នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
Manchester City ព្យាយាមរក្សា Rodri ខណៈ Real Madrid បន្តដាក់សម្ពាធចង់នាំយកទៅ Bernabéu
បាល់ទាត់អង់គ្លេសសាកល្បងច្បាប់ថ្មី ដើម្បីទប់ស្កាត់ "យុទ្ធសាស្ត្រ​ផ្អាក​ការ​ប្រកួត​តាមរយៈ​ការ​ព្យាបាល​អ្នកចាំទី"
Yan Diomonde ព្រមព្រៀងលក្ខខណ្ឌផ្ទាល់ខ្លួនជាមួយ Real Madrid ខណៈ PSG ដក​ខ្លួន​ចេញ​ពី​ការ​ប្រជែង
Chelsea បើកការចរចានាំយក Jordan Henderson និង Danny Welbeck មកបន្ថែម​បទពិសោធន៍​ក្នុងក្រុម

ព័ត៌មានកីឡា

NOCC នឹងរៀបចំ «ភូមិយុទ្ធគុនដូនតាខ្មែរ» ក្នុងព្រឹត្តិការណ៍អង្គរសង្ក្រាន្ដឆ្នាំ២០២៥ ដើម្បីបំផុសស្មារតីជាតិនិយមបន្ថែម

2025/02/14 07:27:55 pm        296
Facebook Telegram Linkin
គណៈកម្មាធិការជាតិអូឡាំពិកកម្ពុជា(NOCC) នឹងរៀបចំ «ភូមិយុទ្ធគុនដូនតាខ្មែរ» ជាមួយ «ភូមិខ្ញុំ» នៃព្រឹត្តិការណ៍អង្គរសង្ក្រាន្ដ ឆ្នាំ២០២៥ នៅមុខប្រាសាទអង្គរវត្ត ក្នុងពិធីបុណ្យចូលឆ្នាំថ្មីប្រពៃណីជាតិខ្មែរ នាខែមេសាខាងមុខ ដើម្បីបំផុតស្មារតីជាតិនិយមបន្ថែម ក្នុងការចូលរួមអភិរក្ស និងអភិវឌ្ឍន៍នូវក្បាច់គុនបុរាណខ្មែរគ្រប់ទម្រង់ ដែលជាព្រលឹងវប្បធម៌ជាតិ ។ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) បានបញ្ជាក់ថា ការត្រៀមរៀបចំភូមិយុទ្ធគុនដូនតាខ្មែរ ក្នុងព្រឹត្តិការណ៍អង្គរសង្ក្រាន្ដឆ្នាំនេះ ដោយទទួលបានការអនុញ្ញាតពីឯកឧត្តមឧបនាយករដ្ឋមន្ដ្រី ហ៊ុន ម៉ានី ប្រធានសហភាពសហព័ន្ធយុវជនកម្ពុជា(ស.ស.យ.ក) ស្របតាមគោលការណ៍យុទ្ធសាស្ដ្ររបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ដែលបានជំរុញការសិក្សាស្រាវជ្រាវ ក៏ដូចជាជំរុញការអភិរក្ស និងអភិវឌ្ឍន៍យុទ្ធគុនដូនតាខ្មែរ។ការណ៍នេះ គណៈកម្មាធិការជាតិអូឡាំពិកកម្ពុជា នឹងខិតខំធ្វើការងារនេះជាមួយ ស.ស.យ.ក ឲ្យបានល្អ ក្នុងការបង្ហាញនូវក្បាច់គុនបុរាណខ្មែរគ្រប់ទម្រង់ ព្រមទាំងមានការចូលរួមចែករំលែកចំណេះដឹង និងបទពិសោធន៍ពីចាស់ព្រឹទ្ធាចារ្យ ដើម្បីបញ្ជ្រាបការយល់ដឹងបន្ថែម អំពីប្រវត្តិ និងស្នៀតគុនពិសេសៗ នៃក្បាច់គុនបន្សល់ទុកពីបុព្វបុរសខ្មែរឲ្យប្រជាពលលរដ្ឋស្គាល់ និងយល់ ជាមួយកម្មវិធីពិសេសៗជាច្រើន ដើម្បីបំផុសស្មារតីជាតិនិយម ការស្រលាញ់ និងដឹងគុណ ចំពោះបុព្វបុរសខ្មែរ ការស្រលាញ់ និងថែរក្សានូវសន្ដិភាពជាដើម ។ក្រៅពីត្រៀមរៀបចំនូវភូមិយុទ្ធគុនដូនតាខ្មែរ គណៈកម្មាធិការជាតិអូឡាំពិកកម្ពុជា ក៏នឹងសហការជាមួយ ស.ស.យ.ក ក្នុងការរៀបចំការប្រកួតកីឡាប្រពៃណី ដើម្បីអបអរសាទរព្រឹត្តិការណ៍អង្គរសង្ក្រាន្ដ ដូចសព្វដងផងដែរ ពិសេសការប្រកួតកីឡាអុកចត្រង្គ ដែលនឹងត្រូវចាប់ផ្ដើមការប្រកួតចម្រុះ នាខែមីនាខាងមុខ ដើម្បីស្វែងរកបេក្ខភាពឆ្នើមប្រចាំតំបន់ទាំង ៨ និងនិស្សិតឆ្នើម ២រូប ឡើងទៅប្រកួតជុំផ្ដាច់ព្រ័ត្រ ដើម្បីស្វែងរក ស្ដេចអុកចត្រង្គអង្គរសង្ក្រាន្ដ ឆ្នាំ២០២៥ នៅមុខប្រាសាទអង្គរវត្ត៕ អត្ថបទ លី ឈុនឡា

