នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
Paolo Maldini និង Leonardo លាលែងពីតំណែងក្នុងសហព័ន្ធបាល់ទាត់អ៊ីតាលី បង្កវិបត្តិថ្មីដល់ក្រុមជម្រើសជាតិ
Manchester City ព្យាយាមរក្សា Rodri ខណៈ Real Madrid បន្តដាក់សម្ពាធចង់នាំយកទៅ Bernabéu
បាល់ទាត់អង់គ្លេសសាកល្បងច្បាប់ថ្មី ដើម្បីទប់ស្កាត់ "យុទ្ធសាស្ត្រ​ផ្អាក​ការ​ប្រកួត​តាមរយៈ​ការ​ព្យាបាល​អ្នកចាំទី"
Yan Diomonde ព្រមព្រៀងលក្ខខណ្ឌផ្ទាល់ខ្លួនជាមួយ Real Madrid ខណៈ PSG ដក​ខ្លួន​ចេញ​ពី​ការ​ប្រជែង

ព័ត៌មានកីឡា

ស.ស.យ.ក និងក្រុមតារាកម្ពុជា នឹងប្រកួតបាល់ទាត់ជាមួយគ្នានៅចុងឆ្នាំ២០២៤ ដើម្បីអបអរទិវាសន្តិភាព

2024/11/01 10:46:06 pm        1078
Facebook Telegram Linkin
ក្រុមបាល់ទាត់របស់សហភាពសហព័ន្ធយុវជនកម្ពុជា និងក្រុមបាល់ទាត់ Cambodia Football Super Star នឹងធ្វើការប្រកួតបាល់ទាត់ជាមួយគ្នា នៅថ្ងៃទី ២៩ ខែធ្នូ ឆ្នាំ ២០២៤ ខាងមុខនេះ។ ការរៀបចំព្រឹត្តិការណ៍ប្រកួតបាល់ទាត់ដ៏ធំនេះ គឺដើម្បីអបអរសាទរ ទិវាសន្តិភាពលើកទី១។ ជាការអបអរសាទរ ទិវាសន្តិភាពជាលើកដំបូងសម្រាប់កម្ពុជានៅក្នុងឆ្នាំ ២០២៤ខាងមុខនេះ ក្រុម​បាល់​ទាត់របស់សហភាពសហព័ន្ធយុវជនកម្ពុជា និងធ្វើការប្រកួតបាល់ទាត់ជាមួយ ក្រុម​បាល់​ទាត់ Cambodia Football Super Star ដែលជាក្រុមតារាប្រចាំនៅកម្ពុជា។ មុនឈាន​ដល់​ការ​ប្រកួត​នៅ​ចុងឆ្នាំ២០២៤នេះ ក៏មានការរៀបចំជំនួបជាលើកដំបូងនៅរសៀលថ្ងៃទី ៣១ ខែតុលា ឆ្នាំ២០២៤ផងដែរ។ ជំនួបធ្វើឡើងក្រោមវត្តមាន ឯកឧត្តម ហ៊ុន ម៉ានី ប្រធាន​សហភាព​សហព័ន្ធ​យុវជន​កម្ពុជា និងវត្តមានឯកឧត្តម ឃួង ស្រេង អភិបាលរាជធានីភ្នំពេញ ជាតំណាងខាង​ក្រុមបាល់​ទាត់ Cambodia Football Super Star។ក្រោយបញ្ចប់ជំនួប​ខាង​លើនេះ គ្រូបង្វឹកសម្រាប់ ក្រុមបាល់ទាត់ ស.ស.យ.ក លើកឡើងថា ព្រឹត្តិការណ៍​ខាងមុខជា​ព្រឹត្តិការណ៍ដ៏ធំ ដែលអនុញ្ញាតឱ្យសាធារណជនចូលទស្សនាដោយសេរី នៅ​ពហុកីឡដ្ឋានមរតកតេជោ។ លោកលើកឡើងថា ការរៀបចំការប្រកួតខាងមុខនេះ គឺមាន​គោល​ដៅ​​ធំបំផុត គឺជាការអបអរទិវាសន្តិភាពនៅកម្ពុជា។ លោកថា ក្រុមបាល់ទាត់​របស់​សហភាព​សហព័ន្ធ​យុវជន នឹងប្រឹងប្រែងឱ្យខ្លាំងក្លា ដើម្បីដណ្ដើមយកជ័យជំនះ។លើកឡើងដូចគ្នាផងដែរ តារាចម្រៀង លោក ខេម បានបង្ហាញក្ដីរំភើបរីករាយជាខ្លាំង ដែល​ក្រុម​របស់​លោក នឹងមានវត្តមានចូលរួមប្រកួតប្រជែង អបអរសាទរដល់ទាវាសន្តិភាពនៅកម្ពុជា។ ភ្ជាប់​ជា​មួយ​ក្ដីរំភើបរីករាយ ក្រុមបាល់ទាត់Cambodia Football Super Star ក៏នឹងប្រឹង​ប្រែង​ហ្វឹក​ហាត់ ដើម្បីប្រកួតយកជ័យជម្នះផងដែរ។ទិវាសន្តិភាពនៅកម្ពុជា ជាទិវាថ្មីសម្រាប់កម្ពុជា ដោយកំណត់យករៀងរាល់ថ្ងៃទី ២៩ ខែធ្នូ។ ឆ្នាំ ២០២៤​នេះ ជាឆ្នាំដំបូងដែលកម្ពុជារៀបចំឡើង។ ទិវានេះ ក៏ត្រូវបានរាជរដ្ឋាភិបាល កំណត់ជា​ថ្ងៃ​ឈប់​សម្រាក​សាធារណៈផងដែរ៕ អត្ថបទ៖ គឹមហុក

អបអរសាទរ! ព្រះខ័នរាជស្វាយរៀងកក់កៅអីវគ្គ៨ក្រុមចុងក្រោយ នៃពាន AFC Challenge League 2024/25 ក្រោយឈ្នះម្ចាស់ផ្ទះ SP Falcons ដោយលទ្ធផល ២-១

2024/10/30 11:16:03 pm        1820
Facebook Telegram Linkin
អបអរសាទរ! ក្រុមព្រះខ័នរាជស្វាយរៀង របស់កម្ពុជា បានកក់កៅអីវគ្គ ៨ក្រុមចុងក្រោយ នៃពានរង្វាន់ AFC Challenge League 2024/25 (តំបន់អាស៊ីខាងកើត) ពូលE ក្រោយយកឈ្នះក្រុមម្ចាស់ផ្ទះ SP Falcons របស់ម៉ុងហ្គោលី ដោយលទ្ធផល ២-១ នៅរសៀលថ្ងៃទី៣០ ខែតុលានេះ។ ការប្រកួតក្រោមសីតុណ្ហភាព 8°C នេះ វគ្គទី១ ព្រះខ័នរាជស្វាយរៀង បាននាំ ១គ្រាប់មុន តាមរយៈការទាត់បាល់ពិន័យ ១១ម៉ែត្រពីខ្សែប្រយុទ្ធ Pablo នៅនាទី២៥ មុនកីឡាករ Musatkin រកបានគ្រាប់តាមស្មើឲ្យក្រុមម្ចាស់ផ្ទះ នៅនាទី៦៧ ។ ប៉ុន្ដែនៅចុងម៉ោង Cristian Dos Santos បន្ថែមគ្រាប់នាំមុខជាថ្មី ឲ្យក្រុមជើងឯកលីគកំពូលកម្ពុជា តាមរយៈការទាត់បាល់ពិន័យ ១១ម៉ែត្រ នៅនាទី៨០ ហើយក៏ជាគ្រាប់ជ័យជម្នះផងដែរ។ យ៉ាងណាមិញ ព្រះខ័នរាជស្វាយរៀង នៅសល់ ១ប្រកួតទៀត ដោយត្រូវជួបក្រុមឥណ្ឌូនេស៊ី Madura United នាថ្ងៃទី២ ខែវិច្ឆិកាខាងមុខ ដើម្បីកំណត់ជោគវាសនារវាង SP Falcons និង Madura United ក្រុមមួយណា នឹងឡើងទៅវគ្គ ៨ក្រុមចុងក្រោយជាមួយខ្លួន ក្នុងពានរង្វាន់ក្លិបបាល់ទាត់លំដាប់ទី៣ ទ្វីបអាស៊ីនេះ?

