នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ព្រះខ័នរាជ ប្រកួតកម្ដៅសាច់ដុំស្មើ Terengganu ២-២ ខណៈ ១គ្រាប់រកបានដោយខ្សែប្រយុទ្ធចំណូលថ្មី
គោព្រៃជំទង់កម្ពុជា ចេញទៅប្រកួតជើងឯក U23 អាស៊ាន នៅឥណ្ឌូនេស៊ី ខណៈត្រូវជួបឡាវស្អែក
ប្រធានស្ដីទី KIF ចាត់ទុកជើងឯកគុនខ្មែរថ្នាក់ជាតិនៅអ៊ីរ៉ង់ ជាការផ្សព្វផ្សាយ និងអភិវឌ្ឍន៍នៅតំបន់មជ្ឈិមបូព៌ា
កីឡាជឺជីតស៊ូកម្ពុជា ដណ្ដើមបានមេដាយ ២៩គ្រឿង ក្នុងការប្រកួតជើងឯកអាស៊ីអាគ្នេយ៍

ព័ត៌មានកីឡា

ក្រសួងអប់រំ ណែនាំសហព័ន្ធគុនខ្មែរ ពង្រឹងសាមគ្គីផ្ទៃក្នុង និងពន្លឿនការធ្វើសន្និបាត​បញ្ចប់អាណត្តិ

2025/01/09 11:07:36 am        156
Facebook Telegram Linkin
ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា បានណែនាំ​ថ្នាក់ដឹកនាំ​សហព័ន្ធ​កីឡា​ប្រដាល់​គុនខ្មែរ ត្រូវពង្រឹងសាមគ្គីផ្ទៃក្នុង និងពន្លឿនការរៀបចំមហាសន្និបាតបញ្ចប់អាណត្តិ ដើម្បី​រក្សាបាននូវសុពលភាព នៃសមាជិកភាពរបស់ខ្លួន ដែលទទួលស្គាល់ដោយក្រសួងអប់រំ និង​គណៈកម្មាធិការជាតិអូឡាំពិកកម្ពុជា ក្នុងការអភិវឌ្ឍកីឡាអត្តសញ្ញាណជាតិ និងព្រលឹងជាតិ​មួយ​នេះ​។ការលើកឡើងនេះ បន្ទាប់ពីឯកឧត្តមរដ្ឋលេខាធិការ តំណាងឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ដ្រី រដ្ឋមន្ដ្រីក្រសួងអប់រំ យុវជន និងកីឡា បាន​កោះប្រជុំ​ជាមួយ​ថ្នាក់​ដឹកនាំ​សហព័ន្ធ​កីឡាប្រដាល់គុនខ្មែរ ដោយមានការចូលរួមពីឯកឧត្តម ខូវ ឆាយ ប្រធានសហព័ន្ធ និង​លោក ហេង សុខឃន អគ្គលេខាធិការសហព័ន្ធ នៅមជ្ឈមណ្ឌលជាតិហ្វឹកហ្វឺនកីឡា កាល​ពីថ្ងៃ​ទី​០៨ ខែមករា ដើម្បីពិនិត្យយន្ដការសំខាន់ៗចំនួន ២ ទី១-ការរៀបចំ​នីតិវិធី​គ្រប់​គ្រង​មូល​និធិអ​ភិវឌ្ឍន៍​គុនខ្មែរ និងទី២-ការរៀបចំមហាសន្និបាតបញ្ចប់អាណត្តិទី៧ ដែលត្រូវផុសសុពលភាព នា​ថ្ងៃ​ទី០១ ខែកុម្ភៈ ឆ្នាំ២០២៥ ខាងមុខ ។ទន្ទឹមជាមួយគ្នា បន្ទាប់ពីទទួលបានព័ត៌មាន​ពីការមិន​ឯកភាព​គ្នា​ក្នុង​គណៈកម្មាធិការ​ប្រតិបត្តិ​សហព័ន្ធ ឯកឧត្តមក៏បានណែនាំឲ្យសហព័ន្ធ ពិនិត្យ និងពង្រឹងសាមគ្គីផ្ទៃក្នុងឡើងវិញ ដើម្បី​ឈាន​ទៅ​ការរៀបចំហាសន្និបាត និងសម្រេចបាននូវសិទ្ធអំណាចចុងក្រោយ ក្នុងការដឹកនាំ​គ្រ​ប់​គ្រង​សហព័ន្ធ ប្រកបដោយអភិបាលកិច្ចល្អ ស្របតាមបទដ្ឋានគតិយុត្តិរបស់ក្រសួងអប់រំ យុវចន និង​កីឡា និងគណៈកម្មាធិការជាតិអូឡាំពិកកម្ពុជា ក៏ដូចជាលក្ខន្ដិកៈ និងបទ​បញ្ជា​ផ្ទៃ​ក្នុង​របស់​សហព័ន្ធ​ផងដែរ ។សូមបញ្ជាក់ថា បន្ទាប់ពីជួបប្រជុំជាមួយមន្ដ្រីជាន់ខ្ពស់ក្រសួងអប់រំ ថ្នាក់ដឹកនាំសហព័ន្ធ ដែល​កំពុង​ដឹកនាំ​ដោយឯកឧត្តម ខូវ ឆាយ បានរាយការណ៍ថ្នាក់ដឹកនាំក្រសួងអប់រំថា ខ្លួននឹងរៀបចំ​មហា​សន្និបាត​បញ្ចប់អាណត្តិទី៧ នាថ្ងៃទី២២ ខែមករាខាងមុខ ស្របពេលឯកឧត្តម វ៉ាត់ ចំរើន ក៏បាន​ណែនាំ​ឲ្យ​គ្រប់ភាគីពាក់ព័ន្ធ ដែលជាសមាជិកសហព័ន្ធ ទាំងសមាជិកគណៈកម្មាធិការប្រតិបត្តិ តំណាង​សមាគម/ក្លិប ដែលមានសិទ្ធបោះឆ្នោតចូលរួម ដើម្បី​ធានា​ការ​បោះឆ្នោត​ប្រកបដោ​យ​តម្លាភាព និងយុត្តិធម៌ ក្នុងការស្វែងរកក្បាលម៉ាស៊ីនដឹកនាំគ្រប់គ្រងសហព័ន្ធ ក្នុងអាណត្តិថ្មី ឆ្នាំ​២០២៥-២០២៩ ខាងមុខ ៕ អត្ថបទ លី ឈុនឡា 

ជើងឯកក្លិបបាល់ទាត់អាស៊ាន៖ លោក Pep ពេញចិត្តទម្រង់លេងកូនក្រុម ទោះចាញ់ PSM Makasar ១-០

