នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
Spurs ប្រកាសតែងតាំងគ្រុបង្គោលថ្មីអតីតអ្នកចាត់ការ Brentford លោក Thomas Frank
Paris Saint Germain និងក្រុមធំៗនៅអឺរ៉ុបធ្វើដំណើរដល់ទឹកដីអាមេរិកមុនព្រឹត្តិការណ៍ Club World Cup
Dortmund បដិសេធសំណើ ៤២ លានផោនពី Chelsea ក្នុងការផ្ទេរ Jamie Gittens
អង់គ្លេសស្គាល់បរាជ័យដំបូងក្រោមការដឹកនាំរបស់អ្នកចាត់ការ Thomas Tuchel

ព័ត៌មានកីឡា

ព្រះខ័នរាជ បន្ថយគម្លាតត្រឹម ១ពិន្ទុ ក្រោយបញ្ចប់កំណត់ត្រាមិនស្គាល់ចាញ់ភ្នំពេញក្រោន

2025/01/27 01:20:00 pm        322
Facebook Telegram Linkin
ទីបំផុតក្រុមការពារតំណែងជើងឯក ព្រះខ័នរាជស្វាយរៀង បានបញ្ចប់កំណត់ត្រាមិនស្គាល់ចាញ់របស់ក្រុមភ្នំពេញក្រោនបានហើយ និងបន្ថយគម្លាតពិន្ទុពីក្រុមកំពូលតារាងនេះ ត្រឹម ១ពិន្ទុប៉ុណ្ណោះ គិតត្រឹមសប្ដាហ៍ទី១៩ នៃលីគកំពូលកម្ពុជា ឆ្នាំ២០២៤/២៥ ។សម្រាប់ជំនួបដ៏ជក់ចិត្ត នៅកីឡដ្ឋានខេត្តស្វាយរៀង ដែលមានអ្នកទស្សនាផ្ទាល់ជិត ៤ពាន់នាក់ កាលពីរាត្រីថ្ងៃអាទិត្យកន្លងទៅ កីឡាករ ញាណ សុស៊ីដាន បានរកគ្រាប់បាល់នាំមុខឲ្យក្រុមម្ចាស់ផ្ទះ ១គ្រាប់មុន ត្រឹមរយៈពេល ៥នាទី ។ បន្ទាប់មកព្រះខ័នរាជស្វាយរៀង បានបង្កើតឱកាសជាបន្ដបន្ទាប់ទៀត តែធ្វើមិនបានសម្រេច ស្របពេលភ្នំពេញក្រោន ក៏បានព្យាយាមវាយបក រហូតរកបានគ្រាប់តាមស្មើ ១-១ នៅនាទី៣៦ ដោយកីឡាករ Jelle Joost Goselink ។  បន្ទាប់ពីរកបាន ១គ្រាប់ម្នាក់នៅវគ្គទី១ ក្រុមទាំងពីរ បានព្យាយាមវាយសម្រុកគ្នាកាន់តែខ្លាំង នៅវគ្គទី២ ខណៈក្រោយបន្ដលេងបានប្រមាណ ១០នាទី ភ្នំពេញក្រោន បានបាត់បង់សមាជិកម្នាក់ គឺកីឡាករ យ៉ើ មូស្លីម ដែលរងពិន័យកាតក្រហម នៅនាទី៥៤ ក្រោយបង្កកំហុសលើកីឡាករ Nick Tylor នៅលើតំបន់ប្រអប់ទី ដែលបង្កឱកាសឲ្យព្រះខ័នរាជស្វាយរៀង មានប្រៀប រហូតរកបាន ២គ្រាប់បន្ថែមទៀត ដោយកីឡាករ Gabriel Silva Costa នៅនាទី៧១ និងកីឡាករ Pablo Augusto នៅនាទី៩០+២ ។ជ័យជម្នះនេះ នាំឲ្យព្រះខ័នរាជស្វាយរៀង ក្លាយជាក្រុមដំបូង ដែលបានបញ្ចប់កំណត់ត្រាមិនស្គាល់ចាញ់របស់ភ្នំពេញក្រោន ក្នុងរដូវកាលឆ្នាំ២០២៤/២៥ ដែលបានរក្សាអស់រយៈពេល ១៧០ថ្ងៃ ហើយក៏ជាការសងសឹកបានសម្រេចវិញផងដែរ បន្ទាប់ពីជើងទី១ ក្រុមការពារតំណែងជើងឯកនេះ បានរងបរាជ័យលើទឹកដីភ្នំពេញក្រោន ដោយលទ្ធផល ៣-៤ ។ជាមួយការបន្ថែម ៣ពិន្ទុនេះដែរ ធ្វើឲ្យព្រះខ័នរាជស្វាយរៀង បន្ដឈរលេខ២ តែបានកើនដល់ ៤៣ពិន្ទុ ក្រោយឆ្លងកាត់ ១៧ប្រកួតឈ្នះ១៤ ស្មើ ១ និងចាញ់ ២ ចាញ់ប្រៀបក្រុមភ្នំពេញក្រោន ១ពិន្ទុ ដ្បិតអតីតក្រុមជើងឯក ៨សម័យនេះ បានឆ្លងកាត់ ១៧ប្រកួតដូចគ្នា ឈ្នះ ១៤ ស្មើ ២ និងចាញ់ ១ រកបាន ៤៤ពិន្ទុ៕ អត្ថបទ លី ឈុនឡា

