BTV NEWS

យោធាអ៊ីស្រាអែល ចេញបញ្ជាជម្លៀសទីក្រុងហ្កាហ្សា ខណៈការដណ្ដើមកាន់កាប់ក្រុងនេះ កាន់តែកៀក

ក្រុមបាតុករប្រឆាំងរដ្ឋាភិបាលស៊ែប៊ី ប្រមូលផ្តុំគ្នាប្រឆាំងការប្រើប្រាស់កម្លាំងនគរបាល

នាយករដ្ឋមន្ត្រីន័រវេស ជម្នះបាននូវភាពចលាចល ដើម្បីទទួលជ័យជម្នះការបោះឆ្នោតឡើងវិញ

កងកម្លាំងកុងហ្គោ បាញ់ប្រហារទៅលើក្រុមអ្នកតវ៉ានៅភាគខាងកើតដែលហែកហួរដោយសង្រ្គាម

ព័ត៌មានអន្តរជាតិ

មនុស្ស២នាក់ស្លាប់ និង៩នាក់រងរបួស ក្នុងការបាញ់ប្រហារថ្ងៃទិវាចងចាំ នៅទីក្រុង Philadelphia

នគរបាលនិយាយនៅថ្ងៃអង្គារនេះថា មនុស្សពីរនាក់បានស្លាប់ និង៩នាក់ផ្សេងទៀតបានរងរបួសនៅក្នុងការបាញ់ប្រហារមួយនៅឧទ្យាន Fairmount ក្នុងទីក្រុង Philadelphia រដ្ឋផេនស៊ីវឺនៀ សហរដ្ឋអាមេរិកនៅថ្ងៃទិវាចងចាំ។ អ្នករងរបួសទាំង៩នាក់ក្នុងការបាញ់ប្រហារកាលពីយប់ថ្ងៃចន្ទ ស្ថិតក្នុងស្ថានភាពមានស្ថិរភាព ក្នុងនោះមានក្មេងជំទង់បីនាក់។មន្ត្រីនគរបាលបានប្រាប់សារព័ត៌មានក្នុងសន្និសីទមួយថា បុរសម្នាក់ និងស្ត្រីម្នាក់ គឺជាជនរងគ្រោះដែលបានស្លាប់ ហើយមនុស្សពេញវ័យជាច្រើននាក់មានវត្តមាននៅឧទ្យាននោះ។ មន្ត្រី និយាយថា «យើងមិនទាន់រកឃើញអាវុធណាមួយនៅឡើយនៅពេលនេះ ហើយក៏ពុំទាន់ចាប់ខ្លួនខ្មាន់កាំភ្លើងបាននៅឡើយដែរ។«នេះពិតជាមានសារៈសំខាន់។ វាជាទិវារំលឹក យើងយល់ពីសារៈសំខាន់នៃព្រឹត្តិការណ៍នេះ ហើយយើងនឹងប្រាកដជាផ្តល់ការធ្វើបច្ចុប្បន្នភាពនៅថ្ងៃនេះ។ទិវាចងចាំ ត្រូវបានប្រារព្ធឡើងតាមទម្លាប់នៅថ្ងៃចន្ទចុងក្រោយនៃខែឧសភា គឺជាថ្ងៃឈប់សម្រាករបស់សហព័ន្ធនៅក្នុងសហរដ្ឋអាមេរិក ដែលឧទ្ទិសផ្តល់កិត្តិយស និងកាន់ទុក្ខដល់បុគ្គលិកយោធាដែលបានស្លាប់នៅក្នុងការបំពេញភារកិច្ចរបស់ពួកគេ។

