BTV NEWS

អាជ្ញាធរស៊ូដង់បោសសម្អាតរថយន្តរងការបំផ្លិចបំផ្លាញ និងត្រូវបានគេលួចរាប់ពាន់គ្រឿងចេញពីផ្លូវនៅទីក្រុង Khartoum

ប៉ាឡេស្ទីនរិះគន់ការជំរុញរបស់អ៊ីស្រាអែល ដើម្បីគ្រប់គ្រងទីតាំងបុរាណនៅតំបន់វ៉េសប៊ែង

រដ្ឋមន្រ្តីអាកាសធាតុស៊ុយអែតនាំទារករបស់លោកស្រីមកចូលរួមជំនួបសហភាពអឺរ៉ុប

តម្លៃប្រេងវិលត្រឡប់មករកកម្រិតមុនសង្រ្គាមអ៊ីរ៉ង់វិញ ខណៈការផ្គត់ផ្គង់កើនឡើងពីមជ្ឈិមបូព៌ា

ព័ត៌មានអន្តរជាតិ

ក្រុមសមាជិកសភាអាមេរិកស្វែងរកថវិកា៧៥០ លានដុល្លារសម្រាប់អ៊ុយក្រែន និងប្តូរឈ្មោះមន្ទីរបញ្ចកោណជាក្រសួងសង្គ្រាម

គណៈកម្មាធិការសេវាកម្មប្រដាប់អាវុធព្រឹទ្ធសភាអាមេរិកកាលពីថ្ងៃទី ១១ ខែមិថុនា បាននិយាយថា ខ្លួនបានបោះឆ្នោតបន្តផ្ដល់ជំនួយសន្តិសុខរបស់សហរដ្ឋអាមេរិកសម្រាប់អ៊ុយក្រែន និងបង្កើនមូលនិធិដែលមានការអនុញ្ញាតដល់ ៧៥០ លានដុល្លារអាមេរិក ដែលជាការជំរុញចុងក្រោយបំផុតពីក្រុមសភាប្រឆាំងនឹងការដកជំនួយរបស់រដ្ឋបាលលោក Trump សម្រាប់ទីក្រុងគីវ ខណៈខ្លួនប្រយុទ្ធប្រឆាំងនឹងការវាយលុករបស់រុស្ស៊ី។ បុគ្គលពីររូបដែលបានដឹងសេចក្តីព្រាងច្បាប់នេះបានប្រាប់សារព័ត៌មាន Reuters ថា ច្បាប់អនុញ្ញាតការពារជាតិរបស់ព្រឹទ្ធសភា ក៏បានផ្លាស់ប្តូរឈ្មោះក្រសួងការពារជាតិទៅជាក្រសួងសង្គ្រាមផងដែរ។ គណៈកម្មាធិការសំឡេងភាគច្រើននៃគណបក្សសាធារណរដ្ឋ បាននិយាយថា ខ្លួនបានបញ្ចប់កំណែ ច្បាប់អនុញ្ញាតការពារជាតិរបស់ព្រឹទ្ធសភា របស់ខ្លួន ដែលជាគោលនយោបាយកំណត់សេចក្តីព្រាងច្បាប់ប្រចាំឆ្នាំសម្រាប់មន្ទីរបញ្ចកោណ ដែលរួមមាន ៧៥០ លានដុល្លារអាមេរិកសម្រាប់គំនិតផ្តួចផ្តើមជំនួយសន្តិសុខអ៊ុយក្រែន ដែលបង់ប្រាក់ឱ្យក្រុមហ៊ុនអាមេរិកសម្រាប់អាវុធឲ្យទៅយោធាអ៊ុយក្រែន។ សេចក្តីព្រាងច្បាប់ព្រឹទ្ធសភាដ៏ធំ ដែលគាំទ្រថវិកាសរុបចំនួន ១,១៥ សែនកោដិដុល្លារអាមេរិកសម្រាប់ការពារជាតិ កំណត់អ្វីៗគ្រប់យ៉ាងចាប់ពីចំនួននាវា យន្តហោះ និងប្រព័ន្ធមីស៊ីលដែលត្រូវបានទិញ ដើម្បីដំឡើងប្រាក់ខែសម្រាប់កងទ័ព និងរបៀបដោះស្រាយការគំរាមកំហែងភូមិសាស្ត្រនយោបាយ៕

