BTV NEWS

លោក Zelenskyy បញ្ជាក់ថា «ការសម្រេចជាច្រើន» អាចធ្វើឡើងមុនឆ្នាំថ្មី នៅមុនកិច្ចប្រជុំជាមួយលោក Trump

ចិនដាក់ទណ្ឌកម្មលើក្រុមហ៊ុនការពារជាតិអាមេរិក និងបុគ្គល ពាក់ព័ន្ធការលក់អាវុធទៅឲ្យកោះតៃវ៉ាន់

ទីក្រុងសេអ៊ូល នឹងបន្ធូរបន្ថយការរឹតបន្តឹងនូវលទ្ធភាពចូលទៅកាន់សារព័ត៌មានកូរ៉េខាងជើង

រដ្ឋមន្ត្រីការបរទេស៖ នីហ្សេរីយ៉ាផ្តល់ការស៊ើបការណ៍សម្ងាត់ដល់អាមេរិក ដើម្បីវាយប្រហារក្រុមសកម្មប្រយុទ្ធ

ព័ត៌មានអន្តរជាតិ

ចំនួនមនុស្សស្លាប់ក្នុងហេតុការណ៍គ្រោះថ្នាក់រថយន្តបុកគ្នាលើផ្លូវល្បឿនលឿនឥណ្ឌាកើនឡើងដល់ ១៣នាក់

ក្រុមមន្រ្តីនិយាយនៅថ្ងៃអង្គារនេះថា ចំនួនមនុស្សស្លាប់ក្នុងហេតុការណ៍គ្រោះថ្នាក់រថយន្តបុកគ្នាលើផ្លូវល្បឿនលឿនឥណ្ឌា បានកើនឡើងដល់ ១៣នាក់។សារព័ត៌មានក្នុងស្រុក រាយការណ៍ថា ឧបទ្ទេវហេតុគ្រោះថ្នាក់ចរាចរណ៍នេះ បានកើតឡើងនៅលើផ្លូវល្បឿនលឿនចេញពីទីក្រុងដែលី ទៅកាន់ទីក្រុងអាហ្រ្គា បង្កឡើងដោយសារស្ថានភាពរយៈចម្ងាយមើលឃើញពុំសូវច្បាស់ ក្រោយផ្សែងអ័ព្ទក្រាស់កើតមាន អំឡុងរដូវរងា ។សេវាកម្មពន្លត់អគ្គិភ័យ និងក្រុមនគរបាល បានប្រញាប់ប្រញាល់ទៅកាន់កន្លែងកើតហេតុ ក្រោយអ្នកស្រុក និងសាក្សី ព្យាយាមសង្រ្គោះជនរងគ្រោះ ។លោក Chandra Prakash Singh គឺជាចៅក្រមស្រុក Mathura និយាយថា តាមការបង្គាប់បញ្ជាពីរដ្ឋមន្រ្តីប្រចាំរដ្ឋ Uttar Pradesh លោក Yogi Adityanath សំណង ២.២០០ដុល្លារ នឹងផ្តល់ជូនដល់គ្រួសារអ្នកស្លាប់ ។ក្រុមអាជ្ញាធរនិយាយកាលពីខែមករាថា បើទោះបីជាឥណ្ឌាជាទីផ្សាររថយន្តធំបំផុតលំដាប់ទី ៣របស់ពិភពលោកយ៉ាងណាក៏ដោយ ប្រទេសមួយនេះ មានផ្លូវស្លាប់មនុស្សច្រើនបំផុត ក្នុងនោះឧបទ្ទេវហេតុគ្រោះថ្នាក់ចរាចរណ៍កាលពីឆ្នាំមុន បានសម្លាប់មនុស្សប្រហែល ១៨ម៉ឺននាក់ នៅទូទាំងប្រទេស ៕

