នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កីឡាការិនី​លោតទឹកកាណាដា Molly Carlson បង្កើតប្រវត្តិសាស្ត្រ ក្លាយ​ជា​កីឡាការិនី​ដំបូង​លោត​ពី​លើផ្ទាំងទឹកកក
Bruno Fernandes បន្តកាន់តំណែងប្រធានក្រុម Man Utd ដដែល ក្រោយរិះគន់លោក Michael Carrick
អ្នកគ្រប់គ្រងក្លិបនាគរាជចតុមុខ៖ ការហាត់កីឡាប្រយុទ្ធ ត្រូវការអ្វីថ្មី ប្លែក ដើម្បអភិវឌ្ឍន៍ខ្លួន និងបើកឱកាសកាន់តែធំ
រត់ប្រណាំងរាត្រី ថ្ងៃឆ្លងឆ្នាំសាកល ជាព្រឹត្តិការណ៍ថ្មីប្លែក បំផុសចលនាកីឡាឱ្យផុសផុលក្នុងរាជធានីភ្នំពេញ

ព័ត៌មានកីឡា

ឯកឧត្តម អ៊ុក សិទ្ធិជាតិ ទទួលបានការគាំទ្រជាឯកច្ឆ័ន្ទ ធ្វើជាប្រធាន​សហព័ន្ធ​កីឡា​បាល់បោះ​កម្ពុជា អាណត្តិទី៩

2026/08/31 12:57:40 pm        349
Facebook Telegram Linkin
ឯកឧត្តម អ៊ុក សិទ្ធិជាតិ សមាជិកសភា និងតំណាងរាស្រ្តខេត្តព្រៃវែង ត្រូវបានបោះឆ្នោតជាឯកច្ឆ័ន្ទជ្រើសតាំងជាប្រធានសហព័ន្ធកីឡាបាល់បោះកម្ពុជា អាណត្តិទី៩ ឆ្នាំ២០២៤-២០២៨ បន្ទាប់ពីឯកឧត្តមបានចូលរួមដឹកនាំសហព័ន្ធ ក្នុងនាមប្រធានស្ដីទីមួយរយៈពេលធំចុងក្រោយ។ការបោះឆ្នោតនេះ ធ្វើឡើងក្នុងសន្និបាតវិសាមញ្ញសហព័ន្ធកីឡាបាល់បោះកម្ពុជា កាលពីថ្ងៃទី ៣០ ខែសីហា ឆ្នាំ២០២៦ កន្លងទៅ នៅនាយកដ្ឋានរៀបចំព្រឹត្តិការណ៍ និស្ថិតិកីឡា ដោយមានការចូលរួមជាសក្ខីភាពពីឯកឧត្តម ប៉ុន សុខ អគ្គនាយកនៃអគ្គនាយកដ្ឋានកីឡា និងឯកឧត្តម តែម ម៉ឺន អគ្គលេខាធិការរងគណៈកម្មាធិការជាតិអូឡាំពិកកម្ពុជាផងដែរ។ក្នុងនាមប្រធានសហព័ន្ធថ្មី និងជាឥស្សរជនឆ្នើមមួយរូបក្នុងវិស័យកីឡា ឯកឧត្តម អ៊ុក សិទ្ធិជាតិ បានសម្ដែងសេចក្ដីរីករាយក្នុងការចូលរួមដឹកនាំ និងអភិវឌ្ឍវិស័យកីឡាបាល់បោះកម្ពុជា ដែលកំពុងមានការអភិវឌ្ឍ និងរីកចម្រើន ដើម្បីកសាងបាននូវធនធានមនុស្សប្រកបដោយសក្ដានុពល សម្រាប់ត្រៀមការប្រកួតថ្នាក់ជាតិ និងអន្ដរជាតិនានា។ទន្ទឹមជាមួយការបោះឆ្នោតជ្រើសរើសគណៈកម្មាធិការប្រតិបត្តិដឹកនាំបន្ដ អាណត្តិទី៩ នេះដែរ ក្រៅពីឯកឧត្តម អ៊ុក សិទ្ធិជាតិ ជាប្រធាន គឺមានលោក គួច វរ្ម័ន ជាអនុប្រធានទី១ ព្រមទាំងលោកបណ្ឌិត វង្ស ប៊ុនឥន្រ្ទាវុធ, ព្រមទាំងលោកបណ្ឌិត វង្ស ប៊ុនឥន្រ្ទាវុធ ឯកឧត្តម ប៉ុន សុខ, ឯកឧត្តម យិត ភីរៈ, លោក ហ៊ូ ចៀនហៃ និងអ្នកឧញ្ញ៉ា លី ឃុនថៃ ជាអនុប្រធាន ។ ចំណែកអគ្គលេខាធិការ គឺលោក កូឡេដួយ អាបាយូមី និងមានលោកស្រី អ៊ុយ ច័ន្ទធីរ៉ាត អគ្គហេរញ្ញឹក រួមជាមួយសមាជិកចំនួន ១១នាក់ផ្សេងទៀត។បន្ថែមលើនេះ អង្គសន្និបាតវិសាមញ្ញ ដែលដឹកនាំដោយឯកឧត្តម អ៊ុក សិទ្ធិជាតិ ក៏បានតែងតាំងអគ្គលេខាធិការង ៤រូបផ្សេងទៀត រួមមានលោក កៅ កាន់ណាលី, លោក អ៊ុំ សូផាណារ័ត្ន, លោក ឆាយ សុភាព និងលោក ម៉ោញ សេរីវ៉ាត ដើម្បីចូលរួមជំរុញសកម្មភាពការងារអគ្គលេខាធិការដ្ឋាន និងសកម្មភាពអភិវឌ្ឍ ទាំងការងាររដ្ឋបាល បច្ចេកទេស និងហេដ្ឋារចនាសម្ព័ន្ធ ដើម្បីជំរុញការអភិវឌ្ឍវិស័យកីឡាបាល់បោះកម្ពុជាឲ្យកាន់តែរីកចម្រើនថែមទៀតផង៕ អត្ថបទ លី ឈុនឡា

គ្រូជប៉ុន យេម៉ែន និងកូវ៉ែត ផ្ដោតកៅអីវគ្គបន្ដ ខណៈគ្រូកម្ពុជា ចាត់ទុកជាឱកាសល្អ ដែលបានលេងទល់ក្រុមខ្លាំងៗ

