BTV NEWS

វិចិត្រករឥណ្ឌាឧទ្ទិសចម្លាក់ដីខ្សាច់ដល់កិច្ចព្រមព្រៀងសន្តិភាពរវាងអាមេរិកនិងអ៊ីរ៉ង់

រដ្ឋមន្រ្តីអង់គ្លេសជំរុញឲ្យអ៊ីស្រាអែលដកទ័ពចេញពីតំបន់ភាគខាងត្បូងលីបង់ដើម្បីឲ្យពលរដ្ឋវិលត្រឡប់ទៅផ្ទះវិញ

អនុប្រធានាធិបតីអាមេរិកនិយាយថា ទីក្រុងវ៉ាស៊ីនតោនចង់ឲ្យលីបង់រក្សាសន្តិសុខនៅតំបន់ភាគាងត្បូងប្រទេស

រលកកម្តៅវាយប្រហារតំបន់ជាច្រើនរបស់ប្រទេសបារាំង រួមទាំងទីក្រុងប៉ារីសផងដែរ

ព័ត៌មានអន្តរជាតិ

ឯកអគ្គរដ្ឋទូតរុស្ស៊ី៖ ចក្រភពអង់គ្លេសជំរុញអ៊ុយក្រែនឲ្យបង្កើនជម្លោះ

ឯកអគ្គរដ្ឋទូតរុស្ស៊ីប្រចាំអង់គ្លេស លោក Andrey Kelin បាននិយាយថា ចក្រភពអង់គ្លេស កំពុងផ្គត់ផ្គង់អាវុធដល់អ៊ុយក្រែន ដើម្បីទប់ស្កាត់ការបញ្ចប់ជម្លោះនេះ។ អ្នកការទូតរុស្ស៊ីរូបនេះ បានប្រាប់សារព័ត៌មាន TASSថា៖«ចំណាត់ការទាំងអស់ដែលធ្វើឡើងដោយចក្រភពអង់គ្លេសនាពេលបច្ចុប្បន្ន បង្ហាញពីបំណងប្រាថ្នារបស់ពួកគេ ក្នុងការជំរុញទីក្រុងគីវឲ្យបង្កើនភាពតានតឹងបន្ថែមទៀត។ ការផ្គត់ផ្គង់អាវុធដល់ទីក្រុងគីវ កម្មវិធីរួមគ្នាសម្រាប់ផលិតយានដ្រូន និងមីស៊ីល រយៈចម្ងាយឆ្ងាយនៅលើទឹកដីនៃចក្រភពអង់គ្លេស ការបណ្តុះបណ្តាលទាហាននៃកងកម្លាំងប្រដាប់អាវុធអ៊ុយក្រែន នៅទីនោះ វត្តមាននៃគ្រូពេទ្យយោធារបស់អង់គ្លេស កន្លែងបណ្តុះបណ្តាល និងអ្នកឯកទេស ក្នុងការជួសជុលគ្រឿងយុទ្ធោបករណ៍ នៅអ៊ុយក្រែន គឺពុំមានអ្វីបង្ហាញពីបំណងប្រាថ្នារបស់ទីក្រុងឡុងដ៍ ក្នុងការបញ្ចប់ជម្លោះនោះទេ»។ លោក Kelin បានរិះគន់គំនិតផ្តួចផ្តើមសន្តិភាពរបស់ចក្រភពអង់គ្លេស ដោយបង្ហាញពីការសង្ស័យយ៉ាងខ្លាំងអំពីភាពស្មោះត្រង់របស់មន្ត្រីអង់គ្លេស។លោកឯកអគ្គរដ្ឋទូតបាននិយាយថា៖«ការអំពាវនាវដែលគ្មានភាពច្បាស់លាស់ ដើម្បីបញ្ចប់អ្វីដែលហៅថា សន្តិភាពដ៏យុត្តិធម៌ និងយូរអង្វែង គឺគ្មានអ្វីក្រៅពីការធ្វើឲ្យតែល្អមើលនោះទេ។ យើងមិនបានទទួលសញ្ញាណាមួយនៃឆន្ទៈរបស់ចក្រភពអង់គ្លេស ក្នុងការពិភាក្សាអ្វីមួយ ដោយស្ថាបនានោះទេ ហើយយើងមិនរង់ចាំពួកគេធ្វើដូច្នេះទេ»។ «ទីក្រុងឡុងដ៍ស្ទើរតែមិនអាចធ្វើឲ្យយើងភ្ញាក់ផ្អើល ជាមួយនឹងវិធីសាស្រ្តថ្មីជាមូលដ្ឋានចំពោះបញ្ហាអ៊ុយក្រែននោះទេ ហើយទីក្រុងមូស្គូ ក៏មិនត្រូវការការពន្យល់អំពីជំហរផ្លូវការរបស់ពួកគេនោះដែរ»៕

