BTV NEWS

រដ្ឋមន្ត្រីការបរទេសអ៊ីរ៉ង់ ស្វាគមន៍ជំហររបស់ទីក្រុងមូស្គូប្រឆាំងការឈ្លានពានរបស់អាមេរិក និងអ៊ីស្រាអែល

លោក Trump និយាយថា អ៊ីរ៉ង់នៅតែប្រកាប់ជំហរតឹងខ្លាំងក្នុងកិច្ចចរចា

អ្នកស្លាប់ដោយសារទឹកជំនន់នៅរដ្ឋ Assam របស់ឥណ្ឌា ឡើងដល់យ៉ាងហោចណាស់ ៦១នាក់

លោកTrump គំរាមថា អឺរ៉ុបនឹងជួបលទ្ធផលអាក្រក់ក្រោយពីទីក្រុងព្រុចសែលពិន័យក្រុមហ៊ុន Google ១ពាន់លានដុល្លារ

ព័ត៌មានអន្តរជាតិ

អាមេរិកដាក់ពន្ធថ្មី១០និង១២,៥ %លើដៃគូ៦០ប្រទេស ខណៈលោក Trump កំពុងកំណត់របៀបវារៈពាណិជ្ជកម្មឡើងវិញ

សហរដ្ឋអាមេរិកនឹងប្រមូលពន្ធចន្លោះពី ១០ ភាគរយទៅ ១២,៥ ភាគរយលើការនាំចូលពីដៃគូពាណិជ្ជកម្មសំខាន់ៗភាគច្រើន ជាវិធានការដ៏ធំបំផុតរបស់ខ្លួនក្នុងការកសាងជញ្ជាំងពន្ធឡើងវិញរបស់ប្រធានាធិបតីអាមេរិកលោក Donald Trump ដែលត្រូវបានទម្លុះដោយតុលាការកំពូលអាមេរិក។ ការយកពន្ធថ្មីទាំងនេះធ្វើឡើងបន្ទាប់ពីការស៊ើបអង្កេតលើការបរាជ័យក្នុងសេដ្ឋកិច្ចរបស់ប្រទេសប្រហែល ៦០ ក្នុងការទប់ស្កាត់កម្លាំងពលកម្មដោយបង្ខំនៅក្នុងខ្សែច្រវាក់ផ្គត់ផ្គង់របស់ពួកគេដែលបង្កគ្រោះថ្នាក់ដល់កម្មករអាមេរិក។ទំនិញពីដៃគូពាណិជ្ជកម្មប្រហែល១០ ដែលត្រូវបានចាត់ទុកថាបានអនុម័តការរឹតបន្តឹងកម្លាំងពលកម្មដោយបង្ខំនឹងត្រូវទទួលរងពន្ធ១០ ភាគរយ រួមទាំងម៉ិកស៊ិក ចក្រភពអង់គ្លេស កាណាដា និងឥណ្ឌា។ យោងតាមការជូនដំណឹងរបស់ US Federal Register ចេញផ្សាយកាលពីថ្ងៃព្រហស្បតិ៍ ២៣ កក្កដា សប្ដាហ៍នេះ ពន្ធលើទំនិញពីសហភាពអឺរ៉ុប និងតំបន់តៃវ៉ាន់ នឹងមានយ៉ាងហោចណាស់១០ ភាគរយ ហើយផលិតផលពីប្រទេសជប៉ុន ស្វីស និងកូរ៉េខាងត្បូង នឹងត្រូវយកពន្ធយ៉ាងហោចណាស់ ១២,៥ ភាគរយតាមរបៀបអនុលោមតាមកិច្ចព្រមព្រៀងពាណិជ្ជកម្មដែលពួកគេសម្រេចបានជាមួយសហរដ្ឋអាមេរិក។ ផលិតផលពីប្រទេសរាប់សិបផ្សេងទៀតនឹងប្រឈមការគិតពន្ធ១២,៥ ភាគរយ។ យោងតាមការជូនដំណឹងខាងលើ ពន្ធថ្មីនឹងចូលជាធរមាននៅថ្ងៃសុក្រ វេលាម៉ោង ១២ និង១នាទី ព្រឹក ម៉ោងនៅទីក្រុងញូវយ៉ក។ ការយកពន្ធ នឹងមិនអនុវត្តចំពោះទំនិញមួយចំនួនដែលបានផ្ទុកនៅលើនាវារួចហើយមុនពេលចូលជាធរមាននោះទេ។ពន្ធលើកម្លាំងពលកម្មដោយបង្ខំគឺជាចំណាត់ការទូលំទូលាយបំផុតរបស់លោក Trump ឆ្ពោះទៅរកការស្តារឡើងវិញនូវរបបពន្ធគាំពារនិយមរបស់លោកចាប់តាំងពីការយកពន្ធពីដំបូងរបស់លោកត្រូវបានលុបចោលដោយតុលាការជាន់ខ្ពស់។ បន្ទាប់ពីការបរាជ័យនោះ លោកបានដាក់ពន្ធនាំចូលសកល ១០ ភាគរយ ដែលផុតកំណត់នៅថ្ងៃសុក្រនេះដែរ។ ពេលវេលានៃការគិតថ្លៃពន្ធថ្មី ធានាថានឹងមិនមានគម្លាតរវាងតុលាការនឹងលោកTrump នោះទេ៕