2026/08/31 12:04:27 pm        303
Facebook Telegram Linkin
គ្រូបង្វឹកក្រុមជម្រើសជាតិយុវជនអាយុក្រោម ២០ឆ្នាំជប៉ុន យេម៉ែន និងកូវ៉ែត ដែលស្ថិតនៅពូលG ជាមួយក្រុមជម្រើសជាតិយុវជនអាយុក្រោម ២០ឆ្នាំកម្ពុជា ក្នុងយុទ្ធនាការប្រកួតជម្រុះពានរង្វាន់ AFC U20 Asian Cup China 2027 ដែលកម្ពុជានឹងធ្វើជាម្ចាស់ផ្ទះ និងត្រូវចាប់ផ្ដើមការប្រកួតនៅថ្ងៃទី៣១ ខែសីហានេះ សុទ្ធតែផ្ដោតសំខាន់លើកៅអីវគ្គបន្ដ ស្របពេលលោក Yasuhir Yoshida គ្រូបង្វឹកក្រុមគោព្រៃជំទង់កម្ពុជា ចាត់ទុកនេះគឺជាឱកាសល្អ ដែលបានលេងទល់ក្រុមខ្លាំងៗ។ក្នុងសន្និសីទសារព័ត៌មានមុនការប្រកួត កាលពីថ្ងៃទី៣០ ខែសីហា គ្រូបង្វឹកជនជាតិជប៉ុន លោក Yasuhir Yoshida ដែលបានសម្ដែងក្ដីរីករាយ ដែលទទួលបានទំនុកចិត្តពីសហព័ន្ធ ដើម្បីដឹកនាំក្រុមជម្រើសជាតិអាយុក្រោម ២០ឆ្នាំកម្ពុជា។ លោកថា ការប្រកួតនេះ គឺជាំឱកាសដ៏ល្អមួយ សម្រាប់កីឡាករវ័យក្មេងកម្ពុជា ក្នុងការប្រកួតប្រជែងជាមួយក្រុមខ្លាំងៗ និងទទួលបានបទពិសោធន៍កាន់តែច្រើន។ដោយឡែកលោក Satoshi Yamaguchi គ្រូបង្វឹកក្រុមជម្រើសជាតិ U20 ជប៉ុនវិញ បានសម្ដែងការគោរពគ្រប់គូប្រជែងក្នុងពូល រួមទាំងម្ចាស់ផ្ទះកម្ពុជា ប៉ុន្ដែលោកនឹងព្យាយាមធ្វើឲ្យបានល្អគ្រប់ការប្រកួត ដើម្បីសម្រេចគោលដៅឡើងទៅវគ្គបន្ដ។ចំណែកលោក Mohammed Saleh Ali Al-Nufiay គ្រូបង្វឹកក្រុមជម្រើសជាតិ U20 យេម៉ែន ក៏បានបង្ហាញការតាំងចិត្តយ៉ាងមុតមាំ ក្នុងការប្រជែងកៅអីវគ្គបន្ដ ដើម្បីឈានទៅសម្រេចគោលដៅឡើងវគ្គពាក់កណ្ដាលផ្ដាច់ព្រ័ត្រក្នុងពានយុវជនអាយុក្រោម ២០ឆ្នាំប្រចាំទ្វីបនេះ។រីឯលោក Ferdo Milin គ្រូបង្វឹកក្រុមជម្រើសជាតិ U20 កូវ៉ែត ទោះបីដឹងថា ពិបាកប្រជែងជាមួយក្រុមខ្លាំងៗ រួមពូល ពិសេសជប៉ុន និងយេម៉ែន តែលោកពិតជារីករាយក្នុងដំណើរមកដល់កម្ពុជា ហើយលោកនឹងព្យាយាមឲ្យអស់ពីលទ្ធភាព ដើម្បីមានឱកាសឡើងវគ្គបន្ដផងដែរ។គួរដឹងថា វគ្គជម្រុះពូលG នៃពានរង្វាន់ AFC U20 Asian Cup China 2027 ដែលកម្ពុជានឹងធ្វើជាម្ចាស់ផ្ទះនេះ នឹងធ្វើឡើងពីថ្ងៃទី៣១ ខែសីហា ដល់ថ្ងៃទី៦ ខែកញ្ញាខាងមុខ ខណៈប្រកួតដំបូង ក្រុមម្ចាស់ផ្ទះកម្ពុជា នឹងត្រូវជួបក្រុមយេម៉ែន មុនគេ មុនបន្ដជួបក្រុមខ្លាំង U20 ជប៉ុន នាថ្ងៃទី៣ ខែកញ្ញា និងចុងក្រោយ ត្រូវជួបក្រុមជម្រើសជាតិ U20 កូវ៉ែត នាថ្ងៃទី៦ ខែកញ្ញា ដើម្បីកាត់សេចក្ដីរកក្រុមកំពូលតារាងឡើងទៅជុំផ្ដាច់ព្រ័ត្រ នៅប្រទេសចិន នាឆ្នាំ២០២៧ ខណៈក្រុមលេខ២ នឹងត្រូវចាំអ៊ុតលទ្ធផលផ្ទៀងផ្ទាត់ជាមួយក្រុមលេខ២ ក្នុងចំណោម ៨ពូល ដើម្បីស្វែងរកក្រុមលេខ២ ល្អជាងគេ ២ក្រុមឡើងទៅបង្គ្រប់កៅអី ១៦ក្រុមចុងក្រោយ នៃព្រឹត្តិការណ៍ប្រចាំទ្វីប ២ឆ្នាំម្ដងនេះ៕ អត្ថបទ លី ឈុនឡា

លើសពីកីឡា! កម្មវិធី «បេះដូងសប្បុរសដើម្បីភូមិរង់ចាំ» បង្ហាញពីមហាកម្លាំងសាមគ្គី និង​បេះដូង​ខ្មែរតែមួយ