2025/01/09 10:30:21 am        280
Facebook Telegram Linkin
ក្រុមព្រះខ័នរាជស្វាយរៀង បានរបូត ៣ពិន្ទុជាថ្មី ក្នុងយុទ្ធនាការ​ប្រកួត​ជើង​ឯក​ក្លិបបាល់​ទាត់​អាស៊ាន ឆ្នាំ២០២៤/២៥ ពូលA ក្រោយចាញ់ក្រុមភ្ញៀវ PSM Makasar របស់ឥណ្ឌូនេស៊ី ដោយ​លទ្ធផល ១-០ ក្នុងជំនួបក្នុងដីលើកដំបូង កាលពីរាត្រីថ្ងៃទី០៨ ខែមករា ឆ្នាំ២០២៥ ។ ទោះបរាជ័យក្ដី តែលោក Pep Munoz គ្រូបង្វឹកក្រុមជើងឯកលីគកំពូលកម្ពុជា នៅតែ​ពេញ​ចិត្ត​ទម្រង់​លេង​កូនក្រុម ដែលខំប្រឹង និងធ្វើបានយ៉ាងល្អ ជាមួយការគ្រប់គ្រងការប្រកួតស្ទើរទាំងស្រុង ។ជំនួបដ៏ជក់ចិត្ត ចំពោះមុខអ្នកគាំទ្រជិត ១ម៉ឺននាក់ នៅពហុកីឡដ្ឋានជាតិ រាជធានីភ្នំពេញ​នេះ Makasar បានបើកការនាំមុខក្រុមម្ចាស់ផ្ទះ ១គ្រាប់មុន តាំងពី ៣៨វិនាទីដំបូង ។ បន្ទាប់​ពី​មក​ព្រះខ័​នរាជស្វាយរៀង ក៏បានព្យាយាមវាយសម្រុក និងដាក់សម្ពាធ រហូតចប់ការ​ប្រកួត​ពេញ​ម៉ោង ទោះបីក្រុមអវត្តមានកីឡាករសំខាន់ៗជាច្រើនរូប ដោយសារបញ្ហារបួស ហើយ​ត្រូវ​ប្រឈម​ជាមួ​យ​ក្រុមសម្បូរកីឡាករមានកាយសម្បទាធំៗក្ដី តែសោកស្ដាយព្រះខ័នរាជ មិនអាច​ទម្លាយ​របាំង​ការពារក្រុមភ្ញៀវបានឡើយ ។ក្រោយចប់ការប្រកួតលោក Pep បានលើកឡើងថា ការប្រកួតនេះ កូនក្រុមលោក​ពិត​ជា​ធ្វើ​បាន​ល្អ ដោយការគ្រប់គ្រងបាល់ស្ទើរទាំងមូល ពិសេសកូនក្រុមរបស់ខ្លួន ដែលខំ​ប្រឹង​លេង​យ៉ាង​អស្ចារ្យ ស្ទើរដូចការរៀបចំ ១០០% ។ បែបនេះក្ដីលោកមានការសោកស្ដាយ ដែលការ​បញ្ចប់​ទី​ចុង​ក្រោយ មិនទាន់បានល្អ ។ ប៉ុន្ដែលោកនៅតែសរសើរកូនក្រុម ទោះបីអវត្តមាន​កីឡាករ​សំខាន់​ៗ​ជា​ច្រើន ដែលពួកគេបានខំប្រឹងលេងស្ទើរអាចទទួលបានជ័យជម្នះ ឬស្មើក្រុមខ្លាំងឥណ្ឌូនេស៊ី ។ដោយឡែកលោក Bernardo Tavares គ្រូបង្វឹកក្រុម PSM Makasar​ បាន​ទទួល​ស្គាល់​ការ​ទទួល​បាន​ ៣ពិន្ទុនេះ មិនមែនជារឿងងាយស្រួលនោះទេ ដ្បិតក្រុមត្រូវលេងការជាមួយក្រុមដ៏ល្អ និង​កីឡាករដ៏ល្អរបស់ព្រះខ័នរាជស្វាយរៀង ដែលព្យាយាមដាក់សម្ពាធលើក្រុមខ្លួន ។ យ៉ាង​ណា​លោក​ក៏​បានកោតសរសើរកូនក្រុមខ្លួន ដែលព្យាយាមលេងរហូតដល់ចប់ ៩០នាទី​ជាមួយ​បរិយាកាស​ដ៏​ល្អក្នុងការប្រកួតនៅពហុកីឡដ្ឋានជាតិ(អូឡាំពិក) ។គួរដឹងថា ក្រោយរបូត ៣ពិន្ទុដំបូងក្នុងដី ព្រះខ័នរាជស្វាយរៀង បានធ្លាក់មកឈរលេខ៥ បណ្ដោះ​អាសន្ន ដោយរក្សា ៣ពិន្ទុក្នុងដៃ និងសល់ ២ប្រកួត ដែលត្រូវជួបក្រុមម្ចាស់ផ្ទះ Dong A Thanh Hoa របស់វៀតណាម នាថ្ងៃទី២២ ខែមករា និងជួបក្រុមភ្ញៀវ Shan United របស់មីយ៉ាន់ម៉ា នា​ថ្ងៃ​ទី០៥ ខែកុម្ភៈ ឆ្នាំ២០២៥ ខាងមុខ ។បច្ចុប្បន្នក្រុម PSM Makasar បានបន្ដឈរកំពូលតារាង ដោយមាន ៧ពិន្ទុ នាំមុខក្រុម Dong A Thanh Hoa និងក្រុម BG Pahtum United របស់ថៃ ដែលរកបាន ៥ពិន្ទុស្មើគ្នា បន្ទាប់​ពី​ក្រុម​ទាំង​ពីរ បញ្ចប់ការប្រកួតកាលពីយប់មិញ ដោយលទ្ធផលស្មើគ្នា ១-១ ស្របពេល​ក្រុម ​Terengganu FC របស់ម៉ាឡេស៊ី បានរំកិលមកឈរលេខ៤ បន្ទាប់ពីក្រុម Shan United ៥-០ ៕ អត្ថបទ លី ឈុនឡា 

រដ្ឋបាលស្រុកស្វាយជ្រំខេត្តស្វាយរៀងរៀបចំប្រគួតកីឡាបាល់ទាត់អបអរសាទរខួបលើកទី៤៦ថ្ងៃបង្កើតថ្ងៃរំដោះ៧មករា