បេសកជន៖ ការវិលត្រឡប់របស់មេដឹកនាំមីយ៉ាន់ម៉ាទៅកាន់កិច្ចប្រជុំអាស៊ាន ស្ថិតលើផ្លូវវែងឆ្ងាយណាស់

រដ្ឋមន្ត្រីការបរទេសហ្វីលីពីន នៅថ្ងៃព្រហស្បតិ៍ (ទី២៣ ខែកក្កដា ឆ្នាំ២០២៦) នេះ បានលើកឡើងថា ការចូលរួមរបស់ថ្នាក់ដឹកនាំមីយ៉ាន់ម៉ា នៅក្នុងកិច្ចប្រជុំកំពូលនៃសមាគមប្រជាជាតិអាស៊ីអាគ្នេយ៍ ឬអាស៊ាន (ASEAN) គឺ «ស្ថិតនៅលើផ្លូវវែងឆ្ងាយណាស់»។ក្រោយកិច្ចប្រជុំអាស៊ាន លោកស្រី Maria Theresa Lazaro បានប្រាប់សន្និសីទសារព័ត៌មានថា សហភាពមីយ៉ាន់ម៉ា ដែលរួបរឹតដោយសង្គ្រាមស៊ីវិល ប្រហែលមិនទាន់អាចត្រឡប់មកវិញបានទេ ដោយសារតែការអនុលោមរបស់ប្រទេសនេះ ជាមួយនឹងគំនិតផ្តួចផ្តើមសន្តិភាពរបស់អាស៊ាន ដែលគេស្គាល់ថា ជា «កុងសង់ស៊ីស ៥ចំណុច» (Five-Point Consensus) កំពុងត្រូវបានវាយតម្លៃនៅឡើយ។លោកស្រី Lazaro ដែលមានតួនាទីផងដែរជាបេសកជនពិសេសរបស់អាស៊ាន ទទួលបន្ទុកកិច្ចការសហភាពមីយ៉ាន់ម៉ា បាននិយាយថា៖ «វាគឺនៅវែងឆ្ងាយណាស់។ មានសំណួរជាច្រើន អំពីការអនុលោមតាមរបស់ពួកគេ»។ លោកស្រី Lazaro ដែលនឹងដឹកនាំបេសកកម្មមនុស្សធម៌ទៅកាន់ទីនោះនៅចុងឆ្នាំនេះ បានឱ្យដឹងទៀតថា វាមិនទាន់ប្រាកដប្រជានៅឡើយទេថា តើលោកស្រី នឹងត្រូវបានអនុញ្ញាតដែរ ឬយ៉ាងណា ដើម្បីបានចូលជួបម្ចាស់ពានរង្វាន់ណូបែលសន្តិភាព គឺលោកស្រី Aung San Suu Kyi ដែលត្រូវបានទម្លាក់ចេញពីអំណាច នៅក្នុងរដ្ឋប្រហារយោធាឆ្នាំ២០២១។ហើយលោកស្រីបានបន្ថែមថា ប្លុកនឹងកំណត់នូវគោលការណ៍វាស់វែង ដើម្បីវាយតម្លៃវឌ្ឍនភាពលើផែនទីបង្ហាញផ្លូវសន្តិភាព ហើយប្រសិនបើបរាជ័យក្នុងការសម្រេចឱ្យបាននូវគោលដៅទាំងនោះ នឹងត្រូវចាត់ទុកថា ជាការមិនគោរព ឬមិនអនុវត្តតាម៕

