BTV NEWS

លោកKim ប្រាប់លោក Putin ក្នុងសារឆ្នាំថ្មីថា កូរ៉េខាងជើងនិងរុស្ស៊ី មានទំនាក់ទំនងក្នុង«ឈាម»នៃសង្គ្រាម

ប្រទេសចិន ដាក់ទណ្ឌកម្មលើក្រុមហ៊ុនការពារជាតិអាមេរិក ជុំវិញការលក់អាវុធទៅឱ្យកោះតៃវ៉ាន់

លោកZelenskyy៖ រុស្ស៊ីកំពុងប្រើប្រាស់ទឹកដីបេឡារុស ដើម្បីបង្អាក់ការការពាររបស់អ៊ុយក្រែន

អតីតនាយករដ្ឋមន្ត្រីម៉ាឡេស៊ី លោក Najib Razak ជាប់ពន្ធនាគារ១៥ឆ្នាំបន្ថែមទៀត ក្នុងរឿងអាស្រូវ 1MDB

ព័ត៌មានអន្តរជាតិ

ក្រុមM23 ប្រកាសដកទ័ពជាឯកតោភាគីចេញពីទីក្រុងUvira ប្រទេសកុងហ្គោ ជាចំណាត់ការកសាងទំនុកចិត្ត

ក្រុមឧទ្ទាមចលនាM23 បានប្រកាសកាលពីថ្ងៃចន្ទថា ខ្លួនបានសម្រេច «ដកកងទ័ពជាឯកតោភាគី» ចេញពីទីក្រុងUvira ភាគខាងកើតសាធារណរដ្ឋប្រជាធិបតេយ្យកុងហ្គោ(DRC) ដែលខ្លួនអះអាងថា ដណ្តើមយកបានកាលពីសប្តាហ៍មុន ដោយពណ៌នាចំណាត់ការនេះថាជាវិធានការកសាងទំនុកចិត្តក្នុងគោលបំណងគាំទ្រដល់ដំណើរការសន្តិភាពដែលកំពុងដំណើរការ។នៅក្នុងសេចក្តីថ្លែងការណ៍ដែលបានចេញផ្សាយកាលពីថ្ងៃចន្ទ លោក Corneille Nangaa មេដឹកនាំនយោបាយនៃសម្ព័ន្ធទន្លេកុងហ្គោ (AFC) ជាក្រុមចម្រុះនយោបាយ-យោធា មានសម្ព័ន្ធភាពជាមួយក្រុមM23 បាននិយាយថា ការសម្រេចនេះធ្វើឡើងបន្ទាប់ពីវឌ្ឍនភាពថ្មីៗក្រោមដំណើរការសន្តិភាពទីក្រុងដូហា រួមទាំងការចុះហត្ថលេខាលើកិច្ចព្រមព្រៀងសន្តិភាពក្របខ័ណ្ឌទីក្រុងដូហាកាលពីខែវិច្ឆិកា។ ក្រុម M23 បានបញ្ជាក់ពីបំណងរបស់ខ្លួនក្នុងការផ្តួចផ្តើមគំនិត «វិធានការកសាងទំនុកចិត្តឯកតោភាគី» និង «ផ្តល់ដំណើរការសន្តិភាពទីក្រុងដូហាដើម្បីទទួលបានភាពជោគជ័យ»ក្នុងការផ្តល់ដំណោះស្រាយយូរអង្វែងចំពោះជម្លោះ។ចាប់តាំងពីខែមីនា ឆ្នាំនេះមក ការចរចាជាច្រើនជុំរវាងក្រុម M23 និងរដ្ឋាភិបាលកុងហ្គោ ត្រូវបានធ្វើឡើងក្រោមការសម្របសម្រួលរបស់ប្រទេសកាតា ដែលត្រូវបានគេស្គាល់ថាជាដំណើរការសន្តិភាពទីក្រុងដូហា។ យោងតាមសេចក្តីថ្លែងការណ៍បានឲ្យដឹងថា ការដកទ័ពចេញពីទីក្រុង Uvira ត្រូវបានអនុវត្តតាមការស្នើសុំរបស់សហរដ្ឋអាមេរិកក្នុងការសម្របសម្រួល។

អឺរ៉ុបឯកភាពថា ការធានាសន្តិសុខអ៊ុយក្រែន គួរតែរួមបញ្ចូលកងកម្លាំងរក្សាសន្តិភាពដឹកនាំដោយអឺរ៉ុប