ពានសម្ដេចតេជោ-ថ្នាក់ខេត្ដ៖ ពូលA-B កាន់តែតានតឹង ក្រោយបញ្ចប់ការប្រកួតសប្ដាហ៍ទី៥

2024/10/30 08:36:58 pm        247
Facebook Telegram Linkin
ការប្រជែងកៅអីវគ្គ ៨ក្រុមចុងក្រោយ នៃពានរង្វាន់សម្ដេចអគ្គមហាសេនាបតីតេជោ ហ៊ុន សែន លើក​ទី១៨ ឆ្នាំ២០២៤/២៥(ថ្នាក់ខេត្ត) កាន់តែមានភាពតានតឹង សម្រាប់ពូលA និងពូលB ក្រោយ​បញ្ចប់ការប្រកួតសន្សំពិន្ទុ សប្ដាហ៍ទី៥ ដោយត្រូវរង់ចាំអ៊ុតលទ្ធផល ១ប្រកួតចុងក្រោយ ដើម្បីកំណត់ជោគវាសនាក្រុមលេខ១ ត្រូវឡើងវគ្គបន្ដ ។សម្រាប់ពូលA បន្ទាប់ពីក្រុមមន្ទីរអប់រំ យុវជន និងកីឡា ខេត្តកំពង់ស្ពឺ បានបន្ដយកឈ្នះក្រុមម្ចាស់ផ្ទះ មន្ទីរអប់រំ យុវជន និងកីឡា ខេត្តកំពង់ឆ្នាំង ដោយលទ្ធផល ២-១ ក្នុងជំនួបជើងទី២ កាលពីថ្ងៃទី២៩ ខែតុលា បានធ្វើឲ្យខេត្តកំពង់ស្ពឺ ឡើងឈរកំពូលតារាងបណ្ដោះអាសន្នជាថ្មី ដោយរកបាន ៦ពិន្ទុស្មើគ្នា ។ ប៉ុន្ដែខេត្តកំពង់ឆ្នាំង បានអស់ការប្រកួតទៅហើយ នៅឡើយខេត្តកំពង់ស្ពឺ ដែលនៅសល់ ១ប្រកួតក្នុងដៃ ត្រូវជួបក្រុមភ្នំពេញហ្គាឡាក់ស៊ី ដែលកំពុងកាន់ ៣ពិន្ទុក្នុងដៃ នាដើមខែវិច្ឆិកាខាងមុខ ។ជាការពិតជំនួបបញ្ចប់ពូលA នេះ កំពង់ស្ពឺត្រូវការត្រឹម ១ពិន្ទុប៉ុណ្ណោះ ដើម្បីធានាកៅអីវគ្គ ៨ក្រុមចុងក្រោយ តែប្រសិនកំពង់ស្ពឺ បន្ដចាញ់ភ្នំពេញហ្គាឡាក់ស៊ី ដូចកាលពីជើងទី១ ក្រុមទាំងបី នឹងត្រូវមាន ៦ពិន្ទុស្មើគ្នា ដែលត្រូវផ្អែកលើប្រវត្តិជួបគ្នា និងផលសងគ្រាប់បាល់ជាដើម ដើម្បីកាត់សេចក្ដីរកក្រុមឡើងវគ្គបន្ដ ។ដោយឡែកពូលB វិញ សមាគមបាល់ទាត់ខេត្តព្រះសីហនុ ក៏បានបញ្ចប់ការប្រកួតរបស់ខ្លួនក្នុងពូល ដោយរកបាន ៧ពិន្ទុ បន្ទាប់ពីប្រកួតកាលពីម្សិលមិញ ស្មើសមាគមកីឡាបាល់ទាត់ខេត្តកែប ១-១ ។ ការចែកគ្នា ១ពិន្ទុម្នាក់នេះ ក៏មិនខុសពីពូល A ដែរ ដ្បិតខេត្តកែប ដែលកំពុងកាន់ ៥ពិន្ទុក្នុងដៃ នៅសល់ ១ប្រកួត ត្រូវជួបក្រុមតាកែវអេហ្វស៊ី នាពេលខាងមុខ ខណៈប្រសិនបើខេត្តកែបឈ្នះ ពួកគេនឹងឡើងឈរកំពូលតារាង ដើម្បីឡើងទៅវគ្គបន្ដ ខណៈបើស្មើ ឬចាញ់ ឱកាសមាសនេះ នឹងបានទៅសមាគមបាល់ទាត់ខេត្តព្រះសីហនុតែម្ដង ។ក្រឡេកទៅចាប់អារម្មណ៍ការប្រកួតចុងក្រោយក្នុងពូលC របស់សមាគមកីឡាបាល់ទាត់ខេត្តស្វាយរៀងវិញ គឺបានទទួល ៣ពិន្ទុបន្ថែមទាំងប្រផិតប្រផើយ ក្រោយយកឈ្នះក្រុមមន្ទីរអប់រំ យុវជន និងកីឡា ខេត្តព្រៃវែង ៧-៦ កាលពីល្ងាចថ្ងៃអង្គារម្សិលមិញ ។ ជ័យជម្នះនេះ នាំឲ្យសមាគមកីឡាបាល់ទាត់ខេត្តស្វាយរៀង រកបាន ១២ពិន្ទុពេញ ក្រោយឈ្នះទាំង ៤ប្រកួតក្នុងពូល គ្រាដែលខេត្ដព្រៃវែង និងខេត្តកណ្ដាល បានអស់ឱកាសដោយស្វ័យប្រវត្តិ មុនជួបគ្នាបង្គ្រប់កិច្ចក្នុងពូល នាថ្ងៃទី០៥ ខែវិច្ឆិកា ឆ្នាំ២០២៤ ខាងមុខ៕ អត្ថបទ លី ឈុនឡា 

ផ្អាកការចេញ-ចូល បំពេញការងារ ហាត់ប្រាណ ការហ្វឹកហាត់ ក្នុងពហុកីឡដ្ឋានជាតិអូឡាំពិក រយៈពេល១១ថ្ងៃ ដើម្បីរៀបចំការប្រកួតកីឡាជាតិ ឆ្នាំ២០២៤

