BTV NEWS

Kazuyoshi Miura កីឡាករបាល់ទាត់អាជីពវ័យចំណាស់បំផុតស៊ុតបញ្ចូលទីជាលើកដំបូងក្នុងរយៈពេលជិត ៤ឆ្នាំ នៅវ័យ ៥៩ឆ្នាំ

វីរបុរស World Cup របស់កាប់វែរ Vozinha ព្រមព្រៀងផ្ទេរទៅកាន់ក្លិប Colo-Colo របស់ស៊ីលី

សារដ៏ចម្រូងចម្រាស «The Malvinas are Argentine» ត្រូវបានបោះពុម្ពផ្សាយដោយឥតគិតថ្លៃនៅអាហ្សង់ទីន

ក្រុម ស.ស.យ.ក អលស្ដារ គ្រោងរៀបចំការប្រកួតសប្បុរសធម៌ នាចុងខែសីហា ក្រោយជំនួបមិត្តភាពផ្លូវការលើកដំបូង

ព័ត៌មានកីឡា

មុនជួប Nam Dinh គ្រូព្រះខ័នរាជថា នឹងល្អមើល ដោយសារក្រុមទាំងពីរ មានកីឡាករល្អៗដូចគ្នា

ក្រុមព្រះខ័នរាជស្វាយរៀង របស់កម្ពុជា នឹងបន្ដជួបក្រុមម្ចាស់ផ្ទះ Nam Dinh របស់វៀតណាម នាវេលាម៉ោង ៧៖៣០នាទីយប់ ថ្ងៃទី២៥ ខែកញ្ញា ឆ្នាំ២០២៥ នេះ នៅកីឡដ្ឋាន Thien Truong ក្នុងយុទ្ធនាការប្រកួតជើងឯកក្លិបបាល់ទាត់អាស៊ីអាគ្នយ៍ (ASEAN Club Championship Shopee Cup) ឆ្នាំ២០២៥/២៦។ថ្លែងក្នុងសន្និសីទសារព័ត៌មានមុនការប្រកួតលោក Mattew Mcconkey គ្រូបង្វឹកក្រុមព្រះខ័នរាជស្វាយរៀង បានបង្ហាញពីការត្រៀមខ្លួនរួចរាល់ ដើម្បីតតាំងជាមួយក្រុមខ្លាំងរបស់វៀតណាម ដោយលោករំពឹងនឹងក្លាយជាការប្រកួតដ៏ល្អមើល ដ្បិតក្រុមទាំងពីរ សុទ្ធតែមានកីឡាករល្អៗដូចគ្នា។លោកបន្ដថា រវាងការលេងពានអន្ដរជាតិ និងពានក្នុងស្រុក គឺមានភាពខុសគ្នាសម្រាប់ក្រុម Nam Dinh ដែលមានការផ្លាស់ប្ដូរកីឡាករមួយចំនួន ហើយកីឡាករវៀតណាមទៀតសោត ក៏មានកម្រិតល្អ មើលទៅខ្លាំង និងមានចលនាលឿន ជាក់ស្ដែងប៉ុន្មានប្រកួតចុងក្រោយ ពួកគេពិតជាធ្វើបានល្អ ដោយកាយសម្បទាកីឡាករដ៏ល្អរបស់ពួកគេ ហើយអ្វីដែលត្រូវប្រុងប្រយ័ត្នក្នុងការប្រកួត គឺបាល់ Set-Piece ។យ៉ាងណាមិញផ្អែកលើបទពិសោធន៍លេងពានរង្វាន់អន្ដរជាតិកន្លងមក ទោះបីកូនក្រុមខ្លះ មានកាយសម្បទាមិនសូវល្អ តែលោកជឿជាក់លើការខំប្រឹង និងការព្យាយាមគ្រប់យ៉ាង សម្រាប់ការប្រកួតដ៏សំខាន់ទល់នឹងក្រុម Nam Dinh នៅរាត្រីថ្ងៃព្រហស្បត្ដិ៍នេះ ។ បន្ថែមលើនេះ លោកក៏បានកោតសរសើរកូនក្រុមរបស់ខ្លួន ដែលបានខំប្រឹង និងធ្វើបានល្អនាប៉ុន្មានប្រកួតចុងក្រោយ ពិសេសកីឡាករចំនួន Kwame និង Patrick តែម្ដង។ទន្ទឹមជាមួយគ្នាកីឡាករ មិន រតនៈ បានលើកឡើងថា ក្រុមបានត្រៀមខ្លួនជាស្រេច សម្រាប់ការប្រកួតជាមួយក្រុម Nam Dinh ។ រតនៈ ទទួលស្គាល់ក្រុមរបស់វៀតណាមនីមួយៗ សុទ្ធតែមានគុណភាពល្អ តែគោលដៅរបស់ព្រះខ័នរាជស្វាយរៀង គឺយកឈ្នះពួកគេ ដើម្បីទទួលបាន ៣ពិន្ទុត្រឡប់ទៅផ្ទះវិញ ។ ដូច្នេះរូបគេជឿជាក់លើក្រុមទាំងមូល នឹងអាចធ្វើបានល្អក្នុងការប្រកួតដ៏សំខាន់នេះ តាមការរៀបចំរបស់គ្រូបង្វឹក ដោយមិនផ្ដោតអ្វីផ្សេងនោះទេ។ដោយឡែកទៅចាប់អារម្មណ៍សម្ដីគ្រូបង្វឹកក្រុមម្ចាស់ផ្ទះ Nam Dinh លោក Vu Hong Viet វិញ បានគូសបញ្ជាក់ថា ព្រះខ័នរាជស្វាយរៀង គឺជាក្រុមដ៏ល្អមួយ ដែលមានកីឡាករបរទេសមានគុណភាពជាច្រើន ពិសេសខ្សែប្រយុទ្ធ។ ដូច្នេះច្បាស់ណាស់វាមិនមែនជាការប្រកួតងាយស្រួលឡើយ។ យ៉ាងណាមិញក្រុមបានត្រៀមខ្លួនជាស្រេច ដើម្បីសម្រេចគោលដៅដណ្ដើមយក ៣ពិន្ទុពីការប្រកួតបើកឆាកជើងឯកក្លិបបាល់ទាត់ប្រចាំតំបន់លើទឹកដីរបស់ខ្លួននេះ។គួរដឹងថា នេះគឺជាការប្រកួតទី២ ក្នុងពូលB នៃយុទ្ធនាការប្រកួតជើងឯកក្លិបបាល់ទាត់ប្រចាំតំបន់អាស៊ីអាគ្នេយ៍ របស់ក្រុមព្រះខ័នរាជស្វាយរៀង បន្ទាប់ពីប្រកួតទី១ បានយកឈ្នះក្រុម Shan United របស់មីយ៉ាន់ម៉ា ៣-០ កាលពីចុងខែសីហាកន្លងទៅ។ បន្ទាប់ពីជួបក្រុម Nam Dinh របស់វៀតណាម នាថ្ងៃទី២៥ ខែកញ្ញា ក្រុមជើងឯកលីគកំពូលកម្ពុជា នឹងត្រូវទទួលធ្វើម្ចាស់ផ្ទះ ២ប្រកួតជាប់គ្នា ដោយត្រូវជួបក្រុមជើងឯកលីគកំពូលម៉ាឡេស៊ី Johor Darul Ta’zim FC នាថ្ងៃទី៤ ខែធ្នូ និងជួបក្រុមថៃ Bangkok United នាថ្ងៃទី២៩ ខែមករា ឆ្នាំ២០២៦ មុនជំនួបបញ្ចប់ពូលB ជាមួយក្រុមម្ចាស់ផ្ទះ Lion City Sailors FC របស់សិង្ហបុរី នាថ្ងៃទី៥ ខែកុម្ភៈ ឆ្នាំ២០២៦ ខាងមុខ៕ អត្ថបទ លី ឈុនឡា, រូបភាពពាក់ព័ន្ធ៕

