BTV NEWS

មនុស្ស ១៤នាក់ ស្លាប់ ពេលអគ្គិភ័យឆាបឆេះអគារមួយខ្នងនៅទីក្រុង Lucknow ប្រទេសឥណ្ឌា

ពលរដ្ឋជម្លៀសខ្លួននៅលីបង់ ព្រួយបារម្ភខ្លាចបទឈប់បាញ់អ៊ីស្រាអែល-ក្រុមហេសបូឡា ពុំចូលជាធរមាន

ពលរដ្ឋហ្កាហ្សាស្វែងរកកន្លែងស្រាកស្រាន្តនៅក្នុងសមុទ្រកខ្វក់ ដើម្បីគេចវេះពីអាកាសធាតុក្តៅ

រលកបាតុកម្មអាល់បានី ឈានចូលដល់សប្តាហ៍ទី ៤ បើទោះបីជាអាកាសធាតុក្តៅក៏ដោយ

ព័ត៌មានអន្តរជាតិ

ទីប្រឹក្សាមេដឹកនាំកំពូលអ៊ីរ៉ង់អំពាវនាវឲ្យលោក TRUMP បញ្ឈប់ការបិទច្រកសមុទ្រហ័រមូស និងដោះលែងទ្រព្យសកម្មរបស់ក្រុងតអេរ៉ង់

ទីប្រឹក្សាជាន់ខ្ពស់ម្នាក់របស់មេដឹកនាំកំពូលអ៊ីរ៉ង់ បានអំពាវនាវឲ្យប្រធានាធិបតីអាមេរិកលោក ដូណាល់ ត្រាំ ធ្វើការសម្រេចចិត្តដោយឯករាជ្យពីអ៊ីស្រាអែល បញ្ឈប់ការបិទផ្លូវនៅច្រកសមុទ្រហ័រមូស និងដោះលែងទ្រព្យសកម្មដែលត្រូវបានបង្កករបស់អ៊ីរ៉ង់។លោក Mohsen Rezaei ទីប្រឹក្សាយោធារបស់មេដឹកនាំកំពូលអ៊ីរ៉ង់លោក Mojtaba Khamenei បាននិយាយនៅក្នុងបទសម្ភាសន៍ផ្តាច់មុខជាមួយទូរទស្សន៍ CNN កាលពីថ្ងៃសុក្រនៅទីក្រុងតេអេរ៉ង់ថា ការចរចារវាងភាគីទាំងពីរ «កំពុងស្ថិតក្នុងភាពជាប់គាំង ហើយលោក ត្រាំ ត្រូវតែទម្លាយភាពជាប់គាំងនេះ»។លោក Rezaei បាននិយាយថា ប្រសិនបើលោក ត្រាំ ចង់ឈានដល់កិច្ចព្រមព្រៀងជាមួយអ៊ីរ៉ង់ ការដោះលែងទ្រព្យសកម្មដែលត្រូវបានបង្កករបស់អ៊ីរ៉ង់ «គឺជាការសាកល្បងដែលអាមេរិកត្រូវតែឆ្លងកាត់ ហើយដំណោះស្រាយនេះ នឹងត្រូវសម្រេចបាន»។លោក Rezaei បានបដិសេធការរំពឹងទុកនៃកិច្ចប្រជុំដែលអាចកើតមានរវាងលោក ត្រាំ និងលោក Khamenei។ «ជំនួបនេះ នឹងមិនកើតឡើងទេ។ ឥឡូវនេះ យើងកំពុងស្ថិតក្នុងដំណាក់កាលដំបូងនៃការចរចា ហើយលោក ត្រាំ បាននាំការចរចានេះឈានដល់ភាពជាប់គាំង»៕

ប្រព័ន្ធផ្សព្វផ្សាយ៖ អ៊ីរ៉ង់ច្រានចោលការអះអាងដែលថា ខ្លួនយល់ព្រមប្រគល់សារធាតុអ៊ុយរ៉ានីញ៉ូមឲ្យទៅប្រទេសទី៣