បឹងកេត បន្ដខកចិត្តលើទឹកដីសៀមរាប ក្រោយចាញ់អង្គរថាយហ្គឺរ ១-០ នៃលីគកំពូលកម្ពុជា

2025/01/27 12:59:04 pm        205
Facebook Telegram Linkin
ក្រុមបឹងកេត នៅតែមិនអាចរកជ័យជម្នះជាថ្មី លើក្រុមអង្គរថាយហ្គឺរ នៅទឹកដីខេត្តសៀមរាប បានឡើយ ក្រោយខកខានអស់រយៈពេល ៧រដូវកាល បន្ទាប់ពីរងបរាជ័យ ១-០ ក្នុងជំនួបជើងទី២  នៃលីគកំពូលកម្ពុជា ឆ្នាំ២០២៤/២៥ សប្ដាហ៍ទី១៩ កាលពីរាត្រីថ្ងៃអាទិត្យកន្លងទៅ ។ក្រោយរក្សាលទ្ធផលស្មើគ្នា ០-០ នៅកីឡដ្ឋានស្ដាតចាស់ កាលពីជើងទី១ បឹងកេត និងអង្គរថាយហ្គឺរ បានបន្ដការប្រកួតដ៏ជក់ចិត្ត នៅកីឡដ្ឋានអាគីហ៊ីរ៉ូកាតុ ដោយវគ្គទី១ បានរក្សាលទ្ធផល ០-០ មុនកីឡាករ គី រីណា រកបានគ្រាប់បាល់នាំមុខឲ្យក្រុមម្ចាស់ផ្ទះ នៅនាទី៦៧ ហើយក៏ជាគ្រាប់បាល់ជ័យជម្នះ ក្នុងការប្រកួតនេះផងដែរ បន្ទាប់ពីបឹងកេត ព្យាយាមវាយបក តែមិនអាចរកគ្រាប់បាល់បានសម្រេច ។ការបរាជ័យនេះ បានធ្វើឲ្យបឹងកេត បានត្រឹមបន្ដការខកចិត្តជាថ្មី ក្រោយមិនអាចបំបែកកំណត់ត្រាមិនល្អរបស់ខ្លួន ក្នុងការជួបក្រុមអង្គរថាយហ្គឺរ នៅទឹកដីខេត្តសៀមរាប បន្ទាប់ពីយកឈ្នះ ៣-១ ក្នុងលីគ កាលពីឆ្នាំ២០១៧ គឺពួកគេមិនទាន់ស្គាល់ឈ្នះក្រុមមានមូលដ្ឋាននៅខេត្តសៀមរាបនេះឡើយ ដោយជួបគ្នា ៧លើកចុងក្រោយ ក្រុមនាគខៀវ បានចាញ់ក្រុមខ្លាទឹកក្រូច ២ដង និងស្មើគ្នា ៥ដង ។ការរបូត ៣ពិន្ទុនេះដែរ បានធ្វើឲ្យកៅអី Top-6 របស់បឹងកេត ឡើងកម្ដៅ ដោយពួកគេធ្លាក់មកឈរលេខ៦ និងរក្សា ២៦ពិន្ទុក្នុងដៃ ហើយត្រូវគម្រាមកំហែងដោយក្រុម ISI ដង្កោសែនជ័យ ដែលកំពុងឈរលេខ៧ និងរកបាន ២៤ពិន្ទុ គ្រាដែលនៅសល់ ៣ប្រកួតដូចគ្នា សម្រាប់ជុំទី២ ។ រីឯអង្គរថាយហ្គឺរ បានកើនភាគខ្ពស់ ក្នុងការកក់កៅអី Top-6 ក្រោយឆ្លងកាត់ ១៧ប្រកួតឈ្នះ១០ ស្មើ ៣ និងចាញ់ ៤ រកបាន ៣៣ពិន្ទុបណ្ដោះអាសន្ន ៕ អត្ថបទ លី ឈុនឡា 

