BTV NEWS

លោក Trump៖ មូលនិធិអ៊ីរ៉ង់ដែលត្រូវបានបញ្ចេញ នឹងប្រើប្រាស់ទិញទំនិញរបស់សហរដ្ឋអាមេរិក

គណបក្សកាន់អំណាចរបស់ជប៉ុន អនុម័តសេចក្តីព្រាងច្បាប់ ដើម្បីបង្កើតរដ្ឋធានីទី២

មេដឹកនាំកូរ៉េខាងជើង លោក គីម រិះគន់ជប៉ុនថា កំពុងប្រែក្លាយទៅជា «រដ្ឋសង្គ្រាម»

អ៊ុយក្រែន៖ ការវាយប្រហាររបស់រុស្ស៊ី សម្លាប់មនុស្ស ៣នាក់ នៅស្រុកកំណើតរបស់លោក Zelenskyy

ព័ត៌មានអន្តរជាតិ

រុស្ស៊ីប្រកាសពីការដោះដូរអ្នកទោសសង្គ្រាមជាមួយអ៊ុយក្រែន ដោយភាគីម្ខាងៗចំនួន ១៨៥នាក់

ប្រទេសរុស្ស៊ី បានប្រកាសថា ការដោះដូរអ្នកទោសជុំមួយទៀត ជាមួយអ៊ុយក្រែន បានកើតឡើងនៅព្រឹកថ្ងៃសុក្រ (ទី៥ ខែមិថុនា ឆ្នាំ២០២៦) នេះ ដោយមានទាហានចំនួន ១៨៥នាក់ បានវិលត្រឡប់មកវិញ សម្រាប់ភាគីម្ខាងៗ។ក្រសួងការពារជាតិបានឲ្យដឹងនៅក្នុងសេចក្តីថ្លែងការណ៍មួយថា ប្រទេសអេមីរ៉ាតអារ៉ាប់រួម បានសម្របសម្រួលឲ្យមានការដោះដូរអ្នកទោសសង្គ្រាម ឬឈ្លើយសឹកនេះ។ ក្រសួងបានបន្ថែមថា ទាហានរុស្ស៊ីបច្ចុប្បន្ន កំពុងស្ថិតនៅប្រទេសបេឡារុស ហើយស្នងការសិទ្ធិមនុស្សរុស្ស៊ី លោកស្រី Yana Lantratova កំពុងធ្វើការជាមួយពួកគេ។ក្រសួងបានបញ្ជាក់ទៀតថា៖ «ទាហានដែលត្រូវបានដោះលែង កំពុងស្ថិតនៅប្រទេសបេឡារុស ជាកន្លែងដែលពួកគេកំពុងទទួលបានជំនួយផ្នែកផ្លូវចិត្ត និងវេជ្ជសាស្ត្រ។ បន្ទាប់មក ពួកគេនឹងត្រូវបញ្ជូនទៅប្រទេសរុស្ស៊ី ដើម្បីទទួលការព្យាបាល និងការស្តារនីតិសម្បទា»។អ៊ុយក្រែនមិនបានធ្វើការអត្ថាធិប្បាយអ្វីភ្លាមៗឡើយ ជុំវិញការដោះដូរនេះ ប៉ុន្តែមន្ត្រីជាន់ខ្ពស់អ៊ុយក្រែនជាច្រើននាក់ បានឲ្យដឹងថា ការរៀបចំសម្រាប់ការដោះដូរ បានចាប់ផ្តើមក្នុងរយៈពេលប៉ុន្មានសប្តាហ៍ថ្មីៗនេះ៕

មេដឹកនាំកំពូលអ៊ីរ៉ង់ អនុម័តការលើកលែងទោសដល់អ្នកទោសជាង ២.០០០នាក់

មេដឹកនាំកំពូលអ៊ីរ៉ង់ Ayatollah Mojtaba Khamenei នៅថ្ងៃសុក្រ (ទី៥ ខែមិថុនា ឆ្នាំ២០២៦) បានអនុម័តសំណើពីប្រមុខតុលាការ ដើម្បីឲ្យលើកលែងទោស កាត់បន្ថយ ឬបន្ធូរបន្ថយទោសដល់អ្នកទោសជាង ២.០០០នាក់។ការលើកលែងទោសនេះបានកើតឡើងនៅមុនពិធីបុណ្យ Eid al-Ghadir ជាថ្ងៃឈប់សម្រាកសាសនាដ៏សំខាន់បំផុតមួយ ដែលប្រារព្ធឡើងដោយអ្នកកាន់សាសនាឥស្លាមនិកាយ Shia។ នេះបើយោងតាមសេចក្តីថ្លែងការណ៍មួយដែលបានចេញផ្សាយនៅលើគេហទំព័រផ្លូវការរបស់មេដឹកនាំកំពូល។នៅមុននេះ ប្រមុខតុលាការ លោក Gholamhossein Mohseni Ejei បានស្វែងរកការលើកលែងទោសសម្រាប់អ្នកទោសនៅក្នុងប្រទេសនេះ។គួរបញ្ជាក់ថា បើយោងតាមសារព័ត៌មានពាក់កណ្តាលផ្លូវការ ISNA បានឲ្យដឹងថា អ្នកទោសដែលត្រូវបានផ្ដន្ទាទោស ពាក់ព័ន្ធនឹងបទល្មើសទាក់ទងនឹងសន្តិសុខ ចារកម្ម សកម្មភាពប្រឆាំងនឹងសន្តិសុខផ្ទៃក្នុង ឬខាងក្រៅរបស់អ៊ីរ៉ង់ និងបទល្មើសព្រហ្មទណ្ឌដែលគំរាមកំហែងដល់សន្តិសុខសាធារណៈ មិនមានសិទ្ធិទទួលបានការលើកលែងទោសនោះទេ៕

