នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
Harry Kane ឈ្នះពាន Ballon d’Or បញ្ចប់ការរង់ចាំ ២៥ ឆ្នាំរបស់អង់គ្លេស
កម្ពុជាត្រៀម ១៣០វិញ្ញាសា ក្នុងការប្រកួតជើងឯកឃីកបុកស៊ីងទ្វីបអាស៊ី ខណៈអត្តពលិក ២៥ប្រទេសត្រៀមចូលរួម
បេក្ខភាពវគ្គផ្ដាច់ព្រ័ត្រពានសម្ដេចតេជោ ហ៊ុន សែន ថ្នាក់ខេត្ត នឹងរកឃើញនៅថ្ងៃពុធនេះ
ប្រតិភូប៉ាឡាំពិកកម្ពុជា ត្រឡប់មកដល់មាតុភូមិដោយមោទនភាព ជាមួយ​ការ​ស្វាគមន៍​ដ៏​កក់​ក្ដៅ​ពី​ឯកឧត្តម ហ៊ុន ម៉ានី

ព័ត៌មានកីឡា

ក្លិបអង់គ្លេសឡើងវគ្គផ្តាច់ព្រ័ត្រក្របខណ្ឌអឺរ៉ុបទាំងបីកម្រិតលើកដំបូង

2026/05/08 09:13:55 pm        429
Facebook Telegram Linkin
ជារដូវកាលដ៏អស្ចារ្យមួយសម្រាប់បាល់ទាត់អង់គ្លេស បន្ទាប់ពីក្លិបមកពី Premier League បីសុទ្ធតែមានមុខនៅវគ្គផ្តាច់ព្រ័ត្រក្របខណ្ឌបាល់ទាត់ទាំង ៣ កម្រិត។Arsenal មុនគេបានកក់កៅអីនៅវគ្គផ្តាច់ព្រ័ត្រក្របខណ្ឌក្លិបកំពូលអឺរ៉ុប UEFA Champions League ដែលពួកគេនឹងត្រូវជួបជាមួយក្រុមការពារតំណែងជើងឯក Paris Saint Germain។ ក្រោយឆ្លងកាត់ការប្រកួតនៅយប់ថ្ងៃព្រហស្បតិ៍ម្សិលមិញ Aston Villa និង Crystal Palace ក៏បានកក់កៅអីនៅវគ្គផ្តាច់ព្រ័ត្រក្របខណ្ឌអឺរ៉ុបពីរផ្សេងទៀតគឺ Europa League និង Conference League។ សម្រាប់ Aston Villa ដែលចាញ់ជើងទីមួយវគ្គពាក់កណ្តាលផ្តាច់ព្រ័ត្រនៅទឹកដី Nottingham Forest ១-០ នោះ បានត្រលប់មកវាយបកយកឈ្នះនៅទឹកដីរបស់ខ្លួន ៤-០ វិញ។ ជ័យជំនះនេះធ្វើឱ្យគ្រូបង្វឹក Unai Emery កក់កៅអីវគ្គផ្តាច់ព្រ័ត្រអឺរ៉ុបលើកទី ៥ ក្នុងអាជីព។ Aston Villa កំពុងសម្លឹងរកជើងឯកដំបូងក្នុងប្រវត្តិសាស្រ្តក្លិបក្រោយខកខានឈ្នះពាននានាតាំងពីឆ្នាំ ១៩៩៦ ខណៈពួកគេនឹងត្រូវជួបជាមួយ Freiburg នៅយប់ថ្ងៃពុធទី ២១ ខែឧសភានេះនៅទីក្រុង Istanbul ប្រទេសទួកគី។ ងាកមកក្រុមអង់គ្លេសមួយទៀត Crystal Palace ក៏បានកក់កៅអីនៅវគ្គផ្តាច់ព្រ័ត្រក្របខណ្ឌអឺរ៉ុបកម្រិតទីបី Conference League ផងដែរក្រោយយកឈ្នះក្រុមអ៊ុយក្រែន Shakhtar Donetsk សរុបទាំងពីរជើង ៥-២។ ក្រុមរបស់លោក Oliver Glasner នឹងត្រូវជួបជាមួយក្រុមអេស្ប៉ាញ Rayo Vallecano នៅវគ្គផ្តាច់ព្រ័ត្រថ្ងៃទី ២៧ ខែឧសភានេះនៅ Red Bull Arena របស់ក្លិបបាល់ទាត់ Leipzig ទឹកដីអាល្លឺម៉ង់៕ អត្ថបទ៖នាង សុភាវុធ

