BTV NEWS

រុស្សីបានបាញ់ទម្លាក់យានដ្រូនអ៊ុយក្រែនចំនួន ៧៣គ្រឿង ក្នុងនោះ ៣គ្រឿង ហោះសំដៅទីក្រុងមូស្គូ

អ្នកការទូត៖ រុស្ស៊ីគាំទ្រអធិបតេយ្យភាពរបស់ប្រទេសលីបង់ ស្របពេលមានសម្ពាធរបស់សហរដ្ឋអាមេរិក

អាមេរិកចាត់ទុកក្រុមដែលបានអះអាងពីការវាយប្រហារនៅតំបន់កាស្មៀរ ជាក្រុមភេរវករ

ប្រធានាធិបតីប្រេស៊ីល ចោទលោក Trump ពីបទវាយប្រហារលើអធិបតេយ្យភាពរបស់ប្រទេសនេះ

ព័ត៌មានអន្តរជាតិ

មនុស្សរាប់ពាន់នាក់ ចេញធ្វើបាតុកម្មតវ៉ាជុំវិញអំពើហិង្សាក្រុមជនអន្ធពាលដែលកើនឡើង នៅហៃទី

ប្រជាជនហៃទីរាប់ពាន់នាក់ បានចេញធ្វើបាតុកម្មក្នុងទីក្រុង ព័រ អូប្រាំង កាលពីថ្ងៃពុធ ទី២ មេសា ខណៈ អ្នកស្រុកបានបង្ហាញពីកំហឹងប្រឆាំងក្រុមជនអន្ធពាលប្រដាប់អាវុធ ដែលគ្រប់គ្រងស្ទើរតែទាំងស្រុងនៅរដ្ឋធានី និងបានពង្រីកទៅដល់តំបន់ជុំវិញនោះជាច្រើនទៀត ហើយរដ្ឋាភិបាលបរាជ័យក្នុងការរារាំងពួកគេ។ ក្រុមប្រដាប់អាវុធហិង្សា បានរួបរួមគ្នានៅពីក្រោយក្រុមចម្រុះមួយ ដែលគេស្គាល់ថា Viv Ansanm ដែលបានបង្ខំឲ្យមនុស្សជាងមួយលាននាក់ចាកចេញពីលំនៅឋានរបស់ពួកគេ ធ្វើឲ្យសេដ្ឋកិច្ចត្រូវរាំងស្ទះ ជំរុញឱ្យមានភាពអត់ឃ្លាន និងទាមទារការបង់ប្រាក់ពីប្រជាជន។រដ្ឋាភិបាលអន្តរកាល ជាស្ថាប័នប្តូរវេននៃសមាជិកក្រុមប្រឹក្សាប្រធានាធិបតី ដែលត្រូវបានតែងតាំងជិតមួយឆ្នាំកន្លងទៅនេះ រួមជាមួយបេសកកម្មសន្តិសុខគាំទ្រដោយអង្គការសហប្រជាជាតិ បានធ្វើការតិចតួចប៉ុណ្ណោះដើម្បីទប់ស្កាត់ការរុលចូលទៅមុខរបស់ក្រុមជនអន្ធពាល។ អ្នកតវ៉ាម្នាក់និយាយថា ថ្ងៃនេះ ប្រជាជនហៃទី នឹងប្រយុទ្ធដើម្បីសេរីភាព ។អ្នកស្រុក បានមកពេញដងផ្លូវនៅទីក្រុងព័រ អូប្រាំង ដោយកាន់បដា និងអ្នកខ្លះកាន់កាំបិត និងអាវុធផ្សេងៗ។ ការតវ៉ា បានចាប់ផ្តើមដោយសន្តិវិធី ប៉ុន្តែការបាញ់កាំភ្លើង បានផ្ទុះឡើងនៅពេលថ្ងៃ បង្កឱ្យមានការភ័យស្លន់ស្លោ ធ្វើឱ្យហ្វូងមនុស្សរត់ភៀសខ្លួន។

ក្រុមអ្នកតវ៉ាអាមេរិក គ្រវីទង់ជាតិកាណាដា ប្រឆាំងការដំឡើងពន្ធរបស់លោក Trump នៅជិតព្រំដែន

ប្រជាជន បានគ្រវីទង់ជាតិកាណាដា ដែលបានតវ៉ាក្នុងសាមគ្គីភាពជាមួយប្រទេសកាណាដា នៅក្បែរច្រកឆ្លងកាត់ព្រំដែនកាណាដា-អាមេរិក ក្នុងទីក្រុង Buffalo រដ្ឋញូវយ៉ក កាលពីថ្ងៃពុធ ទី២ មេសា ក្នុងពេលមានភាពមិនច្បាស់លាស់ ជុំវិញគោលនយោបាយដំឡើពន្ធរបស់លោក Trump។យោងតាមអ្នករៀបចំផែនការបានឲ្យដឹងថា អ្នកតវ៉ាប្រហែលពី១០០ ទៅ២០០នាក់ បានទប់ទល់ទៅនឹងអាកាសធាតុត្រជាក់ខ្លាំង ដោយកាន់ស្លាកក្នុងការគាំទ្រ «អ្នកជិតខាងរបស់ពួកគេ ឆ្លងកាត់ទន្លេ»។ ប្រធានាធិបតី លោក Donald Trump កាលពីថ្ងៃពុធ បានបង្ហាញពីការដំឡើងពន្ធអប្បបរមា១០% លើទំនិញភាគច្រើនដែលនាំចូលទៅកាន់សហរដ្ឋអាមេរិក ដោយពន្ធកាន់តែខ្ពស់លើផលិតផលពីប្រទេសរាប់សិប ដែលចាប់ផ្តើមសង្រ្គាមពាណិជ្ជកម្មសកលកម្រិតខ្ពស់ គំរាមកំហែងដល់ការជំរុញអតិផរណា និងការបញ្ឈប់កំណើនសេដ្ឋកិច្ចរបស់សហរដ្ឋអាមេរិក និងពិភពលោក។ដៃគូពាណិជ្ជកម្ម ត្រូវបានគេរំពឹងថានឹងឆ្លើយតបជាមួយនឹងវិធានការសងសឹករបស់ពួកគេ ដែលអាចនាំឱ្យតម្លៃទំនិញកាន់តែឡើងខ្ពស់ខ្លាំងសម្រាប់អ្វីគ្រប់យ៉ាងចាប់ពីកង់ រហូតដល់ផលិតផលស្រា។

ការស្ទង់មតិរកឃើញថា ប្រជាជនរុស្ស៊ី៥០% គាំទ្របទឈប់បាញ់បណ្តោះអាសន្ន នៅអ៊ុយក្រែន

ការស្ទង់មតិធ្វើឡើងដោយអង្គការស្រាវជ្រាវឯករាជ្យមួយនៅក្នុងប្រទេសរុស្ស៊ី បង្ហាញថាពាក់កណ្តាលនៃអ្នកដែលបានស្ទង់មតិ បានគាំទ្របទឈប់បាញ់នៅអ៊ុយក្រែន ខណៈ៤១ភាគរយ បានជំទាស់។ មជ្ឈមណ្ឌល Levada-Center បានចេញផ្សាយការរកឃើញរបស់ខ្លួនដោយនិយាយថា ខ្លួនបានធ្វើបទសម្ភាសន៍ទល់មុខផ្ទាល់ជាមួយមនុស្សជាង១.៦០០នាក់នៅក្នុងប្រទេសរុស្ស៊ី ចន្លោះពីថ្ងៃទី២២ និង២៦ ខែមីនា។៥០ភាគរយ បានគាំទ្របទឈប់បាញ់រយៈពេល៣០ថ្ងៃរវាងរុស្ស៊ី និងអ៊ុយក្រែន។ នោះគឺខ្ពស់ជាង៤១ភាគរយនៃអ្នកដែលមិនគាំទ្របទឈប់បាញ់។ នៅពេលដែលត្រូវបានសួរថាហេតុអ្វីបានជាពួកគេគាំទ្របទឈប់បាញ់ ២៩ភាគរយបាននិយាយថាពួកគេចង់បញ្ចប់សង្រ្គាមឲ្យបានឆាប់រហ័ស។ ជាមួយគ្នានេះ ៣៧ ភាគរយ បានឆ្លើយថា បទឈប់បាញ់នឹងផ្តល់ពេលវេលាដល់អ៊ុយក្រែនក្នុងការបំពាក់អាវុធជាថ្មី។ការស្ទង់មតិ បានធ្វើឡើងខណៈប្រធានាធិបតីរុស្ស៊ី លោក Vladimir Putin សន្ទនាតាមទូរស័ព្ទជាមួយប្រធានាធិបតីអាមេរិក លោក Donald Trump កាលពីថ្ងៃទី ១៨ ខែមីនា ដែលបានព្រមព្រៀងផ្អាកការវាយប្រហារលើរោងចក្រថាមពលរយៈពេល ៣០ ថ្ងៃ ប៉ុន្តែពុំបានព្រមព្រៀងលើបទឈប់បាញ់ពេញលេញរយៈពេល ៣០ ថ្ងៃនោះទេ។