ប្លុកក្នុងតំបន់ ព្រមានអំពីសីតុណ្ហភាពហក់ឡើងខ្ពស់ នៅតំបន់ញកអាហ្វ្រិក

ប្រទេសយ៉ាងហោចណាស់ចំនួន៧នៅក្នុងតំបន់ញកអាហ្វ្រិក ត្រូវបានគេរំពឹងថានឹងមានសីតុណ្ហភាពហក់ឡើងខ្ពស់ជាងធម្មតានៅចន្លោះខែមិថុនា និងខែសីហា នេះបើយោងតាមមជ្ឈមណ្ឌលព្យាករណ៍អាកាសធាតុ នៃអាជ្ញាធរអន្តររដ្ឋាភិបាលលើការអភិវឌ្ឍន៍ (IGAD) ដែលជាប្លុកប្រចាំតំបន់។នៅក្នុងការប្រកាសព្រមាន ដែលបានចេញផ្សាយកាលពីថ្ងៃចន្ទ នៅក្នុងរដ្ឋធានីណៃរ៉ូប៊ី ប្រទេសកេនយ៉ា មជ្ឈមណ្ឌលព្យាករណ៍អាកាសធាតុ បាននិយាយថាប្រទេសទាំងនេះ រួមមានប្រទេសអេត្យូពី សូម៉ាលី កេនយ៉ា អ៊ុយហ្គង់ដា រ៉្វាន់ដា ប៊ូរុនឌី និងប្រទេសតង់ហ្សានី។ ប្រទេសមួយចំនួន នឹងកត់ត្រាសីតុណ្ហភាពលើសពី៣២អង្សាសេក្នុងអំឡុងពេលនោះ។មជ្ឈមណ្ឌលនិយាយថា សីតុណ្ហភាពតាមរដូវកាលត្រូវបានគេរំពឹងថានឹងក្តៅជាងធម្មតា។ សីតុណ្ហភាពហក់ឡើងខ្ពស់ នឹងត្រូវបានកត់ត្រា ទោះបីជាតំបន់នេះត្រូវបានគេរំពឹងថានឹងមានភ្លៀងធ្លាក់ច្រើនហួសពីធម្មតានៅក្នុងប្រទេសភាគច្រើនក្នុងអំឡុងពេលនោះក៏ដោយ។ទោះជាយ៉ាងណា ទីភ្នាក់ងារអាកាសធាតុបាននិយាយថា ផ្នែកខ្លះនៃតំបន់ ជាពិសេសភាគខាងលិចប្រទេសអេត្យូពី ភាគខាងលិចនិងភាគឦសានប្រទេសស៊ូដង់ខាងត្បូង និងភាគកណ្តាលប្រទេសស៊ូដង់ខាងត្បូង នឹងក្តៅស្ងួតជាងធម្មតា ដោយសារតែបម្រែបម្រួលអាកាសធាតុនៅតែបន្តប៉ះពាល់ដល់អាហ្វ្រិកខាងកើត និងអាហ្វ្រិកកណ្តាល។

ហ្ស៊កដានី និងន័រវែស បន្តជំរុញឲ្យមានបទឈប់បាញ់ជាបន្ទាន់នៅហ្កាហ្សា និងដំណោះស្រាយរដ្ឋពីរ

ព្រះមហាក្សត្រ Abdullah II នៃប្រទេសហ្ស៊កដានី បានជួបជាមួយរដ្ឋមន្ត្រីការបរទេសន័រវែសលោក Espen Barth Eide ក្នុងទីក្រុងអាម៉ាន កាលពីថ្ងៃចន្ទ ដោយភាគីទាំងពីរ បានអំពាវនាវឲ្យមានបទឈប់បាញ់ជាបន្ទាន់ នៅក្នុងតំបន់ហ្កាហ្សា និងបន្តកិច្ចខិតខំប្រឹងប្រែងឆ្ពោះទៅរកដំណោះស្រាយរដ្ឋពីរ។ទីភ្នាក់ងារសារព័ត៌មានហ្ស៊កដានី បានរាយការណ៍ថា កិច្ចប្រជុំនេះ ក៏មានការចូលរួមពីព្រះអង្គម្ចាស់ Hussein bin Abdullah ផងដែរ។ព្រះមហាក្សត្រ Abdullah បានគូសបញ្ជាក់ពីតម្រូវការក្នុងការបញ្ចប់សង្រ្គាម នៅតំបន់ហ្កាហ្សា ធានានូវការផ្តល់ជំនួយមនុស្សធម៌ប្រកបដោយនិរន្តរភាព និងធ្វើការឆ្ពោះទៅរកសន្តិភាពដ៏ត្រឹមត្រូវ និងទូលំទូលាយដោយផ្អែកលើក្របខណ្ឌរដ្ឋពីរ។ការពិភាក្សានេះ ក៏បានគ្របដណ្តប់ភាពតានតឹង ដែលកើនឡើងនៅក្នុងតំបន់វេសបែង និងទីក្រុងហ្ស៊េរុយសាឡឹម ក៏ដូចជាការវិវឌ្ឍ នៅក្នុងសាធារណរដ្ឋអារ៉ាប់ស៊ីរីផងដែរ។នៅក្នុងកិច្ចប្រជុំដាច់ដោយឡែកមួយ រដ្ឋមន្ត្រីការបរទេសលោក Ayman Safadi និងលោក Eide បានសង្កត់ធ្ងន់លើភាពបន្ទាន់នៃការបញ្ចប់វិបត្តិមនុស្សធម៌ នៅតំបន់ហ្កាហ្សា ដោយព្រមានថា ការបរាជ័យក្នុងសកម្មភាពហានិភ័យ នឹងធ្វើឲ្យមានអស្ថិរភាពក្នុងតំបន់បន្ថែមទៀត។លោករដ្ឋមន្ត្រីទាំងពីរ បានថ្កោលទោសសកម្មភាពយោធារបស់អ៊ីស្រាអែល និងការលុកលុយរបស់អ្នកតាំងលំនៅ នៅក្នុងវិហារឥស្លាម Al-Aqsa ដោយហៅទង្វើទាំងនោះថា ជាការរំលោភបំពានច្បាប់អន្តរជាតិ។

