BTV NEWS

កីឡាការិនីលោតទឹកកាណាដា Molly Carlson បង្កើតប្រវត្តិសាស្ត្រ ក្លាយជាកីឡាការិនីដំបូងលោតពីលើផ្ទាំងទឹកកក

Bruno Fernandes បន្តកាន់តំណែងប្រធានក្រុម Man Utd ដដែល ក្រោយរិះគន់លោក Michael Carrick

អ្នកគ្រប់គ្រងក្លិបនាគរាជចតុមុខ៖ ការហាត់កីឡាប្រយុទ្ធ ត្រូវការអ្វីថ្មី ប្លែក ដើម្បអភិវឌ្ឍន៍ខ្លួន និងបើកឱកាសកាន់តែធំ

រត់ប្រណាំងរាត្រី ថ្ងៃឆ្លងឆ្នាំសាកល ជាព្រឹត្តិការណ៍ថ្មីប្លែក បំផុសចលនាកីឡាឱ្យផុសផុលក្នុងរាជធានីភ្នំពេញ

ព័ត៌មានកីឡា

ការប្រកួតរវាងអង់គ្លេស និងអាហ្សង់ទីនធ្វើឲ្យនឹកឃើញដល់រឿងជូរចត់ក្នុងសមរភូមិបាល់ទាត់ និងនយោបាយ គ្រាដែលអាជ្ញាធរអាមេរិករឹតបន្តឹងសន្តិសុខ

