នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
អ្នកការទូត៖លោក MACRON ទទួលខុសត្រូវផ្ទាល់ខ្លួនចំពោះភាពជាប់គាំងក្នុងទំនាក់ទំនងបារាំង-រុស្ស៊ី
រុស្ស៊ីបដិសេធការដាក់សម្ពាធលើបេឡារុសឲ្យគាំទ្រការពង្រីកជម្លោះអ៊ុយក្រែន ខណៈក្រុងMinskបន្ទោសលោកខាងលិច
ការវាយប្រហារដោយដ្រូនរបស់អ៊ុយក្រែនលើរុស្ស៊ី បានបណ្តាលឲ្យមានអ្នកស្លាប់និងរបួសនៅតំបន់គ្រីម៉េ
ការវាយប្រហាររបស់អ៊ីស្រាអែលបានសម្លាប់ជនស៊ីវិល ៤.២៣០នាក់ នៅលីបង់ ចាប់តាំងពីថ្ងៃទី ២ ខែ មីនា

ព័ត៌មានអន្តរជាតិ

មនុស្ស ១២នាក់ស្លាប់ ក្នុងហេតុការណ៍ធ្លាក់យន្តហោះនៅរដ្ឋ Missouri សហរដ្ឋអាមេរិក

2026/06/15 06:21:34 pm        37
Facebook Telegram Linkin
ប្រតិបត្តិករយន្តហោះ Skydive Kansas City និយាយថា អ្នកលោតឆ័ត្រយោង ១១នាក់ និងអ្នកបើកបរយន្តហោះម្នាក់ បានស្លាប់ ក្នុងហេតុការណ៍ធ្លាក់យន្តហោះឯកជនមួយគ្រឿងកាលពីថ្ងៃអាទិត្យ នៅទីក្រុង Butler រដ្ឋ Missouri សហរដ្ឋអាមេរិក ។តម្រួតផ្លូវហាយវ៉េរដ្ឋ Missouri និយាយថា ហេតុការណ៍ធ្លាក់យន្តហោះនេះ បានកើតឡើងនៅជិតអាកាសយានដ្ឋាន Butler Memorial ស្ថិតនៅចម្ងាយប្រហែល ១០០គ.ម ភាគខាងត្បូងទីក្រុង Kansas ។លោក Justin Ewing គឺជាពលបាលតម្រួតផ្លូវហាយវ៉េរដ្ឋ Missouri និយាយថា ក្រុម NTSB និងក្រុម FAA កំពុងដឹកនាំការស៊ើបអង្កេត ដើម្បីកំណត់មូលហេតុបណ្តាលឲ្យហេតុការណ៍ធ្លាក់យន្តហោះនេះ កើតឡើង ។ចំណែកឯលោក Dennis Jacobs គឺអ្នកគ្រប់គ្រងអាកាសយានដ្ឋានស្តីទី និយាយប្រាប់ទីភ្នាក់ងារព័ត៌មានរ៉យទ័រថា យន្តហោះម៉ាស៊ីន ១ បានហោះឡើងកាលពីវេលាម៉ោង ១១ និង ២០នាទីព្រឹក ម៉ោងក្នុងស្រុក ប៉ុន្តែវាមិនអាចហោះឡើងដល់រយៈកម្ពស់មើលឃើញនោះទេ មុនពេលវាបត់ឆ្វេងយ៉ាងលឿន និងធ្លាក់នៅចម្ងាយប្រហែល ២៧៤ម៉ែត្រប៉ុណ្ណោះ ពីផ្លូវរត់ ។លោក Jacobs បន្តថា ក្រុម NTSB បានកំណត់អត្តសញ្ញាណយន្តហោះមួយនេះថា ជាប្រភេទយន្តហោះ Pacific Aerospace 750XL ។ ពួកគេថា របាយការណ៍ចុងក្រោយលើលទ្ធភាពបណ្តាលឲ្យយន្តហោះធ្លាក់ ត្រូវបានគេរំពឹងថា នឹងចំណាយពេលចន្លោះពី ១២ខែ ទៅ ២៤ខែ ៕

