BTV NEWS

Kazuyoshi Miura កីឡាករបាល់ទាត់អាជីពវ័យចំណាស់បំផុតស៊ុតបញ្ចូលទីជាលើកដំបូងក្នុងរយៈពេលជិត ៤ឆ្នាំ នៅវ័យ ៥៩ឆ្នាំ

វីរបុរស World Cup របស់កាប់វែរ Vozinha ព្រមព្រៀងផ្ទេរទៅកាន់ក្លិប Colo-Colo របស់ស៊ីលី

សារដ៏ចម្រូងចម្រាស «The Malvinas are Argentine» ត្រូវបានបោះពុម្ពផ្សាយដោយឥតគិតថ្លៃនៅអាហ្សង់ទីន

ក្រុម ស.ស.យ.ក អលស្ដារ គ្រោងរៀបចំការប្រកួតសប្បុរសធម៌ នាចុងខែសីហា ក្រោយជំនួបមិត្តភាពផ្លូវការលើកដំបូង

ព័ត៌មានកីឡា

Raphinha បន្តកិច្ចសន្យាថ្មីដល់ឆ្នាំ ២០២៨ និងចង់ចូលនិវត្តន៍ជាមួយ Barcelona

ខ្សែប្រយុទ្ធស្លាបប្រេស៊ីល Raphinha បាននិយាយថា ក្តីសុបិន្តរបស់គេគឺនឹងនៅជាមួយ Barcelona ដល់ចុងក្រោយនៃអាជីពកីឡាករ។ ការលើកឡើងបែបនេះគឺបន្ទាប់ពីចុះហត្ថលេខាកិច្ចសន្យាថ្មីជាមួយ Barcelona ដែលមានសុពលភាពដល់ឆ្នាំ ២០២៨។ កីឡាករវ័យ ២៨ ឆ្នាំរូបនេះបានស៊ុតបញ្ចូលទី ៣៤ គ្រាប់ ប៉ះបញ្ជូន ២៥ ក្នុងការបង្ហាញខ្លួន ៥៦ ប្រកួតជាមួយ Barcelona រដូវកាលនេះក្រោមការដឹកនាំរបស់អ្នកចាត់ការ Hansi Flick ឈ្នះជើងឯកក្នុងស្រុកទាំងអស់រួមមាន La Liga, Copa del Rey និង Spanish Super Cup។ Raphinha បានផ្លាស់មកកាន់ Barcelona កាលពីឆ្នាំ ២០២២ ផ្ទេរពី Leeds United ក្នុងតម្លៃ ៥៥ លានផោន។ បន្ទាប់ពីស៊ុតបញ្ចូលទីបានត្រឹម ១៣ គ្រាប់ក្នុងពីររដូវកាលដំបូងនៅ Barcelona, Raphinha ធ្លាប់ធ្លាក់ក្នុងបញ្ជីលក់ចេញ ស្របពេលក្លិបកំពុងជួបវិបត្តិហិរញ្ញវត្ថុ។ តែរដូវកាល ២០២៤-២៥ នេះ ជាការស្តារកិត្តិយសឡើងវិញគួរកត់សំគាល់ ក្រោយស៊ុតបញ្ចូលទី ១៨ គ្រាប់នៅ La Liga។ Raphinha ក៏រកបាន ១៣ គ្រាប់ផ្សេងទៀតនៅ Champions League និងប៉ះប៉ញ្ជូន ៩ នាំក្រុមឡើងដល់វគ្គ ពាក់កណ្តាលផ្តាច់ព្រ័ត្រ។ Barcelona នឹងបិទបញ្ចប់រដូវកាល La Liga របស់ខ្លួនក្នុងនាមជាជើងឯកដោយត្រូវជួបក្រុមម្ចាស់ផ្ទះ Athletic Bilbao នៅថ្ងៃសៅរ៍នេះ៕អត្ថបទ៖នាង សុភាវុធ

