BTV NEWS

នាយករដ្ឋមន្ត្រីបារាំង ប្រឹងប្រែងបន្ទន់ជំហរប្រឆាំង ចំពោះច្បាប់ថវិការបស់លោក ដើម្បីបញ្ចៀសវិបត្តិថ្មី

អ៊ីរ៉ង់៖ ប្រទេសអឺរ៉ុបគ្មានមូលដ្ឋានសីលធម៌ និងផ្លូវច្បាប់ ដើម្បីអនុវត្តទណ្ឌកម្មមានឡើងវិញភ្លាមៗ

វិមានក្រឹមឡាំង ប្រាប់ថា រុស្ស៊ីបានបង្កើតអភ័យឯកសិទ្ធិជាក់លាក់ បន្ទាប់ពី EU ចេញទណ្ឌកម្មថ្មី

លោក Zelenskyy៖ លោកបានពិភាក្សាអំពីការផ្គត់ផ្គង់មីស៊ីល និងការបណ្តុះបណ្តាលអ្នកបើកយន្តហោះជាមួយលោក Macron

ព័ត៌មានអន្តរជាតិ

លោកនាយករដ្ឋមន្ត្រី Modi៖ ឥណ្ឌា និងថៃ លើកកម្ពស់ទំនាក់ទំនងភាពជាដៃគូយុទ្ធសាស្ត្រ

អំឡុងពេលថ្លែងសុន្ទរកថា នៅឯសន្និសីទសារព័ត៌មានរួម ក្នុងទីក្រុងបាងកក នាថ្ងៃព្រហស្បតិ៍ (ទី៣ ខែមេសា) នេះ នាយករដ្ឋមន្ត្រី លោក Narendra Modi បានលើកឡើងថា ប្រទេសឥណ្ឌា និងថៃ នឹងលើកកម្ពស់ទំនាក់ទំនងឲ្យដល់កម្រិតភាពជាដៃគូយុទ្ធសាស្ត្រ។ដោយនិយាយអំពីទំនាក់ទំនងកាន់តែស៊ីជម្រៅ រវាងប្រទេសទាំង២ លោកនាយករដ្ឋមន្ត្រី Modi បានបញ្ជាក់ថា៖ «ការប្រាស្រ័យទាក់ទងដែលមានអាយុកាលរាប់សតវត្សរ៍ រវាងឥណ្ឌា និងថៃ ត្រូវបានផ្សារភ្ជាប់តាមរយៈទំនាក់ទំនងវប្បធម៌ និងស្មារតីដ៏ជ្រាលជ្រៅរបស់យើង។ ការផ្សព្វផ្សាយព្រះពុទ្ធសាសនា បានផ្សារភ្ជាប់ប្រជាជនរបស់យើង។ ពីអយុធ្យា ទៅ Nalanda (នាលទ្ទា ជាសកលវិទ្យាល័យព្រះពុទ្ធសាសនា នៅឥណ្ឌា) មានការផ្លាស់ប្តូរចំណេះដឹងយ៉ាងជ្រៅជ្រះឲ្យគ្នាទៅវិញទៅមក។ រឿងនិទានរាមាយណៈ ក៏ជាផ្នែកមួយនៃជីវិតរបស់ប្រជាជនថៃដែរ»។គួរបញ្ជាក់ថា លោកនាយករដ្ឋមន្ត្រីឥណ្ឌា បានទៅដល់ទីក្រុងបាងកក នៅថ្ងៃព្រហស្បតិ៍នេះ សម្រាប់ដំណើរទស្សនកិច្ចរយៈពេល ២ថ្ងៃ ដើម្បីចូលរួមកិច្ចប្រជុំគំនិតផ្តួចផ្តើមឈូងសមុទ្រ Bengal សម្រាប់កិច្ចសហប្រតិបត្តិការបច្ចេកទេស និងសេដ្ឋកិច្ចពហុវិស័យ (BIMSTEC)។ ប៉ុន្មានម៉ោងបន្ទាប់ពីបានទៅដល់ លោក Modi បានមានជំនួបទ្វេភាគីជាមួយសមភាគីថៃ លោកស្រី ផែថងថាន ស៊ីណាវ៉ាត់ (Paetongtarn Shinawatra) នៅទីក្រុងបាងកក ដោយបានពិភាក្សាអំពីបញ្ហាជាច្រើននៃកិច្ចសហប្រតិបត្តិការទ្វេភាគី៕