បណ្ដាមេដឹកនាំអឺរ៉ុប បានព្រមព្រៀងគ្នាកាលពីថ្ងៃចន្ទ (១៥ ធ្នូ) ថា ការសម្រេចចិត្តណាមួយលើលទ្ធភាពនៃសម្បទានទឹកដីអ៊ុយក្រែន ដល់រុស្ស៊ី អាចធ្វើឡើងលុះត្រាតែមានការធានាសន្តិសុខយ៉ាងរឹងមាំប៉ុណ្ណោះ ដែលគួរតែរួមបញ្ចូលកម្លាំងចម្រុះជាតិសាសន៍ ដឹកនាំដោយអឺរ៉ុប។សេចក្តីថ្លែងការណ៍រួម ដែលចេញដោយមេដឹកនាំអឺរ៉ុប ១០រូប រួមទាំងប្រធានគណៈកម្មការសហភាពអឺរ៉ុប លោកស្រី Ursula von der Leyen បានកើតមានឡើង បន្ទាប់ពីថ្នាក់ដឹកនាំទាំងអស់បានជួបប្រជុំគ្នានៅទីក្រុងប៊ែរឡាំង ដើម្បីគាំទ្រកិច្ចចរចាសន្តិភាពរវាងអ្នកចរចាអាមេរិក និងអ៊ុយក្រែន ដែលស្វះស្វែងបញ្ចប់ជម្លោះដ៏បង្ហូរឈាមបំផុតនៅអឺរ៉ុប ចាប់តាំងពីសង្គ្រាមលោកលើកទីពីរមក។ដោយគូសបញ្ជាក់ពីអ្វីដែលពួកគេចាត់ទុកថាជាការធានាសន្តិសុខចាំបាច់ សេចក្តីថ្លែងការណ៍នេះបាននិយាយថា អ៊ុយក្រែនគួរតែអាចរក្សាកងកម្លាំងប្រដាប់អាវុធរបស់ខ្លួនឱ្យនៅប្រហែល ៨សែននាក់ ដើម្បីអាចទប់ស្កាត់ជម្លោះ។ លើសពីនេះ អឺរ៉ុបគួរតែសម្របសម្រួល "កម្លាំងចម្រុះជាតិសាសន៍នៅអ៊ុយក្រែន" ដែលបង្កើតឡើងដោយការចូលរួមវិភាគទានពីប្រទេសដែលមានឆន្ទៈ និងគាំទ្រដោយអាមេរិក។ការធានាសន្តិសុខក៏នឹងរួមបញ្ចូលយន្តការត្រួតពិនិត្យបទឈប់បាញ់ ដឹកនាំដោយអាមេរិក ដើម្បីផ្តល់ការព្រមានជាមុន អំពីការវាយប្រហារនាពេលអនាគត និងឆ្លើយតបទៅនឹងការរំលោភបំពានណាមួយ។ សេចក្តីថ្លែងការណ៍សង្កត់ធ្ងន់ថា បញ្ហាទឹកដីគឺទុកឱ្យប្រជាជនអ៊ុយក្រែនជាអ្នកសម្រេចចិត្ត ហើយធ្វើទៅបានតែនៅពេលណាដែលការធានាសន្តិសុខដ៏រឹងមាំ មានប្រសិទ្ធភាពរួចហើយប៉ុណ្ណោះ៕

ដ្រូនក្រោមទឹករបស់អ៊ុយក្រែន វាយប្រហារនាវាមុជទឹករុស្ស៊ី ប៉ុន្តែទីក្រុងមូស្គូបដិសេធថា ពុំមានការខូចខាតទេ

