BTV NEWS

ភ្នំពេញក្រោន ទទួលបានការសរសើរពីគ្រូ Kitchee ក្រោយរកបាន ៩ពិន្ទុពេញក្នុងជុំទី១ នៃពាន ACL-2

ព្រះខ័នរាជ បញ្ចប់ការរង់ចាំ ជាមួយជ័យជម្នះភ្លូកទឹកភ្លូកដីលើក្រុម Tampines Rovers ក្នុងពានកម្រិតទី២ ទ្វីបអាស៊ី

ពលរដ្ឋជាង ១,៥០០នាក់ចូលរួមរត់កម្សាន្ដ Kinal Fun Run 2026 ក្នុងអាកាសយានដ្ឋានអន្ដរជាតិភ្នំពេញ

គ្រូភ្នំពេញក្រោន ប្ដេជ្ញាធ្វើឲ្យអ្នកគាំទ្រមានមោទនភាពជាថ្មី មុនជួបក្រុម Kitchee ក្នុងពានកម្រិតទី២ ទ្វីបអាស៊ីយប់នេះ

ព័ត៌មានកីឡា

វិសាខាវាយបកយកឈ្នះអង្គរថាយហ្គឺរ ៣ទល់នឹង២ក្រៅដី សប្ដាហ៍ទី១៩ លីគកំពូលកម្ពុជា

ទីបំផុតក្លឹបបាល់ទាត់វិសាខាសងសឹកបានសម្រេចក្រោយបរាជ័យក្នុងជើងទី១ ក្នុងដីរបស់ខ្លួន ពេលដែលយកឈ្នះអង្គរថាយហ្គឺរ ៣ទល់នឹង២វិញ ថ្ងៃទី៣១ ខែមករា ឆ្នាំ២០២៦ នៅកីឡដ្ឋានអាគីហ៊ីរ៉ូកាតុ ខេត្តសៀមរាប សប្ដាហទី១៩នៃការប្រកួតកីឡាបាល់ទាត់លីគកំពូលកម្ពុជា។នៅពីមុខអ្នកគាំទ្រជាង២០០០នាក់ កីឡាករ សុខគ្រី សូហ្វាន់ ទាត់បញ្ចូលទីពីចំងាយឱ្យម្ចាស់ផ្ទះអង្គរថាយហ្គឺរ នាំមុខមុន នៅនាទីទី១៧។ ១៣នាទីបន្ទាប់ភ្ញៀវ វិសាខា វាយបកតាមស្មើវិញ ពេលដែលកីឡាករ Park Jung Bin ទាត់បញ្ចូលទីបានសម្រេច ក្រោយពេលដែលកីឡាករ ស៊ិន កក្កដា ទាត់បាល់មួយទំហឹងឱ្យ។ ៨នាទីក្រោយមក វិសាខា បានបាល់ពិន័យ១១ម៉ែត្រ ហើយកីឡាករ Lucas Dias do Nascimento Serafim ក៏ធ្វើបានសម្រេច។ ចប់វគ្គទី១ វិសាខា នាំមុខអង្គរថាយហ្គឺរ ២ទល់នឹង១។ក្នុងវគ្គទីពីរក្លឹបទាំងពីរដាក់សម្ពាធលើគ្នារៀងៗខ្លួនពិសេសម្ចាស់ផ្ទះអង្គរថាយហ្គឺរ ហើយទីបំផុតនៅនាទីទី៨១ ក៏តាមស្មើពេលកីឡាករសញ្ជាតិជប៉ុន YASUOKA TAKUTO ទាត់បញ្ចូលទីយ៉ាងល្អ។ យ៉ាងណាក៏ដោយ នាទីនៅសេសសល់ វិសាខាក៏បន្តវាយសម្រុក ហើយកីឡាករដូរចូល ថា គ្រីយ៉ា តែតបញ្ចូលទីគ្រាប់ជ័យជំនះឱ្យក្រុមនៅនាទីទី៩០បូក២។ ក្រោយការប្រកួតនេះវិសាខា ឡើងមកឈរនៅលេខ៥ ១៨ប្រកួតមាន២៨ពិន្ទុ ចំណែកអង្គរថាយហ្គឺរ ធ្លាក់មកលេខ៦ ១៧ប្រកួតមាន២៧ពិន្ទុ។ សប្តាហ៍ទី២០ថ្ងៃអាទិត្យទី៨ ខែកុម្ភៈ វិសាខា ត្រូវធ្វើដំណើរមកជួបបឹងកេតនៅពហុកីឡដ្ឋានជាតិ និងអង្គរថាយហ្គឺរធ្វើដំណើរទៅខេត្តសមុទ្រ ជួបឡាយហ្វខេត្តព្រះសីហនុ៕

សៀង ចន្ធា រកបានគ្រាប់លីគដំបូងក្នុងការប្រកួតព្រះខ័នរាជឈ្នះកងយោធពលខេមរភូមិន្ទ ៦ទល់៣

