BTV NEWS

បារាំងប្រកាសគាំទ្រការអំពាវនាវរបស់នាយករដ្ឋមន្ត្រី អាន់វ៉ា អ៊ីប្រាហ៊ីម ក្នុងការបង្កើតឱ្យកម្ពុជា-ថៃ មានបទឈប់បាញ់ភ្លាមៗហើយជំរុញភាគីទាំងពីរឱ្យបញ្ឈប់ការប្រយុទ្ធភ្លាមៗ និងត្រឡប់ទៅរកការសន្ទនាវិញ

TOP STORY | សម្ដេចតេជោ៖ ការផ្អាកការធ្វើដំណើរចេញចូលកម្ពុជា-ថៃ គឺគួរធ្វើតែតាមផ្លូវគោកប៉ុណ្ណោះ ផ្លូវអាកាសអាចធ្វើដំណើរបានធម្មតា

កងទ័ពនារីនៃកងពលតូចដឹកជញ្ជូនលេខ៩៩ បន្តនាំយកគ្រឿងឧបភោគបរិភោគ និងថវិកាឧបត្ថម្ភជូនដល់វីរកងទ័ព

មកទល់រសៀលនេះ យោធាថៃបន្តការបាញ់ប្រហារមកលើដែនអធិបតេយ្យភាពកម្ពុជាក្នុងភូមិសាស្រ្ដយោធភូមិទី៤ និងទី៥

ព័ត៌មានជាតិ

ពលរដ្ឋខ្មែរ៩នាក់បានស្លាប់ក្នុងនោះមានទារកម្នាក់ និងរងរបួសជាង៤០នាក់ដោយសារការបាញ់ប្រហាររបស់ទាហានឈ្លានពានថៃ

អ្នកនាំពាក្យក្រសួងការពារជាតិកម្ពុជា លោកជំទាវម៉ាលី សុជាតា បានឲ្យដឹងថា រហូតដល់រសៀលថ្ងៃទី១០ ខែធ្នូ ឆ្នាំ២០២៥នេះមានពលរដ្ឋខ្មែរស្លូតត្រង់ចំនួន៩នាក់ហើយបានស្លាប់ ដោយក្នុងនោះមានទារកម្នាក់ផង ខណៈរងរបួសចំនួនជាង៤០នាក់ ដោយសារតែទាហានឈ្លានពានថៃបានបើកការបាញ់ប្រហារយ៉ាងឃោឃៅ និងអមនុស្សធម៌បំផុតនោះ។ នៅក្នុងសន្និសីទសារព័ត៌មាននេះដែរ លោកជំទាវម៉ាលី សុជាតា ក៏បានឲ្យដឹងផងដែរថា រហូតដល់រសៀលថ្ងៃទី១០ ខែធ្នូ ឆ្នាំ២០២៥នេះបានថ្លែងថា ទាហានឈ្លានពានថៃ បានប្រើប្រាស់អាវុធធុនធ្ងន់ ជាច្រើនប្រភេទ និងយន្តហោះF-16 បាញ់មកលើជនស៊ីវិលកម្ពុជាយ៉ាងព្រៃផ្សៃ និងអមនុស្សធម៌ ដោយ បណ្តាលឲ្យជនស៊ីវិលស្លូតត្រង់កម្ពុជា៩នាក់ស្លាប់ ៤៦នាក់រងរបួសធ្ងន់ស្រាល និងរាប់សែននាក់បានកំពុង រត់ភៀសសឹកគួរឲ្យអាណិតអាសូរនោះ។ជាមួយគ្នានោះដែរ លោកជំទាវម៉ាលី សុជាតា បានលើកឡើងផងដែរថា ទង្វើបាញ់ប្រហាររបស់ទាហានឈ្លានពានថៃ មកលើកម្ពុជាទាំងកម្រោលនេះ មិនត្រឹមតែរំលោភនូវកិច្ចព្រមព្រៀងទាំងឡាយរវាងកម្ពុជា និងថៃប៉ុណ្ណោះទេថែមទាំងរំលោភលើធម្មនុញ្ញអង្គការសហប្រជាជាតិ និងធម្មនុញ្ញអាស៊ានផងដែរ។ មួយវិញទៀតអ្នកនាំពាក្យក្រសួងការពារជាតិកម្ពុជារូបនេះ ក៏បានលើកឡើងផងដែរថា ទង្វើដោយគ្មានទទួលខុសត្រូវរបស់ទាហានឈ្លានពានថៃដាក់មកលើកម្ពុជាប៉ុន្មានថ្ងៃមកនេះ គឺមានគ្រោះថ្នាក់យ៉ាងធ្ងន់ធ្ងរបំផុតមិនត្រឹមតែសម្រាប់សន្តិភាព និងស្ថិរភាពក្នុងតំបន់ប៉ុណ្ណោះទេ ប៉ុន្តែថែមទាំងប៉ះពាល់ដល់មូលដ្ឋានគ្រឹះនៃ សណ្តាប់ធ្នាប់អន្តរជាតិផងដែរ។ក្នុងសន្និសីទសារព័ត៌មាននារសៀលថ្ងៃនេះដែរ លោកជំទាវម៉ាលី សុជាតា បានបញ្ជាក់ឲ្យដឹងផងដែរថា ភាគីថៃបានបន្តរំលោភបំពានដោយធ្វើការបាញ់ប្រហារមកលើកម្ពុជាយ៉ាងព្រៃផ្សៃតាំងពីព្រឹកម៉ោង៥នៅតំបន់មួយចំនួននៃខេត្តឧត្តរមានជ័យ, ខេត្តព្រះវិហារ, ខេត្តបន្ទាយមានជ័យ និងខេត្តបាត់ដំបង ខណៈមកដល់ពេលរសៀលនេះ ទាហានឈ្លានពានថៃនៅតែបន្តបើកការបាញ់ប្រហារនៅឡើយដោយប្រើប្រាស់អាវុធធុនធ្ងន់ យន្តហោះចម្បាំង គ្រាប់បែកផ្សែងជាដើម។ យ៉ាងណាក៏ដោយលោកជំទាវម៉ាលី សុជាតា បានអះអាងថា វីរៈកងទ័ពកម្ពុជា បានបន្តឈរជើងយ៉ាងរឹងមាំរបស់ខ្លួន ដើម្បីការពារនូវបូរណភាពទឹកដីរបស់កម្ពុជា យ៉ាងអង់អាចបំផុត ហើយមួយវិញទៀតការបាញ់ឆ្លើយតបតចំពោះយោធាកម្ពុជា គឺបាញ់ទៅលើតែមូលដ្ឋានកងទ័ពឈ្លានពានថៃប៉ុណ្ណោះ មិនបាញ់សំដៅប្រហារលើជនស៊ីវិល ដូចភាគីថៃនោះឡើយ៕អត្ថបទ បាន ចក់

កម្ពុជាអំពាវនាវឱ្យសហគមន៍អន្តរជាតិថ្កោលទោសថៃចំពោះ ការរំលោភបំពានកិច្ចព្រមព្រៀងសន្តិភាព និងសកម្មភាពឧក្រិដ្ឋកម្មសង្គ្រាមខុសច្បាប់ម្តងហើយម្តងទៀត

