នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
រដ្ឋមន្រ្តីសុខាភិបាល អនុញ្ញាតឱ្យគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ជួបសម្តែងការគួរសម និងពិភាក្សាការងារ
ក្រុមបារាំងកៀរគរគ្នាដើម្បីបេតិកភណ្ឌកម្ពុជា
ក្រុងច្បារមន និងខេត្តកំពង់ស្ពឺ ទទួលបាន ជ័យលាភី “ទីក្រុងទេសចរណ៍គ្មានផ្សែងបារី”
អូស្ត្រាលីកំពុងក្លាយជាទីផ្សារល្អ សម្រាប់ការនាំជលផលកែច្នៃពីកម្ពុជាក្នុងមួយឆ្នាំៗ រាប់សិបតោន

ព័ត៌មានជាតិ

ចិន សិង្ហបុរី និងថៃ ចែករំលែកបទពិសោធការប្រើប្រាស់ឧបករណ៍ឌីជីថល​ក្នុង​រដ្ឋបាលសាធារណៈ​​

2025/08/27 12:38:46 pm        311
Facebook Telegram Linkin
សិក្ខាសាលាស្តីពីឌីជីថលូបនីយកម្ម ក្នុងរដ្ឋបាលសាធារណៈ បានបន្តមកដល់ថ្ងៃទី២ តាម​រយៈ​ការ​ធ្វើប​ទបង្ហាញអំពី បទពិសោធនៃការអនុវត្តល្អៗ លើការប្រើប្រាស់ឧបករណ៍ឌីជីថល ក្នុង​រដ្ឋបាល​សាធារណៈ (Practices in Using Digital Tools in Public Administration)។ បទបង្ហាញ​ចំនួន៣ ត្រូវបានរៀបចំឡើងដោយអ្នកជំនាញមកពីចិន សិង្ហបុរី និងថៃ(ចូលរួមតាមប្រព័ន្ធ​ប្រជុំអន​ឡាញ)។ បទបង្ហាញទាំង៣ បានបង្ហាញពីឧត្តមានុវត្តន៍ និងករណីសិក្សាមួយចំនួន​នៃ​ការ​ប្រើប្រាស់​ឧបករណ៍ក្នុងរដ្ឋបាលសាធារណៈ។អ្នកជំនាញរបស់សាធារណរដ្ឋប្រជាមានិតចិន បានលើកយកការប្រើប្រាស់បច្ចេកវិទ្យាឌីជីថលសម្រាប់ការគ្រប់គ្រងគ្រាអាសន្ននៅប្រទេសចិនដោយលោកសាស្ត្រាចារ្យ Xiaoli Lu មកពី School of Public Policy and Management នៃសាកលវិទ្យាល័យTsinghua។ ទន្ទឹមនេះ អ្នកជំនាញសិង្ហបុរី បានបង្ហាញពីដំណើរនៃការប្រើប្រាស់ឌីជីថលដើម្បីផ្តល់សេវាសាធារណៈ របស់សិង្ហបុរី។ ជាការកត់សម្គាល់ អ្នកជំនាញបានរំលេចថា គ្រប់មុខងារនៃបណ្តាញឌីជីថលរបស់រដ្ឋាភិបាលសិង្ហបុរី មានរូបរាងប្រហាក់ប្រហែលគ្នា និងមានសុវត្ថិភាពខ្ពស់ដើម្បីផ្តល់ភាពងាយស្រួយ ហើយផ្តល់ការការពារសុវត្ថិភាពប្រើប្រាស់ដល់ប្រជាជនជាអ្នកទទួលសេវា។ អ្នកជំនាញថៃបានចូលរួមតាមប្រព័ន្ធអនឡាញ ដើម្បីចែករំលែកឧត្តមានុវត្តន៍ និងករណីសិក្សារបស់ខ្លួនដោយផ្តោតលើ Smart City ជូនសិក្ខាសាលា៕

ពលករត្រឡប់មកពីថៃ អរគុណរាជរដ្ឋាភិបាលដែលជួយស្វែងរកការងារឱ្យពួកគាត់បានធ្វើលឿន និងឆាប់រហ័ស

