នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
Spurs ប្រកាសតែងតាំងគ្រុបង្គោលថ្មីអតីតអ្នកចាត់ការ Brentford លោក Thomas Frank
Paris Saint Germain និងក្រុមធំៗនៅអឺរ៉ុបធ្វើដំណើរដល់ទឹកដីអាមេរិកមុនព្រឹត្តិការណ៍ Club World Cup
Dortmund បដិសេធសំណើ ៤២ លានផោនពី Chelsea ក្នុងការផ្ទេរ Jamie Gittens
អង់គ្លេសស្គាល់បរាជ័យដំបូងក្រោមការដឹកនាំរបស់អ្នកចាត់ការ Thomas Tuchel

ព័ត៌មានកីឡា

Hun Sen Cup៖ វិសាខា ឡើងជួបភ្នំពេញក្រោន ក្រោយទម្លាក់ក្រុមកងយោធពលខេមរភូមិន្ទ ក្នុងវគ្គ ១/៤

2025/04/03 12:34:36 pm        211
Facebook Telegram Linkin
ក្រុមបាល់ទាត់ វិសាខា បានឡើងទៅវគ្គពាក់កណ្ដាលផ្ដាច់ព្រ័ត្រ ដោយត្រូវជួបក្រុមភ្នំពេញក្រោន បន្ទាប់ពីយកឈ្នះសមាគមកីឡាបាល់ទាត់កងយោធពលខេមរភូមិន្ទ ដោយលទ្ធផល ៤-០ ក្នុងជំនួបជើងទី២ វគ្គ ៨ក្រុមចុងក្រោយ នៃពានរង្វាន់សម្ដេចអគ្គមហាសេនាបតីតេជោ ហ៊ុន សែន(Hun Sen Cup) លើកទី១៨ (ថ្នាក់ជាតិ) ឆ្នាំ២០២៤/២៥។ជំនួបក្រោមដំណក់ភ្លៀងនៅកីឡដ្ឋានព្រីនស៍ស្ទើរពេញម៉ោង កាលពីល្ងាចថ្ងៃទី២ ខែមេសានេះ ក្រុមទាំងពីរ បានវាយសម្រុកគ្នាខ្លាំង នៅវគ្គទី១ តែគ្មានក្រុមណាអាចរកគ្រាប់បាល់បានឡើយ ។ ឈានចូលវគ្គទី២ ស៊ិន កក្កដា ក៏បានស៊ុតគ្រាប់នាំមុខឲ្យក្រុមម្ចាស់ផ្ទះវិសាខា ១គ្រាប់ នៅនាទី៦៧ ។ បន្ទាប់ពីទម្លាយភាពជាប់គាំង វិសាខា ក៏ចាប់ផ្ដើមមានឱកាសជាបន្ដបន្ទាប់ រហូតរកបាន ៣គ្រាប់ទៀត ដើម្បីបញ្ចប់ឱកាសក្រុមលោក ភា សុភ័ក្ដ្រា តែម្ដង ។ជ័យជម្នះនេះ នាំឲ្យអតីតក្រុមជើងឯក ៣សម័យ វិសាខា ឡើងទៅជួបក្រុមជើងឯករងឆ្នាំចាស់ ភ្នំពេញក្រោន នៅវគ្គពាក់កណ្ដាលផ្ដាច់ព្រ័ត្រ បន្ទាប់ពីភ្នំពេញក្រោន បានយកឈ្នះក្រុមណាហ្គាវើលដ៏ ក្នុងវគ្គ ៨ក្រុមចុងក្រោយ កាលពីពេលថ្មីៗកន្លងទៅ។ សម្រាប់វគ្គពាក់កណ្ដាលផ្ដាច់ព្រ័ត្រ នៃពានសម្ដេចតេជោ ហ៊ុន សែន ថ្នាក់ជាតិនេះដែរ នឹងធ្វើឡើង ២ជើង ខណៈជើងទី១ បើគ្មានការប្រែប្រួលទេ នឹងធ្វើការប្រកួតនាថ្ងៃទី២៣ ខែមេសាខាងមុខ ៕អត្ថបទ លី ឈុនឡា 

WBC ទទួលស្គាល់ និងដាក់ពាក្យ Kun Khmer លើខ្សែក្រវាត់ អមទង់ជាតិកម្ពុជា និង​ប្រាសាទ​អង្គរវត្ត

2025/04/01 10:04:22 am        353
Facebook Telegram Linkin
ស្ថាប័នប្រដាល់ពិភពលោក World Boxing Council (WBC) បានទទួលស្គាល់ និងដាក់​បញ្ចូល​ពាក្យ «​គុនខ្មែរ ឬ Kun Khmer» លើខ្សែក្រវាត់ជាផ្លូវការ ដែលមានឈ្មោះថា ខ្សែក្រវាត់ WBC Kun Khmer ដោយមានរំលេចនូវទង់ជាតិកម្ពុជា និងរូបប្រាសាទអង្គរវត្ត លើខ្សែក្រវាត់​ពិភព​លោក​នេះ​ទៀត​ផង។ខ្សែក្រវាត់ WBC Kun Khmer នេះ ត្រូវបានដង្ហែមកដល់កម្ពុជា កាលពីល្ងាចថ្ងៃទី៣១ ខែមីនា ឆ្នាំ​២០២៥ ដោយលោកឧកញ៉ា ស្រី ចាន់ថន ប្រធានក្លិបគុនខ្មែរអន្ដរជាតិ(KKIF) និងជា​អនុ​ប្រធាន​សហព័ន្ធគុនខ្មែរអន្ដរជាតិ បន្ទាប់ពីលោកបានចំណាយពេល ១ឆ្នាំ ក្នុងការចរចា និង​សម្រប​សម្រួល ជាមួយថ្នាក់ដឹកនាំស្ថាប័ន WBC ដើម្បីបំពេញលក្ខខណ្ឌផ្សេងៗ រហូតមានការ​ទទួល​ស្គាល់ ​និងដាក់ពាក្យ «Kun Khmer» លើខ្សែក្រវាត់នេះ។លោកឧកញ៉ា ស្រី ចាន់ថន បានបង្ហាញនូវមោទនភាព ក្នុងនាមកូនខ្មែរ ដែលបានសម្រេច​ក្ដី​ស្រម៉ៃ​ដាក់​ពាក្យ​គុនខ្មែរ ព្រមទាំងទង់ជាតិកម្ពុជា និងរូបប្រាសាទអង្គរវត្ត លើខ្សែក្រវាត់​កម្រិត​ពិភព​លោក​ដ៏​ល្បីល្បាញ​នេះ។ លោកថា នេះមិនមែនជាជោគជ័យសម្រាប់លោក ឬអ្នកណាម្នាក់ តែ​ជា​ជោគ​ជ័យ និងមោទនភាព សម្រាប់ប្រជាពលរដ្ឋខ្មែរទាំងអស់ ក្នុងការផ្សារភ្ជាប់គុនខ្មែរ ទៅនឹង​ស្ថាប័ន​ពិភពលោក ដើម្បីផ្សព្វផ្សាយគុនខ្មែរ ឲ្យកាន់តែល្បីល្បាញ់លើពិភពលោក។ក្រោយ​ទទួលបានជោគជ័យ ក្នុងការបញ្ចូលពាក្យ «Kun Khmer» ក្នុងខ្សែក្រវាត់ WBC ក៏​ដូច​ជា​ការ​ត្រៀម​រៀបចំព្រឹត្តិការណ៍ប្រកួតដណ្ដើមខ្សែក្រវាត់ WBC Kun Khmer លើកដំបូង នាថ្ងៃទី១៤ ខែ​មេសា ឆ្នាំ២០២៥ នៅខេត្តព្រះសីហនុ លោកឧញ៉ា ស្រី ចាន់ថន ព្រមទាំងលោក ស្រី រាជបុត្រ នឹង​បន្ដកិច្ចប្រជុំពិភាក្សាជាមួយថ្នាក់ដឹកនាំស្ថាប័ន WBC បន្ថែមទៀត ដើម្បីកំណត់​លក្ខ​ខណ្ឌ​រៀបចំ​ការ​ប្រកួត ទាំងក្នុង និងក្រៅប្រទេសជាបន្ដបន្ទាប់ តើត្រូវរៀបចំប៉ុន្មានដងក្នុង ១ឆ្នាំ? ក៏​ដូច​ជា​កិច្ច​ពិភាក្សាដើម្បីរៀបចំនូវរចនាសម្ព័ន្ធអាជ្ញាកណ្ដាល-ចៅក្រមសម្រាប់កាត់សេចក្ដីការប្រកួត ដោយ​មានការចូលរួមពីក្រុមការងារសហព័ន្ធគុនខ្មែរផងដែរ៕