ក្រុមបាល់ទាត់ជម្រើសជាតិអាហ្សង់ទីន នឹងត្រូវប្រកួតជាមួយជម្រើសជាតិអង់គ្លេស នៅម៉ោង០២និង០០នាទីរំលងអាធ្រាត្រចូលថ្ងៃទី១៦ ខែកក្កដា ឆ្នាំ២០២៦ ពេលវេលានៅកម្ពុជានៅអាត្លង់តា សហរដ្ឋអាមេរិក ដើម្បីប្រជែងយកកៅអីឡើងទៅវគ្គផ្ដាច់ព្រ័ត្រនៃការប្រកួតកីឡាបាល់ទាត់ពានរង្វាន់ពិភពលោក២០២៦។ នេះគឺជាជំនួបប្រវត្តិសាស្ត្រដែលលើសពីកីឡា ព្រោះបានផ្សារភ្ជាប់យ៉ាងជ្រាលជ្រៅជាមួយរឿងរ៉ាវនយោបាយ និងជម្លោះទឹកដី។ ភាពតានតឹងដ៏ស្រួចស្រាវបំផុតបានកើតឡើងក្រោយសង្រ្គាមកោះហ្វកឡែន (Falklands War) ឬអាហ្សង់ទីនហៅថា កោះម៉ាល់វីណាស់ (Malvinas) ក្នុងឆ្នាំ១៩៨២។ មួយវិញទៀតវាហាក់ដូចជាគាប់ជួប ការទទួលមរណភាពក្នុងសប្តាហ៍នេះរបស់អតីតកីឡាករបាល់ទាត់អាហ្សង់ទីន លោក Antonio Rattin បានធ្វើឱ្យនឹកឃើញអំពីជម្លោះកីឡាដំបូងបង្អស់មួយរវាងប្រទេសទាំងពីរ។ ថ្ងៃទី២៨ ខែកក្កដា ឆ្នាំ ១៩៦៦ ប្រទេសទាំងពីរបានជួបគ្នាក្នុងការប្រកួតវគ្គ ៨ ក្រុមចុងក្រោយនៃពានរង្វាន់បាល់ទាត់ពិភពលោក ពេលនោះប្រទេសអង់គ្លេសធ្វើជាម្ចាស់ផ្ទះ។ លោក Rattinជាប្រធានក្រុមអាហ្សង់ទីន ត្រូវបានបណ្តេញចេញពីទីលាន។ លោកបានចាប់ទាញទង់ជាតិនៅជ្រុងទីលានដែលមានរូបទង់ជាតិចក្រភពអង់គ្លេសនៅពេលលោកដើរចេញ ហើយបន្ទាប់មកបានទៅអង្គុយលើកម្រាលព្រំដែលបម្រុងទុកសម្រាប់ម្ចាស់ក្សត្រិយ៍ Elizabeth ដោយបដិសេធមិនព្រមដើរចេញ។ ក្រោយមក លោកបាននិយាយ ថា អ្នកគាំទ្រអង់គ្លេសបានគប់កំប៉ុងស្រាបៀរមកលើរូបលោក។អារម្មណ៍ឆេវឆាវនៅលើទីលានបានកើនឡើងយ៉ាងខ្លាំងពេញការប្រកួត ដែលបានបញ្ចប់ទៅដោយអង់គ្លេសឈ្នះអាហ្សង់ទីន១ទល់នឹង០។ ក្រោយមក គ្រូបង្វឹកអង់គ្លេសលោក Alf Ramsey បាននិយាយសំដៅទៅលើកីឡាករអាហ្សង់ទីនថាជា "សត្វធាតុ"។ នេះគឺជាការប្រមាថមួយដែលអាហ្សង់ទីនមិនដែលបំភ្លេចបានឡើយ។ម្ភៃឆ្នាំក្រោយមក នៅពហុកីឡដ្ឋាន Azteca ទីក្រុងម៉ិកស៊ីកូ ពោលនៅថ្ងៃទី២២ ខែមិថុនា ឆ្នាំ១៩៨៦ ប្រទេសទាំងពីរបានជួបគ្នាម្តងទៀតក្នុងវគ្គ ៨ ក្រុមចុងក្រោយបាល់ទាត់ពិភពលោក១៩៨៦។ ប្រទេសទាំងពីរទើបតែបានធ្វើសង្គ្រាមក្នុងជម្លោះរយៈពេលជាងពីរខែលើការគ្រប់គ្រងដែនកោះនៅមហាសមុទ្រអាត្លង់ទិកខាងត្បូង ដែលខាងចក្រភពអង់គ្លេសហៅថា កោះ Falklands ហើយអាហ្សង់ទីនហៅថា កោះ Malvinas ក្នុងឆ្នាំ ១៩៨២ ដែលធ្វើឱ្យទាហានអាហ្សង់ទីន ៦៤៩ នាក់ និងទាហានអង់គ្លេស ២៥៥ នាក់បានពលីជីវិត។ អារម្មណ៍ឈឺចាប់ និងសោកសៅនៅតែមានភាពស្រស់ៗនៅឡើយ។ក្នុងការប្រកួតនោះ វីរបុរស Diego Maradona ដែលជាកីឡាករបាល់ទាត់ម្នាក់ក្នុងចំណោមកីឡាករដែលមានទេពកោសល្យបំផុតនៅក្នុងប្រវត្តិសាស្ត្រ បានស៊ុតបញ្ចូលទីពីរគ្រាប់ទល់នឹងអង់គ្លេស ដើម្បីទម្លាក់ពួកគេចេញពីការប្រកួត។ គ្រាប់បាល់ទីពីរគឺជាទស្សនីយភាពដ៏ស្រស់ស្អាតខ្លាំង ដោយអូសបាល់យ៉ាងវែងកាត់ទីលាន លោកបានញាក់ដាច់ខ្សែការពារពាក់កណ្តាលក្រុមរបស់អង់គ្លេស។ ចំណែកឯគ្រាប់បាល់ទីមួយ គឺជាការប្រើដៃលេងបាល់ ដែលត្រូវបានគេស្គាល់ថាជាគ្រាប់បាល់ "Hand of God" ដែលជាគ្រាប់បាល់មួយដែលស្ទើរតែប្រាកដជានឹងមិនត្រូវបានអនុញ្ញាតឱ្យចូលឡើយនៅក្នុងយុគសម័យដែលមានបច្ចេកវិទ្យា VAR នាពេលបច្ចុប្បន្ននេះ។សម្រាប់ Maradona និងប្រជាជនអាហ្សង់ទីនជាច្រើន វាមិនមែនជាការបន្លំឡើយ។ វាគឺជាជ័យជម្នះរបស់អ្នកទន់ខ្សោយទៅលើអ្នកមានអំណាច។លោក Maradona បានសរសេរនៅក្នុងសៀវភៅជីវប្រវត្តិផ្ទាល់ខ្លួនរបស់លោកមានចំណងជើង "El Diego" ថាវាលើសពីការយកឈ្នះក្រុមបាល់ទាត់មួយទៅទៀត វាគឺជាការយកឈ្នះលើប្រទេសមួយ។ ជាការពិតណាស់ មុនពេលការប្រកួត យើងបាននិយាយថា បាល់ទាត់មិនមានអ្វីពាក់ព័ន្ធនឹងសង្គ្រាមកោះ Malvinas ឡើយ ប៉ុន្តែយើងដឹងថាក្មេងៗអាហ្សង់ទីនជាច្រើនបានស្លាប់នៅទីនោះ ត្រូវបានគេបាញ់ទម្លាក់ដូចជាសត្វចាបអញ្ចឹង។ នេះគឺជាការសងសឹក"។ទំនាក់ទំនងរវាងចក្រភពអង់គ្លេស និងអាហ្សង់ទីន គឺជាទំនាក់ទំនងដ៏រំជើបរំជួល និងចម្រុះដោយក្តីស្រឡាញ់ផង និងការស្អប់ខ្ពើមផងជាយូរមកហើយផង។ តាមពិតទៅបើនិយាយពីប្រវត្តិបាល់ទាត់នៅអាហ្សង់ទីនវិញគគឺក្រុមអ្នកចំណាកស្រុកជនជាតិអង់គ្លេស ដែលភាគច្រើនជាកម្មករផ្លូវរថភ្លើង ជាអ្នកនាំយកកីឡាបាល់ទាត់មកកាន់ប្រទេសអាហ្សង់ទីនដំបូងបង្អស់នៅក្នុងសតវត្សទី ១៩ ដែលជាអ្វីមួយដែលនៅតែឆ្លុះបញ្ចាំងរហូតមកដល់សព្វថ្ងៃនេះតាមរយៈឈ្មោះរបស់ក្រុមមួយចំនួន ជាក្លឹប River Plate ឬក្លឹបដំបូងបង្អស់របស់ Lionel Messi គឺក្លឹប Newell's Old Boys ជាដើម។ជនជាតិអង់គ្លេសក៏បាននាំយកមកនូវប្រព័ន្ធធនាគារ ការវិនិយោគ និងផ្លូវរថភ្លើង ដើម្បីអនុញ្ញាតឱ្យមានការនាំចេញសាច់គោ និងអាហារផ្សេងៗទៀតពីតំបន់វាលស្មៅ Pampas ហើយវាបានបង្កើតជាទំនាក់ទំនងបែបពាក់កណ្តាលអាណានិគម។ កីឡាផ្សេងទៀតក៏បានមកដល់ផងដែរ ដូចជាកីឡាប៉ូឡូ (Polo) និងកីឡាបាល់ឱប (Rugby) ដែលកីឡាទាំងពីរនេះត្រូវបានលេងក្នុងកម្រិតខ្ពស់នៅអាហ្សង់ទីននាពេលបច្ចុប្បន្ន។ ប៉ុន្តែទំនាក់ទំនងនេះ ជារឿយៗមានលក្ខណៈលំអៀងទៅខាងម្ខាង ហើយការមិនពេញចិត្តចំពោះក្រុមអ្នកមានអំណាចដែលមាននិន្នាការនិយមអង់គ្លេសបានចាប់ផ្តើមកើតមានឡើង សូម្បីតែនៅពេលដែលជនជាតិអង់គ្លេសបានដកខ្លួនចេញជាបណ្តើរៗនៅក្នុងពាក់កណ្តាលសតវត្សទី ២០ ក៏ដោយ។បន្ទាប់ពីឆ្នាំ ១៩៨៦ ការជួបគ្នាក្នុងបាល់ទាត់ពិភពលោកបន្ទាប់គឺនៅក្នុងឆ្នាំ ១៩៩៨ដែលបារាំងធ្វើម្ចាស់ផ្ទះ ក្នុងវគ្គ ១៦ ក្រុមចុងក្រោយ ហើយត្រូវបានគេចងចាំបំផុតតាមរយៈកាតក្រហមដែលផ្តល់ទៅឱ្យ David Beckham ហើយការប្រកួតនោះអាហ្សង់ទីនឈ្នះ៤ទល់៣ដោយការកាត់សេចក្តីទាត់បាល់១១ម៉ែត្រ បន្ទាប់ពីស្មើគ្នា ២ទល់២ក្នុង១២០នាទី។ បួនឆ្នាំក្រោយមកទៀត គឺបាល់ទាត់ពិភពលោក២០០២ កូរ៉េ-ជប៉ុនជាម្ចាស់ផ្ទះ គ្រាប់បាល់របស់ Beckham បានជួយឱ្យអង់គ្លេសឈ្នះអាហ្សង់ទីនក្នុងវគ្គចែកពូល។ នោះគឺជាការជួបគ្នាចុងក្រោយរបស់ពួកគេនៅក្នុងព្រឹត្តិការណ៍បាល់ទាត់ពិភពលោក។ទំនាក់ទំនងប្រវត្តិសាស្ត្ររវាងប្រទេសទាំងពីរ គឺជារឿងរ៉ាវនៃការផ្សារភ្ជាប់គ្នារវាងវប្បធម៌ដោយអង់គ្លេសនាំយកបាល់ទាត់ និងហេដ្ឋារចនាសម្ព័ន្ធផ្សេងៗទៅឱ្យ និងការឈឺចាប់ពីសង្គ្រាម និងការមើលងាយ ដែលធ្វើឱ្យរាល់ការជួបគ្នារបស់ពួកគេមានលក្ខណៈលើសពីកីឡា។ ចំពោះស្ថានភាពបច្ចុប្បន្ននៃជម្លោះកោះហ្វកឡេន (Falkland Islands ឬ Islas Malvinas) នៅក្នុងឆាកនយោបាយអន្តរជាតិ បាននិងកំពុងឡើងកម្ដៅខ្លាំងជាថ្មីម្តងទៀតនៅក្នុងឆ្នាំ ២០២៦ នេះ ដោយសារការផ្លាស់ប្តូរគោលនយោបាយការបរទេសរបស់មហាអំណាច និងការប៉ះទង្គិចសម្តីគ្នាចំពេលអង់គ្លេស និងអាហ្សង់ទីនជួបគ្នាវគ្គពាក់កណ្ដាលផ្ដាច់ព្រ័ត្របាល់ទាត់ពិភពលោក២០២៦នេះ។ក្នុងនោះកាលពីថ្ងៃទី១២-១៣ ខែកក្កដា ឆ្នាំ២០២៦ នេះ រដ្ឋមន្ត្រីការបរទេសអាហ្សង់ទីន លោក Pablo Quirno បានសរសេរអត្ថបទផ្សាយលើសារព័ត៌មាន La Nación ដោយហៅការគ្រប់គ្រងរបស់អង់គ្លេសថាជា "ការកាន់កាប់ខុសច្បាប់"។ លោកបានវាយប្រហារថា ប្រជាជនរស់នៅលើកោះហ្វកឡេនសព្វថ្ងៃ គឺជាប្រជាជនដែល "ត្រូវបានបង្កើតឡើងជាសិប្បនិម្មិត" ដោយអង់គ្លេស ហើយការបោះឆ្នោតប្រជាមតិកាលពីឆ្នាំ២០១៣ (ដែល ៩៩.៨% ចង់នៅជាមួយអង់គ្លេស) គឺគ្មានតម្លៃច្បាប់ឡើយ។ លោកក៏បានថ្កោលទោសផែនការខួងប្រេងរបស់អង់គ្លេសនៅជុំវិញកោះនោះផងដែរ។ចំណែកនាយករដ្ឋមន្ត្រីអង់គ្លេស លោក Sir Keir Starmer និងរដ្ឋមន្ត្រីការបរទេសលោកស្រី Yvette Cooper បានវាយបកភ្លាមៗ ដោយបដិសេធការលើកឡើងរបស់អាហ្សង់ទីន ។ អង់គ្លេសអះអាងថា ដែនអធិបតេយ្យភាពកោះនេះគឺជារបស់ចក្រភពអង់គ្លេសដាច់ខាត ហើយសិទ្ធិសម្រេចវាសនាខ្លួនឯងរបស់ប្រជាជនលើកោះគឺជាចំណុចសំខាន់បំផុត។ជម្លោះនេះបានឡើងកម្ដៅតាំងពីខែមេសា-ឧសភា ឆ្នាំ២០២៦ មកម្ល៉េះ បន្ទាប់ពីមានបែកធ្លាយអនុស្សរណៈផ្ទៃក្នុងរបស់ក្រសួងសង្គ្រាមអាមេរិក។ យោងតាមរបាយការណ៍ រដ្ឋបាលរបស់ប្រធានាធិបតី Donald Trump បានពិភាក្សាអំពីលទ្ធភាពនៃការពិចារណាឡើងវិញលើការគាំទ្ររបស់ខ្លួនចំពោះអធិបតេយ្យភាពអង់គ្លេសលើកោះហ្វកឡេន ដើម្បីឆ្លើយតបនឹងជំហរមិនដាច់ស្រឡះរបស់អង់គ្លេសលើសង្គ្រាមប្រឆាំងអ៊ីរ៉ង់។ទោះបីជារដ្ឋមន្ត្រីការបរទេសអាមេរិក លោក Marco Rubio បានព្យាយាមសម្រាលសង្រ្គាមចិត្តសាស្ត្រនេះ ដោយបញ្ជាក់ថា អាមេរិកនៅតែរក្សាជំហរ "អព្យាក្រឹត" ដដែលក៏ដោយ ប៉ុន្តែវាបានផ្តល់ឱកាសឱ្យប្រធានាធិបតីអាហ្សង់ទីន លោក Javier Milei (ដែលស្និទ្ធនឹងលោក ត្រាំ) ប្រកាសជាថ្មីថាលោកនឹងប្រើប្រាស់ផ្លូវការទូតដើម្បី "យកកោះនេះត្រឡប់មកវិញ"។រីឯជំហររបស់អង្គការសហប្រជាជាតិ នៅក្នុងកិច្ចប្រជុំនាខែមិថុនា ឆ្នាំ២០២៦ នៅតែបន្តចាត់ទុកកោះហ្វកឡេនជា "ដែនដីមិនទាន់មានស្វ័យគ្រប់គ្រង" និងអំពាវនាវឱ្យប្រទេសទាំងពីរចូលតុចរចាដោយសន្តិវិធី ខណៈដែលប្រទេសចិនបន្តបង្ហាញការគាំទ្រយ៉ាងពេញទំហឹងចំពោះការទាមទាររបស់អាហ្សង់ទីនលើកោះនេះ ដើម្បីពង្រឹងឥទ្ធិពលរបស់ខ្លួននៅអាមេរិកខាងត្បូង។ភាពតានតឹងផ្នែកការទូតចុងក្រោយបង្អស់នេះ បានផ្ទុះឡើងចំពេលដែលក្រុមបាល់ទាត់ទាំងពីរត្រូវជួបគ្នាក្នុងវគ្គពាក់កណ្តាលផ្តាច់ព្រ័ត្របាល់ទាត់ពិភពលោកនៅទីក្រុងអាត្លង់តា នាព្រឹកថ្ងៃព្រហស្បត្តិ៍។ ហើយសម្រែកច្រៀងរាំរំលឹកដល់កោះម៉ាល់វីណាសពីសំណាក់អ្នកគាំទ្រអាហ្សង់ទីន បានធ្វើឱ្យអាជ្ញាធរអាមេរិកបង្កើនការការពារសន្តិសុខយ៉ាងតឹងរ៉ឹង ព្រោះខ្លាចមានការប៉ះទង្គិចគ្នាដោយសារគំនុំនយោបាយ៕