ទីភ្នាក់ងារសារព័ត៌មានពាក់កណ្តាលផ្លូវការរបស់អ៊ីរ៉ង់ Fars កាលពីថ្ងៃសុក្រ បានបដិសេធរបាយការណ៍មួយចេញផ្សាយដោយបណ្តាញសារព័ត៌មាន Al Arabiya ដែលគ្រប់គ្រងដោយប្រទេសអារ៉ាប៊ីសាអ៊ូឌីតថា ទីក្រុងតេអេរ៉ង់បានយល់ព្រមប្រគល់អ៊ុយរ៉ានីញ៉ូមចម្រាញ់រួចរបស់ខ្លួនទៅឲ្យប្រទេសទី ៣។ដោយដកស្រង់ប្រភពព័ត៌មានដែលជិតស្និទ្ធនឹងក្រុមចរចាអ៊ីរ៉ង់ Fars បាននិយាយថា បញ្ហានុយក្លេអ៊ែរមិនមែនជារបៀបវារៈបច្ចុប្បន្ននៃការចរចារវាងទីក្រុងតេអេរ៉ង់ និងទីក្រុងវ៉ាស៊ីនតោន ដែលមានគោលបំណងបញ្ចប់សង្គ្រាមនោះទេ ហើយនឹងត្រូវបានពិភាក្សាតែនៅដំណាក់កាលក្រោយៗទៀត។ការបដិសេធនេះ បានកើតឡើងបន្ទាប់ពីរបាយការណ៍មុនមួយដែលថា អ៊ីរ៉ង់បានជូនដំណឹងដល់ប្រទេសប៉ាគីស្ថានអំពីការទទួលយករបស់ខ្លួន ក្នុងការប្រគល់ផ្នែកខ្លះនៃអ៊ុយរ៉ានីញ៉ូមចម្រាញ់រួចរបស់ខ្លួនទៅឲ្យប្រទេសទី៣។ប្រភពព័ត៌មាននេះ បានសង្កត់ធ្ងន់ថា ការប្រគល់បែបនេះ មិនត្រូវបានពិភាក្សាទេ ដោយបន្ថែមថា សហរដ្ឋអាមេរិកត្រូវតែចាត់វិធានការ «ជាក់ស្តែងនិងច្បាស់លាស់» មុនពេល «កិច្ចព្រមព្រៀងចុងក្រោយលើបញ្ហាជាមូលដ្ឋានមួយចំនួន» អាចសម្រេចបាន៕

យោធាអ៊ីស្រាអែលនិយាយថា ខ្លួនបានសម្លាប់ប្រធានអង្គភាពវិស្វកម្មរបស់ក្រុមហេសបូឡា

កងកម្លាំងការពារអ៊ីស្រាអែល បាននិយាយកាលពីថ្ងៃសុក្រថា ខ្លួនបានសម្លាប់ប្រធានអង្គភាពវិស្វកម្មរបស់ក្រុមហេសបូឡា គឺលោក Abed Harb។សេចក្តីថ្លែងការណ៍មួយដែលចេញដោយយោធា បានបញ្ជាក់ថា លោក Harb ត្រូវបានសម្លាប់ នៅក្នុងការវាយប្រហារតាមអាកាស កាលពីសប្តាហ៍មុន។យោធាបាននិយាយថា លោក Harb បានត្រួតពិនិត្យការប្រមូលផ្តុំនិងការដាក់ពង្រាយគ្រឿងផ្ទុះដែលមានបំណងកំណត់គោលដៅទាហានអ៊ីស្រាអែលនៅភាគខាងត្បូងប្រទេសលីបង់ ដោយចោទប្រកាន់លោកពីបទពាក់ព័ន្ធនឹងការវាយប្រហារប្រឆាំងនឹងកងកម្លាំងអ៊ីស្រាអែល ដែលមានតាំងពីសង្គ្រាមឆ្នាំ ២០០៦ ជាមួយអ៊ីស្រាអែល។យោធាបានបន្ថែមថា កងទ័ពអាកាសអ៊ីស្រាអែល បានវាយប្រហារ និងបំផ្លាញជើងទម្របាញ់រ៉ូកែតមួយគ្រឿង នៅពេលយប់ ដែលត្រូវបានប្រើប្រាស់ដោយក្រុមសកម្មប្រយុទ្ធហេសបូឡា ដើម្បីបាញ់រ៉ូកែតទៅកាន់កងទ័ពអ៊ីស្រាអែលដែលកំពុងប្រតិបត្តិការនៅភាគខាងត្បូងប្រទេសលីបង់។ក្រុមហេសបូឡាមិនបានធ្វើអត្ថាធិប្បាយអំពីការអះអាងរបស់អ៊ីស្រាអែលទេ៕