មនុស្ស ៦នាក់ស្លាប់ ក្នុងហេតុការណ៍ធ្លាក់យន្តហោះខ្នាតតូចនៅភាគកណ្តាលម៉ិកស៊ិក

យោងតាមសេចក្តីរាយការណ៍បឋមពីអាជ្ញាធរការពារស៊ីវិលរដ្ឋម៉ិកស៊ិក បានឲ្យដឹងថា យន្តហោះខ្នាតតូចឯកជន Cessna Citation III ចុះបញ្ជីលេខ XA-PRO បានធ្លាក់កាលពីថ្ងៃចន្ទម្សិលមិញ នៅទីក្រុង Toluca ស្ថិតនៅភាគកណ្តាលប្រទេសម៉ិកស៊ិក បណ្តាលឲ្យមនុស្សយ៉ាងហោច ៦នាក់ ស្លាប់ ។ ពួកគេនិយាយថា យន្តហោះមួយគ្រឿងនេះ បានចាកចេញពីទីក្រុង Acapulco ឆ្ពោះទៅកាន់ទីក្រុង Toluca ដោយដឹកអ្នកដំណើរ ៨នាក់ និងអាកាសយានិក ២នាក់ ។ ពួកគេបញ្ជាក់ទៀតថា អគ្គិភ័យបង្កឡើងដោយសារការធ្លាក់យន្តហោះនេះ ត្រូវបានទប់ស្កាត់ជាប់ ក្នុងនោះប្រតិបត្តិការយកចេញកម្ទេចកម្ទី កំពុងធ្វើឡើង ។ ក្រុមអាជ្ញាធរ បានជំរុញសាធារណជនចៀសវាងពីការធ្វើដំណើរទៅកាន់ទីតាំងធ្លាក់យន្តហោះ ហើយមូលហេតុបណ្តាលឲ្យកើតមានឧបទ្ទេវហេតុធ្លាក់យន្តហោះនេះ កំពុងស្ថិតក្រោមការស៊ើបអង្កេត ៕

ឥណ្ឌូនេស៊ីដកហូតលិខិតអនុញ្ញាតរុក្ខាប្រមាញ់ជាង ២០ ក្រោយទឹកជំនន់ស្លាប់មនុស្សនៅកោះស៊ូម៉ាត្រា

រដ្ឋមន្រ្តីក្រសួងរុក្ខាប្រមាញ់ឥណ្ឌូនេស៊ីលោក Raja Juli Antoni និយាយកាលពីថ្ងៃចន្ទថា ឥណ្ឌូនេស៊ី នឹងដកហូតលិខិតអនុញ្ញាតរុក្ខាប្រមាញ់ជាង ២០នៅទូទាំងប្រទេស ក្រោយទឹកជំនន់ និងបំណាក់ដីស្លាប់មនុស្ស បានវាយប្រហារតំបន់ជាច្រើននៅកោះភាគពាយ័ព្យស៊ូម៉ាត្រា ។ក្រុមបរិស្ថាន និងក្រុមអ្នកជំនាញ បានដាក់ការស្តីបន្ទោសដល់ការរួមចំណែកនៃការបាត់បង់ព្រៃឈើ នៅក្នុងទឹកជំនន់ដ៏គំហុក និងបំណាក់ដីនៅកោះស៊ូម៉ាត្រា ដែលបានសម្លាប់មនុស្សជាង ១ពាន់នាក់ ។យោងតាមទិន្នន័យផ្លូវការ បានឲ្យដឹងថា ចំនួនអ្នកស្លាប់ដោយសារទឹកជំនន់ និងបំណាក់ដីបង្កឡើងដោយព្យុះស៊ីក្លូន ដែលបានបំផ្លិចបំផ្លាញផ្ទះសម្បែង និងបង្ខំឲ្យមនុស្សទៅជ្រកកោននៅក្នុងមជ្ឈមណ្ឌលជម្លៀស នៅលើកោះស៊ូម៉ាត្រា កាលពីចុងខែវិច្ឆិកា បានកើនឡើងដល់ ១.០៣០នាក់ គិតត្រឹមថ្ងៃទី១៥ ខែធ្នូនេះ ហើយមនុស្ស ២០៦នាក់ នៅតែបាត់ខ្លួន។ ព្យុះស៊ីក្លូននេះ បណ្ដាលឲ្យមនុស្សប្រហែល ២០០នាក់ស្លាប់ នៅភាគខាងត្បូងប្រទេសថៃ និងម៉ាឡេស៊ីផងដែរ ។លោក Antoni និយាយប្រាប់ក្រុមអ្នកសារព័ត៌មានថា រដ្ឋាភិបាលនឹងដកហូតលិខិតអនុញ្ញាតរុក្ខាប្រម៉ាញចំនួន ២២ដែលគ្របដណ្តប់លើផ្ទៃដីជាង ១ លានហិកតា ។លោកបន្តថា ផ្ទៃដីជាង ១០ម៉ឺនហិចតាដែលត្រូវអនុញ្ញាតឲ្យលុបចោល ស្ថិតនៅលើកោះស៊ូម៉ាត្រា បើទោះបីជារូបលោកពុំបានអះអាងថាតើ ការសម្រេចចិត្តនេះ មានការជាប់ពាក់ព័ន្ធនឹងគ្រោះមហន្តរាយកាលពីពេលកន្លងទៅក៏ដោយ ។ខណៈពេលនោះដែរ ប្រធានាធិបតីឥណ្ឌូនេស៊ី លោក Prabowo Subianto បានលើកឡើងថា សកម្មភាពស្តាឡើងវិញនៅតំបន់នានា លើកោះស៊ូម៉ាត្រាដែលរងគ្រោះដោយទឹកជំនន់យ៉ាងធ្ងន់ធ្ងរ អាចនឹងវិលទៅរកភាពប្រក្រតីឡើងវិញ ក្នុងរយៈពេលពី ២-៣ ខែបន្ទាប់ ក្រោយពីមានគ្រោះមហន្តរាយមួយនេះ ៕