បុត្រារបស់ម្ចាស់ក្សត្រីយ៍ន័រវ៉ែស​ ត្រូវបានរកឃើញថា មានទោសពីបទរំលោភសេពសន្ថវៈ ២ករណី

2026/06/15 06:18:54 pm        42
Facebook Telegram Linkin
ព្រះ​អង្គម្ចាស់​ Marius Borg Høiby ដែលជាព្រះរាជបុត្រាមាន​ព្រះជន្ម ២៩​ឆ្នាំរបស់ម្ចាស់ក្សត្រីយ៍នៃ​ប្រទេស​ន័រវ៉ែស គឺ​ព្រះនាង​ម្ចាស់​ Mette-Marit ត្រូវបានរកឃើញថា មានទោសពីបទរំលោភសេពសន្ថវៈចំនួន ២ករណី និងត្រូវបានកាត់ទោសឲ្យ​ជាប់ពន្ធនាគាររយៈពេល ៤ឆ្នាំ។ចៅក្រមទាំង ៣ នៅក្នុងបន្ទប់សវនាការលេខ២៥០​ នៅតុលាការក្រុង​អូស្លូ (Oslo District Court) បានសម្រេច​ឲ្យ​ព្រះ​អង្គរួ​ចទោសពីបទរំលោភសេពសន្ថវៈ ២ករណីផ្សេងទៀត ប៉ុន្តែបានរកឃើញថា ព្រះអង្គមានទោស សម្រាប់​បទល្មើស​ជាច្រើនករណី​ទៀតដែលព្រះ​រាជបុត្រា​អង្គនេះ​ត្រូវបានចោទប្រកាន់​។ ទ្រង់​ Høiby មិនមាន​ព្រះរាជវត្តមានដោយ​ផ្ទាល់​​នៅតុលាការនោះទេ សម្រាប់សាលក្រមនេះ​ ប៉ុន្តែបានចូលរួមដំណើរការនេះ​តាមរយៈតំណភ្ជាប់វីដេអូ។ព្រះរាជអាជ្ញាបានស្វែង​រក​ឲ្យ​ព្រះអង្គម្ចាស់​ Høiby ជាប់ពន្ធនាគាររយៈពេល ៧ឆ្នាំ និង ៧ខែ។ មេធាវីការពារក្តីរបស់ព្រះអង្គបានអំពាវនាវ​ឲ្យ​មានការជាប់ពន្ធនាគារតិចជាង ១៨​ខែ ហើយអាចប្តឹងឧទ្ធរណ៍ជំទាស់​នឹង​សាលក្រមនេះ​។ បន្ទាប់ពីមាន​សាលក្រមនេះ​ មេធាវីការពារក្តីរបស់ទ្រង់​ Høiby គឺលោក Petar Sekulic បានស្នើសុំតុលាការម្តងទៀតឲ្យមាន​ការដោះលែងព្រះអង្គ។ព្រះអង្គម្ចាស់​ Høiby បានបដិសេធការចោទប្រកាន់បទរំលោភសេពសន្ថវៈទាំង​ ៤ករណី ប៉ុន្តែចៅក្រមបានកាត់ទោសព្រះ​អង្គ​ពីបទរំលោភស្ត្រី ២នាក់ ក្នុង​នោះ​រួមទាំងម្នាក់ធ្វើការនៅ​អចលនទ្រព្យ​​របស់ព្រះអង្គ នៅទីក្រុង​ Skaugum ក្នុងឆ្នាំ២០១៨ និងម្នាក់ទៀតពាក់ព័ន្ធនឹងស្ត្រីម្នាក់ នៅទីក្រុង Oslo ក្នុងឆ្នាំ២០២៤។សំណុំរឿងប្ដឹង​ព្រះអង្គម្ចាស់​ Høiby ពាក់ព័ន្ធនឹងស្ត្រី ៦នាក់ ប៉ុន្តែមានតែស្ត្រីម្នាក់ប៉ុណ្ណោះដែលមាន​វត្តមាន​នៅក្នុងតុលាការ ដើម្បីស្តាប់សាលក្រម៕

ពលរដ្ឋអ៊ីស្រាអែលបង្ហាញការមិនពេញចិត្តនឹងកិច្ចព្រមព្រៀងសន្តិភាពរវាងអាមេរិក និងអ៊ីរ៉ង់