តារាចម្រៀងប៉ុប Shakira បញ្ចេញបទចម្រៀងផ្លូវការសម្រាប់ព្រឹត្តិការណ៍បាល់ទាត់ពិភពលោក

2026/05/08 07:40:01 pm        311
Facebook Telegram Linkin
តារាចម្រៀងប៉ុបល្បីរបស់កូឡុំប៊ី Shakira បានប្រកាសជាផ្លូវការអំពីបទចម្រៀងថ្មីសម្រាប់ព្រឹត្តិការណ៍បាល់ទាត់ពិភពលោក FIFA World Cup 2026 ដែលនឹងធ្វើឡើងនៅសហរដ្ឋអាមេរិក ម៉ិកស៊ិក និងកាណាដា។តារាវ័យ ៤៩ ឆ្នាំរូបនេះ ដែលធ្លាប់ល្បីជាមួយបទ “Whenever, Wherever” និង “Hips Don’t Lie” បានបង្ហាញឈុតខ្លីនៃបទថ្មីមានចំណងជើង “Dai Dai” កាលពីយប់ថ្ងៃព្រហស្បតិ៍។ បទនេះគ្រោងចេញផ្សាយនៅថ្ងៃទី ១៤ ខែឧសភា ហើយមានការចូលរួមច្រៀងពីតារាចម្រៀងនីហ្សេរីយ៉ា Burna Boy ផងដែរ។Shakira បានបង្ហោះវីដេអូរយៈពេលមួយនាទីនៅលើ Instagram ពីកីឡដ្ឋាន Maracanã ដើម្បីផ្សព្វផ្សាយបទចម្រៀងថ្មីនេះ ដែលត្រូវបានគេចាត់ទុកថាជាបទផ្លូវការសម្រាប់ព្រឹត្តិការណ៍បាល់ទាត់ពិភពលោកឆ្នាំ ២០២៦។នេះជាលើកទីពីរហើយដែល Shakira បានចូលរួមធ្វើបទចម្រៀងផ្លូវការសម្រាប់ World Cup បន្ទាប់ពីបទ “Waka Waka (This Time for Africa)” ក្នុងការប្រកួតឆ្នាំ ២០១០ នៅអាហ្វ្រិកខាងត្បូង។ ក្រៅពីនេះ នាងក៏ធ្លាប់ច្រៀងបទ “La La La (Brazil 2014)” សម្រាប់ World Cup ឆ្នាំ ២០១៤ នៅប្រេស៊ីល និងបានសម្តែងនៅពិធីបិទការប្រកួតនៅទីក្រុង Rio de Janeiro ផងដែរ។មិនត្រឹមតែប៉ុណ្ណោះ Shakira ក៏ធ្លាប់សម្តែងបទ “Hips Don’t Lie” នៅពិធីបិទ World Cup ឆ្នាំ ២០០៦ នៅប្រទេសអាល្លឺម៉ង់។ នាងមានកូនប្រុសពីរនាក់ជាមួយអតីតខ្សែការពារ Gerard Piqué របស់ក្រុមជម្រើសជាតិអេស្ប៉ាញ និង FC Barcelona។សម្រាប់ការប្រកួត World Cup ឆ្នាំ ២០១៦ នេះ ក្រុមជម្រើសជាតិកូឡុំប៊ីនឹងចូលរួមប្រកួតផងដែរ ក្នុងព្រឹត្តិការណ៍ដែលមាន ៤៨ ក្រុម ដែលនឹងប្រព្រឹត្តទៅចាប់ពីថ្ងៃទី ១១ ខែមិថុនា ដល់ថ្ងៃទី ១៩ ខែកក្កដា៕ អត្ថបទ៖នាង សុភាវុធ

ឯកឧត្តម វ៉ាត់ ចំរើន លើកពីផលវិជ្ជមាន នៃកំណើនអ្នករត់ម៉ារ៉ាតុងចក្រភពអង្គរ ស្រប​ពេល​ពិភព​លោក​កំពុង​មាន​វិបត្តិ

2026/05/08 07:24:22 pm        300
Facebook Telegram Linkin
ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការ​គណៈ​កម្មា​ធិការ​ជាតិ​អូឡាំពិកកម្ពុជា(NOCC) បានលើកឡើងពីផលវិជ្ជមានសំខាន់ៗច្រើន ក្រោយ​កំណើន​អ្នក​ចុះឈ្មោះចូ​លរួមទិវារត់ប្រណាំងម៉ារ៉ាតុងអន្ដរជាតិ ចក្រភពអង្គរ លើកទី១១ នាថ្ងៃទី២ ខែសីហា ឆ្នាំ២០២៦ ខាងមុខ មានសន្ទុះខ្លាំង ដូចកាលឆ្នាំ២០១៩ មុនផ្ទុះវិបត្តិកូវីដ-១៩។ថ្លែង​ក្រោយសន្និសីទសារព័ត៌មាន កាលពីថ្ងៃទី៧ ខែឧសភាកន្លងទៅ ឯកឧត្តមបានគូសរំលេចថា ​ទោះ​បី​ពិភពលោកកំពុងជួបវិបត្តិសង្គ្រាម ពាណិជ្ជកម្ម និងបញ្ហាផ្សេងៗ ក៏ដូច​ជា​បញ្ហា​ព្រំដែន​កម្ពុជា​ ដែលសេសសល់ និងបញ្ហាផ្សេងទៀត តែក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានជំរុញឲ្យមានភាពប្រសើរឡើងពីមួយថ្ងៃទៅមួយ នាំឲ្យគ្រប់​កម្ម​វិធី​រត់​ប្រណាំង ជាក់ស្ដែងទិវារ់តប្រណាំងម៉ារ៉ាតុងចក្រភពអង្គរ ទាក់ទាញការចូលរួម​កើន​ឡើង​គួ​រ​ឲ្យក​ត់សម្គាល់ ដែលជាផលវិជ្ជមាន ចំពោះសេដ្ឋកិច្ច និងសង្គមជាតិ ក៏ដូចជា​រួម​ចំណែក​លើក​កម្ពស់​ភ្ញៀវទេសចរ​ក្នុងរដូវកាលបៃតងផងដែរ។ជាមួយគ្នា លោក សែម ផល្លា នាយកបច្ចេកទេសគណៈកម្មការម៉ារ៉ាតុងកម្ពុជា បានឲ្យដឹងថា មក​ទល់​ពេ​លនេះ មានអ្នកចុះឈ្មោះចូលរួមទិវារត់ប្រណាំងម៉ារ៉ាតុងអន្ដរជាតិ ចក្រភពអង្គរ លើក​ទី​១១ ​ជិត ៥ពាន់នាក់ហើយ ក្នុងនោះមានខ្មែរជាង ៤ពាន់នាក់ និងបរទេសជាង ៥០០នាក់ មកពី ៤៨​ប្រទេស។ តួរលេខនេះ មានសន្ទុះប្រហាក់ប្រហែលនឹងឆ្នាំ២០១៩ មុនវិបត្តិកូវីដ-១៩ ហើយ​នៅ​សល់​រយៈពេលជិត ៣ខែទៀត លោកសង្ឃឹមថា នឹងមានកំណើនអ្នកចូលរួមពីជាង ៥ពាន់ ទៅ ៦ពាន់នាក់។តាមរយៈកំណើនគួរឲ្យភ្ញាក់ផ្អើលនេះដែរ គណៈកម្មការរៀបចំ បានត្រៀមខ្លួនរួចរាល់ ក្នុងការ​តម្រាយ​ផ្លូវ សន្ដិសុខសណ្ដាប់ធ្នាប់ និងក្រុមគ្រូពេទ្យជាដើម ដើម្បីធានា​បាន​នូវ​សុខ​សុវត្ថិភាព​ជូន​អ្នក​រត់​ទាំង​អស់ ហើយលោកក៏អំពាវនាវដល់ប្រជាពលរដ្ឋ ទាំងជាតិ និងអន្ដរជាតិ រួសរាន់​ចុះ​ឈ្មោះ​ ដើម្បីងាយស្រួលដល់គណៈកម្មការរៀបចំផងដែរ។គួរដឹងថា គោលបំណងសំខាន់ នៃការរៀបចំព្រឹត្តិការណ៍ម៉ារ៉ាតុងចក្រភពអង្គរ កំឡុង​ខែ​សីហា​រៀង​រាល់​ឆ្នាំ គឺដើម្បីចូលរួមផ្សព្វផ្សាយ និងទាក់ទាញភ្ញៀវទេសចរណ៍ ក្នុងរដូវភ្លៀង ឬរដូវបៃតង ស្រប​តាម​គោលនយោបាយរបស់រាជរដ្ឋាភិបាល ក៏ដូចជាក្រសួងទេសចរណ៍ ក្នុងការរៀប​ចំ​ព្រឹត្តិ​ការណ៍​ធំ​ៗ​ឲ្យ​បានច្រើន ដើម្បីទាក់ទាញភ្ញៀវទេសចរផង និងជួយដល់ប្រតិបត្តិករ​ទេសចរណ៍​នៅ​ខេត្ត​សៀម​រាប​ផង។ មួយវិញទៀត ក៏ជាវេទិការផ្សារភ្ជាប់សកម្មភាពសប្បុរសធម៌ ជួយដល់មន្ទីរ​ពេទ្យ​កុមារ​ និងអង្គការផ្សេងៗទៀត។ សម្រាប់វិញ្ញាសារត់មានចំនួន ៤ រួមមានរត់ចម្ងាយ ៤២​គីឡូ​ម៉ែត្រ​, ២១គីឡូម៉ែត្រ, ១០គីឡូម៉ែត្រ និង ៣គីឡូម៉ែត្រ៕ អត្ថបទ លី ឈុនឡា

