BTV NEWS

ការបាញ់ផ្លោង ភាពស្រេកឃ្លាន បានធ្វើឲ្យពលរដ្ឋស៊ូដង់ ភៀសខ្លួនចេញពីទីក្រុង al-Fashir

លោក Kim និយាយថា ឋានៈដ៏ច្បាស់លាស់របស់កូរ៉េខាងជើង មិនអាចកែប្រែបានឡើយ

លោកស្រី Baerbock បើកមហាសន្និបាតUN លើកទី៨០ ដោយអំពាវនាវឱ្យមានសកម្មភាពលើវោហាសាស្ត្រ

ការដំឡើងពន្ធរបស់អាមេរិកលើរថយន្តជប៉ុន នឹងត្រូវបន្ទាបនៅថ្ងៃអង្គារក្រោយ

ព័ត៌មានអន្តរជាតិ

ប្រជាជនលីប៊ី ប្រមូលផ្តុំគ្នានៅក្រុងទ្រីប៉ូលី ទាមទារការបោះឆ្នោត និងបណ្តេញនាយករដ្ឋមន្ត្រីចេញ

ហ្វូងបាតុករ បានមកប្រមូលផ្តុំគ្នាកាលពីថ្ងៃសុក្រ (២៣ ឧសភា) នៅទីលានមួយកន្លែងក្នុងទីក្រុងទ្រីប៉ូលី ដោយអំពាវនាវឱ្យមានការបណ្តេញចេញនាយករដ្ឋមន្ត្រីប្រទេសលីប៊ី លោក Abdulhamid Dbeibah ដែលត្រូវបានទទួលស្គាល់ជាអន្តរជាតិ។អ្នកតវ៉ា លោក Abdelraouf Zahloul បាននិយាយថា យើងមិនចង់បានរយៈពេលអន្តរកាលបន្តបន្ទាប់គ្នាទេ។ យើងធុញទ្រាន់នឹងរយៈពេលអន្តរកាល យើងចង់ទៅបោះឆ្នោត យើងចង់បានរដ្ឋស៊ីវិល យើងចង់បានដូចប្រទេសដទៃទៀតដែរ។លោក Dbeibah ដែលបានដឹកនាំរដ្ឋាភិបាលរួបរួមជាតិរបស់ប្រទេសដែលខ្វែងគំនិតគ្នា បានឡើងកាន់តតំណែងតាមរយៈដំណើរការគាំទ្រដោយអង្គការសហប្រជាជាតិនៅឆ្នាំ២០២១។ ការបោះឆ្នោតតាមផែនការបានបរាជ័យក្នុងការដំណើរការនៅឆ្នាំនោះ ដោយសារតែការមិនចុះសម្រុងគ្នាក្នុងចំណោមក្រុមជាគូប្រជែង ហើយលោកនៅតែកាន់អំណាច។ប្រទេសលីប៊ី មានស្ថិរភាពតិចតួចប៉ុណ្ណោះ ចាប់តាំងពីការបះបោរគាំទ្រដោយសម្ព័ន្ធយោធាណាតូនៅឆ្នាំ ២០១១ ដែលបានទម្លាក់មេដឹកនាំផ្តាច់ការ លោក Muammar Gaddafi។ ប្រទេសនេះ ត្រូវបានបំបែកនៅក្នុងឆ្នាំ២០១៤ រវាងក្រុមគូប្រជែងភាគខាងកើត និងភាគខាងលិច ទោះបីជាមានការផ្ទុះសង្រ្គាមដ៏ធំមួយ ត្រូវបានផ្អាកទៅផ្អាកទៅវិញ តាមរយៈបទឈប់បាញ់នៅឆ្នាំ២០២០ ក៏ដោយ។

ចៅក្រមអាមេរិក រារាំងលោកTrump ពីការលុបចោលការចុះឈ្មោះនិស្សិតបរទេសនៅសាកលវិទ្យាល័យ Harvard

