BTV NEWS

គ្រូបង្វឹក Lucky FC ចាត់ទុកការចូលរួមពានអន្ដរជាតិ ជាឱកាសល្អសម្រាប់បាល់ទាត់ក្នុងសាលកម្ពុជា និងប្ដេជ្ញាចិត្តធ្វើបានល្អ

កីឡាហែលទឹកពាក់ជើងទាកម្ពុជានាពេលនេះ ដណ្តើមបានមេដាយ៦គ្រឿង ពីការប្រកួតជើងឯកអាស៊ីអាគ្នេយ៍នៅម៉ាឡេស៊ី

ភ្នំពេញក្រោន ទទួលបានការសរសើរពីគ្រូ Kitchee ក្រោយរកបាន ៩ពិន្ទុពេញក្នុងជុំទី១ នៃពាន ACL-2

ព្រះខ័នរាជ បញ្ចប់ការរង់ចាំ ជាមួយជ័យជម្នះភ្លូកទឹកភ្លូកដីលើក្រុម Tampines Rovers ក្នុងពានកម្រិតទី២ ទ្វីបអាស៊ី

ព័ត៌មានកីឡា

យុវតីយ៉ាងច្រើនបានចាប់អារម្មណ៍ និងចូលរួមកម្មវិធីសមភាពស្ត្រីក្នុងវិស័យកីឡា នៅខេត្តព្រះសីហនុ

ដោយមានការយល់ដឹងអំពីអត្ថប្រយោជន៍នៃការលេងកីឡា បានជំរុញឲ្យយុវសិស្សជាស្ដ្រីជាច្រើន បានចាប់អារម្មណ៍ និងចូលរួមក្នុងសកម្មភាពកីឡា ជាក់ស្ដែងកម្មវិធីអប់រំគុណតម្លៃអូឡាំពិក និងសមភាពស្ដ្រីក្នុងវិស័យកីឡា នៅខេត្តព្រះសីហនុ ដែលរៀបចំដោយគណៈកម្មាធិការជាតិអូឡាំពិកកម្ពុជា កាលពីថ្ងៃទី៣០ ខែធ្នូកន្លងទៅ បានទាក់ទាញយុវតីប្រមាណជិត ២០០នាក់ចូលរួម។ឯកឧត្តម ប៊ុយ សុភ័ណ្ឌ ទីប្រឹក្សាគណៈកម្មាធិការជាតិអូឡាំពិកកម្ពុជា(NOCC) និងជាគ្រូឧទ្ទេសប្រចាំកម្មវិធីនេះ បានឲ្យដឹងថា តាមរយៈគម្រោងរបស់ក្រុមប្រឹក្សាអូឡាំពិកអាស៊ី កម្មវិធីនេះ ផ្ដោតលើយុវតី ដើម្បីលើកកម្ពស់សមភាពយ័នឌ័រក្នុងវិស័យកីឡា ស្របតាមគោលការណ៍របស់ចលនាអូឡាំពិកអន្ដរជាតិ ដែលបាននឹងជំរុញសកម្មភាពនេះនៅទូទាំងសកលលោក ទាំងបុរស និងនារី សុទ្ធតែមានលទ្ធភាពលេងកីឡាដូចៗគ្នា។ចំពោះកម្មវិធីដែលបានរៀបចំនៅខេត្តព្រះសីហនុ កាលពីល្ងាចថ្ងៃអង្គារសប្ដាហ៍នេះវិញ បានទទួលការគាំទ្រ និងចូលរួមយ៉ាងផុសផុលពីយុវតី ដែលជាសិស្សនុសិស្ស នៃវិទ្យាល័យសម្ដេចឪ រហូតដល់ជិត ២០០នាក់ ហើយកម្មវិធីនេះដែរ បែងចែកជា ២វគ្គ ទី១ ផ្ដោតការចែករំលែកពីគុណតម្លៃអូឡាំពិក ចលនាអូឡាំពិក និងប្រវត្តិកីឡាអូឡាំពិក និងទី២ ការចូលរួមលេងកីឡាវាយសី ដែលជាកីឡាមួយត្រូវបានចាត់ទុកថា ស័ក្ដិសមសម្រាប់ស្ដ្រី។តាមរយៈសកម្មភាពទាំងអស់នេះ ឯកឧត្តម ប៊ុយ សុភ័ណ្ឌ បានវាយតម្លៃខ្ពស់ ចំពោះភាពរីកចម្រើន និងកំណើនស្ដ្រីក្នុងសកម្មភាពកីឡា ដែលឆ្លើយតបនឹងការយកចិត្តទុកដាក់របស់ចលនាអូឡាំពិកអន្ដរជាតិ ក៏ដូចជាចលនាអូឡាំពិកជាតិ ក្នុងការខិតខំអប់រំគុណតម្លៃអូឡាំពិក និងជំរុញស្ដ្រីចូលរួមលេងកីឡា ដែលស្ដ្រីមានសិទ្ធចូលរួមលេងកីឡាដូចបុរាដែរ ផ្ទុយពីអូឡាំពិកសម័យបុរាណ ដែលស្រ្ដីមិនអាចលេងកីឡាបានឡើយ។ទន្ទឹមជាមួយគ្នាដែរ លោក ហាង សុខឡា គ្រូអប់រំកាយ និងកីឡា នៅវីទ្យាល័យសម្ដេចឪ បានគូសបញ្ជាក់ថា សិស្សានុសិស្សទាំងអស់ សុទ្ធតែរីករាយក្នុងការចូលរួមត្រងត្រាប់ស្ដាប់ និងការចែករំលែកពីប្រវត្តិចលនាកីឡាអូឡាំពិក និងបានចូលរួមលេងកីឡា ដែលជំរុញឲ្យយុវតីទាំងអស់បានយល់ដឹងពីគុណតម្លៃនៃកីឡា និងសុខភាព។គួរដឹងថា កម្មវិធីអប់រំគុណតម្លៃអូឡាំពិក និងសមភាពស្ត្រីក្នុងវិស័យកីឡា នេះត្រូវបានអនុវត្តតាំងពីឆ្នាំ ២០២១ ដែលបានរួមចំណែកបំផុសសកម្មភាពកីឡា ដល់មហាជន និងយុវជន ជាពិសេស ស្ត្រី ដែលធ្វើឱ្យមានការយល់ដឹងកាន់តែខ្លាំងពីសារៈសំខាន់នៃការលេងកីឡាចំពោះសុខភាព ពិសេសក្រោយមហាជោគជ័យនៃព្រឹត្តិការណ៍ស៊ីហ្គេម ឆ្នាំ២០២៣ តែម្ដង៕ អត្ថបទ លី ឈុនឡា

ជំនួយចលនាអូឡាំពិកអន្ដរជាតិ ដែលភាគច្រើនជាសម្ភារកីឡា បានប្រគល់ជូនក្រសួងអប់រំ សម្រាប់ជួយជនភៀសសឹក