គិរីវង់ បញ្ចប់កំណត់ត្រាមិនស្គាល់ឈ្នះក្នុងលីគ ក្រោយលត់ក្រសួងមហាផ្ទៃ ៤-១

2025/01/27 11:27:56 am        171
Facebook Telegram Linkin
ទីបំផុតក្រុមគិរីវង់សុខសែនជ័យ បានស្គាល់ជ័យជម្នះលើកដំបូង ក្នុងលីគកំពូលកម្ពុជា ឆ្នាំ២០២៤/២៥ ហើយ ក្រោយយកឈ្នះសមាគមកីឡាបាល់ទាត់ក្រសួងមហាផ្ទៃ ៤-១ ក្នុងជំនួបជើងទី២ កាលពីចុងសប្ដាហ៍កន្លងទៅ នៅទឹកដីរបស់ខ្លួន ។ជំនួបសប្ដាហ៍ទី១៩ នៅកីឡដ្ឋានគិរីវង់នេះ ក្រុមម្ចាស់ផ្ទះ បានបើកការនាំមុខក្រសួងមហាផ្ទៃ ៣គ្រាប់មុន នៅវគ្គទី១ ដែល ២គ្រាប់រកបានដោយកីឡាករ ឃាន់ សុប៉ិន ខ្ចីជើងមកពីក្លិបបឹងកេត នៅនាទីទី៧ និងនាទី៣៨ គ្រាដែល ១គ្រាប់ទៀត ដោយកបានដោយកីឡាករ អារីហ្វីន ម៉ូហាំម៉ាត់ នៅនាទី៤៥+២ ។ចូលវគ្គទី២ ពួកគេ នៅតែបន្ដធ្វើបានល្អ ដែលរកបាន ១គ្រាប់បន្ថែម ដោយកីឡាករ Neville Mbanwei Tengeg នៅនាទី៧៣ មុនកីឡាករ ចាន់ វិបុលដាវីដ វាយបកបាន ១គ្រាប់ឲ្យក្រុមភ្ញៀវ នៅនាទី៨៦ ហើយលទ្ធផលនេះ ក៏បានរក្សាដល់ចប់ការប្រកួត ដោយគិរីវង់សុខសែនជ័យ បានយកឈ្នះក្រសួងមហាផ្ទៃ ៤-១ ។នេះគឺជាជ័យជម្នះលើកដំបូង ក្នុងលីគកំពូលកម្ពុជា រដូវកាលនេះ បន្ទាប់ពីឆ្លងកាត់ ១៧ប្រកួតកន្លងមក បានត្រឹមស្មើ ២ដង ខណៈ ១៥ដងទៀត សុទ្ធតែបរាជ័យ ។ សម្រាប់ជ័យជម្នះក្នុងការប្រកួតទី១៨ របស់ក្រុមមានមូលដ្ឋាននៅខេត្តតាកែវនេះ ក៏ជាការសងសឹកបានសម្រេចផងដែរ បន្ទាប់ពីជើងទី១ ពួកគេបានចាញ់ក្រសួងមហាផ្ទៃ ក្រៅដី ១-២ ។ យ៉ាងណាមិញគិរីវង់សុខសែនជ័យ នៅតែបន្ដឈរបាតតារាង ដោយរកបាន ៥ពិន្ទុ ស្មើគ្នាជាមួយក្រុមក្រសួងមហាផ្ទៃ ៕ អត្ថបទ លី ឈុនឡា

កីឡាទោចក្រយាន បញ្ចប់ការប្រកួតជើងឯកថ្នាក់ជាតិប្រចាំឆ្នាំដោយជោគជ័យ

2025/01/27 10:53:55 am        1050
Facebook Telegram Linkin
ការប្រកួតកីឡាទោចក្រយានជ្រើសរើសជើងឯកថ្នាក់ជាតិ ឆ្នាំ២០២៤ បានបញ្ចប់ដោយជោគជ័យ ក្រោយដំណើរការប្រកួតរយៈពេល ៣ថ្ងៃ ចាប់ពីថ្ងៃទី២៤ ដល់ថ្ងៃទី២៦ ខែមករា ឆ្នាំ២០២៥ កន្លងទៅ នៅខេត្តកំពត ខណៈមន្ដ្រីសហព័ន្ធ បានវាយតម្លៃខ្ពស់ ចំពោះកំណើនសមត្ថភាព និងបច្ចេកទេសរបស់អត្តពលិកចូលរួម ពិសេសក្រុមជម្រើសជាតិ ដែលបានប្រមូលផ្ដុំហ្វឹកហាត់កាលពីឆ្នាំមុន ។លោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជា បានឲ្យដឹងថា ការប្រកួតជើងឯកថ្នាក់ជាតិប្រចាំឆ្នាំនេះ មានសមាគម/ក្លិបចូលរួមជាង ២០ ដែលមានការថយចុះប្រមាណ ១០ក្លិប បើធៀបកាលពីឆ្នាំមុន ។ ប៉ុន្ដែបើនិយាយពីសមត្ថភាពរបស់កីឡាករចូលរួម គឺមានភាពរីកចម្រើនគួរឲ្យកត់សម្គាល់ បន្ទាប់ពីការប្រកួតប្រជែងលើស្ថានភាពផ្លូវលំបាក ក៏ដូចជាការជិះឡើងភ្នំបូកគោជាដើម ។លោកបន្ដថា គោលដៅសំខាន់ នៃការប្រកួតនេះ គឺដើម្បីធ្វើតេស្ដសមត្ថភាពក្រុមជម្រើសជាតិ បន្ទាប់ពីពួកគេបានប្រមូលផ្ដុំហ្វឹកហាត់ កាលពីឆ្នាំ២០២៤ កន្លងមក ដើម្បីវាយតម្លៃសមត្ថភាពួកគេ ក៏ដូចជាការធ្វើជ្រើសរើសកីឡាករជម្រើសជាតិ សម្រាប់ប្រមូលផ្ដុំហ្វឹកហាត់ក្នុងឆ្នាំថ្មី ពិសេសត្រៀមការប្រកួតកីឡាស៊ីហ្គេម លើកទី៣៣ នៅប្រទេសថៃ នាចុងឆ្នាំ២០២៥ ។ ជាលទ្ធផល លោកបានវាយតម្លៃខ្ពស់ ចំពោះភាពរីកចម្រើន ទាំងសមត្ថភាព និងបច្ចេកទេសរបស់កីឡាករជម្រើសជាតិ បើធៀបកាលពីឆ្នាំមុនទៀតផង ។ចំពោះលទ្ធផលបច្ចេកទេសជារួម ក្រោយឆ្លងកាត់ការប្រកួតដ៏ស្វិតស្វាញលើ ៨វិញ្ញាសា កាលពីចុងសប្ដាហ៍កន្លងទៅ សមាគមកីឡាទោចក្រយានក្រសួងមហាផ្ទៃ ដណ្ដើមបានមេដាយច្រើនជាងគេសរុប ៦គ្រឿង (មាស ៣ ប្រាក់ ១ និងសំរឹទ្ធ ២) ខណៈក្លិបកង់គិរីរម្យ ឈរលេខ២ ឈ្នះមេដាយមាស ២  និងប្រាក់ ១  និងក្លិប Electro Racing ឈ្នះមេដាយមាស ១ ប្រាក់ ១ និងសំរឹទ្ធ ២ ឈរលេខ៣ ។ រីឯក្លិបកង់កំពត ឈរលេខ៤ ឈ្នះមេដាយមាស ១ និងសំរឹទ្ធ ១ និងក្លិប Cambodia Biking ឈរលេខ៥ ឈ្នះមេដាយមាស ១គ្រឿង ។ជាមួយគ្នាដែរ លោក នូ ចំរើន ក៏បានថ្លែងអំណរគុណ ដល់ក្រសួងអប់រំ យុវជន និងកីឡា រដ្ឋបាលខេត្តកំពត និងដៃគូឧបត្ថម្ភផងដែរ ដែលបានជួយឧបត្ថម្ភគាំទ្រ និងជំរុញឲ្យការរៀបចំព្រឹត្តិការណ៍ប្រចាំឆ្នាំនេះ បញ្ចប់ដោយជោគជ័យ៕ អត្ថបទ លី ឈុនឡា

