BTV NEWS

លោក Zelenskyy បញ្ជាក់ថា «ការសម្រេចជាច្រើន» អាចធ្វើឡើងមុនឆ្នាំថ្មី នៅមុនកិច្ចប្រជុំជាមួយលោក Trump

ចិនដាក់ទណ្ឌកម្មលើក្រុមហ៊ុនការពារជាតិអាមេរិក និងបុគ្គល ពាក់ព័ន្ធការលក់អាវុធទៅឲ្យកោះតៃវ៉ាន់

ទីក្រុងសេអ៊ូល នឹងបន្ធូរបន្ថយការរឹតបន្តឹងនូវលទ្ធភាពចូលទៅកាន់សារព័ត៌មានកូរ៉េខាងជើង

រដ្ឋមន្ត្រីការបរទេស៖ នីហ្សេរីយ៉ាផ្តល់ការស៊ើបការណ៍សម្ងាត់ដល់អាមេរិក ដើម្បីវាយប្រហារក្រុមសកម្មប្រយុទ្ធ

ព័ត៌មានអន្តរជាតិ

ពលរដ្ឋលីបង់ស្វាគមន៍រដូវកាលបុណ្យណូអែលជាមួយក្តីសង្ឃឹមថា ព្រះជាម្ចាស់នឹងជួយទប់ស្កាត់សង្រ្គាម

ប្រទេសលីបង់ បានស្វាគមន៍ រដូវកាលបុណ្យទានជាមួយដើមណូអែលតុបតែងភ្លើងពណ៌ ពេលដែលក្រុមគ្រួសារដើរផ្សារណូអែលនៅទូទាំងប្រទេស សប្បាយរីករាយជាមួយក្តីសង្ឃឹមថា ព្រះជាម្ចាស់នឹងជួយទប់ស្កាត់សង្រ្គាម ។លោក Randa Farhat គឺជាពលរដ្ឋលីបង់មួយរូប និយាយថា បំណងរបស់ព្រះជាម្ចាស់ ភាពសប្បាយរីករាយនឹងមាននៅគ្រប់ផ្ទះ ហើយអ្នករាល់គ្នាដែលក្រៀមក្រំ ឬឈឺស្កាត់ នឹងជាសះស្បើយ ហើយនិងមានក្តីសង្ឃឹមផងដែរ ។ នៅទីក្រុងតំបន់ឆ្នេរ Byblos និង Batroun មនុស្សម្នា នាំគ្នាឈរថតរូបនៅជិតដើមណូអែលដែលលម្អដោយភ្លើងពណ៌ ។នៅក្នុងរដ្ឋធានីបេរូតវិញ ហ្វូងមនុស្សបានជួបជុំគ្នានៅជុំវិញដើមណូអែលបំភ្លឺភ្លើងពណ៌យ៉ាងភ្លឺច្បាស់ ពេលដែលបុរសម្នាក់ស្លៀកពាក់ជាលោកតាសាន់តាក្លូស រាំតាមចង្វាក់ភ្លេង ។ ក្មេងៗនាំគ្នាលេង និងចែកអាហារគ្នា ខណៈមនុស្សពេញវ័យ ជជែកគ្នាពីអត្ថន័យនៃរដូវកាលបុណ្យទាននេះ ។លោក Sabah Keyrouz គឺជាពលរដ្ឋលីបង់ម្នាក់ដែលរៀបរាប់ការតុបតែងលម្អបុណ្យណូអែលនៅជិតវិហារបុរាណ Byblos ថាគួរឲ្យទាក់ទាញ់នោះ និយាយថា ព្រះជាម្ចាស់នឹងអាចទប់ស្កាត់សង្រ្គាម និងនាំអ្នកអវត្តមានត្រឡប់មកវិញ ។ អ៊ីស្រាអែល និងលីបង់ បានយល់ព្រមបទឈប់បាញ់គាំទ្រដោយសហរដ្ឋអាមេរិក កាលពីឆ្នាំ ២០២៤ ដើម្បីបញ្ចប់សង្រ្គាមរយៈពេលជាង ១ឆ្នាំរវាងអ៊ីស្រាអែល និងក្រុមហេសបូឡា ដែលបានឈានដល់កម្រិតកំពូលនៃការវាយប្រហាររបស់អ៊ីស្រាអែល ។ ចាប់តាំងពីពេលនោះមក ភាគីទាំង ២ បានចោទប្រកាន់គ្នាទៅវិញទៅមកចំពោះការបំពានបទឈប់បាញ់ ៕

តើយានដ្រូនបានផ្លាស់ប្តូរសង្រ្គាមបែបណាខ្លះនៅក្នុងឆ្នាំ ២០២៥?