តុលាការតំបន់សហរដ្ឋអាមេរិក បានរារាំងបណ្តោះអាសន្ននូវបំណងរបស់រដ្ឋបាល លោក Trump ក្នុងការរារាំងនិស្សិតអន្តរជាតិមិនឱ្យចូលរៀននៅសកលវិទ្យាល័យ Harvard ។ តុលាការបានចេញសេចក្តីបង្គាប់កាលពីថ្ងៃសុក្រ ដោយនិយាយថា សាកលវិទ្យាល័យ Harvard នឹង «រងគ្រោះភ្លាមៗ និងមិនអាចត្រៀមលក្ខណៈបាន» មុនពេលសវនាការពីគ្រប់ភាគីទាំងអស់។សាកលវិទ្យាល័យ បានដាក់ពាក្យប្តឹងរដ្ឋបាល លោក Trump បន្ទាប់ពីក្រសួងសន្តិសុខមាតុភូមិ បានប្រកាសកាលពីថ្ងៃព្រហស្បតិ៍ថាខ្លួននឹងរារាំងនិស្សិតអន្តរជាតិមិនឲ្យចុះឈ្មោះ។ ក្រសួងនេះ បានចោទប្រកាន់សាកលវិទ្យាល័យ Harvard ថាបានជំរុញឱ្យមានអំពើហិង្សា និងការប្រឆាំងជ្វីហ្វនិយមនៅក្នុងបរិវេណសាកលវិទ្យាល័យ។ សាកលវិទ្យាល័យ បានចាត់ទុកចំណាត់ការនេះថា«មិនស្របច្បាប់» ហើយបានដាក់ពាក្យសុំសេចក្តីបង្គាត់ហាមឃាត់បណ្តោះអាសន្ន។ ប្រធានសាកលវិទ្យាល័យ Harvard លោក Alan Garber បាននិយាយនៅក្នុងសេចក្តីថ្លែងការណ៍កាលពីថ្ងៃសុក្រថា រដ្ឋបាល លោក Trump កំពុងប្រឆាំងនឹងសាកលវិទ្យាល័យ Harvard ព្រោះតែមិនព្រមបោះបង់ចោលការសិក្សាតាមលក្ខណៈឯករាជ្យរបស់ខ្លួន។លោកបាននិយាយបន្ថែមថា សាកលវិទ្យាល័យ នឹងធ្វើអ្វីគ្រប់យ៉ាងតាមអំណាចរបស់ខ្លួនដើម្បីគាំទ្រនិស្សិត និងអ្នកសិក្សា។ សាកលវិទ្យាល័យ Harvard បានដាក់ពាក្យប្តឹងកាលពីខែមេសា ដើម្បីបញ្ឈប់រដ្ឋបាលរបស់លោក Trump ពីការបង្កកជំនួយរបស់សហព័ន្ធដោយផ្នែក។

ប្រមុខUN៖ អ៊ីស្រាអែល អនុញ្ញាតឲ្យដឹកជញ្ជូនជំនួយក្នុងចំនួន «តិចតួចបំផុត» សម្រាប់តំបន់ហ្កាហ្សា

ប្រមុខអង្គការសហប្រជាជាតិ លោក Antonio Guterres កាលពីថ្ងៃសុក្រ ទី២៣ ឧសភា បាននិយាយថា អ៊ីស្រាអែលបានអនុញ្ញាតលំហូរជំនួយក្នុងចំនួនតិចតួចបំផុតសម្រាប់តំបន់ហ្កាហ្សា ខណៈត្រូវការជំនួយយ៉ាងច្រើន ហើយជាថ្មីម្តងទៀតអង្គការសហប្រជាជាតិបានផ្តល់សញ្ញាថា នឹងមិនចូលរួមក្នុងផែនការចែកចាយជំនួយថ្មីដែលគាំទ្រដោយសហរដ្ឋអាមេរិក នោះទេ។លោក Guterres បានប្រាប់អ្នកសារព័ត៌មានថា «ប្រសិនបើគ្មានការទទួលបានជំនួយរហ័ស គួរឱ្យទុកចិត្ត សុវត្ថិភាព និងនិរន្តរភាពនោះទេ មនុស្សកាន់តែច្រើននឹងស្លាប់ ហើយផលវិបាករយៈពេលវែងលើប្រជាជនទាំងមូលនឹងកាន់តែជ្រៅ»។អ៊ីស្រាអែលនិយាយថា រថយន្តដឹកជំនួយប្រហែល៣០០គ្រឿងបានចូលក្នុងតំបន់ហ្កាហ្សាតាមច្រកឆ្លងកាត់ Kerem Shalom ចាប់តាំងពីខ្លួនបានដកចេញការបិទផ្លូវរយៈពេល១១សប្តាហ៍នៅហ្កាហ្សាកាលពីថ្ងៃចន្ទ ប៉ុន្តែ លោក Guterres បាននិយាយថា រហូតមកដល់ពេលនេះមានតែប្រហែលមួយភាគបីនៃរថយន្តដឹកជំនួយទាំងនោះ ត្រូវបានដឹកជញ្ជូនពីច្រកឆ្លងកាត់ទៅកាន់ឃ្លាំងស្តុកជំនួយ នៅក្នុងតំបន់ហ្កាហ្សាដោយសារតែអសន្តិសុខ។អ៊ីស្រាអែល បានអនុញ្ញាតឱ្យការដឹកជញ្ជូនជំនួយដោយអង្គការសហប្រជាជាតិ និងក្រុមជំនួយផ្សេងទៀតបន្តក្នុងរយៈពេលខ្លី រហូតដល់គំរូចែកចាយជំនួយថ្មីគាំទ្រដោយសហរដ្ឋអាមេរិកដំណើរការដោយមូលនិធិមនុស្សធម៌តំបន់ហ្កាហ្សាដែលទើបបង្កើតថ្មី នឹងដំណើរការនៅចុងខែនេះ។ អង្គការសហប្រជាជាតិ និយាយថា ផែនការនេះលំអៀង ឬមិនអព្យាក្រឹតទេ ហើយខ្លួននឹងមិនពាក់ព័ន្ធឡើយ។អ៊ីស្រាអែលបាននិយាយថា ការបិទផ្លូវរបស់ខ្លួនគឺមានគោលបំណងមួយផ្នែកដើម្បីបញ្ឈប់ក្រុមសកម្មប្រយុទ្ធហាម៉ាសប៉ាឡេស្ទីន ពីការបង្វែរនិងរឹបអូសយកជំនួយ។ ប៉ុន្តែក្រុមហាម៉ាសបានបដិសេធការលួចជំនួយ។