WHO ប្រឈមគម្លាតថវិកាចំនួន២,៥ពាន់លានដុល្លារអាមេរិក ខណៈសហរដ្ឋអាមេរិកប្រកាសដកខ្លួន

យោងតាមរបាយការណ៍ប្រព័ន្ធផ្សព្វផ្សាយ កាលពីថ្ងៃពុធ បានឲ្យដឹងថា អង្គការសុខភាពពិភពលោក (WHO) កំពុងប្រឈមគម្លាតថវិកាចំនួន១,៩ពាន់លានដុល្លារអាមេរិកសម្រាប់ឆ្នាំ២០២៦ និងឆ្នាំ២០២៧ រួមជាមួយឱនភាពចំនួន៦០០លានដុល្លារឆ្លងកាត់ឆ្នាំ២០២៥ ។សារព័ត៌មាន Health Policy Watch ជាបណ្តាញព័ត៌មានសុខភាពសកលឯករាជ្យមិនរកប្រាក់ចំណេញបានរាយការណ៍ថា គម្លាតមូលនិធិចំនួន១,៩ពាន់លានដុល្លារ មានជិត៤៥ភាគរយនៃថវិកាដែលបានកាត់បន្ថយរួចហើយ សម្រាប់រយៈពេលពីរឆ្នាំរហូតដល់ឆ្នាំ២០២៧ ។របាយការណ៍ ដែលបានដកស្រង់សម្តីមន្ត្រីអង្គការសុខភាពពិភពលោកក្នុងកិច្ចប្រជុំ បាននិយាយថា សហរដ្ឋអាមេរិកជំពាក់អង្គការសុខភាពពិភពលោក ២៦០លានដុល្លារក្នុងការទូទាត់សម្រាប់ឆ្នាំ២០២៤ និងឆ្នាំ២០២៥ ។ លោក Raul Thomas ជំនួយការអគ្គនាយកនៃប្រតិបត្តិការធុរកិច្ចរបស់អង្គការសុខភាពពិភពលោក បានបង្ហាញនៅក្នុងកិច្ចប្រជុំថា រដ្ឋបាលដែលបានចាកចេញរបស់ប្រធានាធិបតីសហរដ្ឋអាមេរិក លោក Joe Biden ពុំបានបង់ប្រាក់របស់សហរដ្ឋអាមេរិកចំនួន១៣០លានដុល្លារ នៅឆ្នាំ២០២៤ ដែលបានសន្យា មុនពេលចាកចេញពីតំណែង។ថ្លែងទៅកាន់បុគ្គលិកអង្គការសុខភាពពិភពលោក តាមរយៈបណ្តាញ Zoom នៅក្នុងកិច្ចប្រជុំនោះ អគ្គនាយក លោក Tedros Adhanom Ghebreyesus បានព្យាករពីការកាត់បន្ថយបុគ្គលិក។ លោកត្រូវបានគេដកស្រង់សម្ដីដែលបាននិយាយថា «ចាប់ផ្ដើមពីថ្នាក់ដឹកនាំជាន់ខ្ពស់ ហើយនឹងធ្វើដល់គ្រប់កម្រិត និងគ្រប់តំបន់។ បន្ទាប់ពីការសម្រេចចិត្តរបស់សហរដ្ឋអាមេរិក ក្នុងការដកខ្លួនចេញពីអង្គការសុខភាពពិភពលោក(WHO) ស្ថាប័ននេះបានកាត់បន្ថយថវិកាឆ្នាំ២០២៦-២០២៧ របស់ខ្លួនពី៥,៣ពាន់លានដុល្លារមកនៅត្រឹម៤,២ ពាន់លានដុល្លារ។