ក្រុមបាតុករប៉ះទង្គិចជាមួយនគរបាលអាល់បានី អំឡុងការតវ៉ាបង្កឡើងដោយគម្រោងរមណីយដ្ឋាន

នគរបាលអាល់បានី បានប្រើកាណុងបាញ់ទឹក និងឧស្ម័នបង្ហូរទឹកភ្នែក នៅថ្ងៃព្រហស្បតិ៍ (ទី២៣ ខែកក្កដា ឆ្នាំ២០២៦) នេះ ដើម្បីបំបែកក្រុមបាតុករដែលបានគប់ស៊ុត និងដបទៅលើមន្ត្រី ជាការផ្ទុះឡើងនូវបាតុកម្មចុងក្រោយដែលបង្កឡើងដោយផែនការរបស់លោក Jared Kushner ក្នុងការសាងសង់រមណីយដ្ឋានដែលមានតម្លៃរាប់ពាន់លានដុល្លារ។ភាពចលាចលនៅខាងក្រៅរដ្ឋសភានេះ គឺជាការប៉ះទង្គិចដ៏កម្រមួយ នៅក្នុងការតវ៉ាដោយសន្តិវិធី ដែលត្រូវបានធ្វើឡើងអស់រយៈពេលជិត ២ខែ នៅទីក្រុង Tirana ប្រឆាំងនឹងអ្វីដែលសកម្មជនលើកឡើងថា ជាអំពើពុករលួយ និងការគំរាមកំហែងដល់សត្វព្រៃពីគម្រោងអភិវឌ្ឍន៍នៅឆ្នេរសមុទ្រ Adriatic។ក្រុមបាតុករបានហៅចលនារបស់ពួកគេថា «Flamingo Revolution» (បដិវត្តន៍សត្វហ្វ្លាមីនហ្គូ) តាមឈ្មោះសត្វស្លាបស្រដៀងសត្វក្រៀលប្រមូលផ្តុំគ្នានៅតំបន់ដីសើមដែលត្រូវបានការពារ ជាទីដែលលោក Jared Kushner កូនប្រសារបស់ប្រធានាធិបតីអាមេរិក លោក Donald Trump ចង់សាងសង់សណ្ឋាគារប្រណីត។នគរបាលស្លៀកពាក់ឈុតប្រឆាំងកុបកម្ម និងកាន់ខែល បានប្រើកាណុងបាញ់ទឹកទៅលើក្រុមបាតុកររាប់រយនាក់ ដែលបានអង្រួនរបងហ៊ុមព័ទ្ធអគាររដ្ឋសភា។ ក្រុមបាតុករបានស្រែកថា «អរគុណលោក Trump ដែលធ្វើឱ្យពួកយើងរួមគ្នា»។រមណីយដ្ឋានរបស់លោក Kushner និងគម្រោងអភិវឌ្ឍន៍ផ្សេងទៀត ត្រូវបានគាំទ្រយ៉ាងខ្លាំងដោយនាយករដ្ឋមន្ត្រី លោក Edi Rama ដែលនិយាយថា ការតវ៉ាទាំងនេះ គឺជាសិប្បនិម្មិត ហើយត្រូវបានបង្កើតឡើងដោយគូប្រជែងនយោបាយរបស់លោក៕

EU ហៅការវាយប្រហាររបស់ក្រុមហ៊ួទី លើនាវាដឹកប្រេងថា មិនអាចទទួលយកបាន និងព្រមានកុំបង្កើនភាពតានតឹងបន្ថែម

លោកស្រី Kaja Kallas ប្រធានគោលនយោបាយការបរទេសសហភាពអឺរ៉ុប (EU) នៅថ្ងៃព្រហស្បតិ៍ (ទី២៣ ខែកក្កដា ឆ្នាំ២០២៦) នេះ បានថ្កោលទោសការវាយប្រហាររបស់ក្រុមហ៊ួទី លើនាវាដឹកប្រេង នៅសមុទ្រក្រហមថា ជាទង្វើ «មិនអាចទទួលយកបាន និងខុសច្បាប់» ដោយព្រមានថា វាធ្វើឱ្យកាន់តែធ្ងន់ធ្ងរឡើង សម្រាប់ស្ថានការណ៍ដែលមានភាពប្រែប្រួលរួចទៅហើយ នៅក្នុងតំបន់។នៅក្នុងសេចក្តីថ្លែងការណ៍មួយដែលត្រូវបានបង្ហោះលើបណ្ដាញសង្គម X លោកស្រី Kallas ក៏បានថ្កោលទោសផងដែរដល់ការគំរាមកំហែងថ្មីៗរបស់ក្រុមហ៊ួទី ក្នុងការបិទផ្លូវសមុទ្រ ចំពោះប្រទេសអារ៉ាប៊ីសាអ៊ូឌីត ដោយពណ៌នាអំពីការធ្វើបែបនេះថា ជា «ការគំរាមកំហែងដោយផ្ទាល់ ចំពោះស្ថិរភាពក្នុងតំបន់» និង «ការបង្កើនភាពតានតឹងដ៏គ្រោះថ្នាក់»។លោកស្រីបានសង្កត់ធ្ងន់ថា ការធ្វើនាវាចរណ៍ «ត្រូវតែមិនមានការរារាំង» ទាំងនៅក្នុងច្រកសមុទ្រ Hormuz និងសមុទ្រក្រហម។ លោកស្រី Kallas បានអំពាវនាវឱ្យក្រុមហ៊ួទូ «បញ្ឈប់សកម្មភាពទាំងអស់ដែលបង្កគ្រោះថ្នាក់ដល់ការដឹកជញ្ជូនអន្តរជាតិ និងជីវិតរបស់អ្នកធ្វើដំណើរតាមសមុទ្រ»។ជាមួយគ្នានេះ លោកស្រីក៏បានជំរុញផងដែរឱ្យក្រុមនេះគោរពតាមច្បាប់អន្តរជាតិ រួមទាំងអនុសញ្ញាអង្គការសហប្រជាជាតិស្តីពីច្បាប់សមុទ្រ និងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ស្តីពីប្រទេសយេម៉ែន និងសេរីភាពនៃការធ្វើនាវាចរណ៍៕

ក្រុមប្រឆាំងអ៊ីស្រាអែលហៅកិច្ចព្រមព្រៀងនុយក្លេអ៊ែរអាមេរិក-អារ៉ាប៊ីសាអ៊ូឌីតថា ជាបរាជ័យរបស់លោក Netanyahu