ស្ថានីយទូរទស្សន៍បាយ័ន និងក្រុមហ៊ុន ជីប ម៉ុង អ៊ិនស៊ី សហការរៀបចំកម្មវិធីប្រដាល់ «កំពូលអ្នកចម្បាំងអូដ្ឋ»

2025/03/28 09:31:50 am        195
Facebook Telegram Linkin
អគ្គនាយកវិទ្យុ និងទូរទស្សន៍បាយ័ន បានចុះអនុស្សារណៈយោគយល់គ្នា(MOU) ជាមួយក្រុមហ៊ុន ជីប ម៉ុង អ៊ិនស៊ី ខបភើរេសិន ដើម្បីរៀបចំព្រឹត្តិការណ៍ប្រដាល់គុនខ្មែរដណ្ដើមខ្សែក្រវាត់ «កំពូលអ្នកចម្បាំងអូដ្ឋ» ដែលនឹងត្រូវចាប់ផ្ដើមការប្រកួតផ្លូវការ នាថ្ងៃទី២៩ ខែមីនា ឆ្នាំ២០២៥ ចុងសប្ដាហ៍នេះ ។ពិធីចុះអនុស្សារណៈយោគយល់គ្នានេះ ធ្វើឡើងនៅការិយាល័យក្រុមហ៊ុន ខ្មែរ ប៊ែវើរីជីស នាផ្សារទំនើប Chip Mong Mega Mall 271 ដោយមានការអញ្ជើញចូលរួមពីលោក James Mu នាយកប្រតិបត្តិ(COO) តំណាងលោកជំទាវ ហ៊ុន ម៉ាណា អគ្គនាយិកាស្ថានីយវិទ្យុ និងទូរទស្សន៍បាយ័ន និងអ្នកឧកញ៉ា លាង ពៅ អគ្គនាយកក្រុមហ៊ុន ជីប ម៉ុង អ៊ិនស៊ី ។អ្នកឧកញ៉ា លាង ពៅ បានសម្ដែងនូវសេចក្ដីសោមនស្សរីករាយ ក្នុងកិច្ចសហការជាមួយអគ្គនាយកវិទ្យុ និងទូរទស្សន៍បាយ័ន ដើម្បីរៀបចំនូវព្រឹត្តិការណ៍ថ្មី នៃកម្មវិធីប្រដាល់កំពូលអ្នកចម្បាំងអូដ្ឋ នេះឡើង ។ ក្នុងនាមក្រុមហ៊ុនខ្មែរ ដែលបង្កើតឡើងដោយកូនខ្មែរសុទ្ធសាធ អ្នកឧកញ៉ា បានចាត់ទុកនេះគឺជាផ្នែកមួយដ៏មានសារៈសំខាន់ សម្រាប់បេសកកម្មរបស់ក្រុមហ៊ុន ក្នុងការចូលរួមផ្សព្វផ្សាយ លើកស្ទួយ និងរួមចំណែកជំរុញការអភិវឌ្ឍវិស័យកីឡាប្រដាល់គុនខ្មែរ ។អ្នកឧកញ៉ាបានគូសរំលេចថា ប្រដាល់គុនខ្មែរ មានប្រវត្តិយូរអង្វែងមកហើយ ដែលបន្សល់ទុករាប់ពាន់ឆ្នាំដោយបុព្វបុរសខ្មែរ ។ ដូច្នេះការចូលរួមអភិរក្ស និងអភិវឌ្ឍន៍កីឡាអត្តសញ្ញាណជាតិនេះ គឺជាភារកិច្ចរបស់កូនខ្មែរគ្រប់រូប ។ ដូច្នេះតាមរយៈកម្មវិធីថ្មីនេះ នឹងក្លាយជាវេទិកាមួយ ដើម្បីផ្ដល់ឱកាសដល់កីឡាករ-កីឡាការិនី បានចូលរួមប្រកួតប្រជែង និងបង្ហាញសមត្ថភាព បន្ទាប់ពីការខិតខំប្រឹងប្រែងហ្វឹកហាត់ ហើយឈានទៅដណ្ដើមនូវសមិត្ធផល ក៏ដូចជាលើកមុខមាត់ប្រទេសជាតិ លើឆាកអន្ដរជាតិផងដែរ ។គួរបញ្ជាក់ថា សម្រាប់បើកទំព័រសង្វៀនថ្មី នៃការប្រកួតកីឡាប្រដាល់គុនខ្មែរដណ្ដើមខ្សែក្រវាត់កំពូលអ្នកចម្បាំងអូដ្ឋ នាថ្ងៃទី២៩ ខែមីនាចុងសប្ដាហ៍នេះ នឹងមានការប្រកួតរវាងជើងខ្លាំងជាច្រើនរូប ក្នុងនោះក៏មានគូដណ្ដើមខ្សែក្រវាត់ផងដែរដ រួមមានកីឡាករ ឃួន ឡាំងកូស៊ីន ត្រូវជួបកីឡាករម៉ាឡេស៊ី Umar Red Wolves និងកីឡាករ ពេជ្រ អទិទេព ត្រូវជួបកីឡាករ Thongbang Seuaphom មកពីប្រទេសឡាវ ។ នេះគឺជាការប្រកួតសន្សំពិន្ទុវិលជុំ ដើម្បីឈានទៅរកបេក្ខភាពមានពិន្ទុខ្ពស់ជាងគេឡើងវគ្គបន្ដ ។ក្រៅពីបេក្ខភាពប្រកួតសន្សំពិន្ទុដណ្ដើមខ្សែក្រវាត់នេះ ក៏នឹងមានគូប្រកួតមិត្តភាពអន្ដរជាតិដ៏ទាក់ទាញផងដែរ រវាងកីឡាករ ពេជ្រ សម្បត្តិ ត្រូវជួបកីឡាករអ៊ីរ៉ង់ Parsa Aminpour និងកីឡាករ រឿង សោភ័ណ្ឌ ត្រូវជួបកីឡាករ Yahya Ettaghi មកពីប្រទេសម៉ារ៉ុក ព្រមទាំងគូមិត្តភាពជាតិ រវាងកីឡាករវ័យក្មេង ពេជ្រ បញ្ញា កូនសិស្សលោក ពេជ្រ សុផាន់ ជាមួយកីឡាករ វណ្ណា បញ្ញាបុត្រ មកពីខេត្តកំពង់ធំទៀតផង៕ អត្ថបទ លី ឈុនឡា

វគ្គផ្ដាច់ព្រ័ត្រជើងឯកបាល់ទាត់ក្នុងសាលរាជធានីភ្នំពេញ នឹងប្រកួត​នៅពហុកីឡដ្ឋាន​ជាតិមរតកតេជោ