រដ្ឋមន្ត្រីការបរទេសអ៊ីរ៉ង់៖ ជុំទីប្រាំនៃកិច្ចចរចានុយក្លេអ៊ែរជាមួយអាមេរិកគឺ «ប្រកបដោយវិជ្ជាជីវៈបំផុត»

ក្រុមអ្នកចរចារបស់អ៊ីរ៉ង់ និងសហរដ្ឋអាមេរិក បានបញ្ចប់ការចរចាជុំទីប្រាំ កាលពីថ្ងៃសុក្រ ទី២៣ ឧសភា ដោយអ្នកសម្របសម្រួលប្រទេសអូម៉ង់បាននិយាយថាមានវឌ្ឍនភាពតិចតួចក្នុងការចរចាដែលមានគោលបំណងដោះស្រាយជម្លោះយូរអង្វែងជុំវិញមហិច្ឆតានុយក្លេអ៊ែររបស់ទីក្រុងតេអេរ៉ង់។ប្រភពស្និទ្ធទៅនឹងក្រុមប្រទេសអ៊ីរ៉ង់បានប្រាប់សារព័តត៌មានរ៉យទ័រថា ភាគីទាំងពីរនឹងជួបគ្នាម្តងទៀត។ ពុំមានការអត្ថាធិប្បាយភ្លាមៗពីគណៈប្រតិភូអាមេរិកក្នុងកិច្ចប្រជុំ កាលពីថ្ងៃសុក្រក្នុងទីក្រុងរ៉ូម នោះទេ។រដ្ឋមន្ត្រីការបរទេសអ៊ីរ៉ង់ លោក Abbas Araqchi បាននិយាយថា មានសក្ដានុពលសម្រាប់វឌ្ឍនភាពក្នុងការចរចា បន្ទាប់ពីប្រទេសអូម៉ង់ បានធ្វើសំណើជាច្រើន ប៉ុន្តែកិច្ចពិភាក្សាមានភាពស្មុគស្មាញ ហើយត្រូវការការពិភាក្សាបន្ថែមទៀត។ លោក Araqchi បានប្រាប់ទូរទស្សន៍រដ្ឋអ៊ីរ៉ង់ថា «យើងទើបតែបានបញ្ចប់ជុំមួយនៃការចរចាប្រកបដោយវិជ្ជាជីវៈបំផុត»។លោកប្រធានាធិបតី Donald Trump មានបំណងកាត់បន្ថយសក្តានុពលរបស់ទីក្រុងតេអេរ៉ង់ក្នុងការផលិតអាវុធនុយក្លេអ៊ែរ ដែលអាចបង្កឱ្យមានការប្រជែងអាវុធនុយក្លេអ៊ែរក្នុងតំបន់ ហើយប្រហែលជាគំរាមកំហែងដល់អ៊ីស្រាអែល។ សម្រាប់ផ្នែករបស់ខ្លួន សាធារណរដ្ឋឥស្លាមមួយនេះ មានបំណងចង់ឲ្យលុបបំបាត់ទណ្ឌកម្មដ៏មហន្តរាយលើសេដ្ឋកិច្ចដែលផ្អែកលើប្រេងរបស់ខ្លួន។

រុស្ស៊ី និងអ៊ុយក្រែន ដោះលែងឈ្លើយសឹករាប់រយនាក់ ក្នុងការដោះដូរទ្រង់ទ្រាយធំបំផុតក្នុងសង្រ្គាម

