នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
វីរបុរស World Cup របស់កាប់វែរ Vozinha ព្រមព្រៀងផ្ទេរទៅកាន់ក្លិប Colo-Colo របស់ស៊ីលី
សារដ៏ចម្រូងចម្រាស «The Malvinas are Argentine» ត្រូវបានបោះពុម្ពផ្សាយដោយឥតគិតថ្លៃនៅអាហ្សង់ទីន
ក្រុម ស.ស.យ.ក អលស្ដារ គ្រោងរៀបចំការប្រកួតសប្បុរសធម៌ នាចុងខែសីហា ក្រោយជំនួបមិត្តភាពផ្លូវការលើកដំបូង
កីឡាករម៉ូតូស្ព័រកម្ពុជា ឈឹម ពិសិដ្ឋ ត្រៀមផ្ដល់ការភ្ញាក់ផ្អើលជាថ្មី ក្នុងព្រឹត្តិការណ៍អន្ដរជាតិ នៅម៉ាឡេស៊ី

ព័ត៌មានកីឡា

Jessica Pegula ឈ្នះ Elina Svitolina គ្រងជើងឯកវាយកូនបាល់ Dubai Tennis Championships

2026/02/23 08:42:10 pm        115
Facebook Telegram Linkin
កីឡាការិនីវាយកូនបាល់អាមេរិក Jessica Pegula មានការប្រកួតដ៏អស្ចារ្យនៅវគ្គផ្តាច់ព្រ័ត្រក្រោយយកឈ្នះកីឡាការិនីអ៊ុយក្រែន Elina Svitolina ៦-២ និង ៦-៤ គ្រងជើងឯកកម្មវិធី Dubai Tennis Championship នៅអារ៉ាប់រួម។Jessica Pegula ដែលនឹងឈានចូលវ័យ ៣២ ឆ្នាំនៅថ្ងៃអង្គារស្អែកនេះ បានក្លាយជាកីឡាការិនីវ័យចំណាស់បំផុតទីពីរដែលឈ្នះជើងឯកនៅទីនេះ បន្ទាប់ពីមិត្តរួមជាតិអាមេរិក Venus Williams ឈ្នះកាលពីឆ្នាំ ២០១៤ ក្នុងវ័យ ៣៣ ឆ្នាំ។ កីឡាការិនីលេខ ៥ ពិភពលោករូបនេះបាននាំមុខសិតដំបូង ៣-០ ធ្វើឱ្យកីឡាការិនីអ៊ុយក្រែនធ្វើអីមិនបានមុនពេលយកឈ្នះ ៦-២។ នៅសិតទីពីរ Svitolina ព្យាយាមវាយបកដែរ តែអតីតជើងឯករង US Open, Jessica Pegula នៅតែរឹងមាំ និងបន្តយកឈ្នះ ៦-៤។ ជើងឯក Dubai Tennis Championships នេះជាពានទី ១០ ក្នុងអាជីពសម្រាប់ Jessica Pegula៕ អត្ថបទ៖នាង សុភាវុធ 

អង្គរថាយហ្គឺរ យកឈ្នះកងយោធពលខេមរភូមិន្ទ រក្សាតំណែងលេខ៣ លើក្រុមណាហ្គាវើលដ៏

2026/02/23 08:29:48 pm        176
Facebook Telegram Linkin
ក្រុមបាល់ទាត់អង្គរថាយហ្គឺរ បានយកឈ្នះក្រុមភ្ញៀវកងយោធពលខេមរភូមិន្ទ យ៉ាងចាស់ដៃ ដោយលទ្ធផល ៧-១ ក្នុងជំនួបបញ្ចប់ជុំទី២ នៃលីគកំពូលកម្ពុជា ឆ្នាំ២០២៥/២៦ ដើម្បីរក្សាតំណែងលេខ៣ ខណៈណាហ្គាវើលដ៏ បន្ដឈរលេខ៤ ក្រោយយកឈ្នះក្រុមឡាយហ្វខេត្តព្រះសីហនុ ២-០។សម្រាប់ជំនួបជើងទី២ នៅកីឡដ្ឋានអាគីហ៊ីរ៉ូកាតូ កាលពីថ្ងៃអាទិត្យកន្លងទៅ អង្គរថាយហ្គឺរ បាននាំមុខក្រុមភ្ញៀវ ២គ្រាប់មុន ដែលធ្វើសម្រេចដោយកីឡាករ Yasuoka Takuto នៅនាទី២១ និងកីឡាករ Masutani Takara នៅនាទី៣៣ មុនកីឡាករ Tomoki Taniguchi រកបាន ១គ្រាប់ឲ្យកងយោធពលខេមរភូមិន្ទុ នៅនាទី៣៩។ចូលវគ្គទី២ ក្រុមម្ចាស់ផ្ទះ បានព្យាយាមដាក់សម្ពាធខ្លាំង រហូតរកបាន ៥គ្រាប់បន្ថែម ដោយកីឡាករ Kurita Mark Adjei ៣គ្រាប់ នៅនាទី៥២, ៥៤ និងនាទី៧៣, កីឡាករ Muland និង Facundo ម្នាក់ ១គ្រាប់ នៅនាទី៥៩ និងនាទី៧១ ដើម្បីធានា ៣ពិន្ទុក្នុងដី និងរក្សាចំណាត់ថ្នាក់លេខ៣ បណ្ដោះអាសន្ន ក្រោយឆ្លងកាត់ ២០ប្រកួតឈ្នះ១១ ស្មើ ៣ និងចាញ់ ៦ គ្រាដែលកងយោធពលខេមរភូមិន្ទ បានបន្ដឈរលេខ៨ ដោយរក្សា ១៧ពិន្ទុក្នុងដៃ បន្ទាប់ពីចប់ជុំទី២ ក្នុងលទ្ធផល ២០ប្រកួតដូចគ្នា ឈ្នះ ៤ ស្មើ ៥ និងចាញ់ ១១ប្រកួត។ចំណែកក្រុមណាហ្គាវើលដ៏ បានរក្សាចំណាត់ថ្នាក់លេខ៤ ដោយចាញ់ប្រៀបអង្គរថាយហ្គឺរ ១ពិន្ទុ បន្ទាប់ពីរកបាន ៣ពិន្ទុពីការប្រកួតបញ្ចប់ជុំទី២ ដោយយកឈ្នះក្រុមម្ចាស់ផ្ទះឡាយហ្វខេត្តព្រះសីហនុ ២-០ កាលពីថ្ងៃសៅរ៍កន្លងទៅ ។ ២គ្រាប់របស់ក្រុមលោក ឃឹម បូរី ធ្វើសម្រេចទាំង ២គ្រាប់ដោយកីឡាករ Oliveira Lucas នៅនាទី៤៩ និងនាទី៩០+៦។ សរុបលទ្ធផលការប្រកួត ២ជុំ របស់ក្រុមមានមូលដ្ឋាននៅខេត្តកំពង់ស្ពឺនេះ ២០ប្រកួតឈ្នះ ១០ ស្មើ ៥ និងចាញ់ ៥ រកបាន ៣៥ពិន្ទុ។ រីឯឡាយហ្វខេត្តព្រះសីហនុ បន្ដឈរលេខ១០ និងរក្សា ១០ពិន្ទុក្នុងដៃ ក្រោយឆ្លងកាត់ ២០ប្រកួតឈ្នះ ៣ ស្មើ ១ និងចាញ់ ១៦ប្រកួត៕ អត្ថបទ លី ឈុនឡា 