ជំនួយរបស់ចលនាអូឡាំពិកអន្ដរជាតិ ដែលមានភាគច្រើនជាសម្ភារសិក្សា ពិសេសសម្ភារកីឡា ត្រូវប្រគល់ជូនក្រសួងអប់រំ យុវជន និងកីឡា សម្រាប់ជួយដល់ជនភៀសសឹក តាមរយៈគណៈកម្មាធិការជាតិអូឡាំពិកកម្ពុជា កាលពីថ្ងៃទី៣០ ខែធ្នូ ឆ្នាំ២០២៥ នៅទីស្ដីការក្រសួង ដោយទទួលបានការស្វាគមន៍យ៉ាងកក់ក្ដៅពីឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ដ្រី រដ្ឋមន្ដ្រីក្រសួងអប់រំ យុវជន និងកីឡា។ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) មានប្រសាសន៍ថា នេះជាលើកទី២ ហើយ ដែលគណៈកម្មាធិការជាតិអូឡាំពិកកម្ពុជា បាននាំយកជំនួយពីចលនាអូឡាំពិកអន្ដរជាតិ បរិច្ចាគជួយដល់ជនភៀសសឹក តែជំនួយលើកនេះ ផ្ដោតជាពិសេសលើសម្ភារសិក្សា និងសម្ភារកីឡា សម្រាប់ជួយសម្រួលដល់គ្រូបង្រៀន ពិសេសសិស្សានុសិស្ស ដែលបានភៀសសឹក ក្នុងការបន្ដឱកាសសិក្សាផង និងលេងកីឡាផង។គួរដឹងថា តាមរយៈមូលនិធិជនភៀសសឹកអូឡាំពិក ដែលបង្កើតឡើងក្រោមអនុស្សារណៈយោគយល់គ្នា រវាងគណៈកម្មាធិការអូឡាំពិកអន្ដរជាតិ(IOC) និងអង្គការសហប្រជាជាតិ(UN) កាលពីថ្មីៗ គណៈកម្មាធិការអូឡាំពិកអន្ដរជាតិ ក៏ដូចជាក្រុមប្រឹក្សាអូឡាំពិកអាស៊ី បានផ្ដល់នូវអំណោយសប្បុរសធម៌ដ៏ច្រើនសន្ធឹកសន្ធាប់ សម្រាប់ជួយដល់ជនភៀសសឹកកម្ពុជា ហើយជំនួយទាំងអស់ មួយផ្នែកធំ ដែលរួមមានអង្ករ ថ្នាំពេទ្យ និងសម្ភារប្រើប្រាស់ជាច្រើន ត្រូវបានក្រុមការងារគណៈកម្មាធិការជាតិអូឡាំពិកកម្ពុជា នាំយកបរិច្ចាគជួយផ្ទាល់ដល់ជនភៀសសឹក តាមរយៈអាជ្ញាធរខេត្តឧត្ដរមានជ័យ ហើយជំនួយមួយផ្នែកទៀត ដែលភាគច្រើនជាសម្ភារសិស្សា និងសម្ភារកីឡា អមថវិកា ៨លានរៀល បានបរិច្ចាគតាមរយៈក្រសួងអប់រំ យុវជន និងកីឡា ដែលជាស្ថាប័នតំណាងរាជរដ្ឋាភិបាល ក្នុងចលនាកីឡា៕ អត្ថបទ លី ឈុនឡា

តើអាមេរិកអាចបញ្ចប់ជម្លោះនៅក្នុងពិភពលោក មុនខ្លួនធ្វើម្ចាស់ផ្ទះបាល់ទាត់ពិភពលោក និងអូឡាំពិកបានទេ?

