BTV NEWS

ពលរដ្ឋអ៊ុយក្រែន ប្រារព្ធបុណ្យណូអែល លើកទីបួនក្នុងសម័យសង្គ្រាម ដោយសង្ឃឹមចង់បានសន្តិភាព

អ្នកស្រុកហ្កាហ្សា ប្រារព្ធថ្ងៃបុណ្យណូអែល នៅក្រោមសំឡេងគ្រាប់បែក និងយានដ្រូនរបស់អ៊ីស្រាអែល

ភ្លៀងធ្លាក់ខ្លាំងនៅរដ្ឋកាលីហ្វ័រនីញ៉ា សហរដ្ឋអាមេរិក បានសម្លាប់មនុស្ស៣នាក់គិតត្រឹមយប់បុណ្យណូអែល

អ៊ីរ៉ង់ ព្រមានថាសង្គ្រាមបន្ទាប់ជាមួយអ៊ីស្រាអែល នឹងមិនបញ្ចប់ក្នុងរយៈពេល១២ថ្ងៃនោះទេ

ព័ត៌មានអន្តរជាតិ

ស៊ីរីនិយាយថា ចាប់បានក្រុមដែលមានទំនាក់ទំនងជាមួយក្រុមរដ្ឋអ៊ីស្លាម Daesh នៅពីក្រោយការវាយប្រហារនៅភាគពាយ័ព្យ

រដ្ឋាភិបាលស៊ីរីកាលពីថ្ងៃអង្គារបាននិយាយថា កងកម្លាំងរបស់ខ្លួន បានសម្លាប់មេដឹកនាំក្រុមមួយ ដែលមានទំនាក់ទំនងជាមួយក្រុមរដ្ឋអ៊ីស្លាម Daesh និងបានចាប់ខ្លួនសមាជិករបស់ខ្លួនចំនួន ៨នាក់ ដែលត្រូវបានគេជឿថា នៅពីក្រោយការវាយប្រហារដ៏សាហាវមួយលើបុគ្គលិកសន្តិសុខ កាលពីសប្តាហ៍មុន។ក្រុម Daesh បានអះអាងទទួលខុសត្រូវចំពោះការបាញ់ប្រហារកាលពីថ្ងៃអាទិត្យ ដែលអាជ្ញាធរបាននិយាយថា បានសម្លាប់បុគ្គលិកសន្តិសុខស៊ីរីចំនួន ៤នាក់ ដែលកំពុងល្បាតនៅលើផ្លូវ Maaret Al-Numan ក្នុងខេត្ត Idlib ភាគពាយ័ព្យ។សេចក្តីថ្លែងការណ៍របស់ក្រសួងមហាផ្ទៃបានបញ្ជាក់ថា កងកម្លាំងសន្តិសុខ «បានចាប់ខ្លួនក្រុមភេរវករ ដែលមានទំនាក់ទំនងជាមួយក្រុម Daesh» ដែលបានធ្វើការវាយប្រហារ «ដែលបានកំណត់គោលដៅទៅមលើការល្បាតសន្តិសុខ និងយោធា នៅក្នុងខេត្ត Idlib និង Aleppo»។សេចក្តីថ្លែងការណ៍ បានបន្ថែមថា៖«ប្រតិបត្តិការនេះ បានបណ្តាលឲ្យមានការចាប់ខ្លួនសមាជិក ៨នាក់នៃក្រុមនេះ ហើយសមាជិកទី ៩ ដែលជាមេដឹកនាំក្រុម ត្រូវបានសម្លាប់»៕

អេហ្ស៊ីបសម្របសម្រួលជាមួយក្រិក ដើម្បីបញ្ជូនជនរងគ្រោះនៃទូកអន្តោប្រវេសន៍មកវិញ និងព្រមានប្រឆាំងនឹងផ្លូវមិនប្រក្រតី