ភ្នំពេញ៖ ក្រសួងការពារជាតិកម្ពុជា នៅល្ងាចថ្ងៃទី១០ ខែធ្នូ ឆ្នាំ ២០២៥នេះបានអំពាវនាវឱ្យសហគមន៍អន្តរជាតិថ្កោលទោសយ៉ាងម៉ឺងម៉ាត់ ចំពោះការរំលោភបំពានសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ និងសកម្មភាពឧក្រិដ្ឋកម្មសង្គ្រាមខុសច្បាប់របស់ថៃម្តងហើយម្តងទៀត បាញ់ប្រហារសម្លាប់ជនស៊ីវិល កុមារកម្ពុជា និងប្រើប្រាស់អាវុធគ្រប់ប្រភេទរំលោភលើដែនអធិបតេយ្យភាពកម្ពុជា។ ក្រសួងការពារជាតិម្ពុជាបញ្ជាក់ថា សកម្មភាពឈ្លានពានដោយប្រដាប់អាវុធរបស់ថៃបានបង្កឱ្យមានការខូចខាតយ៉ាងធ្ងន់ធ្ងរ ដោយគិតត្រឹមថ្ងៃទី១០ ខែធ្នូ ឆ្នាំ២០២៥នេះ ជនស៊ីវិលបានបាត់បង់ជីវិតកើនឡើងរហូតដល់ចំនួន ៩នាក់ (ទារក ១នាក់) និងរងរបួសជនស្លូតត្រង់ចំនួន ៤៦ នាក់។ក្នុងន័យនេះ កម្ពុជាអំពាវនាវឱ្យសហគមន៍អន្តរជាតិថ្កោលទោសយ៉ាងម៉ឺងម៉ាត់ ចំពោះការរំលោភបំពានសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ និងសកម្មភាពឧក្រិដ្ឋកម្មសង្គ្រាមខុសច្បាប់របស់ថៃម្តងហើយម្តងទៀតនេះ ដោយទាមទារឱ្យថៃទទួលខុសត្រូវទាំងស្រុងចំពោះការរំលោភបំពានដ៏កំរោលនេះ។ នេះបើតាមការបញ្ជាក់ក្នុងសេចក្ដីប្រកាសព័ត៌មានរបស់ក្រសួងការពារជាតិកម្ពុជា។តាមរយៈសេចក្ដីប្រកាសព័ត៌មាន កម្ពុជាអំពាវនាវឱ្យថៃបញ្ឈប់រាល់អរិភាពជាបន្ទាន់ ដោយដកកម្លាំងចេញពីដែនអធិបតេយ្យរបស់កម្ពុជា និងចៀសវាងសកម្មភាពឈ្លានពានដែលគំរាមកំហែងដល់សន្តិភាព និងស្ថិរភាពនៅក្នុងតំបន់។ ទន្ទឹមនឹងនេះ កម្ពុជាអំពាវនាវឱ្យភាគីថៃ ងាកមកគោរពកិច្ចព្រមព្រៀមបទឈប់បាញ់ សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាព និងកាតព្វកិច្ចទាំងឡាយនៅក្រោមច្បាប់អន្តរជាតិឱ្យបានម៉ឺងម៉ាត់ ស្មោះត្រង់ និងដោយសុច្ឆន្ទៈពិតប្រាកដ៕

ប្រទេសចិន សន្យាបន្តជួយកម្ពុជាលើវិស័យសកម្មភាពមីនមនុស្សធម៌ រហូតដល់កម្ពុជាអាចសម្រេចបាននូវគោលដៅចុងក្រោយ "កម្ពុជាគ្មានមីន"

(ហ្សាការតា ឥណ្ឌូណេស៊ី) ថ្ងៃទី០៨ ខែធ្នូ ឆ្នាំ២០២៥ ឯកឧត្តមបណ្ឌិត លី ធុជ ទេសរដ្ឋមន្ត្រី អនុប្រធានទី១ អាជ្ញាធរមីន បានជួបពិភាក្សាទ្វេភាគីជាមួយ លោក Liang Guotao ប្រធាននាយកដ្ឋានត្រួតពិនិត្យអាវុធ នៃក្រសួងការបរទេសសាធារណរដ្ឋប្រជាមានិតចិន ក្នុងឱកាសអញ្ជើញចូលរួមកិច្ចសន្ទនាកម្រិតខ្ពស់ ស្តីពីការជំរុញកិច្ចសហប្រតិបត្តិការក្នុងតំបន់ និងការកៀរគរធនធានក្នុងសកម្មភាពមីន ដែលប្រព្រឹត្តិទៅនៅរដ្ឋធានីហ្សាការតា ប្រទេសឥណ្ឌូនេស៊ី។ ក្នុងជំនួបនោះ ក៏មានការចូលរួមផងដែរពី ឯកឧត្តម យៀប សំណាង អនុរដ្ឋលេខាធិការក្រសួងការបរទេសនិងសហប្រតិបត្តិការអន្តរជាតិ, ឯកឧត្តម ទាន សំណាង ឯកអគ្គរាជទូតកម្ពុជាប្រចាំនៅឥណ្ឌូណេស៊ី និងឯកឧត្តម ហេង សារិទ្ធ ឯកអគ្គរាជទូតវិសាមញ្ញនិងពេញសមត្ថភាព តំណាងអចិន្ត្រៃយ៍នៃព្រះរាជាណាចក្រកម្ពុជាប្រចាំអាស៊ាន។ឯកឧត្តមបណ្ឌិត លី ធុជ បានជម្រាបជូនភាគីចិននូវលទ្ធផលដែលកម្ពុជាទទួលបានក្នុងកិច្ចប្រជុំលើកទី២២នៃរដ្ឋភាគីនៃអនុសញ្ញាអូតាវ៉ា និងស្ថានការណ៍វិវឌ្ឍថ្មីៗក្នុងប្រទេសកម្ពុជា ក៏ដូចជាលើវិស័យសកម្មភាពមីន។ ឯកឧត្តមបណ្ឌិត បានថ្លែងអំណរគុណដល់រដ្ឋាភិបាល និងប្រជាជនចិន ដែលតែងតែគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការដោះស្រាយបញ្ហាមីន និងសំណល់ជាតិផ្ទុះពីសង្រ្គាមនៅកម្ពុជា ហើយការចូលរួមរបស់មិត្តចិនពិតជាសារៈសំខាន់ដើម្បីធ្វើឱ្យប្រទេសកម្ពុជាអាចសម្រេចបាននូវគោលដៅរបស់ខ្លួន។ ដោយកម្ពុជានូវមានតម្រូវការខ្ពស់លើការងារមនុស្សធម៌នេះ ឯកឧត្តមបណ្ឌិត បានស្នើឱ្យរដ្ឋាភិបាលចិនបន្តផ្តល់ជំនួយគាំទ្របន្ថែមទៀតទាំងផ្នែកបណ្តុះបណ្តាល សម្ភារៈ និងថវិកា។ជាការឆ្លើយតប លោក Liang Guotao បានលើកសរសើរកម្ពុជា ក្នុងភាពជាប្រធាន និងជាម្ចាស់ផ្ទះនៃកិច្ចប្រជុំត្រួតពិនិត្យឡើងវិញលើកទី៥ ឬកិច្ចប្រជុំកំពូលសៀមរាប-អង្គរស្តីពីពិភពលោកមួយដែលគ្មានមីន នៃអនុសញ្ញាអូតាវ៉ាកាលពីឆ្នាំ២០២៤ នៅខេត្តសៀមរាប។ ភាគីចិនបានសន្យាជួយកម្ពុជាលើវិស័យសកម្មភាពមីនបន្តទៅឆ្នាំខាងមុខទៀតរហូតកម្ពុជាអាចសម្រេចបាននូវគោលដៅចុងក្រោយ។ជាមួយគ្នានោះ លោក Liang Guotao បានសម្តែងការសោកស្ដាយចំពោះការបាត់បង់អាយុជីវិត និងរងរបួសរបស់ប្រជាពលរដ្ឋស៊ីវិល ក្នុងសង្រ្គាមកម្ពុជា-ថៃ ហើយលោកបានអំពាវនាវអោយភាគីបន្តភាពអត់ធ្មត់ និងដោះស្រាយដោយសន្តិវិធី។

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត៖ «ការពារជាតិ» សម្រាប់ពួកយើងគឺគ្រាន់តែជាពាក្យនិយាយតែសម្រាប់បងប្អូន វីរកងទ័ពជួរមុខគឺជា «ការលះបង់» ដ៏ធំធេងបំផុត