2025/01/08 05:36:01 pm        98
Facebook Telegram Linkin
ស្វាយរៀង ៖ រដ្ឋបាលស្រុកស្វាយជ្រំ ខេត្តស្វាយរៀង នៅរសៀលថ្ងៃទី៨ ខែមករា ឆ្នាំ២០២៥នេះ បានរៀបចំពិធីប្រកួតកីឡាបាល់ទាត់អបអរសាទរខួបលើកទី៤៦ ថ្ងៃមហាជ័យជំនះ៧មករាឆ្នាំ១៩៧៩ ឆ្នាំ ២០២៥ ដែលពិធីនេះមានការចូលរួមពីក្រុមកីឡាមហាជននៅក្នុងឃុំមួយចំនួននៃស្រុកស្វាយជ្រំ ។បន្ទាប់ពីក្រុមកីឡាករមហាជនធ្វើការប្រកួតដណ្ដើមពានរង្វាន់៧ មករារបស់ស្រុក រួចមកលោកហែមសារិទ្ធ អភិបាលស្រុកស្វាយជ្រំ ខេត្តស្វាយរៀងបានមានប្រសាសន៍សំណេះសំណាល ដោយសំដែងអបអរសាទរចំពោះក្រុមកីឡាករ ទាំងអស់ដែលបានមកចូលរួមប្រគួត អបអរសាទរខួបលើកទី ៤៦ ថ្ងៃមហាជ័យជំនះ៧មករា ឆ្នាំ១៩៧៩ ឆ្នាំ២០២៥ ក្នុងបរិយាកាសសប្បាយរីករាយស្និតស្នាលរវាងក្រុមនិងក្រុម ក្រោមការរួមគាំទ្រពីស្រទាប់យុវជន និងពលរដ្ឋយ៉ាងច្រើនកុះករ ។ឆ្លៀតក្នុងឱកាសនោះដែរក្នុងនាមរដ្ឋបាលស្រុក លោកហែម សារិទ្ធ បានអំពាវនាវដល់ពលរដ្ឋពិសេសយុវជនបន្តអនុវត្តគោលនយោបាយភូមិឃុំមានសុវត្ថិភាពឲ្យបានខ្ជាប់ខ្ជួន បន្តគោរពច្បាប់ចរាចរណ៍ដើម្បីបញ្ជៀសគ្រោះថ្នាក់ដល់អាយុជីវិត បញ្ជៀសការប្រើប្រាស់គ្រឿងញៀន បញ្ជៀសហិង្សា គ្រួសារ និងសង្គមជាតិ ទប់ស្កាត់ក្មេងទំនើង ពិសេសធ្វើការវាយបកគ្រប់សកម្មភាពដែលគណបក្សនិងអង្គការសង្គមស៊ីវិលបង្កឡើងក្នុងភាពញុះញង់ ដើម្បីរក្សាសុវត្ថិភាពសន្តិសុខមូលដ្ឋាន។ជាមួយគ្នានោះដែរលោកហែមសារិទ្ធក៏បានណែនាំដល់ក្រុមកីឡាករកីឡាការិនីពេលវិលត្រឡប់ទៅមូលដ្ឋានត្រូវ បន្តហ្វឹកហាត់ដើម្បីធ្វើការប្រកួតដណ្ដើមពានរង្វាន់នៅលើកក្រៅក្រោយៗ ពិសេសបើកបរគ្មានជាតិស្រវឹងដើម្បីធានាសុវត្ថិភាពខ្លួនឯងនិងក្រុម៕ ដោយ ភា សារឹត

ខ្សែប្រយុទ្ធ Bournemouth, Evanilson ត្រូវសម្រាកមួយរយៈធំក្រោយវះកាត់ជើង

2025/01/08 01:53:48 pm        107
Facebook Telegram Linkin
ខ្សែប្រយុទ្ធ Bournemouth, Evanilson នឹងត្រូវអវត្តមានមួយរយៈធំបន្ទាប់ពីទទួលការវះកាត់របួសជើង។ខ្សែប្រយុទ្ធសញ្ជាតិប្រេស៊ីលរូបនេះ បានទទួលរងរបួស និងផ្លាស់ប្តូរចេញនៅនាទីទី ៨២ នៃការប្រកួតកាលពីថ្ងៃសៅរ៍នៅពេល Bournemouth យកឈ្នះ Everton ១-០។ ក្លិបបានបញ្ជាក់ថា ការវះកាត់ទទួលបានជោគជ័យ តែមិនទាន់បញ្ជាក់ពីពេលវេលាច្បាស់លាស់នៃការសម្រាកព្យាបាលរបួសរបស់កីឡាករវ័យ ២៥ ឆ្នាំរូបនេះឡើយ។Evanilson បានស៊ុតបញ្ចូលទី ៥ គ្រាប់ក្នុងការបង្ហាញខ្លួន ១៩ ប្រកួត បន្ទាប់ពីផ្លាស់មកកាន់ Bournemouth ផ្ទេរពី Porto កាលពីខែសីហាឆ្នាំមុនក្នុងតម្លៃ ៤០ លានផោន។ ជ័យជំនះលើ Everton កាលពីថ្ងៃសៅរ៍ ធ្វើឱ្យ Bournemouth ស្ថិតក្នុងកំណត់ត្រាថ្មីរបស់ក្លិប ដោយមិនចាញ់សោះនៅ Premier League ៨ ប្រកួតជាប់គ្នា។ ក្រុមរបស់លោក​ Iraola កំពុងឈរលេខ ៧ ក្នុងតារាង បីពិន្ទុតាមពីក្រោយ Top4៕ អត្ថបទ៖នាង សុភាវុធ

គ្រូបង្វឹកក្រុមជម្រើសជាតិបារាំង Didier Deschamps នឹងចាកចេញពីតំណែងក្រោយចប់ World Cup 2026

2025/01/08 01:45:21 pm        99
Facebook Telegram Linkin
លោក Didier Deschamps ដែលជាគ្រូបង្វឹកកាន់តំណែងដឹកនាំក្រុមជម្រើសជាតិបារាំងយូរបំផុត នឹងមិនបន្តកិច្ចសន្យាដែលនឹងផុតសុពលភាពនៅឆ្នាំ ២០២៦ នោះឡើយ នេះបើតាមការបញ្ជាក់របស់សហព័ន្ធកីឡាបាល់ទាត់បារាំង។កិច្ចសន្យារបស់បុរសវ័យ ៥៦ ឆ្នាំរូបនេះនឹងដំណើរការដល់ចប់ World Cup 2026 ដែលមិនទាន់ធ្វើការប្រកួតជម្រុះនៅឡើយ។ លោក Didier Deschamps បានមកកាន់តំណែងដឹកនាំក្រុមជម្រើសជាតិបារាំងនៅឆ្នាំ ២០១២ បន្តពីមិត្តរួមអាជីពដែលឈ្នះជើងឯក World Cup 1998 ជាមួយគ្នាគឺលោក Laurent Blanc និងបានដឹកនាំក្រុមឈ្នះជើងឯក World Cup 2018 លើទឹកដីរុស្ស៊ី ពីរឆ្នាំបន្ទាប់ពីឡើងដល់វគ្គផ្តាច់ព្រ័ត្រ Euro 2016 លើទឹកដីរបស់ខ្លួនដែលចាញ់ព័រទុយហ្កាល់។ អតីតប្រធានក្រុមបារាំងរូបនេះ ជាមនុស្សម្នាក់ក្នុងចំណោមបីនាក់ប៉ុណ្ណោះដែលឈ្នះជើងឯក World Cup ទាំងពេលជាកីឡាករ និងជាអ្នកគ្រូបង្វឹក ហើយលោកក៏បានដឹកនាំក្រុមឡើងវគ្គផ្តាច់ព្រ័ត្រ World Cup ម្តងទៀតនៅឆ្នាំ ២០២២ លើទឹកដីកាតានៅពេលចាញ់អាហ្សង់ទីនដោយបាល់ ១១ ម៉ែត្រកាត់សេចក្តី។ លោក Didier Deschamps នឹងប្រកាសផ្លូវការពីអនាគតរបស់លោកនៅថ្ងៃពុធនេះ នេះបើតាមការចុះផ្សាយដោយសារព័ត៌មានបារាំង L’Equipe៕ អត្ថបទ៖នាង សុភាវុធ