ឈ្លោះប្រកែកគ្នាឈានដល់ហិង្សារវាងមិត្តរួមក្រុម Real Madrid, Tchouameni វាយ Valverde បែកក្បាល

2026/05/08 07:14:53 pm        215
Facebook Telegram Linkin
ភាពតានតឹងនៅ Real Madrid បានផ្ទុះឡើងកាន់តែខ្លាំង កាលពីថ្ងៃព្រហស្បតិ៍បន្ទាប់ពីខ្សែបម្រើ Federico Valverde និង Aurélien Tchouaméni បានប៉ះទង្គិចគ្នាក្នុងបន្ទប់ផ្លាស់សម្លៀកបំពាក់ រហូតធ្វើឱ្យកីឡាករអ៊ុយរូហ្គាយរងរបួសក្បាល និងត្រូវបញ្ជូនទៅមន្ទីរពេទ្យ។តាមប្រភព​ជាច្រើននៅក្នុងក្លិប Real Madrid បានឱ្យដឹងថា ហេតុការណ៍នេះកើត​ឡើង​នៅ​មជ្ឈ​មណ្ឌល​ហ្វឹកហាត់ Ciudad Real Madrid ក្នុងតំបន់ Valdebebas មួយថ្ងៃបន្ទាប់ពីអ្នកទាំងពីរមានជម្លោះពាក្យសម្តីជាមួយគ្នាជាមុន។ក្រោយមក Real Madrid បានចេញសេចក្តីប្រកាសបញ្ជាក់ថា ប្រធានក្រុម Valverde បានរងរបួសក្បាល និងត្រូវសម្រាកព្យាបាលប្រហែលពីរសប្តាហ៍។អ្នកនាំពាក្យរបស់ក្លិបបានប្រាប់ Reuters ថាក្លិបមិនធ្វើអត្ថាធិប្បាយលើបញ្ហាផ្ទៃក្នុងរបស់ខ្លួនឡើយ ប៉ុន្តែបានបញ្ជាក់ថា មានការបើកនីតិវិធីវិន័យចំពោះកីឡាករទាំងពីរ ហើយនិងបានបង្កឱ្យមានកិច្ចប្រជុំបន្ទាន់មួយ ដែលមានការចូលរួមពីមន្ត្រីជាន់ខ្ពស់របស់ក្លិបផងដែរ។បញ្ហាភាពច្របូកច្របល់នៅក្នុងក្រុមនេះ កើតឡើងបន្ទាប់ពីមានជម្លោះមួយផ្សេងទៀតកាលពីដើមសប្តាហ៍ រវាងខ្សែការពារ Álvaro Carreras និង Antonio Rüdiger។ Carreras បានទទួលស្គាល់ថា ពិតជាមានការឈ្លោះប្រកែកគ្នាមែន ប៉ុន្តែបានអះអាងថា វាគ្រាន់តែជាហេតុការណ៍តូចតាច និងត្រូវបានដោះស្រាយរួចរាល់ហើយ។រដូវកាលរបស់ Real Madrid កំពុងជួបវិបត្តិយ៉ាងខ្លាំងលើគ្រប់ផ្នែក។ អតីតគ្រូបង្វឹក Xabi Alonso ត្រូវបានបណ្តេញចេញពាក់កណ្តាលរដូវកាល ខណៈអ្នកស្នងតំណែង Álvaro Arbeloa ក៏មិនអាចជួយក្រុមឱ្យត្រឡប់មករកភាពជោគជ័យវិញបានដែរ។បន្ទាប់ពីធ្លាក់វគ្គ ៨ ក្រុមចុងក្រោយ Champions League ក្រោមថ្វីជើង Bayern Munich បច្ចុប្បន្ន Real Madrid កំពុងដេញតាមក្រុមកំពូលតារាង Barcelona ១១ ពិន្ទុនៅ La Liga ខណៈនៅសល់តែ ៤ ប្រកួតប៉ុណ្ណោះ។ក្រុមយក្សទាំងពីរ នឹងត្រូវជួបគ្នាក្នុងការប្រកួត El Clasico នៅទឹកដី Barcelona នៅថ្ងៃអាទិត្យ ដែលអាចក្លាយជាការប្រកួតសម្រេចជើងឯកសម្រាប់ Barcelona ផងដែរ៕ អត្ថបទ៖នាង សុភាវុធ 

