BTV NEWS

មនុស្ស ១៤នាក់ ស្លាប់ ពេលអគ្គិភ័យឆាបឆេះអគារមួយខ្នងនៅទីក្រុង Lucknow ប្រទេសឥណ្ឌា

ពលរដ្ឋជម្លៀសខ្លួននៅលីបង់ ព្រួយបារម្ភខ្លាចបទឈប់បាញ់អ៊ីស្រាអែល-ក្រុមហេសបូឡា ពុំចូលជាធរមាន

ពលរដ្ឋហ្កាហ្សាស្វែងរកកន្លែងស្រាកស្រាន្តនៅក្នុងសមុទ្រកខ្វក់ ដើម្បីគេចវេះពីអាកាសធាតុក្តៅ

រលកបាតុកម្មអាល់បានី ឈានចូលដល់សប្តាហ៍ទី ៤ បើទោះបីជាអាកាសធាតុក្តៅក៏ដោយ

ព័ត៌មានអន្តរជាតិ

ក្រុមហ៊ុនអាកាសចរណ៍សកល កាត់បន្ថយការព្យាករប្រាក់ចំណេញឆ្នាំ២០២៦ ដោយសារតែវិបត្តិប្រេងពីសង្គ្រាមអ៊ីរ៉ង់

ឧស្សាហកម្មអាកាសចរណ៍សកល បានកាត់បន្ថយការព្យាករប្រាក់ចំណេញឆ្នាំ ២០២៦ របស់ខ្លួនស្ទើរតែពាក់កណ្តាលកាលពីថ្ងៃអាទិត្យ ទី ៧ ខែមិថុនា ដោយលើកឡើងពីជម្លោះនៅតំបន់មជ្ឈិមបូព៌ាដែលបានជំរុញឱ្យតម្លៃប្រេងឥន្ធនៈកើនឡើង រំខានដល់ច្រករបៀងផ្លូវអាកាសសំខាន់ៗ និងបង្ហាញពីភាពផុយស្រួយនៃវិស័យមួយដែលធ្វើប្រតិបត្តិការការលើប្រាក់ចំណេញតិចតួច។ សមាគមដឹកជញ្ជូនផ្លូវអាកាសអន្តរជាតិ តំណាងឱ្យក្រុមហ៊ុនអាកាសចរណ៍ជាង ៣៧០ក្រុមហ៊ុន ដែលមានចំនួនប្រហែល ៨៥ ភាគរយនៃចរាចរណ៍ផ្លូវអាកាសសកល បាននិយាយនៅក្នុងរបាយការណ៍ប្រចាំឆ្នាំរបស់ខ្លួនថា បច្ចុប្បន្នសមាគមរំពឹងថាឧស្សាហកម្មនេះនឹងបង្ហាញប្រាក់ចំណេញសរុបចំនួន២៣ពាន់លានដុល្លារអាមេរិកនៅឆ្នាំ ២០២៦ ដែលទាបជាងការព្យាករកាលពីពេលមុនប្រហែល ៤១ ពាន់លានដុល្លារអាមេរិក និងបានធ្លាក់ចុះពីចំនួន ៤៥ ពាន់លានដុល្លារអាមេរិកនៅឆ្នាំ ២០២៥។ លោក Willie Walsh អគ្គនាយកសមាគមដឹកជញ្ជូនផ្លូវអាកាសអន្តរជាតិ(IATA) បាននិយាយក្នុងកិច្ចប្រជុំប្រចាំឆ្នាំរបស់ក្រុមនៅទីក្រុង Rio de Janeiroថា ការកាត់បន្ថយអត្រានេះ បង្ហាញពីផលប៉ះពាល់របស់ក្រុមហ៊ុនអាកាសចរណ៍ទៅនឹងវិបត្តិភូមិសាស្ត្រនយោបាយ និងការប្រែប្រួលប្រេងឥន្ធនៈ។ «មានកត្តាសំខាន់ពីរ មួយគឺការកើនឡើងគួរឱ្យកត់សម្គាល់នៃតម្លៃប្រេងឥន្ធនៈយន្តហោះ ដែលបានកើនឡើងខ្ពស់ជាងអ្វីដែលត្រូវបានគេរំពឹងទុក ហើយបន្ទាប់មក ការរំខានដល់ក្រុមហ៊ុនអាកាសចរណ៍នៅក្នុងតំបន់ឈូងសមុទ្រ ដូច្នេះការរួមបញ្ចូលគ្នានេះ បាននាំឱ្យយើងកាត់បន្ថយការព្យាករ» ។ លោក Walsh បាននិយាយបន្ថែមថា លោករំពឹងថាក្រុមហ៊ុនអាកាសចរណ៍តូចៗមួយចំនួននឹងក្ស័យធន ឬត្រូវបានក្រុមហ៊ុនអាកាសចរណ៍ធំៗទទួលយកនៅឆ្នាំនេះនិងឆ្នាំក្រោយ ដោយសារតែតម្លៃប្រេងឥន្ធនៈហក់ឡើងខ្ពស់ ធ្វើឱ្យប៉ះពាល់ដល់ប្រតិបត្តិការ។ ក្រុមហ៊ុនអាកាសចរណ៍មានតម្លៃទាបរបស់សហរដ្ឋអាមេរិក Spirit Airlines បានបិទទ្វារកាលពីខែមុន ជាក្រុមហ៊ុនអាកាសចរណ៍ដំបូងគេដែលរងគ្រោះដោយសារតែសង្គ្រាមនៅអ៊ីរ៉ង់។