ភ្នំពេញ៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នៅរសៀលថ្ងៃទី១០ ខែធ្នូ ឆ្នាំ២០២៥នេះ បានផ្ញើសារជូនបងប្អូនវីរយុទ្ធជន និងវីរយុទ្ធនារីជួរមុខដែលកំពុងលះបង់សាច់ស្រស់ ឈាមស្រស់ដើម្បីការពារប្រជាជន និងមាតុភូមិកម្ពុជា។ លោកជំទាវបណ្ឌិត ពេជ ចន្ទមុន្នី បានសរសេរថា «បេះដូងអ្នកការពារ៖ លិខិតពីក្រោយ ជូនទៅជួរមុខ»! ជូនចំពោះ វីរយុទ្ធជន និងវីរយុទ្ធនារី នៃកងយោធពលខេមរភូមិន្ទ ជាទីគោរព....។លោកជំទាវបណ្ឌិត បានបន្តថាក្នុងពេលដែលពួកយើងកំពុងដេកលក់យ៉ាងស្កប់ស្កល់ក្រោមដំបូលផ្ទះដ៏កក់ក្តៅ ពួកយើងដឹងថា នៅទីនោះ... នៅតាមព្រំដែន ក្នុងព្រៃជ្រៅ កណ្តាលភ្លៀងផ្គរ ឬក្រោមកម្ដៅថ្ងៃដ៏រលាក បងប្អូនកំពុងឈរយ៉ាងរឹងមាំ ដោយយកសាច់ស្រស់ និងឈាមស្រស់ ធ្វើជារបងការពារមាតុភូមិមួយនេះ។លោកជំទាវបណ្ឌិតបានថ្លែងថា ពាក្យថា «ការពារជាតិ» សម្រាប់ពួកយើង គឺគ្រាន់តែជាពាក្យនិយាយ តែសម្រាប់បងប្អូន វាគឺជា «ការលះបង់» ដ៏ធំធេងបំផុត។ បងប្អូនសុខចិត្តឃ្លាតឆ្ងាយពីក្រុមគ្រួសារ ឆ្ងាយពីប្រពន្ធកូន និងឪពុកម្តាយ ដើម្បីមកថែរក្សាសុខសន្តិភាពឱ្យប្រជាជនរាប់លាននាក់។ រាល់ដំណក់ញើសដែលហូរចុះ គឺជាតម្លៃនៃសេចក្តីសុខសាន្តរបស់ជាតិ ហើយរាល់ជំហានដែលបងប្អូនដើរល្បាត គឺជាការធានានូវបូរណភាពទឹកដីនៃកម្ពុជា។លោកជំទាវបណ្ឌិត បានបញ្ជាក់ថា៖«សូមកុំមានអារម្មណ៍ថាឯកា បងប្អូនវីរយុទ្ធជន និងវីរយុទ្ធនារីជួរមុខ! ទោះបីជាបងប្អូននៅឆ្ងាយ ប៉ុន្តែបេះដូងរបស់ប្រជាជនខ្មែរគ្រប់រូប គឺនៅក្បែរបងប្អូនជានិច្ច។ ពួកយើងសូមឱនកាយគោរពចំពោះវីរភាពដ៏អង់អាចក្លាហាន និងសូមចងចាំទុកនូវគុណបំណាច់ដ៏ថ្លៃថ្លានេះនៅក្នុងក្រអៅបេះដូងជារៀងរហូត។លោកជំទាវបណ្ឌិត បានបួងសួងដល់វត្ថុស័ក្តិសិទ្ធិក្នុងលោក ព្រលឹងដូនតា និងទេវតាថែរក្សាព្រះរាជាណាចក្រកម្ពុជា សូមតាមជួយបីបាច់ថែរក្សា បងប្អូនកងទ័ពទាំងអស់ ឱ្យជួបតែសុខសុវត្ថិភាព ឈ្នះអស់មារសត្រូវ និងត្រឡប់មកជួបជុំគ្រួសារវិញដោយស្នាមញញឹមនៃជ័យជម្នះ។លោកជំទាវបណ្ឌិត «អ្នកគឺជាវីរបុរសក្នុងបេះដូងពួកយើង»!

កម្ពុជា ថ្កោលទោសថៃចំពោះមុខទូត ៣៣ប្រទេស និងទីភ្នាក់ងារអង្គការអន្តរជាតិនានា

លោកជំទាវ អ៊ាត សោភា រដ្ឋលេខាធិការប្រចាំការ នៃក្រសួងការបរទេស និងសហប្រតិបត្តិការអន្តរជាតិកម្ពុជា បានថ្កោលទោសការវាយប្រហាររបស់ថៃដោយប្រើអាវុធធុនធ្ងន់ រួមមាន រថក្រោះ កាំភ្លើងធំ កាំភ្លើងត្បាល់ យន្តហោះចម្បាំង និងផ្សែងពុលមកលើទីតាំងកម្ពុជាជាច្រើន ដែល បានបណ្តាលឲ្យមានមនុស្សស្លាប់ និងរងរបួសមួយចំនួន ព្រមទាំងបំផ្លិចបំផ្លាញផ្ទះសម្បែង ហេដ្ឋារចនា- សម្ព័ន្ធសាធារណៈ និងសម្បត្តិបេតិកភណ្ឌជាតិ ដែលត្រូវបានការពារ យ៉ាងដំណំ។ការថ្កោលទោសនេះ ធ្វើឡើងនៅថ្ងៃទី៩ ខែធ្នូ ឆ្នាំ២០២៥ ក្នុងឱកាស លោកជំទាវ បានដឹកនាំការធ្វើបទបង្ហាញ ស្តីពី ការផ្ទុះឡើងនូវការវាយប្រហារ ដោយអាវុធនៅតាមបណ្ដោយព្រំដែនកម្ពុជា-ថៃ ជូនដល់ប្រធាន និងតំណាងបេសកកម្មការទូតចំនួន៣៣ ប្រទេស និងទីភ្នាក់ងារអង្គការអន្តរជាតិនៅទីក្រុងភ្នំពេញ។ ប្រធាននៃស្ថានតំណាងកម្ពុជានៅបរទេស និង សមាជិកក្រុមអ្នកសង្កេតការណ៍អាស៊ានប្រចាំកម្ពុជា ក៏បានចូលរួមស្តាប់បទបង្ហាញនេះ តាមប្រព័ន្ធវីដេអូផងដែរ។លោកជំទាវរដ្ឋលេខាធិការប្រចាំការ បានក៏ច្រានចោលនូវការអះអាងបំភាន់ថា កម្ពុជាបានឈ្លានពានប្រទេសថៃ និងបានផ្ដើមការវាយប្រហារ ដោយបាន គូសបញ្ជាក់ថា ការវាយលុកថ្មីៗមកលើកម្ពុជា គឺជាការរំលោភយ៉ាងធ្ងន់ធ្ងរលើច្បាប់មនុស្សធម៌អន្តរជាតិ ធម្មនុញ្ញអង្គការសហប្រជាជាតិ និងអាស៊ាន និងស្មារតីនៃសហគមន៍អាស៊ាន។ លោកជំទាវបានលើកឡើង អំពីការប្រើប្រាស់កម្លាំងពីសំណាក់យោធាថៃ ក្នុងការកំណត់ព្រំដែន ដែលធ្វើឲ្យប៉ះពាល់ដល់វឌ្ឍនភាពសំខាន់ៗនៃការបោះបង្គោលព្រំដែនលេខ៥២-៥៩ និង៤២-៤៧ ដែលសម្រេចបានដោយគណៈកម្មការចម្រុះខណ្ឌសីមាព្រំដែនគោកកម្ពុជា-ថៃ។លោកជំទាវរដ្ឋលេខាធិការប្រចាំការ អ៊ាត សោភា បានរំលឹកឡើងវិញនូវការវិវត្តនៃព្រឹត្តិការណ៍ មុន ឈានដល់ការបើកការវាយលុករបស់ថៃមកលើកម្ពុជា នៅរសៀលថ្ងៃទី៧ ខែធ្នូ ឆ្នាំ២០២៥ ជាពិសេស ការផ្ទុះមីនកាលពីថ្ងៃទី១០ ខែវិច្ឆិកា ឆ្នាំ២០២៥ ខណៈដែលកងកម្លាំងថៃនៅតែបន្តសកម្មភាពរំលោភបំពាន ការបាញ់ប្រហារលើជនស៊ីវិលនៅភូមិព្រៃចាន់ ខេត្តបន្ទាយមានជ័យ នៅថ្ងៃទី១២ ខែវិច្ឆិកា ឆ្នាំ២០២៥ និងការលែងទទួលស្គាល់សេចក្ដីថ្លែងការណ៍រួមទីក្រុងគូឡាឡាំពួ ថ្ងៃទី២៦ ខែតុលា ឆ្នាំ ២០២៥ ដោយប្រទេសថៃ ដោយផ្អែកលើការចោទប្រកាន់មកលើកម្ពុជាអំពីបញ្ហាគ្រាប់មីនថ្មី ដែលគ្មានមូលដ្ឋាន៕

BREAKING NEWS | មកទល់ម៉ោងជិត៤រសៀលនេះ យោធាថៃបានបើកការបាញ់ ប្រហារមកលើប្រជាពលរដ្ឋស៊ីវិលកម្ពុជា នៅឃុំស្វាយចេក ស្រុកស្វាយចេក

