BTV NEWS

លោក Zelenskyy បញ្ជាក់ថា «ការសម្រេចជាច្រើន» អាចធ្វើឡើងមុនឆ្នាំថ្មី នៅមុនកិច្ចប្រជុំជាមួយលោក Trump

ចិនដាក់ទណ្ឌកម្មលើក្រុមហ៊ុនការពារជាតិអាមេរិក និងបុគ្គល ពាក់ព័ន្ធការលក់អាវុធទៅឲ្យកោះតៃវ៉ាន់

ទីក្រុងសេអ៊ូល នឹងបន្ធូរបន្ថយការរឹតបន្តឹងនូវលទ្ធភាពចូលទៅកាន់សារព័ត៌មានកូរ៉េខាងជើង

រដ្ឋមន្ត្រីការបរទេស៖ នីហ្សេរីយ៉ាផ្តល់ការស៊ើបការណ៍សម្ងាត់ដល់អាមេរិក ដើម្បីវាយប្រហារក្រុមសកម្មប្រយុទ្ធ

ព័ត៌មានអន្តរជាតិ

UN៖ ជនស៊ីវិលជាង ១០០នាក់ បានស្លាប់ក្នុងការវាយប្រហារយានដ្រូននៅតំបន់សង្រ្គាមស៊ូដង់ ក្នុងខែនេះ

ការិយាល័យសិទ្ធិមនុស្ស របស់អង្គការសហប្រជាជាតិ បាននិយាយកាលពីថ្ងៃអង្គារ (១៦ ធ្នូ) ថា មានជនស៊ីវិលយ៉ាងហោច ១០៤នាក់ រួមទាំងកុមារ ៤៣នាក់ ត្រូវបានសម្លាប់ នៅក្នុងការវាយប្រហារដោយយានដ្រូនជាច្រើនលើកច្រើនសារ នៅក្នុងតំបន់សង្រ្គាម Kordofan របស់ប្រទេសស៊ូដង់ ចាប់តាំងពីថ្ងៃទី៤ ខែធ្នូ ឆ្នាំ២០២៥ នេះមក។លោក Volker Turk ប្រធានទីភ្នាក់ងារសិទ្ធិមនុស្ស UN បានសម្ដែងក្ដីបារម្ភពីកំណើនអរិភាពកាន់តែអាក្រក់ក្នុងប្រទេសនេះ ដោយសំដៅលើការប៉ះទង្គិចយ៉ាងហិង្សារវាងភាគីជម្លោះនៅតំបន់ Kordofan ដែលជាតំបន់មួយមានរដ្ឋចំនួន៣ នៅភាគកណ្តាល និងភាគខាងត្បូងប្រទេសស៊ូដង់។លោក Turk មិនបានផ្តល់ព័ត៌មានលម្អិតជាក់លាក់បន្ថែមទៀតអំពីអ្នកដែលនៅពីក្រោយការវាយប្រហារដោយយានដ្រូនទាំងនោះទេ ដោយគ្រាន់តែនិយាយថា ការវាយប្រហារកើតឡើងលើមន្ទីរពេទ្យ សាលាមត្តេយ្យ និងមូលដ្ឋានរបស់អង្គការសហប្រជាជាតិ។កងកម្លាំងគាំទ្ររហ័សយោធាប៉ារ៉ា (RSF) កំពុងតែធ្វើសង្រ្គាមទល់នឹងយោធាស៊ូដង់ អស់ជាង ២ឆ្នាំមកហើយ ហើយថ្មីៗនេះ ការប្រយុទ្ធផ្ដោតទៅកាន់តំបន់ Kordofan ដែលសម្បូរដោយប្រេង បន្ទាប់ពីយោធាប៉ារ៉ា RSF បានកាន់កាប់ក្រុង Al-Fasher នៅតំបន់ Darfur។ យោងតាមអង្គការសហប្រជាជាតិ ជម្លោះនៅស៊ូដង់ បានសម្លាប់មនុស្សយ៉ាងតិច ៤ម៉ឺននាក់ហើយ និងបង្កើតវិបត្តិមនុស្សធម៌ដ៏អាក្រក់បំផុតរបស់ពិភពលោក ជាមួយនឹងមនុស្សជាង ១៤លាននាក់ រត់ភៀសខ្លួនពីអំពើហិង្សា៕