2025/08/27 12:31:42 pm        692
Facebook Telegram Linkin
ក្រុមពលករខ្មែរត្រឡប់មកពីប្រទេសថៃ បានបង្ហាញទឹកមុខសប្បាយរីករាយ និង​សម្តែង​ការ​អរគុណ​ជូន​ចំពោះរាជរដ្ឋាភិបាលដែបានជួយរកការងារឱ្យធ្វើ និងអរគុណក្រុ​មហ៊ុន​ដែល​បាន​ផ្តល់​ឱកាស​ការងារដល់ពួកគាត់យ៉ាងឆាប់រហ័ស។នៅក្នុងបទសម្ភាសន៍ផ្ទាល់ជាមួយក្រុមពលករទើបត្រឡប់មកពីប្រទេសថៃ បច្ចុប្បន្ន​កំពុង​បម្រើ​ការងារ​នៅ​រោងចក្រកាត់ដេរកាបូបរបស់ក្រុមហ៊ុន D’Luxe International Co.,Ltd ស្ថិតនៅ​ខណ្ឌ​ពោធិ៍​សែនជ័យ រាជធានីភ្នំពេញ ពួកគាត់បានឱ្យព័ត៍មាន ប៊ីធីវី ដឹងនៅព្រឹកថ្ងៃទី២៧ ខែសីហា​នេះ​ថា​ ពិតជាមានអារម្មណ៍សប្បាយរីករាយ និងកក់ក្តៅជាងធ្វើការនៅក្រៅស្រុក ដោយសារ​មិន​នឹក​ស្មាន​ថា នៅកម្ពុជាមានការងារសម្បូរបែបនៅតាមរោងចក្រ សហគ្រាស ជាពិសេសគឺ​ដូច​ទៅនឹ​ង​ការ​ផ្សព្វ​ផ្សាយរបស់រាជរដ្ឋាភិបាលដែលលើកឡើងថា ការងារជាច្រើនកន្លែង​កំពុង​រង់​ចាំ​អ្នក​ស្វែង​រក​ការងារ​ធ្វើ។ក្រុមពលករទាំងនេះ បានថ្លែងអំណរគុណចំពោះរាជរដ្ឋាភិបាល ព្រមទាំងក្រសួងការងារ និង​បណ្តុះ​បណ្តាលវិជ្ជាជីវៈ ដែលបានយកចិត្តទុកដាក់ និងជួយរកការងារឱ្យពួកគាត់។ ក្រុមពលករ បាន​និយាយទៀតថា ការបំពេញការងារនៅក្នុងស្រុកទទួលបានអត្ថប្រយោជន៍យ៉ាងច្រើន មាន​ភាព​ងាយ​ស្រួល កក់ក្តៅក្នុងចិត្ត និងរស់នៅជិតក្រុមគ្រួសារ ដោយមិនចាំ​បាច់​ចំណាយ​ថវិកា​លើ​ការ​ធ្វើ​លិខិតឆ្លងដែន។លោក ម៉ីឈាវ ប៊ុនវឌ្ឍន៍ ប្រធានរដ្ឋបាលរោងចក្រខាងលើ បានមានប្រសាសន៍ប្រាប់ ប៊ីធីវី ឱ្យ​ដឹង​ថា ​គិតត្រឹមថ្ងៃម្សិលមិញ រោងចក្រទទួល​បាន​ការ​ចុះ​ឈ្មោះ និង​សម្ភាសន៍​ជាប់​ការងារ​របស់​បង​ប្អូន​ពលករ​ត្រឡប់មកពីថៃចំនួនជិត៣០០នាក់ ដែលមានការជួយសម្របសម្រួលពីក្រសួងការងារ និង​បណ្តុះបណ្តាលវិជ្ជាជីវៈ។ លោកបានបង្ហាញអារម្មណ៍ត្រេកអរ និងកោតសរសើរ​ចំពោះ​កិច្ចខិ​ត​ខំ​ប្រឹង​ប្រែង​របស់​រាជ​រដ្ឋាភិបាល ព្រមទាំងក្រសួងក្នុងការជួយស្វែងរកការងារឱ្យពលករខ្មែរដែលត្រឡប់មកពីប្រទេសថៃ និង​បាន​ប្តេជ្ញាចិត្តចូលរួមជាមួយរាជរដ្ឋាភិបាល ក៏ដូចជាក្រសួង​ក្នុង​ការ​បំពេញ​បេសកកម្ម​នេះ​ឱ្យ​ល្អប្រសើរ។ឯកឧត្តម ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ឱ្យដឹង គិត​មកដល់ពេលនេះ ពលករខ្មែរដែលចាកចេញនិងវិលត្រឡប់មកប្រទេសកម្ពុជាវិញ មាន​ចំនួន​ប្រមាណ​ជា​ង ៩២ម៉ឺននាក់ ក្នុងនោះអ្នកទទួល​បាន​ការងារ​ធ្វើ​តាម​រយៈ​ទីភ្នាក់​ងារ​ជាតិ​មុខ​របរ និង​ការងារ​ (NEA) នៃក្រសួងការងារ និងបណ្តុះបណ្តាលវិជ្ជាជីវៈ ចំនួនប្រមាណជាង ១៣ម៉ឺននាក់។ ឯកឧត្តម​អ្នក​នាំពាក្យ បានបន្ដអំពាវនាវដល់ពលករខ្មែរដែលបានត្រឡប់មកដល់កម្ពុជា ហើយ​មិន​ទាន់​ទទួល​បាន​ការងារធ្វើ រួសរាន់ទាក់ទងទៅលេខទូរសព្ទ១២៩៧ ដើម្បីទទួលបានកា​រ​ជួយ​សម្រប​សម្រួល​ពីក្រសួងការងារក្នុងការស្វែងរកការងារធ្វើនៅតាមក្រុមហ៊ុន រោងចក្រ សហគ្រាស និង​ឱកាសការងារដែលមានជាបន្តបន្ទាប់ទូទាំងប្រទេស៕ អត្ថបទ៖ ឈិត បូរ៉ាវី

កិច្ចប្រជុំ RBC ព្រឹកនេះ កម្ពុជា-ថៃ បានឯកភាពរក្សាទំនាក់ទំនង និងខិតខំដោះស្រាយរាល់បញ្ហាដោយសន្តិវិធី និងបញ្ចៀសការប៉ះទង្គិចគ្នា

2025/08/27 12:26:05 pm        284
Facebook Telegram Linkin
ភ្នំពេញ៖ កិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ (RBC) ព្រឹកនេះ ឯកភាពគ្នាក្នុងការរក្សាទំនាក់ទំនងជាប្រចាំរវាងបណ្តាយោធភូមិភាគ និងតំបន់យោធា ព្រមទាំងបណ្តាអង្គភាព នៅតាមបណ្តោយព្រំដែននៃប្រទេសទាំងពីរ និងខិតខំដោះស្រាយរាល់បញ្ហាដោយសន្តិវិធី និងបញ្ចៀសការប៉ះទង្គិចគ្នា។ នេះបើយោងតាមសេចក្តីប្រកាសព័ត៌មានស្ដីពីកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៤របស់កម្ពុជា និងកងទ័ពភូមិភាគទី២របស់ថៃ នៅថ្ងៃទី២៧ ខែសីហា ឆ្នាំ២០២៥ ដោយភាគីថៃធ្វើជាម្ចាស់ផ្ទះ នៅច្រកព្រំដែនអន្តរជាតិជាំ-សាង៉ាំ ខេត្តឧត្តរមានជ័យ។បើតាម ក្រសួងការពារជាតិកម្ពុជា គណៈប្រតិភូកម្ពុជាដឹកនាំដោយ ឯកឧត្តម ឧត្តមសេនីយ៍ឯក ពៅ ហេង មេបញ្ជាការយោធភូមិភាគទី៤ និងជាសហប្រធាននៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ (RBC)។ គណៈ ប្រតិភូថៃដឹកនាំដោយ ឯកឧត្តម ឧត្តមសេនីយ៍ឯក ប៊ុនស៊ីន ផាតក្លាង មេបញ្ជាការកងទ័ពភូមិភាគទី២ និងជាសហប្រធាននៃកិច្ចប្រជុំវិសាមញ្ញរបស់គណៈកម្មាធិការ ព្រំដែនថ្នាក់យោធភូមិភាគ (RBC)។កិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) បានចាប់ផ្តើមនៅម៉ោង១១៖០០នាទីព្រឹក និងបានបញ្ចប់ដោយជោគជ័យ នៅវេលាម៉ោង១១៖៥៣នាទីព្រឹក ថ្ងៃទី២៧ ខែសីហា ឆ្នាំ២០២៥។ក្រសួងការពារជាតិបានបញ្ជាក់ថា៖«នៅក្នុងកិច្ចប្រជុំវិសាមញ្ញនេះ ភាគីទាំងពីរបានឯកភាពគ្នាក្នុងការរក្សាទំនាក់ទំនងជាប្រចាំរវាងបណ្តាយោធភូមិភាគ និងតំបន់យោធា ព្រមទាំងបណ្តាអង្គភាព នៅតាមបណ្តោយព្រំដែននៃប្រទេសទាំងពីរ និងខិតខំដោះស្រាយរាល់បញ្ហាដោយសន្តិវិធី និងបញ្ចៀសការប៉ះទង្គិចគ្នា»។ក្រសួងបានឱ្យដឹងថាភាគីទាំងពីរក៏បានគូសបញ្ជាក់ពីសារៈសំខាន់នៃការពង្រឹងទំនាក់ទំនងបន្ថែមទៀតនៅគ្រប់កម្រិត ដើម្បីកសាងជំនឿទុកចិត្ត និងលើកកម្ពស់ភាពជាអ្នកជិតខាងល្អ។ តាមរយៈការប្រាស្រ័យទាក់ទងគ្នានេះ ភាគីទាំងពីរ បានសង្កត់ធ្ងន់ពីការវិវឌ្ឍជាវិជ្ជមាន និងវឌ្ឍនភាពដែលសម្រេចបានកន្លងមក សំដៅជំរុញកិច្ច សហប្រតិបត្តិការលើគ្រប់វិស័យ និងការវិលត្រឡប់ទៅរកប្រក្រតីភាពឡើងវិញ៕