2026/08/31 11:24:14 am        241
Facebook Telegram Linkin
ព្រឹត្តិការណ៍ប្រកួតបាល់ទាត់មិត្តភាពសប្បុរសធម៌ ក្រោមប្រធានបទ «បេះដូងសប្បុរសដើម្បីភូមិរង់ចាំ» បានស្តែងឱ្យឃើញយ៉ាងច្បាស់ពីស្មារតីសាមគ្គីភាព និងទឹកចិត្តរបស់មហាក្រុមគ្រួសារខ្មែរតែមួយ ដោយមិនបោះបង់ពលរដ្ឋណាម្នាក់ឲ្យនៅឯកោឡើយ ដែលបង្ហាញពីការរួបរួម និងមហាកម្លាំងសាមគ្គីខ្មែរ និង បេះដូងខ្មែរនៅតែជាមួយខ្មែរជានិច្ច។នេះបើតាមឯកឧត្តម គួច វែងស្រ៊ុន អ្នកចាត់ការទូទៅក្រុមបាល់ទាត់ ស.ស.យ.ក អលស្ដារ បន្ទាប់ពីព្រឹត្តិការណ៍បាល់ទាត់មិត្តភាពសប្បុរសធម៌ដ៏ធំ កាលពីចុងសប្ដាហ៍កន្លងទៅ នៅកីឡដ្ឋានស្ដាតចាស់ ដែលមានការចូលរួមទស្សនា គាំទ្រ ពិសេសការចូលរួមបរិច្ចាគយ៉ាងច្រើនពីថ្នាក់ដឹកនាំ និងសប្បុរសជននានា ដើម្បីផ្ដល់ការគាំទ្រដល់អ្នកភូមិរង់ចាំ នាពេលឆាប់ៗខាងមុខ។ក្រោមការដឹកនាំ និងគាំទ្រពីឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា(ស.ស.យ.ក) និងជាប្រធានក្រុមបាល់ទាត់ ស.ស.យ.ក អលស្ដារ ព្រឹត្តិការណ៍កីឡា ផ្សារភ្ជាប់ប្រជាពលរដ្ឋភៀសសឹក នៅភូមិរង់ចាំនេះ បានចាប់ផ្ដើមនៅថ្ងៃទី១១ ខែសីហា ដោយផ្ដើមពីការប្រកួតមិត្តភាព ទល់នឹងក្រុមរួមគ្នាដើម្បីកំពង់ស្ពឺ មុនបន្ដការប្រកួតទី២ ទល់ក្រុមរដ្ឋបាលខេត្តកណ្ដាល កាលពីថ្ងៃទី១៨ ខែសីហា និងចុងក្រោយ គឺព្រឹត្តិការណ៍ដ៏ធំ កាលពីថ្ងៃទី២៩ ខែសីហា នៅរាជធានីភ្នំពេញ នាកីឡដ្ឋានស្ដាតចាស់។ឯកឧត្តម គួច វែងស្រ៊ុន បានបញ្ជាក់ថា ព្រឹត្តិការណ៍នេះ មិនត្រឹមបង្កើតនូវបរិយាកាសរីករាយ និងរឹតចំណងមិត្តភាពក្រោមពាក្យស្លោក «កីឡា មិត្តភាព សប្បុរស» ប៉ុណ្ណោះទេ ប៉ុន្ដែជាបេសកកម្មមនុស្សធម៌យ៉ាងជ្រាលជ្រៅ ក្នុងការកៀរគរថវិកា និងស្បៀងអាហារចាំបាច់ ដើម្បីឆ្លើយតបចំពោះតម្រូវការជាក់ស្តែង និងជួយសម្រាលបន្ទុកជីវភាពជូនប្រជាពលរដ្ឋភៀសសឹកដែលកំពុងរស់នៅក្នុង «ភូមិរង់ចាំ» ។ ឯកឧត្តមមានមោទនភាព បន្ទាប់ពីបានឃើញមហាកម្លាំងសាមគ្គីខ្មែរ ដែលនៅជួរក្រោយ ហើយសង្ឃឹមថា ផែនការចំពោះមុខ គឺការរៀបចំកញ្ចប់អំណោយ នឹងមានការស្ម័គ្រចិត្តកាន់តែច្រើនបន្ថែមទៀត។ជាមួយគ្នាលោកស្រី មាន សុវណ្ណា ប្រជាពលរដ្ឋ ដែលបានចូលរួមព្រឹត្តិការណ៍កីឡាសប្បុរសធម៌នេះ បានសម្ដែងការគាំទ្រ ចំពោះការផ្ដួចផ្ដើមឲ្យកម្មវិធីដើម្បីផ្សារភ្ជាប់នូវក្ដីនឹករឮក ក៏ដូចជាការកៀរគរនូវជំនួយ សម្រាប់ជួយដល់អ្នកភូមិរង់ចាំ។ លោកស្រីថា ព្រឹត្តិការណ៍នេះ ពិតជាល្អ មិនត្រឹមបង្ហាញនូវការចង់ចាំ និងចែករំលែកជួយគ្នាក្នុងគ្រាលំបាកនោះទេ ក៏ផ្សារភ្ជាប់ការជួយពង្រឹងស្មារតីកុមារនៅភូមិរង់ចាំ ដោយរង់ផលប៉ះពាល់យ៉ាងធ្ងន់ធ្ងរ ដោយសារការឈ្លានពានពីប្រទេសជិតខាងផងដែរ។សូមបញ្ជាក់ថា ទោះបីកម្មវិធីប្រកួតបាល់ទាត់សប្បុរសធម៌របស់ក្រុមបាល់ទាត់ ស.ស.យ.ក អលស្ដារ ត្រូវបានបញ្ចប់ តែការចូលរួមបរិច្ចាគជាមួយកម្មវិធី «បេះដូងសប្បុរសដើម្បីភូមិរង់ចាំ» នៅតែបន្ដ ពោលគឺនៅសល់ ១ថ្ងៃទៀត សម្រាប់ប្រជាពលរដ្ឋមានបំណងចង់ចូលរួមបរិច្ចាគ ទាំងសម្ភារ ឬអាហារក្រៀមផ្សេងៗ អាចនាំយកទៅប្រគល់ជូនក្រុមការងារដោយផ្ទាល់នៅអគារ The Kampus ឬអាចបរិច្ចាគតាមរយៈ QR Code ដែលក្រុមការងារបានរៀបចំផ្សព្វផ្សាយកន្លងមក។បន្ទាប់មកក្រុមការងារ ស.ស.យ.ក អលស្ដារ នឹងរៀបចំថវិកា និងសម្ភារទាំងអស់ ដើម្បីច្នៃជាកញ្ចប់អំណោយគោលសំខាន់ៗចំនួន ២ សម្រាប់ត្រៀមនាំយកទៅប្រគល់ជូនប្រជាពលរដ្ឋនៅភូមិរង់ចាំប្រមាណ ៣៣១៣គ្រួសារ ព្រមទាំងកុមារតូចៗ ដែលនឹងដឹកនាំផ្ទាល់ដោយឯកឧត្តម ហ៊ុន ម៉ានី ដើម្បីបានសួរសុខទុក្ខប្រជាពលរដ្ឋដោយផ្ទាល់ និងនាំយកនូវសេចក្តីស្រឡាញ់ ក្តីសង្ឃឹម និងការលើកទឹកចិត្តចេញពីបេះដូងរបស់បងប្អូនមហាគ្រួសារខ្មែរ ជូនដល់បងប្អូននៅ «ភូមិរង់ចាំ» ឱ្យកាន់តែជិតស្និទ្ធ នាថ្ងៃទី១២-១៣ ខែកញ្ញាខាងមុខ អមជាមួយការត្រៀមរៀបចំនូវកម្មវិធីសំខាន់ៗជាច្រើនផងដែរ៕ អត្ថបទ លី ឈុនឡា

ព្រះខ័នរាជស្វាយរៀងគ្រងតំណែងជើងឯកពានរង្វាន់បើករដូវកាល Cambodian Super Cup ជាលើកទីទី៣ជាប់គ្នា