អ៊ុយក្រែនបាននិយាយកាលពីថ្ងៃចន្ទ (១៥ ធ្នូ) ថា ខ្លួនវាយប្រហារ និងធ្វើឱ្យខូចខាតដល់នាវាមុជទឹកដឹកមីស៊ីល ១គ្រឿងរបស់រុស្ស៊ី ដែលចតនៅមូលដ្ឋានទ័ពជើងទឹកសមុទ្រខ្មៅ ដោយប្រើយានដ្រូនក្រោមទឹកជាលើកដំបូង ប៉ុន្តែទីក្រុងមូស្គូ បានបដិសេធថា ការវាយប្រហារនោះមិនបង្កការខូចខាតអ្វីឡើយ។សេវាសន្តិសុខអ៊ុយក្រែន SBU បាននិយាយថា ដ្រូនក្រោមទឹកឈ្មោះ "Sub Sea Baby" ផលិតនៅអ៊ុយក្រែន បានវាយប្រហារត្រូវនាវាមុជទឹកប្រភេទ Kilo ក្នុងកំពង់ផែ Novorossiysk ជាទីដែលរុស្ស៊ី បានដាក់មូលដ្ឋាននាវាចម្បាំងជាច្រើនគ្រឿងរបស់ខ្លួន ដែលប្ដូរពីសមុទ្រខ្មៅ ដើម្បីកុំឱ្យនាវារងការវាយប្រហារដោយយានដ្រូនរបស់អ៊ុយក្រែន។វីដេអូដែលចេញផ្សាយដោយសេវា SBU បានបង្ហាញឱ្យឃើញ ការផ្ទុះដ៏ខ្លាំងក្លាមួយពីក្នុងទឹកនៅកំពង់ផែ ក្បែរកន្លែងចតនាវាមុជទឹកមួយគ្រឿងនោះ និងនាវាដទៃទៀត។លោក Alexander Kamyshin ទីប្រឹក្សារបស់ប្រធានាធិបតីអ៊ុយក្រែន បានបង្ហោះលើបណ្ដាញសង្គម X ថា "នេះជាលើកដំបូងក្នុងប្រវត្តិសាស្ត្រ ដែលដ្រូនក្រោមទឹកបានបំផ្លាញនាវាមុជទឹក"។ ប៉ុន្តែប៉ុន្មានម៉ោងក្រោយមក កងនាវាចរសមុទ្រខ្មៅរបស់រុស្ស៊ី ចេញបដិសេធទាំងស្រុងលើការអះអាងនេះ។កងនាវាចររុស្ស៊ី បាននិយាយថា ពុំមានកប៉ាល់ ឬនាវាមុជទឹកណាមួយ ដែលឈរជើងនៅឈូងសមុទ្រនៃមូលដ្ឋានកងទ័ពជើងទឹក Novorossiysk ឬបុគ្គលិកនៅលើនោះ រងការខូចខាតដោយសារតែការបំផ្លិចបំផ្លាញនេះទេ ហើយកំពុងតែបំពេញកាតព្វកិច្ចដូចធម្មតា៕

ការស្ទង់មតិ៖ ប្រជាជនអ៊ុយក្រែនភាគច្រើន បដិសេធសម្បទានធំៗក្នុងសំណើសន្តិភាព

ស្ថាប័នស្ទង់មតិមួយនៅទីក្រុងគីវ បាននិយាយកាលពីថ្ងៃចន្ទ (១៦ ធ្នូ) ថា ប្រជាជនអ៊ុយក្រែនចំនួន ៣ភាគ៤ បានបដិសេធសម្បទានសំខាន់ៗនៅក្នុងកិច្ចព្រមព្រៀងសន្តិភាពណាមួយ ដែលនេះជាបញ្ហាប្រឈមកាន់តែខ្លាំងឡើងសម្រាប់លោកប្រធានាធិបតី Volodymyr Zelenskyy ខណៈពេលកំពុងចរចាក្រោមសម្ពាធពីសេតវិមានរួមចទៅហើយ ដើម្បីបញ្ចប់សង្គ្រាមជាមួយរុស្ស៊ី។អ៊ុយក្រែនបានព្យាយាមរុញច្រាន ប្រឆាំងផែនការដើម ដែលគាំទ្រដោយសហរដ្ឋអាមេរិក ក្នុងអ្វីដែលអ៊ុយក្រែននិងសម្ព័ន្ធមិត្តអឺរ៉ុប យល់ឃើញថា អំណោយផលដល់ទីក្រុងមូស្គូ ដែលទាមទារឱ្យទីក្រុងគីវ បោះបង់តំបន់ Donbas ភាគខាងកើតទាំងមូល និងរឹតត្បិតសមត្ថភាពយោធា។ការស្ទង់មតិ ដែលធ្វើឡើងដោយវិទ្យាស្ថានសង្គមវិទ្យាអន្តរជាតិទីក្រុងគីវ បានរកឃើញថា ប្រជាជនអ៊ុយក្រែនចំនួន ៧២% ត្រៀមខ្លួនរួចរាល់សម្រាប់កិច្ចព្រមព្រៀងដែលបង្កកជួរមុខបច្ចុប្បន្ន និងមានការសម្របសម្រួលមួយចំនួន។ ប៉ុន្តែអត្រាអ្នកឆ្លើយតបដល់ទៅ ៧៥% ជឿជាក់ថា ផែនការសន្តិភាពដែលលម្អៀងទៅរុស្ស៊ី ដោយរួមបញ្ចូលការកាត់ទឹកដីអ៊ុយក្រែន ឬរឹតត្បិតទំហំកងទ័ពរបស់ខ្លួន ដោយមិនទទួលបានការធានាសន្តិសុខច្បាស់លាស់ គឺជារឿង «មិនអាចទទួលយកបានទាល់តែសោះ»។ការស្ទង់មតិនេះបាននិយាយទៀតថា ប្រជាជនអ៊ុយក្រែនចំនួន ៦៣% បានត្រៀមខ្លួនរួចជាស្រេចដើម្បីបន្តការប្រយុទ្ធ ហើយមានត្រឹមតែ ៩% ប៉ុណ្ណោះ ដែលជឿជាក់ថា សង្គ្រាមដ៏បង្ហូរឈាមនេះនឹងបញ្ចប់នៅដើមឆ្នាំ ២០២៦ ខាងមុខ៕

