BTV NEWS

កម្ពុជាភ្លាត់ចាញ់សិង្ហបុរីនៅនាទីទីចុងក្រោយ ក្នុងជំនួបបើកឆាកពានរង្វាន់បាល់ទាត់តំបន់អាស៊ីអាគ្នេយ៍ (ASEAN Hyundai Cup 2026)

វ័យ ៤០ ឆ្នាំ Luka Modric បន្តកិច្ចសន្យាថ្មីជាមួយ AC Milan មួយឆ្នាំទៀត

Arsenal នាំយកខ្សែប្រយុទ្ធក្រិក Christos Tzolis ពី Club Brugge ក្នុងតម្លៃ ៣៤ លានផោន

មន្រ្តីជាន់ខ្ពស់ក្រសួងអប់រំ៖ ការប្រកួតកីឡាជាតិ-កីឡាជាតិជនពិការ ត្រូវរៀបចំតាមលំនាំហ្គេមស្តង់ដា លើប្រភេទកីឡានីមួយៗ

ព័ត៌មានកីឡា

ព័រទុយហ្គាល់ជួបក្រូអាស៊ីនៅវគ្គ ៣២ ក្រុមចុងក្រោយ ខណៈ Ronaldo និង Modric មានតែម្នាក់ឡើងវគ្គបន្ត

ក្រុមជម្រើសជាតិព័រទុយហ្គាល់ នឹងត្រូវជួបក្រុមជម្រើសជាតិក្រូអាស៊ី នៅវគ្គ៣២ក្រុមចុងក្រោយនៃព្រឹត្តិការណ៍បាល់ទាត់ពិភពលោក FIFA World Cup 2026 ព្រឹកស្អែកនេះនៅទីក្រុង Toronto ប្រទេសកាណាដា ដោយមានគោលដៅស្ដារទំនុកចិត្ត និងបំបិទមាត់អ្នករិះគន់ ក្រោយការបង្ហាញទម្រង់លេងមិនសូវទាក់ទាញនៅវគ្គចែកពូល។ការប្រកួតនេះក៏ត្រូវបានគេចាត់ទុកថា អាចជាការជួបគ្នាចុងក្រោយនៅ World Cup រវាងតារាឆ្នើមពីររូប គឺខ្សែប្រយុទ្ធ Cristiano Ronaldo វ័យ ៤១ឆ្នាំ និងខ្សែបម្រើ Luka Modrić វ័យ ៤០ឆ្នាំ ដែលសុទ្ធតែជាវីរបុរសរបស់ប្រទេសរៀងៗខ្លួន និងកំពុងស្វែងរកឱកាសចុងក្រោយដើម្បីសម្រេចក្តីស្រមៃឈ្នះពានបាល់ទាត់ពិភពលោក។ក្រោមការដឹកនាំរបស់លោក Roberto Martínez ព័រទុយហ្គាល់ត្រូវបានរំពឹងថានឹងបង្ហាញទម្រង់លេងល្អជាងមុន បន្ទាប់ពីទទួលរងការរិះគន់ ទោះបីក្រុមមានកីឡាករឆ្នើមជាច្រើនក្នុងសមាសភាព ដូចជា Vitinha, João Neves និង Nuno Mendes ដែលជោគជ័យខ្លាំងនៅ Paris Saint-Germain ក៏ដោយ។នៅវគ្គចែកពូល ព័រទុយហ្គាល់បានចាប់ផ្តើមដោយស្មើកុងហ្គោមុនពេលយកឈ្នះអ៊ូសបេគីស្ថាន។ប៉ុន្តែការស្មើជាមួយកូឡុំប៊ីនៅប្រកួតចុងក្រោយនៃវគ្គចែកពូល បានធ្វើឱ្យព័រទុយហ្គាល់បញ្ចប់ក្នុងចំណាត់ថ្នាក់លេខ២ក្នុងពូល ហើយបានបង្កើនសម្ពាធលើ Ronaldo និងក្រុមទាំងមូល។ អ្នកវិភាគជាច្រើនបានរិះគន់ថា ប្រធានក្រុមរូបនេះមិនសូវមានឥទ្ធិពលក្នុងការប្រកួត ជាពិសេសការជួយការពារនៅពេលក្រុមបាត់បង់បាល់។ជាមួយនឹងការប្រកួតចាញ់-ធ្លាក់ ព័រទុយហ្គាល់ និងក្រូអាស៊ី សុទ្ធតែត្រូវការជ័យជម្នះដើម្បីឡើងទៅវគ្គ១៦ក្រុមចុងក្រោយ។ ទន្ទឹមនឹងនេះ ការប្រកួតក៏ជាការប្រឈមដ៏សំខាន់សម្រាប់ Ronaldo និង Modric ដែលអាចកំពុងឈានទៅកាន់ការបង្ហាញខ្លួនចុងក្រោយរបស់ពួកគេនៅលើឆាក FIFA World Cup។ អត្ថបទ៖នាង សុភាវុធ

អាកាសធាតុក្តៅខ្លាំង បង្កការរំខានដល់បរិយាកាសទស្សនាបាល់ទាត់ World Cup នៅទីក្រុង Toronto

