BTV NEWS

អធិការបតីអាល្លឺម៉ង់ សារភាពថា អឺរ៉ុបមិនអាចដើរតួនាទីជាសកល ដែលខ្លួនចង់បាននោះទេ

លោក Kim Jong Un៖ កូរ៉េខាងជើងគាំទ្រការតស៊ូរបស់រុស្ស៊ី ដើម្បីការពារអធិបតេយ្យភាពរបស់ខ្លួន

ប្លុកអារ៉ាប់ និយាយថា ពុំមានសន្តិភាពកើតឡើង ដោយគ្មានទីបញ្ចប់សកម្មភាព «អរិភាព»របស់ អ៊ីស្រាអែលនោះទេ

សហភាពអឺរ៉ុប និងអាមេរិក នឹងពិភាក្សាអំពីទណ្ឌកម្មថ្មីលើរុស្ស៊ី នៅថ្ងៃទី 0៨ ខែកញ្ញា

ព័ត៌មានអន្តរជាតិ

លោកTrump និយាយថាលោកមិនស្វែងរកកិច្ចព្រមព្រៀងជាមួយសហភាពអឺរ៉ុបទេ បន្ទាប់ពីគំរាមដំឡើងពន្ធ៥០%

លោកប្រធានាធិបតី Donald Trump កាលពីថ្ងៃសុក្រសប្ដាហ៍នេះ បានគំរាមដំឡើងពន្ធ៥០% លើទំនិញនាំចូលពីសហភាពអឺរ៉ុប ដោយលើកឡើងពីកង្វះវឌ្ឍនភាពក្នុងការចរចាពាណិជ្ជកម្មបច្ចុប្បន្ន។លោកបានប្រកាសនៅលើបណ្ដាញសង្គម Truth Social កាលពីព្រឹកថ្ងៃសុក្រសប្ដាហ៍នេះថា របាំងពាណិជ្ជកម្មដ៏មានឥទ្ធិពលរបស់ពួកគេ ពន្ធបន្ថែមឬពន្ធកាត់ទុក(Vat) ការពិន័យសាជីវកម្មគួរឱ្យអស់សំណើច របាំងពាណិជ្ជកម្មមិនមែនរូបិយវត្ថុ ឧបាយកលរូបិយវត្ថុ បណ្តឹងអយុត្តិធម៌ និងមិនស្មើរភាពប្រឆាំងនឹងក្រុមហ៊ុនអាមេរិក និងបញ្ហាជាច្រើនទៀត បាននាំឱ្យមានឱនភាពពាណិជ្ជកម្មជាមួយសហរដ្ឋអាមេរិកដែលមានចំនួនច្រើនជាង ២៥០.០០០.០០០ ដុល្លារអាមេរិក ក្នុងមួយឆ្នាំ ដែលចំនួនសរុបមិនអាចទទួលយកបាន ។ លោក Trump បានសរសេរ ការពិភាក្សារបស់យើងជាមួយពួកគេ នឹងមិនមានវឌ្ឍនភាពទេ។ ហេតុដូច្នេះហើយ លោកណែនាំឱ្យដំឡើងពន្ធ ៥០% ដោយផ្ទាល់លើសហភាពអឺរ៉ុប ដោយចាប់ផ្តើមពីថ្ងៃទី ១ ខែមិថុនា ឆ្នាំ ២០២៥តទៅ។ ប៉ុន្តែក្រោយមកនៅថ្ងៃសុក្រ តាមក្រឹត្យដែលចុះហត្ថលេខានៅការិយាល័យ Oval លោក Trump បានបង្កើនសាររបស់លោកទៅកាន់សហភាពអឺរ៉ុប ។លោកបាននិយាយថាលោកមិនស្វែងរកកិច្ចព្រមព្រៀងទេ។ លោកបានកំណត់កិច្ចព្រមព្រៀងនេះរួចហើយ គឺការដំឡើងពន្ធមានចំនួន៥០% ៕

[UPDATE] អូស្ត្រាលី ចាប់ផ្តើមសម្អាត បន្ទាប់ពីទឹកជំនន់សម្លាប់មនុស្ស៥នាក់ និងបំផ្លិចបំផ្លាញទ្រព្យសម្បត្តិ

