BTV NEWS

ឧបនាយករដ្ឋមន្រ្តីប្រចាំការ វង្សី វិស្សុត ដឹកនាំកិច្ចប្រជុំត្រួតពិនិត្យវឌ្ឍនភាព និងពង្រឹងប្រសិទ្ធភាពការងារក្រុមប្រឹក្សាអ្នកច្បាប់

កម្ពុជាគ្រោងនឹងទិញយន្តហោះផលិតដោយចិនផ្ទាល់ ប្រភេទC909 regional ២០គ្រឿង ខណៈ១០គ្រឿងបានបញ្ជាទិញរួចហើយ

រាជរដ្ឋាភិបាលត្រៀមរថយន្តក្រុងជិត៦០០គ្រឿង ដឹកពលរដ្ឋដោយឥតគិតថ្លៃ រយៈពេល៦ថ្ងៃ ក្នុងឱកាសបុណ្យភ្ជុំបិណ្ឌ

រដ្ឋមន្រ្តីសុខាភិបាល អនុញ្ញាតឱ្យគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ជួបសម្តែងការគួរសម និងពិភាក្សាការងារ

ព័ត៌មានជាតិ

ឯកឧត្តម ជាម ច័ន្ទសោភ័ណ អញ្ជើញចុះសួរសុខទុក្ខពលបាលឯកមួយរូបកំពុងសម្រាកព្យាបាលនៅស្រុកកំណើតបន្ទាប់ពីរបួសនៅទិសប្រាសាទតាក្របី

ឯកឧត្តម ជាម ច័ន្ទសោភ័ណ អភិបាលខេត្តកំពង់ស្ពឺ និងជាប្រធានកិត្តិយស ស.អ.ក ខេត្ត ព្រមទាំងឧត្តមសេនីយ៍ទោ ម៉ាន់ ម៉ាច មេបញ្ជាការតំបន់ប្រត្តិបត្តិការសឹករងខេត្ត និងជាប្រធាន ស.អ.ក ខេត្ត នាព្រឹកថ្ងៃទី ២៦ ខែសីហា ឆ្នាំ២០២៥ បានដឹកនាំក្រុមការងាររដ្ឋបាលខេត្ត និងក្រុមការងារ ស.អ.ក ខេត្ត ចុះសំណេះសំណាលសាកសួរសុខទុក្ខ យុទ្ធជនម្នាក់រងរបួសក្នុងការប៉ះទង្គិចប្រដាប់អាវុធជាមួយកងទ័ពសៀមនៅតំបន់ព្រំដែន ដែលពេលនេះលោកកំពុងបន្តព្យាបាលជំងឺនៅគេហដ្ឋានក្នុងស្រុកបរសេដ្ឋ ខេត្តកំពង់ស្ពឺលោកពលបាលឯក ណុប វ៉ាន់ អាយុ ៥៨ ឆ្នាំ បម្រើការនៅវរសេនាតូចអន្តរាគមន៍លេខ ២៥១ កងពលតូចអន្តរាគមន៍លេខ៥ កងពលធំអន្តរាគមន៍លេខ២ លោកបានរងរបួសពេលប្រយុទ្ធតតាំងទ័ពសៀមទិសប្រាសាទតាក្របី។ មកទល់ពេលនេះស្ថានភាពរបួសរបស់លោកបានប្រសើរជាងមុនខ្លះហើយ បន្ទាប់ពីសម្រាកព្យាបាលនៅមន្ទីរពេទ្យខេត្តសៀមរាម និងមន្ទីរពេទ្យរុស្សីមួយរយៈ។ ក្នុងឱកាសចុះសួរសុខទុក្ខនេះ ឯកឧត្តមអភិបាលខេត្តក៏បាននាំយកការផ្ដាំផ្ញើសួរសុខទុក្ខពីសំណាក់សម្ដេចតេជោ ហ៊ុន សែន និងសម្ដេចធិបតី ព្រមទាំងនាំយកអំណោយមួយចំនួនរួមមាន អង្ករ មី ទឹកត្រី ទឹកស៊ីវ ត្រីខ និងថវិកាមួយចំនួន។

ឯកឧត្តមបណ្ឌិត ប៉ែន ស៊ីម៉ន អញ្ជើញជួបសំណេះសំណាលជាមួយសិស្សានុសិស្សថ្នាក់ទី១២ ទូទាំងខេត្តកំពត