ការព្រមានអំពីរលកកម្ដៅពីអាជ្ញាធរអាកាសធាតុកាណាដា កំពុងបង្កការប្រឈមដល់ការរៀបចំបរិយាកាសសម្រាប់អ្នកគាំទ្របាល់ទាត់ នៅទីក្រុង Toronto ខណៈសីតុណ្ហភាពត្រូវបានព្យាករណ៍ថានឹងកើនលើស ៣៥ អង្សាសេ និងអាចមានភ្លៀងផ្គររន្ទះផងដែរ។ទីក្រុង Toronto គ្រោងធ្វើជាម្ចាស់ផ្ទះការប្រកួតចុងក្រោយរបស់ខ្លួនក្នុងព្រឹត្តិការណ៍ FIFA World Cup នៅថ្ងៃសុក្រស្អែកនេះដោយក្រុមជម្រើសជាតិព័រទុយហ្គាល់ ត្រូវជួពក្រូអាស៊ី ក្នុងវគ្គ ៣២ ក្រុមចុងក្រោយ។មុនថ្ងៃបុណ្យជាតិ Canada Day នាថ្ងៃទី១ ខែកក្កដាម្សិលមិញ ប្រជាជនកាណាដានៅតំបន់ជាច្រើនកំពុងប្រឈមនឹងអាកាសធាតុប្រែប្រួលខ្លាំង ចាប់ពីទឹកជំនន់រហូតដល់រលកកម្ដៅ។វេជ្ជបណ្ឌិត Michelle Murti មន្ត្រីសុខាភិបាលទីក្រុង Toronto បានឱ្យដឹងថា ដោយសារសំណើមខ្ពស់ សីតុណ្ហភាពធ្វើឱ្យមានអារម្មណ៍ថាក្តៅដល់ ៤០ អង្សាសេ នៅពេលការប្រកួតរវាងព័រទុយហ្គាល់ និងក្រូអាស៊ី ចាប់ផ្តើម។ អាជ្ញាធរក៏កំពុងត្រៀមផែនការឆ្លើយតប ប្រសិនបើមានភ្លៀងផ្គររន្ទះ ដែលអាចបង្ខំឱ្យលុបចោលកម្មវិធីទស្សនារួម (Fan Zones) មួយចំនួន។អាជ្ញាធរទីក្រុងបានអំពាវនាវឱ្យអ្នកគាំទ្រទទួលទានទឹកឱ្យបានគ្រប់គ្រាន់ និងគួរកាត់បន្ថយការទទួលទានគ្រឿងស្រវឹង ព្រោះវាអាចបង្កឱ្យរាងកាយបាត់បង់ជាតិទឹកកាន់តែខ្លាំង។ក្នុងអំឡុងការប្រកួត World Cup កន្លងមក ទីក្រុង Toronto បានរៀបចំតំបន់ Fan Zone និងកម្មវិធីទស្សនាបាល់ទាត់ជាសាធារណៈជាបន្តបន្ទាប់។ នៅទីលាន Nathan Phillips Square កាលពីថ្ងៃទី៣០ ខែមិថុនា អ្នកគាំទ្រជាច្រើនត្រូវបានគេឃើញប្រើប្រាស់ស្ថានីយ៍បាញ់ផ្សែងទឹក ដែលអាជ្ញាធរបានដំឡើង ដើម្បីបន្ថយកម្ដៅ។អ្នកគាំទ្រម្នាក់ឈ្មោះ Megan Rennie បាននិយាយថា នាងមកទស្សនាការប្រកួត ប៉ុន្តែអាកាសធាតុក្តៅខ្លាំងពេក ធ្វើឱ្យនាងពិចារណាចាកចេញមុនពេលកម្មវិធីបញ្ចប់ ហើយក៏អាណិតកីឡាករដែលត្រូវប្រកួតក្រោមសីតុណ្ហភាពខ្ពស់បែបនេះផងដែរ។ចំណែកអ្នកទេសចរឈ្មោះ Laura Albarez មកពីប្រទេសកូឡុំប៊ី បាននិយាយថា នាងមានបំណងត្រឡប់ទៅសណ្ឋាគារសម្រាកសិន ហើយនឹងចេញមកក្រៅនៅពេលអាកាសធាតុត្រជាក់ជាងនេះ ដោយបានសរសើរថា ទីក្រុងបានរៀបចំទឹកសម្រាប់អ្នកទស្សនាយ៉ាងល្អ។ស្ថានភាពអាកាសធាតុក្តៅខ្លាំងនេះ បានក្លាយជាកត្តាប្រឈមមួយសម្រាប់ការរៀបចំព្រឹត្តិការណ៍កីឡាអន្តរជាតិ ប៉ុន្តែអាជ្ញាធរទីក្រុងតូរ៉ុនតូ កំពុងបន្តអនុវត្តវិធានការផ្សេងៗ ដើម្បីធានាសុវត្ថិភាព និងផ្តល់បទពិសោធន៍ល្អបំផុតដល់អ្នកគាំទ្របាល់ទាត់៕ អត្ថបទ៖នាង សុភាវុធ

នាយកដ្ឋានរៀបចំព្រឹត្តិការណ៍ និងសហព័ន្ធកីឡាជាតិ ប្រជុំរៀបចំបទបញ្ញត្តិទូទៅ បទបញ្ជាបច្ចេកទេស ត្រៀមកីឡាជាតិលើកទី៥