អតីតយុទ្ធជន៤០គ្រួសារនឹងទទួលបានផ្ទះ និងដី ជាអំណោយរបស់សម្តេចធិបតី ហ៊ុន ម៉ាណែត

2025/08/27 12:14:07 pm        93
Facebook Telegram Linkin
អតីតយុទ្ធជនចំនួន៤០គ្រួសារ នឹងទទួលបានផ្ទះ និងដីសម្បទានសង្គមកិច្ចជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី។ ការផ្តល់អំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាអនុប្រធានទី១ សមាគមអតីតយុទ្ធជនកម្ពុជា នឹងប្រគល់ជូនអតីតយុទ្ធជនចំនួន ៤០គ្រួសារ ប្រព្រឹត្តទៅនៅថ្ងៃទី២៨ ខែសីហា ឆ្នាំ២០២៥ ដែលអំណោយនេះកសាងតាមរយៈអ្នកឧកញ៉ា វិញ ហួរ ប្រធានក្រុមប្រឹក្សាភិបាលក្រុមហ៊ុន កំពតផត ស្ថិតក្នុងឃុំដូនបារ ស្រុកគាស់ក្រឡ ខេត្តបាត់ដំបង។ ពិធីប្រគល់ និងទទួលអំណោយដ៏ថ្លៃថ្លានេះនឹងធ្វើឡើងក្រោមអធិបតីភាពឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា។ឯកឧត្តមកិត្តិសង្គហបណ្ឌិត គន់ គីម ថ្លែងថា គិតមកដល់ថ្ងៃនេះមានរយៈពេល២ឆ្នាំហើយនៃរាជរដ្ឋាភិបាលក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី, ដែលសមាគមអតីតយុទ្ធជនកម្ពុជា បានបន្តគោលការណ៍ និងប្រតិបត្តិយ៉ាងខ្ជាប់ខ្ជួនចំពោះសុខទុក្ខរបស់អតីតយុទ្ធជន ព្រមទាំងពិនិត្យ និងវាយតម្លៃដល់អតីតយុទ្ធជនដែលជួបការលំបាកឱ្យទទួលបានអាទិភាពមុនគេ ក្នុងការទទួលអំណោយផ្ទះ និងដីរបស់រាជរដ្ឋាភិបាល ក៏ដូចជាការចុះជួបសួរសុខទុក្ខជាប់ជាប្រចាំជាមួយបងប្អូនអតីតយុទ្ធជនគ្រប់បណ្តារាជធានី-ខេត្ត។ ក្នុងនាមជាសេនាធិការជូនសម្តេចអគ្គមហាសេនបតីតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជនកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាអនុប្រធានទី១ សមាគមអតីតយុទ្ធជនកម្ពុជា, ឯកឧត្តមកិត្តិសង្គហបណ្ឌិត គន់ គីម តែងតែចុះត្រួតពិនិត្យ និងតាមដានជាប់ជាប្រចាំអំពីស្ថានភាព ជីវភាព និងបញ្ហាប្រឈមរបស់អតីតយុទ្ធជនគ្រប់រូបដែលជួបការលំបាកឱ្យទទួលបានការដោះស្រាយ និងឆ្លើយតបចំពោះតម្រូវការចាំបាច់ចំពោះមុខផងដែរ។ដើម្បីឆ្លើយតបទៅនឹងគុណបំណាច់របស់ អតីតយុទ្ធជនដែលមានចំពោះជាតិ និងប្រជាជន, ឯកឧត្តម ទេសរដ្ឋមន្រ្តី គន់ គីម បញ្ជាក់ថា រាជរដ្ឋាភិបាលបានដាក់ចេញនូវ គោលនយោបាយជាច្រើន ក្នុងការគាំទ្រដល់សុខុមាលភាព និងជីវភាពរស់នៅរបស់បងប្អូនជាអតីតយុទ្ធជន ដូចជាការផ្តល់បណ្ណ ប.ស.ស. ដែលពួកគាត់អាច ទទួលបានការថែទាំសុខភាពដោយឥតគិតថ្លៃនៅតាមបណ្តាមន្ទីរពេទ្យរដ្ឋ និងឯកជនមួយចំនួន ពិសេសផ្តល់ឱកាសឱ្យបងប្អូនអតីតយុទ្ធជនអាចចូលរួមក្នុងសង្គម តាមរយៈទទួលបានតួនាទីមួយចំនួនក្នុងមូលដ្ឋាន ហើយលើសពីនេះក៏បានផ្តល់ជាអាហារូបករណ៍ និងផ្តល់ឱកាសជាអាទិភាពដល់កូនចៅអតីតយុទ្ធជន បានចូលបំរើការងារកងទ័ពបន្តវេនពីឪពុកម្តាយផងដែរ។បន្ថែមលើនេះ ឯកឧត្តម ទេសរដ្ឋមន្រ្តី គន់ គីម តែងតែបានផ្តាំផ្ញើឲ្យលោកមេឃុំជាប្រធានកិត្តិយស និងលោកប្រធានប៉ុស្តិ៍រដ្ឋបាល ជាប្រធានសាខាសមាគម ឃុំ សង្កាត់ ត្រូវបន្តធ្វើអំពើល្អ ហើយខិតខំសហការ និងបង្កគ្រប់លទ្ធភាពឲ្យបងប្អូនអតីតយុទ្ធជនគ្រប់រូបបានទទួលនូវសេវាសាធារណៈផ្សេងៗឱ្យមានប្រសិទ្ធភាពដូចប្រជាពលរដ្ឋទូទៅ៕

រាជរដ្ឋាភិបាលបានបន្ថែមថវិកា ២០ លានដុល្លារផ្តល់ជាទុនបង្វិលក្នុងការប្រមូលទិញស្រូវពីកសិករ

