BTV NEWS

លោក Zelenskyy បញ្ជាក់ថា «ការសម្រេចជាច្រើន» អាចធ្វើឡើងមុនឆ្នាំថ្មី នៅមុនកិច្ចប្រជុំជាមួយលោក Trump

ចិនដាក់ទណ្ឌកម្មលើក្រុមហ៊ុនការពារជាតិអាមេរិក និងបុគ្គល ពាក់ព័ន្ធការលក់អាវុធទៅឲ្យកោះតៃវ៉ាន់

ទីក្រុងសេអ៊ូល នឹងបន្ធូរបន្ថយការរឹតបន្តឹងនូវលទ្ធភាពចូលទៅកាន់សារព័ត៌មានកូរ៉េខាងជើង

រដ្ឋមន្ត្រីការបរទេស៖ នីហ្សេរីយ៉ាផ្តល់ការស៊ើបការណ៍សម្ងាត់ដល់អាមេរិក ដើម្បីវាយប្រហារក្រុមសកម្មប្រយុទ្ធ

ព័ត៌មានអន្តរជាតិ

តម្លៃប្រេងកើនឡើងជាង១% ក្រោយលោក Trump បញ្ជាឱ្យបិទផ្លូវនាវាដឹកប្រេងជាប់ទណ្ឌកម្ម មិនឱ្យចេញ ចូល វ៉េណេស៊ុយអេឡា

តម្លៃប្រេងបានកើនឡើងជាង១% នៅថ្ងៃពុធ១៧ធ្នូនេះ បន្ទាប់ពីប្រធានាធិបតីអាមេរិក លោក Donald Trump បានបញ្ជាឱ្យបិទផ្លូវនាវាដឹកប្រេងជាប់ទណ្ឌកម្មទាំងស្រុង ទាំងចូល និងចេញ ពីប្រទេសវ៉េណេស៊ុយអេឡា ដែលបង្កើនភាពតានតឹងភូមិសាស្ត្រនយោបាយថ្មី ពេលមានការព្រួយបារម្ភពីតម្រូវការ។ភាគហ៊ុនប្រេងឆៅ Brent របស់អាមេរិក បានកើនឡើង៧០ សេន ឬ ១,២% នៅតម្លៃ ៥៩,៦២ ដុល្លារក្នុងមួយបារ៉ែល នៅម៉ោង ២ និង៤៥នាទីម៉ោងសកល ខណៈប្រេងឆៅ West Texas Intermediate របស់សហរដ្ឋអាមេរិកដែរ បានកើនឡើង៧៣ សេន ឬ១,៣% ដល់តម្លៃ ៥៦ ដុល្លារក្នុងមួយបារ៉ែល។តម្លៃប្រេងបានធ្លាក់ចុះជិតដល់កម្រិតទាបបំផុតក្នុងរយៈពេលប្រាំឆ្នាំនៅក្នុងវគ្គមុន ស្តីពីវឌ្ឍនភាពនៃការចរចាសន្តិភាពរវាងរុស្ស៊ី និងអ៊ុយក្រែន ខណៈកិច្ចព្រមព្រៀងមួយអាចមើលឃើញទណ្ឌកម្មរបស់លោកខាងលិចលើទីក្រុងមូស្គូត្រូវបានបន្ធូរបន្ថយ ដោយធ្វើឱ្យការផ្គត់ផ្គង់មានភាពធូរស្រាល ទោះបីជាទីផ្សារកំពុងតស៊ូជាមួយនឹងតម្រូវការសកលដ៏ផុយស្រួយក៏ដោយ។កាលពីថ្ងៃអង្គារ១៦ធ្នូសប្ដាហ៍នេះ លោក Trump បានបញ្ជាឱ្យបិទផ្លូវនាវាដឹកប្រេងទាំងអស់ដែលជាប់ទណ្ឌកម្ម ទាំងចូលទាំងចេញ ពីប្រទេសវ៉េណេស៊ុយអេឡា ដោយបន្ថែមថា លោកឥឡូវនេះចាត់ទុកក្រុមអ្នកគ្រប់គ្រងប្រទេសនេះជាអង្គការភេរវករបរទេស។យោងតាមក្រុមហ៊ុនជួញដូរប្រេងមួយរបស់អាមេរិកបានឲ្យដឹងថា ចំណាត់ការនេះអាចប៉ះពាល់ដល់ប្រេងចំនួន ចន្លោះពី០,៤ទៅ០,៥ លានបារ៉ែលក្នុងមួយថ្ងៃ ដែលធ្វើឱ្យតម្លៃកើនឡើងពី ១ទៅ២ ដុល្លារក្នុងមួយបារ៉ែល៕

UN និងប៉ាឡេស្ទីនព្រមានថា ការកម្ទេចអគារលំនៅឋាននៅតំបន់ West Bank អាចធ្វើឱ្យមនុស្សរាប់រយនាក់ភៀសខ្លួនជាអចិន្ត្រៃយ៍