ឯកឧត្តមបណ្ឌិត ប៉ែន ស៊ីម៉ន ប្រធានគណៈកម្មការទី១០ នៃរដ្ឋសភា និងជាតំណាងរាស្រ្តមណ្ឌល កំពត កាលពីថ្ងៃទី២៣ និងថ្ងៃទី២៤ ខែសីហា ឆ្នាំ២០២៥ បានអញ្ជើញជាអធិបតីក្នុងពិធីសំណេះសំណាលជាមួយសាស្ត្រាចារ្យ លោកគ្រូ អ្នកគ្រូ និងសិស្សានុសិស្សថ្នាក់ទី១២ ដែលត្រៀមប្រឡងសញ្ញាបត្រមធ្យមសិក្សាទុតិយភូមិក្នុងឆ្នាំសិក្សា ២០២៤-២០២៥ មកពីវិទ្យាល័យនានាទូទាំងខេត្តកំពត សរុបចំនួន ជាង៦,០០០ នាក់ នៅសាលាខេត្តកំពត។ ពិធីនេះមានការអញ្ជើញចូលរួមពីសំណាក់ ឯកឧត្តម តាក់ ហាប់ ប្រធានក្រុមប្រឹក្សាខេត្តកំពត ឯកឧត្តម លោកជំទាវ តំណាងរាស្ត្រមណ្ឌលខេត្តកំពត សមាជិក សមាជិកា ព្រឹទ្ធសភា លោកលោកស្រី អភិបាលរង ខេត្ត ប្រធានមន្ទីរអង្គភាពជុំវិញខេត្ត អង្គភាពចំណុះសាលាខេត្ត។ លោក សូ ភារិទ្ធ ប្រធានមន្ទីរ អប់រំយុវជន កីឡា និងខេត្តកំពត បានមានប្រសាសន៍ឱ្យដឹងថា៖សម្រាប់ឆ្នាំសិក្សា២០២៤-២០២៥ នេះ នៅ ខេត្តកំពតមានបេក្ខជនដែលត្រូវប្រឡងយកសញ្ញាបត្រមធ្យមសិក្សាទុតិយភូមិ មានចំនួន ៥,៣១៧ ស្រី ២,៩៩៥នាក់ចែកចេញជា១០ មណ្ឌលស្មើនឹង ២១៥ បន្ទប់ ។ ជាមួយគ្នានេះលោក សូ ភារិទ្ធ បានថ្លែងអំណរគុណចំពោះ ឯកឧត្តមបណ្ឌិត ប៉ែន ស៊ីម៉ន និងលោកជំទាវ ដែលបានឧបត្ថម្ភគាំទ្រលើកស្ទួយ វិស័យអប់រំសិក្សាធិការខេត្តជាបន្តបន្ទាប់តាមរយៈការផ្តល់អគារសិក្សា អាហារូបករណ៍ និងផ្តល់ថវិកាដល់លោកគ្រូ អ្នកគ្រូបើកវគ្គបំប៉ន។ ឆ្លៀតក្នុងឱកាសនោះ ឯកឧត្តមបណ្ឌិត ប៉ែន ស៊ីម៉ន បាននាំនូវការផ្តាំផ្ញើសាកសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចពញាចក្រី ហេង សំរិន ប្រធានកិត្តិយស នៃក្រុមឧត្តមប្រឹក្សាផ្ទាល់ព្រះមហាក្សត្រ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ជូនដល់សាស្ត្រាចារ្យ លោកគ្រូ អ្នកគ្រូ សិស្សានុសិស្សទាំងអស់។ ជាមួយនេះ ឯកឧត្តមបណ្ឌិត បានសម្តែងការកោតសរសើរ និងវាយតម្លៃខ្ពស់ចំពោះការយកចិត្តទុកដាក់ ខិតខំរៀនសូត្រ របស់ចៅៗ សិស្សានុសិស្សទាំងអស់ដោយមានជំនឿ យ៉ាងមុតមាំថាលទ្ធផលនៃការប្រឡងសញ្ញាបត្រមធ្យម សិក្សាទុតិយ ភូមិឆ្នាំសិក្សា ២០២៤-២០២៥ នេះ ពិតជាមានភាពប្រសើរជាងឆ្នាំមុនៗ ជាក់ជាពុំខាន។ ឯកឧត្តម បណ្ឌិត ប៉ែន ស៊ីម៉ន ក៏បានលើកឡើងពីបទពិសោធន៍នៃការ សិក្សារៀនសូត្រ និងផ្តល់ពុទ្ធិមួយចំនួនជាមូលដ្ឋានគ្រឹះសម្រាប់ចូល រួមប្រឡងសញ្ញាបត្រមធ្យមសិក្សាទុតិយភូមិនាខែសីហា ឆ្នាំ ២០២៥ ខាងមុខនេះ។ ឯកឧត្តមបណ្ឌិត បានជូនពរចៅៗទាំងអស់ប្រឡងជាប់និទ្ទេសល្អគ្រប់ៗគ្នា ដើម្បីបង្ហាញជាកិត្តិយសជូន លោកគ្រូ អ្នកគ្រូ ជូនសាលាយើង គ្រួសារយើង ស្រុកយើង និងខេត្តយើង។ ឯកឧត្តបណ្ឌិត បានជូនថវិកាលើកទឹកចិត្តដល់បេក្ខជនមកពីវិទ្យាល័យ នានាក្នុងខេត្តកំពតសរុបចំនួន ៥,៣១៧នាក់ក្នុងម្នាក់ៗទទួល បានថវិកា ៥ម៉ឺនរៀល លោកគ្រូ អ្នកគ្រូ ចំនួន ៤៤៩នាក់ ម្នាក់ៗថវិកា ១០ម៉ឺនរៀល គណៈគ្រប់គ្រងសាលាសរុបចំនួន ៧២នាក់ម្នាក់ៗថវិកា ១០ម៉ឺនរៀល កងកម្លាំងប្រដាប់អាវុធចូលរួមការពារក្នុងកម្មវិធី ម្នាក់ៗ២ម៉ឺនរៀលពេទ្យប្រចាំការម្នាក់ ៗ ៥ម៉ឺនរៀល៕

ប្រទេសកម្ពុជា និងខេត្តយូណាន បង្កើនកិច្ចសហការដើម្បីអភិវឌ្ឍន៍វិស័យទេសចរណ៍ និងជំរុញលំហូរភ្ញៀវទេសចរ