មេដឹកនាំគណបក្សប្រឆាំងអ៊ីស្រាអែល នៅថ្ងៃព្រហស្បតិ៍ (ទី២៣ ខែកក្កដា ឆ្នាំ២០២៦) នេះ បានរិះគន់កិច្ចព្រមព្រៀងសហប្រតិបត្តិការនុយក្លេអ៊ែរដោយសន្តិវិធីដែលត្រូវបានចុះហត្ថលេខា រវាងសហរដ្ឋអាមេរិក និងអារ៉ាប៊ីសាអ៊ូឌីត ដោយពណ៌នាវាថា ជា «ការបរាជ័យដ៏ធំមួយ» សម្រាប់រដ្ឋាភិបាលរបស់លោកនាយករដ្ឋមន្ត្រី Benjamin Netanyahu។ក្រសួងថាមពលសហរដ្ឋអាមេរិក បានប្រកាសកាលពីថ្ងៃពុធថា ទីក្រុងវ៉ាស៊ីនតោន និងទីក្រុងរីយ៉ាដ បានចុះហត្ថលេខាលើកិច្ចព្រមព្រៀងសហប្រតិបត្តិការនុយក្លេអ៊ែរស៊ីវិល។សេចក្ដីប្រកាសនោះ បានរៀបរាប់ថា កិច្ចព្រមព្រៀងនេះតំណាងឱ្យជំហានដ៏សំខាន់មួយ ក្នុងការពង្រឹងកិច្ចសហប្រតិបត្តិការនុយក្លេអ៊ែរសន្តិភាព រវាងទីក្រុងវ៉ាស៊ីនតោន និងទីក្រុងរីយ៉ាដ ហើយនឹងត្រូវបានដាក់ជូនសភារបស់សហរដ្ឋអាមេរិក សម្រាប់ការពិនិត្យឡើងវិញ ក្រោមនីតិវិធីដែលបានកំណត់ មុនពេលចូលជាធរមាន។បន្ទាប់ពីមានសេចក្ដីប្រកាសនេះ មេដឹកនាំគណបក្សប្រឆាំងអ៊ីស្រាអែល បានចោទប្រកាន់រដ្ឋាភិបាលរបស់លោក Netanyahu ថា បានបរាជ័យក្នុងការទប់ស្កាត់កុំឱ្យកិច្ចព្រមព្រៀងកើតឡើង។អតីតនាយករដ្ឋមន្ត្រីអ៊ីស្រាអែល លោក Naftali Bennett ដែលជាមេដឹកនាំគណបក្សប្រឆាំង Together បានប្រាប់ប្រព័ន្ធផ្សព្វផ្សាយសាធារណៈរបស់អ៊ីស្រាអែល KAN ថា៖ «កិច្ចព្រមព្រៀងនេះគឺជាការបរាជ័យផ្នែកការទូតដ៏ធំមួយ សម្រាប់រដ្ឋាភិបាលរបស់យើង»។លោកបានបន្ថែមថា៖ «កិច្ចព្រមព្រៀងនេះត្រូវបានសម្រេចដោយយើងមិនដឹងអ្វីឡើយ ហើយយើងកំពុងត្រូវបានគេដកចេញ ពីព្រោះយើងមិនមែនជាភាគីសកម្ម ក្នុងដំណើរការចរចា រវាងសហរដ្ឋអាមេរិក និងអ៊ីរ៉ង់»៕

ជនស៊ីវិល ១៦នាក់ត្រូវបានសម្លាប់ អំឡុងការវាយប្រហារថ្មីរបស់ក្រុមឧទ្ទាម នៅភាគខាងកើតកុងហ្គោ

អាជ្ញាធរមូលដ្ឋានបានឱ្យដឹងនៅថ្ងៃព្រហស្បតិ៍ (ទី២៣ ខែកក្កដា ឆ្នាំ២០២៦) នេះថា យ៉ាងហោចណាស់មនុស្ស ១៦នាក់ រួមទាំងអ្នករុករករ៉ែផងដែរ ត្រូវបានសម្លាប់ អំឡុងការវាយប្រហារចុងក្រោយបំផុត ដោយក្រុមឧទ្ទាមសម្ព័ន្ធកងកម្លាំងប្រជាធិបតេយ្យ (ADF) នៅភូមិមួយ ក្នុងខេត្ត Ituri ភាគខាងកើតនៃសាធារណរដ្ឋប្រជាធិបតេយ្យកុងហ្គោ។មន្ត្រីមូលដ្ឋាន លោក Janvier Kinyongi បានប្រាប់អ្នកសារព័ត៌មាននៅទីក្រុង Bunia ថា ការវាយប្រហារនេះ បានកើតឡើងកាលពីរសៀលថ្ងៃពុធនៅភូមិ Mandeite ក្នុងដែនដី Mambasa ចម្ងាយ ១៦៥គីឡូម៉ែត្រ នៅភាគនិរតីនៃរដ្ឋធានី Bunia ។លោកបានបញ្ជាក់ទៀតថា៖ «ជនរងគ្រោះជាច្រើន គឺជាអ្នករុករករ៉ែមាស។ ចំនួនអ្នកស្លាប់ គឺជាតួលេខបណ្តោះអាសន្ន ខណៈដែលការវាយប្រហារនៅតែត្រូវបានរាយការណ៍ នៅក្នុងតំបន់ជុំវិញ»។ការវាយប្រហារនេះបានកើតឡើងក្រោយប៉ុន្មានថ្ងៃបន្ទាប់ពីសមាជិកក្រុម ADF ដែលសង្ស័យថា បានចាប់ពង្រត់មនុស្សជាច្រើន នៅក្នុងតំបន់ដូចគ្នា។ ADF នៅតែជាការគំរាមកំហែងដ៏ធំដល់ប្រជាជនស៊ីវិល នៅកុងហ្គោ។ក្រុមអ្នកឃ្លាំមើលសន្តិសុខ Kivu Security Tracker បានឱ្យដឹងនៅក្នុងរបាយការណ៍មួយកាលពីសប្តាហ៍មុនថា ក្រុមឧទ្ទាមនេះបានសម្លាប់ជនស៊ីវិល ៦២នាក់ និងចាប់ពង្រត់មនុស្ស ៥៧នាក់ផ្សេងទៀត កាលពីខែមិថុនា៕

