BTV NEWS

ទឹកជំនន់នៅនីហ្សេរីយ៉ា បានសម្លាប់មនុស្សលើសពី ២៣០នាក់ ដោយជាង ១០០នាក់ នៅតែបាត់ខ្លួន

ពលរដ្ឋអាមេរិកជាង ២៥លាននាក់ ស្ថិតក្រោមការព្រមាន ខណៈអាកាសធាតុធ្ងន់ធ្ងរវាយប្រហារភាគឦសាន

[UPDATE] នាយករដ្ឋមន្ត្រីជប៉ុន Ishiba បានចេញមកប្រកាសថា លោកសម្រេចចិត្តចុះពីតំណែងហើយ

សហរដ្ឋអាមេរិក និង UN កំពុងពិភាក្សាផែនការកសាងតំបន់ហ្កាហ្សាឡើងវិញ នៅមុនមហាសន្និបាត

ព័ត៌មានអន្តរជាតិ

លោក Trump ពន្យាពេលកំណត់ការដំឡើងពន្ធរបស់អឺរ៉ុប រហូតដល់ថ្ងៃទី៩ ខែកក្កដា

ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃអាទិត្យ ទី២៥ ឧសភា ថា លោកនឹងផ្អាកការដំឡើងពន្ធ៥០ភាគរយលើសហភាពអឺរ៉ុបរហូតដល់ថ្ងៃទី ៩ ខែកក្កដា បន្ទាប់ពី ការសន្ទនាតាមទូរស័ព្ទដ៏ល្អប្រសើរ ជាមួយប្រធានសហភាពអឺរ៉ុប លោកស្រី Ursula von der Leyen ។ លោក Trump បានគំរាមកាលពីថ្ងៃសុក្រសប្តាហ៍កន្លងទៅនេះ អំពាវនាវឱ្យមានការដំឡើងពន្ធភ្លាមៗនៅថ្ងៃទី១ ខែមិថុនា។លោក Trump បានប្រាប់អ្នកសារព័ត៌មានមុនពេលឡើងយន្តហោះ Air Force One នៅទីក្រុង Morristown រដ្ឋ New Jersey ថា លោកស្រី Von der Leyen «ទើបតែបានទូរស័ព្ទមកខ្ញុំ ហើយលោកស្រី បានស្នើសុំពន្យារពេលកាលបរិច្ឆេទនៅថ្ងៃទី១ ខែមិថុនា ហើយលោកស្រី បាននិយាយថាលោកស្រីមានបំណងជំរុញការចរចាដ៏ហ្មត់ចត់»។លោកស្រី Von der Leyen បាននិយាយកាលពីពេលមុននៅលើបណ្តាញ X ថាលោកស្រី « មានការសន្ទនាល្អប្រសើរជាមួយលោកTrump ប៉ុន្តែ «ដើម្បីឈានដល់កិច្ចព្រមព្រៀងល្អ យើងនឹងត្រូវការពេលវេលារហូតដល់ថ្ងៃទី៩ ខែកក្កដា»។ ប្រធានគណៈកម្មការអឺរ៉ុប ដែលដឹកនាំគោលនយោបាយពាណិជ្ជកម្មសម្រាប់ប្លុកទាំង២៧ប្រទេស បាននិយាយថា «អឺរ៉ុប បានត្រៀមខ្លួនរួចជាស្រេចដើម្បីជំរុញកិច្ចចរចាឱ្យបានឆាប់រហ័ស និងយ៉ាងម៉ឺងម៉ាត់»។ទីក្រុងប្រ៊ុចសែល និងវ៉ាស៊ីនតោន បាននឹងកំពុងចរចាគ្នាក្នុងបំណងដើម្បីបញ្ចៀសសង្រ្គាមពាណិជ្ជកម្ម ហើយបានយល់ព្រមផ្អាកចំណាត់ការដំឡើងពន្ធលើភាគីទាំងពីររហូតដល់ខែកក្កដា។ ប៉ុន្តែការគំរាមកំហែងរបស់លោក Trump កាលពីថ្ងៃសុក្រ បានធ្វើឱ្យភាគហ៊ុនកើនឡើងយ៉ាងខ្លាំង។

ការព្រួយបារម្ភពីការដំឡើងពន្ធអាមេរិក និងវិបត្តិមីយ៉ាន់ម៉ាគ្របដណ្ដប់លើកិច្ចប្រជុំកំពូលអាស៊ាននៅម៉ាឡេស៊ី