មន្ត្រីប៉ាឡេស្ទីនបានព្រមានអំពី ការផ្លាស់ទីលំនៅដោយបង្ខំ បន្ទាប់ពីយោធាអ៊ីស្រាអែលបានបញ្ជាឱ្យមានការវាយកម្ទេចអគារលំនៅឋានជាបន្តបន្ទាប់ក្នុងតំបន់ West Bank ដែលខ្លួនកាន់កាប់ ដោយលើកឡើងពីសន្តិសុខ និង តម្រូវការប្រតិបត្តិការ។ នាយកដ្ឋានកិច្ចការជនភៀសខ្លួនប៉ាឡេស្ទីនបានថ្កោលទោសការសម្រេចចិត្តរបស់អាជ្ញាធរអ៊ីស្រាអែលក្នុងការរុះរើអគារលំនៅដ្ឋានចំនួន២៥កន្លែង ក្នុងជំរំជនភៀសខ្លួន Nur Shams ជិតទីក្រុង Tulkarem ក្នុងតំបន់ West Bank ដោយហៅថាជា ការរំលោភបំពានច្បាប់មនុស្សធម៌អន្តរជាតិយ៉ាងច្បាស់ នៅក្នុងសេចក្តីថ្លែងការណ៍មួយកាលពីថ្ងៃអង្គារ ១៦ធ្នូ សប្ដាហ៍នេះ។ ដោយអំពាវនាវឱ្យសហគមន៍អន្តរជាតិធ្វើអន្តរាគមន៍ នាយកដ្ឋាននេះ និយាយថា គោលនយោបាយរុះរើជាប្រព័ន្ធនៅក្នុងជំរំ Nur Shams នឹងឈានទៅរកការបង្ខំឱ្យផ្លាស់ទីលំនៅរបស់គ្រួសាររាប់សិប ជាផ្នែកមួយនៃផែនការមួយដែលមានគោលបំណងបោសសម្អាតជំរំប៉ាឡេស្ទីន និងលុបបំបាត់អត្ថិភាពរបស់ពួកគេ និងដាក់ការគ្រប់គ្រងរយៈពេលវែង ដែលជាផ្នែកមួយនៃផែនការទូលំទូលាយដើម្បីបញ្ចូលតំបន់ West Bank ក្នុងឧបសម្ព័ន្ធរបស់ខ្លួន រួមទាំងទីក្រុងហ្សេរុយសាឡឹមខាងកើត ផងដែរ។លោក Roland Friedrich នាយកកិច្ចការរបស់ទីភ្នាក់ UNRWA នៅតំបន់ West Bank បាននិយាយក្នុងសារបង្ហោះមួយនៅលើបណ្ដសញសង្គមX កាលពីថ្ងៃចន្ទដើមសប្ដាហ៍នេះថា ការរុះរើទាំងនេះ នឹងត្រូវអនុវត្តនៅថ្ងៃទី១៨ធ្នូខាងមុខនេះ។ លោកបានហៅសកម្មភាពនេះថាជាដំណឹងដ៏មហន្តរាយ ដោយនិយាយថា អគារ២៥កន្លែង ពេលនេះប្រឈមនឹងការវាយកម្ទេចចោលឆាប់ៗនេះ ដែលនឹងបណ្ដាលឲ្យមនុស្សរាប់រយនាក់ភៀសខ្លួនដោយបង្ខំ៕

កិច្ចពិភាក្សារបស់អឺរ៉ុប ដើម្បីផ្តល់មូលនិធិដល់អ៊ុយក្រែនជាមួយនឹងទ្រព្យសកម្មរបស់រុស្ស៊ីមានវឌ្ឍនភាព