ព្រះខ័នរាជស្វាយរៀង បន្ថែមខ្សែប្រយុទ្ធថ្មី ត្រៀមពាន AFC Challenge League

2025/02/14 06:53:31 pm        357
Facebook Telegram Linkin
ក្លិបព្រះខ័នរាជស្វាយរៀង បានប្រកាសនាំចូលខ្សែប្រយុទ្ធស្លាប់ថ្មី កីឡាករសញ្ជាតិប្រេស៊ីល Breno Caetano ដើម្បីពង្រឹងក្រុមបន្ថែម ត្រៀមការប្រកួតជើងឯកក្លិបបាល់ទាត់កម្រិតទី៣ ប្រចាំទ្វីបអាស៊ី AFC Challenge League 2024/25 ។Breno Caetano បច្ចុប្បន្នមានវ័យ ២៧ឆ្នាំ និងមានកម្ពស់ ១.៧៧ម៉ែត្រ ។ មុនផ្ទេរមកកាន់ក្រុមជើងឯកលីគកំពូលកម្ពុជា រូបគេបានប្រកបអាជីពជាមួយក្លិប Centro Atlético Fénix នៃលីគលំដាប់ទី២ ប្រទេសអ៊ុយរូហ្គាយ។ យ៉ាងណាមិញ វត្តមានរបស់ Breno ពេលនេះ មានសិទ្ធត្រៀមចូលរួមប្រកួតពានរង្វាន់ AFC Challenge League 2024/25 ប៉ុណ្ណោះ តែមិនអាចចូលរួមប្រកួតលីគកំពូលកម្ពុជាបានឡើយ ដ្បិតលើសចំនួនកូតាកីឡាករបរទេស ដែលក្លិបមានបច្ចុប្បន្ន ។ដូច្នេះភារកិច្ចចំពោះមុខរបស់កីឡាករ Breno Caetano ជាមួយក្រុមព្រះខ័នរាជស្វាយរៀង គឺការត្រៀមជួបក្រុមខ្លាំងមីយ៉ាន់ម៉ា Shan United ក្នុងវគ្គ ៨ក្រុមចុងក្រោយ នៃពានរង្វាន់ AFC Challenge League ដោយជើងទី១ នឹងត្រូវជួបគ្នា នាថ្ងៃទី០៦ ខែមីនាខាងមុខ នៅពហុកីឡដ្ឋានជាតិមរតកតេជោ រាជធានីភ្នំពេញ មុនជំនួបកាត់សេចក្ដីជើងទី២ នៅទឹកដីមីយ៉ាន់ម៉ាវិញ នាថ្ងៃទី១៣ ខែមីនា ឆ្នាំ២០២៥ ។ជំនួបរវាងក្រុមទាំងពីរ សម្រាប់ក្រុមទទួលបានជ័យជម្នះ នឹងត្រូវឡើងទៅជួបក្រុមឈ្នះប្រចាំតំបន់អាស៊ីខាងកើតដូចគ្នា រវាងក្រុម Tainan City របស់កោះតៃវ៉ាន់ និងក្រុម Madura United របស់ឥណ្ឌូនេស៊ី នៅវគ្គពាក់កណ្ដាលផ្ដាច់ព្រ័ត្រ ។ សម្រាប់ក្រុម Tainan City និងក្រុម Madura United ក៏នឹងត្រូវធ្វើការប្រកួត ២ជើង ដំណាលគ្នា នឹងការប្រកួតរបស់ព្រះខ័នរាជស្វាយរៀង និង Shan United ផងដែរ៕ អត្ថបទ លី ឈុនឡា 

ពានសម្ដេចតេជោ-ថ្នាក់ជាតិ៖ មហាផ្ទៃបានត្រឹមខកចិត្ត ក្រោយស្មើណាហ្គា ក្នុងជំនួបកាត់ក្ដី ខណៈ ISI ឈ្នះត្បូងឃ្មុំ ៣-០

2025/02/13 10:30:56 pm        204
Facebook Telegram Linkin
ទីបំផុតសមាគមកីឡាបាល់ទាត់ក្រសួងមហាផ្ទៃ បានធ្លាក់ត្រឹមវគ្គជម្រុះ ១៦ក្រុមចុងក្រោយ នៃពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៨ (ថ្នាក់ជាតិ) ឆ្នាំ២០២៤/២៥ បន្ទាប់ពីបានត្រឹមស្មើក្រុមម្ចាស់ផ្ទះណាហ្គាវើលដ៏ ២-២ ក្នុងជំនួបកាត់សេចក្ដីជើងទី២ ។ រីឯក្រុម ISI ដង្កោសែនជ័យ បានយកឈ្នះក្រុមជើងឯកថ្នាក់ខេត្ត មន្ទីរអប់រំ យុវជន និងកីឡា ខេត្តត្បូងឃ្មុំ ៣-០ ក្នុងជំនួបជើងទី១ នៅទីលានវិទ្យាល័យ ប៊ុន រ៉ានី ហ៊ុន សែន មេមត់ នៅថ្ងៃទី១២ ខែកុម្ភៈ ឆ្នាំ២០២៥ ។សម្រាប់ជំនួបកាត់សេចក្ដីនៅកីឡដ្ឋានខេត្តកំពង់ស្ពឺ បន្ទាប់ពីលេងបាន ៦នាទី កីឡាករ អឹម សំអូន បានរកគ្រាប់បាល់នាំមុខឲ្យក្រុមណាហ្គាវើលដ៏ ១គ្រាប់មុន ខណៈប្រមាណ ២នាទីក្រោយមក មហាផ្ទៃ ក៏តាមស្មើវិញ ពីការបញ្ចប់ទីដ៏ល្អរបស់កីឡាករ សាន បូរ៉ា នៅនាទីទី៨ មុនកីឡាករ Hugo Kametani បន្ថែមគ្រាប់នាំមុខជាថ្មីឲ្យក្រុមម្ចាស់ផ្ទះ នៅនាទី២៩ ។ បន្ទាប់មកក្រុមទាំងពីរ ក៏បានព្យាយាមវាយសម្រុកគ្នាកាន់តែខ្លាំង ពិសេសក្រុមភ្ញៀវមហាផ្ទៃ ដែលត្រូវការឈ្នះ ដើម្បីរក្សាឱកាសឡើងវគ្គបន្ដ ។រហូតដល់នាទី៧៩ កីឡាករ ម៉ូន រ៉ាដូ ក៏រកបានគ្រាប់តាមស្មើជាថ្មី ឲ្យក្រសួងមហាផ្ទៃ តែក៏ជាគ្រាប់បាល់ចុងក្រោយក្នុងការប្រកួតដ៏តានតឹងនេះផងដែរ ដោយលទ្ធផល ២-២ បានរក្សាដល់ចប់ការប្រកួតពេញម៉ោង នាំឲ្យឱកាសប្រជែងកៅអីវគ្គបន្ដរបស់សមាគមកីឡាបាល់ទាត់ក្រសួងមហាផ្ទៃ ត្រូវបានបញ្ចប់ត្រឹមវគ្គ ១៦ក្រុមចុងក្រោយ បន្ទាប់ពីសរុបលទ្ធផលទាំង ២ជើង ចាញ់ណាហ្គាវើលដ៏ ៣-២ ដ្បិតជើងទី១ ពួកគេបានរងបរាជ័យក្នុងដី ១-០ ។ ការណ៍នេះ ណាហ្គាវើលដ៏ នឹងត្រូវឡើងទៅជួបក្រុមភ្នំពេញក្រោន នៅវគ្គ ៨ក្រុមចុងក្រោយ ។ដោយឡែកជំនួបជើងទី១ រវាងក្រុមជើងឯកថ្នាក់ខេត្ត មន្ទីរអប់រំ យុវជន និងកីឡា ខេត្តត្បូងឃ្មុំ និង ISI ដង្កោសែនជ័យ បានដំណើរការប្រកួតស្ទើរចប់វគ្គទី១ ទើបមានគ្រាប់បាល់កើតឡើង ដោយកីឡាករ ចាន់ សីលា ដែលរកបានគ្រាប់នាំមុខឲ្យក្រុមភ្ញៀវ នៅនាទី៤៥+២ ។ លុះចូលវគ្គទី២ ក្រុមដំរីជ័យ ដែលស្ទើរប្រើប្រាស់កីឡាករខ្មែរសុទ្ធនេះ បានបន្ថែម ២គ្រាប់ទៀត ដោយកីឡាករ យ៉ា ម៉ាត់ នៅនាទី៦៧ និងកីឡាករ កែវ សារ៉ាត នៅនាទី៧៦ ដើម្បីបង្កើនឱកាសឡើងវគ្គបន្ដ មុនជំនួបកាត់សេចក្ដីជើងទី២ នៅតំបន់វេងស្រេង នាថ្ងៃទី១៩ ខែកុម្ភៈខាងមុខ ។គួរដឹងថា ប្រសិនបើ ISI ដង្កោសែនជ័យ បន្ដលទ្ធផលល្អនៅជើងទី២ ពួកគេនឹងត្រូវឡើងទៅជួបក្រុមបឹងកេត នៅវគ្គ ៨ក្រុមចុងក្រោយ បន្ទាប់ពីក្រុមនាគខៀវ បានយកឈ្នះក្រុមមន្ទីរអប់រំ យុវជន និងកីឡាខេត្តកំពង់ចាម ១៨-១ ក្នុងវគ្គ ១៦ក្រុមចុងក្រោយ កាលពីថ្មីៗកន្លងទៅ ៕ អត្ថបទ លី ឈុនឡា