នាយករដ្ឋមន្ត្រីអូស្ត្រាលី លោក Anthony Albanese បាននិយាយនៅថ្ងៃសៅរ៍ ២៤ ឧសភាសប្ដាហ៍នេះថា ការសម្អាតបានចាប់ផ្តើមនៅភាគអាគ្នេយ៍របស់ប្រទេសនេះ បន្ទាប់ពីទឹកជំនន់បានសម្លាប់មនុស្ស ៥ នាក់ និងជន់លិចបំផ្លិចបំផ្លាញលំនៅឋានប្រជាពលរដ្ឋជាង ១០.០០០ ខ្នង។ លោក Albanese បាននិយាយនៅលើប្រព័ន្ធផ្សព្វផ្សាយសង្គម X ថា ក្រុមអាជ្ញាធរ កំពុងបន្តធ្វើការយ៉ាងអស់ពីចិត្តនៅទូទាំងរដ្ឋាភិបាលសហព័ន្ធ រដ្ឋ និងក្នុងតំបន់ ដើម្បីធ្វើឱ្យប្រាកដថា ប្រជាជនអូស្ត្រាលីទទួលបានការគាំទ្រដែលពួកគេត្រូវការនៅពេលនេះ និងតាមរយៈការស្តារឡើងវិញ។ ទីភ្នាក់ងារសេវាសង្គ្រោះបន្ទាន់របស់រដ្ឋបាននិយាយថា ការវាយតម្លៃការខូចខាតកំពុងដំណើរការនៅក្នុងតំបន់ឆ្នេរភាគកណ្តាលភាគពាយ័ព្យនៃរដ្ឋ New South Wales ដែលរងគ្រោះខ្លាំងជាងគេ បន្ទាប់ពីទឹកជំនន់នៅសប្តាហ៍នេះ បានកាត់ផ្តាច់ទីក្រុងនានា ហូរកួចសត្វ និងបំផ្លាញផ្ទះសម្បែង។ ភ្នាក់ងារនេះ បានប៉ាន់ប្រមាណថា យ៉ាងហោចណាស់លំនៅឋាន១០.០០០ខ្នង អាចត្រូវបានខូចខាត។ទីភ្នាក់ងារនេះបាននិយាយថា ស្ថានភាពបានប្រសើរឡើងចាប់តាំងពីថ្ងៃសុក្រនៅក្នុងតំបន់រងផលប៉ះពាល់នៃរដ្ឋដែលមានប្រជាជនច្រើនបំផុតមួយនេះ របស់ប្រទេសអូស្ត្រាលី។ ស្នងការសេវាសង្គ្រោះបន្ទាន់របស់រដ្ឋនេះ លោក Mike Wassing បាននិយាយនៅក្នុងសន្និសីទសារព័ត៌មានមួយក្នុងទីក្រុងស៊ីដនីថា ទោះបីជាដូច្នេះក៏ដោយ អ្នកស្រុករាប់រយនាក់ដែលរងគ្រោះដោយទឹកជំនន់នៅតែស្ថិតក្នុងមជ្ឈមណ្ឌលជម្លៀសនៅឡើយ ខណៈការជួយសង្គ្រោះពីទឹកជំនន់ចំនួន ៥២លើក ត្រូវបានធ្វើឡើងពេញមួយយប់៕

មន្ទីរពេទ្យនៅហ្កាហ្សា មានអ្នករបួសច្រើនលើសលប់ ខណៈអ៊ីស្រាអែលបង្កើនការវាយលុកនៅភាគខាងជើង

