BTV NEWS

BREAKING NEWS ៖ លោក ថាក់ស៊ីន ទៅពិនិត្យសុខភាព នៅសិង្ហបុរី ខណៈសន្យាវិលក្នុងរយៈពេល ២ថ្ងៃ

ក្រុមអ្នកជួយសង្គ្រោះ៖ ការលិចស្រឡាង នៅនីហ្សេរីយ៉ា បណ្ដាលឲ្យមនុស្សយ៉ាងតិច ៣២នាក់ស្លាប់

មន្ត្រីសន្តិសុខអ៊ីរ៉ង់ និងអង់គ្លេស ពិភាក្សាគ្នា អំពីអនាគតនៃកិច្ចចរចានុយក្លេអ៊ែរ និងការដាក់ទណ្ឌកម្ម

លោក Xi Jinping៖ មនុស្សជាតិ ត្រូវជ្រើសរើសម្តងទៀតរវាងសន្តិភាព និងសង្រ្គាម

ព័ត៌មានអន្តរជាតិ

រដ្ឋមន្រ្តីសុខាភិបាលប៉ាឡេស្ទីនរាយការណ៍ករណីស្លាប់មនុស្ស ២៩នាក់ពាក់ព័ន្ធនឹងភាពអត់ឃ្លាន

រដ្ឋមន្រ្តីសុខាភិបាលប៉ាឡេស្ទីនលោក Majed Abu Ramadan និយាយនៅថ្ងៃព្រហស្បតិ៍នេះថា កុមារ និងមនុស្សចាស់ ២៩នាក់ បានស្លាប់ដោយសារភាពអត់ឃ្លាន ក្នុងរយៈពេលប៉ុន្មានថ្ងៃកន្លងមកនេះ នៅតំបន់ហ្កាហ្សា ។លោក Majed និយាយប្រាប់ក្រុមអ្នកសារព័ត៌មានថា ក្នុងរយៈពេល ២ថ្ងៃចុងក្រោយនេះ ពួកយើងបាត់បង់អាយុជីវិតកុមារ ទារក និងមនុស្សចាស់ចំនួន ២៩នាក់ ហើយពួកគេបានស្លាប់ដោយសារភាពអត់ឃ្លាន ។អ៊ីស្រាអែលបានបិទការចូលឱសថ ស្បៀងអាហារ និងការផ្គត់ផ្គង់ប្រេងចូលទៅកាន់តំបន់ហ្កាហ្សា ចាប់តាំងពីដើមខែមីនារហូតមក ជំរុញឲ្យក្រុមអ្នកជំនាញអន្តរជាតិ ព្រមានពីការជិតកើតមានគ្រោះទុរ្ភិក្សនៅក្នុងដែនដីមួយនេះ ដែលមានជនប៉ាឡេស្ទីន ២,៣លាននាក់ មុនសង្រ្គាមផ្ទុះឡើង ។យោងតាមតួលេខយោធាអ៊ីស្រាអែល បានឲ្យដឹងថា រថយន្តដឹកជំនួយតិចជាង ១០០គ្រឿង បានធ្វើដំណើរចូលទៅក្នុងតំបន់ហ្កាហ្សា ចាប់តាំងពីថ្ងៃចន្ទរហូតមក ពេលដែលរដ្ឋាភិបាលរបស់លោកនាយករដ្ឋមន្រ្តី Benjamin Netanyahu យល់ព្រមដកចេញការបិទច្រកដែលធ្វើឲ្យពលរដ្ឋហ្កាហ្សាពិបាករស់រាន ។ជាមួយនឹងការវាយប្រហារតាមច្រកអាកាស និងការផ្លោងគ្រាប់កាំភ្លើងធំរបស់រថក្រោះនៅតែបន្តមានគោលដៅលើដែនដីបិទច្រកមួយនេះ សម្លាប់មនុស្សរាប់សិបនាក់កាលពីថ្ងៃពុធ ហាងដុតនំក្នុងស្រុក និងប្រតិបត្តិករដឹកជញ្ជូន និយាយថា ពួកគេនៅមិនទាន់ឃើញមានការផ្គត់ផ្គង់ម៉្សៅ និងគ្រឿងចាំបាច់ផ្សេងទៀតនោះទេ ។ បន្ថែមពីលើកង្វះខាតជំនួយ ការប្រយុទ្ធគ្នាកាន់តែខ្លាំងក្លាឡើងនៅតំបន់ហ្កាហ្សា ។ កាលពីសប្តាហ៍មុន យោធាអ៊ីស្រាអែល បានប្រកាសចាប់ផ្តើមយុទ្ធនាការសឹកថ្មីលើក្រុមហាម៉ាស ហើយក្រុមគ្រូពេទ្យបឋមនៅដែនដីមួយនេះនិយាយថា ការវាយប្រហាររបស់អ៊ីស្រាអែល បានសម្លាប់មនុស្សជាង ៥០០នាក់ ក្នុងរយៈពេល ៨ថ្ងៃកន្លងមកនេះ ៕