2024/10/29 06:04:48 pm        255
Facebook Telegram Linkin
អគ្គនាយកដ្ឋានកីឡា សូមជម្រាបជូនឯកឧត្តម លោកជំទាវ លោក លោកស្រី បុគ្គលិកក្រោមឱវាទ អគ្គនាយកដ្ឋានកីឡា និងសហព័ន្ធកីឡាជាតិ ដែលកំពុងបំពេញការងារ នៅក្នុងពហុកីឡដ្ឋានជាតិ ក៏ដូចជាមហាជនទាំងអស់ឱ្យបានជ្រាបថា ចាប់ពីថ្ងៃទី២៩ ខែតុលា រហូតដល់ថ្ងៃទី០៨ ខែវិច្ឆិកា ឆ្នាំ២០២៤ នៅក្នុងពហុកីឡដ្ឋានជាតិអូឡាំពិក នឹងត្រូវរៀបចំការប្រកួតកីឡាជាតិលើកទី៤ និងកីឡាជាតិជនពិការលើកទី២ ឆ្នាំ២០២៤។ដើម្បីរក្សាសណ្តាប់ធ្នាប់ របៀបរៀបរាយ និងសុវត្ថិភាពជូនថ្នាក់ដឹកនាំជាន់ខ្ពស់ អគ្គនាយកដ្ឋានកីឡាសូមផ្អាកការ “ចេញ-ចូល” ការធ្វើការ និងការហាត់ប្រាណក្នុងបរិវេណពហុកីឡដ្ឋានជាតិអូឡាំពិក ចំនួន ០២ថ្ងៃគឺនៅថ្ងៃទី៣០ ខែតុលា នឹងមានព្រឹត្តិការណ៍បើកការប្រកួតកីឡាជាតិលើកទី៤ និងកីឡាជាតិជនពិការលើកទី២ ឆ្នាំ២០២៤ និងថ្ងៃទី០៨ ខែវិច្ឆិកា ឆ្នាំ២០២៤ នឹងប្រារព្ធពិធីបិទការប្រកួតកីឡាជាតិឆ្នាំ២០២៤៕

ថ្នាក់ដឹកនាំ និងប្រជាពលរដ្ឋខេត្តស្វាយរៀង សាទរពិធីរត់ភ្លើងគប់កីឡាជាតិ មុនពិធីបើកផ្លូវការ នាថ្ងៃពុធនេះ

2024/10/28 11:42:07 pm        565
Facebook Telegram Linkin
ពិធីរត់ភ្លើងគប់កីឡាជាតិលើកទី៤ និងកីឡាជាតិជនពិការលើកទី២ ឆ្នាំ២០២៤ បានបន្ដ​ដំណើរ​ដល់​ខេត្ត​ស្វាយរៀង ដោយទទួលបានការស្វាគមន៍ និងអបអរសាទរយ៉ាងច្រើនកុះករពីថ្នាក់ដឹកនាំ ប្រជា​ពលរដ្ឋ និងសិស្សានុសិស្ស កាលពីចុងសប្ដាហ៍កន្លងទៅ មុនឈាន​ដល់​ពិធី​បើក​ការ​ប្រកួត​ជា​ផ្លូវ​ការនាថ្ងៃទី៣០ ខែតុលាឆាប់ៗនេះ នៅពហុកីឡដ្ឋានជាតិ(អូឡាំពិក) ក្រោមអធិបតី​ភាព​ដ៏​ខ្ពង់​ខ្ពស់​របស់​សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ។ពិធីរត់ភ្លើងគប់ នៅខេត្តស្វាយរៀងនេះ បានប្រព្រឹត្តទៅក្រោមវត្តមានឯកឧត្តម សាមឺឌី ស៊ីវឌ្ឍនា រដ្ឋ​លេខាធិការក្រសួងអប់រំ យុវជន និងកីឡា, ឯកឧត្តមម៉ែន វិបុល ប្រធានក្រុមប្រឹក្សាខេត្ត និង​ឯកឧត្តម ប៉េង ពោធិសា អភិបាលខេត្តស្វាយរៀង ព្រមទាំងកងកម្លាំង ប្រជាពលរដ្ឋ និង​សិស្សា​នុសិស្ស​ជា​ច្រើន។ថ្លែងនាឱកាសនោះ ឯកឧត្តម ប៉េង ពោធិសា បានថ្លែងអំណរគុណ ចំពោះក្រសួងអប់រំ យុវជន និង​កីឡា ក៏ដូចជារាជរដ្ឋាភិបាល ដែល​បាន​ជ្រើស​រើស​យក​ខេត្តស្វាយរៀង​ធ្វើ​ជា​ម្ចាស់​ផ្ទះ​ក្នុង​ពិធី​រត់​ភ្លើងគប់ និងការប្រកួតកីឡាជាតិលើកទី៤ ដែលជាព្រឹត្តិការណ៍​ដ៏សំខាន់​ថ្មី​បន្ថែម​ទៀត​ដែល​រាជ​រដ្ឋាភិបាល​បានយកចិត្តទុកដាក់លើវិស័យមួយនេះ ស្របពេលខេត្តស្វាយរៀង ក៏បាន​ត្រៀម​កីឡាករ-កីឡាការិនី ១៧០នាក់ ត្រៀមចូលរួមប្រកួតលើ ១៦ប្រភេទកីឡា ក្នុងព្រឹត្តិការណ៍ប្រចាំ ២ឆ្នាំ​ម្ដងនេះផងដែរ ។ទន្ទឹមជាមួយ ឯកឧត្តម សាមឺឌី ស៊ីវឌ្ឍនា ក៏បានសម្ដែងការអបអរសាទរចំពោះរដ្ឋបាលខេត្ត ក្រសួង​មន្ទីរពាក់ព័ន្ធ មន្ត្រីរាជការសិស្សាសិស្ស ពលរដ្ឋ ពិសេសរដ្ឋបាលមូលដ្ឋាន បាន​អញ្ជើញ​ចូលរួម​ និង​ចាត់តាំងរក្សាការពារសន្តិសុខប្រកបដោយស្មារតីទទួលខុសត្រូវ។ ឯកឧត្តមបន្ថែមថា ប្រទេសមានសន្តិភាព និងការអភិវឌ្ឍន៍​គឺ​បាន​កើត​ឡើង​ក្រោម​ការ​ដឹកនាំ​របស់​រាជ​រដ្ឋាភិបាល សម្ដេចមហាបវរធិបតីហ៊ុនម៉ាណែតនាយករដ្ឋមន្ត្រី ក្នុងនោះនៅ​ក្នុង​គោល​នយោបាយ​ជាតិរា​ជរដ្ឋាភិបាលបានយកចិត្តទុកដាក់ពង្រឹង និងពង្រីកធនធាន​មនុស្ស​លើ​គ្រប់​វិស័យ​ដើម្បី​រកគុណភាព បន្តដឹកនាំនិងអភិវឌ្ឍន៍ជាតិដោយផ្សារភ្ជាប់ទៅនឹងវិស័យអប់រំនិងកីឡា ដែល​ជាវិស័យមួយរួមចំណែកធ្វើឱ្យប្រទេសនៅក្នុងពិភពលោកបានស្គាល់ និងបាន​សិក្សា​ពី​ប្រវត្តិសាស្ត្រ នៃ​ប្រទេសកម្ពុជាយើងមិនអាចកាត់ផ្តាច់ផងដែរ ។គួរដឹងថា ក្រោយ​ពិធីរត់ភ្លើងគប់ចេញពីខេត្តកែប ខេត្តព្រះសីហនុ ខេត្តកំពង់ឆ្នាំង និងខេត្ត​ស្វាយរៀង ភ្លើងគប់កីឡាជាតិ នឹងរៀបចំពិធីដង្ហែចុងក្រោយ ចេញ​ពី​កន្លែង​បើក​ការដ្ឋាន​សាង​សង​គម្រោង​ «ព្រែកជីកហ្វូណនតេជោ» ឆ្ពោះទៅពហុកីឡដ្ឋានជាតិ(អូឡាំពិក) នាថ្ងៃទី៣០ ខែតុលា ឆ្នាំ​២០២៤ ដើម្បីប្រារព្ធពិធីបើកការប្រកួតផ្លូវការ នៃព្រឹត្តិការណ៍កីឡាជាតិ លើកទី៤ និង​កីឡា​ជាតិ​ជន​ពិការ លើកទី២ ជាផ្លូវការ ដែលនឹងប្រព្រឹត្ត​ទៅ​ក្រោម​អធិបតី​ភាព​ដ៏ខ្ពង់​ខ្ពស់​របស់​សម្ដេច​បវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា នាថ្ងៃពុធសប្ដាហ៍នេះ៕