ប្រធានាធិបតីចិន បញ្ជាក់ថា លោកនឹងធ្វើការជាមួយកូរ៉េខាងជើង ដើម្បីប្រយុទ្ធប្រឆាំងនឹងអនុត្តរភាព

យោងតាមការអត្ថាធិប្បាយដែលបានចុះផ្សាយនៅក្នុងកាសែតរដ្ឋ កូរ៉េខាងជើង Rodong Sinmun នៅថ្ងៃចន្ទ ៨ មិថុនានេះ បានឲ្យដឹងថា ប្រធានាធិបតីចិន លោក Xi Jinping បានថ្លែងថា វាជាគោលនយោបាយដ៏រឹងមាំរបស់ចិន ក្នុងការធ្វើឱ្យប្រសើរឡើងនូវទំនាក់ទំនងជាមួយកូរ៉េខាងជើង ហើយប្រទេសទាំងពីរនឹងធ្វើការរួមគ្នា ដើម្បីប្រយុទ្ធប្រឆាំងនឹងអនុត្តរភាព និងការប៉ុនប៉ងដើម្បីរស់ឡើងវិញនូវយោធានិយម ។ លោក Xi បាននិយាយនៅក្នុងអត្ថាធិប្បាយមួយថា ប្រទេសជិតខាងទាំងពីរនឹងពង្រឹងការផ្លាស់ប្តូរលើគ្រប់វិស័យ ដើម្បីចាក់បញ្ចូលសន្ទុះដ៏រឹងមាំទៅក្នុងការអភិវឌ្ឍទំនាក់ទំនង និងការពារសណ្តាប់ធ្នាប់សកលដោយយុត្តិធម៌ និងស្មើរភាព។ លោកប្រធានាធិបតីចិនរូបនេះ បានមានប្រសាសន៍ថា ពួកលោកត្រូវតែប្រឆាំងនឹងអនុត្តរភាព អំណាចផ្តាច់ការ និងការប៉ុនប៉ង និងការឃុបឃិតទាំងអស់ ដើម្បីរស់ឡើងវិញនូវយោធានិយម ដែលបង្កគ្រោះថ្នាក់ដល់សន្តិសុខ និងស្ថិរភាពក្នុងតំបន់។ លោកក៏បានសន្យាផងដែរថា នឹងធ្វើការជាមួយកូរ៉េខាងជើង ដើម្បីលើកកម្ពស់ពហុភាគីនិយមដោយយុត្តិធម៌ និងមានសណ្តាប់ធ្នាប់ និងសកលភាវូបនីយកម្មសេដ្ឋកិច្ចរួមបញ្ចូលគ្នា ដែលនឹងផ្តល់ផលប្រយោជន៍ដល់ពិភពលោក ក្នុងការកសាងសហគមន៍នៃមនុស្សដែលមានវាសនារួមគ្នា។ គេរំពឹងថាលោក Xi នឹងទៅដល់កូរ៉េខាងជើងនៅថ្ងៃចន្ទនេះ សម្រាប់ដំណើរទស្សនកិច្ចរយៈពេលពីរថ្ងៃ ជាលើកដំបូងរបស់លោកក្នុងរយៈពេលប្រាំពីរឆ្នាំ និងធ្វើកិច្ចពិភាក្សាជាមួយមេដឹកនាំកូរ៉េខាងជើង លោក Kim Jong Un ខណៈទីក្រុងប៉េកាំងព្យាយាមទាញទីក្រុងព្យុងយ៉ាងត្រឡប់ទៅក្នុងគន្លងរបស់ខ្លួនវិញ៕