នាវាផ្ទុកយន្តហោះទំនើបបំផុតរបស់ប្រទេសចិន បើកឆ្លងកាត់ច្រកសមុទ្រតៃវ៉ាន់ដ៏រសើប

អាជ្ញាធរការពារជាតិរបស់កោះតៃវ៉ាន់ បាននិយាយនៅថ្ងៃពុធ (១៧ ធ្នូ) នេះថា នាវាផ្ទុកយន្តហោះថ្មីបំផុត និងទំនើបបំផុតរបស់ប្រទេសចិន ឈ្មោះថានាវា ហ៊្វូជាន បានធ្វើដំណើរឆ្លងកាត់ច្រកសមុទ្រតៃវ៉ាន់ កាលពីថ្ងៃអង្គារកន្លងទៅ ដែលជាការបើកឆ្លងកាត់ផ្លូវទឹកដ៏រសើបនេះជាលើកដំបូង ចាប់តាំងពីនាវាហ្វ៊ូជាន ចូលបម្រើការជាផ្លូវការក្នុងយោធាជើងទឹកចិន កាលពីខែមុន។តំបន់តៃវ៉ាន់ ដែលប្រទេសចិន ចាត់ទុកថាជាទឹកដីរបស់ខ្លួន បានរាយការណ៍ពីសកម្មភាពយោធាចិនស្ទើរតែរាល់ថ្ងៃនៅជុំវិញកោះ ក្នុងយុទ្ធនាការដាក់សម្ពាធជាបន្តបន្ទាប់។ ក្នុងសេចក្តីថ្លែងការណ៍មួយ អាជ្ញាធរការពារជាតិតៃវ៉ាន់បាននិយាយថា នាវាចម្បាំង ហ៊្វូជាន បានបើកឆ្លងកាត់ច្រកសមុទ្រ ហើយកងកម្លាំងកោះតៃវ៉ាន់ ក៏បានតាមដានដែរ។ទីក្រុងប៉េកាំងនិយាយថា មានតែចិនទេដែលមានអធិបតេយ្យភាពលើច្រកសមុទ្រនេះ ដែលជាសរសៃឈាមផ្លូវសមុទ្រដ៏សំខាន់សម្រាប់ចរាចរណ៍ទំនិញ។ កាលពីខែកញ្ញាកន្លងទៅ នាវាផ្ទុកយន្តហោះហ៊្វូជាន ដដែលនេះ បានឆ្លងកាត់ច្រកសមុទ្រតៃវ៉ាន់ ម្ដងរួចមកហើយ និងចូលទៅក្នុងសមុទ្រចិនខាងត្បូងដែលមានជម្លោះ ក្នុងអំឡុងពេលសាកល្បង។ហ៊្វូជានគឺជានាវាផ្ទុកយន្តហោះទី៣ របស់ចិន ដែលមានផ្ទៃបន្ទុករាបស្មើ និងឧបករណ៍អេឡិចត្រូម៉ាញ៉េទិច ដើម្បីងាយស្រួលបង្ហោះយន្តហោះ ដែលធ្វើឱ្យនាវានេះ ក្លាយជាអាវុធកងទ័ពជើងទឹកដ៏មានអានុភាពជាងនាវាផ្ទុកយន្តហោះ ២គ្រឿងដំបូងរបស់ចិន ដែលរចនាឡើងដោយរុស្ស៊ី៕

សកម្មភាពមនុស្សធម៌ត្រូវបានផ្អាកក្នុងក្រុងចំនួន២ក្រោយការប៉ះទង្គិចនៅSouth Kivu ប្រទេសកុងហ្គោ

