BTV NEWS

ប្រធានាធិបតីមីយ៉ាន់ម៉ាបញ្ជាក់ឡើងវិញពីការប្តេជ្ញាចិត្តចំពោះសន្តិសុខរបស់ឥណ្ឌា

ប្រតិបត្តិករនាវា ជំរុញឲ្យមានច្បាប់ច្បាស់វិលត្រឡប់មកកាន់ច្រកសមុទ្រ Hormuz វិញ

កងទ័ពជើងទឹកបារាំងដោយមានការគាំទ្រពីអង់គ្លេស បានស្កាត់ចាប់នាវាដឹកប្រេងរុស្ស៊ី

EU ជំរុញឲ្យអ៊ីស្រាអែលឈប់បង្កើនភាពតានតឹងផ្នែកយោធា នៅលីបង់ និងគាំទ្រកិច្ចប្រឹងប្រែងការទូត

ព័ត៌មានអន្តរជាតិ

ក្រុមបាតុករបានប្រមូលផ្តុំគ្នានៅទូទាំងទ្វីបអឺរ៉ុប ដើម្បីគាំទ្រប្រជាជនអ៊ីរ៉ង់ និងតវ៉ាប្រឆាំងនឹងសង្រ្គាម

កាលពីថ្ងៃសៅរ៍ (៧ មីនា) ប្រជាជនអឺរ៉ុប បានចេញធ្វើបាតុកម្មតាមដងផ្លូវដើម្បីសម្ដែងការគាំទ្ររបស់ពួកគេដល់ប្រជាជនដែលរស់នៅប្រទេសអ៊ីរ៉ង់ និងប្រឆាំងនឹងរបបដឹកនាំបច្ចុប្បន្នរបស់អ៊ីរ៉ង់ ស្របពេលសង្រ្គាមដែលកំពុងរវាងសហរដ្ឋអាមេរិក និងអ៊ីស្រាអែល ប្រឆាំងនឹងរដ្ឋអ៊ិស្លាមមួយនេះ។ អ្នកខ្លះទៀតបានជួបជុំគ្នាដើម្បីគាំទ្រព្រះអង្គម្ចាស់ Reza Pahlavi ដែលជាខ្សែរាជវង្សចុងក្រោយរបស់អ៊ីរ៉ង់ ខណៈអ្នកផ្សេងទៀតបានបង្ហាញការជំទាស់នឹងការវិលត្រឡប់នៃរបបរាជានិយមបែបនោះ។ទង់ជាតិមានរូបតោនៃប្រទេសអ៊ីរ៉ង់សម័យមុនបដិវត្តន៍ ត្រូវបានលើកឡើងនៅតាមបណ្តាទីក្រុងនានាទូទាំងទ្វីបអឺរ៉ុប នៅពេលដែលក្រុមបាតុករបានជួបជុំគ្នា ដើម្បីសម្តែងការគាំទ្រចំពោះប្រជាជនអ៊ីរ៉ង់ ក្នុងអំឡុងពេលសង្រ្គាមដ៏ក្ដៅគគុក។ ក្រុមបាតុករជាច្រើន រួមមាននៅទីក្រុងប៊ែរឡាំង ស្តុកខុម និងប៉ារីស បានបញ្ចេញសំឡេងគាំទ្រដល់ព្រះអង្គម្ចាស់ Pahlavi ដែលលេចឡើងជាជម្រើសថ្មី បន្ទាប់ពីមេដឹកនាំកំពូលអ៊ីរ៉ង់ Ali Khamenei ត្រូវបានសម្លាប់ក្នុងការវាយប្រហាររបស់អ៊ីស្រាអែល និងអាមេរិក។នៅទីក្រុងឡុងដ្រ៍ មនុស្សជាច្រើនបានធ្វើបាតុកម្មប្រឆាំងនឹងសង្រ្គាម ហើយអ្នកខ្លះទៀតបានដើរក្បួនដើម្បីគាំទ្រលោក Khamenei។ យោងតាមនគរបាលក្រុងឡុងដ្រ៍ មនុស្សចន្លោះពី ៥ពាន់ ទៅ ៦ពាន់នាក់ បានចូលរួមក្នុងការដើរក្បួននេះ។ ចំណែកនៅទីក្រុងប៉ារីស មានបាតុកម្មពីរផ្សេងគ្នា៖ មួយគឺគាំទ្របុត្រារបស់អតីតរាជវង្សអ៊ីរ៉ង់អង្គនោះឱ្យដឹកនាំការផ្លាស់ប្តូរអំណាចនៅអ៊ីរ៉ង់ និងបាតុកម្មមួយក្រុមទៀតគឺថ្កោលទោសចំពោះស្ថានភាពបែបនោះ។ប្រធានាធិបតីអាមេរិក លោក Donald Trump បានសន្យាជួយកសាងសេដ្ឋកិច្ចអ៊ីរ៉ង់ឡើងវិញ បើទីក្រុងតេអេរ៉ង់ តែងតាំងនរណាម្នាក់ដែលលោក «អាចទទួលយកបាន» មកជំនួសតំណែងអតីតមេដឹកនាំកំពូលដែលបានស្លាប់ទៅ។ លោក Amir Saeid Iravani ឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិ និយាយថា អាមេរិក នឹងមិនមានតួនាទីណាមួយក្នុងការជ្រើសរើសមេដឹកនាំកំពូលថ្មីឡើយ៕