ឯកឧត្តម សៅ សុខា ប្រកាសបង្កើតសាលាមត្ដេយ្យបាល់ទាត់ ក្រោយឃើញ​ចន្លោះប្រហោង​នៅមជ្ឈមណ្ឌលជាតិបាទី

2026/02/23 07:35:24 pm        206
Facebook Telegram Linkin
ឯកឧត្តមនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា បានប្រកាស​នឹង​រៀបចំ​បង្កើតឲ្យមានសាលាមត្ដេយ្យបាល់ទាត់ ដើម្បីធានានិរន្ដរភាពនៃការអភិវឌ្ឍ និង​កសាង​ធនធាន​កីឡាករ ក៏ដូចជាការបំពេញនូវចំណុចចន្លោះប្រយោង ដែលសហព័ន្ធបានអនុវត្ត​នៅ​មជ្ឈ​មណ្ឌល និងសាលាបាល់ទាត់ជាតិបាទី។ការគូសបញ្ជាក់នេះ បន្ទាប់ពីឯកឧត្តម បានទទួលការគាំទ្រពីសមាជិក​គណៈកម្មាធិការ​ប្រតិបត្តិ​សហព័ន្ធ បន្ដតំណែងជាប្រធានសហព័ន្ធកីឡាបាល់ទាត់កម្ពុជា អាណត្តិឆ្នាំ២០២៦-២០៣០ នៅក្នុ​ងមហាសន្និបាត លើកទី២០ នៅសណ្ឋាគារ Raffles Hotel Le Royal កាល​ពីចុងសប្ដាហ៍​កន្លងទៅ។ក្រោយជួបពិភាក្សា និងការផ្ដល់យោបល់ពីអ្នកជំនាញអន្ដរជាតិ ឯកឧត្តមយល់ថា ក្នុងបាល់ទាត់ កត្ដារត់លឿន កម្លាំងខ្លាំង និងភាពឆ្លាតវៃ គឺជារឿងមួយ ដែលក្នុងបច្ចេកទេស គឺគ្រប់គ្រងបាល់ ជារឿងសំខាន់ជាងគេ ហើយដើម្បីអភិវឌ្ឍន៍បច្ចេកទេសគ្រប់គ្រងបាល់បានល្អ លុះត្រាមានការបណ្ដុះផ្នត់គំនិតការលេងបាល់តាំងពីកុមារតូចៗ។ កត្ដានេះ ទើបជំរុញឲ្យឯកឧត្តមរៀបចំផែនការបង្កើតសាលាមត្ដេយ្យបាល់ទាត់ ក្នុងជំហានដំបូងចំនួន ២ នៅខេត្តស្វាយរៀង នាពេលឆាប់ៗខាងមុខ។ទន្ទឹមជាមួយគម្រោងបង្កើតសាលាមត្ដេយ្យបាល់ទាត់នេះដែរ មិនមែនជារឿងចៃដន្យនោះទេ តែដោយសារការមើលឃើញពីចន្លោះប្រហោង នៃសាលាបាល់ទាត់ជាតិបាទី ក្នុងរយៈពេលកន្លងមក ដែលការទទួលបានលទ្ធផល មិនសមប្រកបនឹងការចង់បាន ក៏ដូចជាការចំណាយដ៏ច្រើន ។ ដូច្នេះឯកឧត្តមសង្ឃឹមថា បន្ទាប់ពីមានសាលាមត្ដេយ្យបាល់ទាត់ នឹងអាចចម្រាញ់បានធនធានកីឡាករថ្នាលបន្ដវេន សម្រាប់ប្រមូលផ្ដុំ និងតម្រង់ទិសពួកគេក្លាយជាកីឡាករអាជីពដ៏មានសក្ដានុពលនាថ្ងៃអនាគត។គួរដឹងថា ក្រៅពីគម្រោងបង្កើតសាលាមត្ដេយ្យបាល់ទាត់ ក្នុងអាណត្តិថ្មី ដឹកនាំដោយឯកឧត្តមនាយឧត្តមសេនីយ៍ សៅ សុខា សហព័ន្ធក៏នឹងធ្វើការពង្រឹងការប្រកួតថ្នាក់ខេត្ត ដោយផ្ដោតជាពិសេសលើយុវជនថ្នាល ជាមួយការរៀបចំនូវក្រុមការងារជំនាញ ដើម្បីចុះត្រួតពិនិត្យ និងវាយតម្លៃឲ្យបានត្រឹមត្រូវ សំដៅឈានទៅជ្រើសរើសបាននូវធនធានកីឡាករយុវជនប្រកបដោយសមត្ថភាព ទេពកោសល្យ ចូលរួមប្រមូលផ្ដុំហ្វឹកហាត់ និងបណ្ដុះបណ្ដាលពួកគេឲ្យក្លាយជាកីឡាករអាជីព សម្រាប់​ការ​ប្រកួត​ប្រជែង​ទាំង​ថ្នាក់ជាតិ និងអន្ដរជាតិផងដែរ៕ អត្ថបទ លី ឈុនឡា 