2026/08/30 08:38:20 pm        205
Facebook Telegram Linkin
ព្រះខ័នរាជស្វាយរៀងគ្រងតំណែងជើងឯកពានរង្វាន់បើករដូវកាល Cambodian Super Cup ជាលើកទីទី៣ជាប់គ្នាក្នុងប្រវត្តិសាស្ត្រ ក្រោយឈ្នះវិសាខា ២ទល់នឹង១ យប់ថ្ងៃអាទិត្យ នៅពហុកីឡថ្ឋានជាតិមរតកតេជោ។ជំនួបនេះក្នុងវគ្គទី១ ក្រុមទាំងពីរមានឱកាសរៀងៗខ្លួន តែគ្មានក្រុមណាមួយអាចទាត់បញ្ចូលទីគ្នាបានទេ។ វគ្គនេះវិសាខាបាត់បង់កីឡាករមួយរូប បន្ទាប់ពីស រតនា បង្ករកំហុសរារាំងឱកាសរកគ្រាប់បាល់របស់កីឡាករ មិន រតនៈ នាទីទី៣៨។ចូលវគ្គទី២ ទោះបីសល់គ្នា១០នាក់ វិសាខានៅតែមានឱកាសដាក់សម្ពាធលើព្រះខ័នរាជស្វាយរៀងដែរ ប៉ុន្តែយ៉ាងណាក៏ដោយ ព្រះខ័នរាជស្វាយរៀងនៅតែអាចទប់ទល់ស្ថានការណ៍នេះបាន។ផ្ទុយទៅវិញ នៅនាទីទី៧៨ ព្រះខ័នរាជស្វាយរៀងបើកការនាំមុខមុនដោយគ្រាប់បាល់របស់កីឡាករ PEPRAH Kwame ។ លុះចុងម៉ោង ពោលនាទីទី៩០ កីឡាករសៀង ចន្ធា ទាត់បញ្ចូលទីគ្រាប់ទី២ឱ្យក្រុមនាំមុខវិសាខា ២ទល់០ មុនពេលដែលកីឡាករ Ewolo តែតបញ្ចូលទីឱ្យវិសាខាកាត់បន្ថយគម្លាតនាំមុខ។ចប់ការប្រកួត ព្រះខ័នរាជស្វាយរៀងឈ្នះវិសាខា ២ទល់១ និងក្លាយជាម្ចាស់ពាន Cambodian Super Cup ជាលើកទី៣ជាប់គ្នា។សូមជម្រាបជូនបន្ថែមថាលីគកំពូលកម្ពុជារដូវកាល២០២៦-២០២៧ នឹងចាប់ផ្ដើមពីថ្ងៃទី៥ ខែកញ្ញា ឆ្នាំ២០២៦ ដល់ខែឧសភា ឆ្នាំ២០២៧៕

Liverpool កៀកនឹងកិច្ចព្រមព្រៀងតម្លៃ ១២០លានផោនផ្ទេរ Bradley Barcola ពី PSG

2026/08/28 03:28:54 pm        305
Facebook Telegram Linkin
ក្លិបហង្សក្រហម Liverpool កំពុងខិតជិតឈានដល់ការចុះហត្ថលេខាលើខ្សែប្រយុទ្ធសញ្ជាតិបារាំង Bradley Barcola ពី Paris Saint-Germain ក្នុងកិច្ចព្រមព្រៀងដែលអាចមានតម្លៃរហូតដល់ ១២០លានផោន។ដំបូង PSG បានវាយតម្លៃ Barcola ក្នុងតម្លៃប្រមាណ ១៤៥លានផោន ប៉ុន្តែ Liverpool កំពុងត្រៀមព្រមព្រៀងលើកញ្ចប់ផ្ទេរដែលមានតម្លៃយ៉ាងហោចណាស់ ១០០លានផោន ហើយអាចកើនដល់ ១២០លានផោន អាស្រ័យលើសមិទ្ធផលផ្ទាល់ខ្លួនរបស់កីឡាករ និងភាពជោគជ័យរបស់ក្រុម។Barcola ជាកីឡាករជើងស្តាំ ប៉ុន្តែតួនាទីដែលគេចូលចិត្តបំផុតគឺលេងនៅតំបន់ ស្លាបឆ្វេង។ ការមកដល់របស់គេអាចធ្វើឱ្យមានភាពមិនច្បាស់លាស់កាន់តែខ្លាំងចំពោះអនាគតរបស់ Cody Gakpo នៅ Anfield។Barcola បានក្លាយជាគោលដៅសំខាន់របស់ Liverpool ខណៈក្លិបកំពុងព្យាយាមបង្កើនប្រសិទ្ធភាពនៅតំបន់ប្រយុទ្ធ បន្ទាប់ពីការចាកចេញរបស់ Luis Diaz និង Mohamed Salah។ខ្សែប្រយុទ្ធបារាំងរូបនេះបានផ្លាស់ពី Lyon ទៅ PSG ក្នុងឆ្នាំ២០២៣ ក្នុងតម្លៃដែលត្រូវបានរាយការណ៍ថា ៣៨.៥លានផោន។ ចាប់តាំងពីពេលនោះមក Barcola បានឈ្នះជើងឯក Ligue1 ចំនួន៣ដង, Champions League ចំនួន២ដង, French Cup ចំនួន២ដង ព្រមទាំង UEFA Super Cup និង FIFA Intercontinental Cup។ក្នុងការប្រកួត World Cup រដូវក្តៅនេះ Barcola ក៏បានបង្ហាញទម្រង់លេងល្អ ដោយស៊ុតបញ្ចូលទីបាន ៣គ្រាប់សម្រាប់ក្រុមជម្រើសជាតិបារាំង។ក្រៅពីលេងនៅស្លាបឆ្វេង Barcola ក៏អាចលេងនៅ ស្លាបស្តាំ ឬតំបន់កណ្តាល បានផងដែរ។ សមត្ថភាពលេងបានច្រើនតួនាទីរបស់គេ អាចផ្តល់ជម្រើសបន្ថែមសម្រាប់ Liverpool ជាពិសេសក្នុងការជួយជំនួស Alexander Isak ខណៈខ្សែប្រយុទ្ធ Hugo Ekitike កំពុងសម្រាកព្យាបាលរបួសសរសៃពួរ៕ អត្ថបទ៖នាង សុភាវុធ