អ៊ីស្រាអែល ព្រមានលីបង់ពី «ផលវិបាកដ៏មហន្តរាយ» ខណៈចំនួនអ្នកស្លាប់ក្នុងសប្តាហ៍នេះជិតដល់ ៣០០នាក់

កាលពីថ្ងៃសៅរ៍ (៧ មីនា) អ៊ីស្រាអែល បានព្រមានលីបង់ អំពីផលវិបាក «ដ៏មហន្តរាយ» ប្រសិនបើខ្លួនមិនទប់ស្កាត់ក្រុមសកម្មប្រយុទ្ធហេសបូឡា ដែលគាំទ្រដោយអ៊ីរ៉ង់ទេនោះ ខណៈយោធាអ៊ីស្រាអែល បានវាយប្រហារយ៉ាងខ្លាំងក្លាលើបន្ទាយរបស់ក្រុមនេះនៅទូទាំងប្រទេសលីបង់ តាមរយៈការវាយប្រហារតាមអាកាស និងការឆ្មក់វាយប្រហារតាមផ្លូវអាកាសដ៏បង្ហូរឈាមនៅភាគខាងកើត។លីបង់ត្រូវបានអូសទាញឱ្យធ្លាក់ចូលក្នុងសង្រ្គាមមជ្ឈិមបូព៌ាដ៏រីករាលដាលកាលពីថ្ងៃចន្ទដើមសប្ដាហ៍នេះ នៅពេលក្រុមហេសបូឡា បាញ់ប្រហារលើអ៊ីស្រាអែល ដែលនាំឱ្យមានការឆ្លើយតបវិញជាមួយនឹងយុទ្ធនាការយោធាថ្មី ដែលបានសម្លាប់មនុស្សជិត ៣០០ នាក់ គិតមកទល់ចុងសប្ដាហ៍នេះ និងបង្ខំឱ្យប្រជាជនលីបង់រាប់សែននាក់ភៀសខ្លួនចេញពីផ្ទះសម្បែងរបស់ពួកគេ។វីដេអូរបស់ទីភ្នាក់ងារសារព័ត៌មានរ៉យទ័របានបង្ហាញឱ្យឃើញការបំផ្លិចបំផ្លាញនៅជាយភាគខាងត្បូងនៃទីក្រុងបេរូត ដែលជាបន្ទាយរបស់ក្រុមហេសបូឡា ជាទីដែលអគារនានាបានក្លាយជាកម្ទេចថ្ម។ នៅចុងភាគខាងកើតក្នុងទីក្រុង Nabi Chit ការទម្លាក់គ្រាប់បែកយ៉ាងខ្លាំងក្លារបស់អ៊ីស្រាអែល បន្ទាប់ពីការឆ្មក់វាយប្រហារតាមផ្លូវអាកាសដ៏កម្រមួយ បានធ្វើដីបាក់ស្រុតកប់លើរថយន្ត និងធ្វើឱ្យរថយន្តមួយគ្រឿងខ្ទាតទៅលើដំបូលអគារកម្ពស់ពីរជាន់។នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ នៅក្នុងសេចក្តីថ្លែងការណ៍តាមទូរទស្សន៍ បានព្រមានថា៖ «រដ្ឋាភិបាលលីបង់ មានភារកិច្ចអនុវត្តកិច្ចព្រមព្រៀងឆ្នាំ២០២៤ ដើម្បីរំសាយអាវុធក្រុមហេសបូឡា។ ការទទួលខុសត្រូវរបស់លីបង់ គឺត្រូវលុបបំបាត់អាវុធក្រុមហេសបូឡា។ ប្រសិនបើលីបង់មិនធ្វើបែបនេះទេ ការឈ្លានពានរបស់ក្រុមនេះ នឹងបណ្តាលឱ្យមានផលវិបាកដ៏មហន្តរាយសម្រាប់ប្រទេសលីបង់»៕

តុលាការឧទ្ធរណ៍អាមេរិក៖ រដ្ឋបាលមិនអាចបញ្ចប់សិទ្ធិការពារផ្នែកនិរទេសរបស់ជនជាតិហៃទី ៣៥ម៉ឺននាក់បានទេ