អ្នកនាំពាក្យអង្គការសហប្រជាជាតិបាននិយាយកាលពីថ្ងៃអង្គារថា បន្ទាប់ពីការប៉ះទង្គិចគ្នានៅក្នុងតំបន់ជាច្រើននៃខេត្ត South Kivu ភាគខាងកើតសាធារណរដ្ឋប្រជាធិបតេយ្យកុងហ្គោ(DRC) សកម្មភាពមនុស្សធម៌ទាំងអស់នៅតែត្រូវបានផ្អាកនៅក្នុងក្រុង Fizi និងក្រុង Baraka។លោក Farhan Haq អ្នកនាំពាក្យរងរបស់អគ្គលេខាធិការអង្គការសហប្រជាជាតិ បាននិយាយនៅក្នុងសន្និសីទសារព័ត៌មានប្រចាំថ្ងៃ ដោយដកស្រង់សម្តីពីការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌(OCHA)ថា អំពើហិង្សាចុងក្រោយ បានបង្កឲ្យមានការភ័យខ្លាចក្នុងចំណោមជនស៊ីវិល ហើយដៃគូរបស់អង្គការសហប្រជាជាតិ បានរាយការណ៍ពីការចូលលួចជំនួយដោយក្រុមជនប្រដាប់អាវុធ។អាជ្ញាធរតំបន់បានប៉ាន់ប្រមាណថា ចាប់តាំងពីថ្ងៃទី៨ ខែធ្នូមក មនុស្សប្រហែល ១១០.០០០នាក់ បានភៀសខ្លួនទៅកាន់តំបន់ផ្សេងៗនៃខេត្ត South Kivu ខណៈអ្នកផ្សេងទៀតបានឆ្លងកាត់ចូលទៅក្នុងប្រទេសប៊ូរុនឌី។ លោក Haq និយាយថា អង្គការ OCHA បន្តចូលរួមជាមួយគ្រប់ភាគីទាំងអស់ ដើម្បីសម្រួលដល់សកម្មភាពសុវត្ថិភាពរបស់ក្រុមមនុស្សធម៌ និងបន្តប្រតិបត្តិការជំនួយ។ទន្ទឹមនឹងនេះ មនុស្សជាង ៧៨.០០០ នាក់ រួមទាំងអ្នកស្វែងរកសិទ្ធិជ្រកកោន អ្នកវិលត្រឡប់ និងជនអន្តោប្រវេសន៍ បានឆ្លងចូលទៅក្នុងប្រទេសប៊ូរុនឌីពីខេត្តSouth Kivu ចាប់តាំងពីថ្ងៃទី ៥ ខែធ្នូ នេះបើយោងតាមអ្នកនាំពាក្យរបស់ទីភ្នាក់ងារជនភៀសខ្លួនអង្គការសហប្រជាជាតិ។យោងតាមអ្នកនាំពាក្យបានឲ្យដឹងថា ករណីជំងឺអាសន្នរោគរាប់សិបករណី និងករណីជំងឺអុតស្វាយពីរករណី ត្រូវបានរាយការណ៍នៅក្នុងតំបន់ភៀសខ្លួន Gatumba ដែលនៅជិតព្រំដែនជាមួយសាធារណរដ្ឋប្រជាធិបតេយ្យកុងហ្គោ ហើយដៃគូអង្គការសហប្រជាជាតិដែលធ្វើការក្នុងវិស័យសុខាភិបាល កំពុងព្យាយាមទប់ស្កាត់ និងគ្រប់គ្រងការផ្ទុះឡើងជំងឺនេះ។

អូស្ត្រាលី ចោទខ្មាន់កាំភ្លើងក្នុងការបាញ់ប្រហារនៅឆ្នេរស៊ីដនី ពីបទព្រហ្មទណ្ឌ ៥៩ករណី រួមទាំងភេរវកម្ម

អូស្ត្រាលី បាននិយាយនៅថ្ងៃពុធ (១៧ ធ្នូ) នេះថា ពួកគេបានសម្រេចចោទប្រកាន់ជាផ្លូវការលើបុរសខ្មាន់កាំភ្លើងម្នាក់ ក្នុងការការបាញ់ប្រហារទ្រង់ទ្រាយធំលើព្រឹត្តិការណ៍ជនជាតិជ្វីហ្វមួយ នៅឆ្នេរ Bondi ទីក្រុងស៊ីដនី ពីបទព្រហ្មទណ្ឌចំនួន ៥៩ករណី រួមទាំង ១៥ករណីពីបទឃាតកម្ម និងប្រព្រឹត្តអំពើភេរវកម្ម ស្របពេលពិធីបុណ្យសពជនរងគ្រោះក្នុងការវាយប្រហារកាលពីថ្ងៃអាទិត្យកន្លងទៅ បានចាប់ផ្តើម។ខ្មាន់កាំភ្លើង ២នាក់ ដែលជាឪពុកនិងកូនប្រុស បានបើកការបាញ់ប្រហារនៅក្នុងពិធីបុណ្យ Hanukkah របស់ជនជាតិជ្វីហ្វ នៅលើឆ្នេរដ៏ល្បីល្បាញរបស់ទីក្រុងស៊ីដនី កាលពីថ្ងៃអាទិត្យចុងសប្ដាហ៍មុន សម្លាប់មនុស្សជាច្រើន ដោយនោះជាការវាយប្រហារដ៏កក្រើកនៅអូស្រ្តាលី និងបង្កើនភាពភ័យខ្លាចនៃទំនោរប្រឆាំងជនជាតិជ្វីហ្វ និងភាពជ្រុលនិយមហិង្សា។ជនល្មើសដែលជាឪពុក ឈ្មោះ Sajid Akram វ័យ ៥០ឆ្នាំ ត្រូវបាននគរបាលបាញ់សម្លាប់ នៅនឹងកន្លែង ខណៈកូនប្រុសអាយុ ២៤ ឆ្នាំរបស់ជននោះ ដែលប្រព័ន្ធផ្សព្វផ្សាយក្នុងស្រុកដាក់ឈ្មោះថា Naveed បានភ្ញាក់ដឹងខ្លួនពីសន្លប់នៅថ្ងៃពុធនេះ ហើយក្រុមស៊ើបអង្កេតនឹងធ្វើការសាកសួរចម្លើយ។ជនត្រូវចោទ នៅក្នុងការបាញ់ប្រហារកាលពីថ្ងៃអាទិត្យនោះ ធ្លាប់បានធ្វើដំណើរទៅភាគខាងត្បូងហ្វីលីពីន ជាតំបន់មួយដែលរួមរឹតដោយក្រុមសកម្មប្រយុទ្ធអ៊ិស្លាមនិយមជាយូរមកហើយ។ ការធ្វើដំណើរនេះកើតឡើងត្រឹមតែប៉ុន្មានសប្តាហ៍ប៉ុណ្ណោះ មុនការបាញ់ប្រហារ ដែលនគរបាលអូស្ត្រាលីនិយាយថា ហាក់ដូចជាត្រូវបានជំរុញដោយក្រុមរដ្ឋអ៊ិស្លាម៕