កម្ពុជាបានត្រឹមជើងឯករង នៃការប្រកួតកីឡាអេឡិចត្រូនិកចិន-អាស៊ាន ឆ្នាំ២០២៥

ក្រុមកីឡាអេឡិចត្រូនិកជម្រើសជាតិកម្ពុជា មិនអាចការពារតំណែងជើងឯក ក្នុងព្រឹត្តិការណ៍កីឡាអេឡិចត្រូនិកចិន-អាស៊ាន ឆ្នាំ២០២៥ បានឡើយ ដោយទទួលបានត្រឹមចំណាត់ថ្នាក់លេខ២ ឬជើងឯករង លើវិញ្ញាសា Mobile Legends Bang Bang កាលពីថ្មីៗកន្លងទៅ។សម្រាប់យុទ្ធនាការនេះ កម្ពុជាបានឈរលេខ២ ក្នុងវគ្គសន្សំពិន្ទុក្នុងពូល បន្ទាប់ពីយកឈ្នះក្រុមវៀតណាម ១-០, ចាញ់ម្ចាស់ផ្ទះចិន ០-១, ឈ្នះឡាវ ១-០ និងឈ្នះហ្វីលីពីន ១-០ ដើម្បីឡើងទៅវគ្គពាក់កណ្តាលផ្តាច់ព្រ័ត្រ ដោយត្រូវជួបក្រុមកីឡាអេឡិចត្រូនិកមីយ៉ាន់ម៉ា។ជាលទ្ធផលការប្រកួតវគ្គចាញ់ធ្លាក់នេះ កម្ពុជា បានយកឈ្នះមីយ៉ាន់ម៉ា ២-០ ដើម្បីឡើងទៅវគ្គផ្តាច់ព្រ័ត្រ ជួបម្ចាស់ផ្ទះចិន សាជាថ្មី ប៉ុន្ដែសោកស្ដាយការប្រកួតកាត់សេចក្ដីនេះ កម្ពុជា នៅតែមិនអាចយកឈ្នះក្រុមចិន ដោយរងបរាជ័យក្នុងលទ្ធផល ២-០ ដែលនាំឲ្យក្រុមកីឡាអេឡិចត្រូនិកកម្ពុជា បានត្រឹមមេដាយប្រាក់ ខណៈចិន បានមេដាយមាស ។គួរដឹងថា នេះគឺជាលើកទី២ ហើយ ដែលកម្ពុជាត្រូវបានអញ្ជើញចូលរួមការប្រកួតកីឡាអេឡិចត្រូនិកចិន-អាស៊ាន បន្ទាប់ពីចូលរួមប្រកួតលើកទី១ កាលពីឆ្នាំ២០២៤ កម្ពុជា បានឈ្នះជើងឯក លើវិញ្ញាសា Mobile Legends Bang Bang។ រីឯការប្រកួតវិញ្ញាសា Valorant វិញ ក្រុមជម្រើសជាតិកម្ពុជា បានធ្លាក់ត្រឹមវគ្គសន្សំពិន្ទុក្នុងពូលប៉ុណ្ណោះ៕អត្ថបទ លី ឈុនឡា, រូបភាពពាក់ព័ន្ធ៕

កម្ពុជា យកឈ្នះម៉ាកាវ ១១-២ ក្នុងវគ្គជម្រុះជើងឯក Futsal អាស៊ី ឆ្នាំ២០២៦ មុនត្រឡប់មកផ្ទះវិញ

