នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
Harry Kane ឈ្នះពាន Ballon d’Or បញ្ចប់ការរង់ចាំ ២៥ ឆ្នាំរបស់អង់គ្លេស
កម្ពុជាត្រៀម ១៣០វិញ្ញាសា ក្នុងការប្រកួតជើងឯកឃីកបុកស៊ីងទ្វីបអាស៊ី ខណៈអត្តពលិក ២៥ប្រទេសត្រៀមចូលរួម
បេក្ខភាពវគ្គផ្ដាច់ព្រ័ត្រពានសម្ដេចតេជោ ហ៊ុន សែន ថ្នាក់ខេត្ត នឹងរកឃើញនៅថ្ងៃពុធនេះ
ប្រតិភូប៉ាឡាំពិកកម្ពុជា ត្រឡប់មកដល់មាតុភូមិដោយមោទនភាព ជាមួយ​ការ​ស្វាគមន៍​ដ៏​កក់​ក្ដៅ​ពី​ឯកឧត្តម ហ៊ុន ម៉ានី

ព័ត៌មានកីឡា

អបអរសាទរ! ព្រះខ័នរាជស្វាយរៀង គ្រងជើងឯកពានរង្វាន់សម្ដេចតេជោ ហ៊ុន សែន​ ជាលើកទី៦ ក្នុងប្រវត្តិសាស្ដ្រក្លិប

2026/05/25 05:05:17 am        553
Facebook Telegram Linkin
ក្លិបបាល់ទាត់ ព្រះខ័នរាជស្វាយរៀង បានក្លាយ​ជាជើង​ឯកពានរ​ង្វាន់​សម្ដេ​ចអ​គ្គម​ហា​សេនា​បតី​តេជោ ​ហ៊ុន សែន លើកទី១៩ ឆ្នាំ២០២៥/២៦ ក្រោយយកឈ្នះក្រុមវិសាខា ដោយ​ការ​ទាត់​បាល់​ប៉េណាល់​ទីកា​ត់សេ​ចក្ដី ៥-៣ បន្ទាប់ពីប្រកួត ១២០នាទី ស្មើគ្នា ៤-៤ នៅរាត្រីថ្ងៃអាទិត្យនេះ នៅ​ពហុកីឡដ្ឋានជាតិមរតកតេជោ។ជំនួប​ដ៏តានតឹងនេះ វិសាខា បានបើកការនាំមុខ ២គ្រាប់មុន ដោយរកបានដោយ ស៊ិន កក្កដា នៅ​នាទី​១៤ ​និង Scot Allardice នៅនាទី២៥ មុន Kwame Peprah វាយបក ១គ្រាប់ឲ្យ​ព្រះខ័ន​រាជ​ស្វាយ​រៀង​វិញ នៅនាទី៤០។នៅវគ្គទី២ វិសាខា បានបន្ដបន្ថែមគ្រាប់បាល់នាំមុខទី៣ ដោយកីឡាករ ឡេង ណូរ៉ា នៅនាទី៦៩ មុន​កីឡាករ Kwame Peprah វាយបកគ្រាប់ទី២ ឲ្យព្រះខ័នរាជស្វាយរៀង នៅនាទី៧៣ ហើ​យ​លទ្ធ​ផល​នេះ​ បានអូសបន្លាយដល់ចុងម៉ោង តែឱកាសគ្រងជើងឯករបស់វិសាខា ត្រូវបានបង្អាក់ ក្រោយ​ប្រធាន​ Jagodinskis Vitalijs ទាត់បាល់ភ្លាត់ចូលទីខ្លួនឯង(Own Goal) នៅនាទី៩០+៦ ដែល​នាំ​ឲ្យឈានដល់ម៉ោងបន្ថែម ១៥នាទី ២ដង។ឈានដល់ការប្រកួត ៣០នាទីចុងក្រោយ ក្រុមទាំងពីរ រកបាន ១គ្រាប់ម្នាក់ទៀត ដោយ Kwame Peprah រកបាននៅនាទី១១៥ និង ឆេង ម៉េង រកបានគ្រាប់តាមស្មើឲ្យវិសាខា នៅនាទី១១៨ ដែល​នាំ​ឲ្យកា​រប្រកួតត្រូវកាត់សេចក្ដី ដោយការទាត់បាល់ប៉េណាល់ទីកាត់សេចក្ដី ហើយ​ព្រះខ័ន​រាជ​ស្វាយរៀង បានយកឈ្នះវិសាខា ៥-៣ ដើម្បីក្លាយជាជើងឯកតែម្ដង ។នេះគឺជាលើកទី៦ ដែលព្រះខ័នរាជស្វាយរៀង បានគ្រងជើងឯក ក្នុងប្រវត្តិសាស្ដ្ររបស់ក្លិប ដែល​បាន​ឡើងមកដល់វគ្គផ្ដាច់ព្រ័ត្រចំនួន ១១លើក បន្ទាប់ពីពួកគេ ធ្លាប់ឈ្នះពាន កាលពីឆ្នាំ២០១១, ២០១២​, ​២០១៥, ២០១៧ និងឆ្នាំ២០២៣/២៤ ។ រីឯវិសាខា បានទទួលជើងឯករងលើកដំបូង ក្រោយ​ធ្លាប់​គ្រងជើងឯក ៣រដូវកាលជាប់គ្នា កាលពីឆ្នាំ២០២០, ២០២១ និងឆ្នាំ២០២២៕

Aston Villa ដង្ហែពាន Europa League យ៉ាងអធិកអធមក្រោយបញ្ចប់ការរង់ចាំឈ្នះពានដំបូងរយៈពេល ៣០ ឆ្នាំ