អ៊ីស្រាអែល បដិសេធមិនឱ្យសមាជិកសភាកាណាដាដែលព្យាយាមចូលទៅតំបន់ West Bank

ក្រុមសង្គមស៊ីវិលកាណាដានិយាយថា អ៊ីស្រាអែលបានបដិសេធមិនឱ្យក្រុមសមាជិកសភាកាណាដាមួយក្រុមដែលព្យាយាមចូលទៅដល់តំបន់កាន់កាប់ West Bank ដើម្បីជួបពិភាក្សាជាមួយអាជ្ញាធរប៉ាឡេស្ទីន និងក្រុមតស៊ូមតិសិទ្ធិមនុស្ស។ក្រុមប្រឹក្សាជាតិមូស្លីមកាណាដា(NCCM) បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា សមាជិកសភាកាណាដាចំនួន៦នាក់កំពុងព្យាយាមទៅដល់តំបន់ West Bank ពីប្រទេសហ្ស៊កដានី ដែលនៅជិតខាង នៅពេលនោះអាជ្ញាធរអ៊ីស្រាអែល បានបដិសេធ ហើយឲ្យពួកគេឲ្យត្រឡប់ទៅវិញ។ក្រុមប្រឹក្សាជាតិមូស្លីមកាណាដា(NCCM) និយាយថា សមាជិកសភា ដែលកំពុងធ្វើដំណើរជាមួយមេដឹកនាំសហគមន៍កាណាដា ជាផ្នែកមួយនៃដំណើរទស្សនកិច្ចរៀបចំដោយ The Canadian-Muslim Vote ជាក្រុមមិនស្វែងរកប្រាក់ចំណេញ ត្រូវបានគេប្រាប់ថា ពួកគេត្រូវបានចាត់ទុកថាជា «ការគំរាមកំហែងដល់សុវត្ថិភាពសាធារណៈ»។ លោក Stephen Brown នាយកប្រតិបត្តិក្រុមប្រឹក្សាជាតិមូស្លីមកាណាដា(NCCM) បាននិយាយនៅក្នុងសេចក្តីថ្លែងការណ៍ថា «ការវិវត្តន៍នេះ គួរឱ្យព្រួយបារម្ភ និងខកចិត្តយ៉ាងខ្លាំង»។លោកនិយាយថា «អាជ្ញាធរអ៊ីស្រាអែល បានចេញការអនុញ្ញាតធ្វើដំណើរដោយចុះឈ្មោះតាមប្រព័ន្ធអនឡាញដល់សមាជិកទាំងអស់នៃគណៈប្រតិភូ ប៉ុន្តែអ្នកសង្កេតការណ៍ស្របច្បាប់ រួមទាំងមន្ត្រីកាណាដាជាប់ឆ្នោត ត្រូវបានហាមឃាត់មិនឱ្យចូល ព្រោះជា «ការគំរាមកំហែងដល់សុវត្ថិភាពសាធារណៈ»។