2026/06/15 06:16:24 pm        43
Facebook Telegram Linkin
នៅថ្ងៃចន្ទនេះ ប្រជាលពលរដ្ឋអ៊ីស្រាអែល បានបង្ហាញពីអារម្មណ៍មិនសប្បាយចិត្តរបស់ពួកគេចំពោះកិច្ចព្រមព្រៀងសន្តិភាពរវាងអាមេរិក និងអ៊ីរ៉ង់ ។លោក Tomer Zafrir គឺជាពលរដ្ឋអ៊ីស្រាអែលវ័យ ២៧ឆ្នាំមួយរូប និយាយថា លោកមិនគិតថា វានឹងមានជាយូរអង្វែងនោះទេ ពីព្រោះថា អ៊ីរ៉ង់សន្យាថានឹងបំផ្លាញអ៊ីស្រាអែល ។ ដូច្នេះហើយ ពេលអ្នកចុះហត្ថលេខាលើកិច្ចព្រមព្រៀងជាមួយពួកគេ វាគ្រាន់តែជាការពន្យាពេលប៉ុណ្ណោះ ពន្យាពេលគោលបំណងរបស់ពួកគេ ដើម្បីបំផ្លាញអ៊ីស្រាអែល ហើយនិងអាមេរិក ។លោកបន្តថា លោកចង់ឲ្យមានសន្តិភាពរវាងអ៊ីស្រាអែល និងអ៊ីរ៉ង់ ប៉ុន្តែវានឹងមិនមានជាយូរអង្វែងនោះទេ គាត់ហ៊ានភ្នាល់ ។ចំណែកឯអ្នកនាង Yael Alon គឺជានិស្សិតអ៊ីស្រាអែលវ័យ ២៥ឆ្នាំមួយរូប និយាយដែរថា អ្នកនាងរស់នៅតំបន់ភាគខាងជើងប្រទេស ហើយអ្នកនាងមិនពេញចិត្តនឹងវានោះឡើយ ។ អ្នកនាងគិតថា វាអាចចំណាយពេលត្រឹម ២ឆ្នាំ រហូតដល់ លោក Trumpបញ្ចប់អាណត្តិរបស់លោក ហើយបន្ទាប់មក ពួកយើងនឹងវិលត្រឡប់មករករឿងតែមួយ ។ដោយឡែកលោកតា Yechiel Israeli វ័យ ៧៧ឆ្នាំ ដែលជាពលរដ្ឋអ៊ីស្រាអែលដែរនោះ និយាយថា វាគឺជាកិច្ចព្រមព្រៀងមិនល្អនោះទេ ពេលដែលគាត់ទទួលបានព័ត៌មាននៅលើបណ្តាញព័ត៌មានសង្គម ហើយគាត់ឮពីអ៊ីរ៉ង់ និងអាមេរិក ។លោកតាបន្តថា គាត់មិនយល់ពីលោក Trumpនោះទេ ។ ម្យ៉ាងវិញទៀត ពួកយើងធ្វើសង្រ្គាមជាមួយពួកគេ តែបែរជាពួកគេឆ្ពោះទៅមុខបែបហ្នឹងទៅវិញ ហើយតាមគំនិតរបស់គាត់ ពួកគេគឺជាអ្នកឈ្នះសង្រ្គាមមួយនេះ ពួកគេទទួលបានប្រាក់ របបក៏ពុំបានដួលរលំ ហើយតាមទស្សនៈរបស់គាត់ វាគឺជាគ្រោះមហន្តរាយមួយ ។សូមបញ្ជាក់ថា មុនពេលកិច្ចព្រមព្រៀងត្រូវបានប្រកាស មន្រ្តីជាន់ខ្ពស់មួយរូបរបស់អ៊ីរ៉ង់និយាយប្រាប់ទីភ្នាក់ងារព័ត៌មានរ៉យទ័រថា ក្រោមលក្ខខណ្ឌនៃសេចក្តីព្រាង សហរដ្ឋអាមេរិកយល់ព្រមបញ្ចេញទ្រព្យសកម្មបង្កកតម្លៃ ២៥ពាន់លានដុល្លាររបស់អ៊ីរ៉ង់ ៕

លីបង់ព្រមានជនភៀសខ្លួនកុំឲ្យប្រញាប់វិលត្រឡប់ទៅផ្ទះវិញបន្ទាប់ពីកិច្ចព្រមព្រៀងរវាងអាមេរិក និងអ៊ីរ៉ង់

2026/06/15 06:13:36 pm        40
Facebook Telegram Linkin
ក្រុមអាជ្ញាធរនៅភាគខាងត្បូងប្រទេសលីបង់បានព្រមានប្រជាជនដែលផ្លាស់ទីលំនៅដោយសារសង្គ្រាមរយៈពេលបីខែរវាងអ៊ីស្រាអែល និងហេសបូឡា កុំឲ្យប្រញាប់វិលត្រឡប់ទៅផ្ទះវិញនៅថ្ងៃចន្ទ ១៥មិថុនានេះ ទោះបីជាមានកិច្ចព្រមព្រៀងរវាងអាមេរិក និងអ៊ីរ៉ង់ដើម្បីបញ្ចប់ជម្លោះកាន់តែទូលំទូលាយក៏ដោយ ខណៈអ៊ីស្រាអែលនិយាយថា ខ្លួននឹងមិនដកកងទ័ពចេញពីភាគខាងត្បូងឡើយ។ប្រទេសលីបង់បានរងគ្រោះពីការហៀរចេញនៃសង្គ្រាមដ៏សាហាវបំផុតពីជម្លោះរវាងអាមេរិក និងអ៊ីរ៉ង់ ដោយមនុស្សរាប់ពាន់នាក់ត្រូវបានសម្លាប់ និងមនុស្សប្រហែល១,២លាននាក់ត្រូវបានបណ្តេញចេញពីផ្ទះសម្បែងដោយសារការវាយលុករបស់អ៊ីស្រាអែលប្រឆាំងក្រុមហេសបូឡាគាំទ្រដោយអ៊ីរ៉ង់ ដែលបានបាញ់ប្រហារលើអ៊ីស្រាអែលដើម្បីគាំទ្រទីក្រុងតេអេរ៉ង់កាលពីថ្ងៃទី២មីនា ឆ្នាំ២០២៦នេះ។ នាយករដ្ឋមន្ត្រីប៉ាគីស្ថាន លោក Shehbaz Sharif ដែលជាអ្នកសម្របសម្រួលដ៏សំខាន់រវាងទីក្រុងតេអេរ៉ង់ និងទីក្រុងវ៉ាស៊ីនតោន បានប្រកាសថា កិច្ចព្រមព្រៀងមួយត្រូវបានធ្វើឡើងនៅព្រឹកថ្ងៃចន្ទ ១៥មិថុនានេះ ម៉ោងក្នុងស្រុក ហើយថា កិច្ចព្រមព្រៀងនេះបានអំពាវនាវឱ្យមាន "ការបញ្ចប់ប្រតិបត្តិការយោធាជាបន្ទាន់ និងជាអចិន្ត្រៃយ៍នៅគ្រប់ទិសទី រួមទាំងនៅលីបង់ផងដែរ។នៅភាគខាងត្បូងលីបង់ ជាទីកងកម្លាំងអ៊ីស្រាអែលបានកាន់កាប់តំបន់សន្តិសុខដែលប្រកាសដោយខ្លួនឯង ក្រុមប្រឹក្សាក្រុងបានចេញសេចក្តីថ្លែងការណ៍អំពាវនាវដល់ប្រជាពលរដ្ឋឱ្យពន្យារពេលការវិលត្រឡប់វិញ នេះបើយោងតាមទីភ្នាក់ងារសារព័ត៌មានជាតិគ្រប់គ្រងដោយរដ្ឋ។ Mona Mazeh ជាស្ត្រីដែលត្រូវបានបណ្តេញចេញពីលំនៅឋានក្នុងស្រុក ហាំរ៉ា (Hamra) ក្រុងបេរូត គ្មានគម្រោងភ្លាមៗដើម្បីត្រឡប់ទៅភូមិរបស់ខ្លួនវិញនៅជិតទីក្រុង តៃរ៉េ (Tyre)ភាគខាងត្បូងនោះទេ។ អ្នកស្រីបាននិយាយថា និយាយឲ្យត្រង់ទៅ ពួកគេស្ទាក់ស្ទើរ។ អ៊ីស្រាអែលមិនអាចទុកចិត្តបានទេ៕