អ៊ុយក្រែន វាយប្រហារដោយយានដ្រូនលើទីក្រុងមូស្គូជាថ្មីទៀត ខណៈក្រុងគីវអះអាងពីការដាក់គោលដៅលើរោងចក្រចម្រាញ់ប្រេង

យោងតាមអភិបាលក្រុងមូស្គូ លោក Sergey Sobyanin យានដ្រូនរបស់អ៊ុយក្រែនបានវាយប្រហារទីក្រុងមូស្គូម្តងទៀតនៅព្រឹកព្រលឹមថ្ងៃព្រហស្បតិ៍១១មិថុនាសប្ដាហ៍នេះ ជាថ្ងៃទីបួនជាប់ៗគ្នានៃការវាយប្រហាររយៈចម្ងាយឆ្ងាយរបស់អ៊ុយក្រែនលើរដ្ឋធានីរុស្ស៊ី។លោក Sobyanin បាននិយាយនៅក្នុងសារបង្ហោះលើTelegram ថា យានដ្រូនរបស់អ៊ុយក្រែនយ៉ាងហោចណាស់ ១៥ គ្រឿងត្រូវបានស្ទាក់ចាប់នៅតាមផ្លូវទៅកាន់រដ្ឋធានីពេញមួយយប់ ដោយគ្មានការខូចខាត ឬអ្នកស្លាប់ និងរបួសត្រូវបានរាយការណ៍នោះទេ។ លោក Sobyanin បាននិយាយថា ក្រុមអ្នកឆ្លើយតបបន្ទាន់ត្រូវបានបញ្ជូនទៅកន្លែងដែលដ្រូនទាំងនោះបានធ្លាក់ ឬកម្ទេចកម្ទីបានធ្លាក់។ទីភ្នាក់ងារដឹកជញ្ជូនផ្លូវអាកាសសហព័ន្ធរបស់រុស្ស៊ី Rosaviatsiya បានប្រកាសនៅលើ Telegram ថា ការរឹតបន្តឹងជើងហោះហើរបណ្តោះអាសន្នត្រូវបានណែនាំនៅអាកាសយានដ្ឋានអន្តរជាតិពីរក្នុងចំណោមអាកាសយានដ្ឋានអន្តរជាតិទាំងបួនរបស់រដ្ឋធានី គឺ អាកាសយានដ្ឋាន Vnukovo នៅភាគនិរតីនៃទីក្រុងមូស្គូ និងអាកាសយានដ្ឋាន Zhukovsky នៅភាគអាគ្នេយ៍នៃទីក្រុងនេះ។យានដ្រូនដែលបានដាក់គោលដៅលើទីក្រុងមូស្គូគឺស្ថិតក្នុងចំណោមដ្រូនអ៊ុយក្រែនយ៉ាងហោចណាស់៣៣០ គ្រឿងដែលត្រូវបានរាយការណ៍ថាត្រូវបានបាញ់ទម្លាក់ដោយក្រសួងការពារជាតិរុស្ស៊ីកាលពីយប់ថ្ងៃពុធ និងរហូតដល់ព្រឹកថ្ងៃព្រហស្បតិ៍សប្ដាហ៍នេះ ៕