សារព័ត៌មាន Ahram Online បានរាយការណ៍កាលពីថ្ងៃអង្គារថា រដ្ឋមន្ត្រីការបរទេសអេហ្ស៊ីប លោក Badr Abdelatty បានណែនាំស្ថានទូតអេហ្ស៊ីបប្រចាំទីក្រុង Athens ឲ្យបង្កើនការសម្របសម្រួលជាមួយអាជ្ញាធរក្រិក។ ក្រសួងបាននិយាយថា ជនជាតិអេហ្ស៊ីបចំនួន ១៤ នាក់ ស្ថិតក្នុងចំណោមជនអន្តោប្រវេសន៍ចំនួន ៣៤ នាក់ ដែលបានស្លាប់នៅពេលដែលទូកលិចនៅតាមផ្លូវទៅកាន់ប្រទេសក្រិក កាលពីថ្ងៃទី ០៧ ខែធ្នូ។ការសម្រេចនេះ មានគោលបំណងគាំទ្រដល់អ្នករស់រានមានជីវិត និងពន្លឿនការបញ្ជូនសាកសពជនរងគ្រោះត្រឡប់មកប្រទេសវិញ នៅពេលដែលនីតិវិធីផ្លូវច្បាប់ ត្រូវបានបញ្ចប់។ក្រសួងបានបន្ថែមថា ស្ថានទូតបានទាក់ទងជាមួយក្រុមគ្រួសារអ្នកស្លាប់ ដើម្បីរៀបចំការបញ្ជូនសាកសពត្រឡប់ទៅផ្ទះវិញ។ដោយសម្តែងការចូលរួមរំលែកទុក្ខដល់ក្រុមគ្រួសារជនរងគ្រោះ ក្រសួងបានបន្តការព្រមានរបស់ខ្លួនដល់ប្រជាពលរដ្ឋអំពីហានិភ័យនៃការធ្វើទេសន្តរប្រវេសន៍មិនប្រក្រតី ដោយជំរុញឲ្យជនជាតិអេហ្ស៊ីបការពារជីវិតរបស់ពួកគេ ដោយប្រើប្រាស់បណ្តាញធ្វើដំណើរស្របច្បាប់ និងមានបទប្បញ្ញត្តិត្រឹមត្រូវ៕

ហ្វីលីពីន៖ គ្មានភស្តុតាងពី «ការបណ្តុះបណ្តាលភេរវករ» ក្រោយខ្មាន់កាំភ្លើង នៅឆ្នេរ Bondi របស់អូស្ត្រាលី ធា្លប់ចូលទៅកាន់ប្រទេស

ប្រទេសហ្វីលីពីន នៅថ្ងៃពុធ (ទី១៧ ខែធ្នូ) នេះ បានប្រាប់ឲ្យដឹងថា មិនមានភស្តុតាងណាមួយ ដែលបង្ហាញថា ទឹកដីរបស់ខ្លួនត្រូវបានគេប្រើប្រាស់ ដើម្បីបណ្តុះបណ្តាលភេរវករនោះឡើយ ដោយការលើកឡើងនេះកើតមានមួយថ្ងៃបន្ទាប់ពីប្រទេសនេះ ត្រូវបានគេបង្ហាញថា បុរសដែលនៅពីក្រោយការបាញ់ប្រហារបណ្ដាលឲ្យមនុស្សជាច្រើននាក់ស្លាប់ នៅឆ្នេរ Bondi របស់ប្រទេសអូស្ត្រាលី បានចំណាយពេលវេលា ក្នុងខែវិច្ឆិកា នៅលើកោះភាគខាងត្បូងដែលត្រូវបានដឹងថា ជាតំបន់របស់ក្រុមបះបោរជ្រុលនិយម។អ្នកនាំពាក្យប្រធានាធិបតី លោកស្រី Claire Castro បាននិយាយនៅក្នុងសន្និសីទសារព័ត៌មានមួយថា៖ «លោកប្រធានាធិបតី Ferdinand Marcos ច្រានចោលយ៉ាងដាច់អហង្ការ ចំពោះសេចក្តីថ្លែងការណ៍ដ៏ទូលំទូលាយ និងការធ្វើឲ្យមានការយល់ច្រឡំថា ហ្វីលីពីនជាកន្លែងបណ្តុះបណ្តាលសមាជិករបស់ក្រុម ISIS (រដ្ឋឥស្លាម)»។ដោយបានអានពីសេចក្តីថ្លែងការណ៍របស់ក្រុមប្រឹក្សាសន្តិសុខជាតិ លោកស្រីបានឲ្យដឹងបន្ថែមថា៖ «គ្មានភស្តុតាងណាមួយត្រូវបានបង្ហាញឡើយ ដើម្បីគាំទ្រការអះអាង ដែលថា ប្រទេសនេះត្រូវបានគេប្រើប្រាស់ ដើម្បីបណ្តុះបណ្តាលភេរវករ។ មិនមានរបាយការណ៍ត្រឹមត្រូវ ឬការបញ្ជាក់ណាមួយឡើយ ដែលថា បុគ្គលដែលពាក់ព័ន្ធនឹងឧបទ្ទវហេតុ នៅ Bondi Beach (ឆ្នេរ Bondi) បានទទួលនូវទម្រង់ណាមួយនៃការបណ្តុះបណ្តាល នៅក្នុងប្រទេសហ្វីលីពីន»។គួរបញ្ជាក់ថា កាលពីថ្ងៃអង្គារ ការិយាល័យអន្តោប្រវេសន៍របស់ប្រទេស បានបញ្ជាក់ថា លោក Sajid Akram និងកូនប្រុសរបស់លោកឈ្មោះ Naveed ដែលបានសម្លាប់មនុស្ស ១៥នាក់ និងរាប់សិបនាក់ផ្សេងទៀតរងរបួស ក្នុងព្រឹត្តិការណ៍នៃពិធីបុណ្យ Hanukkah នៅលើឆ្នេរ Bondi របស់ទីក្រុងស៊ីដនី បានចូលទៅកាន់ប្រទេសអាស៊ីអាគ្នេយ៍មួយនេះ កាលពីថ្ងៃទី១ ខែវិច្ឆិកា ឆ្ពោះទៅខេត្ត Davao ភាគខាងត្បូង៕