លោក Rutte៖ សម្ព័ន្ធមិត្តណាតូ សន្យាផ្តល់ជំនួយជាង២១ពាន់លានដុល្លារដល់អ៊ុយក្រែនក្នុងឆ្នាំ២០២៥នេះ

អគ្គលេខាធិការសម្ព័ន្ធយោធាណាតូ បាននិយាយកាលពីថ្ងៃពុធថា សម្ព័ន្ធមិត្តណាតូ បានសន្យាផ្តល់ជំនួយផ្នែកយោធាជាង២០ពាន់លានអឺរ៉ូ (២១,៦៥ ពាន់លានដុល្លារ) សម្រាប់អ៊ុយក្រែនក្នុងរយៈពេល៣ខែដំបូង នៃឆ្នាំនេះ។រដ្ឋមន្ត្រីការបរទេសមកពីសម្ព័ន្ធនេះ បានជួបប្រជុំគ្នានៅទីក្រុងប្រ៊ុចសែល នៅថ្ងៃព្រហស្បតិ៍ ទី៣ មេសា នេះ និងថ្ងៃសុក្រ ទី៤ មេសា ដើម្បីពិភាក្សាអំពីការគាំទ្របន្ថែមទៀតសម្រាប់អ៊ុយក្រែន ប្រឆាំងការឈ្លានពានរយៈពេលបីឆ្នាំមកនេះ របស់រុស្ស៊ី។ថ្លែងនៅមុនកិច្ចប្រជុំរដ្ឋមន្ត្រីការបរទេសណាតូ នៅទីក្រុងប្រ៊ុចសែល ប្រទេសបែលហ្ស៊ិក លោក Rutte និយាយថា ទីបញ្ជាការណាតូនៅទីក្រុង Wiesbaden ប្រទេសអាល្លឺម៉ង់ ជំនួយសន្តិសុខនិងបណ្តុះបណ្តាលរបស់ណាតូសម្រាប់អ៊ុយក្រែន នឹងបន្តសម្របសម្រួលជំនួយយោធាដល់អ៊ុយក្រែន និងបណ្តុះបណ្តាលទាហានអ៊ុយក្រែន។ការប្រកាសនេះធ្វើឡើងក្នុងពេលដែលមានការព្រួយបារម្ភថា ការគាំទ្ររបស់សហរដ្ឋអាមេរិកចំពោះអ៊ុយក្រែន អាចត្រូវបានកាត់បន្ថយយ៉ាងខ្លាំង ខណៈរដ្ឋបាលរបស់ប្រធានាធិបតីអាមេរិក លោក Donald Trump ព្យាយាមបង្ខំឱ្យមានកិច្ចព្រមព្រៀងសន្តិភាពមួយ ខណៈអំពាវនាវឱ្យសម្ព័ន្ធមិត្តអឺរ៉ុប បង្កើនការចំណាយលើវិស័យការពារជាតិ។ បន្ទាប់ពីជំនួបដ៏ចម្រូងចម្រាសមួយរវាង លោក Trump និងប្រធានាធិបតីអ៊ុយក្រែន លោក Volodymyr Zelenskyy នៅសេតវិមាន ទីក្រុងវ៉ាស៊ីនតោន បានផ្អាកបណ្តោះអាសន្នជំនួយយោធានិងចារកម្មដល់ទីក្រុង Kyiv ប៉ុន្តែចាប់តាំងពីពេលនោះមក បានបន្តជំនួយវិញ។ កាលពីឆ្នាំមុន សម្ព័ន្ធយោធាណាតូ បានផ្តល់ជំនួយសន្តិសុខដែលមានតម្លៃប្រហែល ៥០ ពាន់លានអឺរ៉ូសម្រាប់អ៊ុយក្រែន។