អ្នកជំនាញ៖អ៊ីស្រាអែលកំពុងពិចារណាអំពីការវាយប្រហារលើទីតាំងនុយក្លេអ៊ែរអ៊ីរ៉ង់ ប្រឆាំងនឹងឆន្ទៈរបស់អាមេរិក

លោក Andrey Zeltyn សាស្ត្រាចារ្យជាន់ខ្ពស់នៅសាលា Asian Studies នៃនាយកដ្ឋានសេដ្ឋកិច្ចពិភពលោក និងនយោបាយពិភពលោក នៅឧត្តមសិក្សាសេដ្ឋកិច្ចជាតិនៃសាកលវិទ្យាល័យស្រាវជ្រាវជាតិ បាននិយាយថា រដ្ឋាភិបាលអ៊ីស្រាអែល កំពុងពិចារណាអំពីការវាយប្រហារយោធាយ៉ាងខ្លាំងក្លាប្រឆាំងនឹងរោងចក្រនុយក្លេអ៊ែររបស់ប្រទេសអ៊ីរ៉ង់។ លោក Zeltyn បានចែករំលែកទស្សនៈទាំងនេះ នៅក្នុងការអត្ថាធិប្បាយសម្រាប់សារព័ត៌មាន TASS ។លោកបានគូសបញ្ជាក់ពីជំហរប្រឈមមុខដាក់គ្នាកាន់តែខ្លាំងឡើងរបស់អ៊ីស្រាអែល ចំពេលការចរចា កំពុងបន្តរវាងអាមេរិក និងអ៊ីរ៉ង់ ជុំវិញកម្មវិធីនុយក្លេអ៊ែរ។ «អ៊ីស្រាអែល ដែលជំទាស់យ៉ាងដាច់អហង្ការចំពោះកិច្ចព្រមព្រៀងនុយក្លេអ៊ែរ ជាមួយអ៊ីរ៉ង់ជាគោលការណ៍ ហាក់ដូចជាកំពុងបង្កើនភាពតានតឹង។ ប្រព័ន្ធផ្សព្វផ្សាយលោកខាងលិចដែលដកស្រង់ប្រភពស៊ើបការណ៍សម្ងាត់របស់សហរដ្ឋអាមេរិកបង្ហាញថា ទីក្រុង តែលអាវីវ (Tel Aviv) កំពុងថ្លឹងថ្លែងអំពីការវាយប្រហារការពារលើទីតាំងនុយក្លេអ៊ែរអ៊ីរ៉ង់។ សមយុទ្ធយោធា ការបញ្ជូនគ្រាប់រំសេវ និងសេចក្តីថ្លែងការណ៍ដោយមន្ត្រីជាន់ខ្ពស់ បានគូសបញ្ជាក់អំពីភាពធ្ងន់ធ្ងរនៃចេតនាទាំងនេះ»។អ្នកវិភាគរូបនេះ បានកត់សម្គាល់ថា អ៊ីស្រាអែល ដែលចាត់ទុកនុយក្លេអ៊ែរអ៊ីរ៉ង់ ជាការគំរាមកំហែងឥតឈប់ឈរ អាចធ្វើសកម្មភាពឯកតោភាគី ហើយថែមទាំងផ្ទុយទៅនឹងការចង់បានរបស់ទីក្រុងវ៉ាស៊ីនតោន។ «នាពេលថ្មីៗនេះ លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) បានបង្ហាញការខ្វែងគំនិតគ្នាយ៉ាងខ្លាំង ជាមួយលោកប្រធានាធិបតី ដូណាល់ ត្រាំ ( Donald Trump)។ គួរឲ្យកត់សម្គាល់ផងដែរ ការប៉ុនប៉ងរបស់លោក ណេតាន់យ៉ាហ៊ូ នៅក្នុងខែមេសា ដើម្បីទទួលបានការយល់ព្រមពីសហរដ្ឋអាមេរិកសម្រាប់ការវាយប្រហារលើប្រទេសអ៊ីរ៉ង់ គឺមិនបានជោគជ័យទេ។ វាហាក់ដូចជាគួរឲ្យជឿជាក់ដែលថា អ៊ីស្រាអែលឥឡូវនេះ កំពុងពិចារណាយ៉ាងយកចិត្តទុកដាក់លើការធ្វើសកម្មភាពនៃគំនិតផ្តួចផ្តើមរបស់ខ្លួន។ លោក Zeltyn បានសង្កេតឃើញការធ្វើឲ្យប៉ះពាល់ដល់ការចរចា ដែលកំពុង បន្ត។