វិសាខាដណ្ដើមបានជើងឯកលីគអភិវឌ្ឍន៍កម្ពុជា ក្រោយឈ្នះភ្នំពេញក្រោន

2026/02/23 07:18:39 pm        132
Facebook Telegram Linkin
ក្រោយដំណើរការជាង៨ខែ លីគអភិវឌ្ឍន៍កម្ពុជារដូវកាល២០២៥-២០២៦ដែលរៀបចំដោយក្រុមហ៊ុនលីគកម្ពុជា បានបញ្ចប់ការប្រកួតជាផ្លូវការហើយ ដោយក្លឹបបាល់ទាត់វិសាខាក្លាយជាម្ចាស់ជើងឯក ពេលឈ្នះភ្នំពេញក្រោន ៣ទល់នឹង០ ព្រឹកថ្ងៃទី២២ ខែកុម្ភៈ ឆ្នាំ២០២៦នៅកីឡដ្ឋានភ្នំពេញក្រោន។សម្រាប់ការប្រកួតនេះលេងបាន៦នាទី កីឡាករ ភឿក ថាតថៃ ទាត់បញ្ចូលទីឱ្យក្រុមនាំមុខ មុនពេលដែលកីឡាករ មាន ចាន់រិទ្ធ តែតបញ្ចូលទីគ្រាប់ទី២ ២៤នាទីបន្ទាប់ ពីការលើកបាល់របស់កីឡាករ កែន ចាន់សុភ្ក្រ។ លេងវគ្គទី២ មិនដល់មួយនាទីស្រួលបួលផង កីឡាករ ភឿក ថាតថៃ រកបានមួយគ្រាប់ទៀត ឱ្យវិសាខានាំមុខ ៣ទល់នឹង០។ នាទីនៅសេសសល់គ្មានគ្រាប់បាល់កើតឡើងទៀតទេ។ ចប់ការប្រកួត ភ្នំពេញក្រោន ចាញ់ វិសាខា ០ទល់នឹង៣។ចំណែកក្លឹបបាល់ទាត់អាយអេសអាយដង្កោ សែនជ័យ បានត្រឹមបញ្ចប់នៅចំណាត់ថ្នាក់លេខ២ ទោះបីឈ្នះអឹមអូអាយកំពង់ដេវ៉ា និងមានពិន្ទុស្មើគ្នាក៏ដោយ ព្រោះសំណល់គ្រាប់បាល់តិចជាងវិសាខា។ មួយគ្រាប់ជ័យជំនះរបស់ អាយអេសអាយ កើតឡើងដោយកីឡាករ ប៉េង ពិសាលនៅនាទីទី៩០បូក២។ ថ្ងៃជាមួយគ្នានេះដែរ ក្លឹបឡាយអ៊ិនឃីង ចាញ់កណ្ដាលយូណាយធីត ១ទល់២។សូមបញ្ជាក់ថា គោលបំណងនៃការរៀបចំការប្រកួត ខេមបូឌានលីគអភិវឌ្ឍន៍ មានបួនចំណុចធំៗគឺផ្តល់ឱកាសដល់កីឡាករដែលមិនសូវទទួលបានឱកាសលេងនៅក្នុងការប្រកួតជម្រើសជើងឯក ខេមបូឌានព្រីមៀរលីគ ( CPL ) និងកីឡាករអាយុក្រោម២២ឆ្នាំ ឲ្យមានឱកាសបង្ហាញសមត្ថភាពនៅលើទីលាន។ ផ្តល់ឱកាសដល់កីឡាករ ខេមបូឌានលីគ យុវជនអាយុក្រោម ១៨ ឆ្នាំ ទទួលបានឱកាសបង្ហាញសមត្ថភាព ក្នុងការប្រកួតប្រជែងជាមួយក្រុមធំ ដើម្បីពង្រឹង និងអភិវឌ្ឍន៍បច្ចេកទេសបន្ថែម។ រៀបចំឡើងដោយផ្តោតសំខាន់លើកីឡាករអាយុក្រោម ២២ឆ្នាំ ជំរុញបង្កើនឱ្យមានការប្រកួតប្រជែងកាន់តែខ្លាំង ដើម្បីត្រៀមលក្ខណៈសម្បត្តិសម្រាប់ចូលរួមការប្រកួត Sea Games និង អភិវឌ្ឍន៍សមត្ថភាពរបស់មន្រ្តីដឹកនាំការប្រកួត ដោយផ្តល់ឱកាសច្រើនក្នុងការបំពេញភារកិច្ចនានា៕ 

ព្រះខ័នរាជ យកឈ្នះគិរីវង់ ៥-០ រក្សាគម្លាត ៥ពិន្ទុក្នុងតំណែងកំពូលតារាង ក្រោយចប់ជុំទី២