ខ្សែប្រយុទ្ធកម្ពុជា សៀង ចន្ធា បានបញ្ចប់ភាពក្សត់គ្រាប់បាល់ក្នុងការប្រកួតលីគកំពូលកម្ពុជារដូវកាល២០២៥-២០២៦ ដោយរកបានគ្រាប់បាល់ដំបូងក្នុងលីគកំពូលកម្ពុជា ក្នុងការប្រកួតដែលអ្នកការពារតំណែងជើងឯកព្រះខ័នរាជស្វាយរៀង បន្តឈ្នះក្លឹបបាល់ទាត់កងយោធពលខេមរភូមិន្ទ ៦ទល់នឹង៣ សប្ដាហទី១៩ នៅពហុកីឡដ្ឋានជាតិមរតកតេជោ យប់ថ្ងៃទី០១ ខែកុម្ភៈ ឆ្នាំ២០២៦។ជំនួបនេះលេងបាន៤នាទី កីឡាករសារ៉េត គ្រីយ៉ា តែតបញ្ចូលទីគ្រាប់នាំមុខឱ្យព្រះខ័នរាជស្វាយរៀង ពេលដែលកីឡាករ Conor Jon Shields ទាត់បាល់ចេញពីជ្រុង ហើយកីឡាករ Patrick ទាត់បុកដីខ្ទាត់ទៅរកជំហររបស់គ្រីយ៉ា ហើយក៏តែតបញ្ចូលទីបានសម្រេច។នៅនាទីទី២០ ព្រះខ័នរាជស្វាយរៀង បន្ថែមមួយគ្រាប់ទៀត ពេលដែលកីឡាករ Conor Jon Shield លើកបាល់ចេញពីជ្រុង ហើយកីឡាករ Odawara តែតទៅឱ្យ Faris Hammouti ហើយកីឡាករសញ្ជាតិម៉ារ៉ុករូបនេះរកគ្រាប់បាល់បានសម្រេច។ ៨នាទីបន្ទាប់កីឡាករ កងយោធពលខេមរភូមិន្ទ អ៊ឹម វិនុន ធ្វើឱ្យមានកំហុសតែតបញ្ចូលទីខ្លួនឯងជួយឱ្យម្ចាស់ផ្ទះនាំមុខ ៣ទល់០ បន្ទាប់ពី Shields លើកបាល់ចេញពីជ្រុងដដែល។ នៅចុងវគ្គទី១នាទីទី៤៥បូក២ កីឡាករ Patrick Robson ទាត់បញ្ចូលទីគ្រាប់៤ឱ្យព្រះខ័នរាជ បន្ទាប់ពីកីឡាករ Hammouti ទាត់បាល់ពីចំងាយបញ្ជួនទៅឱ្យ។ ចប់វគ្គទី១ព្រះខ័នរាជស្វាយរៀង នាំមុខកងយោធពលខេមរភូមិន្ទ ៤ទល់នឹង០។ក្រោយសម្រាក ផ្ដើមវគ្គទី២ បានត្រឹម៥នាទី ក្រុមលោកភា សុភក្ត្រា កងយោធពលខេមរភូមិន្ទ វាយបកបានមួយគ្រាប់វិញដោយកីឡាករ ស្រេង សុខគា ទាត់បាល់មួយទំហឹងធ្វើឱ្យវីរៈ ដារា មិនអាចជួយបាន។ ៤នាទីបន្ទាប់កីឡាករ ទេព ហ្វីលីព បន្ថែមគ្រាប់ទី២ឱ្យក្លឹប មុនពេលដែលកីឡាកររូបនេះបន្ថែមគ្រាប់ទី២របស់ខ្លួន និងជាគ្រាប់វាយបកតាមពីក្រោយទី៣របស់ក្លឹបដែលមានមូលដ្ឋាននៅស្តាតចាស់នេះ។យ៉ាងនេះក្ដីព្រះខ័នរាជស្វាយរៀង នៅតែបន្តវាយសម្រុកទៅលើគូប្រកួត។ លុះនាទីទី៨៩កីឡាករដូរចូល ប៊ុត រដ្ឋា បញ្ជួនបាល់ស្ទើរឱ្យអ្នកចាំទីអ៊ុំ សេរីរ័ត្ន ហើយខ្សែប្រយុទ្ធ ព្រះខ័នរាជស្វាយរៀង Kwame Peprah ដណ្ដើមបាន និងទាត់បញ្ចូលទីបានសម្រេច។ ជិតចប់ការប្រកួតទៅហើយ ពោលនាទីទី៩០បូក៦ កីឡាករ សៀង ចន្ធា ក៏ទាត់បាល់បញ្ចូលទីគ្រាប់ទី៦ឱ្យក្រុម និងជាគ្រាប់បាល់ទី១របស់ខ្លួនក្នុងលីគកំពូលកម្ពុជារដូវកាល ២០២៥-២០២៦ ក្រោយដំណើរការបាន១៩សប្ដាហ៍។ លទ្ធផលនេះធ្វើឱ្យព្រះខ័នរាជស្វាយរៀងនៅបន្តកាន់កាប់កំពូលតារាង។ថ្ងៃទី៣ ខែកុម្ភៈ ព្រះខ័នរាជស្វាយរៀង នឹងចាកចេញទៅកាន់ប្រទេសសិង្ហបុរី ចូលរួមប្រកួតជើងឯកក្លឹបកំពូលអាស៊ាន ថ្ងៃទី៥ ខែកុម្ភៈជាមួយក្លឹប Lion City Sailors មុនទទួលអាយអេសអាយ ដង្កោសែនជ័យ ថ្ងៃអាទិត្យចុងសប្ដាហ៍នេះ៕

ព្រឹត្តិការណ៍កីឡាកុមារអូឡាំពិក លើកដំបូងនៅកម្ពុជា ទទួលបានគាំទ្រខ្លាំង

ព្រឹត្តិការណ៍កីឡាកុមារអូឡាំពិក លើកទី១ នៅកម្ពុជា បានប្រព្រឹត្តទៅយ៉ាងរលូន និងជោគជ័យ ជាមួយសន្ទុះនៃការគាំទ្រយ៉ាងខ្លាំងរបស់អាណាព្យាបាល ដែលបាននាំកូនៗតូចៗរបស់ខ្លួនចូលរួមយ៉ាងច្រើនកុះករ នៅផ្សារទំនើបអ៊ីអនមានជ័យ កាលពីថ្ងៃទី១ ខែកុម្ភៈ ឆ្នាំ២០២៦។កម្មវិធីកីឡាសម្រាប់កុមារអាយុចន្លោះអាយុ ១ឆ្នាំ ដល់អាយុ ៧ឆ្នាំនេះ បានធ្វើឡើងក្រោមអធិបតីភាពឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) ព្រមទាំងវត្តមានអាណាព្យាបាល និងកុមារា-កុមារីរាប់រយនាក់ ដែលបានបង្ហាញទឹកមុខសប្បាយរីករាយក្នុងការចូលរួមព្រឹត្តិការណ៍នេះ។យោងតាមគណៈកម្មការរៀបចំ ព្រឹត្តិការណ៍កីឡាកុមារអូឡាំពិកលើកដំបូងនេះ មានកុមារចូលរួមសរុប ៣៥០នាក់ ដែលជាតួរលេខលើសពីការរំពឹងទុក បន្ទាប់ពីមានអាណាព្យាបាលជាច្រើន បានសំណូមពរស្នើសុំចុះឈ្មោះបន្ថែម តែដោយសារកត្ដាទីតាំង និងដើម្បីធានាការរៀបចំបានល្អប្រសើរ គណៈកម្មការសម្រេចទទួលការចុះឈ្មោះត្រឹម ៣៥០នាក់ប៉ុណ្ណោះ។យ៉ាងណាមិញឯកឧត្តម វ៉ាត់ ចំរើន បានសម្ដែងការភ្ញាក់ផ្អើល និងវាយតម្លៃខ្ពស់ ចំពោះការគាំទ្រ និងការចូលរួមរបស់កុមារ ពិសេសការជំរុញរបស់អាណាព្យាបាល ដែលបង្ហាញឲ្យឃើញពីការយល់ដឹងអំពីអត្ថប្រយោជន៍នៃការលេងកីឡា ។ ទោះបីការប្រកួតកីឡា តែងមានឈ្នះមានចាញ់ តែឯកឧត្តមសង្កត់ធ្ងន់ថា ព្រឹត្តិការណ៍រៀបចំឡើង មិនផ្ដោតលើលទ្ធផលពេកនោះទេ សំខាន់គឺការចូលរួម និងបង្ហាញនូវភាពក្លាហានរបស់កុមារ តាមរយៈសកម្មភាពកីឡា។តាមរយៈការគាំទ្រយ៉ាងផុសផុលនេះ គណៈកម្មាធិការជាតិអូឡាំពិកកម្ពុជា ក្រោមស្មារតី និងឧត្តមគិតអូឡាំពិក នឹងបន្ដរៀបចំព្រឹត្តិការណ៍នេះជារៀងរាល់ឆ្នាំ ហើយពង្រីកការរៀបចំឲ្យបានកាន់តែធំទៀត នាឆ្នាំក្រោយៗ ជាក់ស្ដែងដោយមានសំណូមពរពីអាណាព្យាបាល នៅឆ្នាំក្រោយ ព្រឹត្តិការណ៍កីឡាកុមារអូឡាំពិក នឹងត្រូវពង្រីកកម្រិតអាយុបន្ថែម ពីអាយុ ១ឆ្នាំ ដល់ ១០ឆ្នាំ ដើម្បីផ្ដល់ឱកាសដល់កុមារកាន់តែច្រើនចូលរួមបន្ថែមទៀត។គួរដឹងថា សម្រាប់ឆ្នាំដំបូង នៃព្រឹត្តិការណ៍កុមារអូឡាំពិក ឆ្នាំ២០២៦ មានកីឡា ១០ប្រភេទ ដូចជាកីឡាវារ កីឡាប្រើបញ្ញាអូឡាំពិក និងកីឡារត់ សម្រាប់កុមារចន្លោះអាយុ ១ ទៅ ២ឆ្នាំ, កីឡាប្រណាំងកង់ដោល, លើកទម្ងន់ និងបាល់បោះ សម្រាប់កុមារចន្លោះអាយុ ៣ ទៅ ៤ឆ្នាំ រួមជាមួយកីឡាបាល់ទាត់ យុទ្ធគុនចម្រុះ វាយកូនគោល និងវាយសី សម្រាប់កុមារចន្លោះអាយុ ៥ ទៅ ៧ឆ្នាំ។ ក្រោយបញ្ចប់ការប្រកួត សម្រាប់កុមារទទួលបានជ័យលាភីលេខ១ ដល់លេខ៣ ក៏ទទួលបានរង្វាន់អនុស្សាវរីយ៍ពីគណៈកម្មការរៀបចំផងដែរ៕ អត្ថបទ លី ឈុនឡា