អ្នកការទូតសហភាពអឺរ៉ុបបាននិយាយកាលពីថ្ងៃអង្គារទី១៦ ខែធ្នូថា សហភាពអឺរ៉ុបកំពុងមានវឌ្ឍនភាពលើរបៀបផ្តល់ហិរញ្ញប្បទានដល់ប្រទេសអ៊ុយក្រែនជាមួយនឹងទ្រព្យសកម្មរបស់រុស្ស៊ីដែលត្រូវបានបង្កក ប៉ុន្តែការសម្រេចសំខាន់ៗមួយចំនួន រួមទាំងការធានាសម្រាប់ប្រទេសបែលហ្ស៊ិក ជាកន្លែងដែលទ្រព្យសកម្មភាបភាគច្រើនត្រូវបានរក្សាទុក នឹងត្រូវបានធ្វើឡើងនៅក្នុងកិច្ចប្រជុំកំពូលសហភាពអឺរ៉ុប នៅថ្ងៃព្រហស្បតិ៍។សហភាពអឺរ៉ុប មានបំណងទុកហិរញ្ញវត្ថុសម្រាប់អ៊ុយក្រែន ព្រោះខ្លួនមើលឃើញថាសង្គ្រាមរបស់រុស្ស៊ីជាការគំរាមកំហែងដល់សន្តិសុខផ្ទាល់ខ្លួន។ ដើម្បីធ្វើដូច្នេះ រដ្ឋសហភាពអឺរ៉ុបមានគោលបំណងដាក់ឱ្យដំណើរការទ្រព្យសកម្មអធិបតេយ្យភាពរបស់រុស្ស៊ីមួយចំនួនដែលពួកគេបានបង្កកបន្ទាប់ពីការឈ្លានពានរបស់ទីក្រុងមូស្គូលើអ៊ុយក្រែនក្នុងឆ្នាំ២០២២។មានទ្រព្យសកម្មប្រហែល២១០ពាន់លានអឺរ៉ូនៅក្នុងសហភាពអឺរ៉ុប ដែលក្នុងនោះ១៨៥ពាន់លានអឺរ៉ូ នៅបែលហ្ស៊ិក ១៨ពាន់លានអឺរ៉ូនៅប្រទេសបារាំង និងចំនួនតិចជាងនេះនៅប្រទេសលុចសំបួរ អាល្លឺម៉ង់ និងស៊ុយអែត។ ប្រទេសបែលហ្ស៊ិកបាននិយាយថា ខ្លួននឹងយល់ស្របចំពោះផែនការនេះ លុះត្រាតែប្រទេសសហភាពអឺរ៉ុបផ្សេងទៀតដែលគ្រប់គ្រងទ្រព្យសកម្មរបស់រុស្ស៊ីក៏ចូលរួមផងដែរ។ អ្នកការទូតបាននិយាយថា ឯកអគ្គរដ្ឋទូតនៃរដ្ឋាភិបាលសហភាពអឺរ៉ុប បានដោះស្រាយបញ្ហានេះនៅក្នុងកិច្ចពិភាក្សាកាលពីថ្ងៃចន្ទ។

គ្រួសារជាច្រើននៅហ្កាហ្សាព្យាយាមស្តារឡើងវិញក្រោយភ្លៀងធ្លាក់ខ្លាំងបណ្តាលឲ្យមនុស្សជាង១០នាក់ស្លាប់

ប្រជាជនប៉ាឡេស្ទីននៅតំបន់ហ្កាហ្សាបានព្យាយាមដើម្បីស្តារឡើងវិញក្រោយពីភ្លៀងធ្លាក់ខ្លាំងដែលបានវាយប្រហារតំបន់នេះរយៈពេលជាច្រើនថ្ងៃ ដោយបានជន់លិចជំរំជនភៀសខ្លួន បណ្តាលឲ្យអគារបាក់រលំខណៈបានរងការខូចខាតធ្ងន់ធ្ងររួចទៅហើយនៅក្នុងសង្គ្រាមរយៈពេលពីរឆ្នាំមកនេះ និងបានបណ្តាលឲ្យមនុស្សជាង១០នាក់ស្លាប់ រួមទាំងទារកអាយុពីរសប្តាហ៍ម្នាក់ផងដែរ។ភ្លៀងធ្លាក់ខ្លាំងនៅតំបន់មួយចំនួនក្នុងតំបន់ហ្កាហ្សាក្នុងរយៈពេលមួយសប្តាហ៍កន្លងទៅនេះ បានប្រែក្លាយដីផ្លូវទៅជាដីល្បប់ និងជន់លិចតង់ក្នុងជំរំសម្រាប់ជនភៀសខ្លួន។នៅទីក្រុងហ្កាហ្សា បុរសម្នាក់បានស្លាប់កាលពីថ្ងៃអង្គារ បន្ទាប់ពីលំនៅឋានមួយខ្នងដែលរងការខូចខាតរួចទៅហើយក្នុងការវាយប្រហាររបស់អ៊ីស្រាអែល បានបាក់រលំដោយសារភ្លៀងធ្លាក់ខ្លាំង។ បុគ្គលិកសង្គ្រោះបន្ទាន់បានព្រមានដល់ប្រជាជន កុំឱ្យស្នាក់នៅក្នុងអគារដែលរងការខូចខាត ព្រោះវាអាចបាក់រលំនៅពេលណាមួយ។ ប៉ុន្តែតំបន់ភាគច្រើនត្រូវបានបំផ្លាញទៅជាគំនរបាក់បែក ហើយមានកន្លែងតិចតួចណាស់ដើម្បីគេចផុតពីទឹកភ្លៀង។