2026/05/22 10:02:05 pm        420
Facebook Telegram Linkin
ក្រុមអ្នកគាំទ្រ និងកីឡាកររបស់ Aston Villa បាននាំគ្នាអបអរសាទរយ៉ាងកក្រើកតាមដងផ្លូវក្នុងទីក្រុង Birmingham កាលពីថ្ងៃព្រហស្បតិ៍ បន្ទាប់ពីឈ្នះជើងឯក UEFA Europa League ជាលើកដំបូងក្នុងប្រវត្តិសាស្ត្រ។អ្នកគាំទ្រជាច្រើនបានឈររង់ចាំតាមដងផ្លូវ និងស្រែកហ៊ោកញ្ជ្រៀវ ខណៈរថយន្តដង្ហែរបស់ក្រុមបានធ្វើដំណើរឆ្លងកាត់ទីក្រុង ក្រោយ Aston Villa យកឈ្នះក្រុម SC Freiburg ក្នុងលទ្ធផល ៣-០ នៅវគ្គផ្តាច់ព្រ័ត្រ ដែលធ្វើឡើងនៅទីក្រុង Istanbul កាលពីថ្ងៃពុធ។ខ្សែបម្រើ Youri Tielemans, Emiliano Buendia និង Morgan Rodgers រកគ្រាប់បាល់យ៉ាងអស្ចារ្យម្នាក់មួយគ្រាប់ ជួយឲ្យគ្រូបង្វឹក Unai Emery បន្តបង្កើតកំណត់ត្រាឈ្នះពាន Europa League ជាលើកទី៥។ជោគជ័យនេះបានបញ្ចប់ការរង់ចាំពានរង្វាន់រយៈពេល ៣០ ឆ្នាំរបស់ Aston Villa ចាប់តាំងពីពួកគេឈ្នះពានចុងក្រោយ English League Cup ក្នុងឆ្នាំ១៩៩៦ ហើយក៏ជាពានអឺរ៉ុបលើកដំបូងរបស់ក្លិប ចាប់តាំងពីឈ្នះពាន European Cup ឆ្នាំ១៩៨២ ក្រោយផ្តួលក្រុម FC Bayern Munich នៅវគ្គផ្តាច់ព្រ័ត្រ៕ អត្ថបទ៖នាង សុភាវុធ

ទីក្រុងញូយ៉កផ្តល់សំបុត្របញ្ចុះតម្លៃ ១,០០០ សន្លឹក សម្រាប់ការប្រកួត FIFA World Cup

2026/05/22 09:52:04 pm        663
Facebook Telegram Linkin
អភិបាលក្រុង Zohran Mamdani បានប្រកាសនាពេលថ្មីៗនេះថាទីក្រុង New York នឹងផ្តល់សំបុត្របញ្ចុះតម្លៃចំនួន ១,០០០ សន្លឹក សម្រាប់ការប្រកួតបាល់ទាត់ពិភពលោក FIFA World Cup ដែលរៀបចំនៅ New York និង New Jersey តាមរយៈការចាប់ឆ្នោត សម្រាប់ប្រជាពលរដ្ឋដែលមិនមានលទ្ធភាពទិញសំបុត្រតម្លៃខ្ពស់។ថ្លែងនៅសហគមន៍ Little Senegal លោក Mamdani បានឲ្យដឹងថា ទីក្រុងបានសហការជាមួយ NYNJ Host Committee ដើម្បីទទួលបានសំបុត្រទាំងនេះ ស្របពេលដែលតម្លៃសំបុត្របានកើនឡើងដល់រាប់ពាន់ដុល្លារ។លោកបាននិយាយថា មានប្រជាជននៅ New York ជាច្រើនចង់ចូលរួមទស្សនាការប្រកួត World Cup ប៉ុន្តែមិនមានលទ្ធភាពគ្រប់គ្រាន់ទិញសំបុត្រ។សំបុត្រដែលបញ្ចុះតម្លៃនេះនឹងមានតម្លៃត្រឹម ៥០ ដុល្លារក្នុងមួយសន្លឹក ហើយនឹងត្រូវបែងចែកសម្រាប់ការប្រកួតវគ្គចែកពូលចំនួន ៥ ប្រកួត និងវគ្គជម្រុះចំនួន ២ ប្រកួត នៅកីឡដ្ឋាន MetLife ហើយទីក្រុងក៏នឹងផ្តល់សេវារថយន្តក្រុងទៅ-មកដោយឥតគិតថ្លៃសម្រាប់អ្នកដែលទទួលបានសំបុត្រផងដែរ។ការចាប់ឆ្នោតនឹងធ្វើឡើងនៅថ្ងៃទី ២៥ ខែឧសភានេះ ដោយប្រជាពលរដ្ឋនៅ New York អាចចុះឈ្មោះបានម្តងក្នុងមួយថ្ងៃ ហើយកំណត់ចំនួនអ្នកចូលរួមត្រឹម ៥០,០០០ នាក់ក្នុងមួយថ្ងៃ។ អ្នកឈ្នះនឹងត្រូវប្រកាសនៅថ្ងៃទី៣ ខែមិថុនា ហើយអាចទិញសំបុត្របានរហូតដល់ ២ សន្លឹកក្នុងម្នាក់។ដើម្បីទប់ស្កាត់ការលក់បន្តក្នុងតម្លៃខ្ពស់ អភិបាលក្រុងបានបញ្ជាក់ថា សំបុត្រទាំងនេះមិនអាចផ្ទេរឲ្យអ្នកដទៃបានឡើយ ហើយនឹងត្រូវប្រគល់ជូនដោយផ្ទាល់នៅទីតាំងឡើងរថយន្តក្រុង។ អាជ្ញាធរក៏នឹងផ្ទៀងផ្ទាត់អត្តសញ្ញាណ ដើម្បីធានាថា មានតែប្រជាពលរដ្ឋនៅទីក្រុង New York ប៉ុណ្ណោះដែលអាចទិញសំបុត្របាន៕ អត្ថបទ៖នាង សុភាវុធ