ក្រុមបាល់ទាត់ជម្រើសជាតិក្នុងសាលកម្ពុជា បានយកឈ្នះក្រុមជម្រើសជាតិក្នុងសាលម៉ាកាវ ដោយលទ្ធផល ១១-២ ក្នុងជំនួបបញ្ចប់កិច្ច នៃវគ្គជម្រុះជើងឯកបាល់ទាត់ក្នុងសាលទ្វីបអាស៊ី AFC Futsal Asian Cup 2026 ពូលC នៅប្រទេសតាជីគីស្ថាន កាលពីរាត្រីថ្ងៃទី២៤ ខែកញ្ញា។នេះគឺជាជ័យជម្នះលើកដំបូងរបស់ក្រុមជម្រើសជាតិ Futsal កម្ពុជា បន្ទាប់ពីឆ្លងកាត់ ៣ប្រកួត ដោយប្រកួតដំបូង បានចាញ់ក្រុមខ្លាំងជប៉ុន ៥-០ កាលពីថ្ងៃទី២០-កញ្ញា និងប្រកួតបន្ទាប់ចាញ់ក្រុមម្ចាស់ផ្ទះតាជីគីស្ថាន ៧-១ កាលពីដើមសប្ដាហ៍កន្លងទៅ។ជាមួយលទ្ធផលនេះ បានធ្វើឲ្យក្រុមជម្រើសជាតិក្នុងសាលកម្ពុជា អត់ឱកាសឡើងវគ្គបន្ដ ដោយបានត្រឹមឈរលេខ៣ ក្នុងពូល ជាមួយការរកបាន ៣ពិន្ទុពីការយកឈ្នះក្រុមបាតតារាងម៉ាកាវ ។ រីឯជប៉ុន បានឈរកំពូលតារាង ទទួលបានកៅអីជុំផ្ដាច់ព្រ័ត្រ ជាមួយក្រុមតាជីគីស្ថាន ដែលទទួលបានតំណែងក្រុមលេខ២ ល្អជាងគេ ក្នុងចំណោម ៧ក្រុម ដែលត្រូវធ្វើដំណើរទៅប្រជែងពាន AFC Futsal Asian Cup 2026 នៅទីក្រុងហ្សាកាតា ទេសឥណ្ឌូនេស៊ី ចាប់ពីថ្ងៃទី២៧ ខែមករា ដល់ថ្ងៃទី៧ ខែកុម្ភៈ ឆ្នាំ២០២៦ ខាងមុខ៕អត្ថបទ លី ឈុនឡា, រូបភាពពាក់ព័ន្ធ៕

អភិបាលខេត្តព្រះវិហារ អញ្ជើញបិទការប្រកួតកីឡាបាល់ទះមិត្តភាព ក្រោមប្រធានបទ «លេងកីឡាដើម្បីសន្តិភាព» នៅមណ្ឌលសុវត្ថិភាពវត្តពោធិ៍ ៥០០០ដើម!

ឯកឧត្តម គីម រិទ្ធី អភិបាលនៃណៈអភិបាលខេត្តព្រះវិហារ កាលពីថ្ងៃទី០១ ខែកញ្ញា ឆ្នាំ២០២៥ បានអញ្ជើញជាអធិបតីភាពក្នុងធ្វើពិធីបិទការប្រកួតកីឡាបាល់ទះមិត្តភាព ផ្នែកបុរស និងនារី ក្រោមប្រធានបទ «លេងកីឡាដើម្បីសន្តិភាព» ដែលបានរៀបចំឡើង នៅមណ្ឌលសុវត្តិភាពវត្តិពោធិ៍៥០០០ដើម ស្ថិតនៅឃុំគូលែនត្បូង ស្រុកគូលែន ខេត្តព្រះវិហារ។ការប្រកួតកីឡាបាល់ទះមិត្តភាពនេះ គឺផ្ដើមចេញពីគំនិតផ្ដួចផ្ដើមរបស់ឯកឧត្តម គីម រិទ្ធី ក្នុងគោលបំណងពង្រឹងចំណងមិត្តភាព សាមគ្គីភាព និងបង្កើតបរិយាកាសសប្បាយរីករាយរវាងអ្នកដែលរស់នៅក្នុងមណ្ឌលសុវត្ថិភាព និងក្រុមការងារ។ ជាមួយគ្នានេះដែរ កីឡាក៏ជាផ្នែកដ៏សំខាន់មួយក្នុងការចូលរួមចំណែកកសាងសន្តិភាព និងភាពសុខដុមរមនាក្នុងសហគមន៍។ថ្លែងក្នុងឱកាសបិទពិធី និងប្រគល់ពានរង្វាន់ ឯកឧត្តម គីម រិទ្ធី បានថ្លែងការកោតសរសើរ ចំពោះកីឡាករ កីឡាការិនីទាំងអស់ ដែលបានខិតខំប្រឹងប្រែងបង្ហាញទេពកោសល្យ និងស្មារតីកីឡាពិតប្រាកដ។ ទន្ទឹមនេះ ឯកឧត្តម ក៏បានគូសបញ្ជាក់ពីសារៈសំខាន់នៃវិស័យកីឡា ក្នុងការលើកកម្ពស់សុខភាពផ្លូវកាយ និងផ្លូវចិត្ត ព្រមទាំងជួយកាត់បន្ថយបញ្ហាសង្គមនានា។ ដើម្បីជាការលើកទឹកចិត្ត ឯកឧត្តមបានផ្តល់រង្វាន់ដល់ក្រុមដែលទទួលជ័យលាភី ដើម្បីជំរុញឲ្យពួកគេបន្តអភិវឌ្ឍន៍សមត្ថភាព និងចូលរួមក្នុងសកម្មភាពកីឡាផ្សេងៗទៀតនាពេលអនាគត។ការប្រកួតនេះបានធ្វើឡើងរយៈពេល ២ថ្ងៃ ចាប់ពីថ្ងៃទី៣១ ខែសីហា (វគ្គជម្រុះ) ដល់ថ្ងៃទី១ ខែកញ្ញា (វគ្គផ្ដាច់ព្រ័ត្រ) ដោយមានក្រុមចូលរួមសរុបចំនួន ១៤ក្រុម ដែលក្នុងនោះមានក្រុមបាល់ទះបុរស ១០ក្រុម និងក្រុមបាល់ទះនារី ៤ក្រុម ដើម្បីស្វែងរកចំណាត់ថ្នាក់លេខ១ ដល់លេខ៣ ទាំងផ្នែកបុរស និងផ្នែកនារី។

