BTV NEWS

អូស្ត្រាលី ស្វាគមន៍លទ្ធផលនៃកិច្ចប្រជុំពិសេសលើកទី១ GBC រវាងកម្ពុជា-ថៃ ដែលនឹងត្រួសត្រាយផ្លូវសម្រាប់ការដោះស្រាយជម្លោះព្រំដែនដោយសន្តិវិធី

ស្ថានទូតអង់គ្លេសប្រចាំកម្ពុជា និងប្រចាំនៅប្រទេសថៃ ស្វាគមន៍ចំពោះលទ្ធផលនៃកិច្ចប្រជុំពិសេសលើកទី១ គណៈកម្មការព្រំដែនទូទៅកម្ពុជា និងថៃ (GBC)

បារាំង សន្យាពង្រឹងកិច្ចសហប្រតិបត្តិការ គាំទ្រផែនការអាទិភាពរបស់ក្រសួងសុខាភិបាល

ក្រុមហ៊ុន VISA Worldwide Pte. Limited គាំទ្រគម្រោងរបស់ក្រសួងទេសចរណ៍លើការអភិវឌ្ឍន៍ប្រព័ន្ធទេសចរណ៍វៃឆ្លាត

ព័ត៌មានជាតិ

អំណោយរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាសម្ភារៈប្រើប្រាស់បានប្រគល់ជូនជនភៀសសឹកក្នុងខេត្តព្រះវិហារ

ព្រះវិហារ៖ នៅថ្ងៃទី២៥ ខែសីហា ឆ្នាំ២០២៥ ឯកឧត្តម គីម រិទ្ធី អភិបាលខេត្តព្រះវិហារ បានចុះសួរសុខទុក្ខ និងនាំយកអំណោយរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា រួមមាន សាប៊ូដុសខ្លួន សាប៊ូបោកខោអាវ ឈុតឆ្នាំង ចាន វែកបាយ វែកសម្លរ និងស្លាបព្រា ដើម្បីចែកជូនដល់បងប្អូនប្រជាពលរដ្ឋភៀសសឹក ដែលកំពុងស្នាក់នៅមណ្ឌលសុវត្ថិភាពវត្តពោធិ៍សិលារាម និងវត្តកំពង់សង្កែ ស្ថិតក្នុងខេត្តព្រះវិហារ។ឯកឧត្តម អភិបាលខេត្ត ថ្លែងថា អំណោយចានឆ្នាំងនេះ មិនត្រឹមតែជាតម្រូវការចាំបាច់សម្រាប់ប្រើប្រាស់ប្រចាំថ្ងៃប៉ុណ្ណោះទេ តែក៏ជានិមិត្តរូបនៃក្ដីសង្ឃឹម និងការយកចិត្តទុកដាក់របស់ថ្នាក់ដឹកនាំចំពោះជីវភាពរស់នៅរបស់ប្រជាពលរដ្ឋផងដែរ ព្រមទាំងបានបង្ហាញពីការគិតគូរយ៉ាងម៉ត់ចត់លើតម្រូវការមូលដ្ឋានរបស់ប្រជាពលរដ្ឋ ដែលបានបាត់បង់សម្ភារៈប្រើប្រាស់ក្នុងគ្រាអាសន្ន៕

