នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្តេចធិបតីនាយករដ្ឋមន្រ្តី សម្តែងមោទកភាព ក្រោយឃើញភ្ញៀវទេសចរណ៍ ចូលទស្សនាអង្គរវត្ត មានសន្ទុះខ្លាំងឡើងវិញ
ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ក្នុងពិធីប្រគល់សញ្ញាបត្រជូនដល់និស្សិតសាកលវិទ្យាល័យ សៅស៍អ៊ីសថ៍អេយសៀ
លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត «យើងទាំងអស់គ្នាបានដឹងហើយថា ការចូលរួមថែរក្សាសិល្បៈវប្បធម៌ដ៏ផូរផង់របស់ជាតិយើងនេះ គឺជាតួនាទីរបស់ពលរដ្ឋគ្រប់ៗគ្នាទាំងអស់»
ឯកឧត្តមសាស្រ្តាចារ្យ ឈាង រ៉ា «ត្រូវឈ្នះលើខ្លួនយើង ដើម្បីយើងឈ្នះលើការងារ មានប្រៀបលើការងារ និងទទួលបានជោគជ័យ»

ព័ត៌មានជាតិ

សមត្ថកិច្ចខេត្តស្វាយរៀងបង្ក្រាបឧក្រិដ្ឋកម្មគ្រឿងជនជាតិវៀតណាម៥នាក់ដកហូតគ្រឿងជិត៥គីឡូនិងអាវុធខ្លី៥ដើមនៅក្រុងបាវិត

2025/02/16 06:52:56 pm        246
Facebook Telegram Linkin
ខេត្តស្វាយរៀង៖សមត្ថកិច្ចបើកកិច្ចប្រតិបត្តិការបង្ក្រាបករណីជួញដូរ រក្សាទុកប្រើប្រាស់ដោយខុសច្បាប់នូវសារធាតុញៀន និងកាន់កាប់រក្សាទុកអាវុធ គ្រាប់រំសេវដោយគ្មានការអនុញ្ញាត្តិ នៅក្រុងបាវិត ខេត្តស្វាយរៀង។បើតាមសមត្ថកិច្ចបានឲ្យដឹងថា៖ដោយអនុវត្តតាមបទបញ្ជាដ៍មុឺងម៉ាត់របស់លោកឧត្តមសេនីយ៍ទោ ពេជ្រ វីរ: ស្នងការនគរបាលខេត្ត និងដឹកនាំបញ្ជាផ្ទាល់ពីលោកឧត្តមសេនីយ៍ត្រី កែវ សុថា ស្នងការរង ទទួលផែនការងារប្រឆាំងគ្រឿងញៀន និងការសម្របសម្រួលផ្ទាល់ពីលោក ឡាយ ជុងហេង ព្រះរាជអាជ្ញារង អមសាលាដំបូងខេត្តស្វាយរៀង កាលពីថ្ងៃទី១៣-១៤ ខែកុម្ភះ ឆ្នាំ២០២៥ កម្លាំងជំនាញផែនការងារប្រឆាំងគ្រឿងញៀនខេត្ត សហការជាមួយកម្លាំងអធិការដ្ឋាននគរបាលក្រុងបាវិត បានបើកប្រតិបត្តិការបង្ក្រាបករណីជួញដូរគ្រឿងញៀន និងកាន់កាប់រក្សាទុកអាវុធដោយខុសច្បាប់ និងបានឃាត់ខ្លួនជនសង្ស័យជាជនជាតិវៀតណាមចំនួន០៥ នាក់។ប្រភពបានបន្តទៀតថា៖ជនជាតិវៀតណាមដែលសមត្ថកិច្ចយើងបានធ្វើការឃាត់រួមមាន៖ ១.ហ្វាម ឌឹកគឿង ប្រុស អាយុ ២៨ ឆ្នាំ២.កាប ឌឹកអាញ់ ប្រុស អាយុ ៣៨ ឆ្នាំ៣.ង្វៀង វ៉ាន់ទូ ប្រុស អាយុ ២១ ឆ្នាំ៤. ង្វៀង វ៉ាន់មិ ប្រុស អាយុ ៣៣ ឆ្នាំ៥.ច្រឹង ដឹកម៉ាន់ ប្រុស អាយុ ២៥ ឆ្នាំហើយសម្ភារ:វត្ថុតាងដែលសមត្ថកិច្ចដកហូតបានរួមមាន៖ - ថ្នាំញៀនប្រភេទកេតាមីន ទម្ងន់ ១៦៩៣,៣៧ក្រាម - ថ្នាំញៀនប្រភេទ អុិចស្តាសុី ទម្ងន់ ២៣៤៣,៩៥ក្រាម - ថ្នាំញៀនប្រភេទមេតំហ្វេតាមីន ទម្ងន់ ៦៣៥,១៦ក្រាម(សរុបសារធាតុញៀនទម្ងន់ ៤៦២៨,៨៩ក្រាម) ៤kg៦២៨,៨៩g- អាវុធខ្លី០៥ ដើម បង់០៥ គ្រាប់៥៤ គ្រាប់- រថយន្ត ០១ គ្រឿង- ម៉ូតូ០២ គ្រឿង-លិខិតឆ្លងដែន ០២ ក្បាល - អត្ត/បណ្ណ័វៀតណាម០១ សន្លឹក- ប្រាក់ដុល្លា 1000$- ប្រាក់ដុង ៤.០០០.០០០ដុង រួមទាំងឧបករណ៍ សម្ភារប្រើប្រាស់គ្រឿងញៀនមួយចំនួនទៀត។បច្ចុប្បន្នជនសង្ស័យរួមជាមួយវត្ថុតាងត្រូវបានកម្លាំងជំនាញនៃស្នងការដ្ឋាននគរបាលខេត្តស្វាយរៀងបញ្ជូនទៅកាន់សាលាដំបូងខេត្តដើម្បីចាត់ការតាមនីតិវិធីច្បាប់។

ក្រុមការងាររាជរដ្ឋាភិបាល ចុះមូលដ្ឋានក្រុងរុនតាឯកតេជោសែន ធ្វើការផ្សព្វផ្សាយពីលទ្ធផលសន្និបាតបក្សដល់សមាជិក