ឯកអគ្គរាជទូតកម្ពុជាប្រចាំរដ្ឋកូវ៉ែតថា វត្តមានក្លិបព្រះខ័នរាជ ក្នុង​វគ្គ​ផ្ដាច់​ព្រ័ត្រ ​ACGL​ មាន​អត្ថន័យ​លើស​ពី​ការប្រកួត

2026/05/08 06:38:05 pm        706
Facebook Telegram Linkin
ឯកឧត្តម ឆាយ មករា ឯកអគ្គរាជទូតនៃព្រះរាជាណាចក្រកម្ពុជា ប្រចាំរដ្ឋកូវ៉ែត បាន​ចាត់​ទុក​វត្ត​មាន​ក្លិប​ព្រះខ័​នរាជស្វាយរៀង របស់កម្ពុជា នៅក្នុងវគ្គផ្ដាច់ព្រ័ត្រពានរង្វាន់កម្រិតទី៣ ទ្វីប​អាស៊ី ​AFC ​Challenge League(ACGL) 2025/26 ដែលត្រៀមប្រកួតទល់ក្រុមខ្លាំង Al Kuwait SC ​នា​សប្ដាហ៍ក្រោយ គឺមានអត្ថន័យជ្រាលជ្រៅ និងលើសពីការប្រកួតប្រជែងកីឡាធម្មតា ប៉ុន្ដែវា​នឹង​បង្ហា​ញ​ពី​សមត្ថភាព និងមុខមាត់ប្រទេសកម្ពុជាលើឆាកអន្ដរជាតិ។ថ្លែងប្រាប់ក្រុមការងារ BTV-News តាមរយៈ Video Call ពីរដ្ឋកូវ៉ែត ឯកឧត្តមឯកអគ្គរាជទូត បាន​បង្ហាញសេចក្ដីសោមនស្សរីករាយ និងមោទនភាព ដែលរយៈពេលប៉ុន្មានឆ្នាំចុងក្រោយ វិស័យ​កីឡា​បាល់​ទាត់កម្ពុជា បានលេចត្រដែតលើឆាកអន្ដរជាតិ ពិសេសការប្រកួតក្របខណ្ឌក្លិប ។ ជាក់​ស្ដែងការឡើងវគ្គផ្ដាច់ព្រ័ត្ររបស់ក្លិបព្រះខ័នរាជស្វាយរៀង និងត្រូវប្រកួតទល់ក្រុមខ្លាំងកូវ៉ែត នា​សប្ដាហ៍ក្រោយ ពិតជាមានអត្ថន័យលើសពីការប្រកួត តែនឹង​ក្លាយជា​ព្រឹត្តិការណ៍​ដើម្បី​បង្ហាញ​ពី​សមត្ថភាព​ក្រុម​កីឡាករកម្ពុជា ពិសេសការលើកស្ទួយកេរ្ដិ៍ឈ្មោះ និងទាក់ទាញចំណាប់​អារម្មណ៍​បណ្ដា​ប្រទេស​អារ៉ាប់ឲ្យស្គាល់កម្ពុជាកាន់តែច្រើនបន្ថែមទៀត។ទន្ទឹមជាមួយគ្នា ក្នុងនាមស្ថានទូតកម្ពុជា និងជាប្រជាពលរដ្ឋខ្មែរមួយរូប ឯកឧត្តម ឆាយ មករា បាន​ត្រៀម​ខ្លួនរួចរាល់ ក្នុងការទទួលស្វាគមន៍ដំណើរដល់អាកាសយានដ្ឋានរដ្ឋកូវ៉ែត ដើម្បី​ដំណើរ​ដល់​រប​ស់ក្លិបព្រះខ័នរាជស្វាយរៀង ក៏ដូចជាការត្រៀមរួចរាល់ ក្នុងការកៀរគរមន្ដ្រី និង​បុគ្គលិក​ស្ថាន​ទូត​កម្ពុជាប្រចាំរដ្ឋកូវ៉ែត និងសិស្ស-និស្សិតកម្ពុជាទាំងអស់ ត្រៀមចូលរួមទស្សនា និង​លើក​ទឹក​ចិត្ត​ ដោយភ្ជាប់ជាមួយទង់ជាតិកម្ពុជា ដើម្បីលើកទឹកចិត្តដល់ក្រុមតំណាងប្រទេសកម្ពុជា ក្នុង​ការ​ប្រកួត​ប្រជែង ឆ្ពោះទៅរកជ័យជម្នះ និងការដណ្ដើមពានជូនជាតិមាតុភូមិផងដែរ។គួរដឹងថា​ ក្លិបព្រះខ័នរាជស្វាយរៀង បានចាកចេញពីមាតុភូមិ កាលយប់មិញ ក្រោយចប់​ការ​ប្រកួត​លីគ​កំពូលកម្ពុជា ទល់ក្រុមបឹងកេត ហើយគ្រោងធ្វើដំណើរដល់រដ្ឋកូវ៉ែត នៅព្រឹកថ្ងៃទី៨ ខែ​ឧសភានេះ ដើម្បីត្រៀមការប្រកួតវគ្គផ្ដាច់ព្រ័ត្រពានរង្វាន់  AFC Challenge League​ ទល់​នឹង​ក្រុម ​Al Kuwait SC របស់ម្ចាស់ផ្ទះកូវ៉ែត នាវេលាម៉ោង ១១ និង ១៥នាទីយប់ ម៉ោងនៅកម្ពុជា នា​ថ្ងៃ​ទី១៣ ខែឧសភា ឆ្នាំ២០២៦ ខាងមុខ នៅពហុកីឡដ្ឋានជាតិកូវ៉ែត Jaber Al Ahmad International ដែលនឹងមានការផ្សាយផ្ទាល់លើកញ្ចក់ទូរទស្សន៍ BTV ៕ អត្ថបទ លី ឈុនឡា 

