BTV NEWS

លោក Putin៖ រុស្ស៊ីត្រៀមរួចរាល់សម្រាប់ការចរចាជាមួយអ៊ុយក្រែន លុះត្រាផ្អែកលើកិច្ចព្រមព្រៀងទីក្រុងអ៊ីស្តង់ប៊ុលឆ្នាំ២០២២

រលកកម្ដៅដ៏ក្ដៅបំផុតមិនធ្លាប់មាន បង្កឱ្យមានការព្រមានពីសុខភាពនៅទូទាំងទ្វីបអឺរ៉ុប

ប្រធានាធិបតីរុស្ស៊ី លោក Putin និយាយថា ទីក្រុងគីវ ចង់បង្កអស្ថិរភាពដល់រុស្ស៊ី

សហរដ្ឋអាមេរិក ជំរុញសន្តិភាពយូរអង្វែង ខណៈកិច្ចចរចារវាងអ៊ីស្រាអែលនិងលីបង់ ចាប់ផ្តើម

ព័ត៌មានអន្តរជាតិ

ឧត្តមស្នងការសិទ្ធិមនុស្សរបស់UN អំពាវនាវឱ្យមានការ «ដកទណ្ឌកម្មលើគុយបា ជាបន្ទាន់»

លោក Volker Turk ឧត្តមស្នងការសិទ្ធិមនុស្សនៅអង្គការសហប្រជាជាតិ បានចេញការរិះគន់មួយចំនួនរបស់លោកចំពោះទណ្ឌកម្មថ្មីៗដែលសហរដ្ឋអាមេរិក បានដាក់ទៅលើប្រទេសគុយបា។ កាលពីថ្ងៃចន្ទ លោក Turk បានគូសបន្ទាត់រវាងការរឹតត្បិតកាន់តែខ្លាំងលើសេដ្ឋកិច្ចប្រទេសគុយបា និងរបាយការណ៍អំពីអត្រាស្លាប់កើនឡើង ជាពិសេសក្នុងចំណោមកុមារ។ លោក Turk បាននិយាយនៅក្នុងសេចក្តីថ្លែងការណ៍ថា «ការរឹតត្បិតប្រេងឥន្ធនៈដែលបានដាក់តាំងពីដើមឆ្នាំ ២០២៦ និងការរឹតត្បិតទណ្ឌកម្មនៅក្រៅដែនដីកាលពីពេលថ្មីៗនេះ ដែលយកមកដាក់រួមគ្នា កំពុងធ្វើឱ្យប៉ះពាល់ដល់ប្រជាជនគុយបាដោយផ្ទាល់ ជាពិសេសអ្នកដែលងាយរងគ្រោះបំផុត»។ «កុមារកំពុងស្លាប់ដោយសារតែវេជ្ជបណ្ឌិតខ្វះដំណើរការទទួលបានការផ្គត់ផ្គង់វេជ្ជសាស្ត្រ និងឱសថសំខាន់ៗ ដែលនេះមិនអាចទទួលយកបានឡើយ»។ លោកបាននិយាយបន្ថែមថា «ទណ្ឌកម្មធ្ងន់ធ្ងរ» បែបនេះ ផ្ទុយពី «គោលការណ៍ជាមូលដ្ឋាននៃច្បាប់សិទ្ធិមនុស្សអន្តរជាតិ»។ លោកបានអំពាវនាវឱ្យទណ្ឌកម្មនេះ «ត្រូវបានដកចេញជាបន្ទាន់»។ ការថ្លែងលើកឡើងរបស់លោក Turk គឺជាការឆ្លើយតបដោយផ្ទាល់ចំពោះសកម្មភាពដែលបានធ្វើឡើងក្រោមរដ្ឋបាលប្រធានាធិបតីសហរដ្ឋអាមេរិក លោក Donald Trump ដើម្បីរឹតបន្តឹងសម្ពាធលើប្រទេសគុយបា ជាប្រទេសកោះតំបន់សមុទ្រការ៉ាអ៊ីព។ ចាប់ផ្តើមនៅក្នុងខែមករា រដ្ឋបាលលោក Trump មានចំណាត់ការកាត់ផ្តាច់ការផ្គត់ផ្គង់ប្រេងពីបរទេសចូលទៅប្រទេសគុយបា ជាចំណុចសំខាន់សម្រាប់បណ្តាញថាមពលដែលមានអាយុកាលចាស់របស់ខ្លួន។ ដំបូងឡើយ បានកាត់ផ្តាច់ការផ្គត់ផ្គង់ប្រេង និងមូលនិធិពីប្រទេសវេណេស៊ុយអេឡា។ ក្រោយមក នៅថ្ងៃទី២៩ ខែមករា លោក Trump បានចេញក្រឹត្យមួយដែលប្រកាសថាប្រទេសគុយបាជា «ការគំរាមកំហែងខ្ពស់» ចំពោះសន្តិសុខជាតិរបស់សហរដ្ឋអាមេរិក។ ដូច្នេះ លោកបាននិយាយថា ប្រទេសណាមួយដែលផ្គត់ផ្គង់ប្រេងដល់ប្រទេសនេះ នឹងត្រូវទទួលរងដោយការដំឡើងពន្ធខ្ពស់។