លោក ERDOGAN៖ ទួរគីប្តេជ្ញាមិនចូលរួមក្នុងជម្លោះក្នុងតំបន់ ដែលកំពុងបន្តនេះទេ

ប្រធានាធិបតីទួរគី លោក រ៉េសិប តាយីប អឺដូហ្កាន់ ( Recep Tayyip Erdogan) បាននិយាយថា ប្រទេសរបស់លោក មិនមានបំណងចូលរួមក្នុងជម្លោះបច្ចុប្បន្ននៅក្នុងតំបន់ឈូងសមុទ្រនេះទេ។លោក អឺដូហ្កាន់ បានថ្លែងបន្ទាប់ពីកិច្ចប្រជុំគណៈរដ្ឋមន្ត្រី ដើម្បីពិភាក្សាអំពីស្ថានភាព នៅក្នុងឈូងសមុទ្រថា៖«យើងប្តេជ្ញាចិត្តមិនឲ្យប្រទេសរបស់យើង ធ្លាក់ចូលទៅក្នុងភ្លើងសង្គ្រាមឈូងសមុទ្រនេះទេ។ យើងមិនចង់ឲ្យជម្លោះនេះ ប្រែក្លាយទៅជាសង្គ្រាមរយៈពេលយូរក្នុងចំណោមប្រទេសនានា នៅក្នុងតំបន់នោះទេ។ នៅពេលនេះ ទួរគីធ្វើការសម្រេចចិត្តអធិបតេយ្យភាព ស្របតាមអាទិភាពរបស់ខ្លួន»។លោកក៏បានកត់សម្គាល់ផងដែរថា ភាគីដែលពាក់ព័ន្ធក្នុងសង្គ្រាម កំពុងងាកទៅរកល្បិចកល ដើម្បីអូសទាញប្រទេសដទៃទៀតចូលទៅក្នុងជម្លោះនេះ ប៉ុន្តែ «ទួរគីមើលឃើញអន្ទាក់ទាំងនេះ ហើយកំពុងធ្វើសកម្មភាពយ៉ាងប្រុងប្រយ័ត្ន និងដោយចិត្តត្រជាក់បំផុត»៕

