BTV NEWS

លោក Zelenskyy បញ្ជាក់ថា «ការសម្រេចជាច្រើន» អាចធ្វើឡើងមុនឆ្នាំថ្មី នៅមុនកិច្ចប្រជុំជាមួយលោក Trump

ចិនដាក់ទណ្ឌកម្មលើក្រុមហ៊ុនការពារជាតិអាមេរិក និងបុគ្គល ពាក់ព័ន្ធការលក់អាវុធទៅឲ្យកោះតៃវ៉ាន់

ទីក្រុងសេអ៊ូល នឹងបន្ធូរបន្ថយការរឹតបន្តឹងនូវលទ្ធភាពចូលទៅកាន់សារព័ត៌មានកូរ៉េខាងជើង

រដ្ឋមន្ត្រីការបរទេស៖ នីហ្សេរីយ៉ាផ្តល់ការស៊ើបការណ៍សម្ងាត់ដល់អាមេរិក ដើម្បីវាយប្រហារក្រុមសកម្មប្រយុទ្ធ

ព័ត៌មានអន្តរជាតិ

រុស្ស៊ីប្រាប់ថា បានគ្រប់គ្រងទីក្រុងដ៏សំខាន់ Kupiansk របស់អ៊ុយក្រែន

រុស្ស៊ី នៅថ្ងៃអង្គារ (ទី១៦ ខែធ្នូ) នេះ បានប្រាប់ឲ្យដឹងថា ខ្លួនកំពុងគ្រប់គ្រងទីក្រុងដ៏សំខាន់ គឺ Kupiansk នៅភាគឦសាននៃប្រទេសអ៊ុយក្រែន ជាកន្លែងដែលកងកម្លាំងអ៊ុយក្រែនថ្មីៗនេះ បានអះអាងថា បានដណ្តើមកាន់កាប់តំបន់ជាច្រើនវិញ។ប្រធានក្រុមយោធា Zapad លោក Leonid Sharov បានប្រាប់ទីភ្នាក់ងារសារព័ត៌មានរដ្ឋ TASS ថា៖ «ទីក្រុង Kupiansk ស្ថិតក្រោមការគ្រប់គ្រងដោយកងទ័ពទី៦ របស់រុស្ស៊ី»។កិច្ចខិតខំប្រឹងប្រែងការទូត ដើម្បីដោះស្រាយជម្លោះ បានបន្តប្រព្រឹត្តទៅក្នុងសប្តាហ៍នេះ នៅទីក្រុងប៊ែរឡាំង ប្រទេសអាល្លឺម៉ង់ ជាកន្លែងដែលប្រធានាធិបតីអ៊ុយក្រែន លោក Volodymyr Zelenskyy បានសាទរចំពោះវឌ្ឍនភាព ក្នុងកិច្ចពិភាក្សាជាមួយអ្នកចរចាអាមេរិក កាលពីថ្ងៃចន្ទ។ មេដឹកនាំអឺរ៉ុប បានដាក់ចេញផែនការមានកម្លាំងចម្រុះជាតិសាសន៍ ដើម្បីធានាសន្តិភាព។រុស្ស៊ីបានប្រាប់ឲ្យដឹងថា ខ្លួនបានដណ្តើមកាន់កាប់ទីក្រុង Kupiansk ក្នុងខែវិច្ឆិកា ប៉ុន្តែក្រោយមក អ៊ុយក្រែន បានអះអាងថា ខ្លួនបានដណ្តើមគ្រប់គ្រងតំបន់ជាច្រើននៃទីក្រុងវិញ។លោក Sharov បាននិយាយថា «ក្រុមតូចៗ» នៃទាហានអ៊ុយក្រែន កំពុងព្យាយាមរាល់ថ្ងៃ ដើម្បីចូលទៅកាន់ទីក្រុង Kupiansk ដែលជាមជ្ឈមណ្ឌលផ្លូវដែក នៅក្នុងតំបន់ Kharkiv។ ប៉ុន្តែលោកបានទទូចថា៖ «គ្រប់តំបន់ទាំងអស់ស្ថិតក្រោមការគ្រប់គ្រងរបស់កងកម្លាំងរុស្ស៊ី»។នៅក្នុងវីដេអូមួយដែលបានចេញផ្សាយកាលពីថ្ងៃសុក្រសប្ដាហ៍កន្លងមក លោក Zelenskyy បានប្រាប់ថា លោកបានទៅសួរសុខទុក្ខកងទ័ពនៅក្នុងតំបន់ Kupiansk បន្ទាប់ពីទីក្រុងគីវបានប្រកាសពីការដណ្តើមបានតំបន់ជាច្រើន និងតំបន់ជិតខាងចំនួន ២ ផ្សេងទៀត។ ដំណើរទស្សនកិច្ចរបស់លោក បានកើតឡើងភ្លាមៗ បន្ទាប់ពីកងកម្លាំងអ៊ុយក្រែន បានប្រកាសពី«ការរុលទៅមុខដ៏ធំ» នៅក្នុងតំបន់នេះ៕