បារាំងបញ្ជាក់ជាថ្មីនូវការគាំទ្រ ចំពោះ ICC និងថ្កោលទោសការគំរាមកំហែងលើតុលាការ

រដ្ឋមន្ត្រីការបរទេសបារាំង លោក Jean-Noel Barrot បានបញ្ជាក់ជាថ្មីនូវការគាំទ្ររបស់បរ្ទេសបារាំង ចំពោះតុលាការព្រហ្មទណ្ឌអន្តរជាតិ (ICC) ក្នុងអំឡុងពេលជួបពិភាក្សាជាមួយរដ្ឋអាជ្ញារងរបស់ ICC គឺលោក Mame Mandiaye Niang។ នេះបើយោងតាមការឱ្យដឹងពីក្រសួងការបរទេស កាលពីថ្ងៃពុធ (ទី២២ ខែកក្កដា ឆ្នាំ២០២៦)។យោងតាមក្រសួង បានឱ្យដឹងថា លោក Barrot និងលោក Niang បានពិភាក្សាអំពីនីតីវិធីស៊ើបអង្កេត និងចោទប្រកាន់របស់ការិយាល័យរដ្ឋអាជ្ញា ដែលក្រសួងបានពិពណ៌នាថា «មានសារៈសំខាន់ណាស់ ក្នុងការប្រយុទ្ធប្រឆាំងនឹងនិទណ្ឌភាព ចំពោះការប្រព្រឹត្តិបទល្មើសព្រហ្មទណ្ឌអន្តរជាតិធ្ងន់ធ្ងរបំផុត»។ក្នុងជំនួយនោះ លោក Barrot បានបញ្ជាក់ជាថ្មីនូវ «ការគាំទ្រយ៉ាងពេញទំហឹង» របស់បារាំង ចំពោះ ICC ដោយចាត់ទុកស្ថាប័ននេះថា ជា «តុលាការព្រហ្មទណ្ឌអន្តរជាតិអចិន្ត្រៃយ៍តែមួយគត់របស់ពិភពលោកដែលមានបេសកកម្មជាសកល» និងជា «សសរស្តម្ភនៃប្រព័ន្ធយុត្តិធម៌ព្រហ្មទណ្ឌអន្តរជាតិ»។ហើយបើយោងតាមក្រសួង បានឱ្យដឹងទៀតថា ជាមួយគ្នានេះ លោកក៏បានសង្កត់ធ្ងន់ផងដែរថា «ការគំរាមកំហែង ឬវិធានការដាក់ទណ្ឌកម្មគ្រប់ប្រភេទ» ប្រឆាំងនឹងតុលាការ រដ្ឋភាគីរបស់ស្ថាប័ន បុគ្គលិក ឬអង្គការសង្គមស៊ីវិលដែលគាំទ្រការងាររបស់ស្ថាប័ន គឺ «មិនអាចទទួលយកបាន» ឡើយ៕