2026/02/23 06:52:34 pm        181
Facebook Telegram Linkin
ក្រុមការពារតំណែងជើងឯកព្រះខ័នរាជស្វាយរៀង បានយកឈ្នះក្រុមម្ចាស់ផ្ទះគិរីវង់​សុខសែន​ជ័យ ៥-០ ដើម្បីពង្រឹងកៅអីកំពូលតារាង ដោយរក្សាគម្លាត ៥ពិន្ទុពីក្រុមឈរលេខរៀងទី២ ភ្នំពេញ​ក្រោន ក្រោយបញ្ចប់ការប្រកួតជុំទី២ ក្នុងដំណាក់កាលទី១ នៃលីគកំពូលកម្ពុជា ឆ្នាំ២០២៥/២៦។ផ្ទុយពីជើងទី១ ដែលយកឈ្នះក្នុងដីត្រឹម ២-១ ព្រះខ័នរាជស្វាយរៀង បានយកឈ្នះក្រៅដីយ៉ាងចាស់ដៃ លើក្រុមមាន់គក់ ខេត្តតាកែវ ។ ៥គ្រាប់ ដែលជួយឲ្យក្រុមការពារតំណែងជើងឯក ទទួលបាន ៣ពិន្ទុបន្ថែម ធ្វើសម្រេចដោយកីឡាករ Peprah Kwame ២គ្រាប់, Cristian Dos Santos ១គ្រាប់ និង Patrick Robson ២គ្រាប់។ជ័យជម្នះនេះ នាំឲ្យព្រះខ័នរាជស្វាយរៀង បណ្ចប់ការប្រកួត ២ជុំ ក្នុងដំណាក់កាលទី១ ស្មើនឹង ២០ប្រកួតឈ្នះ ១៧ និងចាញ់ ៣ រកបាន ៥១ពិន្ទុ នាំមុខ ៥ពិន្ទុ លើក្រុមភ្នំពេញក្រោន ដែលឈរលេខ២ មាន ៤៦ពិន្ទុ តែនាំមុខក្រុមឈរលេខ៣ អង្គរថាយហ្គឺរ រហូតដល់ ១៥ពិន្ទុឯណោះ។ការនាំមុខគូប្រជែងដ៏ច្រើនពិន្ទុបែបនេះ បានក្លាយជាផលចំណេញដ៏ធំ សម្រាប់ព្រះខ័នរាជស្វាយរៀង មុនឈានដល់ការប្រកួតដំណាក់កាលទី២ រវាងបេក្ខភាព ៦ក្រុមកំពូលតារាង(Top-6) ដែលនឹងត្រូវធ្វើការប្រកួតសន្សំពិន្ទុ ២ជុំ ស្មើនឹង ១០ប្រកួតទៀត ដើម្បីកាត់សេចក្ដីរកក្រុមកំពូលតារាង និងក្លាយជាជើងឯកលីគកំពូលកម្ពុជា ឆ្នាំ២០២៥/២៦ តែម្ដង៕ អត្ថបទ លី ឈុនឡា

James Milner ក្លាយជាកីឡាករបង្ហាញខ្លួននៅ Premier League ច្រើនជាងគេ

2026/02/23 06:04:09 pm        148
Facebook Telegram Linkin
២៤ ឆ្នាំបន្ទាប់ពីបង្ហាញខ្លួនដំបូងនៅ Premier League, James Milner នៅពេល​នេះ​បាន​ក្លាយ​ជា​កីឡាករ​ដែលបង្ហាញខ្លួននៅ Premier League ច្រើនប្រកួតជាងគេ បន្ទាប់ពីចាប់​ផ្តើម​ជា​ជម្រើស ១១នាក់របស់ Brighton នៅទឹកដី Brentford ២-០។អាជីពរយៈពេល ២៤ ឆ្នាំរឺជាងពីរទសវត្សរិ៍ កីឡាករវ័យ ៤០ ឆ្នាំរូបនេះបានឆ្លងកាត់ក្លិបអាជីពនៅ Premier League ចំនួន ៦ បង្ហាញខ្លួនសរុប ៦៥៤ ប្រកួត បង្ហាញខ្លួនឱ្យជម្រើសជាតិអង់គ្លេស ៦១ លើក ឈ្នះជើងឯក Premier League បីលើក FA Cup ពីរលើក និង Champions League មួយលើក។ សមិទ្ធផលនេះ James Milner បានបំបែកកំណត់ត្រាចាស់របស់ Gareth Barry បង្ហាញខ្លួនសរុប ៦៥៣ ប្រកួត។ James Milner បានរក្សាខ្លួននៅ Premier League សរុប ៨៥០៤ ថ្ងៃ បន្ទាប់ពីបង្ហាញខ្លួនដំបូងឱ្យ Leeds United នៅឆ្នាំ ២០០២។ អតីតខ្សែប្រយុទ្ធអង់គ្លេស Alan Shearer ដែលធ្លាប់ប្រកបអាជីពជាមួយ Milner នៅ Newcastle បានហៅ កីឡាករវ័យ ៤០ ឆ្នាំរូបនេះ ថាកីឡាករគម្រូ និងជាអនាគតអ្នកចាត់ការដ៏ល្អម្នាក់។ នៅពេលបង្ហាញខ្លួនដំបូងនៅ Premier League ជាមួយ Leeds United, Milner មានវ័យត្រឹម ១៦ ឆ្នាំប៉ុណ្ណោះ និងមានប្រាក់ឈ្នួលត្រឹម ៧០ ផោនប៉ុណ្ណោះក្នុងមួយសប្តាហ៍។ ៦ សប្តាហ៍បន្ទាប់ពីបង្ហាញខ្លួនដំបូង James Milner ក៏បានក្លាយជាកីឡាករវ័យក្មេងបំផុតស៊ុតបញ្ចូលទីបាននៅ Premier League ក្នុងវ័យ ១៦ ឆ្នាំ ៣៥៦ ថ្ងៃនៅពេលនោះ នៅពេលរកបានមួយគ្រាប់ក្នុងជ័យជំនះលើ Sunderland ២-១ នៅកីឡដ្ឋាន Stadium of Light របស់ Sunderland។ បន្ទាប់ពី Leeds, Milner ក៏បានបន្តដំណើរទៅ Newcastle នៅឆ្នាំ ២០០៤ ដល់ឆ្នាំ ២០០៨ ផ្ទេរទៅ Aston Villa លេងបានពីរឆ្នាំ។ នៅឆ្នាំ ២០១០ James Milner ក៏បោះដំណើរឡើងក្លិបធំដោយបានចូលរួមជាមួយ Manchester City រយៈពេលប្រាំឆ្នាំ មុនផ្ទេរទៅ Liverpool នៅឆ្នាំ ២០១៥ និងបានចាកចេញវិញនៅឆ្នាំ​ ២០២៣ មកកាន់ Brighton នេះ៕ អត្ថបទ៖នាង សុភាវុធ