ភ្ញៀវទេសចរនៅអេស្ប៉ាញភ្ញាក់ផ្អើលនឹងចម្លាក់ដីខ្សាច់ Sand Nativity Scene

ភ្ញៀវទេសចរ និងប្រជាពលរដ្ឋក្នុងស្រុក បានជួបជុំគ្នានៅឆ្នេរខ្សាច់ Las Canteras ស្ថិតក្នុងប្រទេសអេស្ប៉ាញ ភ្ញាក់ផ្អើលនឹងខួបលើកទី២០នៃចម្លាក់ដីខ្សាច់ Sand Nativity Scene ដែលឆ្លាក់ដោយក្រុមវិចិត្រករអន្តរជាតិ នៅលើឆ្នេរខ្សាច់កោះ Gran Canaria ។វិចិត្រករ ១០រូបមកពីបណ្តាលប្រទេសចំនួន ៦ រួមទាំងសហរដ្ឋអាមេរិក កាណាដា និងអូស្រ្តាលី បានធ្វើការអស់រយៈពេលជាច្រើនសប្តាហ៍ ដើម្បីឆ្លាក់ចម្លាក់ដីខ្សាច់ដ៏អស្ចារ្យនេះ ។ព្យុះ Emilia បានគំរាមកំហែងដល់ចម្លាក់មួយនេះកាលពីចុងសប្តាហ៍កន្លងទៅ ហើយបង្ខំឲ្យក្រុមអ្នករៀបចំ ផ្លាស់ប្តូរកាលបរិច្ឆេតបើកព្រឹត្តការណ៍របស់ពួកគេ ។រៀបចំឡើងដោយគ្រួសារក្នុងស្រុក ចាប់តាំងពីឆ្នាំ ២០០៦រហូតមក ព្រឹត្តការណ៍ឆ្នាំនេះ បានក្លាយជាសារមន្ទីរចម្លាក់ដីខ្សាច់មានភ្ញៀវមកលេងច្រើនបំផុតទី ៣របស់អេស្ប៉ាញ អំឡុងខែធ្នូ ធ្វើឲ្យទាក់ទាញភ្ញៀវទេសចរ ២៦ម៉ឺននាក់ ក្នុងរយៈពេលជាង ៤០ថ្ងៃកន្លងមកនេះ ៕

ស្ថាប័នឃ្លាំមើលបរមាណូ UN «គ្មានសិទ្ធិ» ត្រួតពិនិត្យទីតាំងនុយក្លេអ៊ែរអ៊ីរ៉ង់ដែលរងការវាយប្រហារឡើយ

ប្រធានអង្គការថាមពលអាតូមិកអ៊ីរ៉ង់ (IAEO) កាលពីថ្ងៃចន្ទ (ទី១៥ ខែធ្នូ) បានច្រានចោលការទាមទាររបស់ទីភ្នាក់ងារថាមពលបរមាណូអន្តរជាតិ (IAEA) ដើម្បីត្រួតពិនិត្យទីតាំងនុយក្លេអ៊ែរដែលត្រូវបានវាយប្រហារដោយសហរដ្ឋអាមេរិក និងអ៊ីស្រាអែល កាលពីខែមិថុនា។យោងតាមទីភ្នាក់ងារសារព័ត៌មាន ISNA បានឲ្យដឹងថា លោក Mohammad Eslami បានប្រាប់ឲ្យដឹងថា ទីក្រុងតេអេរ៉ង់ បានអនុញ្ញាតឲ្យមានការត្រួតពិនិត្យនៅកន្លែងនុយក្លេអ៊ែរដែលមិនត្រូវបានវាយប្រហារ។ លោក Eslami ត្រូវបានដកស្រង់សម្ដី ដែលនិយាយថា៖ «ត្រូវតែមាននីតិវិធី សម្រាប់ការត្រួតពិនិត្យទីតាំងនុយក្លេអ៊ែរដែលត្រូវបានវាយប្រហារ មុនពេលអាចផ្តល់ការអនុញ្ញាតបាន»។លោកក៏បានរិះគន់ផងដែរដល់ IAEA ចំពោះការបរាជ័យ ក្នុងការថ្កោលទោសការវាយប្រហារលើទីតាំងនុយក្លេអ៊ែររបស់អ៊ីរ៉ង់។ លោកបានបន្តថា៖ «ទីភ្នាក់ងារមួយ ដែលមិនចេញការថ្កោលទោស និងគ្មានការណែនាំនោះ គ្មានសិទ្ធិអះអាងថា ខ្លួនមានបំណងត្រួតពិនិត្យឡើយ»។គួរបញ្ជាក់ថា អ៊ីរ៉ង់បានបន្ទោស IAEA ម្តងហើយម្តងទៀត ចំពោះការមិនបរិហារការវាយប្រហារលើទីតាំងនុយក្លេអ៊ែរសំខាន់ៗរបស់ខ្លួន ហើយបានចោទប្រកាន់ទីភ្នាក់ងារនេះថា បានបញ្ជូនព័ត៌មានរសើប អំពីទីតាំងទាំងនោះទៅឲ្យអ៊ីស្រាអែល។លោក Eslami បានបន្ថែមថា សម្ពាធពីប្រទេសអឺរ៉ុបចំនួន ៣ សហរដ្ឋអាមេរិក និងអ៊ីស្រាអែល «មិនសំខាន់សម្រាប់យើងទេ ហើយក៏មិនមានផលប៉ះពាល់នោះដែរ»៕