ឯកឧត្តម ហ៊ុន ម៉ានី៖ កីឡា មិត្តភាព និងសប្បុរស គឺជាស្មារតីស្នូលរបស់ក្រុមបាល់ទាត់ ស.ស.យ.ក អលស្ដារ

ឯកឧត្តមឧបនាយករដ្ឋមន្ដ្រី ហ៊ុន ម៉ានី ប្រធានសហភាពសហព័ន្ធយុវជនកម្ពុជា(ស.ស.យ.ក) បានគូសរំលេចពីស្មារតីស្នូល និងបេសកកម្មចម្បងរបស់ក្រុមបាល់ទាត់ ស.ស.យ.ក អលស្ដារ ដោយផ្តោតលើគោលដៅសំខាន់ចំនួន ៣ រួមមាន «កីឡា មិត្តភាព និងសប្បុរស» ដើម្បីលើកកម្ពស់សុខភាព ការរឹតចំណងមិត្តភាព និងការចូលរួមជួយដល់ការងារសង្គម។ការលើកឡើងនេះ ស្របពេលឯកឧត្តម បានអញ្ជើញជាអធិបតីភាពក្នុងពិធីប្រកាសទទួលស្គាល់កីឡាករក្រុមបាល់ទាត់ ស.ស.យ.ក អលស្ដារ និងការបង្ហាញឯកសណ្ឋានថ្មីរបស់ខ្លួនជាផ្លូវការ កាលពីល្ងាចថ្ងៃទី១៤ ខែកក្កដា ឆ្នាំ២០២៦ នេះ ដោយមាឯកឧត្តមឧបនាយករដ្ឋមន្ដ្រីនការចូលរួមជាសក្ខីភាពពីថ្នាក់ដឹកនាំ អាជ្ញាធរកីឡា និងក្រុមបាល់ទាត់ជាច្រើន នៅអគារ The Kampus។ទន្ទឹមជាមួយការចេញសេចក្ដីសម្រេចទទួលស្គាលសមាសភាពកីឡាករផ្លូវការ និងស្ដាបនូវរបាយការណ៍សង្ខេបពីសកម្មភាពក្រុមបាល់ទាត់ ស.ស.យ.ក អលស្ដារ ឯកឧត្តមឧបនាយករដ្ឋមន្ដ្រី បានវាយតម្លៃខ្ពស់ ចំពោះការចូលរួមយ៉ាងសកម្មរបស់សមាជិកក្រុម ទាំងគ្រូបង្វឹក និងកីឡាករ ក្នុងរយៈពេលជិត ២ឆ្នាំកន្លងមក ទាំងការហ្វឹកហាត់ ការប្រកួត ពិសេសការចូលរួមជួយដល់ការងារសង្គមផ្សេងៗ។ក្នុងនាមប្រធានក្រុមផ្ទាល់ ឯកឧត្តម ហ៊ុន ម៉ានី បានលើកឡើងពីសារៈសំខាន់ នៃកីឡាបាល់ទាត់ ដែលជាក្ដីស្រលាញ់របស់មនុស្សគ្រប់រូប ហើយនាំឲ្យមានការជួបជុំ ពង្រឹង និងពង្រីកនូវចំនងមិត្តភាព ដែលជាតម្លៃស្នូលមួយដ៏សំខាន់ សម្រាប់ភាពរីកចម្រើននៃសង្គមជាតិមួយ ដែលត្រូវចាប់ផ្ដើមពីការកសាងស្មារតីមិត្តភាព។ កត្ដានេះហើយ ទើបថ្នាក់ដឹកនាំក្រុម សម្រេចជ្រើសរើសយកពាក្យ ៣ គឺ កីឡា មិត្តភាព និងសប្បុរស សម្រាប់ជាស្មារតីស្នូល នៃបេសកកម្មរបស់ក្រុមបាល់ទាត់ ស.ស.យ.ក អលស្ដារ ដែលមិនត្រឹមចូលរួមលើកកម្ពស់សុខភាព មិត្តភាព តែថែមទាំងអាចរួមចំណែកជួយដល់សង្គមជាតិថែមទៀតផង។គួរដឹងថា សមាសភាពកីឡាករក្រុមបាល់ទាត់ ស.ស.យ.ក អលស្ដារ ដែលត្រូវបានប្រកាសទទួលស្គាល់ គឺមានសមាជិកសរុបចំនួន ៨៧នាក់ ដែលមកពីគ្រប់មជ្ឈដ្ឋាន ទាំងថ្នាក់ដឹកនាំ និងសមាជិក ស.ស.យ.ក, មន្ត្រីរាជការ, ពាណិជ្ជករ, សិល្បករ, កីឡាករអាជីព អតីតកីឡាករអាជីព និងកីឡាករមកពីក្រុមផ្សេងៗ ដោយមានឯកឧត្តម ហ៊ុន ម៉ានី ជាប្រធានក្រុម ព្រមទាំងទីប្រឹក្សាក្រុមចំនួន ១០រូប, អនុប្រធាន ៤រូប ព្រមទាំងក្រុមការងារពាក់ព័ន្ធផ្សេងទៀត។ក្រោយបង្កើតដំបូង ក្នុងខែតុលា ឆ្នាំ២០២៤ រហូតដល់បច្ចុប្បន្នក្រុមបាល់ទាត់មានសមាសភាពកីឡាករចម្រុះនេះ បានសម្រេចនូវសមិទ្ធផលសំខាន់ៗជាច្រើន ដូចជាការប្រកួតមិត្តភាពអបរសាទរខួបលើកទី១ នៃទិវាសន្ដិភាពនៅកម្ពុជា ថ្ងៃទី២៩ ខែធ្នូ ឆ្នាំ២០២៤, ការប្រកួតអបអរសាទរទិវាជ័យជម្នះ ៧មករា ឆ្នាំ២០២៥, កម្មវិធី «តស់! យើងទៅច្រៀងចម្រៀងជាតិផ្ដល់កម្លាំងចិត្តជូនទ័រជួរមុខ ថ្ងៃទី១៩ ខែកក្កដា ឆ្នាំ២០២៥ និងការប្រកួតមិត្តភាពផ្សេងៗទៀតសរុបចំនួន ១១លើក ជាមួយផែនការជាច្រើនទៀត ដែលថ្នាក់ដឹកនាំក្រុមបានប្ដេជ្ញាយ៉ាងមុតមាំ ក្នុងការដឹកនាំស្មារតីក្រុមឱ្យមានសាមគ្គីភាព និងវិន័យខ្ពស់ រក្សាឱ្យបានដាច់ខាតនូវគោលការណ៍ស្នូល បន្តសកម្មភាពមនុស្សធម៌ដើម្បីបម្រើសង្គមជាតិ និងខិតខំពង្រីកសមាជិកភាពបន្ថែមទៀត ក្រោមស្មារតីរឹងមាំគឺ «កីឡា មិត្តភាព សប្បុរស»៕ អត្ថបទ លី ឈុនឡា