ក្រុមហេសបូឡា អះអាងការវាយប្រហារ១៦លើកលើកងកម្លាំងអ៊ីស្រាអែលនៅភាគខាងត្បូងលីបង់

ក្រុមហេសបូឡា បានរាយការណ៍ថា ខ្លួនបានបើកការវាយប្រហារជាបន្តបន្ទាប់ដាក់គោលដៅទៅលើកងកម្លាំងអ៊ីស្រាអែលនៅភាគខាងត្បូងប្រទេសលីបង់ ដោយវាយប្រហារទៅលើការប្រមូលផ្តុំកងទ័ព យានយន្តយោធា និងសម្ភារៈដឹកជញ្ជូននៅទូទាំងតំបន់ចំណុចក្តៅជាច្រើនកន្លែង។ យោងតាមសេចក្តីថ្លែងការណ៍ដែលបានរៀបរាប់លម្អិតអំពីប្រតិបត្តិការកាលពីថ្ងៃចន្ទ ក្រុមនេះបាននិយាយថា ខ្លួនបានកំណត់គោលដៅដដែលៗទៅលើការប្រមូលផ្តុំទាហាន និងយានយន្តអ៊ីស្រាអែលនៅជាយក្រុងមួយចំនួន។ សេចក្តីថ្លែងការណ៍ ក៏បានបញ្ជាក់ពីការវាយប្រហារសំខាន់ៗជាច្រើនកន្លែងដែលមានផលប៉ះពាល់ខ្ពស់ រួមទាំងការវាយប្រហារដោយយានដ្រូនលើយានយន្តនៅជិតប្រាសាទ Beaufort ជាប្រវត្តិសាស្ត្ររបស់ប្រទេសលីបង់ និងទីតាំងកាំភ្លើងធំមួយកន្លែងនៅក្រុង Odaisseh។ បន្ថែមលើនេះ ក្រុមហេសបូឡាបាននិយាយថា ខ្លួនបានផ្តោតការបាញ់ប្រហារយ៉ាងខ្លាំងក្លានៅជាយក្រុងYohmor al-Shaqif ភាគអាគ្នេយ៍ ដោយអះអាងថា បានប្រើប្រាស់គ្រាប់រាវរកគោលដៅ មីស៊ីលស៊ីបគោលដៅ និងកាំភ្លើងធំដើម្បីបំផ្លាញយានយន្តដឹកជញ្ជូនគ្រាប់រំសេវ និងរថយន្តឈូសឆាយរបស់យោធាអ៊ីស្រាអែល។

បេសកជនអ៊ីរ៉ង់ប្រចាំUN សង្ឃឹមថាកិច្ចចរចារវាងអាមេរិក និងអ៊ីរ៉ង់ «ឈានដល់ចំណុចបញ្ចប់» នៅចុងខែមិថុនា

លោក Amir Saeid Iravani ឯកអគ្គរដ្ឋទូតអ៊ីរ៉ង់ បាននិយាយថា សហរដ្ឋអាមេរិក និងអ៊ីរ៉ង់ «កំពុងផ្តល់ និងផ្លាស់ប្តូរទស្សនៈគ្នាដើម្បីឈានដល់ចំណុចបញ្ចប់» តាមរយៈការសម្របសម្រួលការចរចារបស់ប្រទេសប៉ាគីស្ថាន។ លោកបានឆ្លើយតបទៅនឹងសំណួរមួយពីសារព័ត៌មាន AP បន្ទាប់ពីលោកបានថ្លែងនៅក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិក្នុងទីក្រុងញូវយ៉កកាលពីថ្ងៃចន្ទថា «យើងពុំទាន់ទទួលបានឯកសារចុងក្រោយនៅឡើយទេ ប៉ុន្តែយើងកំពុងខិតខំដើម្បីទទួលបានឯកសារនេះ»។ នៅពេលត្រូវបានសួរថាតើលោកគិតថាចំណុចបញ្ចប់នឹងត្រូវបានឈានដល់នៅចុងខែនេះដែរ ឬទេ លោកឯកអគ្គរដ្ឋទូតបានឆ្លើយតបថា យើងសង្ឃឹមដូច្នេះ ដោយលោកបានសង្កត់ធ្ងន់ថា បទឈប់បាញ់ មានលក្ខណៈទូលំទូលាយ និងត្រូវបានអនុវត្តចំពោះតំបន់រួមទាំងនៅប្រទេសលីបង់ ដែលអ៊ីស្រាអែលបានច្រានចោល។ មេដឹកនាំអ៊ីស្រាអែល លោក Netanyahu បានប្តេជ្ញាថា កងកម្លាំងអ៊ីស្រាអែលនឹងបន្តវាយប្រហារក្រុមហេសបូឡានៅប្រទេសលីបង់ ទោះបីជាលោកបានដកថយពីការវាយប្រហារបន្ថែមទៀតជាមួយអ៊ីរ៉ង់ កាលពីថ្ងៃចន្ទក៏ដោយ។