វិមានក្រឹមឡាំង៖ បទឈប់បាញ់បុណ្យណូអែលស្នើឡើងដោយអ៊ុយក្រែន អាស្រ័យលើការឈានដល់កិច្ចព្រមព្រៀងសន្តិភាព

វិមានក្រឹមឡាំង នៅថ្ងៃអង្គារ (ទី១៦ ខែធ្នូ) នេះ បានបញ្ជាក់ថា បទឈប់បាញ់ថ្ងៃបុណ្យណូអែលដែលអ៊ុយក្រែនបានស្នើឡើង នឹងអាស្រ័យលើថា តើកិច្ចព្រមព្រៀងសន្តិភាពត្រូវបានឈានដល់ដែរ ឬអត់។ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃចន្ទថា ទីក្រុងគីវបានគាំទ្រគំនិតឲ្យមានបទឈប់បាញ់ ជាពិសេស ចំពោះការវាយប្រហារលើហេដ្ឋារចនាសម្ព័ន្ធថាមពល ក្នុងអំឡុងពេលប្រារព្ធពិធីបុណ្យណូអែល។នៅពេលសួរត្រូវបានសួរអំពីគំនិតនេះ អ្នកនាំពាក្យវិមានក្រឹមឡាំង លោក Dmitry Peskov បានប្រាប់ថា៖ «បញ្ហា ឥឡូវនេះ គឺថា តើដូចដែលលោកប្រធានាធិបតី (Donald) ⁠Trump និយាយ យើងនឹងឈានដល់កិច្ចព្រមព្រៀងដែរ ឬអត់»។លោក Peskov បានបញ្ជាក់ថា រុស្ស៊ីទំនងជាមិនចូលរួមក្នុងបទឈប់បាញ់បែបនេះទេ ប្រសិនបើអ៊ុយក្រែន ផ្តោតតែលើ «ដំណោះស្រាយរយៈពេលខ្លី និងមិនអាចស្ថិតស្ថិរ» ជាជាងការដោះស្រាយយូរអង្វែង។លោក Peskov បានប្រាប់អ្នកសារព័ត៌មានថា៖ «យើងចង់បានសន្តិភាព។ យើងមិនចង់បានបទឈប់បាញ់ ដើម្បីផ្តល់ឲ្យអ៊ុយក្រែននូវពេលវេលាដកដង្ហើម ហើយរៀបចំសម្រាប់ការបន្តសង្រ្គាមនោះទេ។ យើងចង់បញ្ឈប់សង្រ្គាមនេះ សម្រេចបាននូវគោលដៅរបស់យើង ធានាផលប្រយោជន៍របស់យើង និងធានាសន្តិភាព នៅអឺរ៉ុប សម្រាប់ពេលអនាគត។ នោះហើយជាអ្វីដែលយើងចង់បាន»។ជាមួយគ្នានេះ លោក Peskov ក៏បានប្រាប់ដែរថា ទីក្រុងមូស្គូមិនទាន់បានឃើញសេចក្ដីលម្អិតនៃសំណើ ស្តីពីការធានាសន្តិសុខតាមបែបអង្គការណាតូ (NATO) សម្រាប់អ៊ុយក្រែន ដែលមន្ត្រីអាមេរិក និងអឺរ៉ុប បាននិយាយថា ទីក្រុងវ៉ាស៊ីនតោនបានផ្តល់ជូននោះទេ៕