Luka Modric នឹងចាកចេញពី Real Madrid ក្រោយចប់ Club World Cup

ប្រធានក្រុម Real Madrid, Luka Modric បានបញ្ជាក់ថា នឹងចាកចេញពីក្លិបយក្សអេស្ប៉ាញក្រោយចប់ព្រឹត្តិការណ៍ក្លិបបាល់ទាត់ពិភពលោក Club World Cup រដូវក្តៅខាងមុខនេះ។ ខ្សែបម្រើវ័យ ៣៩ ឆ្នាំក្រូអាស៊ីរូបនេះ ជាម្ចាស់ជ័យលាភី Ballon d’Or នៅឆ្នាំ ២០១៨ នឹងបង្ហាញខ្លួនចុងក្រោយ នៅកីឡដ្ឋាន Santiago Bernabeu ថ្ងៃសៅរ៍នេះនៅពេល Real Madrid បើកទ្វារផ្ទះស្វាគមន៍ Real Sociedad បិទបញ្ចប់រដូវកាល La Liga។ “ពេលវេលាបានមកដល់ហើយ ពេលវេលាដែលមិនចង់ឱ្យមកដល់ តែនេះគឺបាល់ទាត់ និងជីវិតរស់នៅ មានការចាប់ផ្តើម ក៏មានទីបញ្ចប់” នេះជាសំនេររបស់ Modric នៅបណ្តាញសង្គម Instagram បញ្ជាក់ពីការចាកចេញរបស់ខ្លួន។ មកដល់ Real Madrid នៅឆ្នាំ ២០១២ ក្នុងតម្លៃផ្ទេរប្រមាណ ៣០ លានផោនពីក្លិបអង់គ្លេស Tottenham Hotspur, Luka Modric បានក្លាយជាសមាជិកសំខាន់បាត់ទៅហើយសម្រាប់ Real Madrid ដែលរួមមានការឈ្នះជើងឯកសរុប ២៨ ពានសំខាន់ៗ បូករួមទាំង Champions League ៦ លើក និង La Liga ៤ លើក FIFA Club World Cup ៦ លើក European Super Cup ៥ លើក Copa del Rey ២ លើក និង Spanish Super Cup ៥ លើកក្នុងរយៈពេល ១៣ រដូវកាល។ Luka Modrid នឹងចាកចេញពី Real Madrid ក្នុងនាមជាកីឡាករដែលមានកិត្តិនាមអស្ចារ្យម្នាក់តាមរយៈសមិទ្ធផលរបស់ខ្លួនដែលបានបង្ហាញខ្លួនសរុប ៥៩០ ប្រកួត ស៊ុតបញ្ចូលទី ៤៣ គ្រាប់ និងប៉ះបញ្ជូន ៩៥។ Modrid បច្ចុប្បន្នឈរលេខបីក្នុងតារាងកីឡាករដែលបង្ហាញខ្លួនច្រើនបំផុតនៅ La Liga តាមពីក្រោយ Oscar de Marcos របស់ Athletic Bilbao និង Koke របស់ Atletico Madrid។ Real Madrid នឹងចាប់ផ្តើម Club World Cup ដោយត្រូវជួបជាមួយក្រុមអារ៉ាប៊ីសាអ៊ូឌីត Al-Hilal មុនបន្តជួបក្លិបម៉ិកស៊ិក Pachuca និងក្លិបអូទ្រីស RB Salzburg៕អត្ថបទ៖នាង សុភាវុធ

