BTV NEWS

រដ្ឋមន្រ្តីសុខាភិបាល អនុញ្ញាតឱ្យគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ជួបសម្តែងការគួរសម និងពិភាក្សាការងារ

ក្រុមបារាំងកៀរគរគ្នាដើម្បីបេតិកភណ្ឌកម្ពុជា

ក្រុងច្បារមន និងខេត្តកំពង់ស្ពឺ ទទួលបាន ជ័យលាភី “ទីក្រុងទេសចរណ៍គ្មានផ្សែងបារី”

អូស្ត្រាលីកំពុងក្លាយជាទីផ្សារល្អ សម្រាប់ការនាំជលផលកែច្នៃពីកម្ពុជាក្នុងមួយឆ្នាំៗ រាប់សិបតោន

ព័ត៌មានជាតិ

អ្នកនាំពាក្យក្រសួងការបរទេស៖កម្ពុជាបានផ្ញើលិខិតតវ៉ាជាថ្មីទៅភាគីថៃប្រឆាំងនឹងការរំលោភបំពានរបស់យោធាថៃមកលើអធិបតេយ្យកម្ពុជា

ភ្នំពេញ៖ ឯកឧត្តម ជុំ សុន្ទរី អ្នកនាំពាក្យក្រសួងការបរទេសនិងសហប្រតិបត្តិការអន្តរជាតិ បានថ្លែងក្នុងសេចក្តីសង្ខេបព័ត៌មានប្រចាំថ្ងៃស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នាវេលាម៉ោង ៤:០០ រសៀលថ្ងៃទី២៦ ខែសីហា ឆ្នាំ២០២៥ ថា ក្រសួងការបរទេសនិងសហប្រតិបត្តិការអន្តរជាតិបានបញ្ជូនលិខិតទៅកាន់ភាគីថៃនៅថ្ងៃទី២៥ ខែសីហា ឆ្នាំ២០២៥ នូវការតវ៉ាប្រឆាំងដ៏ខ្លាំងក្លារបស់រាជរដ្ឋាភិបាលកម្ពុជា ចំពោះការរំលោភជាបន្តបន្ទាប់ដោយកងកម្លាំងរបស់ថៃចូលមកក្នុងទឹកដីរបស់កម្ពុជា។ជាមួយគ្នានេះដែរ ឯកឧត្តម ជុំ សុន្ទរី បានមានប្រសាសន៍បន្ថែមថា នេះគឺជាការតវ៉ាលើកទី៣ ហើយបន្ទាប់ពីមានការតវ៉ាចំនួន២លើកមុននេះ នៅថ្ងៃទី១៤ និងថ្ងៃទី១៩ ខែសីហា ឆ្នាំ២០២៥ ដែលការតវ៉ាលើកនេះគូសបញ្ជាក់ថា នៅថ្ងៃទី២៥ ខែសីហា ឆ្នាំ២០២៥ វេលាម៉ោង ១៤:២០ នាទី យោធាថៃបានបន្តដាក់ខ្សែលួសបន្លានៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ សកម្មភាពនេះគឺជាការំលោភបំពានថ្មីមួយទៀតរបស់យោធាថៃចូលមកក្នុងទឹកដីរបស់កម្ពុជាហួសពីទីតាំងរបស់ពួកគេនៅថ្ងៃទី១២-១៣ ខែសីហា ឆ្នាំ២០២៥។អ្នកនាំពាក្យក្រសួងការបរទេសនិងសហប្រតិបត្តិការអន្តរជាតិបានបញ្ជាក់ថា សកម្មភាពនេះគឺជាការំលោភទៅលើអធិបតេយ្យភាពរបស់កម្ពុជា ហើយក៏ឆ្លុះបញ្ចាំងអោយឃើញពីការប៉ុនប៉ងដោយចេតនារបស់ថៃក្នុងការពង្រីកជម្លោះចូលទៅក្នុងតំបន់ប្រជាជនស៊ីវិល។ ជាងនេះទៅទៀត ការរំលោភនេះក៏អាចធ្វើឱ្យមានគ្រោះថ្នាក់បន្ថែមទៀតទៅដល់បទឈប់បាញ់ដែលកំពុងតែមានភាពផុយស្រួយ ហើយវាក៏ជាការផ្ទុយស្រឡះទៅនឹងកិច្ចព្រមព្រៀងឈប់បាញ់ដែលសម្រេចបាននៅថ្ងៃទី២៨ ខែកក្កដា ឆ្នាំ២០២៥ នៅទីក្រុងពូត្រាចាយ៉ាប្រទេសម៉ាឡេស៊ី ក៏ដូចជាស្មារតីកំណត់ហេតុនៃកិច្ចប្រជុំវិសាមញ្ញរបស់គណៈកម្មាធិការកិច្ចការព្រំដែនទូទៅ (GBC) កាលពីថ្ងៃទី៧ ខែសីហា ឆ្នាំ២០២៥ នៅទីក្រុងកូឡាឡាំពួរដែលត្រូវបានគូសបញ្ជាក់បន្ថែមទៀតដោយកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់តំបន់ (RBC) រវាងយោធភូមិភាគទី៥ របស់កម្ពុជា ជាមួយនិងបញ្ជាការដ្ឋានការពារព្រំដែនចាន់បុរី-ត្រាតរបស់ថៃ៕

ឯកឧត្តម ហ៊ុន ម៉ានី កោតសរសើរចំពោះការត្រៀមលក្ខណៈរបស់ក្រុមគ្រួសារ ស.ស.យ.ក.ក្នុងការរួមចំណែកជួយដល់ដំណើរការប្រឡងបាក់ឌុបនៅថ្ងៃទី២៨-២៩ សីហាខាងមុខនេះ

ភ្នំពេញ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក.) បានផ្ញើសារថ្លែងអំណរគុណ និងកោតសរសើរចំពោះការត្រៀមលក្ខណៈរបស់ ក្រុមគ្រួសារ ស.ស.យ.ក. នៅទូទាំងប្រទេស ក្នុងការចូលរួមចំណែកជួយសម្របសម្រួលដំណើរការប្រឡងសញ្ញាបត្រមធ្យមសិក្សា ទុតិយភូមិ សម័យប្រឡង ថ្ងៃទី២៨ និងទី២៩ ខែសីហា ឆ្នាំ២០២៥ នាពេលខាងមុខនេះ។តាមរយៈសារផ្ញើជូនចំពោះ សមាជិក សមាជិកា សហភាពសហព័ន្ធយុវជនកម្ពុជាទូទាំងប្រទេស ឯកឧត្តម ហ៊ុន ម៉ានី បានថ្លែងអំណរគុណ និងកោតសរសើរចំពោះការត្រៀមលក្ខណៈរបស់ ក្រុមគ្រួសារ ស.ស.យ.ក. នៅទូទាំងប្រទេស ក្នុងការចូលរួមចំណែកជួយសម្របសម្រួលដំណើរការប្រឡងសញ្ញាបត្រមធ្យមសិក្សា ទុតិយភូមិ សម័យប្រឡង ថ្ងៃទី២៨ និងទី២៩ ខែសីហា ឆ្នាំ២០២៥ នាពេលខាងមុខនេះ។ ជាមួយគ្នានេះ ឯកឧត្តម បានសូមលើកទឹកចិត្តដល់សមាជិក សមាជិកា ចូលរួមជាមួយគណៈកម្មាធិការ ស.ស.យ.ក. រាជធានី-ខេត្ត ក្នុងជួយការសម្របសម្រួលដល់ប្អូនៗបេក្ខជន ទាំងនៅតាមមណ្ឌលប្រឡង ក៏ដូចជាកន្លែងស្នាក់នៅ តាមតម្រូវការជាក់ស្តែង តាមគ្រប់រូបភាព និងលទ្ធភាពដែលអាចជួយបាន ដោយសហការជាមួយគណៈកម្មការប្រលងរបស់ក្រសួងអប់រំ យុវជន និងកីឡា និងអាជ្ញាធរដែនដីមានសមត្ថកិច្ច។ឯកឧត្តម ហ៊ុន ម៉ានី បានថ្លែងថា៖«ទឹកចិត្ត ឆន្ទៈ នៃការចូលរួមរបស់ក្រុមគ្រួសារ ស.ស.យ.ក. គឺជាចំណែកមួយក្នុងការចូលរួមលើកស្ទួយវិស័យអប់រំឱ្យកាន់តែល្អប្រសើរឡើង ជាពិសេស ជួយសម្រាលក្តីបារម្ភរបស់ប្អូនៗ ក៏ដូចជាអាណាព្យាបាល ដែលនេះក៏ជាជ្រុងមួយនៃស្មារតី ស.ស.យ.ក.ផងដែរ»៕