ក្លិបចិន Guangzhou នឹងមិនមានមុខនៅលីគកំពូលចិនរដូវកាលក្រោយឡើយ ដោយសារបញ្ហាបំណុល

2025/01/08 01:36:16 pm        182
Facebook Telegram Linkin
Guangzhou FC ក្លិបបាល់ទាត់ដែលជោគជ័យបំផុតនៅទឹកដីចិន នឹងមិនមានមុខនៅក្របខណ្ឌបាល់ទាត់ចិនឡើយនៅរដូវកាលក្រោយ ដោយសារតែមិនអាចសងបំណុលដែលជំពាក់ជាច្រើន ខណៈជើងឯកលីគចិន ៨ សម័យមួយនេះ ត្រូវបានសមាគមបាល់ទាត់ចិន CFA ដកសិទ្ធិពីគ្រប់ការប្រកួតក្នុងស្រុកទាំងអស់នៅពេលរដូវកាលថ្មីចាប់ផ្តើម។ ក្នុងរជ្ជកាលជោគជ័យគេឃើញ Guangzhou FC បញ្ចប់លេខបួននៅ FIFA Club World Cup និងធ្លាប់បានចុះកិច្ចព្រមព្រៀងសហការជាមួយ Real Madrid ក្នុងបញ្ជូនកីឡាករយុវជនទៅហ្វឹកហាត់នៅទឹកដីអេស្ប៉ាញ រួមជាមួយនឹងការបញ្ចេញគម្រោងសាងសង់កីឡដ្ឋានថ្មីដែលអាចផ្ទុកទស្សនិកជនបាន ១០​ ម៉ឺននាក់ផងដែរ។ ការរីកចំរើនយ៉ាងឆាប់រហ័សរបស់ Guangzhou បានចាប់ផ្តើមនៅពេលដែលអ្នកអភិវឌ្ឍន៍អចលនទ្រព្យ China Evergrande បានទិញក្លឹបនេះក្នុងឆ្នាំ ២០១០ និងបានប្តូរឈ្មោះក្រុមទៅជា Guangzhou Evergrande ហើយបានបណ្តាក់ទុនយ៉ាងច្រើន ស្របតាមមហិច្ឆតារបស់ប្រធានាធិបតីចិន Xi Jinping ក្នុងការប្រែក្លាយប្រទេសទៅជាមហាអំណាចបាល់ទាត់ដែលអាចធ្វើជាម្ចាស់ផ្ទះ និងឈ្នះការប្រកួត World Cup។លោក Marcelo Lippi ដែលធ្លាប់ដឹកនាំអ៊ីតាលីឈ្នះ World Cup 2006 ត្រូវបានតែងតាំងឱ្យដឹកនាំ Guangzhou នៅឆ្នាំ ២០១២ ហើយលោកក៏នាំក្រុមឈ្នះជើងឯកលីគចិនបីលើក Chinese Cup មួយលើក និង AFC Champions League មួយលើក។ មិនតែប៉ុណ្ណោះលោក Luiz Felipe Scolari ដែលដឹកនាំក្រុមប្រេស៊ីលឈ្នះ World Cup 2002 នោះ ក៏ត្រូវបានតែងតាំងផងដែរ និងបានដឹកនាំក្រុមឈ្នះជើងឯកសរុប ៧ ក្នុងរយៈពេល ២ ឆ្នាំកន្លះ។ អំឡុងពេលនោះក្លិបបាននាំយកកីឡាករល្បីៗពីអឺរ៉ុបដូចជាអតីតខ្សែបម្រើ Spurs និង Barcelona, Paulinho អតីតខ្សែប្រយុទ្ធអ៊ីតាលី Alberto Gilardino និងខ្សែប្រយុទ្ធកូឡុំប៊ី Jackson Martinez ស្របពេលដែលក្លិបចិនផ្សេងទៀតក៏បានចំណាយលុយសន្ធឹកសន្ធាប់ក្នុងការប្រកួតប្រជែងផងដែរ។ ខ្សែប្រយុទ្ធប្រេស៊ីល Hulk បានចូលរួមជាមួយ Shanghai SIPG ក្នុងតម្លៃផ្ទេរ ៤៦ លានផោន ខណៈដែលខ្សែបម្រើ Chelsea, Oscar ផ្លាស់មកកាន់ Shanghai Shenhua តម្លៃ ៦០ លានផោន តមកដោយ Carlos Tevez ៤០ លានផោន។ យ៉ាងណាក្តី វិបត្តិហិរញ្ញវត្ថុសម្រាប់បាល់ទាត់ចិនចាប់ផ្តើមកើតឡើងអំឡុងពេលជំងឺរាតត្បាតសកល Covid-19 ខណៈដែលក្រុមហ៊ុនអចលនាទ្រព្យកំពូលរបស់ចិន Evergrande ប្រកាសក្ស័យធននៅឆ្នាំ ២០២២ ធ្វើឱ្យ Guangzhou ធ្លាក់ក្នុងវិបត្តិដែរ ដោយគម្រោងសាងសង់កីឡដ្ឋានថ្មីត្រូវលុបចោល ការលក់កីឡាករចេញ និងធ្លាក់ទៅក្របខណ្ឌទីពីរ។ ថ្វីបើក្លិបបានប្រឹងប្រែងងើបឡើងមកកាន់ក្របខណ្ឌកំពូលចិនវិញ បញ្ហហិរញ្ញវត្ថុមិនត្រូវបានដោះស្រាយស្រាច់បាច់នៅឡើយ មុននឹងឈានដល់ចំណាត់ការដោយសមាគមបាល់ទាត់ចិនបែបនេះ៕ អត្ថបទ៖នាង សុភាវុធ