ដឹងតែកក្រើកលីគនារី ក្រុម Top-4 ប៉ះគ្នានាចុងសប្ដាហ៍នេះ

2026/05/22 09:23:05 pm        453
Facebook Telegram Linkin
ការប្រកួតបាល់ទាត់ជម្រើសជើងឯកលីគនារីកម្ពុជា ឆ្នាំ២០២៦ បាន​នឹង​កំពុង​ឡើង​កម្ដៅ​កាន់​តែ​ខ្លាំង​ បើធៀបនឹងរដូវកាលមុន ក្រោយចាប់ផ្ដើមរដូវកាលថ្មីបាន ៤សប្ដាហ៍ ពិសេស​ជំនួប​សប្ដាហ៍​ទី​៥ ​នាចុងសប្ដាហ៍នេះ កាន់តែជក់ចិត្ត និងកក្រើក ដែលជារឿងអ្នកគាំទ្រមិនគួររំលង នោះ​គឺ​ជំនួប​រវាង​ក្រុម​កំពុងឈរកំពូលតារាងទាំង ៤ (Top-4) តែម្ដង។សម្រាប់​កម្មវិធីប្រកួតនៅថ្ងៃទី២៣ ខែឧសភាស្អែកនេះ នឹងមាន ៣ប្រកួត ហើយក្រុម Top-4 ​ដែល​ត្រូវ​ជួបគ្នា គឺមានក្រុមកំពូលតារាងភ្នំពេញក្រោន ត្រូវជួបក្រុមព្រះខ័នរាជស្វាយរៀង និង​ក្រុម​វិសាខា​ ជួបក្រុមម្ចាស់ផ្ទះសៀមរាបអេហ្វស៊ី ។ រីឯ ១ប្រកួតទៀត គឺក្រុមបឹងកេត ជួបក្រុម​ណាហ្គា​វើល ​ដែលសុទ្ធតែជាជំនួបក្រុមខ្លាំង ប៉ះខ្លាំង។ក្រុមបាល់ទាត់នារីភ្នំពេញក្រោន ឆ្លងកាត់ ៤ប្រកួត ឈ្នះទាំង ៤ ស៊ុតគូប្រកួត ៥០គ្រាប់ របូតតែ ១​គ្រាប់​ប៉ុណ្ណោះ រកបាន ១២ពិន្ទុពេញ ។ រីឯព្រះខ័នរាជស្វាយរៀង ក្រោយពីរុះរើក្រុមទ្រង់ទ្រាយធំ និង​នាំ​ចូលកីឡាការិនីបរទេសមួយចំនួន ក៏កំពុងធ្វើបានល្អ ដោយឈ្នះ ៣ប្រកួតជាប់គ្នា មុន​ភ្លាត់​ចាញ់​ក្រុម​សៀមរាប​អេហ្វស៊ី ៣-៤ ក្នុងការប្រកួតចុងក្រោយ កាលពីសប្ដាហ៍មុន។ចំណែក​ក្រុមវិសាខា ក៏ជាក្រុមមិនទាន់ស្គាល់ចាញ់ ក្រោយឆ្លងកាត់ ៤ប្រកួតឈ្នះ ៣ និងស្មើ ១ ដោយ​រក​បាន ១០ពិន្ទុ ឈរលេខ២ នាំមុខក្រុមសៀមរាបអេហ្វស៊ី ឈរលេខ៤ មាន ៧ពិន្ទុ ក្រោយ​ឆ្លង​កាត់ ​៤ប្រកួតឈ្នះ ២ ស្មើ ១ និងចាញ់ ១។ តែថ្ងៃសៅរ៍នេះ គេរំពឹងថា វិសាខា​នឹង​ពិបាក​ក្នុង​ការ​ដណ្ដើម​ពិន្ទុពីរសៀមរាប ដែលកំពុងធ្វើបានល្អពីមួយប្រកួតទៀតមួយប្រកួត ហើយ​ក្រុម​ទាំង​ពីរ ​សុទ្ធតែត្រូវការឈ្នះ ដើម្បីពង្រឹងតំណែង Top-4 ស្រដៀងទៅនឹងជំនួបរវាងបឹងកេត និង​ណា​ហ្គា​វើ​​លដ៏ ដែលត្រូវការឈ្នះរៀងខ្លួន ដើម្បីប្រជែងឱកាសមាសនេះផងដែរ។ដោយឡែក​ការប្រកួតនៅថ្ងៃទី២៤ ខែឧសភា មានតែ ១គូប៉ុណ្ណោះ រវាងក្រុម​មិន​ទាន់​ស្គាល់​ឈ្នះ​ទាំង​ពីរ​ គឺក្រុម XO United និងមន្ទីរអប់រំ យុវជន និងកីឡាខេត្តកំពង់ឆ្នាំង ដែល​ត្រូវ​ជួប​គ្នា​នៅ​កីឡដ្ឋាន​ ISI Park។គួរដឹងថា គ្រប់ការប្រកួត នៃការប្រកួតជម្រើសជើងឯកលីគនារី ឆ្នាំ២០២៦ នេះ នឹង​មាន​ផ្សាយ​ផ្ទាល់​ពី​ក្រុម​ការងារទូរទស្សន៍ BTV-News ផងដែរ៕ អត្ថបទ លី ឈុនឡា