ក្រសួងការពារជាតិកម្ពុជា បានបញ្ជាក់ឱ្យដឹងថា មកទល់នឹងម៉ោងប្រមាណ ៣៖៤៥ នាទីល្ងាចថ្ងៃទី១០ ខែធ្នូនេះយោធាថៃបានបើកការបាញ់ ប្រហារមកលើប្រជាពលរដ្ឋស៊ីវិលកម្ពុជា នៅក្នុងភូមិសាស្រ្តយោធភូមិភាគទី៥៖នៅថ្ងៃទី១០ ខែធ្នូ ឆ្នាំ២០២៥ វេលាម៉ោង ១៥:៤៥នាទី យោធាថៃផ្លោងគ្រាប់កាំភ្លើង១៥៥មម ចំនួន ២គ្រាប់ចូលបឋមសិក្សាខ្វាវលិច ឃុំស្វាយចេក ស្រុកស្វាយចេក ខេត្តបន្ទាយមានជ័យ។ សកម្មភាពដ៏កំរោលរបស់យោធាថៃនេះ ជាការបើកការបាញ់ប្រហារ ដោយមិនរើសគោលដៅបាញ់ចូលទីប្រជុំជនដែលមានប្រជាពលរដ្ឋស៊ីវិលរស់នៅ ពិសេសជាសាលារៀនរបស់កុមារ។ ក្រសួងការពារជាតិ ក្រកម្ពុជា ប្រកាសថ្កោលទោសយ៉ាងដាច់អហង្ការចំពោះទង្វើ អមនុស្សធម៌ដ៏សាហាវឃោរឃៅនេះ ហើយនេះបង្ហាញយ៉ាងច្បាស់ការណ៍ដែលភាគីថៃបានរំលោភ បំពាន លើបទឈប់បាញ់ និងសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ” ដែលភាគី ទាំងពីរបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ ដែលចុះហត្ថលេខាដោយនាយករដ្ឋ មន្ត្រីនៃប្រទេសកម្ពុជា និងថៃ ក្រោមសាក្សីរបស់ឯកឧត្តម ដូណាល់ ត្រាំ ប្រធានាធិបតីសហរដ្ឋអាម៉េរិក និងឯកឧត្តម អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានអាស៊ាន។

ឯកអគ្គរដ្ឋទូតកាណាដាប្រចាំនៅកម្ពុជា សម្តែងក្តីបារម្ភ និងបានតាមដានដោយយកចិត្តទុកដាក់ជាខ្លំាង ចំពោះការផ្ទុះសង្រ្គាមតាមព្រំដែនកម្ពុជា-ថៃ