កីឡាករហូឡង់ Olav Kooij ឈ្នះដំណាក់កាលទី ១២ ប្រណាំងកង់ grand Tour, Giro d’Italia

កីឡាករប្រណាំងកង់ហូឡង់ Olav Koiij បានប្រជែងឈ្នះដំណាក់កាលទី ១២ នៃព្រឹត្តិការណ៍ប្រណាំងកង់លំដាប់ Grand Tour, Giro d’Italia ខណៈដែលកីឡាករម៉ិកស៊ិក Isaac del Toro បន្តដឹកនាំតារាងវេលារួម។ ដំណាក់កាលទី ១២ ដែលមានចំងាយផ្លូវ ១៧២ គីឡូម៉ែត្រចេញពី Modena ទៅ Viadana ភាគខាងជើងប្រទេសអ៊ីតាលី Olav Kooij ដែលជិះឱ្យក្រុម Visma-Lease a Bike ប្រើពេល ៣ ម៉ោង ៥៥ នាទី ៤០ វិនាទី ដើម្បីមកដល់ទីព្រ័ត្រមុនគេ ពោលគឺវ៉ាគូប្រជែងនៅចំណុចចុងក្រោយគឺមិត្តរួមជាតិហូឡង់ Casper van Uden ដែលទទួលបាន ចំណាត់ថ្នាក់លេខពីរ និងលេខបីបានទៅកីឡាករអង់គ្លេស Ben Turner។ ក្រោយ ១២ ដំណាក់កាលនេះ កីឡាករម៉ិកស៊ិក Isaac del Toro ជិះឱ្យក្រុម UAE Team Emirate នៅតែបន្តនាំមុខគេក្នុងតារាងរួមជាមួយនឹងថេរវេលាសរុប ៣៨ ម៉ោង ៤៧ នាទី ១ វិនាទី តាមពីក្រោយ ៣៣ វិនាទីដោយកីឡាករអេស្ប៉ាញ Juan Ayuso និងលេខបីកីឡាករម្ចាស់ផ្ទះអ៊ីតាលី Antonio Tiberi យឺតជាង ១ នាទី ៩ វិនាទី។ សម្រាប់ដំណាក់កាលទី ១៣ ថ្ងៃសុក្រនេះមានចំងាយផ្លូវ ១៨០ គីឡូម៉ែត្រចេញពី Rovigo ទៅ Vicenza ភាគខាងជើងប្រទេសអ៊ីតាលី៕អត្ថបទ៖នាង សុភាវុធ

Tottenham Hotspur ឈ្នះជើងឯកអឺរ៉ុបដំបូងតាំងពីឆ្នាំ ១៩៨៤ និងជាពានសំខាន់ដំបូងតាំងពីឆ្នាំ ២០០៨

ទីបំផុតក្លិបបាល់ទាត់អង់គ្លេស Tottenham Hotspur សម្រេចបានការឈ្នះជើងឯក UEFA Europa League តាមរយៈជ័យជំនះ ១-០ លើក្រុមបិសាចក្រហម Manchester United វគ្គផ្តាច់ព្រ័ត្រនៅ Bilbao ប្រទេសអេស្ប៉ាញ។ មួយគ្រាប់ជ័យជំនះរបស់ Brennan Johnson នៅវគ្គទីមួយមានន័យគ្រប់យ៉ាងសម្រាប់ Spurs៖ - បញ្ចប់រដូវកាលដ៏អាក្រក់របស់ Spurs ក្នុងរយៈពេល ៥០ នៅ Premier League ជាមួយនឹងការឈ្នះជើងឯកក្របខណ្ឌក្លិបកំពូលទីពីររបស់អឺរ៉ុប- ជាជើងឯកអឺរ៉ុបលើកដំបូងសម្រាប់ Spurs តាំងពីឆ្នាំ ១៩៨៤ ដែលឈ្នះជើងឯក UEFA Cup - ជាជើងឯកដំបូងរាប់ពីឆ្នាំ ២០០៨ ដែលឈ្នះពាន League Cup - ជាជើងឯកដែលកំណត់ថា Spurs មានកៅអី UEFA Champions League រដូវកាលក្រោយ- អាចជាការស្រោចស្រង់កៅអីរបស់អ្នកចាត់ការ Ange Postecoglou ងាកមកក្រុមបិសាចក្រហម Manchester United ជាយប់គ្មានសំណាងរបស់ពួកគេ ដោយសារខ្លួនជាក្រុមមានប្រៀប គ្រប់គ្រងការប្រកួត គ្រប់គ្រងបាល់លើសលុបដល់ទៅ ៧៣% ធៀបនឹង Spurs ២៧% ជាពិសេសគឺមានឱកាសស៊ុតចំគោលដៅ ៦ លើក និងខុសគោលដៅ ៦ លើក តែមិនសម្រេចទី។ ចំណែក Spurs ត្រឹមលេងការពារតែមានឱកាសស៊ុតមួយលើកគត់ចំគោលដៅ និងសម្រេចទីនៅនាទីទី ៤២ ដោយ Brennan Johnson ដែលធ្វើឱ្យ Spurs មានមុខនៅ Champions League ម្តងទៀតរដូវកាលក្រោយ ក្រោយអវត្តមានពីររដូវកាល។ បរាជ័យនេះដែរមានន័យថា Manchester United នឹងមិនមានកៅអីអឺរ៉ុបសោះរដូវកាលក្រោយ ដែលវាជាលើកទីពីរប៉ុណ្ណោះរាប់តាំងពីឆ្នាំ ១៩៩០៕អត្ថបទ៖នាង សុភាវុធ