AC Milan ឈានដល់កិច្ចព្រមព្រៀងខ្ចី Kyle Walker ពី Man City ដល់ចប់រដូវកាល

2025/01/24 03:32:07 pm        253
Facebook Telegram Linkin
ក្លិបបាល់ទាត់អ៊ីតាលី AC Milan បានឈានដល់កិច្ចព្រមព្រៀងក្នុងការចុះហត្ថលេខានាំយកខ្សែការពារអង់គ្លេស Kyle Walker ក្នុងកិច្ចសន្យាខ្ចីជើងដល់ចប់រដូវកាលនេះ។ ក្នុងកិច្ចព្រមព្រៀងនេះ ក៏មានបូករួមទាំងលក្ខខណ្ឌទិញផ្តាច់ផងដែរក្រោយចប់កិច្ចសន្យាខ្ចី។កីឡាករវ័យ ៣៤ ឆ្នាំរូបនេះ បានធ្វើដំណើរដល់ទីក្រុង Milan ប្រទេសអ៊ីតាលីហើយ ដើម្បីបំពេញកិច្ចសន្យា។Walker ដែលបង្ហាញខ្លួនសរុបជាមួយ Man City ៣១៦ លើក ធ្លាប់បានប្រាប់អ្នកចាត់ការ Pep Guardiola ថា ចង់ចាកចេញដើម្បីទទួលបានការប្រកួតប្រជែងថ្មី។ កន្លងមកក៏មានការចរចាពីក្របខណ្ឌ Saudi Pro League ផងដែរ តែអតីតខ្សែការពារ Spurs រូបនេះចង់ផ្លាស់ទៅអ៊ីតាលីជាង។ ក្រៅពី Walker, AC Milan ក៏មានទំនាក់ទំនងជាមួយ Manchester United ផងដែរកន្លងមក តែតាមរយៈច្បាប់នៅអ៊ីតាលី ក្នុងពេលទីផ្សារទិញដូរកីឡាករមានសិទ្ធិចុះហត្ថលេខានាំយកកីឡាករអង់គ្លេសតែម្នាក់ប៉ុណ្ណោះ។ រំលឹកថា Kyle Walker គឺជាសមាជិកសំខាន់របស់ City ដែលឈ្នះជើងឯក Premier League ៦ លើកក្រោមការដឹកនាំរបស់លោក Pep Guardiola ក្រោយផ្លាស់ពី Spurs នៅឆ្នាំ ២០១៧ តម្លៃ ៥០ លានផោន៕ អត្ថបទ៖នាង សុភាវុធ

Bruno Fernandes ស៊ុតគ្រាប់ចុងម៉ោងឱ្យ Manchester United ឈ្នះ Rangers នៅ Europa League

2025/01/24 02:45:08 pm        224
Facebook Telegram Linkin
ក្រុមបិសាចក្រហម Manchester United រកបានបីពិន្ទុទាំងតានតឹងក្រោយជ័យជំនះលើក្រុមភ្ញៀវស្កុតឡេន Glasgow Rangers ២-១ នៅ Old Trafford បន្តមិនដែលចាញ់នៅ Europa League រដូវកាលនេះ។ក្រុមរបស់លោក Ruben Amorim រកបានគ្រាប់នាំមុខមុនដោយបាល់ចូលទីខ្លួនឯងរបស់អ្នកចាំទី Jack Butland នៅពេលដាល់បាល់ទាត់ចេញពីជ្រុងរបស Christian Eriksen។ នៅសល់តែពីរនាទីទៀតចប់ការប្រកួត ពោលគឺនាទីទី ៨៨ ក្រុមភ្ញៀវ Rangers ក៏រកបានគ្រាប់តាមស្មើវិញដោយ Cyriel Dessers ធ្វើឱ្យអ្នកគាំទ្រ Rangers នៅ Old Trafford អបអរសាទរ រីករាយនឹងទទួលយកលទ្ធផលស្មើ។ បានត្រឹមបួននាទីទី នៅក្នុងម៉ោងបន្ថែមបង្គ្រប់នាទីទី ៩០+២ ប្រធានក្រុម Bruno Fernandes គឺជាអ្នកស៊ុតសម្រេចគ្រាប់បាល់បីពិន្ទុឱ្យ Manchester United ឡើងឈរលេខបួនក្នុងតារាងមាន ១៥ ពិន្ទុមិនទាន់ស្គាល់ចាញ់ ពោលគឺឈ្នះ ៤ ស្មើ ៣។ ប្រកួតចុងក្រោយ Manchester United នឹងត្រូវទៅទឹកដីរ៉ូម៉ានីជួប FCSB Steaua Bururesti។ ចំណែក Rangers នៅឈរលេខ ១៣ ស្ថិតក្នុងតំណែង Play-Off ត្រូវជួប Union Saint-Gilloise ក្នុងទឹកដីរបស់ខ្លួនប្រកួតចុងក្រោយ៕ អត្ថបទ៖នាង សុភាវុធ 