លោកTrump បញ្ជាឱ្យបិទផ្លូវទាំងស្រុងចំពោះនាវាដឹកប្រេងវ៉េណេស៊ុយអេឡាដែលជាប់ទណ្ឌកម្ម

ប្រធានាធិបតីសហរដ្ឋអាមេរិក លោក Donald Trump បានបញ្ជាឱ្យបិទផ្លូវទាំងស្រុងចំពោះនាវាដឹកប្រេងទាំងអស់ដែលត្រូវបានដាក់ទណ្ឌកម្មដោយសហរដ្ឋអាមេរិក មិនឱ្យចូលនិងចាកចេញពីប្រទេសវ៉េណេស៊ុយអេឡា។ លោក Trump និយាយថា «ចំពោះការលួចទ្រព្យសម្បត្តិរបស់យើង និងហេតុផលជាច្រើនទៀត រួមទាំងភេរវកម្ម ការរត់ពន្ធគ្រឿងញៀន និងការជួញដូរមនុស្ស របបវ៉េណេស៊ុយអេឡាត្រូវបានកំណត់ថាជាអង្គការភេរវកម្មបរទេស»។ «ដូច្នេះ ថ្ងៃនេះ ខ្ញុំបញ្ជាឱ្យបិទផ្លូវទាំងស្រុងចំពោះនាវាដឹកប្រេងទាំងអស់ដែលត្រូវបានដាក់ទណ្ឌកម្ម មិនឱ្យចូលនិងចេញពីប្រទេសវ៉េណេស៊ុយអេឡា»។ការលើកឡើងរបស់លោក Trump បានធ្វើឡើងមួយសប្តាហ៍បន្ទាប់ពីកងកម្លាំងសហរដ្ឋអាមេរិក បានរឹបអូសនាវាដឹកប្រេងមួយគ្រឿងដែលត្រូវបានដាក់ទណ្ឌកម្មនៅជិតឆ្នេរសមុទ្រវ៉េណេស៊ុយអេឡា និងខណៈដែលទីក្រុងវ៉ាស៊ីនតោន បានបញ្ជាឱ្យមានការបង្កើនកងកម្លាំងយោធាសហរដ្ឋអាមេរិកយ៉ាងច្រើននៅឆ្នេរវ៉េណេស៊ុយអេឡាក្នុងប្រតិបត្តិការមួយដែលត្រូវបានគេនិយាយថាដាក់គោលដៅសំខាន់លើការរត់ពន្ធគ្រឿងញៀន។ យោធាអាមេរិកបានសម្លាប់មនុស្សយ៉ាងហោចណាស់៩០នាក់ចាប់តាំងពីខែកញ្ញាមក ក្នុងការវាយប្រហារលើនាវារាប់សិបគ្រឿងនៅមហាសមុទ្រប៉ាស៊ីហ្វិកភាគខាងកើត និងសមុទ្រការ៉ាអ៊ីប ជិតប្រទេសវ៉េណេស៊ុយអេឡា ជាអ្វីដែលអ្នកជំនាញច្បាប់អន្តរជាតិបានរិះគន់ថាជាការសម្លាប់ក្រៅប្រព័ន្ធតុលាការ។ ទីក្រុងវ៉ាស៊ីនតោនបានអះអាងថា នាវាទាំងនោះមានជាប់ពាក់ព័ន្ធទៅនឹងការជួញដូរគ្រឿងញៀន ប៉ុន្តែពុំបានផ្តល់ភស្តុតាងដើម្បីគាំទ្រដល់ការចោទប្រកាន់របស់ខ្លួននោះទេ។

សមាជិកសភាបារាំង៖ការប្រើទ្រព្យបង្កករបស់រុស្ស៊ីពីសំណាក់អឺរ៉ុប អាចបង្កការស្មុគស្មាញដល់ការចរចាអ៊ុយក្រែន