ឆ្មាំបដិវត្តន៍អ៊ីរ៉ង់ ព្រមានថា អ៊ីស្រាអែលនឹងជួបការឆ្លើយតបធ្ងន់ធ្ងរ បើសម្រេចបើកការវាយប្រហារ

ឆ្មាំបដិវត្តន៍របស់ទីក្រុងតេអេរ៉ង់ នៅថ្ងៃព្រហស្បតិ៍ (ទី២២ ខែឧសភា) នេះ បានប្រាប់ថា អ៊ីស្រាអែលនឹងទទួលបាន «ការឆ្លើយតបយ៉ាងធ្ងន់ធ្ងរ និងខ្លាំងក្លា» ប្រសិនបើប្រទេសនេះសម្រេចវាយប្រហារអ៊ីរ៉ង់ ដោយការព្រមាននេះកើតមានឡើងប៉ុន្មានថ្ងៃបន្ទាប់ពីប្រព័ន្ធផ្សព្វផ្សាយ CNN បានរាយការណ៍ពីព័ត៌មានចារកម្មរបស់សហរដ្ឋអាមេរិក ដែលបង្ហាញថា អ៊ីស្រាអែលកំពុងរៀបចំវាយប្រហារទីតាំងនុយក្លេអ៊ែររបស់អ៊ីរ៉ង់។យោងតាមប្រព័ន្ធផ្សព្វផ្សាយរដ្ឋ បានឲ្យដឹងថា អ្នកនាំពាក្យរបស់ឆ្មាំបដិវត្តន៍ លោក Alimohammad Naini បាននិយាយថា៖ «ពួកគេកំពុងព្យាយាមបំភ័យយើងជាមួយនឹងការបង្កសង្រ្គាម ប៉ុន្តែពួកគេកំពុងបង្កើតកំហុសឆ្គង ដោយសារពួកគេមិនបានដឹងច្បាស់នោះលើយ អំពីការគាំទ្រដ៏មានឥទ្ធិពលពីប្រជាជន និងយោធា ដែលសាធារណរដ្ឋឥស្លាម អាចប្រមូលផ្តុំនៅក្នុងករណីមានសង្រ្គាម»។គួរដឹងថា ទីក្រុងតេអេរ៉ង់ និងក្រុងវ៉ាស៊ីនតោន នឹងធ្វើកិច្ចចរចានុយក្លេអ៊ែរជុំទី៥ នៅថ្ងៃសុក្រ ក្នុងទីក្រុងរ៉ូម ប្រទេសអ៊ីតាលី ស្របពេលមានការខ្វែងគំនិតគ្នាយ៉ាងខ្លាំងក្លា ជុំវិញការចម្រាញ់សារធាតុអ៊ុយរ៉ាញ៉ូម នៅអ៊ីរ៉ង់ ដែលសហរដ្ឋអាមេរិក លើកឡើងថា ជាផ្លូវដែលអាចឆ្ពោះទៅរកការផលិតគ្រាប់បែកនុយក្លេអ៊ែរ។ អ៊ីរ៉ង់បដិសេធមិនមានបំណងបែបនេះឡើយ។យ៉ាងណាក្ដី ដោយដកស្រង់សម្តីមន្ត្រីចារកម្ម ប្រព័ន្ធផ្សព្វផ្សាយ CNN បានបន្ថែមថា គេមិនទាន់ច្បាស់នៅឡើយទេថា តើមេដឹកនាំអ៊ីស្រាអែល បានធ្វើការសម្រេចចិត្តចុងក្រោយហើយ ឬនៅ ជុំវិញវិធានការយោធា ហើយមានការខ្វែងគំនិតគ្នានៅក្នុងរង្វង់រដ្ឋាភិបាលអាមេរិក អំពីថា តើអ៊ីស្រាអែល ចុងក្រោយនឹងសម្រេចវាយប្រហារ ឬយ៉ាងណានោះ៕