រដ្ឋនៅអូស្ត្រាលី នឹងអនុម័តច្បាប់គ្រប់គ្រងអាវុធបន្ទាន់ ក្រោយការបាញ់ប្រហារនៅឆ្នេរ Bondi

មេដឹកនាំរដ្ឋ New South Wales របស់ប្រទេសអូស្ត្រាលី បាននិយាយនៅថ្ងៃពុធ ទី១៧ ខែធ្នូនេះ ថា លោកនឹងកោះប្រជុំសភានៅសប្តាហ៍ក្រោយ ដើម្បីអនុម័តកំណែទម្រង់ដ៏ទូលំទូលាយនៃច្បាប់គ្រប់គ្រងអាវុធ និងការតវ៉ា ប៉ុន្មានថ្ងៃបន្ទាប់ពីការបាញ់ប្រហារទ្រង់ទ្រាយធំបំផុតមួយនៅក្នុងប្រទេស។ខ្មាន់កាំភ្លើងជាពុកនិងកូនប្រុសតាមដែលត្រូវបានចោទប្រកាន់ថាបានបើកការបាញ់ប្រហារនៅក្នុងពិធីបុណ្យ Hanukkah របស់ជនជាតិជ្វីហ្វនៅលើឆ្នេរ Bondi ដ៏ល្បីល្បាញរបស់ទីក្រុងស៊ីដនី កាលពីថ្ងៃអាទិត្យ ទី១៤ ខែធ្នូ ក្នុងការវាយប្រហារមួយដែលបានធ្វើឱ្យប្រទេសរង្គោះរង្គើ និងបង្កើនការព្រួយបារម្ភនៃការប្រឆាំងជ្វីហ្វ និងភាពជ្រុលនិយមហិង្សា។ពិធីបុណ្យសពរបស់ជនរងគ្រោះជ្វីហ្វក្នុងការវាយប្រហារកាលពីថ្ងៃអាទិត្យ បានចាប់ផ្តើមនៅថ្ងៃពុធនេះ ក្នុងពេលមានកំហឹងជុំវិញរបៀបដែលខ្មាន់កាំភ្លើងម្នាក់ក្នុងចំណោម២នាក់ត្រូវបានស៊ើបអង្កេតភ្លាមៗចំពោះការជាប់ពាក់ព័ន្ធជាមួយក្រុមជ្រុលនិយម។នាយករដ្ឋមន្ត្រីប្រចាំរដ្ឋ លោក Chris Minns បាននិយាយក្នុងសន្និសីទសារព័ត៌មានថា សភានឹងត្រឡប់មកវិញនៅថ្ងៃទី២២ ខែធ្នូ ដើម្បីស្តាប់កំណែទម្រង់ «បន្ទាន់» រួមទាំងការគ្រប់គ្រងចំនួនអាវុធដែលត្រូវបានអនុញ្ញាត។

ប្រមុខ UN ជំរុញឱ្យមានសកម្មភាពសកលឡើងវិញលើកំណើនវិបត្តិជនភៀសខ្លួនទូទាំងពិភពលោក

អគ្គលេខាធិការអង្គការសហប្រជាជាតិ លោក Antonio Guterres បានព្រមានកាលពីថ្ងៃចន្ទសប្ដាហ៍នេះថា ស្ថានភាពជនភៀសខ្លួនសកល កាន់តែអាក្រក់ទៅនាពេលថ្មីៗនេះ ដោយលើកឡើងពីជម្លោះដែលកំពុងកើនឡើងគ្រប់ទិសទី កំណើនជនភៀសខ្លួន ការគ្រប់គ្រងព្រំដែនកាន់តែតឹងរ៉ឹង និងការកាត់បន្ថយថវិកាមនុស្សធម៌យ៉ាងច្រើន ខណៈលោកជំរុញឱ្យមានសកម្មភាពជាសកលឡើងវិញ។ការអំពាវនាវរបស់ប្រមុខ UN រូបនេះ កើតឡើងស្របពេលព្រឹត្តិការណ៍ “ការពិនិត្យវឌ្ឍនភាពនៃវេទិកាជនភៀសខ្លួនសកលលើកទីពីរ” ដែលរៀបចំឡើងដោយទីភ្នាក់ងារជនភៀសខ្លួនអង្គការសហប្រជាជាតិ (UNHCR) និងរដ្ឋាភិបាលស្វីស បានចាប់ផ្តើមនៅទីក្រុងហ្សឺណែវ។ថ្លែងក្នុងកិច្ចប្រជុំនេះតាមសារជាវីដេអូ លោក Guterres បានសង្កត់ធ្ងន់លើតម្រូវការនៃការគាំទ្រកាន់តែច្រើន សម្រាប់ប្រទេសដែលទទួលជនភៀសខ្លួន ដោយកត់សម្គាល់ថា ប្រទេសដែលមានចំណូលទាប និងមធ្យម បានផ្តល់ជម្រកដល់ជនភៀសខ្លួនជិត ៣ភាគ៤ នៃពិភពលោក។ដោយអំពាវនាវឱ្យមានកិច្ចប្រឹងប្រែងកាន់តែខ្លាំងដើម្បីគិតគូរដល់ជនភៀសខ្លួននៅសេដ្ឋកិច្ចក្នុងតំបន់ និងលើកកម្ពស់ការទីពឹងខ្លួន លោក Guterres បានជំរុញឱ្យបន្តកិច្ចសហប្រតិបត្តិការសកល “ដើម្បីវិនិយោគលើជនភៀសខ្លួន និងសហគមន៍ទាំងនោះ ព្រមទាំងការពារ និងលើកកម្ពស់សិទ្ធិស្វែងរកសិទ្ធិជ្រកកោន ដែលជាសសរស្តម្ភជាមូលដ្ឋាននៃច្បាប់អន្តរជាតិ”៕