2025/03/25 02:13:33 pm        537
Facebook Telegram Linkin
ក្រោយដំណើរការប្រកួតអស់រយៈជាង ៣ខែកន្លះ ពានរង្វាន់បាល់ទាត់ក្នុងសាលរាជធានីភ្នំពេញ រដូវកាលទី១ នឹងឈានដល់វគ្គផ្ដាច់ព្រ័ត្រនាថ្ងៃទី២៨ ខែមីនា ឆ្នាំ២០២៥ ចុងសប្ដាហ៍នេះ ដែលនឹងប្រព្រឹត្តទៅ នៅមជ្ឈមណ្ឌលកីឡាសាល នៃពហុកីឡដ្ឋានជាតិមរតកតេជោ ដោយមាន ២ប្រកួត រួមមានគូដណ្ដើមចំណាត់ថ្នាក់លេខ៣ រវាងក្រុម Lucky ជួបក្រុម The Peanut និងគូដណ្ដើមជើងឯករវាងក្រុម Mihel Soul Young Gun ជួបក្រុម C-Light Stars។ព្រឹត្តិការណ៍នេះ រៀបចំដោយកម្មវិធីកីឡា នៃសហភាពសហព័ន្ធយុវជនកម្ពុជា (ស.ស.យ.ក) រាជធានីភ្នំពេញ ដែលបានចាប់ផ្ដើមការប្រកួត តាំងពីដើមខែធ្នូ ឆ្នាំ២០២៤ ដោយមានបេក្ខភាព ១៦ក្រុមចូលរួម ដោយការប្រកួតជម្រុះតាមពូល រហូតដល់វគ្គពាក់កណ្ដាលផ្ដាច់ព្រ័ត្រ បានរៀបចំនៅអាគារខេមរានី ។ ប៉ុន្ដែដើម្បីជំរុញឲ្យការប្រកួតវគ្គផ្ដាច់ព្រ័ត្រកាន់តែទាក់ទាញ និងមានភាពអស្ចារ្យ ថ្នាក់ដឹកនាំ ស.ស.យ.ក រាជធានីភ្នំពេញ ក៏សម្រេចរៀបចំការប្រកួតវគ្គដ៏ពិសេសនេះ នៅពហុកីឡដ្ឋានជាតិមរតកតេជោ ដែលជាទីតាំងកីឡាប្រវត្តិសាស្ត្រកម្ពុជាសម័យទំនើប ដែលទើបទទួលរៀបចំព្រឹត្តិការណ៍កីឡាស៊ីហ្គេមនិងអាស៊ានប៉ារ៉ាហ្គេម កាលពីឆ្នាំ២០២៣ កន្លងទៅ។សម្រាប់ការប្រកួតថ្ងៃផ្ដាច់ព្រ័ត្រនេះដែរ ក្រៅពីគូប្រកួតដណ្ដើមចំណាត់ថ្នាក់លេខ៣ ក៏ដូចជាគូប្រកួតដណ្ដើមជើងឯក ក៏នឹងមានការប្រកួតគូកិត្តិយស រវាងក្រុមបាល់ទាត់សហភាពសហព័ន្ធយុវជនកម្ពុជារាជធានីភ្នំពេញ និងក្រុមបាល់ទាត់ផ្ការីកគ្រប់រដូវ ដែលដឹកនាំដោយនាយ ពាក់មី ព្រមទាំងការសម្ដែងចម្រៀងពីតារាចម្រៀងល្បីៗជាច្រើនផងដែរ ។ អ្វីដែលពិសេស គឺវគ្គផ្ដាច់ព្រ័ត្រពានរង្វាន់បាល់ទាត់ក្នុងសាលជើងឯករាជធានីភ្នំពេញ រដូវកាលទី១ នេះ នឹងបើកឲ្យសាធារណៈជនចូលរួមទស្សនាដោយសេរី និងឥតគិតថ្លៃ ចាប់ពីម៉ោង២រសៀលតទៅ៕ អត្ថបទ លី ឈុនឡា 

លោក Koji រំពឹងកូនក្រុមលេងបានល្អ ទល់ក្រុមអារូបា ដែលជាបទពិសោធន៍ថ្មី សម្រាប់ក្រុមគោព្រៃកម្ពុជា

2025/03/25 01:55:36 pm        369
Facebook Telegram Linkin
លោក Koji Gyotoku គ្រូបង្វឹកក្រុមជម្រើសជាតិកម្ពុជា បានចាត់ទុកជំនួបមិត្តភាពអន្ដរជាតិ ជាមួយ​ក្រុមជម្រើសជាតិអារូបា នាល្ងាចថ្ងៃទី២៥ ខែមីនា ឆ្នាំ២០២៥ គឺជាបទពិសោធន៍ថ្មីមួយ សម្រាប់​ក្រុមគោព្រៃ ដែលត្រូវជួបក្រុមមកពីទ្វីបផ្សេង ហើយសង្ឃឹមថា កូនក្រុម​នឹង​បង្ហាញ​ការ​លេង​មួយ​ដ៏ល្អ ចំពោះមុខអ្នកគាំទ្រ ក្នុងជំនួបមិត្តភាពបើកឆាកឆ្នាំថ្មីនេះ ។ថ្លែងក្នុងសន្និសីទសារព័ត៌មានមុនការប្រកួតនៅថ្ងៃទី២៤ ខែមីនានេះ លោក Koji បានលើកថា ការ​ប្រកួតជាមួយអារូបា គឺជាជំនួបដ៏ល្អមួយ ដែលលោកនឹងព្យាយាមជំរុញកូនក្រុមលេងឲ្យអស់ពីសមត្ថភាព ។ ទោះបីការប្រមូលផ្ដុំមិនទាន់ល្អតាមផែនការ តែលោកពិតជាចង់ឈ្នះការប្រកួតនេះ ពិសេសគឺការបង្ហាញទម្រង់លេងដ៏ល្អរបស់កូនក្រុម ។រីឯប្រធានក្រុមគោព្រៃកម្ពុជា កីឡាករ កាន់ ម៉ូ ក៏បានបង្ហាញនូវការប្ដេជ្ញាចិត្តយ៉ាងមុតមាំក្នុងការប្រកួតនេះ ដើម្បីស្វែងរកជ័យជម្នះជូនអ្នកគាំទ្រកម្ពុជា ។ យ៉ាងណា កាន់ ម៉ូ ថាការប្រកួតនេះ មែនជាការប្រកួតងាយស្រួយឡើយ ទោះបីអារូបា បានធ្វើដំណើរវែងឆ្ងាយក៏ដោយ ។ដោយឡែកលោក Marvic Bermudez គ្រូបង្វឹកក្រុមជម្រើសជាតិអារូបា និងកីឡាករ Nickenson Paul បានសម្ដែងក្ដីរីករាយក្នុងការមកប្រកួតមិត្តភាពនៅកម្ពុជា ។ លោកទទួលស្គាល់ពីគុណភាពកីឡាកររបស់កម្ពុជា តែបើក្រឡេកទៅមើលចំណាត់ថ្នាក់ពិភពលោកក្រុមទាំងពីរ គឺប្រហាក់ប្រហែលគ្នា ។ ដូច្នេះលោកសង្ឃឹមថា ការប្រកួតមិត្តភាពនេះ នឹងក្លាយជាការប្រកួតទាក់ទាញ ។គួរដឹងថា ជំនួបមិត្តភាពអន្ដរជាតិ រវាងក្រុមជម្រើសជាតិកម្ពុជា និងក្រុមជម្រើសជាតិអារូបា នឹងធ្វើឡើងនាវេលាម៉ោង ៧៖៣០នាទីយប់ថ្ងៃទី២៥ ខែមីនា ឆ្នាំ២០២៥ នៅពហុកីឡដ្ឋានជាតិមរតកតេជោ ។ នេះគឺជាជំនួបមិត្តភាពទី២ កំឡុងថ្ងៃ FIFA Day ប្រចាំខែមីនា ឆ្នាំ២០២៥ ដោយប្រកួតទី១ របស់ក្រុមគោព្រៃ បានរងបរាជ័យក្រោមថ្វីជើងក្រុមម្ចាស់ផ្ទះវៀតណាម ២-១ គ្រាដែលប្រកួតដំបូងរបស់ក្រុមជម្រើសជាតិអារូបា គឺចាញ់ក្រុមសមាជិកលីគកំពូលកម្ពុជា វិសាខា ៣-១ កាលពីថ្មីៗកន្លងទៅ ។ អត្ថបទ លី ឈុនឡា  