លោក STARMER៖ ចក្រភពអង់គ្លេសកំពុងធ្វើការជាមួយដៃគូ ដើម្បីបើកច្រកសមុទ្រហ័រមូស

ការិយាល័យនាយករដ្ឋមន្ត្រី បាននិយាយនៅក្នុងសេចក្តីថ្លែងការណ៍មួយថា ចក្រភពអង់គ្លេស រួមជាមួយដៃគូរបស់ខ្លួន កំពុងធ្វើការលើផែនការមួយ ដើម្បីបន្តការធ្វើនាវាចរណ៍តាមច្រកសមុទ្រហ័រមូស។ ការិយាល័យនេះបាននិយាយបន្ទាប់ពីការសន្ទនាតាមទូរស័ព្ទរវាងលោកនាយករដ្ឋមន្ត្រី Keir Starmer និងព្រះអង្គម្ចាស់រាជទាយាទនៃប្រទេសអារ៉ាប៊ីសាអ៊ូឌីត Mohammed bin Salman ថា៖«បន្ទាប់ពីសេចក្តីថ្លែងការណ៍រួមដឹកនាំដោយអង់គ្លេសកាលពីសប្តាហ៍មុន ចក្រភពអង់គ្លេសឥឡូវនេះ កំពុងធ្វើការជាមួយដៃគូលើអ្វី ដែលផែនការអាចអនុវត្តបាន ហើយអាចធានាបាននូវលំហូរទំនិញតាមរយៈផ្លូវសមុទ្រដ៏សំខាន់់នេះ។លោក Starmer បានសម្តែងការគាំទ្រយ៉ាងមុតមាំចំពោះទីក្រុងរីយ៉ាដ។នៅថ្ងៃទី ១៩ ខែមីនា មេដឹកនាំនៃចក្រភពអង់គ្លេស អ៊ីតាលី ហូឡង់ បារាំង អាល្លឺម៉ង់ និងជប៉ុន បានអំពាវនាវឲ្យអ៊ីរ៉ង់បញ្ឈប់ការគំរាមកំហែងរបស់ខ្លួនជាបន្ទាន់ ការដាក់មីន ការវាយប្រហារដោយយានដ្រូន និងមីស៊ីល ក៏ដូចជាការប៉ុនប៉ងផ្សេងទៀត ដើម្បីបិទច្រកសមុទ្រហ័រមូសសម្រាប់ការដឹកជញ្ជូនពាណិជ្ជកម្ម។ ក្រោយមក ប្រទេសជាង ២០ បានចូលរួមជាមួយពួកគេ រួមទាំងរដ្ឋអឺរ៉ុបមួយចំនួន អូស្ត្រាលី បារ៉ែន សាធារណរដ្ឋដូមីនីកែន កាណាដា នូវែលសេឡង់ ប៉ាណាម៉ា ទ្រីនីដាដនិងតូបាហ្គោ អេមីរ៉ាតអារ៉ាប់រួម និងកូរ៉េខាងត្បូង។សហរដ្ឋអាមេរិក និងអ៊ីស្រាអែល បានចាប់ផ្តើមប្រតិបត្តិការយោធាប្រឆាំងនឹងអ៊ីរ៉ង់ នៅថ្ងៃទី២៨ ខែកុម្ភៈ ដោយវាយប្រហារទីក្រុងធំៗ រួមទាំងទីក្រុងតេអេរ៉ង់ផងដែរ។ សេតវិមានបានបង្ហាញភាពត្រឹមត្រូវនូវការវាយប្រហារនេះ ដោយលើកឡើងពីការគំរាមកំហែងដោយមីស៊ីល និងនុយក្លេអ៊ែរពីអ៊ីរ៉ង់។ កងឆ្មាំបដិវត្តន៍ឥស្លាម អ៊ីរ៉ង់ បានសងសឹកដោយការវាយប្រហារយ៉ាងទូលំទូលាយទៅលើអ៊ីស្រាអែល និងមូលដ្ឋានយោធារបស់សហរដ្ឋអាមេរិកនៅក្នុងប្រទេសបារ៉ែន ហ្ស៊កដានី កាតា គូវ៉ែត អេមីរ៉ាតអារ៉ាប់រួម និងអារ៉ាប៊ីសាអ៊ូឌីត។ លោក Ayatollah Ali Khamenei និងឥស្សរជនសំខាន់ៗរបស់អ៊ីរ៉ង់មួយចំនួនទៀត ត្រូវបានសម្លាប់៕

អ៊ីរ៉ង់អំពាវនាវឲ្យមានការបង្កើតសម្ព័ន្ធភាពយោធាក្នុងតំបន់ ដោយគ្មានអាមេរិក និងអ៊ីស្រាអែល