មន្ត្រីអ៊ីតាលី៖ កញ្ចប់ទណ្ឌកម្មចំនួន ១៩ របស់សហភាពអឺរ៉ុបលើរុស្ស៊ី ធ្វើឲ្យសេដ្ឋកិច្ចអឺរ៉ុបចុះខ្សោយ

លោក Matteo Salvini ឧបនាយករដ្ឋមន្ត្រីអ៊ីតាលី និងជារដ្ឋមន្ត្រីក្រសួងដឹកជញ្ជូន និងហេដ្ឋារចនាសម្ព័ន្ធបាននិយាយថា កញ្ចប់ទណ្ឌកម្មចំនួន ១៩ របស់សហភាពអឺរ៉ុបលើរុស្ស៊ី បានធ្វើឲ្យសេដ្ឋកិច្ចអឺរ៉ុបចុះ ខ្សោយ។ លោកបានប្រាប់បណ្តាញទូរទស្សន៍ Rete4 ថា៖«ខ្ញុំគ្រាន់តែចង់កត់សម្គាល់ថា ជម្លោះជិត ៤ឆ្នាំ និងកញ្ចប់ទណ្ឌកម្មចំនួន ១៩ ដែលត្រូវបានគេសន្មត់ថា នឹងនាំរុស្ស៊ីឲ្យដួលរលំ ផ្ទុយទៅវិញបាននាំសេដ្ឋកិច្ចអឺរ៉ុបឲ្យចុះខ្សោយ ដោយនាំឲ្យថាមពលថ្លៃជាងមុនសម្រាប់ជនជាតិអ៊ីតាលី។ នេះគឺជាមូលហេតុដែលខ្ញុំអំពាវនាវឲ្យមានការប្រុងប្រយ័ត្នទាក់ទងនឹងការបំពាក់និងផ្គត់ផ្គង់អាវុធឡើងវិញនោះ»។លោក Salvini បានបន្ថែមថា៖«ទាំងលោក ហ៊ីត្លែរ និង លោក ណាប៉ូឡេអុង មិនអាចនាំទីក្រុងមូស្គូឲ្យដួលរលំបានទេ ហើយខ្ញុំសង្ស័យថា ប្រមុខការទូតរបស់សហភាពអឺរ៉ុប លោកស្រី Kaja Kallas ប្រធានាធិបតីបារាំង អាមេរ៉ានុយអែល ម៉ាក្រុង (Emmanuel Macron) នាយករដ្ឋមន្ត្រីអង់គ្លេសលោក Keir Starmer និង អធិការបតីអាល្លឺម៉ង់លោក Friedrich Merz នឹងអាចធ្វើដូច្នេះបាន»។ តាមទស្សនៈរបស់លោក អឺរ៉ុបមិនកំពុងប្រឈមនឹងការគំរាមកំហែងពិតប្រាកដពីភាគខាងកើតទេ ប៉ុន្តែមកពីភាគខាងត្បូង ជាកន្លែងដែលជនអន្តោប្រវេសន៍ខុសច្បាប់ បានចេញមក៕

ទីក្រុងឡាអេធ្វើជាម្ចាស់ផ្ទះកិច្ចប្រជុំពិភាក្សាលើការទាមទារសំណងសង្រ្គាមរបស់អ៊ុយក្រែនពីរុស្ស៊ី