ពានសម្ដេចតេជោ-ថ្នាក់ជាតិ៖ កងយោធពលខេមរភូមិន្ទ យកឈ្នះអង្គរថាយហ្គឺរ ៣-០ គួរឲ្យភ្ញាក់ផ្អើល

2025/01/24 10:46:45 am        233
Facebook Telegram Linkin
សមាគមកីឡាបាល់ទាត់កងយោធពលខេមរភូមិន្ទ បានបង្កការភ្ញាក់ផ្អើលជាខ្លាំង សម្រាប់អ្នកគាំទ្រ បន្ទាប់ពីយកឈ្នះក្រុមម្ចាស់ផ្ទះអង្គរថាយហ្គឺរ ៣-០ ក្នុងជំនួបជើងទី១ នៃពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៨ (ថ្នាក់ជាតិ) ឆ្នាំ២០២៤/២៥ វគ្គ ១៦ក្រុមចុងក្រោយ កាលពីល្ងាចថ្ងៃទី២៣ ខែមករា ឆ្នាំ២០២៥ នៅកីឡដ្ឋានអាគីហ៊ីរ៉ូកាតុ ។ជំនួបដ៏ជក់ចិត្តលើទឹកដីខេត្តសៀមរាបនេះ កងយោធពលខេមរភូមិន្ទ បានធ្វើឲ្យអ្នកគាំទ្រក្រុមម្ចាស់ផ្ទះ ស្ទើរមិនអាជឿ ដោយរយៈពេលមិនដល់ ២០នាទីផង ពួកគេបានស៊ុតបំប៉ោងសំណាញ់ទីអង្គរថាយហ្គឺរ ៣គ្រាប់ ដែលធ្វើបាន Hat-Trick ដោយកីឡាករជប៉ុន Konishita Reiya នៅនាទីទី៦ នាទីទី៩ និងនាទី១៨ ។ ការរបូតគ្រាប់បាល់ដ៏លឿនជាបន្ដបន្ទាប់នេះ បានធ្វើឲ្យអង្គរថាយហ្គឺរ ជួបការលំបាកក្នុងការវាយបក ជាក់ស្ដែងពួកគេ បានព្យាយាមការពារ និងវាយបកជាខ្លាំង តែមិនអាចទម្លាយរបាំងការពារក្រុមភ្ញៀវបានឡើយ ដោយរក្សាលទ្ធផល ០-៣ រហូតដល់ចប់ការប្រកួតពេញម៉ោង ។ជាការកត់សម្គាល់ កាលពីជួបគ្នាក្នុងលីគកំពូលកម្ពុជា អង្គរថាយហ្គឺរ បានយកឈ្នះក្រុមកងយោធពលខេមរភូមិន្ទ ទាំង ២ជើង ដោយយកឈ្នះ ២-១ ក្រៅដី ហើយបានយកឈ្នះរហូតដល់ ៥-០ លើទឹកដីខ្លួន នៅជើងទី២ ។ ការណ៍នេះ បានធ្វើឲ្យអ្នកគាំទ្រមានការភ្ញាក់ផ្អើល ដែលក្រុមលោក ភា សុភ័ក្ដ្រា អាចវាយបកយកឈ្នះក្រុមមានមូលដ្ឋាននៅខេត្តសៀមរាបនេះ រហូតដល់ ៣-០ ក្នុងពានរង្វាន់សម្ដេចតេជោ ហ៊ុន សែន (ថ្នាក់ជាតិ) វិញ ។ជាមួយជ័យជម្នះនេះ គឺជាដើមទុនដល់សំខាន់សម្រាប់ក្រុមកងយោធពលខេមរភូមិន្ទ តែក៏មិនទាន់អស់សង្ឃឹម សម្រាប់ក្រុមអង្គរថាយហ្គឺរដែរ ដ្បិតក្រុមទាំងពីរ នឹងត្រូវជួបគ្នា នៅជើងទី២ នាថ្ងៃទី០៥ ខែកុម្ភៈ ឆ្នាំ២០២៥ ខាងមុខ ដើម្បីកាត់សេចក្ដីរកក្រុមឡើងទៅវគ្គ ៨ក្រុមចុងក្រោយ នៃពានរង្វាន់សម្ដេចតេជោ-ថ្នាក់ជាតិឆ្នាំនេះ៕ អត្ថបទ លី ឈុនឡា