ក្រុមមេដឹកនាំអាស៊ីអាគ្នេយ៍ កំពុងជួបប្រជុំនៅប្រទេសម៉ាឡេស៊ីនៅថ្ងៃចន្ទទី២៦ខែឧសភាដើមសប្ដាហ៍នេះ ដើម្បីស្វែងរកកិច្ចព្រមព្រៀងពាណិជ្ជកម្មជាមួយដៃគូថ្មី ខណៈការដំឡើងពន្ធរបស់សហរដ្ឋអាមេរិកគំរាមកំហែងដល់ការខូចខាតមិនធ្លាប់មានចំពោះសេដ្ឋកិច្ចដែលពឹងផ្អែកលើការនាំចេញរបស់ខ្លួន។កិច្ចប្រជុំកំពូលអាស៊ានរយៈពេលពីរថ្ងៃនៅទីក្រុងកូឡាឡាំពួរ (Kuala Lumpur) ក៏ត្រូវបានគេរំពឹងថានឹងបង្កើនសម្ពាធលើរបបយោធាមីយ៉ាន់ម៉ា និងការព្យាយាមដោះស្រាយបញ្ហាជាមួយនឹងការស្នើសុំរបស់ប្រទេសទីម័រខាងកើត ដើម្បីចូលរួមក្នុងប្លុកនេះផងដែរ។ ជំនួបកំពូលនេះបានកើតឡើង ទន្ទឹមនឹងកំណើនសេដ្ឋកិច្ចនៅទូទាំងតំបន់ បានទទួលរងផលប៉ះពាល់ពីការគំរាមដំឡើងពន្ធរបស់ប្រធានាធិបតីអាមេរិកលោក Donald Trump រហូតដល់៤៩ ភាគរយ ត្រូវបានកំណត់លើរដ្ឋជាសមាជិក លុះត្រាតែពួកគេអាចធ្វើកិច្ចព្រមព្រៀងមុនកាលកំណត់ខែកក្កដា។ ភាពចលាចលនៃការដំឡើងពន្ធជំរុញឱ្យសមាគមប្រជាជាតិអាស៊ីអាគ្នេយ៍ដែលមានសមាជិកចំនួន ១០ប្រទេសនេះ បន្តកិច្ចព្រមព្រៀងពាណិជ្ជកម្មជាមួយដៃគូមិនមែនសហរដ្ឋអាមេរិក និងបង្កើនកិច្ចសហប្រតិបត្តិការពាណិជ្ជកម្ម និងធុរកិច្ចក្នុងប្លុកនេះ។នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim )នៅថ្ងៃចន្ទដើមសប្ដាហ៍នេះ បានបង្ហាញក្ដីបារម្ភថា មូលដ្ឋានគ្រឹះនៃពាណិជ្ជកម្មសេរី កំពុងត្រូវបានរុះរើក្រោមកម្លាំងនៃសកម្មភាពទាមទារឲ្យមានភាពស្មើគ្នាឬបដិការ៕

ប្រទេសចិនភាគខាងត្បូងត្រៀមទប់ទល់ភ្លៀងធ្លាក់ខ្លាំងបំផុតក្នុងឆ្នាំ២០២៥ ក្រោយទឹកជំនន់សម្លាប់មនុស្ស៥នាក់