ពលរដ្ឋរស់នៅក្នុងក្រុងញូវដែលី ពិបាកដកដង្ហើម ស្របពេលគុណភាពខ្យល់អន់ខ្លាំង

ផ្ទៃមេឃនៅទីក្រុងញូវដែលី ប្រទេសឥណ្ឌា បានគ្របដណ្តប់ដោយផ្សែងអ័ព្ទយ៉ាងក្រាស់ ខណៈដែលគុណភាពខ្យល់ធ្លាក់ដល់កម្រិតគ្រោះថ្នាក់ នាថ្ងៃអង្គារនេះ ធ្វើឲ្យប្រជាពលរដ្ឋពិបាកដកដង្ហើម និងប្រឈមនឹងបញ្ហាផ្លូវដង្ហើម ។មន្ទីរស្រាវជ្រាវប្រព័ន្ធគុណភាពខ្យល់ និងព្យាករឧតុនិយមគ្រប់គ្រងដោយរដ្ឋាភិបាលឥណ្ឌា បានរកឃើញសន្ទស្សន៍គុណភាពខ្យល់ឡើងខ្ពស់ដល់កម្រិត ៣៧៧ ដែលធ្លាក់ក្នុងកម្រិតអន់ខ្លាំងនៅរដ្ឋធានីដែលី នាថ្ងៃអង្គារនេះ ។យោងតាមសេចក្តីជូនដំណឹងរបស់ក្រសួងបរិស្ថានឥណ្ឌា បានឲ្យដឹងថា គណៈកម្មការគ្រប់គ្រងគុណភាពខ្យល់ បានដាក់ចេញផែនការសកម្មភាពឆ្លើយតបចាត់ថ្នាក់ ៤ ដំណាក់កាលដែលជាផែនការកម្រិតខ្ពស់បំផុត សម្រាប់ទីក្រុងដែលី និងតំបន់ជុំវិញនោះ កាលពីល្ងាចថ្ងៃសៅរ៍កន្លងទៅ ។គ្រូពេទ្យឯកទេសបេះដូងដែលមានមូលដ្ឋាននៅទីក្រុងដេលីនិយាយថា ភាគល្អិតតូចៗដែលអណ្តែតនៅលើអាកាស អាចបណ្តាលឲ្យមានបញ្ហាសួតធ្ងន់ធ្ងរ ហើយផលប៉ះពាល់នេះ អាចបណ្តាលឲ្យមានជំងឺវង្វេងវង្វាន់ផងដែរ ។គួរឲ្យដឹងថា ទីក្រុងដែលីដែលមានមនុស្សរស់នៅ ៣០លាននាក់ តែងតែគ្របដណ្តប់ដោយផ្សែងអ័ព្ទពុល អំឡុងរដូវរងា ពេលដែលអាកាសធាតុត្រជាក់ទាក់ជាប់ខ្យល់ពីការភាយឧស្ម័នរបស់រថយន្ត ការដ្ឋានសំណង់ និងការដុតកាកសំណល់កសិកម្ម នៅរដ្ឋជិតខាង ធ្វើឲ្យកម្រិតកង្វក់បរិយាកាសកើនឡើងដល់កម្រិតមួយក្នុងចំណោមកម្រិតខ្ពស់បំផុតនៅលើពិភពលោក និងធ្វើឲ្យប្រជាពលរដ្ឋជួបហានិភ័យបញ្ហាផ្លូវដង្ហើមធ្ងន់ធ្ងរ ។ក្រុមអាជ្ញាធរ ជំរុញឲ្យប្រជាពលរដ្ឋបន្តស្នាក់នៅក្នុងផ្ទះ ជាពិសេសកុមារ និងអ្នកដែលមានបញ្ហាផ្លូវដង្ហើម ឬជំងឺបេះដូង ហើយនិងពាក់ម៉ាស បើសិនជាពួកគេចេញក្រៅ ៕