Bruno Fernandes ជឿថា Michael Carrick មានសមត្ថភាពគ្រប់គ្រាន់ដើម្បីទទួលតំណែងដឹកនាំ Manchester United ផ្លូវការ

2026/05/22 07:49:58 pm        310
Facebook Telegram Linkin
ប្រធានក្រុមបិសាចក្រហម Manchester United, Bruno Fernandes បានកោតសរសើរគ្រូបង្វឹកបណ្ដោះអាសន្ន Michael Carrick ចំពោះការជួយបង្វែររដូវកាលដ៏លំបាករបស់ក្លិបឱ្យត្រឡប់មករកភាពជោគជ័យវិញ ហើយបានបញ្ជាក់ថា ពេលនេះគឺអាស្រ័យលើថ្នាក់ដឹកនាំក្លិបថាតើពួកគេចង់បន្តទុកចិត្តលើ Carrick ឬជ្រើសរើសផ្លូវថ្មី។Fernandes បានថ្លែងបែបនេះ ក្រោយទទួលពានរង្វាន់កីឡាករឆ្នើមបំផុតប្រចាំឆ្នាំរបស់សមាគមអ្នកសារព័ត៌មានបាល់ទាត់អង់គ្លេស (FWA) កាលពីថ្ងៃព្រហស្បតិ៍។ ខ្សែបម្រើជនជាតិព័រទុយហ្គាល់រូបនេះ បានបង្ហាញទម្រង់លេងយ៉ាងអស្ចារ្យក្នុងរដូវកាលនេះ ដោយជួយ Manchester United វិលត្រឡប់ទៅកាន់ពាន UEFA Champions League វិញ បន្ទាប់ពីខកខានអស់រយៈពេល២ឆ្នាំ។Fernandes បាននិយាយថា៖ «Michael Carrick មានបុគ្គលិកលក្ខណៈល្អ និងមានសមត្ថភាពគ្រប់គ្រាន់ដើម្បីក្លាយជាគ្រូបង្វឹកកំពូលម្នាក់»។រដូវកាលនេះ Fernandes រកបាន ៨ គ្រាប់នៅ Premier League និងបញ្ជូនបាល់ឱ្យមិត្តរួមក្រុមស៊ុតបានដល់ទៅ ២០ លើក តាមស្មើកំណត់ត្រា Premier League ដែលកាន់កាប់រួមដោយ Thierry Henry និង Kevin De Bruyne ខណៈការប្រកួតនៅសល់មួយប្រកួតទៀតចប់រដូវកាល។ក្រោមការដឹកនាំរបស់ Carrick និងទម្រង់លេងដ៏លេចធ្លោរបស់ Fernandes គេឃើញ Manchester United បានឡើងមកឈរនៅចំណាត់ថ្នាក់លេខ៣ ក្នុងតារាង Premier League ហើយធានាកៅអីលេង Champions League រដូវកាលក្រោយរួចរាល់។ក្នុងការបោះឆ្នោតពាន FWA ឆ្នាំនេះ Fernandes បានយកឈ្នះ Declan Rice របស់ Arsenal ចំនួន ២៨ សំឡេង ខណៈខ្សែប្រយុទ្ធ Erling Haaland របស់ Manchester City ឈរនៅលេខ៣។ Fernandes ក៏ក្លាយជាកីឡាករ Manchester United ដំបូងគេ ដែលឈ្នះពាននេះ ចាប់តាំងពី Wayne Rooney ឈ្នះតាំងពីឆ្នាំ ២០១០៕ អត្ថបទ៖នាង សុភាវុធ

បញ្ជាការដ្ឋានអង្គរក្ស រក្សាកំណត់ត្រាមិនស្គាល់ចាញ់ ៤ប្រកួតជាប់គ្នាក្នុងតេជោលីគរដូវកាលថ្មី