នាយករដ្ឋមន្រ្តីអង់គ្លេស៖ សង្រ្គាមពាណិជ្ជកម្មមិនស្ថិតក្នុងផលប្រយោជន៍របស់នរណាម្នាក់នោះទេ

នាយករដ្ឋមន្រ្តីចក្រភពអង់គ្លេសលោក Keir Starmer និយាយនៅថ្ងៃព្រហស្បតិ៍នេះថា អង់គ្លេសនឹងរកវិធីសាស្រ្តដោយស្ងៀមស្ងាត់ជាការទប់ទល់ចំពោះការដំឡើងពន្ធ ១០ភាគរយរបស់ប្រធានាធិបតីសហរដ្ឋអាមេរិកលោក Donald Trump លើការនាំចូលរបស់អង់គ្លេស ។គួរឲ្យដឹងថា លោក Trump និយាយថា លោកនឹងដំឡើងពន្ធមូលដ្ឋាន ១០ភាគរយ លើការនាំចូលទាំងអស់ និងរៀបចំតារាងដែលបង្ហាញពីពន្ធខ្ពស់ៗលើដៃគូពាណិជ្ជកម្មធំៗមួយចំនួន រួមទាំពន្ធ ៣៤ភាគរយ បន្ថែមពីលើ ២០ភាគរយ ដែលមានស្រាប់លើប្រទេសចិន និងតួលេខ ២០ភាគរយ លើសហភាពអឺរ៉ុប ព្រមទាំងអត្រាពន្ធផ្សេងៗគ្នាលើប្រទេសដទៃជាច្រើនទៀត ។លោក Starmer និយាយថា តាមទស្សនៈរបស់លោក សង្រ្គាមពាណិជ្ជកម្មមិនស្ថិតក្នុងផលប្រយោជន៍របស់នរណាម្នាក់នោះទេ ប៉ុន្តែជាការពិតណាស់ថា ពួកយើងត្រូវតែការពារខ្លួនឯង នោះហើយគឺជាហតុផលដែលពួកយើងបន្តដាក់ជម្រើសទាំងអស់នៅលើតុ ។ជុំចុងក្រោយនៃការដំឡើងពន្ធពាណិជ្ជកម្មរបស់សហរដ្ឋអាមេរិកនេះដែរ នឹងបង្កើនភាពតានតឹងកាន់តែខ្លាំងបន្ថែមទៀតទៅលើសេដ្ឋកិច្ចពិភពលោក ដែលកំពុងទ្រុឌទ្រោម និងស្ទើរតែមិនទាន់បានងើបឡើងវិញស្រួលបួលផងពីកំណើនអតិផរណា ក្រោយជំងឺ COVID-19 ខណៈសេដ្ឋកិច្ចសកលក៏កំពុងរែកពន់បន្ទុកដ៏ធ្ងន់ដោយសារបំណុលដ៏ច្រើនលើសលប់ និងភាពរង្គើរង្គើដោយសារជម្លោះភូមិសាស្ត្រនយោបាយ ៕