ក្រុមហាម៉ាស នឹងមិនឆ្លើយតបទៅនឹងសំណើឈប់បាញ់ហ្កាហ្សាថ្មីរបស់អ៊ីស្រាអែលទេ

មន្ត្រីហាម៉ាសម្នាក់បានប្រាប់សារព័ត៌មានរ៉យទ័រ កាលពីថ្ងៃពុធ (០២ មេសា) ថា ក្រុមសកម្មប្រយុទ្ធហាម៉ាស បានសម្រេចចិត្តមិនឆ្លើយតប ឬចូលរួមជាមួយសំណើកែប្រែថ្មីរបស់អ៊ីស្រាអែល សម្រាប់បទឈប់បាញ់នៅតំបន់ហ្កាហ្សានោះទេ ដោយបញ្ជាក់ថា ខ្លួនប្តេជ្ញាចិត្តចំពោះផែនការដំបូងរបស់ក្រុមអ្នកសម្រុះសម្រួលជំនួសវិញ។អ៊ីស្រាអែល បាននិយាយកាលពីថ្ងៃទី២៩ ខែមីនា ថា ខ្លួនបានបញ្ជូនសំណើកែប្រែថ្មីមួយនៅក្នុងការសម្របសម្រួលពេញលេញជាមួយសហរដ្ឋអាមេរិក ទៅកាន់អ្នកចរចា បន្ទាប់ពីក្រុមហាម៉ាស បានយល់ព្រមចំពោះសំណើមានស្រាប់ដែលខ្លួនទទួលបានពីអ្នកសម្របសម្រួលអេហ្ស៊ីប និងកាតា។ ច្បាប់ចម្លងដែលទទួលបានដោយសារព័ត៌មាន កាលពីថ្ងៃពុធបង្ហាញថា សំណើរបស់អ្នកសម្របសម្រួលគឺជាផ្នែកមួយនៃកិច្ចព្រមព្រៀងបទឈប់បាញ់ថ្ងៃទី១៧ ខែមករា ហើយនឹងបន្តបទឈប់បាញ់រយៈពេល ៥០ថ្ងៃទៀត។ ច្បាប់ចម្លងនិយាយថា ការចរចាសម្រាប់ដំណាក់កាលឈប់បាញ់ទី២ គួរតែបញ្ចប់មុនរយៈពេល ៥០ថ្ងៃត្រូវបានបញ្ចប់។ សំណើនេះរួមមានការដោះលែងជនជាតិអាមេរិកម្នាក់ នៅថ្ងៃដំបូងបន្ទាប់ពីបទឈប់បាញ់ត្រូវបានប្រកាស។ក្រុមហាម៉ាស់ក៏នឹងដោះលែងចំណាប់ថ្នូរអ៊ីស្រាអែល ៤នាក់ផងដែរ ដោយចំណាប់ថ្នូរម្នាក់ត្រូវបានដោះលែងរៀងរាល់ ១០ថ្ងៃម្ដង ជាថ្នូរនឹងការដោះលែងជនជាតិប៉ាឡេស្ទីន ២៥០នាក់ដែលជាប់ឃុំក្នុងពន្ធនាគារអ៊ីស្រាអែល និងដោះលែងមនុស្ស ២.០០០នាក់ ដែលត្រូវបានឃុំខ្លួនបន្ទាប់ពីការវាយប្រហារថ្ងៃទី០៧ ខែតុលា របស់ហាម៉ាស លើអ៊ីស្រាអែល។ គួរបញ្ជាក់ថា សំណើកែប្រែថ្មីរបស់អ៊ីស្រាអែលនោះក៏ជាផ្នែកមួយនៃសំណើមានស្រាប់នេះដែរ ប៉ុន្តែមិនទាន់មានសេចក្ដីលម្អិតនោះទេ៕

ទាហានប្រឆាំងនៅស៊ូដង់ខាងត្បូង ចុះចាញ់រដ្ឋាភិបាល ខណៈអ្នកសម្របសម្រួលសង្គ្រោះកិច្ចព្រមព្រៀងសន្តិភាព