2025/08/27 11:53:05 am        213
Facebook Telegram Linkin
រាជរដ្ឋាភិបាលបានសម្រេចដកថវិកាចំនួន ២០ លានដុល្លារអាម៉េរិក ពីមូលនិធិកម្មហិរញ្ញប្បទានពិសេស ឲ្យ ARDB ផ្តល់ជាទុន បង្វិលដល់រោងម៉ាស៊ីនកិនស្រូវ ក្នុងការប្រមូលទិញស្រូវពីប្រជាកសិករមានតម្លៃសមរម្យ និងគ្រោងបន្តផ្តល់សុពលភាព២ឆ្នាំបន្ថែមទៀត លើផ្នែកពន្ធដារដល់វិស័យកសិកម្ម។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើកឡើងក្នុងពិធី បិទមហាសន្និបាតបូកសរុបការងារ និងបិទបញ្ចប់អាណត្តិទី៤ របស់សហព័ន្ធស្រូវ-អង្ករកម្ពុជា នៅថ្ងៃទី២៥ សីហា ម្សិលមិញនេះថា ការដាក់ចេញនូវយន្តការសម្របសម្រួល និងកម្មវិធីហិរញ្ញប្បទានពិសេស សំដៅលើកស្ទួយផលិតកម្មរកទីផ្សារ និងរក្សាលំនឹងថ្លៃ កសិផល, តាមរយៈការផ្តល់នូវកញ្ចប់ថវិកាចំនួន ១០០ លានដុល្លារអាម៉េរិក ដើម្បីធ្វើអន្តរាគមន៍ឲ្យបានទាន់ពេល ក្នុងការប្រមូលទិញ កសិផល ជាពិសេសស្រូវ សំដៅរក្សាស្ថិរភាពថ្លៃ និងធានាសន្តិសុខស្បៀង ។ឯកឧត្តមអគ្គបណ្ឌិតសភាចារ្យ បានគូសបញ្ជាក់ថា ក្រោមកម្មវិធីហិរញ្ញប្បទានពិសេសនេះ រាជរដ្ឋាភិបាលបានអនុញ្ញាតឲ្យ ធនាគារអភិវឌ្ឍន៍ជនបទ និងកសិកម្ម (ARDB) ប្រើប្រាស់មូលនិធិចំនួន ៧០ លានដុល្លារអាម៉េរិក កាលពីឆ្នាំ២០២៤ កន្លងទៅ។ ថ្មីៗនេះ, រាជរដ្ឋាភិបាលក៏បានសម្រេចដកថវិកាចំនួន ២០ លានដុល្លារអាម៉េរិកពីមូលនិធិនេះ ឲ្យធនាគារអភិវឌ្ឍន៍ជនបទ និងកសិកម្ម ដើម្បីផ្តល់ជាទុនបង្វិលដល់រោងម៉ាស៊ីនកិនស្រូវ ក្នុងការប្រមូលទិញស្រូវពី ប្រជាកសិករក្នុងតម្លៃសមរម្យ។ គណៈកម្មាធិការគោល- នយោបាយសេដ្ឋកិច្ច និងហិរញ្ញវត្ថុ, តាមរយៈក្រុមការងារបច្ចេកទេសអន្តរក្រសួង ដែលទើបត្រូវបានបង្កើតឡើងថ្មី នឹងបន្តតាមដាន សភាពការណ៍ទីផ្សារស្រូវ-អង្ករជាប់ជាប្រចាំបន្តទៅទៀត ហើយនឹងសម្របសម្រួលស្នើឡើងនូវវិធានការចាំបាច់នានា សំដៅដោះ ស្រា បញ្ហាទីផ្សារ និងថ្លៃកសិផលឲ្យបានសមស្រប និងទាន់ពេល។ឯកឧត្តមអគ្គបណ្ឌិតសភាចារ្យ បន្ថែមឱ្យដឹងថា ការផ្ដល់ការលើកទឹកចិត្តដល់វិស័យស្រូវ-អង្ករ តាមរយៈការលើកលែងពន្ធ គយ លើការនាំចូលសម្ភារៈបរិក្ខារ និងការផ្តល់ការអនុគ្រោះខាងពន្ធដារ រួមបញ្ចូលនូវការដាក់ជាបន្ទុករបស់រដ្ឋនូវអាករលើតម្លៃបន្ថែម, ព្រមទាំងការព្យួរទុកនូវការបង់ពន្ធអប្បបរមា និងការបង់ប្រាក់រំដោះពន្ធលើប្រាក់ចំណូល។ រាជរដ្ឋាភិបាលតាមរយៈក្រសួងសេដ្ឋកិច្ច និងហិរញ្ញវត្ថុ បានដាក់ចេញនូវប្រកាសស្តីពីការលើកទឹកចិត្តពន្ធដារ ចំពោះវិស័យកសិកម្មដែលនឹងត្រូវអស់សុពលភាពនៅដំណាច់ឆ្នាំ ២០២៥ ខាងមុខនេះ។ បញ្ហានេះ, ផ្អែកតាមតម្រូវការចាំបាច់ជាក់ស្តែងចំពោះមុខ ក្រសួងសេដ្ឋកិច្ចនិងហិរញ្ញវត្ថុ នឹងស្នើសុំការអនុញ្ញាត ដ៏ខ្ពង់ខ្ពស់ពីប្រមុខរាជរដ្ឋាភិបាល ដើម្បីបន្តសុពលភាពប្រកាសខាងលើ សម្រាប់រយៈពេល២ឆ្នាំបន្ថែមទៀត។ ឯកឧត្តមបណ្ឌិត កៅ ថាច អគ្គនាយកធនាគារធនាគារអភិវឌ្ឍន៍ជនបទ និងកសិកម្ម (ARDB) លើកឡើងឱ្យដឹងថា តាម រយៈការផ្តល់ហិរញ្ញប្បទានដល់គ្រប់តួអង្គក្នុងខ្សែច្រវាក់តម្លៃផលិតកម្ម ជាទុនបង្វឹល ឬជាទុនវិនិយោគ គិតត្រឹមថ្ងៃទី៣១ ខែកក្កដា ឆ្នាំ ២០២៥នេះ ធនាគារ ARDB មានសម្ពាធឥណទានទៅលើស្រូវ-អង្ករប្រមាណជា ២០០ លានដុល្លារអាម៉េរិក ស្មើ ៤១% នៃឥណទាន សរុប។ បញ្ហានេះ ARDB នឹងបន្តគាំទ្រដល់វិស័យមួយនេះ រហូតដល់គោលដៅបំណាច់របស់រាជរដ្ឋាភិបាល ជាពិសេសសម្រេចបាននូវ ចក្ខុវិស័យច្បាស់លាស់ របស់សម្តេចតេជោ ហ៊ុន សែន អតតីនាយករដ្ឋមន្រ្តី និងជាប្រធានព្រឹទ្ធសភា ធ្វើយ៉ាងណាជំរុញនាំចេញអង្ករឱ្យ បាន១លានតោន ក្នុងមួយឆ្នាំ៕ អត្ថបទ៖ សុន រ៉ាឌី

សភាយុវពាណិជ្ជករអន្តរជាតិ កម្ពុជា (JCI Cambodia) ទទួលបានការគាំទ្រលើ​ការបណ្តុះ​បណ្តាល​ជំនាញសហគ្រិនភាពនៅកម្រិតវិទ្យាល័យពីក្រសួងការងារ និងបណ្ដុះបណ្ដាលវិជ្ជាជីវៈ