ពលរដ្ឋលីបង់សង្ឃឹមថា កិច្ចព្រមព្រៀងអាមេរិក-អ៊ីរ៉ង់ នឹងនាំបទឈប់បាញ់យូរអង្វែងជាមួយអ៊ីស្រាអែល

2026/06/15 06:11:16 pm        37
Facebook Telegram Linkin
ប្រជាពលរដ្ឋលីបង់រស់នៅក្នុងទីក្រុងបេរូត បានបង្ហាញក្តីសង្ឃឹមរបស់ពួកគេនៅថ្ងៃចន្ទនេះ ក្រោយក្រុមមន្រ្តីសហរដ្ឋអាមេរិក និងអ៊ីរ៉ង់ បាននិយាយថា ពួកគេបានឈានដល់កិច្ចព្រមព្រៀង ដើម្បីបញ្ចប់សង្រ្គាមរបស់ពួកគេ និងបើកច្រកសមុទ្រ Hormuz ឡើងវិញ ។លោក Mustafa Ismail គឺជាអ្នកស្រុកមួយរូបរស់នៅក្នុងទីក្រុងបេរូតនិយាយថា បទឈប់បាញ់នេះល្អខ្លាំងណាស់ ប៉ុន្តែអ្វីដែលសំខាន់នោះ គឺត្រូវអនុវត្តវាឲ្យបានខ្ជាប់ខ្ជួន ។ចំណែកឯលោក Fouad Sarhan គឺជាពលរដ្ឋមួយរូបទៀត និយាយដែរថា ពាក់ព័ន្ធនឹងបទឈប់បាញ់នេះ បំណងព្រះបានក្លាយជាការពិតហើយ ។ទោះបីជាយ៉ាងណាក៏ដោយ លោកបានបញ្ជាក់ថា ពួកយើងមិនដែលជឿថា មានបទឈប់បាញ់ម្តងណានោះទេ ពីព្រោះថាបទឈប់បាញ់មានរយៈពេលជាច្រើនខែមកហើយ ប៉ុន្តែលីបង់នៅតែបន្តខ្ទេចខ្ទាំ លីបង់នៅតែរងការវាយប្រហារឥតឈប់ឈរពីអ៊ីស្រាអែល ។សូមបញ្ជាក់ថា លីបង់បានក្លាយជាចំណុចខ្ទាស់ដ៏ធំមួយនៅក្នុងកិច្ចចរចា ក្នុងនោះអ៊ីស្រាអែល និងក្រុមហេសបូឡា ពុំបានអើពើនោះឡើយចំពោះការអំពាវនាវឲ្យរបស់ប្រធានាធិបតីសហរដ្ឋអាមេរិកលោក Donald Trump និងមេដឹកនាំផ្សេងទៀតឲ្យបញ្ឈប់ការវាយប្រហារលើគ្នាទៅវិញទៅមករបស់ពួកគេ ក្នុងរយៈពេលប៉ុន្មានសប្តាហ៍ចុងក្រោយនេះ ៕

ពលរដ្ឋជម្លៀសខ្លួនលីបង់និយាយថា ពួកគេត្រូវការពេលពេញមួយជីវិតដើម្បីកសាងទីក្រុងរបស់ខ្លួនឡើងវិញ