ក្តីសង្ឃឹមកើនឡើងនៅក្នុងប្រទេសអ៊ីរ៉ង់ថា សង្គ្រាមដ៏មហន្តរាយអាចនឹងឈានដល់ទីបញ្ចប់

ប្រព័ន្ធផ្សព្វផ្សាយនិយាយថា យើងបានមើលឃើញពលរដ្ឋអ៊ីរ៉ង់ជាច្រើននាក់ភៀសខ្លួនចេញពីទីក្រុងតេអេរ៉ង់ និងទីក្រុងដទៃទៀតក្នុងអំឡុងសង្គ្រាមរយៈពេល ៤០ ថ្ងៃ ខណៈក៏មានទុក្ខលំបាកនៅក្នុងតំបន់ជាច្រើនរបស់ប្រទេស។ អ្នកវិភាគនិយាយថា យើងបានឃើញកុមារត្រូវបានសម្លាប់ ហើយប្រជាជនបាត់បង់លំនៅឋាន ការងារ និងជីវភាពរស់នៅរបស់ពួកគេ។ អ៊ីរ៉ង់ បានរងទុក្ខលំបាកផ្នែកសេដ្ឋកិច្ច សូម្បីតែនៅមុនពេលចាប់ផ្តើមសង្គ្រាមនេះក៏ដោយ ដែលធ្វើឱ្យសេដ្ឋកិច្ចកាន់តែធ្លាក់យ៉ាប់យ៉ឺន ហើយប្រជាជនកំពុងប្រឈមនឹងភាពអត់ការងារធ្វើ។ ដូច្នេះ ត្រូវតែមានភាពធូរស្បើយ ដែលសង្គ្រាមនេះអាចនឹងឈានដល់ទីបញ្ចប់ បន្ទាប់ពីការរងទុក្ខរយៈពេលជាច្រើនឆ្នាំ។ អាជ្ញាធរអ៊ីរ៉ង់ កំពុងកំណត់រឿងនេះថាជាជ័យជម្នះដ៏ធំធេងសម្រាប់អ៊ីរ៉ង់។ អ៊ីរ៉ង់បានស្ថិតនៅក្រោមទណ្ឌកម្ម ស្ថិតនៅក្រោមការរឹតត្បិតជាច្រើនទាំងសេដ្ឋកិច្ចនិងនយោបាយរបស់ខ្លួន និងអ្វីៗផ្សេងទៀត នៅមុនពេលសង្គ្រាម ខណៈទ្រព្យសកម្មរបស់ប្រទេស ត្រូវបានបង្កក។ ក្រុមមេដឹកនាំកំពុងប្រាប់ប្រជាជនថា ភាពអត់ធ្មត់នឹងជាលទ្ធផលដ៏ជោគជ័យ ហើយអ្វីដែលបានកើតឡើង និងទុក្ខលំបាកទាំងអស់ដែលអ៊ីរ៉ង់បានឆ្លងកាត់ក្នុងរយៈពេលប៉ុន្មានខែចុងក្រោយនេះ នឹងមានលទ្ធផលវិជ្ជមាន ព្រោះអ៊ីរ៉ង់នឹងងើបចេញពីជម្លោះ ក្នុងស្ថានភាពប្រសើរជាងមុន។

ក្រុមហេសបូឡា អះអាងការវាយប្រហារ ២៤ លើក លើកងកម្លាំងអ៊ីស្រាអែលនៅភាគខាងត្បូងប្រទេសលីបង់

ក្រុមប្រដាប់អាវុធហេសបូឡានៅលីបង់ បានប្រកាសថាខ្លួនបានបើកការវាយប្រហារជាបន្តបន្ទាប់ដោយយានដ្រូន មីស៊ីល និងរ៉ូកែត ដោយកំណត់គោលដៅលើបុគ្គលិកយោធាអ៊ីស្រាអែល រថពាសដែក និងទីតាំងនានា នៅទូទាំងភាគខាងត្បូងប្រទេសលីបង់ និងតំបន់ជ្រលងភ្នំ Bekaa ។ ក្រុមហេសបូឡា អះអាងការវាយប្រហារ ២៤ លើក លើកងកម្លាំងអ៊ីស្រាអែលនៅភាគខាងត្បូងប្រទេសលីបង់ យោងតាមសេចក្តីថ្លែងការណ៍ ដែលរៀបរាប់លម្អិតអំពីប្រតិបត្តិការចាប់ពីថ្ងៃពុធ ដល់ថ្ងៃព្រហស្បតិ៍សប្តាហ៍នេះ ក្រុមហេសបូឡា បាននិយាយថាខ្លួនបានកំណត់គោលដៅដដែលលើការប្រមូលផ្តុំទាហានអ៊ីស្រាអែល និងរថពាសដែក ជាពិសេសផ្តោតសំខាន់លើតំបន់ al-Rajman ដែលត្រូវបានវាយប្រហារចំនួនបួនលើដាច់ដោយឡែកពីគ្នា។ ក្រុមនេះ បាននិយាយថា ការប្រមូលផ្តុំកងទ័ពអ៊ីស្រាអែល និងយានយន្ត ក៏ត្រូវបានកំណត់គោលដៅនៅក្នុងទីក្រុងមួយចំនួនរបស់ប្រទេសលីបង់ ផងដែរ។

រដ្ឋមន្ត្រីការពារជាតិអង់គ្លេស លាលែងពីតំណែង ដោយស្តីបន្ទោសយ៉ាងខ្លាំងលើនាយករដ្ឋមន្ត្រី លោក Starmer