យានដ្រូនបានក្លាយជាចំណែកមួយនៃសង្រ្គាមអស់រយៈពេលជាច្រើនឆ្នាំមកហើយៗ យានគ្មានមនុស្សបើកបញ្ជាពីចម្ងាយដ៏សាមញ្ញនេះ ត្រូវបានសាកល្បងតាំងពីសង្រ្គាមលោកលើកទី ១មកម្ល៉េះ ប៉ុន្តែជម្លោះនៅប្រទេសអ៊ុយក្រែន ត្រូវបានគេមើលឃើញការប្រើប្រាស់វា កើនឡើងខ្លាំង វាលែងគ្រាន់តែសម្រាប់កិច្ចការពិសេសទៀតហើយ ។បច្ចុប្បន្ន យានដ្រូនបានក្លាយជាអាវុធដ៏សំខាន់នៅលើសមរភូមិប្រយុទ្ធ ។ អាវុធមួយក្នុងចំណោមអាវុធដ៏មានប្រសិទ្ធិភាពបំផុតនៅក្នុងសង្រ្គាមអ៊ុយក្រែន គឺយានដ្រូនតម្លៃទាប FPV ។ យានដ្រូននេះ ដែលកាលពីដំបូងឡើយត្រូវបានគេរចនាឡើងសម្រាប់តែក្រុមប្រកួតប្រជែងស៊ីវិលនោះ ត្រូវបានគ្រប់គ្រងដោយអ្នកបញ្ជានៅលើដី ហើយតែងតែធ្លាក់ចំគោលជាមួយគ្រឿងផ្ទុះ ។ តម្លៃយានដ្រូននេះ អាចមានតម្លៃទាបរហូតដល់ ៥០០ដុល្លារ ។លោក Benjamin Wolba គឺជាសហស្ថាបនិកបង្កើតមជ្ឈមណ្ឌលបច្ចេកវិទ្យាការពារជាតិអឺរ៉ុបនិយាយថា ពួកយើងមានយានដ្រូន FPV ថោកខ្លាំង ដែលមានតម្លៃត្រឹមប៉ុន្មានរយដុល្លារប៉ុណ្ណោះ មិនថ្លៃដូចជារថក្រោះ យន្តហោះចម្បាំង និងឧទ្ធម្ភាគចក្រនោះទេ ។លោកថា អ្នកមើលការសិក្សាឃើញថា ការប្រយុទ្ធគ្នា ៧០-៨០ភាគ នៃអ្នកដែលត្រូវបានសម្លាប់ និងរបួស កើតចេញពីយានដ្រូន FPV ។ទាហានអ៊ុយក្រែន និយាយថា យានដ្រូនបានជំរុញឲ្យរថក្រោះ និងរថពាសដែកធន់ធ្ងន់ដកថយទៅឆ្ងាយពីតំបន់ជួរមុខ ។ ពួកគេនិយាយថា បច្ចុប្បន្នវាពិបាកខ្លាំងណាស់ក្នុងការបំលាស់ទីដោយសុវត្ថិភាពនៅក្នុងលេណដ្ឋាន ឬនាំគ្រឿងផ្គត់ផ្គង់ ដោយសារតែយានដ្រូនទាំងអស់នេះ ៕

ផ្សែងអ័ព្ទយ៉ាងក្រាស់នៅប៉ាគីស្ថាន បង្ខំឲ្យបិទផ្លូវហាយវ៉េសំខាន់ៗជាច្រើនខ្សែនៅខេត្ត Punjab

