BTV NEWS

អ្នកជំនាញជួសជុលនៅប្រាសាទជម ខិតខំស្វែងរកប្រភពដើមថ្ម ដែលជ្រុះធ្លាក់រាយប៉ាយមកជួសជុលឡើងវិញ

នាយកដ្ឋានបុរាណវិទ្យា និងបុរេប្រវត្តិវិទ្យា បង្ហាញវឌ្ឍនភាពការងារ ក្នុងការថែរក្សា និងការពារ ទីតាំងបុរាណដ្ឋាន ទាំងនៅលើដី ក្រោមដី និងក្រោមទឹក ក្នុងប្រទេសកម្ពុជា

ក្រុមស្រាវជ្រាវ ប្រទះឃើញព្រះកេសទេវតា ក្នុងកំណាយនៅខ្លោងទ្វារជ័យ

ប្រតិមាព្រះនារាយណ៍ផ្ទុំពីសំរឹទ្ធមកពីប្រាសាទមេបុណ្យខាងលិច និងបំណែកចំនួន៣៩ កំពុងវេចខ្ចប់ ដើម្បីត្រៀមបញ្ជូនទៅប្រទេសបារាំង

វប្បធម៌ និងទេសចរណ៍

ស្ពានផ្លូវកង់ប្រាសាទតាកែវបង្កើតបរិយាកាសថ្មី សម្រាប់អ្នកជិះកង់

អាជ្ញាធរជាតិអប្សរា បានសាងសង់ស្ពានផ្លូវកង់ស្របតាមស្ពានប្រាសាទតាកែវ ដើម្បីសម្រួលដល់ការជិះកង់របស់ភ្ញៀវទេសចរ ក្នុងរមណីយដ្ឋានអង្គរឱ្យកាន់តែងាយស្រួល។ លោក សុខ សូសិលា អនុប្រធាននាយកដ្ឋានទឹក ព្រៃឈើ និងហេដ្ឋារចនាសម្ព័ន្ធ នៃអាជ្ញាធរជាតិអប្សរាបានឱ្យដឹងថា អាជ្ញាធរជាតិអប្សរាបានចាប់ផ្តើមសង់ផ្លូវកង់ក្នុងរមណីយដ្ឋានអង្គរនៅឆ្នាំ២០២០ ដើម្បីសម្រួលដល់ភ្ញៀវទេសចរដែលនិយមជិះកង់កម្សាន្ត។ ផ្លូវកង់ក្នុងរមណីយដ្ឋានអង្គរប្រវែងសរុបជាង ២៣គីឡូម៉ែត្រ ហើយក្នុងនោះក៏មានឆ្លងស្ទឹងចំនួន ៤ទីតាំងផងដែរ។ ស្ពានផ្លូវកង់ប្រាសាទតាកែវ គឺជាទីតាំងមួយក្នុងចំណោម ៤ទីតាំងខាងលើ ដែលអាជ្ញាធរជាតិអប្សរាសាងសង់សម្រួលដល់អ្នកជិះកង់ ដោយចង់បែងចែកឱ្យដាច់រវាងផ្លូវ ឬស្ពានធ្វើដំណើរទូទៅ និងផ្លូវកង់។ ស្ពាននេះមាន ទទឹង២.