ក្រុមវេជ្ជបណ្ឌិតនៅមន្ទីរពេទ្យ Nasser និងមន្ទីរពេទ្យ Al Shifa តំបន់ហ្កាហ្សា បានត្អូញត្អែរ ពីភាពចង្អៀតណែន និងកង្វះការផ្គត់ផ្គង់សម្រាប់ព្យាបាលអ្នកជំងឺ ខណៈកងទ័ពអ៊ីស្រាអែលបង្កើនការវាយលុករបស់ខ្លួននៅភាគខាងជើង តំបន់ហ្កាហ្សា។អង្គការសុខភាពពិភពលោក (WHO) បាននិយាយថា ប្រព័ន្ធសុខាភិបាលនៅតំបន់ហ្កាហ្សា ស្ថិតក្នុងចំណុចបំបែក ខណៈប្រតិបត្តិការរបស់យោធាអ៊ីស្រាអែលនៅតែបន្តកាន់តែខ្លាំងឡើង ក្នុងពេលមានការជម្លៀសប្រជាជនទ្រង់ទ្រាយធំ និងកង្វះសម្ភារៈចាំបាច់ជាមូលដ្ឋាន។មន្ទីរពេទ្យធំៗចំនួនបួននៅតំបន់ហ្កាហ្សាត្រូវផ្អាកសេវាវេជ្ជសាស្រ្តកាលពីសប្តាហ៍មុន ហើយបេសកកម្មរបស់អង្គការសុខភាពពិភពលោកដែលប៉ុនប៉ងទៅដល់មន្ទីរពេទ្យ Al-Awda និងមន្ទីរពេទ្យឥណ្ឌូនេស៊ី ត្រូវបានរារាំង។អង្គការសុខភាពពិភពលោកនិយាយថា មានតែមន្ទីរពេទ្យចំនួន១៩កន្លែងប៉ុណ្ណោះក្នុងចំណោមមន្ទីរពេទ្យចំនួន៣៦កន្លែង ក្នុងតំបន់ហ្កាហ្សាស្ទ្រីប នៅតែដំណើរការ ខណៈយ៉ាងហោចណាស់៩៤% នៃមន្ទីរពេទ្យទាំងអស់ត្រូវបានខូចខាត ឬត្រូវបានបំផ្លាញ។

វ៉េណេស៊ុយអេឡា បង្ខំឱ្យបិទព្រំដែនជាមួយកូឡុំប៊ី ជាបណ្តោះអាសន្ន នៅមុនការបោះឆ្នោត

ប្រទេសវេណេស៊ុយអេឡា បានបិទព្រំដែនរបស់ខ្លួនជាបណ្តោះអាសន្នជាមួយប្រទេសជិតខាង រួមមានទាំងប្រទេសកូឡុំប៊ី ជាផ្នែកមួយនៃវិធានការសន្តិសុខ នៅមុនពេលការបោះឆ្នោតថ្នាក់តំបន់ និងសភាដែលគ្រោងធ្វើនៅថ្ងៃអាទិត្យ ទី២៥ ខែឧសភា ស្អែកនេះ។ការបិទព្រំដែន ដែលត្រូវបានបញ្ជាតាមរយៈដំណោះស្រាយរួមពីក្រសួងការពារជាតិប្រទេសវេណេស៊ុយអេឡា និងក្រសួងទំនាក់ទំនងមហាផ្ទៃ យុត្តិធម៌ និងសន្តិភាព បានចាប់ផ្តើមនៅម៉ោង ១២:០១នាទី យប់ឈានចូលថ្ងៃសុក្រ ទី២៣ ឧសភា ម៉ោងក្នុងតំបន់ ហើយនឹងបន្តចូលជាធរមានរហូតដល់ម៉ោង ១១:៥០នាទីយប់ថ្ងៃច័ន្ទ ទី២៦ ឧសភា។កាលពីថ្ងៃសុក្រ អ្នកធ្វើដំណើររាប់សិបនាក់ត្រូវបានគេមើលឃើញ កំពុងរង់ចាំដោយមានវ៉ាលីឥវ៉ាន់នៅលើស្ពានព្រំដែនប្រទេសកូឡុំប៊ី-វ៉េណេស៊ុយអេឡា ក្នុងទីក្រុង Cucuta ដោយអ្នកមួយចំនួនពុំបានដឹងពីពេលវេលានៃការបិទព្រំដែននោះទេ។ការបិទព្រំដែន គឺជាផ្នែកមួយនៃពិធីការបទដ្ឋានរបស់ប្រទេសវេណេស៊ុយអេឡា ក្នុងអំឡុងពេលដំណើរការបោះឆ្នោត។ ច្រកឆ្លងកាត់ព្រំដែន ត្រូវបានគេរំពឹងថានឹងបើកឡើងវិញនៅពាក់កណ្តាលអធ្រាត្រនៅថ្ងៃអង្គារ បន្ទាប់ពីការបញ្ចប់ការរាប់សន្លឹកឆ្នោត។

ប្រជាជនលីប៊ី ប្រមូលផ្តុំគ្នានៅក្រុងទ្រីប៉ូលី ទាមទារការបោះឆ្នោត និងបណ្តេញនាយករដ្ឋមន្ត្រីចេញ

