BTV NEWS

គណៈបញ្ជាការឯកភាពរាជធានី បន្តប្រតិបត្តិការបង្ក្រាបទីតាំង Online Scams ឃាត់ជនបរទេសជាង៣០០នាក់ នៅខណ្ឌដូនពេញ

ឃាត់ខ្លួនជនសង្ស័យ ៤៩នាក់ពាក់ព័ន្ធ Online Scams និងជនបរទេសស្នាក់នៅខុសច្បាប់ជាច្រើននាក់ទៀត

នគរបាលរាជធានីបង្ហាញមុខជនសង្ស័យ ៣៥នាក់ពាក់ព័ន្ធ ១០ករណីផ្សេងគ្នា

ជនជាតិចិនចំនួន៣៣៩នាក់ ពាក់ព័ន្ធករណី Online Scams ត្រូវបានបណ្ដេញចេញពីកម្ពុជា

សន្តិសុខ និង សង្គម

ជនជាតិអាមេនីនៅតំបន់ការ៉ាបាក់ យល់ព្រមរំលាយរដ្ឋាភិបាលផ្ដាច់ខ្លួនចោលចូលទៅជាមួយអាស៊ែរបៃហ្សង់

អាមេនី៖ ជនជាតិភាគតិចអាមេនីនៅក្នុងតំបន់ណាហ្គ័រណូ -ការ៉ាបាក់ បាននិយាយកាលពីថ្ងៃព្រហស្បតិ៍ថា ពួកគេកំពុងរំលាយរដ្ឋាភិបាលផ្ដាច់ខ្លួន ដែលពួកគេបានការពាររយៈពេល៣ទសវត្សរ៍មកហើយ ជាទីដែលមានប្រជាជនជាងពាក់កណ្ដាលបានរត់គេចខ្លួនចាប់តាំងពីអាស៊ែរបៃហ្សង់បាន បើកការវាយលុកភ្លាមៗកាលពីសប្ដាហ៍មុន។ នៅក្នុងសេចក្ដីថ្លែងការណ៍ ពួកគេនិយាយថា សាធារណរដ្ឋស្វ័យប្រកាស អាតសាក់(Artsakh) របស់ពួកគេ នឹងបញ្ចប់វត្តមានចាប់ពីឆ្នាំក្រោយត្រឹមថ្ងៃទី១ខែមករា ជាអ្វីដែលត្រូវបានរួមបញ្ជូលជាផ្លូវការជាមួយរដ្ឋាភិបាលអាស៊ែរបៃហ្សង់ ។ សម្រាប់អាស៊ែរបៃហ្សង់ និងប្រធានាធិបតីរបស់ខ្លួន លោក អ៊ីលហាំ អាលីយ៉េវ (Ilham Aliyev)និយាយថា លទ្ធផលនេះ គឺជាការស្ដារឡើងវិញនៃអធិបតេយ្យភាពដ៏ជោគជ័យលើតំបន់នេះ ដែលត្រូវបានទទួលស្គាល់ជាអន្តរជាតិ ថាជាផ្នែកមួយនៃទឹកដីរបស់ខ្លួន ប៉ុន្តែភាគច្រើននៃជនជាតិអាមេនីក្នុងតំបន់នេះ បានទទួលឯករាជភាពតាមជាក់ស្ដែងក្នុងសង្រ្គាមមួយកាលពីទសវត្សរ៍ឆ្នាំ១៩៩០។ សម្រាប់អាមេនីវិញ នេះគឺជាការបរាជ័យ និងសោកនាដកម្មសម្រាប់ប្រទេស។ ទីភ្នាក់ងារសារព័ត៌មាន RIA របស់រុស្ស៊ី បានរាយការណ៍ថា មនុស្សប្រមាណ៧0.៥០០នាក់ បានឆ្លងព្រំដែនចូលទៅក្នុងប្រទេសអាមេនី កាលពីរសៀលថ្ងៃព្រហស្បតិ៍សប្ដាហ៍នេះ ក្នុងចំណោមប្រជាជនសរុបដែលមានប្រហែល១២ម៉ឺននាក់។ ការវិភាគជាច្រើនលើស្ថានភាពនេះ បង្ហាញថា នៅប៉ុន្មានថ្ងៃខាងមុខទៀតនេះ នឹងមានពុំមានជនជាតិអាមេនី នៅសេសសល់ក្នុងតំបន់ណាហ្គ័រណូ -ការ៉ាបាក់ ទៀតទេ។ ទីភ្នាក់ងារសារព័ត៌មាន Interfax បានដកស្រង់សម្ដីរបស់ នាយករដ្ឋមន្ត្រី អាមេនី លោក នីកូល ផាស៊ីនយ៉ាន (Nikol Pashinyan)ដោយនិយាយថានេះគឺជាទង្វើបោសសម្អាតជនជាតិភាគតិច៕