ភ្នំពេញ៖ កាលពីរសៀលថ្ងៃទី២៥ ខែសីហា ឆ្នាំ២០២៥ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូន ឯកឧត្តម XU Hao អភិបាលរង នៃខេត្តយូណាន និងគណៈប្រតិភូ អញ្ជើញចូលជួបពិភាក្សាការងារ ស្តីពីកិច្ចសហប្រតិបត្តិការលើវិស័យទេសចរណ៍ប្រទេសកម្ពុជា និងខេត្តយូណាន នៃសាធារណរដ្ឋប្រជាមានិតចិន ព្រមទាំងបង្ហាញពីគោលដៅទេសចរណ៍ដ៏ទាក់ទាញរបស់កម្ពុជា ដើម្បីជំរុញលំហូរភ្ញៀវទេសចរក្នុងខេត្តយូណានមកកាន់ប្រទេសកម្ពុជាឱ្យបានកាន់តែច្រើន។ ក្នុងជំនួបដ៏មានអត្ថន័យនេះ ភាគីទាំងពីរបានឯកភាពក្នុងការជួយជំរុញផ្សព្វផ្សាយទេសចរណ៍កម្ពុជា ទៅកាន់ប្រជាជនខេត្តយូណានឱ្យកាន់តែទូលំទូលាយ ដោយស្របតាមស្មារតីនៃ “ឆ្នាំទេសចរណ៍ កម្ពុជា-ចិន ២០២៥” ជាមួយគ្នានេះដែរ រដ្ឋបាលខេត្តយូណានសហការជួយទាក់ទាញវិនិយោគិនក្នុងខេត្តយូណានឱ្យមកបណ្តាក់ទុនបង្កើតផលិតផលទេសចរណ៍នៅកម្ពុជា ដែលពោរពេញដោយសក្តានុពល និងទទួលបានការការពារ ការអនុគ្រោះ និងការលើកទឹកចិត្តជាច្រើនពីប្រមុខថ្នាក់ដឹកនាំនៃប្រទេសទាំងពីរ ក៏ដូចជាការសហការរៀបចំ FAM Trip ដោយអញ្ជើញប្រតិភូសារព័ត៌មាន និង Influencers ល្បីៗពីខេត្តយូណាន ឱ្យមកទស្សនានិងជួយជំរុញផ្សព្វផ្សាយអំពីសក្តានុពលទេសចរណ៍កម្ពុជាឱ្យបានកាន់តែទូលំទូលាយបន្ថែមទៀតផងដែរ៕

គណៈកម្មាធិការអចិន្ត្រៃយ៍ព្រឹទ្ធសភាប្រជុំ ពិនិត្យ និងឱ្យយោបល់លើសេចក្តីព្រាងច្បាប់ស្តីពី វិសោធនកម្មច្បាប់ស្តីពីសញ្ជាតិ

ភ្នំពេញ៖ នៅវេលាម៉ោង៨:៣០ព្រឹក ថ្ងៃទី២៦ ខែសីហា ឆ្នាំ២០២៥ គណៈកម្មាធិការអចិន្ត្រៃយ៍ព្រឹទ្ធសភា នីតិកាលទី៥ បានដឹកនាំកិច្ចប្រជុំ ក្រោមអធិបតីភាពដ៏ខ្ពង់ខ្ពស់ឯកឧត្តម អ៊ុច បូររិទ្ធ ប្រធានស្តីទីព្រឹទ្ធសភា ដែលមានរបៀបវារៈចំនួន៣ដូចខាងក្រោម៖១- ពិនិត្យសំណើរបស់រដ្ឋសភា សុំពិនិត្យហើយឱ្យយោបល់លើសេចក្តីព្រាងច្បាប់ស្តីពីវិសោធនកម្មច្បាប់ស្តីពីសញ្ជាតិ។២- ពិនិត្យសំណើរបស់រដ្ឋសភា សុំពិនិត្យហើយឱ្យយោបល់លើសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងស្តីពីការអភិរក្ស និងការប្រើប្រាស់ជីវៈចម្រុះសមុទ្រប្រកបដោយចីរភាព នៅក្រៅដែនយុត្តាធិការជាតិក្រោមអនុសញ្ញាសហប្រជាជាតិស្តីពីច្បាប់សមុទ្រ។៣- ផ្សេងៗ៕