លីគកំពូលកម្ពុជា៖ បឹងកេត បន្តឈរនៅចំណាត់ថ្នាក់លេខ៣ ក្រោយឈ្នះគិរីវង់សុខសែនជ័យ ២ទល់០

ក្លឹបបាល់ទាត់បឹងកេត បានយកឈ្នះម្ចាស់ផ្ទះគិរីវង់សុខសែនជ័យ ២ទល់នឹង០ ថ្ងៃទី៣១ ខែមករា នៅក្រុងដូនកែវ ខេត្តតាកែវ ការប្រកួតកីឡាបាល់ទាត់លីគកំពូលកម្ពុជា សប្ដាហទី១៩។ការប្រកួតនេះ ទំរាំមានគ្រាប់បាល់បឹងកេត ចាំរហូតដល់ចុងវគ្គទី១ ពេលដែលកីឡាករ តាំង ប៊ុនឆៃ ទាត់បញ្ចូលទីគ្រាប់នាំមុខ នៅនាទីទី៤៥ បន្ទាប់ពី Iago Bento លើកបាល់ចេញពីជ្រុង។ក្នុងវគ្គទី២ បឹងកេតនៅតែធ្វើបានល្អ ហើយនាទីទី៦៣ កីឡាករខ្សែការពារ សឿត ណាវ៉ា តែតបញ្ចូលទីគ្រាប់ទីពីរឱ្យក្រុម ពេលដែលកីឡារតាំង ប៊ុនឆៃ បញ្ជួនបាល់ឱ្យ។ក្រោយលេងបាន១៨ប្រកួតបឹងកេត មាន៣១ពិន្ទុ ឈរនៅចំណាត់ថ្នាក់លេខក្នុងតារាងជើងឯក។ ឯគិរីវង់សុខសែនជ័យលេខ៩ ១៧ប្រកួតមាន១១ពិន្ទុ។ ថ្ងៃសៅរ៍សប្ដាហ៍នេះ គិរីវង់ត្រូវធ្វើដំណើរមកស្តាតចាស់ជួបកងយោធពលខេមរភូមិន្ទ ចំណែកបឹងកេត ទទួលវិសាខាថ្ងៃអាទិត្យនេះ៕

សម្ព័ន្ធក្លឹបចំនួន៦០ ចូលរួមប្រកួតប៊ូល និងប៉េតង់ ជ្រើសរើសជើងឯកថ្នាក់ជាតិ ឆ្នាំ២០២៥