ប្រធានសភាលីបង់គាំទ្រការដកទ័ពរបស់ហេសបូឡា ដំណាលគ្នានឹងការដកទ័ពរបស់អ៊ីស្រាអែល

ប្រធានសភាលីបង់ និងជាសម្ព័ន្ធមិត្តរបស់ក្រុមហេសបូឡា គឺលោក Nabih Berri បាននិយាយនៅថ្ងៃសុក្រ (ទី៥ ខែមិថុនា ឆ្នាំ២០២៦) នេះថា លោកនឹងយល់ព្រម ចំពោះការដកទ័ពរបស់ក្រុមដែលគាំទ្រដោយអ៊ីរ៉ង់មួយនេះ ចេញពីភាគខាងត្បូងលីបង់ ប្រសិនបើកងទ័ពអ៊ីស្រាអែលចាកចេញពីដែនដីដែលពួកគេកាន់កាប់នៅក្នុងប្រទេសនេះក្នុងពេលដំណាលគ្នាដែរ។នៅក្នុងការអត្ថាធិប្បាយជាលាយលក្ខណ៍អក្សរដែលចែកចាយដោយការិយាល័យរបស់លោក លោក Berri បានរិះគន់ក្របខ័ណ្ឌបទឈប់បាញ់ដែលសម្របសម្រួលដោយសហរដ្ឋអាមេរិក និងដែលបានប្រកាសនៅសប្តាហ៍នេះថា មិនយុត្តិធម៌ទេ ដោយបានបញ្ជាក់ថា វាគួរតែរួមបញ្ចូល «បទឈប់បាញ់ដោយគ្មានលក្ខខណ្ឌ ទាំងតាមផ្លូវគោក ទឹក និងអាកាស»។លោកបានបន្ថែមថា លោក «យល់ស្រប ចំពោះការដកទ័ពរបស់ក្រុមហេសបូឡា ចេញពីភាគខាងត្បូងនៃទន្លេ Litani ដំណាលគ្នានឹងការដកទ័ពរបស់អ៊ីស្រាអែលចេញពីតំបន់ដែលខ្លួនកាន់កាប់»។គួរបញ្ជាក់ថា សង្គ្រាម នៅប្រទេសលីបង់ ជាកន្លែងដែលកងកម្លាំងអ៊ីស្រាអែល បានដណ្តើមកាន់កាប់យ៉ាងធំនៅតំបន់ភាគខាងត្បូង ចាប់តាំងពីថ្ងៃទី២ ខែមីនា គំរាមកំហែងដល់កិច្ចប្រឹងប្រែង ដើម្បីបញ្ចប់សង្គ្រាមអ៊ីរ៉ង់ និងបើកច្រកសមុទ្រហ័រមូសឡើងវិញ។ អ៊ីរ៉ង់បានទាមទារថា បទឈប់បាញ់យូរអង្វែងណាមួយ ត្រូវតែរួមបញ្ជូលទាំងប្រទេសលីបង់។ តែនាយករដ្ឋមន្ត្រីអ៊ីស្រាអែល Benjamin Netanyahu ចង់បន្តការវាយលុករបស់អ៊ីស្រាអែល រហូតដល់ក្រុមហេសបូឡាលែងបង្កការគំរាមកំហែងទៀត៕

លោក Macron គាំទ្រការចរចាដោយផ្ទាល់រវាងអ៊ុយក្រែន និងរុស្ស៊ី ដើម្បីឈានដល់កិច្ចព្រមព្រៀងសន្តិភាព