ប្រទេសរុស្ស៊ី និងអ៊ុយក្រែន បានដោះលែងអ្នកទោសចំនួន៣៩០នាក់ម្ខាងៗកាលពីថ្ងៃសុក្រ ជាផ្នែកមួយនៃអ្វីដែលត្រូវបានគេរំពឹងថាជាការដោះដូរឈ្លើយសឹកទ្រង់ទ្រាយធំបំផុតនៃសង្រ្គាមរយៈពេល៣ឆ្នាំមកនេះ។ កិច្ចព្រមព្រៀងដោះដូរឈ្លើយសឹក១.០០០នាក់ពីភាគីម្ខាងៗគឺជាជំហានជាក់ស្តែងតែមួយគត់ឆ្ពោះទៅរកសន្តិភាពដែលលេចឡើងកាលពីសប្តាហ៍មុនពីការចរចានៅទីក្រុងអ៊ីស្តង់ប៊ុល ប្រទេសទួរគី។ភាគីទាំងពីរបាននិយាយថា ពួកគេបានដោះលែងទាហាន ២៧០នាក់ និងជនស៊ីវិល ១២០នាក់ ដោយជាច្រើននាក់បន្ថែមទៀតនឹងធ្វើឡើងនៅថ្ងៃសៅរ៍ និងថ្ងៃអាទិត្យ។ នៅឯកិច្ចចរចាក្នុងទីក្រុងអ៊ីស្តង់ប៊ុល ភាគីទាំងពីរបានបរាជ័យក្នុងការឈានដល់កិច្ចព្រមព្រៀងបទឈប់បាញ់ដែលបានស្នើឡើងដោយប្រធានាធិបតីសហរដ្ឋអាមេរិក លោក Donald Trump ។ជុំវិញការដោះដូរឈ្លើយសឹកនេះ លោក Trump បានសរសេរនៅលើ បណ្តាញ Truth Social ថា «សូម អបអរដល់ភាគីទាំងពីរចំពោះការចរចានេះ។ នេះអាចនាំទៅរកអ្វីដែលកាន់តែធំជាងនេះ។ទាហានរាប់សែននាក់ត្រូវបានគេជឿថាបានរងរបួស ឬស្លាប់ នៅក្នុងសង្រ្គាមដ៏បង្ហូរឈាមបំផុតរបស់អឺរ៉ុបចាប់តាំងពីសង្គ្រាមលោកលើកទីពីរ។ ជនស៊ីវិលអ៊ុយក្រែនរាប់ម៉ឺននាក់ក៏បានស្លាប់ ខណៈកងកម្លាំងរុស្ស៊ីបានទម្លាក់គ្រាប់បែកលើទីក្រុងនានារបស់អ៊ុយក្រែន។ អ៊ុយក្រែននិយាយថាខ្លួនត្រៀមសម្រាប់បទឈប់បាញ់រយៈពេល៣០ថ្ងៃភ្លាមៗ។រុស្ស៊ីដែលបានចាប់ផ្តើមសង្រ្គាមដោយការឈ្លានពានលើប្រទេសជិតខាងខ្លួននៅឆ្នាំ២០២២ ហើយបច្ចុប្បន្ននេះកាន់កាប់ប្រហែលមួយភាគប្រាំនៅអ៊ុយក្រែន និយាយថា ខ្លួននឹងមិនផ្អាកការវាយលុកទេ រហូតដល់លក្ខខណ្ឌនានាត្រូវបានបំពេញជាមុនសិន។

លោក Trump គំរាមដំឡើងពន្ធថ្មីលើសហភាពអឺរ៉ុប ក្រុមហ៊ុនApple រហូតដល់ក្រុមហ៊ុន Samsung