ពលករខ្មែរដែលបានត្រឡប់មកពីថៃប្រមាណជាង ១៣ម៉ឺននាក់ទទួលបានឱកាសការងារ

មកដល់ពេលនេះ ពលរដ្ឋ និងពលករខ្មែរដែលទើបត្រឡប់មកពីថៃជាង ១៣ម៉ឺននាក់ទទួលបានឱកាសការងារ។ នេះបើយោងតាមការលើកឡើងរបស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី២២ ខែសីហា ឆ្នាំ២០២៥ ក្នុងកម្មវិធីផ្សព្វផ្សាយស្តីពីយន្តការគាំទ្រដល់ពលករខ្មែរត្រឡប់មកពីប្រទេសថៃវិញ នៅទីស្តីការក្រសួងមហាផ្ទៃ។ជាមួយគ្នានេះ ឯកឧត្តមរដ្ឋមន្ត្រីក៏បានបញ្ជាក់ដែរថា ក្រោយពីការត្រឡប់មកវិញរបស់បងប្អូនពលករ ក្រសួងការងារជាដំបូងផ្តោតលើរោងចក្រធំៗ ដើម្បីធានាថាបងប្អូនពលករដែលត្រឡប់មកវិញទទួលបានឱកាសការងារជាមួយនឹងស្តង់ដារ និងលក្ខខណ្ឌការងារដែលល្អប្រសើរ។ឯកឧត្តមថ្លែងថា “យើងផ្តោតលើរោងចក្រធំៗដែលបម្រើការនាំចេញ ដោយសាររោងចក្រធំទាំងនោះមានលក្ខខណ្ឌការងារល្អ មានប្រាក់ខែប្រហាក់ប្រហែលថៃ កន្លែងធ្វើការមានស្តង់ដាប្រហាក់ប្រហែលថៃ និងទំនើប ដែលក្រោយពីបងប្អូនបានចូលធ្វើការងារហើយ គាត់នឹងមិនត្រឡប់ទៅវិញនោះទេ”។បន្ថែមពីនេះ ឯកឧត្តម ហេង សួរ បានលើកឡើងថា ក្រសួងការងារប្រមូលបានឱកាសការងាររាប់សិនម៉ឺនកន្លែងជារៀងរាល់សប្តាហ៍ ឯការប្រែប្រួលពីព័ត៌មានទីផ្សារការងារដោយសារតម្រូវការការងារជាច្រើនពីសំណាក់បងប្អូនពលករខ្មែរ ហើយវាក៏បង្ហាញពីការខិតខំនៃតួអង្គពាក់ព័ន្ធក្នុងការជួយរកការងារជូនពួកគាត់។ សូមបញ្ជាក់ថា ការទទួលបានឱកាសការងាររបស់ពលករខ្មែរជាង ១៣ម៉ឺននាក់ ដោយសារវិធានការពីរសំខាន់ៗគឺវិធានការដែលដាក់ចេញដោយក្រសួងការងារ និងការចូលរួមពីក្រុមហ៊ុនឯកជនផងដែរ៕

ព្រឹកនេះ ក្រុមអ្នកសង្កេតការណ៍៥ប្រទេស បន្តចុះពិនិត្យខេត្តបន្ទាយមានជ័យ ជាទីកន្លែងដែលថៃរាយបន្លាលួសចូលទឹកដីខ្មែរ

ក្រុមអ្នកសង្កេតការណ៍អន្តរកាល (IOT) នៅថ្ងៃទី២៦ ខែសីហាឆ្នាំ២០២៥នេះ បានបន្តចុះទៅពិនិត្យច្រកព្រំដែនកម្ពុជា និងថៃនៅតំបន់ខេត្តបន្ទាយមានជ័យ ជាទីកន្លែងដែលទាហានថៃមិនគោរពកិច្ចព្រមព្រៀងជាមួយកម្ពុជា ដោយបានព្យាយាមរាយបន្លាលួសចូលភូមិដ្ឋានរបស់ប្រជាពលរដ្ឋខ្មែរ ប៉ុន្តែដោយស្មារតីសាមគ្គី របស់ពលរដ្ឋខ្មែរ បានទប់ស្កាត់ និងប្រឆាំងទើបទាហានថៃសម្រេចដកខ្លួនចេញទៅវិញ។អ្នកនាំពាក្យក្រសួងការពារជាតិកម្ពុជា លោកជំទាវ ម៉ាលី សុជាតា បានថ្លែងនៅក្នុងសន្និសីទសារព័ត៌មានប្រចាំថ្ងៃ ស្តីពីការអនុវត្តបទឈប់បាញ់រវាងកម្ពុជា និងថៃនាព្រឹកថ្ងៃទី២៦ ខែសីហា ឆ្នាំ២០២៥នេះ បានឲ្យដឹងថា ថ្ងៃនេះក្រសួងការពារជាតិកម្ពុជា បានធ្វើការសម្របសម្រួលជូនក្រុមអ្នកសង្កេតការណ៍អន្តរកាល (IOT) ចំនួន៥ប្រទេសមានដូចជា ប្រទេសម៉ាឡេស៊ី ឥណ្ឌូនេស៊ី ឡាវ វៀតណាម និងហ្វីលីពីន ចេញពីភ្នំពេញទៅខេត្តបន្ទាយមានជ័យ ដើម្បីបន្តត្រួតពិនិត្យ និងសង្កេតការណ៍ជាក់ស្តែងនៅតំបន់នោះ បន្ទាប់ពីក្រុមទាហានថៃ បានប៉ុនប៉ងរាយបន្លាលួសចូលទឹកដីខ្មែរ។បើតាមអ្នកនាំពាក្យរបស់ក្រសួងការពារជាតិកម្ពុជា បានបញ្ជាក់ជាថ្មីម្តងទៀតនៅព្រឹកថ្ងៃនេះថា កាលពីថ្ងៃទី២៥ ខែសីហាម្សិលមិញនេះកងកម្លាំងយោធារបស់ថៃបានព្យាយាមរាយបន្លាលួសនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ទល់មុខភូមិសាស្ត្រភូមិ Nong Chan ស្រុក Khok Sung ខេត្តស្រះកែវ ប្រទេសថៃ ប៉ុន្តែដោយស្មារតីសាមគ្គីរបស់ប្រជាពលរដ្ឋខ្មែរនៅក្នុងភូមិនោះ រួមទាំងពលរដ្ឋខ្មែរនៅភូមិដទៃទៀត បានធ្វើការទប់ស្កាត់យ៉ាងខ្លាំងទើបកងកម្លាំងរបស់ថៃយកបន្លាលួសនោះត្រឡប់ទៅវិញ៕ អត្ថបទបាន ចក់