អ្នកនាំពាក្យក្រសួងការងារ៖ បងប្អូនដែលអត់ទាន់មានការងារធ្វើ សូមទូរសព្ទទៅលេខ ១២៩៧

ភ្នំពេញ៖ នៅថ្ងៃទី២៥ ខែសីហា ឆ្នាំ២០២៥ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បន្ដអំពាវនាវដល់ពលករខ្មែរដែលបានត្រលប់មកដល់កម្ពុជា ហើយមិនទាន់ទទួលបានការងារធ្វើសូមឱ្យទាក់ទងទៅលេខទូរសព្ទ ១២៩៧ ដើម្បីទទួលបានការជួយសម្របសម្រួលពីក្រសួងការងារក្នុងការស្វែងរកការងារធ្វើនៅតាមក្រុមហ៊ុន រោងចក្រ សហគ្រាស និងឱកាសការងារដែលមានជាបន្តបន្ទាប់។ឯកឧត្តម ស៊ុន មេសា មានប្រសាសន៍ថាថា "ប្រជាជនកម្ពុជាដែលមិនទាន់មានការងារធ្វើ សូមទូរសព្ទទៅលេខ ១២៩៧។ តាមរយៈលេខទូរសព្ទនេះ ក្រសួងការងារប្តេជ្ញាជួយសម្រួលដល់បងប្អូន ប្រជាពលរដ្ឋបានត្រលប់មកពីថៃឱ្យឆាប់ទទួលបានការងារធ្វើ ហើយក៏បើកផ្លូវទំនាក់ទំនងរវាងអ្នកស្វែងរកការងារធ្វើ និងអ្នកដែលត្រូវការបុគ្គលិកបម្រើការងារផងដែរ។” យោងតាមអ្នកនាំពាក្យក្រសួងការងារ លេខទូរសព្ទ ១២៩៧ ជាប្រព័ន្ធទំនាក់ទំនងទាន់ហេតុការណ៍ (Hotline) ២៤ម៉ោង របស់ក្រសួងការងារ សម្រាប់ផ្ដល់ព័ត៌មានអំពីទីផ្សារការងារជូនប្រជាពលរដ្ឋកម្ពុជា។ ឯកឧត្តម បន្ថែមថា ពលរដ្ឋកម្ពុជាក៏អាចស្វែងរកព័ត៌មានអំពីឱកាសការងារនៅតាមមន្ទីរការងាររាជធានីខេត្ត សាលាបណ្តុះបណ្តាលបច្ចេកទេស វិជ្ជាជីវៈ តាមបណ្ដាខេត្តនៅទូទាំងប្រទេស ឬតាមអាជ្ញាធរមូលដ្ឋានដែលខ្លួនកំពុងរស់នៅផងដែរ។ សូមបញ្ជាក់ថា ដើម្បីជំរុញការយកចិត្តទុកដាក់ និងផ្ដល់ភាពកក់ក្ដៅជូនបងប្អូនពលករខ្មែរដែលទើបត្រឡប់មកពីប្រទេសថៃ ក្រសួងការងារ និងបណ្ដុះបណ្ដាលវិជ្ជាជីវៈ បានណែនាំម្ចាស់ឬនាយកសហគ្រាស ក្រុមហ៊ុន រោងចក្រ រួមមាន៖*១៖ ណែនាំដល់បុគ្គលិកដែលកាន់លេខទូរសព្ទទំនាក់ទំនងជ្រើសរើសបុគ្គលិក ប្រើប្រាស់នូវពាក្យសម្ដីទន់ភ្លន់ និង សមរម្យក្នុងការពន្យល់អំពីឱកាសការងារនៅកន្លែងរបស់ខ្លួន។ *២៖ ចូលរួមឱ្យបានសកម្មក្នុងវេទិកាការងារដែលក្រសួងការងារបានអនុវត្តប្រចាំថ្ងៃ ចាប់ពីថ្ងៃទី២០ ខែសីហា ឆ្នាំ២០២៥ តទៅ នៅតាមរាជធានី ខេត្តទាំង២៥។ ខេត្តនីមួយៗ មានវេទិកាការងារយ៉ាងតិចចំនួន ២កន្លែង គឺទី១. នៅសាខាបេឡាជាតិសន្តិសុខសង្គម និងទី២. នៅវិទ្យាស្ថានពហុបច្ចេកទេស/មជ្ឈមណ្ឌលបណ្តុះបណ្តាល វិជ្ជាជីវៈ នៅតាមទីរួមខេត្ត។ នៅរាជធានីភ្នំពេញ មានចំនួន ៤កន្លែង គឺទី១. នៅទីស្តីការក្រសួងការងារ និងបណ្តុះបណ្តាលវិជ្ជាជីវៈ, ទី២. នៅវិទ្យាស្ថានជាតិពហុបច្ចេកទេសកម្ពុជា (NPIC), ទី៣. នៅវិទ្យាស្ថានជាតិ បណ្តុះបណ្តាលបច្ចេកទេស (NTTI), និងទី៤. នៅវិទ្យាស្ថានជាតិពាណិជ្ជសាស្ត្រ (NIB)។ *៣៖ សហគ្រាស ក្រុមហ៊ុន រោងចក្រ អាចចូលរួមវេទិកាការងារ ឬយុទ្ធនាការសម្ភាសជ្រើសរើសបុគ្គលិក ដោយផ្ទាល់ ឬតាមរយៈប្រព័ន្ធ Zoom ក្នុងយុទ្ធនាការជុំទី៣ របស់ក្រសួងការងារ ដែលបានចាប់ផ្ដើមពីថ្ងៃទី២៤ ខែសីហា ឆ្នាំ២០២៥ នៅតាមឃុំ សង្កាត់ ដើម្បីចុះឈ្មោះ អ្នកស្វែងរកការងារ និងសម្ភាសជ្រើសរើសបុគ្គលិក ដោយក្នុងមួយថ្ងៃ មានវេទិកាការងារចន្លោះពី ៨០ ទៅ ១០០ ឃុំ សង្កាត់។ ទន្ទឹមនេះ ការចុះឈ្មោះស្វែងរកការងារតាមរយៈប្រព័ន្ធ Hotline លេខ ១២៩៧ និង QR Code (ស្វែងរកការងារ-MLVT) ក៏នៅរក្សាផងដែរ។ *៤៖ ផ្តល់ការណែនាំ និងតម្រង់ទិសការងារ ដោយយកចិត្តទុកដាក់បំផុតនៅថ្ងៃចូលធ្វើការ ៣ថ្ងៃដំបូង និងសូមសម្រួល ឱ្យមានការបើកប្រាក់ឈ្នួលដោយផ្ទាល់ដៃ ឬតាមមធ្យោបាយបណ្តោះអាសន្នណាមួយ ជូនបងប្អូនពលករខ្មែរ ដែលពុំទាន់អាចបើកគណនីធនាគារបាន។ *៥៖ សហការផ្តល់ព័ត៌មានអំពីតម្រូវការកម្លាំងពលកម្ម មកក្រសួងរៀងរាល់ ២សប្តាហ៍ម្តង តាមរយៈប្រព័ន្ធគ្រប់គ្រង ទិន្នន័យរួមពាក់ព័ន្ធវិស័យការងារ (LACMS) ដែលមានតំណភ្ជាប់ https://lacms.mlvt.gov.kh ឬតាមរយៈប្រព័ន្ធ Hotline លេខ ១២៩៧ ឬស្ទែន QR Code (ជំនួយការឌីជីថល-MLVT)៕

អតីតយុទ្ធជន និងពលរដ្ឋភៀសសឹក ២៥គ្រួសារក្នុងខេត្តកំពង់ធំទទួលអំណោយពីសម្ដេចធិបតី

កំពង់ធំ ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងជាប្រធានស.អ.ក ខេត្តកំពង់ធំ នាព្រឹកថ្ងៃទី២៥ ខែសីហា ឆ្នាំ២០២៥ នេះ បានដឹកនាំក្រុមការងារនាំយកអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត អនុប្រធានទី១ សមាគម និងលោកជំទាវបណ្ឌិត ពេជ ចន្ទមុន្នី ជូនអតីតយុទ្ធជនដែលមានជីវភាពខ្វះខាត និងពលករចំណាកស្រុកវិលត្រឡប់មកពីប្រទេសថៃ ព្រមទាំងប្រជាពលរដ្ឋភៀសសឹក ចំនួន ២៥គ្រួសារ ដែលកំពុងរស់នៅលើដីសម្បទានសង្គមកិច្ច ស្ថិតនៅឃុំក្រយា ស្រុកសន្ទុក ខេត្តកំពង់ធំ។ ឧត្តមសេនីយ៍ទោ សោម ស៊ុន ក៏បានផ្សព្វផ្សាយសភាពការណ៍ទូទៅស្ដីពីសង្គ្រាមឃ្លានពានពីភាគីថៃកាលពីពេលកន្លងទៅមកលើដែនអធិបតេយ្យភាព និងបូរណភាពទឹកដីកម្ពុជា រយៈពេល ៥យប់ ៥ថ្ងៃ នៅក្នុងភូមិសាស្ត្រខេត្តព្រះវិហារ និងខេត្តឧត្តរមានជ័យ ព្រមទាំងស្ថានការណ៍ក្រោយមានបទឈប់បាញ់ ដែលបានសម្របសម្រួលដោយឯក ឧត្តម ដូណាល់ ត្រាំ ប្រធានាធិបតីសហរដ្ឋអាមេរិក ,តំណាងភាគីចិន និងនាយករដ្ឋមន្ត្រីម៉ាឡេស៊ី ដែលជាប្រធានអាស៊ានប្ដូរវេន។ តែភាគីថៃនៅតែរំលោភបំពានជាបន្តបន្ទាប់ ដោយបានចល័តកងទ័ព រាយលួសបន្លា ដាក់កង់ឡាន រំលោភព័ទ្ធយកផ្ទះប្រជាពលរដ្ឋ ទន្ទ្រានយកទឹកដីកម្ពុជា ដោយគ្មានការកោតក្រែងអំពីច្បាប់អន្តរជាតិ ដែល កម្ពុជា បាន អត់ ធ្មត់ និង គោរពយ៉ាងមុឺងម៉ាត់នូវកិច្ចព្រមព្រាងទាំង១៣ ចំណុច ដែល ភាគី ទាំង ពីរ បាន ចុះហត្ថលេខា ក្នុង កិច្ច ប្រជុំ GBC នៅ ប្រទេស ម៉ាឡេស៊ី នៅថ្ងៃទី ០៧ ខែ សីហា ឆ្នាំ ២០២៥ កន្លងទៅ ។ ជាមួយនេះដែរ ឧត្តមសេនីយ៍ទោម សោម ស៊ុន ក៏បានអំពាវនាវដល់ប្រជាពលរដ្ឋខ្មែរគ្រប់រូប ត្រូវ តែ ចងចាំ ជានិច្ច មិន អាច បំភ្លេច បាន ឡើយ នូវ ភាពឈឺចាប់អំពីការ ឈ្លាន ពាននេះ ហើយ ត្រូវតែជឿជាក់លើការដឹកនាំប្រកបដោយភាពឈ្លាសវៃ ម៉ឺងម៉ាត់ អត់ធ្មត់ខ្ពស់បំផុត របស់ សម្តេច តេជោ សម្ដេចធិបតី ដើម្បីជោគជ័យ និង សន្តិភាព យូរ អង្វែង សម្រាប់ប្រជាជនកម្ពុជាយេីងទាំងមូល ។នាឱកាសនោះ ឧត្តមសេនីយ៍ទោ សោម ស៊ុន បានប្រគល់ជូនស្បៀងអាហារ គ្រឿងឧបភោគបរិភោគជូនក្រុមគ្រួសារខាងលើ ក្នុងមួយគ្រួសារទទួលបាននូវអង្ករចំនួន ២៥គីឡូក្រាម មីជាតិចំនួនមួយកេស ត្រីខកំប៉ុងចំនួនមួយយួរ និងទឹកត្រីទឹកស៊ីអ៉ីវចំនួន ២យួរផងដែរ៕