នៅសល់ជាងកន្លះឆ្នាំទៀត អាមេរិក កាណាដា និងម៉ិចស៊ិក ត្រូវធ្វើម្ចាស់ផ្ទះបាល់ទាត់ពិភពលោក២០២៦ នឹងនៅសល់ជាងពីរឆ្នាំទៀត អាមេរិកតែឯងធ្វើម្ចាស់ផ្ទះអូឡាំពិករដូវក្ដៅ២០២៨ ខណៈជម្លោះឈ្លានពាន និងជម្លោះប្រដាប់អាវុធកំពុងបន្តកើតឡើងនៅតំបន់មួយចំនួនជុំវិញពិភពលោកក្នុងនោះក៏មានការឈ្លានពានរបស់ប្រទេសថៃមកលើព្រះរាជាណាចក្រកម្ពុជាផងដែរ។លោក ដូណាល់ ត្រាំ ប្រធានាធិបតីសហរដ្ឋអាមេរិក តាំងពីលោកក្លាយជាអ្នកកាច់ចង្កូចនាវាអាមេរិកជាលើកទី២សកម្មភាពមួយក្នុងចំណោមសកម្មភាពនយោបាយការបរទេសជាច្រើនរបស់លោកគឺការស្វែងរកសន្តិភាពសម្រាប់តំបន់ និងប្រទេសដែលមានជម្លោះ។ស្របពេលជាមួយគ្នានេះ ក្នុងនាមម្ចាស់ផ្ទះរួម (កាណាដា ម៉ិចស៊ិក អាមេរិក)ការប្រកួតបាល់ទាត់ពិភពលោក២០២៦ សហព័ន្ធកីឡាបាល់ទាត់អន្តរជាតិ (FIFA) ក៏បានបង្ហាញការគាំទ្រពេញទំហឹង ហើយថ្មី ៗនេះ បានប្រគល់ពានរង្វាន់សន្តិភាពបាល់ទាត់ពិភពលោក (FIFA Peace Prize) ជូនប្រធានាធិបតីអាមេរិករូបនេះឆ្លើយតបនឹងកិច្ចខំប្រឹងប្រែងរបស់លោក។ ក្រៅពីនេះមេដឹកនាំប្រទេសមួយចំនួន និងប្រធានFIFA រួមទាំងកម្ពុជាផងក៏បានប្រកាសគាំទ្រលោកត្រាំឈ្នះពានរង្វាន់ណូបែលទៀតផង។*កីឡាជាទូតនៃសន្តិភាព បាល់ទាត់បង្រូបបង្រួមពិភពលោក នេះជាអ្វីដែលអ្នកអូឡាំពិកអន្តរជាតិ កីឡាករ កីឡាការិនី តារាបាល់ទាត់គ្រប់រូបតែងតែលើកឡើងគ្រប់ៗគ្នា ។មិនខុសគ្នាប៉ុន្មាននោះទេ លោកដូណាល់ត្រាំ គ្រប់វេទិកា តែងតែលើកឡើងពីការបញ្ចប់សង្គ្រាម និងស្វែងរកសន្តិភាពជូនពិភពលោក។ នេះបង្ហាញថាអាមេរិកត្រូវការសន្តិភាព បដិសេដសង្គ្រាម។ ដូច្នោះហើយ វាមិនមែនជារឿងចៃដន្យនោះទេ ក៏ព្រោះតែអាមេរិកត្រូវធ្វើម្ចាស់ផ្ទះព្រឹត្តិការណ៍កីឡាដ៏ធំរបស់ភពផែនដី គឺការប្រកួតបាល់ទាត់ពិភពលោក២០២៦ និងកីឡាអូឡាំពិករដូវក្ដៅ២០២៨នៅឡូអេនជឺឡេស។ប្រាកដណាស់ក្នុងនាមមហាអំណាចពិភពលោក (បងធំពិភពលោក)និងជាម្ចាស់ផ្ទះព្រឹត្តិការណ៍បួនឆ្នាំនេះផង អាមេរិកមិនត្រូវការសង្គ្រាមនោះទេ អាមេរិក ចង់ឱ្យពិភពលោកទាំងមូលរួបរួមគ្នា សប្បាយទាំងអស់គ្នា រីករាយទាំងអស់គ្នា អបអរសាទរទាំងអស់គ្នាជាមួយកីឡាដ៏ស្រស់ស្អាតនេះ។អាមេរិកទំនងជាមិនចង់ឃើញភាពលំបាកវេទនា ប្រជាជនត្រូវជម្លៀស កុមារមិនបានរៀនសូត្រ ឈាមត្រូវបង្ហូរ មនុស្សត្រូវស្លាប់ដោយសារសង្គ្រាមនៅចំពោះមុខ មុនខ្លួនធ្វើម្ចាស់ផ្ទះកីឡាដ៏ធំទាំងពីរនេះនោះទេ។ បើសិនអាមេរិកមិនអាចធ្វើបាន នោះអាមេរិកត្រូវបានគេមើលឃើញពីភាពកម្សោយ និងធ្វើឱ្យឥទ្ធិពលអាមេរិក សាប និងថយចុះជាក់ជាមិនខាន។យើងអាចមើលដឹងពីមោទនភាពរបស់លោកត្រាំចំពោះកិច្ចការរបស់លោកក្នុងការស្វែងរកសន្តិភាព ហើយលោកលោកតែពោលថាខ្លួនជាអ្នកបង្កើតសន្តិភាព និងជួយជីវិតមនុស្សរាប់លាននាក់លើពិភពលោកតាមរយៈការបញ្ចុះបញ្ចូល និងចរចារបញ្ចប់សង្គ្រាម ដូចជាជាក់ស្តែងជម្លោះរវាង រ៉វ៉ាន់ដា និងសាធារណរដ្ឋកុងហ្គោ (Rwanda and the Democratic Republic of the Congo) អ៊ីស្រាអែល និងក្រុមហាម៉ាស់ (Israel and Hamas) អ៊ីស្រាអែល និងអ៊ីរ៉ង់ (Israel and Iran) ឥណ្ឌា និងប៉ាគីស្ថាន (India and Pakistan) អាមេនី និងអាស៊ែបៃហ្សង់ (Armenia and Azerbaijan)។ ក្រៅពីនេះលោក បានអនុម័តផែនការ២៨ចំណុចបញ្ចប់សង្គ្រាមរុស្ស៊ី និងអ៊ុយក្រែន (28-point plan for peace between Russia and Ukraine)។និយាយដោយឡែក សង្គ្រាមឈ្លានពានដោយប្រដាប់អាវុធរបស់ថៃមកលើដែនអធិបតេយ្យកម្ពុជា ប្រធានធិបតីអាមេរិករូបនេះ ក៏បានដើរតួនាទីយ៉ាងសកម្មជាមួយភាគីប្រធានអាស៊ានម៉ាឡេស៊ី ក្នុងការបញ្ចប់សង្គ្រាម ដោយធ្វើឱ្យមានបទឈប់បាញ់ថ្ងៃទី២៨ ខែកក្កដា ឆ្នាំ២០២៥ និងកិច្ចព្រមព្រៀងសន្តិភាពទីក្រុងកូឡាឡំពួរ ប្រទេសម៉ាឡេស៊ីថ្ងៃទី២៦ ខែតុលា ឆ្នាំ២០២៥។ ប៉ុន្តែកិច្ចខិតខំប្រែងប្រែងប្រកបដោយអំនួត និងមោទនភាពរបស់លោកដូណាល់ត្រូវ ត្រូវបានសម្ព័ន្ធមិត្តរបស់ខ្លួនថៃជាន់ឈ្លី មើលស្រាល មើលថោក និងបង្ករសង្គ្រាមឈ្លានពានជាថ្មីមកលើទឹកដីកម្ពុជា (ថ្ងៃទី៧ ខែធ្នូ ឆ្នាំ២០២៥)។បញ្ហានេះលោកប្រធានាធិបតីអាមេរិក ក៏មិនបានព្រងើយកន្ដើយនោះទេ លោកបានព្យាយាមអន្តរាគមន៍ និងឱ្យភាគីថៃ និងកម្ពុជាវិលទៅគោរពបទឈប់បាញ់ និងកិច្ចព្រមព្រៀងសន្តិភាពដែលមានស្រាប់ តែផ្ទុយទៅវិញ សម្ដីអាមេរិកលែងមានតម្លៃសម្រាប់ប្រទេសថៃ ហើយបង្ករសង្គ្រាមឈ្លានពានកាន់តែខ្លាំងក្លាបន្ថែមទៀត។ ជារួមថៃមិនស្តាប់នរណាទាំងអស់ សូម្បីអាមេរិកក៏ដោយ ខណៈដែលកម្ពុជា គោរពយ៉ាងខ្ជាប់ខ្ជួន។ ជាក់ស្ដែងនាយករដ្ឋមន្ត្រីចាំផ្ទះថៃ អានុទីន បញ្ជាក់ប្រាប់សារព័ត៌មានថា អាមេរិក មិនមានឥទ្ធិពលលើថៃនោះទេ។*តើអាមេរិក (ដូណាល់ត្រាំ)ពិតជាបណ្ដោយឱ្យថៃធ្វើតាមទំនើងចិត្តយ៉ាងនេះរឺ?ដើម្បីបង្ហាញថាខ្លួនជាប្រទេសមហាអំណាច និងបងធំពិភពលោក ហើយដោះស្រាយជម្លោះ និងបញ្ចប់ដោយជោគជ័យនៅដែនដីផ្សេងៗ ជឿជាក់ថាលោកត្រំា និងចាត់វិធានការបន្ទាន់ណាមួយដើម្បីបញ្ចប់សង្គ្រាមឈ្លានពានថៃមកលើកម្ពុជា ឱ្យសមនឹងអ្វីដែលលោកលើកឡើងចំពោះមុខប្រធានសហព័ន្ធបាល់ទាត់ពិភពលោក ក៏ដូចជាមេដឹកនាំប្រទេសនានាថាលោកជួយសង្គ្រោះជិវិតមនុស្សរាប់សិបលាននាក់ តាមរយៈអន្តរាគមន៍ការទូត និងបឈ្ឈប់សង្គ្រាមដែលកើតឡើង និងមុនកើតឡើង (Trump stated he had saved "tens of millions of lives" through diplomatic interventions and had "stopped wars happening just before they started")។សង្គ្រាម បង្កើតឡើងដោយមនុស្ស និងប្រទេសឈ្លានពាន ហើយក៏នឹងត្រូវបញ្ចប់ដោយមនុស្ស តែអ្វីដែលសោកស្តាយពន់ពេក គឺប្រជាជនស្លូតត្រូវ កុមារ យោធា ត្រូវបាត់បង់ជីវិតដោយសារជនស្មោភសង្គ្រាម អំណាច និងនយោបាយក្នុងសង្គមថៃ យកបញ្ហាក្នុងប្រទេសរបស់ខ្លួនជាលេសដើម្បីឈ្លានពានប្រទេសកម្ពុជា។យើងទាំងអស់គ្នា ជាប្រជាពលរដ្ឋកម្ពុជា (ទាំងក្នុង និងក្រៅប្រទេស) ត្រូវសាមគ្គីគ្នាជាឆ្លុងមួយជឿជាក់ ទុកចិត្តលើរាជរដ្ឋាភិបាល និងវីរកងទ័ពរបស់យើង ហើយឆ្លងកាត់ការលំបាកទាំងអស់គ្នា កុំជឿលើកព័ត៌មានមិនពិត និងការលើកឡើងរបស់អ្នកនយោបាយ និងជនមួយក្ដាប់តូចគ្មានមនសិកាជាតិដែលកំពុងរស់នៅក្រៅប្រទេស។ខ្មែររួមខ្មែរខ្លាំង!!!!!!ដោយ៖ គង់ ហួន