ក្រុមមេដឹកនាំអឺរ៉ុប រួមទាំងប្រធានាធិបតីអ៊ុយក្រែនលោក Volodymyr Zelenskiy គ្រោងនឹងជួបគ្នានៅក្នុងទីក្រុងឡាអេ ប្រទេសហូឡង់ នាថ្ងៃអង្គារនេះ ដើម្បីដាក់ចេញគណៈកម្មការទាមទារអន្តរជាតិ ជាការផ្តល់សំណងខូចខាតរាប់ពាន់លានដុល្លារដល់ទីក្រុងគីវ ពីការវាយប្រហាររបស់រុស្ស៊ី និងឧក្រិដ្ឋកម្មសង្រ្គាមរងការចោទប្រកាន់ ។កិច្ចប្រជុំរយៈពេល ១ថ្ងៃ ដែលធ្វើសហម្ចាស់ផ្ទះដោយហូឡង់ និងក្រុមប្រឹក្សាអឺរ៉ុបមាន ៤៦ប្រទេស គឺជាក្រុមសិទ្ធិមនុស្សកំពូលរបស់ទ្វីបមួយនេះ ត្រូវបានចូលរួមដោយឥស្សរជនជាន់ខ្ពស់រាប់សិបនាក់ រួមទាំងប្រធានគោលនយោបាយការបរទេសសហភាពអឺរ៉ុបលោកស្រី Kaja Kallas ។ជំនួបនេះ គាប់ជួននឹងដំណើរការការទូតសន្តិភាពកំពុងបន្តគាំទ្រដោយសហរដ្ឋអាមេរិក មានគោលបំណងបញ្ឈប់សង្រ្គាម ដែលបានចាប់ផ្តើមជាមួយនឹងការវាយប្រហារពេញបន្ទុករបស់រុស្ស៊ីលើអ៊ុយក្រែនកាលពីខែកុម្ភៈ ឆ្នាំ ២០២២ ។ក្រុមមន្រ្តីរុស្ស៊ី ពុំអាចទាក់ទងសុំសេចក្តីអត្ថាធិប្បាយភ្លាមៗបាននោះទេ លើផែនការនេះ ប៉ុន្តែពួកបានបដិសេធន៍ចោលម្តងហើយម្តងទៀតការចោទប្រកាន់ថា កងកម្លាំងរុស្ស៊ី បានប្រព្រឹត្តឧក្រិដ្ឋកម្មសង្រ្គាម អំឡុងជម្លោះនេះ ។លទ្ធភាពនៃការរួមបញ្ចូលការលើកលែងទោសសម្រាប់អំពើឃោឃៅនាសម័យសង្រ្គាមនៅក្នុងកិច្ចព្រមព្រៀងសន្តិភាពដែលធ្លាប់ស្នើសុំដោយរដ្ឋបាលលោកប្រធានាធិបតី Donald Trump អាចនឹងធ្វើឲ្យស្មុគស្មាញដល់ផែនការរបស់អឺរ៉ុប ក្នុងការផ្តល់សំណងផងដែរដល់ជនរងគ្រោះនៃការបំពាននៅអ៊ុយក្រែន ចាប់ពីអំពើហិង្សាផ្លូវភេទ និងការនិរទេសកុមារ រហូតដល់ការបំផ្លាញទីតាំងសាសនា ។បញ្ជីឈ្មោះខូចខាត(Register of Damage) រយៈពេល ២ឆ្នាំ ដែលនឹងក្លាយជាផ្នែកមួយនៃគណៈកម្មករទាមទារអន្តរជាតិ ទទួលបានការទាមទារចំនួនជាង ៨ម៉ឺន ដាក់ជូនដោយបុគ្គល អង្គការ និងស្ថាប័នសាធារណៈ នៅអ៊ុយក្រែន ក្រោមរូបភាពដ៏ធំទូលំទូលាយ ។បណ្តារដ្ឋជាង ៥០ និងសហភាពអឺរ៉ុប បានធ្វើសេចក្តីស្នើច្បាប់អនុសញ្ញាក្រុមប្រឹក្សាអឺរ៉ុប ដើម្បីបង្កើតគណៈកម្មការនេះឡើង ក្រោយត្រូវបានផ្តល់សច្ចាប័នដោយហត្ថលេខីចំនួន ២៥ ក៏ដូចជាមូលនិធិគ្រប់គ្រាន់ទទួលបាន ដើម្បីផ្តល់ហិរញ្ញប្បទានដល់ការងារមួយនេះ ៕

តុលាការប៉ាគីស្ថានកាត់ទោសបព្វជិតមកពីគណបក្សដែលត្រូវបានហាមឃាត់ ឲ្យជាប់ពន្ធនាគារ ៣៥ឆ្នាំ ពីបទបង្កអំពើហិង្សា