នាយសេនាធិការអាល្លឺម៉ង់ថ្មី អំពាវនាវឲ្យមានទណ្ឌកម្មកាន់តែតឹងរ៉ឹងលើរុស្ស៊ី

លោក Thorsten Frei នាយសេនាធិការនៃអធិការបតីថ្មីរបស់ប្រទេសអាល្លឺម៉ង់ បានប្រាប់សារព័ត៌មាន Reuters ថា អឺរ៉ុបចាំបាច់ត្រូវងើបចេញពីតំបន់សុខស្រួលរបស់ខ្លួន ហើយពិចារណាដល់ការដាក់ទណ្ឌកម្មកាន់តែតឹងរ៉ឹងបន្ថែមទៀតលើរុស្ស៊ី ដូចជាបម្រាមលើឧស្ម័ន ឬសារធាតុអ៊ុយរ៉ាញ៉ូមជាដើម ឬទាញយកប្រយោជន៍ពីទ្រព្យសម្បត្តិរដ្ឋរបស់រុស្ស៊ីដែលត្រូវបានបង្កក។គួរបញ្ជាក់ថា សហភាពអឺរ៉ុប (EU) និងអង់គ្លេស បានប្រកាសដាក់ទណ្ឌកម្មថ្មីរុស្ស៊ី កាលពីថ្ងៃអង្គារ (ទី២០ ខែឧសភា) ជុំវិញការលុកលុយរបស់ប្រទេសនេះលើអ៊ុយក្រែន ដោយផ្ដោតជាពិសេសលើ «កងនាវាស្រមោល» នៃនាវាដឹកប្រេង និងក្រុមហ៊ុនហិរញ្ញវត្ថុ ដែលបានជួយឲ្យទីក្រុងមូស្គូគេចផុតពីផលប៉ះពាល់នៃទណ្ឌកម្មផ្សេងទៀត។អំឡុងបទសម្ភាសមួយ នៅឯការិយាល័យថ្មីរបស់លោក ក្នុងការិយាល័យអធិការបតី លោក Frei បាននិយាយថា ជុំបន្ទាប់នៃទណ្ឌកម្មរបស់សហភាពអឺរ៉ុប ដែលបច្ចុប្បន្នកំពុងត្រូវបានរៀបចំឡើង ត្រូវតែរឹងមាំ ក្នុងនោះរួមមានទាំងវិធានការមួយចំនួនដែលអាចប៉ះពាល់ដល់រដ្ឋសហភាពអឺរ៉ុបផ្សេងទៀតផងដែរ។អ្នកនយោបាយអភិរក្សនិយមរូបនេះ បានលើកឡើងថា៖ «យើងត្រូវតែចាកចេញពីតំបន់សុខស្រួលរបស់យើង ហើយចាប់ផ្ដើមវិធានការថ្មី ដែលពិតណាស់ត្រូវទៅឲ្យហួសពីស្ថានភាពបច្ចុប្បន្ននេះ»។នៅពេលត្រូវបានសួរថា តើការលើកឡើងនោះមានន័យដល់ការហាមឃាត់ការនាំចូលរបស់អឺរ៉ុប ពាក់ព័ន្ធនឹងឧស្ម័ន ឬសារធាតុអ៊ុយរ៉ាញ៉ូម និងការប្រើប្រាស់ទ្រព្យសម្បត្តិរដ្ឋរបស់រុស្ស៊ីដែលត្រូវបានបង្កកមែនទេ លោក Frei បានឆ្លើយតបថា៖ «ទាំងនេះ ពិតណាស់គឺជាប្រភេទនៃវិធានការទាំងឡាយ ដែលច្បាស់ណាស់នឹងធ្វើឲ្យប៉ះពាល់ដល់រុស្ស៊ី ហើយនោះគឺជាអ្វីដែលយើងចង់សម្រេចបាន ដោយសារការដាក់ទណ្ឌកម្ម»៕

តុលាការបញ្ជាឲ្យអតីតនាយករដ្ឋមន្រ្តីថៃលោកស្រី Yingluck សងការខូចខាត ៣០៥លានដុល្លារ ជុំវិញគម្រោងស្រូវ-អង្ករ