កីឡា ១០ប្រភេទ នឹងត្រូវរៀបចំអបអរសាទរពិធីបុណ្យទន្លេ លើកទី៩ នៅខេត្តតាកែវ ចុងសប្ដាហ៍នេះ

2025/03/20 01:51:10 pm        111
Facebook Telegram Linkin
ពិធីបុណ្យទន្លេ លើកទី៩ ឆ្នាំ២០២៥ នៅខេត្តតាកែវ នឹងប្រព្រឹត្តទៅ នាថ្ងៃទី២១, ២២, និងថ្ងៃទី២៣ ខែមីនា ចុងសប្ដាហ៍នេះ ជាមួយការត្រៀមរៀបចំនូវទស្សនីយភាពជាច្រើន ក្នុងនោះក៏មានសកម្មភាពកីឡាផងដែរ ដោយអនុគណៈកម្មការរៀបចំព្រឹត្តិការណ៍កីឡាលើទឹក និងតាមដងទន្លេ នៃក្រសួងទេសចរណ៍ បានត្រៀមរៀបចំនូវសកម្មភាពកីឡាចំនួន ១០ប្រភេទ ដើម្បីអបអរសាទរព្រឹត្តិការណ៍ដ៏ធំប្រចាំឆ្នាំនេះ។ឯកឧត្តម វ៉ាហេង ដាវុធ រដ្ឋលេខាធិការក្រសួងទេសចរណ៍ បានឲ្យដឹងថា កីឡាទាំង ១០ប្រភេទ ដែលត្រូវរៀបចំដើម្បីអបអរសាទរពិធីបុណ្យទន្លេ នៅខេត្តតាកែវ នាចុងសប្ដាហ៍នេះ រួមមានកីឡារត់កម្សាន្ដមហាជនចម្ងាយ ៥គីឡូម៉ែត្រ, កីឡាវាយសីមហាជន, កីឡាប៉េតង់មហាជន, កីឡាអុកចត្រង្គ, កីឡាទូកកាយ៉ាក, កីឡារែក និងលោតម៉ឹក, ប្រដាល់គុនខ្មែរ, កីឡាប៉ារ៉ាម៉ូទ័រ ឬកីឡាហោះហើរ, កីឡាបាល់ទាត់ និងការបង្ហោះគោមជាដើម ។ឯកឧត្តមបានគូសបញ្ជាក់ថា កីឡាភាគច្រើន ដែលនឹងត្រូវរៀបចំកំឡុងពិធីបុណ្យទន្លេឆ្នាំនេះ គឺជាកីឡាលក្ខណៈមហាជន ដើម្បីគាស់រំលេចនូវប្រភេទកីឡាប្រពៃណី ក៏ដូចជាកីឡាប្រជាប្រិយ កំឡុងទសវត្សរ៍ឆ្នាំ១៩៨០ ឬមុនឆ្នាំនេះ ឲ្យត្រឡប់មកវិញ ដើម្បីរំឮកនូវអនុស្សាវរីយ៍សម្រាប់ប្រជាពលរដ្ឋខ្មែរ បាននឹកឃើញនូវសកម្មភាពកីឡាពីអតីតកាល ក្រោមម្លប់សន្ដិភាព ដែលដឹកនាំដោយរាជរដ្ឋាភិបាលបច្ចុប្បន្ន ដូចជាកីឡាអុកចត្រង្គ លេងរែក និងការលេងលោកម៉ឹកជាដើម ។ដូច្នេះតាមរយៈសកម្មភាពកីឡាទាំងអស់នេះ ក្រៅពីផ្ដល់នូវទស្សនីយភាពកម្សាន្ដជូនភ្ញៀវជាតិ និងអន្ដរជាតិ សម្រាប់ប្រជាពលរដ្ឋ ដែលចូលរួមពិធីបុណ្យទន្លេនេះ ក៏អាចចូលរួមលេងកម្សាន្ដបានផងដែរ ដោយកីឡាស្ទើរទាំងអស់ នឹងត្រូវរៀបចំនៅតំបន់បឹងតាកែវ លើកលែងកីឡាបាល់ទាត់ប៉ុណ្ណោះ ដែលនឹងត្រូវរៀបចំនៅកីឡដ្ឋានគិរីវង់សុខសែនជ័យ ។គួរដឹងថា ពិធីបុណ្យទន្លេ លើកទី៩ ឆ្នាំ២០២៥ នឹងប្រារព្ធពិធីបើកផ្លូវការនៅថ្ងៃទី២២ ខែមីនា ក្រោមអធិបតីភាពដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ក្រោមប្រធានបទ «គុណតម្លៃនៃទន្លេ៖ ផ្សារភ្ជាប់វប្បធម៌ និងទេសចរណ៍ធម្មជាតិ» ដោយផ្សារភ្ជាប់ជាមួយពាក្យស្លោកសំខាន់ៗ ដូចជា «ទេសចរណ៍ រីកលូតលាស់ក្នុងសន្ដិភាព» «ម្នាក់!ជាអ្នកផ្សព្វផ្សាយទេសចរណ៍កម្ពុជាម្នាក់» និង «ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍» ជាដើម ៕ អត្ថបទ លី ឈុនឡា

រាជរដ្ឋាភិបាល ផ្ដល់ប្រាក់រង្វាន់ជាង ១លាន ២សែនដុល្លារ ដល់អត្តពលិកជ័យលាភី​លើឆាក​អន្ដរជាតិចំនួន ១១ប្រភេទកីឡា