2026/06/15 06:08:45 pm        38
Facebook Telegram Linkin
នៅថ្ងៃចន្ទនេះ ប្រជាពលរដ្ឋលីបង់ជម្លៀសខ្លួន បានធ្វើដំណើរទៅកាន់ទីក្រុងកំណើត Nabatieh របស់ពួកគេវិញ ដើម្បីពិនិត្យមើលទ្រព្យសម្បត្តិរបស់ពួកគេ និងការខ្ទេចខ្ទាំនៅក្នុងទីក្រុងមួយនេះ ។លោក Mohammed Daqdouq គឺជាពលរដ្ឋជម្លៀសខ្លួនមួយរូបនិយាយថា លោកមានអារម្មណ៍ថា វាគឺជាគ្រោះមហន្តរាយ ។ តើអ្វីទៅដែលអ្នកអាចធ្វើបាននោះ? វាគឺជាគ្រោះមហន្តរាយ ។ ពួកយើងត្រូវការពេលពេញមួយជីវិតរបស់ពួកយើង ដើម្បីកសាងទីក្រុងមួយនេះឡើងវិញ ដើម្បីធ្វើឲ្យទីក្រុង Nabatieh វិលត្រលប់មករកសភាពដើមវិញកាលពីមុនសង្រ្គាមផ្ទុះឡើង ។ក្រុមមន្រ្តីសហរដ្ឋអាមេរិក និងអ៊ីរ៉ង់ បាននិយាយថា ពួកគេបានឈានដល់កិច្ចព្រមព្រៀង ដើម្បីបញ្ចប់សង្រ្គាមរបស់ពួកគេ និងបើកច្រកសមុទ្រ Hormuz ឡើងវិញ ។ស្របពេលដែលនៅមានក្របខណ្ឌមួយ កិច្ចព្រមព្រៀងនេះ បានក្លាយជាការទម្លុះភាពទាល់ច្រកធំបំផុតឆ្ពោះទៅរកការដោះស្រាយជម្លោះដែលបានសម្លាប់មនុស្សរាប់ពាន់នាក់ និងធ្វើឲ្យរង្គោះរង្គើរដល់ទីផ្សារថាមពល ចាប់តាំងពីវាចាប់ផ្តើមជាមួយនឹងការវាយប្រហាររួមដៃគ្នារវាងសហរដ្ឋអាមេរិក និងអ៊ីស្រាអែល លើអ៊ីរ៉ង់កាលពីខែកុម្ភៈ ។ខណៈពេលនោះដែរ លេខាធិការដ្ឋាននៃក្រុមប្រឹក្សាសន្តិសុខជាតិកំពូលអ៊ីរ៉ង់និយាយនៅក្នុងសេចក្តីថ្លែងការណ៍ថា សង្រ្គាម និងប្រតិបត្តិការសឹកនៅជួរមុខទាំងអស់ រួមទាំងនៅលីបង់ នឹងត្រូវបញ្ចប់ជាអចិន្រ្តៃយ៍ចាប់ពីយប់ថ្ងៃចន្ទនេះតទៅ ។ទោះបីជាយ៉ាងណាក៏ដោយ រដ្ឋមន្រ្តីការពារជាតិអ៊ីស្រាអែលលោក Israel Katz និយាយក្នុងសេចក្តីថ្លែងការណ៍នាថ្ងៃចន្ទនេះថា អ៊ីស្រាអែលនឹងមិនដកទ័ពចេញដែនដីដែលពួកគេរឹបអូសបាននោះទេនៅប្រទេសលីបង់ ហើយបើសិនជាអ៊ីរ៉ង់វាយប្រហារអ៊ីស្រាអែល ដោយសារករណីនៅលើបង់ អ៊ីស្រាអែលនឹងសងសឹកវិញ ៕

នាវាពាណិជ្ជកម្មដោតទង់ជាតិសហរដ្ឋអាមេរិក ២គ្រឿង ធ្វើដំណើរឆ្លងកាត់ច្រកសមុទ្រ Hormuz

2026/06/15 06:06:24 pm        65
Facebook Telegram Linkin
ទីបញ្ជាការកណ្តាលសហរដ្ឋអាមេរិកនិយាយថា នៅថ្ងៃចន្ទនេះ នាវាពាណិជ្ជកម្មដោតទង់ជាតិសហរដ្ឋអាមេរិក ២គ្រឿង បានធ្វើដំណើរឆ្លងកាត់ច្រកសមុទ្រ Hormuz ស្របពេលដែលនាវាពិឃាតបំពាក់មីស៊ីលតម្រង់គោលដៅកងទ័ពជើងទឹកអាមេរិក ប្រតិបត្តិការនៅតំបន់ឈូងសមុទ្រ ។ពួកគេនិយាយនៅក្នុងសេចក្តីថ្លែងការណ៍ថា កងកម្លាំងអាមេរិក កំពុងជួយយ៉ាងសកម្មដល់កិច្ចខិតខំស្តាឡើងវិញការឆ្លងកាត់សម្រាប់ការដឹកជញ្ជូនពាណិជ្ជកម្ម ។នៅមុននេះ អ៊ីរ៉ង់និយាយថា ពួកគេបានបង្ខំឲ្យនាវាចម្បាំងសហរដ្ឋអាមេរិកបកក្រោយវិញ ពីការចូលក្នុងច្រកសមុទ្រ Hormuz បើទោះបីជាទីបញ្ជាការកណ្តាលសហរដ្ឋអាមេរិក ច្រានចោលភ្លាមនូវសេចក្តីការណ៍ពីការវាយប្រហារមីស៊ីលក៏ដោយ ។មន្រ្តីជាន់ខ្ពស់មួយរូបរបស់អ៊ីរ៉ង់និយាយប្រាប់ទីភ្នាក់ងារព័ត៌មានរ៉យទ័រថា អ៊ីរ៉ង់បានបាញ់ព្រមាន ហើយពួកគេពុំបានដឹងច្បាស់នោះទេថាតើ នាវាចម្បាំងមួយគ្រឿងនេះ រងការខូចខាតយ៉ាងណានោះទេ ។សូមបញ្ជាក់ថា កិច្ចព្រមព្រៀងសន្តិភាព ត្រូវបានឈានដល់រវាងសហរដ្ឋអាមេរិក និងអ៊ីរ៉ង់ ដើម្បីបញ្ចប់សង្រ្គាមរបស់ពួកគេ ក្នុងនោះអនុស្សរណៈយោគយល់ត្រូវបានគេកំណត់ឲ្យចុះហត្ថលេខាជាផ្លូវការនៅថ្ងៃសុក្រខាងមុខនេះ ក្នុងប្រទេសស្វីស ខណៈដែលលក្ខខ័ណ្ឌច្បាស់លាស់ ពុំត្រូវបានគេដឹងភ្លាមៗនោះទេ ៕