អេស្ប៉ាញទម្លាក់បារាំងឡើងវគ្គផ្តាច់ព្រ័ត្របាល់ទាត់ពិភពលោកលើកដំបូង ក្នុងរយៈពេល ១៦ឆ្នាំ

ក្រុមជម្រើសជាតិអេស្ប៉ាញ បានបង្ហាញទម្រង់លេងយ៉ាងរឹងមាំ និងគ្រប់គ្រងការប្រកួតបានយ៉ាងល្អ ដោយយកឈ្នះក្រុមជម្រើសជាតិបារាំងក្នុងលទ្ធផល ២-០ នៅវគ្គពាក់កណ្ដាលផ្តាច់ព្រ័ត្របាល់ទាត់ពិភពលោក ដើម្បីកក់កៅអីទៅកាន់វគ្គផ្តាច់ព្រ័ត្រ។អេស្ប៉ាញ ដែលជាម្ចាស់ជើងឯក UEFA Euro 2024 បានបើកការនាំមុខនៅនាទីទី២២ បន្ទាប់ពីខ្សែប្រយុទ្ធ Mikel Oyarzabal ស៊ុតបាល់ពិន័យ ១១ ម៉ែត្របានសម្រេច ក្រោយ Lucas Digne បង្កកំហុសលើ Lamine Yamal នៅក្នុងតំបន់គ្រោះថ្នាក់។នៅនាទីទី៥៨ អេស្ប៉ាញបានបន្ថែមគ្រាប់ទី២ តាមរយៈ Pedro Porro ដែលទទួលបានការបញ្ជូនបាល់យ៉ាងល្អពី Dani Olmo ក្នុងការលេង ១-២ មុនពេលស៊ុតផុតដៃអ្នកចាំទី Mike Maignan ធានាជ័យជម្នះ ២-០។គ្រូបង្វឹកក្រុមជម្រើសជាតិបារាំងលោក Didier Deschamps បានទទួលស្គាល់ថា ក្រុមរបស់លោកចាញ់អេស្ប៉ាញដោយសមត្ថភាពពិតប្រាកដ។ បារាំងដែលត្រូវបានគេចាត់ទុកថាជាបេក្ខភាពដ៏សំខាន់មួយសម្រាប់លើកពាន មិនអាចបង្ហាញទម្រង់លេងដូចការរំពឹងទុកឡើយ។ អេស្ប៉ាញបានគ្រប់គ្រងតំបន់បម្រើយ៉ាងល្អ កាត់ផ្តាច់ការបញ្ជូនបាល់ទៅកាន់ខ្សែប្រយុទ្ធ Kylian Mbappe និងទាញយកផលប្រយោជន៍ពីកំហុសជាច្រើនរបស់កីឡាករបារាំង។ថ្លែងក្រោយចប់ការប្រកួតលោក Deschamps បាននិយាយថា៖ «អេស្ប៉ាញជាក្រុមដ៏ខ្លាំងមួយ ហើយពួកគេបានបង្ហាញឱ្យឃើញយ៉ាងច្បាស់នៅយប់នេះ។ យើងលេងមិនបានល្អដូចការប្រកួតមុនៗទេ មានកំហុសបច្ចេកទេសច្រើនជាងធម្មតា ហើយក៏ខ្វះកម្លាំងរាងកាយផងដែរ»។ «យើងដឹងពីគុណភាពរបស់អេស្ប៉ាញ ហើយប្រសិនបើយើងចង់ឡើងវគ្គបន្ទាប់ យើងត្រូវតែលេងឱ្យបានល្អបំផុត។ ប៉ុន្តែយើងមិនអាចធ្វើបានទេ»។បញ្ហារបស់បារាំងកាន់តែធ្ងន់ធ្ងរ នៅពេលខ្សែការពារ William Saliba រងរបួស ខណៈខ្សែបម្រើ Adrien Rabiot ត្រូវប្រុងប្រយ័ត្នជាងមុន បន្ទាប់ពីទទួលបានកាតលឿងតាំងពីដើមការប្រកួត។ លោក Deschamps ក៏បានសរសើរអេស្ប៉ាញចំពោះសមត្ថភាពក្នុងការយល់ទិសដៅបាល់ កាត់ផ្តាច់ការបញ្ជូនបាល់ និងកាត់ផ្តាច់ចង្វាក់លេងរបស់បារាំង។«ពួកគេពូកែក្នុងការភ្ជាប់ការលេង និងអាចយល់ទិសដៅបាល់បានយ៉ាងល្អ ដើម្បីកាត់ផ្តាច់ការវាយប្រហាររបស់យើង។ យើងមិនអាចរកដំណោះស្រាយបានទេ។ ការដែលយើងមិនអាចបង្ហាញគុណភាពប្រយុទ្ធ និងបច្ចេកទេសដូចការប្រកួតមុន គឺជាកំហុសរបស់យើងមួយផ្នែក ប៉ុន្តែអេស្ប៉ាញក៏សមនឹងទទួលបានការកោតសរសើរផងដែរ»។បរាជ័យនេះបានបញ្ចប់ក្ដីសង្ឃឹមរបស់បារាំងក្នុងការឡើងទៅកាន់វគ្គផ្តាច់ព្រ័ត្រ World Cup បីលើកជាប់ៗគ្នា បន្ទាប់ពីធ្លាប់ចាញ់អាហ្សង់ទីនដោយបាល់ ១១ ម៉ែត្រកាត់សេចក្តីនៅវគ្គផ្តាច់ព្រ័ត្រ ២០២២ នៅកាតា។ទោះបីជាមានការខកចិត្តយ៉ាងខ្លាំងក៏ដោយលោក Deschamps មិនចង់មើលរំលងសមិទ្ធផលដែលក្រុមបានសម្រេចនៅក្នុងការប្រកួតនេះឡើយ។«ការខកចិត្តគឺធំណាស់។ កីឡាករទាំងអស់សុទ្ធតែជាអ្នកប្រកួតប្រជែង ហើយការបញ្ចប់ដំណើរនៅត្រឹមនេះពិតជាឈឺចាប់។ ប៉ុន្តែខ្ញុំមិនចង់មើលរំលងនូវអ្វីៗដែលយើងបានធ្វើនោះទេ។ គ្រាន់តែការប្រកួតនេះ អេស្ប៉ាញបានបង្ហាញថា ពួកគេល្អជាងយើងមួយកម្រិត»។ងាកមកអេស្ប៉ាញវិញ គ្រូបង្វឹកលោក Luis de la Fuente បានថ្លែងថា ក្រុមរបស់លោកកំពុងស្ដារឡើងវិញនូវស្មារតី និងទម្រង់លេងដ៏រឹងមាំដូចសម័យដែលធ្លាប់ឈ្នះជើងឯកពិភពលោកឆ្នាំ ២០១០។«ខ្ញុំតែងតែនិយាយថា សម្រាប់ខ្ញុំ កីឡាករអេស្ប៉ាញគឺជាកីឡាករល្អបំផុតក្នុងពិភពលោក ពីព្រោះពួកគេមានការយល់ដឹងអំពីការលេងបាល់ទាត់យ៉ាងល្អ។ ពួកគេដឹងថាត្រូវលេងបែបណានៅពេលប្រយុទ្ធ និងនៅពេលការពារ។ នេះគឺជាសមិទ្ធផលដ៏អស្ចារ្យរបស់បាល់ទាត់អេស្ប៉ាញ គ្រូបង្វឹកអេស្ប៉ាញ ក្លិបអាជីព និងលីគបាល់ទាត់អេស្ប៉ាញរួមគ្នាសម្រេចបាន។ យើងគួរតែមានមោទនភាព និងឱ្យតម្លៃចំពោះអ្វីដែលយើងមាន ហើយការប្រកួតថ្ងៃនេះគឺជាភស្តុតាងយ៉ាងច្បាស់។ សរុបមកវិញ តាំងពីចាប់ផ្តើមព្រឹត្តិការណ៍ យើងបានវាយតម្លៃថា ក្រុមទាំងមូលកំពុងស្ថិតក្នុងស្មារតីជើងឯកដូចយុគសម័យឈ្នះជើងឯកឆ្នាំ ២០១០ នៅអាហ្វ្រិកខាងត្បូង»។លោក Luis de la Fuente ក៏បានបង្ហាញបំណងចង់ជួបក្រុមអាហ្សង់ទីននៅវគ្គផ្តាច់ព្រ័ត្រ ដោយសារតែលោកមានទំនាក់ទំនងមិត្តភាពយ៉ាងជិតស្និទ្ធជាមួយគ្រូបង្វឹក Lionel Scaloni។ ទន្ទឹមនឹងនេះ លោកក៏បានកោតសរសើរក្រុមអង់គ្លេសផងដែរ និងលើកឡើងថា ការប្រកួតវគ្គពាក់កណ្ដាលផ្តាច់ព្រ័ត្រមួយទៀត គឺជាការប្រកួតដែល «អាចក្លាយជាវគ្គផ្តាច់ព្រ័ត្រ World Cup បានដែរ» ដោយសារគុណភាពរបស់ក្រុមទាំងពីរ។នៅវគ្គផ្តាច់ព្រ័ត្រ ដែលនឹងធ្វើឡើង នៅកីឡដ្ឋាន New York/New Jersey នៅយប់ថ្ងៃអាទិត្យ ទី១៩ រំលងអាធ្រាតចូលថ្ងៃទី ២០ ខែកក្កដានៅកម្ពុជា អេស្ប៉ាញនឹងត្រូវជួបអ្នកឈ្នះរវាងក្រុមជម្រើសជាតិអង់គ្លេស រឺអាហ្សង់ទីន៕អត្ថបទ៖នាង សុភាវុធ