សាលាឧទ្ធរណ៍សហរដ្ឋអាមេរិក បានចេញសេចក្ដីសម្រេចមួយ ដែលបដិសេធមិនអនុញ្ញាតឱ្យរដ្ឋបាលលោកប្រធានាធិបតី ដូណាល់ ត្រាំ លុបចោលសិទ្ធិការពារផ្លូវច្បាប់ ដែលអនុញ្ញាតឱ្យជនជាតិហៃទីជាង ៣៥០.០០០ នាក់ រស់នៅ និងធ្វើការក្នុងសហរដ្ឋអាមេរិក ហើយដើម្បីចៀសវាងការនិរទេសត្រឡប់ទៅប្រទេសកំណើតរបស់ពួកគេ ដែលកំពុងរងគ្រោះដោយអំពើហិង្សាក្រុមជនអន្ធពាល។គួរឱ្យដឹងថា រដ្ឋបាលអាមេរិក បានប្ដឹងឧទ្ធរណ៍ ដើម្បីផ្អាកសេចក្តីសម្រេចមួយ ចេញកាលពីថ្ងៃទី២ ខែកុម្ភៈ ដែលបានរារាំងក្រសួងសន្តិសុខមាតុភូមិ មិនឱ្យបញ្ចប់ «ស្ថានភាពការពារបណ្តោះអាសន្ន» (ឬហៅថា TPS) សម្រាប់ប្រទេសហៃទី។ ប៉ុន្តែតុលាការឧទ្ធរណ៍ប្រចាំតំបន់វ៉ាស៊ីនតោន កាលពីយប់ថ្ងៃសុក្រកន្លងទៅ បានច្រានចោលការប៉ុនប៉ងនេះ។ ក្រុមចៅក្រមបានលើកឡើងថា ប្រសិនបើជនជាតិហៃទីត្រូវបាននិរទេសទៅប្រទេសកំណើតវិញ នោះពួកគេនឹង «ងាយរងគ្រោះដោយអំពើហិង្សាក្នុងស្ថានភាពដែលនីតិរដ្ឋកំពុងដួលរលំ និងខ្វះលទ្ធភាពទទួលបានការថែទាំវេជ្ជសាស្ត្រដើម្បីទ្រទ្រង់ជីវិត»។គួរបញ្ជាក់ថា សិទ្ធការពារផ្នែកច្បាប់ TPS នេះ គឺជាកម្មវិធីមនុស្សធម៌មួយដែលការពារជនអន្តោប្រវេសន៍ដែលមានលក្ខណៈសម្បត្តិគ្រប់គ្រាន់ មិនឱ្យរងហានិភ័យនៃការនិរទេស និងអនុញ្ញាតឱ្យពួកគេធ្វើការនៅសហរដ្ឋអាមេរិក។ ក្រសួងសន្តិសុខមាតុភូមិបានឈានទៅបញ្ចប់កម្មវិធី TPS នេះសម្រាប់ប្រទេសចំនួន ១២ ដែលជាផ្នែកមួយនៃការបង្ក្រាបអន្តោប្រវេសន៍របស់លោក ត្រាំ ដោយលើកអំណះអំណាងថា កម្មវិធីនេះមិនដែលបង្កើតឡើងដើម្បីបម្រើជា «ការលើកលែងជាក់ស្តែង» នោះទេ។អ្នកនាំពាក្យក្រសួងសន្តិសុខមាតុភូមិ បាននិយាយក្នុងសេចក្តីថ្លែងការណ៍មួយថា រដ្ឋបាលនឹងបន្តប្តឹងសំណុំរឿងនេះទៅកាន់តុលាការកំពូលសហរដ្ឋអាមេរិក។ អ្នកនាំពាក្យរូបនេះបានបញ្ជាក់ថា៖ «ពាក្យថាបណ្តោះអាសន្ន គឺមានន័យថាបណ្តោះអាសន្ន ហើយការសម្រេចចុងក្រោយនឹងមិនមែនចេញពីចៅក្រមសកម្មជន ដែលបង្កើតច្បាប់ចេញពីកៅអីតុលាការនោះឡើយ»៕

យោធាអ៊ីស្រាអែល ប្ដេជ្ញាតាមកម្ចាត់អ្នកណាក៏ដោយដែលស្នងតំណែងមេដឹកនាំកំពូលបន្ទាប់របស់អ៊ីរ៉ង់

នៅថ្ងៃអាទិត្យ (៨ មីនា) នេះ កងទ័ពអ៊ីស្រាអែលបានព្រមានថា ខ្លួននឹងបន្តតាមកម្ចាត់នូវរាល់អ្នកបន្តវេនទាំងអស់របស់មេដឹកនាំកំពូលអ៊ីរ៉ង់ លោក Ayatollah Ali Khamenei ដែលត្រូវបានសម្លាប់នៅក្នុងការវាយប្រហាររបស់សហរដ្ឋអាមេរិក និងអ៊ីស្រាអែល លើប្រទេសអ៊ីរ៉ង់ កាលពីចុងសប្ដាហ៍មុន។ក្នុងការបង្ហោះលើបណ្តាញសង្គម X ជាភាសាហ្វាស៊ីរបស់អ៊ីរ៉ង់ កងទ័ពអ៊ីស្រាអែលក៏បានព្រមានផងដែរថា ខ្លួននឹងតាមកម្ចាត់រាល់បុគ្គលណាដែលព្យាយាមតែងតាំងអ្នកស្នងតំណែងលោក Khamenei ដោយសំដៅទៅលើស្ថាប័នសាសនាដែលមានភារកិច្ចជ្រើសរើសមេដឹកនាំកំពូលនៃសាធារណរដ្ឋអ៊ិស្លាមមួយនេះ។ គួរឱ្យដឹងថា ការព្រមាននេះបានកើតឡើងភ្លាមៗ បន្ទាប់ពីស្ថាប័នសាសនាមួយនេះ ត្រៀមរៀបចំកិច្ចប្រជុំដើម្បីជ្រើសរើសមេដឹកនាំកំពូលបន្ទាប់របស់អ៊ីរ៉ង់។លោក Mojtaba Khamenei កូនប្រុសទីពីររបស់លោក Khamenei ត្រូវបានរំពឹងទុកថា នឹងបន្តតំណែងពីឪពុករបស់លោក ជាមេដឹកនាំកំពូលថ្មីរបស់អ៊ីរ៉ង់ ដើម្បីដឹកនាំសាធារណរដ្ឋអ៊ិស្លាមមួយនេះ ឆ្លងកាត់ដំណាក់កាលដ៏ច្របូកច្របល់បំផុតក្នុងប្រវត្តិសាស្ត្រ ៤៨ឆ្នាំរបស់ខ្លួន ហើយក៏ជាសញ្ញាដ៏ខ្លាំងក្លាមួយបង្ហាញថា សម្រាប់ពេលនេះ អ៊ីរ៉ង់គ្មានបំណងនឹងផ្លាស់ប្តូរទិសដៅរបបដឹកនាំរបស់ខ្លួនឡើយ។លោក Mojtaba វ័យ ៥៦ឆ្នាំ ដែលបានរួចជីវិតពីសង្គ្រាមផ្លូវអាកាសរវាងអាមេរិក និងអ៊ីស្រាអែល លើអ៊ីរ៉ង់ ត្រូវបានគេជឿថា ជាជម្រើសរបស់កងឆ្មាំបដិវត្តន៍អ៊ិស្លាម (IRGC)។ ប្រភពដែលដឹងពីបញ្ហានេះបានប្រាប់សារព័ត៌មានរ៉យទ័រថា ទំនាក់ទំនងដ៏ជិតស្និទ្ធរបស់លោក Mojtaba ជាមួយកងឆ្មាំបដិវត្តន៍ ផ្តល់ឱ្យលោកនូវឥទ្ធិពលបន្ថែមនៅទូទាំងផ្នែកនយោបាយ និងសន្តិសុខរបស់អ៊ីរ៉ង់៕