រដ្ឋមន្ត្រីការពារជាតិអង់គ្លេស លោក John Healey បានលាលែងពីតំណែងគួរឲ្យភ្ញាក់ផ្អើលកាលពីថ្ងៃព្រហស្បតិ៍ ទី១១ ខែមិថុនា ដោយបានចោទប្រកាន់នាយករដ្ឋមន្ត្រីអង់គ្លេស លោក Keir Starmer និងក្រសួងហិរញ្ញវត្ថុដែលបានរងការរិះគន់ថា មិនបានប្តេជ្ញាចំពោះការចំណាយប្រាក់គ្រប់គ្រាន់ដើម្បីការពារប្រទេស។ ការលាលែងពីតំណែងដ៏គួរឱ្យភ្ញាក់ផ្អើលរបស់លោកធ្វើឱ្យអំណាចរបស់លោក Starmer ចុះខ្សោយបន្ថែមទៀតនៅពេលវេលាដែលមិនប្រាកដប្រជាសម្រាប់មេដឹកនាំគណបក្សការងារដែលកំពុងជួបបញ្ហា។ ក្នុងការរិះគន់ លោក Healey បានព្រមានថា ផែនការវិនិយោគវិស័យការពារជាតិ ដែលរង់ចាំជាយូរមកហើយរបស់លោក Starmer សម្រាប់ការផ្តល់មូលនិធិក្នុងរយៈពេលមួយទសវត្សរ៍ខាងមុខដែលលោកនាយករដ្ឋមន្ត្រីមិនទាន់បានផ្សព្វផ្សាយ ប្រឈមនឹងការធ្វើឱ្យចក្រភពអង់គ្លេស«លែងសូវមានសុវត្ថិភាព»។ លោក Healey បានសរសេរនៅក្នុងលិខិតលាលែងពីតំណែងទៅកាន់លោក Starmer ដែលបានបង្ហោះនៅលើគណនីបណ្តាញសង្គម X របស់លោកថា «អ្នកមិនអាចធ្វើ ហើយក្រសួងរតនាគារ ក៏ពុំមានឆន្ទះប្តេជ្ញាចំពោះធនធានដែលប្រទេសជាតិត្រូវការដើម្បីការពារប្រទេសនៅពេលមានការគំរាមកំហែងកើនឡើង» នោះដែរ។ «បន្ទាប់ពីពន្យល់ ខ្ញុំមិនអាចទទួលយកការដោះស្រាយផែនការវិនិយោគវិស័យការពារជាតិ ដែលមិនផ្តល់ឱ្យកងកម្លាំងរបស់យើងនូវធនធានដែលពួកគេត្រូវការ ពេលនេះខ្ញុំគ្មានជម្រើសអ្វីក្រៅពីដាក់ពាក្យសុំលាលែងពីតំណែងនោះទេ»។ ការលាលែងចេញភ្លាមៗរបស់លោក Healey ធ្វើឡើងបន្ទាប់ពីការពន្យារពេលជាច្រើនខែចំពោះផែនការការពារជាតិ ដែលលោក Starmer បានទទូចថា លោកនឹងផ្សព្វផ្សាយនៅមុនកិច្ចប្រជុំកំពូល NATO នៅប្រទេសទួរគី ដែលចាប់ផ្តើមនៅថ្ងៃទី៧ ខែកក្កដា។

[UPDATE] ភ្លៀង និងរលករញ្ជួយ រំខានដល់ការសង្គ្រោះ ខណៈអ្នកស្លាប់ពីគ្រោះរញ្ជួយដីនៅហ្វីលីពីនឡើងដល់ជាង៥០នាក់