រដ្ឋាភិបាលប៊ុលហ្គារី ចៀសផុតពីការបោះឆ្នោតដកសេចក្ដីទុកចិត្ត

ទីភ្នាក់ងារសារព័ត៌មាន BTA បានរាយការណ៍ថា រដ្ឋាភិបាលប៊ុលហ្គារីដឹកនាំដោយលោក Rosen Zhelyazkov នៅថ្ងៃព្រហស្បតិ៍ (ទី៣ ខែមេសា) នេះ បានរួចផុតពីការបោះឆ្នោតដកសេចក្ដីទុកចិត្ត ដែលត្រូវបានចាប់ផ្តើមឡើងដោយសារគោលនយោបាយការបរទេសរបស់ខ្លួន។ញត្តិដកសេចក្ដីទុកចិត្តដែលត្រូវបានផ្តួចផ្តើមឡើងដោយគណបក្ស Vazrazhdane និងគាំទ្រដោយសមាជិកសភាមកពីគណបក្ស Velichie និង MECh បានបរាជ័យមិនអាចទទួលបានសំឡេងភាគច្រើនដែលត្រូវការចាំបាច់។ការបោះឆ្នោតនេះ បានបញ្ចប់ទៅដោយសមាជិកចំនួន ៥៤រូប គាំទ្រចំពោះការញត្តិនេះ និង ១៥០នាក់ ប្រឆាំង ដោយគ្មានសំឡេងអនុបវាទ។គួរបញ្ជាក់ថា ដើម្បីឲ្យញត្តិនេះទទួលបានការអនុម័ត វាត្រូវការសំឡេងគាំទ្រពីសមាជិកសភាជាងពាក់កណ្តាល នៅក្នុងសភាដែលមាន ២៤០អាសនៈ៕

ជនរងគ្រោះទទួលបានជំនួយពីកម្មវិធីស្បៀងអាហារពិភពលោក ខណៈមីយ៉ាន់ម៉ាព្យាយាមងើបពីការរញ្ជួយដី

កម្មវិធីស្បៀងអាហារពិភពលោក(WFP)របស់អង្គការសហប្រជាជាតិ(UN) បានចាប់ផ្តើមចែកចាយជំនួយរបស់ពួកគេដល់ជនរងគ្រោះដោយសារការរញ្ជួយដីដែលបានអង្រួនសហភាពមីយ៉ាន់ម៉ាកាលពីថ្ងៃសុក្រសប្តាហ៍មុន ដោយបានសម្លាប់មនុស្សជាង ៣ពាន់នាក់ ។ស្របពេលដែលប្រតិបត្តិការជួយសង្រ្គោះកំពុងបន្តនៅតាមទីក្រុង Mandalay និងទីក្រុង Sagaing ប្រជាពលរដ្ឋដែលបានជម្លៀសខ្លួនដោយសារការរញ្ជួយដី ទទួលបានស្បៀងអាហារពីក្រុមការងារ WFP ។ ពលរដ្ឋរស់នៅក្នុងទីក្រុងទាំង ២ និយាយថា ពួកគេពុំទទួលបានជំនួយណាមួយពីយោធានោះទេ ។យោធាពិបាកគ្រប់គ្រងសហភាពមីយ៉ាន់ ចាប់តាំងពីពួកគេវិលត្រឡប់មកកាន់អំណាចវិញនៅក្នុងរដ្ឋប្រហារកាលពីឆ្នាំ ២០២១ដែលបានផ្តួលរំលំរដ្ឋាភិបាលស៊ីវិលឈ្នះឆ្នោតរបស់ម្ចាស់ជ័យលាភីណូបែលសន្តិភាពលោកស្រី Aung San Suu Kyi ។របបសឹក និយាយនៅថ្ងៃព្រហស្បតិ៍នេះថា ការរញ្ជួយដីនៅតំបន់ភាគកណ្តាលមីយ៉ាន់ម៉ា បានសម្លាប់មនុស្ស ៣.០៨៥នាក់ និងមនុស្ស ៤.៧១៥នាក់ផ្សេងទៀត រងរបួស ក្នុងនោះមនុស្សរាប់រយនាក់ បន្ថែមទៀត កំពុងបាត់ខ្លួន ៕