ចិនជំរុញឱ្យសហរដ្ឋអាមេរិក និងអ៊ីរ៉ង់បញ្ឈប់អរិភាព ហើយចាប់ផ្ដើមការសន្ទនាឡើងវិញ

នៅថ្ងៃព្រហស្បតិ៍ (ទី២៣ ខែកក្កដា ឆ្នាំ២០២៦) នេះ ប្រទេសចិនបានសម្តែងនូវក្ដីព្រួយបារម្ភយ៉ាងខ្លាំង ចំពោះភាពតានតឹងដែលកំពុងកើនឡើង នៅតំបន់មជ្ឈិមបូព៌ា ដោយជំរុញឱ្យសហរដ្ឋអាមេរិក និងអ៊ីរ៉ង់បញ្ឈប់អរិភាព វិលត្រឡប់ទៅរកការសន្ទនា និងស្វែងរកដំណោះស្រាយខាងនយោបាយ ក្នុងពេលមានការភ័យខ្លាច ដែលថា ជម្លោះទ្រង់ទ្រាយធំអាចចាប់ផ្ដើមឡើងវិញ។អ្នកនាំពាក្យក្រសួងការបរទេស លោក Lin Jian បានប្រាប់អ្នកសារព័ត៌មាននៅទីក្រុងប៉េកាំងថា៖ «សមិទ្ធផលដែលសម្រេចបានតាមរយៈការចរចា គឺពិបាកទទួលបានណាស់ ហើយការបន្តអរិភាព មិនបម្រើផលប្រយោជន៍របស់ភាគីណាមួយឡើយ។ អធិបតេយ្យភាព សន្តិសុខ និងបូរណភាពទឹកដីរបស់ប្រទេសនានាក្នុងតំបន់ គួរតែត្រូវបានគោរព និងលើកកម្ពស់»។លោក Lin កំពុងឆ្លើយតបទៅនឹងសំណួរអំពីរបាយការណ៍ ដែលថា សហរដ្ឋអាមេរិកកំពុងដាក់ពង្រាយគ្រឿងយុទ្ធោបករណ៍បន្ថែម ក្នុងនោះរួមទាំងនាវាផ្ទុកយន្តហោះ និងយន្តហោះចម្បាំង ទៅកាន់តំបន់នេះ ដែលសង្គ្រាមទ្រង់ទ្រាយធំប្រឆាំងនឹងអ៊ីរ៉ង់ អាចនឹងចាប់ផ្ដើមឡើងវិញក្នុងរង្វង់ប៉ុន្មានថ្ងៃខាងមុខ ហើយប្រទេសជាច្រើនបានចេញសេចក្តីណែនាំដោយជំរុញឱ្យមានការប្រុងប្រយ័ត្ន នៅពេលធ្វើដំណើរទៅកាន់មជ្ឈិមបូព៌ា។ នេះបើយោងតាមសារព័ត៌មាន Global Times ដែលមានមូលដ្ឋាននៅទីក្រុងប៉េកាំង។លោក Lin បាននិយាយថា៖ «ភាគីពាក់ព័ន្ធគួរតែរក្សាភាពស្ងប់ស្ងាត់ និងអត់ធ្មត់ បញ្ឈប់អរិភាព ចាប់ផ្ដើមការចូលរួម និងការសន្ទនាឡើងវិញ ប្រកាន់ខ្ជាប់នូវការដោះស្រាយជម្លោះ តាមរយៈមធ្យោបាយនយោបាយ និងការទូត និងសម្រេចបាននូវបទឈប់បាញ់គ្រប់ជ្រុងជ្រោយ និងយូរអង្វែងឱ្យបានឆាប់តាមដែលអាច»៕

លោក Rubio បញ្ជាក់ថា អ៊ីរ៉ង់នឹងខាតបង់ធ្ងន់ធ្ងរ ប្រសិនបើមិនភ្ញាក់រលឹកឡើងវិញ

រដ្ឋមន្ត្រីការបរទេសអាមេរិក លោក Marco Rubio បាននិយាយនៅថ្ងៃព្រហស្បតិ៍ (ទី២៣ ខែកក្កដា ឆ្នាំ២០២៦) នេះថា អ៊ីរ៉ង់នឹងបន្តខាតបង់ធ្ងន់ធ្ងរ រហូតដល់ប្រទេសនេះ «ភ្ញាក់រលឹក» ឡើងវិញ ដោយបន្ថែមថា ទីក្រុងតេអេរ៉ងហាក់ដូចជាមិនទាន់ត្រៀមខ្លួនរួចរាល់នៅឡើយទេ ដើម្បីធ្វើកិច្ចព្រមព្រៀងម្តងទៀត។ការអត្ថាធិប្បាយរបស់លោកបានកើតឡើង ខណៈដែលសហរដ្ឋអាមេរិកបន្តការវាយប្រហារជាបន្តបន្ទាប់លើអ៊ីរ៉ង់ ដោយប្រធានាធិបតីអាមេរិក លោក Donald Trump បានផ្ដល់ការសន្យាយ៉ាងម៉ឺងម៉ាត់កាលថ្ងៃពុធថា នឹងបំផ្លាញស្ពាន ឬទីតាំងថាមពលរបស់អ៊ីរ៉ង់ រាល់ពេលដែលអ៊ីរ៉ង់វាយប្រហារនាវា ១គ្រឿង នៅច្រកសមុទ្រ Hormuz។អំឡុងពេលនិយាយទៅកាន់អ្នកសារព័ត៌មាននៅខាងក្រៅកិច្ចប្រជុំអាស៊ាន នៅទីក្រុងម៉ានីល ប្រទេសហ្វីលីពីន លោក Rubio បានបញ្ជាក់ថា៖ «អ៊ីរ៉ង់កំពុងអង្វរយើង ទាំងដោយផ្ទាល់ និងដោយប្រយោល។ សូមធ្វើកិច្ចព្រមព្រៀងជាមួយគ្នា។ សូមជជែកពិភាក្សាជាមួយគ្នា។ សូមជជែកពិភាក្សាជាមួយគ្នា។ អ៊ីរ៉ង់កំពុងអង្វរយើងជារៀងរាល់ថ្ងៃ។ បញ្ហាជាមួយអ៊ីរ៉ង់ គឺរាល់ពេលដែលពួកគេធ្វើកិច្ចព្រមព្រៀង អ្នកដែលទទួលបន្ទុក នៅទីនោះ បើពួកគេមិនរំលោភបំពានទេ ក៏ពួកគេចង់ផ្លាស់ប្តូរវាដែរ។ ដូច្នេះ វាហាក់ដូចជាពួកគេមិនទាន់ត្រៀមខ្លួនរួចរាល់ ដើម្បីធ្វើកិច្ចព្រមព្រៀង»។លោកបានសង្កត់ធ្ងន់ថា៖ «ការខាតបង់នឹងបន្តកើនឡើងជារៀងរាល់យប់ ប្រសិនពួកគេមិនភា្ញក់រលឹកឡើងវិញទេនោះ»។ ហើយជាមួយគ្នានេះ លោកបានបញ្ជាក់ជាថ្មីថា ផលប្រយោជន៍ចម្បងរបស់សហរដ្ឋអាមេរិក គឺចង់ឱ្យអ៊ីរ៉ង់គ្មានអាវុធនុយក្លេអ៊ែរ ដោយបន្ថែមថា ទោះបីជាមាន «ការនិយាយបែបខ្លាំងក្លា» ពីសំណាក់អ៊ីរ៉ង់ក៏ដោយ ក៏ពួកគេកំពុងរងទុក្ខវេទនាខ្លាំងណាស់៕