នៅថ្ងៃព្រហស្បតិ៍នេះ តុលាការថៃបានបញ្ជាអតីតនាយករដ្ឋមន្រ្តីនិរទេសខ្លួនឯងលោកស្រី Yingluck Shinawatra សងការខូចខាតចំនួន ១០ពាន់លានបាត(ស្មើនឹង ៣០៥លានដុល្លារ) ជុំវិញគម្រោងសន្យាទិញស្រូវ-អង្ករដ៏ខ្ជីខ្ជាយ ដែលមើលឃើញលោកស្រីត្រូវបានកាត់ទោសកាលពីឆ្នាំ ២០១៧ ឲ្យជាប់ពន្ធនាគាររយៈពេល ៥ឆ្នាំ សម្រាប់ការធ្វេសប្រហែស ។លោកស្រី Yingluck ដែលស្ថិតនៅក្នុងចំណោមសមាជិក ៤រូបរបស់គ្រួសារមហាសេដ្ឋី Shinawatra បានក្លាយជានាយករដ្ឋមន្រ្តីថៃនោះ កំពុងរស់នៅបរទេស ដើម្បីចៀសវាងការជាប់ពន្ធនាគារ សម្រាប់ការខកខានការការពារអំពើពុករលួយនៅក្នុងគម្រោងស្រូវ-អង្ករ ដែលបានចំណាយឲ្យកសិកររហូតដល់ ៥០ភាគរយលើសតម្លៃទីផ្សារ ហើយនិងបានធ្វើឲ្យបាត់បង់ថវិការដ្ឋយ៉ាងច្រើន ។កម្មវិធីដែលជាគោលនយោបាយដ៏សំខាន់របស់គណបក្ស Pheu Thai របស់លោកស្រី បានធ្វើរដ្ឋខាតបង់ថវិការាប់ពាន់លានដុល្លារ និងនាំឲ្យស្រូវ-អង្កររាប់លានតោនលក់មិនចេញ ។ ថៃគឺជាប្រទេសនាំចេញស្រូវ-អង្ករធំបំផុតលំដាប់ទី ២របស់ពិភពលោក ។សេចក្តីសម្រេចនៅថ្ងៃព្រហស្បតិ៍នេះ ពាក់ព័ន្ធនឹងបណ្តឹងឧទ្ធរណ៍របស់លោក Yingluckជំទាស់ បទបញ្ជាលើកមុនឲ្យបង់ថ្លៃខូចខាត ៣៥ពាន់លានបាត(ស្មើនឹង ១,០៧ពាន់លានដុល្លារ)ដល់ក្រសួងហិរញ្ញវត្ថុថៃ ។សូមបញ្ជាក់ថា លោកស្រី Yingluck វ័យ៥៧ឆ្នាំ បានឡើងកាន់អំណាចកាលពីឆ្នាំ ២០១១ ក្រោយឈ្នះការបោះឆ្នោតភ្លូកទឹកភ្លូកដី ហើយនិងបានលាលែងពីតំណែងរយៈពេលប៉ុន្មានថ្ងៃប៉ុណ្ណោះ មុនពេលរដ្ឋាភិបាលរបស់លោកស្រី ត្រូវបានទម្លាក់ពីអំណាចដោយរដ្ឋប្រហារឆ្នាំ ២០១៤ ។លោកស្រីត្រូវជាម្តាយមីងបង្កើតរបស់នាយករដ្ឋមន្រ្តីថៃបច្ចុប្បន្នគឺលោកស្រី Paetongtarn Shinawatraនិងជាប្អូនស្រីពៅបង្កើតរបស់អតីតនាយករដ្ឋមន្រ្តីថៃលោក Thaksin Shinawatra ៕

អ៊ីស្រាអែលចោទអឺរ៉ុបថា «ញុះញង់ឲ្យមានការប្រឆាំងជនជាតិជ្វីហ្វ» ក្រោយមានការបាញ់ប្រហារ នៅទីក្រុងវ៉ាស៊ីនតោន

រដ្ឋមន្ត្រីការបរទេសអ៊ីស្រាអែល លោក Gideon Saar នៅថ្ងៃព្រហស្បតិ៍ (ទី២២ ខែឧសភា) បានចោទប្រកាន់មន្ត្រីអឺរ៉ុបមួយចំនួនដែលមិនត្រូវបានបញ្ចេញឈ្មោះថា បាន «ញុះញង់ឲ្យមានទង្វើប្រឆាំងជនជាតិជ្វីហ្វ» ដោយលោកបានស្តីបន្ទោសថា ការនិយាយអុចអាលបែបនេះបង្កជាបរិយាកាសអរិភាព រហូតនាំឲ្យមានការបាញ់សម្លាប់បុគ្គលិកស្ថានទូតអ៊ីស្រាអែល ២នាក់ នៅទីក្រុងវ៉ាស៊ីនតោន សហរដ្ឋអាមេរិក។អ៊ីស្រាអែលបានប្រឈមនឹងការរិះគន់យ៉ាងខ្លាំងក្លាពីបណ្ដាប្រទេស នៅអឺរ៉ុប ខណៈដែលខ្លួនបានបង្កើនយុទ្ធនាការយោធា នៅតំបន់ហ្កាហ្សា ជាកន្លែងដែលក្រុមមនុស្សធម៌ បានព្រមានថា ការបិទផ្លូវរបស់អ៊ីស្រាអែលរយៈពេល ១១សប្តាហ៍មិនឲ្យមានការផ្គត់ផ្គង់ជំនួយ បានធ្វើឲ្យដែនដីប៉ាឡេស្ទីនកៀកនឹងការមានគ្រោះទុរ្ភិក្ស។លោក Saar មិនបានបញ្ចេញឈ្មោះប្រទេស ឬមន្ត្រីណាឡើយ ប៉ុន្តែបាននិយាយថា បរិយាកាសអរិភាព ចំពោះអ៊ីស្រាអែល គឺនៅពីក្រោយការបាញ់ប្រហារលើបុគ្គលិកស្ថានទូតឈ្មោះ Yaron Lischinsky និង Sarah Lynn Milgrim នៅខាងក្រៅសារមន្ទីរជនជាតិជ្វីហ្វ ក្នុងទីក្រុងវ៉ាស៊ីនតោន កាលពីថ្ងៃពុធ (ទី២១ ខែឧសភា)។លោកបានប្រាប់សន្និសីទសារព័ត៌មាននៅទីក្រុងហ្សេរុយសាឡិមថា៖ «មានការពាក់ព័ន្ធដោយផ្ទាល់ដែលភ្ជាប់ការញុះញង់ប្រឆាំងនឹងជនជាតិជ្វីហ្វ និងប្រឆាំងអ៊ីស្រាអែល ទៅនឹងអំពើឃាតកម្មនេះ»។ លោកបានបញ្ជាក់ថា៖ «ការញុះញង់នេះក៏ធ្វើឡើងផងដែរ ដោយមេដឹកនាំ និងមន្ត្រីនៃប្រទេស និងអង្គការជាច្រើន ជាពិសេសមកពីអឺរ៉ុប»។យ៉ាងណាក្ដី លោក Saar បានបដិសេធមិនបញ្ជាក់ថា តើមេដឹកនាំ ឬមន្ត្រីរូបណាដែលលោកនិយាយសំដៅនោះ។ ប៉ុន្តែការកត់សម្គាល់របស់លោក បានកើតឡើងបន្ទាប់ពីមានពាក្យសម្ដីកាន់តែធ្ងនធ្ងរខ្លាំងឡើងៗពីសម្ព័ន្ធមិត្តលោកខាងលិចរបស់អ៊ីស្រាអែល ក្នុងនោះរួមទាំងបារាំង និងអង់គ្លេសផងដែរ ដែលបានចូលរួមជាមួយកាណាដា ក្នុងសប្តាហ៍នេះ ព្រមានអំពី «វិធានការខ្លាំងក្លា» ដែលអាចមាន ប្រឆាំងនឹងអ៊ីស្រាអែល ជុំវិញសង្រ្គាមរបស់ខ្លួន នៅតំបន់ហ្កាហ្សា។ មន្ត្រីអាមេរិក បានឲ្យដឹងថា ជនសង្ស័យម្នាក់ដែលស្រែកពាក្យស្លោកគាំទ្រប៉ាឡេស្ទីន ត្រូវបានចាប់ឃុំខ្លួន។ លោកប្រធានាធិបតីអាមេរិក Donald Trump និងមេដឹកនាំអឺរ៉ុប និងបរទេសដទៃទៀត បានថ្កោលទោសការបាញ់ប្រហារនេះ៕