Slaven Bilinc ត្រឡប់មកដឹកនាំក្រុមជម្រើសជាតិក្រូអាស៊ីជាថ្មី

សហព័ន្ធបាល់ទាត់ក្រូអាស៊ី បានប្រកាសជាផ្លូវការនៅថ្ងៃចន្ទពីការតែងតាំងលោក Slaven Bilic អតីតអ្នកចាត់ការក្លិប West Ham United ជាគ្រូបង្វឹកថ្មីរបស់ក្រុមជម្រើសជាតិ បន្ទាប់ពីលោក Zlatko Dalic លាលែងពីតំណែង។លោក Slaven Bilic វ័យ ៥៧ ឆ្នាំ បានវិលត្រឡប់មកកាន់ក្រុមជម្រើសជាតិវិញ បន្ទាប់ពីធ្លាប់ដឹកនាំក្រុមអាយុក្រោម ២១ ឆ្នាំរបស់ក្រូអាស៊ី មុនពេលក្លាយជាគ្រូបង្វឹកក្រុមធំអស់រយៈពេល ៦ ឆ្នាំ ដោយបានដឹកនាំសរុប ៦៥ ប្រកួត។ចំណែកលោក Dalic ដែលត្រូវបានចាត់ទុកថាជាគ្រូបង្វឹកជោគជ័យបំផុតក្នុងប្រវត្តិសាស្ត្របាល់ទាត់ក្រូអាស៊ី បានសម្រេចចិត្តចាកចេញពីតំណែងក្រោយដឹកនាំក្រុមអស់រយៈពេល ៩ ឆ្នាំ បន្ទាប់ពីក្រូអាស៊ីធ្លាក់ចេញពីការប្រកួតបាល់ទាត់ពិភពលោក ២០២៦ ក្រោមថ្វីជើងព័រទុយហ្គាល់វគ្គ ៣២ ក្រុមចុងក្រោយ។លោក Slaven Bilic មិនទាន់ដឹកនាំក្រុមណាមួយឡើយចាប់តាំងពីចាកចេញពីក្លិប Al Fateh នៃលីគកំពូលអារ៉ាប៊ីសាអូឌីត ក្នុងឆ្នាំ ២០២៤ បន្ទាប់ពីដឹកនាំក្រុមបាន ៣៦ ប្រកួតក្នុងមួយរដូវកាល។ក្រៅពីនេះ លោកក៏មានបទពិសោធន៍យ៉ាងច្រើននៅអង់គ្លេស ដោយធ្លាប់ដឹកនាំ West Ham, West Bromwich Albion និង Watford។ អាជីពជាគ្រូបង្វឹករបស់លោកបានចាប់ផ្តើមនៅក្លិប Hajduk Split ក្នុងឆ្នាំ ២០០១ បន្ទាប់ពីចូលនិវត្តន៍ពីអាជីពជាកីឡាករបានមួយឆ្នាំ។ក្នុងនាមជាកីឡាករលោក Bilic បង្ហាញខ្លួនឱ្យក្រុមជម្រើសជាតិក្រូអាស៊ី ៤៤ ប្រកួត និងជាសមាជិកសំខាន់ម្នាក់ដែលបានជួយឱ្យក្រូអាស៊ីឈ្នះចំណាត់ថ្នាក់លេខ៣ បាល់ទាត់ពិភពលោក ១៩៩៨ នៅប្រទេសបារាំង។បេសកកម្មដំបូងរបស់លោកក្នុងការវិលត្រឡប់មកដឹកនាំក្រុមជម្រើសជាតិក្រូអាស៊ី គឺដឹកនាំក្រុមឱ្យឆ្លងផុតវគ្គជម្រុះជើងឯកទ្វីបអឺរ៉ុប UEFA Euro 2028 មុនបន្តរៀបចំក្រុមសម្រាប់ការប្រកួត FIFA World Cup 2030៕ អត្ថបទ៖នាង សុភាវុធ

អ្នកចាត់ការថ្មី Andoni Iraola ថា Liverpool ត្រូវការទិញចូលកីឡាករថ្មីបន្ថែម ដើម្បីត្រៀមប្រជែងរដូវកាលថ្មី

អ្នកចាត់ការថ្មីរបស់ហង្សក្រហម Liverpool លោក Andoni Iraola បានឱ្យដឹងថា លោកចង់ឱ្យក្លិបបន្តចុះហត្ថលេខានាំចូលកីឡាករថ្មីបន្ថែមទៀត ខណៈក្រុមកំពុងរៀបចំសម្រាប់ការប្រកួតប្រជែងរដូវកាលថ្មី Premier League ២០២៦-២៧ ដោយមានគោលដៅធ្វើឱ្យលទ្ធផលប្រសើរជាងរដូវកាលមុន។Liverpool បានបញ្ចប់នៅចំណាត់ថ្នាក់លេខ៥ កាលពីរដូវកាលមុន ហើយរហូតមកដល់ពេលនេះ ក្លិបបាននាំចូលខ្សែការពារកណ្តាល Jeremy Jacquet ពី Stade Rennais និងខ្សែប្រយុទ្ធស្លាប Victor Munoz ពី Osasuna។លោក Iraola បានចូលកាន់តំណែងនៅខែមិថុនា បន្ទាប់ពីលោក Arne Slot ត្រូវបានបញ្ចប់តួនាទី។ ភារកិច្ចដ៏ធំរបស់លោក គឺស្តារកម្លាំង Liverpool ឱ្យវិលត្រឡប់មកប្រជែងពានវិញ ខណៈក្រុមក៏ត្រូវប្រឈមនឹងអវត្តមានរបស់ខ្សែប្រយុទ្ធ Mohamed Salah ដែលធ្លាប់ជាកម្លាំងសំខាន់របស់ក្លិបអស់ជាច្រើនឆ្នាំកន្លងមក។លើសពីនេះ លោកក៏ត្រូវស្វែងរកដំណោះស្រាយចំពោះបញ្ហាកីឡាកររងរបួសរយៈពេលវែង រួមមាន Hugo Ekitike, Conor Bradley និង Giovanni Leoni ផងដែរ។Iraola អតីតកីឡាករជម្រើសជាតិអេស្ប៉ាញ ដែលធ្លាប់លេងឱ្យ Athletic Bilbao ពីឆ្នាំ២០០៣ ដល់ឆ្នាំ២០១៥ បានចាប់ផ្តើមអាជីពជោគជ័យក្នុងនាមជាគ្រូបង្វឹក Bournemouth កាលពីឆ្នាំ២០២៣ ហើយបានដឹកនាំក្រុមបញ្ចប់នៅលេខ៦ Premier League កាលពីរដូវកាលមុន ព្រមទាំងទទួលបានកៅអីនៅ UEFA Europa League។គ្រូបង្វឹកវ័យ ៤៤ ឆ្នាំរូបនេះបានបញ្ជាក់ថា លោកយល់ច្បាស់ពីសម្ពាធនៃការដឹកនាំក្លិបធំដូចជា Liverpool ហើយត្រៀមខ្លួនរួចជាស្រេចក្នុងការទទួលខុសត្រូវ។Liverpool នឹងចាប់ផ្តើមយុទ្ធនាការ Premier League រដូវកាលថ្មី ដោយត្រូវធ្វើដំណើរទៅទឹកដី Newcastle United នៅថ្ងៃទី២៣ ខែសីហា៕អត្ថបទ៖នាង សុភាវុធ