គណបក្សភឿថៃ តែងតាំងក្មួយប្រុសរបស់លោក ថាក់ស៊ីន ជាបេក្ខភាពនាយករដ្ឋមន្ត្រី ក្នុងការបោះឆ្នោត

ការបោះឆ្នោតសកលក្នុងប្រទេសថៃ នៅសល់តែប៉ុន្មានខែទៀតប៉ុណ្ណោះ ពេលនេះ គណបក្សភឿថៃ ដែលអតីតមេដឹកនាំមហាសេដ្ឋីរបស់ខ្លួនកំពុងជាប់ពន្ធនាគារ បានងាកទៅរកសមាជិកម្នាក់ទៀតនៃត្រកូលស៊ីណាវ៉ាត់ ដ៏បែកបាក់ ដែលមានបទពិសោធន៍តិចតួចក្នុងនយោបាយ ដើម្បីជួយឱ្យបក្សរបស់ខ្លួនងើបមុខឡើងវិញ។គណបក្សភឿថៃ កាលពីថ្ងៃអង្គារ (១៦ ធ្នូ) បានដាក់ឈ្មោះ លោក Yodchanan Wongsawat វ័យ ៤៦ឆ្នាំ ដែលជាក្មួយប្រុសរបស់លោក ថាក់ស៊ីន ស៊ីណាវ៉ាត់ ឱ្យធ្វើជាបេក្ខជននាំមុខគេក្នុងចំណោមបេក្ខជនទាំង ៣រូប របស់បក្សនេះ សម្រាប់តំណែងនាយករដ្ឋមន្រ្តី ក្នុងការបោះឆ្នោតសកលនៅថ្ងៃទី៨ ខែកុម្ភៈ ខាងមុខ។ លោក Yodchanan ជាកូនប្រុសរបស់អតីតនាយករដ្ឋមន្ត្រី Somchai Wongsawat ជាមួយប្អូនស្រីលោក ថាក់ស៊ីន គឺលោកស្រី Yaowapa Wongsawat។អ្នកនយោបាយថៃដ៏ចម្រូងចម្រាស លោក ថាក់ស៊ីន កំពុងអនុវត្តទោសក្នុងពន្ធនាគាររយៈពេល ១ឆ្នាំកាលពីខែកញ្ញា។ កូនស្រីរបស់លោក ថាក់ស៊ីន គឺលោកស្រី ផែថងថាន ស៊ីណាវ៉ាត់ ក៏ត្រូវបានបណ្តេញចេញពីតំណែងនាយករដ្ឋមន្ត្រី ដោយដីការបស់តុលាការ កាលពីខែសីហា ផងដែរ។អត្រាគាំទ្ររបស់បក្សភឿថៃ បានធ្លាក់ចុះយ៉ាងខ្លាំងក្នុងអំឡុងពេលនៃចលាចលផ្ទៃក្នុង ហើយនៅខែធ្នូនេះទទួលបានការគាំទ្រត្រឹមតែ ១១,០៤% ប៉ុណ្ណោះ ក្នុងការស្ទង់មតិទូទាំងប្រទេស ដែលធ្វើឡើងដោយវិទ្យាស្ថានមួយ ពោលគឺធ្លាក់ចុះពីអត្រា ១៣,៩៦% ក្នុងខែកញ្ញា និង ២៨,០៥% ក្នុងខែមីនា៕