ឯកឧត្តម ជាម ច័ន្ទសោភ័ណ អញ្ជើញចុះសួរសុខទុក្ខពលបាលឯកមួយរូបកំពុងសម្រាកព្យាបាលនៅស្រុកកំណើតបន្ទាប់ពីរបួសនៅទិសប្រាសាទតាក្របី

ឯកឧត្តម ជាម ច័ន្ទសោភ័ណ អភិបាលខេត្តកំពង់ស្ពឺ និងជាប្រធានកិត្តិយស ស.អ.ក ខេត្ត ព្រមទាំងឧត្តមសេនីយ៍ទោ ម៉ាន់ ម៉ាច មេបញ្ជាការតំបន់ប្រត្តិបត្តិការសឹករងខេត្ត និងជាប្រធាន ស.អ.ក ខេត្ត នាព្រឹកថ្ងៃទី ២៦ ខែសីហា ឆ្នាំ២០២៥ បានដឹកនាំក្រុមការងាររដ្ឋបាលខេត្ត និងក្រុមការងារ ស.អ.ក ខេត្ត ចុះសំណេះសំណាលសាកសួរសុខទុក្ខ យុទ្ធជនម្នាក់រងរបួសក្នុងការប៉ះទង្គិចប្រដាប់អាវុធជាមួយកងទ័ពសៀមនៅតំបន់ព្រំដែន ដែលពេលនេះលោកកំពុងបន្តព្យាបាលជំងឺនៅគេហដ្ឋានក្នុងស្រុកបរសេដ្ឋ ខេត្តកំពង់ស្ពឺលោកពលបាលឯក ណុប វ៉ាន់ អាយុ ៥៨ ឆ្នាំ បម្រើការនៅវរសេនាតូចអន្តរាគមន៍លេខ ២៥១ កងពលតូចអន្តរាគមន៍លេខ៥ កងពលធំអន្តរាគមន៍លេខ២ លោកបានរងរបួសពេលប្រយុទ្ធតតាំងទ័ពសៀមទិសប្រាសាទតាក្របី។ មកទល់ពេលនេះស្ថានភាពរបួសរបស់លោកបានប្រសើរជាងមុនខ្លះហើយ បន្ទាប់ពីសម្រាកព្យាបាលនៅមន្ទីរពេទ្យខេត្តសៀមរាម និងមន្ទីរពេទ្យរុស្សីមួយរយៈ។ ក្នុងឱកាសចុះសួរសុខទុក្ខនេះ ឯកឧត្តមអភិបាលខេត្តក៏បាននាំយកការផ្ដាំផ្ញើសួរសុខទុក្ខពីសំណាក់សម្ដេចតេជោ ហ៊ុន សែន និងសម្ដេចធិបតី ព្រមទាំងនាំយកអំណោយមួយចំនួនរួមមាន អង្ករ មី ទឹកត្រី ទឹកស៊ីវ ត្រីខ និងថវិកាមួយចំនួន។

ឯកឧត្តម វង សូត អនុញ្ញាតឱ្យនិស្សិតអាហារូបករណ៍កម្ពុជា-ឆែក និងកម្ពុជា-រុស្សី ចូលជួបសំណេះសំណាល និងទទួលអនុសាសន៍