កម្ពុជាទទួលបានសំណើសុំចុះបញ្ជីវិនិយោគចំនួន១១ គម្រោង មានទុនសរុប ៩៩ លានដុល្លារ

ភ្នំពេញ ៖ គណៈកម្មាធិការវិនិយោគកម្ពុជា ពិនិត្យពិភាក្សាលើសំណើសុំចុះបញ្ជី គម្រោងវិនិយោគមានលក្ខណៈសម្បត្តិគ្រប់គ្រាន់ចំនួន ១៣ គម្រោង មានទុនសរុប ៩៩ លានដុល្លារអាម៉េរិក ក្នុងនោះការវិនិយោគលើវិស័យឧស្សាហកម្មចំនួន១១ និងវិស័យកសិ-ឧស្សាហកម្មចំនួន ២ គម្រោង។ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា នៅថ្ងៃទី២៥ ខែសីហា ឆ្នាំ ២០២៥ នេះ បានអញ្ជើញជាអធិបតីភាព “កិច្ចប្រជុំច្រកចេញ-ចូលតែមួយ”លើកទី១៣ ក្នុងឆ្នាំ២០២៥ ដែលត្រូវបានរៀបចំឡើង ដើម្បីពិនិត្យ ពិភាក្សាលើសំណើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ចំនួន ១៣ គម្រោង។ជុំវិញគម្រោងវិនិយោគខាងលើនេះ អាចបង្កើតការងារបានប្រមាណ ៥,៥ ពាន់កន្លែង ក្នុងនោះការវិនិយោគលើវិស័យឧស្សាហ- កម្មចំនួន ១១ គម្រោងរួមមាន៖ ផ្គុំដំទ្បើងរថយន្ត, ផលិតសម្ភារៈបរិក្ខាសម្រាប់កន្ទុយសណ្តោងរថយន្ត និងគ្រឿងបន្ទាប់បន្សំ, ផលិត សម្ភារៈបំពាក់ និងតុបតែងរថយន្ត, ផលិតបរិក្ខារអគ្គិសនីបំភ្លឺបរិក្ខារអគ្គិសនីលម្អ និងគ្រឿងបន្ទាប់បន្សំអគ្គិសនីគ្រប់ប្រភេទ, ផលិតដើម ណូអែល គ្រឿងលម្អ និងគ្រឿងបន្លាស់ដើមណូអែលគ្រប់ប្រភេទ, ផលិតគ្រឿងសង្ហារិមគ្រប់ប្រភេទ, ផលិតក្រដាសកាតុង, ផលិត អេប៉ុង, ផលិតថង់ប្លាស្ទិក បង់ស្អិត និងក្រដាសម៉ាកឃឺ។ចំណែក២គម្រោងទៀត គណៈកម្មាធិការវិនិយោគកម្ពុជា បានអនុម័តលើសំណើសុំចុះបញ្ជីគម្រោងវិនិយោគមានលក្ខណៈ សម្បត្តិគ្រប់គ្រាន់ គឺការវិនិយោគលើវិស័យកសិ-ឧស្សាហកម្ម នៃគម្រោងរោងចក្រកែច្នៃជ័រកៅស៊ូ។ ចំពោះគម្រោងវិនិយោគទាំង ១៣ គម្រោងខាងលើនេះ ក្រុមហ៊ុនទាំងនោះបានជ្រើសរើសបង្កើតរោងចក្រនៅតាមតំបន់ផ្សេងៗគ្នារួមមាន៖ រាជធានីភ្នំពេញ ខេត្តកណ្តាល តាកែវ កំពង់ស្ពឺ កំពង់ឆ្នាំង និងត្បូងឃ្មុំ៕អត្ថបទ៖ សុន រ៉ាឌី

តំណាងក្រុមប្រឹក្សាភិបាល CIMIC Group សម្តែងនូវការពេញចិត្តអំពីបរិយាកាសវិនិយោគនៅកម្ពុជា