នៅក្នុងរដ្ឋធានី Juba របស់ប្រទេសស៊ូដង់ខាងត្បូង អ្នកសម្របសម្រួលសហភាពអាហ្រ្វិក រួមមានអតីតប្រធានាធិបតីប៊ូរុនឌី លោក Domitien Ndayizeye និងអតីតចៅក្រមប្រទេសកេនយ៉ា លោក Effie Owuor បានទៅដល់ទីក្រុង Juba សម្រាប់កិច្ចចរចាសន្តិភាព កាលពីថ្ងៃពុធ ទី២ មេសា ក្នុងគោលបំណងទប់ស្កាត់សង្គ្រាមស៊ីវិលដែលអាចកើតមាន បន្ទាប់ពីការឃុំខ្លួនអនុប្រធានាធិបតីទីមួយ លោក Riek Machar ក្នុងលំនៅឋាន ដែលរដ្ឋាភិបាលរបស់ប្រធានាធិបតី លោក Salva Kiir ចោទប្រកាន់ពីបទញុះញុងឲ្យមានការបះបោរ។ភាពតានតឹងដែលកំពុងបន្ត បានកើនឡើងដោយសារការប៉ះទង្គិចគ្នាកាលពីពេលថ្មីៗនេះ នៅក្នុងរដ្ឋ Upper Nile រវាងយោធា និងកងជីវពល White Army។ដំណើរទស្សនកិច្ចរបស់គណៈប្រតិភូសហភាពអាហ្វ្រិក ធ្វើឡើងបន្ទាប់ពីការអំពាវនាវរបស់ក្រុមប្រឹក្សាសន្តិភាព និងសន្តិសុខរបស់សហភាពអាហ្វ្រិក ឱ្យមានការដោះលែងលោក Machar ជាបន្ទាន់ ដោយអះអាងថា ការវិវឌ្ឍន៍នាពេលបច្ចុប្បន្ន ធ្វើឱ្យប៉ះពាល់ដល់សន្ធិសញ្ញាសន្តិភាពឆ្នាំ២០១៨ ។ផែនការរបស់លោក Kiir ត្រូវបានគេមើលឃើញថាជាការប៉ុនប៉ងដើម្បីក្តោបអំណាចរបស់លោក ក្នុងពេលមានការមិនពេញចិត្តផ្នែកនយោបាយផ្ទៃក្នុង និងការផ្ទុះហៀរចេញសង្រ្គាមនៅក្នុងប្រទេសស៊ូដង់ដែលនៅជិតខាង។

មនុស្សរាប់លាននាក់នៅសហរដ្ឋអាមេរិក ស្ថិតក្រោមការព្រមាន និងហានិភ័យពីព្យុះភ្លៀងដ៏ខ្លាំងក្លា

ខ្យល់ព្យុះកួចដ៏ខ្លាំងក្លា និងភ្លៀងធ្លាក់ខ្លាំង បានបោកបក់ពាសពេញតំបន់ដ៏ធំទូលាយនៃភាគកណ្តាល និងភាគខាងត្បូងនៃសហរដ្ឋអាមេរិក កាលពីថ្ងៃពុធ (០២ មេសា) ដោយធ្វើឱ្យមនុស្សរាប់លាននាក់ស្ថិតក្រោមការព្រមាន និងហានិភ័យ ហើយបានបំផ្លាញផ្ទះសម្បែង និងអាជីវកម្ម ព្រមទាំងធ្វើឱ្យខ្សែភ្លើង និងដើមឈើបាក់រលំ។សេវាអាកាសធាតុជាតិអាមេរិក និយាយថា មានរបាយការណ៍យ៉ាងហោចណាស់ ១៥ករណី នៃព្យុះកួចនៅក្នុងរដ្ឋចំនួន៤ យ៉ាងតិច គិតត្រឹមល្ងាចថ្ងៃពុធ។ មិនទាន់មានសេចក្តីរាយការណ៍ភ្លាមៗពីអ្នកស្លាប់ ដោយសារខ្យល់ព្យុះដែលបាននាំមកនូវព្រិលដ៏ក្រាស់ និងភ្លៀងធ្លាក់ខ្លាំងនេះទេ។សេវាអាកាសធាតុជាតិបន្តថា មនុស្សរាប់លាននាក់ស្ថិតនៅក្រោមការប្រុងប្រយ័ត្នចំពោះព្យុះកួច និងទឹកជំនន់យ៉ាងគំហុក ហើយគ្រោះថ្នាក់នឹងបន្តរហូតដល់ព្រឹកថ្ងៃព្រហស្បតិ៍ ០៣ មេសា នេះ។ ទីភ្នាក់ងារអាកាសធាតុមួយនេះបានព្រមានថា ព្យុះដ៏ធំនោះត្រូវបានព្យាករថានឹងបំផ្លិចបំផ្លាញប្រទេសក្នុងរយៈពេលជាច្រើនថ្ងៃ ដោយព្រឹត្តិការណ៍អាកាសធាតុកាលពីថ្ងៃពុធនោះជា "ការចាប់ផ្តើមនៃគ្រោះមហន្តរាយច្រើនថ្ងៃ និងភ្លៀងធ្លាក់ខ្លាំងជាប្រវត្តិសាស្ត្រ"។សេវាអាកាសធាតុជាតិបានចេញការព្រមានអំពីព្យុះកួច និងទឹកជំនន់យ៉ាងគំហុកសម្រាប់ផ្នែកខ្លះនៃរដ្ឋ Missouri, Arkansas, Tennessee, Mississippi, Indiana, Illinois, Kentucky និង Oklahoma ។ យោងតាមគេហទំព័រតាមដានការដាច់ចរន្ត PowerOutage.us បានឱ្យដឹងថា អតិថិជនជាង ៣៥០.០០០នាក់ ពុំមានចរន្តអគ្គិសនីប្រើប្រាស់ទេនៅទូទាំងតំបន់ដែលរងគ្រោះដោយព្យុះ៕