អ្នកនាំពាក្យក្រសួងការពារជាតិ៖រសៀលនេះ កងកម្លាំងយោធាថៃបានព្យាយាមរាយបន្លាលួសនៅភូមិជោគជ័យ ប៉ុន្តែត្រូវបានពលរដ្ឋ និងសមត្ថកិច្ចទីនោះទប់ស្កាត់យ៉ាងខ្លាំងទើបយកបន្លាលួសនោះត្រឡប់ទៅវិញ

អ្នកនាំពាក្យក្រសួងការពារជាតិកម្ពុជា បញ្ជាក់ថានៅថ្ងៃទី២៥ ខែសីហា ឆ្នាំ២០២៥ ចាប់ពីម៉ោង ១៤:២០ នាទី រសៀលនេះ កងកម្លាំងយោធារបស់ថៃបានព្យាយាមរាយបន្លាលួសនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលទល់មុខភូមិសាស្ត្រភូមិ Nong Chan ស្រុក Khok Sung ខេត្តស្រះកែវ ប្រទេសថៃ ប៉ុន្តែក៏ត្រូវបានប្រជាពលរដ្ឋ និងសមត្ថកិច្ចនៅភូមិជោគជ័យធ្វើការទប់ស្កាត់យ៉ាងខ្លាំងទើបកងកម្លាំងរបស់ថៃយកបន្លាលួសនោះត្រឡប់ទៅវិញ។ អ្នកនាំពាក្យក្រសួងការពារជាតិកម្ពុជា បន្តស្នើឱ្យភាគីថៃគោរពឱ្យបានពេញលេញ និងខ្ជាប់ខ្ជួននូវបទឈប់បាញ់ និងជាពិសេសស្មារតីនៃកិច្ចព្រមព្រៀង នៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ (RBC) រវាងយោធភូមិភាគទី៥របស់កម្ពុជា និងកងទ័ពភូមិភាគទី១របស់ថៃ ដែលបានប្រព្រឹត្តិឡើងកាលពីថ្ងៃទី២២ ខែសីហា ឆ្នាំ២០២៥ កន្លងទៅថ្មីៗនេះ ពាក់ព័ន្ធនឹងការមិនពង្រីកភូមិសាស្ត្រ នៃជម្លោះ និងជៀសវាងទង្វើដែលនាំទៅដល់ការកើនឡើងនៃភាពតានតឹង។ អ្នកនាំពាក្យក្រសួងការពារជាតិកម្ពុជា បានបញ្ជាក់ជាថ្មីថា កម្ពុជាបញ្ជាក់ថា រាល់ទំនាស់ពាក់ព័ន្ធនឹងបញ្ហាព្រំដែនត្រូវយកទៅដោះស្រាយដោយគណៈកម្មាធិការចម្រុះខណ្ឌសីមាព្រំដែនគោក (JBC) នៃប្រទេសទាំងពីរ ស្របតាមស្មារតីនៃអនុស្សរណៈនៃការយោគយល់ឆ្នាំ២០០០ (MOU 2000)៕

សហជីពនៅកម្ពុជា៖ វិធានការរកការងារជូនពលករមកពីថៃរបស់ក្រសួងការងារមានលក្ខណៈគ្រប់ជ្រុងជ្រោយ លឿនរហ័ស និងបង្ហាញពីការយកចិត្តទុកដាក់