ប្រធានាធិបតីឈីលីលោក Gabriel Boric និយាយថា លោក Trumpព្យាយាមក្លាយជាអធិរាជថ្មី

អំឡុងដំណើរទស្សនកិច្ចទៅកាន់ប្រទេសឥណ្ឌា ប្រធានាធិបតីឈីលីលោក Gabriel Boric បានចោទប្រកាន់ប្រធានាធិបតីសហរដ្ឋអាមេរិកលោក Donald Trump ថា កំពុងព្យាយាមធ្វើជា “អធិរាជថ្មី” ដោយលោកនិយាយប្រឆាំងចំពោះការដំឡើងពន្ធឯកតោភាគី ។ លោក Trumpគ្រោងនឹងប្រកាសដំឡើងពន្ធបដិការលើប្រទេសដៃគូពាណិជ្ជកម្មសកលលោកនៅវេលាម៉ោង ២០ និង ០០នាទី ម៉ោងសកល គឺជាពេលដែលសេតវិមានចាត់ទុកថាជា “ថ្ងៃរំដោះ” ដោយវានឹងគំរាមកំហែងធ្វើឲ្យអាក់ខានដល់ការអនុវត្តពាណិជ្ជកម្មបង្កើតឡើងរាប់ទសវត្សរ៍ ។ លោក Boric បានធ្វើសេចក្តីអត្ថាធិប្បាយបែបនេះ អំឡុងជំនួបធុរកិច្ចឈីលី-ឥណ្ឌា ដែលរៀបចំឡើងនៅក្នុងរដ្ឋធានីញូវដែល្លី ហើយលោកនិយាយទៀតថា ឈីលីនឹងឆ្លើយតបចំពោះការដំឡើងពន្ធរបស់អាមេរិក ។ សូមបញ្ជាក់ថា ជុំចុងក្រោយនៃការដំឡើងពន្ធពាណិជ្ជកម្មរបស់សហរដ្ឋអាមេរិក ដែលបានបង្ហាញកាលពីថ្ងៃពុធ នឹងបង្កើនភាពតានតឹងកាន់តែខ្លាំងបន្ថែមទៀតទៅលើសេដ្ឋកិច្ចពិភពលោក ដែលកំពុងទ្រុឌទ្រោម និងស្ទើរតែមិនទាន់បានងើបឡើងវិញស្រួលបួលផងពីកំណើនអតិផរណាក្រោយជំងឺ COVID-19 ខណៈសេដ្ឋកិច្ចសកលក៏កំពុងរែកពន់បន្ទុកដ៏ធ្ងន់ដោយបំណុលដ៏ច្រើនលើសលប់ និងភាពរង្គើរង្គើដោយជម្លោះភូមិសាស្ត្រនយោបាយ ។ លោក Trump បានប្រកាសនៅថ្ងៃម្សិលមិញថា លោកនឹងដាក់ពន្ធមូលដ្ឋាន ១០ភាគរយ លើការនាំចូលទាំងអស់ និងរៀបចំតារាងដែលបង្ហាញពីពន្ធខ្ពស់ៗលើដៃគូពាណិជ្ជកម្មធំៗមួយចំនួន រួមទាំពន្ធ ៣៤ភាគរយ បន្ថែមពីលើ ២០ភាគរយ ដែលមានស្រាប់លើប្រទេសចិន និងតួលេខ ២០ភាគរយ លើសហភាពអឺរ៉ុប ព្រមទាំងអត្រាពន្ធផ្សេងៗគ្នាលើប្រទេសដទៃជាច្រើនទៀត ៕

នាយករដ្ឋមន្ត្រីអ៊ីស្រាអែល ទៅដល់ហុងគ្រី ដើម្បីបំពេញទស្សនកិច្ចផ្លូវរដ្ឋ ខណៈទីក្រុង Budapest ប្រកាសចេញពី ICC