ក្នុងឱកាសចូលជួបសម្តែងការគួរសម និងពិភាក្សាការងារជាមួយ សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី១០ ខែធ្នូ ឆ្នាំ២០២៥ ឯកឧត្តម គ្រីស្ទាន អង់ជេឡូ ដេសរ៉ូស (Christian Angelo DesRoches) ឯកអគ្គរដ្ឋទូតប្រទេសកាណាដា ប្រចាំកម្ពុជា បានចូលរួមសម្តែងការសោកស្តាយចំពោះការផ្ទុះសង្រ្គាមនៅតាមព្រំដែនកម្ពុជា-ថៃ ដោយបានអះអាងថា ឯកឧត្ដមមានការបារម្ភ និងបានតាមដានដោយយកចិត្តទុកដាក់បំផុតចំពោះហេតុការនេះ។ ឯកឧត្តមបានបញ្ជាក់ពីកិច្ចខិតខំរួមចំណែករបស់កាណាដាក្នុងការបញ្ចប់ជម្លោះនេះ ដោយសន្តិវិធី ផ្នែកលើច្បាប់អន្តរជាតិ ដើម្បីនាំមកនូវសុខសុវត្ថិភាព សម្រាប់ពលរដ្ឋស្លូតត្រង់នៃប្រទេសទំាងពីរ។នៅក្នុងជំនួបពិភាក្សាការងារនេះ សម្តេចប្រធានរដ្ឋសភា និងឯកឧត្តម គ្រីស្ទាន ដេសរ៉ូស បានពិភាក្សាគ្នាដោយត្រង់ និងបើកចំហក្នុងការលើកកម្ពស់ទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទំាងពីរដែលមានតំាងពីយូរណាស់មកហើយ ឱ្យកាន់តែរឹងមាំ និងរីកចម្រើនបន្ថែមទៀត ទាំងខាងស្ថាប័ននីតិប្បញ្ញត្តិ និងនីតិប្រតិបត្តិ សំដៅធ្វើយ៉ាងណានាំមកនូវផលប្រយោជន៍ជូនប្រជាពលរដ្ឋទំាងសងខាង ក៏ដូចជាជូនប្រជាពលរដ្ឋនៅក្នុងតំបន់ និងពិភពលោកផងដែរ។សម្តេចប្រធានរដ្ឋសភាបានគូសបញ្ជាក់ថា ការដាក់ស្ថានទូតប្រទេសកាណាដាប្រចាំកម្ពុជាជាថ្មីឡើងវិញ កាលពីខែមីនា ឆ្នាំ២០២៥ គឺជាសញ្ញាណវិជ្ជមានដ៏សំខាន់ បង្ហាញពីការប្តេជ្ញាចិត្ត ការជឿជាក់ និងស្របតាមយុទ្ធសាស្រ្ត គោលនយោបាយការបរទេសរបស់រដ្ឋាភិបាលកាណាដាចំពោះតំបន់ឥណ្ឌូ-ប៉ាស៊ីហ្វិក ក៏ដូចជាសម្រាប់កម្ពុជា នៅក្នុងការពង្រឹង និងពង្រីកទំនាក់ទំនងទ្វេភាគីរវាងប្រទេសទាំងពីរឱ្យកាន់តែជិតស្និទ្ធ ស៊ីជម្រៅ និងទូលំទូលាយ ឈានឆ្ពោះទៅកម្រិតខ្ពស់ថ្មីមួយ។សម្តេចរដ្ឋសភាធិបតី មានជំនឿមុតមំាថា នៅក្នុងអាណត្តិការទូតរបស់ ឯកឧត្តម គ្រីស្ទាន ដេសរ៉ូស នឹងធ្វើឱ្យទំនាក់ទំនង និងកិច្ចសហប្រតិបត្តិការលើគ្រប់វិស័យនៃប្រទេសទំាងពីរ កាន់តែរីកចម្រើន និងរឹងមាំឡើង ទំាងការងារការទូតសភា និងវិស័យផ្សេងៗទៀតដូចជាការអប់រំ ទេសចរណ៍ សេដ្ឋកិច្ច ពាណិជ្ជកម្ម ពិសេសទំនាក់ទំនងប្រជាជន និងប្រជាជន។ ទំនាក់ទំនងដ៏ល្អរវាងប្រទេសទាំងពីរ ផ្អែកលើភាពស្មោះត្រង់ និងការជឿជាក់គ្នាទៅវិញទៅមកដោយយកពលរដ្ឋជាស្នូល។សម្តេចរដ្ឋសភាធិបតី ឃួន សុដារី បានកត់សម្គាល់ថា កាណាដាជាដៃគូអភិវឌ្ឍន៍ដ៏សំខាន់មួយរបស់កម្ពុជា។ កាណាដាបានរួមចំណែកជួយការងាររដ្ឋសភាកម្ពុជា តាំងពីឆ្នាំ១៩៩៣ មក។ ក្នុងរយៈពេលចុងក្រោយនេះ កាណាដាបានផ្តល់នូវជំនួយអភិវឌ្ឍន៍ជាទឹកប្រាក់ប្រមាណ ២៣.១ លានដុល្លារសម្រាប់ឆ្នាំ២០២២-២០២៣។ ចំណែកពាណិជ្ជកម្មវិញ កាណាដាបាននាំចូលទំនិញដ៏ធំច្រើនសន្ធឹកសន្ធាប់ពីកម្ពុជា ដែលក្នុងនោះភាគច្រើនគឺសម្លៀកបំពាក់ ស្បែកជើង វាយនភណ្ឌ និងកាបូប ជាដើម។ ពាណិជ្ជកម្មទ្វេភាគីរវាងប្រទេសយើងទាំងពីរសម្រាប់ឆ្នាំ២០២៥ ក្នុងរយៈពេល ៣ ត្រីមាសដំបូង បានកើនលើស ១ ពាន់លានដុល្លារអាមេរិក ដោយឡែកនៅក្នុងឆ្នាំ២០២៤ ទំហំពាណិជ្ជកម្មសម្រេចបានដល់ ២,៤ ពាន់លានដុល្លារ ដែលនេះជាសញ្ញាណវិជ្ជមានដ៏ល្អ និងបញ្ជាក់ច្បាស់អំពីលទ្ធភាពនៃការពង្រីកពាណិជ្ជកម្មទ្វេភាគី ឱ្យកាន់តែប្រសើរឡើង។ឯកឧត្តម គ្រីស្ទាន ដេសរ៉ូស បានសម្តែងការកោតសរសើរពីការរីកចម្រើនគ្រប់វិស័យរបស់កម្ពុជា។ ឯកឧត្តម លើកឡើងថា កម្ពុជាជាប្រទេសគំរូមួយក្នុងការលើកកម្ពស់សមភាពយេនឌ័រ ដោយបានផ្តល់តួនាទីសំខាន់ៗជូនស្រ្តី ដូចជាតួនាទីប្រធានរដ្ឋសភា រដ្ឋមន្រ្តី និងប្រធានស្ថាប័នជាច្រើនទៀត។ ឯកឧត្តមឯកអគ្គរដ្ឋទូត ក៏បានបង្ហាញ ពីសមិទ្ធផល