ឧត្តមស្នងការUNទទួលបន្ទុកសិទ្ធិមនុស្សធ្វើការអំពាវនាវជាបន្ទាន់សុំឲ្យមានបេសកកម្មសន្តិសុខសម្រាប់ប្រទេសហៃទី

UN៖ ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បាននិយាយកាលពីថ្ងៃព្រហស្បតិ៍ថា អំពើហិង្សក្រុមជនអន្ធពាលដែលកំពុងកើនឡើងនៅប្រទេសហៃទី បច្ចុប្បន្ន បានសាយភាយគ្រប់កម្រិតនៃសង្គមនេះ ខណៈដែលលោកបានអំពាវនាវជាបន្ទាន់ឲ្យដាក់ពង្រាយកម្លាំងពហុជាតិទៅកាន់ប្រទេសសមុទ្រការ៉ាអ៊ីបដែលងាយនឹងបង្កជាហេតុ ដើម្បីជួយនគរបាលបង្ក្រាបអំពើហិង្សានេះ។ការអំពាវនាវពីឧត្តមស្នងការ លោក វ៉ុលកើ ទួក (Volker Türk) កើតឡើង នៅពេលដែលអំពើហិង្សារបស់ក្រុមជនអន្ធពាលរីករាលដាលពីទីក្រុងព័រអូប្រាំង ទៅកាន់កណ្តាលនៃប្រទេសនេះ ហើយបទឈប់បាញ់នៅពាក់កណ្តាលខែកក្កដារវាងក្រុមចម្រុះក្រុមជនអន្ធពាលធំៗពីរ បានបែកបាក់គ្នា។ កាលពីថ្ងៃព្រហស្បតិ៍ គ្រូបង្រៀននៅសាលា École Argentine ក្នុងទីក្រុងព័រអូប្រាំង បានចូលទៅរៀបចំអាហារសម្រាប់សិស្សទាំងអស់ បន្ទាប់ពីចុងភៅ មិនអាចចូលទៅធ្វើការបាន ដោយសារអំពើហិង្សា។លោកទួក បាននិយាយថា៖«ជារៀងរាល់ថ្ងៃ ជីវិតរបស់ប្រជាជនហៃទីកាន់តែលំបាកទៅៗ ប៉ុន្តែវាសំខាន់ណាស់ ដែលយើងមិនបោះបង់ទេ។ ស្ថានភាពរបស់ពួកគេ មិនអស់សង្ឃឹមទេ»។ «ដោយមានការគាំទ្រ និងការដោះស្រាយពីអន្តរជាតិ ប្រជាជនហៃទី អាចដោះស្រាយអសន្តិសុខដ៏ធ្ងន់ធ្ងរនេះ ហើយស្វែងរកផ្លូវចេញពីភាពចលាចលនេះ»។ក្នុងរយៈពេលប៉ុន្មានខែថ្មីៗនេះ ប្រទេសហៃទី បានឃើញការវាយប្រហារទ្រង់ទ្រាយធំកើតឡើងដដែលៗ ដោយមិនរើសមុខ ជារឿយៗប្រឆាំងនឹងសង្កាត់ទាំងមូល និងអ្នកស្រុករបស់ពួកគេ។ បញ្ហានេះ បាននាំឲ្យមានការជម្លៀសមនុស្ស ១៣០.000នាក់ ហើយជិត ២.៨០០ នាក់ ត្រូវបានរាយការណ៍ថា ត្រូវបានសម្លាប់នៅចន្លោះខែតុលាឆ្នាំមុន ដល់ខែមិថុនា ក្នុងនោះមានស្ត្រី ២៤៧នាក់ ក្មេងប្រុស ៥៨នាក់ និងក្មេងស្រី ២០នាក់ នេះបើយោងតាមរបាយការណ៍ថ្មីមួយទៅកាន់ក្រុមប្រឹក្សាសន្តិសុខUN។ មានការចាប់ជំរិតមនុស្សជិត ១.៥០០នាក់ ដើម្បីទារប្រាក់លោះ ដែលត្រូវបានរាយការណ៍ ក្នុងអំឡុងពេលនោះ៕

ជនអន្តោប្រវេសន៍ជាច្រើនសម្រុកឆ្លងចូលទឺកដីអាមេរិក ខណៈជួបបញ្ហាប្រឈមនៅព្រំដែន និងច្បាប់សិទ្ធិជ្រកកោនថ្មី