ប្រភព៖ អារ៉ាប៊ីសាអ៊ូឌីត បានប្រាប់អ៊ីរ៉ង់ កុំឱ្យវាយប្រហារខ្លួន និងព្រមានពីលទ្ធភាពនៃការសងសឹកវិញ

ប្រភពចំនួន៤ ដែលដឹងពីបញ្ហានេះ បានប្រាប់ទីភ្នាក់ងារសារព័ត៌មានរ៉យទ័រថា អារ៉ាប៊ីសាអូអ៊ូឌីត បានប្រាប់ទៅកាន់ទីក្រុងតេអេរ៉ង់ថា ទោះបីជាខ្លួនចង់បានដំណោះស្រាយតាមផ្លូវការទូតចំពោះជម្លោះរបស់អ៊ីរ៉ង់ ទល់នឹងសហរដ្ឋអាមេរិកក៏ដោយ ក៏ការបន្តវាយប្រហារលើព្រះរាជាណាចក្រមួយនេះ និងវិស័យថាមពលរបស់ខ្លួនពីសំណាក់អ៊ីរ៉ង់ អាចនឹងជំរុញឱ្យទីក្រុងរីយ៉ាដ ឆ្លើយតបវិញតាមរបៀបដូចគ្នា។សារព្រមាននេះត្រូវបានបញ្ជូន នៅមុនការថ្លែងសុន្ទរកថាកាលពីថ្ងៃសៅរ៍ ទី៧ ខែមីនា ដែលក្នុងនោះ ប្រធានាធិបតីអ៊ីរ៉ង់ លោក Masoud Pezeshkian បានសូមអភ័យទោសដល់បណ្តាប្រទេសឈូងសមុទ្រជិតខាង ចំពោះសកម្មភាពរបស់ទីក្រុងតេអេរ៉ង់ ដែលជាការព្យាយាមយ៉ាងច្បាស់ដើម្បីបន្ធូរបន្ថយកំហឹងក្នុងតំបន់ ជុំវិញការវាយប្រហាររបស់អ៊ីរ៉ង់ ដែលបានប៉ះពាល់ដល់គោលដៅស៊ីវិល។ប្រភពបាននិយាយថា រយៈពេលពីរថ្ងៃមុននោះ ពោលគឺនៅថ្ងៃព្រហស្បតិ៍ រដ្ឋមន្ត្រីការបរទេសអារ៉ាប៊ីសាអ៊ូឌីត គឺព្រះអង្គម្ចាស់ Faisal bin Farhan បានពិភាក្សាតាមទូរសព្ទជាមួយរដ្ឋមន្ត្រីការបរទេសអ៊ីរ៉ង់ លោក Abbas Araqchi និងបានបញ្ជាក់ពីគោលជំហររបស់ទីក្រុងរីយ៉ាដ យ៉ាងច្បាស់លាស់។ប្រភពបានដកស្រង់សម្តីរដ្ឋមន្ត្រីទីក្រុងរីយ៉ាដអង្គនេះ ដែលបានលើកឡើងថា អារ៉ាប៊ីសាអ៊ូឌីត បើកចំហចំពោះរាល់ទម្រង់នៃការសម្របសម្រួលក្នុងគោលបំណងកាត់បន្ថយភាពតានតឹង និងការស្វែងរកដំណោះស្រាយតាមរយៈការចរចា ដោយបានសង្កត់ធ្ងន់ថា ទាំងទីក្រុងរីយ៉ាដ និងបណ្តាប្រទេសឈូងសមុទ្រផ្សេងទៀត មិនបានអនុញ្ញាតឱ្យសហរដ្ឋអាមេរិក ប្រើប្រាស់ដែនអាកាស ឬទឹកដីរបស់ពួកគេ ដើម្បីបើកការវាយប្រហារតាមអាកាសលើអ៊ីរ៉ង់ឡើយ។ប្រភពបន្តថា ព្រះអង្គម្ចាស់ Faisal ក៏បានមានបន្ទូលព្រមានផងដែរថា ប្រសិនបើការវាយប្រហាររបស់អ៊ីរ៉ង់ នៅតែបន្តមកលើទឹកដី ឬហេដ្ឋារចនាសម្ព័ន្ធថាមពលរបស់អារ៉ាប៊ីសាអូអ៊ូឌីត នោះអារ៉ាប៊ីសាអ៊ូឌីតនឹងបង្ខំចិត្តអនុញ្ញាតឱ្យកងកម្លាំងសហរដ្ឋអាមេរិក ប្រើប្រាស់មូលដ្ឋានទ័ពរបស់ពួកគេនៅទីនោះសម្រាប់ប្រតិបត្តិការយោធា ហើយថា ទីក្រុងរីយ៉ាដនឹងសងសឹកវិញ ប្រសិនបើការវាយប្រហារលើទីតាំងថាមពលសំខាន់ៗរបស់ព្រះរាជាណាចក្រនេះ នៅតែបន្ត៕