2025/02/16 04:15:30 pm        95
Facebook Telegram Linkin
ក្រុមការងាររាជរដ្ឋាភិបាល ចុះមូលដ្ឋាន ក្រុងរុនតាឯកតេជោ ខេត្ដសៀមរាប នៅថ្ងៃទី១៦ ខែកុម្ភៈ ឆ្នាំ២០២៥នេះ បានធ្វើការផ្សព្វផ្សាយពីលទ្ធផលនៃសន្និបាត គណៈកម្មាធិការកណ្ដាលលើកទី៤៥ អាណត្ដិទី៥ របស់គណបក្សប្រជាជនកម្ពុជា ដល់សមាជិកសមាជិការបស់ខ្លួន នៅសង្កាត់បល្ល័ង្ក ក្រុងរុនតាឯកតេជោសែន ខេត្ដសៀមរាប។លោក អ៊ឹង សុភ័ណ ប្រធានគណបក្សក្រុងរុនតាឯកតេជោសែន ខេត្ដសៀមរាប បានលើកឡើងនូវរបាយការណ៍ ពីសភាពការទូទៅ ការងារគណបក្សឆ្នាំ២០២៤ និងទិសដៅភារកិច្ចឆ្នាំ២០២៥ ដល់សមាជិកសមាជិកាឱ្យបានយល់កាន់តែច្បាស់ដែលគណបក្សប្រជាជនបានអនុវត្ដកន្លងមក។ លោកបានលើកឡើងថា ដើម្បីជំរុញការអនុវត្តកម្មវិធីនយោបាយរបស់គណបក្សសម្រាប់ការកសាង និងការពារមាតុភូមិ ឆ្នាំ២០២៣-២០២៨ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភាឱ្យកាន់តែមានប្រសិទ្ធភាព និងប្រសិទ្ធផលឆ្លើយតបទៅនឹងក្តីសង្ឃឹមទុកចិត្តរបស់ប្រជាជន អង្គការចាត់តាំងគណបក្សគ្រប់ថ្នាក់ គ្រប់ផ្នែក គ្រប់ស្ថាប័ន និងមន្ត្រីគ្រប់រូប ត្រូវយកចិត្តទុកដាក់អនុវត្តនូវទិសដៅភារកិច្ចសំខាន់ៗផងដែរ។ លោកបន្ដថា ទិសដៅការងារទូទៅ ត្រូវពង្រឹងធ្លុងមហាសាមគ្គីជាតិក្រោមបាវចនា ជាតិ សាសនា ព្រះមហាក្សត្រ ការពារយ៉ាងគត់មត់នូវ ឯករាជ្យ អធិបតេយ្យ និងបូរណភាពទឹកដី។ប្ដេជ្ញារថែរក្សា ពង្រឹង និងពង្រីកកិច្ចសហប្រតិបត្តិការជាមួយកង កម្លាំងនៃប្រទេសជាមិត្តជិតខាង ដើម្បីធានានូវសន្តិភាព និងការកសាងតំបន់ព្រំដែនប្រកបដោយមិត្តភាព សាមគ្គីភាព សហប្រតិបត្តិការ និងអភិវឌ្ឍន៍។ លោកថា ការពារដាច់ខាតនូវសន្តិភាព និងស្ថិរភាពនយោបាយ មិនឱ្យកម្លាំងអមិត្តណា ឬក្រុមជ្រុលនិយម ណាមកបង្កកលិយុគបំផ្លាញសន្តិភាព និងសេចក្តីសុខរបស់ប្រជាជនកម្ពុជាបានឡើយ។ ជាមួយគ្នានោះ ក៏ត្រូវអនុវត្តឱ្យបានខ្ជាប់ខ្ជួននូវពាក្យរស្លោក “អរគុណសន្តិភាព ហើយរួមគ្នា លើកកម្ពស់ -វប្បធម៌សន្តិភាព នៅកម្ពុជា ពិសេសការចូលរួមការពារ និងថែរក្សាឱ្យបានដាច់ខាតនូវ “សុខសន្តិភាព» ដែលជាអាយុជីវិតរបស់ជាតិ និងជាគ្រឹះដ៏មានតម្លៃបំផុតសម្រាប់ការអភិវឌ្ឍជាតិ និងភាពសុខ សាន្តរបស់ប្រជាជនកម្ពុជា។នាឱកាសនោះ ឯកឧត្ដម សែម រតនា ប្រធានក្រុមការងារគណបក្សចុះមូលដ្ឋាន ក្រុងរុនតាឯកតេជោសែន បានលើកឡើងនៃលទ្ធផលសន្និបាតគណៈកម្មាធិការកណ្តាលលើកទី៤៥អាណត្តិទី៥ របស់គណបក្សប្រជាជនកម្ពុជាផងដែរ។ ឯកឧត្ដម បានលើកឡើងថា សន្និបាតដែលធ្វើឡើងរយៈពេលពីរថ្ងៃនេះបានសម្រេចការងារជាច្រើន ដូចជា ពិភាក្សា និងអនុម័តរបាយការណ៍ស្តីពី «សភាពការណ៍ទូទៅ និងការងារគណបក្ស ឆ្នាំ២០២៤ និងទិសដៅភារកិច្ច ឆ្នាំ២០២៥»។ បោះឆ្នោតជ្រើសតាំងបំពេញបន្ថែមសមាជិកគណៈអចិន្ត្រៃយ៍នៃគណៈកម្មាធិការកណ្តាល ចំនួន៤រូប។ គាំទ្រទាំងស្រុងរបាយការណ៍បន្ថែមរបស់សម្តេចបវរធិបតី ហ៊ុន ម៉ាណែត អនុប្រធានគណបក្ស និងជានាយករដ្ឋមន្ត្រីនៃព្រះរាជាណាចក្រកម្ពុជាអំពី “ស្ថានការណ៍ទូទៅ ជាពិសេសការងារសេដ្ឋកិច្ច សង្គមបានជ្រួតជ្រាបយ៉ាងស៊ីជម្រៅនូវមតិដឹកនាំដ៏ខ្ពង់ខ្ពស់របស់ សម្តេចតេជោ ហ៊ុន សែន ប្រធានគណបក្ស ស្តីពីទស្សនៈសភាពការណ៍ជាតិ សភាពការណ៍អន្តរជាតិ និងទិសដៅការងារ របស់គណបក្សសម្រាប់រយៈពេលបន្ត។ ឯកឧត្ដមបន្ថែមថា អង្គសន្និបាតបានកត់សម្គាល់ប្រកបដោយមោទនភាពចំពោះសភាពការណ៍ទូទៅក្នុងឆ្នាំ២០២៤ ដែលធានាដល់ដំណើរការអភិវឌ្ឍន៍សេដ្ឋកិច្ច សង្គម និងការរស់នៅដ៏សុខសាន្តរបស់ប្រជាជននៅក្រោមម្លប់នៃសន្តិភាព។ ឯកឧត្ដមបញ្ជាក់ថា អំឡុងពេលនេះ ទោះបីត្រូវជួបការលំបាក ក៏រាជរដ្ឋាភិបាលនីតិកាលទី៧នៃរដ្ឋសភា ដែលជារាជរដ្ឋាភិបាលបន្តវេនរបស់គណបក្សប្រជាជនកម្ពុជា បានបំពេញបេសកកម្មដ៏ឧត្តុង្គឧត្តមជាប្រវត្តិសាស្ត្ររបស់ខ្លួន ដោយជោគជ័យ ក្នុងការដឹកនាំអនុវត្តកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ ដែលបានឆ្លើយតប ទៅនឹងសេចក្តីសង្ឃឹម និងការជឿជាក់របស់ប្រជាជន។ ជាក់ស្តែង សន្តិភាព ស្ថិរភាពនយោបាយ អធិបតេយ្យជាតិ និងបូរណភាពទឹកដី ត្រូវបានរក្សាការពារយ៉ាងគត់មត់, សន្តិសុខ សណ្តាប់ធ្នាប់ និងសុវត្ថិភាពសង្គមមានភាពរឹងមាំ ព្រមជាមួយនឹងការធានាបាននូវស្ថិរភាពម៉ាក្រូសេដ្ឋកិច្ច ស្ថិរភាពហិរញ្ញវត្ថុសាធារណៈ និងស្ថិរភាពនៃជីវភាពរបស់ប្រជាជន៕

សម្តេចកិត្តិព្រឹទ្ធបណ្ឌិត ចាត់ឱ្យសហការីចុះពិនិត្យពីស្ថានភាពរស់នៅដល់ខ្នងផ្ទះ និងផ្តល់​អំណោយ​ដល់ប្រជាជនងាយរងគ្រោះបំផុតចំនួន ៥០គ្រួសារ រស់នៅស្រុកសំរោងទង ខេត្តកំពង់ស្ពឺ

2025/02/16 03:57:54 pm        84
Facebook Telegram Linkin
កំពង់ស្ពឺ៖ បន្ទាប់ពីបានឃើញព័ត៌មានតាមបណ្តាញសង្គម ពីករណីដ៏លំបាករបស់គ្រួសារលោក សឹង ភឺន អាយុ៧៥ឆ្នាំ ប្រកបមុខរបរឡើងត្នោត ប្រពន្ធអាយុ៥៣ឆ្នាំ មានជំងឺប្រចាំកាយ ព្រមទាំងមានកូនប្រុសម្នាក់មានជំងឺខ្សោយសតិពីកំណើតផងនោះ នៅថ្ងៃអាទិត្យ ទី១៦ ខែកុម្ភៈ ឆ្នាំ២០២៥នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យលោកជំទាវ ម៉ែន នារីសោភ័គ អគ្គលេខាធិការរងទី១ និងសហការី រួមជាមួយមន្ត្រីប្រតិបត្តិសាខាកាកបាទក្រហមកម្ពុជា ខេត្តកំពង់ស្ពឺ ចុះសួរសុខទុក្ខ និងនាំយកអំណោយមនុស្សធម៌ជូនដល់គ្រួសារខាងលើ រស់នៅភូមិត្រពាំងត្រាវ ឃុំរឡាំងគ្រើល ស្រុកសំរោងទង ខេត្តកំពង់ស្ពឺ។អំណោយផ្តល់ជូនគ្រួសារខាងលើនេះ រួមមាន អង្ករ១០០គ្រួសារ, មី៤កេស, ត្រីខ៤០កំប៉ុង, ទឹកស៊ីអ៊ីវ ៤យួរ, ឃីត (មុង ភួយ សារុង ក្រមា) ២កញ្ចប់ និងថវិកា ១លានរៀល។អនុវត្តតាមអនុសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏បានណែនាំដល់ លោកជំទាវ ម៉ែន នារីសោភ័គ ចុះពិនិត្យស្ថានភាពជាក់ស្តែងតាមខ្នងផ្ទះរបស់ប្រជាជន ដែលរស់នៅក្នុងភូមិចំនួន៥ នៃឃុំរឡាំងគ្រើល ស្រុកសំរោងទង ខេត្តកំពង់ស្ពឺ ទើបមើលឃើញថានៅទីនេះ មានប្រជាជនងាយរងគ្រោះបំផុត ដែលជាចាស់ឥតទីពឹង ជនពិការ និងគ្រួសារមានកូនច្រើន ចំនួន ៤៩គ្រួសារទៀត ហេតុនេះហើយ កាកបាទក្រហមកម្ពុជា ក៏បានដោះស្រាយផ្តល់ជូនអំណោយមនុស្សធម៌ជាគ្រឿងឧបភោគបរិភោគ សម្ភារប្រើប្រាស់ និងថវិកាមួយចំនួនដល់គ្រួសារងាយរងគ្រោះបំផុតទាំងអស់នោះផងដែរ។សូមជម្រាបជូនថា ក្នុងឱកាសចុះសួរសុខទុក្ខនោះ លោកជំទាវ អគ្គលេខាធិការរងទី១ បាននាំនូវប្រសាសន៍ផ្តាំផ្ញើសួរសុខទុក្ខ ក្តីនឹករលឹកពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនចំពោះបងប្អូនប្រជាពលរដ្ឋទាំងអស់ ជាពិសេសនាំនូវការផ្តាំផ្ញើដល់គ្រួសារនីមួយៗត្រូវយកចិត្តទុកដាក់ គិតគូរពីបញ្ហាសុខភាព សម្អាតបរិស្ថានជុំវិញផ្ទះឱ្យបានស្អាតល្អ, ត្រូវបរិភោគទឹកឆ្អិន, ត្រូវកាត់បន្ថយអាហារដែលមានជាតិប្រៃពេក ផ្អែមពេក ខ្លាញ់ពេក ដែលនាំឱ្យមានជំងឺទឹកនោមផ្អែម ជំងឺមហារីក និងជំងឺបេះដូងសរសៃឈាមជាដើម។ ជាមួយគ្នានេះ លោកជំទាវ ក៏បានក្រើនរំលឹកដល់ប្រជាពលរដ្ឋទាំងអស់ សូមចូលរួមជាមួយអាជ្ញាធរមូលដ្ឋានដើម្បីលុបបំបាត់គ្រឿងញៀន គ្រឿងស្រវឹង ក្មេងទំនើងនៅក្នុងភូមិដែលខ្លួនរស់នៅ ហើយសូមអាណាព្យាបាលទាំងអស់បញ្ជូនកូនៗទៅសាលារៀនឱ្យបានគ្រប់ៗគ្នា រៀនសូត្រឱ្យបានខ្ពង់ខ្ពស់ដើម្បីមានចំណេះដឹង មានការងារធ្វើ និងជួយលើកស្ទួយជីវភាពគ្រួសាររៀងៗខ្លួន៕

សម្ដេចធិបតី ហ៊ុន ម៉ាណែត ជួយកម្លាំងដោះមីន ២១០ នាក់ដែលប៉ះពាល់ពីការកាត់ជំនួយ​អាមេរិកឱ្យបន្តការងារធម្មតា