ក្រុមសង្កេតការណ៍ជាតិរបស់ប្រទេសចិនកាលពីថ្ងៃអាទិត្យ បានព្រមានថាតំបន់ភាគខាងត្បូងរបស់ប្រទេសនេះ នឹងជួបប្រទះភ្លៀងធ្លាក់ខ្លាំងបំផុតនៅឆ្នាំនេះចាប់ពីថ្ងៃទី២៧ ដល់ថ្ងៃទី ២៩ ខែឧសភា ជាមួយនឹងហានិភ័យនៃគ្រោះមហន្តរាយកាន់តែខ្លាំងស្របពេលមានការព្យាករណ៍ថា ទឹកភ្លៀងនឹងវិលត្រលប់ជាថ្មីទៅតំបន់ដែលរងផលប៉ះពាល់នាពេលថ្មីៗនេះ។មនុស្សយ៉ាងហោចណាស់៤នាក់បានស្លាប់ បន្ទាប់ពីភ្លៀងធ្លាក់យ៉ាងគំហុក បង្កឲ្យមានបំណាក់ដីក្នុងខេត្តកួយចូវ(Guizhou)ភាគនិរតីនៃប្រទេសចិន កាលពីថ្ងៃព្រហស្បតិ៍សប្ដាហ៍មុន។យោងតាមមជ្ឈមណ្ឌលឧតុនិយមជាតិ បានឲ្យដឹងថា ខេត្ត កួយចូវ(Guizhou) តំបន់ភាគខាងត្បូងនៃទន្លេយ៉ាងសេ(Yangtze) និងតំបន់ភាគខាងត្បូងប្រទេសចិន នឹងមើលឃើញភ្លៀងធ្លាក់ខ្លាំងរហូតដល់ព្យុះភ្លៀងក្នុងអំឡុងពេលនេះ ដោយទីតាំងមួយចំនួនរំពឹងថានឹងមានព្យុះភ្លៀងដ៏ធ្ងន់ធ្ងរ។ចាប់តាំងពីចូលខែឧសភាមក ភាគខាងត្បូងប្រទេសចិន បានជួបប្រទះភ្លៀងធ្លាក់ខ្លាំងជាញឹកញាប់ ដោយព្រឹត្តិការណ៍ទឹកភ្លៀងសំខាន់ៗចំនួនបីបានកើតឡើងចាប់តាំងពីថ្ងៃទី១៣ ខែឧសភា និងប៉ះពាល់ដល់តំបន់ភាគខាងត្បូងនៃទន្លេ យ៉ាងសេ(Yangtze) ក៏ដូចជាតំបន់ភាគខាងត្បូងប្រទេសចិន និង ខេត្ត កួយចូវ (Guizhou) ។ ក្រសួងធនធានទឹក និងរដ្ឋបាលឧតុនិយមចិន (CMA) បានចេញសេចក្តីជូនដំណឹងពណ៌ខៀវ សម្រាប់ទឹកជំនន់ដ៏គំហុក នៅវេលាម៉ោង ៦ ល្ងាចកាលពីថ្ងៃអាទិត្យ ដោយការព្យាករពីគ្រោះទឹកជំនន់ដែលអាចកើតឡើងនៅតំបន់ភាគខាងលិចខេត្ត យូណាន (Yunnan) ចាប់ពីម៉ោង ៨ យប់ ថ្ងៃអាទិត្យដល់ម៉ោង ៨ យប់ នៅថ្ងៃចន្ទដើមសប្ដាហ៍នេះ៕

បេក្ខជនប្រធានាធិបតីកូរ៉េខាងត្បូង លោក Lee សន្យាស្តារបណ្តាញទូរសព្ទបន្ទាន់ជាមួយកូរ៉េខាងជើង

បេក្ខជនប្រធានាធិបតីខាងក្រុមសេរីនិយមរបស់កូរ៉េខាងត្បូង លោក Lee Jae-myung បាននិយាយនៅក្នុងសារលើបណ្ដាញសង្គមហ្វេសប៊ុក នាថ្ងៃចន្ទ (២៦ ឧសភា) នេះថា លោកនឹងស្វះស្វែងរកការស្តារទំនាក់ទំនងឡើងវិញរវាងទីក្រុងសេអ៊ូល និងកូរ៉េខាងជើង រួមទាំងតាមរយៈបណ្តាញទូរសព្ទបន្ទាន់យោធា ប្រសិនបើលោកជាប់ឆ្នោត។ទាក់ទងនឹងកូរ៉េខាងជើង លោក Lee ក៏បានសន្យាថានាំយក "ឧបទ្វីបកូរ៉េប្រកបដោយសន្តិភាព ផ្អែកលើការកាត់បន្ថយភាពតានតឹង និងការរំសាយអាវុធនុយក្លេអ៊ែរ"។ យោងតាមសារបង្ហោះលើបណ្ដាញសង្គមនោះ គោលនយោបាយកូរ៉េខាងជើងរបស់លោក Lee នឹងផ្អែកលើ "កិច្ចសន្ទនាអន្តរកូរ៉េ ដែលមានអត្ថប្រយោជន៍ទៅមក និងការផ្លាស់ប្តូរដែលឆ្លើយតបនឹងសាធារណជន"។លោក Lee ដែលជាបេក្ខភាពនាំមុខគេក្នុងការស្ទង់មតិសម្រាប់ការបោះឆ្នោតថ្ងៃទី០៣ ខែមិថុនា ខាងមុខនេះ ក៏បាននិយាយផងដែរថាលោកនឹង "គ្រប់គ្រងដោយស្ថិរភាព" នូវទំនាក់ទំនងជាមួយប្រទេសចិន ដែលលោកនិយាយថាបានឈានដល់ "ស្ថានភាពអាក្រក់បំផុត" នៅក្រោមរដ្ឋបាលមុន។លើសពីនេះ លោកក៏បានប្តេជ្ញាថានឹងអភិវឌ្ឍទំនាក់ទំនងរវាងសហរដ្ឋអាមេរិក និងកូរ៉េខាងត្បូង ឱ្យក្លាយទៅជា "សម្ព័ន្ធភាពយុទ្ធសាស្ត្រគ្រប់ជ្រុងជ្រោយ" ហើយឆ្លើយតបជាគោលការណ៍ទៅនឹងប្រវត្តិសាស្ត្រកាលពីអតីតកាល និងបញ្ហាទឹកដីដែលទាក់ទងនឹងជប៉ុន ខណៈសន្យាពង្រឹងកិច្ចសហប្រតិបត្តិការរវាងកូរ៉េខាងត្បូង សហរដ្ឋអាមេរិក និងជប៉ុន៕