ប្រធានាធិបតីសហរដ្ឋអាមេរិក លោក Donald Trump បានគំរាមបង្កើនសង្គ្រាមពាណិជ្ជកម្មរបស់លោកម្តងទៀត ដោយជំរុញការដំឡើងពន្ធ៥០%លើទំនិញរបស់សហភាពអឺរ៉ុបចាប់ពីថ្ងៃទី១ ខែមិថុនា និងព្រមានដល់ក្រុហ៊ុន Apple ថាលោកអាចនឹងដំឡើងពន្ធ២៥% លើទូរស័ព្ទ iPhone ទាំងអស់ដែលបានទិញដោយអ្នកប្រើប្រាស់អាមេរិក។ ការវាយប្រហារពាណិជ្ជកម្មថ្មីរបស់លោក Trump លើសហភាពអឺរ៉ុបត្រូវបានជំរុញដោយជំនឿរបស់សេតវិមានដែលថាការចរចាជាមួយប្លុកនេះពុំមានវឌ្ឍនភាពលឿនគ្រប់គ្រាន់។ ប៉ុន្តែការគំរាមរបស់លោក ក៏បានបង្ហាញពីការវិលត្រឡប់ទៅរកសង្រ្គាមពាណិជ្ជកម្មបញ្ឈប់និងចាប់ផ្តើមរបស់ទីក្រុងវ៉ាស៊ីនតោន ដែលបានធ្វើឲ្យរង្គោះរង្គើទីផ្សារ អាជីវកម្ម និងអ្នកប្រើប្រាស់ និងបង្កើនការព្រួយបារម្ភពីការធ្លាក់ចុះសេដ្ឋកិច្ចពិភពលោក។ ទន្ទឹមនឹងនេះ ការវាយប្រហាររបស់លោកប្រធានាធិបតីទៅលើ ក្រុមហ៊ុនApple គឺជាការប៉ុនប៉ងចុងក្រោយរបស់លោកក្នុងការដាក់សម្ពាធលើក្រុមហ៊ុនដ៏ជាក់លាក់មួយឱ្យផ្លាស់ផ្តូរទីតាំងផលិតទៅកាន់សហរដ្ឋអាមេរិក។ ទោះជាយ៉ាងណា សហរដ្ឋអាមេរិកមិនផលិតស្មាតហ្វូនច្រើននោះទេ ទោះបីជាអ្នកប្រើប្រាស់អាមេរិកទិញទូរស័ព្ទច្រើនជាង៦០លានគ្រឿងក្នុងមួយឆ្នាំក៏ដោយ ហើយការផ្លាស់ប្តូរផលិតកម្មទំនងជានឹងបង្កើនតម្លៃ iPhones រាប់រយដុល្លារបន្ថែមទៀត។លោក Trump បានប្រាប់អ្នកសារព័ត៌មាននៅខាងក្នុងការិយាល័យ Oval Office ថាការដំឡើងពន្ធដែលបានស្នើឡើងរបស់លោកលើ ក្រុមហ៊ុន Apple ក៏នឹងអនុវត្តចំពោះក្រុមហ៊ុន Samsung និងក្រុមហ៊ុនផ្សេងទៀដែលផលិតផលិតផលនោះជាក់ស្តែងសំដៅទៅលើស្មាតហ្វូន។លោក Trump បានរំលឹកឡើងវិញនូវការត្អូញត្អែររបស់លោកដែលសហភាពអឺរ៉ុបបានប្រព្រឹត្តចំពោះសហរដ្ឋអាមេរិកយ៉ាងចាស់ដៃ និងបានដាក់ការរិតត្បិតលើសហរដ្ឋអាមេរិកមិនឱ្យលក់រថយន្តចូលទៅក្នុងសហភាពអឺរ៉ុប។ លោកនិយាយថា «ខ្ញុំគ្រាន់តែនិយាយថា ដល់ពេលហើយដែលយើងលេងហ្គេមតាមរបៀបដែលខ្ញុំដឹងពីរបៀបលេង»។

លោក Netanyahu ចោទ ប្រទេសបារាំង អង់គ្លេស និងកាណាដា ពីការគាំទ្រក្រុមហាម៉ាស

នាយករដ្ឋមន្ត្រីអ៊ីស្រាអែល លោក Benjamin Netanyahu បានចោទប្រកាន់មេដឹកនាំរបស់ប្រទេសបារាំង អង់គ្លេស និងកាណាដា ថាមានបំណងជួយដល់ក្រុមសកម្មប្រយុទ្ធហាម៉ាសប៉ាឡេស្ទីន បន្ទាប់ពីប្រទេសទាំងបីបានគំរាមថានឹងចាត់វិធានការជាក់ស្តែង ប្រសិនបើអ៊ីស្រាអែលមិនបញ្ឈប់ការវាយលុកចុងក្រោយរបស់ខ្លួននៅតំបន់ហ្កាហ្សា។ការរិះគន់នេះ បានធ្វើឲ្យមានការកត់សម្គាល់ស្រដៀងគ្នាពីរដ្ឋមន្ត្រីការបរទេសអ៊ីស្រាអែល លោក Gideon Saar ជាផ្នែកមួយនៃការវាយបករបស់រដ្ឋាភិបាលអ៊ីស្រាអែល ប្រឆាំងសម្ពាធអន្តរជាតិកាន់តែខ្លាំងឡើងលើប្រទេសខ្លួន ជុំវិញសង្គ្រាមនៅតំបន់ហ្កាហ្សា។ខណៈមានលំហូររូបភាពនៃការបំផ្លិចបំផ្លាញ និងភាពអត់ឃ្លាននៅក្នុងតំបន់ហ្កាហ្សានៅបន្ត ជំរុញឱ្យមានការតវ៉ានៅក្នុងប្រទេសនានាជុំវិញពិភពលោក ដែលអ៊ីស្រាអែលបានព្យាយាមបង្វែរមតិពិភពលោកធ្វើឲ្យមានការផ្លាស់ប្តូរកាន់តែខ្លាំងឡើងប្រឆាំងខ្លួន។មន្ត្រីអ៊ីស្រាអែល មានការព្រួយបារម្ភជាពិសេសចំពោះការអំពាវនាវសម្រាប់បណ្តាប្រទេសអ៊ឺរ៉ុបរួមទាំងប្រទេសបារាំង អេស្ប៉ាញ និងអៀរឡង់ ក្នុងការទទួលស្គាល់រដ្ឋប៉ាឡេស្ទីន ជាផ្នែកមួយនៃដំណោះស្រាយរដ្ឋពីរដើម្បីដោះស្រាយជម្លោះជាច្រើនទសវត្សរ៍នៅក្នុងតំបន់នេះ។