ព្រះខ័នរាជស្វាយរៀង បានបង្ហាញពីរូបភាពដ៏ល្អពីបាល់ទាត់កម្ពុជា

2025/01/24 10:19:58 am        375
Facebook Telegram Linkin
លោក Pep Munoz គ្រូបង្វឹកក្រុមព្រះខ័នរាជស្វាយរៀង បានលើកឡើងថា ក្រុមរបស់ខ្លួន បានបង្ហាញនូវភាពដ៏ល្អពីវិស័យបាល់ទាត់កម្ពុជា តាមរយៈការប្រកួតជើងឯកក្លិបបាល់ទាត់អាស៊ីអាគ្នេយ៍ ឆ្នាំ២០២៤/២៥ បើទោះបីក្រុមលោក បានអស់ឱកាសក្នុងការប្រជែងកៅអីវគ្គបន្ដក៏ដោយ ។ការយល់ឃើញថា បន្ទាប់ពីព្រះខ័នរាជស្វាយរៀង បានត្រឡប់មកដល់មាតុភូមិវិញ នៅល្ងាចថ្ងៃទី២៣ ខែមករា ឆ្នាំ២០២៤ ក្រោយប្រកួតស្មើក្រុមម្ចាស់ផ្ទះ Dong A Thanh Hoa របស់វៀតណាម ០-០ កាលពីថ្ងៃពុធកន្លងទៅ ក្នុងយុទ្ធនាការប្រកួតជើងឯកក្លិបបាល់ទាត់ប្រចាំតំបន់អាស៊ាន ។លោក Pep បានសម្ដែងការសោកស្ដាយ ដែលមិនអាចយកឈ្នះការប្រកួតដ៏សំខាន់នេះ ក៏ដូចជាទទួលបានលទ្ធផលល្អពេលជួបក្រុមឥណ្ឌូនេស៊ី PSM Makasar ។ បែបនេះក្ដី ជារួមលោកបានវាយតម្លៃខ្ពស់ ចំពោះការខំប្រឹងរបស់កូនក្រុម ដែលបានបង្ហាញនូវរូបភាពដ៏ល្អពីកម្រិតលេង និងការវិឌ្ឍន៍នៃវិស័យកីឡាបាល់ទាត់កម្ពុជាលើឆាកអន្ដរជាតិ ។ទន្ទឹមជាមួយគ្នាលោកក៏បានបញ្ជាក់មូលហេតុមិនដាក់ខ្សែប្រយុទ្ធ Pablo Agusto លេងទល់នឹងក្រុម Dong A Thanh Hoa ផងដែរ ដោយសារគេមិនទាន់ជាសះស្បើយ ១០០% តែលោកសង្ឃឹមថា ការប្រកួតដ៏ធំក្នុងលីគកំពូលកម្ពុជា ចុងសប្ដាហ៍នេះ Pablo នឹងកីឡាករថ្មីៗផ្សេងៗ នឹងអាចជួយក្រុមក្នុងការប្រកួតជាមួយក្រុមភ្នំពេញក្រោនបាន ។គួរដឹងថា ព្រះខ័នរាជស្វាយរៀង បានអស់ឱកាសប្រជែងកៅអីវគ្គ ៤ក្រុម នៃជើងឯកក្លិបបាល់ទាត់អាស៊ាន ក្រោយឆ្លងកាត់ ៤ប្រកួតឈ្នះ ១ ស្មើ ១ និងចាញ់ ២ រកបាន ៤ពិន្ទុ ឈរលេខ៥ បណ្ដោះអាសន្ន ។ យ៉ាងណាក្រុមការពារតំណែងជើងឯកលីគកំពូលកម្ពុជា រដូវកាលថ្មីនេះ នៅសល់ភារកិច្ច ១ប្រកួតទៀត ដោយត្រូវបើកទ្វារផ្ទះទទួលក្រុម Shan United របស់មីយ៉ាន់ម៉ា នាថ្ងៃទី០៥ ខែកុម្ភៈ ឆ្នាំ២០២៥ ខាងមុខ នៅពហុកីឡដ្ឋានជាតិ(អូឡាំពិក) រាជធានីភ្នំពេញ ៕ អត្ថបទ លី ឈុនឡា