ផ្សែងអ័ព្ទយ៉ាងក្រាស់បានគ្របដណ្តប់ផ្លូវហាយវ៉េសំខាន់ជាច្រើនខ្សែនៅខេត្ត Punjab ប្រទេសប៉ាគីស្ថាននាថ្ងៃអង្គារនេះ បង្ខំឲ្យអាជ្ញាធរបិទផ្លូវសំខាន់ៗជាច្រើន ដោយសារកាត់បន្ថយរយៈចម្ងាយមើលឃើញ និងប្រឈមឧបទ្ទេវហេតុគ្រោះថ្នាក់ខ្ពស់ ។គុណភាពខ្យល់នៅទីក្រុង Lahore ត្រូវបានរកឃើញកម្រិតអាសន្នចំនួន ៣២២ កាលពីវេលាម៉ោង ៦ព្រឹក ម៉ោងក្នុងស្រុកថ្ងៃអង្គារនេះ ធ្វើឲ្យទីក្រុងនេះក្លាយជាទីក្រុងមានកង្វក់បរិយាកាសខ្លាំងបំផុតរបស់ពិភពលោក ។ភាពខកចិត្តបានកើតមានចំពោះអ្នកដំណើរជាប់ខ្លួន ក្នុងនោះ លោក Mohammad Naeem ដែលជាអ្នកដំណើរមួយរូបនិយាយថា ពួកយើងរង់ចាំតាំងពីម៉ោង ៦ព្រឹកមកម្ល៉េះ ។ រថយន្តក្រុងត្រៀមនឹងចាកចេញ ប៉ុន្តែពួកយើងពុំត្រូវបានគេអនុញ្ញាតឲ្យឡើងជិះនោះទេ ហើយពួកយើងពុំត្រូវបានគេជូនដំណឹងនោះដែរ ។លោក Hafiz Safar Abbas ដែលជាអ្នកដំណើរដែរនោះ និយាយបន្ទរពីអារម្មណ៍ខកចិត្តដូចគ្នា ។ លោកថា សាធារណជនមិនប្រាកដប្រជានោះទេ ។ បើសិនជាអាកាសធាតុច្បាស់ ផ្លូវគួរតែបើកឡើងវិញភ្លាមៗ ។ ខណៈពេលនោះដែរ ក្រុមអាជ្ញាធររដ្ឋាភិបាល កំពុងតាមដានស្ថានភាព ធ្វើការបើកផ្លូវឡើងវិញ នៅពេលណាដែលលក្ខខណ្ឌល្អប្រសើរហើយនោះ ខណៈអ្នកដំណោះរត្រូវបានជំរុញឲ្យបន្តអត់ធ្មត់ រង់ចាំការជូនដំណឹងជាក្រោយ ៕

ចិនបញ្ជាក់ឡើងវិញពីតម្រូវការឲ្យនាយករដ្ឋមន្រ្តីជប៉ុនកែសម្រួលសេចក្តីអត្ថាធិប្បាយលើបញ្ហាកោះតៃវ៉ាន់

នៅថ្ងៃអង្គារនេះ ចិនបញ្ជាក់ឡើងវិញពីតម្រូវការឲ្យជប៉ុនកែសម្រួលសេចក្តីអត្ថាធិប្បាយរបស់លោកស្រីនាយករដ្ឋមន្រ្តី Sanae Takaichi លើបញ្ហាកោះតៃវ៉ាន់ រយៈពេលជាង ១ខែ ក្រោយលោកស្រី Takaichi និយាយថា ការវាយប្រហារលើកោះគ្រប់គ្រងតាមបែបប្រជាធិបតេយ្យមួយនេះ អាចជាការគំរាមកំហែងអត្ថិភាពចំពោះជប៉ុន ។លោក Guo Jiakun គឺជាអ្នកនាំពាក្យក្រសួងការបរទេសចិននិយាយនៅក្នុងសន្និសីទសារព័ត៌មានថា ពាក់ព័ន្ធនឹងបញ្ហាសំខាន់នេះ ជប៉ុនគេចវេសមិនព្រមទទួលស្គាល់ការពិត ដែលទីក្រុងប៉េកាំងសូមធ្វើការជំទាស់យ៉ាងមុតមាំចំពោះបញ្ហានេះ ។ សូមបញ្ជាក់ថា ទំនាក់ទំនងការទូតរវាងទីក្រុងតូក្យូ និងទីក្រុងប៉េកាំង បានស្ថិតក្នុងកម្រិតទាបបំផុត ក្នុងរយៈពេលជាច្រើនឆ្នាំកន្លងមកនេះ ក្រោយលោកស្រី Takaichi លើកឡើងថា ការវាយប្រហារជាសម្មតិកម្មរបស់ចិនលើកោះតៃវ៉ាន់ អាចនឹងនាំឲ្យមានការឆ្លើយតបផ្នែកយោធាពីទីក្រុងតូក្យូ ៕