ក្រុមអ្នកវិទ្យាសាស្រ្តអាមេរិកព្យាករពីរដូវកាលព្យុះកំណាចលើសកម្រិតធម្មតាក្នុងឆ្នាំ ២០២៥នេះ

ក្រុមអ្នកវិទ្យាសាស្រ្តរដ្ឋាភិបាលសហរដ្ឋអាមេរិក បាននិយាយកាលពីថ្ងៃព្រហស្បតិ៍ថា ពួកគេរំពឹងថានឹងមានរដូវកាលព្យុះកំណាចលើសកម្រិតធម្មតាក្នុងឆ្នាំ ២០២៥ ធ្វើឲ្យមានព្យុះសង្ឃរាធំៗចន្លោះពី ៣-៥លើក ជាមួយនឹងសន្ទុះខ្យល់បក់យ៉ាងហោច ១៧៩គ.មក្នុង ១ម៉ោង ។យោងតាមការអះអាងរបស់សេវាកម្មឧតុនិយមជាតិសហរដ្ឋអាមេរិក បានឲ្យដឹងថា រដូវកាលព្យុះកំណាចអាត្លង់ទិក ដែលចាប់ផ្តើមនៅថ្ងៃទី ១ ខែមិថុនា ត្រូវបានគេព្យាករថា នឹងបង្កឲ្យមានព្យុះត្រូពិកចន្លោះពី ១៣-១៩លើកជាមួយសន្ទុះខ្យល់បក់យ៉ាងហោច ៦៣គ.មក្នុង ១ម៉ោង ។ នៅក្នុងចំណោមព្យុះទាំងនោះ ព្យុះ ៦-១០លើកត្រូវបានគេព្យាករថានឹងក្លាយជាព្យុះសង្ឃរាជាមួយកម្លាំងខ្យល់បក់យ៉ាងហោច ១២០គ.មក្នុង ១ម៉ោង ។លោក Ken Graham គឺជាប្រធានសេវាកម្មឧតុនិយមជាតិសហរដ្ឋអាមេរិកនិយាយថា សីតុណ្ហភាពផ្ទៃសមុទ្រក្តៅជាងមុន ប្រហែលជាកត្តារួមចំណែកសំខាន់នាំឲ្យកើតមានព្យុះកំណាចនេះ ។ក្រុមអ្នកព្យាករណ៍ឧតុនិយមឯកទេស និងឯកជន បានបង្ហាញទស្សនវិស័យស្រដៀងគ្នាសម្រាប់រដូវកាលព្យុះកំណាច ដែលបន្តរហូតដល់ថ្ងៃទី ៣០ ខែវិច្ឆិកា ។សូមបញ្ជាក់ថា ចន្លោះឆ្នាំ ១៩៩១ និងឆ្នាំ ២០២០ មានព្យុះត្រូពិកជាមធ្យមប្រហែល ១៤លើកជារៀងរាល់ឆ្នាំនៅសមុទ្រអាត្លង់ទិក រួមទាំងព្យុះកំណាចប្រហែល ៣លើកនៅក្នុងចំណោមព្យុះសង្ឃរាប្រហែល ៧លើក ។ ក្រុមឧតុនិយមមកពីសាកលវិទ្យាល័យរដ្ឋ Colorado និយាយកាលពីដើមខែមេសាថា រដូវកាលព្យុះកំណាចនៅឆ្នាំ ២០២៥នៅទូទាំងតំបន់បាសាំងអាត្លង់ទិកនឹងមានចំនួនលើសកម្រិតមធ្យម ជាមួយនឹងព្យុះត្រូពិក ១៧លើក រួមទាំងព្យះសង្ឃរា ៩លើក ក្នុងនោះព្យុះចំនួន ៤ គឺជាព្យុះកំណាច ៕