ខ្សែបម្រើអង់គ្លេស Jude Bellingham របួសស្មាត្រូវសម្រាកដល់រដូវកាលថ្មី

ខ្សែបម្រើ Real Madrid និងអង់គ្លេស Jude Bellingham ត្រូវរំពឹងថាអវត្តមានរហូតដល់រដូវកាលថ្មី នៅពេលវះកាត់របួសស្មារួចរាល់។ កីឡាករវ័យ ២១ ឆ្នាំរូបនេះមានបញ្ហារបួសស្មារ៉ាំរៃតាំងពីឆ្នាំ ២០២៣ ខណៈ Real Madrid បានដាក់កាលវិភាគ វះកាត់របួសនេះក្រោយបញ្ចប់ការប្រកួត Club World Cup នៅសហរដ្ឋអាមេរិក។ អតីតខ្សែបម្រើ Birmingham រូបនេះត្រូវបានគេឃើញពាក់អាវជំនួញស្មានៅខាងក្នុងនៅពេលប្រកួតឱ្យក្រុមជម្រើសជាតិ និង Real Madrid ហើយក៏បានអវត្តមានការប្រកួតមួយចំនួននៅចុងឆ្នាំ ២០២៣ នោះក្រោយរបួសស្មាដែលទទួលរងពេលលេងទល់នឹង Rayo Vallecano។ Club World Cup ដែលនឹងរៀបចំនៅសហរដ្ឋអាមេរិកនឹងចាប់ផ្តើមពីថ្ងៃទី ១៥ ខែមិថុនាបញ្ចប់នៅថ្ងៃទី ១៣ ខែកក្កដា។ ក្រោយព្រឹត្តិការណ៍ចប់ Bellingham នឹងត្រូវធ្វើការវះកាត់ភ្លាមៗ ដែលមានន័យថាគេនឹងអវត្តមានពីការប្រកួត Preseason ទាំងអស់ និងយ៉ាងហោចណាស់អវត្តមានពីការប្រកួតរដូវកាលថ្មី ៦ សប្តាហ៍ដំបូង ក៏ដូចជាអវត្តមានពីក្រុមជម្រើសជាតិអង់គ្លេសប្រកួតជម្រុះ World Cup ទល់នឹងអង់ដូរ៉ា និងស៊ែបនៅខែកញ្ញាផងដែរ។ រំលឹកថា Jude Bellingham ជាសមាជិកសំខាន់របស់ Real Madrid តាំងពីផ្ទេរពី Dortmund តម្លៃ ១១៥ លានផោន ដោយបានជួយ Real Madrid ឈ្នះជើងឯក La Liga និង Champions League នៅរដូវកាលដំបូងជាមួយនឹងការស៊ុតបញ្ចូលទី ២៣ គ្រាប់នៃការបង្ហាញខ្លួន ៤៣ ប្រកួត។ រដូវកាលនេះ Bellingham ស៊ុតបញ្ចូលទីបានត្រឹម ១៤ គ្រាប់ប៉ុណ្ណោះក្នុងចំណោម ៥២ ប្រកួតខណៈ Real Madrid បាត់បង់ពាន La Liga ទៅ Barcelona និងធ្លាក់ត្រឹមវគ្គ ៨ ក្រុម Champions League ក្រោមស្នាដៃ Arsenal៕អត្ថបទ៖នាង សុភាវុធ

អ្នកចាត់ការ Ruben Amorim យល់ព្រមចាកចេញពី Manchester United ដោយគ្មានសំណងប្រសិនក្លិបត្រូវការអ្នកថ្មី