ប្រធានាធិបតីបារាំង លោក Emmanuel Macron នៅថ្ងៃសុក្រ (ទី៥ ខែមិថុនា ឆ្នាំ២០២៦) នេះ បានសង្កត់ធ្ងន់លើតម្រូវការ ក្នុងការចាប់ផ្ដើមការសន្ទនាឡើងវិញ រវាងអ៊ុយក្រែន និងរុស្ស៊ី ដើម្បីសម្រេចបាននូវបទឈប់បាញ់ និងឈានដល់កិច្ចព្រមព្រៀងសន្តិភាព។នៅពេលធ្វើដំណើរទៅ ដើម្បីចូលរយមកិច្ចប្រជុំកំពូលតំបន់បាល់កង់ខាងលិច ក្នុងប្រទេសម៉ុងតេណេហ្គ្រោ លោក Macron បានប្រាប់អ្នកសារព័ត៌មានថា៖ «យើងតែងតែគាំទ្រការចរចាដោយផ្ទាល់ រវាងអ៊ុយក្រែន និងវិមានក្រឹមឡាំង«។ លោកបានសង្កត់ធ្ងន់ថា៖ «ខ្ញុំនឹងនិយាយត្រង់ៗជាមួយអ្នកទាំងអស់គ្នា។ ខ្ញុំជឿថា ពេលនេះ គឺអ៊ុយក្រែន និងរុស្ស៊ី ដែលអាចបង្កើតបានទាំងបទឈប់បាញ់ និងផែនការសន្តិភាព»។ដោយគូសបញ្ជាក់ថា អឺរ៉ុបគឺជាអ្នករួមចំណែកដ៏ធំបំផុតមួយ ចំពោះកិច្ចខិតខំប្រឹងប្រែងបញ្ចប់សង្គ្រាម នៅអ៊ុយក្រែន លោកបាននិយាយថា ទ្វីបនេះអាចដើរតួនាទីយ៉ាងសំខាន់ ក្នុងដំណើរការសន្តិភាព។ជាមួយគ្នានេះ អមដោយការអះអាងថា លោកនឹងជួបជាមួយប្រធានាធិបតីអ៊ុយក្រែន លោក Volodymyr Zelenskyy នៅប៉ុន្មានថ្ងៃខាងមុខ លោក Macron បានឲ្យដឹងទៀតថា អ្នករួមចំណែកទាំងអស់ ចំពោះសម្ព័ន្ធឆន្ទៈរួម ក៏ត្រូវបានអញ្ជើញទៅកាន់ទីក្រុងប៉ារីស សម្រាប់ការចរចា នៅថ្ងៃទី ១៣-១៤ ខែកក្កដាផងដែរ។គួរបញ្ជាក់ថា ការកត់សម្គាល់របស់មេដឹកនាំបារាំង បានកើតឡើង ខណៈដែលទាំងទីក្រុងគីវ និងមូស្គូបានបង្ហាញការចាប់អារម្មណ៍ការចរចាឡើងវិញ។ ក្នុងលិខិតចំហមួយដែលត្រូវបានចេញផ្សាយកាលពីថ្ងៃព្រហស្បតិ៍ លោក Zelenskyy បានអំពាវនាវឲ្យមានកិច្ចចរចាដោយផ្ទាល់ជាមួយប្រធានាធិបតីរុស្ស៊ី លោក Vladimir Putin ហើយបាននិយាយថា អ៊ុយក្រែនបានត្រៀមខ្លួនរួចជាស្រេច ដើម្បីគោរពតាមបទឈប់បាញ់ ក្នុងអំឡុងរយៈពេលនៃការចរចា៕

UN អំពាវនាវរកជំនួយទ្វេដងដល់ជិត ៦៤០លានដុល្លារ សម្រាប់លីបង់ អំឡុងសង្គ្រាមអ៊ីស្រាអែល

អង្គការសហប្រជាជាតិ (UN) នៅថ្ងៃសុក្រ (ទី៥ ខែមិថុនា ឆ្នាំ២០២៦) នេះ បានអំពាវនាវរកជំនួយទ្វេដង សម្រាប់លីបង់ ខណៈដែលប្រទេសនេះកំពុងរងផលប៉ះពាល់ពីសង្គ្រាមរបស់អ៊ីស្រាអែល ប្រឆាំងនឹងក្រុមហេសបូឡាដែលគាំទ្រដោយអ៊ីរ៉ង់ ដោយបញ្ជាក់ថា ត្រូវការជិត ៦៤០លានដុល្លារអាមេរិក ក្នុងរយៈពេល ៦ខែ។នៅក្នុងការអំពាវនាវដែលត្រូវបានកែសម្រួល សម្រាប់ប្រទេសនេះ ការិយាល័យសម្របសម្រួលកិច្ចការមនុស្សធម៌ (OCHA) របស់ទីភ្នាក់ងារមនុស្សធម៌ UN បានឲ្យដឹងថា៖ «វិបត្តិមនុស្សធម៌ នៅក្នុងប្រទេសលីបង់ គឺធ្ងន់ធ្ងរ និងកាន់តែអាក្រក់ទៅៗ»។ទីភ្នាក់ងារនេះ បានឲ្យដឹងថា «ការបង្ខំផ្លាស់ទីលំនៅម្តងហើយម្តងទៀត ចំនួនទីជម្រកបណ្ដោះអាសន្នមិនគ្រប់គ្រាន់ និងលទ្ធភាពមានកម្រិត ក្នុងការវិលត្រឡប់ទៅវិញដោយសុវត្ថិភាព កំពុងធ្វើឲ្យមានភាពងាយរងគ្រោះកាន់តែធ្ងន់ធ្ងរឡើងៗ» ដោយព្រមានថា «ប្រជាជនដែលរងផលប៉ះពាល់ កំពុងអស់យ៉ាងឆាប់រហ័សនូវធនធាន ហើយសេវាកម្មសំខាន់ៗកំពុងស្ថិតនៅក្រោមការលំបាកកាន់តែខ្លាំងឡើងៗ»។ UN បានអំពាវនាវរកជំនួយចំនួន ៣០៨លានដុល្លារអាមេរិក ក្នុងខែមីនា ដើម្បីគាំទ្រដល់ការឆ្លើយតបបន្ទាន់ដ៏ធំមួយដែលដឹកនាំដោយរដ្ឋាភិបាលលីបង់ រហូតដល់ចុងខែឧសភា។ នៅថ្ងៃទី៥ ខែមិថុនា សា្ថប័ននេះបានបញ្ជាកើថា ត្រូវការជំនួយ ៣៣១លានដុល្លារអាមេរិកបន្ថែមទៀត រហូតដល់ចុងខែសីហា។OCHA បានឲ្យដឹងទៀតថា រហូតមកដល់ពេលនេះ មានតែ ១៨៥លានដុល្លារអាមេរិកប៉ុណ្ណោះដែលទទួលបានពីការអំពាវនាវដំបូង ដោយបន្ថែមថា ចំនួនទឹកប្រាក់នោះបានជួយផ្តល់ជំនួយដល់មនុស្សប្រហែល ៦៨០.០០០នាក់ ចន្លោះពីថ្ងៃទី២ ខែមីនា ដល់ថ្ងៃទី៣១ ខែឧសភា។អង្គការនេះបានសង្កត់ធ្ងន់ថា គោលបំណងឥឡូវនេះ គឺបង្កើនចំនួននោះទ្វេដង ដើម្បីបានជួយដល់ប្រជាជនទាំងអស់ ១,៤លាននាក់ នៅលីបង់ ពោលគឺប្រហែល ១ភាគ៤ នៃចំនួនប្រជាជន ដែលត្រូវបានប៉ាន់ប្រមាណថា ត្រូវការជំនួយមនុស្សធម៌នៅក្នុងប្រទេសនេះ៕