ការប្រកួតកួតកីឡាប៊ូល និងប៉េតង់ជ្រើសរើសជើងឯកថ្នាក់ជាតិ ឆ្នាំ២០២៥ បានចាប់ផ្តើមប្រកួតហើយកាលពីម្សិលមិញ នាពហុកីឡដ្ឋានអូឡាំពិច ដោយមានការចូលរួមពីសម្ព័ន្ធ ក្លឹប ចំនួន៦០ មកពី ១១រាជធានីខេត្ត និង៣ស្ថាប័ន។ ការចូលរួមឆ្នាំនេះមានសន្ទុះកើនឡើង សហព័ន្ធបានរៀបចំ វិញ្ញាសាប្រកួតក្រិតក្រំ ដើម្បីជ្រើសរើសកីឡាករ កីឡាការិនីមានទេពកោសល្យ និងមានសមត្ថភាព មកបំពេញបន្ថែម ជម្រើសជាតិ ដើម្បីធ្វើការប្រមូលផ្តុំ សម្រាប់ឆ្នាំ២០២៦ និងត្រៀមលក្ខណៈ ចូលរួមការប្រកួត កម្រិតអន្តរជាតិនានារួមមមាន៖ ការប្រកួតកីឡានិស្សិតសាកលវិទ្យាល័យអាស៊ាន ជើងឯកពិភពលោក ជើងឯកអាស៊ី ។ ថ្លែងក្នុងពិធីបើកកាប្រកួត ឯកឧត្តម សុខ សូកាន រដ្ឋលេខាធិការ ក្រសួងរៀបចំ ដែនដី នគរូបនីយកម្ម និងសំណង់ និងជាប្រធាន សហព័ន្ធកីឡាប៊ូល និងប៉េតង់កម្ពុជា បានលើកឡើងថា ការប្រកួតនេះ រៀបចំឡើងក្នុងគោលបំណង លើកស្ទួយវិស័យកីឡាមួយនេះ ឲ្យរឹតតែមានការគាំទ្រ ពីមហាជន និងជាការបង្កើនទំនាក់ទំនង រវាងសម្ព័ន្ធ ក្លឹប។ លើសពីនេះក៏ជាការផ្ដល់ឱកាស ដល់កីឡាករ កីឡាការិនី ទូទាំងប្រទេសដែលបានហ្វឹកហាត់នៅក្នុងមូលដ្ឋាន បានប្រកួតប្រជែងនិងជាវេទិកាសម្រាប់សហព័ន្ធសម្លឹងមើលកីឡាករ កីឡាការិនី ដែលមានសក្តានុពល និងឧបនិស្ស័យលើកីឡាប៉េតង់ចូលរួមប្រមូលផ្តុំជាក្រុមជម្រើសជាតិ នាឆ្នាំបន្តបន្ទាប់ទៀត។ ឯកឧត្តម សុខ សូកាន បានបន្តថា សក្តានុពលរបស់កម្ពុជា លើវិស័យកីឡា ប៊ូល និងប៉េតង់ ត្រូវបានការទទួលស្គាល់ ទាំងកម្រិត តំបន់ និងពិភពលោក ព្រមទាំងត្រូវបាន សហព័ន្ធកីឡាប៊ូល និងប៉េតង់អន្តរជាតិ(FIPJP)កន្លងមក បានប្រសិទ្ធនាមកម្ពុជាថា ជាប្រទេស មហាអំណាច លើវិស័យកីឡាប៉េតង់ ដែលនេះគឺជា មោទកភាព សម្រាប់ប្រជាជាតិកម្ពុជាទាំងមូល។ ឯកឧត្តម ប្រធានសហព័ន្ធ បានបញ្ជាក់បន្ថែមថា សម្រាប់ការប្រកួតជើងឯកថ្នាក់ជាតិ ឆ្នាំ២០២៥ នេះ សហព័ន្ធនឹងជ្រើសរើសវិញ្ញាសា ៣ទល់៣ ក្រុមចម្រុះបុរសខ្លាំងៗ ចំនួន ១០ ក្រុម ដើម្បីត្រៀមសម្រាប់ការប្រកួតជើងឯកថ្នាក់ជាតិ ឆ្នាំ២០២៦ ដែលនឹងដំណើរការប្រកួតជម្រុះក្នុងក្របខណ្ឌ ក១។ចាប់ពីឆ្នាំ២០២៦ តទៅ សហព័ន្ធនឹងរៀបចំការប្រកួតលីគ ដោយបែងចែកជាពីរក្របខណ្ឌ គឺ ក្របខណ្ឌ ក១ និងក្របខណ្ឌ ក២ ដោយក្រុមក្របខណ្ឌ ក១ ដែលបានចំណាត់ថ្នាក់លេខ ៩ និងលេខ ១០ នឹងត្រូវធ្លាក់ចេញ ហើយជំនួសមកវិញដោយក្រុមលេខ ១ និងលេខ ២ ពីក្របខណ្ឌ ក២។ យុទ្ធសាស្រ្តនេះ គឺដើម្បីបង្កើនភាពទាក់ទាញ សមភាព និងការប្រកួតប្រជែងយ៉ាងតឹងរឹងរវាងសម្ព័ន្ធក្លិបរាជធានី–ខេត្ត។សូមបញ្ជាក់ដែរថា ការប្រកួតជ្រើសរើសជើងឯកថ្នាក់ជាតិ ឆ្នាំ២០២៥ របស់សហព័ន្ធកីឡាប៊ូល និងប៉េតង់កម្ពុជា នេះធ្វើឡើងរយៈពេល ៣ថ្ងៃចាប់ពីថ្ងៃទី២៨ ដល់ ៣០ ខែមករា ឆ្នាំ២០២៦ នៅទីលាន របស់សហព័ន្ធ ក្នុងពហុកីឡាដ្ឋានជាតិ ដោយមាន ប្រតិភូ គ្រូបង្វឹក កីឡាករ កីឡាការិនី ចូលរួមចំនួន ៤១៦នាក់ មកពី ១១រាជធានីខេត្ត និង៣ស្ថាប័ន ស្មើនឹង ៦០សម្ព័ន្ធ-ក្លិប ដោយប្រកួតលើ ៨វិញ្ញាសា៕

កីឡាប្រដាល់សកល នឹងមានការប្រកួតអាជីពប្រចាំខែ ដើម្បីជំរុញការអភិវឌ្ឍសមត្ថភាពកីឡាករ-កីឡាការិនី

សហព័ន្ធកីឡាប្រដាល់សកលកម្ពុជា ត្រៀមរៀបចំការប្រកួតកម្រិតអាជីពប្រចាំខែ ដោយគ្រោងនឹងចាប់ផ្ដើមពីខែកុម្ភៈខាងមុខតទៅ ដើម្បីផ្ដល់ឱកាសឲ្យកីឡាករ-កីឡាការិនីបានចូលរួមប្រកួត ក៏ដូចជាអភិវឌ្ឍសមត្ថភាពបានកាន់តែល្អ សម្រាប់ត្រៀមការប្រកួតថ្នាក់ជាតិ និងអន្ដរជាតិនានា។នេះបើតាមការបញ្ជាក់របស់ឯកឧត្តម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជា បន្ទាប់ពីលោកបានដឹកនាំកិច្ចប្រជុំគណៈកម្មាធិការប្រតិបត្តិសហព័ន្ធ នៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃទី២៨ ខែមករា ឆ្នាំ២០២៦ ។កិច្ចប្រជុំនេះ ផ្ដោតលើរបៀបវារៈសំខាន់ៗចំនួន ៤ រួមមាន៖ ១-ពិនិត្យមើលរបាយការណ៍សកម្មភាពការងារឆ្នាំ២០២៥ និងលើកទិសដៅឆ្នាំ២០២៦, ២-ការបែងចែកតួនាទីភារៈកិច្ចគណៈកម្មាធិការប្រតិបត្តិ, ៣-ពិនិត្យបច្ចុប្បន្នភាពសមាជិកក្លិប-សមាគម និង ៤-ពិនិត្យយន្តការវាយតម្លៃអភិបាលកិច្ចសហព័ន្ធ។ទន្ទឹមជាមួយការពង្រឹងបច្ចុប្បន្នភាពសមាគម/ក្លិបសមាជិកនោះដែរ លោកក៏បានជូនដំណឹងអំពីការប្រកួតប្រដាល់សកលអាជីព ដែលជាសកម្មភាពថ្មីមួយ ក្នុងឆ្នាំ២០២៦ ក្រោយទទួលបានការគាំទ្រពីវិស័យឯកជន ដែលសហព័ន្ធនឹងរៀបចំការប្រកួតរៀងរាល់ខែ ដើម្បីផ្ដល់ឱកាសដល់កីឡាករ-កីឡាការិនី ដែលខិតខំប្រឹងប្រែងហ្វឹកហាត់ បានប្រកួតជាប់ជាប្រចាំ ក្នុងន័យដុសខាតសមត្ថភាព បច្ចេកទេស បានកាន់តែល្អប្រសើរ សម្រាប់ត្រៀមការប្រកួតអន្ដរជាតិនានា។បន្ថែមលើសកម្មភាពបច្ចេកទេសនេះ ក្នុងនាមប្រធានសហព័ន្ធ ឯកឧត្តម ប៊ុយ សុភ័ណ្ឌ ក៏បានជំរុញដល់ការពង្រឹងអភិបាលកិច្ចល្អក្នុងសហព័ន្ធ ស្របតាមកំណែទម្រង់ស៊ីជម្រៅរបស់ក្រសួងអប់រំ យុវជន និងកីឡា ដើម្បីទទួលបានការឧបត្ថម្ភគាំទ្រពីក្រសួង ក៏ដូចជាគណៈកម្មាធិការជាតិអូឡាំពិកកម្ពុជា សហព័ន្ធកីឡាប្រដាល់សកលអន្ដរជាតិ និងវិស័យឯកជន សម្រាប់បន្ដនិរន្ដរភាពនៃការអភិវឌ្ឍប្រភេទកីឡាអូឡាំពិកមួយនេះឲ្យកាន់តែរីកចម្រើនផងដែរ៕ អត្ថបទ លី ឈុនឡា