ក្រុមអ្នកជួយសង្គ្រោះកំពុងតតាំងនឹងភ្លៀងធ្លាក់ និងរលករញ្ជួយជាច្រើន ដើម្បីសម្អាតផ្លូវ និងស្វែងរកអ្នកបាត់ខ្លួនក្នុងប្រទេសហ្វីលីពីនភាគខាងត្បូងនៅព្រឹកថ្ងៃសុក្រសប្ដាហ៍នេះ។ ក្រុមអាជ្ញាធរបាននិយាយនៅព្រឹកថ្ងៃសុក្រ ១២មិថុនា សប្ដាហ៍នេះថា ចំនួនអ្នកស្លាប់ដែលបានរាយការណ៍ដោយសារតែគ្រោះរញ្ជួយដីកម្រិត ៧,៨ រ៉ិចទ័រដែលបានវាយប្រហារភាគខាងត្បូងកោះមីនដាណាវ (Mindanao) កាលពីថ្ងៃចន្ទដើមសប្តាហ៍នេះ បានកើនឡើងដល់ ៥៥ នាក់ ខណៈមនុស្សជាង ១.១០០ នាក់ត្រូវបានរាយការណ៍ថារងរបួស។ គ្រោះរញ្ជួយដីនេះ បានបណ្ដាលឲ្យអគារជាច្រើនដួលរលំ និងមានបំណាក់ដី ខណៈចេញការព្រមានរលកយក្សស៊ូណាមិទូទាំងតំបន់។ យោងតាមរបាយការណ៍ចុងក្រោយបំផុតពីក្រុមប្រឹក្សាជាតិកាត់បន្ថយ និងគ្រប់គ្រងហានិភ័យគ្រោះមហន្តរាយជាតិហ្វីលីពីន (NDRRMC) មនុស្សសរុបចំនួន ១.១២០ នាក់បានរងរបួស ខណៈមនុស្ស ៣១ នាក់នៅតែបាត់ខ្លួន។ ប្រតិបត្តិការស្វែងរក ជួយសង្គ្រោះ និងរុករកនៅតែបន្តនៅក្នុងសហគមន៍នានាដែលរងគ្រោះខ្លាំងបំផុត។ មូលនិធិ Inquirer កំពុងអំពាវនាវឱ្យមានការគាំទ្រសម្រាប់សហគមន៍ត្រូវបានបំផ្លាញដោយគ្រោះរញ្ជួយដីកម្រិត ៧,៨ រ៉ិចទ័រថ្មីៗនេះដែលបានវាយប្រហារកោះមីនដាណាវ។ ក្នុងភាពជាដៃគូជាមួយកាកបាទក្រហមហ្វីលីពីន មូលនិធិនេះ កំពុងពង្រីកការអំពាវនាវរកអាហារ ទឹកស្អាត និងជំនួយសំខាន់ៗផ្សេងទៀតសម្រាប់គ្រួសារដែលរងផលប៉ះពាល់។ ក្រុមអ្នកបរិច្ចាគអាចផ្ញើវិភាគទានដោយផ្ទាល់ទៅកាកបាទក្រហមហ្វីលីពីន PRC តាមរយៈបណ្តាញផ្ទេរផ្លូវការរបស់ខ្លួន ដោយបញ្ជីពេញលេញអាចរកបាននៅលើទំព័រហ្វេសប៊ុករបស់ PRC៕

លោក Trump ថា លោកបានលុបចោលការវាយប្រហារលើអ៊ីរ៉ង់ និងពិភាក្សាអំពីកិច្ចព្រមព្រៀងដែលអាចធ្វើទៅបាន

ប៉ុន្មានម៉ោងបន្ទាប់ពីគំរាមកំហែងវាយប្រហារអ៊ីរ៉ង់ «យ៉ាងខ្លាំងក្លា» ប្រធានាធិបតីសហរដ្ឋអាមេរិក លោក Donald Trump បានលុបចោលការវាយប្រហារដែលបានគ្រោងទុករបស់លោក ដោយបង្ហាញសញ្ញាថា ការទម្លាយភាពទាល់ច្រកក្នុងការចរចាត្រូវបានសម្រេច។ ការបង្ហោះកាលពីថ្ងៃព្រហស្បតិ៍នៅលើបណ្ដាញសង្គម Truth Social បានកើតឡើងប្រហែលប្រាំម៉ោងបន្ទាប់ពីលោកបានព្រមានថា យោធាសហរដ្ឋអាមេរិកនឹង «ដណ្តើមយកកោះ Kharg» និង «ចំណុចហេដ្ឋារចនាសម្ព័ន្ធប្រេងរបស់អ៊ីរ៉ង់» ផ្សេងទៀតនាពេលដ៏ខ្លីខាងមុខនេះ។ លោក Trump បានសរសេរថា ដោយផ្អែកលើការពិតដែលថា ការពិភាក្សាជាមួយសាធារណរដ្ឋអ៊ីស្លាមអ៊ីរ៉ង់ត្រូវបាននាំយកទៅដល់កម្រិតខ្ពស់បំផុតនៃថ្នាក់ដឹកនាំអ៊ីរ៉ង់ និងត្រូវបានអនុម័ត ក្នុងនាមរូបលោកជាប្រធានាធិបតីសហរដ្ឋអាមេរិក បានលុបចោលការវាយប្រហារតាមផែនការ និងការទម្លាក់គ្រាប់បែកប្រឆាំងនឹងអ៊ីរ៉ង់នៅល្ងាចនេះ។ ការពិភាក្សា និងចំណុចចុងក្រោយត្រូវបានអនុម័តទាំងគំនិត និងព័ត៌មានលម្អិតដោយគ្រប់ភាគីពាក់ព័ន្ធទាំងអស់ រួមទាំងសហរដ្ឋអាមេរិក អ៊ីស្រាអែល អារ៉ាប៊ីសាអ៊ូឌីត អារ៉ាប់រួម កាតា ទួរគី ប៉ាគីស្ថាន បារ៉ែន កូវ៉ែត ហ្ស៊កដានី អេហ្ស៊ីប និងប្រទេសដទៃទៀត។ លោក Trump បានបន្ថែមថា ការបិទផ្លូវទឹកពីសំណាក់កងទ័ពជើងទឹកអាមេរិកលើកំពង់ផែអ៊ីរ៉ង់ នឹងនៅតែបន្ត និងជាធរមានពេញលេញរហូតដល់ប្រតិបត្តិការនេះត្រូវបានបញ្ចប់ ពេលវេលា និងទីកន្លែងនៃការចុះហត្ថលេខានឹងត្រូវប្រកាសក្នុងពេលឆាប់ៗនេះ៕