អតីតអ្នកជំនាញUN ព្រមានប្រឆាំងនឹងការដាក់ពង្រាយកម្លាំងអឺរ៉ុប ទៅកាន់អ៊ុយក្រែន

លោក Alfred de Zayas មេធាវីអាមេរិក និងជាអតីតអ្នកជំនាញនៃក្រុមប្រឹក្សាសិទ្ធិមនុស្សអង្គការសហប្រជាជាតិ បានព្រមានប្រឆាំងនឹងការដាក់ពង្រាយកម្លាំងពហុជាតិអឺរ៉ុប ទៅកាន់អ៊ុយក្រែន ព្រោះវានឹងធ្វើឲ្យជម្លោះកាន់តែធ្ងន់ធ្ងរឡើង និងបន្ថែមហានិភ័យនៃការប្រឈមមុខដាក់គ្នាដោយនុយក្លេអ៊ែរ។លោកបានសរសេរនៅលើទំព័រ X របស់ខ្លួនថា៖«កងទ័ពជើងគោករបស់អង្គការណាតូ នឹងធ្វើឲ្យកើនឡើងភាពតានតឹងកា្លយជាសង្គ្រាម។ វានឹងមិននាំមកនូវសន្តិសុខដល់អ៊ុយក្រែនទេ ប៉ុន្តែមានតែសង្គ្រាមកាន់តែខ្លាំងឡើង និងគ្រោះថ្នាក់កាន់តែខ្ពស់នៃការប្រឈមមុខដាក់គ្នាដោយនុយក្លេអ៊ែរ។ ចំណែកនាយករដ្ឋមន្ត្រីចក្រភពអង់គ្លេសលោក Keir Starmer, [ប្រធានាធិបតីបារាំងលោក អេម៉ានុយអែល ម៉ាក្រុង ( Emmanuel] Macron), អធិការបតីអាល្លឺម៉ង់ លោក Friedrich Merz និង វ្ល៉ូឌីមី ហ្សេឡិនស្គី រស់នៅក្នុងពិភពស្រមើស្រមៃរបស់ពួកគេ»។ ក្រុមមេដឹកនាំនៃប្រទេសសហភាពអឺរ៉ុបបានចេញសេចក្តីថ្លែងការណ៍រួមមួយ បន្ទាប់ពីការចរចារបស់ពួកគេនៅទីក្រុងប៊ែរឡាំងកាលពីថ្ងៃចន្ទ។ យោងតាមឯកសារនេះ ពួកគេចង់ឲ្យការធានាសន្តិសុខសម្រាប់ទីក្រុងគីវ រួមទាំងការបង្កើត «កម្លាំងពហុជាតិនៅអ៊ុយក្រែនដែលដឹកនាំដោយអឺរ៉ុប ដែលបង្កើតឡើងដោយការចូលរួមវិភាគទានពីប្រទេសដែលមានឆន្ទៈ»។ សេចក្តីថ្លែងការណ៍នេះ បង្ហាញថា កងកម្លាំងទាំងនេះ នឹងជួយ «ក្នុងការស្តារឡើងវិញនូវកងកម្លាំងអ៊ុយក្រែន ក្នុងការធានាសុវត្ថិភាពដែនអាកាសរបស់អ៊ុយក្រែន និងក្នុងការគាំទ្រដល់សមុទ្រដែលមានសុវត្ថិភាពជាងមុន រួមទាំងតាមរយៈប្រតិបត្តិការនៅក្នុងប្រទេសអ៊ុយក្រែនផងដែរ»៕

លោក LAVROV និងរដ្ឋមន្ត្រីការបរទេសអ៊ីរ៉ង់ នឹងពិភាក្សាអំពីសន្តិសុខក្នុងតំបន់ និងកម្មវិធីនុយក្លេអ៊ែររបស់អ៊ីរ៉ង់

រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ ( Sergey Lavrov) នឹងធ្វើកិច្ចចរចានៅទីក្រុងមូស្គូ នៅថ្ងៃពុធនេះ ជាមួយសមភាគីអ៊ីរ៉ង់ លោក Abbas Araghchi។ ភាគីនានានឹងពិភាក្សាអំពីបញ្ហាប្រឈមសន្តិសុខនៅក្នុងតំបន់សមុទ្រកាព្យែន ( Caspian) និងការរំពឹងទុកសម្រាប់កម្មវិធីនុយក្លេអ៊ែររបស់អ៊ីរ៉ង់ និងបញ្ហាអន្តរជាតិផ្សេងទៀត។បញ្ហាសន្តិសុខក្នុងតំបន់ត្រូវបានគេរំពឹងថា នឹងស្ថិតក្នុងចំណោមប្រធានបទសំខាន់ៗនៃកិច្ចប្រជុំរដ្ឋមន្ត្រី។ ដូចដែលលោក ឡារ៉ូវ បានសង្កត់ធ្ងន់នៅក្នុងបទសម្ភាសន៍មួយ មុនពេលដំណើរទស្សនកិច្ចរបស់លោក Araghchi ភាគីរុស្ស៊ីកំពុងកត់សម្គាល់ពីផែនការបំផ្លិចបំផ្លាញរបស់លោកខាងលិច ដើម្បី «បំបែកប្រទេសដែលព្រំដែនជាប់សមុទ្រកាព្យែនចំនួន ៥ » គឺ(រុស្ស៊ី អ៊ីរ៉ង់ អាស៊ែរបៃហ្សង់ កាហ្សាក់ស្ថាន និងតួកម៉េនីស្ថាន) និងដាក់ចេញនូវការសម្រេចចិត្តផ្ទាល់ខ្លួន នៅក្នុងតំបន់នេះ។លោក Araghchi ក៏ត្រូវបានគេរំពឹងថា នឹងយកចិត្តទុកដាក់ជាពិសេសចំពោះបញ្ហាកម្មវិធីនុយក្លេអ៊ែររបស់សាធារណរដ្ឋឥស្លាម។ លោក ឡាវរ៉ូវ បានបញ្ជាក់ថា ទីក្រុងមូស្គូបានគាំទ្រទីក្រុងតេអេរ៉ង់យ៉ាងជាប់លាប់ក្នុងការចរចាលើផែនការសកម្មភាពគ្រប់ជ្រុងជ្រោយរួម (JCPOA) លើកម្មវិធីនុយក្លេអ៊ែររបស់អ៊ីរ៉ង់។ ចំណែកប្រធានាធិបតីអាមេរិក លោក ដូណាល់ ត្រាំ (Donald Trump) និងគំនិតផ្តួចផ្តើមសន្តិភាពរបស់លោកទាក់ទងនឹងអ៊ុយក្រែន និងតំបន់ហ្កាហ្សាស្ទ្រីប ក៏នឹងស្ថិតនៅក្នុងរបៀបវារៈនៃកិច្ចពិភាក្សាផងដែរ៕

ប្រធានាធិបតីបេឡារុសអំពាវនាវឲ្យចាត់វិធានការរហ័ស លើសង្រ្គាមអ៊ុយក្រែន ខណៈអាមេរិកចូលរួមយ៉ាងសកម្ម