ឯកឧត្តម វង សូត អនុប្រធានទី២រដ្ឋសភា តំណាងដ៏ខ្ពង់ខ្ពស់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា នាព្រឹកថ្ងៃទី២៦ ខែសីហា ឆ្នាំ២០២៥ បានអញ្ជើញទទួលជួបសំណេះសំណាល និងអនុសាសន៍ណែនាំដល់និស្សិតជ័យលាភីអាហារូបករណ៍ទៅបន្តការសិក្សានៅសាធារណរដ្ឋឆែក និងសហព័ន្ធរុស្សី ព្រមទាំងនិស្សិតអាហារូបករណ៍ទើបបញ្ចប់ការសិក្សាពីសហព័ន្ធរុស្សី សរុប៥៧នាក់ នៅវិមានរដ្ឋសភា។ ក្រោយពីបានស្តាប់របាយការណ៍តំណាងនិស្សិតអាហារូបករណ៍ទាំងពីរ ឯកឧត្តម វង សូត បានសម្តែងនូវការអបអរសាទរ និងកោតសរសើរ ព្រមទាំងបានណែនាំឱ្យនិស្សិតទាំងអស់ត្រូវប្រឹងប្រែងរៀនសូត្រ ក្រេបយកចំណេះដឹង និងបទពិសោធល្អៗពីបណ្ដាប្រទេសទាំង នោះ ដើម្បីកសាងសមត្ថភាពរបស់ខ្លួនចូលរួមអភិវឌ្ឍសង្គម និងសេដ្ឋកិច្ចកម្ពុជា។ យុវជន សិស្សនិស្សិត មានតួនាទីក្នុងការផ្សារភ្ជាប់ទំនាក់ទំនងកម្ពុជា-ឆែក និងកម្ពុជា-រុស្សី ហើយក៏ជាទូតសុច្ឆន្ទៈតំណាងប្រទេស ដើម្បីផ្សព្វផ្សាយអំពីពីវប្បធម៌ អរិយធម៌ អត្តសញ្ញាណជាតិ និងសក្តានុពលវិស័យទេសចរណ៍កម្ពុជា នៅកាន់ពិភពលោក តាមរយៈស្នាមញញឹម ភាពរួសរាយរាក់ទាក់ ដើម្បីបង្កើនភ្ជាប់ទំនាក់ទំនងប្រជាជន និងប្រជាជន ក្នុងការទាក់ទាញអ្នកទេសចរ ឱ្យមកកាន់កម្ពុជាច្រើនបន្ថែមទៀត។ ក្នុងឱកាសនេះដែរ ឯកឧត្តម បានលើកឡើងថា ក្នុងនាមយុវជនជំនាន់ក្រោយត្រូវតែដឹងអំពីប្រវត្តិសាស្រ្តរបស់ខ្លួន ដែលធ្លាប់ឆ្លងកាត់សង្គ្រាមរ៉ាំរ៉ៃ និងធ្លាក់ចូលទៅក្នុងរបបប្រល័យពូជសាសន៍ ដែលសម្លាប់ប្រជាជនអស់ជាច្រើនលាននាក់។ សន្តិភាព និងការអភិវឌ្ឍដែលកម្ពុជាមានដូចសព្វថ្ងៃនេះ គឺកើតចេញពីការបូជាសាច់ស្រស់ឈាមស្រស់របស់ឥស្សរជនជាតិជាន់ខ្ពស់របស់យើង ក្នុងការតស៊ូផ្តួលរំលំរបបប្រល័យពូជសាសន៍ ប៉ុល ពត នាថ្ងៃទី៧ មករា ឆ្នាំ១៩៧៩។ កាលពីឆ្នាំ២០២២ តុលាការខ្មែរក្រហម ឬអង្គជំនុំជម្រះវិសាមញ្ញក្នុងតុលាការកម្ពុជា ដែលហៅកាត់ថា អ.វ.ត.ក. បានបិទបញ្ចប់ និងបានចេញនូវសាលជាសាលដីកាពាក់ព័ន្ធនឹងសំណុំរឿងរបស់មេដឹកនាំខ្មែរក្រហម ជាស្ថាពរ ដែលមានការទទួលស្គាល់ជាអន្តរជាតិ។ ថ្មីៗនេះរដ្ឋសភាក៏បានអនុម័តច្បាប់ស្តីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ។ ប្រជាពលរដ្ឋត្រូវមានការចងចាំជានិច្ច នូវមហាសោកនាដកម្ម ក្នុងរបបដ៏ខ្មៅងងឹតរយៈពេល ៣ឆ្នាំ ៨ខែ២០ថ្ងៃ និងផ្តន្ទាទោសចំពោះបុគ្គលទាំងឡាយ ដែលបដិសេធមិនទទួលស្គាល់ការពិត ចំពោះប្រវត្តិសាស្ត្រដ៏សែនជូរចត់បំផុត ដែលបានកើតឡើងនៅកម្ពុជា កាលពីអតីតកាល។ក្នុងឱកាសនោះ ឯកឧត្តម អនុប្រធានទី២រដ្ឋសភា ក៏បានរំលឹក និងអបអរសាទរចំពោះព្រឹត្តិការណ៍នៃការចុះបូជនីយដ្ឋានចងចាំ នៃកម្ពុជា ត្រូវបានចុះបញ្ជីបេតិកភណ្ឌពិភពលោករបស់អង្គការយូណេស្កូ ដែលនេះគឺជាមោទនភាពជាតិដ៏ធំធេងថ្មីមួយទៀតសម្រាប់ប្រទេសកម្ពុជា។ “បូជនីយដ្ឋានចងចាំ នៃកម្ពុជា” រួមមាន ទីតាំងឧក្រិដ្ឋកម្មចំនួន ៣ រួមមាន អតីតមន្ទីរឃុំឃាំង ម-១៣ (ស្ថិតនៅព្រំប្រទល់ខេត្តកំពង់ឆ្នាំង និងខេត្តកំពង់ស្ពឺ) សារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។ ចំពោះព្រឹត្តិការណ៍ដែលកំពុងតែកើតឡើងនៅតាមបន្ទាត់ព្រំដែនរវាងកម្ពុជា-ថៃ ឯកឧត្តម វង សូត បានលើកឡើងទៀតថា យុវជនត្រូវជឿជាក់លើចំណាត់ការរបស់រាជរដ្ឋាភិបាល ក្នុងកាដោះស្រាយជម្លោះព្រំដែននេះ ហើយយុវជនខ្លួនឯងត្រូវសាមគ្គីគ្នាជាធ្លុងមួយ ពន្យល់ទៅកាន់អន្តរជាតិឱ្យបានដឹងអំពីរឿងពិតដែលកំពុងកើតឡើងនៅកម្ពុជា។ ក្នុងឱកាសនោះដែរ ឯកឧត្តម វង សូត បានលើកឡើងពីសមាជរដ្ឋសភា-ព្រឹទ្ធសភា រៀបចំជាលើកដំបូងកាលពីថ្ងៃទី ២-៣ ខែមិថុនា ឆ្នាំ២០២៥ ក្រោមអធិបតីភាព សម្តេចអគ្គមហាសេនាបតី តេជោ ហ៊ុន សែន ប្រធានព្រឹទ្ធសភា លើប្រធានបទចំនួន៣ គឺ១- ប្រព័ន្ធគាំពារសង្គមកម្ពុជា, ២- សេដ្ឋកិច្ចក្រៅប្រព័ន្ធ, ៣- វិស័យកសិកម្មនៅកម្ពុជា។ ការរៀបចំសមាជរដ្ឋសភា-ព្រឹទ្ធសភា ជាប្រវត្តិសាស្រ្ត កឺដើម្បីធ្វើការសិក្សាធ្វើកំណែទម្រង់ឱ្យកាន់តែស៊ីជម្រៅ ដើម្បីអភិវឌ្ឍប្រទេសជាតិសម្រេចបានគោលដៅក្លាយទៅជាប្រទេសមានចំណូលមធ្យមកម្រិតខ្ពស់ក្នុងឆ្នាំ២០៣០ និងចំណូលខ្ពស់ក្នុងឆ្នាំ ២០៥០ ។ ក្រុមនិស្សិតជ័យលាភីទាំងពីរប្រទេស បានថ្លែងអំណរគុណជ្រាលជ្រៅជូន ឯកឧត្តម វង សូត ដែលបានចំណាយពេលវេលាដ៏មានតម្លៃអនុញ្ញាតឱ្យក្រុមនិស្សិតអាហារូបករណ៍បានចូលជួបទទួលអនុសាសន៍ល្អៗ នៅក្នុងឱកាសនេះ។ ជាមួយគ្នានេះក្រុមនិស្សិតទាំងងអស់ បានប្តេជ្ញាចិត្តមោះមុតក្នុងការខិតខំប្រឹងប្រែងសិក្សារៀនសូត្រក្រេបយកចំណេះដឹងនិងជំនាញ ដើម្បីមកបម្រើប្រទេសជាតិ ចូលរួមអភិវឌ្ឍសង្គម ក្រោមការដឹកនាំរបស់រាជរដ្ឋាភិបាលនីតិកាលទី៧ នៃរដ្ឋសភា ដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី៕

ប្រមុខការពារជាតិកម្ពុជា អំពាវនាវដល់ជនរួមជាតិយោគយល់ និងរួមគ្នាអត់ធ្មត់ ដើម្បីប្រយោជន៍ជាតិយើងទាំងមូល