សារមន្ទីរលូវ៉ា របស់បារាំង បានបិទទ្វារ ខណៈបុគ្គលិករាប់រយនាក់ចាប់ផ្តើមធ្វើកូដកម្ម

សារមន្ទីរ លូវ៉ា (Louvre) ក្នុងទីក្រុងប៉ារីស បានបិទទ្វារកាលពីថ្ងៃចន្ទ (១៥ ធ្នូ) បន្ទាប់ពីបុគ្គលិករាប់រយនាក់ ចាប់ផ្តើមធ្វើកូដកម្មជាបន្តបន្ទាប់ ដើម្បីទាមទារលក្ខខណ្ឌការងារកាន់តែប្រសើរជាងមុន និងការជួសជុលឡើងវិញជាបន្ទាន់ ដែលបានរំខានដល់ប្រតិបត្តិការនៃសារមន្ទីរ ដែលមានភ្ញៀវចូលទស្សនាច្រើនបំផុតលើពិភពលោកមួយនេះ អំឡុងពេលវេលាដ៏មមាញឹកបំផុតមួយ។ការចេញកូដកម្ម បានកើតឡើង ស្របពេលសារមន្ទីរ នៅតែរងផលប៉ះពាល់ដោយចោរកម្មដ៏កក្រើកក្នុងខែតុលា ដែលលួចគ្រឿងអលង្ការមានតម្លៃ ៨៨លានអឺរ៉ូ (លើសពី ១០០លានដុល្លារអាមេរិក) និងបញ្ហាហេដ្ឋារចនាសម្ព័ន្ធថ្មីៗនេះ រួមទាំងការលេចធ្លាយទឹកដែលបានបំផ្លាញគម្ពីរបុរាណអស់រាប់រយក្បាល។ជាធម្មតា សារមន្ទីរ លូវ៉ា ស្វាគមន៍ភ្ញៀវទេសចរប្រមាណ ៣ម៉ឺននាក់ ជារៀងរាល់ថ្ងៃ ហើយដោយសារតែសារមន្ទីរនេះត្រូវបានបិទជារៀងរាល់ថ្ងៃអង្គារ មានន័យថា សារមន្ទីរនឹងមិនបើកឡើងវិញមុនថ្ងៃពុធ ទី១៧ ខែធ្នូ ទេ ក៏ជាពេលដែលបុគ្គលិកត្រូវសម្រេចចិត្តថា គួរតែបន្តកូដកម្មឬយ៉ាងណា។កាលពីសប្តាហ៍មុន សហជីពបានព្រមានរួចមកហើយអំពីកូដកម្មនេះ ដោយបុគ្គលិកប្រហែល ៤០០នាក់ ក្នុងចំណោមបុគ្គលិកសរុប ២.២០០នាក់ របស់សារមន្ទីរ បានគាំទ្រសកម្មភាពកូដកម្ម។ សហជីព បានស្នើឱ្យសារមន្ទីរជួលបុគ្គលិកអចិន្ត្រៃយ៍បន្ថែមទៀត ជាពិសេសផ្នែកសន្តិសុខ និងសេវាកម្មភ្ញៀវ និងការកែលម្អលក្ខខណ្ឌការងារ ក្នុងចំណោមការទាមទារជាច្រើនទៀត៕

រដ្ឋវ៉ាស៊ីនតោន របស់អាមេរិក ជួបប្រទះជំនន់ទឹកភ្លៀង ខណៈអាជ្ញាធរព្រមានឱ្យអ្នកស្រុកជម្លៀសខ្លួន