លោក Trump បង្ហើបថានឹងមានសេចក្តីប្រកាសមួយនៅ "ពីរថ្ងៃបន្ទាប់" ស្តីពីកិច្ចចរចានុយក្លេអ៊ែរអ៊ីរ៉ង់

លោកប្រធានាធិបតីអាមេរិក Donald Trump បាននិយាយកាលពីថ្ងៃអាទិត្យ (២៥ ឧសភា) ថា ក្រុមអ្នកចរចារបស់សហរដ្ឋអាមេរិក បានធ្វើការពិភាក្សា "យ៉ាងល្អ" ជាមួយគណៈប្រតិភូអ៊ីរ៉ង់ នៅចុងសប្តាហ៍ ដោយលើកពីវឌ្ឍនភាព និងបង្ហើបថា សេចក្ដីប្រកាសមួយអាចនឹងកើតមានឡើងនៅក្នុងពេល "ពីរថ្ងៃបន្ទាប់" ខណៈលោកស្វះស្វែងរកកិច្ចព្រមព្រៀងមួយដើម្បីទប់ស្កាត់ទីក្រុងតេអេរ៉ង់ មិនឱ្យអភិវឌ្ឍអាវុធនុយក្លេអ៊ែរ។លោក Trump បានប្រាប់អ្នកយកព័ត៌មាននៅឯអាកាសយានដ្ឋាន Morristown រដ្ឋ New Jersey នៅពេលត្រៀមត្រឡប់ទៅទីក្រុងវ៉ាស៊ីនតោនវិញថា "រូបលោកគិតថា សហរដ្ឋអាមេរិកអាចមានព័ត៌មានល្អខ្លះស្ដីពីបញ្ហានុយក្លេអ៊ែរអ៊ីរ៉ង់"។ លោក Trump បន្តថា លោកនឹងប្រកាសពីរឿងល្អ ឬអាក្រក់ក្នុងពេលពីរថ្ងៃខាងមុខនេះ ប៉ុន្តែលោកមានអារម្មណ៍ថា រឿងនោះនឹងជាដំណឹងល្អ។ លោក Trump បានសង្កត់ធ្ងន់ថា មានការរីកចម្រើនយ៉ាងម៉ឺងម៉ាត់ ប៉ុន្តែមិនបញ្ជាក់លម្អិតពីកិច្ចពិភាក្សាជុំទី៥ ក្នុងទីក្រុងរ៉ូម រវាងប្រេសិតពិសេសអាមេរិក លោក Steve Witkoff និងគណៈប្រតិភូអ៊ីរ៉ង់នោះទេ។គួរឱ្យដឹងថា សហរដ្ឋអាមេរិក និងអ៊ីរ៉ង់ កំពុងពិភាក្សាពីមធ្យោបាយទប់ស្កាត់កម្មវិធីនុយក្លេអ៊ែររបស់ទីក្រុងតេអេរ៉ង់ ជាថ្នូរនឹងការដកទណ្ឌកម្មសេដ្ឋកិច្ចមួយចំនួនដែលសហរដ្ឋអាមេរិក បានដាក់លើសាធារណរដ្ឋអ៊ិស្លាមមួយនេះ៕

លោក Zelensky៖ ភាពស្ងៀមស្ងាត់របស់អាមេរិក ជុំវិញការវាយប្រហាររបស់រុស្ស៊ីលើកទឹកចិត្តលោក Putin