​​លីគកំពូល៖ ភ្នំពេញក្រោនបន្ដឈ្នះ ឯគិរីវង់បន្ដចាញ់ ខណៈបឹងកេត និង ISI ស៊ុតគ្នាដូចព្យុះ

2024/10/28 10:33:28 pm        675
Facebook Telegram Linkin
គិតត្រឹមសប្ដាហ៍ទី៩ នៃលីគកំពូលកម្ពុជា ក្រុមភ្នំពេញក្រោន បានរក្សាតំណែងក្រុមតែមួយគត់ ដែល​មិនទាន់ស្គាល់ចាញ់ ផ្ទុយពីក្រុមគិរីវង់សុខសែនជ័យ ដែលបានបញ្ចប់ភារកិច្ចក្នុងជុំទី១ មុន​គេ ដោយមិនទាន់ស្គាល់ជ័យជម្នះម្ដងឡើយ ខណៈជំនួបរវាងក្រុមម្ចាស់ផ្ទះ ISI ដង្កោសែនជ័យ និង​បឹងកេត មានគ្រាប់បាល់កើតឡើង ៨គ្រាប់ ស្ទើរមិនគួរឲ្យជឿ ក្នុងជំនួប​ដ៏​កក្រើក​នៅ​កីឡដ្ឋាន AIA, KMH Park កាលពីរាត្រីថ្ងៃអាទិត្យកន្លងទៅ។សម្រាប់ក្រុម​ភ្នំពេញក្រោន គឺបានយកឈ្នះក្រុមអង្គរថាយហ្គឺរ ៣-១ នៅកីឡដ្ឋាន Smart RSN ។ ជំនួប​តានតឹងនេះ កីឡាករ Gayoso បានរកគ្រាប់បាល់នាំមុខឲ្យក្រុមម្ចាស់ផ្ទះ ១គ្រាប់មុន បន្ទាប់​ពី​ចាប់​ផ្ដើមលេងបាន ៣នាទី តែត្រូវបានអង្គរថាយហ្គឺរ តាមស្មើវិញ ត្រឹមនាទី១១ ដែលរក​បាន​ដោយ​កីឡាករ Da Silva Feritas Joao Pedro ។ ប៉ុន្ដែប្រមាណ ១០នាទីក្រោយ​មក​ខ្សែ​ប្រយុទ្ធ​សញ្ជាតិ​ហ្វីលីពីន Gayoso ក៏រកបានគ្រាប់នាំមុខជាថ្មី នៅនាទី២១ រហូតដល់ចប់វគ្គទី១ ។ចូល​វគ្គទី២ ការប្រកួតកាន់តែជក់ចិត្ត បន្ទាប់ពីការវាយសម្រុកគ្នាកាន់តែខ្លាំង តែអង្គរថាយហ្គឺរ មិន​អាច​ទម្លាយរបាំងការពារក្រុមម្ចាស់ផ្ទះបានទៀតឡើយ ផ្ទុយទៅវិញ ភ្នំពេញក្រោន ក៏រកបាន ១គ្រាប់​បន្ថែម ដោយកីឡាករ Yudia Ogawa នៅនាទី៧៩ ហើយបាន​រក្សា​ដល់​ចប់​ការ​ប្រកួត​ពេញ​ម៉ោង ដោយក្រុមសិង្ហក្រហម បានយកឈ្នះក្រុមខ្លាទឹកក្រូច ៣-១ តែម្ដង ។ ជ័យជម្នះនេះ នាំ​ឲ្យ​ភ្នំពេញក្រោន បន្ដឈរកំពូលតារាង ដោយរកបាន ២៧ពិន្ទុពេញ ក្រោយឈ្នះ ៩ប្រកួត​ជាប់​គ្នា គ្រាដែលអង្គរថាយហ្គឺរ បានធ្លាក់មកឈរលេខ៤ ដោយរក្សា ១៦ពិន្ទុក្នុងដៃ ក្រោយឆ្លងកាត់ ៩​ប្រកួត​ឈ្នះ ៥ ស្មើ ១ និងចាញ់ ៣ ។ចំណែក​ក្រុម​គិរីវង់សុខសែនជ័យវិញ បានបន្ដបរាជ័យ​ក្រោម​ថ្វី​ជើង​ក្រុម​ភ្ញៀវ​​កង​យោធពល​ខេមរភូមិន្ទ ៧-១ ។ ១គ្រាប់របស់ក្រុមម្ចាស់ផ្ទះ រកបានដោយកីឡាករ Neville Mbanwei Tengeg នៅនាទី៤៥+៥ បន្ទាប់ពីត្រូវក្រុមភ្ញៀវបើកការនាំមុខ ៥គ្រាប់មុន ។ អ្វីដែល​ពិសេស​គឺ​ត្រឹម ១០នាទី កីឡាករ Josemar រកបាន ៤គ្រាប់ម្នាក់ឯងឲ្យកងយោធពលខេមរភូមិន្ទ មុន​ក្រុម​ពួក​គេ​បន្ថែម ២គ្រាប់ទៀត នៅវគ្គទី២ ដោយកីឡាករ Tetsuaki Misawa នៅចុងម៉ោង ។ការ​បរាជ័យនេះ នាំឲ្យគិរីវង់សុខសែនជ័យ គឺក្រុមដែលបញ្ចប់ការប្រកួតជុំទី១ មុនគេ ដោយ​មិន​ស្គាល់​ជ័យ​ជម្នះសោះ ក្នុងចំណោម ១០ប្រកួតស្មើ ១ និងចាញ់ ៩ ស្របពេល​កង​យោធពល​ខេមរភូមិន្ទ បន្ដឈឬលេខ៨ និងរកបាន ១០ពិន្ទុ ជាមួយលទ្ធផល ៩ប្រកួតឈ្នះ ៣ ស្មើ ១ និង​ចាញ់ ៥ ។ដោយឡែកជំនួបដ៏កក្រើកតំបន់វេងស្រេង រវាងម្ចាស់ផ្ទះ ISI ដង្កោសែនជ័យ និងបឹងកេត បាន​បញ្ចប់​ដោយ​ភាពតានតឹង បន្ទាប់ពីបឹងកេត បើកការនាំមុខ ២គ្រាប់មុន ដោយ​កីឡាករ​ Golubovic Stefan នៅនាទីទី៤ និងកីឡាករ Yoshihama Ryohei​ នៅ​នាទី​២៣ ​ISI​ ក៏​តាម​ស្មើ​វិញ​ ត្រឹមនាទី៤៨ ដែលធ្វើសម្រេច ២គ្រាប់ដោយកីឡាករ ហាវ សុខនេត្រ ។បន្ទាប់​មកខ្សែប្រយុទ្ធ ម៉ាត់ នូរុណ រកបានគ្រាប់នាំមុខជាថ្មីឲ្យក្រុមនាគខៀវ នៅនាទី៦៣ តែមិន​ទាន់​បាន ៣នាទីស្រួលបួលផង ISI ក៏តាមស្មើវិញ ដោយកីឡាករ Louis Willy នៅនាទី៦៧ ខណៈ​ ២នាទីក្រោយមកកីឡាករជប៉ុន Yoshihama Ryohei ​ក៏រក​បាន​គ្រាប់​នាំ​មុខ​ឲ្យ​បឹង​កេត​ម្ដង​ទៀត ​នៅនាទី៦៩ ។ ក្រោយវាយសម្រុកគ្នាទៅវិញទៅមក នៅចុងម៉ោងកីឡាករ Louis Willy ​ក៏រកបានគ្រាប់តាមស្មើឲ្យក្រុមដំរីជ័យ នៅនាទី៩០ ហើយលទ្ធផលនេះ ក៏បាន​រក្សា​ដល់​ចប់​ការ​ប្រកួត​ពេញ​ម៉ោង ។ការចែកគ្នា ១ពិន្ទុម្នាក់នេះ ធ្វើឲ្យបឹងកេត បន្ដឈរលេខ៦ និងមាន ១៤ពិន្ទុ ក្រោយឆ្លងកាត់ ៨​ប្រកួ​ត​ឈ្នះ ៤ ស្មើ ២ និងចាញ់ ២ នាំមុខ ISI ដង្កោសែនជ័យ ដែលឆ្លងកាត់ ៩ប្រកួតឈ្នះ ៣ ស្មើ ២ និងចាញ់ ៤ រកបាន ១១ពិន្ទុ ។ដោយឡែកជំនួបសប្ដាហ៍ទី៩ មួយគូទៀតវិញ គឺក្រុមណាហ្គាវើលដ៏ បានយក​ឈ្នះ​ក្រុម​ភ្ញៀវ​សមាគម​កីឡា​បាល់ទាត់ក្រសួងមហាផ្ទៃ ៥-២ នៅកីឡដ្ឋានខេត្តកំពង់ស្ពឺ ។ ជ័យជម្នះនេះ ធ្វើ​ឲ្យ​ណាហ្គា​​វើលដ៏ ឡើងទៅឈរលេខ៣ បណ្ដោះអាសន្ន ដោយរកបាន ១៨ពិន្ទុពីការប្រកួត ៩លើក​ឈ្នះ ៦ និងចាញ់ ៣ គ្រាដែលក្រសួងមហាផ្ទៃ បន្ដឈរលេខ៩ និងរក្សា ៤ពិន្ទុក្នុងដៃ ក្រោយ​ឆ្លង​កាត់ ​៩ប្រកួតឈ្នះ ១ ស្មើ ១ និងចាញ់ ៧ប្រកួត៕ អត្ថបទ លី ឈុនឡា 