៥ម៉ែត្រ និងបណ្ដោយ៦៥ម៉ែត្រ។ ចំណែកស្ពានកង់៣ទីតាំងទៀត រួមមាន ស្ពានអង្គរ ស្ពានក្រាំងក្រូច និងស្ពាននាគព័ន្ធ។ ក្រៅពីនេះ ក៏មានស្ពានខ្នាតតូចឆ្លងកាត់២ទីតាំងទៀត ដូចជាកសិន្ធុយសោធរ និងអតីតទ្វារទឹកនាគព័ន្ធ។ គោលបំណងសំខាន់នៃការបង្កើតផ្លូវកង់ក្នុងរមណីយដ្ឋានអង្គរ គឺការចង់បែងចែកឱ្យដាក់ពីគ្នារវាងផ្លូវ ចរាចរណ៍ធម្មតា និងផ្លូវកង់ ដើម្បីលើកកម្ពស់កីឡាជិះកង់ ការកាត់បន្ថយគ្រោះថ្នាក់នៅលើដងផ្លូវរវាងអ្នកជិះយានយន្ត និងអ្នកជិះកង់ ពិសេសកាត់បន្ថយផ្សែងយានយន្តដែលប៉ះពាល់ដល់ថ្មប្រាសាទ។ ចំពោះរចនាបថនៃការសង់ស្ពានកង់នេះ លោក សុខ សូសិលា បញ្ជាក់ថា បានជ្រើសរើសការរៀបចំបែបសាមញ្ញស្រដៀងនឹងធម្មជាតិជុំវិញ ដោយមិនបង្កើតអ្វីដែលថ្មីលេចធ្លោពេកទេ គឺស្របតាមគោលគំនិតរបស់ថ្នាក់ដឹកនាំថា ការអភិរក្សដើរស្របនឹងការអភិវឌ្ឍ។ ជាមួយគ្នានេះ លោក សុខ សូសិលា សំណូមពរឱ្យភ្ញៀវទេសចរ ចូលរួមលើកតម្កើងការជិះកង់ ឱ្យបានកាន់តែច្រើននៅក្នុងតំបន់រមណីយដ្ឋានអង្គរ ក្នុងបំណងដើម្បីសុខភាព ប្ដូរបរិយាកាសថ្មី ព្រោះថាការជិះកង់ធ្វើឱ្យយើងមានពេលគ្រប់គ្រាន់សម្រាប់ការទស្សនា ឬសិក្សាពីធម្មជាតិនៅជុំវិញ ពិសេសលុបបំបាត់ផ្សែងពុលដែលបង្កគ្រោះថ្នាក់ដល់ការអភិរក្សប្រាសាទ៕ អត្ថបទ៖ ឈិត សាវី