កម្ពុជាកំណត់គោលការណ៍ក្លិបចំនួន៤ មានកៅអីក្នុងការប្រកួតពានបាល់ទាត់ទ្វីបអាស៊ី ឆ្នាំ២០២៦/២៧

សហព័ន្ធកីឡាបាល់ទាត់កម្ពុជា បានជូនដំណឹងស្ដីពីគោលការណ៍កំណត់យកក្លិបបាល់ទាត់តំណាងជាតិ ចូលរួមការប្រកួតបាល់ទាត់ទ្វីបអាស៊ី ឆ្នាំ២០២៦/២៧ ដោយមានបេក្ខភាព ៤ក្លិប ដែលនឹងទទួលបានកៅអីចូលរួមព្រឹត្តិការណ៍ប្រចាំទ្វីបនេះ។យោងតាមសេចក្ដីជូនដំណឹងរបស់ក្រុមហ៊ុនខេមបូឌានព្រីមៀរលីគ កាលពីថ្ងៃពុធកន្លងទៅ សហព័ន្ធកីឡាបាល់ទាត់កម្ពុជា បានសម្រេចក្នុងការកំណត់គោលការណ៍ ចំពោះក្លិបបាល់ទាត់តំណាងជាតិ ចូលរួមការប្រកួតដែលរៀបចំដោយសហព័ន្ធកីឡាបាល់ទាត់ទ្វីបអាស៊ី(AFC) សម្រាប់ឆ្នាំ២០២៦/២៧ ដោយផ្អែកសំខាន់លើចំណាត់ថ្នាក់របស់ក្លិបបាល់ទាត់ ចូលរួមការប្រកួតជម្រើសជើងឯក ខេមបូឌានព្រីមៀរលីគ និងពានរង្វាន់សម្តេចអគ្គមហាសេនាបតីតេជោ ហ៊ុន សែន ឆ្នាំ២០២៥/២៦ ដែលបានបំពេញអាជ្ញាបណ្ណក្លិបអន្តរជាតិ AFC Club Licensing ពេញលេញ តាមលំដាប់លំដោយ រួមមាន៖១-ក្លិបដែលទទួលបានជើងឯកការប្រកួត ខេមបូឌានព្រីមៀរលីគ ឆ្នាំ២០២៥/២៦។២-ក្លិបដែលទទួលបានចំណាត់ថ្នាក់លេខ២ នៃការប្រកួត ខេមបូឌានព្រីមៀរលីគ ឆ្នាំ២០២៥/២៦។៣-ក្លិបដែលទទួលបានជើងឯក ពានរង្វាន់សម្តេចអគ្គមហាសេនាបតីតេជោ ហ៊ុន សែន ឆ្នាំ២០២៥/២៦។៤-ក្លិបដែលទទួលបានចំណាត់លេខ៣ នៃការប្រកួត ខេមបូឌានព្រីមៀរលីគ ឆ្នាំ២០២៥/២៦។ទន្ទឹមជាមួយគ្នាដែរ ប្រសិនបើក្លិបបាល់ទាត់ចូលរួមប្រកួតតំណាងជាតិទទួលបានជើងឯក AFC Challenge League នោះក្លិបបាល់ទាត់កម្ពុជា នឹងទទួលកូតាក្លិបបន្ថែមចំនួន ១ក្លិបទៀត ។ ដូច្នេះគោលការណ៍កំណត់ក្លិបបាល់ទាត់ ដែលត្រូវចូលរួមប្រកួត នឹងអនុវត្តទៅតាមចំណាត់ថ្នាក់ដូចបានបញ្ជាក់ និងស្របទៅតាមបទបញ្ជាចូលរួមប្រកួត AFC Club Competition Entry Regulations។គួរដឹងថា សម្រាប់រដូវកាលឆ្នាំ២០២៦/២៧ ខាងមុខ ក្នុងចំណោមពានធំៗរៀបចំដោយ AFC កម្ពុជា បានទទួល ១កៅអីកន្លះ ឬស្មើនឹង ២ក្រុម សម្រាប់ចូលរួមប្រកួតពានរង្វាន់ក្លិបបាល់ទាត់កម្រិតទី២ ឆ្នាំ២០២៦/២៧ (AFC Champions League Two ឆ្នាំ២០២៦/២៧ ពោលគឺក្រុមជើងឯកលីគ ត្រូវលេងវគ្គចែកពូល និងជើងឯករងលីគ ត្រូវលេងវគ្គជម្រុះ បន្ទាប់ពីចំណាត់ថ្នាក់លីគកំពូលកម្ពុជា បានឡើងទៅឈរលេខរៀងទី២៣ ក្នុងតារាងចំណាត់ថ្នាក់ AFC Club Competitions Ranking 2024//25 ក្រោយពីក្លិបព្រះខ័នរាជស្វាយរៀង បានឡើងវគ្គផ្ដាច់ព្រ័ត្រពានរង្វាន់ AFC Challenge League 2024/25។ក្រឡេកមកចាប់អារម្មណ៍ការប្រកួត AFC Challenge League រដូវកាលឆ្នាំ២០២៥/២៦ នេះវិញ កម្ពុជាមានបេក្ខភាព ២ក្រុមចូលរួមការប្រកួតក្របខណ្ឌពានរង្វាន់ទី៣ ទ្វីបអាស៊ីនេះផងដែរ រួមមានព្រះខ័នរាជស្វាយរៀង និងភ្នំពេញក្រោន ដែលគ្រោងនឹងត្រូវជួបគ្នា ក្នុងវគ្គ ៨ក្រុមចុងក្រោយ នាខែមីនាខាងមុខ៕ អត្ថបទ លី ឈុនឡា