និងគម្រោងជាច្រើនដែលកាណាដាបាននិងកំពុងបន្តកិច្ចសហប្រតិបត្តិការជាមួយកម្ពុជា។ កាណាដាបានត្រៀមលក្ខណៈជាស្រេចនៅក្នុងការជួយនិងគំាទ្រកម្ពុជា ក្នុងការរៀបបចំកិច្ចប្រជុំកំពូលលើកទី២០ ហ្រ្វង់កូហ្វីនី នៅឆ្នាំ២០២៦ ខាងមុខ ហើយនៅពេលនោះ ឯកឧត្តមនាយករដ្ឋមន្រ្តីកាណាដា និងធុរជនកាណាដានឹងអញ្ជើញចូលរួមក្នុងកិច្ចប្រជុំនេះផងដែរ។សម្តេចប្រធានរដ្ឋសភា បានសម្តែងនូវកិច្ចស្វាគមន៍យ៉ាងកក់ក្តៅចំពោះវត្តមានរបស់ ឯកឧត្តមនាយករដ្ឋមន្រ្តីកាណាដា នៅកម្ពុជា នាពេលខាងមុខ។ ការអញ្ជើញចូលរួមកិច្ចប្រជុំកំពូលហ្រ្វង់កូហ្វីនី របស់ ឯកឧត្តមនាយកដ្ឋមន្រ្តីកាណាដានៅកម្ពុជាគឺជាទំព័រថ្មីមួយ ដែលនឹងធ្វើឱ្យទំនាក់ទំនងប្រទេសទំាងពីរកាន់តែរឹងមាំ ទំាងកម្រិតទ្វេភាគី និងពហុភាគី។ សម្តេចបានកត់សម្គាល់ថា ទោះបីកាណាដានៅឆ្ងាយពីកម្ពុជាក្តី តែមនោសញ្ចេតនាប្រជាពលរដ្ឋប្រទេសទំាងពីរមានលក្ខណៈស្និទ្ធស្នាលបំផុត។ឆ្លើយតបការបារម្ភពីជម្លោះព្រំដែនកម្ពុជា និងថៃ ដែលកើតពីការឈា្លនពានរបស់ប្រទេសថៃមកលើកម្ពុជានោះ សម្តេចប្រធានរដ្ឋសភាបានគូសបញ្ជាក់ថា តាមពិតទៅជម្លោះព្រំដែនរវាងប្រទេសទំាងពីរបានកើតមានជាយូរមកហើយ ដោយសារការប្រើប្រាស់ផែនទីខុសគ្នា។ កម្ពុជាប្រើប្រាស់ផែនទីដែលអន្តរជាតិទទួលស្គាល់ ចុះហត្ថលេខាទទួលស្គាល់ដោយបារាំងនិងសៀម។ ចំណែកថៃប្រើប្រាស់ផែនទីឯកតោភាគី។ សម្តេចបានបញ្ជាក់បន្ថែមទៀតថា ដោយធ្លាប់ឆ្លងកាត់ភ្លើងសង្រ្គាមជាច្រើនទសវត្សរ៍ កម្ពុជាបានស្គាល់រស់ជាតិឈឺចាប់ និងវិនាសកម្មពីភ្លើងសង្រ្គាម ដូច្នេះហើយបានជាកម្ពុជាប្រកាន់យកភាពអត់ធ្មត់ ស្វែងរកដំណោះស្រាយដោយសន្តិវិធី គោរពកិច្ចព្រមព្រៀងនានា គោរពច្បាប់អន្តរជាតិ និងដោយសារមិនចង់ឱ្យពលរដ្ឋទាំងសងខាងរងគ្រោះ ទទួលការលំបាកពីភ្លើងសង្រ្គាម។ ប៉ុន្តែភាគីថៃបានចិញ្ចឹមចិត្តឈ្លានពានកម្ពុជា បើកការវាយប្រហារមកលើកម្ពុជាជាញឹកញាប់។សម្តេចបានសង្កត់ធ្ងន់ថា ការឈ្លានពានចុងក្រោយរបស់ថៃ មកលើអធិបតេយ្យកម្ពុជាមានលក្ខណៈឃោរឃៅ អមនុស្សធម៌ ធ្វើឱ្យប៉ះពាល់សុខសន្តិភាព ស្ថិរភាពក្នុងតំបន់ និងសកលលោក រំលោភច្បាប់មនុស្សធម៌អន្តរជាតិ ធ្វើឱ្យពលរដ្ឋស្លូតត្រង់ជាជនស៊ីវិលស្លាប់បាត់បង់ជីវិត និងរងរបួសជាច្រើននាក់ ព្រមទាំងបានបំផ្លិចបំផ្លាញសម្បត្តិរដ្ឋ និងឯកជនយ៉ាងច្រើនសន្ធឹកសន្ធាប់៕

BREAKING NEWS | នាយករដ្ឋមន្ត្រីម៉ាឡេស៊ីពិភាក្សាតាមទូរស័ព្ទជាមួយសម្ដេចធិបតី និងលោក អនុទីន អំពីស្ថានភាពព្រំដែនប្រទេសទាំងពីរ

នាយករដ្ឋមន្ត្រីម៉ាឡេស៊ី ឯកឧត្តម អាន់វ៉ា អ៊ីប្រាហ៊ីម (Anwar Ibrahim) កាលពីថ្ងៃទី៩ ខែធ្នូ ឆ្នាំ២០២៥នេះ បានបើកកិច្ចសន្ទនាតាមទូរស័ព្ទជាមួយនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត និងលលោក អនុធីន នាយករដ្ឋមន្រ្ដីថៃ ដើម្បីពិភាក្សាអំពីស្ថានភាពជម្លោះព្រំដែនប្រទេសទាំងពីរដែលកំពុងកើតឡើងនៅតំបន់ព្រំដែន។ ឯកឧត្តម អាន់វ៉ា បានបញ្ជាក់ថា ជំនួបតាមទូរស័ព្ទឯកឧត្តមបង្ហាញការកោតសរសើរចំពោះការបើកចំហ និងឆន្ទៈរបស់មេដឹកនាំនៃប្រទេសទាំងពីរ ក្នុងការបន្តចរចាសំដៅបន្ធូរបន្ថយភាពតានតឹង និងបញ្ចៀសការយល់ច្រឡំដែលអាចធ្វើឱ្យស្ថានការណ៍កាន់តែអាក្រក់ឡើង។ ឯកឧត្តមបន្តថា ស្របពេលដែលមិនទាន់ដំណោះស្រាយចុងក្រោយណាមួយត្រូវបានឈានដល់ការបន្តកិច្ចប្រឹងប្រែងការទូតបានធានាអាចធានា កុំឱ្យឧបទ្ទវហេតុធ្ងន់ធ្ងរកើតឡើងថែមទៀតក្នុងពេលវេលាដ៏សំខាន់នេះ។ ឯកឧត្តម អាន់វ៉ា បន្ថែមថា ម៉ាឡេស៊ីនឹងបន្តគាំទ្រដល់កិច្ចសន្ទានា ដំណោះស្រាយឈរលើមូលដ្ឋានច្បាប់អន្តរជាតិ និងកិច្ចសហប្រតិបត្តិការតំបន់ដើម្បីថែរក្សាស្ថិរភាព និងសុវត្ថិភាពនៃតំបន់របស់យើង៕