AFC U17៖ កម្ពុជាអស់ឱកាស ខណៈអាហ្វហ្គានីស្ថាន បានឡើងជុំផ្ដាច់ព្រ័ត្រ ក្រោយវាយបក​ឈ្នះបង់ក្លាដេស

2024/10/28 09:23:00 pm        220
Facebook Telegram Linkin
ក្រុមជម្រើសជាតិអាយុក្រោម ១៧ឆ្នាំកម្ពុជា បានត្រឹមលេខ៤ ក្នុងពូលប៉ុណ្ណោះ ក្រោយ​បរាជ័យ​ទល់​នឹងក្រុមជម្រើសជាតិ U17 ហ្វីលីពីន ក្នុងជំនួបបញ្ចប់​ពូលB នៃ​ការ​ប្រកួត​ជម្រុះ​ជើង​ឯក​យុវជន​អាយុ​ក្រោម ១៧ឆ្នាំទ្វីបអាស៊ី(AFC U17 Asian Cup) ឆ្នាំ២០២៥ ស្របពេល​ក្រុម​យុវជន U17 អាហ្វហ្គានីស្ថាន គឺជាក្រុមតែមួយគត់ បានឡើងវគ្គ ១៦ក្រុមចុងក្រោយ ក្នុងពូល​ដែល​កម្ពុជា​ធ្វើជាម្ចាស់ផ្ទះ ។សម្រាប់ការប្រកួតបញ្ចប់ពូលB កាលពីរាត្រីថ្ងៃទី២៧ ខែតុលា ក្រុមគោព្រៃជំទង់កម្ពុជា ហាក់ធ្វើ​មិន​​បាន​ល្អប្រសើរឡើយ បន្ទាប់ពីរបូតគ្រាប់បាល់ដ៏លឿន ត្រឹម ៤នាទី ក្រោយចាប់ផ្ដើមការប្រកួត ដែល​ធ្វើសម្រេចដោយកីឡាករ Spencer Webster ។ បន្ទាប់​មក​សមាជិក​ក្រុម ​U17​ ហ្វីលីពីន​ដដែល ក៏បានបន្ថែមគ្រាប់ទី២ នៅនាទី៤៣ ដើម្បីនាំមុខម្ចាស់ផ្ទះ ២-០ នៅវគ្គទី១ ហើយ​លទ្ធផល​នេះ ក៏បានរក្សាដល់ចប់ការប្រកួតពេញម៉ោង ។បរាជ័យនេះ នាំឲ្យក្រុមជម្រើសជាតិ U17 កម្ពុជា បានត្រឹមឈរលេខ៤ ក្នុងពូល ដោយរកបាន ៦ពិន្ទុ ស្មើក្រុមបង់ក្លាដេស និងហ្វីលីពីន បន្ទាប់ពីឆ្លងកាត់ ៤ប្រកួតឈ្នះ ២ និងចាញ់ ២ប្រកួត​ដូចៗ​គ្នា។ដោយឡែកក្រុមជម្រើសជាតិ U17 អាហ្វហ្គានីស្ថានវិញ បន្ទាប់ពីត្រូវក្រុមយុវជន U17 បង់ក្លាដេស បើក​ការនាំមុខម្ដងជាពីរដង នៅកីឡដ្ឋានព្រីនស៍ ពួកគេក៏ព្យាយាមវាយបកវិញ រហូតយក​ឈ្នះ​ក្នុង​លទ្ធផល ​៣-២ ដើម្បីរក្សាកំណត់ត្រាឈ្នះ ៤ប្រកួតជាប់ៗគ្នា និងរកបាន ១២ពិន្ទុពេញ ឈរ​កំពូល​តារាង​ពូលB ហើយក៏ជាក្រុមតែមួយគត់ក្នុងពូល ដែលបានឡើងទៅជុំផ្ដាច់ព្រ័ត្រ នាឆ្នាំ​២០២៥ ផងដែរ ។ក្រោយ​បញ្ចប់ការប្រកួតជម្រុះតាមពូលនីមួយៗ ផងដែរ សម្រាប់ក្រុមដែលបានកក់កៅអីវគ្គ ១៦​ក្រុម​ចុង​ក្រោយ ក្រៅពីម្ចាស់ផ្ទះអារ៉ាប៊ីសាអូឌីត ចំពោះក្រុមលេខ១ ប្រចាំពូលទាំង ១០ ពីពូល​A ​ដល់​ពូល​J រួមមានក្រុមជម្រើសជាតិ U17 កូរ៉េខាងជើង អាហ្វហ្កានីស្ថាន កូរ៉េខាងត្បូង ថៃ អ៊ូសបេគីស្ថាន ជប៉ុន អូស្ត្រាលី អេមីរ៉ាត់អារ៉ាប់រួម យេម៉ែន និងតាហ្ស៊ីគីស្ថាន ។ រីឯក្រុមលេខ២ ល្អ​ជាង​គេ​ទាំង ៥ក្រុម ដែលឡើងបង្គ្រប់កៅអីជុំផ្ដាច់ព្រ័ត្រនេះ រួមមានក្រុមជម្រើសជាតិ U17 ចិន វៀតណាម ឥណ្ឌូណេស៊ី អូម៉ង់ និងអ៊ីរ៉ង់។សម្រាប់​ការប្រកួតវគ្គ ១៦ក្រុមចុងក្រោយ នៃព្រឹត្តិការណ៍ជើងឯកយុវជន U17 ទ្វីបអាស៊ីនេះ គ្រោងនឹង​ធ្វើ​ការ​ប្រកួតពីថ្ងៃទី០៣ ដល់ថ្ងៃទី២០ ខែមេសា ឆ្នាំ២០២៥ ខាងមុខ៕ អត្ថបទ លី ឈុនឡា