ថៃកំពុងរងភាពអាម៉ាសចំពោះកំហុសជាច្រើនដែលបង្កើតឡើង ក្នុងពិធីបើកកីឡាស៊ីហ្គេម លើកទី៣៣

ក្រោយពិធីបើកផ្លូវការ នៃការប្រកួតកីឡាស៊ីហ្គេម លើកទី៣៣ ដែលប្រទេសថៃ ធ្វើម្ចាស់ផ្ទះ កាលពីរាត្រីថ្ងៃទី៩ ខែធ្នូ បានបន្សល់នូវរឿងរ៉ាវដ៏អាម៉ាសជាច្រើន ដែលកំពុងរងការរិះគន់ពីសហគមន៍អន្ដរជាតិ ពិសេសបណ្ដាប្រទេសក្នុងតំបន់ ចំពោះភាពកម្សោយរបស់ម្ចាស់ផ្ទះថៃ ដែលបង្កើតឲ្យមានឡើង ក្នុងពិធីបើកព្រឹត្តិការណ៍ប្រចាំតំបន់ ២ឆ្នាំម្ដងនេះ។ចំពោះកំហុសដែលបានកើតឡើងក្នុងពិធីបើកស៊ីហ្គេម លើកទី៣៣ នៅទីក្រុងបាងកក កាលពីយប់មិញមានដូចជា៖១. ពិធីបើកការប្រកួតនេះ មិនអាចដំណើរការតាមការគ្រោងទុក ដោយត្រូវពន្យាពេលរហូតដល់ប្រមាណ ៣០នាទី ដើម្បីរងចាំការយាងមកដល់របស់ព្រះមហាក្សត្រថៃ ដែលផ្ដល់នូវការខកចិត្តសម្រាប់អ្នកចូលរួមទស្សនាផ្ទាល់។២. ពិធីដង្ហែក្បួនប្រតិភូកីឡារបស់ប្រទេសសមាជិកទាំង ១១ ដោយមានការប្រកាសឈ្មោះប្រទេសឥណ្ឌូនេស៊ី ដែលធ្លាប់ធ្វើម្ចាស់ផ្ទះស៊ីហ្គេម កាលពីឆ្នាំ ១៩៩៧ ប៉ុន្តែរូបទង់ជាតិ ដែលបង្ហាញនៅលើផ្ទាំងអេក្រង់ ជាទង់ជាតិរបស់ប្រទេសសិង្ហបុរី ទៅវិញ។ នេះគឺជាកំហុសដ៏ធ្ងន់ធ្ងរមួយ ដែលធ្វើឱ្យប៉ះពាល់ដល់តម្លៃជាតិសាសន៍របស់ឥណ្ឌូនេស៊ី និងសិង្ហបុរី។ ប៉ុន្ដែនេះក៏មិនមែនជារឿងថ្មីដែរ ចំពោះកំហុសច្រឡំទង់ជាតិ និងឈ្មោះប្រទេសនេះ ដ្បិតរឿងនេះ ធ្លាប់បានកើតមានយ៉ាងញឹកញាប់ ដូចជាចាប់ឆ្នោតវគ្គចែកពូលបាល់ទាត់ ASEAN U19 Futsal ដោយម្ចាស់ផ្ទះថៃ បានប្រើប្រាស់និមិត្តសញ្ញាទង់ជាតិចិន ជំនួសទង់ជាតិប្រទេសវៀតណាម ហើយថ្មីៗនេះ ថៃ បន្ដសុំទោសវៀតណាម និងឡាវ ចំពោះបញ្ហាបច្ចេកទេសគ្មានភ្លេងគោរពទង់ជាតិប្រទេសទាំងពីរ ក្នុងជំនួបបើកឆាកពូលB វិញ្ញាបាល់ទាត់បុរស នៃព្រឹត្ដិការណ៍ស៊ីហ្គេម ក៏ដូចជាបញ្ហារឿងភ្លេងជាតិដដែល ដែលកើតឡើងក្នុងជំនួបបាល់ទាត់នារី ក្នុងពូលA រវាងម្ចាស់ផ្ទះថៃ និងឥណ្ឌូនេស៊ី ដោយរូបភាពទង់ជាតិខុសបច្ចេកទេសលើការផ្សាយ ដែលរូបភាពបានរចនាឡើងមក ជារូបភាពលាយលំទង់ជាតិរួមគ្នាតែមួយ ទាំងទង់ជាតិឥណ្ឌូនេស៊ី ឡាវ ថៃ និងវៀតណាមតែម្ដង។៣. ការបង្ហាញអក្សរខ្មែរ (ជម្រាបសួរ) ដែលលោតនៅលើផ្ទាំងអេក្រង់ សរសេរខុស ទៅជា «ជាំរាបសួរ» ។ នេះអាចជាកំហុសអចេតនា ឬជាភាសាលេងសើច ក្នុងន័យមើលស្រាលអក្សរសាស្រ្តខ្មែរ ដែលធ្វើឲ្យប្រជាពលរដ្ឋខ្មែរ សម្ដែងការមិនពេញចិត្ត និងរិះគន់ផងដែរ។៤. ការបង្ហាញផែនទីរបស់ប្រទេសវៀតណាម នៅលើអេក្រងធំ ក្នុងពិធីបើកស៊ីហ្គេមនេះ គឺបាត់កោះចំនួន២ របស់វៀតណាម ហើយបញ្ហានេះ ភាគីវៀតណាម កំពុងផ្ទុះការវែងញែកជាខ្លាំង ព្រោះវាប៉ះពាល់ធ្ងន់ធ្ងរ ដល់ដែនអធិបតេត្យភាពរបស់វៀតណាម។៥. ប្រអប់ភ្លើង LED ទាំង១១ ដែលតំណាងឱ្យប្រទេសសមាជិកទាំង១១ នៅក្នុងតំបន់អាស៊ាន មានភ្លើងបាញ់ភ្លើងពណ៌ខៀវចំនួន ១០ប្រអប់ លើកលែងថា ប្រអប់ LED ទី២ ដែលរាប់ពីឆ្វេងមកស្ដាំ ជាប្រអប់តំណាងឱ្យកម្ពុជា គ្មានភ្លើងបាញ់បំភ្លឺដូចគេ ។ នេះអាចទុកជាកំហុសចេតនាច្រើនជាង ព្រោះថៃកំពុងមានបញ្ហាព្រំដែនជាមួយកម្ពុជា ប៉ុន្តែទង្វើនេះ ជាការលក់មុខជាតិសាសន៍ថៃទៅវិញ ព្រោះថៃជាម្ចាស់ផ្ទះ មិនមែនកម្ពុជាឡើយ។៦. ពេលគោរពភ្លេងជាតិស៊ីហ្គេម លើកទី ៣៣ ឆ្នាំ២០២៥ គឺទង់ជាតិស៊ីហ្គេមរបស់ម្ចាស់ផ្ទះថៃ បានធ្លាក់ បន្ទាប់ពីប៉ូលិស បានដើរចេញពីទីតាំង ព្រោះចងអត់ខ្សែជាប់។ នេះគឺជាភាពកម្សោយ និងគ្មានការយកចិត្តទុកដាក់របស់ម្ចាស់ផ្ទះថៃ។៧. ពិធីរត់ភ្លើងគប់ រឹតតែគ្មានភាពទាក់ទាញអ្វីសោះ ដោយពេលបំភ្លឺភ្លើង នៅគប់ធំ គឺឃើញមានតែផ្សែងហុយៗ តែគ្មានអណ្តាតភ្លើង។ នេះជាភាពកម្សោយខ្លាំងបំផុត ធ្វើឱ្យថៃបាក់មុខខ្លាំង រហូតពិធីករ-ពិធីការិនី ព្យាយាមនាំគ្នានិយាយបង្វែរប្រធានបទ ដើម្បីកុំឱ្យអ្នកចូលរួមផ្ទាល់ និងអ្នកមើលតាមការផ្សាយផ្ទាល់ ចាប់អារម្មណ៍ និងមើលដឹងពីភាពកម្សោយនេះ។៨. ពិធីបើកស៊ីហ្គេមទាំងមូល តែគ្មានការបាញ់កាំជ្រួចអបអរ ផ្ទុយពីព្រឹត្តិការណ៍ស៊ីហ្គេមមុនៗ។ ធម្មតាក្រោយពិធីដុតភ្លើងគប់ធំឆេះ ពិធីបាញ់កាំជ្រួចនឹងកើតឡើង តែពិធីបើកស៊ីហ្គេម នៅថៃខុសគេ អាចជាលេសថា ប្រទេសកំពុងមានសង្គ្រាមជុំទិស មិនអាចបន្លឺសំឡេងបាន។ ប៉ុន្ដែក្រោយប្រកាសបិទកម្មវិធី សូម្បីការចាក់ភ្លេង ដើម្បីអបអរសាទរពិធីបើកក៏គ្មាន ដែលធ្វើឲ្យពិធីបើកហាក់គ្មានន័យអ្វីទាំងអស់៕ អត្ថបទ លី ឈុនឡា