ប្រធានាធិបតីអាមេរិក និយាយថា លោកនឹងបញ្ឈប់សង្គ្រាមរបស់រុស្ស៊ីនៅអ៊ុយក្រែន

ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃពុធ ទី០២ ខែមេសា ថា លោកនឹងបញ្ឈប់សង្គ្រាមរបស់រុស្ស៊ីនៅអ៊ុយក្រែន។ លោកបាននិយាយក្នុងអំឡុងពេលព្រឹត្តិការណ៍ប្រកាសការដំឡើងពន្ធនៅ Rose Garden ថា «យើងនឹងបញ្ឈប់សង្គ្រាមនេះ។ វាជាសង្រ្គាមមិនគួកើតឡើង។ វានឹងមិនកើតឡើងនោះទេ ប្រសិនបើខ្ញុំជាប្រធានាធិបតី»។រដ្ឋបាល របស់លោក Trump មានភាពអត់ធ្មត់ជាមួយភាគីជម្លោះទាំងសងខាង ដើម្បីឈានឆ្ពោះទៅមុខកាន់តែលឿន ទៅរកការបញ្ចប់សង្គ្រាមរយៈពេលបីឆ្នាំ មកនេះ។អ៊ុយក្រែន បាននិយាយថាកាលពីខែមុន ខ្លួនមានឆន្ទះទទួលយកបទឈប់បាញ់ពេញលេញរយៈពេល៣០ថ្ងៃ ប៉ុន្តែលោក Putin បានមិនព្រមឯកភាពចំពោះរឿងនោះ ដោយលើកពីបញ្ហានានាជាច្រើន ដែលកិច្ចព្រមព្រៀងត្រូវតែបានត្រួតពិនិត្យ និងព្រួយបារម្ភថាអ៊ុយក្រែននឹងប្រើប្រាស់ឱកាសដកដង្ហើមដើម្បីចល័តកងទ័ព និងទទួលបានគ្រឿងយុទ្ធោបករណ៍បន្ថែមទៀត ពីប្រទេសលោកខាងលិច។