សារមន្ទីរព្រះនរោត្តមសីហនុ-អង្គរ នឹងតាំងពិព័រណ៍បង្ហាញវត្ថុសិល្បៈក្វាតជិត ៧០០០គ្រាប់

សារមន្ទីរព្រះនរោត្តមសីហនុ-អង្គរ គ្រោងនឹងតាំងពិព័រណ៍វត្ថុសិល្បៈក្វាត ចំនួន៦៩៥៦គ្រាប់ ដែលបានពីកំណាយស្រាវជ្រាវ ដើម្បីឱ្យសាធារណជនបានស្គាល់ និងទស្សនាចាប់ពីថ្ងៃទី១៦ ខែមករា ឆ្នាំ២០២៤ ខាងមុខនេះ។ ក្រុមអ្នកស្រាវជ្រាវ នៃអាជ្ញាធរជាតិអប្សរា បានប្រទះឃើញវត្ថុសិល្បៈបុរាណក្វាត ចំនួន ៦៩៥៦គ្រាប់នេះ នៅឯប្រាសាទកណ្តាលស្រះស្រង់ កាលពីឆ្នាំ២០២០កន្លងទៅ។មគ្គុទេសក៍សារមន្ទីរព្រះនរោត្តមសីហនុ-អង្គរ លោក គុន ផល្លី មានប្រសាសន៍ថា វត្ថុសិល្បៈបុរាណក្វាត ទាំងនេះ នឹងដាក់តាំងពិពរណ៍ជាអចិន្ត្រៃយ៍ក្នុងសាលពិព័រណ៍សារមន្ទីរ។ វត្ថុសិល្បៈនេះ មានបីប្រភេទ គឺពណ៌ស្វាយ(កែវណាំហ្វាន)Amethyst ពណ៌លឿង(ស៊ីទ្រីន)Citine និងពណ៌សថ្លា(គ្រីស្តាល់)Crystal។ ក្រៅពីការដាក់តាំងក្វាតនេះ ក៏មានការដាក់តាំងបង្ហាញនូវវត្ថុមួយចំនួនទៀត ដែលបានមកពីកន្លែងតែមួយនៅប្រាសាទកណ្ដាលស្រះស្រង់ដែរដូចជា រូបអណ្ដើកថ្ម អាវុធត្រីសូល៍ អាវុធបញ្ចសូល៍ និងចតុសូល៍ជាដើម។ លោកឱ្យដឹងទៀតថា ការតាំងបង្ហាញពិព័រណ៍ជាអចិន្ត្រៃយ៍នេះ ក្នុងគោលបំណងបង្ហាញជូនសាធារណជនជាតិ អន្តរជាតិ អ្នកស្រាវជ្រាវ និងសិស្សានុសិស្សឱ្យមកទស្សនាសិក្សាស្វែងយល់អំពីវត្ថុសិល្បៈ វត្ថុសក្ការៈសម្រាប់បញ្ចុះនៅគ្រឹះប្រាសាទកាលពីសម័យបុរាណ ព្រមទាំងដឹងពីប្រវត្តិសាស្ត្រ វប្បធម៌ សាសនា និងទំនៀមទម្លាប់របស់ជាតិខ្មែរផង។ជារៀងរាល់ថ្ងៃសៅរ៍ដើមខែនីមួយៗ សារមន្ទីរព្រះនរោត្តមសីហនុ-អង្គរ តែងតែបើកឱ្យភ្ញៀវជាតិ ចូលទស្សនាដោយមិនគិតថ្លៃ ដែលនេះ គឺជាចំណុចមួយដ៏ពិសេស សម្រាប់លើកទឹកចិត្តដល់ភ្ញៀវជាតិ អន្តរជាតិ សាធារណជន អ្នកស្រាវជ្រាវ និងសិស្សានុសិស្ស ចូលទស្សនាសារមន្ទីរឱ្យបានកាន់តែច្រើន៕

នាវាទេសចរណ៍បរទេស ផ្ទុកអ្នកដំណើរជិត ១០០០នាក់ ចូលចតធ្វើទស្សនកិច្ចក្នុងខេត្ដព្រះសីហនុ