ដើម្បីស្វែងរកគោលការណ៍រួមមួយ សម្រាប់យកទៅអនុវត្តឱ្យមានដំណើរការដោយរលូន និងជោគជ័យ នៃព្រឹត្តិការណ៍កីឡាជាតិលើកទី៥ និង កីឡាជាតិជនពិការលើកទី៣ នាខែវិច្ឆិកា ឆ្នាំ២០២៦នាពេលខាងមុខនេះ នាយកដ្ឋានរៀបចំព្រឹត្តិការណ៍ និងសហព័ន្ធកីឡាជាតិ បានបើកកិច្ចប្រជុំ និងជជែងពិភាក្សាគ្នា ក្នុងការរៀបចំបទបញ្ញត្តិទូទៅ បទបញ្ជាបច្ចេកទេស វិញ្ញាសាប្រកួត និងទីលានប្រកួត ។កិច្ចប្រជុំនេះធ្វើឡើង នាថ្ងៃទី០១ ខែកក្កដា ឆ្នាំ២០២៦ នៅក្នុងពហុកីឡដ្ឋានអូឡាំពិក រាជធានីភ្នំពេញ។ លោក ហួត សេងទ្រី ប្រធាននាយកដ្ឋានរៀបចំព្រឹត្តិការណ៍ និងស្ថិតិកីឡា បានគូសបញ្ជាក់ថា នេះជាកិច្ចប្រជុំដ៏សំខាន់ ជាមួយសហព័ន្ធកីឡាជាតិទាំង៣២សហព័ន្ធ និងតំណាងគណៈកម្មាធិការជាតិប៉ារ៉ាឡាំពិកកម្ពុជា ដើម្បីចូលរួមជជែងពិភាក្សាគ្នា ក្នុងការរៀបចំបទបញ្ញត្តិទូទៅបទបញ្ជាបច្ចេកទេស វិញ្ញាសាប្រកួតនៃប្រភេទកីឡានីមួយ ដើម្បីស្វែងកគោលការណ៍រួមមួយ សម្រាប់យកទៅអនុវត្តឱ្យមានដំណើរការដោយរលូន និងជោគជ័យ។ លោកបន្ថែមថា ព្រឹត្តិការណ៍កីឡាជាតិដ៏ធំប្រារព្ធធ្វើឡើងរៀងរាល់២ឆ្នាំម្តងនេះគ្រោងរៀបចំលើ៣២ប្រភេទកីឡា និងកីឡាជាតិជនពិការគ្រោងរៀបចំលើ៧ប្រភេទកីឡា។កិច្ចប្រជុំបច្ចេកទេសជាមួយសហព័ន្ធកីឡាជាតិ និងគណៈកម្មាធិការជាតិប៉ារ៉ាឡាំពិកកម្ពុជានេះមានការ ចូលរួមពីប្រធាន អនុប្រធាននាយកដ្ឋាន និងតំណាងសហព័ន្ធកីឡាជាតិ និងគណៈកម្មាធិការជាតិប៉ារ៉ាឡាំពិកកម្ពុជា ព្រមមន្ត្រីបច្ចេកទេសពាក់ព័ន្ធនានាផងដែរ។គួរបញ្ជាក់ថា ការប្រកួតកីឡាជាតិលើកទី៥ និងកីឡាជាតិជនពិការលើកទី៣ ឆ្នាំ២០២៦នេះនឹងប្រព្រឹត្តទៅចាប់ថ្ងៃទី០៦-១៥ ខែវិច្ឆិកា ឆ្នាំ២០២៦ ដែលមានក្រសួង៣ និង២៥រាជធានីខេត្តចូលរួម ខណៈការប្រកួតនឹងរៀបចំនៅរាជធានីភ្នំពេញ ខេត្តកែប ខេត្តកំពង់ឆ្នាំង និងខេត្តស្វាយរៀង។ តាមការគ្រោងទុក ពិធីបើកជាផ្លូវការគ្រោងធ្វើឡើងនាថ្ងៃទី០៧ ខែវិច្ឆិកា ឆ្នាំ២០២៦ ចាប់ពីម៉ោង១៦:០០ នៅពហុកីឡដ្ឋានជាតិអូឡាំពិក ស្ថិតក្រោមអធិបតីភាពដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។ ការប្រកួតកីឡាជាតិ និងកីឡាជាតិជនពិការនេះនឹងមានប្រតិភូ គ្រូបង្វឹក កីឡាករ កីឡាការិនីមកក្រសួងស្ថាប័នចំនួន៣ និង២៥រាជធានីខេត្តទូទាំងប្រទេសចូលរួមប្រមាណ ជាង ៥០០០នាក់៕