ជម្រើសជាតិតេក្វាន់ដូ WT ២រូបត្រៀមចូលរួមការប្រកួតកីឡាអាស៊ី នៅជប៉ុន ឆ្នាំ២០២៦

2026/08/28 03:05:20 pm        366
Facebook Telegram Linkin
កីឡាករ កីឡាការិនីតេក្វាន់ដូ WT ២រូប គឺកីឡាករ វ៉ា មិថុនា និងកីឡាការិនី ម៉ម ជូលី កំពុងហ្វឹកហាត់បង្កើនគុណភាពបច្ចេកទេស ត្រៀមចេញទៅប្រកួតកីឡាអាស៊ី នៅប្រទេសជប៉ុន នាខែកញ្ញា ឆ្នាំ២០២៦ បន្ទាប់ពីបេក្ខភាពទាំងពីររូបបានប្រកួតជាប់វគ្គជម្រុះ ជើងឯកអាស៊ី នៅប្រទេសម៉ុងហ្គោលី កាលពីខែមិថុនា ឆ្នាំ២០២៦។ លោក ជាតិ ខេមរា គ្រូជំនួយជម្រើសជាតិតេក្វាន់ដូ WT នៃខេមរសហព័ន្ធតេក្វាន់ដូបានគូសបញ្ជាក់ថា សហព័ន្ធត្រៀមបញ្ជូនគ្រូបង្វឹក គ្រូជំនួយ និងកីឡាករ កីឡាការិនីសរុប៤នាក់ ត្រៀមចូលរួមប្រកួតកីឡាដ៏ធំរៀងរាល់៤ឆ្នាំម្តងប្រចាំទ្វីបអាស៊ី ឆ្នាំ២០២៦នេះ រួមមានលោកគ្រូ ឆយ យ៉ុងសុក គ្រូបង្វឹកជនជាតិកូរ៉េខាងត្បូង លោក ជាតិ ខេមរា គ្រូជំនួយ និងកីឡាករ វ៉ា មិថុនា ប្រកួតលើវិញ្ញាសាក្រោម ៨០គ.ក្រ និងកីឡាការិនី ម៉ម ជូលី ប្រកួតក្នុងប្រភេទទម្ងន់ក្រោមទម្ងន់ ៥៧គ.ក្រ។ បេក្ខភាពកីឡាករ កីឡាការិនីតេក្វាន់ដូ WT កម្ពុជាទាំង២នាក់នេះ ដែលត្រៀមចេញទៅប្រកួតកីឡាអាស៊ី នៅប្រទេសជប៉ុន គឺបន្ទាប់ពីបានឆ្លងកាត់ការប្រកួតជាប់វគ្គជម្រុះ ការប្រកួតជើងឯកអាស៊ី នៅប្រទេសម៉ុងហ្គោលី កាលពីខែឧសភា ឆ្នាំ២០២៦កន្លងទៅ។ ក្នុងការត្រៀមខ្លួននេះ កីឡាករ កីឡាការិនី ទើបនឹងចូលរួមប្រកួតប្រជែង នៅប្រទេសវៀតណាម កន្លងទៅថ្មីៗនេះ ដោយកីឡាការិនី ម៉ម ជូលី ដណ្តើមេដាយមាស១គ្រឿង លើវិញ្ញាសាក្រោម ៥៧គ.ក្រ និងកីឡាករ វ៉ា មិថុនា ដណ្តើមបានមេដាយសំរឹទ្ធិ១គ្រឿង ក្រោមទម្ងន់ ៨០គ.ក្រ។សូមបញ្ជាក់ថា ព្រឹត្តិការណ៍កីឡាអាស៊ីលើកទី២០ នៅប្រទេសជប៉ុន “The 20th Asian Games Aichi-Nagoya 2026” នឹងប្រព្រឹត្តទៅចាប់ពីថ្ងៃទី ១៩ ខែកញ្ញា ដល់ថ្ងៃទី៤ ខែតុលា ឆ្នាំ២០២៦ ។ ព្រឹត្តិការណ៍នេះមានកីឡាចំនួន ៤៣ ប្រភេទ មកពី ៤៥ ប្រទេសចូលរួមប្រកួតប្រជែងដណ្តើមមេដាយ ក្នុងនោះកម្ពុជានឹងបញ្ជូន ១៣ប្រភេទកីឡា ចូលរួម ក្នុងនោះក៍មានប្រភេទកីឡាតេក្វាន់ដូ WT ផងដែរ ៕

PSG ជួប Barcelona និង Man City ខណៈ Real Madrid ជួប Inter និង Arsenal វគ្គដំណាក់កាលលីគ Champions League

2026/08/28 02:36:26 pm        293
Facebook Telegram Linkin
ក្រុមការពារតំណែងជើងឯក Paris Saint-Germain នឹងត្រូវជួបគូប្រជែងធំៗដូចជា Barcelona និង Manchester City ក្នុងវគ្គដំណាក់កាលលីគ (League Phase) នៃក្របខណ្ឌ UEFA Champions League រដូវកាលនេះ ខណៈ Real Madrid ដែលជាជើងឯក ១៥ សម័យ ត្រូវប្រឈមមុខជាមួយ Inter Milan និង Arsenal ក្រោយការចាប់ឆ្នោតដែលរៀបចំនៅទឹកដី Monaco កាលពីថ្ងៃព្រហស្បតិ៍។PSG ដែលដឹកនាំដោយលោក Luis Enrique បានឈ្នះពាន Champions League កាលពីខែឧសភា បន្ទាប់ពីយកឈ្នះ Arsenal ដោយបាល់ ១១ ម៉ែត្រកាត់សេចក្តីក្នុងវគ្គផ្តាច់ព្រ័ត្រ ហើយពេលនេះពួកគេនឹងត្រូវប្រកួតក្នុងផ្ទះជាមួយ Barcelona និងធ្វើដំណើរទៅជួប Manchester City។ក្រៅពីនេះ PSG នឹងត្រូវជួប Roma, Aston Villa, Galatasaray, Villarreal, Slovan Bratislava និង Como ក្នុងវគ្គ League Phase នេះផងដែរ។ទម្រង់ប្រកួត League Phase ត្រូវបានដាក់ឱ្យប្រើប្រាស់ជាលើកដំបូងនៅរដូវកាល ២០២៤-២៥ ហើយនេះ ជារដូវកាលទី៣ ដែលប្រើប្រាស់ទម្រង់ថ្មីនេះ។សម្រាប់ Real Madrid ពួកគេនឹងបើកទ្វារកីឡដ្ឋានទទួលស្វាគមន៍ Inter Milan ហើយត្រូវធ្វើដំណើរទៅជួប Arsenal នៅទឹកដីអង់គ្លេស។ ក្រៅពីនេះ Real Madrid ក៏ត្រូវជួប PSV Eindhoven, Roma, RB Leipzig, Shakhtar Donetsk, LASK និង AEK Athens ផងដែរ។ការប្រកួតរវាង Real Madrid និង Inter Milan ក៏នឹងមានភាពពិសេសផងដែរ ដោយលោក Jose Mourinho ដែលទើបត្រឡប់មកដឹកនាំ Real Madrid ជាលើកទី២ កាលពីខែមិថុនា នឹងត្រូវជួបអតីតក្លិបរបស់លោក។Mourinho ធ្លាប់ដឹកនាំ Inter Milan ឈ្នះពាន Champions League ក្នុងឆ្នាំ ២០១០ មុនពេលចាកចេញទៅកាន់ Real Madrid។ចំណែក Bayern Munich ដែលជាក្រុមឈ្នះពានអឺរ៉ុប ៦ លើក ក៏មានការប្រកួតធំៗជាច្រើនផងដែរ។ ពួកគេនឹងត្រូវបើកទ្វារផ្ទះទទួល Arsenal ខណៈត្រូវធ្វើដំណើរទៅជួប Atletico Madrid និង Manchester United នៅក្រៅដី។ការប្រកួតជុំដំបូងក្នុងដំណាក់កាលលីគ នឹងចាប់ផ្តើមនៅខែកញ្ញាខាងមុខ៕ អត្ថបទ៖នាង សុភាវុធ