ការបាក់ទំនប់ទឹកនៅរដ្ឋវ៉ាស៊ីនតោន របស់សហរដ្ឋអាមេរិក ក្រោយពីមានភ្លៀងធ្លាក់ដ៏ខ្លាំងក្លាអស់ជាច្រើនថ្ងៃ បាននាំឱ្យមានការព្រមានអំពីទឹកជំនន់យ៉ាងគំហុក និងបទបញ្ជាឱ្យពលរដ្ឋជម្លៀសចេញ កាលពីថ្ងៃចន្ទ (១៥ ធ្នូ) ប៉ុន្តែអាជ្ញាធរក៏បាននិយាយថា ការជួសជុលកំពុងដំណើរការហើយ។ភ្លៀងធ្លាក់ខ្លាំងក្នុងសប្ដាហ៍នេះ បានគ្របដណ្ដប់ទូទាំងភាគខាងលិចរដ្ឋវ៉ាស៊ីនតោន ដោយជន់លិចផ្លូវថ្នល់ និងដីស្រែចម្ការ បង្កឱ្យមានការដាច់ចរន្តអគ្គិសនី និងបង្ខំឱ្យសាលារៀនបិទទ្វារនៅទូទាំងតំបន់ ខណៈអ្នកព្យាករព្រមានថា អាកាសធាតុកាន់តែអាក្រក់ អាចនឹងកើតឡើង។ អ្នកបើកបរជួបការរំខានរួចទៅហើយ ដោយទឹកជំនន់កាត់ផ្តាច់ផ្លូវជាច្រើនខ្សែ ហើយការបាក់ទំនប់បង្កភាពវឹកវរកាន់តែខ្លាំង។នាយកគ្រប់គ្រងគ្រាអាសន្ននៃតំបន់ King របស់រដ្ឋវ៉ាស៊ីនតោន បាននិយាយថា ការជួសជុលទំនប់ អាចចំណាយពេលច្រើនម៉ោង ហើយមន្ត្រីកំពុងតាមដានយ៉ាងដិតដល់នូវទំនប់ផ្សេងទៀតក្បែរតំបន់ Seattle ជាទីដែលផ្នែកតូចមួយនៃទំនប់ ក៏បានបាក់ក្នុងទឹកជំនន់ផងដែរ។ជាមួយគ្នានេះ អាជ្ញាធរបានជំរុញឱ្យប្រជាពលរដ្ឋជៀសវាងការបើកបរឆ្លងកាត់តំបន់ជន់លិច ខណៈកម្រិតទឹកកំពុងកើនឡើង ដែលជំរុញឱ្យកសិករនៅជិតច្រាំងទន្លេ ជម្លៀសសត្វពាហនៈ និងឧបករណ៍ទៅទីទួលខ្ពស់ ហើយប្រជាជនក្នុងតំបន់ជាច្រើនទៀត បន្តតាមដានកម្រិតទឹកយ៉ាងដិតដល់៕

កងកម្លាំង STC របស់ប្រទេសយេម៉ែន ចាប់ផ្តើមប្រតិបត្តិការយោធាថ្មី នៅក្នុងខេត្តភាគខាងត្បូង