Balogun ស៊ុតបញ្ចូលទី និងត្រូវបណ្តេញចេញតែអាមេរិកឈ្នះបូស្នៀឡើងវគ្គ ១៦ ក្រុម

ខ្សែប្រយុទ្ធ AS Monaco, Folarin Balogun បានក្លាយជាតួអង្គសំខាន់ក្នុងការប្រកួតរវាងក្រុមជម្រើសជាតិសហរដ្ឋអាមេរិក និងបូស្នៀ បន្ទាប់ពីរកបានមួយគ្រាប់ ប៉ុន្តែត្រូវបណ្តេញចេញពីទីលាន ខណៈអាមេរិកនៅតែយកឈ្នះក្នុងលទ្ធផល ២-០ ដើម្បីឡើងទៅកាន់វគ្គ១៦ក្រុមចុងក្រោយនៃព្រឹត្តិការណ៍បាល់ទាត់ពិភពលោក FIFA World Cup 2026។ការប្រកួតនៅវគ្គ៣២ក្រុមចុងក្រោយនេះ អាមេរិកបានបង្ហាញទម្រង់លេងយ៉ាងរឹងមាំ និងគ្រប់គ្រងការប្រកួតបានល្អ។ Balogun បានបើកការនាំមុខឱ្យក្រុមម្ចាស់ផ្ទះ តែការប្រកួតបានប្រែជាតានតឹងនៅពេល Balogun ទទួលកាតក្រហម និងត្រូវបណ្តេញចេញពីទីលាន ធ្វើឱ្យអាមេរិកត្រូវលេងដោយសល់កីឡាករ ១០នាក់ចាប់ពីនាទីទី ៦៤ ។ប៉ុន្តែក្រុមរបស់លោក Mauricio Pochetino បានរក្សាវិន័យការពារយ៉ាងល្អ និងមិនបណ្តោយឱ្យបូស្នៀមានឱកាសវាយបកបានឡើយ មុនពេលដែល Malik Tillman ស៊ុតបាល់ហ្វ្រីឃីកធានាជ័យជំនះឱ្យអាមេរិក។ជ័យជម្នះនេះ បានធានាឱ្យសហរដ្ឋអាមេរិកកក់កៅអីឡើងទៅវគ្គ១៦ក្រុមចុងក្រោយ និងបន្តក្តីសង្ឃឹមក្នុងការប្រជែងពានរង្វាន់ World Cup 2026 នៅលើទឹកដីរបស់ខ្លួនដោយនឹងត្រូវជួបជាមួយប៊ែលហ្ស៊ិក៕ អត្ថបទ៖នាង សុភាវុធ

សម្ដេចតេជោ ហ៊ុន សែន៖ «យោងតាមការប្រែប្រួលនៃភូមិសាស្ត្របាល់ទាត់ ពេលណាមួយប្រទេសក្រីក្រ ប្រជាជនតិចនឹងលើកពានបាល់ទាត់ពិភពលោកជាក់ជាមិនខាន»

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នៅថ្ងៃទី២ ខែកក្កដា ឆ្នាំ២០២៦នេះ បានបន្តលើកឡើងអំពីស្ថានភាពការលេងកីឡាបាល់ទាត់ពិភពលោកបន្តទៀត ក្នុងនោះសម្ដេចបានមើលឃើញថា បើយោងតាមការប្រែប្រួលនៃភូមិសាស្ត្របាល់ទាត់បែបនេះពេលណាមួយប្រទេសក្រីក្រប្រជាជនតិចនឹងលើកពានបាល់ទាត់ពិភពលោកជាក់ជាមិនខាន។ សម្ដេចតេជោបានថ្លែងថា ថ្ងៃមុនសម្ដេចបាននិយាយពី (បាល់មូល) ក្រោយការប្រកួតកន្លងមកនិងយប់កន្លងទៅនេះយើងគួរតែចាប់ផ្តើមនិយាយពី(ភូមិសាស្ត្របាល់ទាត់)ដែលវាខុសពីភូមិសាស្ត្រនយោបាយទាំងស្រុង។ ពេលមុនខ្ញុំតែងនិយាយថាលើពិភពលោកស្តង់ដាអន្តរជាតិមានតែក្នុងវិស័យកីឡាមួយប៉ុណ្ណោះ។សម្ដេចតេជោមានប្រសាសន៍ថា «ឆ្លងកាត់ការប្រកួតបាល់ទាត់ពិភពលោកឆ្នាំ២០២៦នេះខ្ញុំសង្កេតឃើញថាភូមិសាស្ត្របាល់ទាត់កំពុង ប្រែប្រួលយ៉ាងខ្លាំងតាមរយៈវត្តមាន ក្រុមកីឡាមកពីប្រទេសដែលមានប្រជាជនតិច និងជាប្រទេសកំពុងអភិវឌ្ឍ។» សម្ដេចតេជោបញ្ជាក់ថា «វត្តមានកាន់តែច្រើននៃប្រទេសក្រីក្រ និងចំនួនប្រជាជនតិចបានបង្ហាញថាបាល់ទាត់មិនរើសអើងប្រទេសមាន ឬក្រ ប្រទេសមានប្រជាជនច្រើន ឬតិចនោះទេដែលនេះវាជា(ភូមិសាស្ត្របាល់ទាត់) ដែលនេះវាខុសគ្នាទាំងស្រុងជាមួយភូមិសាស្ត្រនយោបាយដែលពិភពលោកកំពុងជ្រួលច្របល់បាត់សណ្តាប់ធ្នាប់»។សម្ដេចតេជោបញ្ជាក់ថា ក្រុមបាល់ទាត់មកពីប្រទេសក្រីក្របានជួយជូនដំណើរក្រុមកីឡាពី ប្រទេសអ្នកមានត្រឡប់ទៅប្រទេសវិញតាំងពីប្រកួតសន្សំពិន្ទុរហូតដល់ការប្រកួត៣២ក្រុម និងប្រសិនមិនអាចយកឈ្នះក៏ធ្វើឲ្យប្រទេសអ្នកមានមានការព្រួយបារម្មណ៍ពេលក្រុមបាល់ទាត់មកពីក្រីក្រទាត់បញ្ចូលទីឡើងប៉ោងសំណាញ់។សម្ដេចតេជោសង្គត់ធ្ងន់ថា «យោងតាមការប្រែប្រួលនៃភូមិសាស្ត្របាល់ទាត់បែបនេះពេលណាមួយប្រទេសក្រីក្រប្រជាជនតិចនឹងលើកពានបាល់ទាត់ពិភពលោកជាក់ជាមិនខាន»។សម្ដេចតេជោលើកឡើងថា សម្ដេចមិនដឹងថានៅលើពិភពលោកនេះមានអ្នកធ្លាប់ប្រើពាក្យ (ភូមិសាស្ត្របាល់ទាត់) ហើយឬនៅទេ ប៉ុន្តែសម្រាប់សម្ដេចឱកាសត្បូង ត្បូងបាននិងកំពុងមកដល់ហើយសម្រាប់ប្រទេសកំពុងអភិវឌ្ឍទាំងអស់៕