នៅក្នុងបទសម្ភាសន៍មួយដែលត្រូវបានផ្សព្វផ្សាយជាសាធារណៈផ្នែកខ្លះ កាលពីថ្ងៃអង្គារ (ទី១៦ ខែធ្នូ) ប្រធានាធិបតីបេឡារុស លោក Alexander Lukashenko បានអំពាវនាវឲ្យចាត់វិធានការយ៉ាងឆាប់រហ័ស ដើម្បីបញ្ចប់ជម្លោះ នៅអ៊ុយក្រែន ខណៈដែលសហរដ្ឋអាមេរិកនៅតែចូលរួមក្នុងកិច្ចខិតខំប្រឹងប្រែងការទូតយ៉ាងសកម្ម។លោក Lukashenko គឺជាសម្ព័ន្ធមិត្តរបស់ប្រធានាធិបតីរុស្ស៊ី លោក Vladimir Putin ហើយបានអនុញ្ញាតឲ្យយកទឹកដីរបស់ប្រទេសបេឡារុសប្រើប្រាស់ សម្រាប់ការលុកលុយរបស់ទីក្រុងមូស្គូ លើអ៊ុយក្រែន ក្នុងឆ្នាំ២០២២។លោកបាននិយាយថា ប្រធានាធិបតីអាមេរិក លោក Donald Trump កំពុងធ្វើរឿងដ៏ត្រឹមត្រូវ ក្នុងការជំរុញឲ្យមានដំណោះស្រាយយ៉ាងឆាប់រហ័ស ដោយបានបន្ថែមថា ប្រសិនបើគោលនយោបាយរបស់លោក មានតាំងពីដើមដំបូងមកនោះ ជម្លោះប្រហែលជាមិនកើតឡើងឡើយ។តាមរយៈសម្រង់សម្ដីនៃបទសម្ភាសនេះ ដែលត្រូវបានបង្ហោះដោយទីភ្នាក់ងារព័ត៌មានរដ្ឋបេឡារុស BelTA លោក Lukashenko បានប្រាប់ទូរទស្សន៍អាមេរិក Newsmax ថា៖ «អ្វីៗជាច្រើននាពេលនេះ អាស្រ័យលើជំហររបស់លោក Trump និងសហរដ្ឋអាមេរិក។ ហើយរឿងដែលសំខាន់នោះ គឺថា លោក Trump មិនងាកចេញពីគោលជំហររបស់លោក»។ លោកបានសង្កត់ធ្ងន់ថា៖ «ការបរាជ័យ ក្នុងការបញ្ឈប់សង្រ្គាមនេះ អាចធ្វើឲ្យមានបញ្ហាធ្ងន់ធ្ងរ ទាំងសម្រាប់អឺរ៉ុប និងពិភពលោកទាំងមូល។ វាទំនងរាលដាលទៅជាប្រភេទខ្លះនៃជម្លោះពិភពលោក»។គួរបញ្ជាក់ថា លោក Trump បានដឹកនាំកិច្ចប្រឹងប្រែង ដើម្បីស្វែងរកដំណោះស្រាយបញ្ចប់ជម្លោះ ហើយសំណើសន្តិភាពដំបូងរបស់សហរដ្ឋអាមេរិក ដែលបានមេដឹកនាំជាច្រើននៅអឺរ៉ុបរិះគន់ថា ផ្ដល់ភាពចំណេញដល់រុស្ស៊ីនោះ ត្រូវបានកែសម្រួល។ មន្ត្រីអាមេរិក និងអ៊ុយក្រែន បានធ្វើការពិគ្រោះយោបល់លើសំណើកិច្ចព្រមព្រៀងនេះ រួមជាមួយមន្ត្រីអឺរ៉ុប ក្នុងនោះរួមមានទាំងការពិភាក្សារយៈពេល ២ថ្ងៃ នៅទីក្រុងប៊ែរឡាំង ប្រទេសអាល្លឺម៉ង់ ក្នុងសប្តាហ៍នេះផងដែរ៕

អាល្លឺម៉ង់ដកប្រព័ន្ធការពារដែនអាកាស Patriot និងបុគ្គលិកយោធា ចេញពីប្រទេសប៉ូឡូញ

ក្រសួងការពារជាតិអាល្លឺម៉ង់ បានចេញសេចក្តីប្រកាសព័ត៌មានមួយ ដោយប្រកាសពីការដកប្រព័ន្ធមីស៊ីលការពារដែនអាកាស Patriot របស់ខ្លួនចេញពីប្រទេសប៉ូឡូញ និងការវិលត្រឡប់របស់បុគ្គលិកយោធា (កងកម្លាំងប្រដាប់អាវុធអាល្លឺម៉ង់) ដែលឈរជើងនៅទីនោះ។ក្រសួងការពារជាតិអាល្លឺម៉ង់បានកត់សម្គាល់ថា កងកម្លាំងប្រដាប់អាវុធអាល្លឺម៉ង់ កំពុងដកប្រព័ន្ធការពារដែនអាកាស Patriot ដែលដាក់ពង្រាយនៅប្រទេសប៉ូឡូញ ដែលមានបំណងការពារដែនអាកាសណាតូ និងមជ្ឈមណ្ឌលដឹកជញ្ជូននៅក្នុងទីក្រុង Rzeszow ជិតព្រំដែនជាមួយអ៊ុយក្រែន។ ក្រសួងបានសង្កត់ធ្ងន់ថា៖« បន្ទាប់ពីការប្រគល់ទីបញ្ជាការបេសកកម្មទៅឲ្យដៃគូហូឡង់របស់យើងដោយរលូននៅដើមខែធ្នូ បុគ្គលិកយោធាចុងក្រោយ បានវិលត្រឡប់ទៅមូលដ្ឋានរបស់ពួកគេវិញ នៅថ្ងៃអង្គារ (ទី ១៦ ខែធ្នូ)»។នៅចុងខែមករា ប្រទេសអាល្លឺម៉ង់បានដាក់ពង្រាយប្រព័ន្ធការពារដែនអាកាស Patriot ចំនួនពីរ និងបុគ្គលិកយោធាចំនួន ២០០ នាក់ ទៅកាន់អាកាសយានដ្ឋាន Rzeszow នៅតាមព្រំដែនជាមួយអ៊ុយក្រែនសម្រាប់រយៈពេល ៦ ខែ។ នៅដើមខែឧសភា នាយករដ្ឋមន្ត្រីប៉ូឡូញលោក Donald Tusk បានស្នើសុំឲ្យអធិការបតីអាល្លឺម៉ង់លោក Friedrich Merz ពង្រីកការដាក់ពង្រាយប្រព័ន្ធការពារដែនអាកាស Patriot នៅតាមព្រំដែនជាមួយអ៊ុយក្រែន រហូតដល់ចុងឆ្នាំ។ ដូច្នេះ ប្រព័ន្ធការពារដែនអាកាស និងបុគ្គលិកយោធារបស់អាល្លឺម៉ង់ ត្រូវបានដាក់ពង្រាយនៅប្រទេសប៉ូឡូញ រហូតដល់ខែធ្នូ ដោយផ្នែកមួយនៃបេសកកម្មរបស់ពួកគេ គឺធានាការផ្គត់ផ្គង់ដល់យោធាអ៊ុយក្រែន៕