2025/03/20 01:41:07 pm        99
Facebook Telegram Linkin
រាជរដ្ឋាភិបាលកម្ពុជា បានប្រាក់រង្វាន់លើកទឹកចិត្តសរុបចំនួន ៤,៩៨៤,៩០០,០០០រៀល ឬប្រមាណ ១,២៤៦,២២៥ដុល្លារ ដល់គ្រូបង្វឹក គ្រូជំនួយ និងកីឡាករ-កីឡាការិនីជ័យលាភី ចំនួន ១១ប្រភេទកីឡា ដែលដណ្ដើមបានមេដាយពីព្រឹត្តិការណ៍អន្ដរជាតិចំនួន ១៦ផ្សេងគ្នា កាលពីឆ្នាំ២០២៣ និងឆ្នាំ២០២៤ កន្លងទៅ។ពិធីប្រគល់ប្រាក់រង្វាន់លើកទឹកចិត្តរបស់រាជរដ្ឋាភិបាលនេះ ធ្វើឡើងក្រោមអធិបតីភាពឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ដ្រី រដ្ឋមន្ដ្រីក្រសួងអប់រំ យុវជន និងកីឡា នៅមជ្ឈមណ្ឌលជាតិហ្វឹកហ្វឺនកីឡា នៅល្ងាចថ្ងៃទី១៩ ខែមីនា ឆ្នាំ២០២៥ ។ ចំពោះប្រភេតកីឡា ដែលទទួលបានប្រាក់រង្វាន់លើកទឹកចិត្ត ក្រោយចូលរួមប្រកួតលក្ខណៈហ្គេម និងការប្រកួតជើងឯកកម្រិតអន្ដរជាតិនានា រួមមានកីឡាប៉េតង់ ការ៉ាតេ ចំបាប់ កាយសម្ព័ន្ធ ហែលទឹកពាក់ជើងទា កាយវប្បកម្ម យុទ្ធគុនចម្រុះ វ៉ូវីណាម ជឺជីតស៊ូ តេក្វាន់ដូ WT និងកីឡាយូដូ។ក្នុងឱកាសនោះដែរ ឯកឧត្តមបណ្ឌិតសភាចារ្យ ហង់ជួន ណារ៉ុន បានអបអរសាទរគ្រូបង្វឹក គ្រូជំនួយ ពិសេសកីឡាករ-កីឡាការិនីទាំងអស់ ដែលទទួលបានប្រាក់រង្វាន់លើកទឹកចិត្តពីរាជរដ្ឋាភិបាល ក្រោយពីការខិតខំប្រឹងប្រែងហ្វឹកហាត់ និងប្រកួតប្រជែងដណ្ដើមមេដាយជូនជាតិ ។ ឯកឧត្តមទទួលស្គាល់ ការផ្ដល់ប្រាក់រង្វាន់មានការយឺតយ៉ាវ តែយ៉ាងណាក្រសួងអប់រំ ពិសេសប្រមុខរាជរដ្ឋាភិបាល មិនបានភ្លេច ឬប្រងើយកន្ដើយចំពោះប្រាក់រង្វាន់នេះឡើយ ដោយរាជរដ្ឋាភិបាល ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានយកចិត្តទុកដាក់ខ្ពស់ ក្នុងការជំរុញក្រសួង-ស្ថាប័នពាក់ព័ន្ធ រហូតទទួលបានថវិកាសម្រាប់ផ្ដល់ជូនគ្រូបង្វឹក គ្រូជំនួយ និងកីឡាករ-កីឡាការិនីជ័យលាភីទាំងអស់គ្នា ។ឯកឧត្តមឧបនាយករដ្ឋមន្ដ្រីបន្ថែមទៀតថា ទោះបីកម្ពុជាមានគោលការណ៍ផ្ដល់ប្រាក់រង្វាន់លើកទឹកចិត្តមួយខ្ពស់ជាងបណ្ដាប្រទេសជិតខាង តែក្រោមការដឹកនាំរបស់សម្ដេចធិបតីនាយករដ្ឋមន្ដ្រី នៅតែបន្ដគោលនយោបាយ ដែលដាក់ចេញដោយសម្ដេចតេជោ ហ៊ុន សែន អតីតនាយករដ្ឋមន្ដ្រី ដើម្បីផ្ដល់នូវការលើកទឹកចិត្តដល់កីឡាករ-កីឡាការិនីទាំងអស់ ដែលខិតខំប្រឹងប្រែង លះបង់ ក៏ដូចជាការប្រកួតប្រជែង ដើម្បីលើកមុខមាត់ កិត្តិយស និងដណ្ដើមមេដាយជូនជាតិមាតុភូមិ ។ ដូច្នេះឯកឧត្តមសង្ឃឹមថា សហព័ន្ធកីឡាជាតិទាំងអស់ នឹងបន្ដការខិតខំប្រឹងប្រែងអភិវឌ្ឍ និងបណ្ដុះនូវធនធានថ្នាលបន្ដវេនបន្ថែមទៀត ដើម្បីត្រៀមការប្រកួតប្រជែងលើឆាកអន្ដរជាតិ និងត្រៀមធ្វើម្ចាស់ផ្ទះកីឡាយុវជនអាស៊ី ឆ្នាំ២០២៩ ខាងមុខ ។យោងតាមរបាយការណ៍ឯកឧត្តម ប៉ុន សុខ អគ្គនាយកនៃអគ្គនាយដ្ឋានកីឡា ចំពោះប្រភេទកីឡា ដែលបានចូលរួមប្រកួតលក្ខណៈហ្គេម និងការប្រកួតជើងឯកកម្រិតអន្ដរជាតិនានា ហើយបានទទួលប្រាក់រង្វាន់លើកទឹកចិត្តពីរាជរដ្ឋាភិបាល ក្រោយដណ្ដើមបានមេដាយជូនជាតិនេះ រួមមាន៖១. ការចូលរួមប្រកួតកីឡាសាកលវិទ្យាល័យអាស៊ីអាគ្នេយ៍ លើកទី២១ ឆ្នាំ២០២៤ នៅឥណ្ឌូនេស៊ី កម្ពុជា ឈ្នះមេដាយ ៩គ្រឿង (មាស ១ ប្រាក់ ៥ និងសំរឹទ្ធ ៣) លើប្រភេទកីឡាប៉េតង់ តេក្វាន់ដូ WT, ការ៉ាតេ និងយូ ។២. ការប្រកួតកីឡាសិស្សមធ្យមអាស៊ីអាគ្នេយ៍ លើកទី១៣ ឆ្នាំ២០២៤ នៅវៀតណាម កម្ពុជា ឈ្នះមេដាយសរុប ៩គ្រឿង (មាស ២ ប្រាក់ ១ និងសំរឹទ្ធ ៦) ។៣. ការប្រកួតកីឡាកាយវប្បកម្មជើងឯកពិភពលោក លើកទី១៤ ឆ្នាំ២០២៣ នៅកូរ៉េខាងត្បូង កម្ពុជា ឈ្នះមេដាយសំរឹទ្ធ ២គ្រឿង។៤. ការប្រកួតកីឡាយុទ្ធគុនចម្រុះជើងឯកពិភពលោក ឆ្នាំ២០២៣ នៅថៃ កម្ពុជាឈ្នះមេដាយ ២គ្រឿង (ប្រាក់ ១ និងសំរឹទ្ធ ១)។៥. ការប្រកួតកីឡាប៉េតង់ជើងឯកអាស៊ី លើកទី៥ ឆ្នាំ២០២៣ នៅម៉ាឡេស៊ី កម្ពុជាឈ្នះមេដាយ ៦គ្រឿង (មាស១ ប្រាក់១ និងសំរឹទ្ធ៤) ។៦. ការប្រកួតកីឡាវ៉ូវីណាមជើងឯកពិភពលោក លើកទី៧ ឆ្នាំ២០២៣ នៅវៀតណាម កម្ពុជា ឈ្នះមេដាយ ២០គ្រឿង (មាស៦ ប្រាក់៥ និងសំរឹទ្ធ៩) ។៧. ការប្រកួតកីឡាកាយសម្ព័ន្ធអាអេរ៉ូប៊ិចជើងឯកអាស៊ី លើកទី៨ ឆ្នាំ២០២៣នៅម៉ុងហ្គោលី កម្ពុជាឈ្នះមេដាយ ២គ្រឿង(មាស១ និងសំរឹទ្ធ១) ។៨. ការប្រកួតកីឡាហែលទឹកពាក់ជើងទាជើងឯកអាស៊ី លើកទី១៨ ឆ្នាំ២០២៣ នៅថៃ កម្ពុជាឈ្នះមេដាយ ៥គ្រឿង (មាស២ ប្រាក់១ និងសំរឹទ្ធ២)។៩. ការប្រកួតជឺជីតស៊ូជើងឯកអាស៊ី លើកទី៨ ឆ្នាំ២០២៤ នៅអារ៉ាប់រួម កម្ពុជាឈ្នះមេដាយសំរឹទ្ធ ៥គ្រឿង ។១០. ការប្រកួតកីឡាកាយសម្ព័ន្ធជើងឯកអាស៊ី លើកទី៩ ឆ្នាំ២០២៤ នៅវៀតណាម កម្ពុជាឈ្នះមេដាយសំរឹទ្ធ ១គ្រឿង។១១. ការប្រកួតកីឡាយុទ្ធគុនចម្រុះជើងឯកអាស៊ី លើកទី២ នៅកម្ពុជា កម្ពុជាឈ្នះមេដាយ ១៥គ្រឿង (មាស១ ប្រាក់៥ និងសំរឹទ្ធ៩)។១២. ការប្រកួតកីឡាតេក្វាន់ដូ ITF ជើងឯកអាស៊ី លើកទី១០ ឆ្នាំ២០២៤ នៅឥណ្ឌា កម្ពុជា ឈ្នះមេដាយ ២៤គ្រឿង (មាស៣ ប្រាក់៧ និងសំរឹទ្ធ១៤) ។១៣. ការប្រកួតកីឡាការ៉ាតេជើងឯកអាស៊ីអាគ្នេយ៍ លើកទី១០ ឆ្នាំ២០២៤ នៅហ្វីលីពីន កម្ពុជា ឈ្នះមេដាយ ៥គ្រឿង (មាស២ ប្រាក់១ និងសំរឹទ្ធ២) ។១៤. ការប្រកួតកីឡាចំបាប់ជើងឯកអាស៊ីអាគ្នេយ៍ លើកទី២ ឆ្នាំ២០២៤ នៅកម្ពុជា កម្ពុជាឈ្នះមេដាយ ២៧គ្រឿង (មាស៣ ប្រាក់១៧ និងសំរឹទ្ធ៧) ។១៥. ការប្រកួតកីឡាការ៉ាតេជើងឯកអាស៊ីអាគ្នេយ៍ លើកទី១១ ឆ្នាំ២០២៣ នៅថៃ កម្ពុជាឈ្នះមេដាយ ៧គ្រឿង (ប្រាក់ ១ និងសំរឹទ្ធ៦) ។១៦. ការប្រកួតកីឡាជឺជីតស៊ូជើងឯកអាស៊ីអាគ្នេយ៍លើកទី៣ ឆ្នាំ២០២៤ នៅឥណ្ឌូនេស៊ី កម្ពុជាឈ្នះមេដាយ ២១គ្រឿង (មាស៩ ប្រាក់៤ និងសំរឹទ្ធ៨) ៕ អត្ថបទ លី ឈុនឡា