សហព័ន្ធគុនខ្មែរ រកឃើញក្បាលម៉ាស៊ីនអាណត្ដិថ្មី ខណៈអគ្គលេខាធិការនឹងត្រូវរើសជាពិសេស

2025/01/23 01:25:38 pm        182
Facebook Telegram Linkin
សហព័ន្ធកីឡាប្រដាល់គុនខ្មែរ បានរកឃើញក្បាលម៉ាស៊ីនដឹកនាំសហព័ន្ធ សម្រាប់អាណត្ដិថ្មីហើយ ដោយមានសមាជិកគណៈកម្មាធិការប្រតិបត្តិសរុបចំនួន ១៩រូប ដឹកនាំដោយឯកឧត្តម ខូវ ឆាយ ដែលបន្ដជាប់ធ្វើជាប្រធានសហព័ន្ធ សម្រាប់អាណត្តិទី៨ ឆ្នាំ២០២៥-២០២៩ ខណៈអគ្គលេខាធិការ នឹងត្រូវជ្រើសរើសជាពិសេស ដោយមិនជាប់ពាក់ព័ន្ធជាសមាជិកគណៈកម្មាធិការប្រតិបត្តិ ឬសមាគម/ក្លិបឡើយ ។នេះបើយោងតាមមហាសន្និបាតបញ្ចប់អាណត្តិទី៧ និងបន្ដអាណត្តិទី៨ របស់សហព័ន្ធ ដែលបានរៀបចំកាលពីល្ងាចថ្ងៃទី២២ ខែមករា ឆ្នាំ២០២៥ ដោយមានការចូលរួមជាសក្ខីភាពពីសំណាក់ឯកឧត្តម តែម ម៉ឺន អគ្គលេខាធិការរង តំណាងឯកឧត្តមបណ្ឌិតទេសរដ្ឋមន្ដ្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា និងតំណាងក្រសួងអប់រំ យុវជន និងកីឡា ព្រមទាំងតំណាងសមាគម/ក្លិបជាច្រើនផងដែរ ។ឯកឧត្តម ខូវ ឆាយ បានគូសបញ្ជាក់ថា មហាសន្និបាតនេះ បានប្រព្រឹត្តទៅ តាមលក្ខន្ដិកៈរបស់សហព័ន្ធ ក៏ដូចជាតាមគោលការណ៍ណែនាំរបស់ក្រសួងអប់រំ យុវជន និងកីឡា ។ ក្នុងនាមប្រធានសហព័ន្ធអាណត្តិថ្មី ឯកឧត្តមបានប្ដេជ្ញាពង្រឹងសាមគ្គីផ្ទៃក្នុង និងជំរុញឲ្យមានកម្មវិធីកាន់តែច្រើន ដើម្បីអភរិក្ស និងអភិវឌ្ឍន៍គុនខ្មែរឲ្យកាន់តែល្បីល្បាញលើពិភពលោក ក៏ដូចជាធានាបាននូវការបណ្ដុះបណ្ដាលកីឡាករត្រៀមការប្រកួត ទាំងក្នុង និងក្រៅស្រុកផងដែរ ។ពាក់ព័ន្ធនឹងអគ្គលេខាធិការសហព័ន្ធ ក្នុងអាណត្ដិថ្មីវិញ នឹងត្រូវជ្រើសរើសជាពិសេស ក្នុងនាមបុគ្គលមិនមែនជាសមាជិកគណៈកម្មាធិការប្រតិបត្តិ ឬសមាគម/ក្លិប ពិសេសត្រូវមានសមត្ថភាព និងពេលវេលាគ្រប់គ្រាន់ ហើយត្រូវឆ្លងកាត់ការបោះឆ្នោតគាំទ្រដោយសមាជិកគណៈកម្មាធិការប្រតិបត្តិទាំងអស់ ដើម្បីធានានូវការប្រតិបត្តិការងារប្រចាំថ្ងៃបានល្អប្រសើរ និងប្រកបដោយប្រសិទ្ធភាពខ្ពស់ ។សូមបញ្ជាក់ថា ក្នុងចំណោមសមាជិកគណៈកម្មាធិការប្រតិបត្តិសហព័ន្ធកីឡាប្រដាល់គុនខ្មែរ អាណត្តិទី៨ ក្រៅពីឯកឧត្តម ខូវ ឆាយ បន្ដធ្វើជាប្រធាន គឺមានអនុប្រធានសហព័ន្ធចំនួន ៧រូប និងអគ្គហិរញ្ញឹកម្នាក់ ព្រមទាំងសមាជិកចំនួន ១០រូប ក្នុងនោះអគ្គលេខាធិការសហព័ន្ធ អាណត្តិមុន គឺលោក ហេង សុខឃន ក៏ជាសមាជិកមួយរូបផងដែរ ៕ អត្ថបទ លី ឈុនឡា

លោក Pep សោកស្ដាយការរបូតពិន្ទុពីប្រកួតមុន នាំឲ្យព្រះខ័នរាជ អស់ឱកាសប្រជែង​កៅអីវគ្គបន្ដ