ភ្នំពេញ ៖សមាជិកក្រុមប្រឹក្សាភិបាលក្រុមហ៊ុន CIMIC Group បានសម្តែងនូវការពេញចិត្ត ចំពោះការធ្វើឱ្យប្រសើរឡើងនូវបរិស្ថានវិនិយោគ ដែលបានបង្កនូវភាពងាយស្រួលក្នុងការបណ្ដាក់ទុន និងគ្រោងពង្រីកការវិនិយោគបន្ថែម ឈរលើមូលដ្ឋាននៃភាពជឿជាក់ លើការ ដឹកនាំរបស់រាជរដ្ឋាភិបាល។ លោក Robert Seidler សមាជិកក្រុមប្រឹក្សាភិបាលក្រុមហ៊ុន CIMIC Group នៅក្នុងជួបពិភាក្សាការងារជាមួយ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី២៥ ខែសីហា ឆ្នាំ២០២៥ នេះ បានថ្លែង អំណរគុណ ចំពោះឯកឧត្តមឧបនាយករដ្ឋមន្ត្រី ដែលបានអនុញ្ញាតឱ្យប្រតិភូក្រុមហ៊ុនបានជួបសម្តែងការគួរសម និងធ្វើបច្ចុប្បន្នភាព ពីសកម្មភាពអាជីវកម្មរបស់ខ្លួននៅក្នុងប្រទេសកម្ពុជា និងបានជម្រាបជូនអំពីវឌ្ឍនភាពនៃការវិនិយោគរបស់ខ្លួននៅកម្ពុជា និងផែនការ ពង្រីកការវិនិយោគបន្ថែម ដោយឈរលើមូលដ្ឋាននៃភាពជឿជាក់លើការដឹកនាំរបស់រាជរដ្ឋាភិបាល។ លោកក៏បានសម្តែងនូវការពេញចិត្ត ចំពោះការធ្វើឱ្យប្រសើរឡើងនូវបរិស្ថានវិនិយោគ ដែលបានបង្កនូវភាពងាយស្រួលក្នុង ការបណ្ដាក់ទុន និងការធ្វើប្រតិបត្តិការអាជីវកម្មរបស់ខ្លួននៅកម្ពុជា ជាពិសេសជាងនេះ, កម្ពុជាមានកម្លាំងពលកម្មដែលមានឧត្តមភាព ប្រកួតប្រជែងខ្ពស់ និងមានភាពស្វាហាប់ ព្រមទាំងងាយស្រួលក្នុងការទទួលយកការបណ្ដុះបណ្ដាលថ្មីៗផងដែរ។ លោក Robert Seidler ក៏បាន អរគុណ ដែលរាជរដ្ឋាភិបាលក្រោមការដឹកនាំរបស់ សម្ដេចធិបតីនាយករដ្ឋមន្ត្រី បានយកចិត្តទុកដាក់ខ្ពស់លើវិស័យឯកជន។ លោកក៏បានបង្ហាញពីក្នុងការចូលរួមជំរុញកំណើនសេដ្ឋកិច្ចកម្ពុជា តាមរយៈការពង្រីកការវិនិយោគ របស់ខ្លួននៅប្រទេសកម្ពុជាបន្ថែមទៀត។ជាការឆ្លើយតប, ឯកឧត្តមឧបនាយករដ្ឋមន្ត្រី បានបង្ហាញជូនក្រុមហ៊ុននូវគោលនយោបាយ និងផែនការរបស់រាជរដ្ឋាភិបាល កម្ពុជា ក្នុងការជំរុញធ្វើឱ្យការបណ្ដាក់ទុនវិនិយោគ និងការធ្វើអាជីវកម្មនៅកម្ពុជាកាន់តែមានភាពទាក់ទាញ៕អត្ថបទ៖ សុន រ៉ាឌី

ឯកឧត្តមបណ្ឌិត សោម រតនា៖ ដើម្បីធានាតម្លាភាព និងសុក្រឹត្យភាពនៃការប្រឡង គឺទាមទារឱ្យមានការសហការពីគ្រប់ភាគីពាក់ព័ន្ធទាំងអស់

នាព្រឹកថ្ងៃទី២៥ ខែសីហា ឆ្នាំ២០២៥ គណៈប្រតិភូក្រសួងអប់រំ យុវជន និងកីឡា ប្រធានគណៈមេប្រយោគ និងអប្បមាទទូទាំងប្រទេស ដែលដឹកនាំដោយ ឯកឧត្តមបណ្ឌិត សោម រតនា បានដឹកជញ្ជូនវិញ្ញាសាប្រឡងសញ្ញាបត្រមធ្យមសិក្សាទុតិយភូមិ មកប្រគល់មណ្ឌលប្រឡងខេត្តសៀមរាបដោយសុវត្ថិភាព ជាមួយនឹងការធានាបាននូវភាពសម្ងាត់។ឆ្លៀតក្នុងឱកាសនេះ ឯកឧត្តមបណ្ឌិត សោម រតនា អនុរដ្ឋលេខាធិការក្រសួងអប់រំ យុវជន និងកីឡា និងជាប្រធានគណៈមេប្រយោគទូទាំងប្រទេសប្រចាំខេត្តសៀមរាប បានចូលជួបសម្ដែងការគួរសមជាមួយថ្នាក់ដឹកនាំខេត្ត ក៏ដូចជាបានពាំនាំប្រសាសន៍ថ្លែងអំណរគុណរបស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រី ក្រសួងអប់រំយុវជន និងកីឡា ជូនដល់ថ្នាក់ដឹកនាំខេត្ត ដែលបានបន្តចូលរួមយ៉ាងសស្រាក់សស្រាំងនៅក្នុងការងារធានាដំណើរការប្រឡងនាពេលប៉ុន្មានថ្ងៃខាងមុខនេះ ឱ្យប្រព្រឹត្តទៅប្រកបដោយសុវត្ថិភាព ព្រមទាំងតម្លាភាព។ ឯកឧត្តម សោម រតនា ក៏បានគូសបញ្ជាក់ផងដែរថា ដំណើរការប្រឡងឆ្នាំនេះ មានលក្ខណៈពិសេសជាងឆ្នាំកន្លងទៅ ដោយក្រសួងបានរៀបចំការប្រឡងដោយបែងចែកបេក្ខជនទៅតាមតំបន់ និងផ្ដល់អាទិភាពពិសេស ជាក់ស្ដែងដូចជាមណ្ឌលប្រឡងនៅខេត្តព្រះវិហារ និងខេត្តឧត្តរមានជ័យ ជាតំបន់ដែលរងនូវផលប៉ះពាល់ពីសង្គ្រាមឈ្លានពានកាលពីពេលថ្មីៗនេះ ដូច្នេះក្រសួងបានផ្តល់ការយកចិត្តទុកដាក់ខ្ពស់ទាំងការស្នាក់នៅ ការហូបចុក ដើម្បីជាការលើកទឹកចិត្តដល់ប្អូនៗ និងធ្វើយ៉ាងណាដើម្បីឱ្យការប្រឡងអាចប្រព្រឹត្តទៅបានដោយរលូន បើទោះបីជាមានយើងកំពុងមានបញ្ហាប៉ះទង្គិចគ្នាជាមួយប្រទេសជិតខាងក៏ដោយ។ យ៉ាងណាមិញ ឯកឧត្តមបណ្ឌិត បានបន្ថែមថា ដើម្បីធានាបាននូវតម្លាភាព និងសុក្រឹត្យភាពនៃការប្រឡង គឺទាមទារឱ្យមានការចូលរួមពីគ្រប់ភាគីពាក់ព័ន្ធទាំងអស់។ជាការឆ្លើយតប លោកជំទាវ ម៉ននី រង្សី អភិបាលរងនៃគណៈអភិបាលខេត្តសៀមរាបបានមានប្រសាសន៍ថា ឯកឧត្តមអភិបាលខេត្តសៀមរាប ព្រមទាំងអាជ្ញាធរមូលដ្ឋានខេត្ត សូមទទួលស្វាគមន៍យ៉ាងកក់ក្ដៅចំពោះប្រតិភូក្រសួងអប់រំនៅក្នុងជំនួបនាឱកាសនេះ។ លោកជំទាវ បានលើកឡើងថា នេះជាមោទនភាពដែលខេត្តសៀមរាបបានចូលរួមចំណែកនៅក្នុងយន្តការធានាប្រសិទ្ធិភាពនៃការប្រឡងនាពេលកន្លងមក ជាមួយគ្នានេះ លោកជំទាវបានវាយតម្លៃខ្ពស់ចំពោះកិច្ចសហប្រតិបត្តិការរវាងមន្ត្រីអាជ្ញាធរមូលដ្ឋាន ក៏ដូចជាថ្នាក់ដឹកនាំក្រសួង ដែលបានអញ្ជើញចុះមកត្រួតពិនិត្យដំណើរការប្រឡង រួមទាំងភាគីពាក់ព័ន្ធដែលបានផ្ដល់ការសហការសម្របសម្រួលក្នុងការប្រឡងសញ្ញាបត្រមធ្យមសិក្សាទុតិយភូមិជារៀងរាល់ឆ្នាំ និងក្នុងឆ្នាំ២០២៥នេះផងដែរ។គួរបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២៨ សីហា ២០២៥ មានបេក្ខជនចុះឈ្មោះ ប្រឡងសរុប ១៤៦ ៧២០ នាក់ ស្រី ៨១ ៤៤២ នាក់ ក្នុងនោះ បេក្ខជនថ្នាក់វិទ្យាសាស្ត្រ មានចំនួន ៤០ ៦៧៨ នាក់ ស្រី ២៤ ៥១៩ នាក់ បេក្ខជនថ្នាក់វិទ្យាសាស្ត្រសង្គម មានចំនួន ១០៦ ០៤២ នាក់ ស្រី ៥៦ ៩២៣ នាក់។ ដោយឡែក បេក្ខជនត្រូវបានរៀបចំចំនួន ២៥នាក់ ក្នុងមួយបន្ទប់ទៅតាមមណ្ឌលសំណេរនីមួយៗតាមរាជធានី-ខេត្ត លើកលែងតែបន្ទប់ចុងក្រោយ និងបន្ទប់ដែលមានបេក្ខជនមកពីវិទ្យាល័យអប់រំពិសេស។ មណ្ឌលសំណេរមានចំនួនសរុប ២៤១ មណ្ឌល ត្រូវជា ៥ ៩២៤ បន្ទប់ ក្នុងនោះថ្នាក់វិទ្យាសាស្ត្រ មានចំនួន ៧២ មណ្ឌល ត្រូវជា ១ ៦៥៥ បន្ទប់ និងថ្នាក់វិទ្យាសាស្ត្រសង្គម មានចំនួន ១៦៩ មណ្ឌល ត្រូវជា ៤ ២៦៩ បន្ទប់ ក្នុងនោះសម្រាប់ខេត្តសៀមរាប គឺមានមណ្ឌលប្រឡងសរុបចំនួន ១៦មណ្ឌល ដែលថ្នាក់វិទ្យាសាស្ត្រសង្គមមាន១១ និងថ្នាក់វិទ្យាសាស្ត្រពិតមានចំនួន ៥ មណ្ឌល៕