ក្រុមហ៊ុនធានារ៉ាប់រង Swiss Re ៖ គ្រោះមហន្តរាយធម្មជាតិធ្វើឲ្យប៉ះពាល់សេដ្ឋកិច្ចសកល ២២០ពាន់លានដុល្លារ ក្នុងឆ្នាំ ២០២៥

យោងតាមការព្យាកររបស់ក្រុមហ៊ុនធានារ៉ាប់រងស្វីស Swiss Re បានឲ្យដឹងថា គ្រោះមហន្តរាយធម្មជាតិ បណ្តាលឲ្យខាតបង់សេដ្ឋកិច្ចសកលចំនួន ២២០ពាន់លានដុល្លារ ក្នុងឆ្នាំ ២០២៥នេះ ។ក្រុមហ៊ុនដែលធានាក្រុមហ៊ុនធានារ៉ាប់រងនេះ បានចេញនូវការប៉ាន់ស្មានបឋមរបស់ខ្លួនសម្រាប់ឆ្នាំ ២០២៥ នៅថ្ងៃអង្គារនេះ ។ បើទោះបីជាមានការចំណាយដ៏ច្រើនសន្ធឹកសន្ធាប់លើគ្រោះមហន្តរាយធម្មជាតិ ចាប់ពីព្យុះសង្ឃរា រហូតដល់ភ្លើងឆេះព្រៃក៏ដោយ ពិតណាស់ថាកម្រិតនៃការខាតបង់នេះ មានភាពល្អប្រសើរឡើង បើធៀបទៅនឹងឆ្នាំមុន ពេលដែលពិភពលោកបានខាតចំនួន ៣២៧ពាន់លានដុល្លារ ។ការធ្លាក់ចុះ ៣៣ភាគនេះ ត្រូវបានរកឃើញ បើទោះបីជាមានភ្លើងឆេះព្រៃបំផ្លិចបំផ្លាញសង្កាត់អ្នកមាននៅទីក្រុង Los Angeles សហរដ្ឋអាមេរិក កាលពីខែមករាក៏ដោយ ពេលដែលភ្លើងឆេះព្រៃបានឆាបឆេះផ្ទៃដីចំនួនជាង ៩.៣០៨ហិចតា ដោយបំផ្លិចបំផ្លាញផ្ទះសម្បែងប្រជាពលរដ្ឋ អគារធុរកិច្ច និងបង្ខំឲ្យមនុស្សរាប់ពាន់នាក់ រត់ភៀសខ្លួន ៕

សមាជិកកម្លាំងសន្តិសុខ ៣នាក់ នៅអ៊ីរ៉ង់ ត្រូវបានសម្លាប់ អំឡុងការប្រយុទ្ធគ្នា

ប្រព័ន្ធផ្សព្វផ្សាយរដ្ឋ នៅថ្ងៃអង្គារ (ទី១៦ ខែធ្នូ) នេះ បានរាយការណ៍ថា ការប៉ះទង្គិចគ្នាមួយ នាពេលយប់ នៅក្នុងខេត្ត Kerman ភាគខាងត្បូងប្រទេសអ៊ីរ៉ង់ បានបណ្ដាលឲ្យបុគ្គលិកសន្តិសុខយ៉ាងហោចណាស់ ៣នាក់ និងជនស៊ីវិលម្នាក់បាត់បង់ជីវិត។ក្នុងសេចក្តីថ្លែងការណ៍ដែលត្រូវបានផ្សាយដោយទីភ្នាក់ងារព័ត៌មានផ្លូវការ IRNA កងឆ្មាំបដិវត្តន៍ឥស្លាមអ៊ីរ៉ង់ បានឲ្យដឹងថា៖ «មន្ត្រីសន្តិសុខ ៣នាក់ និងពលរដ្ឋម្នាក់ ត្រូវបានសម្លាប់ នៅក្នុងតំបន់នៃប៉ុស្តិ៍ត្រួតពិនិត្យ Fahraj ដែលមានទីតាំងនៅភាគខាងកើតខេត្ត Kerman»។ហើយតាមរយៈសេចក្តីថ្លែងការណ៍មួយដាច់ដោយឡែកដែលត្រូវបានបង្ហោះដោយសារព័ត៌មាន IRNA នគរបាលខេត្ត Kerman បានបញ្ជាក់ថា៖ «ឧប្បត្តិហេតុនេះបានកើតឡើងកាលពីយប់មិញ (ថ្ងៃទី១៥ ខែធ្នូ) អំឡុងពេលមានការប៉ះទង្គិចគ្នា រវាងក្រុមភេរវករ និងកងកម្លាំងដែលឈរជើងប្រចាំការនៅប៉ុស្តិ៍ត្រួតពិនិត្យ»។សេចក្តីថ្លែងការណ៍នេះបានផ្ដល់ការសន្យាថា៖ «វិធានការស៊ើបការណ៍ និងប្រតិបត្តិការ ដើម្បីកំណត់អត្តសញ្ញាណ នឹងត្រូវបានចាប់ផ្ដើម ហើយចាត់វិធានការយ៉ាងម៉ឺងម៉ាត់ ចំពោះជនល្មើសដែលបង្កឧក្រិដ្ឋកម្មនេះ»។គួរបញ្ជាក់ថា ទីក្រុង Fahraj គឺនៅកៀកនឹងខេត្ត Sistan-Baluchistan ភាគអាគ្នេយ៍ ដែលមានព្រំប្រទល់ជាប់ប្រទេសប៉ាគីស្ថាន និងអាហ្វហ្គានីស្ថាន ហើយបានក្លាយជាទីតាំងក្ដៅ សម្រាប់ការប៉ះទង្គិចគ្នាជាយូរមកហើយ រវាងកងកម្លាំងសន្តិសុខ និងក្រុមប្រដាប់អាវុធ ក្នុងនោះរួមទាំងក្រុមជួញដូរគ្រឿងញៀន និងក្រុមបំបែកខ្លួនផងដែរ៕