កម្ពុជា ប្រកាសដកខ្លួនចេញពីការប្រកួតកីឡាស៊ីហ្គេម ២០២៥ នៅថៃ

យោងតាមលិខិតរបស់គណៈកម្មាធិការជាតិអូឡាំពិកកម្ពុជា ព្រឹកនេះ បានបញ្ជាក់ថាកម្ពុជា បានដកខ្លួនពីការប្រកួតកីឡាស៊ីហ្គេម ២០២៥ហើយ ដោយសារបារម្ភពីសុវត្ថិភាព។លិខិតផ្លូវការបន្ថែមថា គណៈកម្មាធិការជាតិអូឡាំពិកកម្ពុជា ជូនដំណឹងដល់ក្រុមប្រឹក្សាកីឡាអាស៊ីអាគ្នេយ៍ និងគណៈកម្មការរៀបចំស៊ីហ្គេមឆ្នាំ២០២៥ អំពីការសម្រេចដកខ្លួនភ្លាមៗ ដើម្បីត្រឡប់មកប្រទេសកម្ពុជាវិញរបស់ក្រុមប្រតិភូកីឡាកម្ពុជា ដោយសារក្រុមគ្រួសារប្រតិភូកីឡាកម្ពុជា សម្ដែងនូវការព្រួយបារម្ភអំពីសុវត្ថិភាព។អូឡាំពិកកម្ពុជា ក៏បានថ្លែងអំណរគុណដល់គណៈកម្មាធិការរៀបចំការប្រកួតស៊ីហ្គេម ២០២៥ ក៏ដូចជាគណៈកម្មាធិការជាតិអូឡាំពិកថៃ ចំពោះការទទួលបដិសណ្ឋារកិច្ច ឈរលើស្មារតីអ្នកកីឡាដល់អត្តពលិកកម្ពុជាកំឡុងពេលស្នាក់នៅនេះ។សូមបញ្ជាក់ថាប្រតិភូកីឡាកម្ពុជាបានបំពេញកាតព្វកិច្ចផ្លូវការទូតកីឡា និងច្បាប់កីឡាអន្តរជាតិ និងតំបន់ចប់សព្វគ្រប់ហើយ៕

ពានរង្វាន់បាល់ទាត់ពិភពលោកមកដល់រដ្ឋធានី Washington D.C មុនការចាប់ផ្តើមព្រឹកស្អែក

ពានរង្វាន់បាល់ទាត់ពិភពលោក FIFA World Cup បានមកដល់រដ្ឋធានី Washington D.C ហើយដោយធ្វើដំណើរទៅកាន់ទីតាំងល្បីៗមួយចំនួននៃរដ្ឋធានីរបស់សហរដ្ឋអាមេរិក នៅមុនការចាប់ឆ្នោតបែងចែកពូលផ្លូវការនៅព្រឹកស្អែក។ពានរង្វាន់កំពូលរបស់បាល់ទាត់ ត្រូវបានដាក់តាំងបង្ហាញនៅមជ្ឈមណ្ឌល John F. Kennedy អមជាមួយនឹងការសម្តែងសិល្បៈ ដែលជាកន្លែងដែលអតីតខ្សែការពារអង់គ្លេស Rio Ferdinand និងតំណាងរបស់ FIFA ស្វាគមន៍ប្រព័ន្ធផ្សព្វផ្សាយ។អតីតប្រធានក្រុមជម្រើសជាតិអង់គ្លេសរូបនេះ បានចែករំលែកនូវមោទនភាព និងក្តីរំភើបរបស់ខ្លួន ហើយក៏ត្រៀមរៀបចំការចាប់ឆ្នោតជាប្រវត្តិសាស្ត្រដែលមានក្រុមចំនួន ៤៨។អ្នកជំនួយការអំឡុងការចាប់ឆ្នោតនឹងឃើញមានតារាកីឡាល្បីៗរបស់អាមមេរិកដូចជា - Tom Brady, Wayne Gretzky, Aaron Judge និង Shaquille O'Neal - នឹងចូលរួមដំណើរការនីតិវិធីចាប់ឆ្នោតកីឡាពិភពលោកដ៏អស្ចារ្យ៕អត្ថបទ៖នាង សុភាវុធ