អ្នកចាត់ការក្រុម Manchester United លោក Ruben Amorim បាននិយាយថា លោកមានទំនុកចិត្តថានៅតែជាមនុស្សត្រឹមត្រូវសម្រាប់ការងារនៅ Old Trafford បន្ទាប់ពីក្លឹបចាញ់ក្រុម Tottenham Hotspur វគ្គផ្តាច់ព្រ័ត្រ Europa League ប៉ុន្តែយល់ព្រមលាលែងដោយគ្មានសំណងកិច្ចសន្យា ប្រសិនបើថ្នាក់ដឹកនាំក្លិបត្រូវការអ្នកថ្មី Amorim និងក្រុមការងារ សង្ឃឹមថាការឈ្នះជើងឯក Europa League នឹងស្រោចស្រង់រដូវកាលដ៏អាក្រក់ Manchester United នៅ Premier League ដែលធ្លាក់ដល់ចំណាត់ថ្នាក់លេខ ១៦។ ផ្ទុយទៅវិញ មួយគ្រាប់ជ័យជំនះរបស់ Brennan Johnson ជួយឱ្យ Spurs ទទួលបានកៅអីមួយក្នុងក្របខ័ណ្ឌ Champions League រដូវកាលក្រោយ តែ Man United ត្រូវទំនេរពីអឺរ៉ុប។ “នៅពេលនេះ វាបានស្តែងពីជោគវាសនារបស់ខ្ញុំ តែចាំមើលទាំងអស់គ្នា ខ្ញុំតែងតែបើកចំហរជានិច្ច ទទួលយកគ្រប់យ៉ាង ហើយខ្ញុំមិនការពារខ្លួនឯងឡើយ។ ប្រសិនបើក្រុមប្រឹក្សាក្លិប និងអ្នកគាំទ្រគិតថា ខ្ញុំមិនសមកាន់តំណែងបន្ត ខ្ញុំនឹងចាកចេញភ្លាមដោយមិនមានការចរចាអ្វីទាំងអស់ និងមិនទាមទារសំណងកិច្ចសន្យាផង” នេះជាការលើកឡើងរបស់អតីតគ្រូបង្វឹក Sporting Lisbon ក្នុងសន្និសីតសារព័ត៌មានក្រោយចប់ការប្រកួត។ បរាជ័យវគ្គផ្តាច់ព្រ័ត្រ Europa League ខកខានឱកាសនៅ Champions League រដូវកាលក្រោយ មានន័យថា Manchester United បាត់បង់ផលប្រយោជន៍ហិរញ្ញវត្ថុ ៨០ ទៅ ១០០ លានផោន ដែលបានមកពីការសិទ្ធិផ្សាយផ្ទាល់ ការលក់សំបុត្រ និងពាណិជ្ជកម្ម៕ អត្ថបទ៖នាង សុភាវុធ

Buriram និង Cong An Hanoi វគ្គផ្តាច់ព្រ័ត្រដ៏រំជើបរំជួលគ្រងជើងឯកក្លិបកំពូលអាស៊ាន

ព្រឹត្តិការណ៍បាល់ទាត់ក្របខណ្ឌក្លិបកំពូលអាស៊ាន បានបិទបញ្ចប់ដោយការប្រកួតវគ្គផ្តាច់ព្រ័ត្រដ៏រំជើបរំជួលរវាងក្លិបថៃ Buriram United និង Cong An Hanoi។ បន្ទាប់ពីលទ្ធផលស្មើគ្នា ២-២ នៅទឹកដីវៀតណាម ក្រុមទាំងពីរនៅតែបង្ហាញការប្រកួតដ៏ជក់ចិត្តសម្រាប់អ្នកទស្សនា តាមរយៈការប្រើប្រាស់យុទ្ធសាស្រ្តប្រយុទ្ធត្រូវការគ្រាប់បាល់គ្រប់នាទី។ ការប្រកួតនៅទឹកដី Buriram ក្រុមភ្ញៀវវៀតណាម Cong An Hanoi មានឱកាសនាំមុខមុន ២-០ ដោយគ្រាប់បាល់ Jason Pendant នាទីទី ១៥ និងបាល់ពិន័យ ១១ ម៉ែត្ររបស់ Leo Artur នាទីទី ៣៩។ Cong An Hanoi ត្រូវបានគេមើលឃើញថាជាជើងឯកទៅហើយ តែនៅនាទីទី ៨៣ Buriram តបបានមួយគ្រាប់វិញដោយ Peter Zulj។ បន្ថែមបង្គ្រប់បួននាទី បន្ទាប់ពីមានការពន្យារពេលរបស់វៀតណាម ថៃក៏មានក៏មានបាល់ហ្វ្រីឃីកចុងម៉ោង ហើយរឿងមិនគួរឱ្យជឿនោះគឺ Lucas Crispim ស៊ុតសម្រេចពីចំងាយនៅនាទីទី ៩០+៨ ផ្ទុះការតវ៉ាពីកីឡាករក្រុម Cong An Hanoi។ ស្មើគ្នា ២-២ និងសរុបទាំងពីរជើង ៤-៤ ក្រុមទាំងពីរត្រូវលេងម៉ោងបន្ថែម ១៥ នាទីពីរដង។ Buriram លើកនេះជាអ្នកនាំមុខមុនវិញដោយ Guilherme Bissoli ដោយបាល់ពិន័យ ១១ ម៉ែត្រនាទីទី ១០៥ តែពួកគេក៏ស្គាល់ពាក្យថាខកចិត្តដែរនៅពេល Cong An Hanoi តាមស្មើវិញចុងម៉ោងដោយការតែតបញ្ចូលទីរបស់ Alan នាទីទី ១៨។ ជៀសមិនផុតពីវគ្គ ១១ ម៉ែត្រកាត់សេចក្តី សំណាងចុងក្រោយធ្លាក់ទៅក្រុមម្ចាស់ផ្ទះ Buriram ក្រោយអ្នកចាំទី Budprom សង្គ្រោះបាល់បីលើកឱ្យ Buriram ឈ្នះជើងឯកក្លិបកំពូលអាស៊ាន Shopee Cup៕