2025/08/27 11:39:00 am        80
Facebook Telegram Linkin
ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានអនុញ្ញាតឱ្យលោក សាំង តារារស្មី ប្រធានថ្នាក់ជាតិ និងថ្នាក់ដឹកនាំក្រុមប្រឹក្សាភិបាលនៃសភាយុវពាណិជ្ជករអន្តរជាតិ កម្ពុជា (JCI Cambodia) ចូលជួបសម្ដែងការគួរសម នារសៀលថ្ងៃទី២៦ ខែសីហា ឆ្នាំ២០២៥ នៅទីស្ដីការក្រសួង។ គោលបំណង នៃជំនួបគឺ ទី១ បង្ហាញពីចក្ខុវិស័យ សមិទ្ធិផល និងទិសដៅបន្តការងាររបស់ JCI Cambodia ដែលបានសម្រេច នាពេលកន្លងមក រួមមានការចូលរួមការងារសង្គមផ្សេងៗ អភិវឌ្ឍន៍ធនធានមនុស្ស និងជាពិសេសចូលរួមក្នុងការបណ្តុះបណ្តាលជំនាញសហគ្រិនភាព ដល់ពលរដ្ឋសកម្មវ័យក្មេងនៅកម្ពុជា និងទី២ ស្នើសុំនូវការគាំទ្រពីក្រសួងការងារ និងបណ្ដុះបណ្ដាលវិជ្ជាជីវៈ ក្នុងការបណ្តុះបណ្តាលធនធានមនុស្សរបស់សភាយុវពាណិជ្ជករអន្តរជាតិ កម្ពុជា។ឯកឧត្ដមរដ្ឋមន្ត្រី ហេង សួរ បានកោតសសើរ និងវាយតម្លៃខ្ពស់ចំពោះ JCI Cambodia ក្នុងការបន្តរួមចំណែកអភិវឌ្ឍន៍សង្គមកម្ពុជា ជាពិសេសផ្តល់សិទ្ធិអំណាចដល់យុវជន តាមរយៈការចូលរួមការងារសង្គម ការបណ្តុះបណ្តាលជំនាញសហគ្រិនភាព និងការអភិវឌ្ឍធនធានមនុស្ស ស្របតាមចក្ខុវិស័យរបស់រាជរដ្ឋាភិបាលកម្ពុជា។លើសពីនេះ ឯកឧត្ដមរដ្ឋមន្ត្រី បានផ្តល់អនុសាសន៍ដល់សភាយុវពាណិជ្ជករអន្តរជាតិ កម្ពុជា ដែលមានបណ្ដាញក្រុមហ៊ុនច្រើនជាសមាជិកជួយផ្សព្វផ្សាយ និងបង្កើនឱកាសការងារជូនដល់បងប្អូនពលករខ្មែរដែលទើបវិលត្រឡប់មកពីប្រទេសថៃវិញ ហើយក្រសួងការងារ និងបណ្តុះបណ្តាលវិជ្ជាជីវៈ បានត្រៀមខ្លួនរួចជាស្រេចក្នុងការគាំទ្រ និងធ្វើការយ៉ាងជិតស្និទ្ធជាមួយ JCI Cambodia ក្នុងការអភិវឌ្ឍធនធានមនុស្សវ័យក្មេង ដើម្បីឆ្លើយតបទៅនឹងតម្រូវការទីផ្សារការងារ និងរួមចំណែកដល់ការអភិវឌ្ឍប្រកបដោយចីរភាពរបស់កម្ពុជា និងគាំទ្រដល់ការបោះជំហានទៅមុខនៃកិច្ចសហប្រតិបត្តិការ កាន់តែរឹងមាំង រវាងក្រសួង និង JCI Cambodia។ជាការឆ្លើយតប លោក សាំង តារារស្មី ប្រធានថ្នាក់ជាតិ នៃសភាយុវពាណិជ្ជករអន្តរជាតិ កម្ពុជា បានថ្លែង អំណរគុណចំពោះ ឯកឧត្ដមរដ្ឋមន្ត្រី ដែលផ្ដល់នូវការគាំទ្រលើកិច្ចសហប្រតិបត្តិការនានា ដើម្បីផ្ដល់ឱកាសឱ្យក្រុមការងាររបស់លោក បន្តបេសកកម្មរបស់ខ្លួន ក្នុងការចូលរួមចំណែកក្នុងការបណ្តុះបណ្តាលជំនាញសហគ្រិនភាពដោយផ្ដោតលើកម្រិតវិទ្យាល័យ ដើម្បីចូលរួមការអភិវឌ្ឍធនធានមនុស្សនៅកម្ពុជា សំដៅជួយលើកស្ទួយការផលិតផលក្នុងស្រុក និងបង្កើនឱកាសទទួលបានការងារ៕

កិច្ចប្រជុំ RBC កម្ពុជា-ថៃ កំពុងប្រព្រឹត្តទៅនៅខេត្តឧត្តរមានជ័យ ខណៈកម្ពុជា សង្ឃឹមលទ្ធផលជាវិជ្ជមានបន្ថែម