FIFA គ្រោងបំពាក់បច្ចេកវិទ្យាថ្មីនៅលើអាជ្ញាកណ្តាល និងរឹតបន្តឹងការខ្ជះខ្ជាយពេលវេលាប្រកួត

FIFA កំពុងថ្លឹងថ្លែងលើការដាក់បញ្ចូលបច្ចេកវិទ្យាអាជ្ញាកណ្តាលថ្មី និងច្បាប់រឹត បន្តឹងការខ្ជះខ្ជាយពេលវេលាដ៏តឹងរ៉ឹងនៅ World Cup ឆ្នាំ ២០២៦ ឆ្នាំក្រោយ នេះបើតាមមន្ត្រីជាន់ខ្ពស់ FIFA លើកឡើងនៅមុនថ្ងៃនៃការចាប់ឆ្នោត World Cup។ លោក Johannes Holzmueller នាយកផ្នែកនវានុវត្តន៍របស់ FIFA បាននិយាយថា ស្ថាប័នគ្រប់គ្រងចង់ពង្រីកការប្រើប្រាស់ប្រព័ន្ធកាមេរ៉ានៅលើខ្លួនអាជ្ញាកណ្តាល និងកំណែទម្រង់កម្រិតខ្ពស់នៃប្រព័ន្ធចាប់បាល់ជំហរក្រៅល្បែង (Off-Side)ពាក់កណ្តាលស្វ័យប្រវត្តិ ដែលទាំងពីរត្រូវបានសាកល្បងនៅ Club World Cup កន្លងមក។លោក Holzmueller បាននិយាយថា FIFA ក៏បានអភិវឌ្ឍបច្ចេកវិទ្យា (Off-Side)ពាក់កណ្តាលស្វ័យប្រវត្តិរបស់ខ្លួនដោយស្ងាត់ស្ងៀមនៅក្នុង Club World Cup ដោយការផ្ញើការជូនដំណឹង(Off-Side)ដោយផ្ទាល់ទៅកាន់ជំនួយការអាជ្ញាកណ្តាល ជំនួសឱ្យការផ្តល់ជូនព័ត៌មានទៅកាន់ (VAR) ដើម្បីកាត់បន្ថយការប្រើប្រាស់ពេលវេលា។លោកបានច្រានចោលគំនិតដែលថាបច្ចេកវិទ្យាកំពុងបង្កើតកំណែថ្មីនៃកីឡា ដោយលើកហេតុផលថាវាជំនួសមកវិញនូវលំហូរប្រពៃណីរបស់ហ្គេម។លោក Pierluigi Collina ប្រធានគណៈកម្មាធិការអាជ្ញាកណ្តាលរបស់ FIFA បាននិយាយថា ការផ្លាស់ប្តូរទៅលើរយៈពេលដែលអ្នកចាំទីអាចកាន់បាល់បាន ដែលប្រកាសដោយ IFAB កាលពីខែមីនាកន្លងទៅ គឺមានបំណងបង្កើនល្បឿននៃការលេង បន្ទាប់ពី FIFA បានរកឃើញអ្នកចាំទីខ្លះចំណាយពេលដល់ទៅ 25 វិនាទី។ការប្រកួតបាល់ទាត់ពិភពលោកឆ្នាំ ២០២៦ ដែលនឹងធ្វើឡើងនៅទូទាំងសហរដ្ឋអាមេរិក ម៉ិកស៊ិក និងកាណាដា នឹងចាប់ឆ្នោតបែងចែកពូលផ្លូវការនៅព្រឹកថ្ងៃសុក្រស្អែកនេះនៅរដ្ឋធានី Washington D.C សហរដ្ឋអាមេរិក៕ អត្ថបទ៖នាង សុភាវុធ

ជាលើកដំបូងក្នុងរយៈពេល ១៥ឆ្នាំ កីឡាករបីរូបនឹងប្រជែងជើងឯក F1 ពិភពលោកទីលានចុងក្រោយសប្តាហ៍នេះនៅអារ៉ាប់រួម

កីឡាករអង់គ្លេស Lando Norris របស់ McLaren កីឡាករហូឡង់ Max Verstappen របស់ Red Bull និងកីឡាករអូស្រ្តាលី Oscar Piastri របស់ McLaren នឹងមានតែម្នាក់ប៉ុណ្ណោះជាជើងឯក F1 ពិភពលោកដែលនឹងរកឃើញនៅទីលានចុងក្រោយទីក្រុង Abu Dhabi អារ៉ាប់រួមចុងសប្តាហ៍នេះ។ ជាលើកដំបូងក្នុងរយៈពេល ១៥ ឆ្នាំដែលមានកីឡាករលើសពី ២ នាក់ប្រជែងជើងឯកនៅទីលានចុងក្រោយបែបនេះ ពោលគឺចុងក្រោយបំផុតនៅឆ្នាំ ២០១០ ដែលមានកីឡាករបួនរូបប្រជែងគ្នានៅទីលានចុងក្រោយបែបនេះ។ Abu Dhabi ក៏នឹងរំលឹកពីអនុស្សាវរីយ៍ត្រចះត្រចង់របស់ Max Verstappen ដែលបានប្រជែងឈ្នះ Lewis Hamilton នៅទីលានចុងក្រោយដើម្បីឈ្នះជើងឯកពិភពលោកលើកដំបូង។ តាំងពី Formula One ពិភពលោកចាប់ផ្តើមពីឆ្នាំ ១៩៥០ អ្នកនាំមុខគេក្នុងតារាងជើងឯកពិភពលោកតែងតែឈ្នះជើងឯកនៅពេលប្រជែងនៅទីលានចុងក្រោយលើកលែងតែ ៩ លើក។ ឆ្នាំ ២០១០ Sebastian Vettel ជាកីឡាករចុងក្រោយបំផុតដែលតាមពីក្រោយ Fernando Alonso ១៥ ពិន្ទុ និងឈ្នះជើងឯកដំបូងរបស់ខ្លួនដោយឈ្នះទីលានចុងក្រោយ។មុនឈានដល់ទីលានចុងក្រោយនេះ Lando Norris កំពុងមាន ៤០៨ ពិន្ទុ Max Verstappen ៣៩៦ ពិន្ទុ និង Oscar Piastri ៣៩២ ពិន្ទុ។ លទ្ធភាពដែល Norris ឈ្នះជើងឯកត្រូវ៖- បញ្ចប់នៅលើវេទិកាកិត្តិយស- បានលេខ ៥ រឺលេខ ៦ ហើយ Verstappen មិនឈ្នះការប្រណាំង- បានលេខ ៦ រឺ លេខ ៧ ហើយ Verstappen រឺ Piastri មិនឈ្នះការប្រណាំង- បានលេខ ៨ ហើយ Verstappen មិនឈ្នះ រឺលេខពីរ ហើយ Piastri មិនឈ្នះ- បានលេខ ៩ ហើយ Verstappen មិនស្ថិតលើវេទិកាកិត្តិយស ហើយ Piastri មិនឈ្នះលទ្ធភាពដែល Max Verstappen ឈ្នះជើងឯកត្រូវ៖- ឈ្នះការប្រណាំង ហើយ Norris មិនស្ថិតលើវេទិកាកិត្តិយស- បានលេខ ២ ហើយ Norris ខ្ពស់ជាងលេខ ៨ ខណៈ Piastri មិនឈ្នះ- បានលេខ ៣ ហើយ Norris បានលេខ ៩ រឺខ្ពស់ជាងនេះ ខណៈ Piastri មិនឈ្នះលទ្ធភាពដែល Piastri ឈ្នះជើងឯកត្រូវ៖- ឈ្នះការប្រណាំង ហើយ Norris មិនស្ថិតក្នុង Top5- បានលេខ ២ ហើយ Norris បានលេខ ១០ យ៉ាងទាប ខណៈ Verstappen មិនឈ្នះអត្ថបទ៖នាង សុភាវុធ