ហ្វូងបាតុករ បានមកប្រមូលផ្តុំគ្នាកាលពីថ្ងៃសុក្រ (២៣ ឧសភា) នៅទីលានមួយកន្លែងក្នុងទីក្រុងទ្រីប៉ូលី ដោយអំពាវនាវឱ្យមានការបណ្តេញចេញនាយករដ្ឋមន្ត្រីប្រទេសលីប៊ី លោក Abdulhamid Dbeibah ដែលត្រូវបានទទួលស្គាល់ជាអន្តរជាតិ។អ្នកតវ៉ា លោក Abdelraouf Zahloul បាននិយាយថា យើងមិនចង់បានរយៈពេលអន្តរកាលបន្តបន្ទាប់គ្នាទេ។ យើងធុញទ្រាន់នឹងរយៈពេលអន្តរកាល យើងចង់ទៅបោះឆ្នោត យើងចង់បានរដ្ឋស៊ីវិល យើងចង់បានដូចប្រទេសដទៃទៀតដែរ។លោក Dbeibah ដែលបានដឹកនាំរដ្ឋាភិបាលរួបរួមជាតិរបស់ប្រទេសដែលខ្វែងគំនិតគ្នា បានឡើងកាន់តតំណែងតាមរយៈដំណើរការគាំទ្រដោយអង្គការសហប្រជាជាតិនៅឆ្នាំ២០២១។ ការបោះឆ្នោតតាមផែនការបានបរាជ័យក្នុងការដំណើរការនៅឆ្នាំនោះ ដោយសារតែការមិនចុះសម្រុងគ្នាក្នុងចំណោមក្រុមជាគូប្រជែង ហើយលោកនៅតែកាន់អំណាច។ប្រទេសលីប៊ី មានស្ថិរភាពតិចតួចប៉ុណ្ណោះ ចាប់តាំងពីការបះបោរគាំទ្រដោយសម្ព័ន្ធយោធាណាតូនៅឆ្នាំ ២០១១ ដែលបានទម្លាក់មេដឹកនាំផ្តាច់ការ លោក Muammar Gaddafi។ ប្រទេសនេះ ត្រូវបានបំបែកនៅក្នុងឆ្នាំ២០១៤ រវាងក្រុមគូប្រជែងភាគខាងកើត និងភាគខាងលិច ទោះបីជាមានការផ្ទុះសង្រ្គាមដ៏ធំមួយ ត្រូវបានផ្អាកទៅផ្អាកទៅវិញ តាមរយៈបទឈប់បាញ់នៅឆ្នាំ២០២០ ក៏ដោយ។

ចៅក្រមអាមេរិក រារាំងលោកTrump ពីការលុបចោលការចុះឈ្មោះនិស្សិតបរទេសនៅសាកលវិទ្យាល័យ Harvard

តុលាការតំបន់សហរដ្ឋអាមេរិក បានរារាំងបណ្តោះអាសន្ននូវបំណងរបស់រដ្ឋបាល លោក Trump ក្នុងការរារាំងនិស្សិតអន្តរជាតិមិនឱ្យចូលរៀននៅសកលវិទ្យាល័យ Harvard ។ តុលាការបានចេញសេចក្តីបង្គាប់កាលពីថ្ងៃសុក្រ ដោយនិយាយថា សាកលវិទ្យាល័យ Harvard នឹង «រងគ្រោះភ្លាមៗ និងមិនអាចត្រៀមលក្ខណៈបាន» មុនពេលសវនាការពីគ្រប់ភាគីទាំងអស់។សាកលវិទ្យាល័យ បានដាក់ពាក្យប្តឹងរដ្ឋបាល លោក Trump បន្ទាប់ពីក្រសួងសន្តិសុខមាតុភូមិ បានប្រកាសកាលពីថ្ងៃព្រហស្បតិ៍ថាខ្លួននឹងរារាំងនិស្សិតអន្តរជាតិមិនឲ្យចុះឈ្មោះ។ ក្រសួងនេះ បានចោទប្រកាន់សាកលវិទ្យាល័យ Harvard ថាបានជំរុញឱ្យមានអំពើហិង្សា និងការប្រឆាំងជ្វីហ្វនិយមនៅក្នុងបរិវេណសាកលវិទ្យាល័យ។ សាកលវិទ្យាល័យ បានចាត់ទុកចំណាត់ការនេះថា«មិនស្របច្បាប់» ហើយបានដាក់ពាក្យសុំសេចក្តីបង្គាត់ហាមឃាត់បណ្តោះអាសន្ន។ ប្រធានសាកលវិទ្យាល័យ Harvard លោក Alan Garber បាននិយាយនៅក្នុងសេចក្តីថ្លែងការណ៍កាលពីថ្ងៃសុក្រថា រដ្ឋបាល លោក Trump កំពុងប្រឆាំងនឹងសាកលវិទ្យាល័យ Harvard ព្រោះតែមិនព្រមបោះបង់ចោលការសិក្សាតាមលក្ខណៈឯករាជ្យរបស់ខ្លួន។លោកបាននិយាយបន្ថែមថា សាកលវិទ្យាល័យ នឹងធ្វើអ្វីគ្រប់យ៉ាងតាមអំណាចរបស់ខ្លួនដើម្បីគាំទ្រនិស្សិត និងអ្នកសិក្សា។ សាកលវិទ្យាល័យ Harvard បានដាក់ពាក្យប្តឹងកាលពីខែមេសា ដើម្បីបញ្ឈប់រដ្ឋបាលរបស់លោក Trump ពីការបង្កកជំនួយរបស់សហព័ន្ធដោយផ្នែក។