មកស្គាល់ពីប្រទេសអារូបា ត្រូវប្រកួតមិត្តភាពអន្តរជាតិជាមួយកម្ពុជា

2025/03/20 11:40:05 am        338
Facebook Telegram Linkin
កម្ពុជា នឹងបើកពហុកីដ្ឋានជាតិ(អូឡាំពិក)ទទូលក្រុមបាល់ទាត់ធ្វើដំណើរមកពីមហាសមុទ្រអាត្លង់ទិចខាងជើង អារូបា ថ្ងៃទី២៥ ខែមីនា ឆ្នាំ២០២៥ ការប្រកួតមិត្តភាពអន្តរជាតិ (FIFA DAY)។ដោយអាចមានបងប្អូនប្រជាជនកម្ពុជាយើងមួយចំនួន មិនធ្លាប់ដឹង លឺ និងស្គាល់ប្រទេសនេះ ហើយដោយក្រុមជម្រើសជាតិ ត្រូវប្រកួតជាមួយផង ថ្ងៃនេះ BTV News សូមណែនាំជួន។អារូបា គឺជារដ្ឋដែនដីកោះស្ថិតក្រោមអធិបតេយ្យរបស់ព្រះរាជាណាចក្រហូឡង់ មានទីតាំងនៅសមុទ្រការ៉ាអ៊ីបខាងត្បូងនៃមហាសុទ្រអាត្លង់ទិចខាងជើង ចម្ងាយ២៩គីឡូម៉ែត្រខាងជើងឧបទ្វីបប៉ារ៉ាហ្កាណានៃប្រទេវេណេស៊ុយអេឡា និង៨០គីឡូម៉ែត្រភាគពាយព្យប្រទេសដែនកោះហូឡង់មួយទៀត ក្យួរ៉ាសាវ។អារូបា ឆ្នាំ១៩៨៦ បានក្លាយជាដែនដីកោះស្វយ័តពីព្រះរាជាណាចក្រហូឡង់ ដោយមានឈ្មោះផ្លូវការប្រទេសអារួបា រឺ Country of Aruba ប៉ុន្តែកិច្ចការមួយចំនួនដូចជាការបរទេសនិងការពារជាតិនៅក្រោមហូឡង់ចាត់ចែង។ដោយមានប្រជាជនសរុបជាង១១ម៉ឺននាក់ ជិត៨០%ជាជនជាតិដើមហូឡង់ និងភាគច្រើនប្រើភាសាប៉ាពៀមិនតូ និងហូឡង់ផ្លូវការ ប្រទេសដែនដីកោះមួយនេះមានទំហំ១៨០គីឡូម៉ែត្រក្រឡា និងទីក្រុងឈ្មោះ អូរែនជឺស្តាត រឺប្រជាជននៅទីនោះតែងហៅថា ផ្លាយ៉ា និងជាកន្លែងទេសចរណ៍ដ៏ទាក់ទាញលើពិភពលោក។នយោបាយអារូបាកើតឡើងក្នុងក្របខ័ណ្ឌ សភា(ស្តេតិន)ដែលមានសមាជិក២១រូបបោះឆ្នោតរៀងរាល់បួនឆ្នាំ និងគណៈរដ្ឋមន្ត្រី៨រូប។ អគ្គទេសាភិបាលអារូបាត្រូវបានតែងតាំងដោយមហាក្សត្រហូឡង់ក្នុងអាណត្តិ៦ឆ្នាំ។ ចំណែកនាយករដ្ឋមន្ត្រី និងឧបនាយករដ្ឋមន្ត្រី ត្រូវជ្រើសតាំងដោយសភាស្តេតិន ៤ឆ្នាំម្ដង។បច្ចុប្បន្នប្រមុខរដ្ឋរបស់ប្រទេសអារូបាគឺព្រះមហាក្សត្រ Willem-Alexander នៃព្រះរាជាណាចក្រហូឡង់ អគ្គទេសាភិបាលគឺឯកឧត្ដម Juan Alfonso Boekhoudt និងលោកជំទាវ Evelyn Wever-Croes ជានាយករដ្ឋមន្ត្រី។មកចាប់អារម្មណ៍ផ្នែកកីឡារបស់ប្រទេសកោះដ៏តូចច្រឡឹងនេះវិញម្ដង។សម្រាប់កីឡាដែលមានប្រជាប្រិយបំផុតនៅអារូបាគឺបាល់ទាត់ បាល់បោះ បេស្បល់ និងបាល់ទះ ព្រមទាំងសម្មភាពកីឡានានាទាក់ទងនឹងទេសចរណ៍ដែលជាវិស័យចម្បងក្នុងសេដ្ឋកិច្ច។ អារូបានបង្ហាញខ្លួនក្នុងព្រឹត្តិការណ៍អូឡាំពិកតាំងពីឆ្នាំ១៩៨៨។ដោយឡែកសម្រាប់កីឡាបាល់ទាត់ ក្រុមបាល់ទាត់ជម្រើសជាតិអារូបា ក៏ដូចជាសហព័ន្ធកីឡាបាល់ទាត់អារូបាត្រូវបង្កើតឡើងនៅឆ្នាំ១៩៣២ ហើយបានក្លាយជាសមាជិកសហភាពបាល់ទាត់សមុទ្រការ៉ាអ៊ីប(CFU) សហព័ន្ធបាល់ទាត់អាមេរិកខាងជើង កណ្ដាល និងការ៉ាអ៊ីប(CONCACAF ) និងសហ័ន្ធបាល់ទាត់អន្តរជាតិ (FIFA) តាំងពីឆ្នាំ១៩៨៨។ក្រៅពីក្រុមបាល់ទាត់ជម្រើសជាតិបុរស អារូបាមានជម្រើសជាតិនារី និងក្រុមបាល់ទាត់ជម្រើសជាតិយុវជន និងយុវនារីអាយុក្រោម១៣ឆ្នាំ ១៥ឆ្នាំ ១៧ឆ្នាំ ២០ឆ្នាំ និងអាយុក្រោម២១ឆ្នាំ។អារូបាមានលីគអាជីពបាល់ទាត់៣កម្រិតគឺលីគកំពូលមានឈ្មោះថា Aruban Division di Honor ដែលមាន១០ក្លឹបចូលរួម Division One និង Division Two។ ប្រទេសនេះក៏មានលីគបាល់ទាត់នារី និងយុវជនផងដែរ។ ក្រៅពីនេះក៏រៀបចំឱ្យមានការប្រកួតប្រចាំប្រទេសដែលមានឈ្មោះ Copa Betico Croes។បច្ចុប្បន្នជម្រើសជាតិអារូបា ឈរនៅចំណាត់ថ្នាក់លេខ១៩៥លើពិភពលោក ក្រោមកម្ពុជា១៥លេខ។ ចំពោះសមាសភាពកីឡាករ ដែលត្រូវបានលោក Marvic Bermúdez គ្រូបង្វឹកក្រុមជម្រើសជាតិអារូបា កោះហៅមកជួបក្រុមជម្រើសជាតិកម្ពុជា នាថ្ងៃទី២៥ ខែមីនា ភាគច្រើនជាកីឡាករកំពុងប្រកបអាជីពនៅប្រទេសហូឡង់ ហើយមាន ៥រូបប៉ុណ្ណោះ ដែលលេងនៅលីគអារូបា និងមាន ២រូបប្រកបអាជីពនៅអង់គ្លេស និងអាល្លឺម៉ង់។ក្រឡេកទៅចាប់អារម្មណ៍លទ្ធផលប្រមាណ ១០ប្រកួតចុងក្រោយ ក្រុមមកពីទ្វីបអាមេរិកខាងត្បូងមួយនេះ មិនធ្លាប់ទទួលបានជ័យជម្នះឡើយ ដោយស្គាល់ស្មើម្ដងគត់ ក្រៅពីនោះ សុទ្ធតែរងបរាជ័យ គ្រាដែល ២ប្រកួត កាលពីចុងឆ្នាំ២០២៤ គឺបានចាញ់ក្រុម ព័រតូរីកូ ដោយលទ្ធផល ៥-១ និងចាញ់ក្រុមសាំងម៉ារតាំង ១-០ ក្នុងពានរង្វាន់ CONCACAF Nations League៕