ប្រទេសចំនួន២០ រិះគន់ច្បាប់អ៊ីស្រាអែល ហាមឃាត់ក្រុមជំនួយដែលមិនបានបញ្ជូនបញ្ជីឈ្មោះបុគ្គលិក

រដ្ឋាភិបាលប្រទេសចំនួន១៨នៅអឺរ៉ុប ព្រមទាំងប្រទេសអូស្ត្រាលី និងជប៉ុន បានចេញសេចក្តីថ្លែងការណ៍រួមមួយ ដោយពណ៌នាអំពីច្បាប់ចុះបញ្ជីថ្មីរបស់អ៊ីស្រាអែលសម្រាប់ក្រុមជំនួយដែលធ្វើការនៅក្នុងតំបន់ហ្កាហ្សា និងតំបន់កាន់កាប់ West Bank ថាជា «ការព្រួយបារម្ភយ៉ាងខ្លាំង»។ សេចក្តីថ្លែងការណ៍នេះ ធ្វើឡើងបន្ទាប់ពីតុលាការជាន់ខ្ពស់របស់អ៊ីស្រាអែលកាលពីសប្តាហ៍មុន បានគាំទ្រការរឹតត្បិតនេះ ដែលបានមើលឃើញក្រុមជំនួយចំនួន៣៧ក្រុមត្រូវបានហាមឃាត់ដោយសារតែបដិសេធមិនផ្តល់បញ្ជីឈ្មោះបុគ្គលិកប៉ាឡេស្ទីន និងអន្តរជាតិរបស់ពួកគេទៅឲ្យរដ្ឋាភិបាលអ៊ីស្រាអែល។ ប្រទេសទាំង២០នេះ បាននិយាយថា ច្បាប់ថ្មីនឹង «កំណត់យ៉ាងតឹងរ៉ឹង» ដល់ក្រុមជំនួយ និងកំណត់សមត្ថភាពរបស់ពួកគេក្នុងការឆ្លើយតបទៅនឹងវិបត្តិ។ ប្រទេសទាំងនេះបាននិយាយថា «ជំនួយដែលចូលទៅក្នុងតំបន់ហ្កាហ្សានៅតែមិនគ្រប់គ្រាន់ទាំងបរិមាណ និងគុណភាព ខណៈប្រជាជនស្ទើរតែទាំងអស់ពឹងផ្អែកលើសេវាសង្គ្រោះជីវិត»។ ជាថ្មីម្តងទៀតពួកយើងអំពាវនាវយ៉ាងខ្លាំងដល់អ៊ីស្រាអែល កុំឱ្យអនុវត្តច្បាប់ចុះបញ្ជីក្នុងទម្រង់បច្ចុប្បន្នរបស់ខ្លួន។ អ៊ីស្រាអែល បានហាមឃាត់ក្រុមជំនួយរាប់សិបក្រុមដែលបដិសេធមិនគោរពតាមច្បាប់ថ្មី រួមមានអង្គការ Oxfam, Save the Children, អង្គការគ្រូពេទ្យគ្មានព្រំដែនដែលត្រូវបានគេស្គាល់ដោយអក្សរកាត់ជាភាសាបារាំងMSF និងគណៈកម្មាធិការជួយសង្គ្រោះអន្តរជាតិ។ ក្រុមជំនួយ បានលើកឡើងពីការព្រួយបារម្ភជាច្រើន រួមទាំងការសម្លាប់បុគ្គលិកមនុស្សធម៌រាប់រយនាក់ដោយអ៊ីស្រាអែលនៅតំបន់ហ្កាហ្សា ក្នុងអំឡុងពេលសង្គ្រាមប្រល័យពូជសាសន៍របស់ខ្លួន។