សមាជិកសភាអឺរ៉ុបរបស់បារាំង លោក Thierry Mariani បានប្រាប់សារព័ត៌មាន TASS របស់រុស្ស៊ី ក្នុងបទសម្ភាសន៍មួយថា ការប៉ុនប៉ងរបស់សហភាពអឺរ៉ុបក្នុងការប្រើប្រាស់ទ្រព្យបង្កករបស់រុស្ស៊ី អាចបង្កភាពស្មុគស្មាញកាន់តែខ្លាំងដល់កិច្ចចរចារវាងរុស្ស៊ី-អាមេរិក ដែលកំពុងដំណើរការលើការដោះស្រាយជម្លោះអ៊ុយក្រែន។ សមាជិកសភាអឺរ៉ុបរូបនេះ បានពន្យល់ថា ខណៈរុស្ស៊ី និងសហរដ្ឋអាមេរិក កំពុងចរចាឆ្ពោះទៅរកការឈានដល់កិច្ចព្រមព្រៀងសន្តិភាព អឺរ៉ុបដែលត្រូវបានដកចេញពីការចូលរួមដោយសារតែជំហរលំអៀងខ្លាំងពេករបស់ទីក្រុងព្រុចសែល បានរកឃើញថាខ្លួនឯងត្រូវបានទុកចោលមួយឡែក។ លោកបន្តថា ដោយសារតែមិនអាចរឹបអូសទ្រព្យសម្បត្តិរុស្ស៊ីដែលត្រូវបានបង្កកដោយស្របច្បាប់ដោយសារតែច្បាប់ ក្នុងការបោះឆ្នោតនៃការឯកភាពគ្នានៅក្រុមប្រឹក្សាអឺរ៉ុប និងការប្រឆាំងពីបែលហ្ស៊ិក ជាទីដែលទ្រព្យសម្បត្តិចំនួន ១៨០ ពាន់លានអឺរ៉ូត្រូវបានកាន់កាប់ដោយស្ថាប័នផ្ដល់ហិរញ្ញវត្ថុសកល Euroclear ពួកគេបានបង្កើតល្បិចនេះដើម្បីគេចវេះច្បាប់។អ្នកនយោបាយបារាំងដដែល បានបដិសេធវិធីសាស្រ្តនេះ ដែលលោកថាមិនត្រូវបានគាំទ្រដោយច្បាប់ ឬការពិតការទូតណាមួយឡើយ ថាជារឿងមិនត្រឹមត្រូវ។ លោកខ្លាចថា នេះអាចធ្វើឱ្យកិច្ចពិភាក្សាសន្តិភាពដែលកំពុងដំណើរការដឹកនាំដោយអាមេរិកកាន់តែស្មុគស្មាញ ឬធ្វើឲ្យជម្លោះអូសបន្លាយ។នៅថ្ងៃទី១២ ខែធ្នូ សហភាពអឺរ៉ុបបានយល់ព្រមបង្កកទ្រព្យសម្បត្តិធនាគារកណ្តាលរុស្ស៊ីដែលមាននៅនៅអឺរ៉ុបដោយគ្មានកំណត់។ គណៈកម្មការអឺរ៉ុបសង្ឃឹមថានឹងទទួលបានការសម្រេចចិត្តក្នុងកិច្ចប្រជុំកំពូលថ្ងៃទី១៨-១៩ ខែធ្នូ ដើម្បីដកហូតទ្រព្យសម្បត្តិរុស្ស៊ីចំនួន ២១០ ពាន់លានអឺរ៉ូ ដែលក្នុងនោះ ១៨៥ ពាន់លានអឺរ៉ូត្រូវបានរារាំងនៅលើវេទិកា Euroclear ក្នុងប្រទេសបែលហ្ស៊ិក។ បែលហ្ស៊ិកប្រឆាំងនឹងការសម្រេចចិត្តនេះ ដោយនិយាយថាវានឹងធ្វើឱ្យប៉ះពាល់ដល់ទំនុកចិត្តសកលលើស្ថាប័នហិរញ្ញវត្ថុដែលមានមូលដ្ឋាននៅសហភាពអឺរ៉ុប៕

លោក Hegseth៖ អាមេរិកនឹងមិនបញ្ចេញវីដេអូទាំងស្រុងជាសាធារណៈនៃការវាយប្រហារតាមទូករបស់វ៉េណេស៊ុយអេឡាទេ

លោក Pete Hegseth រដ្ឋមន្ត្រីក្រសួងការពារជាតិអាមេរិក បាននិយាយថា សមាជិកសភាអាមេរិកមួយក្រុមនឹងត្រូវបានមើលឃើញវីដេអូទាំងស្រុង ដែលមិនទាន់បានកែសម្រួលនៃការវាយប្រហារតាមទូកដ៏ចម្រូងចម្រាសកាលពីខែកញ្ញានៅសមុទ្រការ៉ាអ៊ីប។លោក Hegseth បានប្រាប់អ្នកសារព័ត៌មានបន្ទាប់ពីកិច្ចប្រជុំសម្ងាត់សម្រាប់សមាជិកព្រឹទ្ធសភាកាលពីថ្ងៃអង្គារ ១៦ធ្នូសប្ដាហ៍នេះថា គណៈកម្មាធិការសភាសមស្របនឹងត្រូវបានអនុញ្ញាតឱ្យមើលវីដេអូនោះ ប៉ុន្តែមិនមែនសាធារណជនទូទៅទេ។លោក Marco Rubio រដ្ឋមន្ត្រីការបរទេសក៏បានចូលរួមក្នុងកិច្ចប្រជុំស្តីពីការវាយប្រហារតាមអាកាសរបស់រដ្ឋបាលលោក Trump លើទូកដែលបានចោទប្រកាន់ពីបទដឹកគ្រឿងញៀនរបស់វ៉េណេស៊ុយអេឡា និងសកម្មភាពយោធាផ្សេងទៀតនៅសមុទ្រការ៉ាអ៊ីប ផងដែរ។ បន្ទាប់ពីកិច្ចប្រជុំ សមាជិកសភាមកពីគណបក្សសាធារណរដ្ឋភាគច្រើន បាននិយាយថា ពួកគេចង់ឱ្យសេតវិមានបន្តកិច្ចខិតខំប្រឹងប្រែងរបស់ខ្លួន ខណៈក្រុមអ្នកប្រជាធិបតេយ្យ បានលើកឡើងនូវសំណួរអំពីភាពស្របច្បាប់នៃការវាយប្រហារដែលបានសម្លាប់មនុស្សយ៉ាងហោចណាស់ ៩០ នាក់។ត្រឹមតែប៉ុន្មានម៉ោងមុនកិច្ចប្រជុំនៅវិមាន Capitol Hill យោធាសហរដ្ឋអាមេរិកបានប្រកាសថា ខ្លួនបានបើកការវាយប្រហារលើទូកចំនួនបីនៅមហាសមុទ្រប៉ាស៊ីហ្វិក ដោយបានសម្លាប់មនុស្ស៨នាក់៕