2026/05/22 07:31:05 pm        223
Facebook Telegram Linkin
ព្រឹត្តិការណ៍បាល់ទះតេជោលីគ រដូវកាលទី៣ សប្ដាហ៍ទី១ បានបញ្ចប់ជាមួយលទ្ធផលជក់ចិត្ត ដោយស្ទើរគ្រប់ការប្រកួត មានការឈ្នះចាញ់គ្នាទៅវិញទៅមក ។ យ៉ាងណាក្រុមការពារតំណែងជើងឯកបញ្ជាការដ្ឋានអង្គរក្ស នៅតែធ្វើបានល្អ ដោយរក្សាកំណត់ត្រាឈ្នះ ៤ប្រកួតជាប់គ្នា ដូចលទ្ធផលបើកឆាក ៤ប្រកួតដំបូង កាលពីរដូវកាលទី២ ដែរ។បច្ចុប្បន្នក្រុមបញ្ជាការដ្ឋានអង្គរក្ស កំពុងឈរកំពូលតារាងការប្រកួតសន្សំពិន្ទុ ជុំទី១ បណ្ដោះអាសន្ន ដោយរកបាន ១១ពិន្ទុ ក្រោយឆ្លងកាត់ ៤ប្រកួតឈ្នះទាំង ៤ រួមមានឈ្នះក្រុមវិសាខា ៣-២សិត និងឈ្នះក្រុមស្នងការនគរបាលរាធានីភ្នំពេញ, ក្រុមស្នងការនគរបាលខេត្តកោះកុង និងឈ្នះក្រសួងមហាផ្ទៃ ដោយលទ្ធផល ៣-១សិតដូចៗគ្នា។កាលពីរដូវកាលមុន ៤ប្រកួតដំបូង ក្រុមជើងឯក ២សម័យនេះ ក៏បានយកឈ្នះ ៤ប្រកួតជាប់គ្នាផងដែរ តែគួរឲ្យចាប់អារម្មណ៍ជាងនេះ គឺបញ្ជាការដ្ឋានអង្គរក្ស បានយកឈ្នះដាច់ ៣-០សិតទាំងអស់ ពុំមានក្រុមណាអាចតដៃបានឡើយ មុនពួកគេស្គាល់បរាជ័យនៅប្រកួតទី៥ និងប្រកួតទី៧ ទល់នឹងក្រសួងមហាផ្ទៃ និងវិសាខា តែក្នុងរដូវកាលថ្មីនេះ ក្រុមទាំងពីរ សុទ្ធតែចាញ់ក្រោមថ្វីដៃក្រុមបញ្ជាការដ្ឋានអង្គរក្ស ក្នុងជុំទី១។បន្ទាប់ពីការពារតំណែងជើងឯក ដែលកំពុងឈរកំពូលតារាង ក្រោយឆ្លងកាត់ ៤ប្រកួតដូចគ្នា គេឃើញក្រុមផ្សេងៗទៀត កំពុងមានពិន្ទុប្រកៀកប្រកិតគ្នា រួមមានវិសាខា រកបាន ១០ពិន្ទុ, ក្រសួងមហាផ្ទៃ រកបាន ៨ពិន្ទុ ព្រមទាំងក្រុមស្នងការនគរបាលខេត្តកោះកុង, ក្រុមស្នងការនគរបាលរាជធានីភ្នំពេញ និងក្រុមស្នងការនគរបាលខេត្តស្វាយរៀង ដែលរកបាន ៦ពិន្ទុស្មើគ្នា។ រីឯក្រុមកងពលធំអន្ដរាគមន៍លេខ៣ រកបាន ១ពិន្ទុ និងក្រុមស្នងការនគរបាលខេត្តព្រះសីហនុ មិនទាន់រកបានពិន្ទុ កំពុងប្រឈមរបូតកៅអីជុំទី២ ដ្បិតមាន ២ក្រុមត្រូវកាត់សេចក្ដី ក្រោយចប់ជុំទី១។គួរដឹងថា ក្រោយបញ្ចប់ការប្រកួតសប្ដាហ៍ទី១ ព្រឹត្តិការណ៍បាល់ទះតេជោលីគ នឹងត្រូវសម្រាក ១សប្ដាហ៍ នាចុងសប្ដាហ៍នេះ មុនបន្ដការប្រកួតសប្ដាហ៍ទី២ ដែលជាការប្រកួតកាត់សេចក្ដី នៅជុំទី២ ដើម្បីស្វែងរកបេក្ខភាព ៦ក្រុម បន្ដដំណើរទៅប្រកួតជុំទី២ ចាប់ពីថ្ងៃទី៣១ ខែឧសភា ដល់ថ្ងៃទី២ ខែមិថុនាខាងមុខ នៅវិមានពហុកីឡដ្ឋានជាតិ(អូឡាំពិក)៕

Ronaldo ស៊ុតពីរគ្រាប់ឱ្យ Al Nassr ឈ្នះជើងឯកលីគអារ៉ាប៊ីសាអ៊ូឌីតដំបូងតាំងពីឆ្នាំ ២០១៩

2026/05/22 07:18:03 pm        227
Facebook Telegram Linkin
ក្លិបបាល់ទាត់ Al Nassr បានក្លាយជាជើងឯកលីគកំពូលអារ៉ាប៊ីសាអ៊ូឌីត Saudi Pro League រដូវកាលនេះ បន្ទាប់ពីយកឈ្នះ Damac ៤-១ នៅការប្រកួតចុងក្រោយបិទរដូវកាល។ខ្សែប្រយុទ្ធឆ្នើម Cristiano Ronaldo បានបង្ហាញទម្រង់លេងយ៉ាងអស្ចារ្យ ដោយស៊ុតបញ្ចូលទី ២ គ្រាប់ ខណៈ Sadio Mane និង Kingsley Coman ក៏រកបានម្នាក់ ១ គ្រាប់ផងដែរ សម្រាប់ក្រុមដឹកនាំដោយលោក Jorge Jesus។ការប្រកួតបានចាប់ផ្តើមដោយ Al Nassr គ្រប់គ្រងស្ថានការណ៍បានល្អ ហើយនៅនាទី៣៤ Mane បានតែតបាល់បញ្ចូលទីពីការបញ្ជូនបាល់ជ្រុងរបស់ Joao Felix ធ្វើឲ្យក្រុមនាំមុខ ១-០។ចូលដល់នាទី៥២ Coman បានអូសបាល់រំលងខ្សែការពារជាច្រើន មុនស៊ុតជើងឆ្វេងពីក្រៅតំបន់គ្រោះថ្នាក់ បញ្ចូលទីយ៉ាងល្អ បង្កើនការនាំមុខដល់ ២-០។ទោះបី Damac វាយបកបានមួយគ្រាប់វិញតាមរយៈបាល់ពិន័យ ១១ម៉ែត្រ របស់ Morlaye Sylla នៅនាទី៥៨ ក៏ដោយ ប៉ុន្តែ Al Nassr មិនទុកឱកាសឲ្យគូប្រកួតមានសង្ឃឹមត្រឡប់មកវិញឡើយ។ត្រឹមតែ ៥ នាទីបន្ទាប់ Ronaldo បានស៊ុតបាល់ហ្វ្រីឃីកយ៉ាងអស្ចារ្យ មុនពេលកីឡាករព័រទុយហ្កាល់រូបនេះបន្ថែមគ្រាប់ទី២របស់ខ្លួននៅនាទី៨១។ជ័យជម្នះនេះធ្វើឲ្យ Al Nassr បញ្ចប់រដូវកាលដោយមាន ៨៦ ពិន្ទុ លើសក្រុម Al Hilal ២ ពិន្ទុ បើទោះបី Al Hilal ឈ្នះ Al Fayha ១-០ ក៏ដោយ។នេះគឺជាជើងឯកលីគលើកដំបូងរបស់ Al Nassr ចាប់តាំងពីឆ្នាំ២០១៩ ហើយក៏ជាពានរង្វាន់ធំដំបូងសម្រាប់ Ronaldo ផងដែរ ចាប់តាំងពីរូបគេផ្ទេរមកចូលរួមជាមួយក្លិបនៅចុងឆ្នាំ ២០២២៕ អត្ថបទ៖នាង សុភាវុធ 