2025/02/16 03:46:44 pm        159
Facebook Telegram Linkin
ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក មជ្ឈមណ្ឌលសកម្មភាពកំចាត់មីនកម្ពុជា ស៊ីម៉ាក់ បានបញ្ជាក់ថា សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជាបានយកចិត្តទុកដាក់ និងបន្តគាំទ្រជួយដល់កម្លាំងដោះមីន ២១០ នាក់ដែលរងផលប៉ះពាល់ពីការកាត់ជំនួយរបស់សហរដ្ឋអាមរិកឱ្យនៅបន្តការងារធម្មតា។ តាមរយៈបណ្ដាញសង្គមហ្វេសប៊ុកកាលពីថ្ងៃទី១៥ ខែកុម្ភៈ ឆ្នាំ២០២៥នេះ ក្នុងឱកាសជួបសំណេះសំណាលផ្សព្វផ្សាយអំពីការកែសំរួលកម្លាំង និងបុគ្គលិកស្ថិតនៅក្រោមគម្រោងជំនួយរបស់សហរដ្ឋអាមេរិកដែលគាំទ្រមកអង្គភាពស៊ីម៉ាក់ ២០២៥ នៅកងឯកភាពកំចាត់មីនទី៥ ខេត្តត្បូងឃ្មុំ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក ស៊ីម៉ាក់ បានបញ្ជាក់ថា៖«ខ្ញុំបានបញ្ជាក់ជូនកងកម្លាំងទាំងអស់ជ្រាបច្បាស់ថា សម្តេចមហាបវរធិបតី ប្រមុខរាជរដ្ឋាភិបាលបានយកចិត្តទុកដាក់និងបន្តគាំទ្រពេញទំហឹងអនុញ្ញាតិឱ្យអង្គភាព CMAC រៀបចំនិងកែសម្រួលកម្លាំងចំនួន២១០នាក់ ដែលបានរងផលប៉ះពាល់ដោយសារការផ្អាកនិងកាត់រំសាយក្នុងគម្រោងជំនួយសហរដ្ឋអាម៉េរិកនេះ នៅបន្តភារកិច្ចរបស់ខ្លួនក្នុងអង្គភាពជាធម្មតា ដើម្បីបន្តអនុវត្តន៍កិច្ចប្រតិបត្តិការបោសសម្អាតគ្រាប់មីន និងសំណល់យុទ្ធភណ្ឌសង្គ្រាមជូនប្រជាពលរដ្ឋតាមសំនូមពរ»។ ក្នុងឱកាសនោះ ឯកឧត្តម ហេង រតនា ក្នុងនាមថ្នាក់ដឹកនាំ និងមន្ត្រីបុគ្គលិកអង្គភាព CMACទាំងមូល សូមគោរពថ្លែងអំណរគុណចំពោះសម្តេចមហាបវរធិបតី នាយករដ្ឋមន្រ្ដី ដែលតែងតែគិតគូរនិងដោះស្រាយបញ្ហាប្រឈមនានារបស់ប្រជាពលរដ្ឋ ក៏ដូចជាមន្រ្ដីដោះមីននៅអង្គភាពស៊ីម៉ាក់ផងដែរ។ យោងតាមសេចក្ដីប្រកាសព័ត៌មានរបស់អង្គភាពស៊ីម៉ាក់កាលពីថ្ងៃទី១៣ ខែកុម្ភៈនេះ បានឱ្យដឹងថា ការប្រកាសផ្អាកជំនួយភ្លាមៗរបស់រដ្ឋាភិបាលសហរដ្ឋអាមេរិកចាប់ពីថ្ងៃទី២៥ ខែមករា ឆ្នាំ២០២៥ ដែលមានរយៈពេល៨៥ថ្ងៃ បានធ្វើឲ្យប៉ះពាល់ដល់កម្លាំងប្រតិបត្តិការមួយចំនួនរបស់អង្គភាពស៊ីម៉ាក់ ដែលគាំទ្រ ដោយអង្គការជាដៃគូ ដែលបានទទួលថវិកាជំនួយពីរដ្ឋាភិបាលសហរដ្ឋអាមេរិក តាមរយៈក្រសួងការបរទេស សហរដ្ឋអាមេរិក។ ការផ្អាកជំនួយពីអង្គការជាដៃគូចំនួន៣ មានថវិកាចំនួនប្រមាណ២លាន ដុល្លារក្នុងមួយឆ្នាំ បានធ្វើឲ្យប៉ះពាល់ដល់កម្លាំងជំនាញបច្ចេកទេសអង្គភាពស៊ីម៉ាក់ចំនួន ២១០ នាក់ ដែលកំពុង បំពេញការងារបោសសម្អាតគ្រាប់យុទ្ធភណ្ឌមិនទាន់ផ្ទុះសំណល់សង្គ្រាមស្ថិតក្នុងខេត្តកំពង់ចាម ក្រចេះ ស្ទឹងត្រែង មណ្ឌលគីរី រតនគិរី ត្បូងឃ្មុំ ស្វាយរៀង សូមបញ្ជាក់ថា កម្លាំងប្រតិបត្តិការបស់អង្គភាពCMAC មានចំនួនប្រមាណ៩២% បន្ត ដំណើរការប្រតិបត្តិការជាធម្មតា ដែលកម្លាំងទាំងនេះគាំទ្រដោយរាជរដ្ឋាភិបាលកម្ពុជា និងប្រទេសផ្តល់ជំនួយ មានដូចជា ជប៉ុន ចិន អាឡឺម៉ង់ CMA/UNDP (គាំទ្រដោយរដ្ឋាភិបាលកូរ៉េខាងត្បូង អូស្ត្រាលី កាណាដា និង ណូវែលហ្សឺឡង់) អង្គការJMAS អង្គការNPA អង្គការAPOPO និងអង្គការMAG៕

អាជ្ញាធរជាតិអប្សរានឹងរៀបចំពិធីសាសនា អបអរខួប៣០ឆ្នាំ​នៃការបង្កើតអាជ្ញាធរ​ជាតិអប្សរា នៅថ្ងៃទី១៩ ខែកុម្ភៈ ឆ្នាំ២០២៥

2025/02/16 03:40:23 pm        93
Facebook Telegram Linkin
ឯកឧត្តមបណ្ឌិត ហង់ ពៅ អគ្គនាយកអាជ្ញាធរជាតិអប្សរា មានប្រសាសន៍ថា ឆ្នាំនេះជាខួបទី៣០ឆ្នាំ នៃការបង្កើត អាជ្ញាធរដើម្បីការពាររមណីយដ្ឋាន និងរៀបចំតំបន់អង្គរ ហៅកាត់ថា «អាជ្ញាធរជាតិអប្សរា» គឺថ្ងៃទី១៩ ខែកុម្ភៈ ឆ្នាំ១៩៩៥-១៩ ខែកុម្ភៈ ឆ្នាំ២០២៥។ ដើម្បីអបអរខួបទី៣០នេះ អាជ្ញាធរជាតិអប្សរា នឹងរៀបចំពិធីសាសនា ដូចជាពិធីរាប់បាត្រព្រះសង្ឃ ១៣០ អង្គ នៅបរិវេណប្រាសាទបាយ័ន។ថ្លែងនៅក្នុងសន្និសីទសារព័ត៌មាននៅរសៀលថ្ងៃទី១៥ ខែកុម្ភៈ នៅខាងមុខប្រាសាទអង្គរវត្ត ឯកឧត្តម ហង់ ពៅ បានរំឭកពីការបង្កើតស្ថាប័នអាជ្ញាធរជាតិអប្សរានៅឆ្នាំ១៩៩៥ និងតួនាទីសំខាន់ៗ​ដើម្បីគ្រប់គ្រង ការពារ និងអភិរក្សតំបន់រមណីយដ្ឋានអង្គរ រហូតមានការអភិវឌ្ឍរហូតដល់សព្វថ្ងៃ។ ភាពល្បីល្បាញរបស់រមណីយ​ដ្ឋាន​អង្គរ បានទាក់ទាញទេសចរអន្តរជាតិ និងជាតិ ជាច្រើនមកទស្សនា តំបន់បេតិកភណ្ឌមួយនេះ គឺមកម្ដងហើយចង់មកម្ដងទៀតដោយគិតតចាប់ពីឆ្នាំ២០០០មក រមណីយដ្ឋានអង្គរ ទទួលបានទេសចរអន្តរជាតិចូលមកទស្សនាប្រមាណ ២៨លាននាក់។ ជាមួយគ្នានេះ មានឥស្សរជនជាតិខ្ពស់ជាច្រើនរូប បានមកទស្សនាតំបន់រមណីយដ្ឋានអង្គរផងដែរ រាប់ទាំងព្រះមហាក្សត្រ ប្រធានាធិបតី នាយករដ្ឋមន្រ្តី ប្រធានស្ថាប័នអន្តរជាតិធំៗ តារាសម្ដែង និងតារាចម្រៀង។ ពួកគេទាំងនោះ បានចំណាយពេលដើម្បីចង់សិក្សាស្វែងយល់​ពីភាពល្បីល្បាញ​នៃអាណាចក្រអង្គរ ទាំងពេលអតីតកាល និងបច្ចុប្បន្ន។ ក្រៅពីនេះ ឯកឧត្តមអគ្គនាយក បានរំឭកពីកិច្ចការងារជាច្រើនដែលអាជ្ញាធរជាតិអប្សរាបានធ្វើកន្លងមក ទាំងការងារអភិរក្សប្រាសាទ ទឹក ព្រៃឈើ សហគមន៍ ទេសចរណ៍ និងថែរក្សាមរតករូបី និងអរូបី។ល។ ធ្វើយ៉ាងណាឱ្យតំបន់នេះនៅតែរក្សាបាននូវកិត្តិនាមជារមណីយដ្ឋានបេតិកភណ្ឌមានជីវិត មានន័យថា ទាំងប្រាសាទ និងមនុស្ស អាចរស់នៅជាមួយគ្នាជាដរាប។ឯកឧត្តម​ក៏មិនភ្លេចរំឭកពីការចូលរួមរបស់ស្ថាប័ន និងអ្នកជំនាញការអន្តរជាតិ ដែលបានចូលរួម​នាពេលកន្លងមក និងបានបណ្ដុះបណ្ដាលធនធានជាតិជាច្រើន ឱ្យមានភាពម្ចាស់ការលើកិច្ចការពារ មរតកវប្បធម៌ជាតិខ្លួនឯង៕