ប្រមុខUN៖ អ៊ីស្រាអែល អនុញ្ញាតឲ្យដឹកជញ្ជូនជំនួយក្នុងចំនួន «តិចតួចបំផុត» សម្រាប់តំបន់ហ្កាហ្សា

ប្រមុខអង្គការសហប្រជាជាតិ លោក Antonio Guterres កាលពីថ្ងៃសុក្រ ទី២៣ ឧសភា បាននិយាយថា អ៊ីស្រាអែលបានអនុញ្ញាតលំហូរជំនួយក្នុងចំនួនតិចតួចបំផុតសម្រាប់តំបន់ហ្កាហ្សា ខណៈត្រូវការជំនួយយ៉ាងច្រើន ហើយជាថ្មីម្តងទៀតអង្គការសហប្រជាជាតិបានផ្តល់សញ្ញាថា នឹងមិនចូលរួមក្នុងផែនការចែកចាយជំនួយថ្មីដែលគាំទ្រដោយសហរដ្ឋអាមេរិក នោះទេ។លោក Guterres បានប្រាប់អ្នកសារព័ត៌មានថា «ប្រសិនបើគ្មានការទទួលបានជំនួយរហ័ស គួរឱ្យទុកចិត្ត សុវត្ថិភាព និងនិរន្តរភាពនោះទេ មនុស្សកាន់តែច្រើននឹងស្លាប់ ហើយផលវិបាករយៈពេលវែងលើប្រជាជនទាំងមូលនឹងកាន់តែជ្រៅ»។អ៊ីស្រាអែលនិយាយថា រថយន្តដឹកជំនួយប្រហែល៣០០គ្រឿងបានចូលក្នុងតំបន់ហ្កាហ្សាតាមច្រកឆ្លងកាត់ Kerem Shalom ចាប់តាំងពីខ្លួនបានដកចេញការបិទផ្លូវរយៈពេល១១សប្តាហ៍នៅហ្កាហ្សាកាលពីថ្ងៃចន្ទ ប៉ុន្តែ លោក Guterres បាននិយាយថា រហូតមកដល់ពេលនេះមានតែប្រហែលមួយភាគបីនៃរថយន្តដឹកជំនួយទាំងនោះ ត្រូវបានដឹកជញ្ជូនពីច្រកឆ្លងកាត់ទៅកាន់ឃ្លាំងស្តុកជំនួយ នៅក្នុងតំបន់ហ្កាហ្សាដោយសារតែអសន្តិសុខ។អ៊ីស្រាអែល បានអនុញ្ញាតឱ្យការដឹកជញ្ជូនជំនួយដោយអង្គការសហប្រជាជាតិ និងក្រុមជំនួយផ្សេងទៀតបន្តក្នុងរយៈពេលខ្លី រហូតដល់គំរូចែកចាយជំនួយថ្មីគាំទ្រដោយសហរដ្ឋអាមេរិកដំណើរការដោយមូលនិធិមនុស្សធម៌តំបន់ហ្កាហ្សាដែលទើបបង្កើតថ្មី នឹងដំណើរការនៅចុងខែនេះ។ អង្គការសហប្រជាជាតិ និយាយថា ផែនការនេះលំអៀង ឬមិនអព្យាក្រឹតទេ ហើយខ្លួននឹងមិនពាក់ព័ន្ធឡើយ។អ៊ីស្រាអែលបាននិយាយថា ការបិទផ្លូវរបស់ខ្លួនគឺមានគោលបំណងមួយផ្នែកដើម្បីបញ្ឈប់ក្រុមសកម្មប្រយុទ្ធហាម៉ាសប៉ាឡេស្ទីន ពីការបង្វែរនិងរឹបអូសយកជំនួយ។ ប៉ុន្តែក្រុមហាម៉ាសបានបដិសេធការលួចជំនួយ។