ភ្នំពេញ៖ តាមរយៈសារជូនសាធារណជននៅរសៀលថ្ងៃទី២៦សីហានេះ ប្រមុខការពារជាតិកម្ពុជា ឯកឧត្តម ទៀ សីហា អំពាវនាវដល់ជនរួមជាតិយោគយល់រួមគ្នាអត់ធ្មត់ ដើម្បីប្រយោជន៍ជាតិយើងទាំងមូល។ ឯកឧត្តម ទៀ សីហា ជម្រាបជូនសាធារជនពិចារណា៖1- អ្នកនាំពាក្យក្រសួងការពារជាតិ មានពេលវេលាផ្សាយតាមការកំណត់ មួយថ្ងៃ២ដង (ពេលព្រឹកម៉ោង៧ និងពេលល្ងាចម៉ោង៤) ដើម្បីសរុបហេតុការណ៍ដែលបានកើតឡើងតាមបណ្តាព្រំដែន កិច្ចប្រជុំ ដំណើរការអនុវត្តបទឈប់បាញ់ ព្រមទាំងព័ត៌មានកងទ័ពផ្សេងៗទៀត ។ក្នុងនោះមានអ្នកនាំភ្លើងមួយក្រុម បានយកការផ្សាយរបស់ក្រសួងការពារជាតិ ត្រឹមតែមួយជ្រុងមកបំភាន់ខ្លឹមសាររួម ៖ «ក្រសួងការពារជាតិបានផ្សាយថាសភាពការណ៍មានភាពស្ងប់ស្ងាត់នៅតាមព្រំដែន...... តែប្រជាជនបង្ហោះថាកំពុងប៉ះទង្គិចជាមួយទាហានថៃ រឿងពង្រាយបន្លាលួសចូលមកដីប្រជាជន....... សាធារណជន «មិនដឹងត្រូវជឿខាងណា?» សូមពិនិត្យ និងពិចារណា៖ - ក្រសួងការពារជាតិ ផ្សាយពីសភាពការណ៍ ពីម៉ោង១២:00យប់ ដល់ម៉ោង៦នាទីព្រឹក មានស្ថានភាពស្ងប់ស្ងាត់- ជាក់ស្តែងការប៉ះទង្គិច រវាងប្រជាជន និងយោធាថៃ ពាក់ព័ន្ធនឹងរឿងបន្លាលួស នៅវេលាម៉ោង ២:២០នាទីរសៀល ជាមួយគ្នានោះអាជ្ញាធរខេត្តបន្ទាយមានជ័យ ព្រមទាំងកងកម្លាំងមានសមត្ថកិច្ច ឈរជើងចូលរួមដោះស្រាយ។ ថ្ងៃដដែលគ្នានោះ ផេកក្រសួងការពារជាតិ ក៏បានចេញផ្សាយភ្លាមចំនួចពីរដង។ ➡️ តើក្រសួងការពារជាតិលាក់ព័ត៌មានត្រង់ណា???2- បើសិនថតរូបភាព និងវិឌីអូកន្លែងកើតហេតុ ថតតែប្រជាជន យើងនឹងឃើញតែប្រជាជន តែបើថតមួយជ្រុងទៀត យើងនឹងឃើញទាំងអភិបាលខេត្ត និងអាជ្ញាធរខេត្ត ព្រមទាំងកងកម្លាំងនៅការពារព្រំដែន ទឹកដី និងការពារបងប្អូនប្រជាជនដែលកំពុងតវ៉ាលើទីតាំងដីរបស់ខ្លួន។ខ្ញុំសូមបញ្ជាក់ជូនបងប្អូនជនរួមជាតិឳ្យបានជ្រាបថា៖ តាំងពីថ្ងៃទី២៨កក្កដា មកដល់ពេលនេះ កងកម្លាំងរបស់យើងបានរក្សាការពារប្រទេស ប្រកបដោយភាពអត់ធ្មត់ជាទីបំផុត ដើម្បីអនុវត្តបទឈប់បាញ់ ជៀសវាងការប៉ះទង្គិចគ្នាដោយប្រដាប់អាវុធម្តងទៀត ដែលនឹងនាំឳ្យមានការខាតបង់ទាំងទ្រព្យសម្បត្តិ ទាំងបាត់បង់សាច់ញាតិបងប្អូន ប្រជាជន និងកងកម្លាំងយើង។ តើបងប្អូនមានបានកត់សម្គាល់ដែរឬទេ? ថាកងកម្លាំងយើងមិនប្រដាប់អាវុធ នៅទីតាំងកើតហេតុ (ឃុំអូរបីជាន់)នោះទេ គឺយើងប្តេជ្ញាចិត្តអនុវត្តបទឈប់បាញ់ឳ្យមានប្រសិទ្ធិភាព។ សូមបងប្អូនជនរួមជាតិយោគយល់ពីទឹកចិត្តកងកម្លាំងយើងនៅទីនោះ និងរួមគ្នាអត់ធ្មត់ដើម្បីប្រយោជន៍ជាតិយើងទាំងមូល។ យើងនៅសល់កិច្ចប្រជុំវិសាមញ្ញRBC រវាងយោធភូមិភាគទី៤ និងយោធភូមិភាគទី២(ថៃ) នៅថ្ងៃទី២៧ ខែសីហានេះ និងកិច្ចប្រជុំGBC នៅរាជធានីភ្នំពេញ នៅថ្ងៃទី៩-១០ ខែកញ្ញាខាងមុខនេះទៀត។ PS: ➡️សូមបញ្ជាក់ថា ការការពារប្រទេសជាតិ ការការពារព្រំដែន មិនមែនជារឿងតូចតាចទេ ហើយក៏មិនអាចបំភ្លៃព័ត៌មានបាននោះទេ គ្មានថ្នាក់ដឹកនាំណាដែលយកប្រជាជនខ្លួនជាខែល ឬជាឈ្នាន់ ដើម្បីការពារផលប្រយោជន៍ខ្លួន ដូចថ្នាក់ដឹកនាំក្បត់ជាតិមួយចំនួន ដែលរស់ស្រួល ដេកស្រួល នៅក្រៅប្រទេសនោះទេ។ ប្រជាជនខ្មែរ មានវិជ្ជាជីវៈ កុំនាំប្រទេសជាតិ ធ្លាក់ក្នុងថ្លុកសង្គ្រាម ដូចអតីតកាលទៀត៕

តាមរយៈជំនួបជាមួយ ឯកឧត្តម ស៊ុន ចាន់ថុល ក្រុមហ៊ុនអូស្រ្តាលីមួយចង់មកបង្កើតរោងចក្រ និងបច្ចេកវិទ្យាបង្កបង្កើនផលស្រូវនៅមកកម្ពុជា