អ៊ីរ៉ង់ ជិតរកឃើញមេដឹកនាំកំពូលថ្មីរបស់ខ្លួនហើយ ដែលប្រហែលជាកូនប្រុសរបស់លោក Khamenei

លោក Ayatollah Mohammadmehdi Mirbaqeri សមាជិកក្រុមប្រឹក្សាអ្នកជំនាញជាន់ខ្ពស់ ដែលមានភារកិច្ចជ្រើសរើសមេដឹកនាំកំពូលបន្ទាប់របស់អ៊ីរ៉ង់ បាននិយាយនៅថ្ងៃអាទិត្យ (៨ មីនា) នេះថា ស្ថាប័នសាសនាមួយនេះ ជិតរកឃើញអ្នកដែលបន្តតំណែងពីលោក Ayatollah Ali Khamenei ដែលត្រូវបានធ្វើឃាតក្នុងការវាយប្រហារកាលពីសប្ដាហ៍មុន និងស្ទើរតែសម្រេចបាននូវការឯកភាពភាគច្រើនហើយ ខណៈបង្ហើបបែបប្រយោលថា មេដឹកនាំកំពូលថ្មីប្រហែលជាកូនប្រុសរបស់លោក Khamenei។ភ្នាក់ងារសារព័ត៌មាន Mehr បានដកស្រង់សម្តីរបស់លោក Mirbaqeri ដែលបានលើកឡើងថា «ឧបសគ្គមួយចំនួន» នៅតែត្រូវការដោះស្រាយ ពាក់ព័ន្ធនឹងដំណើរការនេះ។ កាលពីថ្ងៃសៅរ៍កន្លងទៅ បព្វជិតជាន់ខ្ពស់មួយរូបនៅក្នុងក្រុមប្រឹក្សាអ្នកជំនាញនេះ បាននិយាយថា សមាជិករបស់ខ្លួននឹងជួបប្រជុំគ្នា «ក្នុងរយៈពេលមួយថ្ងៃ» ដើម្បីជ្រើសរើសមេដឹកនាំកំពូលថ្មី។ប្រព័ន្ធផ្សព្វផ្សាយអ៊ីរ៉ង់ និយាយថា ក្រុមនេះមានការខ្វែងគំនិតគ្នាបន្តិចបន្តួចលើបញ្ហាដែលថា តើការសម្រេចចិត្តចុងក្រោយរបស់ពួកគេត្រូវតែធ្វើឡើងតាមរយៈការជួបប្រជុំគ្នាដោយផ្ទាល់ ឬអាចប្រកាសចេញដោយមិនចាំបាច់អនុវត្តតាមទម្រង់ផ្លូវការនេះ។លោក Ayatollah Mohsen Heidari Alekasir ដែលជាសមាជិកម្នាក់ទៀតនៃក្រុមប្រឹក្សានេះ បាននិយាយថា ជំនួបទល់មុខគ្នាដោយក្រុមប្រឹក្សា សម្រាប់ការបោះឆ្នោតចុងក្រោយ គឺមិនអាចធ្វើទៅបានទេក្រោមស្ថានភាពបច្ចុប្បន្ន។ លោកបន្តថា បេក្ខជនមួយរូបត្រូវបានជ្រើសរើសរួចទៅហើយ ដោយផ្អែកលើដំបូន្មានរបស់អតីតមេដឹកនាំកំពូលដែលថា មេដឹកនាំកំពូលរបស់អ៊ីរ៉ង់ គួរតែជាបុគ្គលដែល «សត្រូវស្អប់» មិនមែនជាអ្នកទទួលបានការសរសើរពីសត្រូវនោះឡើយ។ លោក Alekasir បាននិយាយអំពីអ្នកស្នងតំណែងដែលត្រូវបានជ្រើសរើសនោះថា៖ «សូម្បីតែសហរដ្ឋអាមេរិក ក៏បានបញ្ចេញឈ្មោះរបស់បេក្ខភាពមេដឹកនាំកំពូលថ្មីរូបនេះដែរ»។ គួរឱ្យដឹងថា ប៉ុន្មានថ្ងៃមុន លោកប្រធានាធិបតីអាមេរិក ដូណាល់ ត្រាំ បាននិយាយថា កូនប្រុសរបស់លោក Khamenei ឈ្មោះលោក Mojtaba គឺជាជម្រើសមួយដែលលោក «មិនអាចទទួលយកបាន» នោះឡើយ៕