មន្ត្រីតុលាការ និងមេធាវីការពារក្តីម្នាក់ បាននិយាយនៅថ្ងៃអង្គារនេះថា តុលាការប្រឆាំងភេរវកម្មប៉ាគីស្ថាន បានកាត់ទោសមេដឹកនាំជាន់ខ្ពស់នៃគណបក្សអ៊ីស្លាមនិយម ដែលត្រូវបានហាមឃាត់ ឲ្យជាប់ពន្ធនាគារ ៣៥ឆ្នាំ ពីបទបង្កអំពើហិង្សា រយៈពេលជាងមួយឆ្នាំបន្ទាប់ពីបព្វជិតរូបនេះ បានអំពាវនាវជាសាធារណៈឲ្យសម្លាប់ប្រធានតុលាការ នៅពេលនោះ។ លោក Zaheerul Hassan Shah មេដឹកនាំនៃគណបក្ស Tehreek-e-Labbaik Pakistan ដែលត្រូវបានហាមឃាត់ ត្រូវបានចាប់ខ្លួនកាលពីឆ្នាំមុន បន្ទាប់ពីវីដេអូមួយ ត្រូវបានចែកចាយនៅលើបណ្តាញសង្គមដែលបង្ហាញពីលោក កំពុងផ្តល់ប្រាក់ចំនួន ១០ លានរូពី (៣៦.000 ដុល្លារ) ដល់អ្នកណាដែលកាត់ក្បាលអតីតប្រធានតុលាការលោក Qazi Faez Isa។លោក Isa បានប្រឈមនឹងការរិះគន់ពីក្រុមសាសនាដែលមាននិន្នាការតឹងរ៉ឹងកាលពីឆ្នាំមុន បន្ទាប់ពីលោក បានផ្តល់ប្រាក់ធានាដល់បុរសម្នាក់មកពីសហគមន៍ជនជាតិភាគតិច Ahmadi ដែលជាករណីប្រមាថព្រះ។សាសនា Ahmadi គឺជាសាខាមួយនៃសាសនាអ៊ីស្លាម ប៉ុន្តែសភាប៉ាគីស្ថានបានប្រកាសថា Ahmadi មិនមែនជាសាសនាមូស្លីមនៅឆ្នាំ ១៩៧៤ទេ។ ផ្ទះសម្បែង និងកន្លែងគោរពបូជារបស់សាសនា Ahmadi ជារឿយៗ ត្រូវបានវាយប្រហារដោយក្រុមសកម្មប្រយុទ្ធនិកាយស៊ុននី ដែលចាត់ទុកពួកគេថា មិនគោរពវិន័យ។ មេធាវីការពារក្តី លោក Maqsood-ul-Haq និងមន្ត្រីតុលាការបាននិយាយថា លោក Shah ត្រូវបានកាត់ទោសកាលពីថ្ងៃចន្ទ ដោយតុលាការប្រឆាំងភេរវកម្មមួយនៅក្នុងទីក្រុង Lahore ភាគខាងកើត៕

ប្រព័ន្ធផ្សព្វផ្សាយ៖ សហភាពអឺរ៉ុបជឿថា រឿងអាស្រូវពុករលួយអាចបង្ខំឲ្យលោក ZELENSKYY ទទួលយកកិច្ចព្រមព្រៀង

អ្នកការទូតអឺរ៉ុបម្នាក់បានប្រាប់កាសែត The Washington Post ថា រឿងអាស្រូវពុករលួយ និងបញ្ហាជាមួយហេដ្ឋារចនាសម្ព័ន្ធថាមពលរបស់អ៊ុយក្រែន អាចបង្ខំឲ្យលោក វ្ល៉ូឌីមី ហ្សេឡិនស្គី យល់ព្រមលើកិច្ចព្រមព្រៀងមួយ ដើម្បីដោះស្រាយជម្លោះអ៊ុយក្រែន។ អ្នកការទូតដែលសុំមិនមិនបញ្ចេញឈ្មោះនោះ បាននិយាយថា៖«ខ្ញុំជឿថា ពួកគេមិនដែលធ្ងន់ធ្ងរដូចយើងនៅពេលនេះទេ។ ហើយទោះបីជាយ៉ាងណាក៏ដោយ មានការជឿជាក់ថា រឿងនេះពាក់ព័ន្ធនឹងរឿងអាស្រូវទាំងមូលលើអំពើពុករលួយ និងភាពគ្មានសណ្តាប់ធ្នាប់ក្នុងស្រុកទាំងមូលផងដែរ»។ ការចរចារវាងគណៈប្រតិភូសហរដ្ឋអាមេរិក និងអ៊ុយក្រែន បានធ្វើឡើងនៅទីក្រុងប៊ែរឡាំង នៅថ្ងៃទី ១៤-១៥ ខែធ្នូ។ គណៈប្រតិភូសហរដ្ឋអាមេរិករួមមានលោក Steve Witkoff បេសកជនពិសេសរបស់លោកប្រធានាធិបតី ដូណាល់ ត្រាំ ( Donald Trump) និងកូនប្រសាររបស់មេដឹកនាំសហរដ្ឋអាមេរិក គឺអ្នកជំនួញ Jared Kushner។ ភាគីអ៊ុយក្រែនត្រូវបានតំណាងដោយលោក វ្ល៉ូឌីមី ហ្សេឡិនស្គី លេខាធិការក្រុមប្រឹក្សាសន្តិសុខ និងការពារជាតិ លោក Rustem Umerov និងនាយអគ្គសេនាធិការ លោក Andrey Gnatov។យោងតាមប្រភពព័ត៌មានរបស់កាសែត Politico បានឲ្យដឹងថា រដ្ឋបាលលោក ត្រាំ បានបង្ហាញឱសានវាទដល់អ៊ុយក្រែនដែលពាក់ព័ន្ធនឹងសម្បទានទឹកដី ជាថ្នូរនឹងការធានាសន្តិសុខស្រដៀងគ្នាទៅនឹងមាត្រា ៥ នៃសន្ធិសញ្ញាអាត្លង់ទិកខាងជើង ដែលធានាគោលការណ៍ការពារជាតិរួមរបស់អង្គការណាតូ។ ទីក្រុងគីវ ត្រូវតែយល់ព្រមតាមលក្ខខណ្ឌទាំងនេះជាបន្ទាន់។ បើមិនដូច្នោះទេ សំណើបន្ទាប់របស់សហរដ្ឋអាមេរិកនឹងមិនអំណោយផលទេ៕