ក្រសួងសេដ្ឋកិច្ចវាយតម្លៃកំណើនសេដ្ឋកិច្ចគិតត្រឹមពាក់កណ្តាលឆ្នាំនេះមានអត្រាត្រឹម ៥%

ក្រសួងសេដ្ឋកិច្ច និងហិរញ្ញវត្ថុ វាយតម្លៃសេដ្ឋកិច្ចកម្ពុជា គិតត្រឹមពាក់កណ្តាលឆ្នាំ២០២៥នេះ បានថមថយមកនៅត្រឹមអត្រា ៥%, ដោយសារផលប៉ះពាល់នៃការបិទខ្ទប់ព្រំដែនគោក បានបង្អាក់សកម្មភាពផលិតកម្ម ដែលពឹងផ្អែកលើការដឹកជញ្ជូនវត្ថុធាតុដើម ការនាំចេញ និងរំហូរទេសចរផងដែរ។យោងតាមរបាយការណ៍ស្តីពីលទ្ធផលនៃការអនុវត្តឆមាសទី១ និងការវាយតម្លៃលើការអនុវត្តច្បាប់ ស្តីពីហិរញ្ញវត្ថុសម្រាប់ការ គ្រប់គ្រងឆ្នាំ២០២៥ របស់ក្រសួងសេដ្ឋកិច្ច និងហិរញ្ញវត្ថុ បានបង្ហាញពីស្ថានភាពម៉ាក្រូសេដ្ឋកិច្ចនៅក្នុងឆមាសទី១ និងការវាយតម្លៃ សម្រាប់ឆ្នាំ២០២៥ ក្នុងនោះមុនពេលការដាក់ពន្ធគយបដិកា និងការបិទខ្ទប់ព្រំដែនគោកកម្ពុជា-ថៃ, សេដ្ឋកិច្ចកម្ពុជាត្រូវបានប៉ាន់ស្មាន ថា នឹងមានកំណើនក្នុងអត្រាប្រមាណ ៦,៣% ដោយសារការបន្តចលនការរឹងមាំ នៃវិស័យបម្រើដល់ការនាំចេញ មានវិស័យកម្មន្ត សាលកាត់ដេរ និងមិនមែនកាត់ដេរ, វិស័យទេសចរណ៍នៅបន្តនិន្នាការកើនឡើង, និងវិស័យកសិកម្មក៏នៅបន្តរក្សាបានស្ថិរភាព នៃ កំណើន។ យ៉ាងណាមិញក្នុងអំឡុងខែមេសា ឆ្នាំ២០២៥ កន្លងទៅ, ការវាយតម្លៃស្ថានភាពសេដ្ឋកិច្ច ក្នុងក្របខ័ណ្ឌហិរញ្ញវត្ថុសាធារណៈ រយៈពេលមធ្យមឆ្នាំ២០២៦-២០២៨ បានរំពឹងថា កំណើនសេដ្ឋកិច្ចកម្ពុជាក្នុងឆ្នាំ២០២៥ នឹងថមថយមកក្នុងរង្វង់ ៥,២% ដោយសារ ការរំពឹងទុកបច្ច័យអវិជ្ជមាន នៃការអនុវត្តពន្ធគយបដិកា មកលើវិស័យបម្រើការនាំចេញ។មកដល់ពាក់កណ្ដាលឆ្នាំនេះ, ស្ថានការណ៍បានប្រែប្រួលក្នុងទិសដៅអវិជ្ជមានជាងការរំពឹងទុក ដែលរួមមាន ការអនុវត្តពន្ធគយ បដិការក្នុងអត្រា ៣៦% និងការបិទខ្ទប់ព្រំដែនគោកកម្ពុជា-ថៃ ដែលអាចនឹងបន្តអូសបន្លាយរហូតដល់ដំណាច់ឆ្នាំ។ ក្រោមមូលដ្ឋាន សម្មតិកម្ម និងសូចនាករម៉ាក្រូសេដ្ឋកិច្ច គិតត្រឹម ៦ ខែ ដើមឆ្នាំ២០២៥ កំណើនសេដ្ឋកិច្ចកម្ពុជា នឹងបន្តថមថយមកត្រឹមអត្រាត្រឹមតែ ៥,០%, ដោយសារផលប៉ះពាល់នៃការបិទខ្ទប់ព្រំដែនគោក បានបង្អាក់សកម្មភាពផលិតកម្ម ដែលពឹងផ្អែកលើការដឹកជញ្ជូនវត្ថុធាតុដើម និងការនាំចេញ ព្រមទាំងរំហូរទេសចរ ជាពិសេសទេសចរអន្តរជាតិ ដែលឆ្លងកាត់ច្រកព្រំដែនគោក និងមួយផ្នែកទៀត, ដោយសារការ អនុវត្តពន្ធគយបដិការក្នុងអត្រា ៣៦% ដែលត្រូវបានកំណត់ថា នឹងចាប់អនុវត្តពីខែសីហា ឆ្នាំ២០២៥តទៅ ដែលនឹងមានផលជះជា អវិជ្ជមានដល់ការបញ្ជាទិញពីទីផ្សារសហរដ្ឋអាម៉េរិក ក្នុងត្រីមាសទី៤ ឆ្នាំ២០២៥។ ឯកឧត្តម សួន ម៉ិ ប្រធានសមាគមសហគ្រិនវីម៉ូនៅកម្ពុជា លើកឡើងថា ជុំវិញសេដ្ឋកិច្ចកម្ពុជានេះ ទោះបីកម្ពុជាបានប៉ះពាល់ ព្រំដែនគោក ក៏កម្ពុជានៅមានសហរដ្ឋអាមេរិកជួយគាំទ្រផងដែរ ទោះបីកន្លងមកមានការបង្អាក់បន្ទិច ដោយការកំណត់អត្រាពន្ធបដិកា របស់សហរដ្ឋអាម៉េរិកខ្លះៗ ក៏មិនមែនជាឧបសគ្គធំសម្រាប់កម្ពុជានោះទេ។ ជាក់ស្តែងនៅក្នុងឆ្នាំ២០២០ នៅពេលសហរដ្ឋអាម៉េរិកដក GSP ការនាំចេញរបស់កម្ពុជារឹងតែបន្តកើនឡើង ជួយជ្រោមជ្រែងដល់ការនាំចេញរបស់កម្ពុជាកាន់តែខ្លាំង ជាក់ស្តែងមកដល់ពេលនេះ ទោះកម្ពុជាជួបបញ្ហាខ្លះៗ តែបើក្រឡេកមើលការវិនិយោគឃើញថា កម្ពុជាបានបន្តស្រូបយកការវិនិយោគកាន់តែខ្លាំង ដែលលទ្ធផល ទាំងនេះ នឹងអាចជួយគាំទ្រដល់ការនាំចេញទំនិញរបស់កម្ពុជាក្នុងរយៈពេលខ្លីខាងមុខ។ជុំវិញវិធានការផ្នែកម៉ាក្រូសេដ្ឋកិច្ចនេះ ជាទិសដៅយុទ្ធសាស្ត្រ និងគោលនយោបាយអាទិភាព, រាជរដ្ឋាភិបាលនៅតែបន្តប្រកាន់ខ្ជាប់នូវ អភិក្រមចំនួន២នោះគឺ៖ (១). វិធានការគោលនយោបាយឆ្លើយតបទៅនឹងបញ្ហាបន្ទាន់ចំពោះមុខ និងក្នុងរយៈពេលខ្លី ដោយផ្តោតលើ ការរក្សាស្ថិរភាពម៉ាក្រូសេដ្ឋកិច្ច និងហិរញ្ញវត្ថុ និងការធានាលំនឹងជីវភាពរបស់ប្រជាជន; និង (២). ទិសដៅវិធានការគោលនយោបាយ រយៈពេលមធ្យម និងវែងខាងមុខ ដែលនឹងផ្តោតលើការដោះស្រាយបញ្ហាជារចនាសម្ព័ន្ធ ក្នុងការជំរុញការធ្វើពិពិធកម្ម ការលើកកម្ពស់ ភាពប្រកួតប្រជែង និងការកសាងភាពធន់សម្រាប់សង្គម-សេដ្ឋកិច្ចកម្ពុជា៕ អត្ថបទ៖ សុន រ៉ាឌី

ឯកអគ្គរដ្ឋទូតអ៊ីតាលី និងបុរីវ៉ាទីកង់ ប្រចាំនៅកម្ពុជា លើកទឹកចិត្តឱ្យបង្កើនកិច្ចប្រឹងប្រែងរក្សាបទឈប់បាញ់រវាងកម្ពុជា និងថៃ ឈានទៅបញ្ឈប់ជម្លោះដោយអាវុធ

នៅព្រឹកថ្ងៃទី២១ ខែសីហា ឆ្នាំ២០២៥ លោកជំទាវ អ៊ាត សោភា រដ្ឋលេខាធិការប្រចាំការនៃក្រសួងការបរទេស និងសហប្រតិបត្តិការអន្តរជាតិ បានទទួលជំនួបសម្តែងការគួរសមរួមគ្នារបស់ ឯកឧត្តម Paolo Dionisi ឯកអគ្គរដ្ឋទូតអ៊ីតាលី និងឯកឧត្តម Peter B. Wells ឯកអគ្គរដ្ឋទូតបុរីវ៉ាទីកង់ ប្រចាំកម្ពុជា ដែលមាននិវេសនដ្ឋាននៅទីក្រុងបាងកក នៅទីស្តីការក្រសួង។ នៅក្នុងជំនួបនេះ លោកជំទាវរដ្ឋលេខាធិការប្រចាំការ បានកោតសរសើរឯកឧត្តមឯកអគ្គរដ្ឋទូតទាំងពីរ ចំពោះកិច្ចខិតខំប្រឹងប្រែងក្នុងការចូលរួមចំណែកដើម្បីលើកកម្ពស់ និងពង្រឹងចំណងមិត្តភាព និងកិច្ចសហប្រតិបត្តិការរវាងកម្ពុជា-អ៊ីតាលី និងកម្ពុជា-វ៉ាទីកង់។ លោកជំទាវ អ៊ាត សោភា បានថ្លែងអំណរគុណយ៉ាងជ្រាលជ្រៅចំពោះអ៊ីតាលី និងបុរីវ៉ាទីកង់ ដែលបានលើកទឹកចិត្តឱ្យបង្កើនកិច្ចប្រឹងប្រែងរក្សាបទឈប់បាញ់ រវាងកម្ពុជា និងថៃ ដើម្បីឈានទៅបញ្ឈប់ជម្លោះដោយអាវុធ និងរកដំណោះស្រាយបញ្ហាព្រំដែនតាមសន្តិវិធីអនុលោមតាមច្បាប់អន្តរជាតិ៕

ក្រសួងសុខាភិបាលកម្ពុជា និងKOICA រួមគ្នាពង្រឹងសមត្ថភាពបុគ្គលិកសុខាភិបាល ដើម្បីប្រសិទ្ធិភាពសេវាសុខាភិបាលនាពេលអនាគត