អាមេរិក៖ អស់រយៈពេលជាច្រើនថ្ងៃកន្លងមក ជនអន្តោប្រវេសន៍ជាច្រើនក្រុម ដែលភាគច្រើនមកពីប្រទេសវេណេស៊ុយអេឡា បាននិងកំពុងសម្រុកធ្វើដំណើរឆ្លងកាត់ទន្លេ Rio Bravo ពីទីក្រុង Piedras Negras ភាគខាងជើងប្រទេសម៉ិកស៊ិក ចូលទៅក្នុងទីក្រុង Eagle Pass រដ្ឋតិចសាស់ របស់សហរដ្ឋអាមេរិក ដោយជួបបញ្ហាប្រឈមជាច្រើននៅតាមព្រំដែន ព្រោះតែមានការរារាំងដោយខ្សែលួសបន្លាដ៏មុតស្រួត ដែលដាក់នៅតាមច្រាំងទន្លេនោះ។នៅក្រោមច្បាប់ថ្មី ដែលបានដាក់ក្នុងខែឧសភា ដោយរដ្ឋបាលរបស់ប្រធានាធិបតីអាមេរិក លោក Joe Biden បានដាក់កំហិតលើជនអន្តោប្រវេសន៍ ដែលមិនបានធ្វើការណាត់ជួបដើម្បីឆ្លងកាត់ច្រកចូលផ្លូវច្បាប់ នៅលើកម្មវិធីទូរស័ព្ទគ្រប់គ្រងដោយរដ្ឋាភិបាល ដែលគេស្គាល់ថាឈ្មោះកម្មវិធីសិទ្ធិជ្រកកោន CBP One អាចប្រឈមមុខនឹងការរារាំងក្នុងការជ្រកកោននៅអាមេរិក ព្រមទាំងការនិរទេសត្រឡប់ទៅប្រទេសកំណើត ដែលអាចកើតមានផងដែរ។សូមបញ្ជាក់ថា ចំនួនជនអន្តោប្រវេសន៍បានធ្លាក់ចុះកាលពីដំបូង បន្ទាប់ពីការប្រកាសច្បាប់សិទ្ធិជ្រកកោនថ្មី ប៉ុន្តែក្នុងប៉ុន្មានសប្តាហ៍ថ្មីៗនេះ តួលេខបានចាប់ផ្តើមកើនឡើងម្តងទៀត ខណៈជនអន្តោប្រវេសន៍រាប់ពាន់នាក់ ដែលភាគច្រើនបានភៀសខ្លួនចេញពីវេណេហ្ស៊ុយអេឡា ដែលធ្វើដំណើរឆ្លងកាត់អាមេរិកខាងត្បូង និងកណ្តាល បានចាប់ផ្តើមមកដល់ព្រំដែនអាមេរិកជាបន្តបន្ទាប់មក៕

គណបក្សសាធារណរដ្ឋអាមេរិក បើកការស៊ើបអង្កេតលើការចោទប្រកាន់លោក បៃដិន ដោយផ្តោតលើអាជីវកម្មរបស់កូនប្រុសលោក

អាមេរិក៖ គណបក្សសាធារណរដ្ឋ ដឹកនាំការស៊ើបអង្កេតលើការចោទប្រកាន់ដើម្បីទម្លាក់តំណែងប្រធានាធិបតីអាមេរិក លោកចូ បៃដិន ដោយផ្ដោតលម្អិតលើការទូទាត់ប្រាក់បរទេសដល់សមាជិកនៃគ្រួសាររបស់លោក នៅក្នុងសវនាការលើកដំបូងរបស់ពួកគេកាលពីថ្ងៃព្រហស្បតិ៍ (២៨ កញ្ញា) ប៉ុន្តែមិនបានផ្តល់ភស្តុតាងដែលថាប្រធានាធិបតីប្រជាធិបតេយ្យរូបនេះ បានទទួលផលប្រយោជន៍ផ្ទាល់ខ្លួននោះទេ។សវនាការលើការចោទប្រកាន់ដំបូង ដោយគណៈកម្មាធិការត្រួតពិនិត្យសភាតំណាងរាស្រ្តសហរដ្ឋអាមេរិក បានធ្វើការពិនិត្យលើភស្តុតាងដែលថា គណបក្សសាធារណរដ្ឋបានប្រមូលផ្តុំមកទល់ពេលនេះ អំពីការបណ្តាក់ទុនអាជីវកម្មបរទេស ដោយកូនប្រុសដែលកំពុងមានបញ្ហារបស់លោក បៃដិន ឈ្មោះ ហាន់ធឺ បៃដិន (Hunter Biden) វ័យ៥៣ឆ្នាំ ដែលពួកគេនិយាយថា ភស្តុតាងបានបង្ហាញថាសមាជិកគ្រួសាររបស់លោក បៃដិន កំពុងលក់សិទ្ធិប្រើប្រាស់នៃអាជីវកម្មបរទេសទាំងនោះ។គណបក្សប្រជាធិបតេយ្យ និងសាក្សីឯករាជ្យជាច្រើននាក់បាននិយាយថា មិនមានភស្តុតាងណាមួយដែលថាលោក បៃដិន បានទទួលប្រាក់ទាំងនោះ ឬបានចូលរួមក្នុងអាកប្បកិរិយាមិនសមរម្យ ខណៈពេលដែលលោកបម្រើការជាអនុប្រធានាធិបតីចន្លោះឆ្នាំ២០០៩ និងឆ្នាំ២០១៧ នោះទេ។ សេតវិមានបានបដិសេធការប្រព្រឹត្តខុសរបស់លោកបៃដិន ហើយបានច្រានចោលការស៊ើបអង្កេតនេះថា មានហេតុផលនយោបាយនៅពីក្រោយ។គួររម្លឹកផងដែរថា គណបក្សសាធារណរដ្ឋ បានចោទប្រកាន់លោក បៃដិន និងក្រុមគ្រួសាររបស់លោក ថាបានប្រយោជន៍ពីគោលនយោបាយ ដែលលោកបានបន្តធ្វើជាអនុប្រធានាធិបតី ក្នុងអំឡុងពេលរដ្ឋបាលរបស់អតីតប្រធានាធិបតីអាមេរិក លោក បារ៉ាក់ អូបាម៉ា (Barack Obama) ចន្លោះឆ្នាំ២០០៩ និងឆ្នាំ២០១៧។ ដោយឡែក ពួកគេក៏បានចោទប្រកាន់ក្រសួងយុត្តិធម៌ ថាបានជ្រៀតជ្រែកក្នុងការស៊ើបអង្កេតឧក្រិដ្ឋកម្មរបស់កូនប្រុសលោកប្រធានាធិបតីរូបនេះ គឺលោក ហាន់ធឺ បៃដិន ផងដែរ៕