សមាជិកសភាក្រុង Mexico មានជម្លោះ រហូតដល់វាយតប់រាងកាយ អំឡុងជជែកដេញដោល

សមាជិកសភាជាស្ត្រីមួយក្រុម នៅក្នុងសភានៃទីក្រុង Mexico របស់ប្រទេសម៉ិកស៊ិក បានឈានដល់ការវាយតប់គ្នា កាលពីថ្ងៃចន្ទ (ទី១៥ ខែធ្នូ) ដោយកាមេរ៉ាបានផ្សាយការវាយតប់គ្នានោះដោយផ្ទាល់ ខណៈដែលពួកគេទាញសក់គ្នាទៅវិញទៅមក និងវាយតប់រាងកាយគ្នា។ជម្លោះនោះបានផ្ទុះឡើងបន្ទាប់ពីស្ត្រីមួយក្រុមមកពីគណបក្សសកម្មភាពជាតិ (PAN) ដែលជាក្រុមស្ដាំនិយម បានចូលទៅកាន់វេទិកាសំខាន់របស់សភា ជាការតវ៉ា ចំពោះច្បាប់ដែលត្រូវបានចោទប្រកាន់ថា ត្រូវបានរំលោភដោយគណបក្សឆ្វេងនិយម Morena ដែលមានសំឡេងភាគច្រើននៅក្នុងសភា។ការជជែកដេញដោល ពាក់ព័ន្ធនឹងការកែទម្រង់ទីភ្នាក់ងារត្រួតពិនិត្យតម្លាភាពរបស់រដ្ឋាភិបាលទីក្រុង។ នេះបើយោងតាមរបាយការណ៍ប្រព័ន្ធផ្សព្វផ្សាយក្នុងស្រុក។វីដេអូពីហេតុការណ៍នេះ បង្ហាញឲ្យឃើញសមាជិកសភាយ៉ាងតិច ៥នាក់មកពីភាគីទាំង២ បានជជែកគ្នាយ៉ាងតឹងសរសៃ-ក ដោយសមាជិកសភាទាំងនោះបានវាយតប់គ្នាដោយកែងដៃ ទះកំផ្លៀង និងទាញសក់គ្នាទៅវិញទៅមក ជាប៉ុនប៉ងរបស់សមាជិកសភារបស់បក្ស Morena ដើម្បីឲ្យសមាជិកបក្ស PAN ចេញពីវេទិកា ទោះបីជាពួកគេបដិសេធមិនចេញក៏ដោយ។បន្ទាប់ពីមានជម្លោះនោះ សមាជិកសភារបស់គណបក្ស PAN បានចាកចេញពីសភា ហើយភាគច្រើននៃបក្ស Morena បានបន្តការជជែកដេញដោលដោយគ្មានវត្តមានគណបក្សប្រឆាំង។ នេះបើយោងតាមរបាយការណ៍ដែលបានបង្ហោះនៅលើបណ្ដាញសង្គមរបស់សភាទីក្រុង Mexico City ៕