អាល្លឺម៉ង់៖ ក្រោមការធានាសន្តិសុខអ៊ុយក្រែន ទ័ពលោកខាងលិច អាចនឹងវាយរុញទ័ពរុស្ស៊ី ក្រោយបទឈប់បាញ់

អធិការបតីអាល្លឺម៉ង់ លោក Friedrich Merz បានប្រាប់ទូរទស្សន៍រដ្ឋ ZDF ក្នុងបទសម្ភាសន៍មួយថា នៅក្រោមការធានាសន្តិសុខក្រោយបទឈប់បាញ់ ដែលផ្តល់ដោយសហរដ្ឋអាមេរិកនិងអឺរ៉ុប សម្រាប់អ៊ុយក្រែន កងកម្លាំងរក្សាសន្តិភាពអាចនឹងវាយរុញច្រានកងកម្លាំងរុស្ស៊ី នៅក្នុងកាលៈទេសៈជាក់លាក់ណាមួយ ប៉ុន្តែលោកបានបន្ថែមថា នេះនៅតែជាទស្សនវិស័យដ៏ឆ្ងាយមួយនៅឡើយ។ដោយត្រូវសាកសួរលម្អិតអំពីលទ្ធភាពនៃការធានាសន្តិសុខ ដែលសហរដ្ឋអាមេរិកដាក់ចេញនៅក្នុងកិច្ចពិភាក្សាទីក្រុងប៊ែរឡាំង កាលពីថ្ងៃចន្ទ ជាមួយលោកប្រធានាធិបតីអ៊ុយក្រែន Volodymyr Zelenskyy — លោក Merz បាននិយាយថា កងកម្លាំងធានាសន្តិសុខ (ដឹកនាំដោយលោកខាងលិច) អាចនឹងត្រូវបណ្តេញកងកម្លាំងរុស្ស៊ីចេញ ប្រសិនបើមានការរំលោភលើលក្ខខណ្ឌឈប់បាញ់ណាមួយ។លោកបាននិយាយថា «អឺរ៉ុបនឹងធានាឱ្យមានតំបន់គ្មានយោធារវាងភាគីសង្គ្រាម ហើយអឺរ៉ុបក៏នឹងចាត់វិធានការប្រឆាំងនឹងការឈ្លានពាន និងការវាយប្រហាររបស់រុស្ស៊ីផងដែរ ប៉ុន្តែ គ្រប់ភាគីមិនទាន់ទៅដល់ចំណុចនោះនៅឡើយទេ»។ លោកបន្ថែមថា «ការពិតដែលថា អាមេរិកបានប្តេជ្ញាចិត្តបែបនេះ -ពោលគឺ ការពារអ៊ុយក្រែន ក្នុងករណីមានបទឈប់បាញ់ ប្រៀបដូចជាទឹកដីរបស់ណាតូ - គឺជាជំហរថ្មីដ៏សំខាន់របស់អាមេរិក»។គួរបញ្ជាក់ថា រុស្ស៊ី មិនទាន់យល់ព្រមលើបទឈប់បាញ់ ឬចំពោះវត្តមានកងទ័ពលោកខាងលិចនៅលើទឹកដីអ៊ុយក្រែន ដើម្បីជួយបញ្ចប់សង្គ្រាមទ្រង់ទ្រាយធំនៅឡើយទេ ដែលបានចាប់ផ្តើមនៅពេលលោកប្រធានាធិបតីរុស្ស៊ី Vladimir Putin បានបញ្ជាឱ្យបើកប្រតិបត្តិការយោធាពិសេសលើអ៊ុយក្រែន ក្នុងខែកុម្ភៈ ឆ្នាំ២០២២ កន្លងទៅ៕

លោក Trump បង្កើនចំនួនប្រទេសដែលប្រឈមនឹងបម្រាមឬការរឹតត្បិតការធ្វើដំណើររហូតដល់៣៩ប្រទេស