កីឡាករវ័យ ៤០ ឆ្នាំស្វ៊ីស Stanislas Wawrinka ទទួលបានការអញ្ជើញចូលរួមប្រកួត Grand Slam, French Open

អតីតជើងឯក Grand Slam, French Open កីឡាករស្វ៊ីស Stanislas Wawrinka បានទទួលការអញ្ជើញឱ្យចូលរួមការប្រកួតនៅ Roland Garros ឆ្នាំនេះ បើទោះឈានដល់វ័យ ៤០ ឆ្នាំក៏ដោយ។ Stanislas Wawrinka ធ្លាប់យកឈ្នះ Novak Djokovic នៅវគ្គផ្តាច់ព្រ័ត្រ ២០១៥ លើកពាន French Open នេះដែលជាពាន Grand Slam ទីពីរក្នុងចំណោមបីនៃអាជីពរបស់ខ្លួន។ បច្ចុប្បន្នវ័យ ៤០ ឆ្នាំ Wawrinka បានធ្លាក់ដល់ចំណាត់ថ្នាក់លេខ ១៣២ ពិភពលោកនៃតារាងចំណាត់ថ្នាក់របស់ ATP។ ឆ្នាំមុន Wawrinka បានឈានចូលជុំទីពីរ French Open តែចាញ់កីឡាកររុស្ស៊ី Pavel Kotov និងមិនដែលឈានដល់សប្តាហ៍ទីពីរឡើយរាល់ព្រឹត្តិការណ៍ Grand Slam តាំងពីឆ្នាំ ២០២០ នៅ Australian Open។ កីឡាករជើងចាស់បារាំងបច្ចុប្បន្នវ័យ ៣៨ ឆ្នាំ Richard Gasquet ដែលនឹងចូលនិវត្តន៍ក្រោយចប់ French Open នេះ ក៏ទទួលបានការអញ្ជើញឱ្យចូលរួមប្រកួតផងដែរ។ French Open ជាព្រឹត្តិការណ៍ Grand Slam ទីពីរប្រចាំឆ្នាំនឹងចាប់ផ្តើមពីថ្ងៃទី ២៥ ខែឧសភានេះដល់ថ្ងៃទី ៨ ខែមិថុនា៕អត្ថបទ៖នាង សុភាវុធ

កីឡាការិនីជិត ៥០នាក់ ចូលរួមធ្វើតេស្ដជម្រើសជាតិ U19 កម្ពុជា ត្រៀមការប្រកួតជើងឯកអាស៊ាន ខែក្រោយ