ក្រុមគ្រួសារអ្នកដំណើរលើយន្តហោះ MH370 ដែលបាត់ខ្លួន ១២ឆ្នាំមុន ជំរុញឱ្យម៉ាឡេស៊ី ពង្រីកការស្វែងរក

នៅថ្ងៃអាទិត្យ (៨ មីនា) នេះ ក្រុមគ្រួសារជនរងគ្រោះលើជើងហោះហើរ MH370 របស់ក្រុមហ៊ុនអាកាសចរណ៍ម៉ាឡេស៊ី ជំរុញឱ្យរដ្ឋាភិបាលម៉ាឡេស៊ី បន្តកិច្ចសន្យាដែលខ្លួនបានធ្វើជាមួយក្រុមហ៊ុនរុករកបាតសមុទ្រជ្រៅ Ocean Infinity ដើម្បីបន្តការស្វែងរកយន្តហោះ ដែលបាត់ខ្លួនកាលពី ១២ ឆ្នាំមុន។គួររម្លឹកថា យន្តហោះប្រភេទប៊ូអ៊ីង 777 នេះ បានដឹកអ្នកដំណើរ ២២៧ នាក់ និងបុគ្គលិក ១២ នាក់ ហើយបានបាត់ខ្លួនអំឡុងពេលហោះហើរពីទីក្រុងគូឡាឡាំពួរ ទៅកាន់ទីក្រុងប៉េកាំង កាលពីថ្ងៃទី៨ ខែមីនា ឆ្នាំ២០១៤ ដែលបានក្លាយជាអាថ៌កំបាំងអាកាសចរណ៍ដ៏យូរអង្វែងបំផុតមួយរបស់ពិភពលោក។ ប្រតិបត្តិការស្វែងរកយន្តហោះជាច្រើនលើក ត្រូវបានធ្វើឡើងក្នុងតំបន់ភាគខាងត្បូងនៃមហាសមុទ្រឥណ្ឌា ចាប់តាំងពីពេលនោះមក ប៉ុន្តែការស្វែងរកទាំងអស់សុទ្ធតែមិនទទួលលទ្ធផល។កាលពីខែមីនាឆ្នាំមុន ម៉ាឡេស៊ី បានអនុញ្ញាតឱ្យក្រុមហ៊ុន Ocean Infinity បន្តការស្វែងរកឡើងវិញក្រោមគោលការណ៍ «រកមិនឃើញ មិនយកប្រាក់» ដោយក្រុមហ៊ុននេះ នឹងទទួលបានប្រាក់កម្រៃចំនួន ៧០ លានដុល្លារ ប្រសិនបើរកឃើញបំណែកយន្តហោះដោយជោគជ័យ។ការិយាល័យស៊ើបអង្កេតគ្រោះថ្នាក់ផ្លូវអាកាសរបស់ម៉ាឡេស៊ី (AAIB) បាននិយាយនៅថ្ងៃអាទិត្យនេះថា ប្រតិបត្តិការមិនទាន់ទទួលបានផ្លែផ្កាអ្វីឡើយមកទល់ពេលនេះ បន្ទាប់ពីការស្វែងរកចំនួនពីរដំណាក់កាលមានរយៈពេល ២៨ថ្ងៃ ដែលគ្របដណ្តប់ផ្ទៃបាតសមុទ្រប្រមាណ ៧.៥៧១ គីឡូម៉ែត្រក្រឡា ហើយប្រតិបត្តិការបានរងភាពរអាក់រអួលជាប្រចាំដោយសារអាកាសធាតុ និងស្ថានភាពសមុទ្រ ដោយដំណាក់កាលទីពីរបានបញ្ចប់កាលពីថ្ងៃទី២៣ ខែមករា។ក្រុម Voice370 ដែលជាក្រុមតំណាងឱ្យគ្រួសារអ្នកនៅលើយន្តហោះនោះ បាននិយាយថា ក្រុមហ៊ុន Ocean Infinity ប្រហែលជាមិនបន្តការស្វែងរកឡើងវិញទេ មុនកិច្ចសន្យារបស់ខ្លួនបញ្ចប់នៅខែមិថុនា ខាងមុខនេះ ដោយសារតែរដូវរងាជិតមកដល់នៅអឌ្ឍគោលខាងត្បូង និងស្ថានភាពសមុទ្រកាន់តែអាក្រក់ទៅៗ។ ក្រុមនេះបានជំរុញឱ្យរដ្ឋាភិបាលម៉ាឡេស៊ី យល់ព្រមលើរាល់សំណើសុំបន្តកិច្ចព្រមព្រៀងរបស់ក្រុមហ៊ុន Ocean Infinity ក៏ដូចជាពង្រីកលក្ខខណ្ឌដូចគ្នានេះដល់ក្រុមហ៊ុនរុករកផ្សេងទៀតដែលចាប់អារម្មណ៍លើបេសកកម្មនេះផងដែរ៕