ក្រសួងការបរទេសអាមេរិក រៀបចំផែនការបន្ទាន់ក្នុងករណីមានការបិទរដ្ឋាភិបាល

អាមេរិក៖ អ្នកនាំពាក្យក្រសួងការបរទេសអាមេរិក លោក Matthew Miller បាននិយាយកាលពីថ្ងៃព្រហស្បតិ៍ (២៨ កញ្ញា) ថា ក្រសួងការបរទេសសហរដ្ឋអាមេរិក បាននិងកំពុងរៀបចំផែនការបន្ទាន់ ក្នុងករណីមានការបិទរដ្ឋាភិបាល។ក្នុងអំឡុងសន្និសីទសារព័ត៌មាន លោក Miller បាននិយាយថា ផែនការនោះនឹងបន្តនៅប៉ុន្មានថ្ងៃខាងមុខ ដើម្បីសម្រេច ថាតើការងារណា ដែលចាំបាច់សម្រាប់សន្តិសុខជាតិ ហើយមិនអាចត្រូវផ្អាកក្នុងពេលការបិទរដ្ឋាភិបាល និងការងារណាខ្លះដែលត្រូវផ្អាក។គួរបញ្ជាក់ផងដែរថា សភាតំណាងរាស្រ្តគណបក្សសាធារណរដ្ឋ ដែលដឹកនាំដោយក្រុមតូចមួយនៃពួកអភិរក្សនិយមដ៏រឹងរូស បានបដិសេធកម្រិតការចំណាយសម្រាប់ឆ្នាំសារពើពន្ធ២០២៤ ដែលបានកំណត់នៅក្នុងកិច្ចព្រមព្រៀង ដែលប្រធានសភាអាមេរិក លោក Kevin McCarthy បានចរចាជាមួយលោកប្រធានាធិបតី ចូ បៃដិន កាលពីខែឧសភា៕

មន្ត្រី៖កិច្ចព្រមព្រៀងEUចែករំលែកអ្នកស្វែងរកសិទ្ធិជ្រកកោននឹងត្រូវកំណត់ ក្នុងរយៈពេលប៉ុន្មានថ្ងៃខាងមុខ