វិសាខា ឬអឹមអូអាយត្រូវនៅ ឬឡើងតំបន់៦ក្រុមលើគេ (Top 6) នឹងសម្រេចថ្ងៃសៅរ៍នេះ

2026/02/20 07:39:18 pm        275
Facebook Telegram Linkin
ការប្រកួតកីឡាបាល់ទាត់លីគកំពូលកម្ពុជា (Cambodian Premier League) រដូវ​កាល​២០២៥-២០២៦ ត្រូវបញ្ចប់ដំណាក់កាលទី១នៅចុងសប្ដាហ៍នេះហើយ ខណៈ​ដែល​ពេល​នេះ​អ្នក​គាំទ្រ​បាល់ទាត់ជាតិកំពុងតែតាមដានថាតើក្លឹបបាល់ទាត់វិសាខា បន្តស្ថិតនៅតំបន់៦​ក្រុម​លើ​គេ រឺអឹមអូអាយ កំពង់ដេវ៉ា ឡើងមកតំបន់នេះវិញ។ក្លឹបបាល់ទាត់ព្រះខ័នរាជស្វាយរៀង ភ្នំពេញក្រោន អង្គរថាយហ្គឺរ ណាហ្កាវើលដ៍ និងក្លឹបបាល់ទាត់បឹងកេត ធានាកៅអីក្នុងតំបន់៦ក្រុមលើគេរួចរាល់ហើយ នៅឡើយវិសាខា និងអឹមអូអាយកំពង់ដេវ៉ា ដែលត្រូវប្រជែងជាមួយគូប្រកួតផ្សេងគ្នា។ថ្ងៃសៅរ៍ទី២១ ខែកុម្ភៈ ឆ្នាំ២០២៦នេះ ក្លឹបបាល់ទាត់វិសាខា ត្រូវស្វែងរកពិន្ទុ ជាមួយភ្នំពេញក្រោនដែលត្រូវការពិន្ទុប្រជែងជើងឯកជាមួយព្រះខ័នរាជស្វាយរៀង ខណៈដែលអឹមអូអាយកំពង់ដេវ៉ា ត្រូវការបីពិន្ទុដាច់ខាតពេលជួបអាយអេសអាយ ដង្កោសែនជ័យថ្ងៃជាមួយគ្នា។ពេលនេះ វិសាខា ឈរនៅចំណាត់លេខ៦បណ្ដោះអាសន្ន (មាន២៩ពិន្ទុ)មិនទាន់សុវត្ថិភាពនៅឡើយព្រោះគម្លាតពីអឹមអូអាយដែលឈរនៅលេខ៧ តែ២ពិន្ទុប៉ុណ្ណោះ។ ដូច្នោះវិសាខាត្រូវការឈ្នះភ្នំពេញក្រោនដាច់ខាត ដើម្បីរក្សាកៅអីតំបន់៦ក្រុមលើគេ មិនខ្វល់ពីលទ្ធផលអឹមអូអាយ កំពង់ដេវ៉ាយ៉ាងណានោះទេ។ ផ្ទុយទៅវិញវិសាខា នឹងធ្លាក់ចេញពីតំបន់ប្រជែងជើងឯក បើភ្លាត់ចាញ់ រឺស្មើ ហើយ អឹមអូអាយ ឈ្នះអាយអេសអាយដង្កោសែនជ័យ។សម្រាប់ក្លឹបភ្នំពេញក្រោន ក៏ត្រូវការពិន្ទុចាំបាច់ដែរពីវិសាខា​ ដើម្បីប្រជែងជាមួយក្រុមកំពូលតារាងព្រះខ័នរាជស្វាយរៀង ព្រោះពេលនេះកំពុងចាញ់ព្រះខ័នរាជ៥ពិន្ទុ ក្រោយចាញ់អង្គរថាយហ្គឺរកាលពីសប្ដាហ៍មុន។ ជើងទី១ ថ្ងៃទី៨ ខែវិច្ឆិកា វិសាខា និងភ្នំពេញក្រោន ស្មើគ្នា១ទល់១។ ពេលនោះភ្នំពេញក្រោននាំមុខមុនដោយកីឡាករ DYER MOSES JOHN នាទីទី៥៧​ ប៉ុន្តែ១៦នាទីបន្ទាប់ អ៊ុក សុវណ្ណ ជួយឱ្យវិសាខាតាមស្មើ។ អឹម អូអាយ កំពង់ដេវ៉ា ជួបជាមួយអាយអេសអាយ ដង្កោសែនជ័យ ក៏មិនស្រួលប៉ុន្មាននោះដែរ ព្រោះកាលពីជើងទីមួយ ក្រុមទាំងពីរបានត្រឹមស្មើគ្នា ០ទល់០ ហើយសប្ដាហ៍មុន អាយអេសអាយធ្វើបានល្អដោយយកឈ្នះកងយោធពលខេមរភូមិន្ទ ៣ទល់០ ខណៈដែលអឹមអូអាយចាញ់ព្រះខ័នរាជស្វាយរៀង ១ទល់នឹង២។ការប្រកួតផ្សេងទៀតនៅសប្ដាហ៍ចុងក្រោយនេះ ឡាយហ្វខេត្តព្រះសីហុន ទទួលណាហ្កាវើលដ៍។ ចំណែកថ្ងៃអាទិត្យគិរីវង់សុខសែនជ័យ​ ជួបព្រះខ័នរាជស្វាយរៀង និងអង្គរថាយហ្គឺរ ប្រកួតជាមួយកងយោធពលខេមរភូមិន្ទ៕ 

ព្រឹត្តិការណ៍ជិះកង់ភ្នំពេញ-តាកែវ នឹងត្រឡប់មកវិញ នាដើមខែមីនា ក្រោមប្រធានបទ «ទេសចរណ៍រីកលូតលាស់ក្នុងសន្ដិភាព»