រដ្ឋមន្ត្រីការបរទេសអ៊ីរ៉ង់៖ ជុំទីប្រាំនៃកិច្ចចរចានុយក្លេអ៊ែរជាមួយអាមេរិកគឺ «ប្រកបដោយវិជ្ជាជីវៈបំផុត»

ក្រុមអ្នកចរចារបស់អ៊ីរ៉ង់ និងសហរដ្ឋអាមេរិក បានបញ្ចប់ការចរចាជុំទីប្រាំ កាលពីថ្ងៃសុក្រ ទី២៣ ឧសភា ដោយអ្នកសម្របសម្រួលប្រទេសអូម៉ង់បាននិយាយថាមានវឌ្ឍនភាពតិចតួចក្នុងការចរចាដែលមានគោលបំណងដោះស្រាយជម្លោះយូរអង្វែងជុំវិញមហិច្ឆតានុយក្លេអ៊ែររបស់ទីក្រុងតេអេរ៉ង់។ប្រភពស្និទ្ធទៅនឹងក្រុមប្រទេសអ៊ីរ៉ង់បានប្រាប់សារព័តត៌មានរ៉យទ័រថា ភាគីទាំងពីរនឹងជួបគ្នាម្តងទៀត។ ពុំមានការអត្ថាធិប្បាយភ្លាមៗពីគណៈប្រតិភូអាមេរិកក្នុងកិច្ចប្រជុំ កាលពីថ្ងៃសុក្រក្នុងទីក្រុងរ៉ូម នោះទេ។រដ្ឋមន្ត្រីការបរទេសអ៊ីរ៉ង់ លោក Abbas Araqchi បាននិយាយថា មានសក្ដានុពលសម្រាប់វឌ្ឍនភាពក្នុងការចរចា បន្ទាប់ពីប្រទេសអូម៉ង់ បានធ្វើសំណើជាច្រើន ប៉ុន្តែកិច្ចពិភាក្សាមានភាពស្មុគស្មាញ ហើយត្រូវការការពិភាក្សាបន្ថែមទៀត។ លោក Araqchi បានប្រាប់ទូរទស្សន៍រដ្ឋអ៊ីរ៉ង់ថា «យើងទើបតែបានបញ្ចប់ជុំមួយនៃការចរចាប្រកបដោយវិជ្ជាជីវៈបំផុត»។លោកប្រធានាធិបតី Donald Trump មានបំណងកាត់បន្ថយសក្តានុពលរបស់ទីក្រុងតេអេរ៉ង់ក្នុងការផលិតអាវុធនុយក្លេអ៊ែរ ដែលអាចបង្កឱ្យមានការប្រជែងអាវុធនុយក្លេអ៊ែរក្នុងតំបន់ ហើយប្រហែលជាគំរាមកំហែងដល់អ៊ីស្រាអែល។ សម្រាប់ផ្នែករបស់ខ្លួន សាធារណរដ្ឋឥស្លាមមួយនេះ មានបំណងចង់ឲ្យលុបបំបាត់ទណ្ឌកម្មដ៏មហន្តរាយលើសេដ្ឋកិច្ចដែលផ្អែកលើប្រេងរបស់ខ្លួន។

រុស្ស៊ី និងអ៊ុយក្រែន ដោះលែងឈ្លើយសឹករាប់រយនាក់ ក្នុងការដោះដូរទ្រង់ទ្រាយធំបំផុតក្នុងសង្រ្គាម