ក្រុងស៊ីដនី៖ នាយកប្រតិបត្តិក្រុមហ៊ុន SunRice Group បង្ហាញពីចំណាប់អារម្មណ៍អំពីការធ្វើទស្សនកិច្ចមកកាន់ប្រទេសកម្ពុជា ពិនិត្យ លទ្ធភាពបណ្តាក់ទុនវិនិយោគបង្កើតរោងចក្រ និងនាំយកពូជ ព្រមទាំងបច្ចេកវិទ្យាបង្កបង្កើនផលស្រូវ Japonica មកប្រទេសកម្ពុជា។លោក Paul Serra នាយកប្រតិបត្តិក្រុមហ៊ុន SunRice Group ក្នុងជំនួបពិភាក្សាការងារជាមួយ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅទីក្រុងស៊ីដនី ប្រទេសអូស្ត្រាលី ថ្ងៃទី២៥ ខែសីហា ឆ្នាំ២០២៥ បាន លើកឡើងអំពីសាវតា ដែលជាក្រុមហ៊ុនរបស់អូស្ត្រាលីដំបូងគេ ដែលបាននាំចេញអង្ករពីកម្ពុជាទៅកាន់ទីផ្សារអូស្ត្រាលី និងនូវែលហ្សេ ឡង់។ លោកនាយកប្រតិបត្តិ បានបង្ហាញចំណាប់អារម្មណ៍ ក្នុងការធ្វើទស្សនកិច្ចមកកាន់ប្រទេសកម្ពុជា ដើម្បីពិនិត្យលទ្ធភាពបណ្តាក់ ទុនវិនិយោគបង្កើតរោងចក្រ និងនាំយកពូជ ព្រមទាំងបច្ចេកវិទ្យាបង្កបង្កើនផលស្រូវ Japonica មកប្រទេសកម្ពុជាផងដែរ។លោក បានបន្ថែមឱ្យដឹងថា ក្រុមហ៊ុន SunRice Group គឺជាក្រុមហ៊ុនកែច្នៃផលិតផលចំណីអាហារ និងអង្ករក្នុងចំណោមក្រុម ហ៊ុនធំៗនៅលើពិភពលោក ដែលមានដើមកំណើតនៅប្រទេសអូស្ត្រាលី តាំងពីឆ្នាំ១៩៥០ ហើយបច្ចុប្បន្នក្រុមហ៊ុនបានពង្រីកប្រតិបត្តិ ការរបស់ខ្លួន ទៅកាន់ប្រទេសជាច្រើននៅជុំវិញពិភពលោក។ក្នុងជំនួបនេះ, ឯកឧត្តមឧបនាយករដ្ឋមន្ត្រី បានសម្តែងនូវក្តីសោមនស្ស ចំពោះការជួបពិភាក្សាការងារផ្លាស់ប្តូរយោបល់ ចែក រំលែកបទពិសោធន៍ការងារ ទៅវិញទៅមកនាឱកាសនេះ។ ឯកឧត្តមឧបនាយករដ្ឋមន្ត្រី ក៏បានជម្រាបជូនអំពីបច្ចុប្បន្នភាពនៃ បរិយាកាសវិនិយោគនៅកម្ពុជា ក៏ដូចជាសក្តានុពលនានាដែលកម្ពុជាមាន ស័ក្តិសមសម្រាប់ការជ្រើសរើសជាគោលដៅវិនិយោគ ក្នុង បរិការណ៍ពិភពលោកនាពេលបច្ចុប្បន្ន និងវឌ្ឍនភាពថ្មីៗនៃការអភិវឌ្ឍហេដ្ឋារចនាសម្ព័ន្ធដឹកជញ្ជូន និងថាមពលនៅក្នុងប្រទេសកម្ពុជា ដែលកាន់តែផ្ដល់ភាពងាយស្រួលដល់ការធ្វើប្រតិបត្តិការពាណិជ្ជកម្ម។ចំណែកនៅក្នុងថ្ងៃទី២៦នេះ, ឯកឧត្តមឧបនាយករដ្ឋមន្ត្រី ក៏បានអញ្ជើញទទួលជួបពិភាក្សាការងារជាមួយលោក Glenn Keys AO ស្ថាបនិក និងជាប្រធានក្រុមហ៊ុន Aspen Medical ក្នុងនោះលោកបានលើកបង្ហាញអំពីប្រវត្តិការងារ និងបទពិសោធន៍របស់ក្រុមហ៊ុន ដែលធ្លាប់បានអនុវត្តជោគជ័យនាពេលកន្លងមក លើគម្រោងសុខាភិបាលនៅក្នុងប្រទេសអូស្ត្រាលី ប្រទេសឥណ្ឌូនេស៊ី និងប្រទេស ហ្វីជី។ បន្ថែមពីនោះ ក្រុមហ៊ុនក៏មានប្រតិបត្តិការសេវាសុខាភិបាលនៅក្នុងប្រទេសធំៗមួយចំនួន លើពិភពលោកដូចជាសហរដ្ឋអាម៉េរិក និងចក្រភពអង់គ្លេសផងដែរ។ ក្រុមហ៊ុននឹងសិក្សាលម្អិតលើវិសាលភាពគ្របដណ្តប់សម្រាប់ការវិនិយោគនៅកម្ពុជា និងស្វែងរកកិច្ច សហការជាមួយអង្គភាពពាក់ព័ន្ធ សំដៅបណ្តាក់ទុនវិនិយោគនាពេលអនាគត៕អត្ថបទ៖ សុន រ៉ាឌី

ឯកឧត្តម ហ៊ុន ម៉ានី៖ បច្ចេកវិទ្យាឌីជីថលបានក្លាយជាផ្នែកដ៏មានសារៈសំខាន់ រួមចំណែកដល់ការពង្រឹងសមត្ថភាពរដ្ឋបាលសាធារណៈ និងគាំទ្រជំរុញការបន្តការកំណែទម្រង់រដ្ឋបាលសាធារណៈ

សៀមរាប៖ នៅក្នុងពិធីបើកសិក្ខាសាលាស្តីពី ឌីជីថលូបនីយកម្មក្នុងរដ្ឋបាលសាធារណៈ នាព្រឹកថ្ងៃទី២៦ ខែសីហា ឆ្នាំ២០២៥ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានមានប្រសាសន៍ថា “ស្របពេលកិច្ចខិតខំប្រឹងប្រែងក្នុងការធ្វើបរិវត្តកម្មឌីជីថល ត្រូវបានធ្វើឡើងយ៉ាងសកម្ម ដោយគ្រប់តួអង្គនៃក្រសួង-ស្ថាប័ន ទាំងថ្នាក់ជាតិ និងថ្នាក់ក្រោមជាតិ ជាមួយអភិក្រម«ជវភាពនៃប្រព័ន្ធតួអង្គតែមួយ» និងអភិក្រម«ធ្វើការប្រទាក់ក្រឡាគ្នាជារដ្ឋាភិបាលទាំងមូល» បច្ចេកវិទ្យាឌីជីថល បានក្លាយជាផ្នែកដ៏មានសារៈសំខាន់បំផុតមួយនៃការរួមចំណែកពង្រឹងសមត្ថភាពរដ្ឋបាលសាធារណៈ និងជាកាតាលីករ គាំទ្រជំរុញការបន្តការកំណែទម្រង់រដ្ឋបាលសាធារណៈ ជាកិច្ចការដែលបានធ្វើជាបន្ត បន្ទាប់ ដោយរាជរដ្ឋាភិបាលនីតិកាលមុនៗ ចាប់តាំងពីទសវត្សរ៍ឆ្នាំ១៩៩០មក។”បន្ថែមលើការលើកឡើងបែបនេះ ឯកឧត្តមឧបនាយករដ្ឋមន្ត្រី បានចែករំលែកការងារកែទម្រងរដ្ឋបាលសាធារណៈ ដែលរាជរដ្ឋាភិបាលនីតិកាលទី៧ ក្រោមការដឹកនាំរបស់ សម្តេចមហាបវរធិបតី បាននិង កំពុងបន្តកិច្ចការកែទម្រង់រដ្ឋបាលសាធារណៈជាមួយឆន្ទៈនយោបាយមុតស្រួចប្រកប ដោយភាពស្វាហាប់ ឈ្លាសវៃ និងចក្ខុវិស័យវែងឆ្ងាយ ដោយកំណត់គោលដៅអាទិភាព ក្នុងការងារកែទម្រង់រដ្ឋបាលសាធារណៈ ជាមួយនឹងការដាក់ចេញវិធានការគន្លឹះចំនួន៣។“ក្នុងនាមជាសេនាធិការរាជរដ្ឋាភិបាល ក្រៅពីជំរុញយ៉ាងសកម្មលើការធ្វើឌីជីថលូបនីយកម្មក្នុងការពង្រឹងគុណភាព និងពង្រីកវិសាលភាពនៃការផ្តល់សេវាឱ្យកាន់តែប្រសើរ និងកាន់តែមានប្រសិទ្ធភាពខ្ពស់ ក្រសួងមុខងារសាធារណៈ កំពុងប្រើប្រាស់ជាប្រចាំនូវបច្ចេកវិទ្យាឌីជីថលក្នុងការអនុវត្តការងារកែទម្រង់ ស្របតាមទស្សនវិស័យដ៏មុតស្រួច របស់រាជរដ្ឋាភិបាល ក្នុងនោះបច្ចេកវិទ្យាឌីជីថល បានក្លាយជាថ្នាលព័ត៌មានវិទ្យាដ៏មានសារៈសំខាន់ក្នុងការអនុវត្តវិធានការគន្លឹះទាំង៣ របស់រាជរដ្ឋាភិបាល ក្នុងកិច្ចការកែទម្រង់រដ្ឋបាលសាធារណៈ ដូចបានលើកខាងលើ។” […] តួយ៉ាងមានដូចជា ការប្រើប្រាស់ថ្នាលបច្ចេកវិទ្យា ដើម្បីគាំទ្រការប្រឡងជ្រើសរើសមន្ត្រីរាជការ និងមន្ត្រីផ្អែកលើកិច្ចព្រមព្រៀងការងារ, ការគ្រប់គ្រងមន្ត្រីតាមប្រព័ន្ធឌីជីថល រួមទាំងការគ្រប់គ្រងអត្តសញ្ញាណប័ណ្ណ និងប្រាក់បៀវត្សមូលដ្ឋានរបស់មន្ត្រី, ប្រព័ន្ធព័ត៌មានមន្ត្រីរាជការតាមឧបករណ៍វៃឆ្លាត, និងប្រព័ន្ធតាមដានឯកសារមុខងារសាធារណៈ ព្រមទាំងផ្ទាលឌីជីថលគាំទ្រដល់ការបណ្តុះបណ្តាល និងការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែង តាមក្រសួង ស្ថាប័នថ្នាក់ជាតិ វិស័យអប់រំ និងសុខាភិបាលនៅថ្នាក់ក្រោមជាតិ។ ឯកឧត្តមឧបនាយករដ្ឋមន្ត្រីបន្ថែម។ ឯកឧត្តមឧបនាយករដ្ឋមន្ត្រី បន្តថា “ក្នុងន័យនេះ កិច្ចសហប្រតិបត្តិការរបស់ប្រទេសជាសមាជិកអាស៊ាន គឺពិតជាមាន សារៈសំខាន់ ជាពិសេសនាឱកាសនេះ ក្នុងវិស័យមុខងារសាធារណៈ ដែលយើងត្រូវ បន្តរៀបចំជាវេទិកាកម្រិតតំបន់ ដើម្បីរួមគ្នាកសាងសមត្ថភាព ចែករំលែកផ្លាស់ប្តូរគ្នា ទៅវិញទៅមកពីឧត្តមានុវត្តន៍ និងចំណេះដឹងបច្ចេកវិទ្យាទំនើបៗ ឆ្ពោះទៅការប្រើប្រាស់ និងចាប់យកឱ្យបានជាអតិបរិមានូវកាលានុវត្តភាព និងសក្តានុពលបច្ចេកវិទ្យាឌីជីថល នៅក្នុងកិច្ចការរដ្ឋបាលសាធារណៈ និងការផ្តល់សេវាជូនប្រជាពលរដ្ឋ។”