អគ្គសេនាធិការកងទ័ពអ៊ីរ៉ង់ បាននិយាយថា ជាការពិតណាស់ ចាំបាច់ត្រូវបង្កើតសម្ព័ន្ធភាពនៃរដ្ឋនានា ដើម្បីធានាសន្តិសុខ និងអភិវឌ្ឍន៍កិច្ចសហប្រតិបត្តិការយោធានៅមជ្ឈិមបូព៌ា ដោយគ្មានការចូលរួមពីសហរដ្ឋអាមេរិក និងអ៊ីស្រាអែល។សេនាធិការកងទ័ពអ៊ីរ៉ង់បាននិយាយនៅក្នុងសេចក្តីថ្លែងការណ៍មួយថា៖«ពេលវេលាសមស្រប បានមកដល់ហើយ ដើម្បីបង្កើតសម្ព័ន្ធភាពនៃរដ្ឋនានា ដើម្បីធានាសន្តិសុខ និងកិច្ចសហប្រតិបត្តិការយោធា នៅក្នុងតំបន់ ដោយគ្មានការចូលរួមពីសហរដ្ឋអាមេរិក និងអ៊ីស្រាអែល។ បណ្តាប្រទេសក្នុងតំបន់ «នឹងមិនត្រូវការរដ្ឋដែលមានទីតាំងនៅចម្ងាយរាប់ពាន់គីឡូម៉ែត្រ ដើម្បីធានាសន្តិសុខរបស់ពួកគេឡើយ»។យោងតាមអ៊ីរ៉ង់ ប្រទេសនានាក្នុងតំបន់«មិនត្រូវការរដ្ឋដែលដាក់សន្តិសុខ និងផលប្រយោជន៍របស់អ៊ីស្រាអែលលើសពីអ្វីទាំងអស់» និង «មើលឃើញតែទ្រព្យសម្បត្តិដែលមាននៅលើដីរបស់ពួកគេ» នៅក្នុង រដ្ឋក្នុងតំបន់នោះទេ៕

មន្ត្រីUN៖ ពិភពលោកកំពុងជួបប្រទះនឹងសម័យកាលដ៏ហិង្សាបំផុត ចាប់តាំងពីសង្គ្រាមលោកលើកទី ២

មន្ត្រីអង្គការសហប្រជាជាតិម្នាក់ បាននិយាយថា ពិភពលោកកំពុងជួបប្រទះនឹងសម័យកាលដ៏ហិង្សាបំផុតរបស់ខ្លួន ចាប់តាំងពីសង្គ្រាមលោកលើកទី ២ ខណៈដែលការកើនឡើងនៃអំពើហិង្សានៅមជ្ឈិមបូព៌ា នៅតែបន្តបង្កផលប៉ះពាល់យ៉ាងធ្ងន់ធ្ងរដល់ជនស៊ីវិល និងជីវភាពរស់នៅ ជាមួយនឹងផលប៉ះពាល់ជាសកល។ លោក Jorge Moreira da Silva នាយកប្រតិបត្តិនៃការិយាល័យសេវាកម្មគម្រោងអង្គការសហប្រជាជាតិ (UNOPS) បាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា៖«ពិភពលោករបស់យើង គឺស្ថិតក្នុងសម័យកាលដ៏ហិង្សាបំផុត ចាប់តាំងពីសង្គ្រាមលោកលើកទី ២។ ចំនួនមនុស្សដែលត្រូវបានបណ្តេញចេញ និងបង្ខំឲ្យរត់គេចខ្លួន កំពុងកើនឡើងជារៀងរាល់ម៉ោង»។លោកបាននិយាយថា ជម្លោះដ៏មហន្តរាយនៅមជ្ឈិមបូព៌ា បានឆ្លងកាត់ព្រំដែន ធ្វើឲ្យសេដ្ឋកិច្ចពិភពលោករង្គោះរង្គើ ស្របពេលមានការកើនឡើងយ៉ាងខ្លាំងនៃតម្លៃប្រេង ប្រេងឥន្ធនៈ និងឧស្ម័ន។លោកបានចង្អុលបង្ហាញថា ប្រទេសកំពុងអភិវឌ្ឍន៍នៅអាស៊ី និងអាហ្វ្រិក ទំនងជាទទួលរងនូវផលប៉ះពាល់ធ្ងន់ធ្ងរបំផុត ហើយចំនួនមនុស្សដែលរស់នៅក្នុងភាពអត់ឃ្លានទូទាំងពិភពលោក ទំនងជានឹងកើនឡើងរាប់សិបលាននាក់ នៅឆ្នាំនេះ។លោកបានជំរុញឲ្យគ្រប់ភាគីទាំងអស់អនុវត្តសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិទាំងអស់ និងបញ្ចប់ភាពវឹកវរ និងទុក្ខវេទនារបស់ប្រជាជន តាមរយៈដំណោះស្រាយការទូត និងសន្តិភាព៕