កំណត់ត្រាថ្មី! អ្នកឡើងភ្នំ ២៧៤ នាក់ឡើងដល់កំពូលភ្នំខ្ពស់ជាងគេលើពិភពលោក Mount Everest ក្នុងថ្ងៃតែមួយ

2026/05/22 06:41:06 pm        266
Facebook Telegram Linkin
កំណត់ត្រាថ្មីមួយត្រូវបានបង្កើតឡើងនៅលើកំពូលភ្នំ Mount Everest បន្ទាប់​ពីមាន​អ្នក​ឡើង​ភ្នំ​សរុប​ចំនួន ២៧៤ នាក់ បានឡើងដល់កំពូលភ្នំខ្ពស់ជាងគេលើពិភពលោកនេះ ក្នុង​ថ្ងៃ​តែ​មួយ​កាល​ពី​ថ្ងៃទី២០ ខែឧសភាកន្លងទៅពីផ្លូវឡើងខាងប្រទេសនេប៉ាល់។ចំនួននេះបានបំបែកកំណត់ត្រាចាស់ ដែលធ្លាប់មានអ្នកឡើងដល់កំពូលចំនួន ២២៣ នាក់ ក្នុង​ថ្ងៃ​​តែ​មួយ កាលពីថ្ងៃទី២២ ខែឧសភា ឆ្នាំ២០១៩។ទោះបីមាន​ការ​ព្រួយបារម្ភអំពីភាពកកស្ទះ និងហានិភ័យនៅលើភ្នំក៏ដោយលោក Rishi Bhandari អគ្គ​លេខាធិការសមាគមប្រតិបត្តិករទេសចរណ៍ឡើងភ្នំរបស់នេប៉ាល់ បានបញ្ជាក់ថា អ្នក​ឡើង​ភ្នំ​ត្រូវ​បាន​បែងចែកតាមជំរំ និងតំបន់ផ្សេងៗគ្នា ដើម្បីកាត់បន្ថយការកកស្ទះ។ ទោះយ៉ាងណា លោក​ក៏​បាន​ស្នើថា ចំនួនអ្នកព្យាយាមឡើងដល់កំពូលក្នុងមួយថ្ងៃ គួរត្រូវកំណត់មិនឱ្យលើសពី ២៥០ នាក់​។អ្នកជំនាញផ្នែកឡើងភ្នំជាច្រើន តែងរិះគន់រដ្ឋាភិបាលនេប៉ាល់ ចំពោះការ​អនុញ្ញាត​ឱ្យ​មាន​អ្នក​ឡើង​ភ្នំ​ច្រើន​ពេក ដែលអាចបង្កឱ្យមានការកកស្ទះគ្រោះថ្នាក់ នៅតំបន់ “Death Zone” ក្បែរ​កំពូល​ភ្នំ​។ តំបន់នេះមានកម្រិតអុកស៊ីសែនទាបខ្លាំង ដែលអាចបង្កគ្រោះថ្នាក់ដល់ជីវិតមនុស្ស។ជា​ការឆ្លើយតប នេប៉ាល់បានដាក់ចេញវិធានការតឹងរ៉ឹងជាងមុន និងបង្កើនតម្លៃអាជ្ញាបណ្ណឡើងភ្នំ ដើម្បី​គ្រប់គ្រងចំនួនអ្នកឡើងភ្នំ និងបង្កើនសុវត្ថិភាព។ ឆ្នាំ២០២៦នេះ នេប៉ាល់បាន​ចេញ​អាជ្ញា​បណ្ណ​ឡើង​ភ្នំ Everest សរុបចំនួន ៤៩៤ អាជ្ញាបណ្ណ ដោយម្នាក់ៗត្រូវបង់ថ្លៃដល់ទៅ ១៥,០០០ ដុល្លា​រដើ​ម្បីឡើង៕ អត្ថបទ៖នាង សុភាវុធ