ភ្នំពេញ ៖ ក្រសួងសុខាភិបាល សហការជាមួយទីភ្នាក់ងារសហប្រតិបត្តិការអន្តរជាតិកូរ៉េ(KOICA)កម្ពុជា បានរៀបចំវេទិកាចែករំលែកចំណេះដឹងស្តីពីការបង្ការ និងត្រួតពិនិត្យការចម្លងរោគកម្រិតខ្ពស់ (IPC) នៅមន្ទីរពេទ្យព្រះអង្គឌួង។វេទិកានេះជាថ្ងៃបើកនៃកម្មវិធី "វគ្គបណ្តុះបណ្តាលគ្រូបង្គោលស្តីពីការបង្ការ និងត្រួតពិនិត្យការចម្លងរោគកម្រិតខ្ពស់" រយៈពេលប្រាំថ្ងៃ ដែលជាគោលការណ៍ដ៏សំខាន់មួយរបស់រដ្ឋាភិបាលសាធារណៈរដ្ឋកូរ៉េ រយៈពេលយូរដើម្បីពង្រឹងសេវាសុខាភិបាលជាតិតាមរយៈ KOICA។ វេទិកានេះប្រព្រឹត្តទៅក្រោមអធិបតីភាពឯកឧត្តមសាស្រ្តាចារ្យ ឡឹម តារា រដ្ឋលេខាធិការក្រសួងសុខាភិបាល លោកស្រី CHOI Moon Jung ប្រធានតំណាងប្រទេសនៃការិយាល័យ KOICA ប្រចាំកម្ពុជា និងឯកឧត្តមវេជ្ជបណ្ឌិត លូ លីឃាង ប្រធានមន្ទីរពេទ្យព្រះអង្គឌួង និងមន្ត្រីមកពី ក្រសួងសុខាភិបាល និងមន្ទីរពេទ្យបង្អែកខេត្តសរុបប្រមាណ១០០នាក់, នាព្រឹកថ្ងៃទី២៥ ខែសីហា ឆ្នាំ២០២៥នេះ។លោកស្រី CHOI Moon Jung បានលើកឡើងពីសារៈសំខាន់នៃកម្មវិធីថា តាងនាមរដ្ឋាភិបាលនៃសាធារណរដ្ឋកូរ៉េ KOICA មានកិត្តិយសក្នុងការ សហការជាមួយក្រសួងសុខាភិបាល ដើម្បីជំរុញការបង្ការ និងត្រួតពិនិត្យការចម្លងរោគកម្រិតខ្ពស់នៅកម្ពុជា។ វគ្គបណ្តុះបណ្តាលនេះលើសពីវគ្គបណ្តុះបណ្តាលទូទៅ ដែលជាបេសកកម្មដ៏សំខាន់មួយក្នុងការពង្រឹងស្តង់ដារថែទាំសុខភាព។ តាមរយៈការបណ្តុះបណ្តាល និងគោលនយោបាយស្របតាមបរិបទរបស់កម្ពុជា KOICA ប្តេជ្ញាក្នុងការរួមចំណែកអភិវឌ្ឍន៍សុខុមាលភាពរបស់ប្រជាជនកម្ពុជា។ ចំនុចសំខាន់នៃកម្មវិធីនេះគឺការចែករំលែកបទពិសោធន៍របស់សិក្ខាកាមសុខាភិបាលដែលបានចូលរួមក្នុងវគ្គបណ្តុះបណ្តាល IPC កាលពីឆ្នាំមុននៅប្រទេសកូរ៉េតាមរយៈការិយាល័យ KOICA។ វេទិការការពិភាក្សា និងបទបង្ហាញរបស់ពួកគាត់បានផ្តល់ ការយល់ដឹង និងមេរៀនជាក់ស្តែងសម្រាប់អ្នកចូលរួមវគ្គបណ្តុះបណ្តាលនៅឆ្នាំនេះ។ កម្មវិធីប្រជុំបានបង្ហាញប្រធានបទជាច្រើន រួមទាំងសមិទ្ធិផល IPC ថ្មីៗនេះ និងផែនការសកម្មភាពនាពេលអនាគត ការអនុវត្តជាក់ស្តែងនៃការបង្ការការឆ្លងមេរោគនៅកម្រិតមន្ទីរពេទ្យ និងការអនុវត្តវិធានការណ៍ IPC កម្រិតខ្ពស់នៅមន្ទីរពេទ្យខេត្ត។ ទាំងនេះត្រូវបានបង្ហាញដោយលោកស្រី អៀ ដារ៉ាវី មកពីក្រសួងសុខាភិបាល រួមជាមួយនឹងតំណាងមន្ទីរពេទ្យព្រះអង្គឌួង និងមន្ទីរពេទ្យបង្អែកកំពង់ឆ្នាំង។នាឱកាសនោះឯកឧត្តមសាស្រ្តាចារ្យ ឡឹម តារា បានថ្លែងថា ព្រឹតិ្តការណ៍នេះ គឺជាជំហានដ៏សំខាន់មួយ នៅក្នុងកិច្ចខិតខំប្រឹងប្រែងរួមគ្នា របស់យើងដើម្បីបង្កើននូវសមត្ថភាពនៃការការបង្ការ ការត្រួតពិនិត្យចម្លងរោគនៅកម្ពុជា។ នៅក្នុងការអនុវត្តក្នុងរយៈពេល០១ឆ្នាំកន្លងមកនេះ បានបង្ហាញយ៉ាងច្បាស់អំពី IPC ដែលក្នុងនោះយើងឃើញថា IPC វាមិនមែនគ្រាន់តែជាបញ្ហាបច្ចេកទេសប៉ុណ្ណោះទេ ប៉ុន្តែវាជាបញ្ហាដែលទាក់ទងទៅនឹងសុវតិ្ថភាពរបស់អ្នកជំងឺ គុណភាពរបស់សេវាសុខាភិបាល និងសន្តិសុខសុខាភិបាលជាតិ។ ជាចុងក្រោយឯកឧត្តមសាស្រ្តាចារ្យ បានបញ្ជាក់ទៀតថា នាពេលអនាគតគោលបំណងរបស់យើង គឺការយកបទពិសោធន៍ដែលបានសិក្សាក្នុងរយៈពេល០១ឆ្នាំកន្លងមកនេះ យកមកអភិវឌ្ឍនូវយុទ្ធសាស្រ្តក្នុងការបណ្តុះបណ្តាលបន្ត និងកំណត់ទិសដៅគោលនយោបាយដែលសមស្របទៅនឹងបរិបទសុខាភិបាលរបស់កម្ពុជាយើង ដើម្បីពង្រឹងប្រព័ន្ធសុខាភិបាល ការពារអ្នកជំងឺ គាំទ្រដល់បុគ្គលិកសុខាភិបាល៕អត្ថបទ រដ្ឋា

មន្រ្តីជាន់ខ្ពស់រាជរដ្ឋាភិបាល លើកទឹកចិត្តដល់អ្នកធ្វើអាជីវកម្មត្រីឱ្យពង្រឹងសមត្ថភាពលើការចិញ្ចឹមត្រី និងកែច្នៃ