លោកប្រធានាធិបតីអ៊ុយក្រែន Volodymyr Zelensky បានចោទប្រកាន់ថា ភាពស្ងៀមស្ងាត់របស់សហរដ្ឋអាមេរិក បន្ទាប់ពីការវាយប្រហាររបស់រុស្ស៊ីនាពេលថ្មីៗនេះ គឺជាការលើកទឹកចិត្តដល់ប្រធានាធិបតី Vladimir Putin បន្ទាប់ពីការវាយប្រហារតាមអាកាសដ៏ធំបំផុតរបស់ទីក្រុងមូស្គូ។ ការវាយប្រហារទាំងយប់នោះបានមើលឃើញរុស្ស៊ី បើកការវាយលុកដោយយានដ្រូន និងមីស៊ីល ចំនួន ៣៦៧ គ្រឿងនិងគ្រាប់ ដែលជាចំនួនខ្ពស់បំផុតក្នុងរយៈពេលតែមួយយប់ ចាប់តាំងពីលោក Putin បានចាប់ផ្តើមការលុកលុយទ្រង់ទ្រាយធំក្នុងឆ្នាំ ២០២២។ យ៉ាងហោចណាស់មនុស្ស ១៣ នាក់ រួមទាំងកុមារ ៣ នាក់បានស្លាប់ និងរាប់សិបនាក់ទៀតរងរបួស ក្នុងការវាយប្រហារយប់ទី២ជាប់គ្នានៅទូទាំងប្រទេសអ៊ុយក្រែនកាលពីថ្ងៃអាទិត្យ។ការវាយប្រហារទាំងនោះ បានកើតឡើងមួយថ្ងៃបន្ទាប់ពីការវាយលុកមួយក្នុងចំណោមការវាយលុកដ៏ធ្ងន់ធ្ងរបំផុតជាច្រើនលើរដ្ឋធានី Kyiv ក្នុងរយៈពេលជាច្រើនខែមកនេះ។លោកប្រធានាធិបតីសហរដ្ឋអាមេរិក Donald Trump បានបញ្ចេញប្រតិកម្មកាលពីល្ងាចថ្ងៃអាទិត្យដោយប្រាប់អ្នកសារព័ត៌មានថាលោកមិនសប្បាយចិត្តនឹងអ្វីដែលលោក Putin កំពុងធ្វើ និងកំពុងស្លាប់មនុស្សជាច្រើន។ នៅក្នុងសារមួយទៅកាន់លោក Trump ដែលធ្លាប់បានអះអាងថា លោក Putin ចាប់អារម្មណ៍ក្នុងការបញ្ចប់សង្រ្គាម លោក Zelensky បាននិយាយថា ពិភពលោកអាចនឹងមានពេលវេលាវិស្សមកាល ប៉ុន្តែសង្រ្គាមនៅតែបន្ត ទោះបីជាចុងសប្តាហ៍ និងថ្ងៃធ្វើការក៏ដោយ។លោកថាបញ្ហានេះមិនអាចព្រងើយកន្តើយបានទេ។ ភាពស្ងៀមស្ងាត់ និងការមិនខ្វាយខ្វល់របស់អាមេរិក និងភាពស្ងៀមស្ងាត់របស់ប្រទេសដទៃក្នុងពិភពលោក មានតែលើកទឹកចិត្តមេដឹកនាំរុស្ស៊ីតែប៉ុណ្ណោះ ៕

រដ្ឋបាលលោក Trump ដាក់ការរឹតត្បិតថ្មីទៅលើអ្នកសារព័ត៌មាននៅមន្ទីរបញ្ចកោណ

រដ្ឋមន្ត្រីការពារជាតិអាមេរិក លោក Pete Hegseth កាលពីថ្ងៃសុក្រសប្ដាហ៍មុន បានចេញបទបញ្ជារឹតត្បិតថ្មី ដែលតម្រូវឱ្យអ្នកកាសែតត្រូវតែមានមន្រ្តីអមដំណើរនាំផ្លូវ នៅក្នុងអគារមន្ទីរបញ្ចកោណភាគច្រើន ដែលជាការរឹតបន្តឹងចុងក្រោយបំផុតនៃសកម្មភាពដាក់កម្រិតរបស់រដ្ឋបាលលោកប្រធានាធិបតី Donald Trump ដែលធ្វឡើងលើបណ្ដាញសារព័ត៌មាន។វិធានការដែលចូលជាធរមានភ្លាមៗនោះ រារាំងអ្នកយកព័ត៌មានដែលមានការទទួលស្គាល់ មិនឱ្យចេញចូលដោយសេរីពីផ្នែកភាគច្រើនក្នុងទីស្នាក់ការកណ្តាលនៃក្រសួងការពារជាតិក្នុងទីក្រុង Arlington រដ្ឋ Virginia លុះត្រាតែពួកគេមានការយល់ព្រមជាផ្លូវការ និងមានអ្នកនាំផ្លូវអមជាមួយ។ លោក Hegseth បាននិយាយនៅក្នុងអនុស្សរណៈថា "ខណៈដែលក្រសួងនៅតែប្តេជ្ញាធ្វើឱ្យមានតម្លាភាព ក្រសួងការពារជាតិអាមេរិកក៏មានកាតព្វកិច្ចស្មើភាពគ្នាក្នុងការការពារឯកសារសម្ងាត់ និងព័ត៌មានរសើប ព្រមទាំងសន្តិសុខប្រតិបត្តិការជាតិ ដែលជារឿង "ចាំបាច់មិនអាចផ្លាស់ប្តូរបានសម្រាប់ក្រសួង"។សមាគមសារព័ត៌មានមន្ទីរបញ្ចកោណ ដែលជាអង្គការសមាជិកតំណាងឱ្យផលប្រយោជន៍នៃអង្គភាពសារព័ត៌មានគ្របដណ្តប់លើយោធាសហរដ្ឋអាមេរិក បាននិយាយថា ច្បាប់ដាក់ដែនកំណត់ថ្មីនេះហាក់ដូចជា "ការវាយប្រហារដោយផ្ទាល់ទៅលើសេរីភាពសារព័ត៌មាន"៕