គិរីរង់ អាយអេសអាយ និងឡាយហ្វ បង្កព្យុះភ្លៀងក្នុងពានសម្ដេចតេជោ ខណៈកងយោធពលខេមរភូមិន្ទយកឈ្នះជើងឯកថ្នាក់ខេត្ត ៤-០

ក្រុមគិរីវង់សុខសែនជ័យ, អាយអេសអាយ ដង្កោសែនជ័យ និងក្រុមឡាយហ្វខេត្តព្រះសីហនុ បានបង្កព្យុះភ្លៀងក្នុងពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៩ (ថ្នាក់ជាតិ) ឆ្នាំ២០២៥/២៦ បន្ទាប់ពីបានយកឈ្នះក្រុមសមាជិកលីគកំពូលកម្ពុជាដូចគ្នា ក្នុងជើងទី១ នៃវគ្គ ១៦ក្រុមចុងក្រោយ ស្របពេលក្រុមកងយោធពលខេមរភូមិន្ទ បានយកឈ្នះក្រុមជើងឯកពានរង្វាន់សម្ដេចតេជោ ហ៊ុន សែន-ថ្នាក់ខេត្ត មន្ទីរអប់រំ យុវជន និងកីឡា ខេត្តកំពង់ចាម ៤-០ កាលពីល្ងាចថ្ងៃទី២៨ ខែមករា ឆ្នាំ២០២៦។សម្រាប់ក្រុមគិរីវង់សុខសែនជ័យ បានយកឈ្នះក្រុមខ្លាំងអង្គរថាយហ្គឺរ ២-០ លើទឹកដីរបស់ខ្លួន។ ជំនួបដ៏ជក់ចិត្តនេះ នៅកីឡដ្ឋានគិរីវង់នេះ ក្រុមម្ចាស់ផ្ទះ បានបើកការនាំមុខអង្គរថាយហ្គឺរ ២គ្រាប់ នៅវគ្គទី១ រកបានដោយកីឡាករ Louis Willy នៅនាទី១៧ និងនាទី៣៧ ។ បន្ទាប់មកក្រុមទាំងពីរបានបន្ដវាយសម្រុកគ្នា រហូតដល់ចុងម៉ោង Louis Willy ក៏មានឱកាសទាត់បាល់ពិន័យ ១១ម៉ែត្ររកគ្រាប់បាល់ទី៣ ឲ្យគិរីវង់ជាថ្មី តែការស៊ុតនេះ ត្រូវបានរារាំងដោយអ្នកចាំទី ហើយក៏រក្សាលទ្ធផល ២-០ ដល់ចប់ការប្រកួតពេញម៉ោង។នេះជាលទ្ធផលមួយគួរឲ្យភ្ញាក់ផ្អើល ដ្បិតកាលពីជួបគ្នាក្នុងលីគ គិរីវង់ បានចាញ់អង្គរថាយហ្គឺរ ៤-០ ក្នុងដី កាលពីជើងទី១ មុនស្មើគ្នា ០-០ ក្រៅដី នៅជើងទី២។ចំណែកក្រុម អាយអេសអាយ ដង្កោសែនជ័យ បានយកឈ្នះក្រុម អឹមអូអាយ កំពង់ដេវ៉ា ដោយលទ្ធផល ៣-២ នៅកីឡដ្ឋានវិសាខា។ ការប្រកួតដ៏តានតឹងនេះ ម៉ន ប៊ុនថាប់ បានស៊ុតបាល់ពីចម្ងាយឲ្យអាយអេសអាយ ដង្កោសែនជ័យ បើកការនាំមុខ ១គ្រាប់មុន ត្រឹមរយៈពេល ៧នាទី មុនកីឡាករ Lucas រកបានគ្រាប់តាមស្មើវិញ ឲ្យក្រុមម្ចាស់ផ្ទះ នៅនាទី២២ ។ ប៉ុន្ដែចុងវគ្គទី២ ក្រុមរហស្សនាមដំរីជ័យ ក៏បានបន្ថែម ២គ្រាប់ទៀត ដោយកីឡាករ Bruno នៅនាទី៣៦ និង Dakite នៅនាទី៣៩។ចូលវគ្គទី២ ក្រុមទាំងពីរ បានព្យាយាមដាក់សម្ពាធគ្នាកាន់តែខ្លាំង ពិសេសក្រុម អឹមអូអាយ កំពង់ដេវ៉ា ខណៈក្រោយបន្ដការប្រកួតបានប្រមាណ ២៥នាទី ក៏មានការបង្កកំហុសក្នុងប្រអប់គ្រោះថ្នាក់របស់អ្នកចាំទី អាយអេសអាយ ដង្កោសែនជ័យ នាង ផាន់និត ដែលផ្ដល់ឱកាសឲ្យ ម៉ុន វ៉ាន់ដា ស៊ុតបាល់ពិន័យ ១១ម៉ែត្ររកបានគ្រាប់ទី២ ឲ្យមិត្ដរួមក្រុម ។ តែមុនកាត់ទាត់បាល់ពិន័យសម្រេចទី អ្នកចាំទី នាង ផាន់និត ក៏បានរងពិន័យកាតលឿង ២ដងជាប់គ្នា ស្មើនឹងកាតក្រហម ក្រោយរុញអាជ្ញាកណ្ដាល និងវាយដៃអាជ្ញាកណ្ដាល ហើយបន្ដការប៉ះទង្គិចកាយវិការជាមួយមិត្តរួមក្រុម Bruno មុនដើរចេញពីទីលានទៀតផង។ យ៉ាងណាលទ្ធផលនេះ ក៏បានរក្សាដល់ចប់ការប្រកួតពេញម៉ោង ដោយ អាយអេសអាយ ដង្កោសែនជ័យ បានយកឈ្នះ អឹមអូអាយ កំពង់ដេវ៉ា ៣-២។ដោយឡែកក្រុមឡាយហ្វខេត្ដព្រះសីហនុ ដែលជាក្រុមប្រដេញបាតតារាងជាមួយ អាយអេសអាយ ដង្កោសែនជ័យ ក្នុងលីគកំពូលកម្ពុជា ក៏បានបង្កការភ្ញាក់ផ្អើលដូចគ្នា បន្ទាប់ពីការយកឈ្នះក្រុមណាហ្គាវើលដ៏ ១-០ លើទឹកដីរបស់ខ្លួន ដែលធ្វើសម្រេចដោយកីឡាករ វី ច័ន្ទដារ៉ា នៅនាទី៩០+៧។ក្រឡេកទៅចាប់អារម្មណ៍ជ័យជម្នះរបស់ក្រុមកងយោធពលខេមរភូមិន្ទ លើក្រុមម្ចាស់ផ្ទះមន្ទីរអប់រំ យុវជន និងកីឡា ខេត្តកំពង់ចាមវិញ ក្នុងចំណោមគ្រាប់បាល់ជ័យជម្នះ ៤គ្រាប់ គឺរកបានដោយកីឡាករ ស្រេង សុខគា ១គ្រាប់ នៅនាទី២១, Valentine ២គ្រាប់នៅនាទី៤០ និងនាទី៤៥ និង លាង ពិសី ១គ្រាប់ នៅនាទី៦៥។យ៉ាងណាមិញជ័យជម្នះក្នុងជើងទី១ នេះ គ្រាន់តែជាដើមទុនមួយ តែក៏មិនទាន់អស់សង្ឃឹមសម្រាប់ក្រុមបរាជ័យដែរ ដ្បិតក្រុមនីមួយៗ នឹងត្រូវធ្វើការប្រកួតជើងទី២ ដែលគ្រោងប្រព្រឹត្តទៅ នាថ្ងៃទី១១ ខែកុម្ភៈខាងមុខ ដើម្បីកាត់សេចក្ដីក្រុមទទួលបានជ័យជម្នះពិតប្រាកដ ដែលត្រូវឡើងទៅវគ្គ ៨ក្រុមចុងក្រោយ នៃពានរង្វាន់សម្ដេចតេជោ ហ៊ុន សែន-ថ្នាក់ជាតិ ឆ្នាំ២០២៥/២៦៕ អត្ថបទ៖ លី ឈុនឡា