EFL ចាប់ផ្តើមស៊ើបអង្កេត Southampton ក្រោមការចោទប្រកានថាបានលួចថតសកម្មភាពហ្វឹកហាត់របស់ Middlesbrough

2026/05/08 06:09:52 pm        215
Facebook Telegram Linkin
ស្ថាប័នបាល់ទាត់អង់គ្លេស English Football League (EFL) បានបើកការស៊ើបអង្កេតជាផ្លូវការមួយ ទាក់ទងនឹងការចោទប្រកាន់ថា ក្លិបបាល់ទាត់ Southampton បានលួចថតសកម្មភាពហ្វឹកហាត់របស់ Middlesbrough មុនការប្រកួតវគ្គ Play-off នៃក្របខណ្ឌ Championship។ការប្រកួតជើងទី១ នៃវគ្គពាក់កណ្តាលផ្តាច់ព្រ័ត្រ Play-Off នឹងធ្វើឡើងនៅកីឡដ្ឋាន Riverside Stadium នៅថ្ងៃសៅរ៍ចុងសប្តាហ៍នេះ ខណៈជើងទី២ នឹងត្រឡប់ទៅប្រកួតនៅកីឡដ្ឋាន St Mary's Stadium នៅថ្ងៃអង្គារសប្តាហ៍ក្រោយ។តាមការចុះផ្សាយរបស់ BBC Sport បុគ្គលិកផ្នែកវិភាគការប្រកួតរបស់ Southampton ម្នាក់ត្រូវបានគេចាប់បានថាកំពុងថតវីដេអូ និងថតរូបយុទ្ធសាស្ត្រហ្វឹកហាត់របស់ Middlesbrough កាលពីព្រឹកថ្ងៃព្រហស្បតិ៍។ បន្ទាប់ពីត្រូវបានរកឃើញ បុគ្គលនោះត្រូវបានបញ្ជាឱ្យលុបឯកសារទាំងអស់ និងចាកចេញពីតំបន់ភ្លាមៗ ដែលធ្វើឱ្យ Middlesbrough ខឹងសម្បារយ៉ាងខ្លាំង និងបានដាក់ពាក្យបណ្តឹងទៅកាន់ EFL ភ្លាមៗ។នៅក្នុងសេចក្តីថ្លែងការណ៍របស់ EFL បានបញ្ជាក់ថា EFL បានផ្ញើលិខិតទៅកាន់ Southampton ដើម្បីស្នើសុំការពន្យល់ បន្ទាប់ពីមានបណ្តឹងពី Middlesbrough ទាក់ទងនឹងការថតវីដេអូដោយគ្មានការអនុញ្ញាត មុនការប្រកួត Play-off នៅថ្ងៃសៅរ៍នេះ។ជុំវិញការចោទប្រកាន់នេះ Southampton មិនទាន់ប្រតិកម្មជាផ្លូវការនៅឡើយទេ។បទបញ្ជារបស់ EFL កំណត់យ៉ាងច្បាស់ថា គ្មានក្លិបណាមួយអាចសង្កេត ឬព្យាយាមសង្កេតសកម្មភាពហ្វឹកហាត់របស់ក្លិបផ្សេង ក្នុងរយៈពេល ៧២ ម៉ោង មុនការប្រកួតបានឡើយ។ច្បាប់នេះត្រូវបានដាក់អនុវត្តកាលពី ៧ ឆ្នាំមុន បន្ទាប់ពីក្លិប Leeds United ត្រូវបានពិន័យប្រាក់ ២០ ម៉ឺនផោន ដោយ EFL ពាក់ព័ន្ធនឹងការលួចមើលការហ្វឹកហាត់របស់គូប្រកួត។នៅឆ្នាំ ២០១៩ បុគ្គលិករបស់ Leeds ម្នាក់ត្រូវបានរកឃើញថា មានអាកប្បកិរិយាគួរឱ្យសង្ស័យនៅខាងក្រៅទីលានហ្វឹកហាត់របស់ Derby County មុនការប្រកួតរវាងក្រុមទាំងពីរ។ ខណៈអ្នកចាត់ការក្រុម Marcelo Bielsa ក៏ធ្លាប់ទទួលស្គាល់ថា លោកបានបញ្ជូនបុគ្គលិកឱ្យទៅសង្កេតការហ្វឹកហាត់របស់គ្រប់ក្រុមដែល Leeds ជួបប្រកួតក្នុងរដូវកាលនោះផងដែរ៕ អត្ថបទ៖នាង សុភាវុធ

គ្រូបាល់ទាត់កុមារខេត្តស្វាយរៀង ដាក់គោលដៅលេង ១២០% ក្នុងវគ្គផ្ដាច់ព្រ័ត្រ​កីឡា​បឋម​សិក្សា​ចុង​សប្ដាហ៍នេះ