រដ្ឋមន្រ្ដីក្រសួងអប់រំផ្ដាំទៅយុវជនថាទន្ទឹមនឹងមានស្មារតីស្នេហាជាតិក៏ត្រូវមានសមត្ថភាពទើបប្រទេសជាតិរីកច្រើនឆាប់រហ័ស រស់នៅប្រកបដោយកិត្តិយស និងរក្សាបាននូវសុខសន្តិភាព

ភ្នំពេញ៖ នៅព្រឹកថ្ងៃទី២៦ ខែសីហា ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានគណៈមេប្រយោគទូទាំងប្រទេស ប្រចាំរាជធានីភ្នំពេញ បានដឹកនាំកិច្ចប្រជុំស្តីពី ការណែនាំបច្ចេកទេសដល់គណៈមេប្រយោគប្រធានមណ្ឌល និងគណៈកម្មការនានាប្រចាំរាជធានីភ្នំពេញ សម្រាប់ការប្រឡងសញ្ញាបត្រមធ្យមសិក្សាទុតិយភូមិសម័យប្រឡង៖ ២៨ សីហា ២០២៥ ដែលប្រព្រឹត្តិទៅនៅ វិទ្យាល័យព្រះស៊ីសុវត្តិ និងមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា ឯកឧត្តម ឃាង សេង អនុប្រធានអង្គភាពប្រឆាំងអំពើពុករលួយ តំណាងដ៏ខ្ពង់ខ្ពស់ ឯកឧត្តម កិត្តិនីតិកោសលបណ្ឌិត ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ និងមន្ត្រីពាក់ព័ន្ធក្រោមឱវាទ លោក លោកស្រី គណៈមេប្រយោគ គណៈកម្មការអប្បមាទទូទាំងប្រទេសប្រចាំរាជធានីភ្នំពេញ ប្រធាន អនុប្រធានមណ្ឌលប្រឡង និងបុគ្គលិកអប់រំនាយកដ្ឋានកិច្ចការប្រឡង សរុបចំនួនប្រមាណ ៣៤១រូប។កិច្ចប្រជុំនេះរៀបចំឡើង ដើម្បីពិនិត្យនិងណែនាំពីសមាសភាព ប្រធាន អនុប្រធានមណ្ឌល និងមន្ត្រីអង្គភាពប្រឆាំងអំពើពុករលួយទាំងអស់ ដែលទទួលបន្ទុកតាមមណ្ឌលប្រឡងនានាក្នុងរាជធានីភ្នំពេញ , ណែនាំពីបច្ចេកទេស តួនាទី ភារកិច្ច និងផ្តល់អនុសាសន៍សំខាន់ៗ ដល់គណៈមេប្រយោគទាំងអស់ សម្រាប់ដំណើរការសំណេរនៃការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៥ សំដៅធានាឱ្យបាននូវដំណើរការនៃការប្រឡងប្រកបដោយតម្លាភាព យុត្តិធម៌ ការគោរពតាមគោលការណ៍ច្បាប់ និងលទ្ធផលទទួលយកបាន ស្របតាមពាក្យថា “អ្នកចេះគឺជាប់”។បន្ទាប់ពីស្តាប់របាយការណ៍ និងមតិសំណេះសំណាលរបស់ ឯកឧត្តម អនុប្រធានអង្គភាពប្រឆាំងអំពើពុករលួយរួចមក ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណដល់ថ្នាក់ដឹកនាំអង្គភាពប្រឆាំងអំពើពុករលួយ និងមន្ត្រីពាក់ព័ន្ធ ដែលតែងតែផ្តល់នូវកិច្ចសហការប្រកបដោយមនសិការទទួលខុសត្រូវខ្ពស់ និងថ្នាក់ដឹកនាំ ក្រសួងអប់រំ យុវជន និងកីឡាគ្រប់លំដាប់ថ្នាក់ និងមន្ត្រីអប់រំទាំងអស់ ដែលបានយកអស់កម្លាំងកាយចិត្តចូលរួមក្នុងការអនុវត្តកំណែទម្រង់ការប្រឡងសញ្ញាបត្រមធ្យមសិក្សាទុតិយភូមិ ឱ្យទទួលបានលទ្ធផលល្អប្រសើរឡើងជាលំដាប់ ដោយគូសរំលេចថា ពីមួយឆ្នាំទៅមួយឆ្នាំ ភាពមិនប្រក្រតីនានាដែលកើតឡើងក្នុងដំណើរការនៃការប្រឡងបានថមថយទៅ ដែលនេះឆ្លុះបញ្ចាំងពីកិច្ចខិតខំប្រឹងប្រែង និងប្រសិទ្ធភាព ដែលលេចចេញពីកិច្ចសហការគ្នាដ៏ល្អរបស់ភាគីពាក់ព័ន្ធទាំងអស់។ទន្ទឹមនឹងនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានទាញការចាប់អារម្មណ៍បន្ថែមពាក់ព័ន្ធនឹងករណីមួយចំនួន ដូចជា៖ (១) សូមពិនិត្យឱ្យបានច្បាស់ និងអនុវត្តឱ្យបានខ្ជាប់ខ្ជួននូវកម្រងភារកិច្ចរបស់ ប្រធានមណ្ឌលសំណេរដែលត្រូវទទួលខុសត្រូវចំពោះមុខគណៈកម្មការសំណេរ និងការ ប្រាស្រ័យទាក់ទងជាមួយអាជ្ញាធរ និងការរៀបចំរបាយការណ៍ប្រចាំថ្ងៃ (២) ពិនិត្យមើលការប្រើប្រាស់ទូរស័ព្ទដៃក្នុងមណ្ឌលប្រឡង បង្ការការបែកធ្លាយវិញ្ញាសា កុំឱ្យមានការចម្លង ពង្រឹងយន្តការឆែកបេក្ខជន (៣) ហាមឃាត់មិនឱ្យមានការថតប្រធានវិញ្ញាសាបង្ហោះ ចែកចាយរូបភាពវិញ្ញាសាគ្រប់កាលៈទេសៈ ទោះក្រោយបញ្ចប់ដំណើរការសំណេរ (៤) ប្រុងប្រយ័ត្នពេលវេចខ្ចប់វិញ្ញាសាប្រឡងបេក្ខជន និងសំណៅឯកសារនានាឱ្យបានត្រឹមត្រូវ ដោយនេះជារដូវភ្លៀង ត្រូវត្រៀមឱ្យបានរួចរាល់នូវថង់ផ្លាស្ទិចដើម្បីវេចខ្ចប់បង្ការការទទឹកខូចសំណៅឯកសារជាដើម។ជាថ្មីម្តងទៀត ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានគូសបញ្ជាក់ពីសារៈសំខាន់នៃការធ្វើកំណែទម្រង់ការប្រឡងមធ្យមសិក្សាទុតិយភូមិ ដែលជាផ្នែកមួយដ៏សំខាន់នៃកំណែទម្រង់វិស័យអប់រំកម្ពុជាទាំងមូល ដែលមានគោលដៅចម្បង គឺដើម្បីពង្រឹងធនធានមនុស្សនៅកម្ពុជា ជំរុញឱ្យសិស្សប្រឹងប្រែងរៀនសូត្រ ឯគ្រូក៏ខំប្រឹងបង្រៀន ត្បិតថាទាល់តែមានការប្រឡងដែលតឹងរឹង មានតម្លាភាព និងភាពយុត្តិធម៌ ទើបអាចជំរុញឱ្យសិស្សខិតខំប្រឹងប្រែងរៀនពិតប្រាកដ ដូច្នេះកម្ពុជានឹងទទួលបាននូវធនធានមនុស្សប្រកបដោយគុណភាព ដែលជាកម្លាំងចលករដ៏សំខាន់គាំទ្រដល់ការអភិវឌ្ឍប្រទេសជាតិ ព្រមទាំងផ្តាំផ្ញើទៅកាន់យុវជនកម្ពុជាទាំងអស់ សូមឱ្យចងចាំថា ទន្ទឹមនឹងមានស្មារតីស្នេហាជាតិ ក៏ត្រូវមានសមត្ថភាពផងដែរ ទើបប្រទេសជាតិយើងរីកច្រើនឆាប់រហ័ស រស់នៅប្រកបដោយកិត្តិយស និងរក្សាបាននូវសុខ សន្តិភាព បូរណភាពទឹកដី និងការអភវិឌ្ឍប្រកបដោយចីរភាព។តាងនាមក្រសួងអប់រំ យុវជន និងកីឡា ឯកឧត្តមបបណ្ឌិតសភាចារ្យ ឧបនាយករដ្ឋមន្ត្រី សូមលើកទឹកចិត្តក្រុមការងារទទួលបន្ទុកការប្រឡងឆ្នាំនេះទាំងអស់ ឱ្យបន្តខិតខំបំពេញតាមភារកិច្ចរៀងៗខ្លួនប្រកបដោយវិជ្ជាជីវៈ និងប្រសិទ្ធភាព ដើម្បីជំរុញឱ្យដំណើរការនៃការប្រឡងប្រព្រឹត្តិទៅប្រកបដោយភាពរលូនជោគជ័យ និងសូមជូនពរឱ្យមានសុខ សុវត្ថិភាព សុខភាពល្អ និងទទួលបានជោគជ័យនៅក្នុងការបំពេញភារកិច្ចដ៏សំខាន់នេះ ដើម្បីរួមចំណែកពង្រឹងគុណភាពធនធានមនុស្សកម្ពុជាឱ្យកាន់តែរឹងមាំ៕