បន្ទាប់ពីមេដឹកនាំអ៊ីស្រាអែល លោក Benjamin Netanyahu ដែលត្រូវបានស្វែករកចាប់ខ្លួនដោយដីការបស់ ICC បានធ្វើដំណើរទៅដល់ ដើម្បីបំពេញទស្សនកិច្ចផ្លូវរដ្ឋ រដ្ឋាភិបាល នៅថ្ងៃទីព្រហស្បតិ៍ (ទី៣ ខែមេសា) នេះ បានប្រាប់ឲ្យដឹងថា ប្រទេសហុងគ្រីបានសម្រេចដកខ្លួនចេញពីតុលាការព្រហ្មទណ្ឌអន្តរជាតិ (ICC) ហើយ។នាយករដ្ឋមន្ត្រីស្តាំនិយមរបស់ហុងគ្រី គឺលោក Viktor Orban បានអញ្ជើញសមភាគីអ៊ីស្រាអែលរបស់លោកទៅកាន់ទីក្រុង Budapest កាលពីខែវិច្ឆិកា ពោលគឺមួយថ្ងៃបន្ទាប់ពី ICC បានចេញដីកាចាប់ខ្លួន ជុំវិញការចោទប្រកាន់ពីបទប្រព្រឹត្តឧក្រិដ្ឋកម្មសង្រ្គាម នៅតំបន់ហ្កាហ្សា ជាកន្លែងដែលអ៊ីស្រាអែលបើកការវាយលុក បន្ទាប់ពីមានការវាយប្រហារដោយពួកយុទ្ធជនដឹកនាំដោយក្រុមហាម៉ាស នៅភាគខាងត្បូងអ៊ីស្រាអែល។អ៊ីស្រាអែលបានច្រានចោលការចោទប្រកាន់ដែលខ្លួននិយាយថា មានហេតុផលនយោបាយ និងត្រូវបានជំរុញដោយការប្រឆាំងនឹងជនជាតិជ្វីហ្វនិយម ហើយបបញ្ជាក់បន្ថែមថា តុលាការព្រហ្មទណ្ឌអន្តរជាតិនេះ បានបាត់បង់ភាពស្របច្បាប់ទាំងស្រុងហើយ ដោយសារការចេញដីកាប្រឆាំងនឹងមេដឹកនាំជាប់ឆ្នោតតាមបែបប្រជាធិបតេយ្យនៃប្រទេសដែលអនុវត្តសិទ្ធិការពារខ្លួន។ក្នុងនាមជាសមាជិកស្ថាបនិករបស់ ICC ហុងគ្រីមានកាតព្វកិច្ចតាមទ្រឹស្តី ក្នុងការចាប់ខ្លួន និងប្រគល់ជនណាម្នាក់ដែលត្រូវបានតុលាការចេញដីកាចាប់ខ្លួន ប៉ុន្តែលោក Orban បានបញ្ជាក់យ៉ាងច្បាស់ថា ហុងគ្រីនឹងមិនគោរពសេចក្តីសម្រេច ដែលលោកហៅថា «ឥតអៀនខ្មាស អាក្រក់មើល និងមិនអាចទទួលយកបានទាំងស្រុង»។គួររំលឹកថា ប្រទេសហុងគ្រីបានចុះហត្ថលេខាលើឯកសារបង្កើត ICC ក្នុងឆ្នាំ១៩៩៩ និងបានផ្តល់សច្ចាប័នដល់ឯកសារនោះ ក្នុងឆ្នាំ២០០១ ប៉ុន្តែច្បាប់នេះមិនត្រូវបានប្រកាសជាផ្លូវការនោះទេ៕

អ្នកបើកបរយន្តហោះចម្បាំងឥណ្ឌាម្នាក់ បានស្លាប់ក្នុងហេតុការណ៍ធ្លាក់យន្តហោះនៅរដ្ឋ Gujarat