Heung min-Son បន្តកិច្ចសន្យាជាមួយ Spurs ដល់ឆ្នាំ ២០២៦

2025/01/08 01:23:10 pm        102
Facebook Telegram Linkin
ខ្សែប្រយុទ្ធកូរ៉េខាងត្បូង Heung min-Son បានចុះហត្ថលេខាលើកិច្ចសន្យាថ្មីបន្តស្នាក់នៅជាមួយ Tottenham Hotspur ដល់ឆ្នាំ ២០២៦។ កីឡាករវ័យ ៣២ ឆ្នាំរូបនេះ បានចូលរួមជាមួយក្លិបដែលមានមូលដ្ឋាននៅទីក្រុងឡុងដ៍មួយនេះនៅឆ្នាំ ២០១៥ ផ្ទេរពី Bayer Leverkusen និងបានស៊ុតបញ្ចូលទីសរុប ១៦៩ គ្រាប់ក្នុងការបង្ហាញខ្លួន ៤៣១ ប្រកួតឱ្យ Spurs។ គិតតែនៅ Premier League កីឡាករជម្រើសជាតិកូរ៉េរូបនេះបង្ហាញខ្លួនសរុប ៣២០ ប្រកួតរកបាន ១២៥ គ្រាប់ និង ៦៨ គ្រាប់បាល់បញ្ជូន។ រយៈពេល ៩ ឆ្នាំនៅទីក្រុងឡុងដ៍ Son មិនដែលឈ្នះពានអ្វីមួយឡើយ តែបានឈានដល់វគ្គផ្តាច់ព្រ័ត្រ UEFA Champions League នៅឆ្នាំ ២០១៩ និងបញ្ចប់លេខ ៥ នៅ Premier League រដូវកាលមុន។បច្ចុប្បន្ន Spurs កំពុងឈរលេខ ១២ ខណៈ Son ស៊ុតបញ្ចូលទីបាន ៥ គ្រាប់និង ៦ បាល់បញ្ជូនក្នុងចំណោមការបង្ហាញខ្លួន ១៧ ប្រកួត៕ អត្ថបទ៖នាង សុភាវុធ

សហព័ន្ធគុនខ្មែរ កំណត់លក្ខខណ្ឌចាប់គូ ៩ចំណុច ខណៈអ្នកល្មើសប្រឈមអស់សិទ្ធប្រកួត​រៀងរហូត