ទិវារត់ប្រណាំងម៉ារ៉ាតុងអន្ដរជាតិចក្រភពអង្គរលើកទី១០ឆ្នាំនេះ មានអត្តពលិកមកពី៤៧ប្រទេសជុំវិញពិភពលោក

សម្រាប់ទិវារត់រត់ប្រណាំងម៉ារ៉ាតុងអន្តរជាតិចក្រភពអង្គរលើកទី១០ឆ្នាំនេះ មានអត្តពលិកមកពី៤៧ប្រទេស ជុំវិញពិភពលោក ដែលមានអត្តពលិកសរុបជាង៤ពាន់នាក់ ក្នុងនោះ អត្តពលិកបរទេសសរុបមានជិត ១ពាន់នាក់។ផ្តល់បទសម្ភាសន៍ឱ្យទូរទស្សន៍ BTV ឯកឧត្តម បណ្ឌិត ទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡំាពិកកម្ពុជា បានមានប្រសាសន៍ថា ទិវានេះមែនទែនទៅ ត្រូវរៀបចំនៅថ្ងៃទី៣ខែសីហា ប៉ុន្តែដោយសារបញ្ហាជម្លោះព្រំដែនកម្ពុជា.ថៃ ត្រូវលើកពេលមករៀបចំនៅថ្ងៃទី៣១ខែសីហា ក្នុងនោះសង្កេតឃើញមានអត្តពលិកចូលរួមនៅតែមានចំនួនច្រើន ដែលមានរហូតដល់ជាង៤ពាន់នាក់ និងមកពី៤៧ប្រទេសជុំវិញពិភពលោក ដែលទំាងអស់នេះដោយសារអត្តពលិក នៅតែមានការជឿជាក់ចំពោះរាជរដ្ឋាភិបាល ទើបបណ្តាលធ្វើឱ្យអត្តពលិក ពុំមានការព្រួយបារម្ភពីសុវត្ថិភាពឡើយ។ចំណែកអត្តពលិកបរទេស បានប្រាប់ដែរថា អត្តពលិកបរទេស ទិវារត់ប្រណាំងម៉ារ៉ាតុងអន្តរជាតិចក្រភពអង្គរ ក្នុងខេត្តសៀមរាប ប្រទេសកម្ពុជា បានប្រព្រឹត្តដោយភាពសប្បាយរីករាយ ដោយសារពួកគេជឿជាក់លើការរៀបចំរបស់រាជរដ្ឋាភិបាលកម្ពុជា ពោលគឺពុំមានការភ័យខ្លាចពីសុវត្ថិភាព ខណៈបញ្ហាព្រំដែនកម្ពុជា-ថៃនៅពុំទាន់មានភាពល្អប្រសើក្តី។ដោយឡែកសម្រាប់អត្តពលិកកម្ពុជាវិញ ក៏បានបង្ហាញពីភាពសប្បាយរីករាយផងដែរ ដែលមានអ្នកចូលរួមរត់ប្រណាំងយ៉ាងច្រើនកុះករ មានទំាងអត្តពលិកជាតិ និងអន្តរជាតិ ហើយពួកគាត់ក៏ជឿជាក់លើរាជរដ្ឋាភិបាលផងដែរចំពោះបញ្ហាព្រំដែន។សូមបញ្ជាក់ថា ទិវារត់ប្រណាំងម៉ារ៉ាតុងអន្តរជាតិចក្រភពអង្គរលើកទី១០ឆ្នាំនេះ បានបង្វែប្រធានបទរត់ដើម្បីសន្ដិភាព សាមគ្គីភាព ភាពសុខសាន្ដរបស់ប្រជាពលរដ្ឋ និងរក្សាការពារបេតិកភណ្ឌរបស់មនុស្សជាតិ ក៏ដូចជាការរួមចំណែកជួយគាំទ្រដល់កងទ័ពជួរមុខ និងជនភៀសសឹក ដែលរងផលប៉ះពាល់ដោយសារជម្លោះព្រំដែនកម្ពុជា-ថៃ ហើយឆ្នាំនេះមានអត្តពលិកចូលរួមប្រមាណ៤២២៤នាក់ មកពី៤៧ប្រទេស ក្នុងនោះមានអត្តពលិកបរទេសសរុបមានជិត១ពាន់នាក់ និងអត្តពលិកខ្មែរមានជាង៣ពាន់៤០០នាក់ ហើយប្រទេសចិនមានអត្តពលិកចូលរួមច្រើនជាងគេ៕ អត្ថបទ៖ គង់ រ៉េន

កីឡាករ ២៦រូប ត្រូវបានកោះហៅប្រមូផ្ដុំ ត្រៀមធ្វើម្ចាស់ផ្ទះវគ្គជម្រុះជើងឯក U23 អាស៊ី ពូលG