Ronald Koeman លាលែងពីតំណែងគ្រូបង្វឹកហូឡង់ ខណៈសហព័ន្ធបាល់ទាត់ថ្កោលទោសការរើសអើងជាតិសាសន៍លើកីឡាករ

លោក Ronald Koeman បានប្រកាសលាលែងពីតំណែងជាគ្រូបង្វឹកក្រុមជម្រើសជាតិហូឡង់ហើយ ភ្លាមៗបន្ទាប់ពីក្រុមធ្លាក់ចេញពីការប្រកួតបាល់ទាត់ពិភពលោក ក្រោយចាញ់ម៉ារ៉ុកដោយបាល់ ១១ ម៉ែត្រកាត់សេចក្តីក្នុងវគ្គ ៣២ ក្រុមចុងក្រោយ។ ក្នុងសេចក្តីថ្លែងការណ៍ លោក Koeman បានទទួលស្គាល់ការទទួលខុសត្រូវចំពោះការមិនអាចសម្រេចគោលដៅរបស់ក្រុម ដោយលើកឡើងថា ក្តីស្រមៃក្នុងការសាងប្រវត្តិសាស្ត្រនៅ World Cup មិនបានក្លាយជាការពិតឡើយ។ លោកក៏បានបញ្ជាក់ថា បញ្ហាសុខភាពរបស់ភរិយា បានធ្វើឱ្យលោកផ្លាស់ប្តូរទស្សនៈចំពោះជីវិត និងអាចជាហេតុផលមួយដែលធ្វើឱ្យលោកសម្រេចចិត្តបញ្ចប់អាជីពជាគ្រូបង្វឹក។ស្របពេលជាមួយគ្នានោះ សហព័ន្ធបាល់ទាត់ហូឡង់ (KNVB) បានថ្កោលទោសយ៉ាងខ្លាំងចំពោះការវាយប្រហារដោយពាក្យសម្តីរើសអើងជាតិសាសន៍លើបណ្តាញសង្គម ដែលផ្តោតលើកីឡាករ Justin Kluivert, Quinten Timber និង Crysencio Summerville បន្ទាប់ពីពួកគេស៊ុតបាល់ ១១ ម៉ែត្រមិនចូល។KNVB បានបញ្ជាក់ថា នឹងរាយការណ៍ករណីនេះទៅកាន់ស្ថាប័នទទួលបន្ទុកផ្នែកការរើសអើងតាមអ៊ីនធឺណិត ដើម្បីពិនិត្យផ្លូវច្បាប់ ហើយអាចឈានដល់ការប្តឹងផ្តល់ប្រសិនបើការបញ្ចេញមតិទាំងនោះមានលក្ខណៈជាបទល្មើស។ សហព័ន្ធបានអះអាងថា ការរើសអើង និងសារស្អប់ខ្ពើម គឺផ្ទុយទាំងស្រុងនឹងតម្លៃ និងស្មារតីដែលវិស័យបាល់ទាត់លើកកម្ពស់។បរាជ័យក្រោមថ្វីជើងម៉ារ៉ុក និងការចាកចេញរបស់លោក Koeman បានបិទបញ្ចប់ការដឹកនាំលើកទីពីររបស់លោកជាមួយក្រុមជម្រើសជាតិហូឡង់ ខណៈសហព័ន្ធបាល់ទាត់ហូឡង់នឹងត្រូវស្វែងរកគ្រូបង្វឹកថ្មី ដើម្បីរៀបចំក្រុមសម្រាប់ការប្រកួតអន្តរជាតិនាពេលខាងមុខ៕ អត្ថបទ៖នាង សុភាវុធ

Spurs ព្រមព្រៀងផ្ទេរ Mateus Fernandes ពី West Ham តម្លៃបំបែកកំណត់ត្រាក្លិប ៨៥ លានផោន