សម្តេចប្រធានរដ្ឋសភាស្វាគមន៍អ្នកវិនិយោគទុនបារំាងដែលគ្រោងនាំផលិតផលមានគុណភាពខ្ពស់ និងតម្លៃសមរម្យមកលក់នៅកម្ពុជា

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជាបានអនុញ្ញាតឱ្យ គណៈប្រតិភូវិនិយោគិនបារាំង ដឹកនាំដោយ លោក ហ្រ្វង់ស័រ ហ្គេស (FRANÇOIS GUEZ) នាយកប្រតិបត្តិនៃក្រុមហ៊ុន ភីអិល វីស្តា (PL Vista) និង ប៊ីវាយ វីស្តា (BY Vista) ចូលជួបសម្តែងការគួរសម និងពិភាក្សាការងារ នៅវិមានរដ្ឋសភា នាព្រឹកថ្ងៃទី១០ ខែធ្នូ ឆ្នាំ២០២៥។លោក ហ្រ្វង់ស័រ ហ្គេស បានថ្លែងអំណរគុណយ៉ាងជ្រាលជ្រៅជូនសម្តេចប្រធានរដ្ឋសភា ដែលបានឆ្លៀតពេលដ៏មមាញឹកទទួលជួបពិភាក្សាការងារជាមួយគណៈប្រតិភូ របស់លោកនៅក្នុងឱកាសនេះ។ លោកនាយកក្រុមហ៊ុន បានបង្ហាញក្តីរីករាយ និងអបអរសាទរចំពោះការរីកចម្រើនរបស់កម្ពុជា និងបានបង្ហាញនូវមនោសញ្ចេតនាជ្រាលជ្រៅជាមួយពលរដ្ឋកម្ពុជា។ឆ្លៀតនៅក្នុងឱកាសនោះ លោក ហ្រ្វង់ស័រ ហ្គេស ក៏បានចួលរួមសម្តែងការសោកស្តាយ និងក្តីកង្វល់ជាខ្លំាងជាមួយសម្តេចប្រធាន ក៏ដូចជាមួយពលរដ្ឋកម្ពុជា ចំពោះបញ្ហាជម្លោះព្រំដែនកម្ពុជា-ថៃ ដែលបានធ្វើឱ្យមានបាត់បង់ជីវិត បង្កផលលំបាកយ៉ាងធ្ងន់ធ្ងរ និងខូចខាតជាច្រើន ដល់ពលរដ្ឋកម្ពុជា។ លោក ហ្រ្វង់ស័រ ហ្គេស មានការជឿជាក់ថា ជ័យជំនះនឹងផ្តល់ជូនអ្នកស្លូតត្រង់ និងត្រឹមត្រូវ។ ទោះជាយ៉ាងណា លោកបានអះអាងថា បញ្ហានៅតាមព្រំដែននេះ មិនមែនជាឧបសគ្គដល់ការវិនិយោគ និងការធ្វើដំណើររបស់គណៈប្រតិភូលោកមកកាន់កម្ពុជា នោះឡើយ។តាមគម្រោង លោក ហ្រ្វង់ស័រ ហ្គេស នឹងនាំចូលផលិតផលរបស់ប្រទេសបារំាងជាច្រើនមុខ មានដូចជាផលិតផលផ្នែកអនាម័យ សុខភាព សម្ភារៈប្រើប្រាស់ និងគ្រឿងសំអាង មកលក់នៅកម្ពុជា។ ក្នុងដំណាក់កាលដំបូងក្រុមហ៊ុននឹងនាំទំនិញប្រមាណ៤០០ មុខ ហើយនឹងពង្រីកដល់១ពាន់មុខ នាពេលអនាគត។ អាជីវកម្មរបស់ក្រុមហ៊ុនលោកនឹងផ្តើមដំណើរការនៅដើមឆ្នាំ២០២៦ ឆាប់ៗនេះ។ លោកបានបញ្ជាក់ថា ទំនិញទំាងអស់នឹងនាំចេញពីរោងចក្រផ្ទាល់នៅប្រទេសបារំាង ហើយការនាំចេញផ្ទាល់ពីរោងចក្រមកលក់លើទីផ្សារកម្ពុជានេះ នឹងធ្វើឱ្យតម្លៃលក់នៅកម្ពុជា ប្រហាក់ប្រហែលនឹងការលក់នៅលើទីផ្សារក្នុងប្រទេសបារំាងដែរ។សម្តេចរដ្ឋសភាធិបតី បានស្វាគមន៍ និងមានសេចក្តីសោមនស្សរីករាយ ចំពោះវត្តមានរបស់គណៈប្រតិភូក្រុមវិនិយោគិនបារាំង ដែលអញ្ជើញមកបណ្តាក់ទុននៅកម្ពុជា។ សម្តេចបានគូសបញ្ជាក់ថា ការវិនិយោគនេះ គឺស្របពេលដែលសភាពាណិជ្ជកម្ម និងឧស្សាហកម្មរបស់បារាំងនៅកម្ពុជាទើបបានផ្សព្វផ្សាយសៀវភៅមគ្គុទេ្ទសក៍ស្តីពី “ការធ្វើធុរកិច្ចនៅកម្ពុជាសម្រាប់ឆ្នាំ២០២៥-២០២៦) កាលពីខែវិច្ឆិកាកន្លងទៅ។ឆ្លៀតនៅក្នុងឱកាសនោះ សម្តេចប្រធានរដ្ឋសភា បានលើកឡើងពីទំនាក់ទំនងដ៏ល្អ និងជាប្រវត្តិសាស្រ្តរវាងកម្ពុជា និងបារំាង។ ក្នុងរយៈពេលចុងក្រោយ ទំនាក់ទំនងនេះបានវិវឌ្ឍន៍ឈានឡើងគួរកត់សម្គាល់ និងបានក្លាយជា ភាពជាដៃគូដ៏រឹងមាំ និងធន់។ ទំនាក់ទំនងទ្វេភាគីកម្ពុជា-បារាំងនឹងត្រូវដំឡើងកម្រិតទៅជា "ភាពជាដៃគូយុទ្ធសាស្រ្ត” ក្នុងពេលឆាប់ៗ ខាងមុខនេះ។សម្តេចបានបញ្ជាក់ថា ប្រជាពលរដ្ឋកម្ពុជា និងពលរដ្ឋបារំាងមានមនោសញ្ចេតនាជិតស្និទ្ធជាមួយគ្នា។ ពលរដ្ឋកម្ពុជាមានការជឿជាក់លើសេវាកម្ម និងគុណភាពផលិតផលរបស់បារំាង ដូចជាវិស័យសុខាភិបាលជាដើម។ សម្តេចបានលើកឡើងថា ការវិនិយោគនៅពេលនេះ ជាពេលវេលាដ៏សមស្របមួយ ដោយហេតុថា ពលរដ្ឋកម្ពុជាត្រូវការផលិតផលមានគុណភាពខ្ពស់ និងតម្លៃសមរម្យ មកប្រើប្រាស់ ស្របតាមការរីកចម្រើនរបស់ប្រទេសជាតិ។ សម្តេចប្រធានរដ្ឋសភា បានថ្លែងអំណរគុណចំពោះមិត្តបារាំង ក្នុងនោះវិស័យធុរកិច្ច និងវិនិយោគិនបារាំង ដែលបានរួមចំណែកបង្កើត និងផ្តល់ការងារ ផ្លាស់ប្តូរជំនាញ និងអភិវឌ្ឍហេដ្ឋារចនាសម្ព័ន្ធ ដែលជាមូលដ្ឋានគ្រឹះ ដ៏សំខាន់ដល់កំណើនសេដ្ឋកិច្ចកម្ពុជាប្រកបដោយនិរន្តរភាព។ បារាំងក៏ជាដៃគូពាណិជ្ជកម្មធំទី២ របស់កម្ពុជាផងដែរ។ ពាណិជ្ជកម្មទ្វេភាគីរវាងកម្ពុជា-បារំាង ក្នុងឆ្នាំ២០២៣ មានចំនួន ៥១៥.២១ លានដុល្លារអាមេរិក ហើយកាលពីឆ្នាំ២០២៤ កន្លងទៅ ទំហំពាណិជ្ជកម្មសម្រេចបានជាង ២០៦ លានដុល្លារអាមេរិក។ សម្តេចបានបញ្ជាក់ថា ទោះជាទំហំពាណិជ្ជកម្មទ្វេភាគីមានលក្ខណៈល្អប្រសើរយ៉ាងណាក្តី ក៏ប្រទេសទាំងពីរនៅមានសក្តានុពលជាច្រើនទៀត ដែលគណៈប្រតិភូអាចសម្លឹងមើលឃើញ និងគួរជំរុញបន្ថែមទៀត។សម្តេចរដ្ឋសភាធិបតី ឃួន សុដារី បានជម្រាបអ្នកវិនិយោគបារំាងថា រដ្ឋសភាកម្ពុជា បាននិងកំពុងរួមចំណែកជាមួយរាជរដ្ឋាភិបាល ក្នុងកិច្ចប្រឹងប្រែងធ្វើឱ្យមានភាពប្រសើរឡើងសម្រាប់បរិយាកាសវិនិយោគ អាជីវកម្ម និងពាណិជ្ជកម្ម តាមរយៈការកសាង និងអនុម័តនូវលិខិតបទដ្ឋានគតិយុត្ត ច្បាប់សំខាន់ៗ ព្រមទាំងការតាមដានត្រួតពិនិត្យ និងភាពជាតំណាងរបស់ប្រជាពលរដ្ឋ។ សម្តេចបានលើកទឹកចិត្តថា សូមឱ្យអ្នកវិនិយោគបរទេសកុំសម្លឹងកម្ពុជា ត្រឹមតែកម្ពុជា។ សូមសម្លឹងមើលកម្ពុជាឱ្យហួសពីកម្ពុជា ពេលនោះនឹងឃើញថា កម្ពុជាមានវិសាលភាព និងសក្តានុពលធំទូលាយ។ កម្ពុជា គឺជាច្រកចូលទៅតំបន់មេគង្គ អាស៊ី អាគ្នេយ៍ និងតំបន់ដទៃផ្សេងទៀត។ ក្នុងនាមជាសមាជិកអាស៊ាន ដែលមានប្រជាពលរដ្ឋប្រមាណជា ៧០០លាននាក់ និងសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP ) ដែលមានប្រជាពលរដ្ឋប្រមាណជាង ១ ពាន់លាននាក់ ប្រការនេះធ្វើឱ្យកម្ពុជាមានសក្តានុពល និងលទ្ធភាពចូលទៅក្នុងទីផ្សារយ៉ាងទូលំទូលាយ៕