កុមារម្នាក់ បានបាត់បង់ជីវិត អំឡុងការវាយប្រហារដោយកាំបិត ក្នុងសាលារៀន នៅរុស្ស៊ី

គណៈកម្មាធិការស៊ើបអង្កេតរបស់រុស្ស៊ី នៅថ្ងៃអង្គារ (ទី១៦ ខែធ្នូ) នេះ បានប្រាប់ឲ្យដឹងថា ក្មេងជំទង់ម្នាក់ មានកាំបិតក្នុងដៃ បានធ្វើសកម្មភាពវាយប្រហារលើរាងកាយ នៅសាលារៀនមួយកន្លែង ក្នុងតំបន់មូស្គូ ដែលបណ្តាលឲ្យកុមារម្នាក់ស្លាប់ និងសន្តិសុខម្នាក់រងរបួស។គណៈកម្មាធិការនេះបានបញ្ជាក់ថា ឧបទ្ទវហេតុនេះបានកើតឡើងនៅទីកន្លែងតាំងទីលំនៅ Gorki-2 ក្នុងតំបន់ Odintsovo របស់តំបន់មូស្គូ ហើយបានបន្ថែមថា «ដោយសាររបួសពីការចាក់ ក្មេងបានបាត់បង់ជីវិតហើយ»។លោកស្រី Ksenia Mishonova ដែលជាមន្ត្រីទទួលពាក្យបណ្ដឹងរបស់កុមារ សម្រាប់តំបន់មូស្គូ បានបញ្ជាក់ថា សិស្សថ្នាក់ទី៤ ម្នាក់ បានបាត់បង់ជីវិត បន្ទាប់ពីមានការវាយប្រហារដោយកាំបិតនោះ»។ លោកស្រីបានសរសេរនៅលើ Telegram ថា៖ «ជារឿងគួរឲ្យសោកសៅពន់ពេក កុមារដែលជាសិស្សថ្នាក់ទី ៤ ម្នាក់ បានស្លាប់នៅក្នុងសាលារៀន។ ហើយក៏មានអ្នករងរបួសផងដែរ»។អង្គភាពស៊ើបអង្កេតបានប្រាប់បន្ថែមថា ស្ថាប័នបានបើកដំណើរការសំណុំរឿងព្រហ្មទណ្ឌ បន្ទាប់ពីមានហេតុការណ៍នេះ៕

វិទ្យាស្ថានស្រាវជ្រាវ៖ ការបង្រ្កាបលើកាំភ្លើង នៅអូស្ត្រាលី ត្រូវការចាំបាច់ ដោយសារបទល្មើសលួចអាវុធកើនឡើង

បទល្មើសលួចកាំភ្លើងចុះបញ្ជីរាប់លានដើមរបស់អូស្ត្រាលី បានក្លាយជាប្រភពដ៏ធំបំផុតរបស់ប្រទេសនៃការកាន់កាប់អាវុធដោយខុសច្បាប់ ដោយនេះបញ្ជាក់ពីតម្រូវការ ក្នុងការកំណត់ភាពជាម្ចាស់កម្មសិទ្ធិ បន្ទាប់ពីមានការបាញ់ប្រហារនៅឆ្នេរ Bondi កាលពីថ្ងៃទី១៤ ខែធ្នូ។ នេះបើយោងតាមវិទ្យាស្ថានស្រាវជ្រាវ។វិទ្យាស្ថានអូស្ត្រាលី (Australia Institute) បានឲ្យដឹងនៅក្នុងរបាយការណ៍ខែកញ្ញាថា យ៉ាងហោចណាស់កាំភ្លើងស្របច្បាប់ចំនួន ៤៤.៦០០ដើម ត្រូវបានលួចក្នុងរយៈពេល ២០ឆ្នាំចុងក្រោយនេះ ដែលស្មើនឹងមួយដើមរៀងរាល់ ៤ម៉ោង ដោយបន្ថែមឲ្យមានប្រភពកាន់តែច្រើន សម្រាប់ពួកឧក្រិដ្ឋជន។នគរបាលបានបញ្ជាក់ថា កាំភ្លើងដែលត្រូវបានប្រើប្រាស់ ក្នុងអំឡុងពេលមានការបាញ់ប្រហារសម្លាប់រង្គាល នៅឆ្នេរ Bondi ត្រូវបានកាន់កាប់ដោយស្របច្បាប់។ លោក Rod Campbell ដែលជាអ្នកនិពន្ធម្នាក់នៃរបាយការណ៍នេះ បាននិយាយថា ទោះយ៉ាងណាក្ដី រដ្ឋាភិបាលត្រូវតែផ្តោតលើវិធានការកាត់បន្ថយបរិមាណអាវុធដែលកំពុងចរាចរ។នគរបាលបានបញ្ជាក់ថា បុរសវ័យ ៥០ឆ្នាំដែលត្រូវបានបង្ហាញអត្តសញ្ញាណថា ជាអ្នកបាញ់ប្រហារម្នាក់នៅហេតុការណ៍សម្លាប់រង្គាល នៅឆ្នេរ Bondi និងដែលត្រូវបានបញ្ជាក់ថា ស្លាប់ បានទទួលអាជ្ញាប័ណ្ណឲ្យកាន់កាប់អាវុធ ដែលជា «កាំភ្លើងវែង» ចំនួន ៦ដើម និងកាន់ប័ណ្ណអនុញ្ញាតប្រើប្រាស់អាវុធរយៈពេលមួយទសវត្សរ៍។នៅក្នុងបទសម្ភាសន៍មួយ នាថ្ងៃអង្គារ (ទី១៦ ខែធ្នូ) នេះ លោក Campbell បាននិយាយថា៖ «សុវត្ថិភាពសហគមន៍ ត្រូវបានធ្វើឲ្យប្រសើរឡើងដោយការមានកាន់កាប់កាំភ្លើងកាន់តែតិច។ កាំភ្លើងមានកាន់តែតិច នៅក្នុងសហគមន៍របស់យើង ពួកឧក្រិដ្ឋជនកាន់តែមិនអាចមានប្រភពលួចបាន»។វិទ្យាស្ថានប៉ាន់នេះ ប៉ាន់ប្រមាណថា ឥឡូវនេះ មានអាវុធចុះបញ្ជីឯកជនជាង ៤លានដើម ហើយជាកម្មសិទ្ធិឯកជន នៅក្នុងប្រទេសអូស្ត្រាលី៕