EU៖ មន្ត្រីទេសន្តរប្រវេសន៍ជាន់ខ្ពស់របស់សហភាពអឺរ៉ុប បាននិយាយថា ប្លុកនេះ ត្រូវបានកំណត់ ដើម្បីយល់ព្រមលើរបៀបដោះស្រាយអន្តោប្រវេសន៍មិនទៀងទាត់ឲ្យបានឆាប់ បន្ទាប់ពីកិច្ចពិភាក្សារបស់រដ្ឋមន្ត្រី មិនមានកិច្ចព្រមព្រៀងចុងក្រោយ កាលពីថ្ងៃព្រហស្បតិ៍ជាមួយទីក្រុងប៊ែរឡាំងទេ ហើយទីក្រុងរ៉ូម ព្រួយបារម្ភអំពីការកើនឡើងចំនួននៃអ្នកមកដល់ នៅមុនការបោះឆ្នោតសំខាន់ៗ។ក្រុមរដ្ឋមន្ត្រី កំពុងស្វែងរកកិច្ចព្រមព្រៀងលើប្រព័ន្ធដែលជាប់គាំងជាយូរមកហើយសម្រាប់ការចែករំលែកនៅទូទាំងសហភាពអឺរ៉ុប ដែលអ្នកស្វែងរកសិទ្ធិជ្រកកោន បានទៅដល់អឺរ៉ុប នៅខាងក្រៅច្រកឆ្លងព្រំដែនផ្លូវការ។លោកស្រី អ៊ីលវ៉ា ចូហានសុន (Ylva Johansson) ប្រធានកិច្ចការមហាផ្ទៃរបស់សហភាពអឺរ៉ុប បានបដិសេធមិនផ្តល់ព័ត៌មានលម្អិតថា៖«ខ្ញុំប្រាកដថា ក្នុងរយៈពេលពីរបីថ្ងៃទៀត យើងនឹងមានការសម្រេចចិត្តជាផ្លូវការលើវិធីសាស្រ្តទូទៅសម្រាប់យន្តការដោះស្រាយវិបត្តិនេះ។លោកស្រី បានដាក់ចំនួនមកដល់មិនទៀងទាត់ក្នុងឆ្នាំនេះ គឺមានជនអន្តោប្រវេសន៍ ២៥០.០០០នាក់ ដែលភាគច្រើនជាអ្នកដែលបានភៀសខ្លួនចេញពីសង្គ្រាម និងភាពក្រីក្រនៅមជ្ឈិមបូព៌ា អាហ្វ្រិក និងអាស៊ីខាងត្បូង ហើយបានទៅដល់សហភាពអឺរ៉ុប នៅទូទាំងសមុទ្រមេឌីទែរ៉ាណេ៕

កោះតៃវ៉ាន់បង្ហាញនាវាមុជទឹកថ្មី ដើម្បីទប់ទល់ប្រទេសចិន

តៃវ៉ាន់៖ កោះតៃវ៉ាន់ បានបង្ហាញនាវាមុជទឹកផលិតក្នុងស្រុកលើកដំបូងរបស់ខ្លួន ខណៈកោះនេះពង្រឹងការការពារប្រឆាំងការវាយប្រហាររបស់ប្រទេសចិន។ មេដឹកនាំលោកស្រី Tsai Ing-wen បានអញ្ចើញជាអធិបតីក្នុងពិធីចាប់ផ្តើមការបង្ហាញនៅទីក្រុងកំពង់ផែ Kaohsiung នៅថ្ងៃព្រហស្បតិ៍នេះ។ មន្ត្រីសហរដ្ឋអាមេរិក បានព្រមានថា ប្រទេសចិន អាចប្រើសមត្ថភាពផ្នែកយោធា ក្នុងការបង្កើនការឈ្លានពានក្នុងរយៈពេលប៉ុន្មានឆ្នាំខាងមុខនេះ។ កោះតៃវ៉ាន់ ជាកោះស្វ័យគ្រប់គ្រង ដែលប្រទេសចិនចាត់ទុកថាជាខេត្តរបស់ខ្លួន ហើយបានប្តេជ្ញាទាមទារសិទ្ធក្រសោបយកមកវិញនៅថ្ងៃណាមួយ។ អ្នកសង្កេតការណ៍ភាគច្រើន ជឿថា ប្រទេសចិននឹងមិនវាយប្រហារទៅលើកោះនេះភ្លាមៗនោះទេ ហើយទីក្រុងប៉េកាំងបាននិយាយថាខ្លួនស្វែងរក ការបង្រួបបង្រួមដោយសន្តិវិធីជាមួយកោះតៃវ៉ាន់។ ប៉ុន្តែទន្ទឹមនឹងនេះ ប្រទេសចិនបាន ព្រមានកោះតៃវ៉ាន់ចំពោះការប្រកាសឯករាជ្យជាផ្លូវការ និងមានការគាំទ្រពីបរទេសណាមួយ។ ប្រទេសនេះបានព្យាយាមកាន់តែខ្លាំងឡើង ដើម្បីដាក់សម្ពាធលើកោះនេះ ដោយមានសមយុទ្ធយោធារបស់ខ្លួននៅច្រកសមុទ្រតៃវ៉ាន់ រួមទាំងការធ្វើសមយុទ្ធជាច្រើននៅក្នុងខែនេះ។លោកស្រី Tsai បាននិយាយខណៈលោកស្រីឈរនៅពីមុខនាវាមុជទឹកដែលមានរូបទង់ជាតិកោះតៃវ៉ាន់ថា «ប្រវត្តិសាស្ត្រនឹងចងចាំជារៀងរហូតនៅថ្ងៃនេះ»។ លោកស្រីនិយាយបន្ថែមថា គំនិតនៃនាវាមុជទឹកផលិតក្នុងស្រុកកាលពីពេលមុនត្រូវបានគេចាត់ទុកថា «ជាកិច្ចការមិនអាចទៅរួច ប៉ុន្តែយើងបានធ្វើវា»។យោងតាមមន្ត្រីយោធាបានឱ្យដឹងថា នាវាមុជទឹកដើរដោយថាមពលប្រេងម៉ាស៊ូតតម្លៃ ១,៥៤ពាន់លានដុល្លារ នឹងដំណើរការសាកល្បងជាច្រើនលើក ហើយនឹងត្រូវបញ្ជូនទៅឱ្យកងទ័ពជើងទឹកនៅចុងឆ្នាំ ២០២៤ ។