បារ៉ែនថ្កោលទោសការវាយប្រហាររបស់អ៊ីរ៉ង់លើទឹកដីរបស់ខ្លួនថា ជាការឈ្លានពានជាក់ស្តែង

បារ៉ែននៅថ្ងៃសៅរ៍នេះបានថ្កោលទោសចំពោះការវាយប្រហារចុងក្រោយរបស់អ៊ីរ៉ង់ប្រឆាំងនឹងទឹកដីរបស់ខ្លួន និងប្រទេសជិតខាងកូវ៉ែត ដោយនិយាយថា ប្រទេសឈូងសមុទ្រទាំងពីរ បានស្ទាក់ចាប់មីស៊ីលចំនួ ៧ គ្រាប់ដែលបាញ់ដោយអ៊ីរ៉ង់។ក្រសួងការបរទេសបារ៉ែន បានថ្កោលទោសអ្វីដែលខ្លួនពិពណ៌នាថា ជា «ការឈ្លានពានរបស់អ៊ីរ៉ង់ប្រឆាំងនឹងព្រះរាជាណាចក្របារ៉ែន និងរដ្ឋកូវ៉ែត ហើយបញ្ជាក់ថា សន្តិសុខមិនត្រូវបានបង្កើតឡើងដោយមីស៊ីលទេ ហើយស្ថិរភាពមិនត្រូវបានរក្សាដោយការដាក់មីននោះទេ»។ក្រសួងបានបន្ថែមថា «ការឈ្លានពានដោយចំហនេះ គឺជាការរំលោភបំពានយ៉ាងធ្ងន់ធ្ងរលើអធិបតេយ្យភាពរបស់ប្រទេសទាំងពីរ»៕

បារាំងបើកការស៊ើបអង្កេតឧក្រិដ្ឋកម្មសង្គ្រាមជុំវិញការប្រព្រឹត្តរបស់អ៊ីស្រាអែលលើសកម្មជនកងនាវាមនុស្សធម៌