ប្រទេសរុស្ស៊ី និងអ៊ុយក្រែន បានដោះលែងអ្នកទោសចំនួន៣៩០នាក់ម្ខាងៗកាលពីថ្ងៃសុក្រ ជាផ្នែកមួយនៃអ្វីដែលត្រូវបានគេរំពឹងថាជាការដោះដូរឈ្លើយសឹកទ្រង់ទ្រាយធំបំផុតនៃសង្រ្គាមរយៈពេល៣ឆ្នាំមកនេះ។ កិច្ចព្រមព្រៀងដោះដូរឈ្លើយសឹក១.០០០នាក់ពីភាគីម្ខាងៗគឺជាជំហានជាក់ស្តែងតែមួយគត់ឆ្ពោះទៅរកសន្តិភាពដែលលេចឡើងកាលពីសប្តាហ៍មុនពីការចរចានៅទីក្រុងអ៊ីស្តង់ប៊ុល ប្រទេសទួរគី។ភាគីទាំងពីរបាននិយាយថា ពួកគេបានដោះលែងទាហាន ២៧០នាក់ និងជនស៊ីវិល ១២០នាក់ ដោយជាច្រើននាក់បន្ថែមទៀតនឹងធ្វើឡើងនៅថ្ងៃសៅរ៍ និងថ្ងៃអាទិត្យ។ នៅឯកិច្ចចរចាក្នុងទីក្រុងអ៊ីស្តង់ប៊ុល ភាគីទាំងពីរបានបរាជ័យក្នុងការឈានដល់កិច្ចព្រមព្រៀងបទឈប់បាញ់ដែលបានស្នើឡើងដោយប្រធានាធិបតីសហរដ្ឋអាមេរិក លោក Donald Trump ។ជុំវិញការដោះដូរឈ្លើយសឹកនេះ លោក Trump បានសរសេរនៅលើ បណ្តាញ Truth Social ថា «សូម អបអរដល់ភាគីទាំងពីរចំពោះការចរចានេះ។ នេះអាចនាំទៅរកអ្វីដែលកាន់តែធំជាងនេះ។ទាហានរាប់សែននាក់ត្រូវបានគេជឿថាបានរងរបួស ឬស្លាប់ នៅក្នុងសង្រ្គាមដ៏បង្ហូរឈាមបំផុតរបស់អឺរ៉ុបចាប់តាំងពីសង្គ្រាមលោកលើកទីពីរ។ ជនស៊ីវិលអ៊ុយក្រែនរាប់ម៉ឺននាក់ក៏បានស្លាប់ ខណៈកងកម្លាំងរុស្ស៊ីបានទម្លាក់គ្រាប់បែកលើទីក្រុងនានារបស់អ៊ុយក្រែន។ អ៊ុយក្រែននិយាយថាខ្លួនត្រៀមសម្រាប់បទឈប់បាញ់រយៈពេល៣០ថ្ងៃភ្លាមៗ។រុស្ស៊ីដែលបានចាប់ផ្តើមសង្រ្គាមដោយការឈ្លានពានលើប្រទេសជិតខាងខ្លួននៅឆ្នាំ២០២២ ហើយបច្ចុប្បន្ននេះកាន់កាប់ប្រហែលមួយភាគប្រាំនៅអ៊ុយក្រែន និយាយថា ខ្លួននឹងមិនផ្អាកការវាយលុកទេ រហូតដល់លក្ខខណ្ឌនានាត្រូវបានបំពេញជាមុនសិន។

លោក Trump គំរាមដំឡើងពន្ធថ្មីលើសហភាពអឺរ៉ុប ក្រុមហ៊ុនApple រហូតដល់ក្រុមហ៊ុន Samsung