Ebola កើនឡើងដល់ ៧៨២ករណី នៅកុងហ្គោ ខណៈការផ្ទុះឡើងនៃ​ជំងឺ រាលដាលដល់តំបន់សុខភាពផ្សេង​​ទៀត

2026/06/15 06:04:03 pm        57
Facebook Telegram Linkin
អាជ្ញាធរសុខាភិបាល បានឲ្យ​ដឹង​នៅក្នុងរបាយការណ៍ស្ថានភាពចុងក្រោយរបស់ពួកគេថា ចំនួនករណី​នៃ​ជំងឺ​ Ebola ដែលត្រូវ​បានបញ្ជាក់នៅក្នុងសាធារណរដ្ឋប្រជាធិបតេយ្យកុងហ្គោ បានកើនឡើងដល់ ៧៨២ករណី ក្នុង​នោះ​រួមមាន​អ្នកស្លាប់ ១៧៨ករណី​ ខណៈដែលការផ្ទុះឡើងបានរីករាលដាលដល់តំបន់សុខភាព ២បន្ថែមទៀត។យោងតាមរបាយការណ៍ដែលត្រូវ​បានចេញផ្សាយកាលពីថ្ងៃអាទិត្យ (ទី១៤ ខែមិថុនា ឆ្នាំ២០២៦) ដោយអាជ្ញាធរសុខាភិបាលសាធារណៈរបស់ប្រទេសកុង​ហ្គោ​​ បានឲ្យ​ដឹងថា អ្នក​ឆ្លង​ថ្មីចំនួន ៧២ករណី ដែលបានត្រូវបាន​បញ្ជាក់ ដែល​រួមទាំងអ្នកស្លាប់ ២៩នាក់ផង​ដែរ​ ត្រូវបានរាយការណ៍កាល​ពី​ថ្ងៃសៅរ៍ នៅក្នុងខេត្តភាគខាងកើត គឺ​ Ituri និង North Kivu។ចំណែក​តំបន់សុខភាពដែលរងផលប៉ះពាល់ថ្មីចំនួន ២ គឺតំបន់​ Nia-Nia ក្នុងខេត្ត​ Ituri និងតំបន់​ Mabalako ក្នុងខេត្ត​ North Kivu ដែលធ្វើ​ឲ្យ​ចំនួនសរុបនៃតំបន់សុខភាពដែលរងផលប៉ះពាល់ឡើងដល់ ៣១ ហើយ​ នៅទូទាំងខេត្តចំនួន ៣ គឺ Ituri, North Kivu និង South Kivu។ របាយការណ៍នេះ បានឲ្យ​ដឹង​ថា អ្នកជំងឺសរុបចំនួន ៣៥៩​នាក់ ត្រូវបានដាក់ឲ្យ​នៅដាច់ដោយឡែកពីគេ ឬសម្រាកព្យាបាល នៅមន្ទីរពេទ្យ គិតត្រឹមថ្ងៃសៅរ៍ ខណៈដែលអ្នកជំងឺ ៤០​នាក់ បានជាសះស្បើយ។ជាមួយ​គ្នានេះ អាជ្ញាធរក៏បានរាយការណ៍ផង​ដែរ​ពីករណីសង្ស័យចំនួន ១៣៦​ករណី​ រួមទាំងការស្លាប់ ៤៩​​នាក់ កាលពីថ្ងៃសៅរ៍។ អ្នកដែលបានប៉ះពាល់សរុប ៦.២៧៥នាក់ កំពុងស្ថិតក្រោមការតាមដាន នៅក្នុងខេត្តដែលរងផលប៉ះពាល់ទាំង៣ ប៉ុន្តែមានតែ ៣.៥៤៨នាក់ប៉ុណ្ណោះ ដែលត្រូវបានទាក់​ទង​ពិនិត្យ​ ​ ដែលធ្វើឲ្យ​អត្រាតាមដានទំនាក់ទំនងសរុប នៅកម្រិត​ ៥៦,៥ភាគរយ ដែលទាបជាងគោលដៅ ៩៥ភាគរយ៕