លោកTrump ថា លោកនឹងដាក់សម្ពាធលើអ៊ីស្រាអែលឱ្យបញ្ឈប់ បន្ទាប់ពីអ៊ីរ៉ង់សងសឹកការវាយប្រហាររដ្ឋធានីលីបង់

ប្រធានាធិបតីអាមេរិក លោក Donald Trump បាននិយាយកាលពីថ្ងៃអាទិត្យ ៧ មិថុនា ថា លោកនឹងប្រាប់នាយករដ្ឋមន្ត្រីអ៊ីស្រាអែល លោក Benjamin Netanyahu កុំឱ្យវាយប្រហារតបវិញ បន្ទាប់ពីអ៊ីរ៉ង់បានបាញ់មីស៊ីលជាច្រើនគ្រាប់ទៅលើគោលដៅអ៊ីស្រាអែល ដើម្បីសងសឹកចំពោះការវាយប្រហារនៅជាយក្រុងបេរូត នេះបើយោងតាមការចុះផ្សាយរបស់សារព័ត៌មាន Axios។ នេះគឺជាលើកដំបូងហើយដែលអ៊ីរ៉ង់បានបាញ់មីស៊ីលជាច្រើនគ្រាប់ទៅលើអ៊ីស្រាអែលចាប់តាំងពីមានបទឈប់បាញ់មក។ អ៊ីរ៉ង់បាននិយាយជាយូរមកហើយថា កិច្ចព្រមព្រៀងសន្តិភាពណាមួយជាមួយសហរដ្ឋអាមេរិកនឹងអាស្រ័យលើបទឈប់បាញ់ធ្វើឡើងនៅក្នុងប្រទេសលីបង់ ដែលអ៊ីស្រាអែលបានឈ្លានពានកាលពីខែមីនា ដើម្បីតាមប្រមាញ់ក្រុមយុទ្ធជនហេសបូឡា គាំទ្រដោយអ៊ីរ៉ង់ ដែលបានបាញ់រ៉ូកែត និងយានដ្រូន ឆ្លងកាត់ព្រំដែន ជាការបង្ហាញសាមគ្គីភាពជាមួយទីក្រុងតេអេរ៉ង់។ ប៉ុន្តែអ៊ីស្រាអែលកាលពីថ្ងៃអាទិត្យសប្ដាហ៍មុន បានចាប់ផ្តើមការវាយប្រហារនៅក្នុងតំបន់បេរូតជាលើកដំបូង ចាប់តាំងពីសហរដ្ឋអាមេរិកបានប្រកាសផែនការឈប់បាញ់សម្រាប់ប្រទេសលីបង់កាលពីសប្តាហ៍មុន។ កងឆ្មាំបដិវត្តន៍អ៊ីរ៉ង់បាននិយាយថា ពួកគេបានកំណត់គោលដៅមូលដ្ឋានទ័ពអាកាស Ramat David ជិតទីក្រុង Nazareth របស់ប្រទេសអ៊ីស្រាអែល ភាគខាងជើង។ យោធាអ៊ីស្រាអែលបាននិយាយថា ខ្លួនបានកំណត់អត្តសញ្ញាណមីស៊ីលដែលបាញ់ចេញពីអ៊ីរ៉ង់ ហើយប្រព័ន្ធការពារដែនអាកាសរបស់ខ្លួនបានស្ទាក់ចាប់មីស៊ីលទាំងនោះ៕

[UPDATE] រញ្ជួយដីកម្រិត ៧,៨ រ៉ិចទ័រវាយប្រហារភាគខាងត្បូងប្រទេសហ្វីលីពីន ខណៈចេញការព្រមានពីរលកយក្សស៊ូណាមិ