កងទ័ពអ៊ីស្រាអែលព្រមានពីការវាយប្រហារជិតកើតមាន លើក្រុមហេសបូឡា នៅទីក្រុង Sarafand របស់លីបង់

យោធាអ៊ីស្រាអែលបានព្រមានអ្នកស្រុកនៅទីក្រុង Sarafand នៅភាគខាងត្បូងនៃប្រទេសលីបង់ ដែលជាទីក្រុងមួយនៅលើផ្លូវឆ្នេរសមុទ្រ រវាងទីក្រុងតំបន់ Tyre និង Sidon ឲ្យជម្លៀសចេញជាបន្ទាន់ នៅថ្ងៃសុក្រ (ទី៥ ខែមិថុនា ឆ្នាំ២០២៦) មុនការវាយប្រហារដែលអាចកើតមាន ប្រឆាំងនឹងក្រុមហេសបូឡាដែលគាំទ្រដោយអ៊ីរ៉ង់។តាមរយៈការបង្ហោះនៅលើបណ្ដាញសង្គម X ដោយរាយបញ្ជីឈ្មោះទីក្រុង និងភូមិចំនួន ៦ ក្នុងនោះរួមមានទាំង Sarafand និង Saksakiyeh ដែលក៏ស្ថិតនៅលើផ្លូវឆ្នេរសមុទ្រផងដែរ អ្នកនាំពាក្យយោធាជាភាសាអារ៉ាប់ លោក Avichay Adraee បានបញ្ជាក់ពីការឲ្យជម្លៀសចេញនេះ។លោក Adraee បានសរសេរថា៖ «ដោយសារតែក្រុមភេរវករហេសបូឡា បានរំលោភលើកិច្ចព្រមព្រៀងបទឈប់បាញ់ និងការកំណត់គោលដៅរបស់ក្រុមនេះទៅលើតំបន់ជនស៊ីវិលរបស់ប្រទេសអ៊ីស្រាអែល កងកម្លាំងការពារជាតិអ៊ីស្រាអែល (IDF) ត្រូវបានបង្ខំចាត់វិធានការយ៉ាងខ្លាំងក្លា ប្រឆាំងនឹងក្រុមនេះ ជាពិសេសនៅក្នុងតំបន់របស់អ្នក»។លោកបានបន្ថែមថា៖ «ដោយសារការព្រួយបារម្ភ អំពីសុវត្ថិភាពរបស់អ្នក អ្នកត្រូវតែជម្លៀសចេញពីផ្ទះសម្បែងរបស់អ្នកជាបន្ទាន់ ហើយផ្លាស់ទៅភាគខាងជើងនៃទន្លេ Zahrani ដែលលាតសន្ធឹងប្រហែល ៤០គីឡូម៉ែត្រ នៅភាគខាងជើងព្រំដែន៕