សារព័ត៌មាន FT៖ BBC នឹងកាត់ការងាររាប់រយ នៅអង់គ្លេស ជា​ការ​បន្ថយផ្នែក​​ព័ត៌មានឲ្យ​កាន់តែតូច​​

2026/06/15 06:01:50 pm        38
Facebook Telegram Linkin
 ដោយដកស្រង់សម្តីពី​បុគ្គលដែលស្និទ្ធនឹងស្ថានភាពនេះ សារព័ត៌មាន Financial Times (FT) នៅថ្ងៃចន្ទ (ទី១៥ ខែមិថុនា ឆ្នាំ២០២៦) នេះ បាន​រាយការណ៍​​ថា ប្រព័ន្ធ​ផ្សព្វផ្សាយ​ BBC របស់ចក្រភពអង់គ្លេស គ្រោងនឹងកាត់ការងាររាប់រយកន្លែងនៅទូទាំងផ្នែកព័ត៌មានស្នូលរបស់ខ្លួន នា​សប្តាហ៍ក្រោយ ដោយ​នេះជា​​ផ្នែកដំបូងនៃការកាត់បន្ថយទំហំ​ព័ត៌មាន​របស់ខ្លួន។យោងតាមរបាយការណ៍របស់សារព័ត៌មាន​ FT បានឲ្យដឹងថា នាយកដ្ឋានព័ត៌មាន​ នៅទូទាំងសាជីវកម្មនេះ ត្រូវបានបញ្ជាឲ្យ​កាត់បន្ថយប្រហែល ១ភាគ១០ នៃការចំណាយ ក្រោមផែនការទូលំទូលាយជាងមុន ដែលត្រូវបាន​គេ​រំពឹងថា នឹងនាំ​ឲ្យ​មានការបាត់បង់ការងារសរុបប្រហែល ២.០០០កន្លែង ដើម្បីជួយ​សន្សំប្រាក់រាប់រយលានផោន​។ផ្នែកព័ត៌មានរបស់ប្រព័ន្ធ​ផ្សព្វផ្សាយ​ BBC ត្រូវបានកំណត់ឲ្យ​ក្លាយជាផ្នែកដំបូងគេ ដែលនឹង​បង្ហាញផែនការរបស់ខ្លួន នៅសប្តាហ៍ក្រោយ។ យ៉ាង​ណាក្ដី ទីភ្នាក់ងារ​សារព័ត៌មាន​ Reuters មិនទាន់​អាចផ្ទៀងផ្ទាត់របាយការណ៍នេះបានភ្លាមៗនៅឡើយ​ទេ​៕

មហិច្ឆតាការពារលំហអាកាសរបស់ជប៉ុន បង្កើនការព្រួយបារម្ភ អំពី​យោធូបនីកម្ម​

2026/06/15 05:45:07 pm        47
Facebook Telegram Linkin
សារព័ត៌មានជប៉ុន Nihon Keizai Shimbun បានរាយការណ៍កាលពីថ្ងៃអាទិត្យ (ទី១៤ ខែមិថុនា ឆ្នាំ២០២៦) ថា រដ្ឋាភិបាលជប៉ុន មានគម្រោងរៀបចំរចនាសម្ព័ន្ធឡើងវិញ និងប្តូរឈ្មោះកងកម្លាំងស្វ័យ​ការពារដែន​អាកាសជប៉ុនទៅជាកងកម្លាំងស្វ័យ​ស​ការពារអាកាស និងលំហអាកាស ក្នុងឆ្នាំសារពើពន្ធ២០២៦ ដោយពង្រីកវិសាលភាពនៃសកម្មភាពសន្តិសុខរបស់ជប៉ុនបន្ថែមទៀត ដើម្បីរួមបញ្ចូលលំហអាកាសខាងក្រៅ។ចំណាត់​ការ​នេះបានបង្កឲ្យ​មានក្ដី​បារម្ភ អំពីការពង្រីកយោធា ក្នុងចំណោមសាធារណជនជប៉ុន។ របាយការណ៍នេះ បានឲ្យ​ដឹង​ថា ច្បាប់ពាក់ព័ន្ធ កំពុងស្ថិតក្រោមការពិភាក្សា នៅសភាជាតិ (National Diet)។ ប្រសិនបើត្រូវបានអនុម័តមែន​នោះ​ វានឹងក្លាយ​ជា​ការផ្លាស់ប្តូរលើកដំបូង សម្រាប់​ឈ្មោះកងកម្លាំងស្វ័យ​ការពាររបស់ជប៉ុន ចាប់តាំងពីការបង្កើតកងកម្លាំងស្វ័យ​ការពារដែន​គោក សមុទ្រ និងអាកាស ក្នុងឆ្នាំ១៩៥៤។យោង​តាម​របាយការណ៍នេះ​ បាន​បង្ហាញ​ថា ចេតនារបស់រដ្ឋាភិបាល គឺដើម្បីកំណត់ជាផ្លូវការនូវលំហអាកាសខាងក្រៅជាដែនប្រតិបត្តិការមួយរបស់កងកម្លាំងស្វ័យ​ការពារ។ របាយការណ៍នេះបានកត់សម្គាល់ថា «នេះមិនមែនគ្រាន់តែជាការផ្លាស់ប្តូរឈ្មោះនោះទេ ប៉ុន្តែជាព្រឹត្តិការណ៍សំខាន់មួយ ក្នុងការពង្រីកគំនិតសន្តិសុខរបស់ជប៉ុន»។ចំណាត់​ការ​ទាំងនេះបានបន្តបង្កើនក្ដី​បារម្ភ ក្នុងចំណោមសាធារណជនជប៉ុន។ នៅក្នុងផ្នែកការ​បញ្ចេញ​មតិយោបល់ នៅក្រោមរបាយការណ៍ព័ត៌មានពាក់ព័ន្ធ អ្នកប្រើប្រាស់ប្រព័ន្ធ​អ៊ីនធឺណិតជប៉ុនជាច្រើន បានចោទ​សួរអំពីការពង្រីក «ដែនសន្តិសុខ» ជាបន្តបន្ទាប់របស់រដ្ឋាភិបាល និងការបង្កើន​ការចំណាយលើវិស័យ​ការពារជាតិ ដោយអះអាងថា វិធានការបែបនេះ នឹងរឹតបន្តឹងដល់​មូលនិធិ សម្រាប់សុខុមាលភាពសាធារណៈបន្ថែមទៀត និងដាក់បន្ទុកកាន់តែធ្ងន់លើពលរដ្ឋ៕