សម្តេចរដ្ឋសភាធិបតី ឃួន សុដារី៖ សម្តេចតេជោ ហ៊ុន សែន ចាត់ទុកស្រ្តីជាឆ្អឹងខ្នងសេដ្ឋកិច្ច ចំណែកសម្តេចធិបតី ហ៊ុន ម៉ាណែត លើកឡើងថាពិភពលោកកាន់តែស្រស់បំព្រងកាលបើមានការចូលរួមរបស់ស្រ្តីក្នុងតួនាទីសម្រេចចិត្តកាន់តែច្រើន

2025/02/16 03:20:02 pm        96
Facebook Telegram Linkin
សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានិងជាប្រធានក្រុមចលនាស្រ្តីនៃក្រុមការងារគណបក្សចុះមូលដ្ឋានខេត្តកណ្តាល បានមានប្រសាសន៍ថា គណបក្សប្រជាជនកម្ពុជាតែងតែយកចិត្តទុកដាក់លើកកម្ពស់សមភាពយេនឌ័រនិងការផ្តល់ភាពអង់អាចជូនស្រ្តីនិងកុមារីជានិច្ច នៅក្នុងនោះ សម្តេចអគ្គមហាសេនាបតីតេជោ ហ៊ុន សែន បានចាត់ទុកស្រ្តីជាឆ្អឹងខ្នងនៃសេដ្ឋកិច្ច។ ជួយស្រ្តីគឺជួយខ្លួនឯង។ ចំណែកសម្តេចមហាបវរធិបតី ហ៊ុន ម៉ាណែត វិញបានលើកឡើងថា ពិភពលោកកាន់តែស្រស់បំព្រងបើមានការចូលរួមរបស់ស្រ្តីក្នុងតួនាទីជាអ្នកសម្រេចចិត្តកាន់តែច្រើននោះ។សម្តេចរដ្ឋសភាធិបតី ឃួន សុដារី បានលើកឡើងដូច្នេះ កាលពីព្រឹកថ្ងៃសៅរ៍ ទី១៥ ខែកុម្ភៈ ឆ្នាំ២០២៥ ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីប្រកាសសេចក្តីសម្រេចបែងចែកសមាសភាពក្រុមការងារចលនាស្រ្តីស្រុកពញាឮ ខេត្តកណ្តាល នៅទីស្នាក់ការគណបក្សស្រុកពញាឮ ដែលមានសមាជិកចូលរួមជិត៣០០នាក់។នៅក្នុងឱកាសដ៏មហោឡារិកនោះ ចលនាស្រ្តីគណបក្សប្រជាជនកម្ពុជាស្រុកពញាឮ ក៏ដូចជានៅទូទំាងខេត្តកណ្តាល បានប្រកាសថ្កោលទោសយ៉ាងដាច់អហង្ការលើគម្រោងស្មោកគ្រោក ដែលជាសកម្មភាពភេរវកម្មរបស់ក្រុមជ្រុលនិយមក្នុងការប្រើប្រាស់ដ្រូនប៉ុនប៉ងធ្វើឃាត សម្តេចតេជោ ហ៊ុន សែន និងក្រុមគ្រួសារ។ សកម្មភាពដ៏ថោកទាប ខ្មៅកខ្វក់ គ្មានសាសនានេះ ជាការប្រមាថដ៏ធ្ងន់ធ្ងរលើអាយុជីវិតឥស្សរជនថ្នាក់ដឹកនាំកំពូលរបស់ជាតិមិនអាចអត់ឱនបានឡើយ។ សកម្មភាពឆ្កួតលីលានេះ នឹងឈានដល់ការបំផ្លាញសុខសន្តិភាព ស្ថិរភាពនិងការភិវឌ្ឍរបស់ប្រទេសជាតិ ជាពិសេសនឹងទាញសង្គមជាតិឱ្យធ្លាក់ចូលក្នុងភ្លើងសង្រ្គាមសាជាថ្មី។ បន្ទាប់ពីបានស្តាប់របាយការណ៍ស្វាគមន៍ ក៏ដូចជាការអានសេចក្តីសម្រេចស្តីពីការបែងចែកសមាសភាពក្រុមការងារចលនាស្រ្តីនៃក្រុមការងារគណបក្សចុះមូលដ្ឋានខេត្តកណ្តាល ទទួលបន្ទុកស្រុកពញឮ និងការបេ្តជ្ញាចិត្តរបស់ ប្រធានក្រុមការងារចលនាស្រ្តីនៃក្រុមការងារគណបក្សចុះមូលដ្ឋានស្រុកពញាឮ រួចមក សម្តេចរដ្ឋសភាធិបតី ឃួន សុដារី បានអញ្ជើញមានប្រសាសន៍សំណេះសំណាលទៅកាន់អង្គពិធី ដោយបានលើកពីទិសដៅការងារដែលត្រូវអនុវត្តបន្ត ព្រមទំាងបានផ្តល់អនុសាសន៍ល្អៗមួយចំនួនជូនក្រុមការងារដើម្បីយកទៅអនុវត្តឱ្យកាន់តែទទួលបានលទ្ធផលល្អ ស្របតាមគោលនយោបាយនិងផែនការរបស់គណបក្ស។នៅក្នុងឱកាសនេះ សម្តេចរដ្ឋសភាធិបតី ឃួន សុដារី ក៏បានពាំនាំការផ្តាំផ្ញើសាកសួរសុខទុក្ខនិងក្តីនឹករលឹកពីសំណាក់ សម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទំាង សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនសមាជិកអង្គពិធីទំាងមូលផងដែរ។ សម្តេចរដ្ឋសភាធិបតី បានវាយតម្លៃខ្ពស់ចំពោះលទ្ធផលការងារដែលក្រុមការងារស្រ្តី ក៏ដូចជាគណបក្សប្រជាជនកម្ពុជាស្រុកពញាឮទំាងមូល សម្រេចបាននាពេលកន្លងមក។ សម្តេចរដ្ឋសភាធិបតី ក៏បានលើកឡើងពីលទ្ធផលនៃសន្និបាតគណៈកម្មាធិការកណ្តាលលើកទី៤៥អាណត្តិទី៥របស់គណបក្សប្រជាជនកម្ពុជា ដែលបានវាយតម្លៃខ្ពស់ចំពោះសមិទ្ធផលធំៗ ថ្មីៗ ដែលរាជរដ្ឋាភិបាលសម្រេចបាន។សម្តេចប្រធានរដ្ឋសភានិងជាតំណាងរាស្រ្តមណ្ឌលខេត្តកណ្តាលផងនោះ បានគូសបញ្ជាក់ថា រាជរដ្ឋាភិបាល ក្រោមការដឹកនាំប្រកបដោយឧត្តមគតិ ស្វាហាប់ ឈ្លាសវៃ ហ្មត់ចត់ ប៉ិនប្រសប់និងការប្តេជ្ញាចិត្តយ៉ាងមុតស្រួចរបស់ សម្តេចធិបតី ហ៊ុន ម៉ាណែត នាយករដ្ឋមន្រ្តី បន្តជ្រោងទង់ បង្កើតសមិទ្ធផលថ្មីៗ ជូនសង្គមជាតិ ដូចជាការការធានាបានយ៉ាងប្រសើរនូវសុខសន្តិភាព ស្ថិរភាពនយោបាយ សន្តិសុខនិងសណ្តាប់ធ្នាប់សាធារណៈ។ ធានាបាននូវបរិស្ថានម៉ាក្រូសេដ្ឋកិច្ច ប្រកបដោយស្ថិរភាពនិងភាពអនុគ្រោះសម្រាប់សម្មភាពអាជីវកម្មនិងការរស់នៅរបស់ប្រជាជន។ បានទាក់ទាញការវិនិយោគនិងការជំរុញលើកកម្ពស់សកម្មភាពធុរកិច្ចក្នុងប្រទេស ការបន្តផ្តោតការយកចិត្តទុកដាក់ ជាពិសេសលើការអភិវឌ្ឍធនធានមនុស្សដែលជាអាទិភាពទី១ នៃយុទ្ធសាស្រ្តបញ្ចកោណដំណាក់កាលទី១។ ការបន្តវិនិយោគលើហេដ្ឋារចនាសម្ព័ន្ធរួមបញ្ចូលនូវផ្លូវ ទឹក ភ្លើងនិងប្រព័ន្ធឌីជីថល។ ការកែទម្រង់អភិបាលកិច្ចនិងស្ថាប័នសំដៅលើកកម្ពស់គុណភាពនិងប្រសិទ្ធភាពនៃសេវាសាធារណៈជាដើម។សម្តេចរដ្ឋសភាធិបតី ឃួន សុដារី បានគូសបញ្ជាក់ថា ជាង៤០ឆ្នាំមកនេះ សម្តេចតេជោ ហ៊ុន សែន បានលះបង់សាច់ស្រស់ឈាមស្រស់ដោយមិនខ្លាចការនឿយហត់ ជម្នះរាល់ឧបសគ្គ យកអាយុជីវិតទៅប្តូរដើម្បីសុខសន្តិភាពនិងការអភិវឌ្ឍជូនប្រជាពលរដ្ឋ។ ដូចគ្នានេះក្រោមការដឹកនាំរបស់ សម្តេចធិបតី ហ៊ុន ម៉ាណែត ដែលជាមគ្គទេសក៍បន្តវេន កំពុងបន្តជ្រោងទង់រក្សាសុខសន្តិភាព ស្ថិរភាពសង្គមនិងការអភិវឌ្ឍបង្កើតសមិទ្ធផលថ្មីៗជាច្រើនជូនប្រទេសជាតិជាបន្តទៀតក្នុងការនាំកម្ពុជាឆ្ពោះទៅកាន់ប្រទេសមានចំណូលមធ្យមកម្រិតខ្ពស់នៅឆ្នាំ២០៣០និងប្រទេសមានចំណូលខ្ពស់នៅឆ្នាំ២០៥០។សូមជម្រាបថាក្រុមការងារចលនាស្រ្តីនៃក្រុមការងារគណបក្សចុះមូលដ្ឋានស្រុកពញាឮ ជាជំនួយការឱ្យក្រុមការងារគណបក្សចុះមូលដ្ឋានខេត្តនិងក្រុមការងារចលនាស្រ្តីនៃក្រុមការងារគណបក្សចុះមូលដ្ឋានខេត្ត ដែលមានតួនាទីជាជំនួយការឱ្យគណៈកម្មាធិការគណបក្សស្រុក និងក្រុមការងារចលនាស្រ្តីគណបក្សខេត្តក្នុងការសម្របសម្រួលនិងជំរុញការអនុវត្ត ភារកិច្ចរបស់ក្រុមការងារចលនាស្រ្តី បណ្តាញស្រ្តីគ្រប់ថ្នាក់ដើម្បីធានាបាននូវសុខដុមនីយកម្មការងារចលនាស្រ្តីក្រោមការដឹកនាំរបស់គណបក្ស។ បន្ទាប់ពីបានលើកឡើងពីការងារសំខាន់ៗដែលក្រុមការងារចលនាស្រ្តីគណបក្សស្រុកត្រូវអនុវត្តហើយ សម្តេចរដ្ឋសភាធិបតី បានផ្តល់អនុសាសន៍ចំនួន៦ចំនុចដល់ក្រុមការងារមានដូចជា៖១- បន្តសហការជាមួយគណបក្សនិងក្រុមការងារគណបក្សមូលដ្ឋានស្រុកពញាឮ ក្នុងការអនុវត្តសកម្មភាពជួយសហគមន៍ លើកកម្ពស់សិទ្ធិស្រ្តី សុខុមាលភាពស្រ្តី និងសុខភាពមាតានិងទារក។ ២- កសាងផែនការសកម្មភាពផ្អែកតាមសេចក្តីសម្រេចចិត្ត គោលការណ៍ណែនាំទិសដៅការងារគណបក្សនិងក្រុមការងារគណបក្សនិងស្របតាមផែនការទិសដៅការងារចលនាស្រ្តីនៃក្រុមការងារគណបក្សចុះមូលដ្ឋានខេត្តនិងក្រុមការងារចលនាស្រ្តីគណបក្សខេត្ត។៣- បន្តផ្សព្វផ្សាយអំពីគោលនយោបាយរបស់គណបក្ស និងច្បាប់របស់រដ្ឋ ដែលពាក់ព័ន្ធសិទ្ធិនិងផលប្រយោជន៍ពលរដ្ឋ ផលប្រយោជន៍ស្រ្តី កុមារ ចាស់ជរា ជនងាយរងគ្រោះជាដើម ។ ៤- រៀបចំបែងចែកភារកិច្ចក្នុងក្រុមការងារចលនាស្រ្តីនៃក្រុមការងារគណបក្ស ចុះមូលដ្ឋានស្រុកឱ្យទទួលបន្ទុកតាមឃុំ ភូមិច្បាស់លាស់។ សហការចូលរួមជំរុញការអនុវត្ត គោលនយោបាយ ភូមិ ឃុំ មានសុវត្ថិភាព។ ៥- ខិតខំពង្រឹងពង្រីកសមាជិកគណបក្សឱ្យបានច្រើននិងប្រកបដោយគុណភាព ពោលគឺសមាជិកគណបក្សមួយរូប សន្លឹកឆ្នោតមួយសន្លឹកនិងជាពិសេសត្រូវពង្រឹងសាមគ្គីភាព ឯកភាពផ្ទៃក្នុងឱ្យបានរឹងមាំ។ បន្តខិតខំពង្រឹងពង្រីកសមាជិកគណបក្សឱ្យបានច្រើននិងប្រកបដោយគុណភាព ពោលគឺសមាជិកគណបក្សមួយរូប សន្លឹកឆ្នោតមួយសន្លឹក។ ៦- ពង្រឹងសាមគ្គីភាព ឯកភាពផ្ទៃក្នុងឱ្យបានរឹងមាំ អនុវត្តរបបប្រជុំនិងរាយការណ៍ឱ្យបានទៀងទាត់។ ជាមួយគ្នានេះ សកម្មជនក្រុមការងារទំាងអស់ត្រូវហ៊ានវាយបក និងធ្វើបដិឃោសនាដើម្បីទប់ស្កាត់ឱ្យបានទាន់ពេលវេលានូវរាល់ការញុះញង់ បំភៃ្លសភាពការណ៍របស់ពួកអគតិ ជ្រុលនិយមទំាងនៅក្នុងនិងក្រៅប្រទេស ដែលជានិច្ចកាលតែងតែខិតខំរិះរកបង្កើតនូវព្រឹត្តិការណ៍ និងពង្រីកព្រឹត្តិការណ៍ឱ្យមានភាពច្របូកច្របល់ ប៉ះពាល់ដល់ស្ថិរភាព និងការអភិវឌ្ឍរបស់សង្គមជាតិ៕