អាជ្ញាធរហ្កាហ្សា៖ អ៊ីស្រាអែលវាយប្រហារមជ្ឈមណ្ឌលជនភៀសខ្លួនជាង ២៤០កន្លែង តាំងពីខែតុលា ឆ្នាំ ២០២៣

អាជ្ញាធរប៉ាឡេស្ទីន បាននិយាយនៅក្នុងសេចក្តីថ្លែងការណ៍មួយថា អ៊ីស្រាអែល បានវាយប្រហារមជ្ឈមណ្ឌលស្នាក់នៅចំនួន ២៤០កន្លែង សម្រាប់ជនភៀសខ្លួន និងប្រជាជនដែលត្រូវបានជម្លៀស នៅក្នុងតំបន់ហ្កាហ្សាស្ទ្រីប ចាប់តាំងពីខែតុលា ឆ្នាំ ២០២៣។សេចក្តីថ្លែងការណ៍ បានបញ្ជាក់ថា៖«ចំនួនមជ្ឈមណ្ឌលដែលបានរងការវាយប្រហារ បានកើនឡើងដល់ ២៤១កន្លែង។ នេះគឺជាការរំលោភយ៉ាងធ្ងន់ធ្ងរលើច្បាប់អន្តរជាតិ និងមនុស្សធម៌ទាំងអស់ និងការប៉ុនប៉ងច្បាស់លាស់ ដើម្បីបង្កឲ្យមានគ្រោះថ្នាក់ដល់ជនស៊ីវិល តាមដែលអាចធ្វើទៅបាន»។ប្រព័ន្ធផ្សព្វផ្សាយអារ៉ាប់ បានរាយការណ៍មុននេះថា មនុស្ស ៣០នាក់ ត្រូវបានសម្លាប់ នៅក្នុងការវាយប្រហាររបស់អ៊ីស្រាអែល ទៅលើសាលារៀន Fahmi al-Jarjawi ក្នុងទីក្រុងហ្កាហ្សា។ យោងតាមរបាយការណ៍ប្រព័ន្ធផ្សព្វផ្សាយបានឲ្យដឹងថ ជនភៀសខ្លួន និងប្រជាជនដែលត្រូវបានជម្លៀស កំពុងស្នាក់នៅក្នុងអគារ។ អាជ្ញាធរនៃតំបន់ដែលត្រូមហ៊ុមព័ទ្ធនេះ បាននិយាយថា យ៉ាងហោចណាស់មានកុមារ ១៨នាក់ក្នុងចំណោមអ្នក ដែលត្រូវបានគេសម្លាប់។ភាពតានតឹង បានផ្ទុះឡើងម្តងទៀត នៅមជ្ឈិមបូព៌ា នៅថ្ងៃទី ០៧ ខែតុលាឆ្នាំ ២០២៣ នៅពេលដែលក្រុម សកម្មប្រយុទ្ធហាម៉ាស បានធ្វើការវាយប្រហារដ៏គួរឲ្យភ្ញាក់ផ្អើលមួយលើទឹកដីអ៊ីស្រាអែលពីតំបន់ហ្កាហ្សាដោយបានសម្លាប់អ្នកស្រុកនៃតំបន់ព្រំដែនអ៊ីស្រាអែល និងចាប់ចំណាប់ថ្នូរជាច្រើននាក់។ ជាការឆ្លើយតប អ៊ីស្រាអែល បានបើកប្រតិបត្តិការមួយនៅក្នុងដែនដីនេះ ដើម្បីមកម្ទេចរចនាសម្ព័ន្ធយោធា និងនយោបាយរបស់ក្រុមហាម៉ាស និងដោះលែងចំណាប់ខ្មាំងទាំងអស់។

ជំនួយអាមេរិក បានរក្សាកុមារសូម៉ាលីដែលស្រេកឃ្លានជាច្រើន ឲ្យនៅមានជីវិត ប៉ុន្តែឥឡូវលុយនោះ បាត់អស់ហើយ