2025/08/27 11:31:52 am        548
Facebook Telegram Linkin
លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានឱ្យដឹងថា នៅព្រឹកថ្ងៃទី២៧ ខែសីហា ឆ្នាំ២០២៥នេះ កិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ កម្ពុជា-ថៃ (RBC) បានប្រព្រឹត្តទៅនៅច្រកព្រំដែនអន្តរជាតិជាំ-សាង៉ាំ ខេត្តឧត្តរមានជ័យ។បើតាម អ្នកនាំពាក្យក្រសួងការពារជាតិ កិច្ចប្រជុំ RBC ព្រឹកនេះ គណៈប្រតិភូកម្ពុជា ដឹកនាំដោយ ឧត្តមសេនីយ៍ឯក ពៅ ហេង មេបញ្ជាការយោធភូមិភាគទី៤ និងជាសហប្រធាននៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ(RBC)។ ចំណែក គណៈប្រតិភូ ថៃដឹកនាំដោយ ឧត្តមសេនីយ៍ឯក ប៊ុនស៊ីន ផាត់ឃ្លាំង មេបញ្ជាការកងទ័ពភូមិភាគទី២ និងជាសហប្រធាននៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ(RBC)។ អ្នកនាំពាក្យក្រសួងការពារជាតិកម្ពុជាបញ្ជាក់ថា កម្ពុជាសង្ឃឹមយ៉ាងមុតមាំថា កិច្ចប្រជុំនេះនឹងទទួលបានលទ្ធផលជាវិជ្ជមានបន្ថែមទៀត ដែលអនុញ្ញាត ឱ្យភាគីទាំងពីរអាចជំរុញការអនុវត្តបទឈប់បាញ់ឱ្យមានប្រសិទ្ធភាពពេញលេញ នឹងនាំមកនូវសន្តិភាព ស្ថិរភាព និងប្រក្រតីភាពវិលត្រឡប់មកវិញបានឆាប់រហ័ស។លោកជំទាវឧត្តមសេនីយ៍ឯក ម៉ាលី សុជាតា ថ្លែងក្នុងសេចក្តីសង្ខេបព័ត៌មានប្រចាំថ្ងៃស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នៅព្រឹកថ្ងៃទី២៧ ខែសីហានេះដែរថា ចាប់តាំងពីកិច្ចប្រជុំពិសេសកាលពីថ្ងៃទី២៨ ខែកក្កដា ឆ្នាំ២០២៥ នៅទីក្រុងពូត្រាឆាយ៉ាដែលសម្រេចបាននូវបទឈប់បាញ់រវាងប្រទេសទាំងពីរ និងការរៀបចំកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី៧ ខែសីហា ឆ្នាំ២០២៥ ប្រកបដោយជោគជ័យជាផ្លែផ្កា ដែលបានស្តែងចេញតាមរយៈការឯកភាពគ្នាលើកំណត់ហេតុនៃកិច្ចប្រជុំដែលមាន១៣ចំណុចកម្ពុជា និងថៃបានធ្វើការជាមួយគ្នាប្រកបដោយស្ថាបនា និង ការវិវត្តជាវិជ្ជមានក្នុងការរៀបចំ កិច្ចប្រជុំវិសាមញ្ញគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) តួយ៉ាងដូចជាកិច្ចប្រជុំរបស់យោធភូមិភាគទី៣ របស់កម្ពុជាជាមួយបញ្ជាការដ្ឋានការពារព្រំដែនចាន់បុរី-ត្រាតរបស់ថៃកាលពីថ្ងៃទី១៦ ខែសីហា ឆ្នាំ២០២៥ ធ្វើនៅខេត្តត្រាត និងកិច្ចប្រជុំរវាងយោធភូមិភាគទី៥ របស់កម្ពុជា និងកងទ័ពភូមិភាគទី១ ថៃកាលពីថ្ងៃទី២២ ខែសីហា ឆ្នាំ២០២៥ រៀបចំនៅខេត្តស្រះកែវ និងកិច្ចប្រជុំរវាងយោធភូមិភាគទី៥ របស់កម្ពុជា និងបញ្ជាការដ្ឋានការពារព្រំដែនចាន់បុរី-ត្រាតរបស់ថៃកាលពីថ្ងៃទី២៥ ខែសីហា ឆ្នាំ២០២៥ កម្ពុជាធ្វើជាម្ចាស់ផ្ទះ ដែលកិច្ចប្រជុំខាងលើបានបញ្ចប់ទៅជាមួយនឹងការបញ្ជាក់យ៉ាងម៉ឺងម៉ាត់របស់ភាគីទាំងពីរក្នុងការគោរព និងអនុវត្តបទឈប់បាញ់ព្រមទាំងខិតខំប្រឹងប្រែងក្នុងការធ្វើអោយប្រសើរឡើងនូវស្ថានភាពនៅព្រំដែនក៏ដូចជាទំនាក់ទំនងទ្វេភាគីដើម្បីជាប្រយោជន៍រួមរបស់ប្រទេសទាំងពីរ៕

បេក្ខជនប្រឡងបាក់ឌុបមកពីខេត្តឧត្តរមានជ័យ នាំគ្នាមកមើលឈ្មោះ និងបើកប្រាក់ឧបត្ថម្ភ១០ម៉ឺនរៀល និងមី៦កញ្ចប់

2025/08/27 10:49:37 am        215
Facebook Telegram Linkin
នាថ្ងៃទី២៧សីហាឆ្នាំ២០២៥ សម្រាប់បេក្ខជនប្រឡងសញ្ញាបត្រធម្យមសិក្សាទុតិភូមិ(បាក់ឌុប)ប្រចាំឆ្នាំសិក្សា២០២៤-២០២៥ បាននាំគ្នាមកមើលឈ្មោះប្រឡងនៅមណ្ឌលប្រឡងចំនួន៣ ដែលមាន២ទីតំាងស្ថិតនៅស្រុកពួក ខេត្តសៀមរាប គឺមណ្ឌលប្រឡងសាលាបឋមសិក្សា ទៀ បាញ់ គូរូ និងមណ្ឌលប្រឡងវិទ្យាល័យចំណេះទូទៅ និងបច្ចេកទេសពួក។បន្ទាប់ពីបានមើលឈ្មោះប្រឡង និងប្រាក់ប្រាក់ឧបត្ថម្ភ តំណាងបេក្ខជនមួយចំនួន បានប្រាប់ថា ពួកគេមានភាពសប្បាយរីករាយ ថ្វីត្បិតថា ពួកគេ ពុំបានប្រឡងបាក់ឌុបនៅខេត្តឧត្តរមានជ័យរបស់ពួកគេ ក៏ពិតមែន ប៉ុន្តែពួកគេមានភាពកក់ក្តៅ ដោយសារអាជ្ញាធរ បានយកចិត្តទុកដាក់ចំពោះពួកគេគ្រប់ៗគ្នា។ បេក្ខជនប្រឡង បានបន្តទៀតថា ពួកគេ បាននាំគ្នាពិនិត្យឈ្មោះប្រឡង និងបានត្រៀមប្រឡងរួចរាល់ហើយ ដោយពុំបានព្រួយបារម្ភទេ ពោលគឺពួកគេបានត្រៀមរួចរាល់សម្រាប់ការប្រឡងបាក់ឌុប ។ចំណែកអាព្យាបាលបេក្ខជន បានប្រាប់ដែរថា ពួកគាត់ បានធ្វើដំណើរមកជាមួយកូនៗ និងនាំគ្នាមកលើកទឹកចិត្តឱ្យកូនប្រឡងបានលទ្ធផលល្អ ហើយពេលមកដល់ឃើញមានការយកចិត្តទុកដាក់ពីអាជ្ញាធរ បានធ្វើឱ្យពួកគាត់សប្បាយចិត្ត មានភាពកក់ក្តៅចំពោះសុវត្ថិភាព ដោយពួកគាត់រំពឹងថា កូនៗពួកគាត់ នឹងប្រឡងជាប់បាននិទ្ទេសល្អ ដើម្បីក្លាយជាធន់ធានសម្រាប់ប្រទេសជាតិតទៅមុខទៀត។សូមបញ្ជាក់ថា សម្រាប់បេក្ខជនប្រឡងបាក់ឌុបឆ្នាំនេះមានបេក្ខជនសរុបជាង១៤ម៉ឺននាក់ ក្នុងនោះមានមានបេក្ខជនថ្នាក់វិទ្យាសាស្រ្តសង្គមចំនួន១០ម៉ឺននាក់ និងបេក្ខជនថ្នាក់វិទ្យាសាស្រ្តចំនួនជាង៤ម៉ឺននាក់ ដែលមាន២៤១មណ្ឌល និងមានជាង៥ពាន់បន្ទប់។ សូមបញ្ជាក់ផងដែរថា សម្រាប់បេក្ខជនខេត្តឧត្តរមានជ័យ ដែលបានរងផលប៉ះពាល់ដោយសារជម្លោះព្រំដែនកម្ពុជា.ថៃ ដែលបាននាំគ្នាទៅប្រឡងនៅស្រុកពួក ខេត្តសៀមរាប មានចំនួន១៧៧២នាក់ ក្នុងនោះបានស្នើទៅប្រឡងនៅខេត្តកំពង់ស្ពឺម្នាក់ និងនៅភ្នំពេញម្នាក់ ហើយក្នុងចំណោមបេក្ខជនខេត្តឧត្តរមានជ័យ ប្រមាណ១៧៧២នាក់ ត្រូវបានក្រសួងអប់រំយុវជននិងកីឡា បានឧបត្ថម្ភជាថវិកាក្នុងម្នាក់ៗចំនួម១០ម៉ឺនរៀល មី៦កញ្ចប់ កន្លែងស្នាក់ និងអាហារហូបចុកផងដែរ ប៉ុន្តែក៏មានបេក្ខជនខ្លះដែមានលទ្ធភាព សម្រេចចិត្តជួលកន្លែងស្នាក់នៅដោយខ្លួនឯងផងដែរ៕ផលិត គង់ រ៉េន 