ព្រះខ័នរាជស្វាយរៀងចេញទៅប្រកួតពានក្លឹបលំដាប់ទីបីអាស៊ីនៅម៉ុងហ្គោលី ជាក្តីសង្ឃឹមខ្ពស់

2024/10/28 04:40:32 pm        285
Facebook Telegram Linkin
ជើងឯកកម្ពុជាព្រះខ័នរាជស្វាយរៀង រំលងអធ្រាត្រចូលថ្ងៃទី២៨ ខែតុលា ឆ្នាំ២០២៤នេះ បាន​ចាក​ចេញ​ទៅកាន់ទីក្រុងអ៊ូឡង់បាទ័រ ប្រទេសម៉ុងហ្គោលី ចូលរួមការប្រកួត​ជើង​ឯក​ក្លឹប​លំដាប់​ទី​បី​ទ្វីបអាស៊ី ២០២៤/២០២៤ (AFC Challenge League)។នៅអាកាសយានដ្ឋានអន្តរជាតិភ្នំពេញ លោកJosep Munoz គ្រូបង្វឹកព្រះខ័នរាជស្វាយរៀង ប្រាប់​ឱ្យដឹងថានេះជាបទពិសោធន៍ថ្មីសម្រាប់ក្លឹបដែលចូលរួមការប្រកួតនេះ ហើយពីរ​ក្រុម​ឡើង​ទៅ​វគ្គ​បន្ទាប់។ ចំពោះមុខត្រូវលេងឱ្យល្អជាមួយក្លឹប Madura United និងSP Falcons ដែល​សុទ្ធ​សឹង​ជា​ក្រុមល្អៗ ហើយត្រូវតេស្តខ្លួនឯងជាមួយការប្រកួតថ្មីនេះ។ ទាក់ទងនឹងគូប្រកួតទាំងពីររបស់ខ្លួន គ្រូបង្វឹកដដែលបន្តទៀតថាយើងបានមើលការប្រកួត និង​មាន​ក្រុម​ការងារវិភាគការប្រកួតនេះ។ ក្រុមទាំងពីរលេងខ្លាំង ជាពិសេសកីឡាករម៉ុងហ្គោលី ហ៊ា​ន​លេង​ច្រើន​ជាង ក្លាហានពេលលេងប្រយុទ្ធ។ ជារួមក្រុម Falcons លេងល្អជាង។អ្វីដែល​ត្រូវធ្វើពេលមកដល់ប្រទេសម៉ុងហ្គោលី គ្រូបង្វឹកសញ្ជាតិអេស្ប៉ាញរូបនេះបានបង្ហាញថា សម្រាប់​ផែនការគឺឱ្យកីឡាករប្រមូលកម្លាំងមកវិញ ដោយសារនេះជាការធ្វើដំណើរផ្លូវឆ្ងាយ ហើយ​យើង​ត្រូវតែលេងឱ្យខ្លាំងដូចក្រុមទាំងពីរលេងដូចគ្នា។ព្រះខ័នរាជ​ស្វាយរៀងបើកការប្រកួតក្នុងពូល E តំបន់អាស៊ីខាងកើត ដោយត្រូវជួបម្ចាស់ផ្ទះ SP Falcons ថ្ងៃទី៣០ ខែតុលា ឆ្នាំ២០២៤ វេលាម៉ោង២និង០០នាទីរសៀល។ ពីរថ្ងៃបន្ទាប់ ជើង​ឯកកម្ពុជា ត្រូវជួបក្លឹបឥណ្ឌូណេស៊ី Madura United។លោក Josep Munoz បន្ថែមដែរថាមុនការប្រកួតមកដល់គ្មានបញ្ហារបួសកីឡាករនោះទេ ពោល​ទាំង​២៨នាក់មានវត្តមាននៅម៉ុងហ្គោលី។ ហើយយើងព្យាយាម​ធ្វើ​ឱ្យ​បាន​ល្អ​ទាំង​ពីរ​ប្រកួត​នេះ​ជាមួយ​ក្តីរំពឹងឡើងវគ្គបន្ទាប់។AFC Challenge League ជាការប្រកួតបាល់​ទាត់​ជើង​ឯក​សម្រាប់​ក្លឹប​លំដាប់​ទី៣​នៅ​ទ្វីប​អាស៊ី​ដែល​រៀបចំ​ដោយសហព័ន្ធកីឡាបាល់ទាត់អាស៊ី (AFC) ហើយម្ចាស់ជើងឯកមានកៅអីទៅលេង AFC League Twoវគ្គចែកពូលរដូវកាលបន្ទាប់។ជើង​ឯកក្លឹបលំដាប់ទីបីនេះ អាស៊ីខាងលិចមាន១២ក្រុមចូលរួម ចែកជា​បី​ពូល​មួយ​ពូល​មាន​បួន​ក្រុម ក្រុមលេខ១ក្នុងពូលទាំងបីចំនួន៣ក្រុម និងលេខ២​ល្អ​បំផុត​មួយ​ក្រុម​ឡើង​ទៅ​វគ្គ​៨​ក្រុម​ចុង​ក្រោយ​។ ចំនែកអាស៊ីខាងកើតមាន៦ក្លឹបចូលរួម ចែកជាពីរពូលមួយពូលមានបីក្រុម ហើយ​លេខ​១ និង​លេខ២ឡើងទៅវគ្គ៨ក្រុមចុងក្រោយជាមួយអាស៊ីខាងលិច ដែលត្រូវលេងនៅខែមីនា ឆ្នាំ​២០២៥។ វគ្គពាក់កណ្តាលផ្តាច់ព្រ័ត្រលេងនៅខែមេសា និងវគ្គផ្តាច់ព្រ័ត្រលេងនៅខែឧសភា ឆ្នាំ២០២៥៕

ពានសម្ដេចតេជោ-ថ្នាក់ខេត្ត៖ សៀមរាប កក់កៅអីវគ្គ ១/៤ ខណៈក្រុមបងប្អូន បានត្រឹម​ស្មើគ្នាក្នុងជំនួបបង្គ្រប់ជុំទី១