ទីក្រុងតូក្យូរាយការណ៍ពីការចូលមន្ទីរពេទ្យទាក់ទងនឹងកម្ដៅច្រើនបំផុត តាំងពីឆ្នាំ២០១០ ដោយមានអ្នកស្លាប់ម្នាក់

ទីភ្នាក់ងារសង្គ្រោះបន្ទាន់ បានឱ្យដឹងថា កាលពីថ្ងៃពុធ (ទី២២ ខែកក្កដា ឆ្នាំ២០២៦) ទីក្រុងតូក្យូបានកត់ត្រាពីការចូលសម្រាកព្យាបាលនៅមន្ទីរពេទ្យច្រើនបំផុតប្រចាំថ្ងៃ ដែលទាក់ទងនឹងកម្ដៅ គិតចាប់តាំងពីឆ្នាំ២០១០ ខណៈដែលប្រទេសជប៉ុនកំពុងជួបប្រទះនឹងរលកកម្ដៅក្ដៅខ្លាំង ដោយមានមនុស្សម្នាក់ស្លាប់ និង ៤នាក់ស្ថិតក្នុងស្ថានភាពធ្ងន់ធ្ងរ។នាយកដ្ឋានអគ្គិភ័យទីក្រុងតូក្យូ (Tokyo Fire Department) បានបញ្ជាក់ថា មនុស្ស ៤៥៣នាក់ត្រូវបានបញ្ជូនទៅមន្ទីរពេទ្យកាលពីថ្ងៃទី២២ ខែកក្កដា ដែលជាចំនួនប្រចាំថ្ងៃខ្ពស់បំផុត គីតចាប់តាំងពីកំណត់ត្រាបានចាប់ផ្តើមមាននៅឆ្នាំ២០១០។ ចំនួនដងដែលសេវាកម្មសង្គ្រោះបន្ទាន់ត្រូវបានដាក់ពង្រាយ នៅថ្ងៃនោះ ក៏បានឈានដល់កម្រិតខ្ពស់បំផុតជាលើកដំបូងផងដែរ ក្នុងរយៈពេល ៦៣ឆ្នាំ។នៅថ្ងៃទី២៣ ខែកក្កដានេះ អ្នកនាំពាក្យក្រុមពន្លត់អគ្គិភ័យ បានប្រាប់សារព័ត៌មាន AFP ថា៖ «យើងកំពុងជំរុញឱ្យប្រជាជនរក្សាជាតិទឹក និងប្រើប្រាស់ម៉ាស៊ីនត្រជាក់»។ អ្នកនាំពាក្យរូបនេះបានឱ្យដឹងទៀតថា៖ «វាហាក់ដូចជាចំនួន (អ្នកជំងឺ) បានកើនឡើងនៅពេលដែលសីតុណ្ហភាពឡើងខ្ពស់។ វាហាក់ដូចជាថ្ងៃម្សិលមិញ (ទី២២ ខែកក្កដា) និងម្សិលម្ង៉ៃ យើងពិតជាបានឃើញការកើនឡើងគួរឱ្យកត់សម្គាល់»។លោកបានបន្ថែមថា មនុស្សម្នាក់បានបាត់បង់ជីវិត ដោយ ៤នាក់ផ្សេងទៀតស្ថិតក្នុងស្ថានភាពសង្គ្រោះបន្ទាន់ និង ១៨នាក់ស្ថិតក្នុងស្ថានភាពធ្ងន់ធ្ងរ នៅក្នុងខេត្តតូក្យូ ជាទីដែលមានប្រជាជនប្រហែល ១៤លាននាក់។នៅថ្ងៃដដែលនោះ ទីតាំងចំនួន៤ ដោយមួយនៅក្នុងតំបន់ Mie ពីរនៅ Gifu និងមួយនៅ Shizuoka បានមានសីតុណ្ហភាពលើសពី ៤០អង្សាសេ។ នេះបើយោងតាមទីភ្នាក់ងារឧតុនិយមជប៉ុន (JMA)។នៅដើមឆ្នាំ២០២៦ ប្រទេសជប៉ុនបានណែនាំនូវពាក្យថ្មីមួយ ដើម្បីពិពណ៌នាអំពីកម្ដៅលើសពី ៤០អង្សាសេ ដែលហៅថា «Kokushobi» ដែលបកប្រែថា «ថ្ងៃក្តៅខ្លាំងស្ទើរទ្រាំមិនបាន»។ ពាក្យថ្មីនេះត្រូវបានបង្កើតឡើង ដើម្បីទាក់ទាញចំណាប់អារម្មណ៍ពីសាធារណជនកាន់តែច្រើន ចំពោះការព្រមានទាក់ទងនឹងកម្ដៅ ទោះបីជាវាមិនបង្កឱ្យមានវិធានការផ្លូវការណាមួយនៅទូទាំងប្រទេសក៏ដោយ៕