ក្លិបបាល់ទាត់ Tottenham Hotspur បានឈានដល់កិច្ចព្រមព្រៀងជាមួយ West Ham United ក្នុងការផ្ទេរខ្សែបម្រើព័រទុយហ្គាល់ Mateus Fernandes ក្នុងតម្លៃ ៨៥ លានផោន ក្លាយជាកំណត់ត្រាផ្ទេរខ្ពស់បំផុតក្នុងប្រវត្តិសាស្ត្ររបស់ក្លិប។របាយការណ៍បានឱ្យដឹងថា កីឡាករវ័យ ២១ ឆ្នាំរូបនេះ បានយល់ព្រមចូលរួមជាមួយក្លិបមានមូលដ្ឋាននៅភាគខាងជើងទីក្រុងឡុងដ៍ បន្ទាប់ពី Spurs យកឈ្នះ Manchester United ដែលមានការចាប់អារម្មណ៍យ៉ាងខ្លាំង ប៉ុន្តែមិនព្រមបំពេញតម្លៃដែល West Ham ទាមទារនោះទេ។Fernandes បានផ្ទេរមក West Ham កាលពីរដូវក្តៅមុនក្នុងតម្លៃប្រមាណ ៤០ លានផោន ហើយទោះបីក្លិបធ្លាក់ទៅលេងនៅ Championship ក៏ដោយ រូបគេនៅតែបង្ហាញទម្រង់លេងគួរឱ្យចាប់អារម្មណ៍ ធ្វើឱ្យក្លាយជាគោលដៅរបស់ក្លិបធំៗជាច្រើននៅអឺរ៉ុប។ការមកដល់របស់ Fernandes គឺជាការចុះហត្ថលេខាថ្មីមួយទៀតរបស់ Spurs ក្នុងទីផ្សារដោះដូរកីឡាកររដូវក្តៅនេះ បន្ទាប់ពីក្លិបបានពង្រឹងសមាសភាពជាបន្តបន្ទាប់ ដើម្បីត្រៀមប្រកួតប្រជែងក្នុងរដូវកាលថ្មី។បើមិនមានការប្រែប្រួលនៅនាទីចុងក្រោយ Fernandes នឹងធ្វើតេស្តសុខភាព និងចុះកិច្ចសន្យាជាផ្លូវការជាមួយ Spurs ក្នុងពេលឆាប់ៗខាងមុខ ដោយរំពឹងថានឹងក្លាយជាកម្លាំងសំខាន់នៅតំបន់បម្រើរបស់ Spurs សម្រាប់រដូវកាលថ្មី៕ អត្ថបទ៖នាង សុភាវុធ

Tuchel ព្រមានអង់គ្លេសកុំមើលស្រាលកុងហ្គោមុនជំនួបវគ្គ ៣២ ក្រុមចុងក្រោយបាល់ទាត់ពិភពលោក

លោក Thomas Tuchel អ្នកចាត់ការក្រុមជម្រើសជាតិអង់គ្លេស បានអំពាវនាវឱ្យកូនក្រុមរក្សាការផ្តោតអារម្មណ៍ និងកុំមានទំនុកចិត្តហួសហេតុ មុនការប្រកួតទល់នឹងក្រុមជម្រើសជាតិ សាធារណរដ្ឋប្រជាធិបតេយ្យកុងហ្គោក្នុងវគ្គ ៣២ ក្រុមចុងក្រោយ នៃព្រឹត្តិការណ៍បាល់ទាត់ពិភពលោក។ទោះបីអង់គ្លេសត្រូវបានគេចាត់ទុកថាជាក្រុមមានប្រៀបយ៉ាងច្បាស់ក្នុងការប្រកួតដែលនឹងធ្វើឡើងយប់នេះ ក៏ដោយ លោក Tuchel បានបញ្ជាក់ថា ក្រុមរបស់លោកមិនអាចមើលស្រាលគូប្រកួតបានឡើយ ខណៈ World Cup ឆ្នាំនេះបានបង្កើតការភ្ញាក់ផ្អើលជាច្រើន ដោយក្រុមខ្លាំងមួយចំនួនត្រូវធ្លាក់ចេញមុនការរំពឹងទុក។អង់គ្លេសបានបញ្ចប់ការប្រកួតក្នុងពូលក្នុងនាមជាក្រុមលេខ១ ខណៈកុងហ្គោបានឡើងមកវគ្គបន្តក្នុងនាមជាក្រុមលេខ៣ល្អបំផុត។ លោក Tuchel បានលើកឡើងថា គូប្រកួតមួយនេះមានសមត្ថភាពបង្កការលំបាកដល់គ្រប់ក្រុម និងបានបង្ហាញរួចមកហើយក្នុងការប្រកួតទល់នឹងព័រទុយហ្គាល់ និងកូឡុំប៊ី។លោកបានមានប្រសាសន៍ថា៖ «ពួកគេមានសមត្ថភាពធ្វើឱ្យគ្រប់ក្រុមជួបការលំបាក។ ពួកគេបានបង្ហាញរឿងនេះរួចហើយនៅពេលជួបព័រទុយហ្គាល់ និងកូឡុំប៊ី។ ដូច្នេះ ផ្នត់គំនិតរបស់យើងគឺច្បាស់លាស់ ហើយយើងបានត្រៀមខ្លួនរួចជាស្រេចសម្រាប់ការប្រកួតនេះ»។ការប្រកួតវគ្គចាញ់ធ្លាក់ឆ្នាំនេះបានឃើញលទ្ធផលភ្ញាក់ផ្អើលជាបន្តបន្ទាប់ ក្នុងនោះអាល្លឺម៉ង់ចាញ់ប៉ារ៉ាហ្គាយដោយបាល់ ១១ ម៉ែត្រកាត់សេចក្តី ខណៈហូឡង់ក៏បានធ្លាក់ក្រោមថ្វីជើងម៉ារ៉ុកដូចគ្នា។ ចំណែកប្រេស៊ីល និងន័រវេសវិញ សុទ្ធតែត្រូវរង់ចាំគ្រាប់បាល់នៅចុងការប្រកួត ទើបអាចទទួលបានកៅអីទៅវគ្គបន្ត៕ អត្ថបទ៖នាង សុភាវុធ