ក្រុមប្រឹក្សាអន្តរកាលភាគខាងត្បូងរបស់ប្រទេសយេម៉ែន (STC) បាននិយាយកាលពីថ្ងៃចន្ទថា កងកម្លាំងរបស់ខ្លួន បានចាប់ផ្តើមប្រតិបត្តិការយោធាទ្រង់ទ្រាយធំថ្មីមួយ នៅក្នុងខេត្ត Abyan ភាគខាងត្បូងរបស់ប្រទេសនេះ។នៅក្នុងសេចក្តីថ្លែងការណ៍សារព័ត៌មានខ្លីមួយ អ្នកនាំពាក្យយោធារបស់ STC លោក Mohamed al-Naqeeb បាននិយាយថា ប្រតិបត្តិការនេះគឺជាផ្នែកមួយនៃកិច្ចខិតខំប្រឹងប្រែងជាបន្តបន្ទាប់របស់កងកម្លាំងភាគខាងត្បូង ដើម្បីប្រយុទ្ធប្រឆាំងនឹងការគំរាមកំហែងជ្រុលនិយម និងពង្រឹងសន្តិសុខ និងស្ថិរភាព នៅក្នុងតំបន់ភាគខាងត្បូង ក្រោមឥទ្ធិពលរបស់ក្រុមប្រឹក្សានេះ។យោងតាមលោក al-Naqeeb បានឲ្យដឹងថា ការវាយលុកនេះ បានកំណត់គោលដៅទៅលើក្រុមភេរវករនៅក្នុងខេត្ត Abyan ដែលលោកបានពិពណ៌នាថា ជា «បន្ទាយដ៏សំខាន់មួយនៃសមាសភាពជ្រុលនិយម» នៅក្នុងប្រទេសយេម៉ែន ដោយបន្ថែមថា យុទ្ធនាការនេះ មានគោលបំណង «ធានាសុវត្ថិភាពខេត្តនេះយ៉ាងពេញលេញ កាត់ផ្តាច់ខ្សែផ្គត់ផ្គង់ និងភស្តុភារ និងទប់ស្កាត់ក្រុមសកម្មប្រយុទ្ធពីការជួបជុំគ្នាឡើងវិញ ឬការកើតឡើងជាថ្មី»។ការប្រកាសថ្មីនេះ កើតឡើង ចំពេលមានការវិវឌ្ឍផ្នែកយោធា និងនយោបាយកាន់តែខ្លាំងឡើង នៅភាគខាងត្បូងប្រទេសយេម៉ែន។ ក្នុងរយៈពេលប៉ុន្មានសប្តាហ៍ថ្មីៗនេះ STC បានប្រកាសថា ខ្លួនបានគ្រប់គ្រងខេត្តយុទ្ធសាស្ត្រ Hadramout និង al-Mahrah ពីកងកម្លាំងគាំទ្ររដ្ឋាភិបាលផ្សេងទៀត ដោយបានពង្រឹងអំណាចរបស់ខ្លួន នៅទូទាំងភាគខាងត្បូង។ក្រុមប្រឹក្សាអន្តរកាលភាគខាងត្បូងរបស់ប្រទេសយេម៉ែន (STC) បានធ្វើឲ្យមានភាពត្រឹមត្រូវនូវវិធានការយោធាថ្មីៗរបស់ខ្លួន ដោយចោទប្រកាន់ក្រុមគាំទ្ររដ្ឋាភិបាលមួយចំនួនថា បានរក្សាទំនាក់ទំនងជាមួយក្រុមបងប្អនមូស្លីម (Muslim Brotherhood) ខណៈពេលដែលរិះគន់ក្រុមប្រឹក្សាភាពជាអ្នកដឹកនាំនៃប្រធានាធិបតីយេម៉ែន (PLC) ចំពោះអ្វីដែលខ្លួនពិពណ៌នាថា ជាការបរាជ័យក្នុងការចាប់ផ្តើមយុទ្ធនាការដ៏ខ្លាំងក្លាប្រឆាំងនឹងក្រុមហ៊ួទី ដែលបន្តគ្រប់គ្រងខេត្តភាគខាងជើង រួមទាំងរដ្ឋធានី Sanaa ផងដែរ៕

អនុរដ្ឋមន្ត្រីការបរទេសក្រុងមូស្គូ៖ រុស្ស៊ី-អ៊ុយក្រែន "ជិតឈានដល់កិច្ចព្រមព្រៀងបញ្ចប់សង្គ្រាមហើយ"