អត្តពលិកជាតិអន្ដរជាតិ ៥២ប្រទេស ចូលរួមព្រឹត្តិការណ៍រត់ចម្ងាយឆ្ងាយ ១០០គីឡូម៉ែត្រ នៅខេត្ដសៀមរាប

ជួបជុំនៅទីលានព្រះជល់ដំរី តាំងពីវេលាម៉ោង ៣ទៀបភ្លឺ រួមទាំងមួយទីតាំងផ្សេងៗ លើទឹកដីអង្គរ ខេត្តសៀមរាប អត្តពលិកជាតិ-អន្ដរជាតិ ប្រមាណ ១,៧០០នាក់ មកពី ៥២ប្រទេស បានបង្ហាញទឹកមុខសប្បាយរីករាយ ក្នុងការចូលរួមទិវារត់ប្រណាំងចម្ងាយឆ្ងាយនៅតំបន់អង្គរ Ultra Trail Angkor លើកទី៩ ឆ្នាំ២០២៦ នាព្រឹកថ្ងៃទី២៤ ខែមករានេះ។ព្រឹត្តិការណ៍ប្រចាំឆ្នាំ ដែលរៀបចំដោយគណៈកម្មាធិការជាតិអូឡាំពិកកម្ពុជា ក្រោយទទួលបានការអនុញ្ញាត និងគាំទ្រពីរាជរដ្ឋាភិបាលនេះ បានប្រព្រឹត្តក្រោមបរិយាកាសដ៏រីករាយ ជាមួយវិញ្ញាសារត់ចម្ងាយជាច្រើន ចាប់ពី ៨គីឡូម៉ែត្រ, ១៨គីឡូម៉ែត្រ, ៣២គីឡូម៉ែត្រ, ៤២គីឡូម៉ែត្រ, ៦៤គីឡូម៉ែត្រ ពិសេសវិញ្ញាសារត់ចម្ងាយ ១០០គីឡូម៉ែត្រ ដែលមានអត្តពលិកជាតិ និងអន្ដរជាតិជាច្រើនចូលរួម។យោងតាមគណៈកម្មការរៀបចំព្រឹត្តិការណ៍រត់ប្រណាំងបែបផ្សងព្រេងនេះ បានឲ្យដឹងថា ក្នុងខួបលើកទី៩ នេះ មានអត្តពលិកចូលរួមសរុប ១,៧៤០នាក់ មកពី ៥២ប្រទេស ក្នុងនោះមានអត្តពលិកខ្មែរជាង ៧០០នាក់ និងបរទេសជាង ១០០០នាក់ ហើយអត្តពលិកបរទេសច្រើនជាងគេ គឺបារាំងជាង ៥០០នាក់។ តួរលេខនេះ មានការកើនឡើយគួរឲ្យចាប់អារម្មណ៍ បើធៀបកាលពីឆ្នាំមុន ដើម្បីបង្ហាញពីកត្ដាសុវត្ថិភាពរបស់ប្រទេសកម្ពុជា ពិសេសខេត្តសៀមរាប ដែលត្រៀមទទួលស្វាគមន៍ភ្ញៀវទេសចរណ៍មកពីគ្រប់ទិសទីជុំវិញពិភពលោក។សូមបញ្ជាក់ថា ទិវារត់ប្រណាំងចម្ងាយឆ្ងាយនៅតំបន់អង្គរ ត្រូវបានរៀបចំឡើងក្នុងគោលបំណងជំរុញការផ្សព្វផ្សាយ និងអភិវឌ្ឍចលនាកីឡា ជំរុញ និងបង្កើនការអភិវឌ្ឍសេដ្ឋកិច្ចក្រៅប្រព័ន្ធ លើកកម្ពស់បរិស្ថានតំបន់បេតិកភណ្ឌ ជំរុញទាក់ទាញភ្ញៀវទេសចរ និងគាំទ្រគម្រោងមនុស្សធម៌ ក្រោមកិច្ចសហការរវាងគណៈកម្មាធិការជាតិអូឡាំពិកកម្ពុជា(NOCC) និងក្រុមហ៊ុន Phonenix Voyages ។ ក្រោយចំណាយពេលជាច្រើនម៉ោង ពិសេសសវិញ្ញាសារត់ចម្ងាយ ១០០គីឡូម៉ែត្រ ក៏ដូចជាវិញ្ញាសាផ្សេងៗ បន្ទាប់ពីរត់ដល់ទីដោយជោគជ័យ ក្រៅពីការទទួលបានមេដាយអនុស្សាវរីយ៍ សម្រាប់អត្តពលិកទទួលបានជ័យលាភីពីលេខ១ ដល់លេខ៣ ក៏នឹងមានពិធីប្រគល់ពានរង្វាន់ជ័យាលាភី និងរង្វាន់លើកទឹកចិត្ត តាមវិញ្ញាសានីមួយៗ ពីសំណាក់ឯកឧត្តមបណ្ឌិត ថោង ខុន ទេសរដ្ឋមន្ដ្រី និងជាប្រធានគណៈកម្មាធិការជាតិអូឡាំពិកកម្ពុជា នាល្ងាចថ្ងៃទី២៤ ខែមករា ឆ្នាំ២០២៦ នេះផងដែរ៕ អត្ថបទ លី ឈុនឡា