[UPDATE] ក្រុមមន្ត្រីព្រះបរមរាជវាំងថៃ៖ព្រះនាង ផាត់ចារគិទិយាផា បានសោយព្រះពិរាល័យ ក្រោយសន្លប់រយៈពេលជាងបីឆ្នាំ

ព្រះបរមរាជវាំងថៃបាននិយាយនៅក្នុងសេចក្ដីថ្លែងការណ៍មួយនៅថ្ងៃសុក្រ១២មិថុនា ២០២៦ នេះ ថា ព្រះនាង ផាត់ចារគិទិយាផា (Bajrakitiyabha ) របស់ប្រទេសថៃ ដែលបានសន្លប់អស់រយៈពេលជាងបីឆ្នាំ បានសោយព្រះពិរាល័យឬ នៅម៉ោង៧ និង៤៨នាទីយប់ថ្ងៃព្រហស្បតិ៍១១មិថុនា នៅមន្ទីរពេទ្យ Chulalongkorn ក្នុងព្រះជន្ម ៤៧ព្រះវស្សា។ ព្រះនាងបានដួលសន្លប់កាលពីខែធ្នូ ឆ្នាំ២០២២ ខណៈកំពុងបណ្ដើរសុនខរបស់ទ្រង់។ គ្រូពេទ្យរបស់ព្រះនាងបានសន្មតថាវាបណ្តាលមកពីចង្វាក់បេះដូងមិនទៀងទាត់ធ្ងន់ធ្ងរ ដំណើរឈាមមិនប្រក្រតី សម្ពាធឈាមទាប រលាកពោះវៀនធំ និងមានជំងឺរលាកសួតដែលបណ្តាលមកពីការឆ្លងមេរោគ mycoplasma នៅក្នុងបេះដូងរបស់ព្រះនាង។ ចំពោះការសោយព្រះពិរាល័យរបស់ព្រះនាង គ្រួសាររាជវង្សថៃបានបាត់បង់សមាជិកដែលមានសមត្ថភាពខ្ពស់បំផុត និងជាមនុស្សម្នាក់ដែលអាចដើរតួនាទីយ៉ាងសំខាន់ក្នុងការស្នងរាជ្យដែលមិនទាន់ច្បាស់លាស់នៅឡើយ។ ព្រះនាងគឺជាបុត្រីច្បងក្នុងចំណោមបុត្រ ៧ អង្គ របស់ព្រះបាទ វ៉ាជីរ៉ាឡុងកន (Vajiralongkorn ។ព្រះនាងប្រសូតនៅថ្ងៃទី៧ ខែធ្នូ ឆ្នាំ១៩៧៨ ពី មហេសីដំបូង និងជាបងប្អូនជីដូនមួយរបស់ព្រះអង្គ គឺព្រះនាង សូមសាវ៉ាលី ( Soamsawali)។ ព្រះនាងត្រូវបានបណ្តុះបណ្តាលជាមេធាវី ដោយទទួលបានសញ្ញាបត្របរិញ្ញាបត្រជាន់ខ្ពស់ពីរពីសាកលវិទ្យាល័យ Cornell នៅសហរដ្ឋអាមេរិក។ ព្រះនាងបានធ្វើការមួយរយៈខ្លីនៅបេសកកម្មថៃប្រចាំអង្គការសហប្រជាជាតិនៅទីក្រុងញូវយ៉ក មុនពេលត្រឡប់ទៅប្រទេសថៃវិញ ដើម្បីធ្វើការនៅការិយាល័យអគ្គព្រះរាជអាជ្ញានៅទីក្រុងបាងកក និងកន្លែងផ្សេងទៀតនៅក្នុងប្រទេសនេះ។ ចាប់ពីឆ្នាំ ២០១២ ដល់ឆ្នាំ ២០១៤ ព្រះនាងគឺជាឯកអគ្គរាជទូតថៃប្រចាំប្រទេសអូទ្រីស ជាកន្លែងដែលទ្រង់បានបង្កើតទំនាក់ទំនងជាមួយការិយាល័យអង្គការសហប្រជាជាតិស្តីពីគ្រឿងញៀន និងឧក្រិដ្ឋកម្ម (UNODC)៕