ក្រុមបាល់ទាត់ជម្រើសជាតិនារីអាយុក្រោម ១៩ឆ្នាំកម្ពុជា បានចាប់ផ្ដើមធ្វើតេស្ដហើយ ដើម្បីចម្រាញ់ធនធានកីឡាការិនីឆ្នើមៗត្រៀមការប្រកួតជើងឯកបាល់ទាត់នារីអាយុក្រោម ១៩ឆ្នាំប្រចាំតំបន់អាស៊ីអាគ្នេយ៍ ASEAN U19 Girls’ Championship 2025 នៅប្រទេសវៀតណាម នាថ្ងៃទី៩ ដល់ថ្ងៃទី១៨ ខែមិថុនា ឆ្នាំ២០២៥ ខាងមុខ។ បេសកកម្មក្រុមជម្រើសជាតិនារី U19 កម្ពុជា ដែលដឹកនាំដោយគ្រូបង្វឹក ឈឺន នីផា នេះ ត្រូវបានកោះហៅកីឡាការិនីវ័យក្មេងចំនួន ៤៥នាក់ចូលរួមធ្វើតេស្ដសមត្ថភាពដំណាក់កាលទី១ ចាប់ពីថ្ងៃទី១៩ ដល់ថ្ងៃទី២១ ខែឧសភា ឆ្នាំ២០២៥ នៅសាលាបាល់ទាត់ជាតិបាទី ។ ចំពោះកីឡាការិនី ដែលបានកោះហៅមកធ្វើតេស្ដនេះដែរ រួមមានសមាជិកសមាគមក្លិបបាល់ទាត់មីស្ទើរលេង ១០នាក់, ក្លិបបាល់ទាត់សៀមរាប ៩នាក់, ក្លិបបឹងកេត ៦នាក់, ណាហ្គាវើលដ៏ ៦នាក់, ព្រះខ័នរាជស្វាយរៀង ៥នាក់, វិសាខា ៥នាក់, ភ្នំពេញក្រោន ២នាក់ និងសមាជិកក្រុមមន្ទីរអប់រំ យុវជន និងកីឡា ខេត្តកំពង់ឆ្នាំង ២នាក់។ សម្រាប់លក្ខណៈ នៃការធ្វើតេស្ដនេះដែរ នៅមិនទាន់បញ្ជាក់នឹងធ្វើប៉ុន្មានដំណាក់កាលនៅឡើយទេ។ គួរដឹងថា យុទ្ធនាការប្រកួតពានរង្វាន់ ASEAN U19 Girls’ Championship 2025 ដែលនឹងធ្វើឡើងនៅទីក្រុងហូជីមិញ ប្រទេសវៀតណាមនេះ ក្រុមជម្រើសជាតិនារីអាយុក្រោម ១៩ឆ្នាំកម្ពុជា ស្ថិតក្នុងពូលB ជាមួយថៃ ឥណ្ឌូនេស៊ី និងម៉ាឡេស៊ី គ្រាដែលពូលA មាន ៤ក្រុមដូចគ្នា គឺមានម្ចាស់ផ្ទះវៀតណាម មីយ៉ាន់ម៉ា ឡាវ និងទីម័រខាងកើត៕អត្ថបទ លី ឈុនឡា, រូបភាព FFC៕