សហព័ន្ធកីឡាបាល់ទាត់កម្ពុជា បានបង្ហាញបញ្ជីឈ្មោះកីឡាករ ២៦នាក់ ដែលត្រូវបានកោះហៅចូលរួមប្រមូលផ្ដុំហ្វឹកហាត់ក្រុមជម្រើសជាតិអាយុក្រោម ២៣ឆ្នាំកម្ពុជា ដើម្បីត្រៀមធ្វើម្ចាស់ផ្ទះការប្រកួតជម្រុះជើងឯកអាស៊ីយុវជនអាយុក្រោម ២៣ឆ្នាំ ឆ្នាំ២០២៦ ពូលG ចាប់ពីថ្ងៃទី៣ ដល់ថ្ងៃទី៩ ខែកញ្ញា ឆ្នាំ២០២៥ ខាងមុខ នៅពហុកីឡដ្ឋានជាតិ(អូឡាំពិក) រាជធានីភ្នំពេញ។ជាមួយបញ្ជីឈ្មោះកីឡាករ ដែលជ្រើសរើស និងដឹកនាំដោយគ្រូបង្វឹកជនជាតិជប៉ុន លោក Koji Gyotoku គេឃើញមានការផ្លាស់ប្ដូរសមាសភាពថ្មីមួយចំនួន បើធៀបនឹងបញ្ជីឈ្មោះក្រុម U23 កម្ពុជា ដែលបានចូលរួមការប្រកួតជើងឯកអាស៊ាន កាលពីថ្មីៗ ។ អ្វីដែលគួរឲ្យចាប់អារម្មណ៍ ក៏បានលេចនូវវត្ដមានកីឡាករកូនកាត់ខ្មែរកាណាដា ឈឿន ដាវីន ដែលជាសមាជិកយុវជនថ្នាលនៃក្លិបលីគកំពូលកាណាដា York United FC ផងដែរ។ចំពោះកីឡាករ ២៥នាក់ផ្សេងទៀត រួមមានសមាជិកក្លិបព្រះខ័នរាជស្វាយរៀង មានកីឡាករ សុវណ្ណ ដូណា និង ជូន ស៊ីនទិ។ ភ្នំពេញក្រោន មានកីឡាករ បុង សាយូអ៊េល, កើត ពេជ្រ, យ៉ែម ដេវិត, ឈិន វឹននីន និង សោម បូរិទ្ធ។ កងយោធពលខេមរភូមិន្ទ មានកីឡាករ យ៉ង ភូមិន្ទ, ខន ណារ៉ង់ និង ម៉ាត់ ឡានី ។ ណាហ្គាវើលដ៏ មានកីឡាករ រ៉េត លីហេង, ផាត សុខា និង អ៊ាវ សុវណ្ណារ៉ា ។ បឹងកេត មានកីឡាករ លឹម អារុណរ៉េយមិន និង ឃាន់ សុប៊ិន។ វិសាខា មានកីឡាករ ស៊ិន សុវណ្ណមករា និង ម៉ុន រ៉ាដូ ។ ឡាយហ្វខេត្តព្រះសីហនុ មានកីឡាករ រ៉ុន ចុងមីង និង វ៉ាន វីត ។ អង្គរថាយហ្គឺរ មានកីឡាករ អ៊ឹម វ៉ាឃីម, ចាន់វិបុល ដាវីដ និង ទាំ មករា។ ISI ដង្កោសែនជ័យ មានកីឡាករ សំអុល ទីណា និងកីឡាករ វឿន វ៉ា មកពីក្លិបអឹមអូអាយ កំពង់ដេវ៉ា។គួរដឹងថា សម្រាប់ការប្រកួតជម្រុះពានរង្វាន់ AFC U-23 Asian Cup 2026 ដែលកម្ពុជានឹងធ្វើម្ចាស់ផ្ទះពូលG គឺមានបេក្ខភាព ៤ក្រុមចូលរួម រួមមានម្ចាស់ផ្ទះកម្ពុជា អ៊ីរ៉ាក់ អូម៉ង់ និងប៉ាគីស្ថាន។ ចំពោះកម្មវិធីប្រកួតរបស់ក្រុមគោព្រៃជំទង់កម្ពុជា គឺត្រូវជួបក្រុម U23 អូម៉ង់ មុនគេ នាថ្ងៃទី៣-កញ្ញា មុនបន្ដជួបក្រុមយុវជនប៉ាគីស្ថាន នាថ្ងៃទី៦-កញ្ញា និងចុងក្រោយ ត្រូវជួបក្រុមខ្លាំងអ៊ីរ៉ាក់ នាថ្ងៃទី៩ ខែកញ្ញា ឆ្នាំ២០២៥ ខាងមុខ៕អត្ថបទ លី ឈុនឡា, រូបភាពពាក់ព័ន្ធ៕

ក្រុមបាល់ទាត់នារី U16 កម្ពុជារបូត ៣ ពិន្ទុក្នុងប្រកួតដំបូងនៃជើងឯកអាស៊ាន នៅឥណ្ឌូនេស៊ី