មេដឹកនាំអ៊ុយក្រែនថារូបលោកមានការសន្ទនាប្រកបដោយវិជ្ជមានជាមួយប្រេសិតពិសេសអាមេរិក

លោកប្រធានាធិបតីអ៊ុយក្រែន Volodymyr Zelenskyy បាននិយាយកាលពីថ្ងៃចន្ទ៨មិថុនាសប្ដាហ៍នេះថា រូបលោកមានការសន្ទនាប្រកបដោយវិជ្ជមានជាមួយប្រេសិតពិសេសអាមេរិកលោក Steve Witkoff និងលោក Jared Kushner និងបានលើកសរសើរនូវអ្វីដែលលោកបានហៅថាជាការត្រៀមខ្លួនរបស់ពួកគេក្នុងការធ្វើការលើការដោះស្រាយនៃសង្គ្រាមអ៊ុយក្រែន ក្នុងប៉ុន្មានសប្ដាហ៍ខាងមុខ។ លោក Zelenskyy បាននិយាយនៅលើ Telegram អំពីការសន្ទនានេះក្នុងអំឡុងពេលឈប់សម្រាកមួយនៅរដ្ឋធានី ឈីស៊ីនូ (Chisinau) ប្រទេសម៉ុលដាវីថា លោកមានការសន្ទនាដ៏វិជ្ជមានមួយ។ មេដឹកនាំអ៊ុយក្រែនរូបនេះ កំពុងវិលត្រឡប់ទៅកាន់ទីក្រុងគីវវិញពីការចរចានៅទីក្រុងឡុងដ៍្រជាមួយមេដឹកនាំនៃចក្រភពអង់គ្លេស បារាំង និងអាល្លឺម៉ង់ អំពីរបៀបបន្តទៅមុខជាមួយនឹងការដោះស្រាយសង្គ្រាមដែលមានអាយុកាលជាងបួនឆ្នាំ។ មេដឹកនាំទាំងបីបានគាំទ្រសំណើសម្រាប់កិច្ចប្រជុំរវាងលោក Zelenskyy និងប្រធានាធិបតីរុស្ស៊ី លោក Vladimir Putin ដើម្បីព្យាយាមធានាបាននូវបទឈប់បាញ់ ហើយបាននិយាយថា អឺរ៉ុបនឹងដើរតួនាទីមួយ។ ការចរចាដែលសម្របសម្រួលដោយសហរដ្ឋអាមេរិកលើជម្លោះអ៊ុយក្រែន ដែលត្រួតពិនិត្យដោយលោក Witkoff និងលោក Kushner កូនប្រសាររបស់ប្រធានាធិបតីអាមេរិក លោក Donald Trump ត្រូវបានជាប់គាំង ដោយទីក្រុងវ៉ាស៊ីនតោនផ្តោតលើជម្លោះនៅក្នុងប្រទេសអ៊ីរ៉ង់៕

ទីភ្នាក់ងារ IAEA អំពាវនាវឱ្យអ៊ីរ៉ង់ចូលរួមជាថ្មី ខណៈលោកខាងលិចដាក់សម្ពាធដើម្បីជំរុញដំណោះស្រាយ