លោក Trump នឹងពោលសរសើរពីសមិទ្ធិផល «ជាប្រវត្តិសាស្ត្រ» នៅក្នុងសុន្ទរកថាចុងឆ្នាំ

ប្រធានាធិបតីអាមេរិក លោក Donald Trump នឹងថ្លែងសុន្ទរកថាតាមទូរទស្សន៍ទៅកាន់ប្រជាជាតិ នៅថ្ងៃពុធ (ទី១៧ ខែធ្នូ) នេះ ស្តីពី «ឆ្នាំដ៏អស្ចារ្យ» ចាប់តាំងពីលោកបានវិលត្រឡប់ទៅកាន់អំណាចវិញ ខណៈដែលអ្នកបោះឆ្នោតបង្ហាញការមិនសប្បាយចិត្តកាន់តែខ្លាំងឡើងៗ ចំពោះបញ្ហាសេដ្ឋកិច្ច។ជាមួយគ្នានេះ លោក Trump ក៏ត្រូវបានគេរំពឹងផងដែរថា នឹងបង្ហើបខ្លះៗពីគោលនយោបាយ សម្រាប់ឆ្នាំ២០២៦ ខណៈដែលគណបក្សសាធារណរដ្ឋ មើលទៅការបោះឆ្នោតពាក់កណ្តាលអាណត្តិទាំងអារម្មណ៍មិនស្ងប់ ដោយសារអ្នកបោះឆ្នោតកាន់តែខឹងសម្បាខ្លាំងឡើង ចំពោះតម្លៃនៃការរស់នៅ។នៅលើបណ្តាញសង្គម Truth Social របស់លោក កាលពីថ្ងៃអង្គារ (ទី១៦ ខែធ្នូ) លោក Trump បានឲ្យដឹងថា៖ «បងប្អូនជនជាតិអាមេរិករបស់ខ្ញុំ។ ខ្ញុំនឹងផ្តល់សុន្ទរកថាទៅកាន់ប្រជាជាតិ នៅយប់ថ្ងៃស្អែក ដោយផ្សាយពីសេតវិមាន នៅវេលាម៉ោង ៩យប់ (ម៉ោងក្នុងស្រុក)។ ខ្ញុំទន្ទឹងរង់ចាំជួបអ្នកយ៉ាងអន្ទះសារ នៅពេលនោះ។ វាគឺជាឆ្នាំដ៏អស្ចារ្យ សម្រាប់ប្រទេសរបស់យើង តែអ្វីដែលល្អបំផុត គឺមិនទាន់កើតឡើងនៅឡើយទេ!»។អ្នកនាំពាក្យសេតវិមាន លោកស្រី Karoline Leavitt បានប្រាប់ឲ្យដឹងថា សុន្ទរកថានេះ នឹងផ្តោតលើការទម្លាក់អតិផរណា ដែលលោក Trump ដាក់ការទទួលខុសត្រូវទៅលើអ្នកកាន់តំណែងមុនរបស់គណបក្សប្រជាធិបតេយ្យ គឺលោក Joe Biden ហើយនិងការដោះស្រាយបញ្ហាអន្តោប្រវេសន៍៕

អនុរដ្ឋមន្ត្រីការបរទេស៖យុទ្ធសាស្ត្រសន្តិសុខជាតិរបស់អាមេរិកមានបំណងជួយអឺរ៉ុបឲ្យដើរលើផ្លូវត្រូវវិញ