មេដឹកនាំចិន និងអាល្លឺម៉ង់ សង្កត់ធ្ងន់ពីទំនាក់ទំនងល្អជួយឲ្យឆ្លងភាពចលាចលពាណិជ្ជកម្ម

ប្រធានាធិបតីចិន លោក ស៊ី ជីនពីង (Xi Jinping) និងអធិការបតីអាល្លឺម៉ង់ លោក Friedrich Merz អំឡុងពេលសន្ទនាគ្នាតាមទូរសព្ទ នាថ្ងៃសុក្រ (ទី២៣ ខែឧសភា) បានលើកឡើងពីសារៈសំខាន់នៃទំនាក់ទំនងរបស់ប្រទេសទាំង២ ខណៈដែលទាំងចិន និងអឺរ៉ុប កំពុងព្យាយាមដោះស្រាយភាពមិនច្បាស់លាស់ដែលបណ្តាលមកពីគោលនយោបាយពន្ធរបស់សហរដ្ឋអាមេរិក។អឺរ៉ុប និងចិន គឺស្ថិតនៅក្នុងចំណោមដៃគូពាណិជ្ជកម្មដ៏ធំបំផុតរបស់សហរដ្ឋអាមេរិក និងមានទំនាក់ទំនងពាណិជ្ជកម្មយ៉ាងស៊ីជម្រៅជាមួយគ្នាទៅវិញទៅមក។ យោងតាមតួលេខផ្លូវការ បានឲ្យដឹងថា ទំហំពាណិជ្ជកម្មចិន-អាល្លឺម៉ង់តែមួយ មានប្រហែល ២៤៦ពាន់លានអឺរ៉ូ (២៧៩ពាន់លានដុល្លារ) កាលពីឆ្នាំមុន។អាល្លឺម៉ង់បានស្វែងរកសមតុល្យដ៏លំបាកមួយ នៅប៉ុន្មានឆ្នាំចុងក្រោយនេះ ក្នុងទំនាក់ទំនងជាមួយប្រទេសចិន ដែលទីក្រុងប៊ែរឡាំងមើលឃើញថា ទាំងជាគូប្រជែងយុទ្ធសាស្ត្រ និងជាដៃគូពាណិជ្ជកម្មដ៏សំខាន់ ដែលទីផ្សារដ៏ធំរបស់ខ្លួន បានជំរុញសេដ្ឋកិច្ចពឹងផ្អែកលើការនាំចេញដ៏ធំរបស់អាល្លឺម៉ង់។ទូរទស្សន៍ផ្លូវការ CCTV បានរាយការណ៍ថា ក្នុងជំនួបតាមទូរសព្ទនោះ លោក ស៊ី បានកត់សម្គាល់ពីការផ្លាស់ប្តូរនៅក្នុងពិភពលោកដែលមិនធ្លាប់បានឃើញ ក្នុងរយៈពេល ១សតវត្សរ៍ ដោយមានទាំង «ភាពចលាចល និងការផ្លាស់ប្តូរដ៏ធំ»។លោក ស៊ី ត្រូវបានដកស្រង់សម្តីដែលបានលើកឡើងថា៖ «ប្រទេសចិនមានឆន្ទៈ ក្នុងការធ្វើការជាមួយប្រទេសអាល្លឺម៉ង់ ដើម្បីបើកទំព័រថ្មី នៅក្នុងភាពជាដៃគូយុទ្ធសាស្ត្រគ្រប់ជ្រុងជ្រោយរបស់ប្រទេសទាំង២ ដើម្បីធ្វើឲ្យទំនាក់ទំនងចិន-សហភាពអឺរ៉ុបឆ្ពោះទៅរកវឌ្ឍនភាពថ្មី និងដើម្បីរួមចំណែកដល់កំណើនដ៏មានស្ថិរភាពនៃសេដ្ឋកិច្ចសកល»។ចំណែកអ្នកនាំពាក្យរបស់លោក Merz បានឲ្យដឹងថា មេដឹកនាំទាំង២ បានសង្កត់ធ្ងន់លើឆន្ទៈរបស់ពួកលោក ក្នុងការសហការ ដើម្បីជម្នះលើបញ្ហាប្រឈមជាសកល៕