លោក Rubio បញ្ជាក់ជាថ្មី អំពីការគាំទ្ររបស់អាមេរិក ចំពោះរដ្ឋាភិបាលរបស់ប្រទេសបូលីវី

យោងតាមក្រសួងការបរទេស បានឲ្យដឹងថា រដ្ឋមន្ត្រីការបរទេសអាមេរិក លោក Marco Rubio កាលពីថ្ងៃព្រហស្បតិ៍ (ទី៤ ខែមិថុនា ឆ្នាំ២០២៦) បានជជែកជាមួយប្រធានាធិបតីបូលីវី លោក Rodrigo Paz ដោយបញ្ជាក់ជាថ្មីអំពីការគាំទ្ររបស់ទីក្រុងវ៉ាស៊ីនតោន ចំពោះរដ្ឋាភិបាលថ្មីរបស់ប្រទេសបូលីវី។ក្នុងអំឡុងពេលនៃការសន្ទនាតាមទូរស័ព្ទ លោក Rubio បានបញ្ជាក់ជាថ្មី អំពី «ការប្តេជ្ញាចិត្តឥតងាករេរបស់សហរដ្ឋអាមេរិក ក្នុងការគាំទ្រលទ្ធិប្រជាធិបតេយ្យរបស់បូលីវី និងរដ្ឋបាលរបស់លោក Paz ខណៈដែលខ្លួនកំពុងកសាងប្រទេសឡើងវិញ ក្រោយរយៈពេល ២០ឆ្នាំនៃការបរាជ័យគោលនយោបាយសង្គមនិយម។ នេះបើយោងតាមសេចក្ដីប្រកាសព័ត៌មានរបស់ក្រសួងការបរទេស។សេចក្តីថ្លែងការណ៍នេះបានឲ្យដឹងថា៖ «មេដឹកនាំទាំង២ បានពិភាក្សាអំពីស្ថានភាពបច្ចុប្បន្ន នៅក្នុងប្រទេសបូលីវី និងចែករំលែកអាទិភាព សម្រាប់ការជំរុញសន្តិសុខ និងស្ថិរភាពនៅទូទាំងតំបន់របស់យើង»។ក្រសួងបានឲ្យដឹងទៀតថា ជាមួយគ្នានេះ លោក Rubio ក៏បានកត់សម្គាល់ផងដែរថា សហរដ្ឋអាមេរិកកំពុងបង្កើនជំនួយសង្គ្រោះបន្ទាន់ និងការគាំទ្រផ្នែកភស្តុភារ ដើម្បីជួយដោះស្រាយកង្វះខាតស្បៀងអាហារ និងឱសថស្រួចស្រាវ ដែលទីក្រុងវ៉ាស៊ីនតោន បានសន្មតថា ជា «ការបិទផ្លូវដោយខុសច្បាប់» ដែលមានគោលបំណងធ្វើឲ្យប្រទេសមានអស្ថិរភាព។តាមរយៈសេចក្ដីថ្លែងការណ៍នោះ ក្រសួងបានបន្ថែមថា៖ «លោករដ្ឋមន្ត្រី Rubio បានបញ្ជាក់ជាថ្មីថា រដ្ឋបាលរបស់លោកប្រធានាធិបតី Donald Trump នឹងបន្តឈរជាមួយប្រទេសបូលីវី ខណៈពេលដែលប្រទេសនេះធ្វើការឆ្ពោះទៅរកការមានស្ថិរភាព សន្តិសុខ និងអនាគតកាន់តែប្រសើរ សម្រាប់ប្រជាជនបូលីវីទាំងអស់»។គួរបញ្ជាក់ថា មានការតវ៉ាប្រឆាំងរដ្ឋាភិបាលអស់រយៈពេលជាច្រើនសប្តាហ៍ ដោយអំពាវនាវឲ្យលោក Paz លាលែងពីតំណែង។ កម្មករ កសិករ អ្នករុករករ៉ែ ប្រតិបត្តិករដឹកជញ្ជូន និងគ្រូបង្រៀន កំពុងអំពាវនាវឲ្យមានវិធានការបន្ទាន់ ដើម្បីដោះស្រាយវិបត្តិសេដ្ឋកិច្ចធ្ងន់ធ្ងរបំផុតជាលើកដំបូងរបស់ប្រទេស ក្នុងរយៈពេល ៤០ឆ្នាំ៕

អាស៊ែរបៃហ្សង់និយាយថាពលរដ្ឋរបស់ខ្លួនចំនួន ៥នាក់ ត្រូវបានសម្លាប់ នៅក្នុងការវាយប្រហារលើនាវានៅក្នុងសមុទ្រ Azov

ក្រសួងការបរទេសអាស៊ែរបៃហ្សង់ បាននិយាយនៅថ្ងៃសុក្រនេះថា ពលរដ្ឋអាស៊ែរបៃហ្សង់ចំនួន ៥នាក់ ត្រូវបានសម្លាប់ និងបីនាក់ផ្សេងទៀត រងរបួស នៅក្នុងការវាយប្រហារលើនាវាដឹកទំនិញពីរគ្រឿង នៅក្នុងសមុទ្រ Azov។ ដោយឆ្លើយតបទៅនឹងសំណួរអំពីនាវាដែលត្រូវបានវាយប្រហារនៅឈូងសមុទ្រ Taganrog ក្រសួងបាននិយាយថា ក្រុមនាវិករួមមានពលរដ្ឋអាស៊ែរបៃហ្សង់សរុបចំនួន ២៥នាក់ ប៉ុន្តែនាវាទាំងនោះ មិនមែនជារបស់អាស៊ែបៃហ្សង់ទេ។នាព្រឹកថ្ងៃសុក្រនេះ អ៊ុយក្រែនបាននិយាយថា យានដ្រូនរបស់ខ្លួន បានវាយប្រហារនាវាចំនួន ៥គ្រឿងនៅក្នុងកំពង់ផែ Mariupol និង Berdyansk ក៏ដូចជានៅក្នុងដែនទឹកឆ្នេរសមុទ្រនៃទឹកដីដែលគ្រប់គ្រងដោយរុស្ស៊ី។លោក Robert Brovdi មេបញ្ជាការកងកម្លាំងយានដ្រូនអ៊ុយក្រែន បាននិយាយនៅក្នុងសេចក្តីថ្លែងការណ៍មួយថា យានដ្រូនរបស់ខ្លួន បានវាយប្រហារនាវាដឹកទំនិញស្ងួត និងនាវាដឹកប្រេងមួយគ្រឿង ដែលពាក់ព័ន្ធនឹងការលួចគ្រាប់ធញ្ញជាតិអ៊ុយក្រែន និងដឹកទំនិញយោធា និងប្រេងឥន្ធនៈ ដោយឈ្មោះនាវា ត្រូវបានលាបពណ៌ពីលើ និងរ៉ាដារបស់ពួកគេ ត្រូវបានបិទ៕