លោក Rafael Grossi អគ្គនាយកអង្គការឃ្លាំមើលនុយក្លេអ៊ែររបស់អង្គការសហប្រជាជាតិកាលពីថ្ងៃចន្ទ ទី៨ ខែមិថុនា បានអំពាវនាវឱ្យអ៊ីរ៉ង់ «ចូលរួមជាថ្មី» ជាមួយលោក ដូច្នេះការត្រួតពិនិត្យអាចបន្តឡើងវិញនៅរោងចក្រនុយក្លែអ៊ែរដែលសហរដ្ឋអាមេរិក និងអ៊ីស្រាអែល បានទម្លាក់គ្រាប់បែកកាលពីឆ្នាំមុន ខណៈសហរដ្ឋអាមេរិក បានដឹកនាំការជំរុញឱ្យមានដំណោះស្រាយចំពោះផលប៉ះពាល់នោះនៅឯក្រុមប្រឹក្សារបស់ទីភ្នាក់ងារ។ អ៊ីរ៉ង់ នៅតែមិនទាន់បានផ្តល់ព័ត៌មានដល់ទីភ្នាក់ងារថាមពលអាតូមិកអន្តរជាតិ(IAEA)អំពីអ្វីដែលបានកើតឡើងចំពោះទីតាំងនុយក្លេអ៊ែរដែលត្រូវបានទម្លាក់គ្រាប់បែកទាំងនោះ ឬសម្ភារៈនុយក្លេអ៊ែរ រួមទាំងអ៊ុយរ៉ានីញ៉ូមដែលចម្រាញ់រួចជិតដល់កម្រិតផលិតគ្រាប់បែក ដែលត្រូវបានរក្សាទុកនៅទីនោះ។ ខណៈការទម្លាក់គ្រាប់បែកបានបំផ្លាញ ឬធ្វើឲ្យខូចខាតធ្ងន់ធ្ងរដល់រោងចក្រចម្រាញ់អ៊ុយរ៉ានីញ៉ូម អ៊ុយរ៉ាញ៉ូមនីដែលចម្រាញ់រួចក្នុងកម្រិតខ្ពស់ភាគច្រើន រួមទាំងអ៊ុយរ៉ានីញ៉ូមមួយចំនួនដែលចម្រាញ់រួចដល់កម្រិត៦០ភាគរយមិនទាន់គ្រប់គ្រាន់ក្នុងបរិមាណផលិតគ្រាប់បែកប្រហែល៩០ភាគរយ ត្រូវបានគេគិតថាបានរួចផុតពីការបំផ្លាញចោល។ លោក Grossi បានប្រាប់ក្រុមប្រឹក្សាចំនួន៣៥ប្រទេសរបស់ទីភ្នាក់ងារ IAEA នៅថ្ងៃដំបូងនៃកិច្ចប្រជុំប្រចាំត្រីមាសថា «វាមានសារៈសំខាន់ខ្លាំងដែលយើងចូលរួមជាថ្មី»។ លោកបាននិយាយបន្ថែមនៅក្នុងសេចក្តីថ្លែងការណ៍ទៅកាន់ក្រុមប្រឹក្សាថា «ខ្ញុំអំពាវនាវដល់អ៊ីរ៉ង់ ឱ្យចូលរួមជាមួយទីភ្នាក់ងារIAEA ដោយការស្ថាបនា ដើម្បីសម្រួលដល់ការអនុវត្តវិធានការការពារយ៉ាងពេញលេញ និងមានប្រសិទ្ធភាពនៅក្នុងប្រទេសអ៊ីរ៉ង់»។ ទីភ្នាក់ងារ IAEA បានធ្វើការត្រួតពិនិត្យមួយចំនួននៅទីតាំងដែលមិនត្រូវបានទម្លាក់គ្រាប់បែក ប៉ុន្តែបានបញ្ឈប់ការត្រួតពិនិត្យទាំងនោះដោយផ្អែកលើហេតុផលសុវត្ថិភាពកាលពីក្នុងខែកុម្ភៈ ដោយសារតែការវាយប្រហារដោយយោធាជាថ្មីទៀត ហើយចាប់តាំងពីពេលនោះមក បានត្រួតពិនិត្យតែនៅរោងចក្រផលិតថាមពលដែលកំពុងដំណើរការរបស់អ៊ីរ៉ង់ប៉ុណ្ណោះ។

រុស្ស៊ីថា បារាំង អាល្លឺម៉ង់ និងអង់គ្លេស និយាយពីសន្តិភាព ប៉ុន្តែជួយផ្ដល់អាវុធថ្មីឲ្យក្រុងគីវដើម្បីបន្តសង្គ្រាម