UN៖ ស្បៀងអាហារបន្ថែមទៀតត្រូវការជាចាំបាច់នៅហ្កាហ្សា ខណៈការលួចជំនួយប៉ះពាល់ការចែកចាយ

ប្រមុខអង្គការសហប្រជាជាតិ ព្រមានថា មានតែជំនួយស្បៀងអាហារមួយក្ដាប់តូចប៉ុណ្ណោះ ដែលតំបន់ហ្កាហ្សា កំពុងទទួលបាន បន្ទាប់ពីការរារាំងរយៈពេល ១១សប្តាហ៍របស់អ៊ីស្រាអែល ខណៈមន្ត្រីក្រុមហាម៉ាស បាននិយាយកាលពីថ្ងៃសុក្រសប្ដាហ៍មុនថា ការវាយប្រហារតាមអាកាសរបស់អ៊ីស្រាអែល បានសម្លាប់ជនជាតិប៉ាឡេស្ទីនជាច្រើននាក់ ដែលយាមរថយន្តជំនួយប្រឆាំងនឹងអ្នកលួចប្លន់គ្រឿងផ្គត់ផ្គង់។យោធាអ៊ីស្រាអែលនិយាយថា រថយន្តដឹកទំនិញចំនួន ១០៧គ្រឿង ដែលដឹកម្សៅមី និងគ្រឿងឧបភោគបរិភោគផ្សេងទៀត ក៏ដូចជាការផ្គត់ផ្គង់វេជ្ជសាស្រ្ត បានចូលទៅកាន់តំបន់ហ្កាហ្សាស្ទ្រីប ពីចំណុចឆ្លងកាត់ Kerem Shalom កាលពីថ្ងៃព្រហស្បតិ៍សប្ដាហ៍មុន ក្នុងចំណោមចំនួនសរុប ៣០៥គ្រឿង ចាប់តាំងពីថ្ងៃចន្ទសប្ដាហ៍មុនមក នៅពេលការបិទផ្លូវត្រូវបានបន្ធូរបន្ថយ។ប៉ុន្តែការទទួលបានគ្រឿងផ្គត់ផ្គង់ដល់ប្រជាជន ដែលស្នាក់នៅក្នុងតង់ និងជម្រកបណ្តោះអាសន្នផ្សេងទៀត គឺមិនមានភាពទៀងទាត់នោះទេ ហើយមន្ត្រីអង្គការសហប្រជាជាតិនិយាយថា យ៉ាងហោចណាស់ត្រូវការរថយន្តជំនួយពី ៥០០ ទៅ ៦០០គ្រឿង ជារៀងរាល់ថ្ងៃ។ក្រុមជំនួយនិយាយថា រថយន្តដឹកទំនិញជាច្រើនត្រូវបានឃាត់ឃាំងនៅច្រកព្រំដែនមិនទាន់បានទៅដល់មនុស្សដែលត្រូវការនៅឡើយទេ។ អគ្គលេខាធិការអង្គការសហប្រជាជាតិ លោក Antonio Guterres បាននិយាយថា "ប្រសិនបើពុំមានការទទួលបានជំនួយរហ័សបន្ថែមទៀត គួរឱ្យទុកចិត្ត សុវត្ថិភាព និងនិរន្តរភាពទេ នោះមនុស្សកាន់តែច្រើននឹងស្លាប់ ហើយផលវិបាករយៈពេលវែងលើប្រជាជនទាំងមូលនឹងមានភាពជ្រាលជ្រៅ"។បណ្តាញឆ័ត្រតំណាងឱ្យក្រុមជំនួយប៉ាឡេស្ទីននិយាយថា ទោះបីជាមានការបន្ធូរបន្ថយការបិទផ្លូវក៏ដោយ ក៏ការចែកចាយជំនួយត្រូវបានរារាំងដោយការលួចប្លន់ពីក្រុមបុរស ដែលខ្លះប្រដាប់ដោយអាវុធនៅជិតទីក្រុង Khan Younis និងកន្លែងផ្សេងទៀត៕