តម្លៃប្រេងធ្លាក់ចុះទៅរកស្ថានភាពអវិជ្ជមាន ខណៈលោក Trump ប្រកាសការដំឡើងពន្ធថ្មី

តម្លៃប្រេងបានធ្លាក់ចុះទៅរកស្ថានភាពអវិជ្ជមាន បន្ទាប់ពីការកើនឡើងប្រាក់ដុល្លារក្នុងពាណិជ្ជកម្មក្រោយកិច្ចព្រមព្រៀង ខណៈប្រធានាធិបតីសហរដ្ឋអាមេរិក លោក Donald Trump បានប្រកាសការដំឡើងពន្ធបដិការលើដៃគូពាណិជ្ជកម្ម ដែលបង្កឱ្យមានការព្រួយបារម្ភថា សង្រ្គាមពាណិជ្ជកម្មពិភពលោកអាចនឹងធ្វើឱ្យតម្រូវការប្រេងឆៅធ្លាក់ចុះ។ប្រាក់ដុល្លារកើនឡើងរបស់សហរដ្ឋអាមេរិក បានប្រែទៅជាអវិជ្ជមាន ខណៈលោកTrump បានប្រកាសការដំឡើងពន្ធលើដៃគូពាណិជ្ជកម្ម រួមមានសហភាពអឺរ៉ុប ចិន និងប្រទេសកូរ៉េខាងត្បូង។ក្នុងរយៈពេលជាច្រើនសប្តាហ៍មកនេះ លោក Trump បានចាត់ទុកថ្ងៃទី២ ខែមេសា ថាជា «ទិវារំដោះ» ដែលនាំមកនូវពន្ធថ្មី ធ្វើអោយប្រព័ន្ធពាណិជ្ជកម្មពិភពលោកមានភាពច្របូកច្របល់។ តារាងរាយបញ្ជីឈ្មោះប្រទេស និងការដំឡើងពន្ធដែលលោក Trump បានបង្ហាញក្នុងអំឡុងពេលការប្រកាសរបស់លោក ពុំបានលម្អិតអំពីការដំឡើងពន្ធលើប្រទេសកាណាដា និងម៉ិកស៊ិក នោះទេ។ ប្រទេសកាណាដាបាននាំចេញប្រេងឆៅប្រហែល៤លានបារ៉ែលក្នុងមួយថ្ងៃ ទៅកាន់សហរដ្ឋអាមេរិក។គោលនយោបាយដំឡើងពន្ធរបស់លោក Trump អាចជំរុញអតិផរណា កំណើនសេដ្ឋកិច្ចយឺត និងជម្លោះពាណិជ្ជកម្មកាន់តែរីកធំ ដែលលទ្ធភាពបានកំណត់តម្លៃប្រេងកើនឡើង។ ការអត្ថាធិប្បាយពីប្រទេសម៉ិកស៊ិក បានបន្ធូរបន្ថយការព្រួយបារម្ភមួយចំនួនអំពីសង្គ្រាមពាណិជ្ជកម្ម រវាងប្រទេសទាំងពីរ បន្ទាប់ពីប្រធានាធិបតីម៉ិកស៊ិក លោកស្រី Claudia Sheinbaum បាននិយាយកាលពីថ្ងៃពុធថា ម៉ិកស៊ិក ពុំមានគម្រោងដាក់ការដំឡើងពន្ធសងសឹកលើសហរដ្ឋអាមេរិក នោះទេ។

បណ្ដាញសង្គម

ព័ត៌មានថ្មីៗ

អភិបាលខេត្តកំពង់ឆ្នាំង ដាក់បទបញ្ជាម៉ឺងម៉ាត់អោយអាជ្ញាធរ និងមន្ទីរពាក់ព័ន្ធ ក្នុងយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា

សម្ដេចធិបតី អនុញ្ញាតឲ្យមេបញ្ជាការកងទ័ពជើងគោកនៃសាធារណរដ្ឋហ្វីលីពីន ចូលជួបសម្ដែងការគួរសម ពិភាក្សាការងារ

សារព័ត៌មានរ៉យទ័រ៖ អ៊ុយក្រែនបានទទួលគ្រាប់កាំភ្លើងធំជាង ៤២០.000គ្រាប់ តាំងពីដើមឆ្នាំ ២០២៥

អង់គ្លេសចុះកិច្ចព្រមព្រៀងស្តីពីការពារជាតិ ពាណិជ្ជកម្ម និងអន្តោប្រវេសន៍ជាមួយអាល្លឺម៉ង់ ខណៈអឺរ៉ុបពង្រឹងសន្តិសុខ

អាវុធហត្ថខេត្តស្ទឹងត្រែងឃាត់រថយន្តដឹកជនជាតិចិនចំនួន ៩នាក់ ពាក់ព័ន្ធការឆបោកតាមប្រព័ន្ធបច្ចេកវិទ្យា

ក្រសួងការពារជាតិនិយាយថា កងកម្លាំងរុស្ស៊ីបានកាន់កាប់ភូមិអ៊ុយក្រែនចំនួនបី នៅទូទាំងតំបន់ជួរមុខ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877