យន្តហោះចម្បាំង ២កៅអីរបស់កងទ័ពអាកាសឥណ្ឌា បានធ្លាក់នៅទីក្រុង Jamnagar ស្ថិតក្នុងរដ្ឋភាគខាងលិច Gujarat ដោយបានសម្លាប់អ្នកបើកបរម្នាក់កាលពីថ្ងៃពុធ ។ក្រុមមន្រ្តីនិយាយថា អ្នកបើកបរយន្តហោះម្នាក់ទៀតដែលរងរបួស ត្រូវបានបញ្ជូនទៅកាន់មន្ទីរពេទ្យបង្អែក សម្រាប់ការព្យាបាល ។លោក K.B Thakkar គឺជាចៅក្រមស្រុក Jamnagar និយាយថា យន្តហោះចម្បាំងរបស់កងទ័ពអាកាសឥណ្ឌា បានធ្លាក់កាលពីយប់ថ្ងៃពុធ ហើយពួកយើងសង្រ្គោះអាយុជីវិតអ្នកបើកបរម្នាក់ ដែលបានរងរបួសយ៉ាងធ្ងន់ធ្ងរ ហើយអ្នកបើកបរយន្តហោះម្នាក់ទៀត បានស្លាប់ ។លោកបន្តថា ក្រុមភ្នាក់ងារពន្លត់អគ្គិភ័យរបស់ពួកយើង បានពន្លត់អណ្តាតភ្លើង បង្កឡើងដោយសារការធ្លាក់យន្តហោះមួយគ្រឿងនេះ ។កងទ័ពអាកាសឥណ្ឌា និយាយនៅក្នុងសេចក្តីថ្លែងការណ៍ថា អ្នកបើកបរយន្តហោះចម្បាំង ទាំង ២នាក់ ជួបបញ្ហាបច្ចេកទេស ហើយនិងបានគ្រលាស់ខ្លួន ដើម្បីចៀសវាងគ្រោះថ្នាក់ ។បច្ចុប្បន្ន ក្រុមអាជ្ញាធរ កំពុងបើកការស៊ើបអង្កេត ដើម្បីកំណត់មូលហេតុបណ្តាលឲ្យកើតមានឧបទ្ទេវហេតុមួយនេះ ៕

អគ្គីភ័យនៅចំណតរថយន្តក្រោមដី សម្លាប់មនុស្ស ២នាក់នៅទីក្រុង Madrid ប្រទេសអេស្ប៉ាញ

សោកនាដកម្មអគ្គិភ័យនៅចំណតរថយន្តក្រោមដី ស្ថិតក្នុងតំបន់ជាយក្រុង Madrid ប្រទេសអេស្ប៉ាញ បានសម្លាប់ភ្នាក់ងារពន្លត់អគ្គិភ័យ ២នាក់ កាលពីថ្ងៃពុធ ។ ឧបទ្ទេវហេតុនេះ បានកើតឡើង ពេលដែលពួកគេព្យាយាមពន្លត់អណ្តាតភ្លើង ។សេវាកម្មសង្រ្គោះបន្ទាន់ និយាយថា ក្រុមភ្នាក់ងារពន្លត់អគ្គិភ័យ ៣នាក់ផ្សេងទៀត បានរងរបួស ក្នុងនោះមនុស្សម្នាក់ ស្ថិតក្នុងស្ថានភាពធ្ងន់ធ្ងរ ។សាក្សីមើលឃើញផ្សែងខ្មៅហុយចេញពីកន្លែងកើតហេតុ ជាទីដែលរថយន្តពន្លត់អគ្គិភ័យ និងរថយន្តគិលានសង្រ្គោះ ត្រូវបានបញ្ជូនទៅកាន់ទីនោះ ។ក្រោយឧបទ្ទេវហេតុកើតឡើង ក្រុមភ្នាក់ងារពន្លត់អគ្គិភ័យ និងសមាជិកសេវាកម្មសង្រ្គោះបន្ទាន់ត្រូវបានគេមើលឃើញឱបគ្នា និងកាន់ទុក្ខចំពោះការបាត់បង់សហការីរបស់ពួកគេ ។ស្របពេលដែលសារព័ត៌មានក្នុងស្រុក រាយការណ៍ថា រថយន្តអគ្គិសនីបណ្តាលឲ្យកើតមានឧបទ្ទេវហេតុនេះ មូលហេតុបណ្តាលឲ្យកើតមានអគ្គិភ័យ បច្ចុប្បន្នកំពុងស្ថិតក្រោមការស៊ើបអង្កេត ហើយគ្មានព័ត៌មានផ្លូវការណាមួយត្រូវបានបញ្ចេញនោះទេ ៕