ក្រុមជម្រើសជាតិនារីអាយុក្រោម ១៦ឆ្នាំគម្ពុជា បានចាប់ផ្ដើមយុទ្ធនាការប្រកួតបាល់ទាត់នារីជើងឯកអាស៊ីអាគ្នេយ៍អាយុក្រោម ១៦ឆ្នាំ ឆ្នាំ២០២៥ ហើយ ខណៈប្រកួតដំបូង ពួកគេពុំទទួលបានលទ្ធផលគាត់ប្រសើរឡើយ ក្រោយចាញ់ក្រុមជម្រើសជាតិ U16 នារីវៀតណាម ៥-០ កាលពីរាត្រីថ្ងៃព្រហស្បតិ៍កន្លងទៅ។ជំនួបបើឆាកពូលB នេះ វគ្គទី១ ក្រុមកីឡាការិនីវ័យក្មេងកម្ពុជា បានរបូត ២គ្រាប់ ហើយបានរក្សាដល់នាទី៧៥ ទើបក្រុមជម្រើសជាតិ U16 នារីវៀតណាម បន្ថែម ៣គ្រាប់ទៀត នៅចុងវគ្គទី២ ដើម្បីធានា ៣ពិន្ទុដំបូង និងឈរកំពូលតារាងបណ្ដោះអាសន្ន។សម្រាប់ការប្រកួតបន្ទាប់ ក្រុមជម្រើសជាតិ U16 នារីកម្ពុជា នឹងត្រូវជួបក្រុមជម្រើសជាតិ U16 នារីមីយ៉ាន់ម៉ា នាថ្ងៃទី២៣ ខែសីហាស្អែក ដែលជាជំនួបបញ្ចប់ក្នុងពូលB ។គួរដឹងថា សមាជិកក្រុមជម្រើសជាតិ U16 នារីកម្ពុជា ដែលបានជ្រើសរើសចូលរួមការប្រកួតជើងឯកថ្នាក់តំបន់នេះ ភាគច្រើនជ្រើសរើសចេញពីក្រុមបាល់ទាត់មន្ទីរ ក្លិប អង្គរការ និងសាលារៀន តាមបណ្ដារាជធានី-ខេត្ត ហើយមានកីឡាការិនីមួយចំនួនតូចប៉ុណ្ណោះ ដែលជ្រើសរើសចេញពីក្លិប។ចំពោះការប្រកួតជើងឯកបាល់ទាត់នារី U16 អាស៊ីអាគ្នេយ៍នេះដែរ គឺមាន ៩ក្រុមចូលរួម និងបែងចែកជា ៣ពូល ដើម្បីធ្វើការប្រកួតជម្រុះ ហើយក្រុមឈរលេខ១ នៃពូលនីមួយៗ ព្រមទាំងក្រុមលេខ២ ល្អជាងគេ ១ក្រុម នឹងបានឡើងវគ្គពាក់កណ្ដាលផ្ដាច់ព្រ័ត្រ៕អត្ថបទ លី ឈុនឡា, រូបភាពពាក់ព័ន្ធ៕

ក្រុម U16 នារីកម្ពុជា ចូលរួមការប្រកួតជើងឯកអាស៊ាន នៅឥណ្ឌូនេស៊ី

ក្រុមបាល់ទាត់ជម្រើសជាតិនារីអាយុក្រោម ១៦ឆ្នាំកម្ពុជា បានធ្វើដំណើរទៅដល់ទីក្រុង Surakarta ប្រទេសឥណ្ឌូនេស៊ីហើយ កាលពីល្ងាចថ្ងៃអង្គារកន្លងទៅ ដើម្បីចូលរួមការប្រកួតជើងឯកអាស៊ីអាគ្នេយ៍ ផ្នែកបាល់ទាត់នារីអាយុក្រោម ១៦ឆ្នាំ ASEAN U16 Girls’ Championship 2025 ចាប់ពីថ្ងៃទី២០ ដល់ថ្ងៃទី២៩ ខែសីហាខាងមុខ។សម្រាប់យុទ្ធនាការនេះ ក្រុមជម្រើសជាតិ U16 នារីកម្ពុជា ស្ថិតក្នុងពូលB ជាមួយក្រុមកីឡាការិនីវៀតណាម និងមីយ៉ាន់ម៉ា ។ រីឯពូលA គឺមានម្ចាស់ផ្ទះឥណ្ឌូនេស៊ី ម៉ាឡេស៊ី និងទីម័រខាងកើត និងពូលC មានសិង្ហបុរី អូស្ដ្រាលី និងថៃ ដែលត្រូវធ្វើការប្រកួតសន្សំពិន្ទុវិលជុំ ហើយក្រុមានពិន្ទុខ្ពស់ជាងគេនៃពូលនីមួយៗ ព្រមទាំងក្រុមឈរលេខ២ ល្អជាងគេ ក្នុងចំណោម ៣ពូល នឹងបានឡើងទៅវគ្គ ៤ក្រុមចុងក្រោយ។ជាមួយការប្រកួតកម្រិតតំបន់នេះដែរ សមាជិកក្រុមជម្រើសជាតិ U16 នារីកម្ពុជា សុទ្ធសឹងជាកីឡាករវ័យក្មេង ដែលភាគច្រើនជ្រើសរើសចេញពីក្រុមបាល់ទាត់មន្ទីរ ក្លិប អង្គរការ និងសាលារៀន តាមបណ្ដារាជធានី-ខេត្ត ហើយមួយកីឡាការិនីមួយចំនួន ដែលជ្រើសរើសចេញពីក្លិប តែក៏មានកីឡាការិនីកូនកាត់ ១រូបផងដែរ គឺកីឡាការិនី ខេនហ្ស៊ី ចូសឹបភីន ចាស៊ី្ម ម៉ៅ។ចំពោះភារកិច្ចដំបូង ក្រុមកីឡាការិនីវ័យក្មេងកម្ពុជា នឹងត្រូវជួបក្រុម U16 នារីវៀតណាមមុនគេ នាថ្ងៃទី២១ ខែសីហាស្អែក មុនជំនួបបញ្ចប់ពូលB ជាមួយក្រុមជម្រើសជាតិ U16 នារីមីយ៉ាន់ម៉ា នាថ្ងៃទី២៣ ខែសីហាខាងមុខ៕អត្ថបទ លី ឈុនឡា, រូបភាពពាក់ព័ន្ធ៕

ក្នុងឱកាសខួប ៥ឆ្នាំ នៃកីឡដ្ឋានខេត្តកំពង់ស្ពឺ ឯកឧត្តម ហ៊ុន ម៉ានី បង្ហើបពីតម្រុយថ្មី

ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ បានបង្ហើបពីតម្រុយថ្មី សម្រាប់វិស័យកីឡា និងប្រជាពលរដ្ឋអ្នកខេត្តកំពង់ស្ពឺទៀតហើយ ក្រោយឯកឧត្តមបានផ្ដួចផ្ដើម និងគាំទ្រនូវការសាងសង់ រហូតសម្រេចលេចចេញជារូបរាងកីឡដ្ឋានខេត្តកំពង់ស្ពឺ នាពេលបច្ចុប្បន្ន។តាមរយៈបណ្ដាញសង្គមផ្ទាល់ខ្លួនរបស់ឯកឧត្តមឧបនាយករដ្ឋមន្ដ្រី កាលពីថ្ងៃអាទិត្យកន្លងទៅ បានគូសបញ្ជាក់ថា គិតត្រឹមឆ្នាំ២០២៥ នេះ មានរយៈពេល ៥ឆ្នាំហើយ បើគិតពីការចាប់ផ្តើមសាងសង់កីឡដ្ឋានកំពង់ស្ពឺ ដែលក្លិបបាល់ទាត់ណាហ្គាវើលដ៏ បានសម្រេចចិត្តមកឈរជើងនៅខេត្តកំពង់ស្ពឺ ដែលនេះគឺជាការចាប់ដៃដ៏យូរអង្វែងរវាងក្លិប និងវិស័យកីឡារបស់អ្នកកំពង់ស្ពឺ។បន្ថែមលើនេះ ឯកឧត្តមបានរំលេចពីការជួបគ្នា ជាមួយថ្នាក់ដឹកនាំក្លិបណាហ្គាវើលដ៏ ក្នុងនោះក៏មានវត្តមានអ្នកឧកញ៉ា សំអាង វឌ្ឍនៈ សមាជិកក្រុមប្រឹក្សាភិបាលក្រុមហ៊ុន វឌ្ឍនៈ គ្រុប ផងដែរ ដើម្បីរំលឹកអនុស្សាវរីយ៍ផង និងពិគ្រោះយោបល់គ្នាផង ថាតើគ្រប់ភាគីពាក់ព័ន្ធនេះ អាចជំរុញកិច្ចសហប្រតិបត្តិការមួយកម្រិតទៀត ក្រោមរូបមន្ដឈ្នះឈ្នះ សម្រាប់ក្លិបបាល់ទាត់ណាហ្គាវើលដ៏ផង សម្រាប់វិស័យកីឡាផង និងអ្នកខេត្តកំពង់ស្ពឺផង។នេះគឺជាតម្រុយថ្មីមួយ ដែលបានបង្ហើបដោយឯកឧត្តម ហ៊ុន ម៉ានី ចំពោះការពិគ្រោះយោបល់គ្នា ដោយមានការចូលរួមពីថ្នាក់ដឹកនាំក្លិប ក៏ដូចជាវិស័យឯកជន ។ ប៉ុន្ដែពាក់ព័ន្ធនឹងតម្រុងថ្មី នៃកិច្ចសហប្រតិបត្តិការ ក្រោមរូបមន្ដឈ្នះឈ្នះ នៅមិនទាន់បញ្ជាក់ច្បាស់ថា ឯកឧត្តម ក៏ដូចជាក្លិបនឹងគ្រោងធ្វើអ្វីនោះទេ តែជារួមឯកឧត្តមបានបញ្ជាក់ហើយថា កិច្ចសហប្រតិបត្តិការនេះ អាចនឹងកើតឡើងក្រោមផលប្រយោជន៍រួម សម្រាប់ក្លិប វិស័យកីឡា និងប្រជាពលរដ្ឋខេត្តកំពង់ស្ពឺ ផ្ទាល់តែម្ដង៕អត្ថបទ លី ឈុនឡា, រូបភាពពាក់ព័ន្ធ៕