យុវជនកម្ពុជា ស្ថិតក្នុងពូលA នៃវគ្គជម្រុះពានរង្វាន់ AFC U17 Asian Cup 2027

2026/08/28 12:11:37 pm        43
Facebook Telegram Linkin
ក្រុមបាល់ទាត់ជម្រើសជាតិយុវជនអាយុក្រោម ១៧ឆ្នាំកម្ពុជា បានចាប់ឆ្នោតក្នុងពូល A ក្នុងការប្រកួតជម្រុះជើងឯកយុវជនអាយុក្រោម ១៧ឆ្នាំប្រចាំទ្វីបអាស៊ី (AFC U17 Asian Cup) ឆ្នាំ២០២៧ ខណៈការប្រកួតនឹងប្រព្រឹត្តទៅពីថ្ងៃទី៨ ដល់ថ្ងៃទី២០ ខែវិច្ឆិកា ឆ្នាំ២០២៦ ខាងមុខ។សម្រាប់ព្រឹត្តិការណ៍ជម្រុះបាល់ទាត់យុវជនកម្រិតទ្វីបនេះ មានបេក្ខភាព ៣៥ប្រទេសចូលរួម និងបែងចែកជា ៧ពូល ពីពូលA ដល់ពូលG ក្នុងមួយពូលមាន ៥ក្រុម ក្នុងនោះក្រុមជម្រើសជាតិអាយុក្រោម ១៧ឆ្នាំកម្ពុជា ស្ថិតក្នុងពូលA ជាមួយក្រុមម្ចាស់ផ្ទះមីយ៉ាន់ម៉ា ឥណ្ឌូណេស៊ី អាហ្វហ្គានីស្ថាន និងហ្វីលីពីន។ដោយឡែកពូល B មានម្ចាស់ផ្ទះថៃ អ៊ីរ៉ាក់ ហុងកុង ឆាយន្នីស តៃប៉ិ និង ម៉ាល់ឌេវ។ ពូល C មានម្ចាស់ផ្ទះអេមីរ៉ាតអារ៉ាប់រួម បង់ក្លាដែស ស៊ីរី ប៊ូតង់ និងម៉ាកាវ។ ពូល D មានម្ចាស់ផ្ទះឡាវ អ៊ីរ៉ង់ ហ្ស៊កដានី ប៉ាគីស្ថាន និងសី្រលង្កា។ ពូល E មាន ម្ចាស់ផ្ទះម៉ាឡេស៊ី ឥណ្ឌា ប៉ាឡេស្ទីន សិង្ហបុរី និងកោះហ្គាំ។ ពូល F មានម្ចាស់ផ្ទះ កៀហ្ស៊ីស៊ីស្ថាន យ៉េមែន តួកមេនីស្ថាន ម៉ុងហ្គោលី និងកោះម៉ារីអាណា។ ពូល G មាន ម្ចាសផ្ទះអូម៉ង់ កូវ៉ែត បារ៉ែន លីបង់ និងព្រុយណេ។នៅក្នុងចំណោមបេក្ខភាពទាំង ៣៥ក្រុម ដែលចូលរួមប្រកួតជម្រុះនេះ មានតែក្រុមឈរកំពូលតារាងតាមពូលទាំង ៧ ប៉ុណ្ណោះ ដែលនឹងទទួលបានកៅអីជុំផ្ដាច់ព្រ័ត្រ នៅប្រទេសអ៊ូបេគីស្ថាន នាឆ្នាំ២០២៧ ខណៈក្រុមខ្លាំងចំនួន ៩ ទៀត កំពុងឈរចាំ រួមមានក្រុមម្ចាស់ផ្ទះអ៊ូសបេគីស្ថាន ជប៉ុន កូរ៉េខាងត្បូង កាតា តាហ្ស៊ីគីស្ថាន ចិន អារ៉ាប៊ីសាអូឌីត អូស្ត្រាលី និងវៀតណាម។ ការណ៍នេះ គឺជាភារកិច្ចមួយដ៏ធ្ងន់ សម្រាប់ក្រុមគោព្រៃជំទង់កម្ពុជា ដែលត្រូវប្រជែងកៅអីទល់នឹងក្រុមខ្លាំងៗរួមពូល ដើម្បីទទួលបាននូវឱកាសមាសនេះ៕ អត្ថបទ លី ឈុនឡា

វត្តមានគុនខ្មែរ លើសង្វៀន K-1 ជាឱកាសផ្សព្វផ្សាយ និងបើកទ្វារសម្រាប់កីឡាករកម្ពុជា ទាំងបច្ចុប្បន្ន និងអនាគត