ប្រធានាធិបតីសហរដ្ឋអាមេរិក លោក Donald Trump បានគំរាមបង្កើនសង្គ្រាមពាណិជ្ជកម្មរបស់លោកម្តងទៀត ដោយជំរុញការដំឡើងពន្ធ៥០%លើទំនិញរបស់សហភាពអឺរ៉ុបចាប់ពីថ្ងៃទី១ ខែមិថុនា និងព្រមានដល់ក្រុហ៊ុន Apple ថាលោកអាចនឹងដំឡើងពន្ធ២៥% លើទូរស័ព្ទ iPhone ទាំងអស់ដែលបានទិញដោយអ្នកប្រើប្រាស់អាមេរិក។ ការវាយប្រហារពាណិជ្ជកម្មថ្មីរបស់លោក Trump លើសហភាពអឺរ៉ុបត្រូវបានជំរុញដោយជំនឿរបស់សេតវិមានដែលថាការចរចាជាមួយប្លុកនេះពុំមានវឌ្ឍនភាពលឿនគ្រប់គ្រាន់។ ប៉ុន្តែការគំរាមរបស់លោក ក៏បានបង្ហាញពីការវិលត្រឡប់ទៅរកសង្រ្គាមពាណិជ្ជកម្មបញ្ឈប់និងចាប់ផ្តើមរបស់ទីក្រុងវ៉ាស៊ីនតោន ដែលបានធ្វើឲ្យរង្គោះរង្គើទីផ្សារ អាជីវកម្ម និងអ្នកប្រើប្រាស់ និងបង្កើនការព្រួយបារម្ភពីការធ្លាក់ចុះសេដ្ឋកិច្ចពិភពលោក។ ទន្ទឹមនឹងនេះ ការវាយប្រហាររបស់លោកប្រធានាធិបតីទៅលើ ក្រុមហ៊ុនApple គឺជាការប៉ុនប៉ងចុងក្រោយរបស់លោកក្នុងការដាក់សម្ពាធលើក្រុមហ៊ុនដ៏ជាក់លាក់មួយឱ្យផ្លាស់ផ្តូរទីតាំងផលិតទៅកាន់សហរដ្ឋអាមេរិក។ ទោះជាយ៉ាងណា សហរដ្ឋអាមេរិកមិនផលិតស្មាតហ្វូនច្រើននោះទេ ទោះបីជាអ្នកប្រើប្រាស់អាមេរិកទិញទូរស័ព្ទច្រើនជាង៦០លានគ្រឿងក្នុងមួយឆ្នាំក៏ដោយ ហើយការផ្លាស់ប្តូរផលិតកម្មទំនងជានឹងបង្កើនតម្លៃ iPhones រាប់រយដុល្លារបន្ថែមទៀត។លោក Trump បានប្រាប់អ្នកសារព័ត៌មាននៅខាងក្នុងការិយាល័យ Oval Office ថាការដំឡើងពន្ធដែលបានស្នើឡើងរបស់លោកលើ ក្រុមហ៊ុន Apple ក៏នឹងអនុវត្តចំពោះក្រុមហ៊ុន Samsung និងក្រុមហ៊ុនផ្សេងទៀដែលផលិតផលិតផលនោះជាក់ស្តែងសំដៅទៅលើស្មាតហ្វូន។លោក Trump បានរំលឹកឡើងវិញនូវការត្អូញត្អែររបស់លោកដែលសហភាពអឺរ៉ុបបានប្រព្រឹត្តចំពោះសហរដ្ឋអាមេរិកយ៉ាងចាស់ដៃ និងបានដាក់ការរិតត្បិតលើសហរដ្ឋអាមេរិកមិនឱ្យលក់រថយន្តចូលទៅក្នុងសហភាពអឺរ៉ុប។ លោកនិយាយថា «ខ្ញុំគ្រាន់តែនិយាយថា ដល់ពេលហើយដែលយើងលេងហ្គេមតាមរបៀបដែលខ្ញុំដឹងពីរបៀបលេង»។

បណ្ដាញសង្គម

ព័ត៌មានថ្មីៗ

កងកម្លាំងនគរបាលខេត្តកោះកុងបានរៀបចំដេីម្បីការពារ សន្តិសុខ សុវត្ថិភាព និងសណ្ដាប់ធ្នាប់ ក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) នៅខេត្តកោះកុង

ទីប្រឹក្សា៖ អ៊ីស្រាអែលគ្រោងនឹងឆ្លើយតបទៅនឹងការប៉ុនប៉ងរបស់ក្រុមហ៊ួទី ក្នុងការប្រើប្រាស់អាវុធគីមី

កងទ័ពជួយសង្គ្រោះជនរងគ្រោះដោយទឹកជំនន់ នៅរដ្ឋ Punjab ខណៈទឹកទន្លេហូរលើសពីសញ្ញាគ្រោះថ្នាក់ នៅប្រទេសឥណ្ឌា

លោក Trump៖ សហរដ្ឋអាមេរិក មិនមានផែនការផ្តួលរំលំរដ្ឋាភិបាលវ៉េណេហ្ស៊ុយអេឡាទេ

នាយករដ្ឋមន្ត្រីឥណ្ឌាកោតសរសើរការវាយតម្លៃជាវិជ្ជមានរបស់លោក Trump ចំពោះទំនាក់ទំនងរវាងប្រទេសទាំងពីរ

ឯកឧត្តម វង សូត អញ្ជើញទស្សនកិច្ចសិក្សាឈ្វេងយល់អាកាសយានដ្ឋានអន្តរជាតិតេជោ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877