ARMAC បង្ហាញលទ្ធផលនៃកិច្ចសន្ទនាកម្រិតខ្ពស់ក្នុងតំបន់នៅទីក្រុងហ្សាកាតា ប្រទេសឥណ្ឌូណេស៊ី ពង្រឹងកិច្ចសហប្រតិបត្តិការ ការច្នៃប្រឌិត និង ការផ្តល់ហិរញ្ញប្បទានសម្រាប់អាស៊ានគ្មានមីន

(ទីក្រុងហ្សាកាតា): យោងតាមសេចក្តីប្រកាសព័ត៌មានរបស់មជ្ឈមណ្ឌលសកម្មភាពកំចាត់មីនក្នុងតំបន់អាស៊ាន (ARMAC) បានឲ្យដឹងថា ថ្ងៃនេះបានកោះប្រជុំអ្នកបង្កើតគោលនយោបាយជាន់ខ្ពស់ ដៃគូអភិវឌ្ឍន៍ និងអ្នកជំនាញបច្ចេកទេសនៅឯកិច្ចសន្ទនាកម្រិតខ្ពស់ថ្នាក់តំបន់ស្តីពីការពង្រឹងកិច្ចសហប្រតិបត្តិការក្នុងតំបន់ និងការចល័តធនធាននៅក្នុងសកម្មភាពមីន/ERW នៅទីក្រុងហ្សាកាតា ប្រទេសឥណ្ឌូនេស៊ី។ ការប្រមូលផ្តុំដ៏សំខាន់នេះ បាននាំប្រទេសសមាជិកអាស៊ាន និងដៃគូរួមគ្នាដើម្បីពង្រឹងកិច្ចសហប្រតិបត្តិការឱ្យស៊ីជម្រៅ និងតម្រឹមសកម្មភាពមីនជាមួយនឹងគោលដៅសន្តិភាព សន្តិសុខ និងការអភិវឌ្ឍន៍ក្នុងតំបន់។ តាមប្រភពខាងលើ អង្គប្រជុំបានបង្ហាញពីសុន្ទរកថារបស់ ARMAC ក្រសួងការបរទេសនៃសាធារណៈរដ្ឋប្រជាមានិតចិន និងអគ្គលេខា ធិការអាស៊ាន ដែលបានគូសបញ្ជាក់អំពីរណសិរ្សរួបរួមក្នុងការដោះស្រាយផលប៉ះពាល់មនុស្ស និងសេដ្ឋកិច្ចសង្គមនៃគ្រាប់មីន និងសំណល់ជាតិផ្ទុះពីសង្គ្រាម(ERW) នៅទូទាំងតំបន់។ នៅក្នុងសុន្ទរកថាស្វាគមន៍របស់លោកស្រី ប៊ុត រ័ត្នណា នាយិការប្រតិបត្តិនៃARMACបានឆ្លុះបញ្ចាំងពីតម្លៃមនុស្សយ៉ាងជ្រាលជ្រៅនៃការបំពុលមីន/ ERW និងបញ្ជាក់សារជាថ្មីអំពីគោលបំណងមនុស្សធម៌រួមគ្នារបស់តំបន់។ លោកស្រីបានកត់សម្គាល់ថា កិច្ចខិតខំប្រឹងប្រែងរួមគ្នារបស់អាស៊ាន គឺឈរលើមូលដ្ឋាននៃសេចក្តីថ្លៃថ្នូរ និងសុវត្ថិភាពរបស់ប្រជាជន ដោយបញ្ជាក់ថា៖ សព្វថ្ងៃនេះ យើងប្រមូលផ្តុំមិនត្រឹមតែជាស្ថាប័នប៉ុណ្ណោះទេ ប៉ុន្តែជាសហគមន៍មួយដែលរួបរួមគ្នាក្នុងគោលបំណងមនុស្សធម៌រួមគ្នាមួយគឺដើម្បីសង្គ្រោះជីវិត ស្តារដីធ្លីឡើងវិញ និងលើក តម្កើងសេចក្តីថ្លៃ ថ្នូរ និងសុវត្ថិភាពរបស់ប្រជាជនយើងនៅទូទាំងអាស៊ាន”។ លោកស្រីក៏បានថ្លែងអំណរគុណយ៉ាងស្មោះស្ម័គ្រចំពោះរដ្ឋាភិបាលចិនសម្រាប់ការគាំទ្រដ៏យូរអង្វែងរបស់ខ្លួនចំពោះកិច្ចខិតខំប្រឹងប្រែងសកម្មភាពកម្ចាត់មីនរបស់អាស៊ាន ដោយសង្កត់ធ្ងន់ថា៖ ជំនួយដ៏យូរអង្វែងរបស់ប្រទេសចិន តាមរយៈការបណ្តុះបណ្តាល ការផ្តល់ឧបករណ៍ ការដាក់ពង្រាយអ្នកជំនាញ និងការរួមចំណែកផ្នែកហិរញ្ញវត្ថុ បានពង្រឹងសមត្ថភាពជាតិនៅទូទាំងអាស៊ាន និងឆ្លុះបញ្ចាំងពីការប្តេជ្ញាចិត្តដែលចាក់ឫសក្នុងទំនួលខុសត្រូវផ្នែកមនុស្ស ធម៌រួមគ្នា”។ តំណាងឱ្យប្រទេសចិន លោក Liang Guotao ប្រធាននាយកដ្ឋានគ្រប់គ្រងអាវុធនៅក្រសួងការបរទេសបានលើក ឡើងពីការយល់ចិត្ត និងទំនាក់ទំនងយ៉ាងស៊ីជម្រៅរបស់ប្រទេសចិនចំពោះសហគមន៍ដែលរងផលប៉ះពាល់ដោយ សារមីន ដោយកត់សម្គាល់ថាប្រទេសចិននៅតែប្តេជ្ញាចិត្តគាំទ្រប្រទេសអាស៊ានតាមរយៈជំនួយសម្ភារៈ ការបណ្តុះ បណ្តាល និងការណែនាំពីអ្នកជំនាញ។ សូមកត់សម្គាល់៖ ប្រទេសចិនបានត្រៀមខ្លួនរួចជាស្រេចក្នុងការបន្តផ្តល់ការគាំទ្រសម្រាប់ការសម្រេចបាននូវអាស៊ានគ្មានមីន។ គ្រប់គ្រួសារដែលអាចសង់ផ្ទះបានឡើងវិញ ហើយកុមារគ្រប់រូបអាចរស់នៅដោយសុខសាន្តគឺជាផ្លែផ្កានៃកិច្ចខិតខំប្រឹង ប្រែងរួមរបស់យើង»។ នៅក្នុងនោះដែរឯកឧត្តមបណ្ឌិត កៅ គឹមហួន អគ្គលេខា ធិការអាស៊ានបានអះអាងសារជាថ្មីអំពីសារៈសំខាន់ជាយុទ្ធសាស្ត្រនៃសកម្មភាពមីននៅក្នុងរបៀបវារៈនយោបាយ -សន្តិសុខដ៏ទូលំទូលាយរបស់អាស៊ាន។ ឯកឧត្តម បានសង្កត់ធ្ងន់លើតួនាទីដែលកំពុងកើនឡើងរបស់ ARMAC ក្នុងនាមជាមជ្ឈមណ្ឌលឧត្តមភាព និងបានគូសបញ្ជាក់ពីតម្រូវការដើម្បីរក្សាសន្ទុះក្រោមផែនការយុទ្ធសាស្រ្តសហគមន៍នយោបាយ-សន្តិសុខអាស៊ាន ដោយបញ្ជាក់ថា សកម្មភាពមីនមនុស្សធម៌នៅតែបន្តឆ្លុះបញ្ចាំងពីស្មារតីសាមគ្គីភាព និងការទទួលខុសត្រូវរួមរបស់អាស៊ាន។ ឯកឧត្តមក៏បានថ្លែងអំណរគុណចំពោះការគាំទ្រយ៉ាងយក ចិត្តទុកដាក់របស់ប្រទេសចិនចាប់តាំងពីឆ្នាំ 2021។ លោកឯកអគ្គរដ្ឋទូត Shaharuddin bin Onn ប្រធានគណៈ កម្មាធិការដឹកនាំ ARMAC បានគូសបញ្ជាក់បន្ថែមអំពីសកម្មភាពមីនថាជាការវិនិយោគយុទ្ធសាស្ត្រក្នុងសន្តិភាពក្នុងតំបន់ ការអភិវឌ្ឍន៍មនុស្ស និងភាពធន់។បន្ថែមពីនេះ ឯកឧត្តមបានអំពាវនាវឱ្យរដ្ឋសមាជិកអាស៊ាន និងដៃគូនានាបន្តពង្រឹងកិច្ចសហប្រតិបត្តិការ និងបន្តវិធីសាស្រ្តប្រកបដោយភាពច្នៃប្រឌិត និងនិរន្តរភាពស្របតាមចក្ខុវិស័យអាស៊ានឆ្នាំ 2045 ។ សូមជម្រាបថា កិច្ចសន្ទនាបានបង្ហាញពីកម្មវិធីដ៏ទូលំ ទូលាយមួយ រួមទាំងវគ្គសន្ទនាជាយុទ្ធសាស្ត្រស្តីពីការច្នៃ ប្រឌិតកិច្ចសហប្រតិបត្តិការខាងត្បូង-ខាងត្បូង និងការកៀរគរធនធាន។ ផ្ទាំងបច្ចេកទេស និងប្រធានបទស្តីពីវឌ្ឍនភាពក្នុងតំបន់ បច្ចេកវិជ្ជាដែលកំពុងរីកចម្រើន និងការផ្តល់ហិរញ្ញប្បទានប្រកប ដោយនិរន្តរភាព។ និងដំណើរទស្សនកិច្ចសិក្សាទៅ កាន់លេខាធិការដ្ឋានអាស៊ាន ដើម្បីពង្រឹងកិច្ចសហប្រតិបត្តិការស្ថាប័ន និងការយល់ដឹងឆ្លងវិស័យ។ អ្នកចូលរួមបានគូសបញ្ជាក់ពីរបៀបដែលសកម្ម ភាពមីន/ERW រួមចំណែកដោយផ្ទាល់ដល់សន្តិសុខមនុស្ស ជីវភាពរស់នៅការអភិវឌ្ឍរួមបញ្ចូល និងគោលដៅនៃផែនការសហគមន៍នយោបាយ -សន្តិសុខអាស៊ានឆ្នាំ 2025។ដោយពេញមួយកិច្ចសន្ទនា គណៈប្រតិភូបានឆ្លុះបញ្ចាំងពីការ ពិតនៃជីវិតរបស់សហគមន៍ដែលរងផលប៉ះពាល់ដោយសារមីនកុមារមិនអាចលេងបាន កសិករមិនអាចធ្វើស្រែចម្ការ និង គ្រួសារដែលរស់នៅដោយភាពមិនច្បាស់លាស់ ហើយបានបញ្ជាក់សារជាថ្មីថាសកម្មភាពមីននាំមកនូវក្តីសង្ឃឹម ស្ដារឡើងវិញនូវសេចក្តីថ្លៃថ្នូរ និង ធ្វើឱ្យអនាគតប្រកបដោយចីរភាព។ ព្រឹត្តិការណ៍នេះក៏បានលើក ឡើងពីសារៈសំខាន់នៃការបន្តភាពជាដៃគូ ការច្នៃប្រឌិត និងការទទួលខុសត្រូវរួមគ្នាក្នុងការជំរុញវឌ្ឍនភាពឆ្ពោះទៅរកអាស៊ានដែលគ្មានមីន។ ARMAC បានថ្លែងអំណរគុណយ៉ាងជ្រាលជ្រៅដល់រដ្ឋាភិបាលនៃប្រទេសចិនសម្រាប់ការគាំទ្រប្រកបដោយនិរន្តរភាព និងការផ្លាស់ប្តូររបស់ខ្លួន។ ដល់រដ្ឋសមាជិកអាស៊ានទាំងអស់ ដើម្បីសាមគ្គីភាព និងការជឿទុកចិត្តរបស់ពួកគេ។ ជូនចំពោះរាជរដ្ឋាភិបាលកម្ពុជា ក្នុងនាមជាម្ចាស់ផ្ទះនៃលេខាធិការដ្ឋានអចិន្ត្រៃយ៍របស់ ARMAC និងដល់ដៃគូសន្ទនា ទីភ្នាក់ងារអង្គការសហប្រជាជាតិ និងអ្នក ជំនាញបច្ចេកទេស សម្រាប់ការរួមចំណែកសហការរបស់ពួកគេចំពោះបេសកកម្មក្នុងតំបន់រួមគ្នានេះ។ សូមបញ្ជាក់ជូនថា ARMACបង្កើតឡើងដោយមេដឹកនាំអាស៊ានមជ្ឈមណ្ឌលសកម្មភាពកំចាត់មីនក្នុងតំបន់អាស៊ាន (ARMAC) បម្រើជាមជ្ឈមណ្ឌលឧត្តមភាពក្នុងតំបន់សម្រាប់ការសម្របសម្រួល ការផ្លាស់ប្តូរចំណេះដឹង និងជំនួយជនរងគ្រោះ។ បេសកកម្មរបស់វាគឺដើម្បីលើក កម្ពស់អាស៊ានដែលគ្មានមីន សុវត្ថិភាពនិងធន់ ដោយការតម្រឹមសកម្មភាពមីនមនុស្សធម៌ជាមួយ នឹងការអភិវឌ្ឍន៍ប្រកបដោយចីរភាព និងអាទិភាពសន្តិសុខក្នុងតំបន់។ សម្រាប់ព័ត៌មានបន្ថែម សូមចូលទៅកាន់៖ www.aseanmineaction.org (http://www.aseanmineaction.org/)ដោយ ៖ ភា រម្យ