ព្រះខ័នរាជស្វាយរៀង ប្រកាសបន្ដកុងត្រាជាមួយប្រធានក្រុម សឿយ វិសាល និង ជូ ស៊ិនទិ

ក្លិបព្រះខ័នរាជស្វាយរៀង បានប្រកាសបន្ដកុងត្រាថ្មី ជាមួយកីឡាករសំខាន់ៗ ២រូប រួមមានប្រធានក្រុម សឿយ វិសាល និងខ្សែបម្រើវ័យក្មេង ជូ ស៊ិនទិ ដើម្បីបន្ដជួយក្រុមប្រកួតប្រជែង ក្នុងរដូវកាលថ្មី ឆ្នាំ២០២៥/២៦ ខាងមុខ។ការសម្រេចបន្ដកុងត្រាថ្មីរបស់ក្រុមការពារតំណែងជើងឯកលីគកំពូលកម្ពុជានេះ ធ្វើឡើងក្រោយការប្រកួតលីគរដូវកាលថ្មី ឆ្នាំ២០២៥/២៦ បានដំណើរការប្រកួតសន្សំពិន្ទុបាន ១សប្ដាហ៍កន្លងទៅ ខណៈក្រុមមានភារកិច្ចជាច្រើន ត្រៀមប្រកួតប្រជែងក្នុងរដូវកាលនេះ ទាំងពានសម្ដេចតេជោ ហ៊ុន សែន, ជើងឯកក្លិបបាល់ទាត់អាស៊ីអាគ្នេយ៍ និងពានរង្វាន់លំដាប់ទី៣ ទ្វីបអាស៊ី AFC Challenge League ជាដើម។ក្រឡេកមកចាប់អារម្មណ៍កីឡាករ ដែលព្រះខ័នរាជស្វាយរៀង ទើបប្រកាសបន្ដកុងត្រាវិញ សម្រាប់ សឿយ វិសាល បានចំណាយពេលជាង ១២ឆ្នាំមកហើយ ជាមួយក្លិបមានមូលដ្ឋាននៅខេត្តស្វាយរៀង បន្ទាប់ពីរូបគេបានចាកចេញពីអតីតក្រុមអាស៊ីអឺរ៉ុបយូណាយធីត កាលពីឆ្នាំ២០១៤ ។ វិសាល ត្រូវបានចាត់ទុកជាខ្សែការពារដ៏សំខាន់របស់ក្លិប ព្រមទាំងក្រុមជម្រើសជាតិកម្ពុជា ដែលតែងបង្ហាញវត្តមានក្នុងជម្រើស ១១នាក់ដំបូងស្ទើរគ្រប់ការប្រកួតទៀតផង។ចំណែកកីឡាករវ័យ ២២ឆ្នាំ ជូ ស៊ិនទិ ក៏ត្រូវបានចាត់ទុកជាកីឡាករស្នូលមួយរូបរបស់ក្លិបផងដែរ ។ ទោះបីមានកាយសម្បទាមិនសូវធំ តែទេពកោសល្យ និងបច្ចេកទេសដ៏ល្អរបស់រូបគេ បានទាក់ចិត្តគ្រូបង្វឹកជាច្រើន ដែលធ្លាប់ដឹកនាំក្លិបព្រះខ័នរាជស្វាយរៀង តាំងពីរូបគេបានចាកចេញពីជំរំបណ្ដុះបណ្ដាលនៃសាលាបាល់ទាត់ជាតិបាទី កាលពីឆ្នាំ២០២១ រហូតដល់បច្ចុប្បន្ន ដែលជាក្លិបអាជីពដំបូងរបស់ខ្លួន ។ ការបន្ដកុងត្រាថ្មីនេះ គឺជាឱកាសសម្រាប់ ជូ ស៊ិនទិ ក្នុងការបង្ហាញ និងអភិវឌ្ឍន៍សមត្ថភាពកាន់តែប្រសើរ ក្នុងការរួមចំណែកជួយក្រុម ជាមួយការប្រកួតថ្នាក់ជាតិ និងអន្ដរជាតិចំពោះមុខជាច្រើន។សម្រាប់ភារកិច្ចបន្ទាប់របស់ក្លិប បន្ទាប់ពីប្រកាសបន្ដកុងត្រាថ្មីជាមួយកីឡាករស្នូលទាំងពីរ ព្រះខ័នរាជស្វាយរៀង នឹងត្រូវធ្វើដំណើរទៅខេត្តសៀមរាប ដើម្បីជួបការប្រកួតសប្ដាហ៍ទី២ នៃលីគកំពូលកម្ពុជា ជាមួយក្រុមម្ចាស់ផ្ទះអង្គរថាយហ្គឺរ នាថ្ងៃទី១៦ ខែសីហាខាងមុខ មុនចាប់ផ្ដើមយុទ្ធនាការថ្មី ក្នុងការប្រកួតជើងឯកក្លិបបាល់ទាត់អាស៊ីអាគ្នេយ៍ ឆ្នាំ២០២៥/២៦ ពូលB ដោយត្រូវជួបក្រុមឈ្នះវគ្គ Play Off រវាងក្រុម Shan United របស់មីយ៉ាន់ម៉ា និងក្រុម Ezra FC របស់ឡាវ ក្រៅដីមុនគេ នាថ្ងៃទី២១ ខែសីហា ឆ្នាំ២០២៥ ខាងមុខ៕អត្ថបទ លី ឈុនឡា, រូបភាពពាក់ព័ន្ធ៕

បណ្ដាញសង្គម

ព័ត៌មានថ្មីៗ

ជនប៉ាឡេស្ទីនជម្លៀសខ្លួនស្វាគមន៍កងកម្លាំងអន្តរជាតិនៅហ្កាហ្សា និងអំពាវនាវឲ្យកសាងផ្ទះសម្បែងរបស់ពួកគេឡើងវិញ

ពលរដ្ឋវិលត្រឡប់ទៅកាន់តំបន់ភាគខាងត្បូងលីបង់វិញ ក្រោយការដកទ័ពរបស់អ៊ីស្រាអែល

ប្រធានាធិបតីហ្វីលីពីន លោក Marcos ប្រាប់ថា ប្រហែលដល់ពេលត្រូវពិនិត្យថាមពលនុយក្លេអ៊ែរឡើងវិញ

EU បញ្ចូនយន្តហោះ និងអ្នកពន្លត់អគ្គិភ័យទៅជួយទប់ទល់ចំហេះព្រៃ នៅបារាំង និងអេស្ប៉ាញ

ប្រធានាធិបតីអ៊ុយក្រែន ធ្វើដំណើរទៅដល់អង់គ្លេស សម្រាប់ជំនួបជាមួយលោកនាយករដ្ឋមន្រ្តី Burnham

ទីក្រុងប៉េកាំងជំរុញឱ្យសហរដ្ឋអាមេរិកឈប់គំរាមកំហែងដាក់ទណ្ឌកម្ម លើក្រុមហ៊ុន AI របស់ចិន

កងកម្លាំងអ៊ីស្រាអែល វាយប្រហារទីក្រុងជាច្រើននៅតំបន់វ៉េសប៊ែង ខណៈអំពើហិង្សាកាន់តែអាក្រក់ទៅ

អ្នកស្ម័គ្រចិត្តដំបូងទទួលវ៉ាក់សាំងបង្ការជំងឺអេបូឡា ជាផ្នែកមួយនៃការសាកល្បងរបស់សាកលវិទ្យាល័យ Oxford

សម្តេចរដ្ឋសភាធិបតី ឃួន សុដារី អញ្ជើញបំពេញទស្សនកិច្ចផ្លូវការ និងមិត្តភាពនៅសាធារណរដ្ឋសង្គមនិយមវៀតណាម

នគរបាលទីក្រុងប៊ែរឡាំង បាញ់សម្លាប់ជនសង្ស័យសំខាន់ ក្នុងការវាយប្រហារដ៏សាហាវ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877