ការវាយប្រហាររបស់អ៊ីស្រាអែលសម្លាប់ជនប៉ាឡេស្ទីន ៥១នាក់ក្នុងតំបន់ហ្កាហ្សានាថ្ងៃព្រហស្បតិ៍នេះ

ប្រភពសុខាភិបាល បានឲ្យដឹងថា ការវាយប្រហាររបស់អ៊ីស្រាអែលលើតំបន់ហ្កាហ្សា បានសម្លាប់ជនប៉ាឡេស្ទីនរាប់សិបនាក់នៅថ្ងៃព្រហស្បតិ៍ ស្របពេលដែលការផ្គត់ផ្គង់ជំនួយមនុស្សធម៌មានដែនកំណត់ ធ្វើដំណើរយឺតៗចូលទៅក្នុងដែនដីប៉ាឡេស្ទីនមួយនេះ ក្រោយអ៊ីស្រាអែលបន្ធូរបន្ថយការបិទច្រកទាំងស្រុងរបស់ពួកគេ ។ប្រភពសុខាភិបាលនិយាយប្រាប់កាសែត Al Jazeera ថា មនុស្សយ៉ាងហោច ៥១នាក់ ត្រូវបានសម្លាប់នៅក្នុងការវាយប្រហាររបស់អ៊ីស្រាអែល រួមទាំងមនុស្ស ២៥នាក់ នៅទីក្រុងហ្កាហ្សា និងភាគខាងជើងតំបន់ហ្កាហ្សាស្រ្ទីប ។ទីភ្នាក់ងារព័ត៌មានផ្លូវការប៉ាឡេស្ទីន Wafa រាយការណ៍ថា មនុស្សយ៉ាងហោច ១០នាក់ រួមទាំងសមាជិក ៩នាក់ក្នុងគ្រួសារតែមួយ ត្រូវបានសម្លាប់នៅក្នុងការវាយប្រហាររបស់អ៊ីស្រាអែលដែលមានគោលដៅលើកន្លែងរស់នៅរបស់មនុស្សជម្លៀសខ្លួន ស្ថិតក្នុងតំបន់ al-Baraka នៃទីក្រុង Deir el-Balah នៅភាគកណ្តាលតំបន់ហ្កាហ្សា ។ទីភ្នាក់ងារ Wafa រាយការណ៍ទៀតថា មនុស្ស ៥នាក់ ត្រូវបានសម្លាប់នៅក្នុងការវាយប្រហាររបស់អ៊ីស្រាអែលលើផ្ទះរបស់គ្រួសារលោក Bakhit ស្ថិតក្នុងតំបន់ as-Saftawi ។ដោយឡែក ក្រសួងសុខាភិបាលប៉ាឡេស្ទីននិយាយថា ក្នុងទីក្រុង Beit Lahiya នៅភាគខាងជើងហ្កាហ្សា ការផ្លោងគ្រាប់កាំភ្លើងធំរបស់រថក្រោះ ត្រូវចំឃ្លាំងឱសថនៅក្នុងមន្ទីរពេទ្យ Al-Awda និងបង្កជាអគ្គិភ័យកើតឡើង ។ ក្រុមការងារសង្រ្គោះ បានព្យាយាមពន្លត់ភ្លើងអស់រយៈពេលជាច្រើនម៉ោង ។ខណៈពេលនោះដែរ ក្រុមគ្រូពេទ្យបឋម និយាយថា រថក្រោះចតនៅក្រៅមន្ទីរពេទ្យ Al-Awda រារាំងមិនឲ្យនរណាម្នាក់ចូលទៅក្នុងបរិវេនមន្ទីរពេទ្យមួយនេះឡើយ ៕