មជ្ឈមណ្ឌលវាយកូនបាល់ US Open ប្រកាសគម្រោងជួសជុលកែលម្អឡើងវិញតម្លៃ ៨០០ លានដុល្លារ

មជ្ឈមណ្ឌលកីឡាវាយកូនបាល់ Billie Jean King National Tennis Centre ដែលជាទឹកដីរៀបចំការប្រកួត Grand Slam, US Open បានប្រកាសពីគម្រោងជួសជុលកែលម្អរបស់ខ្លួន ដែលចំណាយទុនប្រមាណ ៨០០ លានដុល្លារអាមេរិក នេះបើតាមការប្រកាសរបស់សមាគមកីឡាវាយកូនបាល់អាមេរិក USTA។ គម្រោងផែនការមេនៃការជួសជុលកែលំអ ក៏បានបូកបញ្ជូលការពង្រីកកៅអីទស្សនានៃកីឡដ្ឋានធំ Arthur Ashe បន្ថែម ២០០០ កៅអីនៃចំនួនចាស់ ២៣៧៧១ ជាកីឡដ្ឋានវាយកូនបាល់ធំបំផុតលើលោក។ ក្រៅពីនោះ ក៏មានការលម្អច្រកផ្លូវចូល បន្ថែមហេដ្ឋារចនាសម្ព័ន្ធខាងក្នុងសម្រាប់អ្នកគាំទ្រ និងធ្វើទំនើបកម្មហេដ្ឋារចនាសម្ព័ន្ធដែលមានស្រាប់។ ចំណែកតារាងប្រកួតខាងក្រៅហៅថា Flushing Meadows ដែលមានច្រើនតារាងនោះ ក៏ត្រូវធ្វើការកែលម្អពង្រីកបន្ថែមផ្នែកខាងក្នុង និងខាងក្រៅផងដែរ។ USTA មានបំណងផ្តល់មូលនិធិដល់គម្រោងជួសជុលដោយខ្លួនឯង ជាមួយនឹងការងារដែលត្រូវធ្វើក្នុងដំណាក់កាលនៃការប្រកួត ដើម្បីកាត់បន្ថយការរំខាន ហើយសង្ឃឹមថានឹងបញ្ចប់បាននៅឆ្នាំ ២០២៧។ កីឡដ្ឋាន Louis Armstrong ដែលផ្ទុកទស្សនិកជនច្រើនជាង ១៤០០០ បានបើកដំណើរការក្នុងឆ្នាំ ២០១៨ ដើម្បីជំនួសកីឡដ្ឋានឆ្នាំ ១៩៧៨ ដែលមានឈ្មោះដូចគ្នា ដោយមានដំបូលអាចបើកបិទបាន។ ព្រឹត្តិការណ៍ US Open បានស្វាគមន៍អ្នកគាំទ្រច្រើនជាងមួយលាននាក់ ដែលជាកំណត់ត្រាមួយក្នុងឆ្នាំ ២០២៤ ។ ឆ្នាំនេះដែរ US Open បានពង្រីកដល់ការប្រកួតបន្ថែមមួយថ្ងៃដល់ ១៥ ថ្ងៃសម្រាប់ឆ្នាំ ២០២៥ នេះ ដែលគេរំពឹថានឹងទាក់ទាញអ្នកចូលរួម ៧០០០០ នាក់ថែមទៀត៕ អត្ថបទ៖នាង សុភាវុធ

បណ្ដាញសង្គម

ព័ត៌មានថ្មីៗ

ជនប៉ាឡេស្ទីនជម្លៀសខ្លួនស្វាគមន៍កងកម្លាំងអន្តរជាតិនៅហ្កាហ្សា និងអំពាវនាវឲ្យកសាងផ្ទះសម្បែងរបស់ពួកគេឡើងវិញ

ពលរដ្ឋវិលត្រឡប់ទៅកាន់តំបន់ភាគខាងត្បូងលីបង់វិញ ក្រោយការដកទ័ពរបស់អ៊ីស្រាអែល

ប្រធានាធិបតីហ្វីលីពីន លោក Marcos ប្រាប់ថា ប្រហែលដល់ពេលត្រូវពិនិត្យថាមពលនុយក្លេអ៊ែរឡើងវិញ

EU បញ្ចូនយន្តហោះ និងអ្នកពន្លត់អគ្គិភ័យទៅជួយទប់ទល់ចំហេះព្រៃ នៅបារាំង និងអេស្ប៉ាញ

ប្រធានាធិបតីអ៊ុយក្រែន ធ្វើដំណើរទៅដល់អង់គ្លេស សម្រាប់ជំនួបជាមួយលោកនាយករដ្ឋមន្រ្តី Burnham

ទីក្រុងប៉េកាំងជំរុញឱ្យសហរដ្ឋអាមេរិកឈប់គំរាមកំហែងដាក់ទណ្ឌកម្ម លើក្រុមហ៊ុន AI របស់ចិន

កងកម្លាំងអ៊ីស្រាអែល វាយប្រហារទីក្រុងជាច្រើននៅតំបន់វ៉េសប៊ែង ខណៈអំពើហិង្សាកាន់តែអាក្រក់ទៅ

អ្នកស្ម័គ្រចិត្តដំបូងទទួលវ៉ាក់សាំងបង្ការជំងឺអេបូឡា ជាផ្នែកមួយនៃការសាកល្បងរបស់សាកលវិទ្យាល័យ Oxford

សម្តេចរដ្ឋសភាធិបតី ឃួន សុដារី អញ្ជើញបំពេញទស្សនកិច្ចផ្លូវការ និងមិត្តភាពនៅសាធារណរដ្ឋសង្គមនិយមវៀតណាម

នគរបាលទីក្រុងប៊ែរឡាំង បាញ់សម្លាប់ជនសង្ស័យសំខាន់ ក្នុងការវាយប្រហារដ៏សាហាវ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877