ពាន FIFA Club World Cup ធ្វើដំណើរដល់ទីក្រុង Atlanta សហរដ្ឋអាមេរិក

2025/03/19 03:28:23 pm        309
Facebook Telegram Linkin
ទីក្រុង Atlanta បានស្វាគមន៍ពានរង្វាន់ Club World Cup របស់ FIFA នៅកីឡដ្ឋាន Mercedez-Benz កាលពីពេលថ្មីៗនេះ ជាផ្នែកមួយនេះដំណើរទេសចរណ៍របស់ពាន។ពានរង្វាន់ដែលបានរចនាឡើងដោយសហការជាមួយម៉ាកគ្រឿងអលង្ការប្រណីត Tiffany & Co និងបានដាក់បង្ហាញកាលពីឆ្នាំមុន មានរាងជាថាសមាសទម្រង់ជារង្វង់មូល ដែលរួមមានរូបភាពតំណាងដែលបង្ហាញពីប្រវត្តិដ៏សម្បូរបែបរបស់កីឡា ក៏ដូចជាឈ្មោះសមាគមសមាជិកទាំងអស់របស់ FIFA ទាំង ២១១ ផងដែរ។ពាន​រង្វាន់​នេះ​ក៏​មាន​ការ​ឆ្លាក់​ជា ​១៣ ​ភាសា​ផ្សេង​គ្នា​ផង​ដែរ ​ជាមួយនឹង​អក្សរ​ស្ទាប។បន្ទាប់ពីទីក្រុង Atlanta ពានរង្វាន់ Club World Cup ត្រូវបន្តដំណើរទេចរណ៍របស់ខ្លួនជុំវិញពិភពលោកទៅកាន់ទីក្រុង Auckland ប្រទេសនូវែសេឡង់ ទីក្រុងឡុងដ៍ចក្រភពអង់គ្លេស ទីក្រុងសេអ៊ូល និងតូក្យូជាដើម។ការប្រកួតបាល់ទាត់ជើងឯកក្លិបពិភពលោក FIFA Club World Cup នឹងចាប់ផ្តើមព្រឹត្តិការណ៍ដំបូងរបស់ខ្លួន ជាមួយនឹងការចូលរួមចំនួន ៣២ ក្រុមពីមកពីទ្វីប អឺរ៉ុប អាមេរិកខាងត្បូង អាហ្វ្រិក អាស៊ីចូលរួម ប្រកួតជាលក្ខណៈវិលជុំបែកចែកពូលដូច World Cup របស់ក្រុមជម្រើសជាតិផងដែរ៕ អត្ថបទ៖នាង សុភាវុធ