2026/05/08 05:54:17 pm        439
Facebook Telegram Linkin
លោក អ៊ុង តារា គ្រូបង្វឹកក្រុមបាល់ទាត់កុមារា នៃខេត្តស្វាយរៀង បានដាក់គោលដៅលេង ១២០% ​សម្រាប់ជំនួបវគ្គផ្ដាច់ព្រ័ត្រ ទល់ក្រុមបាល់ទាត់កុមារារាជធានីភ្នំពេញ នៃ​កីឡា​សិស្ស​បឋម​សិក្សា​ថ្នាក់​ជាតិ ឆ្នាំ២០២៦ នាថ្ងៃទី៩ ខែឧសភាស្អែកនេះ នៅ​ពហុកីឡ​ដ្ឋាន​ជាតិ​(អូឡាំពិក)។ការប្ដេជ្ញាចិត្តនេះ បន្ទាប់ពីលោកបានដឹកនាំក្រុម យកឈ្នះក្រុមបាល់ទាត់កុមារាខេត្តក្រចេះ ដោយ​លទ្ធផល ​៣-១ ក្នុងវគ្គពាក់កណ្ដាលផ្ដាច់ព្រ័ត្រ ស្របពេលក្រុមកុមារារាជធានីភ្នំពេញ បានយ​ក​ឈ្នះ​ខេត្ត​បន្ទាយ​មានជ័យ ១-០ កាលពីថ្ងៃទី៧ ខែឧសភា ឆ្នាំ២០២៦ កន្លងទៅ។លោក អ៊ុង តារា បានសម្ដែងក្ដីរីករាយ ដែលកូនក្រុមធ្វើបានល្អក្នុងវគ្គប្រជុំដោយក្រុមខ្លាំងៗ ហើយ​លោក​នឹង​ព្យាយាមបំពេញនូវចំណុចខ្វះខាត ជាមួយការ​ប្ដេជ្ញា​ជំរុញ​ក្រុម​លេង​ឲ្យអ​ស់​ពី​លទ្ធភាព​ដែល​អាច​ធ្វើបាន នៅវគ្គផ្ដាច់ព្រ័ត្រ ដើម្បីសម្រេចគោលដៅដណ្ដើមមេដាយមាសជូនខេត្ត។គួរដឹងថា វិញ្ញាសាបាល់ទាត់ នៃព្រឹត្តិការណ៍កីឡាសិស្សបឋមសិក្សាថ្នាក់ជាតិ ឆ្នាំ២០២៦ បាន​រក​ឃើញ​បេក្ខ​ភាពវគ្គផ្ដាច់ព្រ័ត្រ និងត្រូវប្រកួតកាត់សេចក្ដី នៅព្រឹកថ្ងៃទី៩ ខែឧសភាដូចគ្នា ក្នុង​នោះ​ផ្នែក​បុរស គឺក្រុមបាល់ទាត់កុមារាខេត្តស្វាយរៀង ត្រូវជួបរាជធានីភ្នំពេញ គ្រាដែលផ្នែកនារី ក្រុម​កុមារីខេត្តស្វាយរៀង ត្រូវជួបកុមារីខេត្តកំពង់ស្ពឺ៕ អត្ថបទ លី ឈុនឡា 

អ្នកគាំទ្រជាច្រើននាក់ជូនដំណើរព្រះខ័នរាជស្វាយរៀង​ដល់អាកាសយានដ្ឋាន​មុនចាក​ចេញ​ទៅ​កូវ៉ែត

2026/05/08 05:40:39 pm        380
Facebook Telegram Linkin
(ភ្នំពេញ)៖ បន្ទាប់ពីបានចូលរួមទស្សនាការប្រកួតលីគកំពូលសប្ដាហ៍ទី៣១ អ្នក​គាំទ្រ​ក្លឹប​បាល់​ទាត់​ព្រះខ័ន​រាជ​ស្វាយរៀង មិនបានត្រឡប់ទៅកាន់ខេត្តរបស់ខ្លួនភ្លាមៗទេ ដោយ​ពួក​គាត់​បាន​ចំណាយ​ពេល​ទៅជូ​នដំ​ណើរគ្រូ​បង្វឹក កីឡាករ និងក្រុមការងារដល់​អាកាស​យាន​ដ្ឋាន​អន្តរ​ជាតិ​តេជោ ​រាត្រី​ថ្ងៃទី៧ ចូលថ្ងៃទី៨ ខែឧសភា ឆ្នាំ២០២៦។ក្លឹបបាល់ទាត់ព្រះខ័នរាជស្វាយរៀង បានចាកចេញពីព្រះរាជាណាចក្រកម្ពុជាទៅកាន់រដ្ឋកូវ៉ែត នៅ​ម៉ោង​០១​និង១៥នារីរំលងអធ្រាត្រចូលថ្ងៃទី៨ ខែឧសភានេះ ដើម្បីត្រៀមខ្លួនប្រកួតវគ្គផ្ដាច់ព្រ័ត្រ AFC Challenge League ទល់នឹងក្លឹប Al Kuwait SC។អ្នកគាំទ្រ​មក​ពីខេត្តស្វាយរៀង លោក ហ៊ឹម សូរិយៈអង្គារ៍ បានប្រាប់ប៊ីធីវីឱ្យដឹង​ថា ​លោក​មក​ទី​នេះ​ដើម្បី​ជូន​ដំណើរ​ក្លឹប​ចេញទៅប្រកួតពានអន្តរជាតិ ហើយបង្ហាញជំនឿថាក្លឹបនឹង​ទទួល​បាន​ជោគ​ជ័យ​ក្នុង​ការប្រកួតនេះ។ចំណែកលោកស្រី សំ ស្រីនាង ដែលតែងតែបង្ហាញវត្តស្ទើរគ្រប់ការប្រកួតរបស់ព្រះខ័នរាជ ក៏​បាន​បង្ហាញ​ជំនឿ​ជាក់១០០%ថាក្លឹបនឹងដណ្ដើមបានជ័យជំនះជូនអ្នកគាំទ្រ។ ដោយមិន​បាន​ទៅ​ទស្សនា​ផ្ទាល់ លោកស្រី​ក៏​បាន​ផ្ដាំ​ផ្ញើ​ដល់​បង​ប្អូន​សិស្ស​និស្សិត​នៅ​កូវ៉ែត​ឱ្យ​ចូល​រួម​ទស្សនា ដើម្បី​លើក​ទឹក​ចិត្ត​ក្លឹបនៅទីនោះ។គ្រូបង្វឹកព្រះខ័នរាជស្វាយរៀង Matthew McConkey បាន​ប្រាប់​ឱ្យ​ដឹង​ដែរ​ថា​ លោក​ក៏​ដូច​ជា​កីឡាករ​ពិត​ជាសប្បាយចិត្តដែលឃើញវត្តមានអ្នកគាំទ្រមកដល់ជូនដំណើរនាពេលនេះ ហើយ​ក្លឹប​ពិត​ជា​មានសំណាងដែលមានអ្នកគាំទ្រដ៏ស្មោះស្ម័គ្របែបនេះ។ លោក​ក៏​បាន​សន្យា​ថា​នឹង​ផ្ដល់​ការ​ប្រកួត​មួយ​ដ៏​ល្អសម្រាប់ក្រុម។តាមការគ្រោងទុកក្លឹបព្រះខ័នរាជស្វាយរៀង នឹងធ្វើដំណើរដល់រដ្ឋកូវ៉ែត នៅម៉ោង ៨​និង​៣០​នាទី​ព្រឹក ​ថ្ងៃទី៨ ខែឧសភា ឆ្នាំ២០២៦។ ព្រះខ័នរាជស្វាយរៀង ជើងឯកកម្ពុជា នឹងត្រូវ​ប្រកួត​ជាមួយ​ម្ចាស់​ផ្ទះ Al Kuwait SC ថ្ងៃទី១៣ ខែឧសភា ឆ្នាំ២០២៦ វេលាម៉ោង ១១និង១៥នាទីយប់ (ម៉ោង​នៅ​កម្ពុជា)។ នេះជាលើក​ទី២​ដែ​ល​ក្លឹប​បាល់​ទាត់​ព្រះខ័ន​រាជ​ស្វាយ​រៀង​ឡើង​វគ្គ​ផ្ដាច់​ព្រ័ត្រ​ពាន​រង្វាន់​ក្លឹប​កម្រិត​ទី៣ទ្វីបអាស៊ី (AFC Challenge League)នេះ៕ អត្ថបទ៖គង់ ហួន  