ការិយាល័យរដ្ឋអាជ្ញាបាននិយាយកាលពីថ្ងៃសុក្រថា បារាំងបានបើកការស៊ើបអង្កេតលើ «ឧក្រិដ្ឋកម្មសង្គ្រាម» និង «ការធ្វើទារុណកម្ម» ដែលត្រូវបានចោទប្រកាន់ថា ជាការប្រព្រឹត្តរបស់អ៊ីស្រាអែលលើសកម្មជនបារាំង ដែលបានចូលរួមក្នុងកងនាវាជំនួយមនុស្សធម៌ទៅកាន់តំបន់ហ្កាហ្សា។ ការិយាល័យរដ្ឋអាជ្ញាប្រឆាំងភេរវកម្មជាតិ (PNAT) បាននិយាយថា ការស៊ើបអង្កេតនេះ ត្រូវបានធ្វើឡើង តាមសំណើរបស់រដ្ឋាភិបាល បន្ទាប់ពីសកម្មជនបានចោទប្រកាន់អាជ្ញាធរអ៊ីស្រាអែលពីបទធ្វើទុក្ខបុកម្នេញ ក្នុងអំឡុងពេលឃុំខ្លួនពួកគេកាលពីខែមុន។អ៊ីស្រាអែលបានឃាត់ខ្លួនសកម្មជនជាង ៤៣០ នាក់ មកពីប្រទេសនានាជុំវិញពិភពលោក បន្ទាប់ពីបានស្ទាក់ចាប់ពួកគេ ក្នុងដែនទឹកអន្តរជាតិ នៅថ្ងៃទី ១៨ ខែឧសភា ខណៈដែលពួកគេបានធ្វើការប៉ុនប៉ងចុងក្រោយបំផុត ក្នុងការទម្លាយការបិទផ្លូវទឹកដីប៉ាឡេស្ទីន។រដ្ឋមន្ត្រីសន្តិសុខជាតិស្តាំនិយមជ្រុលរបស់អ៊ីស្រាអែល លោក Itamar Ben Gvir បានបង្កឲ្យមានការថ្កោលទោសយ៉ាងទូលំទូលាយ បន្ទាប់ពីលោកបានបង្ហោះវីដេអូចំអកឲ្យសកម្មជនកងនាវាមនុស្សធម៌ទាំងនោះ ខណៈពេលដែលពួកគេ ត្រូវបានចាប់ចងនោះ៕

ប្រធានសភាលីបង់រិះគន់សេចក្តីព្រាងកិច្ចព្រមព្រៀងជាមួយអ៊ីស្រាអែលថា «មានការរៀបចំទុកជាមុន»

ប្រធានសភាលីបង់ Nabih Berri កាលពីថ្ងៃសុក្រ បានរិះគន់សេចក្តីព្រាងកិច្ចព្រមព្រៀងរវាងលីបង់ និងអ៊ីស្រាអែល ដោយពណ៌នាអំពីបទប្បញ្ញត្តិភាគច្រើនរបស់ខ្លួនថា «អយុត្តិធម៌» និងបដិសេធលក្ខខណ្ឌសំខាន់ៗទាក់ទងនឹងក្រុមហេសបូឡា និងភាគខាងត្បូងលីបង់។នៅក្នុងសេចក្តីថ្លែងការណ៍មួយ លោក Berri បាននិយាយថា សេចក្តីព្រាងកិច្ចព្រមព្រៀងនេះ មិនបានទាមទារឲ្យមានបទឈប់បាញ់ «ពេញលេញ និងគ្មានលក្ខខណ្ឌ»អំពីការបញ្ឈប់ការវាយប្រហារលើដី សមុទ្រ និងអាកាសទេ ហើយត្រូវបានរៀបចំទុកជាមុន ដោយបទប្បញ្ញត្តិបន្ថែមដែលតម្រូវឲ្យមានការបញ្ឈប់ការបាញ់ប្រហារទាំងស្រុង ដោយក្រុមហេសបូឡា និងការដកសមាជិកទាំងអស់របស់ខ្លួនចេញពីភាគខាងត្បូងនៃទន្លេ Litani។លោក Berri ដែលជាឥស្សរជននយោបាយស៊ីអ៊ីត ដែលមានទំនាក់ទំនងជិតស្និទ្ធជាមួយក្រុមហេសបូឡា ក៏បានជំទាស់នឹងបទប្បញ្ញត្តិទាក់ទងនឹងការដកទ័ពរបស់អ៊ីស្រាអែលផងដែរ ដោយនិយាយថា កិច្ចព្រមព្រៀងនេះ គួរតែបានចែងអំពីការដកទ័ពចេញពីទឹកដីលីបង់ដែលអ៊ីស្រាអែលគ្រប់គ្រង។ ផ្ទុយទៅវិញ លោកបាននិយាយថា វាសំដៅទៅលើការដកទ័ពចេញពី «តំបន់ភូមិសាស្ត្រ» ខណៈពេលដែលហាមឃាត់វត្តមានរបស់តួអង្គផ្សេងទៀត។លោក Berri បាននិយាយថា លោកនឹងយល់ព្រមតែគោលការណ៍ពីរប៉ុណ្ណោះ៖ បទឈប់បាញ់ដ៏ទូលំទូលាយ និងគ្មានលក្ខខណ្ឌលើដីគោក សមុទ្រ និងអាកាស ដោយគ្មានការរុះរើ ឬការបំផ្លិចបំផ្លាញ និងការដកទ័ពរបស់ក្រុមហេសបូឡា ចេញពីភាគខាងត្បូងនៃទន្លេ Litani ស្របគ្នានឹងការដកទ័ពរបស់អ៊ីស្រាអែលចេញពីទឹកដីដែលប្រទេសនេះបានគ្រប់គ្រងក្នុងអំឡុងពេលជម្លោះនេះ៕