Cristiano Ronaldo ឈរលើគេពីរឆ្នាំជាប់គ្នាជាអត្តពលិកមានប្រាក់ពលកម្មខ្ពស់បំផុត

2025/02/13 10:16:10 pm        222
Facebook Telegram Linkin
តារាបាល់ទាត់ព័រទុយហ្កាល់របស់ក្លិបអារ៉ាប៊ីសាអ៊ូឌីត Al-Nassr, Cristiano Ronaldo ជាថ្មីម្តងទៀត បានឈរលើ គេពីរឆ្នាំជាប់គ្នាក្នុងតារាងអត្តពលិកដែលមានប្រាក់ពលកម្មខ្ពស់បំផុតប្រចាំឆ្នាំ។អតីតខ្សែប្រយុទ្ធ Manchester United រូបនេះរកបានសរុប ២៦០ លានដុល្លារក្នុងមួយឆ្នាំ នេះបើតាមការចុះផ្សាយដោយ Sportico។កីឡាករបាល់បោះរបស់ក្លិប Golden State Warriors, Stephen Curry ឈរលេខពីរតែដាច់ឆ្ងាយពីអ្នកលេខមួយដោយរកបានក្នុងមួយឆ្នាំ ១៥៣.៨ លានដុល្លារ តាមពីក្រោយដោយកីឡាករប្រដាល់អង់គ្លេស Tyron Fury ១៤៧ លានដុល្លារ ខ្សែប្រយុទ្ធអាហ្សង់ទីនលេងនៅ Inter Miami, Lionel Messi ១៣៥ លានដុល្លារ និងកីឡាករបាល់បោះរបស់ Los Angeles Lakers, LeBron James ១៣៣.២ លានដុល្លារ។ក្នុងចំណោមបញ្ជីរ Top100 គេឃើញមាន កីឡាករប្រដាល់ Oleksandr Usyk កីឡាករបាល់ទាត់ប្រេស៊ីល Neymar, Karim Benzema និង Kylian Mbappe ក៏ដូចជាកីឡាករវាយកូនគោល Jon Rahm និង Scottie Scheffler និងកីឡាករ Dak Prescott របស់ក្លិប NFL, Dallas Cowboys។Daniel Jones អតីតកីឡាកររបស់ New York Giants ក្រោយមកផ្លាស់មក Minnesota Vikings ឈរចំណាត់ថ្នាកលេខ ១០០ រកបាន ៣៧.៥ លានដុល្លារ។ សូមបញ្ជាក់ថា មិនមានវត្តមានអត្តពលិកជានារីឡើយនៅក្នុងបញ្ជីឆ្នាំនេះ ខណៈឆ្នាំមុនធ្លាប់មានកីឡាការិនីវាយកូនបាល់អាមេរិក Coco Gauff ដែលរកបាន ៣០.៤ លានដុល្លារ៕ អត្ថបទ៖នាង សុភាវុធ 

កីឡាហោះហើរ ទទួលបានធនធានកីឡាការិនីទី២ ខណៈមន្ដ្រីសហព័ន្ធចង់ឲ្យមានការចូលរួម​កាន់តែច្រើន