តម្លៃប្រេងធ្លាក់ចុះ ដោយបន្តខាតបង់ពីរដូវកាលមុន ខណៈលោក Trump លុបចោលផែនការវាយប្រហារលើអ៊ីរ៉ង់

តម្លៃប្រេងបានធ្លាក់ចុះនៅថ្ងៃសុក្រនេះ ដោយបន្តការខាតបង់ពីរដូវកាលជួញដូរមុនៗបន្ទាប់ពីប្រធានាធិបតីអាមេរិក លោក Donald Trump បានលុបចោលផែនការវាយប្រហារលើអ៊ីរ៉ង់ ដែលបានកាត់បន្ថយការព្រួយបារម្ភពីការកើនឡើងអរិភាព បន្ទាប់ពីការវាយប្រហារសងសឹក កាលពីដើមសប្តាហ៍នេះ។ ប្រេងឆៅ Brent បានធ្លាក់ចុះ ១,២១ដុល្លារ ឬ ១,៣ភាគរយ មកនៅត្រឹម៨៩,១៧ដុល្លារក្នុងមួយបារ៉ែល ខណៈប្រេងឆៅ West Texas Intermediate (WTI) របស់សហរដ្ឋអាមេរិក ធ្លាក់ចុះ១,២៣ដុល្លារ ឬ ១,៤ភាគរយ ធ្លាក់មកនៅត្រឹមតម្លៃ៨៦,៤៨ ដុល្លារ ក្នុងមួយបារ៉ែល។ លោក Trump ដែលបានគំរាមវាយប្រហារអ៊ីរ៉ង់ខ្លាំងក្លា បានលុបចោលផែនការវាយប្រហារកាលពីថ្ងៃព្រហស្បតិ៍ ដោយនិយាយថា ការពិភាក្សាជាមួយអ៊ីរ៉ង់មានភាពរីកចម្រើន។ ទីភ្នាក់ងារសារព័ត៌មានពាក់កណ្តាលផ្លូវការរបស់អ៊ីរ៉ង់ Fars បានរាយការណ៍ថា ទីក្រុងតេអេរ៉ង់ ពុំបានអនុម័តឯកសារនៃកិច្ចព្រមព្រៀងណាមួយឡើយ។ កាលពីថ្ងៃពុធសប្តាហ៍នេះ អ៊ីរ៉ង់បានប្រកាសពីការបិទច្រកសមុទ្រ Hormuz ទាំងស្រុង ដោយនិយាយថា នាវាណាមួយដែលព្យាយាមឆ្លងកាត់នឹងរងការវាយប្រហារ។ ការបិទច្រកសមុទ្ររយៈពេលជាច្រើនខែរបស់ទីក្រុងតេអេរ៉ង់ ដែលជាធម្មតាដឹកជញ្ជូនប្រេងនិងឧស្ម័នធម្មជាតិរាវមួយភាគប្រាំនៃការដឹកជញ្ជូនប្រេងសកល បានធ្វើឱ្យតម្លៃប្រេងកើនឡើង។

អ៊ីរ៉ង់៖ គ្មានការសម្រេចចុងក្រោយណាមួយធ្វើឡើងលើកិច្ចព្រមព្រៀងដែលលោក Trump សង្ឃឹមថាអាចចុះហត្ថលេខាឆាប់ៗនេះទេ