ឯកឧត្តម ហ៊ុន ម៉ានី រំឭកប្រសាសន៍សម្តេចតេជោ៖«អ្នកជំនាន់មុនស្វែងរក និងនាំមកនូវសន្តិភាព ហើយអ្នកជំនាន់ក្រោយជាអ្នកថែរក្សា ការពារសុខសន្តិភាព»

2025/02/16 02:50:08 pm        84
Facebook Telegram Linkin
កំពង់ស្ពឺ៖ ឯកឧត្តម ហ៊ុន ម៉ានី សមាជិកគណៈអចិន្រ្តៃយ៍គណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តកំពង់ស្ពឺ បានអញ្ជើញប្រកាសបញ្ចូលថ្មី សមាជិក សមាជិកា គណបក្សប្រជាជនកម្ពុជា ក្នុងឃុំព្រះនិពា្វន ស្រុកគងពិសី ខេត្តកំពង់ស្ពឺ។ពិធីនេះបានប្រព្រឹត្តទៅនៅថ្ងៃទី១៥ ខែកុម្ភៈ ឆ្នាំ២០២៥ នៅស្នាក់ការគណបក្សឃុំ ព្រះនិព្វាន ដោយមានវត្តមានចូលរួមពីសំណាក់លោក លោកស្រី ក្រុមការងារគណបក្សចុះមូលដ្ឋានស្រុកគងពិសី គណៈកម្មាធិការគណបក្សស្រុកគងពិសី ឃុំព្រះនិព្វាន និងសមាជិកថ្មីសរុប ២១១ នាក់។បន្ទាប់ពីបានស្តាប់នូវរបាយការណ៍ ក៏ដូចជាការប្តេជ្ញាចិត្តរបស់តំណាងសមាជិកចូលថ្មី ឯកឧត្តម ហ៊ុន ម៉ានី បានសម្តែងនូវការកោតសរសើរចំពោះឆន្ទៈ និងភាពក្លាហានរបស់តំណាងសមាជិក សមាជិកា ដែលបានធ្វើការសម្រេចចិត្តដ៏ត្រឹមត្រូវបំផុតក្នុងការចូលរួមជីវភាពនយោបាយជាមួយគណបក្សប្រជាជនកម្ពុជា។ នាឱកាសនោះ ឯកឧត្តមក៏បានរំលេចនូវអត្ថន័យនៃពាក្យសន្តិភាព និងហេតុអ្វីដែលយើងចាំបាច់ត្រូវរំឭកជាប្រចាំ។ក្នុងនោះ ឯកឧត្តមបានរំឭកនូវប្រសាសន៍របស់សម្តេចតេជោ ដែលបានលើកឡើងថា «អ្នកដឹកនាំជំនាន់មុនបានលះបង់សព្វបែបយ៉ាង យកអាយុជីវិតធ្វើជាដើមទុន ដើម្បីស្វែងរក និងនាំមកសុខសន្តិភាពជូនជាតិ រីឯអ្នកដឹកនាំជំនាន់ក្រោយគឺជាអ្នកបន្តការពារថែរក្សាសុខសន្តិភាព ដែលនេះគឺជាគុណតម្លៃនៃពាក្យសន្តិភាព ដែលបានបង្កប់នូវអត្ថន័យ នៃការឆ្លងកាត់ប្រវត្តិសាស្រ្តដ៏ជូរចត់ ការតស៊ូដ៏លំបាកលំបិនទម្រាំមានអ្វីគ្រប់បែបយ៉ាងនាពេលបច្ចុប្បន្ន»។ឯកឧត្តមបានគូសបញ្ជាក់ថា រាជរដ្ឋាភិបាលក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត បានប្ដេជ្ញាចិត្តខ្ពស់ ថែរក្សាសុខសន្តិភាព ស្ថានភាពនយោបាយ និងបន្តកសាងអភិវឌ្ឍប្រទេសជាតិលើគ្រប់វិស័យ ជាពិសេស ការគិតគូរដល់សុខភាព និងសុខុមាលភាពប្រជាពលរដ្ឋ ជាអាទិភាពចម្បងរបស់រាជរដ្ឋាភិបាល។ក្នុងនោះ ដើម្បីគាំទ្រការអនុវត្តកម្មវិធីនយោបាយ និងវិធានការគន្លឺះទាំងឡាយ រាជរដ្ឋាភិបាលបានជំរុញការយកចិត្តទុកដាក់លើការពង្រឹងលើវិស័យសុខាភិបាល និងវិស័យអប់រំ ដែលជាអាទិភាពមួយក្នុងចំណោមអាទិភាពជាច្រើនរបស់ខ្លួន។ ជាចុងបញ្ចប់ សារជាថ្មីម្តងទៀត ឯកឧត្តមសូមថ្លែងអំណរគុណ និងកោតសរសើរដល់សមាជិកសមាជិកាទើបចូលថ្មីដែលបានប្តេជ្ញាចិត្តក្នុងការគាំទ្រគណបក្សប្រជាជនកម្ពុជា និងចូលរួមការពារសមិទ្ធផលទាំងឡាយដែលគណបក្សបានកសាងជូនជាតិមាតុភូមិ និងបន្តដឹកនាំប្រទេសជាតិតទៅមុខ។សូមបញ្ជាក់ថា សមាជិក សមាជិកា ដែលត្រូវបានបញ្ចូលថ្មី នៅឃុំព្រះនិព្វាននាឱកាសនេះ រួមមាន កម្មករ ១៤៨នាក់, ប្រជាកសិករ៦នាក់, និងសិស្សនិស្សិត៥៧នាក់ ដែលបានសម្រេចចិត្តចូលរួមជីវភាពនយោបាយជាមួយគណបក្សប្រជាជនកម្ពុជា ដោយបានមើលឃើញពីបេសកកម្មជាប្រវត្តិសាស្រ្ត និងសមិទ្ធផលនានាដែលគណបក្សសម្រេចបានជូនជាតិមាតុភូមិ និងក្រោយពីបានស្វែងយល់ពីគោលនយោបាយរបស់គណបក្សក្នុងការដឹកនាំប្រទេសជាតិ ឆ្ពោះទៅរកការអភិវឌ្ឍ៕