ក្រុមប្រឹក្សាសន្តិសុខUN ទាមទារឲ្យក្រុមហ៊ួទីដោះលែងបុគ្គលិកUNចំនួន ៧៣នាក់ ជាបន្ទាន់ ខណៈប្រារព្ធខួប២ឆ្នាំនៃចាប់ខ្លួនពួកគេ

ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃសុក្របានថ្កោលទោសយ៉ាងដាច់អហង្ការចំពោះការបន្តឃុំខ្លួនបុគ្គលិកមនុស្សធម៌ បុគ្គលិកUN និងតំណាងសង្គមស៊ីវិលជាច្រើននាក់ដោយក្រុមហ៊ួទីនៅក្នុងប្រទេសយេម៉ែន។ការថ្កោលទោសនេះ បានកើតឡើង នៅពេលដែលខួបលើកទី២នៃការចាប់ខ្លួនទ្រង់ទ្រាយធំនៅក្នុងខែ មិថុនា ឆ្នាំ ២០២៤ ខិតជិតមកដល់ ដោយពុំមានដំណោះស្រាយណាមួយ អាចត្រូវកំណត់បានឡើយ។ស្ថាប័នដែលមានសមាជិក១៥ ប្រទេសនេះ បានបន្តការទាមទាររបស់ខ្លួនឲ្យមានការដោះលែងអ្នកដែលត្រូវបានឃុំខ្លួនទាំងអស់ ដោយគ្មានលក្ខខណ្ឌ សុវត្ថិភាព និងជាបន្ទាន់ រួមទាំងបុគ្គលិកUN ចំនួន ៧៣ នាក់ ដែលត្រូវបានឃុំខ្លួនក្នុងអំឡុងពេលនៃការចាប់ខ្លួនជាច្រើននាក់ ក្នុងរយៈពេល ៤ឆ្នាំកន្លងមកនេះ និងបានសម្តែងការព្រួយបារម្ភយ៉ាងខ្លាំងចំពោះសុខុមាលភាពរបស់ពួកគេ។ក្រុមប្រឹក្សានេះ បាននិយាយថា៖«ការគំរាមកំហែងទាំងអស់ចំពោះអ្នកដែលផ្តល់ជំនួយមនុស្សធម៌ គឺមិនអាចទទួលយកបានទេ» ដោយព្រមានថា ការឃុំខ្លួនទាំងនេះ កំពុងធ្វើឲ្យស្ថានភាពមនុស្សធម៌ដ៏អាក្រក់រួចទៅហើយនៅក្នុងប្រទេសមួយដែលមនុស្សជាង២២,៣ លាននាក់ ឥឡូវនេះ ត្រូវការជំនួយយ៉ាងខ្លាំង៕