ពលរដ្ឋជម្លៀសខ្លួនពីការវាយប្រហាររបស់ក្រុមជីវពលនៅនីហ្សេរីយ៉ា ចាប់ផ្តើមវិលត្រឡប់មកកាន់ផ្ទះសម្បែងវិញ

ក្រោយជម្លៀសខ្លួនពីភូមិដ្ឋានរបស់ពួកគេដោយសារការវាយប្រហាររបស់ក្រុមជីវពលអ៊ិស្លាមនៅរដ្ឋភាគឦសាន Borno របស់នីហ្សេរីយ៉ាក្នុងខែនេះ ប្រជាពលរដ្ឋរាប់ពាន់គ្រួសារចាប់ផ្តើមវិលត្រឡប់មកាន់ផ្ទះសម្បែងរបស់ពួកគេវិញហើយ ក្រោមការការពារពីយោធា ។អភិបាលរដ្ឋ Borno លោក Babagana Zulum និយាយថា ពលរដ្ឋដែលជម្លៀសខ្លួនរស់នៅក្នុងជំរំនៅទីក្រុង Dikwa បានក្លាយជាការគំរាមធំ ដោយសារយុវជន ងាយរងគ្រោះនៃការជ្រើសរើសដោយក្រុមបះបោរ ។គួរឲ្យដឹងថា មនុស្សយ៉ាងហោច ២ម៉ឺននាក់ បានរត់ភៀសខ្លួនចេញពីទីក្រុង Marte ទៅកាន់ទីក្រុង Dikwa កាលពីថ្ងៃទី ១៩ ខែឧសភា បន្ទាប់ពីការកើនឡើងការវាយប្រហាររបស់ក្រុមជីវពលអ៊ិស្លាមនៅរដ្ឋ Borno ពោលគឺរយៈពេល ៤ឆ្នាំក្រោយប្រជាពលរដ្ឋវិលត្រឡប់មកកាន់ទីក្រុងរបស់ពួកគេវិញដែលធ្លាប់គ្រប់គ្រងដោយក្រុមបះបោរ ។ ទីក្រុង Marte ស្ថិតនៅជាប់ព្រំដែនជាមួយប្រទេសកាមរូន ។រដ្ឋ Borno បានមើលឃើញការហក់ឡើងខ្ពស់ការវាយប្រហាររបស់ក្រុមឧទ្ទាមសង្ស័យ Boko Haram និងក្រុមអ៊ិស្លាម ISWAP នៅក្នុងឆ្នាំនេះ ជាហេតុធ្វើឲ្យកើតមានក្តីបារម្ភថា ក្រុមជីវពលនឹងណ្តើមកាន់តំបន់មួយចំនួនឡើងវិញ ក្រោយរយៈពេលច្រើនឆ្នាំនៃការវាយប្រហាររបស់យោធានីហ្សេរីយ៉ា ៕

បណ្ដាញសង្គម

ព័ត៌មានថ្មីៗ

លោក Kim និយាយថា ឋានៈដ៏ច្បាស់លាស់របស់កូរ៉េខាងជើង មិនអាចកែប្រែបានឡើយ

នាយករដ្ឋមន្ត្រីកាតានិយាយថា គ្មានអ្វីនឹងរារាំងតួនាទីសម្របសម្រួលរបស់ប្រទេសកាតាទេ

អាមេរិកត្រៀមជាស្រេចក្នុងការបន្ថែមពន្ធកំណត់គោលដៅលើអ្នកទិញប្រេងពីរុស្ស៊ី ប្រសិនបើអឺរ៉ុបមានវិធានការស្រដៀងគ្នា

លោក Trump និងនាយករដ្ឋមន្រ្តីឥណ្ឌា Modi គ្រោងពិភាក្សាពីពាណិជ្ជកម្មនៅប៉ុន្មានសប្តាហ៍ខាងមុខនេះ

ការវាយប្រហារតាមអាកាសរបស់រុស្ស៊ី លើភូមិភាគខាងកើតអ៊ុយក្រែន សម្លាប់និវត្តន៍ជនជាង ២០នាក់

អាជ្ញាធរខេត្តប៉ៃលិន គ្រោងកែលម្អបន្ថែមនៅចំណុចជ្រោះសែនសុខ ដើម្បីលើកកម្ពស់វិស័យទេសចរណ៍

ក្រសួងការពារជាតិ៖ កិច្ចប្រជុំពិសេសលើកទី១ គណៈកម្មាធិការ GBC កម្ពុជា-ថៃ ព្រឹកនេះ ដើម្បីពិនិត្យលើលទ្ធផលនៃការអនុវត្តគោលការណ៍ឯកភាពគ្នាដែលសម្រេចបាន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877