ឯកឧត្តម ស៊ុយ សែម អញ្ជើញធ្វើពិធីពុទ្ធាភិសេក ព្រះពុទ្ធប្បដិមាកម្ពស់ ២៧.៩ ម៉ែត្រ នៅវត្តច័ន្ទរង្សី ខេត្តពោធិ៍សាត់

2025/02/16 02:36:14 pm        208
Facebook Telegram Linkin
ពោធិ៍សាត់៖ព្រះពុទ្ធប្បដិមា ទ្រង់ឈរ កម្ពស់ ២៧.៩ ម៉ែត្រ ក្នុងកាយវិការប្រទានព្រះធម៌ និងប្រទានពរ មានតំលៃជិត៤០ម៉ឺនដុល្លារដែលកសាងដោយឯកឧត្តម ស៊ុយ សែម សមាជិករដ្ឋសភា និងជាអ្នកតំណាងរាស្ត្រមណ្ឌលពោធិ៍សាត់ និងលោកជំទាវ ជា ខេង តម្កល់ទុកជាគរុភ័ណ្ឌក្នុងវិស័យព្រះពុទ្ធសាសនា នៅក្នុងវត្តច័ន្ទរង្សីហៅវត្តរំលេច ស្ថិតក្នុងភូមិប្រឡាយរំដេញ ឃុំរំលេច ស្រុកបាកាន ខេត្តពោធិ៍សាត់ បានកសាងរួចរាល់ជាស្ថាពរហើយ ហើយបានធ្វើពិធីបុណ្យពុទ្ធាភិសេកយ៉ាងអធឹកអធម រយៈពេល០២ថ្ងៃ។ ដោយនៅថ្ងៃទី១ពេលរសៀលមានធ្វើពិធីក្រុងពលី សូត្រមន្តចម្រើនព្រះបរិត្ត ពេលល្ងាចធ្វើពិធីអភិសេកព្រះពុទ្ធប្បដិមា ដោយព្រះសង្ឃ៨០អង្គ ដឹកនាំដោយសម្ដេចព្រះពោធិវ័ង្សកិត្តិបណ្ឌិត ណយ ច្រឹក សម្ដេចព្រះសង្ឃនាយករងទី១គណៈមហានិកាយ នៃព្រះរាជាណាចក្រកម្ពុជា ហើយថ្ងៃទី២ មានការនិមន្តនិងអញ្ជើញចូលរួមពីសម្ដេចព្រះមហាអរិយវង្សបណ្ឌិត យ៉ន សេងយៀត ព្រះសាកលវិទ្យាធិការនៃពុទ្ធិកសាកលវិទ្យាល័យព្រះសីហនុរាជ និងជាព្រះចៅអធិការវត្តឧណ្ណាឡោម, ព្រះព្រហ្មាភិរ័ត្ន កែវ កន ព្រះមេគណខេត្ត, ឯកឧត្តម ខូយ រីដា អភិបាលនៃគណៈអភិបាលខេត្តនិងលោកជំទាវ ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី និងពុទ្ធបរិស័ទ។ឯកឧត្តម ស៊ុយ សែម មានប្រសាសន៍ថា ដោយសេចក្ដីគោរព កតញូតា ចំពោះមាតាបិតា និងជំនឿជ្រះថ្លាយ៉ាងជ្រាលជ្រៅក្នុងព្រះពុទ្ធសាសនា ឯកឧត្តមនិងភរិយាតែងបានចូលរួមចំណែកយ៉ាងសកម្ម តាមលទ្ធភាពនិងធនធានដែលមាន ក្នុងការសាងសង់ព្រះវិហារ ឧបដ្ឋានសាលា និងហេដ្ឋារចនាសម្ព័ន្ធបម្រើឲ្យព្រះពុទ្ធសាសនា នៅតាមទីវត្តអារាមនានាជាច្រើនក្នុងខេត្តពោធិ៍សាត់ ដែលជាខេត្តកំណើតរបស់ខ្លួន។ សមិទ្ធិផលទាំងអស់នេះ បានចូលរួមជាមួយរាជរដ្ឋាភិបាលនិងពុទ្ធសាសនិកទាំងអស់ ក្នុងការជម្រុញអភិវឌ្ឍនិងលើកកម្ពស់សេចក្ដីចម្រើនរុងរឿងនៃព្រះពុទ្ធសាសនា និងសេចក្ដីសុខ សុភមង្គល របស់ប្រជារាស្ត្រខ្មែរ ក្រោមម្លប់នៃសន្តិភាពនិងការឯកភាពជាតិដ៍ថ្លៃថ្លាបំផុត។ ឯកឧត្តមបន្តទៀតថា ទន្ទឹមនឹងសមិទ្ធិផលទាំងអស់នោះ ឯកឧត្តមមានបំណងប្រាថ្នាមួយទៀត គឺចង់សាងសង់ព្រះពុទ្ធប្បដិមាទ្រង់ឈរមួយអង្គមុនពេលចូលនិវត្តន៍ ដើម្បីទុកជូនជាមរតកស្ថាបត្យកម្ម ក្នុងព្រះពុទ្ធសាសនាចុងក្រោយរបស់ឯកឧត្តម សម្រាប់ពុទ្ធសាសនិកទាំងអស់ ពិសេសប្រជាពលរដ្ឋខេត្តពោធិ៍សាត់ជំនាន់ក្រោយ។ ដោយមមាញឹកខ្លាំងក្នុងការងារ និងក្នុងការទទួលខុសត្រូវតាមភារកិច្ចប្រគល់ជូនដោយរាជរដ្ឋាភិបាល ឯកឧត្តមពុំមានឱកាសដើម្បីសម្រេចបំណងប្រាថ្នានេះបានសោះ។ គាប់ជូនពេលវេលាមួយក្នុងឱកាសចូលរួមជាអធិបតី ក្នុងពិធីសម្ពោធសមិទ្ធិផលនៅក្នុងវត្តច័ន្ទរង្សីហៅរំលេចនេះ ឯកឧត្តមមានចំណាប់អារម្មណ៍ និងស្រលាញ់ជាប់ចិត្តយ៉ាងខ្លាំង ចំពោះភាពស្រស់ស្អាត បរិស្ថានអនាម័យល្អ និងស្នាមញញឹមរួសរាយរាក់ទាក់ របស់ព្រះសង្ឃនិងប្រជាពលរដ្ឋ ដែលបានមកចូលរួមនៅទីនេះ ឯកឧត្តមនិងភរិយាក៍សម្រេចចិត្តសាងសង់ ព្រះពុទ្ធប្បដិមាទ្រង់ឈរមួយអង្គកម្ពស់២៧.៩ម៉ែត្រ នៅក្នុងវត្តរំលេចនេះតែម្ដង។ បំណងប្រាថ្នារបស់ឯកឧត្តម គឺចង់ឧទ្ទិសស្នាដៃថ្មីនេះ សម្រាប់រំលឹកដល់គុណធម៌នៃសេចក្ដីកតញូតា ចំពោះមាតាបិតា ការសម្ដែងព្រះធម៌ និងសេចក្ដីប្រទានពរសិរីមង្គល របស់ព្រះសម្មាសម្ពុទ្ធចំពោះបុគ្គលដែលមានកតញូ និងស្វែងរកការប្រៀនប្រដៅពីព្រះអង្គ។ ស្របតាមបំណងប្រាថ្នានេះប្លង់រចនានៃសំណង់ ត្រូវបានរៀបចំឡើងយ៉ាងសម្រិតសម្រាំង ដោយស្ថាបត្យករនិងអ្នកជំនាញខាងវប្បធម៌និងសាសនា ដោយផ្អែកលើមូលដ្ឋាននៃគម្រូព្រះពុទ្ធបដិមាខ្មែរ ក្នុងរចនាបថសម័យមុនអង្គរ(ស.វ.ទី៧.ទី៨នៃគ.ស) ដល់សម័យចុងអង្គរ(ស.វ.ទី១២.ទី១៣នៃគ.ស)។ ទម្រង់ទំហំនិងខ្នាតរង្វាស់រង្វាល់នៃសំណង់ ត្រូវបានកំណត់យកស្របតាមសមមាត្រ នៃចំនួនគុណឪពុកនិងចំនួនគុណម្ដាយដូចតទៅ៖ ព្រះពុទ្ធប្បដិមាទ្រង់ឈរមានកម្ពស់២១ម៉ែត្រ តំណាងគុណឪពុកទាំង២១។ ពុទ្ឌាសនៈទ្រព្រះពុទ្ធប្បដិមាមានអង្កត់ផ្ចិត១២ម៉ែត្រ តំណាងគុណម្ដាយទាំង១២។ ព្រះពុទ្ធប្បដិមាទ្រង់ឈរក្នុងទម្រង់កាយវិការពីររួមបញ្ចូលគ្នា គឺកាយវិការប្រទានពរព្រះធម៌ និងកាយវិការប្រទានពរ។ កាយវិការប្រទានព្រះធម៌បង្ហាញតាមរយៈមេដៃ និងចង្អុលដៃផ្គុំគ្នាបង្កើតជារង្វង់ ហើយម្រាមដៃបីទៀតលាតសន្ធឹងធម្មតា។ រង្វង់តំណាងលំហូរនៃថាមពលនិងពុទ្ធិវដ្ត ក្នុងការបង្រៀនប្រៀនប្រដៅ និងការប្រទានព្រះធម៌។ រីឯម្រាមបីទៀតដែលលាតសន្ធឹងស្មើគ្នា តំណាងឲ្យព្រះពុទ្ធ ព្រះធម៌ និងព្រះសង្ឃ។ កាយវិការប្រទានពរ បង្ហាញតាមរយៈព្រះហស្តឆ្វេងសណ្ដូកចុះក្រោម និងលាបាតព្រះហ្តចេញមកក្រៅ។ ម្រាមដៃទាំងអស់សណ្ដូកត្រង់ឬបត់បន្តិច តាមទម្រង់សិល្បៈរចនាបថ។ឯកឧត្តម ស៊ុយ សែម បានឲ្យដឹងថា ការសាងសង់បានចាប់ផ្ដើមនៅថ្ងៃទី១៤ខែធ្នូឆ្នាំ២០២៣ ដោយប្រើរយៈពេល១៤ខែទើបបានបញ្ចប់ជាស្ថាពរ។ សមិទ្ធិផលសំខាន់ៗដែលមានជាមួយគ្នានេះរួមមាន៖ ព្រះពុទ្ធប្បដិមាទ្រង់ឈរកម្ពស់២៧.៩ម៉ែត្រ, ចម្លាក់តោថ្មធ្វើពីសិលាក្រែចំនួនពីរ, សំណង់នរៈសឹង្ហធ្វើពីបេតុងចំនួន០៦, កម្រាលក្រានីតជុំវិញព្រះពុទ្ធប្បដិមា មានបីជាន់ទំហំ៦០២ម៉ែត្រក្រឡា និងផ្លូវចូលពីក្លោងទ្វារវត្តដល់ព្រះពុទ្ធប្បដិមា ក្រាលក្រានីតប្រវែង១០៤,២៥ម៉ែត្រ ទទឹង៦,៨ម៉ែត្រ។ សមិទ្ធផលទាំងអស់នេះ ចំណាយថវិកាសរុបអស់ចំនួន ៣៨០.៧៦៨ ដុល្លារសហរដ្ឋអាមេរិក។ ថវិកាទាំងនេះជាធនធានផ្ទាល់ខ្លួនរបស់ឯកឧត្តមនិងលោកជំទាវ ព្រមទាំងមានការចូលរួមពីឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា ដែលជាមិត្តភ័ក្កិរបស់ឯកឧត្តមនិងលោកជំទាវ នៅរាជធានីភ្នំពេញផងដែរ។ ឯកឧត្តមសូមប្រគល់សមិទ្ធិផលស្ថាបត្យកម្មដ៍ឧត្តុង្គឧត្តមនេះ ទុកជាមរតក សម្រាប់មប្រើឲ្យគុណប្រយោជន៍របស់ពុទ្ធសាសនិកជន ប្រជាជនកម្ពុជាគ្រប់ជំនាន់តរៀងទៅ ជាពិសេសប្រជាជននៅខេត្តពោធិ៍សាត់តែម្ដង។ ក្នុងឱកាសនោះ ឯកឧត្តម ស៊ុយ សែម និងលោកជំទាវ ជា ខេង បានប្រគេនថវិកាចំនួន២០.០០០ដុល្លារសហរដ្ឋអាមេរិកបន្ថែមទៀត សម្រាប់ធ្វើរបងវត្តបង្ហើយ ក្នុងនោះ៤០០០ដុល្លារទុកសម្រាប់ព្យាបាលជំងឺព្រះចៅអធិការវត្តរំលេច ដែលមានព្រះជន្មជរាលើស៩០ឆ្នាំទៅហើយ៕