ក្រុមអ្នកសង្កេតការណ៍អន្ដរកាល IOT ដឹកនាំដោយអនុព័ន្ធយោធាម៉ាឡេស៊ីចុះពិនិត្យជាក់ស្ដែងនៅភូមិជោគជ័យ ចំណុចទាហានថៃរាយបន្លាលួស

បន្ទាយមានជ័យ៖ ក្រុមអ្នកសង្កេតការណ៍អន្ដរកាល (IOT) ចំនួន៥ប្រទេស ដឹកនាំដោយអនុព័ន្ធយោធាម៉ាឡេស៊ីប្រចាំប្រទេសកម្ពុជា នៅថ្ងៃទី២៦ ខែសីហា ឆ្នាំ២០២៥នេះ បានចុះទៅពិនិត្យជាក់ស្ដែងនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ទីដែលកម្លាំងទាហានថៃ បានចូលមកឡោមព័ទ្ធ និងរាយលួសបន្លាយកដី ព្រមទាំងផ្ទះប្រជាពលរដ្ឋកម្ពុជាជាច្រើនគ្រួសារ។ក្នុងពេលចុះពិនិត្យជាក់ស្ដែង នៅទីតាំងដែលទាហានថៃរាយលួសបន្លាយកដី និងផ្ទះប្រជាពលរដ្ឋកម្ពុជានោះ លោក អ៊ុ រាត្រី អភិបាលខេត្តបន្ទាយមានជ័យ និងលោកឧត្តមសេនីយ៍ទោ សេង ធារិន មេបញ្ជាការរងយោធភូមិភាគទី៥ បានធ្វើការពន្យល់ និងរៀបរាប់បញ្ជាក់លម្អិតអំពីបញ្ហាដែលបានកើតឡើង ដែលបង្កដោយក្រុមទាហានថៃ មកលើប្រជាពលរដ្ឋកម្ពុជា រហូតធ្វើឲ្យប្រជាពលរដ្ឋកម្ពុជាខឹងសម្បា និងផ្ទុះការតវ៉ាទៅកាន់ក្រុមទាហានថៃ។នៅរសៀលថ្ងៃទី២៦ ខែសីហា ក្រុមអ្នកសង្កេតការណ៍អន្តរកាល (IOT) បានចុះទីតាំងជាក់ស្តែងដើម្បីសង្កេត ផ្ទៀងផ្ទាត់ និងរាយការណ៍ នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ បន្ទាប់មកក្រុមការងារបន្តចុះទៅដល់ទីតាំងជាក់ស្តែងដើម្បីសង្កេត ផ្ទៀងផ្ទាត់ និងរាយការណ៍អំពីស្ថានភាពព្រំដែន ត្រង់ចំណុចបណ្តោយព្រំដែនលេខ៤៧ នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យផងដែរ។សូមបញ្ជាក់ថា កងកម្លាំងយោធាថៃ កាលពីថ្ងៃទី២៥ ខែសីហា ឆ្នាំ២០២៥ នៅវេលាម៉ោង១៤៖២០នាទី បានចូលមករាយលួសបន្លា នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលមានភូមិសាស្ដ្រទល់មុខភូមិណងចាន់ ឃុំខកសុខ ខេត្តស្រះកែវ ប្រទេសថៃ។ បន្ទាប់មកនៅវេលាម៉ោង១៥៖១៤នាទីរសៀល កងកម្លាំងថៃ បានធ្វើសកម្មភាពជាថ្មីបម្រុងយកបន្លាលួសមករាយម្ដងទៀត ហើយក៏ត្រូវបានប្រជាពលរដ្ឋដែលជាម្ចាស់ដី និងប្រជាពលរដ្ឋផ្សេងៗទៀត ធ្វើការទប់ស្កាត់យ៉ាងខ្លាំងក្លា រហូតដល់កងកម្លាំងថៃ យកបន្លាលួសរបស់ខ្លួនចូលត្រឡប់ទៅវិញ។លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៅព្រឹកថ្ងៃទី២៦ ខែសីហា ឆ្នាំ២០២៥នេះ បានលើកឡើងថា សកម្មភាពរបស់ប្រជាពលរដ្ឋកម្ពុជាដែលចេញតវ៉ាប្រឆាំងនឹងការរាយបន្លាលួសរបស់កងកម្លាំងយោធាថៃ ក្នុងភូមិសាស្ដ្រភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កើតឡើងដោយតែឆន្ទៈស្រលាញ់ទឹកដី និងការពារកម្មសិទ្ទិស្របច្បាប់របស់ពួកគាត់៕