កាតាអំពាវនាវឲ្យមានការវាយតម្លៃឡើងវិញនូវប្រព័ន្ធសន្តិសុខឈូងសមុទ្រ ស្របពេលសង្គ្រាមកំពុងបន្ត

អ្នកនាំពាក្យក្រសួងការបរទេសកាតា លោក Majed Al-Ansari បាននិយាយកាលពីថ្ងៃអង្គារថា ជម្លោះដែលកំពុងបន្តដែលពាក់ព័ន្ធនឹងសហរដ្ឋអាមេរិក អ៊ីស្រាអែល និងអ៊ីរ៉ង់ បានធ្វើឲ្យប៉ះពាល់ដល់សន្តិសុខក្នុងតំបន់ឈូងសមុទ្រ ដោយអំពាវនាវឲ្យមានការវាយតម្លៃឡើងវិញនូវការរៀបចំសន្តិសុខរួម។ថ្លែងនៅក្នុងសន្និសីទសារព័ត៌មាន លោក Majed Al-Ansari បាននិយាយថា ក្រុមប្រឹក្សាសហប្រតិបត្តិការឈូងសមុទ្រ (GCC) បានចាត់វិធានការ ដើម្បីពង្រឹងកិច្ចសហប្រតិបត្តិការការពារជាតិរួមគ្នា ក្នុងចំណោមរដ្ឋជាសមាជិក ចាប់តាំងពីអ៊ីស្រាអែលបានវាយប្រហារកាតាកាលពីរដូវក្តៅមុន ដោយបន្ថែមថា ភាពជាដៃគូការពារជាតិដែលមានស្រាប់ បានបង្ហាញថា មានប្រសិទ្ធភាពក្នុងការបង្កើតជំហរការពារជាតិបច្ចុប្បន្នភាគច្រើន។លោកបានសង្កត់ធ្ងន់លើសារៈសំខាន់នៃជំហរឯកភាពក្នុងចំណោមរដ្ឋឈូងសមុទ្រ និងនៅកម្រិតតំបន់កាន់តែទូលំទូលាយ។លោក Majed Al-Ansari បានព្រមានអំពីផលវិបាកសេដ្ឋកិច្ចនៃជម្លោះនេះ ដោយនិយាយថា វាបានបង្កហានិភ័យដល់ប្រជាជន ហេដ្ឋារចនាសម្ព័ន្ធ និងស្ថិរភាពក្នុងតំបន់។លោកបានអំពាវនាវឲ្យមានការចរចាការទូតជាបន្ទាន់ «ទាំងតាមរយៈបណ្តាញផ្លូវការ ឬក្រៅផ្លូវការ» ដើម្បីឈានដល់ដំណោះស្រាយមួយ៕