អធិការបតីអាល្លឺម៉ង់ លោក Merz និយាយថា សម្ព័ន្ធមិត្តណាតូ ប្តេជ្ញាការពារដែនដី

អធិការបតីលោក Friedrich Merz នៅថ្ងៃព្រហស្បតិ៍ (ទី២២ ខែឧសភា) នេះ បាននិយាយថា ប្រទេសអាល្លឺម៉ង់ និងដៃគូរបស់ខ្លួន បានប្តេជ្ញាការពារដែនដីទាំងអស់របស់សមាជិកអង្គការណាតូ (NATO) ដោយការលើកឡើងនេះកើតមានអំឡុងពេលបំពេញទស្សនកិច្ច នៅទីក្រុង Vilnius ខណៈដែលលោកបានកត់សម្គាល់ពីការដាក់ពង្រាយកងពលតូចអាល្លឺម៉ង់នៅប្រទេសលីទុយអានី ដើម្បីពង្រឹងព្រំដែនខាងកើតរបស់សម្ព័ន្ធភាព។ដំណើរទស្សនកិច្ចនេះ ធ្វើឡើងនៅពេលដែលបណ្ដាមេដឹកនាំនៃអង្គការណាតូ ត្រៀមជួបប្រជុំនៅខែក្រោយ ដើម្បីកំណត់គោលដៅថ្មី ស្តីពីការបំពេញកង្វះខាតផ្នែកសមត្ថភាព និងដើម្បីដោះស្រាយបញ្ហា ដែលថា តើសមាជិកគួរចំណាយកម្រិតណាលើវិស័យការពារជាតិ បន្ទាប់ពីមានការលុកលុយរបស់រុស្ស៊ីលើអ៊ុយក្រែន។លោក Merz បានប្រាប់អ្នកសារព័ត៌មានថា៖ «រួមគ្នាជាមួយដៃគូរបស់យើង យើងប្តេជ្ញាការពារដែនដីរបស់សម្ព័ន្ធមិត្ត ប្រឆាំងនឹងការឈ្លានពានណាមួយ។ ហើយសន្តិសុខនៃសម្ព័ន្ធមិត្តបាល់ទិករបស់យើង ក៏ជាសន្តិសុខរបស់យើងដែរ»។ ពាក់ព័ន្ធនឹងគោលដៅនៃកិច្ចប្រជុំកំពូលនាពេលខាងមុខ លោក Merz បានប្រាប់ថា៖ «សមត្ថភាពការពាររបស់អឺរ៉ុប ត្រូវតែត្រូវបានពង្រឹងក្នុងរយៈពេលវែង ហើយឧស្សាហកម្មការពារជាតិរបស់យើង ត្រូវតែពង្រីកសមត្ថភាពរបស់ខ្លួន»។គួរបញ្ជាក់ថា កិច្ចប្រឹងប្រែង ដើម្បីជំរុញការប្តេជ្ញាចិត្តរបស់អង្គការ NATO កើតឡើងក្រោមសម្ពាធពីលោកប្រធានាធិបតី Donald Trump ដែលបានត្អូញត្អែរថា សហរដ្ឋអាមេរិកចំណាយច្រើនពេក សម្រាប់សន្តិសុខរបស់អឺរ៉ុប៕