2024/10/23 10:33:49 pm        974
Facebook Telegram Linkin
ការប្រកួតបាល់ទាត់ដណ្ដើមពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៨ ឆ្នាំ២០២៤/២៥ (ថ្នាក់ខេត្ត) បានរកឃើញបេក្ខភាពឡើងវគ្គ ៨ក្រុមចុងក្រោយ(១/៤) មួយក្រុមទៀតហើយ គឺក្រុមបាល់ទាត់ឡាយអ៊ិនឃីង ខេត្តសៀមរាប ស្របពេលក្រុមឈើតុំខេត្តពោធិ៍សាត់ ត្រូវការ ១ពិន្ទុទៀត ដើម្បីធានកៅអីវគ្គបន្ដ ។ រីឯជំនួបបង្គ្រប់ជុំទី១ រវាងក្រុមមន្ទីរអប់រំ យុវជន និងកីឡា ខេត្តកំពង់ចាម និងខេត្តត្បូងឃ្មុំ ដែលត្រូវបានចាត់ទុកជាជំនួបបងប្អូន បានបញ្ចប់ដោយលទ្ធផលស្មើគ្នា ១-១ ។សម្រាប់ក្រុមឡាយអ៊ិនឃីង ខេត្តសៀមរាប បានបន្ដយកឈ្នះខេត្តឧត្ដរមានជ័យ លើទឹកដីខ្លួន ក្នុងលទ្ធផល ៨-០ បន្ទាប់ពីយកឈ្នះ ៦-០ ក្រៅដី កាលពីជើងទី១ ។ គ្រាប់បាល់ជ័យជម្នះរបស់ក្រុមតំណាងខេត្តសៀមរាបនេះ ធ្វើសម្រេចដោយកីឡាករ Omokafe ៤គ្រាប់, អៀម ភិរម្យ ២គ្រាប់ និងកីឡាករ ហ៊ន សុផានិត និង គា ម៉េងហ័ង រកបានម្នាក់ ១គ្រាប់ ដែលនាំឲ្យក្រុមឡាយអ៊ិនឃីង ខេត្តសៀមរាប រកបាន ៩ពិន្ទុពេញ ឈរកំពូលតារាងពូល E ក្រោយឈ្នះ ៣ប្រកួតជាប់ៗគ្នា ហើយបានក្លាយជាក្រុមទី២ ដែលបានកក់កៅអីវគ្គ ៨ក្រុមចុងក្រោយ បន្ទាប់ពីសមាគមបាល់ទាត់ខេត្តស្វាយរៀង ។ចំណែកក្រុមបាល់ទាត់ឈើតុំខេត្ដពោធិ៍សាត់វិញ បានបន្ដយកឈ្នះក្រុមប៉ៃលិនស៊ីធី ក្នុងលទ្ធផលដ៏តានតឹង ១-០ លើទឹកដីខ្លួន បន្ទាប់ពីយកឈ្នះ ៣-០ ក្រៅដី កាលពីជើងទី១ ។ គ្រាប់បាល់ជ័យជម្នះ ដែលជួយឲ្យក្រុមឈើតុំខេត្តពោធិ៍សាត់ ទទួលបាន ៣ពិន្ទុបន្ថែម ធ្វើសម្រេចដោយកីឡាករ ភាព មិថុនា នៅនាទី៨៧ ។ ជ័យជម្នះនេះ នាំឲ្យក្រុមតំណាងខេត្តពោធិ៍សាត់ដដែល បន្ដឈរកំពូលតារាងD ដោយរកបាន ៧ពិន្ទុ នាំមុខប៉ៃលិនស៊ីធី ដែលទើបរកបាន ៣ពិន្ទុ និងសល់ ១ប្រកួតក្នុងដៃដូចគ្នា ។ ការណ៍នេះ ក្រុមឈើតុំពោធិ៍សាត់ គឺមានសង្ឃឹមខ្ពស់ឡើងទៅវគ្គបន្ដ ។ តែយ៉ាងណាក៏ត្រូវចាំអ៊ុតលទ្ធផល ២ប្រកួតចុងក្រោយរបស់ខេត្តបាត់ដំបងសិនឌេរ ។ក្រឡេកទៅចាប់អារម្មណ៍ជំនួបបង្គ្រប់ជុំទី១ ក្នុងពូល G រវាងក្រុមម្ចាស់ផ្ទះមន្ទីរអប់រំ យុវជន និងកីឡា ខេត្តកំពង់ចាម និងក្រុមមន្ទីរអប់រំ យុវជន និងកីឡា ខេត្តត្បូងឃ្មុំ គឺបានត្រឹមចែកគ្នា ១ពិន្ទុម្នាក់ ។ ជំនួបដ៏ជក់ចិត្ត រវាងក្រុមក្បែខាងគ្នានេះ ត្បូងឃ្មុំ បានស៊ុតគ្រាប់នាំមុខម្ចាស់ផ្ទះ ១គ្រាប់មុន នៅនាទីទី១០ ដោយកីឡាករ សារី តៃម៉ូ តែមិនបាន ២នាទីស្រួលបួលផង កីឡាករ អេម ផលនិត ក៏រកបានគ្រាប់តាមស្មើឲ្យខេត្តកំពង់ចាមវិញ នៅនាទី១២ ហើយលទ្ធផលនេះ ក៏បានរក្សាដល់ចប់ការប្រកួតពេញម៉ោង គ្មានក្រុមណាអាចរកគ្រាប់បាល់បន្ថែមទៀតឡើយ ។ ការចែកគ្នា ១ពិន្ទុម្នាក់នេះ នាំឲ្យក្រុមមន្ទីរអប់រំ យុវជន និងកីឡា ខេត្តត្បូងឃ្មុំ បន្ដឈរកំពូលតារាង ខណៈខេត្តកំពង់ចាម ឈរលេខ២ ដោយរកបាន ៤ពិន្ទុស្មើគ្នា៕ អត្ថបទ លី ឈុនឡា  