2025/02/11 10:24:06 pm        647
Facebook Telegram Linkin
សហព័ន្ធកីឡាហោះហើរកម្ពុជា បានប្រកាសស្វាគមន៍កីឡាការិនីទី២ ដែលបានឈានជើងចូលប្រឡងក្នុងវិស័យកីឡាហោះហើរប៉ារ៉ាម៉ូទ័រ នៅកម្ពុជា គឺកីឡាការិនី Thorng Honging ដែលទើបចាប់ផ្ដើមហ្វឹកហាត់ថ្ងៃដំបូង ជាមួយក្រុមការងារគ្រូ និងមន្ដ្រីបច្ចេកទេសសហព័ន្ធ កាលពីចុងសប្ដាហ៍កន្លងទៅ នៅតំបន់ភ្នំរាប ខណ្ឌព្រែកព្នៅ រាជធានីភ្នំពេញ ។លោក សារៀម រក្សា អគ្គលេខាធិការសហព័ន្ធ បានឲ្យដឹងថា ផ្ដើមពីចំណូលចំណូលចិត្ត និងបទពិសោធន៍ធ្លាប់ហោះហើរបែប Parasailing នៅក្រៅប្រទេស កាលពីឆ្នាំ២០១៧ បានជំរុញឲ្យអ្នកស្រី Thorng Honging ស្រលាញ់ និងចញ្ចឹមចិត្តចង់ហ្វឹកហាត់កីឡាលើអាកាសនេះ ។ បន្ទាប់មកក្រោយដឹងថា កម្ពុជាមានសហព័ន្ធកីឡាហោះហើរ ទើបថ្មីៗ អ្នកស្រីបានទាក់ទាងចុះឈ្មោះហ្វឹកហាត់ និងចាប់ផ្ដើមអនុវត្តភ្លាមៗដោយក្ដីសប្បាយរីករាយ ។នេះគឺជាកីឡាការិនីទី២ ហើយ ដែលបានហ្វឹកហាត់កីឡាហោះហើរ បន្ទាប់ពីកីឡាការិនី តេង បូរ៉ាវីន ដែលជាកីឡាការិនីទី១ និងកំពុងធ្វើការហ្វឹកហាត់ជាប្រចាំ ។ ក្នុងនាមសហព័ន្ធ លោក សារៀម បានសម្ដែងនូវសេចក្ដីរីករាយ និងមោនទភាព ចំពោះភាពក្លាហានរបស់កីឡាការិនីកម្ពុជាទាំង ២រូប ដែលបានសម្រេចចិត្តចូលរួមហ្វឹកហាត់កីឡាហោះហើរ ដើម្បីអភិវឌ្ឍន៍សមត្ថភាព ឈានទៅរកការប្រកួតកម្រិតជាតិ និងអន្ដរជាតិនានា នៅថ្ងៃអនាគត ។តាមរយៈនេះដែរ លោកក៏បានអំពាវនាវដល់ប្រជាពលរដ្ឋ ពិសេសអ្នកស្រលាញ់វិស័យកីឡាហោះហើរ ទាំងបុរស និងនារី ចូលរួមហ្វឹកហាត់ឲ្យបានច្រើន ដ្បិតសហព័ន្ធមានគ្រូបង្វឹក និងមន្ដ្រីបច្ចេកទេសគ្រប់គ្រាន់ សម្រាប់បង្ហាត់បង្រៀន ជាមួយការគ្រប់គ្រងនូវលក្ខខណ្ឌបច្ចេកទេសផ្សេងៗ ទាំងអាកាសធាតុជាដើម ដើម្បីធានាបាននូវសុវត្ថិភាពដល់កីឡាករ-កីឡាការិនីទាំងអស់គ្នា ។បច្ចុប្បន្នសហព័ន្ធ មានធនធានកីឡាករ-កីឡាការិនីសរុប ៣២នាក់ ក្នុងនោះមានបរទេស ៧នាក់ ហើយគោលដៅបន្ដរបស់សហព័ន្ធ គឺការខិតខំអភិវឌ្ឍន៍ធនធានកីឡាករ-កីឡាការិនី ឬហៅថា Paramotor Pilot ដើម្បីបង្កើនសមត្ថភាពចូលរួមប្រណាំងប្រជែងថ្នាក់ជាតិ និង អន្តរជាតិបាននាពេលអនាគត ។ ម្យ៉ាងក៏ជាផ្នែកមួយ ក្នុងការរួមចំណែកផ្សព្វផ្សាយវិស័យទេសចរណ៍ ដូចអ្វីដែលសហព័ន្ធធ្លាប់បានចូលរួមព្រឹត្តិការណ៍ធំៗនាពេលកន្លងមកផងដែរ៕ អត្ថបទ លី ឈុនឡា

គិរីវង់ គេចពីបាតតារាងបណ្ដោះអាសន្ន ក្រោយស្មើម្ចាស់ផ្ទះ Tiffy Army ក្នុងជំនួបបញ្ចប់ជុំទី២

2025/02/11 09:34:27 pm        266
Facebook Telegram Linkin
ក្រុមគិរីវង់សុខសែនជ័យ បានបញ្ចប់ការប្រកួតសន្សំពិន្ទុ ជុំទី២ ហើយ ដោយបានគេចពីបាតតារាងបណ្ដោះអាសន្ន បន្ទាប់ពីដណ្ដើមបាន ១ពិន្ទុបន្ថែម ពីក្រុមម្ចាស់ផ្ទះកងយោធពលខេមរភូមិន្ទ(Tiffy Army) ក្រោយប្រកួតស្មើគ្នា ១-១ ក្នុងជំនួបជើងទី២ នៃលីគកំពូលកម្ពុជា ឆ្នាំ២០២៤/២៥ ។ជំនួបដ៏តានតឹងនៅកីឡដ្ឋានស្ដាតចាស់នេះ បន្ទាប់ពីចាប់ផ្ដើមបានប្រមាណ ៧នាទី ក៏មានការប៉ះទង្គិចគ្នា រហូតធ្វើឲ្យកីឡាករវ័យក្មេង វី លាភផេង របស់គិរីវង់ បាត់បង់ស្មារតី និងត្រូវបានបញ្ជូនទៅមន្ទីរពេទ្យភ្លាមៗ ។ យ៉ាងណាក្រោយបញ្ជូនដល់មន្ទីរពេទ្យ លាភផេង បានដឹងខ្លួន និងមានស្មារតីល្អប្រសើរឡើងវិញ ។យ៉ាងណាមិញក្រោយមានសមាជិករងរបួសតាំងពីដើមវគ្គទី១ ក្រុមគិរីវង់សុខសែនជ័យ នៅតែមានឱកាសរកបានគ្រាប់នាំមុខក្រុមម្ចាស់ផ្ទះ ដែលធ្វើសម្រេចដោយកីឡាករ សៅ វៃហ្វី នៅនាទី៣៤ ។ បន្ទាប់មកទើបក្រុមកងយោធពលខេមរភូមិន្ទ ព្យាយាមវាយបក និងរកបានគ្រាប់តាមស្មើវិញ នៅនាទី៥៩ ដោយកីឡាករ Kinoshita Reiya ហើយលទ្ធផលនេះ ក៏បានរក្សាដល់ចប់ការប្រកួតពេញម៉ោង ។ការចែកគ្នា ១ពិន្ទុម្នាក់នេះ នាំឲ្យក្រុមគិរីវង់សុខសែនជ័យ រំកិលពីបាតតារាង មកឈរលេខរៀងទី១០ បណ្ដោះអាសន្ន ដោយរកបាន ៦ពិន្ទុ ក្រោយឆ្លងកាត់ ២០ប្រកួតឈ្នះ ១ ស្មើ ៣ និងចាញ់ ១៦ គ្រាដែលក្រសួងមហាផ្ទៃ បានធ្លាក់ឈរបាតតារាងវិញ ដោយរក្សា ៥ពិន្ទុក្នុងដៃ តែក្រុមទើបឡើងមកលេងលីគវិញនេះ នៅសល់ ១ប្រកួតទៀត សម្រាប់ការប្រកួតជុំទី២ មុនបន្ដការប្រកួតដំណាក់កាលទី២ ។ រីឯក្រុមកងយោធពលខេមរភូមិន្ទ គឺបានរក្សាលេខរៀងទី៨ ដោយរកបាន ១៩ពិន្ទុ និងសល់ការប្រកួតជុំទី២ មួយប្រកួតទៀតផងដែរ ៕ អត្ថបទ លី ឈុនឡា 