លោក Trump ចាត់ទុកហ្វង់តានីលថា ជា «អាវុធមហាប្រល័យ» អំឡុងពេលបង្កើនសង្គ្រាមគ្រឿងញៀន

ប្រធានាធិបតីអាមេរិក លោក Donald Trump បានចុះហត្ថលេខាលើក្រឹត្យមួយ កាលពីថ្ងៃចន្ទ (ទី១៥ ខែធ្នូ) ដោយប្រកាសថា សារធាតុហ្វង់តានីល គឺជាអាវុធមហាប្រល័យ ជាចំណាត់ការដែលពង្រីកសិទ្ធិអំណាចរបស់រដ្ឋាភិបាលសហរដ្ឋអាមេរិកកាន់តែខ្លាំង ក្នុងការប្រយុទ្ធប្រឆាំងនឹងថ្នាំញៀនសំយោគនេះ ដែលត្រូវបានស្តីបន្ទោសថា បានធ្វើឲ្យអ្នកប្រើប្រាស់ជ្រុលរបស់អាមេរិករាប់ម៉ឺននាក់សា្លប់ក្នុងមួយឆ្នាំៗ។ការដាក់ឈ្មោះដែលមិនធ្លាប់មានពីមុនមក ចំពោះគ្រឿងញៀននេះ បង្ហាញពីចេតនារបស់លោក Trump ក្នុងការចាត់ទុកសារធាតុហ្វង់តានីល មិនមែនគ្រាន់តែជាវិបត្តិសុខភាពសាធារណៈប៉ុណ្ណោះទេ ប៉ុន្តែថែមទាំងជាការគំរាមកំហែងដល់សន្តិសុខជាតិ ដែលស្មើនឹងសង្គ្រាមគីមី។ការចាត់ចំណាត់ថា្នក់នេះ ដែលបង្កើនការវាយលុកលើអ្វីដែលលោកនិយាយថា ក្រុមអន្ធពាលកំពុងធ្វើឲ្យសហរដ្ឋអាមេរិកជោរជន់ដោយគ្រឿងញៀននោះ ផ្តល់សិទ្ធិអំណាចដល់មន្ទីរបញ្ចកោណ ដើម្បីជួយដល់ការអនុវត្តន៍ច្បាប់ និងអនុញ្ញាតឲ្យភ្នាក់ងារស៊ើបការណ៍សម្ងាត់ដាក់ពង្រាយប្រឆាំងនឹងអ្នកជួញដូរគ្រឿងញៀន នូវឧបករណ៍ដែលជាធម្មតាបម្រុងទុកសម្រាប់ការប្រឆាំងការរីកសាយអាវុធ។នៅឯព្រឹត្តិការណ៍សេតវិមាន ដែលផ្តល់កិត្តិយសដល់សមាជិកដែលមានភារកិច្ចជួយនគរបាលព្រំដែនភាគខាងត្បូងសហរដ្ឋអាមេរិកជាមួយម៉ិកស៊ិក លោក Trump បាននិយាយថា៖ «យើងកំពុងចាត់ថ្នាក់ជាផ្លូវការថា សារធាតុហ្វង់តានីល គឺជាអាវុធមហាប្រល័យ»។ការដាក់ឈ្មោះក្រុមជួញដូរគ្រឿងញៀនរបស់លោក Trump នៅឆ្នាំ 2025 ជាអង្គការភេរវករបរទេស បានបើកផ្លូវឲ្យមានសកម្មភាពយោធាប្រឆាំងនឹងពួកគេ។ ចាប់តាំងពីដើមខែកញ្ញាមក រដ្ឋបាលរបស់លោក Trump បានធ្វើការវាយប្រហារជាង ២០ដងប្រឆាំងនឹងទូកដែលសង្ស័យថា មានគ្រឿងញៀន នៅសមុទ្រការ៉ាអ៊ីប និងមហាសមុទ្រប៉ាស៊ីហ្វិក ដោយបានសម្លាប់មនុស្សជាង ៨០នាក់៕

នគរបាលអូស្ត្រាលី៖ ខ្មាន់កាំភ្លើងនៅឆ្នេរ Bondi ត្រូវបានបំផុសគំនិតដោយរដ្ឋឥស្លាម និងបានទៅហ្វីលីពីន