ក្រុមហាម៉ាសកំណត់តួនាទីអន្តរជាតិក្នុងដែនដីហ្កាហ្សា ខណៈអ៊ីស្រាអែលបំពានបទឈប់បាញ់ជាង៨០០លើក

ក្រុមហាម៉ាសបានច្រានចោលវត្តមានកងកម្លាំងសន្តិសុខបរទេសណាមួយក្នុងដែនដីហ្កាហ្សា ស្ទ្រីប ដោយសង្កត់ធ្ងន់ថា តួនាទីអន្តរជាតិ នឹងត្រូវបានកំណត់ដើម្បីត្រួតពិនិត្យបទឈប់បាញ់តាមព្រំដែនតែប៉ុណ្ណោះ។ លោក Hussam Badran សមាជិកការិយាល័យនយោបាយរបស់ក្រុមហាម៉ាស បានប្រាប់ទីភ្នាក់ងារសារព័ត៌មាន Sputnik របស់រុស្ស៊ី កាលពីថ្ងៃអង្គារ ១៦ធ្នូសប្ដាហ៍នេះថា ក្រុមប៉ាឡេស្ទីនទាំងអស់ បានស្របគំនិតគ្នាចំពោះបញ្ហានេះ ។ លោកថា តំបន់ហ្កាហ្សានឹងត្រូវបានរៀបចំផ្ទៃក្នុង ដោយពន្យល់ថា គណៈកម្មាធិការនៃក្រុមជំនាញ នឹងគាំទ្រកិច្ចខិតខំប្រឹងប្រែងដើម្បីរក្សាស្ថិរភាព និងសណ្ដាប់ធ្នាប់សាធារណៈ។ លោក Badran ក៏បានចង្អុលបង្ហាញពីបំណងរបស់ហាម៉ាស ក្នុងការចូលរួមជាមួយប្រទេសដែលត្រូវបានចាត់ទុកថាជាមិត្តភ័ក្តិចំពោះប្រជាជនប៉ាឡេស្ទីនដែរ ខណៈច្រានចោលការចូលរួមដោយរដ្ឋដែលត្រូវបានគេរាយការណ៍ថាគាំទ្រអ៊ីស្រាអែល ក្នុងអំឡុងពេលសង្គ្រាមចុងក្រោយរបស់ខ្លួនលើតំបន់ ហ្កាហ្សា។ លោកបានទទួលស្គាល់ថា ដោយសារទំហំ និងភាពស្មុគស្មាញនៃស្ថានភាព គ្មានប្រទេសណាមួយហាក់ដូចជាត្រៀមខ្លួនរួចជាស្រេចដើម្បីដើរតួនាទីយ៉ាងសំខាន់នោះទេ។ទន្ទឹមនឹងនេះ ក្រុមហាម៉ាស បានចោទប្រកាន់អ៊ីស្រាអែលថាបានរំលោភលើបទឈប់បាញ់ម្តងហើយម្តងទៀត។ នៅក្នុងសេចក្តីថ្លែងការណ៍មួយ លោក Ghazi Hamad មេដឹកនាំជាន់ខ្ពស់របស់ក្រុមហាម៉ាសនិងជាសមាជិកនៃគណៈប្រតិភូចរចា បាននិយាយថា កងកម្លាំងអ៊ីស្រាអែលបានប្រព្រឹត្តការរំលោភបំពាន៨១៣ លើក ចាប់តាំងពីកិច្ចព្រមព្រៀងនេះចូលជាធរមាន ហើយជាមធ្យមអ៊ីស្រាអែលបានបំពានប្រហែល២៥លើក ក្នុងមួយថ្ងៃ៕

សហគមន៍ជ្វីហ្វនៅទីក្រុងឡុងដ្រ៍ប្រារព្ធពិធី Hanukkah ដើម្បីបង្ហាញសាមគ្គីភាពក្រោយការវាយប្រហារនៅស៊ីដនី