អនុរដ្ឋមន្ត្រីការបរទេសទទួលបន្ទុកកិច្ចការសេដ្ឋកិច្ច លោក Jacob Helberg បាននិយាយថា យុទ្ធសាស្ត្រសន្តិសុខជាតិដែលទើបចេញផ្សាយថ្មីៗនេះរបស់រដ្ឋបាលលោក ដូណាល់ ត្រាំ មិនមែនមានបំណងជាការរិះគន់ទទេៗចំពោះអឺរ៉ុបនោះទេ ប៉ុន្តែត្រូវបានរចនាឡើង ដើម្បីជួយដឹកនាំទ្វីបនេះឲ្យដើរលើផ្លូវត្រូវវិញ។ លោកបានថ្លែងនៅក្នុងបទសម្ភាសន៍ជាមួយសារព័ត៌មាន Bloomberg ថា៖«យុទ្ធសាស្ត្រសន្តិសុខជាតិរបស់លោកប្រធានាធិបតី មិនមែនជាការប្រមាថទេ វាត្រូវបានបង្កើតឡើង ដើម្បីវិភាគស្ថានការណ៍នយោបាយសម្រាប់ទ្វីបអឺរ៉ុប។ «ប្រធានាធិបតីអាមេរិកលោក ដូណាល់ ត្រាំ បានបង្ហាញយ៉ាងច្បាស់ និងសាមញ្ញថា មានចំណុចរបត់មួយដែលអឺរ៉ុបកំពុងប្រឈម។ អឺរ៉ុបអាចជ្រើសរើសការធ្លាក់ចុះដែលមានការគ្រប់គ្រងបាន ប្រព័ន្ធរដ្ឋបាលជាប់គាំង ឬទី្វបនេះអាចជ្រើសរើសការស្តារឡើងវិញ ធានាសុវត្ថិភាពព្រំដែន ភាពសម្បូរបែបនៃថាមពល និងពាណិជ្ជកម្មប្រកបដោយយុត្តិធម៌ និងការកាត់បន្ថយរបាំងពាណិជ្ជកម្មទៅវិញទៅមក»។ឯកសារដែលបានចេញផ្សាយនៅថ្ងៃទី ០៥ ខែធ្នូ បង្ហាញពីការព្រួយបារម្ភថា អឺរ៉ុបនឹងក្លាយទៅជាមិនអាចទទួលស្គាល់បានក្នុងរយៈពេល ២០ ឆ្នាំ ហើយកំពុងជិតៃឈានដល់ការបំផ្លិចបំផ្លាញជាអរិយធម៌មួយ ដោយសារតែគោលនយោបាយបំផ្លិចបំផ្លាញរបស់សហភាពអឺរ៉ុប និងរចនាសម្ព័ន្ធអន្តរជាតិផ្សេងទៀត។ រដ្ឋបាលរបស់សហរដ្ឋអាមេរិក បានបង្ហាញការសង្ស័យថា ប្រទេសអឺរ៉ុបមួយចំនួន នឹងមានសក្តានុពលសេដ្ឋកិច្ច និងយោធាសមស្រប ដើម្បីនៅជាសម្ព័ន្ធមិត្តដែលអាចទុកចិត្តបានរបស់ទីក្រុងវ៉ាស៊ីនតោន។នាពេលថ្មីៗនេះ លោក ត្រាំ បានរិះគន់អឺរ៉ុបម្តងហើយម្តងទៀត។ ជាទូទៅ ដូចដែលលោកបានថ្លែងនៅក្នុងបទសម្ភាសន៍ជាមួយសារព័ត៌មាន Politico លោកចូលចិត្តសមាសភាពបច្ចុប្បន្ននៃអ្នកនយោបាយឈានមុខគេ នៅក្នុងបណ្តាប្រទេសនៅអឺរ៉ុប។ ទោះជាយ៉ាងណាក៏ដោយ យោងតាមមេដឹកនាំអាមេរិករូបនេះ ពួកគេមិនធ្វើការងាររបស់ពួកគេបានល្អទេ។ លោកបានបង្ហាញថា នាពេលអនាគត លោកនឹងគាំទ្រអ្នកនយោបាយអឺរ៉ុបដែលលោកចាត់ទុកថាស័ក្តិសមជាង។ លោក ត្រាំ ក៏បានរិះគន់គោលនយោបាយអន្តោប្រវេសន៍របស់អឺរ៉ុបផងដែរ ដែលនឹងធ្វើឲ្យពួកគេជាច្រើនក្លាយជារដ្ឋដែលមិនអាចរស់នៅបាន នាពេលអនាគត៕

បណ្តាប្រទេសអឺរ៉ុប នៅ UNSC ថ្កោលទោសអំពើហិង្សារបស់អ្នកតាំងទីលំនៅអ៊ីស្រាអែលខុសច្បាប់