មជ្ឈមណ្ឌលស្រាវជ្រាវភូមិសាស្ត្រអាល្លឺម៉ង់ (GFZ )បាននិយាយថា ការព្រមានអំពីរលកយក្សស៊ូណាមិត្រូវបានចេញបន្ទាប់ពីការរញ្ជួយដីកម្រិត ៧,៨ រ៉ិចទ័របានវាយប្រហារកោះ មីនដាណាវ (Mindanao) នៅភាគខាងត្បូងប្រទេសហ្វីលីពីន នៅថ្ងៃចន្ទ៨មិថុនានេះ។ មជ្ឈមណ្ឌលនេះនិយាយថា ការរញ្ជួយដីនេះបានវាយប្រហារនៅជម្រៅ ១០ គីឡូម៉ែត្រ។ ទីភ្នាក់ងារភូគព្ភសាស្ត្រនៃប្រទេសហ្វីលីពីន និងប្រទេសជិតខាងឥណ្ឌូនេស៊ី បានចេញការព្រមានអំពីរលកយក្សស៊ូណាមិ។មិនមានរបាយការណ៍ភ្លាមៗអំពីការខូចខាតធ្ងន់ធ្ងរនៅក្នុងប្រទេសទាំងពីរនោះទេ។ មុននោះបន្តិច មជ្ឈមណ្ឌលខាងលើនេះបានកំណត់ការរញ្ជួយដីនេះនៅកម្រិត ៨,២ រ៉ិចទ័រ។ ប្រព័ន្ធព្រមានអំពីរលកយក្សស៊ូណាមិរបស់សហរដ្ឋអាមេរិកបានចេញការគំរាមកំហែងពីការបំផ្លិចបំផ្លាញពីរលកយក្សស៊ូណាមិចំពោះការរញ្ជួយដីនេះ។ Phivolcs ដែលជាទីភ្នាក់ងារតាមដានការរញ្ជួយដីរបស់ហ្វីលីពីន និយាយថា ការរញ្ជួយដីនេះមានកម្រិត ៧ រ៉ិចទ័រ និងបានព្រមានអំពីការខូចខាត និងរលកយក្សស៊ូណាមិលើសពី ១ ម៉ែត្រ ដែលអាចបន្តរយៈពេលជាច្រើនម៉ោង។BMKG របស់ឥណ្ឌូនេស៊ីបានដាក់ការរញ្ជួយដីនៅកម្រិត ៧,៧ រ៉ិចទ័រ។ លោក Benjie Ancheta អធិការនគរបាលនៃទីក្រុង Alabel ក្នុង ខេត្ត Sarangani របស់ប្រទេសហ្វីលីពីន បាននិយាយថា អគារការិយាល័យនគរបាលមានស្នាមប្រេះមួយចំនួនភ្លាមៗបន្ទាប់ពីការរញ្ជួយដី ដែលបានកើតឡើងក្នុងអំឡុងពេលពិធីគោរពទង់ជាតិរបស់ពួកគេ។ លោក Ancheta បាននិយាយថា មិនមានរបាយការណ៍ភ្លាមៗអំពីអ្នកស្លាប់ និងរបួសនោះទេ ប៉ុន្តែមនុស្សមួយចំនួនបានដួលសន្លប់បន្ទាប់ពីការរញ្ជួយដីដ៏ខ្លាំងក្លានេះ។លោក Ancheta បានប្រាប់សារព័ត៌មាន Reuters តាមទូរស័ព្ទថា នេះគឺជាការរញ្ជួយដីដ៏ខ្លាំងក្លាបំផុតដែលពួកលោកធ្លាប់ជួបប្រទះ៕

[BREAKING NEWS] គ្រោះរញ្ជួយដីកម្រិត ៧,៣ រ៉ិចទ័របានវាយប្រហារកោះ មីនដាណាវ របស់ប្រទេសហ្វីលីពីន

មជ្ឈមណ្ឌលស្រាវជ្រាវវិទ្យាសាស្ត្រភូមិសាស្ត្រអាល្លឺម៉ង់ (GFZ) បាននិយាយថា គ្រោះរញ្ជួយដីកម្រិត ៧,៣ រ៉ិចទ័របានវាយប្រហារកោះមីនដាណាវ (Mindanao) ប្រទេសហ្វីលីពីន នៅព្រឹកថ្ងៃចន្ទ ៨ មិថុនា នេះ ។ មជ្ឈមណ្ឌលស្រាវជ្រាវវិទ្យាសាស្ត្រភូមិសាស្ត្រអាល្លឺម៉ង់ខាងលើ បាននិយាយថា គ្រោះរញ្ជួយដីនេះមានជម្រៅ ១០ គីឡូម៉ែត្រ ។

ឆ្មាំល្បាតឆ្នេរកោះតៃវ៉ាន់និយាយថា ខ្លួនបានដាក់ពង្រាយនាវាដើម្បីឆ្លើយតបទៅនឹងប្រតិបត្តិការរបស់ចិន