ប្រមុខUN ថ្កោលទោសការវាយប្រហារដោយដ្រូនដែលបានសម្លាប់មនុស្សយ៉ាងតិច ៦០នាក់ នៅស៊ូដង់

អ្នកនាំពាក្យរបស់លោក បាននិយាយកាលពីថ្ងៃអង្គារថា អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) បានថ្កោលទោសយ៉ាងដាច់អហង្ការចំពោះការសម្លាប់មនុស្សយ៉ាងហោចណាស់ ៦០នាក់ ក្នុងនោះមានទាំងកុមារ និងបុគ្គលិកសុខាភិបាល នៅក្នុងការវាយប្រហារដោយយានដ្រូនទៅលើមន្ទីរពេទ្យបណ្តុះបណ្តាល El-Daein ក្នុងរដ្ឋ Darfur ខាងកើតរបស់ប្រទេសស៊ូដង់ កាលពីថ្ងៃសុក្រ។អ្នកនាំពាក្យលោក Stephane Dujarric បាននិយាយនៅក្នុងសេចក្តីថ្លែងការណ៍មួយថា ចាប់តាំងពីខែមេសា ឆ្នាំ ២០២៣ អង្គការសុខភាពពិភពលោកបានផ្ទៀងផ្ទាត់ការវាយប្រហារជាង ២០០លើក ដែលបានបង្កការខូចខាតដល់មណ្ឌលសុខភាព នៅក្នុងប្រទេសស៊ូដង់ និងបណ្តាលឲ្យមនុស្សជាង ២.000នាក់ ស្លាប់។ លោកបាននិយាយថា៖«លោកអគ្គលេខាធិការទាមទារឲ្យគ្រប់ភាគីទាំងអស់គោរពតាមកាតព្វកិច្ចរបស់ពួកគេ ក្រោមច្បាប់មនុស្សធម៌អន្តរជាតិ ដែលការពារជាពិសេសបុគ្គលិកពេទ្យ និងមណ្ឌលសុខភាព និងហាមឃាត់ការវាយប្រហារដែលកំណត់គោលដៅលើជនស៊ីវិល និងទ្រព្យសម្បតិ្តស៊ីវិល»។ លោក Dujarric បានបញ្ជាក់ថា លោកប្រមុខអង្គការសហប្រជាជាតិបានអំពាវនាវឲ្យគ្រប់ភាគីទាំងអស់កាត់បន្ថយការប្រយុទ្ធគ្នាជាបន្ទាន់ និងយល់ព្រមលើការបញ្ឈប់អរិភាព។អ្នកនាំពាក្យរូបនេះ បាននិយាយថា លោក ហ្គុយតឺរេស បានអំពាវនាវជាថ្មីដល់ភាគីនានាឲ្យធ្វើការជាមួយអ្នកសម្របសម្រួល រួមទាំងអ្នកតំណាងផ្ទាល់ខ្លួនរបស់លោកសម្រាប់ប្រទេសស៊ូដង់ ដើម្បីវិលត្រឡប់មកតុចរចាវិញ ដើម្បីបន្តបទឈប់បាញ់យូរអង្វែង និងដំណើរការនយោបាយដ៏ទូលំទូលាយ ពេញលេញ និងគ្រប់គ្រងដោយស៊ូដង់៕

និស្សិតជនជាតិព័រទុយហ្គាល់រាប់ពាន់នាក់ ចេញតវ៉ាប្រឆាំងនឹងលក្ខខណ្ឌការសិក្សាអប់រំ

និស្សិតនៅប្រទេសព័រទុយហ្គាល់រាប់ពាន់នាក់ បានចេញតវ៉ាឆ្លងកាត់ទីក្រុង Lisbon កាលពីថ្ងៃអង្គារ ទី២៤ ខែមីនា ដើម្បីទាមទារលក្ខខណ្ឌកាន់តែប្រសើរ រួមទាំងការលុបបំបាត់ថ្លៃសិក្សានៅសាកលវិទ្យាល័យ។និស្សិតម្នាក់និយាយថា «យើងដឹងថារដ្ឋាភិបាលនេះ មិនចង់ស្តាប់យើងទេ។ យើងដឹងថារដ្ឋាភិបាលនេះមិនត្រូវបានបង្កើតឡើងសម្រាប់និស្សិតទេ ហើយយើងដឹងថាអ្វីដែលយើងចាំបាច់ត្រូវផ្តល់ឱ្យរដ្ឋាភិបាល គឺការប្រយុទ្ធប្រឆាំង»។វិបត្តិលំនៅឋានរ៉ាំរ៉ៃនៅក្នុងប្រទេសព័រទុយហ្គាល់ បានធ្វើឱ្យវាកាន់តែពិបាកសម្រាប់យុវវ័យក្នុងការរស់នៅដោយឯករាជ្យ ឬចាប់ផ្តើមគ្រួសារ។និស្សិតជាច្រើនពិបាកក្នុងការព្យាយាមដើម្បីមានលទ្ធភាពជួលផ្ទះក្នុងពេលកំពុងសិក្សា ជាពិសេសនៅក្នុងទីក្រុងធំៗ ហើយក៏ប្រឈមមុខនឹងបន្ទុកនៃការបង់ថ្លៃសិក្សានៅសាកលវិទ្យាល័យសាធារណៈ ដែលពួកគេអះអាងថាគួរតែឥតបង់ថ្លៃ។