2025/01/08 12:43:11 pm        387
Facebook Telegram Linkin
សហព័ន្ធកីឡាប្រដាល់គុនខ្មែរ ដឹកនាំដោយឯកឧត្តម ខូវ ឆាយ ជាប្រធាន កាលពីថ្មីៗ បាន​សម្រេច​ជូនដំណឹងដល់ដៃគូអភិវឌ្ឍន៍នានារបស់សហព័ន្ធ ស្ដីពីការចាប់គូកីឡាករ-កីឡាការិនី​ប្រកួត​ប្រចាំ​សប្ដាហ៍តាមស្ថានីយទូរទស្សន៍ និងកម្មវិធីប្រកួតផ្សេងៗ ដោយត្រូវគោរព​តាម​បទ​បញ្ជា​បច្ចេក​ទេសគ្រប់គ្រងការប្រកួតរបស់សហព័ន្ធ ខណៈកីឡាករ-កីឡាការិនី​ប្រព្រឹត្ត​កំហុស​ដដែល​ៗ ប្រឈមនឹងការដកសិទ្ធបញ្ឈប់ការប្រកួតរៀងរហូត ។យោងតាមលិខិត ដែលបានចម្លងជូនក្រសួងអប់រំ យុវជន និងកីឡា និង​គណៈ​កម្មាធិការ​ជាតិ​អូឡាំពិក​កម្ពុជា បានឲ្យដឹងថា ដោយពិនិត្យឃើញថា ការចាប់គូប្រកួតកីឡាករ-កីឡាការិនី​តាម​ស្ថានីយ​ទូរទស្សន៍ និងកម្មវិធីប្រកួតផ្សេងៗមួយចំនួន មិនទាន់បានយកចិត្តទុកដាក់ដល់សុខភាព កាយ​សម្បទា និងគុណផលរបស់កីឡាករ-កីឡាការិនីនៅឡើយ ។ ដើម្បីរក្សាបា​ន​នូវ​សុខភាព​ផ្លូវ​ការ ផ្លូវចិត្ត បញ្ញាស្មារតី និងគុណផលរបស់កីឡាករ-កីឡាការិនីបានល្អយូរអង្វែង សហព័ន្ធ បាន​ស្នើ​ដល់​ដៃគូអភីវឌ្ឍទាំងអស់ សហការ និងអនុវត្តតាមបទបញ្ជាបច្ចេកទេសគ្រប់គ្រងការប្រកួត ដោយ​កំណត់​លក្ខខណ្ឌ ៩ចំណុច រួមមាន៖១- កីឡាករ កីឡាការិនី បន្ទាប់ពីប្រកួតហើយ ត្រូវសម្រាករយៈពេលយ៉ាងតិចពីរសប្តាហ៍ ទើប​អាច​ចាប់គូ ប្រកួតទៀតបាន លើកលែងតែការប្រកួតម៉ារ៉ាតុង និងមានការអនុញ្ញាតពីសហព័ន្ធ.២- កីឡាករ កីឡាការិនីមុនចាប់គូឱ្យប្រកួត ត្រូវបានត្រួតពិនិត្យកាយសម្បទា សុខភាព​ពី​គ្រូពេទ្យ​របស់​សហព័ន្ធជាមុន។៣- ករណីកីឡាករ កីឡាការិនី ត្រូវបានគូប្រកួតវាយត្រូវក្បាលធ្ងន់ធ្ងរ ត្រូវសម្រាក​ចាប់គូប្រ​កួត​យ៉ាង​តិចរយៈ ពេល ៣សប្តាហ៍។៤- ករណីកីឡាករ កីឡាការិនី ត្រូវបានគូប្រកួតវាយត្រូវក្បាលធ្ងន់ធ្ងរលើកទី២ ត្រូវសម្រាក​ចាប់​គូ​ប្រកួត យ៉ាងតិចរយៈពេល ៦សប្តាហ៍ និងត្រូវធ្វើការពិនិត្យខួរក្បាល ព្រមទាំងមាន​ការ​បញ្ជាក់​ពី​គ្រូពេទ្យ ទើបអាចបន្តចាប់គូប្រកួតបានទៀត។៥- ការកំណត់តម្លៃខ្លួនកីឡាករ កីឡាការិនី តម្លៃក្លឹបជាសមត្ថកិច្ចរបស់ស្ថានីយទូរទស្សន៍ ដៃគូ​អភិវឌ្ឍ ឬម្ចាស់កម្មវិធី។៦- ការចាប់គូកីឡាករ កីឡាការិនីប្រកួតនៅតាមស្ថានីយទូរទស្សន៍ ដៃគូអភិវឌ្ឍ ឬកម្មវិធីផ្សេងៗ ត្រូវ​មានការឯកភាពពីសហព័ន្ធជាមុន។៧- កីឡាករ កីឡាការិនីណា ដែលស្ថានីយទូរទស្សន៍ ដៃគូអភិវឌ្ឍ ឬម្ចាស់កម្មវិធី បានចាប់គូ​រួច​ហើយមានការឯកភាពពីសហព័ន្ធ មិនអនុញ្ញាតឱ្យចាប់គូប្រកួតនៅស្ថានីយទូរទស្សន៍ ដៃគូអភិវឌ្ឍ ឬ​កម្មវិធីផ្សេងត្រួតគ្នាក្នុងសប្តាហ៍តែមួយឡើយ។៨- សហព័ន្ធកីឡាប្រដាល់គុនខ្មែរ បង្កើតជាក្រុមការងារពិនិត្យលើការចាប់គូប្រកួតប្រចាំសប្តាហ៍។៩-គ្រប់ស្ថានីយទូរទស្សន៍ ដៃគូអភិវឌ្ឍ និងម្ចាស់កម្មវិធីត្រូវតែសហការល្អជាមួយសហព័ន្ធ ដើម្បី​ធានា​និរន្តរភាព នៃការអភិវឌ្ឍវិស័យកីឡាប្រដាល់គុនខ្មែរ។ទន្ទឹមជាមួយការកំណត់​លក្ខខណ្ឌចាប់គូនេះ សហព័ន្ធក៏ត្រៀមវិធានាការមួយចំនួន សម្រាប់​ធ្វើ​ការ​ណែនាំ និងដាក់វិន័យ ចំពោះកីឡាករ-កីឡាការិនី ដែលមិនព្រមអនុវត្តផងដែរ រួមមាន៖១- ត្រូវធ្វើការណែនាំ ឬព្រមាន ដោយការស្តីបន្ទោសចំពោះមុខ ឬរដ្ឋបាលជាលាយល័ក្ខអក្សរ បើ​សិន​ជា​កំហុស លើកទី១ ដើម្បីធ្វើការអប់រំណែនាំ ដោយរក្សាឈ្មោះទុកនៅជាកីឡាករ-កីឡាការិនី​ធម្មតា​។២- ផ្អាកមិនឱ្យចូលរួមប្រកួតរយៈពេល ៦សប្តាហ៍ នៅគ្រប់សង្វៀនប្រដាល់គុនខ្មែរ ចំពោះកីឡាករ កីឡាការិនីណាដែលប្រព្រឹត្តកំហុសលើកទី២ ។៣- ផ្អាកមិនឱ្យចូលរួមប្រកួតរយ:ពេល ៣ខែ នៅគ្រប់សង្វៀនប្រដាល់គុនខ្មែរចំពោះកីឡាករ កីឡាការិនី​ណាដែលប្រព្រឹត្តកំហុសលើកទី៣។៤- ផ្អាកមិនឱ្យចូលរួមប្រកួតរយ:ពេល ៦ខែ នៅគ្រប់សង្វៀនប្រដាល់គុនខ្មែរ ចំពោះកីឡាករ កីឡាការិនី​ណាដែលប្រព្រឹត្តកំហុសលើកទី៤។៥- បញ្ឈប់មិនឱ្យចូលរួមប្រកួតជារៀងរហូត និងលុបឈ្មោះចេញពីបញ្ជីឈ្មោះរបស់សហព័ន្ធ ចំពោះ​កីឡាករ កីឡាការិនីណាដែលប្រព្រឹត្តកំហុស មិនព្រមកែប្រែចំនួន ៥លើកឡើងទៅ ។គួរ​ដឹងថា កាលពីពេលថ្មីៗកន្លងទៅ សម្តេចអគ្គមហាសេនាបតីតេជោ ហ៊ុន សែន ប្រធាន​ព្រឹទ្ធសភា​កម្ពុជា បានផ្ដល់អនុសាសន៍គន្លឹះសំខាន់ៗជាច្រើន ដល់ថ្នាក់ដឹកនាំ​សហព័ន្ធ​កីឡា​ប្រដាល់​គុន​ខ្មែរ ក្នុងការពង្រឹងសមត្ថភាពកីឡាករ-កីឡាការិនី ក៏ដូចជា​ការ​អភិវឌ្ឍន៍​នូវ​ធនធាន​បន្ដ​វេន​ ដើម្បីធានាបាន​នូវនិរន្ដរភាព​សម្រាប់​ការ​ប្រកួតវិស័យ​កីឡា​ក្បាច់គុន​ខ្មែរ​បុរាណ​ដ៏​ពេញ​និយ​ម​នេះ ក្នុងនោះសម្ដេចបានផ្ដល់ការណែនាំដល់អ្នកគ្រប់គ្រងកីឡាគុនខ្មែរ ទី១- ត្រូវពិនិត្យ​មើល​ចាប់​ផ្គូរផ្គង​កីឡាករឲ្យឡើងប្រកួត បន្ទាប់ពីសម្ដេចសង្កេតឃើញមានការប្រកួតញឹកញាប់ពេក ធ្វើ​ឲ្យ​ប៉ះពា​ល់​ដល់គុណភាព ឬខូចកីឡាករ ។សម្ដេចតេជោ ហ៊ុន សែន មានប្រសាសន៍ថា កីឡាគុនខ្មែរកំពុងរីកចម្រើន ហើយកីឡាករ-កីឡាការិនី​បានចាប់ផ្ដើមពង្រឹងខ្លួនកាន់តែខ្លាំងក្រោយព្រឹត្តិការណ៍ស៊ីហ្គេម ឆ្នាំ២០២៣ ។ យ៉ាង​ណាការចាប់គូប្រកួតញឹកញាប់ពេក ដោយ ១សប្ដាហ៍ប្រកួតម្ដង គឺមិនអាចទៅរួចទេ ធ្វើ​ឲ្យ​ខូច​កីឡាករ ព្រោះកីឡាករខ្លះមានរបួសមិនទាន់ជាសះស្បើយផង ត្រូវឡើងប្រកួតម្ដងទៀត ។ ហេតុ​នេះ ថ្នាក់ដឹកនាំកីឡាគុនខ្មែរ ត្រូវយកចិត្តទុកដាល់លើបញ្ហាការផ្គូរផ្គងកីឡាករឲ្យប្រកួត ៕ អត្ថបទ លី ឈុនឡា

ឯកឧត្តម គីម រិទ្ធី អញ្ជើញបិទការប្រកួតកីឡាជ្រើសរើសជើងឯក ដណ្ដើមពានរង្វាន់កីឡាមហាជន ឆ្នាំ២០២៥ អបអរសាទរខួបលើកទី៤៦ នៃថ្ងៃជ័យជំនះ ៧មករា