ព្រះសីហនុ៖ នាវាទេសចរណ៍បរទេសខ្នាតយក្ស ផ្ទុកអ្នកដំណើរបម្រុះជាតិសាសន៍ ៩៧៧នាក់ ចូលចតនៅកំពង់ផែស្វយ័តអន្ដរជាតិក្រុងព្រះសីហនុ ថ្ងៃទី១១ ខែមករា ឆ្នាំ២០២៤ ដើម្បីធ្វើទស្សនកិច្ចនៅខេត្ដព្រះសីហនុ រយៈពេល ១ថ្ងៃ ហើយចេញដំណើរបន្ដទៅប្រទេសវៀតណាមនៅយប់ថ្ងៃដដែលនេះ។ នាយនគរបាលអន្ដោប្រវេសន៍ច្រកទ្វារកំពង់ផែស្វយ័តអន្ដរជាតិក្រុងព្រះសីហនុ ប្រាប់ថា បន្ទាប់ពីវិបត្ដិជំងឺកូវីដ-១៩ មាននាវាទេសចរណ៍បរទេសខ្នាតយក្ស ផ្ទុកអ្នកដំណើររាប់រយ រាប់ពាន់នាក់ ចូលចតជាបន្ដបន្ទាប់នៅកំពង់ផែស្វយ័តអន្ដរជាតិក្រុងព្រះសីហនុ ដើម្បីធ្វើទស្សនកិច្ចក្នុងខេត្ដព្រះសីហនុ និងក្នុងព្រះរាជាណាចក្រកម្ពុជា។ នាវាដែលចូលចតថ្ងៃនេះ មានឈ្មោះ SEA BOURN ENCORE សញ្ជាតិ BAHAMAS បានធ្វើដំណើរមកពីប្រទេសថៃ ដែលមានផ្ទុកអ្នកដំណើរចម្រុះជាតិសាសន៍សរុបចំនួន ៩៧៧នាក់ ក្នុងនោះ មាននាវិកសរុបចំនូន ៤២៥នាក់ ជាតិសាសន៍ដែលច្រើនជាងគេបង្អស់ គឺសញ្ជាតិអាមេរិក នាវានេះ នឹងចាកចេញពីកំពង់ផែស្វយ័តអន្ដរជាតិក្រុងព្រះសីហនុ បន្ដដំណើរទេសចរណ៍ទៅកាន់ប្រទេសវៀតណាម នៅយប់ថ្ងៃនេះដដែល។ លោកវរសេនីយ៍ បន្ដថា ការចូលចតនាវាទេសចណ៍ បានផ្ដល់ឱកាសឱ្យភ្ញៀវទេសចរចម្រុះជាតិសាសន៍បានទស្សនាពីវឌ្ឍនភាពខេត្ដព្រះសីហនុ និងបានស្វែងយល់ពីវប្បធម៌រស់នៅរបស់ប្រជាពលរដ្ឋខ្មែរ ជាមួយនិងធនធានធម្មជាតិដ៏សម្បូរបែបរបស់ខេត្ដព្រះសីហនុ។ ទាំងនេះ បានបញ្ជាក់យ៉ាងច្បាស់ថា សេដ្ឋកិច្ចពិភពលោកបានដំណើរការឡើងវិញ ក្រោមដំបូលសុខសន្ដិភាពនៅព្រះរាជាណាចក្រកម្ពុជា នឹងអាចឱ្យភ្ញៀវទេសចរ បន្ដផ្សព្វផ្សាយពីខេត្ដព្រះសីហនុ ក៏ដូចជាប្រទេសកម្ពុជា ក្នុងការទាក់ទាញភ្ញៀវទេសចរ សម្រាប់លើកកម្ពស់វិស័យទេសចរណ៍នៅកម្ពុជា។ ម្យ៉ាងវិញទៀត ការចូលចតនេះ បានផ្ដល់អត្ថប្រយោជន៍មួយចំនួន ដល់ប្រជាពលរដ្ឋខេត្ដព្រះសីហនុ ដែលជាអ្នកលក់ផលិតទេសចរណ៍ ពិសេសអ្នករត់តាក់ស៊ី ឬម៉ូតូកង់បី និងម៉ូតូឌុប ។ល។

ក្រសួងបរិស្ថានប្រកាសអនុវត្ត វិធានប្រតិបត្តិ មាត្រា៦ នៃកិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុ

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា កាលពីពេលថ្មីៗនេះ បានគាំទ្រនិងអនុម័ត វិធានប្រតិបត្តិ មាត្រា៦ នៃកិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុ។ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានថ្លែងសាទរចំពោះការដឹកនាំដ៏ឈ្លាសវៃនៃប្រមុខរាជរដ្ឋាភិបាលកម្ពុជា ដែលបានគិតគូរអាទិភាពលើវិស័យបរិស្ថាន ក្នុងយុទ្ធសាស្រ្តបញ្ចកោណ ដំណាក់កាលទី១ ដែលបានរៀបចំឡើង ដើម្បីកំណើន ការងារ សមធម៌ ប្រសិទ្ធភាព និងចីរភាព សំដៅកសាងមូលដ្ឋានគ្រឹះឆ្ពោះទៅ សម្រេចបានចក្ខុវិស័យកម្ពុជា ឆ្នាំ២០៥០។ ការគាំទ្ររបស់ប្រមុខរាជរដ្ឋាភិបាល ចំពោះវិធានប្រតិបត្តិនេះ បានជំរុញ និងលើកទឹកចិត្តដល់កម្ពុជា ក្នុងការធ្វើអាជីវកម្មកាបូនប្រកបដោយតម្លាភាព គណនេយ្យភាព និងស្របតាមស្តង់ដាអន្តរជាតិ។ឯកឧត្តមបណ្ឌិត អ៊ាង សុផល្លែត បានបញ្ជាក់ថា វិធានប្រតិបត្តិមានប្រយោជន៍ខ្លាំងណាស់សម្រាប់កម្ពុជាផង ហើយក៏ជាការចូលរួមចំណែកសំខាន់របស់កម្ពុជា ជាមួយពិភពលោក ក្នុងការកាត់បន្ថយការកើនឡើងកម្តៅលើភពផែនដី និងការប្រែប្រួលអាកាសធាតុ ដែលជាបញ្ហាសកល។ ឯកឧត្តមរដ្ឋមន្រ្តីក្រសួងបរិស្ថាន បានបន្ថែមថា កន្លងមកកម្ពុជាបានអនុវត្តអាជីវកម្មកាបូន តាមរយៈការស្មគ្រចិត្ត។ តាមរយៈមាត្រា៦ នៃកិច្ចព្រមព្រៀងទីក្រុងប៉ារីស គឺអនុញ្ញាតឲ្យកម្ពុជាកាន់តែពង្រឹងខ្លួនបានខ្លាំងថែមទៀត លើការធ្វើពាណិជ្ជកម្មទ្វេភាគីរវាងរដ្ឋាភិបាលនិងរដ្ឋាភិបាល ស្របនឹងលក្ខខ័ណ្ឌនៃកិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុ ហើយក៏ឆ្លុះបញ្ចាំងពីការប្តេជ្ញាចិត្តខ្ពស់របស់កម្ពុជា និងអំពីតម្លាភាព ដែលកម្ពុជាយើងអនុវត្តបានយ៉ាងខ្ជាប់ខ្ជួន នៃកិច្ចព្រមព្រៀងផងដែរ។ជាមួយគ្នានេះដែរ វិទ្យាស្ថានកំណើនបៃតងសកល (GLOBAL GREEN GROWTH INSTITUTE - GGGI) បង្ហាញទស្សនៈវិជ្ជមានចំពោះកម្ពុជា ដែលកំពុងមាននិន្នាការលើការអភិវឌ្ឍ ក្នុងលក្ខខណ្ឌគិតគូរពីបរិស្ថាន ដែលប្រកបដោយចីរភាព។ កញ្ញា