បណ្ដាញសង្គម

ព័ត៌មានថ្មីៗ

អ្នកការទូត៖លោក MACRON ទទួលខុសត្រូវផ្ទាល់ខ្លួនចំពោះភាពជាប់គាំងក្នុងទំនាក់ទំនងបារាំង-រុស្ស៊ី
06/26/2026 04:06 PM
Facebook Telegram Linkin
រុស្ស៊ីបដិសេធការដាក់សម្ពាធលើបេឡារុសឲ្យគាំទ្រការពង្រីកជម្លោះអ៊ុយក្រែន ខណៈក្រុងMinskបន្ទោសលោកខាងលិច
06/26/2026 04:06 PM
Facebook Telegram Linkin
ការវាយប្រហារដោយដ្រូនរបស់អ៊ុយក្រែនលើរុស្ស៊ី បានបណ្តាលឲ្យមានអ្នកស្លាប់និងរបួសនៅតំបន់គ្រីម៉េ
06/26/2026 03:06 PM
Facebook Telegram Linkin
ការវាយប្រហាររបស់អ៊ីស្រាអែលបានសម្លាប់ជនស៊ីវិល ៤.២៣០នាក់ នៅលីបង់ ចាប់តាំងពីថ្ងៃទី ២ ខែ មីនា
06/26/2026 03:06 PM
Facebook Telegram Linkin
សហរដ្ឋអាមេរិក និងប្រទេសឈូងសមុទ្របដិសេធលទ្ធភាពនៃការយកពន្ធគយនៅច្រកសមុទ្រហ័រមូស
06/26/2026 03:06 PM
Facebook Telegram Linkin
រដ្ឋឈូងសមុទ្រ៖ កងកម្លាំងតំណាង និងមីស៊ីលរបស់អ៊ីរ៉ង់ ត្រូវតែដោះស្រាយ ដើម្បីសន្តិភាពយូរអង្វែង
06/26/2026 03:06 PM
Facebook Telegram Linkin
អ្នកចរចាជាន់ខ្ពស់របស់អ៊ីរ៉ង់បដិសេធការអះអាងរបស់អាមេរិកអំពីការប្រើប្រាស់ទ្រព្យសកម្មដែលមិនទាន់បង្កក
06/26/2026 03:06 PM
Facebook Telegram Linkin
អបអរសាទរ! កម្ពុជាទទួលបានចំណាត់ថ្នាក់លេខ១លើពិភពលោកជាប្រទេសមានការគ្រប់គ្រង ប្រើប្រាស់ដីធ្លី និងធនធានធម្មជាតិប្រកបដោយនិរន្តរភាពឆ្នាំ២០២៦
06/26/2026 03:06 PM
Facebook Telegram Linkin
ទោះបីឡើង អ្នកគាំទ្រអាមេរិកសម្ដែងការខកចិត្តក្រោយក្រុមចាញ់តួកគី ឯអូស្ត្រាលីបានត្រឹមស្មើប៉ារ៉ាហ្កាយ
06/26/2026 02:06 PM
Facebook Telegram Linkin
អាមេរិកគំរាមកាត់បន្ថយការផ្គត់ផ្គង់ឧស្ម័នទៅឲ្យសហភាពអឺរ៉ុប ចំពេលមានជម្លោះលើច្បាប់បរិស្ថាន
06/26/2026 02:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.