កម្ពុជា សម្ពោធដាក់ឱ្យប្រើប្រាស់យុទ្ធសាស្រ្តពង្រីក និងពិពិធកម្មទីផ្សានាំចេញអង្ករ ២០២៥-២០៣០

ភ្នំពេញ៖ នៅព្រឹកថ្ងៃទី២៦ ខែសីហា ឆ្នាំ២០២៥ សហព័ន្ធស្រូវអង្ករកម្ពុជា បានរៀបចំពិធីសម្ពោធដាក់ឱ្យប្រើប្រាស់ផ្លូវការនៃយុទ្ធសាស្រ្តពង្រីក និងពិពិធកម្មទីផ្សានាំចេញអង្ករកម្ពុជា ២០២៥-២០៣០ និងកម្មវិធីមហាសន្និបាតសហព័ន្ធស្រូវអង្ករកម្ពុជា អាណត្តិទី៤ និងការបោះឆ្នោតជ្រើសរើសប្រធានសហព័ន្ធ ប្រធាន និងសមាជិកក្រុមប្រឹក្សាភិបាល នៃសហព័ន្ធស្រូវអង្ករកម្ពុជា អាណត្តិទី៥។ពិធីសម្ពោធនេះ បានប្រព្រឹត្តទៅក្រោមអធិបតីភាព ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងលោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម និងមានការអញ្ជើញចូលរួមពីភ្ញៀវជាតិ និងអន្តរជាតិជាច្រើននាក់។លោក លន់ យ៉េង អគ្គលេខាធិការនៃសហព័ន្ធស្រូវអង្ករកម្ពុជា បានមានប្រសាសន៍ប្រាប់បណ្តាញអ្នកសារព័ត៌មាន ឱ្យដឹងថា យុទ្ធសាស្រ្តពង្រីក និងពិពិធកម្មទីផ្សានាំចេញអង្ករកម្ពុជា ឆ្នាំ២០២៥-២០៣០ មានគោលបំណងដើម្បីរួមសហការគ្នា និងសម្រេចបានគោលដៅនាំចេញអង្ករចំនួន ១លានតោន នៅឆ្នាំ២០៣០ ដែលការណ៍នេះ នឹងបង្ហាញពីតួនាទីដ៏សំខាន់របស់កម្ពុជាក្នុងកិច្ចការកែលម្អសន្តិសុខ ស្បៀង និងអាហារូបត្ថម្ភជាសកល។លោកបានបន្តថា យុទ្ធសាស្ត្រនាំចេញនេះ នឹងដើរតួរជាត្រីវិស័យ និងជាការណែនាំ ដើម្បីដោះស្រាយបញ្ហាប្រឈមនានា និងបើកឱកាសការធ្វើពាណិជ្ជកម្មបន្ថែមទៀតសម្រាប់វិស័យស្រូវអង្ករកម្ពុជា ដែលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជាគោលការណ៍គឺ “រក្សាទីផ្សារដែលមានស្រាប់ ខណៈពេលដែលបើកទីផ្សារថ្មីបន្ថែមទៀត”។នៅក្នុងកម្មវិធីនេះ ឯកឧត្តមរដ្ឋមន្រ្តី ឌិត ទីណា បានអបអរសាទរនូវកម្មវិធីយុទ្ធសាស្ត្រពង្រីកទីផ្សារស្រូវអង្ករកម្ពុជា ខណៈពេលបច្ចុប្បន្ននេះក្រសួងកសិកម្ម និងបណ្តារោងម៉ាស៊ីននានា បានខិតខំព្យាយាមជួយសម្រួលដល់ការលក់ចេញស្រូវរបស់ប្រជាកសិករ និងបានលើកឡើងពីភាពជោគជ័យរបស់កម្ពុជាចាប់តាំងពីការខ្វះខាតស្រូវអង្ករ រហូតដល់អភិវឌ្ឍន៍រីកចម្រើនអាចនាំចេញជាលក្ខណៈពាណិជ្ជកម្មនៅលើទីផ្សារអន្តរជាតិ។ជាមួយគ្នានេះ ឯកឧត្តមរដ្ឋមន្រ្តី បានផ្តល់អនុសាសន៍ណែនាំដល់សហព័ន្ធស្រូវអង្ករកម្ពុជា ត្រូវគិតគូរឱ្យមានភាពបន្ស៉ីគ្នា ដាក់ចេញនូវយុទ្ធសាស្រ្តមុតស្រួចវែងឆ្ងាយ អនុវត្តប្រកបដោយប្រសិទ្ធភាព និងបង្កើនភាពជឿជាក់ពីប្រជាកសិករ ជាពិសេសជំរុញការធ្វើទីផ្សារក្រៅស្រុក និងស្លាកយីហោអង្ករក្រអូបកម្ពុជា ជាមួយនឹងគុណភាពខ្ពស់ តម្លៃថ្លៃ មានលក្ខណៈពិសេសខុសដាច់គេ ស្របពេលដែលកម្ពុជាមានបទពិសោធន៍ជោគជ័យជាច្រើនក្នុងការធ្វើទីផ្សារផលិតផលនេះ៕ អត្ថបទ៖ ឈិត បូរ៉ាវី

បណ្ដាញសង្គម

ព័ត៌មានថ្មីៗ

រ៉្វាន់ដា៖ ការអំពាវនាវរបស់កុងហ្គោឲ្យ UN ទទួលស្គាល់មាន «អំពើប្រល័យពូជសាសន៍» គឺជាទង្វើ «ល្ងង់ខ្លៅ»

វិមានក្រឹមឡាំងបដិសេធមិនធ្វើអត្ថាធិប្បាយ ជុំវិញឧប្បត្តិហេតុយានដ្រូន នៅប៉ូឡូញ

ក្រុមបារាំងកៀរគរគ្នាដើម្បីបេតិកភណ្ឌកម្ពុជា

នាយករដ្ឋមន្ត្រីអង់គ្លេស៖ ការរំលោភរបស់រុស្ស៊ីលើដែនអាកាសប៉ូឡូញ គឺជា «ធ្វេសប្រហែសខ្លាំងណាស់»

សមាជិកព្រឹទ្ធសភាអូស្ត្រាលីស្តាំនិយម ត្រូវបណ្តេញចេញពីក្រសួងស្រមោល ជុំវិញការអត្ថាធិប្បាយប្រឆាំងឥណ្ឌា

ក្រុមហ៊ុនអាកាសចរណ៍ JAL រងការព្រមានជាលើកទី២ ពាក់ព័ន្ធនឹងអ្នកបើកបរយន្តហោះស្រវឹង

ប្រមុខគណៈកម្មការ EU បញ្ជាក់ថា លោកស្រីនឹងស្នើវិធានការថ្មីផ្ដោតលើអ៊ីស្រាអែល

សំឡេងផ្ទុះបន្លឺឡើង ក្រោយរថយន្តផ្លូវដែកផ្ទុកដោយឥន្ធនៈ មានអគ្គិភ័យ នៅលីទុយអានី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877