ចិន លើកពីសារៈសំខាន់នៃកិច្ចចរចាជាមួយសហរដ្ឋអាមេរិក មុនជំនួបកំពូលមេដឹកនាំ នៅចុងខែមីនានេះ

ប្រមុខការទូតរបស់ប្រទេសចិន បាននិយាយនៅថ្ងៃអាទិត្យ (៨ មីនា) នេះថា កិច្ចសន្ទនារវាងសហរដ្ឋអាមេរិក និងចិន គឺមានសារៈសំខាន់ណាស់ក្នុងការទប់ស្កាត់ការគណនាខុសណាមួយ ដែលអាចបង្កការខូចខាតដល់ពិភពលោក នៅមុនពេលជំនួបកំពូលដែលគ្រប់មជ្ឈដ្ឋានទន្ទឹងរង់ចាំយ៉ាងខ្លាំងនៅចុងខែមីនានេះ រវាងមេដឹកនាំចិន លោក ស៊ី ជីនពីង និងសមភាគីអាមេរិក លោក ដូណាល់ ត្រាំ។ រដ្ឋមន្ត្រីការបរទេសចិន លោក វ៉ាង យី បានប្រាប់សន្និសីទសារព័ត៌មាននៅទីក្រុងប៉េកាំងថា៖ «ការខកខានក្នុងការប្រាស្រ័យទាក់ទងរវាងប្រទេសទាំងពីរ នឹងនាំឱ្យមានការយល់ច្រឡំ និងការវាយតម្លៃខុស ដែលឈានទៅរកការប្រឈមមុខដាក់គ្នា និងធ្វើឱ្យប៉ះពាល់ដល់ពិភពលោក»។លោក វ៉ាង បន្ថែមថា៖ «របៀបវារៈសម្រាប់ការផ្លាស់ប្តូរមតិកម្រិតខ្ពស់ (ជាមួយសហរដ្ឋអាមេរិក) គឺរួចរាល់ហើយ អ្វីដែលចាំបាច់ គឺភាគីទាំងពីរត្រូវត្រៀមលក្ខណៈឱ្យបានហ្មត់ចត់ ដើម្បីបង្កើតបរិយាកាសអំណោយផលដើម្បីគ្រប់គ្រងការខ្វែងគំនិតគ្នា» ប៉ុន្តែលោកមិនលម្អិតនោះឡើយ។ មន្ត្រីសេតវិមានមួយរូបបានបញ្ជាក់ថា លោក ត្រាំ នឹងទៅទស្សនកិច្ចនៅចិន ចាប់ពីថ្ងៃទី៣១ ខែមីនា ដល់ថ្ងៃទី២ ខែមេសា៕ស្របពេលប្រធានាធិបតីអាមេរិក កំពុងផ្តោតលើសង្រ្គាមដែលលោក និងអ៊ីស្រាអែលបានចាប់ផ្ដើម ប្រឆាំងនឹងអ៊ីរ៉ង់ ក្រុមអ្នកវិភាគកំពុងតាមដានមើលថា តើដំណើរទស្សនកិច្ចរបស់លោក ដើម្បីជួបលោក ស៊ី នឹងប្រព្រឹត្តទៅដែរឬទេ។ ពាក់ព័ន្ធនឹងបញ្ហាអ៊ីរ៉ង់ លោក វ៉ាង បានជំរុញឱ្យបញ្ឈប់ជាបន្ទាន់នូវប្រតិបត្តិការយោធា ដោយលើកឡើងថា សង្រ្គាមនេះមិនគួរកើតឡើងឡើយ ហើយការប្រើប្រាស់កម្លាំងបាយ មិនមែនជាមធ្យោបាយដោះស្រាយបញ្ហានោះទេ៕

បំណាក់ដីវាយប្រហារតំបន់ Ayacucho របស់ប៉េរូ បណ្តាលឲ្យផ្ទះសម្បែងពលរដ្ឋរាប់រងខ្នងរងការខូចខាត

បំណាក់ដី និងទឹកហូរប្រៀបច្រាំងនៅទន្លេ Sanquirhuato បណ្តាលឲ្យមានការខូចខាតធ្ងន់ធ្ងរនៅស្រុក Ayna ស្ថិតក្នុងតំបន់ Ayacucho របស់ប្រទេសប៉េរូ ដោយបានបំផ្លិចបំផ្លាញផ្ទះសម្បែងប្រជាពលរដ្ឋរាប់រយខ្នង និងធ្វើឲ្យអ្នកស្រុកជាច្រើនគ្រួសារ ស្វែងរកទីជម្រក ។វិទ្យាស្ថានជាតិការពារជនស៊ីវិល(INDECI)របស់ប៉េរូ និយាយថា ទឹកជំនន់បានធ្វើឲ្យផ្ទះសម្បែងប្រជាពលរដ្ឋ ២៤៣ខ្នង សាលារៀន ២កន្លែង និងស្ពានមួយកន្លែង រងការខូចខាត ខណៈផ្លូវថ្នល់ មណ្ឌលសុខភាព និងអគារពាណិជ្ជកម្ម រងផលប៉ះពាល់ផងដែរ ។វិទ្យាស្ថាន INDECI និយាយថា រដ្ឋបាលតំបន់ Ayacucho និងអាជ្ញាធរក្នុងស្រុក បានសម្របសម្រួលការចែកចាយជំនួយមនុស្សធម៌រួមទាំងសម្ភារៈប្រក់ដំបូលផ្ទះ ជម្រក ចំណីអាហារ និងសម្ភារៈប្រើប្រាស់ផ្សេងទៀតដល់អ្នករងផលប៉ះពាល់ ។គ្រឿងចក្រធន់ធ្ងន់ រួមទាំងរថយន្តដឹកសំរាម ត្រូវបានបញ្ជូនឲ្យទៅបោសសម្អាត និងស្តាដងផ្លូវឡើងវិញ ក្នុងនោះទាហានប៉េរូ ៥២នាក់ កំពុងជួយនៅតាមតំបន់រស់នៅរបស់អ្នកស្រុក និងតាមផ្លូវជនបទ ដែលបន្តបិទចំពោះការធ្វើចរាចរណ៍ ៕