(ភ្នំពេញ)៖ សហជីពនៅកម្ពុជាវាយតម្លៃថាការដាក់ចេញនូវវិធានការរបស់ក្រសួងការងារ និងបណ្តុះបណ្តាលវិជ្ជាជីវៈក្នុងការរកការងារជូនពលករខ្មែរដែលត្រឡប់មកពីថៃគឺមានប្រសិទ្ធខ្ពស់ និងបានបង្ហាញពីការយកចិត្តទុកដាក់ជាខ្លាំង។ ការវាយតម្លៃរបស់សហជីពនេះ គឺធ្វើឡើងក្រោយក្រសួងការងារបានដាក់ចេញនូវវិធានការសំខាន់ៗចំនួន ១១ចំណុចដើម្បីសម្របសម្រួលដល់ពលករខ្មែរដែលត្រឡប់មកពីថៃឱ្យទទួលបានឱកាសការងារ។លោក សំ សឿន ប្រធានសហភាពពលកម្មជាតិកម្ពុជា បានលើកឡើងថា ការដាក់ចេញនូវយុទ្ធនាការរបស់ក្រសួងការងារ គឺពិតជាមានសារៈសំខាន់ និងចាំបាច់ដើម្បីធានានូវការរកការងារធ្វើជូនបងប្អូនពលករ។លោក សំ សឿន បានគូសបញ្ជាក់ថា៖ “យុទ្ធនាការ និងយន្តការនានារបស់ក្រសួងការងារដែលបានជួយសម្របសម្រួលដល់បងប្អូនពលករដែលត្រឡប់មកពីប្រទេសថៃ ឱ្យទទួលបានឱកាសការងារនេះ គឺជាការចាំបាច់ និងមានសារៈសំខាន់ ហើយវាជាការយកចិត្តទុកដាក់មួយដែលក្រសួងការងារបានដាក់ចេញបន្ថែមលើការងារដែលមានស្រាប់នៅក្នុងព្រះរាជាណាចក្រកម្ពុជា”។ទន្ទឹមនឹងនេះ លោក គឹម ចាន់សំណាង ប្រធានសភាសម្ព័ន្ធសហជីពកម្ពុជា មានប្រសាសន៍ថាវិធានការដែលក្រសួងបានដាក់ចេញ គឺមានភាពល្អប្រសើរ និងស្របជាមួយនឹងតម្រូវការកម្លាំងពលកម្មនៅក្នុងប្រទេសកម្ពុជា។លោកលើកឡើងថា៖ “នេះជាវិធានការដ៏ល្អរបស់ក្រសួងការងារក្នុងការទទួលយកពលករខ្មែរដែលត្រឡប់មកពីប្រទេសថៃ ដោយបានផ្តល់ការងារជូនដល់ពួកគាត់ ខណៈដែលបច្ចុប្បន្ននេះ នៅកម្ពុជាសម្បូរនូវការងារជាច្រើនដែលមានតម្រូវការកម្លាំងពលកម្មស្រាប់”។ជាមួយគ្នានេះ លោក ហង្ស រ៉ាវី ប្រធានសហភាពសហជីពរក្សាសិទ្ធកម្មករកម្ពុជា បានគូសបញ្ជាក់ពីការចូលរួមរបស់សហជីពជាមួយក្រសួងការងារក្នុងការសម្របសម្រួលឱ្យបងប្អូនពលករខ្មែរបានចូលធ្វើការងារ ជាពិសេសគឺការបង្កើតនូវទំនាក់ទំនងល្អជាមួយនិយោជកឱ្យកាន់តែល្អប្រសើរ។ប្រធានសហជីពរូបនេះ លើកឡើងថា៖ “ក្នុងនាមជាសហជីព ក៏បានចូលរួមគាំទ្រយ៉ាងពេញទំហឹងលើការរៀបចំរបស់ឯកឧត្តមរដ្ឋមន្ត្រីក្រសួងការងារ និងបានចូលរួមផ្សព្វផ្សាយដល់សមាជិកសមាជិកានៅតាមរោងចក្រ និងជួយផ្សព្វផ្សាយជាមួយនឹងនិយោជកអំពីការយកចិត្តទុកដាក់ ការរក្សាទំនាក់ទំនងល្អជាមួយពលករដែលចូលធ្វើការ ដើម្បីបង្ហាញពីភាពយកចិត្តទុកដាក់ទៅវិញទៅមក”។ដើម្បីធានាថាវិធានការរបស់ក្រសួងការងារកាន់តែមានប្រសិទ្ធិភាព សហជីពនៅកម្ពុជាសូមអំពាវនាវដល់បងប្អូនប្រជាជនខ្មែរ ជាពិសេសពលករខ្មែរដែលបានត្រឡប់មកពីថៃ សូមរូតរះដាក់ពាក្យរកការងារធ្វើ ដើម្បីឆាប់ទទួលបានឱកាសការងារ និងសូមរក្សាភាពអត់ធ្មត់ និងជឿជាក់លើការសម្របសម្រួលរបស់ក្រសួងការងារក្នុងការរកការងារជូនបងប្អូនពលករ និងប្រជាជនខ្មែរគ្រប់ៗគ្នា។បន្ថែមពីនេះ សហជីពនៅកម្ពុជាបានអះអាងថា ខ្លួនបានត្រៀមខ្លួនរួចជាស្រេចដើម្បីសហការជាមួយក្រសួងការងារក្នុងការសម្របសម្រួល និងស្វែងរកឱកាសការងារជូនដល់ពលរដ្ឋ ជាពិសេសពលករខ្មែរដែលបានត្រឡប់មកពីប្រទេសថៃវិញ៕

ឯកឧត្តមបណ្ឌិតសភាចារ្យ ហង់ជួន ណារ៉ុន អញ្ជើញដឹកនាំកិច្ចប្រជុំកិច្ចប្រជុំស្តីពី ការអនុវត្តសាកល្បងគន្លងអប់រំថ្មី នៅវិទ្យាល័យទេពប្រណម្យ ខេត្តកណ្តាល