លោកប្រធានាធិបតី Donald Trump កាលពីថ្ងៃព្រហស្បតិ៍ ១១ មិថុនាសប្ដាហ៍នេះ បាននិយាយថា សហរដ្ឋអាមេរិក និងអ៊ីរ៉ង់ អាចចុះហត្ថលេខាលើកិច្ចព្រមព្រៀងសន្តិភាពមួយ ឱ្យបានឆាប់តាមដែលអាចធ្វើទៅបាន នៅចុងសប្តាហ៍នេះ ដែលនឹងបើកច្រកសមុទ្រ Hormuz ឡើងវិញសម្រាប់ការដឹកជញ្ជូនទំនិញ ប៉ុន្តែអ៊ីរ៉ង់បានឆ្លើយតបថា ខ្លួនពុំទាន់ឈានដល់ការសម្រេចចិត្តចុងក្រោយលើកិច្ចព្រមព្រៀងនោះទេ។ កិច្ចព្រមព្រៀងនេះ ប្រសិនបើត្រូវបានបញ្ជាក់ នឹងក្លាយជាការទម្លាយភាពទាល់ច្រកផ្នែកការទូតដ៏សំខាន់បំផុត ដើម្បីបញ្ចប់សង្គ្រាមរយៈពេលបីខែ ដែលបានសម្លាប់មនុស្សរាប់ពាន់នាក់ និងធ្វើឱ្យតម្លៃថាមពលសកលកើនឡើងយ៉ាងខ្លាំង។ ប្រព័ន្ធផ្សព្វផ្សាយអ៊ីរ៉ង់បានរាយការណ៍ថា អ្នកនាំពាក្យក្រសួងការបរទេស លោក Esmaeil Baghaei បាននិយាយថា ផ្នែកធំៗនៃអត្ថបទដែលកំពុងចរចាត្រូវបានបញ្ចប់ ប៉ុន្តែអ៊ីរ៉ង់នឹងមិនសម្របសម្រួលលើបន្ទាត់ក្រហមរបស់ខ្លួនឡើយ។ លោកថា ពួកលោកមិនទាន់ឈានដល់ការសន្និដ្ឋានចុងក្រោយលើបញ្ហានេះនៅឡើយទេ។ នេះគឺជាបញ្ហាដ៏សំខាន់មួយ ដែលកំពុងត្រូវបានពិនិត្យឡើងវិញដោយស្ថាប័នធ្វើការសម្រេចចិត្តពាក់ព័ន្ធ។ ទន្ទឹមនឹងនេះ លោក Trump បានប្រាប់ក្រុមអ្នកសារព័ត៌មាននៅសេតវិមានថា ពួកលោកទើបតែបានដោះស្រាយសង្គ្រាមជាមួយអ៊ីរ៉ង់បានយ៉ាងល្អ។ នៅពេលសួរថាតើមេដឹកនាំកំពូលអ៊ីរ៉ង់ លោក Ayatollah Mojtaba Khamenei បានអនុម័តកិច្ចព្រមព្រៀងនោះឬនៅ លោក Trump ឆ្លើយថា រូបលោកយល់ថា ចំម្លើយ គឺ ពិតមែនហើយ លោក ជឿថា បានអនុម័តហើយ ៕

បណ្ដាញសង្គម

ព័ត៌មានថ្មីៗ

រថយន្តបើកបុកចូលហ្វូងអ្នកគាំទ្របាល់ទាត់ម៉ិកស៊ិក នៅទីក្រុង Cabo San Lucas ដោយមានអ្នករបួសជាច្រើននាក់

កងកម្លាំងឆ្មាំបដិវត្តន៍អ៊ីរ៉ង់ បញ្ជាក់ថា អ៊ីស្រាអែលត្រូវតែដកទ័ពចេញពីលីបង់ទាំងស្រុង

កុងហ្គោចេញនីតិវិធីចត្តាឡីស័ក ចំពោះអ្នកធ្វើដំណើរមកពីតំបន់រងប៉ះពាល់ដោយជំងឺ Ebola

កិច្ចព្រមព្រៀងពាណិជ្ជកម្ម រវាង EU និងអាមេរិក នឹងចូលជាធរមានមុនថ្ងៃកំណត់របស់លោក Trump

លោក Trump លើកឡើងថា មេដឹកនាំអ៊ុយក្រែន កំពុងធ្វើបាន «ល្អ» ក្នុងការតទល់នឹងរុស្ស៊ី

ដាណឺម៉ាកអនុម័តការដាក់ពង្រាយបេសកកម្ម នៅច្រកសមុទ្រ Hormuz

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877