កម្ពុជាឡើងវគ្គ ១/២ ផ្ដាច់ព្រ័ត្រពាន ASEAN Women’s Cup ក្រោយយកឈ្នះទីម័រខាងកើត ៣-១

ក្រុមបាល់ទាត់ជម្រើសជាតិនារីកម្ពុជា បានកក់កៅអីឡើងទៅវគ្គពាក់កណ្តាលផ្ដាច់ព្រ័ត្រ (១/២) នៃពានរង្វាន់បាល់ទាត់នារីប្រចាំតំបន់អាស៊ីអាគ្នេយ៍ ASEAN Women's Cup 2026 ហើយ ក្រោយយកឈ្នះក្រុមជម្រើសជាតិនារីទីម័រខាងកើត ដោយលទ្ធផល ៣-១ កាលពីល្ងាចថ្ងៃចន្ទកន្លងទៅ នៅទីក្រុងគូឡាឡាំពួរ ប្រទេសម៉ាឡេស៊ី។ការប្រកួតដំបូងក្នុងពូលB របស់ក្រុមបាល់ទាត់នារីកម្ពុជានេះ ត្រូវបានទីម័រខាងកើត នាំមុខ ១គ្រាប់មុន ត្រឹមរយៈពេល ២នាទី ដោយកីឡាការិនី Juleica Da Costa មុនកីឡាការិនី ហេង សុវណ្ណមុនី និង ឈិត សាភឿន វាយបកបានម្នាក់ ១គ្រាប់ ជួយឲ្យកម្ពុជា បើកការនាំមុខវិញ នៅនាទី២៩ និងនាទី៣៦ ហើយលទ្ធផលនេះ បានរក្សាដល់ចុងម៉ោង ទើបកីឡាការិនី វិបុល សេរីស៊ីថា រកបានគ្រាប់ទី៣ នៅនាទី៩០+៦ ជួយឲ្យក្រុមជម្រើសជាតិនារីកម្ពុជា យកឈ្នះក្រុមកីឡាការិនីទីម័រខាងកើត ៣-១ តែម្ដង។សម្រាប់ជ័យជម្នះដ៏សំខាន់នេះ បានធ្វើឲ្យក្រុមជម្រើសជាតិនារីកម្ពុជា កក់កៅអីវគ្គពាក់កណ្ដាលផ្ដាច់ព្រ័ត្រ ដោយស្វ័យប្រវត្ដិ ទោះបីសល់ ១ប្រកួតក្នុងដៃក្ដី ដោយរកបាន ៣ពិន្ទុ ស្មើក្រុមជម្រើសជាតិនារីឥណ្ឌូនេស៊ី មុនក្រុមទាំងពីរ ត្រូវជួបគ្នាប្រជែងកៅអីកំពូលតារាងពូលB នាថ្ងៃទី១៦ ខែកក្កដាខាងមុខ។ ចំណែកក្រុមជម្រើសជាតិនារីទីម័រខាងកើត បានក្លាយជាក្រុមអត់ឱកាសមុនគេ ក្នុងចំណោមបេក្ខភាពចូលរួមពានរង្វាន់ថ្នាក់តំបន់នេះ ក្រោយរងបរាជ័យ ២ប្រកួតជាប់គ្នា។សូមបញ្ជាក់ថា ពានរង្វាន់ ASEAN Women's Cup 2026 មាន ៦ក្រុមចូលរួមដូចកាលពីរដូវកាលមុនដែរ និងបែងចែកជា ២ពូល ដើម្បីប្រកួតសន្សំពិន្ទុ និងចម្រាញ់ក្រុមលេខ១ លេខ២ តាមពូលនីមួយៗឡើងវគ្គពាក់កណ្ដាលផ្ដាច់ព្រ័ត្រ មុនឈានដល់ការប្រកួតវគ្គផ្ដាច់ព្រ័ត្រ នាថ្ងៃទី២២ ខែកក្កដាខាងមុខ។ ក្រោយបញ្ចប់ការប្រកួតនេះ សម្រាប់ក្រុមជ័យលាភីលេខ១ លេខ២ និងលេខ៣ នឹងទទួលបានកៅអីចូលរួមការប្រកួតពានរង្វាន់បាល់ទាត់នារីកម្រិតទី១ ប្រចាំតំបន់អាស៊ាន ASEAN Women’s Championship នាឆ្នាំ២០២៧៕ អត្ថបទ លី ឈុនឡា

គោព្រៃកម្ពុជា ចេញទៅហាត់ ១សប្ដាហ៍នៅជប៉ុន មុនបើកទ្វារផ្ទះទទួលសិង្ហបុរី បើកឆាកជើងឯកអាស៊ាន

ក្រុមជម្រើសជាតិកម្ពុជា បានធ្វើដំណើរទៅប្រទេសជប៉ុនហើយ ដើម្បីប្រមូលផ្ដុំហ្វឹកហាត់រយៈពេល ១សប្ដាហ៍ ចាប់ពីថ្ងៃទី១៤ ដល់ថ្ងៃទី២១ ខែកក្កដាខាងមុខ ដើម្បីត្រៀមការប្រកួតជើងឯកបាល់ទាត់អាស៊ីអាគ្នេយ៍ ASEAN Championship Hyundai Cup ឆ្នាំ២០២៦ ដែលនឹងចាប់ផ្ដើមនាចុងខែនេះ។ជាមួយការបើកយុទ្ធនាការហ្វឹកហាត់ ក្រោយរងប្រតិកម្មពីអ្នកគាំទ្រនេះ ក្រុមគោព្រៃកម្ពុជា បានចាកចេញពីមាតុភូមិ កាលពីល្ងាចថ្ងៃចន្ទដើមសប្ដាហ៍នេះ ក្រោមការដឹកនាំរបស់គ្រូបង្វឹកលោក Koji Gyotoku និងកីឡាករ ២៤នាក់ ដែលបានកោះហៅ និងបង្ហាញកាលពីដើមសប្ដាហ៍មុន ដើម្បីហ្វឹកហាត់នៅជប៉ុន ដោយមានកិច្ចសហការ និងទទួលបានការគាំទ្រពីសមាគមបាល់ទាត់ជប៉ុន (JFA)។ក្រោយត្រឡប់ពីហ្វឹកហាត់នៅជប៉ុន មានពេល ៣ថ្ងៃ ដើម្បីបន្ដការហ្វឹកហាត់នៅរាជធានីភ្នំពេញ មុនបើកទ្វារផ្ទះស្វាគមន៍ការប្រកួតផ្លូវការ នៃពានរង្វាន់បាល់ទាត់កម្រិតទី១ ប្រចាំតំបន់ ដោយត្រូវជួបក្រុមជម្រើសជាតិសិង្ហបុរីមុនគេ ក្នុងពូលA នាថ្ងៃទី២៤ ខែកក្កដា នៅពហុកីឡដ្ឋានជាតិមរកតេជោ រាជធានីភ្នំពេញ មុនបន្ដការប្រកួតក្រៅដី ទល់ក្រុមម្ចាស់ផ្ទះឥណ្ឌូនេស៊ី នាថ្ងៃទី២៧-កក្កដា និងការត្រឡប់មកប្រកួតក្នុងដី ជាមួយក្រុមភ្ញៀវទីម័រខាងកើត នាថ្ងៃទី៣ ខែសីហា និងការប្រកួតបញ្ចប់ពូលA ក្រៅដី ទល់ក្រុមខ្លាំងវៀតណាម នាថ្ងៃទី៧ ខែសីហាខាងមុខ។សម្រាប់ពានរង្វាន់ ASEAN Championship Hyundai Cup រដូវកាលថ្មីនេះ មាន ១០ក្រុមចូលរួម និងបែងចែកជា ២ពូល ក្នុងមួយពូលមាន ៥ក្រុម គ្រាដែលកម្ពុជា ស្ថិតក្នុងពូលA ជាមួយការទទួលបានសិទ្ធធ្វើម្ចាស់ផ្ទះ ២ប្រកួត និងត្រូវប្រកួតក្រៅដី ២ប្រកួត។ ព្រឹត្តិការណ៍ប្រចាំតំបន់ ២ឆ្នាំម្ដងនេះ នឹងប្រព្រឹត្តទៅពីថ្ងៃទី២៤ ខែកក្កដា ដល់ថ្ងៃទី២៦ ខែសីហាខាងមុខ ។ សម្រាប់ក្រុមឈរលេខ១ និងលេខ២ ក្រោយបញ្ចប់ការប្រកួតវិលជុំក្នុងពូល នឹងត្រូវឡើងទៅវគ្គពាក់កណ្ដាលផ្ដាច់ព្រ័ត្រ៕ អត្ថបទ លី ឈុនឡា