អាជ្ញាធរខណ្ឌសែនសុខ ដាក់ឱសានវាទ ឱ្យបញ្ឈប់ការយកចិញ្ចើមផ្លូវ២៧១ ធ្វើអាជីវកម្មលក់ដូរ

ភ្នំពេញ ៖ កម្លាំងអាជ្ញាធរខណ្ឌសែនសុខ ដឹកនាំដោយលោកសាំង សុភៈវិចិត្រ អភិបាលរងខណ្ឌ បានដឹកនាំក្រុមមន្ត្រី ចុះអប់រំណែនាំជាលើកចុងក្រោយ លើក្រុមអ្នកលក់ដូរបន្លែត្រីសាច់ទាំងឡាយ ឱ្យបញ្ឈប់ការយកចិញ្ចើមផ្លូវលេខ២៧១ ធ្វើអាជីវកម្មបន្តទៀត ខណះដែលកាលពីពេលកន្លង អាជ្ញាធរក៏ធ្លាប់បានចុះអប់រំជារឿយៗផងដែរ ។ ការចុះដាក់ឱសានវាទ នៃការយកចិញ្ចើមផ្លូវធ្វើអាជីវកម្មខាងលើនេះ ធ្វើឡើងនាវេលាម៉ោង៥ និង៣០នាទីព្រឹក ថ្ងៃទី២៨ ខែកញ្ញា ឆ្នាំ២០២៣នេះ នៅតាមបណ្តោយផ្លូវលេខ២៧១ ( ម្តុំទល់មុខផ្សារហេងលី ) ស្ថិតក្នុងសង្កាត់ទឹកថ្លា និងសង្កាត់អូរបែកក្អម ខណ្ឌសែនសុខ រាជធានីភ្នំពេញ ។ នៅព្រឹកថ្ងៃខែដដែលនេះ កម្លាំងអាជ្ញាធរបានពិនិត្យឃើញថា នៅតែមានបងប្អូនពលរដ្ឋមួយចំនួន បន្តការលក់ដូរលើចិញ្ចើមផ្លូវសាធារណះដដែល បើទោះបីជាអាជ្ញាធរពន្យាចុះអប់រំពន្យល់ណែនាំច្រើនលើកច្រើនសារ ឱ្យបញ្ឈប់ការលក់ដូរបែបនេះទៀតក៏ដោយ ខណះដែលការដាក់លក់បែបនេះ វាធ្វើឱ្យប៉ះពាល់ដល់សណ្តាប់ និងរបៀបរៀបរយផ្លូវសាធារណះ ក៏ដូចជាបរិស្ថានអនាម័យជាដើម ។ មន្ត្រីអាជ្ញាធរ បានណែនាំឱ្យពលរដ្ឋកំពុងលក់ដូរបំពានខាងលើ សូមឱ្យពួកគាត់ស្វែងទីតាំងថ្មី បន្តអាជីវកកម្មលក់ដូររបស់ខ្លួនបន្តទៀត ដែលជាទីតាំងត្រឹមត្រូវ ជៀសវៀងការដាក់លក់ដូរលើចិញ្ចើមផ្លូវ ដែលធ្វើឱ្យបាត់បង់សណ្តាប់ធ្នាប់សង្គម ។ មន្ត្រីអាជ្ញាធរ បញ្ជាក់ថា ក្រោយការអប់រំណែនាំលើកចុងក្រោយនេះត្រូវបានបញ្ចប់រួច នៅពេលខាងមុខ អាជ្ញាធរនឹងមានវិធានការរដ្ឋបាលតាមនីតិវិធីច្បាប់ ដោយដាក់កម្លាំងចុះរៀបចំ ដោយមិនទទួលខុសត្រូវលើការបាត់បង់ ឬខូចខាតទ្រព្យសម្បត្តិរបស់បងប្អូនអ្នកលក់ដូរនោះឡើយ ៕ ដោយ ៖ លីហេង