បារាំងឡើងវគ្គ ១៦ក្រុម Mbappe ក្លាយជាកីឡាករស៊ុតបញ្ចូលទីច្រើនជាងគេក្នុងវគ្គចាញ់-ធ្លាក់ World Cup

ខ្សែប្រយុទ្ធបារាំង Kylian Mbappe បានបន្តសរសេរប្រវត្តិសាស្ត្រថ្មីក្នុងព្រឹត្តិការណ៍បាល់ទាត់ពិភពលោក FIFA World Cup បន្ទាប់ពីក្លាយជាកីឡាករដែលរកគ្រាប់បាល់បានច្រើនជាងគេបំផុតក្នុងវគ្គចាញ់-ធ្លាក់ (Knockout) ក្រោយស៊ុតបញ្ចូលទីពីរគ្រាប់ឱ្យក្រុមជម្រើសជាតិបារាំង ក្នុងជ័យជម្នះ ៣-០ លើស៊ុយអែត នៅវគ្គ៣២ក្រុមចុងក្រោយ។គ្រាប់បាល់របស់ប្រធានក្រុមជម្រើសជាតិបារាំងរូបនេះ បានធ្វើឱ្យរូបគេមានគ្រាប់បាល់សរុបចំនួន ៩ គ្រាប់ក្នុងវគ្គ Knockout នៃ World Cup ដែលជាកំណត់ត្រាថ្មី លើសកីឡាករជើងចាស់ Leonidas និង Ronaldo Nazario ដែលធ្លាប់រកបាន ៨ គ្រាប់ដូចគ្នា។ក្រៅពីកំណត់ត្រាក្នុងវគ្គ Knockout នេះ Mbappe ក៏បានបង្កើនចំនួនគ្រាប់បាល់សរុបរបស់ខ្លួននៅ World Cup ដល់ ១៨ គ្រាប់ ដោយនៅសល់តែ ១ គ្រាប់ប៉ុណ្ណោះ នឹងតាមស្មើកំណត់ត្រារបស់ Lionel Messi ដែលកំពុងឈរនៅកំពូលតារាងអ្នករកគ្រាប់បាល់បានច្រើនជាងគេក្នុងប្រវត្តិសាស្ត្រ World Cup។ក្នុងការប្រកួតទល់នឹងស៊ុយអែត ខ្សែប្រយុទ្ធ Real Madrid រូបនេះរកបាន ២ គ្រាប់ ខណៈ Bradley Barcola បន្ថែមបាន ១ គ្រាប់ ជួយឱ្យក្រុមរបស់លោក Didier Deschamps ឡើងទៅកាន់វគ្គ១៦ក្រុមចុងក្រោយ ដោយត្រូវជួបក្រុមប៉ារ៉ាហ្គាយ។ ក្នុងវ័យនៅមិនទាន់ដល់ ៣០ ឆ្នាំផង Mbappe បានបន្តបំបែកកំណត់ត្រាជាបន្តបន្ទាប់ ហើយកំពុងពង្រឹងឈ្មោះរបស់ខ្លួនក្នុងនាមជាកីឡាករឆ្នើមម្នាក់ក្នុងប្រវត្តិសាស្ត្របាល់ទាត់ពិភពលោក។ ជាមួយនឹងការប្រកួតនៅសល់ក្នុងព្រឹត្តិការណ៍ឆ្នាំ២០២៦ រូបគេនៅមានឱកាសបន្ថែមក្នុងការពង្រីកកំណត់ត្រារបស់ខ្លួន និងប្រជែងក្លាយជាអ្នករកគ្រាប់បាល់ច្រើនជាងគេក្នុងប្រវត្តិសាស្រ្ត World Cup៕ អត្ថបទ៖នាង សុភាវុធ

សសយក រមាសហែក និង U16 ព្រះខ័នរាជ រក្សាភាពខ្លាំងពានបាល់ទាត់នារី Svay Rieng Cup ឆ្នាំ២០២៦