ឆ្មាំល្បាតឆ្នេររបស់កោះតៃវ៉ាន់បាននិយាយនៅថ្ងៃអាទិត្យនេះថា ខ្លួនបានដាក់ពង្រាយនាវា "ដើម្បីឆ្លើយតបឱ្យបានត្រឹមត្រូវ" ចំពោះប្រតិបត្តិការរបស់ចិននៅក្នុងដែនទឹកភាគខាងកើតនៃកោះប្រជាធិបតេយ្យមួយនេះ ដែលខ្លួនបាននិយាយថា "រំលោភលើច្បាប់អន្តរជាតិ"។ទីភ្នាក់ងារសារព័ត៌មាន AFP បាននិយាយថា ការបញ្ជូននាវានេះកើតឡើងបន្ទាប់ពីប្រព័ន្ធផ្សព្វផ្សាយរដ្ឋចិនបានរាយការណ៍កាលពីថ្ងៃសៅរ៍ថា "ប្រតិបត្តិការអនុវត្តច្បាប់" គឺជាការឆ្លើយតបទៅនឹងការចរចារវាងជប៉ុន និងហ្វីលីពីនដើម្បីគូសព្រំដែននៅក្នុងដែនទឹកដែលរងផលប៉ះពាល់ ។ ប្រទេសចិន ដែលអះអាងថាកោះតៃវ៉ាន់ជាផ្នែកមួយនៃទឹកដីរបស់ខ្លួន បានហៅការចរចានេះថា "ខុសច្បាប់" ហើយបានអះអាងសិទ្ធិគ្រប់គ្រងផ្តាច់មុខលើដែនទឹកនេះ។ឆ្មាំល្បាតឆ្នេរតៃវ៉ាន់បាននិយាយនៅក្នុងសេចក្តីថ្លែងការណ៍មួយថា នាវាចិនមួយចំនួនត្រូវបានតាមដាន "ពេញមួយដំណើរការទាំងមូល" ហើយតំបន់តៃវ៉ាន់ "បានដាក់ពង្រាយនាវាចាំបាច់ដើម្បីឆ្លើយតបឱ្យបានត្រឹមត្រូវ" ។កោះតៃវ៉ាន់បាននិយាយថាខ្លួនបានប្រទះឃើញនាវារដ្ឋាភិបាលចិនចំនួនបួនគ្រឿងដែលចាកចេញពីកំពង់ផែ Xiamen ធ្វើដំណើរនៅខាងក្រៅដែនទឹកហាមឃាត់របស់កោះតៃវ៉ាន់នៅភាគនិរតីនៃកោះនេះ។ឆ្មាំល្បាតឆ្នេរតៃវ៉ាន់បានបញ្ជូននាវាប្រាំគ្រឿង ដើម្បីជួយក្នុងការឃ្លាំមើលសកម្មភាពផ្សេងៗ៕

បារាំង និងសម្ព័ន្ធមិត្តសម្លឹងរកការចាត់វិធានការថ្នាក់ជាតិ ដើម្បីដាក់សម្ពាធលើអ៊ីស្រាអែលលើបញ្ហាតំបន់ West Bank

អ្នកការទូតអឺរ៉ុបបីរូបបាននិយាយកាលពីថ្ងៃសៅរ៍ថា ប្រទេសបារាំងកំពុងធ្វើការជាមួយប្រទេសជាច្រើនដើម្បីបង្កើនសម្ពាធលើអ៊ីស្រាអែលដោយបន្តទៅមុខជាមួយនឹងទណ្ឌកម្មជាតិដែលត្រូវបានសម្របសម្រួលដោយកំណត់គោលដៅលើបុគ្គលដែលមានទំនាក់ទំនងជាមួយអំពើហិង្សានៅក្នុងតំបន់ West Bank។អ្នកការទូតបាននិយាយថា វិធានការទាំងនេះ ដែលរួមមានការបង្កកទ្រព្យសម្បត្តិ និងការហាមប្រាមការធ្វើដំណើរ មិនទាន់ត្រូវបានសម្រេចជាចុងបញ្ចប់នៅឡើយទេ ហើយប្រទេសនានាអាចអនុម័តបញ្ជីបុគ្គលផ្សេងៗគ្នា។ចំណាត់ការនេះកើតឡើងស្របពេលមានអំពើហិង្សាកើនឡើងដោយក្រុមអ្នកតាំងទីលំនៅអ៊ីស្រាអែលនៅក្នុងតំបន់ West Bank ដែលអ៊ីស្រាអែលកាន់កាប់ និងបង្ហាញពីកំហឹងនៅក្នុងប្រទេសលោកខាងលិចជាច្រើនចំពោះរដ្ឋាភិបាលរបស់នាយករដ្ឋមន្ត្រីលោក Benjamin Netanyahu ដែលបានពង្រីកការតាំងទីលំនៅ។ ក្រុមអ្នកការទូតនិយាយថា ការពង្រីកនេះមានគោលបំណងធ្វើឱ្យខូចដល់ការរំពឹងទុកសម្រាប់រដ្ឋប៉ាឡេស្ទីន។ក្រុមអ្នកការទូតបាននិយាយថា ដោយសារកិច្ចខិតខំប្រឹងប្រែងត្រូវបានរារាំងនៅសហភាពអឺរ៉ុបដើម្បីជំរុញវិធានការកាន់តែតឹងរ៉ឹងប្រឆាំងនឹងអ៊ីស្រាអែល ប្រទេសជាច្រើនបានសន្និដ្ឋានថា ទណ្ឌកម្មថ្នាក់ជាតិដែលសម្របសម្រួលគឺជាជម្រើសដ៏ល្អបំផុតសម្រាប់ពេលនេះ។អ្នកការទូតម្នាក់បាននិយាយថា ពុំមានការឯកភាពគ្នានៅកម្រិតសហភាពអឺរ៉ុបទេ ដូច្នេះពួកលោកបានផ្លាស់ប្តូរទៅការពិភាក្សានៅកម្រិតជាតិវិញ។អ្នកការទូតពីររូបបាននិយាយថា ការប្រកាសនេះនឹងធ្វើឡើងក្នុងរយៈពេលប៉ុន្មានថ្ងៃខាងមុខ៕