លោកប្រធានាធិបតីTrump កាលពីថ្ងៃអង្គារ១៦ធ្នូសប្ដាហ៍នេះ បានបង្កើនបញ្ជីប្រទេសដែលប្រឈមនឹងបម្រាមធ្វើដំណើរឬការរឹតបន្តឹងយ៉ាងធ្ងន់ធ្ងរលើសទ្វេដងរបស់លោក ដែលធ្វើឱ្យចំនួនប្រទេសសរុបរងផលប៉ះពាល់ដោយការកំណត់ការធ្វើអន្តោប្រវេសន៍ និងចូលប្រទេសនេះឡើងដល់៣៩ ប្រទេស។ បម្រាមធ្វើដំណើរលើកដំបូងរបស់លោក Trump ដែលចេញកាលពីខែមិថុនា រួមមានប្រទេសចំនួន ១៩ ដែលហាមប្រាមទាំងស្រុងនូវការចូលរបស់ជនអន្តោប្រវេសន៍ និងអ្នកដំណើរមកពីប្រទេសអាហ្វហ្គានីស្ថាន មីយ៉ាន់ម៉ា ឆាដ សាធារណរដ្ឋកុងហ្គោ ហ្គីណេអេក្វាទ័រ អេរីទ្រី ហៃទី អ៊ីរ៉ង់ លីប៊ី សូម៉ាលី ស៊ូដង់ និងយេម៉ែន។បម្រាមនេះក៏បានផ្អាកមួយផ្នែកចំពោះការចូលរបស់ពលរដ្ឋមកពីប្រទេសប៊ូរុនឌី គុយបា ឡាវ សៀរ៉ាឡេអូន តូហ្គោ តួមិននីស្ថាន និងវ៉េណេស៊ុយអេឡា ផងដែរ។សេចក្តីប្រកាសដែលចុះហត្ថលេខាដោយលោក Trump កាលពីថ្ងៃអង្គារសប្ដាហ៍នេះ បានបន្ថែមប្រទេសចំនួន៧ទៅក្នុងបញ្ជីរដ្ឋដែលប្រឈមនឹងការរឹតបន្តឹងការចូលប្រទេសពេញលេញដូចជា បួគីណាហ្វាសូ ម៉ាលី នីហ្សេ ឡាវ សៀរ៉ាឡេអូន ស៊ូដង់ខាងត្បូង ស៊ីរី និងប៉ាឡេស្ទីន ។ សេចក្ដីប្រកាសនេះ បានដាក់កំណត់ការចូលដោយផ្នែកលើជនអន្តោប្រវេសន៍ និងអ្នកធ្វើដំណើរមកពីប្រទេសចំនួន១៥ ផ្សេងទៀត រួមមាន អង់ហ្គោឡា អង់ទីហ្គា និងបាប៊ូដា បេនីន កូតឌីវ័រ ដូមីនីកា ហ្គាបុង ហ្គំប៊ី ម៉ាឡាវី ម៉ូរីតានី នីហ្សេរីយ៉ា សេណេហ្គាល់ តង់ហ្សានី តុងហ្គា ហ្សំប៊ី និងហ្ស៊ីមបាបវ៉េ។ ការរឹតបន្តឹងអន្តោប្រវេសន៍ និងការធ្វើដំណើររួមមានករណីលើកលែងមួយចំនួន រួមទាំងសម្រាប់អ្នករស់នៅអចិន្ត្រៃយ៍នៅសហរដ្ឋអាមេរិកមកពីប្រទេសដែលមាននៅក្នុងបញ្ជី និងអត្តពលិក និងបុគ្គលិកដែលចូលរួមក្នុងព្រឹត្តិការណ៍កីឡាសំខាន់ៗដូចជា FIFA World Cup នៅឆ្នាំក្រោយ។ ប៉ុន្តែសេចក្តីប្រកាសកាលពីថ្ងៃអង្គារនោះ ក៏បានលុបចោលករណីលើកលែងមួយផងដែរ ដែលរួមបញ្ចូលនៅក្នុងបម្រាមធ្វើដំណើរខែមិថុនា ដែលបានលើកលែងសម្រាប់ កុមារ ប្តីឬប្រពន្ធ និងឪពុកម្តាយរបស់ពលរដ្ឋអាមេរិក ដែលបានស្នើសុំទិដ្ឋាការក្នុងនាមពួកគេ៕