Shomi Kim តំណាង GGGI ប្រចាំកម្ពុជា បានលើកឡើងថា កម្ពុជាជាប្រទេសទី១ នៃសមាជិក GGGI ដែលបានគាំទ្រវិធានប្រតិបត្តិ មាត្រា៦ នៃកិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុ។ កម្ពុជាបានប្រកាសទៅកាន់ពិភពលោកថា កម្ពុជា បានរៀបចំខ្លួនរួចរាល់ហើយក្នុងការធ្វើពាណិជ្ជកម្មកាបូន។ កម្ពុជាជារដ្ឋភាគីនៃក្របខ័ណ្ឌអនុសញ្ញាស្តីពីការប្រែប្រួលអាកាសធាតុ ដែលមានប្រទេសចំនួន១៩៧។ កិច្ចព្រមព្រៀងទីក្រុងប៉ារីសស្តីពីការប្រែប្រួលអកាសធាតុ ត្រូវបានអនុម័ត នៅក្នុងថ្ងៃទី១២ ខែធ្នូ ឆ្នាំ២០១៥ នាកិច្ចប្រជុំកំពូលស្តីពីការប្រែប្រួលអាកាសធាតុ COP25 នៅទីក្រុងប៉ារីសប្រទេសបារាំង។ ឯកឧត្តម ជួប ប៉ារីស៍ រដ្ឋលេខាធិការក្រសួងបរិស្ថាន បានឱ្យដឹងថា កិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុ មាន វិធានប្រតិបត្តិចំនួន២៩ប្រការ ក្នុងនោះប្រការទី៦ បានសង្កត់ធ្ងន់លើពាណិជ្ជកម្មកាបូន(Carbon Trading) ដើម្បីចូលរួមកាត់បន្ថយ និងបន្ស៉ាំនៃការប្រែប្រួលអាកាសធាតុ។ សូមបញ្ជាក់ថា កម្ពុជាបានដាក់ចេញនូវផែនការជាក់លាក់ក្នុងយុទ្ធសាស្រ្តាចក្រា ដែលផ្តោតលើមុំអាទិភាពចំនួន៣ គឺស្អាត បៃតង និងចីរភាព ដែលក្នុងនោះមុំទី២ ផ្តោតលើភាពបៃតង គឺការអភិរក្ស និងគ្រប់គ្រងព្រៃឈើ ដោយនិរន្តរភាព ក្នុងក្រសួងបរិស្ថាន បានដាក់ចេញវិធានការអាទិភាពចំនួន៤ ទប់ស្កាត់បទល្មើសព្រៃឈើ ដោយអនុវត្តតាមច្បាប់មិនលើកលែង និងយុទ្ធនាការផ្តល់កូនឈើ ចំនួន១លានដើម ជូនប្រជាពលរដ្ឋដាំ ដោយឥតថ្លៃ ចាប់ពីឆ្នាំ២០២៤នេះ ដើម្បីបង្កើនគម្របព្រៃឱ្យបាន៦០% នៅឆ្នាំ២០៥០។ ជាមួយគ្នានេះ កម្ពុជាមានសុទិដ្ឋិនិយមក្នុងការអនុវត្តកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ កាត់បន្ថយការបញ្ចេញកាបូន ពីវិស័យថាមពលនិងឧស្សាហកម្ម ការជំរុញប្រសិទ្ធភាពថាមពល ការដឹកជញ្ជូននិរន្តរភាព ការគ្រប់គ្រងនិងកែច្នៃសំណល់ ការអនុវត្តកសិកម្ម ដែលបញ្ចេញកាបូនទាប ក៏ដូចជាការកៀរគរហិរញ្ញប្បទានបៃតងនិងនវានុវត្តន៍៕