មេដឹកនាំកំពូលអ៊ីរ៉ង់ផ្តល់ការលើកលែងទោសដល់អ្នកទោសជាង ២.០០០នាក់

មេដឹកនាំកំពូលអ៊ីរ៉ង់ លោក Mojtaba Khamenei បានយល់ព្រមលើកលែងទោស ឬបន្ធូរបន្ថយទោសដល់អ្នកទោសជាង ២.000នាក់ ក្នុងឱកាសថ្ងៃបុណ្យសាសនា។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Mizan របស់ស្ថាប័នតុលាការអ៊ីរ៉ង់កាលពីថ្ងៃសុក្រ។របាយការណ៍បានឲ្យដឹងថា ការលើកលែងទោសនេះ ត្រូវបានផ្តល់ឲ្យដើម្បីអបអរសាទរថ្ងៃបុណ្យសាសនាសំខាន់ៗពីរ គឺ Eid al-Adha និង Eid al-Ghadir តាមសំណើរបស់ប្រធានតុលាការអ៊ីរ៉ង់ លោក Gholamhossein Mohseni-Ejei ដែលបានដាក់ជូនបញ្ជីឈ្មោះអ្នកដែលមានសិទ្ធិទទួលបានវា។ សារព័ត៌មាន Mizan បានដកស្រង់សម្តីអនុប្រធានតុលាការអ៊ីរ៉ង់ លោក Ali Mozaffariដែលបាននិយាយថា ការលើកលែងទោសនេះ មិនអនុវត្តចំពោះបុគ្គលដែលត្រូវបានកាត់ទោសពីបទឧក្រិដ្ឋកម្មសន្តិសុខ ចារកម្ម សកម្មភាពប្រឆាំងនឹងសន្តិសុខផ្ទៃក្នុង និងខាងក្រៅរបស់ប្រទេសនេះ និងបុគ្គលដែលបានគំរាមកំហែងដល់សន្តិសុខសាធារណៈរបស់សង្គមទេ។ លោកមេដឹកនាំកំពូលអ៊ីរ៉ង់ផ្តល់ការលើកលែងទោសជាប្រចាំដល់អ្នកទោសក្នុងឱកាសពិសេសៗ តាមសិទ្ធិដែលរដ្ឋធម្មនុញ្ញរបស់ប្រទេសនេះ បានផ្តល់ឲ្យលោក៕

រុស្ស៊ី និងអ៊ុយក្រែន ដោះដូរឈ្លើយសឹកចំនួន ៣៧០នាក់ ជាចំនួនសរុបទាំងសងខាង

ក្រសួងការពារជាតិរុស្ស៊ី បាននិយាយថា រុស្ស៊ី និងអ៊ុយក្រែន បានដោះដូរឈ្លើយសឹកសង្គ្រាមចំនួន ១៨៥នាក់ កាលពីថ្ងៃសុក្រ។ ក្រសួងបាននិយាយថា ទីក្រុងមូស្គូ បាននាំយកទាហានរុស្ស៊ីចំនួន ១៨៥នាក់ ត្រឡប់មកពីទឹកដីដែលគ្រប់គ្រងដោយអ៊ុយក្រែន ខណៈក៏បានប្រគល់អ្នកទោសអ៊ុយក្រែនចំនួន ១៨៥នាក់ ទៅឲ្យទីក្រុងគីវ ដូចគ្នា។ក្រសួងបាននិយាយបន្ថែមថា ទាហានរុស្ស៊ីដែលបានវិលត្រឡប់ទៅប្រទេសវិញបច្ចុប្បន្នកំពុងស្ថិតនៅក្នុងប្រទេសបេឡារុស ដើម្បីទទួលបានការថែទាំផ្លូវចិត្ត និងផ្នែកវេជ្ជសាស្ត្រ ហើយក្រោយមកនឹងត្រូវផ្ទេរទៅឲ្យប្រទេសរុស្ស៊ីសម្រាប់ការព្យាបាល និងការស្តារនីតិសម្បទាបន្ថែមទៀត។ប្រធានាធិបតីអ៊ុយក្រែន លោក Volodymyr Zelenskyy បានបញ្ជាក់នៅថ្ងៃដដែលនោះថា ទាហានចំនួន ១៨៥នាក់ ព្រមទាំងជនស៊ីវិលម្នាក់ បានវិលត្រឡប់ទៅប្រទេសអ៊ុយក្រែនវិញ៕