២ក្រុមបន្ដភាពខ្លាំងក្នុងពាន Svay Rieng Cup U15 ខណៈយុវជនសាមគ្គី ស្គាល់ចាញ់លើកដំបូង

ពានរង្វាន់យុវជន Svay Rieng Cup U15 ឆ្នាំ២០២៥ បានរកឃើញក្រុមឡើងវគ្គបន្ដជាបណ្ដើរៗហើយ ស្របពេលក្រុមយុវជនគោព្រៃភូមិស្វាយធំ និងក្រុមយុវជន U15 ព្រះខ័នរាជស្វាយរៀង បន្ដភាពខ្លាំង ដោយមិនស្គាល់ចាញ់ ខណៈក្រុមយុវជនសាមគ្គី រងបរាជ័យលើកដំបូង គិតត្រឹមសប្ដាហ៍ទី៩ នៃវគ្គជម្រុះតាមពូល កាលពីថ្មីៗ។សម្រាប់ក្រុមគោព្រៃភូមិស្វាយធំ បានយកឈ្នះក្រុម CRS Sport ដោយលទ្ធផល ៣-២ ក្នុងជំនួបបញ្ចប់ពូលA ដើម្បីរក្សាតំណែងកំពូលតារាង ដោយរកបាន ១៤ពិន្ទុ ក្រោយឆ្លងកាត់ ៦ប្រកួតឈ្នះ ៤ និងស្មើ ២ ខណៈក្រុមយុវជន CRS Sport បានត្រឹមឈរលេខ២ ដោយរកបាន ១១ពិន្ទុ ជាមួយលទ្ធផល ៦ប្រកួតដូចគ្នា ឈ្នះ ៣ ស្មើ ២ និងចាញ់ ១។ចំណែកក្រុមយុវជន U15 ព្រះខ័នរាជស្វាយរៀង បានយកឈ្នះក្រុមយុវជន ស.ស.យ.ក ឃុំត្នោត ដោយលទ្ធផល ៨-៣ ដើម្បីរក្សាកំណត់ត្រាឈ្នះ ១០០% ពោលគឺ ៥ប្រកួតឈ្នះទាំង ៥ រកបាន ១៥ពិន្ទុ តាមពីក្រោយដោយក្រុមសាលាបឋមសិក្សាជ្រៃធំ ដែលរកបាន ១២ពិន្ទុ ខណៈក្រុមទាំងពីរ នៅសល់ ១ប្រកួតក្នុងដៃដូចគ្នា ក្នុងការប្រកួតពូលC។ដោយឡែកក្រុមយុវជនសាមគ្គី បានស្គាល់បរាជ័យលើកដំបូង ក្រោមថ្វីជើងក្រុម Young Stars ដោយលទ្ធផល ២-១ ដែលជាជំនួបបញ្ចប់ពូលB ។ បែបនេះក្ដី យុវជនសាមគ្គី នៅតែរក្សាតំណែងកំពូលតារាង ដោយរកបាន ១៥ពិន្ទុ បន្ទាប់ពីឈ្នះ ៥ប្រកួត និងចាញ់ ១ តាមពីក្រោយដោយក្រុមសាមគ្គីកីឡា ដែលរកបាន ១២ពិន្ទុ និងក្រុម Young Stars បានត្រឹមឈរលេខ៣ រកបាន ៦ពិន្ទុ លើក្រុម ស.ស.យ.ក ស្រុកស្វាយទាប ដែលរកបាន ៣ពិន្ទុប៉ុណ្ណោះក្នុងចំណោម ៦ប្រកួត។ក្រឡេកទៅចាប់អារម្មណ៍ការប្រកួតបញ្ចប់ពូលD វិញ ក្រុមធូប្រាឌឺបាវិត បានត្រឹមចែកគ្នា ១ពិន្ទុ ជាមួយក្រុមត្នោតអេហ្វស៊ី ក្រោយប្រកួតស្មើគ្នា ០-០ ។ លទ្ធផលស្មើគ្នានេះ នាំឲ្យក្រុមត្នោតអេហ្វស៊ី រក្សាតំណែងលេខ២ រកបាន ៤ពិន្ទុ តាមពីក្រោយក្រុមកំពូលតារាងដារ៉ូពិទូ Sport FC ដែលរកបាន ១០ពិន្ទុ។គួរដឹងថា ពានរង្វាន់កម្រិតយុវជន ដែលផ្ដួចផ្ដើមរៀបចំដោយឯកឧត្តម ឌី វិជ្ជា ប្រធានសហភាពសហព័ន្ធយុវជនកម្ពុជា ខេត្តស្វាយរៀង និងជាប្រធានក្លិបព្រះខ័នរាជស្វាយរៀង ឆ្នាំនេះ មាន ១៥ក្រុមចូលរួម និងបែងចែកជា ៤ពូល ក្នុងនោះពូលA-B និងពូលC មាន ៤ក្រុមស្មើគ្នា គ្រាដែលពូលD មាន ៣ក្រុម ដែលនឹងត្រូវធ្វើការប្រកួតសន្សំពិន្ទុ ដើម្បីស្វែងរកក្រុមលេខ១ និងលេខ២ ប្រចាំពូលនីមួយៗ ឡើងទៅវគ្គ ៨ក្រុមចុងក្រោយ។ចំពោះប្រាក់រង្វាន់លើកទឹកចិត្តក្រុមទទួលបានជ័យាលភីវិញ ក្រុមជើងឯក នឹងទទួលបានពាន មេដាយមាស អមប្រាក់រង្វាន់ ៨លានរៀល, លេខ២ ទទួលបានមេដាយប្រាក់ អមប្រាក់រង្វាន់ ៤លានរៀល, លេខ៣ ទទួលបានមេដាយសំរឹទ្ធ អមប្រាក់រង្វាន់ ២លានរៀល និងលេខ៤ ទទួលបានប្រាក់រង្វាន់ ១លានរៀលផងដែរ៕ អត្ថបទ លី ឈុនឡា