វិមានក្រឹមឡាំងបាននិយាយកាលពីថ្ងៃចន្ទ ៨ មិថុនា សប្ដាហ៍នេះថា មេដឹកនាំនៃប្រទេសអាល្លឺម៉ង់ បារាំង និងអង់គ្លេស បាននិយាយអំពីសន្តិភាពនៅក្នុងប្រទេសអ៊ុយក្រែន ប៉ុន្តែកំពុងជួយទីក្រុងគីវជាមួយនឹងអាវុធថ្មីដើម្បីបន្តសង្គ្រាម ជាជំហរមួយដែលខ្លួននិយាយថាមិនស៊ីសង្វាក់គ្នា។ មេដឹកនាំនៃប្រទេសអង់គ្លេស អាល្លឺម៉ង់ និងបារាំង បាននិយាយកាលពីថ្ងៃអាទិត្យ ៧ មិថុនា ថា ពួកគេបានគាំទ្រសំណើសម្រាប់ការចរចារវាងប្រធានាធិបតីអ៊ុយក្រែន លោក Volodymyr Zelenskyy និងប្រធានាធិបតីរុស្ស៊ី លោក Vladimir Putin ដើម្បីព្យាយាមធានាបាននូវបទឈប់បាញ់ ហើយថា អឺរ៉ុបនឹងដើរតួនាទីមួយ។ ជាថ្មីម្ដងទៀត លោក Volodymyr Zelenskyy បានស្នើឱ្យមានជំនួបទល់មុខគ្នាជាមួយលោក Vladimir Putin នៅក្នុងលិខិតចំហរដ៏កម្រមួយផ្ញើទៅកាន់មេដឹកនាំរុស្ស៊ីកាលពីថ្ងៃព្រហស្បតិ៍ ៤ មិថុនា ថ្មីៗនេះ មិនយូរប៉ុន្មានបន្ទាប់ពីប្រធានវិមានក្រឹមឡាំងបានទទួលស្គាល់ថា ទីក្រុងមូស្គូត្រូវការពង្រឹងការការពារដែនអាកាសរបស់ខ្លួន បន្ទាប់ពីការវាយប្រហារជាបន្តបន្ទាប់របស់អ៊ុយក្រែន។ ប្រធានាធិបតីអាមេរិក Donald Trump ដែលបានជំរុញភាគីទាំងពីរឱ្យបញ្ចប់ជម្លោះ និងនិយាយថារូបលោកអាចបញ្ចប់សង្គ្រាមក្នុងរយៈពេលមួយថ្ងៃបន្ទាប់ពីចូលកាន់តំណែង បាននិយាយថា កិច្ចប្រជុំផ្ទាល់រវាងលោក Putin និងលោក Zelenskyy នឹងក្លាយជារឿងដ៏អស្ចារ្យ ប៉ុន្តែបានជំរុញឱ្យភាគីទាំងពីរសម្របសម្រួល។ វិមានក្រឹមឡាំងបាននិយាយថា លោក Putin មិនទាន់ត្រូវបានបង្ហាញលិខិតនោះទេ ប៉ុន្តែលោក Zelenskyy អាចជួបលោក Putin នៅទីក្រុងមូស្គូ នៅពេលណាក៏បាន ជាសំណើមួយដែលមេដឹកនាំអ៊ុយក្រែនបានច្រានចោលជាមុននៅក្នុងលិខិតរបស់លោក៕

ដោយផ្គើននឹងលោកTrump តាមរយៈការវាយប្រហារលើអ៊ីរ៉ង់មួយសន្ទុះ អ៊ីស្រាអែលបានងាកទៅរកការចរចាសន្តិភាព

ក្នុងការបើកការវាយប្រហារជាថ្មីលើអ៊ីរ៉ង់កាលពីថ្ងៃចន្ទ ទី៨ ខែមិថុនា ជាការផ្គើនដោយបើកចំហចំពោះលោក Donald Trump អ៊ីស្រាអែលបានព្យាយាមធ្វើឱ្យករណីរបស់ខ្លួនមានឱកាសធ្វើការសម្រេចចិត្តនៅតុចរចាសន្តិភាព ជាកន្លែងដែលប្រធានាធិបតីសហរដ្ឋអាមេរិកនៅតែរក្សាគម្លាតមិនឱ្យនៅឆ្ងាយ។ ទោះបីជាលោក Trump បានអំពាវនាវជាសាធារណៈឱ្យអ៊ីស្រាអែលផ្អាកការបាញ់ប្រហារក៏ដោយ ប្រទេសនេះបានវាយប្រហារទៅលើគោលដៅនៅក្នុងប្រទេសអ៊ីរ៉ង់ជាលើកដំបូងចាប់តាំងពីបទឈប់បាញ់កាលពីខែមេសា បន្ទាប់ពីអ៊ីរ៉ង់បានបាញ់មីស៊ីលទៅលើអ៊ីស្រាអែលជាអ្វីដែលទីក្រុងតេអេរ៉ង់បាននិយាយថា ជាការសងសឹកចំពោះការវាយប្រហាររបស់អ៊ីស្រាអែលលើរដ្ឋធានីប្រទេសលីបង់។ អ៊ីស្រាអែល និងអ៊ីរ៉ង់ ប្រទេសទាំងពីរនេះបានអំពាវនាវឱ្យបញ្ឈប់ការបាញ់តគ្នាកាលពីថ្ងៃចន្ទ ភ្លាមៗបន្ទាប់ពីលោក Trump បានប្រាប់ពួកគេឱ្យឈប់បាញ់ ។ ប៉ុន្តែក្នុងការបើកការវាយប្រហារ អ៊ីស្រាអែលបានបញ្ជូនសារទៅកាន់ទីក្រុងវ៉ាស៊ីនតោនថា គ្មានកិច្ចព្រមព្រៀងចុងក្រោយជាមួយអ៊ីរ៉ង់អាចឈានដល់នោះទេ ប្រសិនបើផលប្រយោជន៍របស់អ៊ីស្រាអែល មិនត្រូវបានគេអើពើ នេះបើយោងតាមលោក Danny Orbach អ្នកប្រវត្តិសាស្ត្រយោធានៅសាកលវិទ្យាល័យ Hebrew របស់អ៊ីស្រាអែល។ លោក Trump ដែលបានចាប់ផ្តើមសង្គ្រាមរួមជាមួយអ៊ីស្រាអែលកាលពីខែកុម្ភៈ បានព្យាយាមដើម្បីឈានដល់ដំណោះស្រាយតាមរយៈការចរចាជាមួយអ៊ីរ៉ង់។