បណ្ដាញសង្គម

ព័ត៌មានថ្មីៗ

យុវជនមកពីគ្រួសារក្រីក្រ និងពលរដ្ឋទូទៅជិត ៤ពាន់នាក់ក្នុងខេត្តស្វាយរៀង មានជំនាញ និងចំណូលសមរម្យ ក្រោយពីទទួលបានការបណ្ដុះបណ្ដាលក្នុងវិធី ១,៥លានរបស់សម្ដេចធិបតី

លោក Trump និយាយថា អ៊ីរ៉ង់នៅតែប្រកាប់ជំហរតឹងខ្លាំងក្នុងកិច្ចចរចា

អ្នកស្លាប់ដោយសារទឹកជំនន់នៅរដ្ឋ Assam របស់ឥណ្ឌា ឡើងដល់យ៉ាងហោចណាស់ ៦១នាក់

សម្តេចធិបតី រំឭកពីគុណបំណាច់យ៉ាងជ្រាលជ្រៅចំពោះវីរៈកងទ័ព វីរកងនគរបាលជាតិ និងវីរកងរាជអាវុធហត្ថដែលបានពលីជីវិត ដើម្បីបុព្វហេតុការពារទឹកដី និងបានកោតសរសើរចំពោះវីរយុទ្ធជនដែលកំពុងឈរជើងនៅជួរមុខ

ក្រសួងបរិស្ថាន បញ្ជាឱ្យផ្អាកសកម្មភាពបាញ់ថ្នាំលាបរថយន្តដែលប្រព្រឹត្តដោយខុសច្បាប់ បន្ទាប់ពីទទួលបានបណ្ដឹងពីពលរដ្ឋពាក់ព័ន្ធនឹងក្លិនថ្នាំលាបរថយន្ត

កម្ពុជាភ្លាត់ចាញ់សិង្ហបុរីនៅនាទីទីចុងក្រោយ ក្នុងជំនួបបើកឆាកពានរង្វាន់បាល់ទាត់តំបន់អាស៊ីអាគ្នេយ៍ (ASEAN Hyundai Cup 2026)

អង្គភាពអ្នកនាំពាក្យរាជរដ្ឋាភិបាល រៀបចំការប្រកួតប្រជែងនិយាយជាសាធារណៈវគ្គផ្តាច់ព្រ័ត្រ លើប្រធានបទ៖ «តើយុវជនត្រូវត្រៀមខ្លួនយ៉ាងដូចម្តេច ដើម្បីចូលរួមសម្រេចចក្ខុវិស័យកម្ពុជាឆ្នាំ២០៥០?»

មនុស្សច្រើននាក់ស្លាប់ក្នុងការវាយប្រហាររយៈចម្ងាយឆ្ងាយរបស់រុស្ស៊ី និងអ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានអន្តរជាតិ

អាមេរិកដាក់ពន្ធថ្មី១០និង១២,៥ %លើដៃគូ៦០ប្រទេស ខណៈលោក Trump កំពុងកំណត់របៀបវារៈពាណិជ្ជកម្មឡើងវិញ

បេសកជន៖ ការវិលត្រឡប់របស់មេដឹកនាំមីយ៉ាន់ម៉ាទៅកាន់កិច្ចប្រជុំអាស៊ាន ស្ថិត​​លើ​ផ្លូវ​វែង​ឆ្ងាយណាស់

ក្រុមបាតុករប៉ះទង្គិចជាមួយនគរបាល​អាល់បានី អំឡុង​ការតវ៉ាបង្កឡើង​ដោយ​​គម្រោង​រមណីយដ្ឋាន

ក្រុមប្រឆាំងអ៊ីស្រាអែលហៅ​កិច្ចព្រមព្រៀងនុយក្លេអ៊ែរអាមេរិក​-អារ៉ាប៊ីសាអ៊ូឌីតថា ជាបរាជ័យរបស់​លោក Netanyahu

ជនស៊ីវិល ១៦នាក់ត្រូវបានសម្លាប់ អំឡុង​ការវាយប្រហារថ្មីរបស់ក្រុមឧទ្ទាម នៅភាគខាងកើតកុងហ្គោ

បារាំងបញ្ជាក់ជាថ្មីនូវការគាំទ្រ ចំពោះ ICC និងថ្កោលទោសការគំរាមកំហែងលើ​តុលាការ

ចិនជំរុញឱ្យសហរដ្ឋអាមេរិក និងអ៊ីរ៉ង់បញ្ឈប់អរិភាព ហើយ​ចាប់​ផ្ដើម​ការសន្ទនាឡើង​វិញ

លោក Rubio បញ្ជាក់​ថា អ៊ីរ៉ង់នឹងខាតបង់ធ្ងន់​ធ្ងរ​ ប្រសិន​បើ​មិន​ភ្ញាក់រលឹកឡើង​វិញ