កិច្ចប្រជុំ RBC កម្ពុជា-ថៃ កំពុងប្រព្រឹត្តទៅនៅខេត្តឧត្តរមានជ័យ ខណៈកម្ពុជាសង្ឃឹមទទួលបានលទ្ធផលជាវិជ្ជមានបន្ថែមទៀត

2025/08/27 10:42:45 am        139
Facebook Telegram Linkin
ភ្នំពេញ៖ អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា បានឱ្យដឹងថា នៅថ្ងៃទី២៧ ខែសីហា ឆ្នាំ២០២៥នេះ កិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ កម្ពុជា-ថៃ (RBC) ប្រព្រឹត្តនៅព្រឹកថ្ងៃនេះនៅច្រកព្រំដែនអន្តរជាតិជាំ-សាង៉ាំ ខេត្តឧត្តរមានជ័យ។ អ្នកនាំពាក្យក្រសួងការពារជាតិ បានឱ្យដឹងថាគណៈប្រតិភូកម្ពុជាដឹកនាំដោយ ឧត្តមសេនីយ៍ឯក ពៅ ហេង មេបញ្ជាការយោធភូមិភាគទី៤ និងជា សហប្រធាននៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ(RBC)។ គណៈប្រតិភូ ថៃដឹកនាំដោយ ឧត្តមសេនីយ៍ឯក ប៊ុនស៊ីន ផាត់ឃ្លាំង មេបញ្ជាការកងទ័ពភូមិភាគទី២ និងជាសហប្រធាន នៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ(RBC)។ អ្នកនាំពាក្យក្រសួងការពារជាតិបញ្ជាក់ថា កម្ពុជាសង្ឃឹមយ៉ាងមុតមាំថា កិច្ចប្រជុំនេះនឹងទទួលបានលទ្ធផលជាវិជ្ជមានបន្ថែមទៀត ដែលអនុញ្ញាត ឱ្យភាគីទាំងពីរអាចជំរុញការអនុវត្តបទឈប់បាញ់ឱ្យមានប្រសិទ្ធភាពពេញលេញ នឹងនាំមកនូវសន្តិភាព ស្ថិរភាព និងប្រក្រតីភាពវិលត្រឡប់មកវិញបានឆាប់រហ័ស។

កម្ពុជាចាត់ទុកសកម្មភាពទន្រ្ទានរបស់ថៃ ជាឯកតោភាគី គឺបានធ្វើឲ្យប៉ះពាល់កិច្ចខិតខំប្រឹងប្រែងនៃការអនុវត្តបទឈប់បាញ់