ប្រជាជនគុយបា តវ៉ាប្រឆាំងការដាច់ចរន្តអគ្គិសនី ខណៈទណ្ឌកម្មថ្មីរបស់អាមេរិកដាក់ទៅលើកោះនេះ

ប្រជាជនគុយបា បានវាយឆ្នាំងនៅទីក្រុងឡាហាវ៉ាន ដើម្បីតវ៉ាប្រឆាំងការដាច់ចរន្តអគ្គិសនីនៅក្នុងតំបន់របស់ពួកគេ ខណៈរថយន្តនគរបាល ត្រូវបានដាក់ពង្រាយនៅតាមដងផ្លូវ។យោងតាមគេហទំព័ររបស់ក្រសួងរតនាគារសហរដ្ឋអាមេរិកបានឲ្យដឹងថា បាតុកម្មនេះ បានកើតឡើងប៉ុន្មានម៉ោងបន្ទាប់ពីទីក្រុងវ៉ាស៊ីនតោន បានដាក់ទណ្ឌកម្មលើប្រធានាធិបតីគុយបា លោក Miguel Diaz-Canel ភរិយារបស់លោក និងសមាជិកគ្រួសារ លោក Castro ។វិធានការចុងក្រោយរបស់សហរដ្ឋអាមេរិក គឺជាផ្នែកមួយនៃយុទ្ធនាការដាក់សម្ពាធកាន់តែទូលំទូលាយប្រឆាំងមេដឹកនាំកុម្មុយនិស្តរបស់ប្រទេសកោះនេះ ដោយទណ្ឌកម្មស្រដៀងគ្នាក៏ត្រូវបានដាក់ទៅលើមន្ត្រីគុយបា ចំនួន ១១ នាក់ កាលពីខែមុន។

បណ្ដាញសង្គម

ព័ត៌មានថ្មីៗ

រលកបាតុកម្មអាល់បានី ឈានចូលដល់សប្តាហ៍ទី ៤ បើទោះបីជាអាកាសធាតុក្តៅក៏ដោយ

សត្វស្លាបផ្លាស់ទីជម្រក ២ក្បាល បញ្ជាក់ថាមានជំងឺគ្រុនផ្តាសាយបក្សី H5N1 នៅអូស្រ្តាលី

ក្រុមភ្នាក់ងារពន្លត់អគ្គិភ័យបន្តពន្លត់អណ្តាតភ្លើងឆាបឆេះឃ្លាំងស្តុកទំនិញមួយកន្លែងនៅទីក្រុង Houston សហរដ្ឋអាមេរិក

កូរ៉េខាងត្បូងព្រមទទួលយកឈ្លើយសឹកកូរ៉េខាងជើងទាំងអស់នៅអ៊ុយក្រែន បើសិនជាពួកគេប្រាថ្នា

លោក Putin ៖ កងកម្លាំងរុស្ស៊ីជិតដណ្តើមបានទីក្រុង Kostiantynivka ស្ថិតក្នុងតំបន់ Donetskរបស់អ៊ុយក្រែន

តំបន់គ្រីមៀបិទភ្លើងបំភ្លឺតាមផ្លូវ ផ្អាកសេវាដឹកជញ្ជូនសាធារណៈ ខណៈជួបកង្វះខាតប្រេងឥន្ធនៈ

រលកកម្តៅខែមិថុនាបានបំណែកកំណត់ត្រាកាលពីថ្ងៃចន្ទនៅទីក្រុង Nante របស់បារាំង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877