WFP ៖ នៅមិនទាន់មានជំនួយណាមួយចូលដល់ពលរដ្ឋនៅក្នុងតំបន់ហ្កាហ្សានោះទេ

លោក Antoine Renard គឺជាអ្នកតំណាង និងជាប្រធានប្រចាំតំបន់របស់កម្មវិធីស្បៀងអាហារពិភពលោក(WFP)បាននិយាយថា នៅមិនទាន់មានជំនួយណាមួយចូលដល់ពលរដ្ឋនៅក្នុងតំបន់ហ្កាហ្សានោះទេ ស្របពេលដែលជនប៉ាឡេស្ទីននៅក្នុងដែនដីបិទច្រកមួយនេះ រង់ចាំការមកដល់ស្បៀងអាហារតាមការសន្យា បើទោះបីជាមានសម្ពាធអន្តរជាតិ និងក្នុងស្រុកកើនឡើងក៏ដោយ លើរដ្ឋាភិបាលអ៊ីស្រាអែល ដើម្បីអនុញ្ញាតឲ្យជំនួយបន្ថែមទៀតចូលដល់ពលរដ្ឋដែលស្ថិតលើមាត់ជ្រោះនៃគ្រោះទុរ្ភិក្ស ក្រោយការបិទច្រករយៈពេល ១១សប្តាហ៍ ។កាន់ឆ្នាំងទទេរ បុរស និងស្រ្តី រង់ចាំជាមួយកូនៗរបស់ពួកគេនៅក្រៅផ្ទះបាយស៊ុបបណ្តោះអាសន្ននៅទីក្រុង Khan Younis ដោយសង្ឃឹមថានឹងទទួលបានអាហារពេលថ្ងៃរបស់ពួកគេ ។ប៉ុន្តែភាគច្រើននៃអ្នកដែលបាននិយាយជាមួយទីភ្នាកងារព័ត៌មានរ៉យទ័រ និយាយថា ពួកគេពុំទទួលបានអាហារណាមួយសោះឡើយ ។យោងតាមតួលេខយោធាអ៊ីស្រាអែល បានឲ្យដឹងថា រថយន្តដឹកជំនួយតិចជាង ១០០គ្រឿង បានធ្វើដំណើរចូលទៅក្នុងតំបន់ហ្កាហ្សា ចាប់តាំងពីថ្ងៃចន្ទរហូតមក ពេលដែលរដ្ឋាភិបាលរបស់លោកនាយករដ្ឋមន្រ្តី Benjamin Netanyahu យល់ព្រមដកចេញការបិទច្រកដែលធ្វើឲ្យពលរដ្ឋហ្កាហ្សាពិបាករស់រាន ។ជាមួយនឹងការវាយប្រហារតាមច្រកអាកាស និងការផ្លោងគ្រាប់កាំភ្លើងធំរបស់រថក្រោះនៅតែបន្តមានគោលដៅលើដែនដីបិទច្រកមួយនេះ សម្លាប់មនុស្សរាប់សិបនាក់កាលពីថ្ងៃពុធ ហាងដុតនំក្នុងស្រុក និងប្រតិបត្តិករដឹកជញ្ជូន និយាយថា ពួកគេនៅមិនទាន់ឃើញមានការផ្គត់ផ្គង់ម៉្សៅ និងគ្រឿងចាំបាច់ផ្សេងទៀតនោះទេ ។ការចាប់ផ្តើមការវាយប្រហារឡើងវិញរបស់អ៊ីស្រាអែលលើតំបន់ហ្កាហ្សាចាប់តាំងពីខែមីនា ក្រោយបទឈប់បាញ់ដ៏ផុយស្រួលរយៈពេល ២ខែ បានធ្វើឲ្យមានការថ្កោលទោសយ៉ាងខ្លាំងពីបណ្តាប្រទេសជាច្រើននៅលើពិភពលោក ហើយសូម្បីតែសហរដ្ឋអាមេរិក ដែលជាសម្ព័ន្ធមិត្តដ៏សំខាន់បំផុតរបស់អ៊ីស្រាអែល ក៏បានបង្ហាញសញ្ញាបាត់បង់ការអត់ធ្មត់ចំពោះលោក Netanyahu ផងដែរ ។យោងតាមការអះអាងរបស់អាជ្ញាធរសុខភាពហ្កាហ្សា បានឲ្យដឹងថា យុទ្ធនាករសឹករបស់អ៊ីស្រាអែល បានសម្លាប់ជនប៉ាឡេស្ទីនជាង ៥៣.៦០០នាក់ និងបានបំផ្លិចបំផ្លាញតំបន់ហ្កាហ្សាស្រ្ទីបស្ទើរតែទាំងស្រុង ជាទីដែលក្រុមជំនួយនិយាយថា សញ្ញានៃកង្វះខាតអាហារូបត្ថម្ភធ្ងន់ធ្ងរ មានលក្ខណៈទ្រង់ទ្រាយធំ ៕

អគ្គិភ័យបានឆាបឆេះរោងចក្រប្រេងនៅតំបន់ភាគខាងជើងប្រទេសម៉ិកស៊ិក

យោងតាមការអះអាងរបស់ទីភ្នាក់ងារការពារស៊ីវិល Nuevo Leon បានឲ្យដឹងថា ក្រុមភ្នាក់ងារពន្លត់អគ្គិភ័យអាចពន្លត់អណ្តាតភ្លើងឆាបឆេះរោងចក្រប្រេងនៅទីក្រុង Cadereyta កាលពីថ្ងៃពុធ គឺជាទីក្រុងស្ថិតនៅភាគខាងជើងប្រទេសម៉ិកស៊ិក ។រូបថតសន្លឹកពីក្រុមការពារស៊ីវិល ឃើញក្រុមភ្នាក់ងារពន្លត់អគ្គិភ័យព្យាយាមពន្លត់អណ្តាតភ្លើងឆាបឆេះបរិវេណរោងចក្រ ។ក្រុមអាជ្ញាធរនិយាយថា មនុស្ស ១១នាក់ ត្រូវបានជម្លៀសចេញពីកន្លែងកើតហេតុ ហើយមនុស្សម្នាក់ ត្រូវបានបញ្ជូនទៅព្យាបាលនៅមន្ទីរពេទ្យ ដោយសាររបួសទទួលរងពីឧបទ្ទេវហេតុអគ្គិភ័យនេះ ។គ្មានសេចក្តីរាយការណ៍ពីគ្រោះថ្នាក់ដល់អាយុជីវិតនោះទេ ពាក់ព័ន្ធនឹងអគ្គិភ័យនេះ ខណៈដែលមូលហេតុបណ្តាលឲ្យកើតមានអគ្គិភ័យ កំពុងស្ថិតក្នុងការស៊ើបអង្កេត ៕