បណ្តាមគ្គុទេសក៍ទេសចរណ៍នាំគ្នាពង្រឹងគោរពក្រមសីលធម៌ខ្លួនក្រោយមានការណែនាំពីក្រសួង

ប្រធានសមាគមន៍មគ្គុទេសក៍ទេសចរណ៍រាជធានីភ្នំពេញ និងបណ្តាមគ្គុទេសក៍ទេសចរណ៍ បានសហការគា្នពង្រឹងការគោរពក្រមសីលធម៌វិជ្ជាជីវៈរបស់ខ្លួនឲ្យបានល្អប្រសើរ ឲ្យភ្ញៀវទេសចរអន្តរជាតិស្រឡាញ់ពេញចិត្ត ក្រោយពីក្រសួងទេសចរណ៍បានជូនសេចក្ដីណែនាំស្តីពីការពង្រឹងការប្រតិបត្តិវិជ្ជាជីវៈមគ្គុទ្ទេសក៍ទេសចរណ៍ និងអ្នកបកប្រែភាសាបន្តជូនភ្ញៀវទេសចរអន្តរជាតិនានា។លោក ឈុន សំណាង ប្រធានសមាគមន៍ទេសចរណ៍ប្រចាំរាជធានីភ្នំពេញ ថ្លែងប្រាប់ BTV នៅថ្ងៃទី១០ ខែមករានេះថា មគ្គុទេសក៍ទេសចរណ៍ គឺជាអ្នកដឹកនាំភ្ញៀវ បកប្រែភាសាណែនាំដើរកម្សាន្តនៅតាមបណ្តាគោលដៅទេសចរណ៍សំខាន់ៗនានា ដែលមានក្រមសីលធម៌វិជ្ជាជីវៈ របស់ខ្លួនច្បាស់លាស់ ហើយថា កន្លងមកយើងក៏បានណែនាំមគ្គុទេសក៍ទេសចរណ៍យើងទាំងអស់ត្រូវគោរពក្រមសីលធម៌វិជ្ជាជីវៈនេះ ដើម្បីបង្កើនភាពទាក់ទាញ និងការផ្តល់ក្តីស្រឡាញ់ពីភ្ញៀវ និងទាក់ទាញឲ្យគេមកទស្សនាកម្ពុជា ម្តងហើយចង់មកទស្សនាម្តងទៀត។បណ្តាប្រតិបត្តិករមគ្គុទេសក៍ទេសចរណ៍ថ្លែងថា អំឡុងពេលទេសចរណ៍កម្ពុជា កំពុងងើបឡើងវិញជាបណ្តើរៗនេះ យើងទាំងអស់គ្នាជាមគ្គុទេសក៍ទេសចរណ៍មានអាជ្ញាបណ្ណត្រឹមត្រូវ គឺបានខិតខំគោរពក្រមសីលធម៌វិជ្ជាជីវៈរបស់ខ្លាំងណាស់ ពិព្រោះបើយើងមិនគោរព គឺធ្វើឲ្យប៉ះពាលខូចមាត់ប្រទេសជាតិ ខូចទេសចរណ៍របស់កម្ពុជា។ឯកឧត្តម អាំង សុវណ្ណរ័ត្ន អគ្គនាយកគ្រប់គ្រងឧស្សាហកម្មទេសចរណ៍ និងជាអ្នកនាំពាក្យក្រសួងទេសចរណ៍បានថ្លែងថា ការងារមគ្គុទេសក៍ទេសចរណ៍បច្ចុប្បន្នមិនមានបាតុភាពអាក្រក់កើតឡើងនោះទេ ហើយការចេញសេចក្តីជូនដំណឹងស្តីពីការពង្រឹងការប្រតិបត្តិវិជ្ជាជីវៈមគ្គុទ្ទេសក៍ទេសចរណ៍ និងអ្នកបកប្រែភាសាបន្ត គឺគ្រាន់តែការក្រើនរំលឹកឲ្យមគ្គុទេសក៍ទេសចរណ៍ខិតខំផ្តល់សេវាបដិសណ្ឋាកិច្ចល្អ ឲ្យភ្ញៀវស្រឡាញ់ចេញចិត្ត។សូមបញ្ជាក់ថា នៅក្នុងសេចក្តីដំណឹងរបស់ក្រសួងទេសចរណ៍បានណែនាំមគ្គុទេសក៍ទេសចរណ៍ប្រតិបត្តិការងារ ៨ចំណុច ដែលមានដូចជា ណែនាំឲ្យគោរពក្រមសីលធម៌វិជ្ជាជីវៈ មិនត្រូវទាមទារប្រាក់កំរៃក្រៅសេវាពីភ្ញៀវ ស្លៀកពាក់ឯកសណ្ឋានត្រឹមត្រូវ មិនត្រូវដើរតួធ្វើជាការីទេសចរណ៍ ត្រូវផ្តល់ព័ត៌មានពិត និងត្រូវចូលរួមថែរក្សាការពារសន្តិសុខ សុវត្ថិភាពជូនភ្ញៀវ និងការទប់ស្កាត់បទល្មើសនានាក្នុងវិស័យទេសចរណ៍ជាដើម៕ អត្ថបទ៖ ស៊ុម សុខជា

អគ្គនាយកដ្ឋានអន្តោប្រវេសន៍ បដិសេធចំពោះការផ្សព្វផ្សាយរឿងពុករលួយនៅអាកាសយានដ្ឋានអន្តរជាតិសៀមរាប