រយៈពេល១៥ថ្ងៃខែកុម្ភៈសាលាដំបូងរាជធានី-ខេត្តចាត់ការលើសំណុំរឿងក្មេងទំនើង ៣៨ ករណី ឃាត់ខ្លួនជនសង្ស័យ ១៣៩ នាក់

2025/02/16 01:42:44 pm        64
Facebook Telegram Linkin
ភ្នំពេញ៖ អ្នកនាំពាក្យក្រសួងយុត្តិធម៌សូមជម្រាបជូនសាធារណជនទាំងអស់ជ្រាបថា ក្នុងរយៈពេល ១៥ថ្ងៃ គិតពីថ្ងៃទី១ ខែកុម្ភៈ ដល់ថ្ងៃទី១៥ ខែកុម្ភៈ ឆ្នាំ២០២៥ សាលាដំបូង និងអយ្យការអមសាលាដំបូងរាជធានីខេត្ត បានទទួលចាត់ការលើសំណុំរឿងករណីក្មេងទំនើងចំនួន ៣៨ ករណី មានជនសង្ស័យចំនួន ២១៥ នាក់ តុលាការបានធ្វើការឃាត់ខ្លួនជនសង្ស័យបានចំនួន ១៣៩ នាក់ ដែលពាក់ព័ន្ធនឹងបទ "ហិង្សាដោយចេតនាមានស្ថានទម្ងន់ទោស, ធ្វើឱ្យខូចខាតដោយចេតនា និងបទកាន់កាប់អាវុធដោយគ្មានការអនុញ្ញាត"។អ្នកនាំពាក្យក្រសួងយុត្តិធម៌ សូមថ្លែងអំណរគុណយ៉ាងជ្រាលជ្រៅដល់អាជ្ញាធរមានសមត្ថកិច្ច ព្រមទាំងសាលាដំបូង និងអយ្យការអមសាលាដំបូងរាជធានីខេត្ត ដែលបានចាត់វិធានការក្នុងការអនុវត្តច្បាប់យ៉ាងម៉ឺងម៉ាត់ក្នុងសំណុំរឿងពាក់ព័ន្ធករណីក្មេងទំនើង ប្រកបដោយស្មារតីយកចិត្តទុកដាក់ និងការទទួលខុសត្រូវខ្ពស់ដើម្បីការការពារសន្តិសុខ និងសុវត្ថិភាពរបស់សង្គមជាតិព្រមទាំងភាពសុខសាន្តរបស់ប្រជាពលរដ្ឋ។បន្ថែមពីនេះ ក្នុងនាមអ្នកនាំពាក្យក្រសួងយុត្តិធម៌ យើងខ្ញុំសូមអំពាវនាវដល់ឪពុកម្តាយ ព្រមទាំងអាណាព្យាបាលទាំងអស់ ត្រូវខិតខំតាមដាន អប់រំ និងទូន្មានប្រៀនប្រដៅដល់កូនៗឱ្យដើរតាមគន្លងត្រឹមត្រូវវៀរចាកនូវអំពើអបាយមុខ ដើម្បីក្លាយជាពលរដ្ឋល្អសម្រាប់សង្គមជាតិ និងសូមអំពាវនាវដល់យុវជនទាំងអស់ ដែលជាទំពាំងស្នងឫស្សីរបស់ប្រទេសជាតិ សូមប្រកាន់ខ្ជាប់នូវវិន័យ សីលធម៌ និងសេចក្តីថ្លៃថ្នូរ ហើយសូមជៀសវាងពីសកម្មភាពទាំងឡាយណាដែលបង្កអន្តរាយដល់ខ្លួន គ្រួសារ និងសង្គមជាតិ៕

សម្តេច ឃួន សុដារី ជំរុញក្រុមចលនាស្រ្តី ខេត្តកណ្តាល បន្តក្តាប់ឱ្យបានបញ្ហាប្រឈម កង្វល់របស់ ពលរដ្ឋ និងរួមគ្នាដោះស្រាយឱ្យបានទាន់ពេលវេលា