សម្រែកនៃកុមារ កំពុងឈឺចាប់ ដោយសារខ្វះអាហារូបត្ថម្ភធ្ងន់ធ្ងរ។ ក្នុងចំណោមអ្នកជំងឺមាន កុមារ Maka'il Mohamed អាយុ ១ឆ្នាំ។ គ្រូពេទ្យ បានសង្កត់ដើមទ្រូងរបស់គេ ក្នុងការប៉ុនប៉ងអស់សង្ឃឹម ដើម្បីជួយដល់ការដកដង្ហើមរបស់កុមាររូបនេះ។ឪពុករបស់ Maka’il Mohamed បាននាំរូបគេទៅមន្ទីរពេទ្យក្នុងរដ្ឋធានី Mogadishu របស់ប្រទេសសូម៉ាលី យឺតពេល។ ជនរងគ្រោះដោយសារមានផលវិបាកទាក់ទងនឹងកង្វះអាហារូបត្ថម្ភ ក្មេងប្រុសនេះ មិនបានរស់រានមានជីវិតឡើយ។ឪពុករបស់កុមារនេះ ឈ្មោះ Mohamed Ma'ow បានសួរគ្រូពេទ្យដោយភ្ញាក់ផ្អើលថា «តើអ្នកប្រាកដទេ? កូនរបស់ខ្ញុំពិតជាស្លាប់មែនទេ?»។ ការស្លាប់នៅដើមខែនេះ នៅមន្ទីរពេទ្យ Banadir បានធ្វើឲ្យប្រជាជនសូម៉ាលីជាច្រើនដែលមិនមានលទ្ធភាពចិញ្ចឹមកូនរបស់ពួកគេ ជួបការលំបាកកាន់តែខ្លាំងឡើង ហើយបុគ្គលិកសុខាភិបាលដែលកំពុងមើលឃើញថា ប្រាក់រាប់រយលានដុល្លារ នៅក្នុងជំនួយរបស់សហរដ្ឋអាមេរិក បានបាត់អស់ នៅក្រោមរដ្ឋបាលរបស់លោក ត្រាំ។លោកវេជ្ជបណ្ឌិត Abdiqani Sheikh Omar អតីតអគ្គនាយកក្រសួងសុខាភិបាល និងបច្ចុប្បន្នជាទីប្រឹក្សា រដ្ឋាភិបាល បាននិយាយថា ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) ធ្លាប់បាន ផ្តល់ ៦៥%នៃជំនួយបរទេសរបស់ប្រទេសសូម៉ាលី។

ប្រធានាធិបតីលីបង់៖ ជំរំប៉ាឡេស្ទីនចំនួន ៣ នៅក្នុងប្រទេសលីបង់ គ្រោងនឹងប្រគល់អាវុធ ក្នុងខែមិថុនា

ទីភ្នាក់ងារព័ត៌មានផ្លូវការជាតិលីបង់ (NNA) បានរាយការណ៍ថា ប្រធានាធិបតីលីបង់ លោក Joseph Aoun បាននិយាយកាលពីថ្ងៃចន្ទថា ជំរំប៉ាឡេស្ទីនចំនួនបី នៅក្នុងទីក្រុងបេរូត នឹងចាប់ផ្តើមប្រគល់អាវុធរបស់ពួកគេ នៅពាក់កណ្តាលខែមិថុនា។លោក Aoun បានធ្វើការអត្ថាធិប្បាយ ក្នុងអំឡុងពេលជួបជាមួយគណៈប្រតិភូ មកពីសភាសហរដ្ឋអាមេរិកក្នុងទីក្រុងបេរូត។នាយករដ្ឋមន្ត្រីលីបង់លោក Nawaf Salam និងប្រធានអាជ្ញាធរប៉ាឡេស្ទីនលោក ម៉ាខ្មូដ អាបាស ( Mahmoud Abbas) បានព្រមព្រៀងគ្នា កាលពីដើមសប្តាហ៍នេះ ដើម្បីបញ្ចប់វត្តមាន និងប្រតិបត្តិការអាវុធដែលកាន់កាប់ដោយក្រុមប្រឆាំងប៉ាឡេស្ទីន នៅខាងក្រៅការគ្រប់គ្រងរបស់រដ្ឋលីបង់ រួមទាំងនៅក្នុងជំរំជនភៀសខ្លួនប៉ាឡេស្ទីនផងដែរ។លោក Aoun បានថ្លែងថា៖ «គណៈកម្មាធិការចម្រុះ ត្រូវបានបង្កើត ឡើងដើម្បីអនុវត្តកិច្ចព្រមព្រៀង ហើយការប្រគល់អាវុធ នឹងចាប់ផ្តើម នៅពាក់កណ្តាលខែមិថុនា នៅក្នុងជំរំចំនួនបី ក្នុងទីក្រុងបេរូត ដោយបន្ថែមថា ជំរំយោធាប៉ាឡេស្ទីនចំនួនបី នៅភាគខាងជើង ភ្នំលីបង់ និងភាគខាងត្បូង ត្រូវបានរុះរើរួច ហើយ។ក្នុងជំនួបជាមួយគណៈប្រតិភូអាមេរិក លោកប្រធានាធិបតីលីបង់ ក៏បានសង្កត់ធ្ងន់ថា អ៊ីស្រាអែលបានបរាជ័យ ក្នុងការបំពេញកាតព្វកិច្ចរបស់ខ្លួន ក្រោមកិច្ចព្រមព្រៀងឈប់បាញ់ជាមួយលីបង់ ដែលបានចូលជាធរមាន នៅថ្ងៃទី ២៧ ខែវិច្ឆិកា ឆ្នាំ ២០២៤។លោក Aoun បាននិយាយថា៖«អ៊ីស្រាអែលបន្តកាន់កាប់ភ្នំចំនួន ៥ នៅភាគខាងត្បូង ហើយមិនបានប្រគល់អ្នកជាប់ឃុំលីបង់វិញទេ បើទោះបីជាមានការអំពាវនាវពីលីបង់ម្តងហើយម្តងទៀត ជាពិសេសទៅសហរដ្ឋអាមេរិក និងបារាំង ដែលបានគាំទ្ររួមដល់កិច្ចព្រមព្រៀងនេះ»។