ត្រីរាប់រយក្បាលងាប់ ខណៈប្រេស៊ីលរងការវាយប្រហារដោយគ្រោះរាំងស្ងួតធ្ងន់ធ្ងរ

រដ្ឋមន្ត្រីក្រសួងបរិស្ថាន លោកស្រី Marina Silva បាននិយាយថា រដ្ឋាភិបាលរបស់ប្រទេសប្រេស៊ីល កំពុងរៀបចំក្រុមការងារមួយ ដើម្បីផ្តល់ជំនួយសង្គ្រោះបន្ទាន់ដល់ប្រជាជននៅក្នុងតំបន់ព្រៃអាម៉ាហ្សូន ដែលរងផលប៉ះពាល់ដោយគ្រោះរាំងស្ងួតធ្ងន់ធ្ងរ ដោយបានជះឥទ្ធិពលដល់ទន្លេ ដែលជាជំនួយជីវិតរបស់ពួកគេ។កម្រិតទឹកទន្លេទាប និងស៊ីតុណ្ហភាពទឹកកាន់តែក្តៅ បានសម្លាប់ហ្វូងត្រីរាប់រយក្បាលអោយអណ្តែតលើផ្ទៃទន្លេ ដោយបំពុលទឹកផឹកសម្រាប់ប្រជាជន។ លោកស្រី Silva បានប្រាប់សារព័ត៌មាន រ៉យទ័រ ថា គ្រោះរាំងស្ងួតដ៏ធ្ងន់ធ្ងរបំផុតក្នុងកំណត់ត្រានេះ បានរំខានដល់ផ្លូវដឹកជញ្ជូនតាមដងទន្លេ ដែលគំរាមកំហែងដល់ការខ្វះខាតស្បៀងអាហារ និងទឹក ហើយបានសម្លាប់ត្រីមួយចំនួនធំនៅក្នុងទន្លេផងដែរ។លោកស្រីបានបន្ថែមថា មនុស្សប្រហែល១១១.០០០នាក់ បានរងផលប៉ះពាល់នៅក្នុងតំបន់ដែលប្រភពចំណូលរបស់ប្រជាជនភាគច្រើនបានមកពីការនេសាទ ហើយសកម្មភាពនេសាទនឹងត្រូវផ្អាកមួយរយៈផងដែរ។ ទីភ្នាក់ងារការពារជនស៊ីវិលបានព្រមានថា គ្រោះរាំងស្ងួតអាចប៉ះពាល់ដល់មនុស្សរហូតដល់ ៥០០.០០០នាក់នៅក្នុងតំបន់ព្រៃអាម៉ាហ្សូន។ គ្រោះរាំងស្ងួតនេះ ក៏ដូចជាទឹកជំនន់នៅភាគខាងត្បូងនៃប្រទេសប្រេស៊ីល បណ្តាលមកពីបាតុភូតអាកាសធាតុអ៊ែល នីញ៉ូ ដែលធ្វើឲ្យកម្ដៅទឹកលើផ្ទៃក្នុងមហាសមុទ្រប៉ាស៊ីហ្វិកកើនឡើង៕

បព្វជិតកាតូលិកជាច្រើនតវ៉ានៅអ៊ីតាលី ដើម្បីទាមទារច្បាប់គ្មានការអត់ឱនលើការរំលោភបំពានផ្លូវភេទ