អ្នករត់ពាក់កណ្ដាលម៉ារ៉ាតុងអង្គរចុងសប្ដាហ៍នេះ នឹងទទួលបានភេសជ្ជៈឥតគិតថ្លៃពីដៃគូសហការ

រំលេងតែ ១ថ្ងៃទៀតប៉ុណ្ណោះ នឹងឈានដល់ព្រឹត្តិការណ៍ដ៏អស្ចារ្យ សម្រាប់ខួប ៣០ឆ្នាំ នៃទិវារត់ប្រណាំងពាក់កណ្ដាលម៉ារ៉ាតុងអន្តរជាតិអង្គរ ឆ្នាំ២០២៥ ដែលនឹងប្រព្រឹត្តទៅនាព្រឹកថ្ងៃទី៧ ខែធ្នូចុងសប្ដាហ៍នេះ នៅតំបន់អង្គរ ខេត្តសៀមរាប ជាមួយការបំបែកកំណត់ត្រាអ្នកចូលរួមថ្មីរហូតដល់ ១៦,០០០នាក់។តាមរយៈតួរលេខអ្នកចូលរួមដ៏ច្រើននេះ បានធ្វើឲ្យគណៈកម្មការរៀបចំ ពិសេសគណៈកម្មាធិការជាតិអូឡាំពិកកម្ពុជា ក៏ដូចជាដៃគូសហការ និងប្រជាពលរដ្ឋ មានមោទនភាពជាខ្លាំង ចំពោះភាពរីកចម្រើននៃព្រឹត្តិការណ៍កីឡាទេសចរណ៍ដ៏ធំប្រចាំឆ្នាំ លើទឹកដីអច្ឆរិយអង្គរនេះ។ជាមួយគ្នាតំណាងក្រុមហ៊ុនភេសជ្ជៈ វី-អាកទីវ ដែលជាដៃគូសហការរៀបចំព្រឹត្តិការណ៍នេះ ក៏បានសម្ដែងនូវមោទនភាព និងរីករាយផងដែរ ដែលបានរួមចំណែកក្នុងព្រឹត្តិការណ៍ប្រវត្តិសាស្ដ្រថ្មី ដោយមានអ្នកចូលរួមរហូតដល់ ១៦,០០០នាក់នេះ ហើយក្រុមហ៊ុនក៏បានត្រៀមខ្លួនរួចរាល់ ក្នុងការផ្ដល់នូវភេសជ្ជៈកីឡា ដោយឥតគិតថ្លៃ ដល់អ្នកចូលរួមរត់ទាំងអស់ ។ ហេតុនេះ សម្រាប់អត្តពលិកជាតិ-អន្ដរជាតិទាំងអស់ អាចស្វែងរកស្ដង់ វី-អាកទីវ ដើម្បីទទួលយកភេសជ្ជៈ ដែលអាចបំពេញជាតិទឹកឲ្យបានគ្រប់គ្រាន់អំឡុងពេលរត់ពាក់កណ្ដាលម៉ារ៉ាតុងនេះ។ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានឲ្យដឹងថា ឆ្នាំនេះ គឺជាឆ្នាំដ៏ពិសេស សម្រាប់ខួបលើកទី៣០ នៃការបង្កើតទិវារត់ប្រណាំងពាក់កណ្ដាលម៉ារ៉ាតុងអន្តរជាតិអង្គរ ហើយក៏ជាមោទនភាពដ៏អស្ចារ្យផងដែរ ដែលមានអ្នកចុះឈ្មោះយ៉ាងច្រើនសរុបចំនួន ១៦,០០០នាក់ មកពី ៨៦ប្រទេសលើពិភពលោក ដែលបានបង្ហាញពីភាពរីកចម្រើន ការអភិវឌ្ឍ និងសុខសន្ដិភាពពេញលេញនៅកម្ពុជា ។ព្រឹត្តិការណ៍នេះ មាន ៤វិញ្ញាសា រួមមានរត់ចម្ងាយ ២១គីឡូម៉ែត្រ, ១០គីឡូម៉ែត្រ, ៥គីឡូម៉ែត្រ និង៣គីឡូម៉ែត្រ ដែលគ្រោងនឹងប្រព្រឹត្តទៅ ក្រោមអធិបតីភាពឯកឧត្ដម ស៊ុន ចាន់ថុល ឧបនាយករដ្ឋមន្ត្រី តំណាងដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៕ អត្ថបទ លី ឈុនឡា

បណ្ដាញសង្គម

ព័ត៌មានថ្មីៗ

ឧបទ្ទវហេតុធ្លាក់ឧទ្ធម្ភាគចក្រអ៊ីតាលីដែលបំពេញបេសកកម្មអឺរ៉ុបនៅបូស្នី បណ្តាលឲ្យមនុស្សស្លាប់និងរបួស

ក្រុមហ៊ូទី អះអាងថាបានវាយប្រហារ៦លើកលើអាកាសយានដ្ឋាន និងរោងចក្រប្រេងអារ៉ាប៊ីសាអ៊ូឌីត

អ៊ីរ៉ង់ ចោទយន្តការសិទ្ធិមនុស្សរបស់UNថាព្យាយាមបិទបាំងការវាយប្រហាររបស់អាមេរិក និងអ៊ីស្រាអែល

មនុស្សមួយចំនួនបានបាត់ស្លាប់ បន្ទាប់ពីព្យុះស៊ីក្លូន Arnab វាយប្រហារតំបន់ឆ្នេររបស់ប្រទេសឥណ្ឌា

ក្រុមការងារទទួលបន្ទុកជួសជុល និងសាងសង់ឡើងវិញអគារសិក្សា អំណោយសម្ដេចតេជោចុះពិនិត្យ និងវាយតម្លៃស្ថានភាពជាក់ស្តែងអគារសិក្សាចំនួន ៨ ទីតាំង ក្នុងក្រុងកំពង់សោម ស្រុកព្រៃនប់ និងស្រុកកំពង់សីលា

ក្រសួងការងារធ្វើតេស្ត RPL ដល់ពលរដ្ឋ និងតពលករចំនួន ១ ០០០នាក់លើជំនាញឆុងកាហ្វេ និងរចនា

កម្ពុជាកំពុងចាប់យកបច្ចេកវិទ្យាហិរញ្ញវត្ថុ គាំទ្រការប្រើប្រាស់ និងលើកកម្ពស់កំណើនសេដ្ឋកិច្ចឌីជីថល

ស្ថាប័នរដ្ឋ ឯកជន និងដៃគូជាង ១០០ ចូលរួមតាំងពិព័រណ៍ក្នុងភូមិហ្វ្រង់កូហ្វូនី លើសពីការរំពឹងទុក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877