ណាហ្គា ប៉ះមហាផ្ទៃ កាត់សេចក្ដីក្រុមឡើងវគ្គ ១/៤ ខណៈត្បូងឃ្មុំ ជួប ISI ក្នុងជើងទី១ នៃពានសម្ដេចតេជោ-ថ្នាក់ជាតិ

2025/02/11 09:26:15 pm        227
Facebook Telegram Linkin
ក្រុមណាហ្គាវើលដ៏ នឹងត្រូវបើកទ្វារកីឡដ្ឋានខេត្តកំពង់ស្ពឺ ទទួលសមាគមកីឡាបាល់ទាត់ក្រសួងមហាផ្ទៃវិញម្ដង ដើម្បីកាត់សេចក្ដីរកក្រុមឈ្នះឡើងវគ្គ ៨ក្រុមចុងក្រោយ នៃពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៨ (ថ្នាក់ជាតិ) ឆ្នាំ២០២៤/២៥ នាល្ងាចថ្ងៃទី១២ ខែកុម្ភៈ ឆ្នាំ២០២៥ ស្របពេលក្រុមជើងឯកថ្នាក់ខេត្ត មន្ទីរអប់រំ យុវជន និងកីឡា ខេត្តត្បូងឃ្មុំ ត្រូវជួបក្រុម ISI ដង្កោសែនជ័យ ក្នុងជើងទី១ លើទឹកដីរបស់ខ្លួន ។សម្រាប់ក្រុមណាហ្គាវើលដ៏ កំពុងមានប្រៀប ក្នុងការប្រជែងកៅអីវគ្គបន្ដ តែក៏មិនទាន់សង្ឃឹមខ្ពស់ពេកដែរ ដ្បិតជើងទី១ អតីតក្រុមជើងឯកឆ្នាំ២០១៣ ណាហ្គាវើលដ៏ បានយកឈ្នះអតីតក្រុមជើងឯកឆ្នាំ២០១៤ ក្រសួងមហាផ្ទៃ ១-០ ប៉ុណ្ណោះ នៅកីឡដ្ឋាន អេអាយអេ ខេអឹមអេចផាក ។ ដូច្នេះជំនួបជើងទី២ ស្អែកនេះ នឹងក្លាយជាការប្រកួតដ៏តានតឹង សម្រាប់ក្រុមទាំងពីរ ដែលទាមទារជ័យជម្នះរៀងខ្លួន ដើម្បីក្ដោបឱកាសដណ្ដើមកៅអីវគ្គ ៨ក្រុមចុងក្រោយ ។ក្រឡេកទៅចាប់អារម្មណ៍ក្រុមជើងឯកពានរង្វាន់សម្ដេចតេជោ-ថ្នាក់ខេត្ត មន្ទីរអប់រំ យុវជន និងកីឡា ខេត្តត្បូងឃ្មុំ វិញ នឹងត្រូវជួបក្រុមភ្ញៀវ ISI ដង្កោសែនជ័យ ក្នុងជើងទី១ ។ ការប្រកួតនេះ ក៏កំពុងស្ថិតក្នុងការចាប់អារម្មណ៍របស់អ្នកគាំទ្រដូចគ្នា បន្ទាប់ពីត្បូងឃ្មុំ ធ្វើបានយ៉ាងល្អ ក្នុងការប្រកួតថ្នាក់ខេត្តកន្លងមក ។ ដូច្នេះការជួបក្រុមកំពុងឈរលេខ៧ ក្នុងលីគ ស្អែកនេះ អាចជាឱកាសមួយ សម្រាប់ពួកគេ បើកទំព័រប្រវត្តិសាស្ដ្រដណ្ដើមកៅអីវគ្គ ៨ក្រុមចុងក្រោយនៃពានសម្ដេចតេជោ-ថ្នាក់ជាតិ ។ ចំពោះជំនួបជើងទី២ រវាងក្រុមទាំងពីរ គឺគ្រោងធ្វើឡើងនាថ្ងៃទី១៩ ខែកុម្ភៈ នៅទឹកដីក្រុមដំរីជ័យវិញម្ដង ។គួរដឹងថា សម្រាប់ជំនួបរវាងក្រុមណាហ្គាវើលដ៏ និងក្រសួងមហាផ្ទៃ ក្រុមឈ្នះ នឹងត្រូវឡើងទៅជួបក្រុមភ្នំពេញក្រោន ក្នុងវគ្គ ៨ក្រុមចុងក្រោយ បន្ទាប់ពីក្រុមសិង្ហក្រហមនេះ បានទម្លាក់ក្រុមឈើតុំខេត្តពោធិ៍សាត់ ក្នុងវគ្គ ១៦ក្រុមចុងក្រោយ ។ រីឯក្រុមឈ្នះ ក្រោយជំនួប ២ជើង រវាងត្បូងឃ្មុំ និង ISI ដង្កោសជ័យ នឹងត្រូវឡើងទៅជួបក្រុមបឹងកេត នៅវគ្គ ១/៤ផ្ដាច់ព្រ័ត្រ បន្ទាប់ពីក្រុមនាគខៀវ បានយកឈ្នះក្រុមមន្ទីរអប់រំ យុវជន និងកីឡាខេត្តកំពង់ចាម ១៨-១ ក្នុងវគ្គ ១៦ក្រុមចុងក្រោយ កាលពីថ្មីៗ ៕ អត្ថបទ លី ឈុនឡា 

តើ​បេក្ខជនរូបណានឹង​ក្លាយជាម្ចាស់ជ័យលាភីកម្មវិធីប្រកួត Frenzy Freestyle ជា​លើក​ដំបូងនៅកម្ពុជា?