2026/02/19 10:10:37 pm        243
Facebook Telegram Linkin
ព្រឹត្តិការណ៍ជិះកង់ភ្នំពេញ-តាកែវ ចម្ងាយ ៧៥គីឡូម៉ែត្រ រៀបចំដោយក្រសួងទេសចរណ៍ សហការជាមួយរដ្ឋបាលខេត្តតាកែវ នឹងត្រឡប់មកវិញជាថ្មី នាថ្ងៃទី៨ ខែមីនា ឆ្នាំ២០២៦ ខាងមុខ ដែលនឹងប្រព្រឹត្តទៅ ក្រោមប្រធានបទ «ទេសចរណ៍រីកលូតលាស់ក្នុងសន្ដិភាព»។នេះបើតាមប្រសាសន៍ឯកឧត្តម វ៉ាហេង ដាវុធ រដ្ឋលេខាធិការក្រសួងទេសចរណ៍ ក្នុងជំនួបពិភាក្សាជាមួយអាជ្ញាធរខេត្ត និងក្រុមការងារពាក់ព័ន្ធ ដើម្បីត្រួតពិនិត្យការងារ នៅប្រាសាទភ្នំជីសូរ នៅព្រឹកថ្ងៃទី១៩ ខែកុម្ភៈ ឆ្នាំ២០២៦ ដោយមានការចូលរួមពីឯកឧត្តម ស៊ុត ខុន អភិបាលរងខេត្តតាកែវ ព្រមទាំងតំណាងមន្ទីរ និងអាជ្ញាធរពាក់ព័ន្ធចូលរួមជាច្រើនផងដែរ។ឯកឧត្តមរដ្ឋលេខាធិការ មានប្រសាសន៍ថា ព្រឹត្តិការណ៍ជិះកង់ភ្នំពេញ-តាកែវ ចម្ងាយ ៧៥គីឡូម៉ែត្រ លើកទី២ ក៏មិនខុសពីឆ្នាំមុនដែរ គឺរៀបចំឡើង ក្នុងគោលបំណងអបអរសាទរទិវានារីអន្ដរជាតិ ៨មីនា ព្រមទាំងបង្ហាញពីឯកភាពជាតិ សាមគ្គីផ្ទៃក្នុងដ៏រឹងមាំ និងការគាំទ្រពីមហាជនចូលចិត្តកីឡាជិះកង់ ផ្សារភ្ជាប់ជាមួយការជំរុញការផ្សព្វផ្សាយតំបន់ទេសចរណ៍នានា នៅខេត្តតាកែវ ពិសេសតំបន់ទេសចរណ៍ភ្នំជីសូរ និងការកៀគរមូលនិធិឧបត្ថម្ភជាសម្ភារសិក្សាដល់សិស្សានុសិស្សនៅខេត្តតាកែវជាដើម។នេះជាលើកទី២ ហើយ ដែលព្រឹត្តិការណ៍កីឡាទេសចរណ៍នេះ ត្រូវបានរៀបចំឡើង ក្រោមគំនិតផ្ដួចផ្ដើម និងការយកចិត្តទុកដាក់របស់ឯកឧត្តម ហួត ហាត់ រដ្ឋមន្ដ្រីក្រសួងទេសចរណ៍ ដែលបានគាំទ្ររៀបចំព្រឹត្តិការណ៍ជិះកង់ភ្នំពេញ-តាកែវនេះ ហើយក៏ជាការបំផុសប្រជាពលរដ្ឋឲ្យចូលរួមសកម្មភាពកីឡា ដើម្បីលើកកម្ពស់សុខភាពសាធារណៈផង ក៏ដូចជាលើកកម្ពស់ និងផ្សព្វផ្សាយសក្ដានុពលទេសចរណ៍ខេត្តផង ជាក់ស្ដែងខេត្តតាកែវ ដែលមានរមណីយដ្ឋានប្រវត្តិសាស្ដ្រ និងធម្មជាតិជាច្រើន។ឯកឧត្តម វ៉ាហេង ដាវុធ បានគូសរំឮកថា កាលពីឆ្នាំមុន ព្រឹត្តិការណ៍ជិះកង់ភ្នំពេញ-តាកែវនេះ បានទទួលកីឡាករ-កីឡាការិនី និងអ្នកចូលរួមអមដំណើរសរុបប្រមាណ ៣៥០នាក់ ដែលទទួលបានការស្វាគមន៍យ៉ាងកក់ក្ដៅ ពីអាជ្ញាធរខេត្តតាកែវ។ ឆ្លើយតបនឹងភាពជោគជ័យលើសការរំពឹងនេះ ទើបថ្នាក់ដឹកនាំក្រសួងទេសចរណ៍ បានបន្ដរៀបចំព្រឹត្តិការណ៍នេះជាថ្មី នាដើមខែក្រោយ ដោយរំពឹង នឹងមានអ្នកចូលរួមកាន់តែច្រើនថែមទៀត។គួរដឹងថា ព្រឹត្តិការណ៍ជិះកង់លក្ខណៈកម្សាន្ដ ផ្សារភ្ជាប់ទេសចរណ៍នេះ នឹងត្រូវចេញដំណើរពីទីស្ដីការក្រសួងទេសចរណ៍ កាត់តាមវិថីសំខាន់ៗក្នុងរាជធានីភ្នំពេញ រហូតដល់ស្ពាន ៦០ម៉ែត្រ បត់តាមផ្លូវជាតិលេខ២ រហូតដល់ប្រសាទភ្នំជីសូត នៅចំណុចវត្តនាងខ្មៅ និងបន្ដដំណើររហូតដល់ទីរួមខេត្តតាកែវ នៅចំណុចបឹងតាកែវ ដែលជាទីកន្លែងប្រារព្ធពិធីបិទជាផ្លូវការតែម្ដង៕ អត្ថបទ លី ឈុនឡា 

Newcastle, Leverkusen, Bodo/Glimt សុទ្ធតែឈ្នះជើងទីមួយខណៈ Club Bruges និង Atletico Madrid ស្មើគ្នា