អង្គការឃ្លាំមើលសិទ្ធិមនុស្ស៖ EUនិងអង់គ្លេស មិនគួរប្រើតំបន់Balkans ជាទីជម្រកសម្រាប់ជនអន្តោប្រវេសន៍ទេ

អង្គការឃ្លាំមើលសិទ្ធិមនុស្ស (HRW) បាននិយាយកាលពីថ្ងៃចន្ទថា ចក្រភពអង់គ្លេស និងសហភាពអឺរ៉ុបគួរតែបញ្ឈប់ការព្យាយាមប្រើប្រាស់តំបន់បាល់កង់(Balkans) ជា «ទីជម្រកសម្រាប់ជនអន្តោប្រវេសន៍ ដោយបន្ថែមការជជែកដេញដោលលើការប្រើប្រាស់ «មជ្ឈមណ្ឌលវិលត្រឡប់»របស់ប្រទេសទី៣ សម្រាប់អ្នកស្វែងរកសិទ្ធិជ្រកកោន។ទាំងសហភាពអឺរ៉ុប និងចក្រភពអង់គ្លេស បានធ្វើសម្រេចចិត្តឆ្ពោះទៅរកការរៀបចំដំណើរការទីកន្លែងសម្រាប់ជនអន្តោប្រវេសន៍ នៅខាងក្រៅព្រំដែនរបស់ពួកគេ ដោយស្វែងរកការដោះស្រាយជាមួយនឹងការកើនឡើងនៃអ្នកមកដល់ថ្មី ដែលបានក្លាយជាបញ្ហានយោបាយយ៉ាងក្តៅគគុក។សហភាពអឺរ៉ុប បានសម្រេច នៅក្នុងខែមីនា ដើម្បីអនុញ្ញាតឲ្យសមាជិករៀបចំដំណើរការទីតាំងសម្រាប់ជនអន្តោប្រវេសន៍ នៅខាងក្រៅព្រំដែននៃប្លុកប្រទេស ២៧នេះ ហើយនាយករដ្ឋមន្ត្រីអង់គ្លេសលោក Keir Starmer បានប្រកាសថា រដ្ឋាភិបាលរបស់លោក បានបើកកិច្ចពិភាក្សាជាមួយប្រទេសជាច្រើន លើការបង្កើត «មជ្ឈមណ្ឌលវិលត្រឡប់» សម្រាប់អ្នកស្វែងរកសិទ្ធិជ្រកកោនដែលត្រូវបានបដិសេធ ដើម្បីរង់ចាំការនិរទេស។លោកមិនបានលើកឡើងពីឈ្មោះប្រទេសទាំងនោះទេ ប៉ុន្តែតំបន់បាល់កង់មើលទៅដូចជាដៃគូដែលអាចធ្វើការជាមួយគ្នាបាន។ លោក Starmer បានធ្វើសេចក្តីប្រកាសក្នុងអំឡុងពេលដំណើរទស្សនកិច្ច ទៅកាន់ប្រទេសអាល់បានី ដែលជាកន្លែងរៀបចំមជ្ឈមណ្ឌលបញ្ជូនជនអន្តោប្រវេសន៍សម្រាប់ប្រទេសអ៊ីតាលីរួចហើយ ហើយនាពេលថ្មីៗនេះ រដ្ឋាភិបាលរបស់លោក បានបង្ហាញកញ្ចប់វិនិយោគចំនួន ៦ពាន់លានអឺរ៉ូ នៅក្នុងប្រទេសម៉ាសេដូនីខាងជើង។