ម៉ាឡេស៊ីចង់ឲ្យមីយ៉ាន់ម៉ា បន្តបទឈប់បាញ់ ខណៈអាស៊ានហាមប្រាមមេដឹកនាំរដ្ឋប្រហារមិនឲ្យចូលរួម

ម៉ាឡេស៊ីបានជំរុញឱ្យមានការពន្យារពេល និងពង្រីកបទឈប់បាញ់ ក្រោយការរញ្ជួយដីនៅក្នុងសហភាពមីយ៉ាន់ម៉ា ដែលនឹងត្រូវផុតកំណត់នៅដំណាច់ខែឧសភា ខណៈការប្រយុទ្ធគ្នាដែលកំពុងបន្តចោទសួរអំពីប្រសិទ្ធភាពរបស់បទឈប់បាញ់នោះ។ រដ្ឋមន្ត្រីការបរទេសម៉ាឡេស៊ី លោក Mohamad Hasan បានចេញសេចក្តីអំពាវនាវនេះ នៅក្នុងកិច្ចប្រជុំជាមួយរដ្ឋមន្ត្រីការបរទេសអាស៊ាន នៅទីក្រុង Kuala Lumpur កាលពីថ្ងៃអាទិត្យ មួយថ្ងៃមុនកិច្ចប្រជុំកំពូលរបស់មេដឹកនាំ។រហូតមកដល់ពេលនេះ ប្លុកក្នុងតំបន់ បានដឹកនាំកិច្ចខិតខំប្រឹងប្រែងការទូតដែលគ្មានផ្លែផ្កាក្នុងការបញ្ចប់ជម្លោះរបស់មីយ៉ាន់ម៉ា ចាប់តាំងពីយោធាបានធ្វើរដ្ឋប្រហារ និងទម្លាក់មេដឹកនាំស៊ីវិលលោកស្រី Aung San Suu Kyi កាលពីខែកុម្ភៈ ឆ្នាំ ២០២១។ ការខកខានរបស់មីយ៉ាន់ម៉ាក្នុងការអនុវត្តកិច្ចព្រមព្រៀងសន្តិភាព៥ចំណុច ដែលបានឈានដល់ក្នុងខែមេសា ឆ្នាំ២០២១ បាននាំឱ្យអាស៊ានដកមេដឹកនាំរដ្ឋប្រហារ មិនឱ្យចូលរួមកិច្ចប្រជុំប្រចាំឆ្នាំរបស់ខ្លួន។លោក Mohamad បាននិយាយនៅក្នុងសុន្ទរកថាបើករបស់លោកថា ប្លុកនេះអំពាវនាវឱ្យភាគីពាក់ព័ន្ធក្នុងសហភាពមីយ៉ាន់ម៉ា បញ្ឈប់អរិភាព និងពង្រីក និងបន្តបទឈប់បាញ់ ដើម្បីជួយសម្រួលដល់ផ្លូវដ៏វែងឆ្ងាយ និងលំបាកឆ្ពោះទៅរកការស្តារឡើងវិញ និងបន្ធូរបន្ថយការឈឺចាប់របស់ប្រជាជនមីយ៉ាន់ម៉ា។ លោកបានស្នើឲ្យបទឈប់បាញ់ ត្រូវបានបន្តនិងពង្រីកលើសពីតំបន់ដែលរងគ្រោះនាពេលបច្ចុប្បន្ននេះ៕

មេដឹកនាំអាស៊ីអាគ្នេយ៍ ស្វះស្វែងរកវឌ្ឍនភាពលើសន្តិភាពមីយ៉ាន់ម៉ា និងយុទ្ធសាស្ត្រពាណិជ្ជកម្ម