2025/08/27 09:08:00 am        590
Facebook Telegram Linkin
អ្នកនាំពាក្យក្រសួងការបរទេស និងសហប្រតិបត្តិការអន្តរជាតិឯកឧត្តម ជុំ សុន្ទរី ចាត់ទុកសកម្មភាព ទន្រ្ទាន ដោយរាយបន្លាលួស ដាក់សំណាញ់របាំង និងដាក់កង់ឡាន ចូលទឹកដីខ្មែរនៅតំបន់ភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ក្នុងរយៈពេលប៉ុន្មានថ្ងៃមកនេះ គឺជាទង្វើដែលនាំឲ្យប៉ះពាល់ដល់ កិច្ចព្រមព្រៀងបទឈប់បាញ់នៃប្រទេសទាំងពីរ ដែលបានឯកភាពគ្នាកាលពីកន្លងទៅជាបន្តបន្ទាប់នោះ។ ក្នុងសន្និសីទសារព័ត៌មានប្រចាំថ្ងៃស្តីពីការអនុវត្តបទឈប់បាញ់ នាព្រឹកថ្ងៃទី២៧ ខែសីហា ឆ្នាំ ២០២៥នេះ ឯកឧត្តម ជុំ សុន្ទរី បានបញ្ជាក់ថា នៅថ្ងៃទី ២៥ ខែសីហា ឆ្នាំ ២០២៥ ក្រសួងការបរទេស និងសហប្រតិបត្តិការអន្តរជាតិ បានបញ្ចូនការតវ៉ាជាផ្លូវការរបស់រាជរដ្ឋាភិបាលកម្ពុជា ទៅកាន់សមភាគីថៃ ប្រឆាំងនឹងការបន្តទន្ទ្រានដោយកងទ័ពថៃ ចូលទៅក្នុងតំបន់ព្រំដែនរវាងកម្ពុជា និងថៃជាពិសេសតំបន់ដែលប្រជាពលរដ្ឋកម្ពុជាកំពុងរស់នៅតែម្តង។ឯកឧត្តមជុំ សុន្ទរី បានបញ្ជាក់ថា នៅថ្ងៃទី២៥ ខែសីហា ឆ្នាំ២០២៥ យោធាថៃនៅតែបន្តសកម្មភាព ដាក់លួសបន្លាបន្ថែមទៀតលើទីតាំងថ្មីចំនួន២ទៀត ស្ថិតនៅចម្ងាយប្រមាណ១០០ម៉ែត្រ និង៨០ម៉ែត ពីទីតាំងដែលយោធាថៃបានដាក់លួសបន្លា សំណាញ់របាំង និងកង់រថយន្ត កាលពីថ្ងៃទី ១២ ខែសីហា ឆ្នាំ២០២៥ ត្រង់ចន្លោះបង្គោលព្រំដែនលេខ ៤៦-៤៧ ក្នុងមូលដ្ឋានភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ អ្នកនាំពាក្យក្រសួងការបរទេសកម្ពុជា បានចាត់ទុកថា «សកម្មភាពបន្តទន្ទ្រានកាន់កាប់ជាឯកតោភាគីដោយកម្លាំងយោធាថៃ តាមវិធីដាក់លួសបន្លា នៅផ្នែកព្រំដែនដែលបានរៀបរាប់ខាងលើ កំពុងធ្វើឱ្យប៉ះពាល់ដល់កិច្ចប្រឹងប្រែង ក៏ដូចជាការប្តេជ្ញាចិត្តរបស់រដ្ឋាភិបាលទាំងពីរ ក្នុងការអនុវត្តកិច្ចព្រមព្រៀងឈប់បាញ់ដែលបានឯកភាពគ្នា កាលពីថ្ងៃទី ២៨ ខែកក្កដា ឆ្នាំ២០២៥ កំណត់ហេតុកិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ (GBC) ពីថ្ងៃទី៧ ខែសីហា ឆ្នាំ២០២៥ និងលទ្ធផលកិច្ចប្រជុំវិសាមញ្ញនៃគណៈកម្មាធិការព្រំដែនភូមិភាគ (RBC) កម្ពុជា-ថៃជាដើម»។ឯកឧត្តម ជុំ សុន្ទរី បានបញ្ជាក់បន្ថែមទៀតថា ការទន្រ្ទានរបស់ទាហានថៃមកលើដែនអធិបតេយ្យ ភាពរបស់កម្ពុជាក្នុងរយៈពេលប៉ុន្មានថ្ងៃមកនេះ គឺបានផ្ទុយនឹងស្មារតីនៃអនុស្សារណៈយោគយល់គ្នាកាលពីឆ្នាំ២០០០ផងដែរ ហើយមួយវិញទៀត ការប៉ុនប៉ងបែបនេះមិនត្រឹមតែរំលោភលើអាណត្តិការងាររបស់គណៈកម្មការចម្រុះខណ្ឌសីមាព្រំដែនគោក(JBC)ប៉ុណ្ណោះទេ ប៉ុន្តែថែមទាំងធ្វើឱ្យប៉ះពាល់ទៅដល់កិច្ចប្រឹងប្រែង និងដំណើរការចរចារបស់ JBC នៃភាគីទាំងពីរផងដែរ។ ដោយឡែកអ្នកនាំពាក្យក្រសួងការបរទេសកម្ពុជារូបនេះ ក៏បានចាត់ទុកថា សកម្មភាពបែបនេះរបស់ភាគីថៃ គឺជាការបំពានលើគោលការណ៍ និងគោលបំណង ដែលចែងក្នុងធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងសន្ធិសញ្ញាមិត្តភាព និងកិច្ចសហប្រតិបត្តិការក្នុងតំបន់អាស៊ីអាគ្នេយ៍ផងដែរ។យ៉ាងណាក៏ដោយរាជរដ្ឋាភិបាលកម្ពុជា សូមជំរុញឱ្យរាជរដ្ឋាភិបាលថៃ និងយោធាថៃ រក្សានូវស្ថានភាពមិនផ្លាស់ប្តូរដូចដែលមាននៅពេលបទឈប់បាញ់បានចូលជាធរមានកាលពីថ្ងៃទី២៨ ខែកក្កដាឆ្នាំ២០២៥ ហើយត្រូវធ្វើការដោះស្រាយកន្លែងមានជម្លោះរួមគ្នា តាមរយៈយន្តការ GBC និងJBC ព្រមទាំងគោរពយ៉ាងពេញលេញ និងដោយគ្មានលក្ខខណ្ឌចំពោះកិច្ចព្រមព្រៀងទ្វេភាគី និងកាតព្វកិច្ចអន្តរជាតិទាំងអស់ ដែលបានឯកភាពគ្នាជាបន្តបន្ទាប់នាពេលកន្លងទៅផងដែរ។ជាថ្មីម្តងទៀត ឯកឧត្តម ជុំ សុន្ទរី ក៏បានលើកឡើងផងដែរថា កម្ពុជានៅតែបន្តប្ដេជ្ញាចិត្តឥតប្រែប្រួលក្នុងការស្វែងរកដំណោះស្រាយដោយស្មារតីមិត្តភាព ចំពោះជម្លោះព្រំដែនជាមួយប្រទេសជិតខាងទាំងអស់តាមសន្តិវិធី ស្របតាមច្បាប់អន្តរជាតិ ដោយបន្តរក្សាការប្តេជ្ញាចិត្តយ៉ាងម៉ឺងម៉ាត់ប្រកាន់នូវជំហរជាគោលការណ៍របស់ខ្លួនថា ព្រំដែនមិនត្រូវបានផ្លាស់ប្តូរតាមរយៈការប្រើកម្លាំងនោះទេ៕ អត្ថបទបាន ចក់

បណ្ដាញសង្គម

ព័ត៌មានថ្មីៗ

រដ្ឋមន្រ្តីសុខាភិបាល អនុញ្ញាតឱ្យគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ជួបសម្តែងការគួរសម និងពិភាក្សាការងារ
09/10/2025 08:09 PM
Facebook Telegram Linkin
រ៉្វាន់ដា៖ ការអំពាវនាវរបស់កុងហ្គោឲ្យ UN ទទួលស្គាល់មាន «អំពើប្រល័យពូជសាសន៍» គឺជាទង្វើ «ល្ងង់ខ្លៅ»
09/10/2025 08:09 PM
Facebook Telegram Linkin
វិមានក្រឹមឡាំងបដិសេធមិនធ្វើអត្ថាធិប្បាយ ជុំវិញឧប្បត្តិហេតុយានដ្រូន នៅប៉ូឡូញ
09/10/2025 07:09 PM
Facebook Telegram Linkin
ក្រុមបារាំងកៀរគរគ្នាដើម្បីបេតិកភណ្ឌកម្ពុជា
09/10/2025 07:09 PM
Facebook Telegram Linkin
នាយករដ្ឋមន្ត្រីអង់គ្លេស៖ ការរំលោភរបស់រុស្ស៊ីលើដែនអាកាសប៉ូឡូញ គឺជា «ធ្វេសប្រហែសខ្លាំងណាស់»
09/10/2025 07:09 PM
Facebook Telegram Linkin
សមាជិកព្រឹទ្ធសភាអូស្ត្រាលីស្តាំនិយម ត្រូវបណ្តេញចេញពីក្រសួងស្រមោល ជុំវិញការអត្ថាធិប្បាយប្រឆាំងឥណ្ឌា
09/10/2025 06:09 PM
Facebook Telegram Linkin
ក្រុងច្បារមន និងខេត្តកំពង់ស្ពឺ ទទួលបាន ជ័យលាភី “ទីក្រុងទេសចរណ៍គ្មានផ្សែងបារី”
09/10/2025 06:09 PM
Facebook Telegram Linkin
ក្រុមហ៊ុនអាកាសចរណ៍ JAL រងការព្រមានជាលើកទី២ ពាក់ព័ន្ធនឹងអ្នកបើកបរយន្តហោះស្រវឹង
09/10/2025 06:09 PM
Facebook Telegram Linkin
ប្រមុខគណៈកម្មការ EU បញ្ជាក់ថា លោកស្រីនឹងស្នើវិធានការថ្មីផ្ដោតលើអ៊ីស្រាអែល
09/10/2025 06:09 PM
Facebook Telegram Linkin
សំឡេងផ្ទុះបន្លឺឡើង ក្រោយរថយន្តផ្លូវដែកផ្ទុកដោយឥន្ធនៈ មានអគ្គិភ័យ នៅលីទុយអានី
09/10/2025 06:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.