មនុស្សយ៉ាងតិច ១៧នាក់ស្លាប់ និងជាច្រើននាក់រងរបួស ក្នុងការវាយប្រហាររបស់អ៊ីស្រាអែល នៅលីបង់

យ៉ាងហោចណាស់មានមនុស្ស ១៧នាក់ បានស្លាប់ និងជាច្រើននាក់ទៀត រងរបួស ក្នុងការវាយប្រហារតាមអាកាស និងប្រតិបត្តិការថ្មើរជើងជាបន្តបន្ទាប់របស់អ៊ីស្រាអែល នៅទូទាំងភាគខាងត្បូងប្រទេសលីបង់ ភ្នំលីបង់ និងជាយក្រុងភាគខាងត្បូងនៃទីក្រុងបេរូតពេញមួយយប់ និងព្រឹកថ្ងៃអង្គារ។ នេះបើយោងតាមក្រសួងសុខាភិបាលរបស់ប្រទេសនេះ។យោធាអ៊ីស្រាអែលកាលពីថ្ងៃអង្គារ បានបញ្ជាក់ពីការវាយប្រហាររបស់ខ្លួន ដោយនិយាយថា ខ្លួនបានបញ្ចប់ការវាយប្រហារតាមអាកាសមួយផ្សេងទៀត នៅទូទាំងប្រទេសលីបង់ ដោយកំណត់គោលដៅស្ថានីយប្រេងឥន្ធនៈដែលជាកម្មសិទ្ធិរបស់ក្រុមហ៊ុនដែលគ្រប់គ្រងដោយក្រុមហេសបូឡា។ការវាយប្រហារតាមអាកាសរបស់អ៊ីស្រាអែល បានកំណត់គោលដៅលើភូមិ Bchamoun ក្នុងស្រុក Aley ដោយបណ្តាលឲ្យមនុស្សពីរនាក់ស្លាប់ និង ៥នាក់ផ្សេងទៀតរងរបួស។ នេះបើយោងតាមមជ្ឈមណ្ឌលប្រតិបត្តិការសង្គ្រោះបន្ទាន់របស់ក្រសួងសុខាភិបាលលីបង់។នៅភាគខាងត្បូងប្រទេសលីបង់ មនុស្ស ៤នាក់ ត្រូវបានសម្លាប់ និង ៤នាក់ផ្សេងទៀត រងរបួស ក្នុងការវាយប្រហារតាមអាកាសដែលបានកំណត់គោលដៅផ្ទះមួយខ្នង នៅក្នុងភូមិ Selaa។ មនុស្សពីរនាក់ផ្សេងទៀត ត្រូវបានសម្លាប់ និង ៥នាក់ ផ្សេងទៀត រងរបួស បន្ទាប់ពីយន្តហោះចម្បាំងអ៊ីស្រាអែល បានធ្វើការវាយប្រហារតាមអាកាសចំនួនបីលើក នៅពេលព្រឹកព្រលឹមថ្ងៃអង្គារលើភូមិ Tayr Debba ក្នុងស្រុក Tyre៕

IAEA អំពាវនាវឲ្យមានការអត់ធ្មត់ បន្ទាប់ពីរោងចក្រថាមពលនុយក្លេអ៊ែរអ៊ីរ៉ង់ ត្រូវរងការវាយប្រហារជាថ្មី