ក្តីស្រមៃពឹងផ្អែកស្រូវសាលីរបស់ប្រជាកសិករអ៊ីរ៉ាក់ត្រូវបានបំផ្លាញដោយសារវិបត្តិទឹក

លោក Ma'an al-Fatlawi គឺជាកសិករស្រូវសាលីមួយរូបរបស់អ៊ីរ៉ាក់ បានពឹងផ្អែកជាយូរមកហើយលើទន្លេ Euphrates ដើម្បីស្រោចស្រពវាលស្រែរបស់លោកនៅជិតទីក្រុង Najaf ប៉ុន្តែឆ្នាំនេះ ទឹកទាំងនោះដែលបានធ្វើឲ្យតំបន់អឌ្ឍចន្ទដ៏មានជីជាតិ ក្លាយជាដើមកំណើតនៃអារ្យធម៌បុរាណកាលពីពេល ១ម៉ឺនឆ្នាំមុននោះ បានរីងស្ងួតហួតហែងអស់ហើយ និងធ្វើឲ្យរូបលោកមើលឃើញជម្រើសតិចតួចប៉ុណ្ណោះ ។ ខណៈឈរក្បែរប្រឡាយស្រោចស្រពជិតវាលស្រែស្ងួតរបស់លោក រង់ចាំការបញ្ចេញការផ្គត់ផ្គង់ទឹកបែងចែករបស់លោក លោក al-Fatlawi និយាយថា ដីកសិកម្មនេះ នៅតាមស្រុកជាច្រើន និងនៅទីក្រុង Najaf អណ្តូងគ្មានទឹកនោះទេ តើមកពីមូលហេតុអ្វីទៅ? ការជំរុញរបស់អ៊ីរ៉ាក់ ដែលមានប្រវត្តិស្ថិតក្នុងចំណោមប្រទេសនាំចូលស្រូវសាលីធំបំផុតនៅតំបន់មជ្ឈិមបូព៌ានោះ ការធានាសន្តិសុខស្បៀងតាមរយៈផលិតកម្មស្រូវសាលីគ្របដណ្តប់តម្រូវការប្រទេសរបស់ខ្លួន នាំឲ្យមានអតិរេកគ្រាប់ធញ្ញជាតិសំខាន់ប្រចាំឆ្នាំ ៣លើកជាប់ៗគ្នា ។ ប៉ុន្តែការធានាមួយនេះ បច្ចុប្បន្នកំពុងស្ថិតក្រោមការគំរាមកំហែង ពេលដែលឆ្នាំស្ងួតបំផុតក្នុងប្រវត្តិសាស្រ្តទំនើប និងកម្រិតទឹកទាបជាប់កំណត់ត្រានៅទន្លេ Tigris និងទន្លេ Euphrates បានកាត់បន្ថយការដាំដុះ ហើយនិងអាចធ្វើឲ្យប៉ះពាល់ដល់ការប្រមូលផលរហូតដល់ ៥០ភាគរយ ក្នុងរដូវនេះ ។ លោក Salah El Hajj Hassan គឺជាអ្នកតំណាងអ៊ីរ៉ាក់នៅអង្គការស្បៀងអាហារ និងកសិកម្មនៃអង្គការសហប្រជាជាតិ និយាយប្រាប់ទីភ្នាក់ងារព័ត៌មានរ៉យទ័រថា អ៊ីរ៉ាក់ប្រឈមនឹងគ្រោះរាំងស្ងួតមួយ ក្នុងចំណោមគ្រោះរាំងស្ងួតធ្ងន់ធ្ងរបំផុតដែលត្រូវបានរកឃើញ ក្នុងរយៈពេលជាច្រើនទសវត្សរ៍កន្លងមកនេះ ៕

បណ្ដាញសង្គម

ព័ត៌មានថ្មីៗ

សប្បុរសជនផ្តល់ថ្នាក់រៀនបណ្តោះអាសន្ន ដើម្បីពង្រីកការរៀបចំថ្នាក់រៀននៅតាមជំរំភៀសសឹក

កម្ពុជា-បង់ក្លាដែស ជំរុញកិច្ចសហប្រតិបត្តិការ វិស័យ ពាណិជ្ជកម្ម និង វិនិយោគ ទេសចរណ៍ សុខាភិបាល កសិកម្ម

សមាគមខ្មែរក្រោមបន្តនាំយក អំណោយប្រគេនព្រះសង្ឃភៀសសឹក ១០៣ អង្គ គង់នៅវត្តខ្សាច់ស ខេត្តកោះកុង

សង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តការបាញ់ប្រហារ ដើម្បីឈ្លានពានមកលើដែនអធិបតេយ្យរបស់កម្ពុជានៅទិសយោធភូមិភាគទី៤ និងយោធភូមិភាគទី៥

ក្រសួងកសិកម្ម ជូន ផ្ទះសំណាញ់១ខ្នង និងប្រព័ន្ធស្រោចស្រព សម្រាប់ដាំដុះបន្លែជូនជនភៀសសឹក

កម្ពុជា-បារាំង ឯកភាពលើតម្រូវការក្នុងការពង្រឹងធនធានមនុស្សតាមរយៈការអប់រំឧត្តមសិក្សាកម្ពុជា

បារាំង គាំទ្រដល់កម្ពុជាក្នុងការហ្វឹកហ្វឺន និងកសាងសមត្ថភាពកងកម្លាំងរក្សាសន្តិភាពរបស់កម្ពុជា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877