PSG ទម្លាក់ Bayern Munich ឡើងវគ្គផ្តាច់ព្រ័ត្រ Champions League ពីររដូវកាលជាប់គ្នា

2026/05/07 09:29:59 pm        435
Facebook Telegram Linkin
ក្រុមការពារតំណែងជើងឯក Paris Saint Germain ជាថ្មីម្តងទៀតកក់កៅអីវគ្គផ្តាច់ព្រ័ត្រ UEFA Champions League ពីររដូវកាលជាប់គ្នាក្រោយយកឈ្នះ Bayern Munich សរុបទាំងពីរជើង ៦-៥។ ជំនួបវគ្គពាក់កណ្តាលផ្តាច់ព្រ័ត្រជើងទីពីរនៅទឹកដីអាល្លឺម៉ង់ មិនមានគ្រាប់បាល់ច្រើនដូចជើងទីមួយនៅទឹកដីបារាំងឡើយ តែក្រុមទាំងពីរនៅតែរក្សាទម្រង់លេងប្រយុទ្ធដូចគ្នាដដែលតែរកគ្រាប់បាល់មិនបានច្រើនដូចមុន។ ការប្រកួតបានត្រឹមតែ ៣ នាទីប៉ុណ្ណោះក្រុមភ្ញៀវ PSG រកបានគ្រាប់នាំមុខមុនដោយ Ousmane Dembele ធ្វើឱ្យក្រុមរបស់លោក Luis Enrique បង្កើនគម្លាតនាំមុខដល់ ២ គ្រាប់។ ក្រុមទាំងពីរមានឱកាសប្រយុទ្ធរកគ្រាប់បាល់បន្ថែមទៀតប្រហាក់ប្រហែលគ្នា តែហាក់ខ្ជះខ្ជាយនៅពេលបញ្ចប់ទី។ ក្រុមរបស់លោក Vincent Kompany ដែលជឿជាក់ថាខ្លួនអាចយកឈ្នះ និងឡើងវគ្គផ្តាច់ព្រ័ត្រនោះ ត្រូវរង់ចាំដល់នាទីចុងក្រោយបំផុតនៃការប្រកួតទើបរកគ្រាប់តាមស្មើ ១-១ បានដោយ Harry Kane នៅនាទីទី ៩០+៤ ទៅហើយ។ ចប់ការប្រកួត Bayern Munich ១-១ Paris Saint Germain និងសរុបទាំងពីរជើងក្រុមបារាំងឈ្នះ ៦-៥។ Paris Saint Germain នៅពេលនេះត្រូវបន្តដំណើរឡើងវគ្គផ្តាច់ព្រ័ត្រជួបកាំភ្លើងធំ Arsenal ដែលយកឈ្នះ Atletico Madrid ឡើងវគ្គផ្តាច់ព្រ័ត្រលើកដំបូងក្នុងរយៈពេល ២០ ឆ្នាំ។ ជំនួបវគ្គផ្តាច់ព្រ័ត្រនឹងធ្វើឡើងនៅទីក្រុង Budapest ប្រទេសហុងគ្រីថ្ងៃសៅរ៍ទី ៣០ ខែឧសភានេះ វេលាម៉ោង ១១ យប់(ម៉ោងនៅកម្ពុជា)៕អត្ថបទ៖នាង សុភាវុធ

ឃីកបុកស៊ីង រៀបចំវគ្គបំប៉នអាជ្ញាកណ្ដាល-ចៅក្រមកម្រិតអន្ដរជាតិ មុនបើកសង្វៀនថ្មី នាពាក់កណ្ដាលខែនេះ