លោក ពូទីន គំរាម «បិទ» ក្រុមហ៊ុនលោកខាងលិច ដែលនៅសេសសល់ ក្នុងប្រទេសរុស្ស៊ី

ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) កាលពីថ្ងៃចន្ទ បានគំរាមថា នឹង «បិទ» ក្រុមហ៊ុនលោកខាងលិច ដែលនៅសេសសល់ ក្នុងប្រទេសរុស្ស៊ី និងធ្វើសកម្មភាពប្រឆាំងនឹងផលប្រយោជន៍របស់ខ្លួន ដែលជាផ្នែកនៃកិច្ចខិតខំប្រឹងប្រែងរបស់ទីក្រុងមូស្គូ ដើម្បីពង្រឹងការអភិវឌ្ឍកម្មវិធី (software)ក្នុងស្រុក។លោកបាននិយាយជាការឆ្លើយតបទៅនឹងការអំពាវនាវរបស់អ្នកជំនួញ ដើម្បីទប់ស្កាត់សកម្មភាពរបស់ក្រុមហ៊ុនបច្ចេកវិទ្យាអាមេរិក Zoom និង Microsoft ដែលបច្ចុប្បន្នផ្តល់សេវាមានកំណត់នៅក្នុងប្រទេសរុស្ស៊ីថា៖«យើងចាំបាច់ត្រូវបន្ថយពួកគេ។ ខ្ញុំយល់ស្របទាំងស្រុង ហើយខ្ញុំនិយាយអំពីញ្ហានេះ ដោយគ្មានការស្ទាក់ស្ទើរ ឡើយ»។ ក្រុមហ៊ុនលោកខាងលិចជាច្រើន បានចាកចេញពីប្រទេសរុស្ស៊ី ឬធ្វើឲ្យខូចខាតយ៉ាងធ្ងន់ធ្ងរដល់សកម្មភាពរបស់ពួកគេ នៅក្នុងប្រទេសនេះ បន្ទាប់ពីទីក្រុងមូស្គូ បានបើកការវាយលុកផ្នែកយោធារបស់ខ្លួនលើអ៊ុយក្រែន ដែលជំរុញឲ្យមានការដាក់ទណ្ឌកម្មសេដ្ឋកិច្ចពីសម្ព័ន្ធមិត្តរបស់អ៊ុយក្រែន។លោកប្រធានាធិបតីរុស្ស៊ី បាននិយាយនៅឯកិច្ចប្រជុំជាមួយសហគ្រិនថា៖«យើងមិនបានបណ្តេញនរណាម្នាក់ចេញទេ...យើងបានផ្តល់នូវលក្ខខណ្ឌអំណោយផលបំផុតសម្រាប់ពួកគេក្នុងការធ្វើការ នៅក្នុងទីផ្សាររបស់យើង ហើយពួកគេកំពុងព្យាយាមរារាំងពួកយើង ដោយមិនបានផ្តល់ព័ត៌មានលម្អិតអំពីរបៀបដែលក្រុមហ៊ុនលោកខាងលិច កំពុងធ្វើឲ្យខូចខាតដល់ប្រទេសរុស្ស៊ីទេ។ លោកប្រធានាធិបតីរុស្ស៊ី ដែលបានរឹតបន្តឹងយ៉ាងខ្លាំងនូវលក្ខខណ្ឌចាកចេញសម្រាប់ក្រុមហ៊ុន ដែលកំពុងស្វែងរកការចាកចេញពីប្រទេសរុស្ស៊ី ដោយបង្ខំមនុស្សជាច្រើនឲ្យលក់ទ្រព្យសម្បត្តិរបស់ពួកគេ ដោយមានការបញ្ចុះតម្លៃយ៉ាងច្រើនថា៖«យើងត្រូវតែឆ្លើយតបដោយចិត្តសប្បុរស ដោយបង្ហាញពីសកម្មភាពរបស់ពួកគេ»។មានការរំពឹងទុករបស់ប្រព័ន្ធផ្សព្វផ្សាយកាន់តែច្រើនឡើងដែលថា ក្រុមហ៊ុនមួយចំនួន អាចពិចារណាពីការត្រឡប់មកវិញ ចំពេលដែលប្រធានាធិបតីអាមេរិកលោក ដូណាល់ ត្រាំ (Donald Trump) ខិតខំប្រឹងប្រែង ដើម្បីស្តារទំនាក់ទំនងឡើងវិញជាមួយប្រទេសរុស្ស៊ី និងសម្រេចបានសន្តិភាពយ៉ាងឆាប់រហ័ស នៅក្នុងអ៊ុយក្រែន។