ប្រធានទីភ្នាក់ងារថាមពលបរមាណូអន្តរជាតិ (IAEA) កាលពីថ្ងៃអង្គារ បានអំពាវនាវជាថ្មីឲ្យមានការអត់ធ្មត់អតិបរមា បន្ទាប់ពីការវាយប្រហារថ្មីលើរោងចក្រថាមពលនុយក្លេអ៊ែររបស់អ៊ីរ៉ង់។IAEA បាននិយាយនៅលើប្រព័ន្ធផ្សព្វផ្សាយសង្គម X ថា ខ្លួនត្រូវបានជូនដំណឹងដោយអ៊ីរ៉ង់ថា គ្រាប់ផ្លោងមួយគ្រាប់ទៀត បានត្រូវចំរោងចក្រថាមពលនុយក្លេអ៊ែរ Bushehr កាលពីថ្ងៃអង្គារ។អាជ្ញាធរអ៊ីរ៉ង់ បាននិយាយថា ពុំមានការខូចខាតដល់រោងចក្រថាមពលនុយក្លេអ៊ែរខ្លួនឯង ឬរបួសដល់បុគ្គលិកនោះទេ ហើយស្ថានភាពនៃរោងចក្រនេះ នៅតែមានលក្ខណៈធម្មតា។លោក Rafael Grossi អគ្គនាយក IAEA បានបញ្ជាក់ជាថ្មីនូវការអំពាវនាវរបស់លោកឲ្យមានការអត់ធ្មត់អតិបរមា ដើម្បីជៀសវាងហានិភ័យសុវត្ថិភាពនុយក្លេអ៊ែរ ក្នុងអំឡុងពេលជម្លោះដែលកំពុងបន្ត។រោងចក្រនុយក្លេអ៊ែររបស់អ៊ីរ៉ង់ ត្រូវបានវាយប្រហារជាច្រើនលើក ចាប់តាំងពីការវាយប្រហារយោធារបស់សហរដ្ឋអាមេរិក និងអ៊ីស្រាអែល បានចាប់ផ្តើម នៅថ្ងៃទី ២៨ ខែកុម្ភៈ៕

បណ្ដាញសង្គម

ព័ត៌មានថ្មីៗ

សម្ដេចធិបតី បញ្ជាក់ជាថ្មីជំហររបស់កម្ពុជាបន្តដោះស្រាយបញ្ហាព្រំដែនគោក និងសមុទ្រជាមួយថៃ ដោយសន្ដិវិធី និងច្បាប់អន្តរជាតិ និងបដិសេធជជែករឿងបើកច្រកព្រំដែនគោក

រមណីយដ្ឋាន Burgenstock របស់ស្វីស ត្រៀមខ្លួនធ្វើជាម្ចាស់ផ្ទះកិច្ចប្រជុំសន្តិភាពអាមេរិក-អ៊ីរ៉ង់

បារាំងជំរុញឲ្យអ៊ីស្រាអែលគោរពបទឈប់បាញ់ នៅលីបង់ និងអំពាវនាវឲ្យអាមេរិកអនុវត្ត «សម្ពាធចាំបាច់»

លោកនាយករដ្ឋមន្រ្តី Rumen Radev ៖ ប៊ុលហ្គារីនឹងវេតូកញ្ចប់ទណ្ឌកម្មថ្មីរបស់ EU លើរុស្ស៊ី

ក្រុមហ៊ុន Amazon ចង្អុលបង្ហាញពីជំហានអភិរក្សទឹកនៅក្នុងប្រទេសឥណ្ឌា ចំពេលមានការត្រួតពិនិត្យយ៉ាងម៉ត់ចត់លើមជ្ឈមណ្ឌលទិន្នន័យ

ប្រព័ន្ធផ្សព្វផ្សាយ៖ អ៊ុយក្រែនស្នើប្រធានាធិបតីប្រេស៊ីលឲ្យធ្វើជាអ្នកសម្របសម្រួលក្នុងការចរចាជាមួយ រុស្ស៊ី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877