លោក LAVROV៖ លោក ASSAD មិនបានសម្របសម្រួលមធ្យោបាយរបស់លោកជាមួយរុស្ស៊ី មុនពេលលាលែងពីតំណែងទេ

រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ ( Sergey Lavrov) បានបង្ហាញនៅក្នុងបទសម្ភាសន៍ជាមួយទូរទស្សន៍របស់សាធារណរដ្ឋឥស្លាមអ៊ីរ៉ង់ (IRIB)ថា អតីតប្រធានាធិបតីស៊ីរី លោក បាសា អាល់អាសាដ (Bashar al-Assad) មិនបានសម្របសម្រួលមធ្យោបាយរបស់លោកជាមួយរុស្ស៊ី មុនពេលលាលែងពីតំណែងទេ។ លោក ឡារ៉ូវ បាននិយាយថា៖«លោកមិនបានសម្របសម្រួលផ្លូវណាមួយទេ។ យើងបានរក្សាទំនាក់ទំនងជិតស្និទ្ធជាមួយលោក អាសាដ និងបានពង្រីកជំនួយដល់រដ្ឋាភិបាលរបស់លោក ក្នុងឆ្នាំ ២០១៥ នៅពេលដែលទីក្រុងដាម៉ាសត្រូវបានឡោមព័ទ្ធយ៉ាងមានប្រសិទ្ធភាព និងប្រឈមនឹងហានិភ័យនៃការធ្លាក់ទៅក្នុងដៃកងកម្លាំងប្រឆាំង។ យើងបានបង្កើតវត្តមានយោធានៅទីនោះ មូលដ្ឋានទ័ពអាកាស និងកងទ័ពជើងទឹក ហើយបានធ្វើការយ៉ាងសកម្ម ដើម្បីរុះរើបន្ទាយរបស់ក្រុមភេរវករ។ កិច្ចខិតខំប្រឹងប្រែងរបស់យើង គឺសហការគ្នា ដែលពាក់ព័ន្ធនឹងដៃគូអន្តរជាតិផ្សេងទៀត ជាពិសេសអ៊ីរ៉ង់ និងទួរគី។ ជារួម ដំណើរការនេះ ពិតជាតមានភាពវិជ្ជមានណាស់»។ ដោយឆ្លុះបញ្ចាំងពីសន្និសីទសន្ទនាថ្នាក់ជាតិស៊ីរី លោក ឡាវរ៉ូវ បានកត់សម្គាល់ថា៖«កិច្ចព្រមព្រៀងដែលយើងសម្រេចបានជាមួយសហការីអ៊ីរ៉ង់ និងទួរគីរបស់យើង បានប្រឈមនឹងឧបសគ្គម្តងហើយម្តងទៀត។ កិច្ចព្រមព្រៀងទាំងនេះ មិនពឹងផ្អែកទាំងស្រុងលើរដ្ឋាភិបាលរបស់លោក អាសាដ ទេ។ ខ្ញុំមិនចង់ទាញសេចក្តីសន្និដ្ឋានប្រវត្តិសាស្ត្រច្បាស់លាស់ឥឡូវនេះទេ ប៉ុន្តែឱកាសជាច្រើនត្រូវបានខកខានទាក់ទងនឹងការផ្សះផ្សាជាតិ ការឯកភាពគ្នា និងការអញ្ជើញក្រុមនយោបាយ និងក្រុមជនជាតិភាគតិចទាំងអស់ឲ្យចូលរួមក្នុងការសន្ទនា»។លោកក៏បានរំលឹកឡើងវិញនូវស្ថានភាពមួយឆ្នាំកន្លងមក នៅពេលដែលព្រឹត្តិការណ៍មួយចំនួន បានកើតឡើងនៅក្នុងប្រទេសស៊ីរី។ លោក ឡាវរ៉ូវ បានពន្យល់ថា៖«នៅពេលនោះ យើងមិនមានអង្គភាពប្រយុទ្ធនៅលើគោកទេ មានតែមូលដ្ឋានពីរគឺ មូលដ្ឋានកងទ័ពអាកាសមួយ និងមូលដ្ឋានកងទ័ពជើងទឹក។ ការឈានទៅមុខយ៉ាងឆាប់រហ័សរបស់ក្រុមប្រឆាំង ដែលដឹកនាំដោយលោក Ahmed al-Shara'a គឺមិននឹកស្មាន ដល់។ ពួកគេបានដណ្តើមកាន់កាប់ទឹកដី ដោយការតស៊ូតិចតួចប៉ុណ្ណោះ៕