អនុរដ្ឋមន្ត្រីការបរទេសរុស្ស៊ី លោក Sergei Ryabkov បានប្រាប់ប្រព័ន្ធផ្សព្វផ្សាយ ABC News ក្នុងបទសម្ភាសន៍មួយកាលពីថ្ងៃចន្ទ (១៥ ធ្នូ) ថា លោកជឿជាក់ថា ភាគីជម្លោះទាំងពីរ កំពុង «ខិតជិតដល់» ដំណោះស្រាយការទូត ដើម្បីបញ្ចប់សង្គ្រាមរបស់ទីក្រុងមូស្គូ លើអ៊ុយក្រែន ហើយ។លោក Ryabkov បាននិយាយអំពីរដ្ឋាភិបាលរបស់លោកប្រធានាធិបតីរុស្ស៊ី Vladimir Putin ថា «រុស្ស៊ី បានត្រៀមខ្លួនរួចជាស្រេចដើម្បីទទួលបានកិច្ចព្រមព្រៀងមួយ» ដោយបន្ថែមថា លោកសង្ឃឹមថា កិច្ចព្រមព្រៀងមួយនឹងត្រូវបានសម្រេច «ក្នុងពេលឆាប់ៗនេះ»។យ៉ាងណាមិញ អនុរដ្ឋមន្ត្រីការបរទេសរូបនេះ ក៏បញ្ជាក់ជាថ្មីនូវការទាមទាររបស់ទីក្រុងមូស្គូ លើបញ្ហាទឹកដី ដែលទីក្រុងគីវនិយាយថា មិនអាចទទួលយកជាផ្នែកមួយនៃកិច្ចព្រមព្រៀងសន្តិភាពណាមួយឡើយ។ ក្នុងចំណោមចំណុចខ្ទាស់ទាំងនោះ រួមមាន ការគ្រប់គ្រងរបស់រុស្ស៊ីលើតំបន់គ្រីម៉េ ដែលត្រូវកាន់កាប់ក្នុងឆ្នាំ២០១៤ និងទឹកដីចំនួន ៤ផ្សេងទៀតដែលរុស្ស៊ីកាន់កាប់ដោយផ្នែក នោះគឺតំបន់ Donetsk តំបន់ Luhansk តំបន់ Zaporizhzhia និងតំបន់ Kherson ដែលនៅភាគខាងត្បូង និងខាងកើតនៃប្រទេសអ៊ុយក្រែន។ជាមួយគ្នានេះ ប្រភពពីក្រុមមន្ត្រីអាមេរិកបាននិយាយថា កិច្ចព្រមព្រៀងយ៉ាងទូលំទូលាយលើបញ្ហាជាច្រើន សម្រេចបាន ៩០% ហើយរវាងអ៊ុយក្រែន និងរុស្ស៊ី ប៉ុន្តែបញ្ហាទឹកដី និងអធិបតេយ្យភាព នៅមិនទាន់មានការឯកភាពដោយភាគីទាំងពីរនៅឡើយ៕

ប្រមុខយោធា ជំរុញឱ្យអង់គ្លេសត្រៀមខ្លួនឱ្យបានកាន់តែប្រសើរចំពោះការគំរាមកំហែងរបស់រុស្ស៊ី

ប្រមុខយោធារបស់ប្រទេសកាលពីថ្ងៃចន្ទ ទី១៥ ខែធ្នូ បាននិយាយថា ចក្រភពអង់គ្លេសត្រូវតែត្រៀមខ្លួនឱ្យបានកាន់តែប្រសើរដើម្បីទប់ស្កាត់ការគំរាមកំហែងពីជម្លោះ ជាពិសេសពីប្រទេសរុស្ស៊ី ដោយការជំរុញទឹកចិត្តកងទ័ពឱ្យមានឆន្ទៈក្នុងការប្រយុទ្ធ បង្កើនសមត្ថភាពអាវុធ និងអភិវឌ្ឍជំនាញ ។មេបញ្ជាការកងទ័ពអាកាស លោក Richard Knighton និងនាយសេនាធិការការពារជាតិ បាននិយាយថា ចក្រភពអង់គ្លេសមិនទាន់គិតពីការគំរាមកំហែងពីប្រទេសរុស្ស៊ី «ដូចសម្ព័ន្ធមិត្តជាច្រើនរបស់យើងនៅអឺរ៉ុប» ដែលមានចំណាត់ការរួចហើយដើម្បីបង្កើនការផ្គត់ផ្គង់ផ្នែកការពារជាតិ។អឺរ៉ុប កំពុងព្យាយាមបំពេញចន្លោះប្រហោងដែលបន្សល់ទុកដោយការទាមទាររបស់ប្រធានាធិបតី លោក Donald Trump សម្រាប់ទ្វីបនេះដើម្បីគ្រប់គ្រងសមត្ថភាពការពារជាតិភាគច្រើនរបស់ណាតូ ជាពិសេសនៅពេលដែលការចរចាសន្តិភាពរវាងរុស្ស៊ី និងអ៊ុយក្រែន មានការលំបាក។ពាក្យសម្ដីរបស់ លោក Knighton ហាក់ដូចជានិយាយសំដៅលើការជំរុញដល់ចក្រភពអង់គ្លេស រដ្ឋាភិបាល និងប្រជាជនរបស់ខ្លួនឱ្យយកចិត្តទុកដាក់ចំពោះការគំរាមកំហែងនៃជម្លោះដ៏ធំទូលាយដែលអាចកើតមានកាន់តែធ្ងន់ធ្ងរ និងមានចំណាត់ការឱ្យបានកាន់តែលឿន។

សហភាពអឺរ៉ុប ចាប់ផ្តើមជើងហោះហើរដឹកជំនួយទៅកាន់តំបន់ Darfur ប្រទេសស៊ូដង់ ខណៈវិបត្តិមនុស្សធម៌កាន់តែធ្ងន់ធ្ងរ