នគរបាលបង្ក្រាបកុបកម្ម បង្ខំឲ្យបាតុករចាកចេញ ក្រោយតវ៉ាបញ្ហាកង្វះសន្លឺកឆ្នោត

នគរបាលប្រឆាំងកុបកម្មរបស់ប្រទេសកូរ៉េខាងត្បូង បានបង្ខំឲ្យក្រុមបាតុករចេញពីបរិវេណខាងក្រៅមណ្ឌលបោះឆ្នោតមួយ ក្នុងទីក្រុងសេអ៊ូល បន្ទាប់ពីបានតវ៉ាដោយការបិទទីនោះរយៈពេល ៣៥ម៉ោង ជាអ្វីដែលបង្កឡើងដោយការខ្វះខាតសន្លឹកឆ្នោត។យោងតាមសារព័ត៌មាន Yonhap បានឲ្យដឹងថា បាតុករជាង ១.០០០នាក់ បានប្រមូលផ្តុំគ្នានៅខាងក្រៅមណ្ឌលបោះឆ្នោតមួយកន្លែង ក្នុងសង្កាត់ Jamsil 7-dong នៅទីក្រុងសេអ៊ូល កាលពីថ្ងៃព្រហស្បតិ៍ (ទី៤ ខែមិថុនា ឆ្នាំ២០២៦) ដោយអ្នកខ្លះកាន់បដាដែលសរសេរថា «បញ្ឈប់ការរាប់សន្លឹកឆ្នោត!» និង «ប្រកាសលទ្ធផលនៃការបោះឆ្នោតជាមោឃភាព!» ខណៈពេលដែលពួកគេបានព្យាយាមរារាំងមិនឲ្យយកធុងសន្លឹកឆ្នោតយ៉ាងហោចណាស់ចំនួន ២ ចេញពីទីនោះ។ យោងតាមទូរទស្សន៍រដ្ឋ KBS បានឲ្យដឹងថា បុគ្គលិកបោះឆ្នោត ក៏ត្រូវបានបង្ខំឲ្យស្នាក់នៅក្នុងមណ្ឌលបោះឆ្នោត រហូតដល់ព្រឹកថ្ងៃទី៥ ខែមិថុនានេះផងដែរ។ ក្នុងវីដេអូផ្សាយផ្ទាល់នៅថ្ងៃទី៥ ខែមិថុនានេះ ដោយប្រព័ន្ធផ្សព្វផ្សាយក្នុងស្រុក នគរបាលអាចត្រូវបានគេមើលឃើញបង្ខំឲ្យអ្នកតវ៉ាចេញពីទីនោះ ខណៈដែលពួកគេកំពុងបិទច្រកចូលទៅកាន់មណ្ឌលបោះឆ្នោតនោះ ហើយស្រែក និងព្យាយាមទប់ទល់នឹងការចាប់ខ្លួន។បុរសម្នាក់អាចត្រូវបានគេឮសំឡេង ដែលនិយាយថា៖ «តើនេះពិតជាប្រទេសគ្រប់គ្រងដោយនីតិរដ្ឋមែនទេ?» ខណៈដែលមន្ត្រីបានបញ្ជាឲ្យបាតុករបើកផ្លូវ។ អាជ្ញាធរបានប្រាប់សារព័ត៌មាន AFP ថា ប្រអប់ទាំងនោះ ដែលមានសន្លឹកឆ្នោតប្រហែល ២.០០០សន្លឹក ឥឡូវនេះត្រូវបានធានាសុវត្ថិភាព និងដឹកជញ្ជូនទៅកាន់មណ្ឌលរាប់សន្លឹកឆ្នោត។គណៈកម្មការជាតិរៀបចំការបោះឆ្នោត (NEC) ត្រូវបានជំរុញឲ្យចេញការសូមអភ័យទោស បន្ទាប់ពីការិយាល័យបោះឆ្នោតចំនួន ១៤ នៅទីក្រុងសេអ៊ូល បានអស់សន្លឹកឆ្នោតនៅថ្ងៃទី៣ ខែមិថុនា ជាកំហុសឆ្គងមិនធ្លាប់មានពីមុន ដែលត្រូវបានស្តីបន្ទោសថា ជាការធ្វេសប្រហែសរបស់ស្ថាប័ន ក្នុងការព្យាករចំនួនអ្នកបោះឆ្នោត។ ការិយាល័យមួយចំនួន នៅតែបើករហូតដល់ម៉ោង ១០យប់ ដើម្បីអនុញ្ញាតឲ្យអ្នកបោះឆ្នោត អំឡុងការបោះឆ្នោតមូលដ្ឋានដែលគណបក្សកំពុងកាន់អំណាចរបស់លោក Lee Jae Myung បានឈ្នះក្នុងសំឡេងដ៏លើសលប់ តែបរាជ័យក្នុងតំណែងអភិបាលក្រុងសេអ៊ូល៕