ប្រធានាធិបតីវ៉េណេស៊ុយអេឡា៖ទីក្រុងការ៉ាកាស និងមូស្គូ នឹងបន្តជំរុញទំនាក់ទំនងយុទ្ធសាស្ត្រ នៅឆ្នាំ ២០២៦

ប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ បានថ្លែងនៅក្នុងកម្មវិធីផ្សាយមួយនៅលើកញ្ចក់ទូរទស្សន៍ Venezolana de Televisionថា ទំនាក់ទំនងយុទ្ធសាស្ត្ររវាងទីក្រុងការ៉ាកាស និងមូស្គូ នឹងបន្តរីកចម្រើន នៅឆ្នាំក្រោយ។ លោកបានចង្អុលបង្ហាញថា៖«យើងបានកំណត់គោលដៅខ្ពស់លើគ្រប់វិស័យទាំងអស់ ដើម្បីធ្វើឲ្យឆ្នាំ ២០២៦ ជាឆ្នាំនៃការអភិវឌ្ឍសម្រាប់ទំនាក់ទំនងយុទ្ធសាស្ត្ររវាងលោកប្រធានាធិបតី ពូទីន និង លោក ម៉ាឌូរ៉ូ និងប្រទេសយើងទាំងពីរ» ដោយលើកឡើងពីការសន្ទនាតាមទូរស័ព្ទកាលពីសប្តាហ៍មុន ជាមួយ មេដឹកនាំរុស្ស៊ី។លោកម៉ាឌូរ៉ូបានបន្ថែមថា ទីក្រុងការ៉ាកាសនឹងធ្វើជាម្ចាស់ផ្ទះនៃកិច្ចប្រជុំគណៈកម្មការអន្តររដ្ឋាភិបាលកម្រិតខ្ពស់រវាងវ៉េណេស៊ុយអេឡា និងរុស្ស៊ី នៅក្នុងត្រីមាសទី ១ នៃឆ្នាំ ២០២៦ ដែលនឹងមានការចូលរួមពី ឧបនាយករដ្ឋមន្ត្រីរុស្ស៊ី លោក Dmitry Chernyshenko៕