កីឡាករវ័យក្មេងកម្ពុជា ២៣នាក់ ត្រូវបានជ្រើសរើសហ្វឹកហាត់ជាមួយគ្រូបង្វឹក Spur នៅថៃ

2024/10/22 11:46:16 pm        661
Facebook Telegram Linkin
កីឡាករយុវជនកម្ពុជា ២៣នាក់ ត្រូវបានជ្រើសរើសហ្វឹកហាត់ នៅកោះសាមុយ ប្រទេសថៃ ជាមួយគ្រូបង្វឹកមកពីក្លិប Tottenham Hotspur រយៈពេល ៦ខែ ក្រោមកម្មវិធីបាល់ទាត់ AIA-Spurs Elite Football Camp  តាមរយៈក្រុមហ៊ុន អេ អាយ អេ ខេមបូឌា ដែលផ្តោតលើការបណ្តុះគំនិត និងសុខមាលភាពកុមារឲ្យមានសុខភាពល្អ តាមរយៈកីឡា និងការអភិវឌ្ឍទៅកាន់ជើងឯកនាពេលអនាគត ។កម្មវិធីនេះ បានចាប់ផ្ដើមដំណើរការកោះសាមុយ កាលពីខែកញ្ញាកន្លងទៅ ខណៈមានកុមារ និងយុវជនកម្ពុជាចំនួន ២៣នាក់ ដែលមានទេពកោសល្យ ត្រូវបានសម្រិតសម្រាំងចេញពីកីឡាករសរុបចំនួន ១,៤៨២នាក់ពីកម្មវិធី AIA-Spurs ដើម្បីទទួលបានឱកាសហ្វឹកហាត់រយៈពេល ៦ខែ ។ ចំពោះវគ្គបណ្ដុះបណ្ដាលបាល់ទាត់ AIA-Spurs Elite Football Camp គឺមានរយៈពេល ៥ថ្ងៃ ដែលសម្របសម្រួល និងបង្វឹកផ្ទាល់ដោយគ្រូបង្វឹកមកពីក្លិបក្របខណ្ឌលីគកំពូលអង់គ្លេស ។កំឡុងពេលហ្វឹកហាត់នោះដែរ គ្រូបង្វឹកកម្រិតខ្ពស់មកពី Spurs លោក Shannon Moloney, Lily Javis និង Josh Tilley បានផ្តល់ឲ្យកុមារទាំងអស់ ចាប់យកសមត្ថភាពចាំបាច់ ដើម្បីក្លាយជាកីឡាករលំដាប់ពិភពលោក ចែករំលែកការយល់ដឹង បទពិសោធន៍ និងគន្លឹះស្ថាបនាដែលជាទុនដើម្បីក្លាយជាកីឡាករអាជីព ដែលរួមផ្សំលើការកសាងទំនុកចិត្ត ភាពអំណត់អត់ធន់ ការប្តេជ្ញាចិត្ត និងការអភិវឌ្ឍជំនាញទំនាក់ទំនងសង្គមជាដើម ។បន្ថែមពីលើជំនាញផ្នែកបាល់ទាត់ កីឡាករវ័យក្មេងរបស់កម្ពុជាទាំងអស់ ក៏ទទួលបានវគ្គសិក្សាលើអត្ថប្រយោជន៍នៃអាហារូបត្ថម្ភ សុខភាពផ្លូវចិត្ត  ការស្រលាញ់និងថែរក្សាបរិស្ថាន និងកត្តាចាំបាច់ផ្សេងៗទៀតដែលជាគ្រឹះទទួលបានសុខភាពល្អ ដើម្បីត្រៀមខ្លួនក្លាយជាកីឡាករអាជីពជាពេលអនាគតផងដែរ ។ទន្ទឹមជាមួយការបង្កើតកម្មវិធីនេះដែរ អាណាព្យាបាលរបស់កីឡាករវ័យក្មេងកម្ពុជាទាំងអស់ បានសម្ដែងក្ដីរីករាយ ដែលបានរៀបចំវគ្គបណ្ដុះបណ្ដាលដ៏មានសារៈសំខាន់ ជំរុញឲ្យកូនៗខ្លួន មិនត្រឹមមានសុខភាពល្អ ថែមទាំងមានទំនួលខុសត្រូវជាងមុន មានភាពក្លាហាន មានទំនុកចិត្ត និងរាង្គកាយស្វាហាប់ជាងមុនទៀតផង ។គួរដឹងថា ក្រោយទទួលបានជោគជ័យ និងការគាំទ្រចំពោះវគ្គបណ្ដុះបណ្ដាលនេះ អេ អាយ អេ នឹងពាំនាំកម្មវិធី “AIA-Spurs បាល់ទាត់ដើម្បីសុខភាពកុមារ-ជើងឯកអង្គរ” ទៅកាន់ទឹកដីខេត្តសៀមរាប ក្រោមការរៀបចំជាមួយក្លិបបាល់ទាត់ Tottenham Hotspur សម្រាប់ផ្តល់នូវបទពិសោធន៍បាល់ទាត់តាមក្បូនខ្នាតអន្តរជាតិដល់កុមារអាយុពីចាប់ពី ៥ឆ្នាំ ដល់ ១៤ឆ្នាំ នាថ្ងៃទី០៣ ខែវិច្ឆិកា ឆ្នាំ២០២៤ ខាងមុខ ។ ដូច្នេះសម្រាប់អាណាព្យាបាលដែលចាប់អារម្មណ៍ គឺអាចចុះឈ្មោះចូលរួមបានដោយឥតគិតថ្លៃ រហូតដល់ថ្ងៃទី៣១ ខែតុលាខាងមុខ៕ អត្ថបទ លី ឈុនឡា

បណ្ដាញសង្គម

ព័ត៌មានថ្មីៗ

លោក Trump ប្រាប់​ពីកិច្ចចរចា «ល្អ» ជាមួយ​អ៊ីរ៉ង់ និងបញ្ជាក់ជាថ្មីពីការគំរាមវាយប្រហារគោលដៅនានា
07/28/2026 08:07 PM
Facebook Telegram Linkin
ក្រុម​គ្រួសារអ្នកដំណើរនៃ​ជើងហោះហើរ MH370 ចង់បានការពិត ខណៈតុលាការចិនបើក​សវនា​ការ​បណ្តឹងឧទ្ធរណ៍
07/28/2026 08:07 PM
Facebook Telegram Linkin
ជប៉ុនស្នើឱ្យអ៊ីរ៉ង់អនុវត្ត «ភាពបត់បែនជា​អតិ​បរិមា​» ដើម្បី​បន្ថយភាពតានតឹងនៅមជ្ឈិមបូព៌ាឱ្យបានឆាប់
07/28/2026 08:07 PM
Facebook Telegram Linkin
រដ្ឋមន្ត្រីការពារជាតិអ៊ីស្រាអែល៖ យន្តហោះចម្បាំងអាមេរិកហោះចេញពីអ៊ីស្រាអែលទៅ​វាយប្រហារអ៊ីរ៉ង់
07/28/2026 08:07 PM
Facebook Telegram Linkin
អ៊ូហ្គង់ដាប្រកាសគ្មានជំងឺអេបូឡា បន្ទាប់ពី​អ្នក​ជំងឺ​ចុង​ក្រោយចេញពី​មន្ទីរពេទ្យ
07/28/2026 08:07 PM
Facebook Telegram Linkin
ក្រុមអ្នកសង្កេតការណ៍អាស៊ានប្រចាំប្រទេសកម្ពុជា និង ប្រធានបេសកកម្មក្រុមអ្នកសង្កេតការណ៍អាស៊ាន (HOM AOT) ហ្វីលីពីនប្រចាំកម្ពុជា ធ្វើបទបង្ហាញ ​«ស្តីពីវឌ្ឍនភាពនៃការងារខណ្ឌសីមា និងបោះបង្គោលព្រំដែនរវាងកម្ពុជានិងថៃ»
07/28/2026 08:07 PM
Facebook Telegram Linkin
កូរ៉េខាងត្បូងចេញការ​ជូនដំណឹងបន្ទាន់ អំពីការសង្ស័យ​លេចធ្លាយផូស្វ័រ នៅមូលដ្ឋានទ័ពអាកាសអាមេរិក
07/28/2026 07:07 PM
Facebook Telegram Linkin
វិមានក្រឹមឡាំង៖ ការវាយប្រហាររបស់អ៊ុយក្រែន លើនាវាអ៊ីរ៉ង់ គួរត្រូវបានចាត់ទុកថា ជាការវាយប្រហារលើអ៊ីរ៉ង់
07/28/2026 07:07 PM
Facebook Telegram Linkin
រញ្ជួយដីកម្រិត ៥,៧រ៉ិចទ័រ​ ធ្វើឱ្យញ័រ​​ខេត្ត​ Qinghai ​របស់​ប្រទេស​ចិន​
07/28/2026 07:07 PM
Facebook Telegram Linkin
របាយការណ៍៖ លោក Trump ហាក់​កាន់​តែ​ទោរទៅ​រក​លោក Zelenskyy ជាង​លោក Putin
07/28/2026 06:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.