2026/08/28 11:53:02 am        58
Facebook Telegram Linkin
ការឈានជើងចូលសង្វៀនលំដាប់អន្តរជាតិ K-1 របស់កីឡាករគុនខ្មែរ គឺជាជំហានប្រវត្តិសាស្ដ្រមួយ ដែលជួយផ្សព្វផ្សាយវប្បធម៌ក្បាច់គុនអត្តសញ្ញាណជាតិខ្មែរទៅកាន់ឆាកអន្ដរជាតិ និងជាស្ពានចម្លងដ៏សំខាន់ សម្រាប់បើកទ្វារដល់កីឡាករ-កីឡាការិនីកម្ពុជា ទាំងបច្ចុប្បន្ន និងអនាគត មានឱកាសចូលរួមកម្មវិធីរបស់ស្ថាប័នកម្រិតពិភពលោកមួយនេះ។នេះបើតាមប្រសាសន៍ឯកឧត្តម ខូវ ឆាយ ប្រធានសហព័ន្ធកីឡាប្រដាល់គុនខ្មែរ ក្នុងសន្និសីទសារព័ត៌មាន ស្ដីពីការបញ្ជូនកីឡាករគុនខ្មែរឆ្នើមៗ ២រូប រួមមានកីលាករ លន បញ្ញា និង ធន់ ម៉េងហុង ទៅចូករួមការប្រកួតក្នុងកម្មវិធី K-1 ដែលជាស្ថាប័នកីឡាប្រយុទ្ធដ៏ល្បីល្បាញរបស់ជប៉ុន និងអន្ដរជាតិ នាថ្ងៃទី១២ ខែកញ្ញា ឆ្នាំ២០២៦ ខាងមុខ នៅទីក្រុងតូក្យូ។ក្នុងសន្និសីទសារព័ត៌មាន កាលពីថ្ងៃព្រហស្បតិ៍សប្ដាហ៍នេះ ឯកឧត្តមបានគូសបញ្ជាក់ថា ការទទួលបានឱកាសចូលរួមកម្មវិធី K-1 នេះ មិនមែនជាឱកាសសម្រាប់តែកីឡាករទាំងពីរនោះទេ តែជាឱកាសដ៏មានតម្លៃសម្រាប់គុនខ្មែរទាំងមូល ក្នុងការបង្ហាញពីសមត្ថភាព បច្ចេកទេស ស្មារតីរឹងមាំ ភាពអង់អាច និងអត្ដសញ្ញាណជាតិខ្មែរ ចំពោះមុខទស្សនិកជនអន្ដរជាតិ។លន បញ្ញា និង ធន់ ម៉េងហុង គឺជាកីឡាករដែលមានសមត្ថភាព បទពិសោធន៍ ឆន្ទៈ និងបានឆ្លងកាត់ការប្រកួតជាច្រើន ទាំងក្នុង និងក្រៅប្រទេស ។ ការជ្រើសរើស និងការបញ្ជូនកីឡាករទាំងពីរទៅចូលរួមកម្មវិធី K-1 នេះ ឆ្លុះបញ្ចាំងពីការជឿទុកចិត្តរបស់សហព័ន្ធ ក៏ដូចជាដៃគូអន្ដរជាតិ ចំពោះគុណភាព និងសក្ដានុពលរបស់កីឡាករគុនខ្មែរ។ឯកឧត្តម ខូវ ឆាយ បន្ដថា ជាមួយបេសកកម្មលើកដំបូងលើសង្វៀន K-1 នេះ សហព័ន្ធបានកំណត់គោលបំណងសំខាន់ៗចំនួន ៥ រួមមាន៖១- ផ្ដល់ឱកាសឲ្យកីឡាករគុនខ្មែរបានបង្ហាញសមត្ថភាព លើសង្វៀនអន្ដរជាតិកម្រិតខ្ពស់។២-ផ្លាស់ប្ដូរបទពិសោធន៍ បង្កើនសមត្ថភាព បច្ចេកទេស និងពង្រឹងការត្រៀមខ្លួនរបស់កីឡាករកម្ពុជាឲ្យកាន់តែមានលក្ខណៈអាជីព។៣ ផ្សព្វផ្សាយប្រដាល់គុនខ្មែរ ដែលជាកេរដំណែលដ៏មានតម្លៃរបស់ដូនតាខ្មែរឲ្យកាន់តែមានកេរ្ដិ៍ឈ្មោះ និងការទទួលស្គាល់នៅទូទាំងពិភពលោក។៤-ពង្រឹងកិច្ចសហប្រតិបត្តិការរវាងសហព័ន្ធកីឡាប្រដាល់គុនខ្មែរ និងស្ថាប័ន K-1 ដើម្បីបង្កើតឱកាសបន្ថែមសម្រាប់កីឡាករគុនខ្មែរជំនាន់បច្ចេកទេស និងជំនាន់ក្រោយៗទៀត។៥-ចូលរួមលើកកម្ពស់មុខមាត់ កិត្តិយស និងកិត្យានុភាពរបស់ព្រះរាជាណាចក្រកម្ពុជា នៅលើឆាកអន្ដរជាតិ តាមរយៈវិស័យកីឡា វប្បធម៌ និងទេសចរណ៍។បន្ថែមលើនេះ ក្នុងនាមប្រធានសហព័ន្ធ ឯកឧត្តមបានអរគុណដល់ក្រសួង-ស្ថាប័ន និងវិស័យឯកជន ពិសេសក្រុមហ៊ុន ខ្មែរ ប៊ែវើរីជីត ដែលបានគាំទ្រដល់បេសកកម្មនេះ និងបានអរគុណដល់ស្ថាប័ន K-១ ដែលបានជឿជាក់ និងផ្ដល់ឱកាសដ៏តមានតម្លៃដល់កីឡាករគុនខ្មែរ ។ សហព័ន្ធសង្ឃឹមយ៉ាងមុតមាំថា កិច្ចសហប្រតិបត្តិការនេះ នឹងបន្ដរីកចម្រើន និងបើកទ្វារឲ្យកាន់តែទូលំទូលាយ ដើម្បីឲ្យកីឡាករគុនខ្មែរជាច្រើនរូបទៀត ទទួលបានឱកាសបង្ហាញវត្តមានលើសង្វៀនដ៏ធំនេះ។ចុងក្រោយឯកឧត្តមបានផ្ដាំផ្ញើដល់កីឡាករ លន បញ្ញា និង ធន់ ម៉េងហុង ការចេញទៅប្រកួតនាពេលដ៏ខ្លីខាងមុខ មិនមែនប្រកួតត្រឹមដើម្បីខ្លួនឯងទេ តែជាការប្រកួតតំណាងឲ្យជាតិ និងតំណាងឲ្យគុនខ្មែរយើងទាំងមូល ។ ដូច្នេះធ្វើម៉េចត្រូវរក្សាឲ្យបាននូវសីលធម៌ សុជីវធម៌ និងស្មារតីកីឡាឲ្យបានខ្ពស់ គោរពបទបញ្ជាការប្រកួត គោរពដៃគូប្រកួត គោរពអាជ្ញាកណ្ដាល និងគោរពប្រពៃណីរបស់ប្រទេសម្ចាស់ផ្ទះ។ លើសពីនេះ ត្រូវខិតខំហ្វឹកហាត់ពង្រឹងកាយសម្បទា សមត្ថភាព បច្ចេកទេសឲ្យបានល្អបំផុត ត្រៀមការប្រកួតដោយភាពក្លាហាន ឆ្លាតវៃ និងការទទួលខុសត្រូវ។ឯកឧត្តមសង្កត់ធ្ងន់ថា លទ្ធផលឈ្នះឬចាញ់ គឺជាផ្នែកមួយនៃការប្រកួត តែអ្វីដែលសំខាន់បំផុត គឺការបង្ហាញឲ្យពិភពលោកបានឃើញពីសមត្ថភាពពិតប្រាកដ ស្មារតីមិនបោះបង់ ក្រមសីលធម៌ និងភាពថ្លៃថ្នូរបស់កីឡាករគុនខ្មែរ៕ អត្ថបទ លី ឈុនឡា