មនុស្សយ៉ាងតិច ២១នាក់ បាត់ខ្លួន ខណៈភ្លៀងធ្លាក់ខ្លាំង នៅភាគខាងត្បូងចិន បង្កឲ្យមានបំណាក់ដី

មនុស្សយ៉ាងតិច ២១នាក់ បានជាប់ទៅណាមិនរួច បន្ទាប់ពីភ្លៀងធ្លាក់យ៉ាងខ្លាំង បានបង្កឲ្យមានបំណាក់ដីនៅក្នុងខេត្ត Guizhou ភាគនិរតីនៃប្រទេសចិន នៅថ្ងៃព្រហស្បតិ៍ (ទី២២ ខែឧសភា) នេះ ដោយយោធាត្រូវបានដាក់ពង្រាយ ដើម្បីជួយដល់កិច្ចប្រឹងប្រែងជួយសង្គ្រោះ។ដោយដកស្រង់របាយការណ៍បឋម ទូរទស្សន៍រដ្ឋ CCTV បានរាយការណ៍ថា បំណាក់ដីបានកើតមាននៅភូមិ Qingyang ដែលធ្វើឲ្យមនុស្ស ១៩នាក់មកពី ៨គ្រួសារផ្សេងគ្នា ជាប់នៅទីនោះ។ចំណែកទីភ្នាក់ងារសារព័ត៌មាន Xinhua បានរាយការណ៍ថា មនុស្ស ២នាក់ទៀត បានជាប់នៅទីក្រុងតូច Changshi ក្បែរនោះ។ អាជ្ញាធរក៏បានចេញការព្រមាន អំពីហានិភ័យនៃការមានគ្រោះមហន្តរាយភូមិសាស្ត្រក្នុងតំបន់ក្បែរនោះផងដែរ។គួរបញ្ជាក់ថា ប្រទេសចិនកំពុងប្រឈមនឹងរលកកម្ដៅក្ដៅជាងមុន និងយូរជាងមុន ក៏ដូចជាភ្លៀងធ្លាក់ខ្លាំងញឹកញាប់ជាងមុន និងមិនអាចទាយទុកមុនបាន ដោយសារបម្រែបម្រួលអាកាសធាតុ។ អាជ្ញាធរបានឲ្យដឹងថា ប្រទេសនេះងាយរងគ្រោះដោយសារផលប៉ះពាល់ពីការប្រែប្រួលអាកាសធាតុ ព្រោះតែចំនួនប្រជាជនដ៏ច្រើនរបស់ខ្លួន៕

បណ្ដាញសង្គម

ព័ត៌មានថ្មីៗ

គម្រោង «ពង្រឹងបច្ចេកវិទ្យា និងធនធាន សម្រាប់ស្រ្តីជនជាតិដើមភាគតិច ក្នុងវិស័យកសិកម្ម (STRIVE Project)» សម្ពោធក្រោមការចូលរួមពីដៃគូអន្តរជាតិ

រដ្ឋមន្ត្រីក្រសួងទេសចរណ៍ ទាក់ទាញ ក្រុមហ៊ុនទេសចរណ៍ធំវៀតណាម បង្កើនវិនិយោគនៅកម្ពុជា

លោក Xi Jinping៖ មនុស្សជាតិ ត្រូវជ្រើសរើសម្តងទៀតរវាងសន្តិភាព និងសង្រ្គាម

លោក Macron និយាយថា អឺរ៉ុបបានបញ្ចប់ការរៀបចំការធានាសន្តិសុខសម្រាប់អ៊ុយក្រែន

បក្ស Pheu Thai នឹងដាក់បេក្ខជនក្នុងដំណើរការបោះឆ្នោតជ្រើសរើសនាយករដ្ឋមន្ត្រី និងប្តេជ្ញាឲ្យមានការបោះឆ្នោតឆាប់ៗ

អាកាសធាតុដែលបង្កជាចំហេះឆេះព្រៃនៅ Iberian ទំនងមានឱកាស ៤០ដង ដោយសារបម្រែម្រួលអាកាសធាតុ

ស្រ្តីកុងហ្គោងាកមកប្រកបការងារជីករ៉ែ ដើម្បីរស់រាន ក្រោយការវាយប្រហាររបស់ក្រុមជីហាដ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877