2025/02/11 09:18:09 pm        144
Facebook Telegram Linkin
ការប្រកួតហ្វ្រីស្តាយល៍ដំបូងបង្អស់របស់កម្ពុជា Frenzy Freestyle បានឈានដល់ដំណាក់កាលដ៏ជក់ចិត្ត គឺវគ្គពាក់កណ្តាលផ្តាច់ព្រ័ត្រ រហូតដល់វគ្គផ្តាច់ព្រ័ត្រ។ តាមរយៈក្លិបបាល់ទាត់ព្រះខ័នរាជស្វាយរៀង កម្មវិធីប្រកួត ហ្រ្វេនហ្ស៊ី ហ្វ្រីស្តាយល៍ - Frenzy Freestyle បាននឹងកំពុងបង្ហាញ ដោយបំផុសយុវជន ក៏ដូចជាប្រជាជនកម្ពុជាឱ្យស្វែងយល់ពី​កីឡាបាល់ទាត់ ហ្រ្វីស្តាយល៍ រួមទាំងបង្ហាញដល់អន្តរជាតិពីកម្មវិធីប្រកួតលើកទី១នៅកម្ពុជាផងដែរ។បន្ទាប់​ពី​ការ​ប្រកួតគ្នា​យ៉ាង​ស្វិតស្វាញ​អស់​រយៈពេល​ជាច្រើន​សប្តាហ៍ បេក្ខជន​ដ៏មានទេពកោសល្យទាំង ៤រូប​បានឈានជើងចូលទៅកាន់វគ្គកាត់សេចក្តីចុងក្រោយដែលកាន់តែជក់ចិត្តបន្ថែមទៀត។ ការប្រកួតប្រជែងគ្នា សម្រាប់អ្នកចូលចិត្តវិស័យកីឡាបាល់ទាត់ហ្វ្រីស្តាយល៍ បានទាក់ទាញទស្សនិកជនជាច្រើន តាមរយៈការបង្ហាញពីក្បាច់ប្លែកៗ លាយឡំជាមួយសិល្បៈ និងភាពច្នៃប្រឌិតដ៏ប៉ិនប្រសប់របស់បេក្ខជននីមួយៗ ។ ឥឡូវនេះនៅសល់តែគូប្រជែង​តែ ២គូប៉ុណ្ណោះ ដែលត្រៀមខ្លួនរួចជាស្រេច ដើម្បីប្រជែងក្លាយជាម្ចាស់ជ័យលាភីកម្មវិធី Frenzy Freestyle ដែលវគ្គពាក់កណ្តាលផ្តាច់ព្រ័ត្រ (ការប្រកួតបែបការសម្តែងតាមបទចម្រៀង - Routine)-      បេក្ខជន លន់ ឆៃយ៉ា ប្រកួតជាមួយ បេក្ខជន នួន វណ្ណា-      បេក្ខជន ស៊ុំ សាន ប្រកួតជាមួយ បេក្ខជន ផ្លម ធិញហួយ អ្នកដែលឈ្នះក្នុងវគ្គនេះនឹងមានឱកាសឡើងទៅកាន់វគ្គផ្តាច់ព្រ័ត្រ ដើម្បីដណ្តើមជ័យលាភី មិនត្រឹមតែប៉ុណ្ណោះអ្នកដែលចាញ់ក្នុងវគ្គពាក់កណ្តាលផ្តាច់ព្រ័ត្រក៏នឹងមានប្រកួតសម្រាប់ចំណាត់ថ្នាក់លេខ៣ផងដែរ។ នេះ​មិន​មែន​គ្រាន់​តែ​ជា​ការ​ប្រកួត​ប្រជែង​ប៉ុណ្ណោះ​ទេ វា​ក៏​ជា​ការ​ជំរុញ​ភាព​លេចធ្លោ​របស់​វិស័យ​កីឡា​បាល់ទាត់ហ្រ្វីស្តាយល៍របស់​ប្រទេស​កម្ពុជាឱ្យកាន់តែឈានទៅមុខមួយកម្រិតទៀត។គួររំលឹកផងដែរថា កម្មវិធីប្រកួត ហ្វ្រេនហ្ស៊ី ហ្រ្វីស្តាយល៍ វគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រនឹងធ្វើឡើងនៅ ស្ថានីយ៍ទូរទស្សន៍បាយ័ន បឹងស្នោរ នៅថ្ងៃទី១៦ ខែកុម្ភៈ ឆ្នាំ២០២៥ ខាងមុខនេះ ហើយក៏មានការផ្សាយផ្ទាល់ ​នៅលើ​ហ្វេសប៊ុកផេចផ្លូវការរបស់ក្លិបបាល់ទាត់ ព្រះខ័នរាជស្វាយរៀង។ រង់ចាំតាមដានទស្សនាទាំងអស់គ្នា៕ 

មន្ដ្រីជាន់ខ្ពស់កីឡាជឺជីតស៊ូថា ការឈ្នះមេដាយមាស មឿនលីម សុបញ្ញា លើទឹកដីអាមេរិកជាសញ្ញាណដ៏ល្អ