សហគមន៍ជ្វីហ្វនៅទីក្រុងឡុងដ្រ៍កាលពីថ្ងៃអង្គារ ទី១៦ ខែធ្នូ បានបង្ហាញសាមគ្គីភាព និងការគាំទ្រដល់ជនរងគ្រោះក្នុងការវាយប្រហារនៅទីក្រុងស៊ីដនី ប្រទេសអូស្ត្រាលី។ ការប្រារព្ធពិធី Hanukkah នៅទីលាន Trafalgar Square ជាទីតាំងដ៏ល្បីល្បាញបំផុតមួយរបស់ទីក្រុងឡុងដ្រ៍ មានភាពរីករាយ និងមោទនភាពលាយឡំជាមួយនឹងការកាន់ទុក្ខចំពោះមនុស្ស១៥នាក់ដែលត្រូវបានសម្លាប់នៅឆ្នេរ Bondi កាលពីថ្ងៃអាទិត្យ ទី១៤ ខែធ្នូ ក្នុងការបាញ់ប្រហារទ្រង់ទ្រាយធំបំផុតមួយនៅប្រទេសអូស្ត្រាលីក្នុងរយៈពេលជិត៣០ឆ្នាំមកនេះ។នគរបាលបានកំណត់អត្តសញ្ញាណខ្មាន់កាំភ្លើងដែលត្រូវបានចោទប្រកាន់មានឈ្មោះ Sajid Akram អាយុ៥០ឆ្នាំ ត្រូវបានបាញ់សម្លាប់ដោយមន្ត្រីនគរបាល។ កូនប្រុសអាយុ២៤ឆ្នាំរបស់លោក និងជាអ្នកសមគំនិត ត្រូវបានប្រព័ន្ធផ្សព្វផ្សាយក្នុងស្រុកផ្តល់ឈ្មោះថា Naveed Akram កំពុងស្ថិតក្នុងស្ថានភាពធ្ងន់ធ្ងរនៅមន្ទីរពេទ្យបន្ទាប់ពីត្រូវបានបាញ់ឲ្យរងរបួស។បុរសម្នាក់និយាយថា «ខណៈ ខ្ញុំប្រាកដថាជនជាតិអូស្ត្រាលីនៅឆ្នេរ Bondi កំពុងកាន់ទុក្ខ ហើយយើងជាសហគមន៍ក៏កំពុងកាន់ទុក្ខចំពោះអ្នកដែលបានបាត់បង់ជីវិតនៅឆ្នេរ Bondi ដែលយើងត្រូវរំលឹកក្នុងពិធី Hanukkah»។ស្ត្រីម្នាក់និយាយ «នេះជាពិធីបុណ្យរបស់យើង យើងកំពុងប្រារព្ធវា ហើយយើងកំពុងប្រារព្ធវាសម្រាប់ជនជាតិជ្វីហ្វទាំងអស់ដែលត្រូវបានសម្លាប់នៅក្នុងប្រទេសអូស្ត្រាលី ព្រោះពួកគេមិនអាចប្រារព្ធពិធីបាននៅពេលនេះ»។

បណ្ដាញសង្គម

ព័ត៌មានថ្មីៗ

សមាគមខ្មែរក្រោមបន្តនាំយក អំណោយប្រគេនព្រះសង្ឃភៀសសឹក ១០៣ អង្គ គង់នៅវត្តខ្សាច់ស ខេត្តកោះកុង

សង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តការបាញ់ប្រហារ ដើម្បីឈ្លានពានមកលើដែនអធិបតេយ្យរបស់កម្ពុជានៅទិសយោធភូមិភាគទី៤ និងយោធភូមិភាគទី៥

ក្រសួងកសិកម្ម ជូន ផ្ទះសំណាញ់១ខ្នង និងប្រព័ន្ធស្រោចស្រព សម្រាប់ដាំដុះបន្លែជូនជនភៀសសឹក

កម្ពុជា-បារាំង ឯកភាពលើតម្រូវការក្នុងការពង្រឹងធនធានមនុស្សតាមរយៈការអប់រំឧត្តមសិក្សាកម្ពុជា

បារាំង គាំទ្រដល់កម្ពុជាក្នុងការហ្វឹកហ្វឺន និងកសាងសមត្ថភាពកងកម្លាំងរក្សាសន្តិភាពរបស់កម្ពុជា

រដ្ឋសភា បន្តចូលរួមសស្រាក់សស្រាំបរិច្ចាគថវិកា និងសម្ភារ ឧបត្ថម្ភគាំទ្រដល់វីរយុទ្ធជន និងពលរដ្ឋភៀសសឹក

រដ្ឋមន្ត្រីសុខាភិបាល «សុខភាពរបស់ប្រជាជន និងវីរកងទ័ព គឺជាអាទិភាពខ្ពស់បំផុត នៅគ្រប់កាលៈទេសៈទាំងអស់»

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877