ក្លិបចំណាយលុយធំ Tottenham សម្រេចការផ្ទេរ Savinho ពី Manchester City ៧៥ លានផោន

2026/08/26 03:19:14 pm        27
Facebook Telegram Linkin
ក្លិបបាល់ទាត់ Tottenham Hotspur បានប្រកាសពីការចុះហត្ថលេខានាំយកខ្សែប្រយុទ្ធស្លាបសញ្ជាតិប្រេស៊ីល Savinho ពី Manchester City ក្នុងកិច្ចព្រមព្រៀងដែលធ្វើឱ្យការចំណាយរបស់ក្លិបនៅរដូវក្តៅនេះកើនលើស ៣០០លានផោន ក្រោមការដឹកនាំរបស់លោក Roberto De Zerbi។ការផ្ទេរនេះត្រូវបានប្រកាសដោយក្លិបទាំងពីរកាលពីថ្ងៃចន្ទ ប៉ុន្តែព័ត៌មានលម្អិតអំពីតម្លៃ និងរយៈពេលកិច្ចសន្យាមិនត្រូវបានបង្ហាញជាផ្លូវការឡើយ។ ទោះជាយ៉ាងណា សារព័ត៌មានអង់គ្លេសបានរាយការណ៍ថា Tottenham ចំណាយប្រមាណ ៧៥លានផោន និងអាចបន្ថែម ១០លានផោន ទៀតតាមលក្ខខណ្ឌផ្សេងៗ។Savinho បានចាប់ផ្តើមអាជីពនៅ Atletico Mineiro មុនផ្លាស់ទៅ Troyes ក្នុងឆ្នាំ២០២២។ បន្ទាប់មក គេបានបង្ហាញសមត្ថភាពយ៉ាងលេចធ្លោនៅពេលខ្ចីជើងទៅ Girona ដោយស៊ុតបញ្ចូលទីបាន ១១គ្រាប់ ក្នុង៤១ប្រកួត និងជួយក្រុមបញ្ចប់ចំណាត់ថ្នាក់លេខ៣ក្នុង LaLiga រដូវកាល ២០២៣-២៤ ដែលជាលទ្ធផលល្អបំផុតក្នុងប្រវត្តិសាស្ត្រក្លិប និងបានកៅអីលេង Champions League។Savinho បានផ្លាស់ទៅ Manchester City នៅរដូវក្តៅឆ្នាំ២០២៤ ហើយចាប់តាំងពីពេលនោះមក រូបគេបានបង្ហាញខ្លួន ៨៤ប្រកួត ក្នុងគ្រប់ការប្រកួត និងស៊ុតបាន៧គ្រាប់។ ខ្សែប្រយុទ្ធវ័យ២២ឆ្នាំរូបនេះ ក៏បានបង្ហាញខ្លួន ១៣ប្រកួត ឱ្យក្រុមជម្រើសជាតិប្រេស៊ីលផងដែរ។ការមកដល់របស់ Savinho គឺជាការចុះហត្ថលេខាដ៏សំខាន់មួយទៀតរបស់ Tottenham ក្នុងទីផ្សារដោះដូររដូវក្តៅនេះ បន្ទាប់ពីពួកគេបាននាំយកកីឡាករដូចជា Sandro Tonali, Mateus Fernandes, Andy Robertson, Marcos Senesi និង Jan Paul van Hecke។បើរាប់បញ្ចូលប្រាក់បន្ថែមក្នុងកិច្ចព្រមព្រៀងរបស់ Savinho ការចំណាយសរុបរបស់ Tottenham នៅរដូវក្តៅនេះអាចឡើងដល់ប្រមាណ ៣២២លានផោន ខណៈក្លិបកំពុងពង្រឹងក្រុមឡើងវិញ បន្ទាប់ពីបញ្ចប់ Premier League រដូវកាលមុនត្រឹមចំណាត់ថ្នាក់លេខ១៧៕អត្ថបទ៖នាង សុភាវុធ

បណ្ដាញសង្គម

ព័ត៌មានថ្មីៗ

គណៈគ្រូពេទ្យជាតិជំរុញឱ្យសមាគមពង្រីកកិច្ចសហការ ដើម្បីទទួលយកបច្ចេកវិទ្យាវេជ្ជសាស្ត ដែលមានប្រសិទ្ធភាព
10/24/2026 09:10 PM
Facebook Telegram Linkin
លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញក្នុងពិធីសច្ចាបញ្ចូលសមាជិកថ្មី នៃសមាគមកាយឫទ្ធិនារីកម្ពុជា នៅខេត្តកំពង់ធំ
10/24/2026 06:10 PM
Facebook Telegram Linkin
ឯកឧត្តម ហ៊ុន ម៉ានី បានផ្តល់ការពិនិត្យភ្នែក និងវ៉ែនតា ជូនមន្ត្រីរាជការកងកម្លាំង ក្នុងស្រុកបសេដ្ឋ ខេត្តកំពង់ស្ពឺ
10/24/2026 05:10 PM
Facebook Telegram Linkin
បង្ក្រាបទីតាំងត្រៀមប្រព្រឹត្តបទល្មើស Online Scams នៅក្រុង​ប៉ោយ​ប៉ែត៖ ឃាត់មនុស្ស១៣៩នាក់ និងដកហូតសម្ភារជាច្រើន
10/24/2026 04:10 PM
Facebook Telegram Linkin
Online Scams ៖ មុខសញ្ញាមេក្លោង និងអ្នកពាក់ព័ន្ធ ៦ពាន់នាក់ ត្រូវបានតុលាការចោទប្រកាន់ និងឃុំខ្លួន
10/24/2026 04:10 PM
Facebook Telegram Linkin
ពិព័រណ៍កាហ្វេ២៦ រៀបចំឡើងដើម្បីលើកកម្ពស់ពាណិជ្ជកម្ម និងកៀរគរទុនវិនិយោគថ្មីៗក្នុងវិស័យកសិ-ស្បៀងអាហារ
10/24/2026 04:10 PM
Facebook Telegram Linkin
សាខាកាកបាទក្រហមកម្ពុជាខេត្តកណ្ដាល នាំយកអំណោយមនុស្សធម៌ចែកជូនប្រជាពលរដ្ឋ ១៨៦គ្រួសារ ដែលបានរងផលប៉ះពាល់ដោយជំនន់ទឹកភ្លៀង
10/24/2026 03:10 PM
Facebook Telegram Linkin
អភិបាលខេត្តកណ្តាល ចុះពិនិត្យស្ថានភាពជំនន់ទឹកភ្លៀង និងជំរុញការរំដោះទឹក នៅស្រុកពញាឮ
10/24/2026 03:10 PM
Facebook Telegram Linkin
ទីភ្នាក់ងារUN៖ ថាមពលនុយក្លេអ៊ែរអាចកើនឡើងជាងបីដង នៅត្រឹមឆ្នាំ ២០៦០
10/24/2026 03:10 PM
Facebook Telegram Linkin
UN៖ កម្ពុជាជាប្រទេសគំរូឆ្នើមនៃស្មារតីពហុភាគីនិយម និងការកសាងសន្ដិភាពពិភពលោក
10/24/2026 01:10 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.