សហភាពអឺរ៉ុបបានចាប់ផ្តើម នាំយកជំនួយមនុស្សធម៌ដឹកតាមយន្តហោះចំនួន៨គ្រឿងចូលទៅក្នុងតំបន់ Darfur ដែលរងការបំផ្លិចបំផ្លាញដោយសង្គ្រាមនៅប្រទេសស៊ូដង់។អង្គភាពត្រួតពិនិត្យជំនួយក្រៅប្រទេសរបស់គណៈកម្មការអឺរ៉ុប បានបង្ហាញវិធានការនេះកាលពីថ្ងៃចន្ទ និងបាននិយាយថា ជើងហោះហើរទាំងនេះនឹងដឹកជញ្ជូនការផ្គត់ផ្គង់ «សម្ភារៈសង្គ្រោះជីវិត" មានតម្លៃ៣,៥ លានអឺរ៉ូ (៤,១ លានដុល្លារ) ទៅកាន់តំបន់ភាគខាងលិច ជាកន្លែងមាន «អំពើឃោរឃៅដ៏ខ្លាំងក្លា ការស្រេកឃ្លាន និងការជម្លៀសខ្លួន» ដែលបានធ្វើឱ្យមនុស្សរាប់លាននាក់កំពុងត្រូវការជំនួយបន្ទាន់។អង្គភាពការពារជនស៊ីវិល និងប្រតិបត្តិការជំនួយមនុស្សធម៌របស់គណៈកម្មការអឺរ៉ុបបាននិយាយនៅក្នុងសេចក្តីថ្លែងការណ៍ថា ជើងហោះហើរដំបូងបានចេញដំណើរកាលពីថ្ងៃសុក្រ ដោយដឹកជញ្ជូនជំនួយប្រហែល១០០តោនពី «ឃ្លាំងស្តុកមនុស្សធម៌របស់សហភាពអឺរ៉ុប និងអង្គការដៃគូ»។អង្គភាពនេះនិយាយថា ជើងហោះហើរបន្ថែមទៀតនឹងបន្តពេញមួយខែនេះ និងខែមករា ដោយមានទឹក សម្ភារៈទីជម្រក សម្ភារៈអនាម័យ និងសម្ភារៈសុខភាព ក្នុងចំណោមសម្ភារៈដែលកំពុងដឹកជញ្ជូនទៅកាន់ «កន្លែងមួយក្នុងចំណោមកន្លែងដែលពិបាកបំផុតរបស់ពិភពលោកសម្រាប់អង្គការជំនួយដើម្បីបានទៅដល់»។

បណ្ដាញសង្គម

ព័ត៌មានថ្មីៗ

កម្ពុជា-ថៃ ឯកភាពគ្នាដាក់ចេញយន្តការអនុវត្ត និងផ្ទៀងផ្ទាត់វិធានការកាត់បន្ថយភាពតានតឹង ដោយទទួលស្គាល់ និងឯកភាពពង្រឹងតួនាទីរបស់ក្រុម AOT ដើម្បីធានាថា បទឈប់បាញ់នឹងត្រូវអនុវត្តឱ្យបាន និងមានប្រសិទ្ធភាព

TOP STORY | កម្ពុជា-ថៃ ឯកភាពគ្នា១១ចំណុច កាត់បន្ថយភាពតានតឹង និងឈប់បាញ់ជាបន្ទាន់នៅម៉ោង១២ថ្ងៃត្រង់នេះ

កិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) បានប្រព្រឹត្តទៅនៅព្រឹកនេះ ក្រោមវត្តមានប្រមុខការពារជាតិនៃប្រទេសទាំងពីរ

ទាហានឈ្លានពានថៃនៅតែបន្តបាញ់ផ្លោងចូលកម្ពុជាបើទោះបីថ្ងៃនេះមានកិច្ចប្រជុំពិសេស GBC ដោយមានវត្តមានអ្នកសង្កេតការណ៍ AOTក្តី

លោក Zelenskyy នឹងពិភាក្សាអំពីទឹកដី និងការធានាសន្តិសុខជាមួយលោក Trump នៅថ្ងៃអាទិត្យ

មន្ត្រីនិយាយថា រដ្ឋធានីគីវរបស់អ៊ុយក្រែន កំពុងស្ថិតក្រោមការវាយប្រហារយ៉ាងខ្លាំងពីរុស្ស៊ី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877