នគរបាល នៅថ្ងៃអង្គារ (ទី១៦ ខែធ្នូ) នេះ បានប្រាប់ឲ្យដឹងថា ជនសង្ស័យជាខ្មាន់កាំភ្លើង ២នាក់ ដែលបានវាយប្រហារនៅឯពិធីជួបជុំ Hanukkah នៅឆ្នេរ Bondi របស់ទីក្រុងស៊ីដនី បានធ្វើដំណើរទៅកាន់ប្រទេសហ្វីលីពីន មុនពេលបង្កអំពើបាញ់ប្រហារដែលបានសម្លាប់មនុស្ស ១៥នាក់យ៉ាងតិច ហើយពួកគេហាក់ដូចជាត្រូវបានបំផុសគំនិតដោយមនោគមន៍វិជ្ជារបស់ក្រុមរដ្ឋឥស្លាម។ហេតុការណ៍ កាលពីថ្ងៃអាទិត្យចុងសប្ដាហ៍កន្លងមកនេះ គឺជាការបាញ់ប្រហារសម្លាប់មនុស្សច្រើនដ៏អាក្រក់បំផុតរបស់ប្រទេសអូស្ត្រាលី ក្នុងរយៈពេលជិត ៣០ឆ្នាំ ហើយកំពុងត្រូវបានស៊ើបអង្កេតថា តើវាគឺជាអំពើភេរវកម្មដែលផ្តោតលើសហគមន៍ជនជាតិជ្វីហ្វមែន ឬយ៉ាងណា។ចំនួនអ្នកស្លាប់ គឺ ១៦នាក់ ដោយរាប់បញ្ចូលទាំងខ្មាន់កាំភ្លើងម្នាក់ផងដែរ ដែលត្រូវបាននគរបាលកំណត់អត្តសញ្ញាណថា ឈ្មោះ Sajid Akram វ័យ ៥០ឆ្នាំដែលត្រូវបានបាញ់បណ្ដាលឲ្យស្លាប់ដោយនគរបាល។ កូនប្រុសរបស់បុរសនោះអាយុ ២៤ឆ្នាំ និងជាជនសង្ស័យសមគំនិតដែលត្រូវបានបង្ហាញអត្តសញ្ញាណដោយប្រព័ន្ធផ្សព្វផ្សាយក្នុងស្រុកថា ឈ្មោះ Naveed Akram កំពុងស្ថិតក្នុងស្ថានភាពធ្ងន់ធ្ងរ នៅឯមន្ទីរពេទ្យ បន្ទាប់ពីត្រូវបានបាញ់ប្រហារផងដែរ។នគរបាលអូស្ត្រាលីបានបញ្ជាក់នៅថ្ងៃអង្គារនេះថា ជនទាំង ២នាក់នេះ បានធ្វើដំណើរទៅហ្វីលីពីន កាលពីខែមុន ហើយគោលបំណងនៃការធ្វើដំណើរនេះ កំពុងស្ថិតនៅក្រោមការស៊ើបអង្កេត។ ចំណែកមន្ត្រីអន្តោប្រវេសន៍ហ្វីលីពីន បានប្រាប់ថា បុរសទាំង ២នាក់ បានធ្វើដំណើរទៅកាន់ទីក្រុងម៉ានីល និងបន្តទៅកាន់ទីក្រុង Davao នៅថ្ងៃទី១ ខែវិច្ឆិកា ហើយបានចាកចេញនៅថ្ងៃទី២៨ ខែវិច្ឆិកា ពោលគឺប៉ុន្មានសប្តាហ៍មុនពេលមានការបាញ់ប្រហារនៅឆ្នេរ Bondi នេះ។មន្ត្រីទាំងនេះ បានបន្ថែមថា ឪពុកបានធ្វើដំណើរដោយកាន់លិខិតឆ្លងដែនឥណ្ឌា ខណៈដែលកូនប្រុសកំពុងធ្វើដំណើរដោយកាន់លិខិតឆ្លងដែនអូស្ត្រាលី។ បណ្តាញដែលមានទំនាក់ទំនងជាមួយរដ្ឋឥស្លាម ត្រូវបានគេដឹងថា មានប្រតិបត្តិការ នៅហ្វីលីពីន និងបានមានឥទ្ធិពលខ្លះនៅភាគខាងត្បូងនៃប្រទេសនេះ៕

បណ្ដាញសង្គម

ព័ត៌មានថ្មីៗ

សប្បុរសជនផ្តល់ថ្នាក់រៀនបណ្តោះអាសន្ន ដើម្បីពង្រីកការរៀបចំថ្នាក់រៀននៅតាមជំរំភៀសសឹក

កម្ពុជា-បង់ក្លាដែស ជំរុញកិច្ចសហប្រតិបត្តិការ វិស័យ ពាណិជ្ជកម្ម និង វិនិយោគ ទេសចរណ៍ សុខាភិបាល កសិកម្ម

សមាគមខ្មែរក្រោមបន្តនាំយក អំណោយប្រគេនព្រះសង្ឃភៀសសឹក ១០៣ អង្គ គង់នៅវត្តខ្សាច់ស ខេត្តកោះកុង

សង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តការបាញ់ប្រហារ ដើម្បីឈ្លានពានមកលើដែនអធិបតេយ្យរបស់កម្ពុជានៅទិសយោធភូមិភាគទី៤ និងយោធភូមិភាគទី៥

ក្រសួងកសិកម្ម ជូន ផ្ទះសំណាញ់១ខ្នង និងប្រព័ន្ធស្រោចស្រព សម្រាប់ដាំដុះបន្លែជូនជនភៀសសឹក

កម្ពុជា-បារាំង ឯកភាពលើតម្រូវការក្នុងការពង្រឹងធនធានមនុស្សតាមរយៈការអប់រំឧត្តមសិក្សាកម្ពុជា

បារាំង គាំទ្រដល់កម្ពុជាក្នុងការហ្វឹកហ្វឺន និងកសាងសមត្ថភាពកងកម្លាំងរក្សាសន្តិភាពរបស់កម្ពុជា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877