របបយោធាមីយ៉ាន់ម៉ា បញ្ជាក់ថា លោកស្រី Suu Kyi មានសុខភាពល្អ ក្រោយកូនប្រុសបារម្ភ

របបយោធាមីយ៉ាន់ម៉ា នៅថ្ងៃអង្គារ (ទី១៦ ខែធ្នូ) នេះ បានបញ្ជាក់ថា អតីតមេដឹកនាំ លោកស្រី Aung San Suu Kyi ដែលកំពុងជាប់ពន្ធនាគារ មាន «សុខភាពល្អជាធម្មតា» ដោយការប្រាប់ឲ្យដឹងនេះកើតមានឡើងមួយថ្ងៃបន្ទាប់ពីកូនប្រុសរបស់លោកស្រី បានប្រាប់ទីភ្នាក់ងារសារព័ត៌មាន Reuters ថា លោកបានទទួលព័ត៌មានតិចតួចប៉ុណ្ណោះ អំពីស្ថានភាពរបស់ម្ដាយវ័យ ៨០ឆ្នាំរបស់លោក ហើយលោកបារម្ភថា លោកស្រីអាចទទួលមរណភាពដោយលោកមិនបានដឹងដំណឹង។ក្នុងបទសម្ភាសន៍មួយ នៅទីក្រុងតូក្យូ ប្រទេសជប៉ុន លោក Kim Aris បាននិយាយថា លោកមិនបានដឹងដំណឹងពីម្តាយរបស់លោកឡើយ ក្នុងរយៈពេលប៉ុន្មានឆ្នាំមកនេះ ហើយជឿថា លោកស្រីត្រូវបានគេឃុំខ្លួន នៅក្នុងរដ្ឋធានី Naypyidaw របស់សហភាពមីយ៉ាន់ម៉ា។លោកស្រី Suu Kyi ដែលជាម្ចាស់ជ័យលាភីរង្វាន់ណូបែលសន្តិភាព ត្រូវបានឃុំខ្លួន បន្ទាប់ពីមានរដ្ឋប្រហារយោធាឆ្នាំ២០២១ ដែលបានទម្លាក់រដ្ឋាភិបាលស៊ីវិលជាប់ឆ្នោតរបស់លោកស្រី និងបានបង្កឲ្យមានសង្រ្គាមស៊ីវិលរហូតដល់សព្វថ្ងៃ។ លោកស្រីកំពុងអនុវត្តការជាប់ទោស ២៧ឆ្នាំ ជុំវិញបទចោទប្រកាន់ជាច្រើន រួមមានទាំងការញុះញង់ អំពើពុករលួយ និងការក្លែងបន្លំការបោះឆ្នោត ដែលបទចោទទាំងអស់នោះលោកស្រីបដិសេធ។សេចក្តីថ្លែងការណ៍មួយដែលត្រូវបានបង្ហោះលើសារព័ត៌មាន Myanmar Digital News ដែលគ្រប់គ្រងដោយរបបយោធា បានឲ្យដឹងថា៖ «លោកស្រី Aung San Suu Kyi មានសុខភាពល្អជាធម្មតាទេ»។ តែយ៉ាងណាក្ដី សេចក្តីថ្លែងការណ៍នោះមិនបានផ្តល់ភស្តុតាង ឬព័ត៌មានលម្អិត អំពីស្ថានភាពរបស់លោកស្រីឡើយ។ លោក Aris មិនអាចទាក់ទងបានភ្លាមៗឡើយ ដើម្បីសុំការអត្ថាធិប្បាយ ជុំវិញសេចក្តីថ្លែងការណ៍របស់របបយោធានេះ៕