បណ្ដាប្រមុខដឹកនាំអាស៊ីអាគ្នេយ៍ នឹងព្យាយាមម្តងទៀតនៅក្នុងជំនួបនាថ្ងៃចន្ទ (២៦ ឧសភា) នេះ ដើម្បីនាំរដ្ឋាភិបាលយោធាមីយ៉ាន់ម៉ា មកចូលរួមពិភាក្សាដើម្បីបញ្ចប់សង្គ្រាមស៊ីវិលដ៏អូសបន្លាយ ហើយក៏នឹងស្វះស្វែងរកមធ្យោបាយដើម្បីទប់ទល់ភាពមិនច្បាស់លាស់នៃពាណិជ្ជកម្មសកល ពីការគំរាមកំហែងពន្ធរបស់លោកប្រធានាធិបតីអាមេរិក Donald Trump។បន្ទាប់ពីកិច្ចប្រជុំថ្នាក់រដ្ឋមន្ត្រីកាលពីចុងសប្តាហ៍ មេដឹកនាំរដ្ឋាភិបាលនៃសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន (ASEAN) ត្រូវបានរំពឹងថានឹងបន្តពិភាក្សាពីសំណើស្តីពីសន្តិភាពមីយ៉ាន់ម៉ា នៅក្នុងកិច្ចប្រជុំកំពូលនៅថ្ងៃចន្ទនេះ និងថ្ងៃអង្គារស្អែក នៅទីក្រុងគូឡាឡាំពួ ប្រទេសម៉ាឡេស៊ី។ម៉ាឡេស៊ី ដែលជាប្រធានអាស៊ាននៅឆ្នាំនេះ និយាយថា ខ្លួននឹងបន្តពិភាក្សាដាច់ដោយឡែកទៅកាន់របបសឹក និងក្រុមប្រឆាំងប្រដាប់អាវុធរបស់មីយ៉ាន់ម៉ា ដើម្បីព្យាយាមជំរុញការចរចាដោយផ្ទាល់រវាងភាគីជម្លោះ។ រដ្ឋមន្ត្រីការបរទេសម៉ាឡេស៊ី លោក Mohamad Hasan បាននិយាយថា ក្រុមរដ្ឋមន្ត្រីការបរទេសរបស់ប្លុកដែលមានសមាជិក១០ប្រទេស បានយល់ព្រមពិភាក្សាលើសំណើសម្រាប់ប្រសិតអចិន្ត្រៃយ៍អាស៊ាន ប្រចាំមីយ៉ាន់ម៉ា។ជាមួយគ្នានេះប្រមុខដឹកនាំអាស៊ាន ត្រូវបានរំពឹងថានឹងជួបជាមួយនាយករដ្ឋមន្ត្រីចិន លោក Li Qiang នៅថ្ងៃអង្គារស្អែកនេះ រួមជាមួយនឹងសមភាគីមកពីបណ្តាប្រទេសមជ្ឈិមបូព៌ា។ កិច្ចពិភាក្សានេះកើតឡើងស្របពេលមានការប្រែប្រួលទីផ្សារសកល និងការធ្លាក់ចុះនៃកំណើនសេដ្ឋកិច្ច ដែលបង្កឡើងដោយការគំរាមកំហែងរបស់លោក Trump លើពន្ធពាណិជ្ជកម្មរបស់សហរដ្ឋអាមេរិក៕

បណ្ដាញសង្គម

ព័ត៌មានថ្មីៗ

សម្តេច ម៉ែន សំអន ប្រារព្ធកិច្ចបួងសួងសុំសេចក្តីសុខ សេចក្តីចម្រើនជូនប្រទេសជាតិ នៅប្រាសាទនាគព័ន្ធ

សម្តេចធិបតី៖ សុខុមាលភាពកងទ័ពទាំង១៨នាក់ ដែលថៃចាប់ទៅគឺជាបញ្ហានៃសេចក្តីថ្លៃថ្នូររបស់ជាតិ

រដ្ឋបាលខណ្ឌ៧មករា បានរៀបចំពិធីសូត្រមន្តកាន់បិណ្ឌទី១ នៅវត្តព្រះពុទ្ធមានបុណ្យ

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អញ្ជើញក្នុងពិធីសូត្រមន្ត កាន់បិណ្ឌវេនទី១ នៅវត្តបទុមវតី

ថ្នាក់ដឹកនាំ និងមន្ត្រីជំនាញ ក្រសួងមុខងារសាធារណៈបង្ហាញស្មារតីទទួលខុសត្រូវខ្ពស់ និងត្រៀមលក្ខណៈរួចរាល់ធ្វើប្រតិបត្តិការជំរឿនមន្ត្រីជាក់ស្តែងសម្រេចលទ្ធផលជូនរាជរដ្ឋាភិបាល

ប្រធានក្រុមការងារចុះជួយឃុំទួលសាលា អំពាវនាវពលរដ្ឋជឿជាក់លើរាជរដ្ឋាភិបាល ស្វែងរកសន្តិភាពជូនប្រទេសជាតិ ជុំវិញជម្លោះព្រំដែន

សម្ដេចធិបតី អបអរលោក Anutin ក្លាយជានាយករដ្ឋមន្ត្រីថៃថ្មី ខណៈកម្ពុជារងចាំធ្វើការជាមួយគ្នាស្ដារទំនាក់ទំនង និងសន្តិភាពប្រទេសទាំងពីរឡើងវិញ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877