រដ្ឋមន្ត្រីការបរទេសរុស្ស៊ី៖ អេមីរ៉ាតអារ៉ាប់រួម និងអ៊ីរ៉ង់ ត្រូវតែវិលត្រឡប់ទៅរកការសន្ទនាវិញជាមិនខាន

រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ ( Sergey Lavrov) បាននិយាយនៅក្នុងបទសម្ភាសន៍ជាមួយសារព័ត៌មាន RT Arabic ថា អ៊ីរ៉ង់ និងអេមីរ៉ាតអារ៉ាប់រួមនឹងត្រូវវិលត្រឡប់ទៅរកការសន្ទនាវិញនៅចំណុចណាមួយ ខណៈដែលប្រទេសអារ៉ាប់ផ្សេងទៀត បានបង្ហាញរួចហើយថា ពួកគេត្រៀមខ្លួនរួចជាស្រេចសម្រាប់ការចរចាជាមួយទីក្រុងតេអេរ៉ង់។ លោកបានរំលឹកថា នៅក្នុងកិច្ចប្រជុំរដ្ឋមន្ត្រីការបរទេស BRICS កាលពីពាក់កណ្តាលខែឧសភា មាន «ជម្លោះដ៏ធ្ងន់ធ្ងរមួយ» រវាងអ៊ីរ៉ង់ និងអេមីរ៉ាតអារ៉ាប់រួម ប៉ុន្តែទោះបីជាយ៉ាងនេះក្តី ទាំងប្រទេសជាប្រធាន ឥណ្ឌា និងប្រទេស BRICS ផ្សេងទៀតដែលចូលរួមក្នុងកិច្ចប្រជុំ បានព្យាយាមស្វែងរកមធ្យោបាយ ដើម្បីចាប់ផ្តើមការសន្ទនារវាងអេមីរ៉ាតអារ៉ាប់រួម និងអ៊ីរ៉ង់។ប្រមុខការទូតរុស្ស៊ីរូបនេះ បានកត់សម្គាល់ថា៖«ការសន្ទនាត្រូវតែកើតឡើង នៅពេលណាមួយ»។ «យើងឃើញការត្រៀមខ្លួនសម្រាប់ការសន្ទនាបែបនេះពីប្រទេសអារ៉ាប់មួយចំនួនទៀត រួមទាំងអារ៉ាប៊ីសាអ៊ូឌីតផងដែរ ហើយជាការពិតណាស់ អ្នកដែលបានបង្កើតភាពចម្រោងចម្រាសនេះ ដែលបានចាប់ផ្តើមគំនិតផ្តួចផ្តើម ពួកគេពិតជាមិនចង់ឲ្យមានការផ្សះផ្សាគ្នារវាងអារ៉ាប់ជាមួយអ៊ីរ៉ង់ទេ សូម្បីតែការផ្សះផ្សាគ្នាក៏ដោយ ពោលគឺពួកគេមិនចង់ឲ្យមានប្រក្រតីភាពទំនាក់ទំនងឡើងវិញទេ»៕

បណ្ដាញសង្គម

ព័ត៌មានថ្មីៗ

រុស្ស៊ី បញ្ជាក់ថា ត្រៀមខ្លួនរួចជាស្រេច ដើម្បីចាត់គ្រប់វិធានការការពារប្រទេសបេឡារុស

ប៉ាគីស្ថាន៖ អាមេរិក និងអ៊ីរ៉ង់នឹងពិភាក្សាកម្មវិធីមីស៊ីលបាលីស្ទិក និងបញ្ហានុយក្លេអ៊ែរ រយៈពេល ៦០ថ្ងៃខាងមុខ

កម្ពុជា-អ៊ីស្រាអែល ឯកភាពបន្តជំរុញទំនាក់ទំនង និងកិច្ចសហប្រតិបត្តិការទ្វេភាគីឱ្យកាន់តែរីកចម្រើន

គណៈកម្មការទី៣ នៃរដ្ឋសភា ចុះសិក្សាឈ្វេងយល់អំពីវឌ្ឍនភាពការងារ និងបញ្ហាប្រឈមនៅខេត្តតាកែវ

តំណាង BNK Financial Group នៃសាធារណរដ្ឋកូរ៉េ ប្តេជ្ញាចិត្តខ្ពស់វិនិយោគវិស័យហិរញ្ញវត្ថុរយៈពេលវែងនៅកម្ពុជា

រុស្ស៊ីស្វាគមន៍បទឈប់បាញ់អាមេរិក-អ៊ីរ៉ង់ ប៉ុន្តែបញ្ជាក់ថា សន្តិភាពយូរអង្វែងនឹងត្រូវការពេលវេលា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានអន្តរជាតិ