របបសឹកមីយ៉ាន់ម៉ា ប្រកាសបទឈប់បាញ់បណ្តោះអាសន្ន បន្ទាប់គ្រោះរញ្ជួយដីស្លាប់មនុស្ស

ទូរទស្សន៍រដ្ឋ MRTV រាយកាណ៍កាលពីថ្ងៃពុធថា របបសឹកមីយ៉ាន់ម៉ា បានប្រកាសបទឈប់បាញ់បណ្តោះអាសន្ន នៅក្នុងប្រតិបត្តិការប្រឆាំងក្រុមប្រឆាំងប្រដាប់អាវុធចាប់ពីថ្ងៃទី ២ ខែមេសា រហូតដល់ថ្ងៃទី ២២ ខែមេសា បន្ទាប់ពីការរញ្ជួយដីស្លាប់មនុស្សកាលពីសប្តាហ៍មុន ។MRTV រាយការណ៍ថា បទឈប់បាញ់នេះ គឺដើម្បីសម្រួលដល់ការស្តាឡើងវិញប្រទេសមីយ៉ាន់ម៉ា ក្រោយគ្រោះមហន្តរាយរញ្ជួយដី ។ការរញ្ជួយដីកម្រិត ៧,៧រ៉ិចទ័រ ដែលស្ថិតក្នុងចំណោមគ្រោះរញ្ជួយដីដ៏ខ្លាំងក្លាបំផុតវាយប្រហារមីយ៉ាន់ម៉ាក្នុងរយៈពេលជាង ១សតវត្សរ៍កន្លងមកនេះ បានធ្វើឲ្យអគារបាក់រលំ និងបានអង្រួនតំបន់មួយដែលមានពលរដ្ឋរស់ ២៨លាននាក់ ធ្វើឲ្យតំបន់សហគមន៍ក្លាយជាគំនរបាក់បែក ធ្វើឲ្យពលរដ្ឋជាច្រើនគ្មានស្បៀងអាហារ ទឹកស្អាត និងទីជម្រក ។យោធាពិបាកគ្រប់គ្រងសហភាពមីយ៉ាន់ ចាប់តាំងពីពួកគេវិលត្រឡប់មកកាន់អំណាចវិញនៅក្នុងរដ្ឋប្រហារកាលពីឆ្នាំ ២០២១ដែលបានផ្តួលរំលំរដ្ឋាភិបាលស៊ីវិលឈ្នះឆ្នោតរបស់ម្ចាស់ជ័យលាភីណូបែលសន្តិភាពលោកស្រី Aung San Suu Kyi ៕

ជនប៉ាឡេស្ទីននាំគ្នាកាន់ទុក្ខមនុស្សជាទីស្រលាញ់ដែលស្លាប់ក្នុងការវាយប្រហាររបស់អ៊ីស្រាអែល