2025/01/23 12:12:36 pm        335
Facebook Telegram Linkin
លោក Pep Munoz គ្រូបង្វឹកក្រុមព្រះខ័នរាជស្វាយរៀង ហាក់មានការសោកស្ដាយ ចំពោះ​ការ​ខក​ខាន​ដណ្ដើម​ពិន្ទុពីការប្រកួតមុនៗ ពិសេសការប្រកួតក្នុងដី ជាមួយក្រុមឥណ្ឌូនេស៊ី PSM Makasar ដែលនាំឲ្យក្រុមខ្លួន ពិបាកក្នុងការប្រជែងកៅអីវគ្គបន្ដ រហូតអស់ឱកាស​ក្នុង​ការ​ប្រកួត​ជើង​ឯកក្លិបបាល់ទាត់អាស៊ីអាគ្នេយ៍ ឆ្នាំ២០២៤/២៥ ។នេះបើតាមការលើកឡើង ក្រោយក្រុមជើងឯកលីគកំពូលកម្ពុជា បានត្រឹមប្រកួត​ស្មើ​ក្រុម​ម្ចាស់​ផ្ទះ Dong A Thanh Hoa របស់វៀតណាម ០-០ កាលពីរាត្រីថ្ងៃពុធ សម្រាប់ការប្រកួតទី៤ ក្នុង​ពូលA នៃព្រឹត្តិការណ៍បាល់ទាត់ជើងឯកក្លិបប្រចាំតំបន់ ដែលនាំឲ្យក្រុមព្រះខ័នរាជស្វាយរៀង បាន​អស់​ឱកាសជាផ្លូវការ ក្នុងការប្រជែងកៅអីវគ្គ ៤ក្រុមចុងក្រោយ ។គ្រូបង្វឹកជនជាតិអេស្ប៉ាញដដែលបន្ដថា ការប្រកួតជាមួយក្រុមខ្លាំង Thanh Hoa កូនក្រុមខ្លួនពិតជាធ្វើបានល្អ ទោះបីមិនអាចលេងតាមការរៀបចំ ១០០% ដោយសារបញ្ហាទីលានក៏ដោយ ។ តែសោកស្ដាយ ដែលក្រុមខ្លួន មិនអាចទាត់បញ្ចប់ទីបាន ហើយផ្គួបជាមួយការប្រកួតពីមុនមួយចំនួន ក្រុមខកខានទទួលបានពិន្ទុផង នាំឲ្យក្រុមអស់ឱកាសប្រជែងកៅអីវគ្គបន្ដតែម្ដង ។គួរដឹងថា ក្រោយទទួល ១ពិន្ទុពីក្រុមខ្លាំងវៀតណាម Dong A Thanh Hoa នាំឲ្យព្រះខ័នរាជស្វាយរៀង បន្ដឈរលេខ៥ ដោយរកបាន ៤ពិន្ទុ តាមពីក្រោយក្រុម Dong A Thanh Hoa ដែលឈរលេខ៤ រកបាន ៦ពិន្ទុ ព្រមទាំងក្រុម Terengganu FC របស់ម៉ាឡេស៊ី និងក្រុម PSM Makasar របស់ឥណ្ឌូនេស៊ី ដែលឈរលេខ២ និងលេខ៣ រកបាន ៧ពិន្ទុស្មើគ្នា គ្រាដែលក្រុម BG Pathum United របស់ថៃ ឈរកំពូលតារាង រកបាន ៨ពិន្ទុ ។ដោយសារក្រុមនីមួយៗ នៅសល់ ១ប្រកួតក្នុងដៃ ធ្វើឲ្យព្រះខ័នរាជស្វាយរៀង អស់ឱកាសក្នុងការប្រជែងកៅអីវគ្គបន្ដ ទោះបីអាចយកឈ្នះការប្រកួតចុងក្រោយក៏ដោយ ។ សម្រាប់ជំនួបបញ្ចប់ពូល ក្រុមកំពុងឈរលេខ២ នៃលីគកំពូលកម្ពុជា នឹងត្រូវជួបក្រុម Shan United របស់មីយ៉ាន់ម៉ា នាថ្ងៃទី០៥ ខែកុម្ភៈ ឆ្នាំ២០២៥ ខាងមុខ នៅពហុកីឡដ្ឋានជាតិ(អូឡាំពិក) រាជធានីភ្នំពេញ៕ អត្ថបទ លី ឈុនឡា  

បណ្ដាញសង្គម

ព័ត៌មានថ្មីៗ

ពពួកល្មូនហើរអាយុកាលជាង ២០០លានឆ្នាំ ត្រូវបានរកឃើញរដ្ឋ Arizona សហរដ្ឋអាមេរិក
07/08/2025 08:07 PM
Facebook Telegram Linkin
លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ ជួបសម្តែងការគួរសមជាមួយប្រធានគណៈកម្មាធិការបេតិកភណ្ឌពិភពលោកលើកទី៤៧
07/08/2025 08:07 PM
Facebook Telegram Linkin
បុរសម្នាក់ត្រូវបានម៉ាស៊ីនយន្តហោះស្រូបចូលរហូតដល់ស្លាប់ នៅអាកាសយានដ្ឋាន Bergamo របស់អ៊ីតាលី
07/08/2025 08:07 PM
Facebook Telegram Linkin
គ្រោះរាំងស្ងួតធ្វើឲ្យការខួងអណ្តូងទឹកកាន់តែជ្រៅនៅភាគឦសានប្រទេសស៊ីរី
07/08/2025 08:07 PM
Facebook Telegram Linkin
អ្នកភូមិឥណ្ឌា វាយមនុស្ស ៥នាក់រហូតដល់ស្លាប់ ពាក់ព័ន្ធនឹងអំពើ «អាបធ្មប់»
07/08/2025 08:07 PM
Facebook Telegram Linkin
ពលរដ្ឋអាហ្វហ្គានីស្ថានជិតកន្លះលាននាក់វិលត្រឡប់ពីអ៊ីរ៉ង់វិញ ក្រោយវិធានការបង្រ្កាបរបស់ទីក្រុងតេអេរ៉ង់
07/08/2025 08:07 PM
Facebook Telegram Linkin
អាកាសយានដ្ឋានក្រុង Marseille ប្រទេសបារាំងបង្ខំបិទដំណើរការ ដោយសារភ្លើងឆេះព្រៃរីករាលដាលឆាប់រហ័ស
07/08/2025 08:07 PM
Facebook Telegram Linkin
រដ្ឋបាលរាជធានីភ្នំពេញព្យាយាមដោះស្រាយជាមួយពលរដ្ឋ៣គ្រួសារដែលរងផលប៉ះពាល់នៃគម្រោងសាងសង់ស្ពានឆ្លងទន្លេបាសាក ចាក់អង្រែក្រោម–ព្រែកប្រា ក្នុងតម្លៃជាង៣លានដុល្លារ តែពលរដ្ឋនៅតែមិនទទួលយក
07/08/2025 08:07 PM
Facebook Telegram Linkin
មនុស្សជាង ១៨.០០០នាក់ ត្រូវនៅមួយកន្លែង ខណៈចំហេះព្រៃរាលដាល នៅតំបន់ Catalonia របស់អេស្ប៉ាញ
07/08/2025 08:07 PM
Facebook Telegram Linkin
មេដឹកនាំថៃពូកែកាឡៃនិងពង្រីកបញ្ហានាំរឿងដល់អ្នកជិតខាង !
07/08/2025 07:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.