2026/02/19 09:46:14 pm        148
Facebook Telegram Linkin
Newcastle United រកបានជ័យជំនះយ៉ាងធំធេង និងកក់ក្តៅមុនត្រលប់មកទឹកដីរបស់ខ្លួនវិញក្រោយយកឈ្នះនៅទឹកដី Qarabag ៦-១ ជើងទីមួយវគ្គ Play-Off រកកៅអីវគ្គ ១៦ ក្រុមចុងក្រោយ Champions League។ខ្សែប្រយុទ្ធស្លាប Anthony Gordon រកបានដល់ទៅបួនគ្រាប់ម្នាក់ឯងក្នុងការប្រកួតនេះ ពោលគឺគ្រាប់ដំបូងកើតឡើងតាំងពីនាទីទី ៣ មុនពេលដែលខ្សែការពារ Malick Thiaw រកបានគ្រាប់នាំមុខ ២-០ នៅនាទីទី ៨។នៅក្នុងវគ្គទីមួយដដែល Anthony Gordon រកបានបីគ្រាប់បន្ថែមទៀតដោយនៅនាទីទី ៣២ បាល់ពិន័យ ១១ ម៉ែត្រ នាទីទី ៣៣ និងនាទីទី ៤៥+១ ក៏ជាបាល់ពិន័យ ១១ ម៉ែត្រ។ ម្ចាស់ផ្ទះក៏តបបានមួយគ្រាប់ដែរនៅដើមវគ្គទីពីរដោយ Cafarquliyev តែ Jacob Murphy បន្ថែមគ្រាប់ចុងក្រោយ នៅនាទីទី ៧២ ឱ្យ Newcastle យកឈ្នះ ៦-១ កាន់ ៥ គ្រាប់ចំណេញមុនត្រលប់ទៅទឹកដីរបស់ខ្លួនសប្តាហ៍ក្រោយ។រីឯក្រុមកំពុងនាំមុខគេនៅអ៊ីតាលី Inter Milan បានរងបរាជ័យនៅទឹកដី Bodo/Glimt ៣-១ គួរឱ្យភ្ញាក់ផ្អើល។ មិនអាចមើកស្រាលបានទេ Bodo/Glimt របស់ន័រវេសមួយនេះបានយកឈ្នះ Manchester City និង​ Atletico Madrid ខែមុន រកបានគ្រាប់នាំមុខនៅនាទីទី ២០ ដោយ Sondre Brunstad Fet មុនពេល Inter Milan តាមស្មើវិញដោយ Francesco Pio Esposito ដប់នាទីក្រោយមក។ ក្រុមម្ចាស់ផ្ទះកាន់តែរឹងមាំនៅវគ្គទីពីរ ដោយរកបានពីរគ្រាប់យកឈ្នះការប្រកួតនេះ ៣-១ ដោយគ្រាប់បាល់របស់ Jens Petter Hauge និង Kasper Waarts Hogh។ ប្រកួតបន្តទៀតនេះ Atletico Madrid ធ្វើអ្វីម្ចាស់ផ្ទះ Club Bruges មិនបានទេ បានត្រឹមបញ្ចប់ដោយ ៣-៣។ Atletico Madrid រកបានពីរគ្រាប់នាំមុខមុនដោយ Julian Alvarez និង Ademola Lookman តែក្រុមម្ចាស់ផ្ទះក៏វាយបកយកតាមស្មើវិញនៅវគ្គទីពីរដោយកីឡាករនីហ្សេរីយ៉ា Raphael Onyedika និងកីឡាករកូនកាត់អាល្លឺម៉ង់ អ៊ីតាលី Nicolo Tresoldi។ Atletico Madrid ក៏នាំមុខជាថ្មីដោយបាល់ចូលទីខ្លួនឯងរបស់ខ្សែការពារអេក្វាឌ័រ Joel Ordonez តែម្ចាស់ក៏តាមស្មើម្តងទៀតដោយខ្សែប្រយុទ្ធក្រិក Christos Tzolis។ គូចុងក្រោយនេះ Bayer Leverkusen យកឈ្នះនៅទឹកដីក្រិក Olympiaskos ២-០ ដោយគ្រាប់បាល់របស់ខ្សែប្រយុទ្ធឆេក Patrick Schick ពីរគ្រាប់ម្នាក់ឯងនៅនាទីទី ៦០ និង ៦៣។ សូមបញ្ជាក់ថា ការប្រកួតជើងទីពីរវគ្គ Play-Off នឹងធ្វើនៅសប្តាហ៍ក្រោយ៕ អត្ថបទ៖នាង សុភាវុធ 