ឯកឧត្តមឧបនាយករដ្ឋមន្ត្រីប្រចាំការ បានលើកទឹកចិត្តដល់បងប្អូនអ្នកចិញ្ចឹមត្រី អ្នកប្រមូលទិញ ចែកចាយ និងនាំចេញ ព្រមទាំង សិប្បកម្មកែច្នៃនៅក្នុងស្រុកស្ទោង ពង្រឹងសមត្ថភាព បង្កើនផលិតភាព គុណភាព និងសេវាកម្ម ដើម្បីឆ្លើយតបទៅនឹងតម្រូវការទីផ្សារ និង ស្ដង់ដាទីផ្សារ និងដើម្បីបង្កើនសមត្ថភាពប្រកួតប្រជែងជាមួយប្រទេសជិត។ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ លើកឡើងនៅក្នុងការបំពេញបេសកកម្ម ជំរុញវិស័យវារីវប្បកម្ម ក្នុងភូមិសាស្រ្តស្រុកស្ទោង ខេត្តកំពង់ធំ នៅចុងសប្តាហ៍កន្លងមកថា យោងតាមកម្មវិធីនយោបាយ និងយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល ក្រោមការដឹក នាំដ៏ស្វាហាប់ ច្បាស់លាស់ ប្រកបដោយចក្ខុវិស័យវែងឆ្ងាយ របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានផ្ដោតអាទិភាពបន្តលើកកម្ពស់ និងបង្កើនតម្លៃបន្ថែមវិស័យកសិកម្ម និងកសិ-ឧស្សាហកម្ម ដែលជាប្រភពសក្ដានុពលនៃកំណើន ក៏ដូចជាការធ្វើពិពិធកម្ម មូលដ្ឋានកំណើនសេដ្ឋកិច្ច ដើម្បីលើកតម្កើងជីវភាពរបស់ប្រជាពលរដ្ឋ។ ក្នុងន័យនេះផ្អែកតាមសក្ដានុពលរបស់ខេត្តកំពង់ធំ ជាពិសេសទន្លេសាប និងស្ទឹងធំៗ ដែលអំណោយផលដល់ការជំរុញវារីវប្បកម្ម ក្នុងស្រុក ក្រុមការងារបានបន្តផ្ដោតការសិក្សាលើបញ្ហាប្រឈម និងដំណោះស្រាយ ព្រមទាំងការរៀបចំផែនការមេ ប្រព័ន្ធអេកូឡូស៊ី វារីវប្បកម្មមួយ ជាខ្សែច្រវាក់ផលិតកម្ម ដែលមានលក្ខណៈប្រទាក់ក្រឡាគ្នា ចាប់ពីការផលិតពូជ ការចិញ្ចឹមការកែច្នៃ ទីផ្សារ និងការប្រកួត ប្រជែង ក្នុងគោលដៅលើកកម្ពស់សមត្ថភាពផលិតកម្មក្នុងស្រុក និងលើកស្ទួយការគាំទ្រផលិតផលក្នុងស្រុក ព្រមទាំងបង្កើនសមត្ថភាពក្នុងការនាំចេញ សំដៅបង្កើនតម្លៃបន្ថែមសេដ្ឋកិច្ច, បង្កើតឱកាសការងារ, ប្រាក់ចំណូលបន្ថែម និងធ្វើឱ្យជីវភាពប្រជាពលរដ្ឋកាន់តែប្រសើរ ក៏ដូចធ្វើឱ្យសកម្មភាពសេដ្ឋកិច្ចឱ្យកាន់តែរស់រវើក និងជវភាព។ឯកឧត្តមឧបនាយករដ្ឋមន្ត្រីប្រចាំការ បានលើកទឹកចិត្តដល់បងប្អូនអ្នកចិញ្ចឹមត្រី អ្នកប្រមូលទិញ ចែកចាយ និងនាំចេញ ព្រមទាំង សិប្បកម្មកែច្នៃ ឱ្យពង្រឹងសមត្ថភាព បង្កើនផលិតភាព ដើម្បីឆ្លើយតបទៅនឹងតម្រូវការទីផ្សារ និងស្ដង់ដាទីផ្សារ និងត្រូវចេះសហការគ្នា ឱ្យ ក្លាយទៅជាប្រព័ន្ធអេកូឡូស៊ីដ៏រស់រវើក និងជាខ្សែច្រវាក់ផលិតកម្មរួមដ៏រឹងមាំ មានភាពទាក់ទាញ និងមានតម្លៃបន្ថែមកាន់តែខ្ពស់ព្រមទាំង មានសមត្ថភាពប្រកួតប្រជែងជាមួយប្រទេសជិតខាងទាំងបរិមាណ និងគុណភាព និងណែនាំឱ្យក្រុមការងារចុះមូលដ្ឋាន ដែលទទួលបន្ទុក តាមវិស័យក្នុងខេត្តកំពង់ធំ ជាពិសេសក្រុមការងារលើកកម្ពស់ជីវភាពប្រជាជន ក្រុមការងារអភិវឌ្ឍន៍សេដ្ឋកិច្ចមូលដ្ឋាន និងទីផ្សារផលិត ផលខ្មែរ សហការជាមួយអាជ្ញាធរមូលដ្ឋាន តំណាងក្រសួងស្ថាប័នពាក់ព័ន្ធ ធនាគារជាដៃគូ ដើម្បីសិក្សា និងរៀបចំចងក្រងជាបណ្ដុំអ្នកផលិត សមាគម ឬជាសហគមន៍, ផ្ដល់ការបណ្តុះបណ្ដាលជំនាញបច្ចេកទេស និងការគ្រប់គ្រងអាជីវកម្ម, ការផ្ដល់ហិរញ្ញប្បទាន ដែល មានអត្រាការប្រាក់សមស្រប, ការជួយដោះស្រាយនូវប្រព័ន្ធហេដ្ឋារចនាសម្ព័ន្ធគាំទ្រចាំបាច់នានាជាដើម។សូមបញ្ជាក់ថា តាំងពីដើមរៀងមក ស្រុកស្ទោងគឺជាទីតាំងពិសេស ដែលមានការសម្គាល់ថា ជាកន្លែងធ្វើវារីវប្បកម្មដ៏សំបូរបែប ពិសេសការ កែច្នៃត្រីធ្វើជាត្រីងៀត ដើម្បីផ្គត់ផ្គង់ ចែកចាយក្នុងស្រុក និងបម្រើឱ្យការនាំចេញ ហើយបច្ចុប្បន្នមានគ្រួសារប្រជាពលរដ្ឋកំពុងចិញ្ចឹមត្រី ចំនួន ១១៥ គ្រួសារ និងមានសិប្បកម្មកែច្នៃត្រីចំនួន ៦៥ ទីតាំង៕ អត្ថបទ៖ សុន រ៉ាឌី