ប្រធានាធិបតីលីបង់ អំពាវនាវដល់រដ្ឋាភិបាលអ៊ីស្រាអែលឱ្យបន្តការចរចា ពុំមែនសង្គ្រាមទេ

ប្រធានាធិបតីប្រទេសលីបង់ លោក Joseph Aoun បានធ្វើការអំពាវនាវដោយផ្ទាល់ដ៏កម្រដល់រដ្ឋាភិបាលអ៊ីស្រាអែល និងប្រជាជនរបស់ប្រទេសនេះឱ្យមករកតុចរចាដើម្បីបញ្ចប់សង្គ្រាម ដោយព្រមាននៅក្នុងបទសម្ភាសន៍លើប្រព័ន្ធផ្សព្វផ្សាយ CNN ដែលបានចាក់ផ្សាយកាលពីថ្ងៃចន្ទ ទី៨ ខែមិថុនា ថា ដំណោះស្រាយយោធា «នឹងមិនផ្តល់ឱ្យអ្នកនូវសន្តិសុខ និងសុវត្ថិភាពឡើយ»។ លោក Aoun បាននិយាយថា «យើងត្រៀមរួចរាល់ហើយ យើងមានឆន្ទៈ យើងប្តេជ្ញាចិត្ត»។ រដ្ឋាភិបាលលីបង់ កំពុងចរចាដោយផ្ទាល់ជាមួយអ៊ីស្រាអែល ដែលត្រូវបានសម្របសម្រួលដោយទីក្រុងវ៉ាស៊ីនតោន ដើម្បីឈានដល់ការបញ្ឈប់អរិភាពទាំងស្រុង ទោះបីជាមានការប្រឆាំងពីក្រុមប្រដាប់អាវុធហេសបូឡា ដែលកំពុងប្រយុទ្ធជាមួយកងទ័ពអ៊ីស្រាអែលនៅភាគខាងត្បូងប្រទេសលីបង់ ក៏ដោយ។ លោក Aoun បាននិយាយថា លោកនឹងមិនជួបជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu មុនពេលការឈានដល់កិច្ចព្រមព្រៀងបញ្ចប់សង្គ្រាមឡើយ។ លោកនិយាយថា កិច្ចព្រមព្រៀងណាមួយនឹងជាកតិកាសញ្ញាមិនឈ្លានពាន និងមិនមែនជាកិច្ចព្រមព្រៀងសន្តិភាពពេញលេញ។ លោក Aoun និយាយថា «យើងត្រូវបញ្ចប់ស្ថានភាពអរិភាពរវាងលីបង់ និងអ៊ីស្រាអែល ជារៀងរហូត ហើយ កតិកាសញ្ញានេះ អាចជាមធ្យោបាយឆ្ពោះទៅមុខសម្រាប់សន្តិភាពដ៏យុត្តិធម៌ និងយូរអង្វែង»។ លោក Aoun បានលើកឡើងថា ប្រទេសលីបង់នឹងធ្វើសកម្មភាពស្របតាមគំនិតផ្តួចផ្តើមសន្តិភាពអារ៉ាប់ឆ្នាំ ២០០២ ដែលផ្តល់នូវប្រក្រតីភាពជាមួយអ៊ីស្រាអែលនៅទូទាំងពិភពអារ៉ាប់ ជាថ្នូរនឹងភាពជារដ្ឋប៉ាឡេស្ទីន និងការដកកងទ័ពរបស់អ៊ីស្រាអែលចេញពីទឹកដីដែលបានចូលកាន់កាប់។

លោក Xi សន្យាគាំទ្រឥតងាករេចំពោះលោក Kim ក្នុងដំណើរទស្សនកិច្ចដ៏កម្រទៅកាន់កូរ៉េខាងជើង