UNHCR៖ ជនភៀសខ្លួនប្រហែល ៦៤.០០០នាក់ ធ្វើដំណើរទៅដល់ប្រទេសប៊ូរុនឌី ខណៈអំពើហិង្សាកើនឡើងនៅខេត្ត South Kivu

ក្រុមមន្រ្តីទីភ្នាក់ងារជនភៀសខ្លួនអង្គការសហប្រជាជាតិ(UNHCR) និយាយថា ជនភៀសខ្លួនរាប់ម៉ឺននាក់ មកពីខេត្ត South Kivu របស់សាធារណរដ្ឋប្រជាធិបតេយ្យកុងហ្គោ បានធ្វើដំណើរតាមផ្លូវទៅកាន់ប្រទេសជិតខាងប៊ូរុនឌី ក្នុងខែនេះ ។ជនភៀសខ្លួនប្រហែល ៦៤.០០០នាក់ បានធ្វើដំណើរទៅដល់ប្រទេសប៊ូរុនឌី ចាប់តាំងពីដើមខែនេះស្របពេលជម្លោះនៅប្រទេសជិតខាងកុងហ្គោ កាន់តែតានតឹងខ្លាំង ។ទីភ្នាក់ងារ UNHCR និយាយថា អ្នកមកដល់ថ្មីត្រូវការជំនួយវេជ្ជសាស្រ្តបន្ទាន់ ហើយកង្វះខាតទីជម្រកគ្រប់គ្រាន់ ក្លាយជាក្តីបារម្ភខ្លាំង ជាពិសេសសម្រាប់កុមារដែលគ្មានអ្នកអមដំណើរ ឬកុមារដែលបែកបាក់ពីឪពុកម្តាយរបស់ពួកគេ ក៏ដូចជាចំនួនភាគរយខ្ពស់នៃស្រ្តីដែលប្រឈមហានិភ័យ ។កាលពីថ្ងៃចន្ទម្សិលមិញ ក្រុមឧទ្ទាមចលនា M23 បានប្រកាសថា ខ្លួនបានសម្រេច ដកកងទ័ពជាឯកតោភាគី ចេញពីទីក្រុង Uvira ភាគខាងកើតកុងហ្គោ ដែលខ្លួនអះអាងថា ដណ្តើមយកបានកាលពីសប្តាហ៍មុន ដោយចាត់ទុកចំណាត់ការនេះថាជាវិធានការកសាងទំនុកចិត្តក្នុងគោលបំណងគាំទ្រដល់ដំណើរការសន្តិភាពដែលកំពុងបន្ត ។សូមបញ្ជាក់ថា ចាប់តាំងពីខែមីនា ឆ្នាំនេះមក ការចរចាជាច្រើនជុំរវាងក្រុម M23 និងរដ្ឋាភិបាលកុងហ្គោ ត្រូវបានធ្វើឡើងក្រោមការសម្របសម្រួលរបស់ប្រទេសកាតា និងសហរដ្ឋអាមេរិក ។ យោងតាមសេចក្តីថ្លែងការណ៍បានឲ្យដឹងថា ការដកទ័ពចេញពីទីក្រុង Uvira ត្រូវបានអនុវត្តតាមការស្នើសុំរបស់សហរដ្ឋអាមេរិកក្នុងការសម្របសម្រួល ៕

UN៖ វិបត្តិអត់ឃ្លាន នៅអាហ្វហ្គានីស្ថាន កាន់តែធ្ងន់ធ្ងរឡើងៗ ខណៈការផ្តល់មូលនិធិជំនួយខ្វះខាត