2026/05/07 09:17:06 pm        388
Facebook Telegram Linkin
សហព័ន្ធកីឡាឃីកបុកស៊ីងកម្ពុជា បានរៀបចំវគ្គបណ្ដុះបណ្ដាលអាជ្ញាកណ្ដាល-ចៅក្រមកម្រិតអន្ដរជាតិជាថ្មី ក្រោមគម្រោងថវិការបស់ក្រសួងអប់រំ យុវជន និងកីឡា និងមានការគាំទ្រពីវិស័យឯកជន ដើម្បីពង្រឹងសមត្ថភាពមន្ដ្រីបច្ចេកទេស ដោយមានការចូលរួមពីគ្រូបង្វឹក និងកីឡាករ-កីឡាការិនីផង មុនបើកទំព័រថ្មី សម្រាប់សង្វៀនកីឡាឃីកបុកស៊ីង ដែលគ្រោងចាប់ផ្ដើមដំណើរការប្រកួតសប្ដាហ៍ដំបូង នាពាក់កណ្ដាលខែឧសភា ឆ្នាំ២០២៦។ឯកឧត្តម ហេង សុខឃន ប្រធានសហព័ន្ធ បានឲ្យដឹងថា វគ្គនេះ មានរយៈពេល ៣ថ្ងៃ ចាប់ពីថ្ងៃទី៦ ដល់ថ្ងៃទី៨ ខែឧសភា ដោយមានសិក្ខាកាមចំនួន ៦០រូប ចូលរួម និងមានការអញ្ជើញធ្វើបទបង្ហាញ ក៏ដូចជាចែករំលែកនូវបទពិសោធន៍ផ្ទាល់ពីលោក Nasser Nassiri ប្រធានសហព័ន្ធកីឡាប្រដាល់ឃីកបុកស៊ីងអាស៊ី។ ពិធីបើកវគ្គនេះ ក៏មានការចូលរួមពីមន្ដ្រីតំណាងក្រសួងអប់រំ យុវជន និងកីឡាផងដែរ។ឯកឧត្តមបន្ដថា នេះគឺជាការបើកទំព័រថ្មីមួយ សម្រាប់កីឡាឃីកបុកស៊ីងកម្ពុជា ក្នុងការពង្រឹងសមត្ថភាព បច្ចេកទេស ដល់គ្រប់ភាគីពាក់ព័ន្ធ ដើម្បីសម្រួចសមត្ថភាពត្រៀមការប្រកួតឃីកបុកស៊ីងប្រចាំសប្ដាហ៍ ក្រោមការឧបត្ថម្ភរបស់ក្រុមហ៊ុន ខ្មែរ ប៊ែរវើរីជីស សំដៅសម្រួចបានគុណផលកីឡាករ-កីឡាការិនី សម្រាប់ប្រកួតប្រជែងកម្រិតអន្ដរជាតិ និងត្រៀមឆ្ពោះទៅធ្វើម្ចាស់ផ្ទះជើងឯកអាស៊ី ឆ្នាំ២០២៦ នាខែធ្នូ ហើយក៏ជាការរួមចំណែកលើកស្ទួយគុនខ្មែរ តាមរយៈធនធានកីឡាករឃីកបុកស៊ីង នេះផងដែរ។ជាមួយគ្នា លោក Nasser Nassiri បានបង្ហាញនូវសេចក្ដីសោមនស្សរីករាយ ដែលបានចូលរួមចែករំលែកចំណេះដឹង និងបទពិសោធន៍ជាថ្មី ដល់អាជ្ញាកណ្ដាលចៅក្រម គ្រូបង្វឹក និងកីឡាករ-កីឡាការិនីនៅកម្ពុជា ពិសេសលោកបានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់សហព័ន្ធ ក្នុងការពង្រឹងសមត្ថភាពធនធានមនុស្ស តាមរយៈការរៀបចំវគ្គបណ្ដុះបណ្ដាល និងការប្រកួតផ្សេងៗ ។ ទាំងអស់នេះ លោកសង្ឃឹមថា វិស័យកីឡាឃីកបុកស៊ីងកម្ពុជា នឹងកាន់តែរីកចម្រើន ហើយទទួលបានជោគជ័យថ្មីៗបន្ថែមទៀត នាថ្ងៃអនាគត៕ អត្ថបទ លី ឈុនឡា

បណ្ដាញសង្គម

ព័ត៌មានថ្មីៗ

ក្រសួងឧស្សាហកម្ម ពិគ្រោះយោបល់លើសេចក្តីព្រាងវិសោធនកម្មច្បាប់ ស្តីពីការគ្រប់គ្រងពូជដំណាំ និងសិទ្ធិអ្នកបង្កាត់ពូជដំណាំ
10/27/2026 08:10 PM
Facebook Telegram Linkin
កម្ពុជា បារាំង ចង់បង្កើតនូវកិច្ចសហប្រតិបត្តិការ លើវិស័យសុខាភិបាល និងអាកាសចរស៊ីវិល បន្ថែមទៀត
10/27/2026 08:10 PM
Facebook Telegram Linkin
សម្ដេចតេជោ៖ ទំនាក់ទំនងស្នូលកម្ពុជា-ជប៉ុន មិនអាចខ្វះបានឡើយ នូវផ្នែកសេដ្ឋកិច្ច ពាណិជ្ជកម្ម និងវិនិយោគ
10/27/2026 07:10 PM
Facebook Telegram Linkin
មេដឹកនាំកំពូលរបស់អ៊ីរ៉ង់ អំពាវនាវឱ្យបំពេញតាម​លក្ខខណ្ឌរបស់ទីក្រុងតេអេរ៉ង់ ដើម្បីបញ្ចប់សង្គ្រាម
10/27/2026 07:10 PM
Facebook Telegram Linkin
អគ្គិភ័យឆាបឆេះឡើងនៅតំបន់ក្រីក្រ ស្ថិតក្នុងស្រុក Gangnam របស់ទីក្រុងសេអ៊ូល ប្រទេសកូរ៉េខាងត្បូង
10/27/2026 07:10 PM
Facebook Telegram Linkin
មនុស្សរាប់ម៉ឺននាក់ ជម្លៀសចេញពីតំបន់ឆ្នេរភាគខាងកើតឥណ្ឌា មុនការមកដល់របស់ព្យុះស៊ីក្លូន Arnab
10/27/2026 06:10 PM
Facebook Telegram Linkin
ការបោះឆ្នោត នៅអ៊ីស្រាអែល៖ ទីផ្សារភ្នាល់ បង្ហាញ​ពីបរាជ័យដ៏​គួរឱ្យភ្ញាក់ផ្អើលរបស់លោក Netanyahu
10/27/2026 06:10 PM
Facebook Telegram Linkin
ចិនអះអាងថា គ្មានគ្រោះមហន្តរាយបន្តបន្ទាប់នោះទេពីការរញ្ជួយដីនៅតំបន់ទីបេ
10/27/2026 06:10 PM
Facebook Telegram Linkin
ការ​ធូរស្រាល​នៃទំនាក់​ទំនង​ឥណ្ឌា-ចិន ត្រូវ​បាន​សាកល្បងដោយ​របាយ​ការណ៍ អំពីការប្រឈមមុខដាក់គ្នា នៅព្រំដែន
10/27/2026 06:10 PM
Facebook Telegram Linkin
មនុស្សជាច្រើននាក់ រងរបួស ក្នុងហេតុការណ៍រថយន្តបើកបុកហ្វូងមនុស្សនៅភាគខាងជើងអាល្លឺម៉ង់
10/27/2026 05:10 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.