លោកប្រធានាធិបតីចុន ស៊ី ជីនពីង (Xi Jinping)បានប្រាប់មេដឹកនាំកូរ៉េខាងជើងកាលពីថ្ងៃចន្ទដើមសប្ដាហ៍នេះ ក្នុងអំឡុងពេលកិច្ចប្រជុំកំពូលដ៏កម្រមួយនៅទីក្រុងព្យុងយ៉ាងថា ប្រទេសចិននឹងមិនងាកចេញពីការប្តេជ្ញាចិត្តរបស់ខ្លួនក្នុងការការពារផលប្រយោជន៍រួមជាមួយកូរ៉េខាងជើង ឬងាកចេញពីការគាំទ្ររបស់ខ្លួនចំពោះលោក គីម ជុងអ៊ុន( Kim Jong Un) ឡើយ ។ សេចក្តីសង្ខេបផ្លូវការរបស់ចិននៃកិច្ចប្រជុំបានបង្ហាញថា លោក ស៊ី បានប្រាប់លោក គីម ថា ប្រទេសជិតខាងទាំងពីរគួរតែពង្រឹងទំនាក់ទំនងជាយុទ្ធសាស្ត្រ និងការពារយ៉ាងរឹងមាំនូវអធិបតេយ្យភាព សន្តិសុខ និងផលប្រយោជន៍ការអភិវឌ្ឍន៍របស់ខ្លួន ខណៈទីក្រុងប៉េកាំងកំពុងសម្លឹងមើលការទាញទីក្រុងព្យុងយ៉ាងឱ្យកាន់តែជិតស្និទ្ធ។ លោក ស៊ី បានប្រាប់លោក គីម ក្នុងដំណើរទស្សនកិច្ចអន្តរជាតិលើកដំបូងរបស់លោកនៅឆ្នាំនេះថា រូបលោកពិតជារីករាយយ៉ាងខ្លាំង ហើយក៏មានអារម្មណ៍ជិតស្និទ្ធពិសេសផងដែរ។ សេចក្តីសង្ខេបខាងលើបានបង្ហាញថា លោកបានបញ្ជាក់ជាថ្មីទៅកាន់លោក គីម ថា មិនថាស្ថានភាពអន្តរជាតិផ្លាស់ប្តូរយ៉ាងណានោះទេ ប្រទេសចិននឹងបន្តឱ្យតម្លៃខ្ពស់ចំពោះមិត្តភាពប្រពៃណីរបស់ខ្លួនជាមួយកូរ៉េខាងជើង។ លោក ស៊ី បានបន្ថែមថា ការគាំទ្រពេញទំហឹងចំពោះការដឹកនាំនៃបុព្វហេតុសង្គមនិយមកូរ៉េខាងជើង របស់សមមិត្តអគ្គលេខាធិការ គីម ជុងអ៊ុន នឹងមិនផ្លាស់ប្តូរទេ ហើយការប្តេជ្ញាចិត្តយ៉ាងមុតមាំក្នុងការការពារផលប្រយោជន៍រួម និងបរិយាកាសយុទ្ធសាស្ត្រល្អ នឹងមិនផ្លាស់ប្តូរឡើយ៕

បណ្ដាញសង្គម

ព័ត៌មានថ្មីៗ

វឿន វាសនា ទទួលបានតម្លៃពលកម្មជាង ១០ម៉ឺនដុល្លារ ពីការបន្ដកុងត្រារដូវកាលទី៤ ជាមួយក្លិបតៃវ៉ាន់ Win Streak

Cristiano Ronaldo បង្កើតប្រវត្តិសាស្ត្រ! ក្លាយជាកីឡាករដំបូងស៊ុតបញ្ចូលទីនៅ World Cup ៦លើក

ឯកឧត្តមឧបនាយករដ្ឋមន្ដ្រី ហ៊ុន ម៉ានី ចុះពិនិត្យការធ្វើជំរឿនមន្ដ្រីជាក់ស្ដែង នៅទីស្តីការក្រសួងរៀបចំដែនដី នគរូបនីយកម្ម និងសំណង់

លោកជំទាវបណ្ឌិត ពេជ ចន្ទមុន្នី អញ្ជើញចូលរួមពិធីប្រគល់-ទទួលថវិកាបរិច្ចាគពីគណៈសង្ឃនាយកកម្ពុជាចំនួន ១៦០លានរៀលជូនមូលនិធិគន្ធបុប្ផា

សមាគមរៀបចំពិធីចាប់ឆ្នោតប្រគល់ផ្ទះជូនអតីតយុទ្ធជនចំនួន ៥១គ្រួសារនៅភូមិប៊ុនរ៉ានីសែនជ័យដំណាក់ទ្រយឹង

សល់តែ៦ថ្ងៃទៀតប៉ុណ្ណោះ សម្រាប់ «យុទ្ធនាការ ១ម៉ឺនរៀល ១ម៉ឺននាក់ ឆ្នាំ២០២៦» របស់មូលនិធិគន្ធបុប្ផាកម្ពុជា, សូមចូលរួមបរិច្ចាគ ដើម្បីមន្ទីរពេទ្យគន្ធបុប្ផា អាចបន្តបេសកកម្មសង្រ្គោះជីវិតទារក និងកុមារនៅកម្ពុជា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877