កីឡដ្ឋានខេត្តស្វាយរៀង លេចរូបរាងកាន់តែច្បាស់ មានការចាប់អារម្មណ៍កាន់តែខ្លាំង

2026/02/19 06:41:19 pm        355
Facebook Telegram Linkin
រយៈពេលជាងកន្លះឆ្នាំមកហើយ ដែលក្លិបបាល់ទាត់ព្រះខ័នរាជស្វាយរៀង បានធ្វើការជួសជុល និង​សាងសង់ថ្មីនូវកីឡដ្ឋានខេត្តស្វាយរៀង ដែលមានមូលដ្ឋាននៅក្រុងស្វាយរៀង ខេត្តស្វាយរៀង ដើម្បី​ឆ្លើយតបសន្ទុះនៃការគាំទ្រ និងបំពេញលក្ខខណ្ឌ​តាម​កម្រិត​ស្ដង់ដារ​របស់​សហព័ន្ធ​កីឡាបាល់​ទាត់​អាស៊ី(AFC)។គិតត្រឹមពេលនេះ ហេដ្ឋារចនាសម្ព័ន្ធជាច្រើន បានលេចរូបរាងកាន់តែច្បាស់ ដែលធ្វើឲ្យមហាជន ពិសេសអ្នកគាំទ្រក្លិបជើងឯកលីគកំពូលកម្ពុជា មានការចាប់អារម្មណ៍កាន់តែខ្លាំង ចំពោះកីឡដ្ឋានដ៏ទំនើប ដែលកំពុងមមាញឹកក្នុងដំណើរការសាងសង់ សម្រាប់ត្រៀមទទួលស្វាគមន៍ការប្រកួតថ្នាក់ជាតិ និងអន្ដរជាតិនារដូវកាលថ្មីខាងមុខ។បន្ទាប់ពីធ្វើពិធីក្រុងពាលីបញ្ចុះបឋមសិលា ដើម្បីសាងសង់ឡើងវិញ នូវកីឡដ្ឋានខេត្តស្វាយរៀង កាលពីដើមខែកក្កដា ឆ្នាំ២០២៥ កីឡដ្ឋាននេះ គ្រោងប្រើពេល ១រដូវកាលពេញ សម្រាប់ឆ្នាំ២០២៥/២៦ ដើម្បីសាងសង់កីឡដ្ឋាន ដែលអាចផ្ទុយអ្នកទស្សនាបានរហូតដល់ក្បែរម៉ឺននាក់ ជាមួយកម្រិតអំពូលភ្លើង(LED) សម្រាប់បំភ្លឺការប្រកួតកាន់តែខ្ពស់ ស្របទៅតាមស្ដង់ដារ AFC ដែលអាចបម្រើឲ្យការប្រកួតអន្ដរជាតិបាន។តាមគម្រោងកីឡដ្ឋានខេត្តស្វាយរៀង នឹងត្រូវបញ្ចប់ការសាងសង់ និងដាក់ឲ្យប្រើប្រាស់ឡើងវិញ នាដើមរដូវកាលឆ្នាំ២០២៦/២៧ ខាងមុខ ជាមួយក្ដីរំពឹងនឹងទទួលបានការគាំទ្រកាន់តែខ្លាំង ពិសេសប្រជាពលរដ្ឋខេត្តស្វាយរៀង ដែលកំពុងទន្ទឹងរង់ចាំទស្សនាការប្រកួតផ្ទាល់ នៅកីឡដ្ឋានស្ដង់ដារ និងទំនើបមួយនេះ។គួរដឹងថា បច្ចុប្បន្នព្រះខ័នរាជស្វាយរៀង បានប្រើប្រាស់ពហុកីឡដ្ឋានជាតិមរតកតេជោ ជាទឹកដីបម្រើឲ្យការប្រកួតលីគកំពូលកម្ពុជា និងពានរង្វាន់សម្ដេចតេជោ ហ៊ុន សែន ក៏ដូចជាពានរង្វាន់អន្ដរជាតិនានា រួមមានការប្រកួតជើងឯកក្លិបអាស៊ីអាគ្នេយ៍ និងជើងឯកក្លិបបាល់ទាត់កម្រិតទី៣ ទ្វីបអាស៊ី ជាដើម ។ បន្ទាប់ក្រោយកីឡដ្ឋានខេត្តស្វាយរៀង សាងសង់រួចរាល់ អ្នកគាំទ្រសង្ឃឹមថា ក្រៅពីបានទស្សនាការប្រកួតក្របខណ្ឌថ្នាក់ជាតិ ក៏រំពឹងនឹងបានទស្សនាការប្រកួតពានរង្វាន់អន្ដរជាតិនៅទីនោះផងដែរ៕ អត្ថបទ៖ លី ឈុនឡា 

បណ្ដាញសង្គម

ព័ត៌មានថ្មីៗ

អ្នកនាំពាក្យក្រសួងការងារ លើកទឹកចិត្តសិស្សវិទ្យាល័យចុះទស្សនកិច្ចសាលា TVET ដើម្បី​ស្វែង​យល់​ពី​សក្តានុ​ពលខ្លួ​នឯង ការបណ្តុះបណ្តាលជំនាញ និងឱកាសការងារនាពេលអនាគត
07/27/2026 02:07 PM
Facebook Telegram Linkin
សម្តេចបវរធិបតី និង លោកជំទាវបណ្ឌិត បានឧបត្ថម្ភគ្រឿងឧបភោគបរិភោគមួយចំនួន ជូនតំបន់ប្រតិបត្តិការសឹករងកំពង់ឆ្នាំង
07/27/2026 02:07 PM
Facebook Telegram Linkin
រដ្ឋាភិបាលបាន​ចាប់ឆ្នោតផ្តល់លេខដីឡូតិ៍ និងផ្ទះនៃកម្មវិធីផ្តល់ដីការពារព្រៃ ដើម្បី​រួមគ្នា​អភិវឌ្ឍ​ដោយ​ចីរភាព
07/27/2026 02:07 PM
Facebook Telegram Linkin
វីរបុរស World Cup របស់កាប់វែរ Vozinha ព្រមព្រៀងផ្ទេរទៅកាន់ក្លិប Colo-Colo របស់ស៊ីលី
07/27/2026 02:07 PM
Facebook Telegram Linkin
សម្ដេចធិបតី៖ កម្ពុជា-ចិន នឹងរៀបចំកិច្ចប្រជុំ នៃ «យុទ្ធសាស្ត្រ ៣+៣» ជាមួយគ្នានៅឆ្នាំក្រោយ
07/27/2026 01:07 PM
Facebook Telegram Linkin
ទេសាភិបាល៖ សេដ្ឋកិច្ចកម្ពុជានឹងអាចចាត់ទុកមានភាពធន់ ដែលសម្រេចបានក្នុងរង្វង់ ៣% ទៅ ៤%
07/27/2026 12:07 PM
Facebook Telegram Linkin
អាជ្ញាធរមីន និងស្ថានទូតឥណ្ឌាប្រចាំកម្ពុជា ចុះហត្ថលេខាលើអនុស្សារណៈនៃការយោគយល់គ្នា អនុវត្តគម្រោង​បោស​សម្អាតមីន​នៅខេត្តពោធិ៍សាត់
07/27/2026 12:07 PM
Facebook Telegram Linkin
មេបញ្ជាការយោធភូមិភាគទី៤ ទទួលជួបសម្តែងការគួរសម និងពិភាក្សាការងារជាមួយក្រុមអ្នកសង្កេតការណ៍អាស៊ានប្រចាំកម្ពុជា
07/27/2026 12:07 PM
Facebook Telegram Linkin
សម្ដេចធិបតី៖ ចិនបានដើរ​តួនាទី​យ៉ាង​សកម្ម​តាំង​ពី​ដើម​មក​លើ​ការ​សម្រប​សម្រួល​ដោះ​ស្រាយ​បញ្ហា​កម្ពុជា​-ថៃ
07/27/2026 12:07 PM
Facebook Telegram Linkin
សារដ៏ចម្រូងចម្រាស «The Malvinas are Argentine» ត្រូវបានបោះពុម្ពផ្សាយដោយឥតគិតថ្លៃនៅអាហ្សង់ទីន
07/27/2026 12:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.