បណ្ដាញសង្គមធំៗ ត្រូវស្ថិតនៅក្រោមច្បាប់ម៉ាឡេស៊ី ចាប់ពីឆ្នាំ២០២៦

TikTok, Instagram និងវេទិការបស់បណ្ដាញសង្គមធំៗផ្សេងទៀត នឹងស្ថិតនៅក្រោមច្បាប់របស់ប្រទេសម៉ាឡេស៊ីដោយស្វ័យប្រវត្តិ ចាប់ពីថ្ងៃទី១ ខែមករាឆ្នាំក្រោយ ដោយនេះជាផ្នែកមួយនៃការជំរុញរបស់រដ្ឋាភិបាល ដើម្បីការពារកុមារកុំឲ្យមានគ្រោះថ្នាក់តាមប្រព័ន្ធអ៊ីនធឺណិត និងពង្រឹងការទទួលខុសត្រូវរបស់វេទិកាទាំងនោះ។ក្រុមហ៊ុនផ្តល់សេវាផ្ញើសារតាមប្រព័ន្ធអ៊ីនធឺណិត និងបណ្ដាញសង្គមទាំងអស់ ដែលមានអ្នកប្រើប្រាស់ ៨លាននាក់ ឬច្រើនជាងនេះ នៅម៉ាឡេស៊ី ត្រូវស្ថិតនៅក្រោមក្របខ័ណ្ឌអាជ្ញាប័ណ្ណរបស់ប្រទេស ហើយនឹងត្រូវបានចាត់ទុកថា បានចុះបញ្ជីអាជ្ញាប័ណ្ណ ក្រោមច្បាប់ទំនាក់ទំនង និងពហុព័ត៌មានឆ្នាំ១៩៩៨។ នេះបើយោងតាមសេចក្តីថ្លែងការណ៍របស់និយតករទំនាក់ទំនងរបស់ប្រទេសនេះ។ក្នុងចំណោមវេទិកាផ្ដល់សេវាកម្មទាំងនោះដែលបំពេញតាមលក្ខណៈវិនិច្ឆ័យ មានដូចជា Instagram, Facebook និង WhatsApp របស់ក្រុមហ៊ុន Meta Platforms Inc, TikTok របស់ក្រុមហ៊ុន ByteDance Ltd និង YouTube របស់ក្រុមហ៊ុន Alphabet Inc ព្រមទាំងកម្មវិធីផ្ញើសាររបស់ Telegram ផងដែរ។គណៈកម្មការទំនាក់ទំនង និងពហុព័ត៌មានម៉ាឡេស៊ី បានឲ្យដឹងថា វិធានការនេះ ធានាថា ការផ្ញើសារតាមប្រព័ន្ធអ៊ីនធឺណិតខ្នាតធំ និងក្រុមហ៊ុនផ្តល់សេវាបណ្ដាញសង្គម ត្រូវអនុលោមតាមក្របខ័ណ្ឌច្បាប់ និងបទប្បញ្ញត្តិរបស់ប្រទេសប្រកបដោយ «ភាពត្រឹមត្រូវ ជាប់លាប់ និងមានប្រសិទ្ធភាព»។វិធានការរបស់ម៉ាឡេស៊ីនេះ កើតឡើងនៅពេលដែលរដ្ឋាភិបាល ជុំវិញពិភពលោក ច្រើនឡើងៗ កំពុងបង្កើតច្បាប់ការពារអនីតិជនពីខ្លឹមសារដ៏គ្រោះថ្នាក់ និងការគំរាមកំហែងតាមប្រព័ន្ធអ៊ីនធឺណិត។ ប្រទេសអាស៊ីអាគ្នេយ៍មួយនេះ ក៏គ្រោងនឹងហាមឃាត់មិនឲ្យមានគណនីបណ្ដាញសង្គម សម្រាប់កុមារអាយុក្រោម ១៦ឆ្នាំផងដែរ ចាប់ពីឆ្នាំ២០២៦ តទៅ បន្ទាប់ពីមានចំណាត់ការស្រដៀងគ្នានេះដោយប្រទេសអូស្ត្រាលី៕

បណ្ដាញសង្គម

ព័ត៌មានថ្មីៗ

សប្បុរសជនផ្តល់ថ្នាក់រៀនបណ្តោះអាសន្ន ដើម្បីពង្រីកការរៀបចំថ្នាក់រៀននៅតាមជំរំភៀសសឹក

កម្ពុជា-បង់ក្លាដែស ជំរុញកិច្ចសហប្រតិបត្តិការ វិស័យ ពាណិជ្ជកម្ម និង វិនិយោគ ទេសចរណ៍ សុខាភិបាល កសិកម្ម

សមាគមខ្មែរក្រោមបន្តនាំយក អំណោយប្រគេនព្រះសង្ឃភៀសសឹក ១០៣ អង្គ គង់នៅវត្តខ្សាច់ស ខេត្តកោះកុង

សង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តការបាញ់ប្រហារ ដើម្បីឈ្លានពានមកលើដែនអធិបតេយ្យរបស់កម្ពុជានៅទិសយោធភូមិភាគទី៤ និងយោធភូមិភាគទី៥

ក្រសួងកសិកម្ម ជូន ផ្ទះសំណាញ់១ខ្នង និងប្រព័ន្ធស្រោចស្រព សម្រាប់ដាំដុះបន្លែជូនជនភៀសសឹក

កម្ពុជា-បារាំង ឯកភាពលើតម្រូវការក្នុងការពង្រឹងធនធានមនុស្សតាមរយៈការអប់រំឧត្តមសិក្សាកម្ពុជា

បារាំង គាំទ្រដល់កម្ពុជាក្នុងការហ្វឹកហ្វឺន និងកសាងសមត្ថភាពកងកម្លាំងរក្សាសន្តិភាពរបស់កម្ពុជា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877