នៅថ្ងៃព្រហស្បតិ៍នេះ ជនប៉ាឡេស្ទីននៅទីក្រុង Khan Younis នាំគ្នាកាន់ទុក្ខមនុស្សជាទីស្រលាញ់របស់ពួកគេដែលត្រូវបានសម្លាប់នៅក្នុងការវាយប្រហាររបស់អ៊ីស្រាអែល ។អ្នកស្រី Inas al-Aqqad គឺជាជនប៉ាឡេស្ទីនមួយរូប និងជាភរិយារបស់បុរសម្នាក់ដែលត្រូវបានសម្លាប់ និយាយថា ការវាយប្រហាររបស់អ៊ីស្រាអែលត្រូវចំផ្ទះមួយខ្នង នាំឲ្យមានគ្រោះថ្នាក់ដល់មនុស្សនៅក្នុងជំរំសំពត់តង់ក្បែរគ្នា ។អ្នកស្រី Al-Aqqad ដែលជម្លៀសចេញពីទីក្រុង Rafah និងស្នាក់នៅក្នុងសំពត់តង់នៅទីក្រុង Khan Younis និយាយថា ប្តីរបស់គាត់កំពុងដេកលើគ្រែក្នុងតង់ ពេលដែលអំបែងគ្រាប់ពីការផ្ទុះត្រូវចំតម្រងនោមរបស់គាត់ បណ្តាលឲ្យគាត់ស្លាប់ ។ក្រសួងសុខាភិបាលហ្កាហ្សា និយាយថា ជនប៉ាឡេស្ទីនយ៉ាងហោច ៩៧នាក់ ត្រូវបានសម្លាប់ដោយសារការវាយប្រហាររបស់អ៊ីស្រាអែលនៅទូទាំងតំបន់ហ្កាហ្សា ក្នុងរយៈពេល ២៤ម៉ោងកន្លងមកនេះ ។ អ៊ីស្រាអែល បានអះអាងថា ពួកគេបានចាត់វិធានការ ដើម្បីចៀសវាងគ្រោះថ្នាក់ដល់ជនស៊ីវិល អំឡុងការវាយប្រហាររបស់ពួកគេ ។យោងតាមការអះអាងរបស់ក្រុមមន្រ្តីសុខភាពប៉ាឡេស្ទីន បានឲ្យដឹងថា យុទ្ធនាការសឹករបស់អ៊ីស្រាអែល បានសម្លាប់ជនប៉ាឡេស្ទីនជាង ៥ម៉ឺននាក់ ចាប់តាំងពីខែតុលា ឆ្នាំ ២០២៣រហូតមក ៕

បណ្ដាញសង្គម

ព័ត៌មានថ្មីៗ

សមត្ថកិច្ចរាជធានីភ្នំពេញបង្ក្រាបទីតាំងបទល្មើសឆបោកតាមអនឡាញ២កន្លែងទៀតឃាត់ខ្លួនមនុស្សបាន១៣៣នាក់

បទបញ្ជាបោសសម្អាតការឆបោកតាមប្រព័ន្ធបច្ចេកវិទ្យា នឹងជួយទាក់ទាញអ្នកវិនិយោគកាន់តែច្រើនថែមទៀតមកកាន់កម្ពុជា

កម្ពុជា-ហ្វីលីពីន ឯកភាពបន្តពង្រឹងកិច្ចសហប្រតិបត្តិការលើវិស័យការពារជាតិ ជាពិសេសការបណ្តុះបណ្តាលធនធានមនុស្ស

មន្ត្រីរាជការក្រសួងប្រៃសណីយ៍ ចូលរួមដាំដើមកោងកាងចំនួន៥៥០ ដើម ក្រោមប្រធានបទ “ឌីជីថល ផ្សារភ្ជាប់បរិស្ថាន”

ប្រធានការិយាល័យសិទ្ធិមនុស្ស UN ជំរុញឲ្យមានការទទួលខុសត្រូវ ចំពោះការសម្លាប់ នៅទីក្រុង Sweida របស់ស៊ីរី

រុស្ស៊ីចាប់ខ្លួនស្ត្រីសញ្ជាតិអាមេរិក-រុស្ស៊ី នៅអាកាសយានដ្ឋាន ពីបទរត់ពន្ធកាំភ្លើង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877