មនុស្សយ៉ាងហោច ២៣នាក់ស្លាប់ ក្នុងទឹកជំនន់នៅទីក្រុង Nairobi ប្រទេសកេនយ៉ា

ទឹកជំនន់ដ៏គំហក់វាយប្រហារទាំងយប់ទីក្រុង Nairobi ប្រទេសកេនយ៉ា បណ្តាលឲ្យមនុស្សយ៉ាងហោច២៣នាក់ បាត់បង់អាយុជីវិត ស្របពេលដែលក្រុមជួយសង្រ្គោះ និងក្រុមនគរបាលជួយជនរងគ្រោះចេញពីផ្លូវរងការជន់លិច សំណង់អគារបាក់ និងរថយន្តរងការខូចខាត ។រថយន្តនគរបាល បានធ្វើដំណើរឆ្លងកាត់សង្កាត់រងការជន់លិច ដើម្បីស្រង់សាកសពមនុស្សចេញពីកម្ទេចកម្ទីរដែលរាយប៉ាយពាសពេញផ្លូវ ហើយរថយន្តត្រូវបានគេបោះបង់ចោលក្នុងទឹកជំនន់ដែលធ្វើឲ្យប៉ះពាល់ធ្ងន់ធ្ងរដល់សង្កាត់Grogan Road ហើយនិងស្រុកឧស្សាហកម្មជុំវិញ ។រថយន្តត្រូវបានក្រឡាប់ ឬត្រូវទឹកហូរនាំយកទៅ ក្នុងនោះអ្នកស្រុកមួយចំនួនមិនអាចគេចផុតពីទឹកជំនន់បានឡើយ។លោក John Mwai គឺជាអ្នកបើកបររថយន្តក្រុងមួយរូបនៅក្នុងទីក្រុងNairobiនិយាយថា រថយន្តរបស់លោកបានជាប់ក្នុងទឹកជំនន់ក្រោយស្ទះចរាចរណ៍រាប់ម៉ោង ។ លោកថា រូបលោក និងអ្នកដំណើរក្នុងរថយន្តរបស់លោក បានធ្វើការរួមគ្នាដើម្បីទៅដល់ទីសុវត្ថិភាព ដោយផ្តលអាទិភាពមុនគេដល់ស្រ្តី និងកុមារពេលដែលរថយន្តក្រុងរបស់លោកចាប់ផ្តើមទឹកហូរចូល ។យោងតាមការអះអាងរបស់ក្រសួងឧតុនិយមកេនយ៉ាបានឲ្យដឹងថា ភ្លៀងធ្លាក់ខ្លាំងត្រូវបានគេរំពឹងថានឹងបន្តបង្អុរចុះរហូតដល់យប់ថ្ងៃចន្ទដើមសប្តាហ៍ក្រោយ ៕

បណ្ដាញសង្គម

ព័ត៌មានថ្មីៗ

មន្ត្រី៖ ក្រុមហាម៉ាសនឹងធ្វើកិច្ចពិភាក្សាជាមួយអន្តរការីតំបន់ហ្កាហ្សា នៅអេហ្ស៊ីប

កម្អែហូរចេញពីមាត់ភ្នំភ្លើង Kilauea របស់រដ្ឋហាវ៉ៃ ខណៈការកម្រើកត្រូវបានគេរំពឹងថានឹងកើនឡើង

កិច្ចព្រមព្រៀងពាណិជ្ជកម្មឥណ្ឌា-អាមេរិក ឆ្លុះបញ្ចាំងពីការផ្លាស់ប្តូរពន្ធរបស់ទីក្រុងវ៉ាស៊ីនតោន

អ៊ីស្រាអែល៖ «គ្មានភាពស្ងប់ស្ងាត់ នៅទីក្រុងបេរូត» ទេ បើក្រុមហេសបូឡាមិនបញ្ឈប់ការវាយប្រហារ

វិមានក្រឹមឡាំង៖ អាជ្ញាធរកំពុងធ្វើការដោះស្រាយបញ្ហាបែងចែកប្រេងនៅតំបន់គ្រីមៀ

ពលរដ្ឋជម្លៀសខ្លួនចេញពីតំបន់ជាយក្រុងភាគខាងត្បូងទីក្រុងបេរូត ក្រោយលោក Netanyahu បញ្ជាឲ្យវាយប្រហារក្រុមហេសបូឡា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877