មិនធម្មតា! ត្រឹម ២ថ្ងៃ ISI និងភ្នំពេញក្រោន ចែកផ្លូវកីឡាករជិត ៣០នាក់

2026/05/22 06:27:31 pm        254
Facebook Telegram Linkin
ជារឿងគួរឲ្យភ្ញាក់ផ្អើល សម្រាប់អ្នកគាំទ្រ ពិសេសប្រិយមិត្តក្លិបបាល់ទាត់ ISI ដង្កោសែនជ័យ និងភ្នំពេញក្រោន ដែលត្រឹមរយៈពេល ២ថ្ងៃ ក្លិបទាំងពីរ បានប្រកាសចែកផ្លូវជាមួយកីឡាកររហូតដល់ជិត ២៧នាក់។ ការរុះរើក្រុមទ្រង់ទ្រាយធំរបស់ក្លិបទាំងពីរ គឺជាការកត់សម្គាល់ដ៏ធំមួយ នៅក្នុងទីផ្សារដោះដូរកីឡាករ ក្រោយបញ្ចប់រដូវកាលនៃលីគកំពូលកម្ពុជា។សម្រប់ ISI ដង្កោសែនជ័យ គិតត្រឹមល្ងាចថ្ងៃទី២១ ខែឧសភា ក្រៅពីការចែកផ្លូវជាមួយគ្រូបង្គោលលោក ទុំ សារ៉ាយ ក្លិបបានប្រកាសចែកផ្លូវជាមួយកីឡាករខ្មែរ និងបរទេសចំនួន ១៥រូបជាបន្ដបន្ទាប់ ក្នុងនោះមានកីឡាករ ឡុង ម៉េងហាវ, ស៊ិន ថាវិស៊ីវ, កែវ សារ៉ាត, ជា ចាន់ដារ៉ា, រុំ រក្សា, ឈុំ សុខហៃ, វ៉ឹង យ៉ុងជេ, អ្នកចាំទី លី កក្កដា,នាង ផាន់និត និងអ្នចាំទីវ័យក្មេង ជា សាវីន។រីឯកីឡាករបរទេស គឺមានកីឡាករព័រទុយហ្គាល់ Jaoa Rodrigues, កីឡាករប្រេស៊ីល Bruno Ernandes, កីឡាករសៀរ៉ាឡេអូន Umaru Samura និងកីឡាករជប៉ុន ២រូប រួមមានកីឡាករ Sonosoke Onda និង Shogo Akiba។ការរុះរើក្រុមគួរឲ្យភ្ញាក់ផ្អើលនេះ បានបង្ហាញយ៉ាងច្បាស់ពីការផ្លាស់ប្ដូរ និងរៀបចំក្រុមឲ្យបានកាន់តែខ្លាំង ដើម្បីត្រៀមប្រកួតប្រជែងនារដូវកាលថ្មី ឆ្នាំ២០២៦/២៧ បន្ទាប់ពីក្រុមមានមូលដ្ឋាននៅតំបន់វេងស្រេងនេះ បរាជ័យគោលដៅព្រជែងកៅអី Top-4 ក្នុងលីគកំពូលកម្ពុជា ឆ្នាំ២០២៥/២៦។ក្រឡេកទៅភ្នំពេញក្រោន រឹតតែធ្វើឲ្យអ្នកគាំទ្រចាប់អារម្មណ៍ ក្រោយក្លិបប្រកាសកីឡាករសំខាន់ៗ មានទាំងកីឡាករធ្លាប់រួមរស់យូរឆ្នាំ និងកីឡាករថ្មី តែបង្ហាញគុណផលល្អសម្រាប់រដូវកាលដំបូង។ ត្រឹមរយៈពេល ២ថ្ងៃ ភ្នំពេញក្រោន បានប្រកាសចែកផ្លូវជាមួយកីឡាករខ្មែរ និងបរទេសរុប ១២នាក់ ក្នុងនោះក្រោយពីចែកផ្លូវជាមួយកីឡាករសញ្ជាតិខ្មែរ Andres Nieto, កីឡាករកូនកាត់ខ្មែរ-ស៊ុយអ៊ែត ហាមីស៊ី មូហាំម៉ាត់, កីឡាករអ៊ុយក្រែន Maksym Priadun, កីឡាករបូលីវី Tellez Makerlo, យ៉ើ មូស្លីម និងអ្នកចាំទី សាវែង សំណាង នៅថ្ងៃទី២១ ខែឧសភា ពួកគេបានបន្ដចែកផ្លូវជាមួយកីឡាករ វុធ តុលា ព្រមទាំងកីឡាករបរទេស ៥រូបទៀត រួមមានកីឡាកាណាដា Diego Gutiérrez, កីឡាករអ៊ីតាលី Pape Serigne, កីឡាករប្រេស៊ីល Breno Caetano និងកីឡាករកូរ៉េខាងត្បូង ២រូប គឺមានកីឡាករ Park Yi-young និងមិត្តរួមជាតិ Seo-In Kim។គួរដឹងថា ភ្នំពេញក្រោន បានបញ្ចប់នៅជើងឯករង នៃលីគកំពូលកម្ពុជា និងធ្លាក់ត្រឹមវគ្គ ៨ក្រុមចុងក្រោយ នៃពានរង្វាន់សម្ដេចតេជោ ហ៊ុន សែន ឆ្នាំ២០២៥/២៦ ។ ការរុះរើក្រុមទ្រង់ទ្រាយធំពេលនេះ អាចជាយុទ្ធសាស្ដ្រថ្មីមួយទៀត សម្រាប់ក្លិបក្នុងការពង្រឹងក្រុមឲ្យបានកាន់តែខ្លាំង សម្រាប់ត្រៀមរដូវកាលថ្មី ទាំងពានក្នុងស្រុកផង និងពានរង្វាន់អន្ដរជាតិផង។ តែយ៉ាងណាមកទល់ពេលនេះ គេមិនទាន់ឃើញក្លិបទាំងពីរ បង្ហាញការនាំចូលសមាជិកថ្មីនោះទេ៕ អត្ថបទ លី ឈុនឡា 