2025/02/16 12:45:20 pm        82
Facebook Telegram Linkin
សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានិងជាសមាជិកគណៈអចិន្រ្តៃយ៍នៃគណៈ កម្មាធិការកណ្តាលគណបក្សប្រជាជនកម្ពុជា ប្រធានក្រុមចលនាស្រ្តីនៃក្រុមការងារគណបក្សចុះមូលដ្ឋានខេត្តកណ្តាល នៅព្រឹកថ្ងៃសៅរ៍ ទី១៥ ខែកុម្ភៈឆ្នាំ២០២៥ បានអញ្ជើញជាអធិបតីខ្ពង់ខ្ពស់ក្នុងពិធីប្រកាសសេចក្តីសម្រេចបែងចែកសមាសភាពក្រុមការងារចលនាស្រ្តីនៃក្រុមការងារចលនាស្រ្តីស្រុកពញាឭ ខេត្តកណ្តាល នៅទីស្នាក់ការគណបក្សស្រុកពញាឭ។នៅក្នុងឱកាសឱឡារិកនោះ សម្តេចរដ្ឋសភាធិបតី បាននាំពាំការផ្តំាផ្ញើការសាកសួរសុខទុក្ខនិងក្តីនឹករលឹកដ៏ជ្រាលជ្រៅរបស់ សម្តេចអគ្គមហាសេនាបតីតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទំាងសម្តេចមហាបវរធិបតី ហ៊ុន ម៉ាណេត និងលោកជំទាវបណ្ឌិត ពេជ ចន្ទមុន្នី ជូនសមាជិកអង្គពិធីទំាងមូល ផងដែរ។មានប្រសាសន៍សំណេះសំណាល់ក្នុងអង្គពិធី សម្តេចរដ្ឋសភាធិបតី ឃួន សុដារី បានវាយតម្លៃខ្ពស់ចំពោះលទ្ធផលការងារដែលក្រុមការងារស្រ្តី ក៏ដូចជា គណបក្សប្រជាជនកម្ពុជាស្រុកពញាឭទំាងមូល សម្រេចបាននាពេលកន្លង ជាផ្នែកមួយក្នុងការចូលរួមនាំមកនូវជ័យជម្នះយ៉ាងធំធេងនិងជាប្រវត្តិសាស្រ្តជូនគណបក្សប្រជាជនកម្ពុជា នៅក្នុងការបោះឆ្នោតសកលឆ្នាំ២០២៣ កន្លងមកនេះ។  សម្តេចប្រធានក្រុមការងារចលនាស្រ្តីខេត្តកណ្តាល បានគូសបញ្ជាក់ថា ជាង៤០ឆ្នាំមកនេះ សម្តេចតេជោ ហ៊ុន សែន បានលះបង់សាច់ស្រស់ឈាមស្រស់ដោយមិនខ្លាចការនឿយហត់ ជម្នះរាល់ឧបសគ្គ យកអាយុជីវិតទៅប្តូរដើម្បីសុខសន្តិភាពនិងការអភិវឌ្ឍជូនប្រជាពលរដ្ឋ។ ដូចគ្នានេះក្រោមការដឹកនាំរបស់ សម្តេច  ធិបតី ហ៊ុន ម៉ាណែត ដែលជាមគ្គទេសក៍បន្តវេនវ័យក្មេងពោរពេញដោយថាមពល សមត្ថភាព និងចំណេះដឹងបានកំពុងបន្តជ្រោងទង់រក្សាសុខសន្តិភាព ស្ថិរភាពសង្គមនិងការអភិវឌ្ឍបង្កើតសមិទ្ធផលថ្មីៗជាច្រើនជូនប្រទេសជាតិជាបន្តទៀត។ សម្តេចតំណាងរាស្រ្តមណ្ឌលខេត្តកណ្តាល បានគូសបញ្ជាក់ថា គណបក្សប្រជាជនកម្ពុជាមានគោលនយោបាយច្បាស់លាស់នៅក្នុងការលើកកម្ពស់សមភាពយេនឌ័រនៅកម្ពុជា។ សម្តេចតេជោ ហ៊ុន សែន ប្រមុខដឹកនាំគណបក្សបានចាត់ទុកស្រ្តីជាឆ្អឹងខ្នងសេដ្ឋកិច្ច។ សម្តេចតេជោ បានលើកឡើងថាជួយស្រ្តី មានន័យថាជួយខ្លួនឯង។ ចំណែកសម្តេចធិបតី ហ៊ុន ម៉ាណែត បានមានប្រសាសន៍ថា ពិភពលោកកាន់តែកក់ក្តៅនិងស្រស់បំព្រង បើមានការចូលរួមរបស់ស្រ្តីកាន់តែច្រើន។ ដើម្បីធានាបាននូវការអនុវត្តបានត្រឹមត្រូវនិងមានប្រសិទ្ធភាពក្នុងតួនាទី ភារកិច្ចខ្លួនរបស់ក្រុមចលនាស្រ្តី ស្រុកពញាឭ ខេត្តកណ្តាល ដែលទើបប្រកាសតែងតំាងនាពេលនេះ សម្តេចរដ្ឋសភាធិបតី បានផ្តល់អនុសាសន៍មួយចំនួនដល់ក្រុមការងារ នៅក្នុងនោះត្រូវបន្តសហការជាមួយគណបក្សនិងក្រុមការងារគណបក្សចូល មូលដ្ឋានស្រុកពញាឭ ក្នុងការអនុវត្តសកម្មភាពជួយសហគមន៍ លើកកម្ពស់សិទ្ធិស្រ្តី សុខមាលភាពស្រ្តី និងសុខភាពមាតានិងទារក។ កសាងផែនការសកម្មភាពផ្អែកតាមសេចក្តីសម្រេចចិត្ត គោលការណ៍ណែនាំទិសដៅការងារគណបក្សនិងក្រុមការងារគណបក្សនិងស្របតាមផែនការទិសដៅការងារចលនាស្រ្តីនៃក្រុមការងារគណបក្សចុះមូលដ្ឋានខេត្តនិងក្រុមការងារចលនាស្រ្តីគណបក្សខេត្ត។សម្តេចបាន ស្នើសុំដល់ក្រុមការងារស្រ្តី ក៏ដូចជាសមាជិកគណបក្សទំាងអស់ បន្តផ្សព្វផ្សាយអំពីគោលនយោបាយរបស់គណបក្ស និងច្បាប់របស់រដ្ឋ ដែលពាក់ព័ន្ធសិទ្ធិនិងផលប្រយោជន៍ពលរដ្ឋ ផលប្រយោជន៍ស្រ្តី កុមារ ចាស់ជរា ជនងាយរងគ្រោះជាដើម ។ ជាមួយគ្នានេះក៏ខិតខំពង្រឹងពង្រឹងពង្រីកសមាជិកគណបក្សឱ្យបានច្រើននិងប្រកបដោយគុណភាព ពោលគឺសមាជិកគណបក្សមួយរូប សន្លឹកឆ្នោតមួយសន្លឹកនិងជាពិសេសត្រូវ ពង្រឹងសាមគ្គីភាព ឯកភាពផ្ទៃក្នុងឱ្យបានរឹងមាំ។សម្តេចរដ្ឋសភាធិបតី ឃួន សុដារី ក៏បានផ្តាំផ្ញើក្រុមការងារបន្ត ខិតខំពង្រឹងពង្រឹងពង្រីកសមាជិកគណបក្សឱ្យបានច្រើននិងប្រកបដោយគុណភាព ពោលគឺសមាជិកគណបក្សមួយរូប សន្លឹកឆ្នោតមួយសន្លឹក។ ពង្រឹងសាមគ្គីភាព ឯកភាពផ្ទៃក្នុងឱ្យបានរឹងមាំ អនុវត្តរបបប្រជុំនិងរាយការណ៍ឱ្យបានទៀងទាត់។ ជាមួយគ្នានេះ សកម្មជនក្រុមការងារទំាងអស់ត្រូវហ៊ានវាយបក និងធ្វើបដិឃោសនា ដើម្បីទប់ស្កាត់ឱ្យបានទាន់ពេលវេលានូវរាល់ការញុះញង់ បំភៃ្លសភាពការណ៍របស់ពួកអគតិ ជ្រុលនិយមទំាងនៅក្នុងនិងក្រៅប្រទេស ដែលជានិច្ចកាលតែងតែខិតខំរិះរកបង្កើតនូវព្រឹត្តិការណ៍ និងពង្រីកព្រឹត្តិការណ៍ឱ្យមានភាពច្របូកច្របល់ ប៉ះពាល់ដល់ស្ថិរភាព និងការអភិវឌ្ឍរបស់សង្គមជាតិ៕

បណ្ដាញសង្គម

ព័ត៌មានថ្មីៗ

សម្តេចធិបតីនាយករដ្ឋមន្រ្តី សម្តែងមោទកភាព ក្រោយឃើញភ្ញៀវទេសចរណ៍ ចូលទស្សនាអង្គរវត្ត មានសន្ទុះខ្លាំងឡើងវិញ
02/25/2025 11:02 AM
Facebook Telegram Linkin
ក្រុមហ៊ុន Starbucks នឹងកាត់រំសាយបុគ្គលិកសាជីវកម្មចំនួន១.១០០នាក់
02/25/2025 10:02 AM
Facebook Telegram Linkin
UN អនុម័តសេចក្តីសម្រេចពង្រៀងដោយអឺរ៉ុប-អ៊ុយក្រែន ស្តីពីសង្រ្គាម ដោយអាមេរិកអនុប្បវាទ
02/25/2025 10:02 AM
Facebook Telegram Linkin
UN អនុម័ត ជំហរអព្យាក្រឹតរបស់អាមេរិកលើសង្គ្រាមនៅអ៊ុយក្រែន ខណៈលោក Trump ស្វែងរកសន្តិភាព
02/25/2025 10:02 AM
Facebook Telegram Linkin
រដ្ឋបាលរបស់លោក Trump ប្រាប់បុគ្គលិកថា ពួកគេអាចមិនអើពើចំពោះឱសានវាទរបស់ លោក Musk
02/25/2025 10:02 AM
Facebook Telegram Linkin
មនុស្សរាប់ពាន់នាក់ ជាប់គាំងនៅព្រំដែនថៃ-មីយ៉ាន់ម៉ា ក្រោយការបង្ក្រាបមណ្ឌលឆបោកអនឡាញ
02/25/2025 10:02 AM
Facebook Telegram Linkin
ហ្វាំងឡង់ ព្រមានលោក Trump ថា ប្រសិនបើអ៊ុយក្រែន ចាញ់សង្រ្គាម នោះអាមេរិកក៏ចាញ់ដែរ
02/25/2025 10:02 AM
Facebook Telegram Linkin
ការធានាសន្តិសុខរបស់អឺរ៉ុប ស្ថិតលើមាត់ជ្រោះ បន្ទាប់ពីសង្គ្រាម ៣បីឆ្នាំនៅអ៊ុយក្រែន
02/25/2025 10:02 AM
Facebook Telegram Linkin
ជនអន្តោប្រវេសន៍ប្រឈមភាពមិនប្រាកដប្រជា ខណៈនយោបាយអាល្លឺម៉ង់ ងាកទៅរកស្តាំនិយម
02/25/2025 10:02 AM
Facebook Telegram Linkin
ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ក្នុងពិធីប្រគល់សញ្ញាបត្រជូនដល់និស្សិតសាកលវិទ្យាល័យ សៅស៍អ៊ីសថ៍អេយសៀ
02/25/2025 09:02 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.