Soccer League រដូវកាលទី៩ ឈានដល់វគ្គ ១/២ ផ្នែកបុរស និងក្រុមឡើងវគ្គផ្ដាច់ព្រ័ត្រផ្នែកនារី

ក្រោយដំណើរការប្រកួតជាង ៥សប្ដាហ៍កន្លងទៅ ពានរង្វាន់បាល់ទាត់ Soccer League រដូវកាលទី៩ បានឈានដល់វគ្គពាក់កណ្ដាលផ្ដាច់ព្រ័ត្រផ្នែកបុរស ដែលនឹងត្រូវជួបគ្នានាថ្ងៃទី១៥ ខែកក្កដាស្អែក ស្របពេលវិញ្ញាសាបាល់ទាត់នារី បានរកឃើញក្រុមឡើងវគ្គផ្ដាច់ព្រ័ត្រ រវាងក្រុមសេនាអង្គរយូណាយធីត ត្រូវជួបក្រុមយុវតីស្ទាំងភ្លើងក្មេងវត្ដក្ដីចាស់ នាចុងសប្ដាហ៍នេះ។សម្រាប់បេក្ខភាពវគ្គ ១/២ ផ្ដាច់ព្រ័ត្រ ដែលត្រូវជួបគ្នានាថ្ងៃពុធស្អែកនេះ រួមមានក្រុម អេសជីស៊ី ត្រូវជួបក្រុម ស៊ីប៊ែលអេហ្វស៊ី និងក្រុម ឌី អាយ ជី អេហ្វស៊ី ត្រូវជួបក្រុម អិ NSM ISP FC នៅទីលានបាល់ទាត់ AUPP។ក្រុមទាំង ៤ បានឆ្លងកាត់ការប្រកួត និងទម្លាក់ក្រុមខ្លាំងៗជាច្រើន ទម្រាំឈានដល់វគ្គសំខាន់នេះ ពិសេសក្រុម អេសជីស៊ី ដែលបានយកឈ្នះក្រុមជើងឯករងឆ្នាំចាស់ គោពិឃាតអេហ្វស៊ី នៅវគ្គ ៨ក្រុមចុងក្រោយ ដ្បិតក្រុមគោពិឃាតអេហ្វស៊ី បានទម្លាក់ក្រុមជើងឯកឆ្នាំចាស់ អាណាចក្របៃតង នៅវគ្គ ១៦ក្រុមចុងក្រោយ។ចំណែកលទ្ធផលវគ្គ ៨ក្រុមចុងក្រោយ ៣ប្រកួតផ្សេងទៀត គឺក្រុម NSM ISP FC បានយកឈ្នះក្រុម TOFU Army FT ដោយការទាត់បាល់ប៉េណាល់ទី ៩-៨ ក្រោយប្រកួតពេញម៉ោងស្មើគ្នា ២-២, ក្រុម ស៊ីប៊ែលអេហ្វស៊ី បានយកឈ្នះក្រុម DIG Legend ១១-០ និងក្រុម ឌីអាយជី អេហ្វស៊ី បានយកឈ្នះក្រុមនសៀមរាបយូណាយធីត ដោយលទ្ធផល ៣-១។ក្រោយជំនួបវគ្គពាក់កណ្ដាលផ្ដាច់ព្រ័ត្រ នារសៀលថ្ងៃទី១៥ ខែកក្កដាស្អែក ក្រុមទទួលបានជ័យជម្នះ នឹងត្រូវឡើងវគ្គផ្ដាច់ព្រ័ត្រ នាល្ងាចថ្ងៃទី១៨ ខែកក្កដា ក្រោយជំនួបវគ្គផ្ដាច់ព្រ័ត្រផ្នែកនារី ដើម្បីប្រកួតកាត់សេចក្ដីស្វែងរកក្រុមជើងឯក Soccer League រដូវកាលទី៩ នៅពហុកីឡដ្ឋានជាតិ(អូឡាំពិក) គ្រាដែលក្រុមចាញ់ នឹងត្រូវជួបគ្នាដណ្ដើមចំណាត់ថ្នាក់លេខ៣ នៅទីលាន AUPP នាថ្ងៃទី១៧ ខែកក្កដា មុនជំនួបវគ្គផ្ដាច់ព្រ័ត្រមួយថ្ងៃ៕ អត្ថបទ លី ឈុនឡា

ជំនួបអាហ្សង់ទីន និងអង់គ្លេសធ្វើឱ្យគេនឹកឃើញប្រវត្តិសាស្រ្តនៃការប៉ះទង្គិចរវាងប្រទេសទាំងពីរ មិនថានយោបាយ រឺកីឡា

ក្រុមអ្នកគាំទ្របាល់ទាត់អាហ្សង់ទីនបានបង្ហាញទស្សនៈថា ការប្រកួតវគ្គពាក់កណ្តាលផ្តាច់ព្រ័ត្រជាមួយក្រុមជម្រើសជាតិអង់គ្លេស នាពេលខាងមុខ គឺជាការប្រកួតដ៏ស្មុគស្មាញ និងពោរពេញដោយប្រវត្តិសាស្ត្រដែលមានអារម្មណ៍ប្រកួតប្រជែងយ៉ាងខ្លាំង។ ទោះជាយ៉ាងណា ពួកគេនៅតែមានជំនឿថា អាហ្សង់ទីនអាចឈានទៅកាន់វគ្គផ្តាច់ព្រ័ត្រពានរង្វាន់បាល់ទាត់ពិភពលោកបានម្តងទៀត។ការប្រកួតដែលគ្រោងធ្វើឡើងនៅយប់ថ្ងៃពុធស្អែកនេះនៅទីក្រុង Atlanta សហរដ្ឋអាមេរិក ត្រូវបានចាត់ទុកថា ជាជំនួបដែលផ្ទុកទៅដោយប្រវត្តិសាស្ត្ររាប់ទសវត្សរ៍ ទាំងក្នុងវិស័យបាល់ទាត់ និងបរិបទនយោបាយ រវាងប្រទេសទាំងពីរ។ ក្រុមទាំងពីរក៏ត្រូវបានគេស្គាល់ថា ជាក្រុមដែលតែងតែអាចឆ្លងផុតស្ថានភាពលំបាក និងប្រកួតប្រជែងរហូតដល់ទីបញ្ចប់។ការជួបគ្នារវាងអាហ្សង់ទីន និងអង់គ្លេស តែងតែទាក់ទាញការចាប់អារម្មណ៍យ៉ាងខ្លាំង ដោយសារតែមានប្រវត្តិសាស្ត្រល្បីៗជាច្រើន រួមមានជ័យជម្នះរបស់អង់គ្លេសនៅ World Cup ឆ្នាំ១៩៦៦ ក្នុងទឹកដីខ្លួនឯង ស្រមោលនៃសង្គ្រាមកោះ Falklands ឆ្នាំ១៩៨២ គ្រាប់បាល់ "Hand of God" ដ៏ល្បីរបស់ Diego Maradona នៅឆ្នាំ១៩៨៦ ព្រមទាំងការប្រកួតដ៏តានតឹងក្នុងឆ្នាំ១៩៩៨ និងឆ្នាំ២០០២។ទោះបីជាការប្រកួតនេះមានភាពរំភើប និងផ្ទុកទៅដោយអារម្មណ៍ប្រវត្តិសាស្ត្រយ៉ាងណាក៏ដោយ កីឡាករអាហ្សង់ទីន និងគ្រូបង្វឹក Lionel Scaloni បានព្យាយាមកាត់បន្ថយសម្ពាធផ្លូវចិត្ត ដោយបញ្ជាក់ថា ពួកគេចាត់ទុកវគ្គពាក់កណ្តាលផ្តាច់ព្រ័ត្រនេះ គ្រាន់តែជាជំហានមួយប៉ុណ្ណោះ ក្នុងដំណើរឆ្ពោះទៅការពារតំណែងជើងឯក។ រំលឹកដែរថា ក្រុមទាំងពីរមានប្រវត្តិជួបគ្នានៅ World Cup សរុបប្រាំលើករួមមាន៖ - ឆ្នាំ ១៩៦២ អង់គ្លេសឈ្នះ ៣-១ នៅវគ្គវិលជុំក្នុងពូល- ឆ្នាំ ១៩៦៦ អង់គ្លេសឈ្នះ ១-០ នៅវគ្គ ៨ ក្រុមចុងក្រោយ ក្នុងដំណើរឆ្ពោះទៅគ្រងជើងឯក- ឆ្នាំ ១៩៨៦ អាហ្សង់ទីនឈ្នះ ២-១ នៅវគ្គ ៨ ក្រុមចុងក្រោយ- ឆ្នាំ ១៩៩៨ ស្មើគ្នា ២-២ មុនពេលអាហ្សង់ទីនឈ្នះ ៤-៣ ដោយបាល់ ១១ ម៉ែត្រកាត់សេចក្តី វគ្គ ១៦ ក្រុម- ឆ្នាំ ២០០២ អង់គ្លេសឈ្នះ ១-០ នៅវគ្គវិលជុំក្នុងពូលអត្ថបទ៖នាង សុភាវុធ