ករណីឆ្លងជំងឺអេបូឡាហក់ឡើងជាង ៤០០នាក់ ខណៈក្ដីបារម្ភកើនឡើងពីការផ្ទុះឡើងនៃជំងឺនេះនៅអាហ្វ្រិកកណ្តាល

ក្រុមមន្ត្រីសុខាភិបាលបានព្រមានថា ការផ្ទុះឡើងនៃជំងឺអេបូឡានៅសាធារណរដ្ឋប្រជាធិបតេយ្យកុងហ្គោ និងអ៊ូហ្គង់ដា អាចក្លាយជាករណីមួយក្នុងចំណោមករណីធំបំផុតក្នុងប្រវត្តិសាស្ត្រ បន្ទាប់ពីករណីឆ្លងដែលបានបញ្ជាក់បានកើនឡើងដល់ ៤៧១ ករណី ជំរុញឱ្យមានការឆ្លើយតបជាអន្តរជាតិដ៏សំខាន់។ យោងតាមអង្គការសុខភាពពិភពលោក ពេលនេះករណីឆ្លងជំងឺអេបូឡាជិត ៥០០ ករណី ត្រូវបានបញ្ជាក់នៅក្នុងការផ្ទុះឡើងយ៉ាងឆាប់រហ័សនៅអាហ្វ្រិកកណ្តាល ដែលជំរុញឱ្យមានការព្រួយបារម្ភថា ជំងឺរាតត្បាតនេះអាចក្លាយជាករណីធំបំផុតមួយក្នុងប្រវត្តិសាស្ត្រ។អង្គការសុខភាពពិភពលោកបានប្រកាសរួចហើយថាវិបត្តិនេះជាគ្រាអាសន្នសុខភាពសាធារណៈអន្តរជាតិ ខណៈក្រុមមន្ត្រីសុខាភិបាលកំពុងប្រឹងប្រែងទប់ស្កាត់ការរីករាលដាលជំងឺនេះនៅទូទាំងតំបន់។លោក Jason Asher នាយកមជ្ឈមណ្ឌលព្យាករណ៍ និងវិភាគការផ្ទុះឡើងនៃជំងឺរបស់មជ្ឈមណ្ឌលគ្រប់គ្រង និងបង្ការជំងឺសហរដ្ឋអាមេរិក បានព្រមានថា "ទំហំនោះអាចកើតឡើងបាន" ដោយសំដៅទៅលើការភ័យខ្លាចថា ការផ្ទុះឡើងនៃជំងឺនេះអាចប្រកួតប្រជែងនឹងជំងឺរាតត្បាតដ៏សាហាវនៅអាហ្វ្រិកខាងលិច កាលពីឆ្នាំ ២០១៤។នៅក្នុងការធ្វើបច្ចុប្បន្នភាពចុងក្រោយរបស់ខ្លួនកាលពីថ្ងៃសៅរ៍ អង្គការសុខភាពពិភពលោកបានរាយការណ៍ពីករណីឆ្លងដែលបានបញ្ជាក់ចំនួន ៤៥២ ករណី រួមទាំងការស្លាប់ចំនួន ៨២ ករណី នៅក្នុងសាធារណរដ្ឋប្រជាធិបតេយ្យកុងហ្គោ ជាទីដែលការផ្ទុះឡើងនៃជំងឺនេះត្រូវបានប្រកាសជាផ្លូវការកាលពីបីសប្តាហ៍មុន៕