2025/02/10 09:18:57 pm        226
Facebook Telegram Linkin
កីឡាករជឺជីតស៊ូជម្រើសជាតិកម្ពុជា មឿនលីម សុបញ្ញា បានឈ្នះមេដាយមាស ក្នុងការប្រកួត Jiu-Jitsu World League California X នៅសហរដ្ឋអាមេរិក កាលពីចុងសប្ដាហ៍កន្លងទៅ ខណៈមន្ដ្រីជាន់ខ្ពស់សហព័ន្ធកីឡាជឺជីតស៊ូកម្ពុជា បានចាត់ទុកជ័យជម្នះនេះ គឺជាសញ្ញាណដ៏ល្អ សម្រាប់ការបោះជំរុំហ្វឹកហាត់នៅទីនោះ។នេះគឺជាការប្រកួតលក្ខណៈអន្ដរជាតិលើកដំបូង បន្ទាប់ពី មឿនលីម សុបញ្ញា បានចេញទៅហ្វឹកហាត់រយៈពេល ២៥ថ្ងៃ ក្នុងបេសកកម្មបោះជំរុំហ្វឹកហាត់រយៈពេល ៣ខែរបស់ខ្លួន នៅរដ្ឋកាលីហ្វ័រញ៉ា សហរដ្ឋអាមេរិក ក្រោមការសម្របសម្រួល និងរៀបចំរបស់សហព័ន្ធ និងទទួលបានការឧបត្ថម្ភគាំទ្រពីលោក ទូច សុភ័ក្រ និងភរិយា។ចំពោះការប្រកួតក្នុងកម្មវិធី Jiu-Jitsu World League California X នេះដែរ បញ្ញា បានប្រកួតលើវិញ្ញាសា Gi ឯកត្តជនបុរស កម្រិតខ្សែខៀវ ប្រភេទទម្ងន់ក្រោម ៨២.៥គីឡូក្រាម  ដែលមានបេក្ខភាពចុះឈ្មោះចូលរួមប្រកួតចំនួន ២២នាក់ ។ ជាលទ្ធផល បញ្ញា ធ្វើបានយ៉ាងល្អ ដោយដណ្ដើមបានមេដាយមាស បន្ទាប់ពីឈ្នះ ៤ប្រកួតជាប់គ្នា ក្នុងនោះបានផ្ដួលដៃគូឲ្យចុះចាញ់ ៣ប្រកួតឯណោះលោក Jasper Paas អនុប្រធានសហព័ន្ធ និងជាគ្រូបង្វឹកក្រុមកីឡាជឺជីតស៊ូជម្រើសជាតិកម្ពុជា បានចាត់ទុកនេះគឺជាជ័យជម្នះដ៏អស្ចារ្យ សម្រាប់ មឿនលីម សុបញ្ញា ដែលសម្រេចបាននូវសមិទ្ធផលគួរឲ្យភ្ញាក់ផ្អើល ដូចអ្វីដែលសហព័ន្ធជឿជាក់លើរូបគេ ។ នេះគឺជាមូលហេតុ ដែលសហព័ន្ធបានបញ្ជូនរូបគេទៅបោះជំរុំហ្វឹកហាត់ ៣ខែនៅអាមេរិក ហើយជ័យជម្នះនេះ បានបង្ហាញឲ្យឃើញពីភាពរីកចម្រើនយ៉ាងឆាប់រហ័សរបស់ បញ្ញា ដើម្បីត្រៀមការប្រកួតធំៗជាច្រើន ក្នុងឆ្នាំ២០២៥ ពិសេសស៊ីហ្គេម លើកទី៣៣ នៅថៃ នាចុងឆ្នាំនេះ។គួរដឹងថា មឿនលីម សុបញ្ញា បានចេញទៅបោះជំរុំហ្វឹកហាត់ នៅមជ្ឈមណ្ឌល Art of Jiu-Jitsu គឺជាកន្លែងប្រមូលផ្ដុំដោយគ្រូបង្វឹកលំដាប់ពិភពលោក ដែលបានបង្កើតនូវអត្តពលិកជើងឯកពិភពលោក និងគ្រូបង្វឹកជាច្រើន ក្នុងនោះក៏មានវត្តមានវីរកីឡាការិនីឆ្នើមកម្ពុជា ខាន់ ចេសា ជាដើម ដែលមានមូលដ្ឋាននៅរដ្ឋកាលីហ្វ័រញ៉ា សហរដ្ឋអាមេរិក ។ បញ្ញា បានចាកចេញពីកម្ពុជា កាលពីពាក់កណ្ដាលខែមករា ហើយគ្រោងនឹងត្រឡប់មកមាតុភូមិវិញ នៅមុនពិធីបុណ្យចូលឆ្នាំថ្មីប្រពៃណីជាតិខ្មែរ នាខែមេសាខាងមុខ៕ អត្ថបទ លី ឈុនឡា