គ្រូកម្ពុជាថា ចង់ឈ្នះវៀតណាម ជារឿងពិបាក តែលោក Kim Sang Sik បានប្រុងប្រយ័ត្នខ្ពស់

2025/03/19 03:20:17 pm        556
Facebook Telegram Linkin
ក្រុមជម្រើសជាតិកម្ពុជា នឹងត្រូវធ្វើការប្រកួតមិត្តភាពអន្ដរជាតិផ្លូវការ ជាមួយក្រុមជម្រើសជាតិវៀតណាម នាវេលាម៉ោង ៧៖៣០នាទីយប់ថ្ងៃទី១៩ ខែមីនា ឆ្នាំ២០២៥ នេះ នៅកីឡដ្ឋាន Gò Đậu នាខេត្ត Binh Duong ។ ថ្លែងក្នុងសន្និសីទសារព័ត៌មាន មុនការប្រកួតគ្រូបង្វឹកក្រុមទាំងពីរ បានបង្ហាញការគោរពគ្នាទៅវិញទៅមក និងមានការប្រុងប្រយ័ត្នរៀងខ្លួន ក្នុងការប្រកួតមិត្តភាពនេះ ។លោក Koji Gyotoku គ្រូបង្វឹកក្រុមជម្រើសជាតិកម្ពុជា បានសម្ដែងក្ដីរីករាយក្នុងការប្រកួតទល់នឹងក្រុមខ្លាំងប្រចាំតំបន់ ហើយការប្រកួតជាមួយក្រុមជម្រើសជាតិវៀតណាមនេះ ក្រុមខ្លួនពិតជាចង់ឈ្នះ តែលោកទទួលស្គាល់ថា វាពិតជាមិនងាយស្រួលណោះទេ ដ្បិតវៀតណាម គឺជាក្រុមជើងឯកពានរង្វាន់ប្រចាំតំបន់អាស៊ាន ហើយក៏ជាក្រុមដែលល្អបំផុតមួយក្នុងតំបន់ ស្របពេលកម្ពុជាត្រៀមខ្លួនមិនទាន់បានល្អឡើយ ។ យ៉ាងណាលោកនឹងព្យាយាមបង្ហាញភាពខ្លាំងរបស់ក្រុមគោព្រៃដល់អ្នកគាំទ្ររបស់ខ្លួនក្នុងការប្រកួតយប់នេះ ។គ្រូបង្វឹកជនជាតិជប៉ុនដដែលបន្ថែមទៀតថា លោកបានសិក្សាក្រុមម្ចាស់ផ្ទះវៀតណាម តាមរយៈការប្រកួតជើងឯកអាស៊ីអាគ្នេយ៍ កាលពីឆ្នាំ២០២៤ ពិសេសជំនួបវគ្គផ្ដាច់ព្រ័ត្រជាមួយថៃ ដែលវៀតណាមពិតជាស័ក្ដិសមគ្រងជើងឯក ដោយសារការរៀបចំក្រុមបានយ៉ាងល្អរបស់គ្រូបង្វឹកលោក  Kim Sang-Sik ។ ទាក់ទងនឹងការអវត្តមានរបស់ខ្សែប្រយុទ្ធ Nguyen Xuan Son លោកក៏សោកស្ដាយដែរ ព្រោះលោកចង់ឲ្យកូនក្រុមលេងទល់នឹងកីឡាករឆ្នើមៗរបស់វៀតណាម ។ បែបននេះក្ដី វៀតណាម នៅមានកីឡាករមានគុណភាពខ្ពស់ជាច្រើនទៀត សម្រាប់ការប្រកួតមិត្តភាពនេះ ។សម្រាប់លោក Kim Sang-Sik វិញ ក៏បានវាយតម្លៃខ្ពស់ ចំពោះភាពរីកចម្រើន និងការផ្លាស់ប្ដូររបស់ក្រុមជម្រើសជាតិកម្ពុជា ដោយលោកបានក្រើនរំឮកកូនក្រុម ត្រូវមានការប្រុងប្រយ័ត្នខ្ពស់ ចំពោះក្រុមគោព្រៃ ដែលមានកីឡាករចូលសញ្ជាតិរហូតដល់ ៦រូប ពិសេសខ្សែប្រយុទ្ធដ៏គ្រោះថ្នាក់ Abdel Kader Coulibaly ។ យ៉ាងណាមិញលោកក៏បានត្រៀមនូវវិធីសាស្ដ្រដើម្បីដោះស្រាយបញ្ហានេះដែរ ។គ្រូបង្វឹកសញ្ជាតិកូរ៉េខាងត្បូងដដែលបន្ថែមទៀតថា ចំណាត់ថ្នាក់ FIFA របស់ក្រុមជម្រើសជាតិកម្ពុជា មិនខ្ពស់នោះទេ ប៉ុន្ដែក្នុងចរន្ដនៃកីឡាករចូលសញ្ជាតិមានការផ្លាស់ប្ដូររៀងរាល់ថ្ងៃ ហើយគ្រប់ក្រុមកាន់តែខ្លាំងឡើងតាមពេលវេលា ជាក់ស្ដែងក្នុងការប្រកួតជើងឯកអាស៊ីអាគ្នេយ៍ ឆ្នាំ២០២៤ កន្លងទៅ គឺកម្ពុជាមិនងាយចាញ់ឡើយ ។ ដូច្នេះលោកនឹងព្យាយាមរៀបចំក្រុមឲ្យបានល្អ ដើម្បីទទួលបានជ័យជម្នះក្នុងការប្រកួតដំបូង ក្នុងឆ្នាំ២០២៥ បន្ទាប់ពីការគ្រងជើងឯក ASEAN Cup 2024 ជាមួយក្រុមគោព្រៃកម្ពុជានេះ ។គួរដឹងថា ជំនួបមិត្តភាពអន្ដរជាតិ រវាងកម្ពុជា ជាមួយក្រុមម្ចាស់ផ្ទះវៀតណាម នារាត្រីថ្ងៃពុធនេះ នឹងមានការផ្សាយផ្ទាល់លើកញ្ចក់ទូរទស្សន៍ BTV-News ។ ក្រោយបញ្ចប់ការប្រកួតនេះ កម្ពុជានឹងត្រូវត្រឡប់មកមាតុភូមិវិញ ដើម្បីបើកទ្វារផ្ទះទទួលក្រុមជម្រើសជាតិអារូបា មកពីទ្វីបអាមេរិកខាងត្បូងវិញម្ដង នាថ្ងៃទី២៥ ខែមីនាខាងមុខ នៅពហុកីឡដ្ឋានជាតិ(អូឡាំពិក) រាជធានីភ្នំពេញ ៕ អត្ថបទ លី ឈុនឡា

បណ្ដាញសង្គម

ព័ត៌មានថ្មីៗ

ក្រសួងការពារជាតិកម្ពុជា បដិសេធយ៉ាងដាច់អហង្ការចំពោះការអះអាងរបស់ថៃ ថាប្រាសាទតាក្របី ស្ថិតក្នុងអធិបតេយ្យរបស់ខ្លួន
07/07/2025 10:07 AM
Facebook Telegram Linkin
យន្តហោះពន្លត់អគ្គិភ័យ ត្រូវបានដាក់ពង្រាយដើម្បីទប់ស្កាត់ចំហេះព្រៃនៅភាគខាងត្បូងប្រទេសបារាំង
07/07/2025 10:07 AM
Facebook Telegram Linkin
ចិន សងសឹកបម្រាមរបស់ប្លុកអឺរ៉ុប ដោយរឹតបន្តឹងការនាំចូលឧបករណ៍វេជ្ជសាស្ត្រតម្លៃរាប់លានដុល្លារ
07/07/2025 10:07 AM
Facebook Telegram Linkin
រដ្ឋមន្ត្រីអាកាសចរណ៍ស៊ីវិល ចុះពិនិត្យអាកាសយានដ្ឋានអន្តរជាតិតេជោ ដើម្បីត្រៀម​ផ្តល់​វិញ្ញា​បន​ប័ត្រ​ដល់ប្រតិបត្តិករ
07/07/2025 10:07 AM
Facebook Telegram Linkin
ព្យុះទីហ្វុងDanas នៅកោះតៃវ៉ាន់ បណ្តាលឲ្យមនុស្សស្លាប់ និងរងរបួសក្នុងគ្រោះមហន្តរាយដ៏កម្រ
07/07/2025 10:07 AM
Facebook Telegram Linkin
លោក Zelenskiy ថាជំនួបទូរសព្ទចុងក្រោយបំផុតជាមួយលោក Trump ប្រកបដោយផ្លែផ្កាយ៉ាងល្អ
07/07/2025 10:07 AM
Facebook Telegram Linkin
បណ្តាប្រទេស BRICS រិះគន់ការដំឡើងពន្ធរបស់លោកTrump និងថ្កោលទោសការវាយប្រហារលើអ៊ីរ៉ង់
07/07/2025 10:07 AM
Facebook Telegram Linkin
ស្ពានមិត្តភាពកម្ពុជា-ចិន មេគង្គក្រចេះ” គ្រោងនឹងបើកឱ្យឆ្លងកាត់បណ្តោះអាសន្ន អំឡុង​ពិធី​បុណ្យ​ដា​​ក់បិណ្ឌ និងភ្ជុំបិណ្ឌនៅខែកញ្ញាខាងមុខនេះ សម្រាប់យានយន្តធុនតូច
07/07/2025 10:07 AM
Facebook Telegram Linkin
អ៊ីរ៉ង់ទាមទារឲ្យមានការទទួលខុសត្រូវពីអ៊ីស្រាអែល និងអាមេរិក បន្ទាប់ពីសង្គ្រាមឈ្លានពាន
07/07/2025 10:07 AM
Facebook Telegram Linkin
សម្តេចធិបតី ហ៊ុន ម៉ាណែត ដឹកនាំកិច្ចប្រជុំឧត្ដមក្រុមប្រឹក្សាពិគ្រោះ និងផ្តល់យោបល់លើកទី៣
07/07/2025 10:07 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.