ការបាញ់ប្រហារបណ្ដាលឱ្យនគរបាលរបួស ខណៈកងកម្លាំងបូលីវីសម្អាតផ្លូវហាយវេក្រោយបិទរយៈពេលជាច្រើនសប្តាហ៍

នគរបាល និងកងកម្លាំងប្រដាប់អាវុធបូលីវី បានសម្អាតផ្នែកមួយនៃផ្លូវហាយវេសំខាន់មួយនៅទីក្រុង San Julian ក្នុងតំបន់ Santa Cruz ភាគខាងកើត កាលពីថ្ងៃសៅរ៍ ៦ មិថុនា បន្ទាប់ពីការបិទផ្លូវអស់រយៈពេលជាងបីសប្តាហ៍ ដែលបានរំខានដល់ការដឹកជញ្ជូនក្នុងអំឡុងពេលនៃការប្រឈមដាក់គ្នានៃការតវ៉ាទូទាំងប្រទេស។ ក្រុមអាជ្ញាធរបាននិយាយថា ប្រតិបត្តិការបោសសម្អាតបានចាប់ផ្តើមនៅម៉ោងប្រហែល ៦ ព្រឹក ម៉ោងក្នុងស្រុក នៅពេលកងកម្លាំងសន្តិសុខបានប្រមូល ឈើ កម្ទេចកម្ទី និងរបាំងផ្សេងទៀតចេញពីផ្លូវ ដែលអនុញ្ញាតឱ្យយានយន្តមួយចំនួនបន្តដំណើរបាន ។ មន្ត្រីនគរបាលយ៉ាងហោចណាស់ពីរនាក់បានរងរបួសដោយការបាញ់ប្រហារក្នុងអំឡុងពេលប្រតិបត្តិការ។ ក្រុមអាជ្ញាធរបាននិយាយថា ការបាញ់ប្រហារបានចេញមកពីទិសដៅរបស់ក្រុមបាតុករ ហើយវីដេអូមួយដែលចេញផ្សាយពីក្រសួងការពារជាតិបូលីវី និងត្រូវបានពិនិត្យដោយសារព័ត៌មាន Reuters បានបង្ហាញមនុស្សពីរនាក់កំពុងបាញ់កាំភ្លើងពីចំហៀងផ្លូវដែលត្រូវបានបិទ។ជម្លោះនេះបានចាប់ផ្តើមជាមួយនឹងកូដកម្មរបស់កម្មករនៅក្នុងខែឧសភា ហើយបានឈានដល់ការបិទផ្លូវហាយវេ ដែលកាត់ផ្តាច់ការចូលទៅកាន់ទីក្រុងជិតខាង La Paz និង El Alto ដែលជាជម្រករបស់ប្រជាជនប្រហែល ២លាននាក់។ក្រុមអ្នកតវ៉ា រួមទាំងសហជីពកម្មករ និងក្រុមដែលស្មោះត្រង់នឹងអតីតប្រធានាធិបតីឆ្វេងនិយម លោក Evo Morales កំពុងទាមទារឱ្យរដ្ឋាភិបាលរបស់លោកប្រធានាធិបតី Paz ដកវិធានការរឹតត្បិត និងដោះស្រាយការកើនឡើងនៃការចំណាយលើជីវភាពរស់នៅប្រចាំថ្ងៃ៕

អ៊ុយក្រែនវាយប្រហារដោយយានដ្រូនជាច្រើនលើរុស្ស៊ីនៅថ្ងៃចុងក្រោយនៃវេទិកាសេដ្ឋកិច្ចដ៏សំខាន់