WFP (កម្មវិធីស្បៀងអាហារពិភពលោក) នៅថ្ងៃអង្គារ (ទី១៦ ខែធ្នូ) នេះ បានឲ្យដឹងថា ជាលើកដំបូង ក្នុងរយៈពេលជាច្រើនទសវត្សរ៍ ស្ថាប័នរបស់អង្គការសហប្រជាជាតិ (UN) មួយនេះ មិនអាចផ្តល់ជំនួយប្រកបដោយប្រសិទ្ធភាពដល់ប្រជាជនអាហ្វហ្គានីស្ថានរាប់លាននាក់ ដែលជួបប្រទះកង្វះអាហារូបត្ថម្ភ ដោយអាត្រាមរណភាព ជាពិសេសក្នុងចំណោមកុមារ អាចនឹងកើនឡើងក្នុងរដូវរងារនេះ។ជំនួយអន្តរជាតិផ្ដល់ដល់អាហ្វហ្គានីស្ថានដែលហែកហួរដោយសង្រ្គាម បានធ្លាក់ចុះយ៉ាងខ្លាំង ចាប់តាំងពីឆ្នាំ២០២១ នៅពេលដែលកងកម្លាំងដឹកនាំដោយសហរដ្ឋអាមេរិក បានចាកចេញពីប្រទេសនេះ ហើយពួកតាលីបង់បានដណ្តើមអំណាចវិញ។ ហើយអ្វីដែលសំខាន់ទៀតនោះ គឺថា វិបត្តិនេះត្រូវបានធ្វើឲ្យកាន់តែធ្ងន់ធ្ងរឡើងៗ ដោយសារគ្រោះមហន្តរាយធម្មជាតិជាច្រើន ដូចជាការរញ្ជួយដីជាដើម។អមដោយការបន្ថែមថា ស្ថាប័នត្រូវការជាង ៤៦០លានដុល្លារ ដើម្បីផ្តល់ជំនួយស្បៀងអាហារដល់ប្រជាជនអាហ្វហ្គានីស្ថានងាយរងគ្រោះបំផុតចំនួន ៦លាននាក់ ទីភ្នាក់ងារនេះបានលើកឡើងនៅក្នុងសេចក្តីថ្លែងការណ៍មួយថា៖ «ជាលើកដំបូងក្នុងរយៈពេលជាច្រើនទសវត្សរ៍នេះ WFP មិនអាចចាប់ផ្តើមប្រតិបត្តិការឆ្លើយតបរដូវរងា ខណៈពេលដែលក៏បង្កើនផងដែរនូវជំនួយសង្គ្រោះបន្ទាន់ និងអាហារូបត្ថម្ភ នៅទូទាំងប្រទេស»។សេចក្ដីថ្លែងការណ៍បានបន្ថែមថា៖ «ដោយកង្វះអាហារូបត្ថម្ភរបស់កុមារ ស្ថិតនៅក្នុងកម្រិតខ្ពស់បំផុត ក្នុងរយៈពេលជាច្រើនទសវត្សរ៍ និងការថយចុះដែលមិនធ្លាប់មានពីមុនមក នៅក្នុងមូលនិធិ (អន្តរជាតិ) សម្រាប់ទីភ្នាក់ងារដែលផ្តល់សេវាសំខាន់ៗ លទ្ធភាពទទួលបានការព្យាបាល គឺកាន់តែខ្វះខាតខ្លាំងឡើង»។ទីភ្នាក់ងារ បានឲ្យដឹងទៀតថា ការស្លាប់របស់កុមារ ទំនងជាកើនឡើង អំឡុងរដូវរងាដ៏ត្រជាក់របស់អាហ្វហ្គានីស្ថាន នៅពេលដែលអាហារខ្វះខាតខ្លាំងបំផុត។ WFP ប៉ាន់ប្រមាណថា មនុស្ស ១៧លាននាក់ប្រឈមនឹងភាពអត់ឃ្លាន ដោយកើនឡើងប្រហែល ៣លាននាក់ ពីឆ្នាំមុន ដែលការកើនឡើងមួយផ្នែកដោយសារជនជាតិអាហ្វហ្គានីស្ថានរាប់លាននាក់ត្រូវបាននិរទេសពីប្រទេសជិតខាងអ៊ីរ៉ង់ និងប៉ាគីស្ថាន ក្រោមកម្មវិធីបញ្ជូនជនអន្តោប្រវេសន៍ និងជនភៀសខ្លួនត្រឡប់វិញ៕

ក្រុមបាតុករជួបជុំគ្នានៅទីក្រុង Uvira របស់កុងហ្គោ ដើម្បីបង្ហាញការគាំទ្រដល់ក្រុមឧទ្ទាម M23