ក្រុមបាល់ទាត់នារី ស.ស.យ.ក ស្រុករមាសហែក និងក្រុមបាល់ទាត់នារីអាយុក្រោម ១៦ឆ្នាំ នៃក្លិបព្រះខ័នរាជស្វាយរៀង បានរក្សាភាពខ្លាំង ក្រោយយកឈ្នះ ៤ប្រកួតជាប់គ្នា ឈរលំដាប់កំពូលតារាង មាន ១២ពិន្ទុស្មើគ្នា គ្រាដែលក្រុម CRS Sports បានធ្លាក់ទៅឈរលេខ៣ ក្រោយរងបរាជ័យ ២ប្រកួតផ្ទួនៗ។សម្រាប់លទ្ធផលការប្រកួតសន្សំពិន្ទុ សប្ដាហ៍ទី៥ កាលពីចុងសប្ដាហ៍កន្លងទៅ ក្រុម ស.ស.យ.ក ស្រុករមាសហែក បានយកឈ្នះក្រុមវិទ្យាល័យព្រះពន្លា ដោយលទ្ធផល ៧-០ ខណៈក្រុមកីឡាការិនី U16 ព្រះខ័នរាជស្វាយរៀង បានយកឈ្នះក្រុម CRS Sports ដោយលទ្ធផល ៤-០ ស្របពេលក្រុម ស.ស.យ.ក ស្រុកស្វាយទាប បានយកឈ្នះក្រុម 2Brother ដោយលទ្ធផល ៣-១ ដើម្បីរក្សាក្ដីសង្ឃឹមប្រជែងកៅអីវគ្គបន្ដ។ជាមួយជ័យជម្នះរបស់ក្រុម ស.ស.យ.ក ស្រុករមាសហែក និងក្រុមកីឡាការិនីវ័យក្មេងព្រះខ័នរាជស្វាយរៀង បានធ្វើឲ្យក្រុមទាំងពីរ រកបាន ១២ពិន្ទុស្មើគ្នា ឈរលេខ១ និងលេខ២ បណ្ដោះអាសន្ន ដែលបានកក់កៅអីវគ្គ ៤ក្រុមចុងក្រោយមុនគេ ទោះបីក្រុមទាំងពីរ នៅសល់ ២ប្រកួតក្នុងដៃទៀតក្ដី។ រីឯក្រុមកំពុងឈរលេខ៣ CRS Sports ក៏នៅតែមានសង្ឃឹមឡើងវគ្គបន្ដ ដ្បិតពួកគេរកបាន ៩ពិន្ទុ និងសល់ ១ប្រកួតក្នុងដៃ កំពុងមានប្រៀបលើក្រុម ស.ស.យ.ក ស្រុកស្វាយទាប ទើបរកបាន ៦ពិន្ទុ ឈរលេខ៤។ចំណែក ៣ក្រុមទៀត ក៏នៅសល់ឱកាសស្ដួចស្ដើងរៀងៗខ្លួន រួមមានក្រុម ស.ស.យ.ក ស្រុកកំពង់រោទិ៍ កំពុងឈរលេខ៥ រកបាន ២ពិន្ទុ លើក្រុមវិទ្យាល័យព្រះពន្លា និងក្រុម Two Brother ដែលទើបរកបាន ១ពិន្ទុ តែនៅសល់ ២ប្រកួតក្នុងដៃដូចគ្នា។សូមរំឮកថា ពានរង្វាន់ Svay Rieng Cup រដូវកាលទី២ នេះ មាន ៧ក្រុមចូលរួម ហើយរូបមន្ដប្រកួត គឺប្រកួតលក្ខណៈលីគ ១ជុំ។ បន្ទាប់មកក្រុមមានពិន្ទុខ្ពស់ជាងគេ ៤ក្រុម នឹងត្រូវឡើងវគ្គបន្ដ ក្នុងនោះក្រុមឈរលេខ៣ និងលេខ៤ ត្រូវជួបគ្នា នៅវគ្គពាក់កណ្ដាលផ្ដាច់ព្រ័ត្រ ដើម្បីស្វែងរកក្រុមឈ្នះ ឡើងទៅជួបក្រុមឈរលេខ២ ហើយក្រុមឈ្នះ នឹងទទួលបានកៅអីវគ្គផ្ដាច់ព្រ័ត្រ ជួបក្រុមកំពូលតារាង ដើម្បីប្រកួតដណ្ដើមជើងឯកតែម្ដង៕ អត្ថបទ លី ឈុនឡា

បណ្ដាញសង្គម

ព័ត៌មានថ្មីៗ

ក្រសួងអប់រំ ផ្ដល់ឱកាសឱ្យសិស្សធ្វើទស្សនកិច្ចសិក្សានៅសិង្ហបុរី តាមរយៈកម្មវិធី ME-NISTER

ការលាលែងពីតំណែងរបស់រដ្ឋមន្ត្រីអប់រំឥណ្ឌា គឺជាជ័យជម្នះដ៏ធំ សម្រាប់ក្រុមបាតុករយុវជន

លោក Trump រិះគន់ព័ត៌មានក្លែងក្លាយ និងបង្កឱ្យមានភាពចម្រូងចម្រាស ជុំវិញការបោះឆ្នោតឆ្នាំ២០២៨

មនុស្សយ៉ាងតិច ៥នាក់ស្លាប់ ក្នុងហេតុការណ៍បាក់ដី នៅភាគខាងជើងចិន

ម៉ិកស៊ិកនឹងមិនតបតពន្ធរបស់លោក Trump ទេ ខណៈការនាំចេញត្រូវបានការពារដោយកិច្ចព្រមព្រៀងពាណិជ្ជកម្ម

កម្មវិធីប្រកួតប្រជែងនិយាយជាសាធារណៈសម្រាប់និស្សិតសាកលវិទ្យាល័យរបស់អង្គភាពអ្នកនាំពាក្យរាជរដ្ឋាភិបាល រកឃើញអ្នកទទួលបានជ័យលាភីហើយ

ចិនតវ៉ាប្រឆាំងនឹងទណ្ឌកម្មរបស់សហភាពអឺរ៉ុប លើក្រុមហ៊ុនចិន ពាក់ព័ន្ធនឹងបញ្ហារុស្ស៊ី

មនុស្សជាង ១៦០.០០០នាក់ រត់គេចពីចំហេះព្រៃ នៅប្រទេសបារាំង និងអេស្ប៉ាញ

ប្រទេសចិនជម្លៀសមនុស្សជាង ២០.០០០នាក់ ខណៈព្យុះទីហ្វុង Noul បក់បោកជិតដល់

លោក Trump៖ នាយករដ្ឋមន្ត្រីអ៊ីស្រាអែល នឹងធ្វើទស្សនកិច្ចនៅអាមេរិក នាសប្តាហ៍ក្រោយ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877