កាលពីថ្ងៃពុធ (២៧ កញ្ញា) ក្រុមជនរងគ្រោះនៃរំលោភបំពានពីវិហារកាតូលិក និងអ្នកតស៊ូមតិ បានអំពាវនាវដល់សម្តេចប៉ាប ហ្វ្រង់ស៊ីស ឱ្យអនុវត្តច្បាប់ «គ្មានការអត់ឱន»" ប្រឆាំងនឹងការរំលោភបំពានផ្លូវភេទពីបព្វជិត បន្ទាប់ពីបានបញ្ចប់ធម្មយាត្រាតវ៉ារយៈពេលប្រាំមួយថ្ងៃ ទៅកាន់ទីក្រុងរ៉ូម ដោយកាន់ឈើឆ្កាងដ៏ធំមួយ។មេធាវីអាមេរិក លោក Timothy Law សហស្ថាបនិកនៃអង្គការលុបបំបាត់ការរំលោភបំពានផ្លូវភេទពីបព្វជិត (ECA) បាននិយាយថា ក្បួនធម្មយាត្រានេះ បង្ហាញពីការប្តេជ្ញាចិត្តនៃអ្នកនៅរស់រានមានជីវិត ដើម្បីមកថ្លែងសាររបស់ពួកគេទៅកាន់សម្តេចប៉ាប ហ្វ្រង់ស៊ីស ដោយថាត្រូវតែមានច្បាប់ជាសកលនៃព្រះវិហារក្នុងការមិនអត់ឱនឱ្យជនល្មើសបំពានផ្លូវភេទពីបព្វជិតនោះទេ។ ការបំពានផ្លូវភេទ និងការបិទបាំងរឿងអាស្រូវ បានធ្វើឱ្យខូចកេរ្តិ៍ឈ្មោះរបស់វិហារកាតូលិក ហើយជាបញ្ហាប្រឈមដ៏សំខាន់សម្រាប់សម្តេចប៉ាប ដែលបានចាត់វិធានការជាបន្តបន្ទាប់ក្នុងគោលបំណងរក្សាឋានានុក្រមសាសនាចក្រ ឱ្យកាន់តែមានទំនួលខុសត្រូវ ជាមួយនឹងលទ្ធផលចម្រុះ។សម្តេចប៉ាប ហ្វ្រង់ស៊ីស បានមានបន្ទូលសន្យាថា «គ្មានការអត់ឱន» ទាក់ទងនឹងការរំលោភបំពានក្នុងព្រះវិហារ ប៉ុន្តែក្រុមអ្នករិះគន់និយាយថា កំណែទម្រង់ និងគោលការណ៍ណែនាំរបស់សម្ដេចប៉ាប មិនទាន់បានសម្រេចគ្រប់គ្រាន់ទេ ហើយត្រូវបានអនុម័តមិនស្មើគ្នាដោយវិហារកាតូលិកជាតិជាច្រើនផងដែរ៕

បណ្ដាញសង្គម

ព័ត៌មានថ្មីៗ

ស្នងការ៖ស្ថានភាពសន្តិសុខក្នុងព្រឹត្តិការណ៍នគរសង្ក្រាន្តមានភាពល្អប្រសើរមិនមានបាតុភាពណាមួយកើតឡើងទេ

ក្រុមការងារគោលដៅបាសាក់លែន អំពាវនាវទេសចរជាតិ អន្តរជាតិមកចូលរួមលេងកម្សាន្តឱ្យបានច្រើន

ក្រុមគ្រូពេទ្យជាង ១ពាន់នាក់ និងស្តង់សុខភាពប្រចាំការ ត្រៀមសង្រ្គោះបឋម ជូនភ្ញៀវជាតិ និងអន្តរជាតិ ចូលមកកម្សាន្តក្នុងព្រឹតិ្តការណ៍នគរសង្រ្កាន្ត

អភិបាលរាជធានីភ្នំពេញ៖ ការការពារសន្តិសុខជូនពលរដ្ឋក្នុងព្រឹត្តិការណ៍ «នគរសង្ក្រាន្ត» គឺជាការងារចម្បងរបស់រដ្ឋបាលរាជធានីភ្នំពេញ

ភ្ញៀវទេសចរជាច្រើននាំគ្នាទៅលេងកម្សាន្តនៅតំបន់រមណីយដ្ឋានទឹកឈូច្រើនក្នុងឱកាសចូលឆ្នាំថ្ងៃទីពីរ

ពលករ និងសហគមន៍ខ្មែរនៅប្រទេសម៉ាឡេស៊ីជួបជុំរៀបចំពិធីបុណ្យចូលឆ្នាំថ្មីប្រពៃណីខ្មែរយ៉ាងសប្បាយរីករាយដើម្បីបង្ហាញពីវប្បធម៌ប្រពៃណីជាតិដ៏ផូរផង់

កម្ពុជា បដិសេធចំពោះការផ្សាយរបស់សារព័ត៌មានថៃថា «កម្ពុជាស្នើឱ្យបើកច្រកដឹកជញ្ជូនទំនិញសង្គ្រោះបន្ទាន់» ដែលនេះជាព័ត៌មានក្លែងក្លាយ

រដ្ឋមន្ត្រីក្រសួងទេសចរណ៍ អញ្ជើញចូលរួម ព្រឹត្តិការណ៍លៀសហាល ចំនួន ៥តោន ជាមួយថ្នាក់ដឹកនាំ និងប្រជាពលរដ្ឋខេត្តកំពង់ចាម

នាវាដឹកប្រេងចិនរងទណ្ឌកម្មអាមេរិក ធ្វើដំណើរឆ្លងកាត់ច្រកសមុទ្រ Hormuz

ធានាធិបតីកូរ៉េខាងត្បូង ព្រមានថាជម្លោះមជ្ឈិមបូព៌ានឹងធ្វើឲ្យតម្លៃប្រេងនៅតែហក់ឡើងខ្ពស់ប្រធ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877