រុស្ស៊ីប្រកាសពីការដោះដូរអ្នកទោសសង្គ្រាមជាមួយអ៊ុយក្រែន ដោយភាគីម្ខាងៗចំនួន ១៨៥នាក់

មេដឹកនាំកំពូលអ៊ីរ៉ង់ អនុម័តការលើកលែងទោសដល់អ្នកទោសជាង ២.០០០នាក់

ប្រធានសភាលីបង់គាំទ្រការដកទ័ពរបស់ហេសបូឡា ដំណាលគ្នានឹងការដកទ័ពរបស់អ៊ីស្រាអែល

លោក Macron គាំទ្រការចរចាដោយផ្ទាល់រវាងអ៊ុយក្រែន និងរុស្ស៊ី ដើម្បីឈានដល់កិច្ចព្រមព្រៀងសន្តិភាព

UN អំពាវនាវរកជំនួយទ្វេដងដល់ជិត ៦៤០លានដុល្លារ សម្រាប់លីបង់ អំឡុងសង្គ្រាមអ៊ីស្រាអែល

កងទ័ពអ៊ីស្រាអែលព្រមានពីការវាយប្រហារជិតកើតមាន លើក្រុមហេសបូឡា នៅទីក្រុង Sarafand របស់លីបង់

លោក Rubio បញ្ជាក់ជាថ្មី អំពីការគាំទ្ររបស់អាមេរិក ចំពោះរដ្ឋាភិបាលរបស់ប្រទេសបូលីវី

នគរបាលបង្ក្រាបកុបកម្ម បង្ខំឲ្យបាតុករចាកចេញ ក្រោយតវ៉ាបញ្ហាកង្វះសន្លឺកឆ្នោត

រដ្ឋមន្ត្រីការបរទេសរុស្ស៊ី៖ អេមីរ៉ាតអារ៉ាប់រួម និងអ៊ីរ៉ង់ ត្រូវតែវិលត្រឡប់ទៅរកការសន្ទនាវិញជាមិនខាន

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានអន្តរជាតិ

រុស្ស៊ីប្រកាសពីការដោះដូរអ្នកទោសសង្គ្រាមជាមួយអ៊ុយក្រែន ដោយភាគីម្ខាងៗចំនួន​ ១៨៥នាក់

មេដឹកនាំកំពូលអ៊ីរ៉ង់ អនុម័តការលើកលែងទោសដល់អ្នកទោសជាង ២.០០០នាក់

ប្រធានសភាលីបង់គាំទ្រការដកទ័ពរបស់ហេសបូឡា ដំណាល​គ្នានឹងការដកទ័ពរបស់អ៊ីស្រាអែល

លោក Macron គាំទ្រការចរចាដោយផ្ទាល់រវាងអ៊ុយក្រែន និងរុស្ស៊ី ដើម្បីឈានដល់កិច្ចព្រមព្រៀងសន្តិភាព

UN អំពាវនាវរកជំនួយទ្វេដងដល់ជិត ៦៤០លានដុល្លារ សម្រាប់​លីបង់ អំឡុងសង្គ្រាមអ៊ីស្រាអែល

កងទ័ពអ៊ីស្រាអែលព្រមានពីការវាយប្រហារជិតកើត​មាន​ លើ​ក្រុមហេសបូឡា នៅទីក្រុង​ Sarafand របស់​លីបង់

លោក Rubio បញ្ជាក់ជាថ្មី អំពីការគាំទ្ររបស់អាមេរិក ចំពោះរដ្ឋាភិបាលរបស់ប្រទេសបូលីវី

នគរបាល​បង្ក្រាប​កុប​កម្ម​ បង្ខំ​ឲ្យ​​បាតុករ​ចាក​ចេញ​ ក្រោយតវ៉ាបញ្ហា​កង្វះ​សន្លឺក​ឆ្នោត​​

រដ្ឋមន្ត្រីការបរទេសរុស្ស៊ី៖ អេមីរ៉ាតអារ៉ាប់រួម និងអ៊ីរ៉ង់ ត្រូវតែវិលត្រឡប់ទៅរកការសន្ទនាវិញជាមិនខាន

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

រុស្ស៊ីប្រកាសពីការដោះដូរអ្នកទោសសង្គ្រាមជាមួយអ៊ុយក្រែន ដោយភាគីម្ខាងៗចំនួន ១៨៥នាក់

ប្រធានសភាលីបង់គាំទ្រការដកទ័ពរបស់ហេសបូឡា ដំណាលគ្នានឹងការដកទ័ពរបស់អ៊ីស្រាអែល

UN អំពាវនាវរកជំនួយទ្វេដងដល់ជិត ៦៤០លានដុល្លារ សម្រាប់លីបង់ អំឡុងសង្គ្រាមអ៊ីស្រាអែល

កងទ័ពអ៊ីស្រាអែលព្រមានពីការវាយប្រហារជិតកើតមាន លើក្រុមហេសបូឡា នៅទីក្រុង Sarafand របស់លីបង់

នគរបាលបង្ក្រាបកុបកម្ម បង្ខំឲ្យបាតុករចាកចេញ ក្រោយតវ៉ាបញ្ហាកង្វះសន្លឺកឆ្នោត