នាព្រឹកថ្ងៃទី២៥ ខែសីហា ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានដឹកនាំកិច្ចប្រជុំស្តីពី ការអនុវត្តសាកល្បងគន្លងអប់រំថ្មី នៅវិទ្យាល័យទេពប្រណម្យ ខេត្តកណ្តាល ដោយមានការចូលរួមពីសំណាក់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា និងមន្ត្រី និងក្រសួងការងារ និងបណ្ដុះបណ្ដាលវិជ្ជាជីវៈ និងមន្ត្រីមកពីនាយកដ្ឋានពាក់ព័ន្ធក្រោមឱវាទនៃក្រសួងទាំងពីរ តំណាងក្រសួងប្រៃសណីយ៍ សាកលវិទ្យាល័យអេស៊ីលីដា សាកលវិទ្យាល័យខេមតិច នាយកវិទ្យាល័យពាក់ព័ន្ធ អាជ្ញាធរដែនដី គណៈគ្រប់គ្រងសាលា និងលោកគ្រូ អ្នកគ្រូ។ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានរម្លឹកពីបុព្វហេតុនៃការរៀបចំឱ្យមានគន្លងអប់រំថ្មី តបតាមអនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលចង់បង្កលក្ខណៈកាន់តែច្រើនដើម្បីឱ្យសិស្សចូលរៀនបន្ថែមទៀតនៅកម្រិតមធ្យមសិក្សា ទាំងបឋមភូមិ និងទុតិយភូមិ និងមានគោលដៅបង្កើនប្រសិទ្ធភាពនៃប្រព័ន្ធអប់រំបច្ចុប្បន្នឱ្យឆ្លើយតបនឹងស្ថានភាពជាក់ស្តែងរបស់កម្ពុជា សំដៅកាត់បន្ថយអត្រាបោះបង់ការសិក្សា ជាពិសេសនឹងជួយសម្រាលស្ថានភាពយុវជន ឬកុមារនៃគ្រួសារពលករកម្ពុជាដែលវិលត្រឡប់ពីប្រទេសថៃ មានការលំបាកក្នុងការចាប់យកការសិក្សាចំណេះទូទៅ អាចចាប់ផ្តើមចូលរៀនកម្មវិធីស្ពានចម្លងស្របតាមវ័យរបស់ពួកគេ ដើម្បីទទួលចំណេះជំនាញច្បាស់លាស់សម្រាប់កសាងអនាគត។ក្រសួងអប់រំ យុវជន និងកីឡា នឹងអនុវត្តកម្មវិធីអប់រំតម្រង់ទិសការសិក្សា ដល់សិស្សចាប់ពីថ្នាក់ទី៧ ដល់ថ្នាក់ទី៩ នៅអនុវិទ្យាល័យ និងវិទ្យាល័យនានា។ ក្រសួងនឹងសាកល្បងអនុវត្តគន្លងអប់រំថ្មីរួមមាន គន្លងវិទ្យាសាស្រ្ត វិទ្យាសាស្រ្តសង្គម និងគន្លងវិជ្ជាជីវៈ ចាប់ពីថ្នាក់ទី១០ នៅតាមវិទ្យាល័យគោលដៅមួយចំនួន ក្នុងនោះរួមាន វិទ្យាល័យដែលមានអគារធនធាន, វិទ្យាល័យមានមជ្ឈមណ្ឌលបច្ចេកវិទ្យាឌីជីថលសហគមន៍, គ្រឹះស្ថានសិក្សាអប់រំបច្ចេកទេស,វិទ្យាល័យស្ថិតនៅក្បែរតំបន់សេដ្ឋកិច្ចពិសេស និងតំបន់ដែលមានដំណើរការសេដ្ឋកិច្ច។ ការអនុវត្តគន្លងសិក្សាថ្មី នៅវិទ្យាល័យទេពប្រណម្យ គឺបានជួយឱ្យសិស្សមានលទ្ធភាពទទួលបានការអប់រំមួយដែលមានជំនាញច្បាស់លាស់ និងកាត់បន្ថយអត្រាបោះបង់ការសិក្សារបស់សិស្សដែលសាលារៀនស្ថិតនៅកម្រិតខ្ពស់ និងមានភាពទាក់ទាញឱ្យមានការចូលរួមកាន់តែខ្លាំងឡើងពីសហគមន៍សាលារៀន។តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅចំពោះការចូលរួមចំណែករបស់ភាគីពាក់ព័ន្ធទាំងអស់ដែលជំរុញឱ្យការអនុវត្តគន្លងអប់រំថ្មីមានវឌ្ឍនភាពឈានដល់ការអនុវត្តសាកល្បងសម្រាប់ឆ្នាំសិក្សា២០២៥-២០២៦ ជាពិសេសសូមកោតសរសើរ ចំពោះការប្តេជ្ញាចិត្តខ្ពស់របស់ វិទ្យាល័យទេពប្រណម្យ ក៏ដូចជាសាលារៀនគោលដៅទាំងអស់ ចំពោះកិច្ចខិតខំប្រឹងប្រែងចូលរួមអនុវត្តគន្លងអប់រំថ្មីឱ្យទទួលបានជោគជ័យ ដោយសូមឱ្យបន្តរក្សាស្មារតីសហការគ្នាឱ្យកាន់តែល្អប្រសើរឡើង ដើម្បីឈានទៅសម្រេចគោលដៅរួមគ្នាជាច្រើនបន្ថែមទៀត ក្នុងបុព្វហេតុអភិវឌ្ឍធនធានមនុស្សកម្ពុជាឱ្យកាន់តែរឹងមាំ។ ជាមួយគ្នានេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍គន្លឹះ ៨ចំណុច រួមមាន៖ (១) វិទ្យាល័យទេពប្រណម្យ ស្ថិតក្នុងតំបន់ដែលមានទីធ្លាធំទូលាយ ហ៊ុមព័ទ្ធដោយប្រព័ន្ធអេកូឡូស៊ីសេដ្ឋកិច្ច អំណោយផលដល់ការអនុវត្តគន្លងអប់រំថ្មី (២) យកឱកាសនេះពង្រឹងការប្រឡងមធ្យមសិក្សាបឋមភូមិ ដោយក្រសួងនឹងរៀបចំជាស្តង់ដារួមថ្នាក់ជាតិ និងលក្ខណៈវិនិច្ឆ័យច្បាស់លាស់ក្នុងការបែងចែក សិស្សវិទ្យាសាស្ត្រ និងវិទ្យាសាស្ត្រសង្គម (៣) កែប្រែទស្សនទានពាក់ព័ន្ធនឹងការបណ្ដុះបណ្ដាលបច្ចេកទេសវិជ្ជាជីវៈ ដែលនេះមិនមែនសម្រាប់តែសិស្សរៀនខ្សោយទេ សិស្សដែលខ្លាំងក៏អាចចូលរៀនបានដែរ, សូមឱ្យបញ្ចូលកម្មវិធីរៀនថ្មីៗ ទំនើបៗ ដូចជាជំនាញឌីជីថល Coding AI ឌីហ្សាញ ជាដើម ដើម្បីឆ្លើយតបនឹងទីផ្សារការងារ ដោយសូមស្នើឱ្យនាយកដ្ឋានពាក់ព័ន្ធចូលរួមគាំទ្រ ជាពិសេសការចូលរួមសហការពីសំណាក់ ក្រសួងការងារ និងបណ្ដុះបណ្ដាលវិជ្ជាជីវៈ (៤) សូមផ្សារភ្ជាប់កម្មវិធីរៀននេះ ទៅនឹងឧត្តមសិក្សា ដោយអញ្ជើញគ្រូ ឬ សាស្ត្រាចារ្យនៅឧត្តមសិក្សាមកជួយបង្រៀន និងអាចផ្តល់ឱកាសដល់សិស្សដែលរៀនពូកែមានឱកាសបន្តទៅរៀននៅសាកលវិទ្យាល័យ (៥) សូមបញ្ចូលយុទ្ធសាស្ត្របង្រៀននៅសាលាជំនាន់ថ្មី (៦) សូមសហការជាមួយគម្រោងកែលម្អកម្មវិធីអប់រំនានា ដោយត្រូវប្រើប្រាស់ធនធានឱ្យអស់ពីលទ្ធភាព និងមានប្រសិទ្ធភាព (៧) ស្វែងរកការគាំទ្របន្ថែម និងបង្កើតភាពជាដៃគូជាមួយដៃគូអភិវឌ្ឍនានា (៨) ស្នើឱ្យក្រុមការងារគោលនយោបាយ ក្នុងកិច្ចសហការជាមួយក្រសួងការងារ និងបណ្ដុះបណ្ដាលជំនាញវិជ្ជាជីវៈ បន្តសិក្សាបន្ថែមពីទីផ្សារការងារ និងជំនាញដែលមានតម្រូវការនាពេលបច្ចុប្បន្ន និងអនាគត ៕

អំណោយរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាសម្ភារៈប្រើប្រាស់បានប្រគល់ជូនជនភៀសសឹកក្នុងខេត្តព្រះវិហារ

ព្រះវិហារ៖ នៅថ្ងៃទី២៥ ខែសីហា ឆ្នាំ២០២៥ ឯកឧត្តម គីម រិទ្ធី អភិបាលខេត្តព្រះវិហារ បានចុះសួរសុខទុក្ខ និងនាំយកអំណោយរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា រួមមាន សាប៊ូដុសខ្លួន សាប៊ូបោកខោអាវ ឈុតឆ្នាំង ចាន វែកបាយ វែកសម្លរ និងស្លាបព្រា ដើម្បីចែកជូនដល់បងប្អូនប្រជាពលរដ្ឋភៀសសឹក ដែលកំពុងស្នាក់នៅមណ្ឌលសុវត្ថិភាពវត្តពោធិ៍សិលារាម និងវត្តកំពង់សង្កែ ស្ថិតក្នុងខេត្តព្រះវិហារ។ឯកឧត្តម អភិបាលខេត្ត ថ្លែងថា អំណោយចានឆ្នាំងនេះ មិនត្រឹមតែជាតម្រូវការចាំបាច់សម្រាប់ប្រើប្រាស់ប្រចាំថ្ងៃប៉ុណ្ណោះទេ តែក៏ជានិមិត្តរូបនៃក្ដីសង្ឃឹម និងការយកចិត្តទុកដាក់របស់ថ្នាក់ដឹកនាំចំពោះជីវភាពរស់នៅរបស់ប្រជាពលរដ្ឋផងដែរ ព្រមទាំងបានបង្ហាញពីការគិតគូរយ៉ាងម៉ត់ចត់លើតម្រូវការមូលដ្ឋានរបស់ប្រជាពលរដ្ឋ ដែលបានបាត់បង់សម្ភារៈប្រើប្រាស់ក្នុងគ្រាអាសន្ន៕

បណ្ដាញសង្គម

ព័ត៌មានថ្មីៗ

កូរ៉េខាងត្បូង ស្នើសុំឱ្យអាមេរិកអនុញ្ញាតឱ្យកម្មករដែលជាប់ឃុំចាកចេញដោយដៃមិនជាប់ខ្នោះ

ផ្ទុះរថយន្តដឹកហ្គាសបណ្តាលឱ្យមនុស្សច្រើននាក់ស្លាប់និងរាប់សិបនាក់រងរបួសនៅរដ្ឋធានីម៉ិកស៊ិក

ប៉ូឡូញ ថាខ្លួនខិតជិតជម្លោះបើកចំហបំផុត ចាប់តាំងពីសង្គ្រាមលោកលើកទីពីរមក ក្រោយបាញ់ទម្លាក់ដ្រូនរុស្ស៊ី

ចលនាតវ៉ា «រាំងខ្ទប់គ្រប់យ៉ាង» រាលដាលទូទាំងប្រទេសបារាំង ដោយមនុស្សរាប់រយនាក់ត្រូវចាប់ខ្លួន

ប្រជាជនប៉ាឡេស្ទីនរត់ទាំងភ័យស្លន់ស្លោ ក្រោយអ៊ីស្រាអែលវាយប្រហារលើអគារកម្ពស់ច្រើនជាន់ក្នុងទីក្រុងហ្កាហ្សា

មន្ត្រីអ៊ីស្រាអែល៖ អ៊ីស្រាអែល នឹងសម្លាប់មេដឹកនាំក្រុមហាម៉ាសពេលក្រោយទៀត បើពួកគេរួចផុតពីការវាយប្រហារនៅកាតា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877