កងកម្លាំងសន្តិសុខស៊ីរី ចាប់ខ្លួនសមាជិកក្រុមរដ្ឋឥស្លាម Daesh ជុំវិញការរៀបចំផែនវាយប្រហារទីក្រុងដាម៉ាស

កងកម្លាំងសន្តិសុខស៊ីរី បានចាប់ខ្លួនសមាជិកប្រដាប់អាវុធជាច្រើននាក់របស់ក្រុមរដ្ឋឥស្លាមដេស (Daesh) នៅជិតទីក្រុងដាម៉ាស កាលពីថ្ងៃចន្ទ ដោយចោទប្រកាន់ពីបទរៀបចំការវាយប្រហារប្រឆាំងនឹងប្រទេសនេះ។ក្រសួងមហាផ្ទៃ បាននិយាយថា ក្រុមនោះ បានកាន់អាវុធធុនស្រាល មធ្យម និងធុនធ្ងន់ និងឧបករណ៍បំផ្ទុះ និងអាវកាក់អត្តឃាត ដែលពួកគេគ្រោងនឹងប្រើ ដើម្បីបំផ្លាញសន្តិសុខ និងស្ថិរភាព។ប្រតិបត្តិការនេះ បានធ្វើឡើង បន្ទាប់ពីឧប្បត្តិហេតុស្រដៀងគ្នាមួយ ក្នុងខែនេះ នៅក្នុងទីក្រុងភាគខាងជើងនៃទីក្រុងអាឡិបប៉ូ ដែលមន្ត្រីកងកម្លាំងសន្តិសុខម្នាក់ និងសមាជិកក្រុម Daesh បីនាក់ ត្រូវបាន សម្លាប់។នៅពេលដែលគ្រប់គ្រងលើទឹកដីស៊ីរី និងអ៊ីរ៉ាក់ ក្រុម Daesh បានបរាជ័យ ក្នុងទឹកដីស៊ីរី ក្នុងឆ្នាំ ២០១៩ ភាគច្រើនដោយសារតែការខិតខំប្រឹងប្រែងរបស់កងកម្លាំងដឹកនាំដោយជនជាតិឃើដ គាំទ្រដោយក្រុមចម្រុះអន្តរជាតិ។ ប៉ុន្តែក្រុមនេះ បានបន្តធ្វើការវាយប្រហារជាពិសេសប្រឆាំងនឹងកងកម្លាំងដឹកនាំដោយ ឃើដ នៅភាគឦសានប្រទេសស៊ីរី។សេតវិមាន បាននិយាយថា ក្នុងអំឡុងពេលកិច្ចប្រជុំរបស់ខ្លួនជាមួយប្រធានាធិបតីស៊ីរីលោក Ahmad Al-Sharaa នៅទីក្រុង Riyadh ក្នុងខែនេះ ប្រធានាធិបតីអាមេរិកលោក ដូណាល់ ត្រាំ (Donald Trump) បានអំពាវនាវឲ្យ Al-Sharaa «ជួយសហរដ្ឋអាមេរិកទប់ស្កាត់ក្រុម Daesh កុំឲ្យកើតឡើងវិញ»។

បណ្ដាញសង្គម

ព័ត៌មានថ្មីៗ

ICRC ប្រគល់សារដំណឹងគ្រួសារវីរយុទ្ធជនទាំង១៨នាក់ជូន CRC

សូមចូលរួមគោរពច្បាប់ចរាចរណ៍! ៧ថ្ងៃមុនកាន់បិណ្ឌ គ្រោះថ្នាក់ចរាចរណ៍ ផ្តាច់ជីវិតពលរដ្ឋ ២៤ នាក់ និងរបួសជិត៦០នាក់

ក្របខណ្ឌគំនិតផ្តួចផ្តើមខ្សែក្រវាត់ និងផ្លូវរបស់ចិន នាំឱ្យកម្ពុជាឱ្យមានការអភិវឌ្ឍរីកចម្រើន

ប្រធានាធិបតី ហ្វីលីពីន និងលោកជំទាវអញ្ជើញនិវត្តន៍ទៅមាតុប្រទេសវិញ ក្រោយបញ្ចប់ទស្សនកិច្ចនៅកម្ពុជា

[UPDATE] លោក ថាក់ស៊ីន ថាលោកទទួលយកសេចក្ដីសម្រេចរបស់តុលាការថៃ ក្នុងការជាប់ពន្ធនាគារឡើងវិញ

នាយករដ្ឋមន្ត្រីអេស្ប៉ាញ ដាក់បម្រាមអាវុធលើអ៊ីស្រាអែលដើម្បី«បញ្ឈប់អំពើប្រល័យពូជសាសន៍នៅហ្កាហ្សា»

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877