ក្រុមបាតុករយ៉ាងច្រើនកុះករ បាននាំដង្ហែរក្បួនឆ្លងកាត់ដងផ្លូវក្នុងទីក្រុង Uvira នាថ្ងៃអង្គារនេះ ដើម្បីបង្ហាញការគាំទ្ររបស់ពួកគេចំពោះក្រុមឧទ្ទាម M23 និងបានចាត់ទុកក្រុមប្រដាប់អាវុធនេះថាជាអ្នករំដោះពួកគេ ហើយនិងច្រានចោលការអំពាវនាវឲ្យក្រុមឧទ្ទាម ដកចេញពីទីក្រុងភាគខាងកើតរបស់កុងហ្គោមួយនេះ ។ការដង្ហែរក្បួននេះដែរ ឃើញបាតុករកាន់បដា ខណៈត្រីចក្រយានយន្ត(តុកតុក)ជាជួរចតនៅជិតពួកគេ ។ ក្រុមបាតុករ នាំគ្នាទះដៃ និងស្រែកពេលពួកគេបង្ហាញការជំទាស់ចំពោះរដ្ឋាភិបាលរបស់លោកប្រធានាធិបតី Felix Tshisekedi ។ លោក Freddy Mutupeke គឺជាអ្នកសម្របសម្រួលក្រុមបាតុករ និយាយថា អ្នកស្រុកនាំគ្នាអបអរសាទរអ្វីដែលពួកគេចាត់ទុកថាជាសេរីភាពពីរបួសផ្លូវចិត្ត និងការយាយី ។លោក Mutupeke និយាយប្រាប់ហ្វូងមនុស្សថា ថ្ងៃនេះ ពួកយើងត្រូវបានរំដោះដោយកងទ័ពបដិវត្តន៍ ហើយពួកយើងគឺជាពលរដ្ឋរស់នៅក្នុងទីក្រុង Uvira សម្រេចចិត្តបង្ហាញភាពត្រេកអរនេះ ។ពេលលោក Mutupeke សួរទៅកាន់ហ្វូងបាតុករថាតើពួកគេព្រមឲ្យលោក Tshisekedi នៅបន្តកាន់អំណាចទៀតដែរឬទេ ? ហ្វូងបាតុករស្វែកថា អត់ទេ ។ ពួកគេបានច្រានចោលផងដែរលទ្ធភាពនៃការដកក្រុមឧទ្ទាម M23 ចេញពីទីក្រុង Uvira បើសិនជាមានការទាមទារពីសហគមន៍អន្តរជាតិ ៕

បណ្ដាញសង្គម

ព័ត៌មានថ្មីៗ

សប្បុរសជនផ្តល់ថ្នាក់រៀនបណ្តោះអាសន្ន ដើម្បីពង្រីកការរៀបចំថ្នាក់រៀននៅតាមជំរំភៀសសឹក

កម្ពុជា-បង់ក្លាដែស ជំរុញកិច្ចសហប្រតិបត្តិការ វិស័យ ពាណិជ្ជកម្ម និង វិនិយោគ ទេសចរណ៍ សុខាភិបាល កសិកម្ម

សមាគមខ្មែរក្រោមបន្តនាំយក អំណោយប្រគេនព្រះសង្ឃភៀសសឹក ១០៣ អង្គ គង់នៅវត្តខ្សាច់ស ខេត្តកោះកុង

សង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តការបាញ់ប្រហារ ដើម្បីឈ្លានពានមកលើដែនអធិបតេយ្យរបស់កម្ពុជានៅទិសយោធភូមិភាគទី៤ និងយោធភូមិភាគទី៥

ក្រសួងកសិកម្ម ជូន ផ្ទះសំណាញ់១ខ្នង និងប្រព័ន្ធស្រោចស្រព សម្រាប់ដាំដុះបន្លែជូនជនភៀសសឹក

កម្ពុជា-បារាំង ឯកភាពលើតម្រូវការក្នុងការពង្រឹងធនធានមនុស្សតាមរយៈការអប់រំឧត្តមសិក្សាកម្ពុជា

បារាំង គាំទ្រដល់កម្ពុជាក្នុងការហ្វឹកហ្វឺន និងកសាងសមត្ថភាពកងកម្លាំងរក្សាសន្តិភាពរបស់កម្ពុជា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877