ព្រះខ័នរាជ ឈរកំពូលតារាង ក្រោយក្រោនស្មើថាយហ្គឺរ ខណៈបឹងកេតឡើងបង្គ្រប់ Top-6

2025/02/10 09:04:05 pm        219
Facebook Telegram Linkin
ក្រុមព្រះខ័នរាជស្វាយរៀង បានឡើងឈរកំពូលតារាងពិន្ទុ នៃលីគកំពូលកម្ពុជា ឆ្នាំ២០២៤/២៥ វិញហើយ ក្រោយខកខានជាច្រើនសប្ដាហ៍ បន្ទាប់ពីក្រុមភ្នំពេញក្រោន បានប្រកួតស្មើក្រុមម្ចាស់ផ្ទះអង្គរថាយហ្គឺរ ១-១ គ្រាដែលក្រុមបឹងកេត បានឡើងបង្គ្រប់កៅអី ៦ក្រុមកំពូលតារាង(Top-6) បន្ទាប់ពីយកឈ្នះលើក្រុមគូប្រជែង ISI ដង្កោសែនជ័យ ៨-១ កាលពីចុងសប្ដាហ៍កន្លងទៅ។សម្រាប់ក្រុមព្រះខ័នរាជស្វាយរៀង បានបន្ដយកឈ្នះក្រុមឡាយហ្វខេត្តព្រះសីហនុ ៣-១ កាលពីរាត្រីថ្ងៃអាទិត្យ នៅកីឡដ្ឋានឡាយហ្វ ។ គ្រាប់បាល់ជ័យជម្នះរបស់ក្រុមការពារតំណែងជើងឯកនេះ ធ្វើសម្រេចដោយកីឡាករ Bounphachan Bounkong ២គ្រាប់ នៅនាទី១៣ និងនាទី៤៨ និង ញាណ សុស៊ីដាន ១គ្រាប់ នៅនាទី៨២ ក្រោយកីឡាករ អ៊ុក ដេវីន រកបាន ១គ្រាប់ឲ្យក្រុមម្ចាស់ផ្ទះ តាំងពីនាទី១៦។ការបន្ថែម ៣ពិន្ទុពេញនេះ នាំឲ្យក្រុមព្រះខ័នរាជស្វាយរៀង ឡើងឈរកំពូលតារាង ដោយរកបាន ៤៩ពិន្ទុ នាំមុខក្រុមភ្នំពេញក្រោន ដែលធ្លាក់មកឈរលេខរៀងទី២ ក្រោយគ្រងតំណែងកំពូលតារាងជាច្រើនសប្ដាហ៍កន្លងមក ។ ការរបូតកៅអីកំពូលតារាងនេះ បន្ទាប់ពីក្រុមសិង្ហក្រហម ទទួលបាន ១ពិន្ទុដ៏តានតឹងពីក្រុមម្ចាស់ផ្ទះអង្គរថាយហ្គឺរ ក្រោយជំនួបដ៏កក្រើកកីឡដ្ឋានអាគីហ៊ីរ៉ូ កាតូ ដែលបញ្ចប់ដោយលទ្ធផលស្មើគ្នា ១-១ កាលពីរាត្រីថ្ងៃទី០៩ ខែកុម្ភៈ។ជំនួបដ៏ស្វិតស្វាញនេះ ភ្នំពេញក្រោន បានបើកការនាំមុខតាំងពីនាទី១៩ ដោយកីឡាករ Jelle Goselink មុនអង្គរថាយហ្គឺរ តាមស្មើ នៅនាទី៦០ ពីការទាត់បាល់ពិន័យ ១១ម៉ែត្ររបស់កីឡាករ Nagashima Kodai បន្ទាប់ពីអ្នកចាំទី សាវែង សំណាង បង្កកំហុសលើខ្សែប្រយុទ្ធ គី រីណា ក្នុងប្រអប់គ្រោះថ្នាក់ ។ បន្ទាប់មកក្រុមទាំងពីរ បានវាយសម្រុកគ្នាកាន់តែខ្លាំង ទោះបីម្ចាស់ផ្ទះ សល់គ្នាត្រឹម ១០នាក់ ក្រោយកីឡាករ សុខគ្រី សូហ្វាន រងពិន័យកាតក្រហម នៅនាទី៨៥ ក៏ក្រុមទាំងពីរ ព្យាយាមសម្រុក និងមានឱកាសស៊ុតជាច្រើនលើក តែពុំមានក្រុមណាអាចរកគ្រាប់បាល់បន្ថែមបានឡើយ ដោយរក្សាលទ្ធផល ១-១ ដល់ចប់ការប្រកួតពេញម៉ោងតែម្ដង។ក្រឡេកទៅចាប់អារម្មណ៍ជំនួបដណ្ដើមកៅអី Top-6 វិញ ក្រុមបឹងកេត បានបញ្ចប់ក្ដីសង្ឃឹមក្រុម ISI ដង្កោសែនជ័យ ក្រោយយកឈ្នះ ៨-១ គួរឲ្យភ្ញាក់ផ្អើល បន្ទាប់ពីជើងទី១ ក្រុមទាំងពីរ បានប្រកួតស្មើគ្នា ៤-៤ ប៉ុណ្ណោះ ។ គ្រាប់បាល់ជ័យជម្នះ ដែលជួយឲ្យក្រុមបឹងកេត ធានាកៅអី Top-6 នេះ ធ្វើសម្រេចដោយកីឡាករ សៀង ចន្ធា ៣គ្រាប់, ម៉ាត់ ណូរុណ ២គ្រាប់, អាវ សុវណ្ណារ៉ា, Golubovic Stefan និង Yoshihama Ryohei ម្នាក់ ១គ្រាប់ ។ រីឯ ១គ្រាប់របស់ ISI ដង្កោសែនជ័យ ធ្វើសម្រេចដោយកីឡាករ ហាវ សុខនេត្រ ។ជាមួយជ័យជម្នះនៅពហុកីឡដ្ឋានជាតិនេះដែរ នាំឲ្យក្រុមបឹងកេត ក្លាយជាបេក្ខភាពកូនពៅ ដែលទទួលបានកៅអី Top-6 ដើម្បីបន្ដការប្រកួតដំណាក់កាលទី២ ក្រោយរកបាន ៣០ពិន្ទុ តាមពីក្រោយក្រុមណាហ្គាវើលដ៏ ដែលរកបាន ៣៣ពិន្ទុ បន្ទាប់ពីយកឈ្នះសមាគមកីឡាបាល់ទាត់ក្រសួងមហាផ្ទៃ ២-១៕ អត្ថបទ លី ឈុនឡា

បណ្ដាញសង្គម

ព័ត៌មានថ្មីៗ

Manchester City ព្យាយាមរក្សា Rodri ខណៈ Real Madrid បន្តដាក់សម្ពាធចង់នាំយកទៅ Bernabéu
07/28/2026 02:07 PM
Facebook Telegram Linkin
ផលិត​ផល​ក្នុង​ស្រុក​កាន់​តែ​រីក​ចម្រើន​ ពង្រីក​វត្ត​មាន​នៅ​ផ្សារ​ទំនើប​ ឆ្លើយ​តប​តម្រូវ​ការ​ទីផ្សារ​
07/28/2026 02:07 PM
Facebook Telegram Linkin
បាល់ទាត់អង់គ្លេសសាកល្បងច្បាប់ថ្មី ដើម្បីទប់ស្កាត់ "យុទ្ធសាស្ត្រ​ផ្អាក​ការ​ប្រកួត​តាមរយៈ​ការ​ព្យាបាល​អ្នកចាំទី"
07/28/2026 01:07 PM
Facebook Telegram Linkin
Yan Diomonde ព្រមព្រៀងលក្ខខណ្ឌផ្ទាល់ខ្លួនជាមួយ Real Madrid ខណៈ PSG ដក​ខ្លួន​ចេញ​ពី​ការ​ប្រជែង
07/28/2026 01:07 PM
Facebook Telegram Linkin
មនុស្សយ៉ាងហោចណាស់៣០នាក់ស្លាប់ក្នុងការវាយប្រហារលើភូមិមួយក្នុងរដ្ឋ Kaduna ប្រទេសនីហ្សេរីយ៉ា
07/28/2026 01:07 PM
Facebook Telegram Linkin
អតីតមន្ត្រីយោធាអ៊ីស្រាអែលរាប់រយនាក់ជំរុញឱ្យលោក Trump ជួយបញ្ចប់អំពើហិង្សារបស់អ្នកតាំងលំនៅឋាន
07/28/2026 01:07 PM
Facebook Telegram Linkin
មន្ត្រីអាមេរិក៖ កិច្ចចរចាជុំបន្ទាប់រវាងអ៊ីស្រាអែល និងលីបង់ នឹងត្រូវធ្វើឡើងនៅថ្ងៃទី៤ ខែសីហា
07/28/2026 12:07 PM
Facebook Telegram Linkin
អារ៉ាប៊ីសាអ៊ូឌីត ការពារប្រឆាំងការវាយប្រហារដោយយានដ្រូនពីក្រុមគាំទ្រដោយអ៊ីរ៉ង់
07/28/2026 12:07 PM
Facebook Telegram Linkin
រដ្ឋមន្រ្ដីក្រសួងសុខាភិបាល៖ មន្ទីរពេទ្យគន្ធបុប្ផាជានិម្មិតរូបនៃការជួយសង្រ្គោះកុមារនៅកម្ពុជាប្រកបដោយក្តីករុណា គុណភាព និងក្តីសង្ឃឹម
07/28/2026 12:07 PM
Facebook Telegram Linkin
Chelsea បើកការចរចានាំយក Jordan Henderson និង Danny Welbeck មកបន្ថែម​បទពិសោធន៍​ក្នុងក្រុម
07/28/2026 12:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.