Carlos Alcaraz នឹងអវត្តមានពី Grand Slam, Wimbledon ដោយសាររបួសកដៃ

2026/05/21 11:45:46 pm        433
Facebook Telegram Linkin
កីឡាករវាយកូនបាល់លំដាប់លេខ ២ ពិភពលោកលេខ Carlos Alcaraz បានប្រកាសថា នឹងខកខានការប្រកួត Grand Slam, Wimbledon ឆ្នាំនេះ ដោយសារត្រូវបន្តព្យាបាលរបួសកដៃ ហើយក៏នឹងអវត្តមានពីការប្រកួត Grand Slam បន្ទាប់ French Open ផងដែរ។តាមរយៈសារបង្ហោះលើបណ្ដាញសង្គមនាពេលថ្មីៗនេះ កីឡាករវ័យ ២៣ឆ្នាំរូបនេះបានបញ្ជាក់ថា ការស្តារសុខភាពរបស់ខ្លួនកំពុងដំណើរការល្អ និងមានអារម្មណ៍ប្រសើរឡើង ប៉ុន្តែមិនទាន់រួចរាល់សម្រាប់ការប្រកួតប្រជែងនៅឡើយទេ។កីឡាករសញ្ជាតិអេស្ប៉ាញរូបនេះធ្លាប់ឈ្នះពាន Wimbledon ចំនួន២លើកជាប់ៗគ្នា ក្នុងឆ្នាំ២០២៣ និង២០២៤ ដោយបានយកឈ្នះ Novak Djokovic នៅវគ្គផ្តាច់ព្រ័ត្រទាំងពីរលើក។ ទោះយ៉ាងណា ក្នុងការប្រកួតចុងក្រោយ កីឡាករអេស្ប៉ាញរូបនេះបានចាញ់កីឡាករលេខ១ពិភពលោកបច្ចុប្បន្ន Jannik Sinner ក្នុងលទ្ធផល ៣-១ សិត។មុនពេលរងរបួស Alcaraz បានចាប់ផ្តើមរដូវកាលឆ្នាំនេះយ៉ាងល្អ ដោយឈ្នះពាន Australian Open ប៉ុន្តែការខកខាន Grand Slam ពីរជាប់គ្នាដោយសារបញ្ហារបួសនេះ កំពុងក្លាយជាការប៉ះពាល់ធំមួយសម្រាប់អាជីពរបស់ខ្លួន៕ អត្ថបទ៖នាង សុភាវុធ

បណ្ដាញសង្គម

ព័ត៌មានថ្មីៗ

ក្រសួងឧស្សាហកម្ម ពិគ្រោះយោបល់លើសេចក្តីព្រាងវិសោធនកម្មច្បាប់ ស្តីពីការគ្រប់គ្រងពូជដំណាំ និងសិទ្ធិអ្នកបង្កាត់ពូជដំណាំ
10/27/2026 08:10 PM
Facebook Telegram Linkin
កម្ពុជា បារាំង ចង់បង្កើតនូវកិច្ចសហប្រតិបត្តិការ លើវិស័យសុខាភិបាល និងអាកាសចរស៊ីវិល បន្ថែមទៀត
10/27/2026 08:10 PM
Facebook Telegram Linkin
សម្ដេចតេជោ៖ ទំនាក់ទំនងស្នូលកម្ពុជា-ជប៉ុន មិនអាចខ្វះបានឡើយ នូវផ្នែកសេដ្ឋកិច្ច ពាណិជ្ជកម្ម និងវិនិយោគ
10/27/2026 07:10 PM
Facebook Telegram Linkin
មេដឹកនាំកំពូលរបស់អ៊ីរ៉ង់ អំពាវនាវឱ្យបំពេញតាម​លក្ខខណ្ឌរបស់ទីក្រុងតេអេរ៉ង់ ដើម្បីបញ្ចប់សង្គ្រាម
10/27/2026 07:10 PM
Facebook Telegram Linkin
អគ្គិភ័យឆាបឆេះឡើងនៅតំបន់ក្រីក្រ ស្ថិតក្នុងស្រុក Gangnam របស់ទីក្រុងសេអ៊ូល ប្រទេសកូរ៉េខាងត្បូង
10/27/2026 07:10 PM
Facebook Telegram Linkin
មនុស្សរាប់ម៉ឺននាក់ ជម្លៀសចេញពីតំបន់ឆ្នេរភាគខាងកើតឥណ្ឌា មុនការមកដល់របស់ព្យុះស៊ីក្លូន Arnab
10/27/2026 06:10 PM
Facebook Telegram Linkin
ការបោះឆ្នោត នៅអ៊ីស្រាអែល៖ ទីផ្សារភ្នាល់ បង្ហាញ​ពីបរាជ័យដ៏​គួរឱ្យភ្ញាក់ផ្អើលរបស់លោក Netanyahu
10/27/2026 06:10 PM
Facebook Telegram Linkin
ចិនអះអាងថា គ្មានគ្រោះមហន្តរាយបន្តបន្ទាប់នោះទេពីការរញ្ជួយដីនៅតំបន់ទីបេ
10/27/2026 06:10 PM
Facebook Telegram Linkin
ការ​ធូរស្រាល​នៃទំនាក់​ទំនង​ឥណ្ឌា-ចិន ត្រូវ​បាន​សាកល្បងដោយ​របាយ​ការណ៍ អំពីការប្រឈមមុខដាក់គ្នា នៅព្រំដែន
10/27/2026 06:10 PM
Facebook Telegram Linkin
មនុស្សជាច្រើននាក់ រងរបួស ក្នុងហេតុការណ៍រថយន្តបើកបុកហ្វូងមនុស្សនៅភាគខាងជើងអាល្លឺម៉ង់
10/27/2026 05:10 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.