មន្ត្រីជំនាញសហព័ន្ធចាត់ទុកថា គ្រូបង្វឹកហែលទឹកកម្រិតមូលដ្ឋាន ឈ្វេងយល់បន្ថែមអំពីការបង្ហាត់បង្រៀន កុមារ និងយុវជន

វគ្គបណ្តុះបណ្តាលគ្រូបង្វឹកកីឡាហែលទឹកកម្រិតមូលដ្ឋាន ដែលធ្វើឡើងរយៈពេល២ថ្ងៃ ដែលមានសិក្ខាកាមចូលរួមសរុប ៤៩នាក់មកពីសាលារៀនឯកជនអន្តរជាតិ និងក្លឹបហែលទឹក និងសាលារដ្ឋមួយចំនួនបានបិទបញ្ចប់ដោយជោគជ័យ ខណៈមន្ត្រីជំនាញសហព័ន្ធបានចាត់ទុកថា នេះជាឱកាសដ៏ល្អសម្រាប់ពួកគាត់ឈ្វេងយល់អំពីការបង្ហាត់បង្រៀនហែលទឹកជូនដល់កុមារ យុវជន និងមហាជន ក្រោយសហព័ន្ធសង្កេតឃើញថាសកម្មភាពបង្ហាត់បង្រៀនទូទៅកន្លងមក មិនទាន់បានត្រឹមត្រូវ និងទទួលស្គាល់ពីសហព័ន្ធជំនាញ។ក្នុងឱកាសបិទវគ្គបណ្តុះបណ្តាល នាពេលថ្មីៗកន្លងទៅ នៅទីស្នាក់ការសហព័ន្ធ រាជធានីភ្នំពេញ លោក ហែម គីរី អគ្គលេខាធិការ បានសង្កត់ធ្ងន់ថា គោលបំណងនៃវគ្គបណ្តុះបណ្តាលគ្រូបង្វឹកកីឡាហែលទឹកកម្រិតមូលដ្ឋាន នេះ យើងសង្កេតថា បណ្តាក្លឹបហែលទឹកនៅតាមសាលារៀនបណ្តុះបណ្តាលសិស្សានុសិស្សរបស់ខ្លួនពុំទាន់បានត្រឹមត្រូវ និងពុំទាន់មានការទទួលស្គាល់ពីសហព័ន្ធកីឡាជាតិ។ ដូច្នេះ តាមរយៈវគ្គបណ្តុះបណ្តាលនេះ គឺជាជំហានទី១ ដែលសហព័ន្ធខ្មែរកីឡាហែលទឹកបានផ្តល់ឱកាសជូនដល់គ្រូបង្វឹកមកពីសាលារៀនឯកជន និងក្លឹបហែលទឹកមួយចំនួនកំពុងបណ្តុះបណ្តាលជូនដល់កុមារ មហាជននៅតាមទីតាំងអាងទឹករបស់ខ្លួនឱ្យយល់ដឹងអំពីវិធីសាស្ត្រក្នុងការបង្ហាត់បង្រៀន គរុកោសល្យនៃគ្រូបង្វឹកហែលទឹក ច្បាប់ទម្លាប់នៃបង្ហាត់បង្រៀនហែលទឹកក្នុងកម្រិតមូលដ្ឋាន។លោកអគ្គលេខាធិការពន្យល់ថា មូលហេតុចម្បងនៃការបើកវគ្គហែលទឹកកម្រិតមូលដ្ឋាននេះ គឺដោយសារតែសហព័ន្ធបានមើលឃើញថា ក្លឹបបើកការបណ្តុះបណ្តាលមិនទាន់តាមត្រឹមត្រូវ និងការទទួលស្គាល់ពីសហព័ន្ធ។ ដូច្នេះសហព័ន្ធក៏ផ្តល់ឱកាសជូនដល់ពួកគាត់ក្នុងវគ្គសិក្សានេះ ព្រមទាំងផ្តល់វិញ្ញាបណ្ណបត្រដែលមានរយៈពេល២ឆ្នាំ ដើម្បីបន្តការបណ្តុះបណ្តាលនៅក្នុងស្ថាប័នរបស់ពួកគាត់។ លោក ហែម គីរី បន្តថា តាមរយៈវគ្គបណ្តុះបណ្តាលនេះ លោកបានមើលឃើញពីភាពវិជ្ជមាននៃការរួបរួមគ្នា ជំរុញដល់ការបណ្តុះបណ្តាលគ្រូហែលទឹក និងបន្តចែករំលែកដល់កីឡាករ កីឡាការិនីហែលទឹកឱ្យកាន់តែមានធនធានសម្បូរបែប និងត្រឹមត្រូវបានបច្ចេកទេសនៃវិស័យកីឡាហែលទឹកផងដែរ ។សូមបញ្ជាក់ថា វគ្គបណ្តុះបណ្តាលគ្រូបង្វឹកកីឡាហែលទឹកកម្រិតមូលដ្ឋាន រៀបចំដោយសហព័ន្ធ និងប្រើប្រាស់ថវិកាឧបត្ថម្ភប្រចាំឆ្នាំរបស់ក្រសួងអប់រំ យុវជន និងកីឡា។ វគ្គនេះមានរយៈពេល២ថ្ងៃ ចាប់ពីថ្ងៃទី ១១ ដល់១២ ខែកក្តដា ឆ្នាំ២០២៦ មានសិក្ខាកាមចូលរួមចំនួន ៤៩នាក់ មកពី ខេត្តសៀមរាប ខេត្តបាត់ដំបង ខេត្តកំពង់ស្ពឺ និងសាលារៀនអន្តរជាតិ នៅរាជធានីភ្នំពេញ៕

បណ្ដាញសង្គម

ព័ត៌មានថ្មីៗ

ប្រធានក្រុមសេនាតេជោសន្តិភាពនាំយកអំណោយរបស់សម្តេចតេជោ ជូនដល់កងទ័ពជួរមុខ នៅបន្ទាយអំពិល ខេត្តឧត្តមានជ័យ

កុមារកម្ពុជាប្រមាណ៣លានករណី ត្រូវបានទទួលការព្យាបាលនៅមន្ទីរពេទ្យកុមារអង្គរ ក្នុងរយៈពេល២៧ឆ្នាំ

ឯកឧត្តម ហ៊ុន ម៉ានី៖ បាថកថាជាស៊េរី ជាយន្តការពង្រឹងទស្សនៈឯកភាពបក្ស ដោយផ្សារភ្ជាប់រវាងថ្នាក់ដឹកនាំជំនាន់មុន និងអ្នកបន្តវេនជំនាន់ក្រោយ

រដ្ឋមន្ត្រីក្រសួងប្រៃសណីយ៍អញ្ជើញសំណេះសំណាលជាមួយអតីតយុទ្ធជន និងនិវត្តជនក្នុងខេត្តតាកែវ

សម្ដេចធិបតី ឆ្លៀតចុះមកពិនិត្យស្ថានភាពគម្រោងសម្រាប់ប្រជាជនភៀសសឹក និងគម្រោងផ្តល់ដី និងផ្ទះ LASED III

ក្រុមហ៊ូទី និងសម្ព័ន្ធមិត្តដឹកនាំដោយអារ៉ាប៊ីសាអ៊ូឌីត វាយប្រហារគ្នាដ៏ខ្លាំងក្លាបណ្ដាលឲ្យមនុស្សស្លាប់ និងរបួសថ្មីៗ

មនុស្ស ១១ នាក់របួសក្នុងការបាញ់ប្រហារជិតសាកលវិទ្យាល័យមួយក្នុងរដ្ឋ Florida សហរដ្ឋអាមេរិក

មន្រ្ដីជាន់ខ្ពស់ក្រសួងកសិកម្ម៖«ការអភិវឌ្ឍសមត្ថភាពយុវជន ជាមូលដ្ឋានគ្រឹះនៃនវានុវត្តន៍វិស័យកសិ-ស្បៀងនៅកម្ពុជា»

ក្រុមការងារអាហារូបករណ៍ អ.ម.ត រៀបចំពិធីសំណេះសំណាល និងតម្រង់ទិសជូនដល់បេក្ខជនជ័យលាភី ឆ្នាំសិក្សា២០២៦-២០២៧ នាខេត្តបាត់ដំបង

អភិបាលខេត្តកំពង់ចាម ដឹកនាំក្រុមការងារ អញ្ជើញចុះពិនិត្យទីតាំងសម្រាប់រៀបចំកម្មវិធីប្រណាំងទូក បណ្តែតប្រទីប ថ្នាក់ខេត្ត ឆ្នាំ២០២៦

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877