2025/01/06 02:09:00 pm        193
Facebook Telegram Linkin
នារសៀលថ្ងៃទី០៥ ខែមករា ឆ្នាំ២០២៥ នៅទីលានបាល់ទាត់ នៃវិទ្យាល័យចំនេះទូទៅ និងបច្ចេកទេស ជា ស៊ីម ត្បែងមានជ័យ មានរៀបចំពិធីបិទ និងប្រគល់ពានរង្វាន់ដល់ក្រុមកីឡាករ កីឡាការនី ទទួលបានជ័យលាភី នៃការប្រកួតកីឡាមហាជនជ្រើសរើសជើងឯកប្រចាំឆ្នាំ ២០២៥ ដើម្បីអបអរសាទរខួបអនុស្សាវរីយ៍លើកទី៤៦ នៃថ្ងៃជ័យជម្នះ ៧មករា ឆ្នាំ១៩៧៩ ៧មករា ឆ្នាំ២០២៥ ក្រោមអធិបតីភាពក្នុងពិធី ឯកឧត្តម គីម រិទ្ធី អភិបាល នៃគណៈអភិបាល ខេត្តព្រះវិហារ ដោយមានការចូលរួមពីសំណាក់ អភិបាលរងខេត្ត ថ្នាក់ដឹកនាំកងកម្លាំងទាំងបី ប្រធាន អនុប្រធាន មន្ទីរអង្គភាពជុំវិញខេត្ត អភិបាលក្រុងស្រុក លោកគ្រូ អ្នកគ្រូ នឹងកីឡាករ កីឡាការនី ជាច្រើនរូបទៀត។ឯកឧត្តម គីម រិទ្ធី បាថ្លែងថា ការរៀបចំការប្រកួតកីឡានាពេលនេះ ប្រកបដោយជោគជ័យ មានលក្ខណៈជាមិត្តភាព សាមគ្គីភាព យោគយល់គ្នានិងចេះអធ្យាស្រ័យគ្នាទៅវិញទៅមក បានល្អយ៉ាងប្រសើរក្នុងរយៈពេល ០៧ថ្ងៃកន្លងមកនេះ។ ឯកឧត្តមបានបន្តថា លទ្ធផលនេះ បានមកពីការខិតខំប្រឹង ប្រែងអស់ពីកម្លាំងកាយចិត្ត និងបច្ចេកទេសរបស់ក្រុមកីឡានីមួយៗ រួមជាមួយភាពយុត្តិធម៌ មិនលម្អៀង របស់អាជ្ញាកណ្តាល ចៅក្រមតាមប្រភេទកីឡានីមួយៗ អនុវត្តបានល្អទៅតាមបទបញ្ជាបច្ចេកទេស របស់មន្ទីរអប់រំយុវជន និងកីឡាដែលបានដាក់ចេញ និងដោយមានការសហការល្អពីអាជ្ញាធរគ្រប់លំដាប់ថ្នាក់ ពិសេសមន្ត្រីអប់រំ យុវជន និងកីឡាខេត្ត ដែលបានខិតខំយ៉ាងសកម្មបង្កលក្ខណៈងាយស្រួល​ដល់ដំណើរការរៀបចំការប្រកួតនេះឱ្យបានជោគជ័យ។ឯកឧត្តម បានគូសបញ្ជាក់ថា ការប្រកួតកីឡានេះ គឺមិនត្រឹមតែជាឱកាសដើម្បីបង្ហាញសមត្ថភាព និងទេពកោសល្យផ្នែកកីឡាច្រើនប្រភេទតែប៉ុណ្ណោះទេ ប៉ុន្តែក៏ជាសញ្ញាបញ្ជាក់ពីការរីក​ចម្រើន​នៃប្រទេសកម្ពុជា ក្រោមការដឹកនាំប្រកបដោយគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានបន្តមរកតនយោបាយដឹកនាំ​ពីសម្តេចអគ្គមហា សេនាបតីតេជោ ហ៊ុន សែន ដែលជាស្ថាបនិក នៃការអនុវត្តគោល នយោបាយ ឈ្នះ ឈ្នះ នាំមកនូវការ បង្រួបបង្រួមជាតិ បញ្ចប់សង្គ្រាមរ៉ាំរ៉ៃ ទទួលបានសុខសន្តិភាព សុវត្ថិភាព និងការអភិវឌ្ឍរីកច្រើន លើគ្រប់វិស័យនៅកម្ពុជា។ទន្ទឹមនេះ ឯកឧត្តមអភិបាលខេត្ត ក៏បានអំពាវនាវទៅដល់បណ្ដាថ្នាក់ដឹកនាំ មន្ដ្រីរាជការ កងកម្លាំង មន្ទីរ-អង្គភាព រដ្ឋបាលក្រុង-ស្រុក ឃុំ-សង្កាត់ និងអ្នកពាក់ព័ន្ធទាំងអស់ ត្រូវគិតគូររៀបចំ​ឱ្យមានទីកន្លែងសម្រាប់ហាត់ប្រាណ កន្លែងលេងកីឡា និងរៀបចំឱ្យមានព្រឹត្តិការណ៍​ប្រកួតកីឡាផ្សេងៗទៀត។ ជាមួយគ្នានេះដែរ ឯកឧត្តមក៏បានផ្ដាំផ្ញើដល់កីឡាករ កីឡាការនី និងយុវជនទាំងអស់ ត្រូវបន្ដយកចិត្ត ទុកដាក់រៀនសូត្រ ខិតខំស្ដាប់ដំបូន្មានឪពុកម្ដាយ លោកគ្រូ អ្នកគ្រូ ដើម្បីក្លាយ​ជាសរសរទ្រូងនៃប្រទេសជាតិ, ចូលរួមគោរពច្បាប់ចរាចរណ៍ ចៀសចេញឆ្ងាយពី​គ្រឿងញៀន គ្រឿងស្រវឹង ល្បែងស៊ីសងគ្រប់ប្រភេទ, រួមគ្នាលើកទឹកចិត្ត ជម្រុញ និងពង្រីកឱ្យមានការលេង និងការប្រកួតកីឡាឱ្យបានច្រើនប្រភេទបន្ថែមទៀត ដើម្បីទាក់ទាញការគាំទ្រពីមហាជន និងត្រូវ​យកចិត្តទុកដាក់ ថែរក្សាបរិស្ថាន សម្អាតអនាម័យជុំវិញទីលានកីឡារបស់យើង ដើម្បីឱ្យកាន់​តែមានសោភ័ណភាព និងភាពទាក់ទាញបន្ថែមទៀត។សូមបញ្ជាក់ថា ការប្រកួតកីឡាមហាជនជ្រើសរើសជើងឯក ប្រចាំឆ្នាំ២០២៥នេះ មាន ៣វិញ្ញាសា មានក្រុមកីឡាចូលរួមចំនួន ៥៤ក្រុម ស្មើនឹង ៩៧៦នាក់ ដែលមកពីបណ្ដាស្រុក-ក្រុង និងអង្គភាព ស្ថាប័នជុំវិញខេត្ត។ ឆ្លងតាមការប្រកួតយ៉ាងស្វិតស្វាញអស់រយៈពេល ០៧ថ្ងៃកន្លងមកនេះ និងដោយឈរលើស្មារតីចេះអធ្យាស្រ័យគ្នា មានសាមគ្គីភាព មិត្តភាព ជាលទ្ធផល ចំណាត់ថ្នាក់លេខ១ វិញ្ញាសាបាល់ទាត់បុរស បានទៅលើក្រុម ព្រះវិហារស៊ីធី, បាល់ទាត់​នារីបានទៅលើក្រុម បញ្ញាវ័ន្តក្មេងវត្ត ស្រុកឆែប, វិញ្ញាសារបាល់ទះបុរសបានទៅលើក្រុម ស ស យ ក ស្រុកគូលែន , និងបាល់ទះនារី បានទៅ លើក្រុម ស ស យ ក ស្រុកត្បែងមានជ័យ៕