Angkor Ultra Trail លើកទី៩ នឹងមកដល់ចុងសប្ដាហ៍នេះ ជាមួយសញ្ញាណវិជ្ជមាន

ទិវារត់ប្រណាំងចម្ងាយឆ្ងាយនៅតំបន់អង្គរ Angkor Ultra Trail លើកទី៩ ឆ្នាំ២០២៦ នឹងប្រព្រឹត្តទៅនាថ្ងៃទី២៤ ខែមករាស្អែកនេះ នៅបរិវេណរមណីយដ្ឋានអង្គរ លើវិញ្ញាសាចំនួន ៦ រួមមានរត់ចម្ងាយ ៨គីឡូម៉ែត្រ, ១៨គីឡូម៉ែត្រ, ៣២គីឡូម៉ែត្រ, ៤២គីឡូម៉ែត្រ, ៦៤គីឡូម៉ែត្រ និងឆ្ងាយជាងគេចម្ងាយ ១០០គីឡូម៉ែត្រ។ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានបញ្ជាក់ថា មកទល់ពេលនេះ អ្វីៗបានប្រព្រឹត្តយ៉ាងរលូន ក្រោយមានកិច្ចសហការ និងការគាំទ្រពីគ្រប់ភាគីពាក់ព័ន្ធ។ អ្វីដែលពិសេស គឺសន្ទុះនៃការចូលរួមរបស់អត្តពលិកមកពីជុំវិញពិភពលោក នៅតែមានសញ្ញាណល្អ មិនចាញ់ឆ្នាំមុនឡើយ ដោយមានអ្នករត់ជិត ១,៧០០នាក់ ។ នេះគឺជាសញ្ញាណវិជ្ជមាន សម្រាប់ព្រឹត្តិការណ៍រត់ប្រណាំងបែបផ្សងព្រេងនេះ ដែលនៅតែមានការគាំទ្រ និងសន្ទុះចូលរួមល្អ សម្រាប់ជួយសង្គមជាតិ ក៏ដូចជាប្រតិបត្តិករទេសចរណ៍ និងវិស័យទេសចរណ៍នៅខេត្តសៀមរាប។គួរដឹងថា Angkor Ultra Trail គឺជាការព្រឹត្តិការណ៍រត់ចម្ងាយឆ្ងាយឆ្លងឧបសគ្គ ដោយឆ្លងកាត់វាលស្រែ ភូមិឋានប្រជាពលរដ្ឋ ភ្នំ និងប្រាសាទនានា នៅតំបន់ឧទ្យានអង្គរ ហើយលើសពីការរត់ដើម្បីសុខភាព និងការបំបែកកំណត់ត្រាផ្ទាល់ខ្លួន អ្នករត់ ដែលជាភ្ញៀវជាតិ និងអន្ដរជាតិ នឹងទទួលបានបទពិសោធន៍ជាច្រើន ដូចជាការផ្សងព្រេងនៅក្នុងព្រៃនៃតំបន់អង្គរ ការបានឃើញពីជីវភាពរស់នៅប្រចាំថ្ងៃរបស់ប្រជាពលរដ្ឋតំបន់អង្គរ និងការរត់កាត់ប្រាសាទបុរាណពីមួយ ទៅមួយ ដែលនឹងក្លាយជាអនុស្សាវរីយ៍ចងចាំមិនអាចបំភ្លេចបានសម្រាប់អ្នកចូលរួម។សម្រាប់គោលបំណងសំខាន់ នៃការរៀបចំព្រឹត្តិការណ៍នេះ គឺដើម្បីលើកកម្ពស់វិស័យទេសចរណ៍ជាតិ ជាពិសេសនៅតំបន់អង្គរ និងជួយដល់សកម្មភាពមនុស្សធម៌ ជាក់ស្ដែងក្រោយបញ្ចប់ព្រឹត្តិការណ៍ឆ្នាំនេះ ក្រុមហ៊ុន Phoenix Voyages បានត្រៀមជួយដល់ការជួសជុលសាលារៀន សាងសង់អណ្ដូង និងសម្ភារៈសិក្សាជាច្រើនទៀត ដល់ប្រជាពលរដ្ឋ និងសិស្សានុសិស្ស នៅស្រុកពួក ខេត្តសៀមរាប ផងដែរ៕ អត្ថបទ លី ឈុនឡា

បណ្ដាញសង្គម

ព័ត៌មានថ្មីៗ

សម្ដេចធិបតី ណែនាំអន្តរក្រសួងត្រៀមស្ដារឡើងវិញ ចែកពូជដំណាំ និងជួសជុលផ្លូវក្រោយទឹកជំនន់ស្រកចុះ

សម្ដេចធិបតី ស្នើពលរដ្ឋអត់ដីពិតប្រាកដទៅដាក់ពាក្យស្នើសុំពីរដ្ឋាភិបាល កុំទៅទន្រ្ទានដីរដ្ឋខុសច្បាប់

ព្រឹកនេះ ចាប់ផ្តើមបែងចែកកន្លែងការងារ ជូនបេក្ខជនគ្រូបង្រៀនផ្អែកលើកិច្ចព្រមព្រៀងការងារ វិទ្យាល័យ

កម្ពុជាប្តេជ្ញាលើកកម្ពស់សមភាពយេនឌ័រ និងការចូលរួមរបស់ស្ត្រីក្នុងវិស័យសន្តិភាព និងសន្តិសុខ

ក្រុមការងារជំនាញបានធ្វើការសិក្សានិងបានរកឃើញហ្វូស៊ីសឈើធំៗចំនួន៣ទីតាំងថែមទៀតនៅខេត្តស្ទឹងត្រែង

មន្ត្រីជាន់ខ្ពស់ក្រសួងការពារជាតិ ដឹកនាំគណៈប្រតិភូការពារជាតិ ចូលរួមកិច្ចប្រជុំថ្ងៃទី២ នៃកិច្ចប្រជុំរដ្ឋមន្ត្រីការពារជាតិអាស៊ាន-បូក (ADMM-Plus) នៅហ្វីលីពីន

ប្រធានាធិបតីអាល្លឺម៉ង់៖ ចិនត្រូវតែចៀសវាងប្រយោជន៍តែម្ខាងនៅក្នុងទំនាក់ទំនងសេដ្ឋកិច្ច

ខេត្តភូកេតរបស់ថៃ ប្រកាសអាសន្ន «ពណ៌ក្រហម» ខណៈផ្លូវត្រូវបានជន់លិចដោយសារភ្លៀងធ្លាក់ខ្លាំង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877