សមាជិកអឺរ៉ុបនៃក្រុមប្រឹក្សាសន្តិសុខអង្គការសហប្រជាជាតិ (UNSC) កាលពីថ្ងៃអង្គារ (ទី១៦ ខែធ្នូ) បានលើកឡើងពីការវាយប្រហាររបស់ជនជាតិអ៊ីស្រាអែលខុសច្បាប់ជាង ២៦០ករណី ប្រឆាំងនឹងជនជាតិប៉ាឡេស្ទីន ក្នុងរយៈពេលតែមួយខែ ដោយថ្កោលទោសអ្វីដែលពួកគេ បានពិពណ៌នាថា ជាកម្រិតនៃអំពើហិង្សា នៅតំបន់កាន់កាប់ West Bank និងទីក្រុង East Jerusalem (ហ៊្សេរុយសាឡឹមខាងកើត)។អំឡុងពេលថ្លែងតំណាងឲ្យ E5 ដែលមានប្រទេសដាណឺម៉ាក បារាំង ក្រិក ស្លូវេនី និងចក្រភពអង់គ្លេស ឯកអគ្គរដ្ឋទូតអង់គ្លេស លោក James Kariuki បាននិយាយថា ក្រុមប្រឹក្សានឹងជួបប្រជុំ ដើម្បីពិភាក្សាអំពីសេចក្ដីសម្រេចលេខ ២៣៣៤ (Resolution 2334) ដែល «ថ្កោលទោសយ៉ាងខ្លាំង ចំពោះសកម្មភាពរបស់អ្នកតាំងទីលំនៅ និងអំពាវនាវឲ្យអ៊ីស្រាអែលគោរពកាតព្វកិច្ចរបស់ខ្លួន ក្រោមច្បាប់អន្តរជាតិ»។លោកបានព្រមានថា «រដ្ឋាភិបាលអ៊ីស្រាអែលបន្តអនុវត្តគោលនយោបាយដែលផ្ទុយនឹងសេចក្ដីសម្រេចនេះ ហើយរួមចំណែកដល់ការកើនឡើងនូវអស្ថិរភាព នៅតំបន់ West Bank» ដោយបន្ថែមថា នេះ «បង្កជាហានិភ័យធ្វើឲ្យខូចដល់ការអនុវត្តផែនការ ២០ចំណុច សម្រាប់តំបន់ហ្កាហ្សា និងការរំពឹងទុកពីការមានដំណោះស្រាយរដ្ឋ២ ក៏ដូចជាសន្តិភាព និងសន្តិសុខរយៈពេលវែង នៅទូទាំងតំបន់នេះ»។ដោយដកស្រង់ទិន្នន័យពីការិយាល័យសម្របសម្រួលកិច្ចការមនុស្សធម៌ (OCHA) លោកឯកអគ្គរដ្ឋទូតរូបនេះ បានបន្ថែមថា៖ «មានការវាយប្រហារជាង ២៦០ករណី លើប្រជាជនប៉ាឡេស្ទីន និងទ្រព្យសម្បត្តិរបស់ពួកគេ នៅក្នុងខែតុលាតែមួយប៉ុណ្ណោះ។ នេះគឺជាការអ្វីដែលគួរឲ្យបារម្ភយ៉ាងខ្លាំង»៕

បណ្ដាញសង្គម

ព័ត៌មានថ្មីៗ

ក្រសួងការពារជាតិ៖ ចាប់ពីម៉ោង ៦:០៨នាទី ដល់ម៉ោង ៧:១៥នាទី យោធាថៃបានប្រើប្រាស់យន្តហោះចម្បាំង F-16 ទម្លាក់គ្រាប់បែកចំនួន ៤០គ្រាប់ ចូលក្នុងភូមិសាស្ត្រភូមិជោគជ័យ

ក្រុមលេខា GBC បន្តកិច្ចប្រជុំថ្ងៃទីបី ជំរុញឱ្យមានការបញ្ឈប់អរិភាព និងស្វែងរកដំណោះស្រាយឡើងវិញរវាង កម្ពុជា-ថៃ

កំណែសន្លឹកសន្លឹកកិច្ចការបេក្ខជនប្រឡងប្រជែងជ្រើសរើសសិស្សមន្ត្រីក្រមការជំនាន់ទី១២ នៃសាលាភូមិន្ទរដ្ឋបាល (វិញ្ញាសាសរសេរលើកទី១) ចាប់ផ្តើមព្រឹកនេះ

អ្នកនាំពាក្យ៖ ទាហានឈ្លានពានថៃ បន្តបាញ់ផ្លោងទាំងផ្លូវអាកាស និងផ្លូវគោកចូលលំនៅដ្ឋានជនស៊ីវិល ដោយមិនខ្វល់ពីការអំពាវនាវរបស់អន្តរជាតិ

បងប្អូនភៀសសឹកបាននាំគ្នាបន្តដាំបន្លែ នៅតាមទីតាំងសុវត្ថិភាពរបស់ខ្លួនស្នាក់នៅ ដើម្បីបង្កើនភាពអាចពឹងផ្អែកលើខ្លួនឯង និងធានាសន្តិសុខស្បៀង

ក្រសួងការពារជាតិ៖ ចាប់ពីម៉ោង៧:៤៥នាទី ដល់ម៉ោង៩:០៣នាទី យោធាថៃបានបាញ់ផ្លោងកាំភ្លើងប្រភេទ ១៥៥ម.ម សរុបចំនួន ១៧គ្រាប់ ចូលទីតាំងប្រជាជនស៊ីវិលកម្ពុជា ក្នុងភូមិសាស្ត្រក្រុងប៉ោយប៉ែត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877