ក្រុមមន្ត្រីបាននិយាយថា អ៊ុយក្រែនបានវាយប្រហារដោយយានដ្រូនរាប់រយគ្រឿងទៅលើប្រទេសរុស្ស៊ីកាលពីព្រឹកថ្ងៃសៅរ៍ ដោយបណ្តាលឱ្យមនុស្សម្នាក់ស្លាប់ និងឆេះបំផ្លាញឃ្លាំងប្រេងមួយកន្លែងនៅថ្ងៃចុងក្រោយនៃវេទិកាសេដ្ឋកិច្ចដ៏សំខាន់របស់ប្រទេសនេះនៅទីក្រុង សេនភីធើស្បើក (St. Petersburg)។ យានដ្រូនជាច្រើនគ្រឿងបានដាក់គោលដៅទីក្រុង សេនភីធើស្បើក ដែលជាការវាយប្រហារលើកទីពីររបស់អ៊ុយក្រែនលើទីក្រុងនេះក្នុងរយៈពេលតិចជាងមួយសប្តាហ៍ ដោយសេវាសន្តិសុខ SBU របស់អ៊ុយក្រែន បាននិយាយថា ខ្លួនបានវាយប្រហារមូលដ្ឋានកងទ័ពជើងទឹក។ទីក្រុងមូស្គូ និងទីក្រុងគីវបានបង្កើនការវាយប្រហារដោយយានដ្រូនទៅលើគ្នាទៅវិញទៅមកក្នុងរយៈពេលប៉ុន្មានខែថ្មីៗនេះ ខណៈកិច្ចខិតខំប្រឹងប្រែងការទូតដឹកនាំដោយសហរដ្ឋអាមេរិកដើម្បីបញ្ចប់សង្គ្រាម ដែលឥឡូវនេះស្ថិតនៅក្នុងឆ្នាំទីប្រាំរបស់ខ្លួន នៅតែជាប់គាំង និងរំខានដោយសង្គ្រាមនៅមជ្ឈិមបូព៌ា។ការវាយប្រហារទាំងនេះបានកើតឡើងមួយថ្ងៃបន្ទាប់ពីប្រធានាធិបតីរុស្ស៊ី Vladimir Putin បានបដិសេធសំណើរបស់សមភាគីអ៊ុយក្រែន លោក Volodymyr Zelenskyy សម្រាប់កិច្ចប្រជុំមួយ ដែលទទួលបានការរិះគន់ពីលោក Zelenskyy ដោយចោទប្រកាន់លោក Putin ថា កំពុងជ្រើសរើសសង្គ្រាមម្តងទៀត។ក្រសួងការពារជាតិរុស្ស៊ីបាននិយាយថា កងកម្លាំងការពារដែនអាកាសរុស្ស៊ីបានស្ទាក់ចាប់យានដ្រូន សរុបចំនួន ៣៧៦ គ្រឿងលើតំបន់ Belgorod, Bryansk, Kaluga, Kursk, Leningrad, Novgorod, Oryol, Pskov, Rostov, Ryazan, Smolensk, Tver និង Tula តំបន់ក្រុងមូស្គូ សាធារណរដ្ឋ Crimea សាធារណរដ្ឋ Abkhazia និងលើដែនទឹកនៃសមុទ្រ Azov និងសមុទ្រខ្មៅ របស់រុស្ស៊ី៕

បណ្ដាញសង្គម

ព័ត៌មានថ្មីៗ

រលកបាតុកម្មអាល់បានី ឈានចូលដល់សប្តាហ៍ទី ៤ បើទោះបីជាអាកាសធាតុក្តៅក៏ដោយ

សត្វស្លាបផ្លាស់ទីជម្រក ២ក្បាល បញ្ជាក់ថាមានជំងឺគ្រុនផ្តាសាយបក្សី H5N1 នៅអូស្រ្តាលី

ក្រុមភ្នាក់ងារពន្លត់អគ្គិភ័យបន្តពន្លត់អណ្តាតភ្លើងឆាបឆេះឃ្លាំងស្តុកទំនិញមួយកន្លែងនៅទីក្រុង Houston សហរដ្ឋអាមេរិក

កូរ៉េខាងត្បូងព្រមទទួលយកឈ្លើយសឹកកូរ៉េខាងជើងទាំងអស់នៅអ៊ុយក្រែន បើសិនជាពួកគេប្រាថ្នា

លោក Putin ៖ កងកម្លាំងរុស្ស៊ីជិតដណ្តើមបានទីក្រុង Kostiantynivka ស្ថិតក្នុងតំបន់ Donetskរបស់អ៊ុយក្រែន

តំបន់គ្រីមៀបិទភ្លើងបំភ្លឺតាមផ្លូវ ផ្អាកសេវាដឹកជញ្ជូនសាធារណៈ ខណៈជួបកង្វះខាតប្រេងឥន្ធនៈ

រលកកម្តៅខែមិថុនាបានបំណែកកំណត់ត្រាកាលពីថ្ងៃចន្ទនៅទីក្រុង Nante របស់បារាំង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877