សហព័ន្ធកីឡាវាយកូនឃ្លីលើតុរៀបចំការប្រកួត ជើងឯកថ្នាក់ជាតិអបអរ ខួបអនុស្សាវរីយ៍លើកទី៤៦ ទិវាជ័យជម្នះ ៧មករា

2025/01/06 11:37:57 am        101
Facebook Telegram Linkin
សហព័ន្ធកីឡាវាយកូនឃ្លីលើតុកម្ពុជាបានរៀបចំការប្រកួត ជើងឯកថ្នាក់ជាតិ និងពានរង្វាន់សហព័ន្ធលើកទី៣ ប្រចាំឆ្នាំ២០២៤ ដើម្បីអបអរសាទរខួបអនុស្សាវរីយ៍លើកទី៤៦ ទិវាជ័យជម្នះ ៧មករា ១៩៧៩-២០២៥ ដែលរៀបចំ ពីថ្ងៃទី២-៦ ខែមករា ឆ្នាំ២០២៥ នៅស្តាតអូឡាំពិក សហព័ន្ធបានរៀបចំលើ ៧វិញ្ញាសាទាំងក្របខណ្ឌក១ និងក២។បើតាមរបាយការណ៍ប្រកួតសហព័ន្ធកីឡាវាយកូនឃ្លីលើតុកម្ពុជាបានឱ្យដឹងថា ដោយអនុវត្តតាមផែនការសកម្មភាពប្រចាំឆ្នាំរបស់សហព័ន្ធកីឡាវាយកូនឃ្លីលើតុកម្ពុជា និងការអនុវត្តថវិកាគាំទ្ររបស់ក្រសួងអប់រំ យុវជន និងកីឡា សម្រាប់ពន្លឿនការអភិវឌ្ឍសហព័ន្ធកីឡាជាតិ។ក្នុងការចូលរួមការប្រកួតនេះដែរ សហព័ន្ធបានរៀបចំការប្រកួតរួមមានទាំង ជើងឯកថ្នាក់ជាតិ និងពានរង្វាន់សហព័ន្ធលលើកទី៣ ព្រមទាំង ការប្រកួតអបអរសាទរថ្ងៃ៧មករា សម្រាប់បច្ចេកទេសការប្រកួតក្នុងក្របខណ្ឌក១ មានប្រតិភូ គ្រូបង្វឹក កីឡាករ កីឡាការិនីចូលរួមសុរប ៥៦នាក់ ខណៈក្របខណ្ឌក២ មានប្រតិភូ គ្រូបង្វឹក កីឡាករ កីឡាការិនីសរុប ៤៦នាក់។ ការប្រកួតនេះមាន៧វិញ្ញាសា ដូចជា វិញ្ញាសាក្រុមបុរស ក១, គូបុរស ក១, ឯកត្តជនបុរស ក១, ឯកត្តជននារី, ក្រុមយុវជន ក២, គូយុវជន ក២ និងវិញ្ញាសាឯកត្តជនយុវជន ក២ ដោយការប្រកួតលើវិញ្ញាសាកម្រិតយុវជនត្រូវបានកំណត់អាយុក្រោម១៨ឆ្នាំ។ កីឡាករ កីឡាការិនីចូលរួម សរុប ២១ក្រុម មកពី២១សមាគម-ក្លឹប ក្នុងនោះប្រភេទក្របខណ្ឌក១ មាន១១ក្រុម និងក២ មាន១០ក្រុម ហើយការប្រកួតមានរហូតដល់ ១៨៦ប្រកួត នឹងបញ្ចប់ថ្ងៃទី៦ ខែមករា ឆ្នាំ២០២៥នេះ៕

បណ្ដាញសង្គម

ព័ត៌មានថ្មីៗ

សារព័ត៌មាន NBC News៖ ការវាយប្រហាររបស់អាមេរិក បានបំផ្លាញទីតាំងនុយក្លេអ៊ែរអ៊ីរ៉ង់តែមួយប៉ុណ្ណោះ
07/17/2025 08:07 PM
Facebook Telegram Linkin
ប្រភព៖ អ្នកការទូតលោកខាងលិចនៅចម្ងាយប៉ុន្មានម៉ែត្រពីការវាយប្រហាររបស់អ៊ីស្រាអែល ក្នុងទីក្រុងដាម៉ាស
07/17/2025 08:07 PM
Facebook Telegram Linkin
អ៊ីស្រាអែល បង្កើនថ្លៃការពារជាតិ ដើម្បីឈានដល់ការងារប្រឈមផ្នែកសន្តិសុខ
07/17/2025 07:07 PM
Facebook Telegram Linkin
ហ្សកហ្ស៊ីររារាំងការលក់សារធាតុអ៊ុយរ៉ានីញ៉ូមតម្លៃ ៣លានដុល្លារដែលអាចប្រើក្នុងគ្រាប់បែក
07/17/2025 07:07 PM
Facebook Telegram Linkin
រដ្ឋធានីប្រទេសអេក្វាឌ័រ រងភាពរង្គោះរង្គើរដោយសារវិបត្តិកង្វះទឹកប្រើប្រាស់ប្រចាំថ្ងៃ​
07/17/2025 07:07 PM
Facebook Telegram Linkin
មេបញ្ជាការជាន់ខ្ពស់ណាតូ៖ ប្រព័ន្ធការពារដែនអាកាស Patriot នឹងទៅដល់ទីក្រុងគីវយ៉ាងលឿនតាមដែលអាច
07/17/2025 07:07 PM
Facebook Telegram Linkin
អាហ្វ្រិកខាងត្បូងជំរុញឲ្យមានការរួបរួម ខណៈកិច្ចប្រជុំរដ្ឋមន្រ្តីហិរញ្ញវត្ថុ G20 ចាប់ផ្តើមក្រោមស្រមោលពាណិជ្ជកម្ម
07/17/2025 07:07 PM
Facebook Telegram Linkin
គណៈបញ្ជាការឯកភាពរដ្ឋបាលខេត្តពោធិ៍សាត់កំពុងអនុវត្តយ៉ាងម៉ឺងម៉ាត់នូវបទបញ្ជា ០១បប របស់រាជរដ្ឋាភិបាល
07/17/2025 07:07 PM
Facebook Telegram Linkin
សមាជិកសភាប្រាប់ថា សភាអ៊ុយក្រែន អនុម័តតែងតាំងនាយករដ្ឋមន្ត្រីថ្មី
07/17/2025 06:07 PM
Facebook Telegram Linkin
អឺរ៉ុបទទួលបន្ទុកហិរញ្ញវត្ថុសម្រាប់សង្រ្គាមអ៊ុយក្រែន នឹងធ្វើឲ្យរុស្ស៊ីខឹងសម្បារ
07/17/2025 06:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.