អគ្គនាយកដ្ឋានអន្តោប្រវេសន៍ បានធ្វើការបដិសេធចំពោះការផ្សព្វផ្សាយព័ត៌មានពាក់ព័ន្ធអំពើពុករលួយនៅអាកាសយានដ្ឋានអន្តរជាតិសៀមរាប។ នេះបើតាមសេចក្តីបំភ្លីរបស់អគ្គនាយកដ្ឋានអន្តោប្រវេសន៍ ចេញនៅថ្ងៃទី៩ ខែមករា ឆ្នាំ២០២៤។សេចក្តីបំភ្លឺ បានឲ្យដឹងថា អគ្គនាយកដ្ឋានអន្តោប្រវេសន៍បានពិនិត្យឃើញថា កាលពីថ្ងៃទី៩ ខែមករា ឆ្នាំ២០២៤ មានទំព័រហ្វេសប៊ុកមួយឈ្មោះ The CEROC បានធ្វើការផ្សព្វផ្សាយព័ត៌មានអំពីអាកាសយានដ្ឋានអន្តរជាតិសៀមរាបថ្មី ដែលមានខ្លឹមសារចោទប្រកាន់ថា «មិនយកអតិថិជនជាធំទេ មើលចុះពួកគេអោយពិន្ទុទាបខ្លាំងណាស់រឿងពុករលួយ សេវាកម្មអត់ល្អ និងថែមទាំងផ្តាំអ្នកដទៃមិនអោយឆ្លងកាត់ព្រលាននេះថែមទៀត» ។ពាក់ព័ន្ធទៅនឹងការចុះផ្សាយខាងលើ អគ្គនាយកដ្ឋានអន្តោប្រវេសន៍បានពិនិត្យឃើញថា ការបញ្ចេញមតិដែលបានចុះផ្សព្វផ្សាយនេះ មិនមានប្រភពព័ត៌មានច្បាស់លាស់ ហើយកាលបរិច្ឆេទ នៃការបញ្ចេញមតិទាំងនេះភាគច្រើនបានផុសមុនពេលដែលអាកាសយានដ្ឋានអន្តរជាតិសៀមរាបថ្មី ត្រូវបានបើកដំណើរការជាផ្លូវការទៅទៀត។សេចក្តីបំភ្លឺខាងលើ បញ្ជាក់ថា អគ្គនាយកដ្ឋានអន្តោប្រវេសន៍ បានខិតខំប្រឹងប្រែងក្នុងការជំរុញការអនុវត្តច្បាប់ស្តីពីអន្តោប្រវេសន៍យ៉ាងម៉ឺងម៉ាត់បំផុត និងបានធ្វើការក្រើនរំលឹកជាញឹកញាប់ដល់មន្ត្រីក្រោមឱវាទនៅក្នុងកិច្ចប្រជុំនានា ជាពិសេសលើការគ្រប់គ្រងដំណើរចេញ-ចូលតាមច្រកទ្វារអន្តរជាតិ ដែលស្ថិតក្រោមសមត្ថកិច្ចរបស់អគ្គនាយកដ្ឋានអន្តោប្រវេសន៍ និងបានណែនាំឲ្យដាក់ផ្លាកជាចំហអំពីតម្លៃទិដ្ឋាការនៅមុខទីតាំងផ្តល់ទិដ្ឋាការនៃប៉ុស្តិ៍ច្រកទ្វារអន្តរជាតិនានា ដោយមានសរសេរជាភាសាអង់គ្លេស ដាក់នៅចំពីមុខបញ្ជរស្នើសុំទិដ្ឋាការជូនអ្នកដំណើរ និងភ្ញៀវបរទេសឲ្យបានឃើញច្បាស់ផងដែរ។បន្ថែមលើនេះ អគ្គនាយកដ្ឋានអន្តោប្រវេសន៍ បានថ្លែងអំណរគុណដល់សាធារណជន និងអ្នកប្រើប្រាស់បណ្តាញសង្គមគ្រប់ប្រភេទទុកជាមុន ចំពោះការចូលរួមផ្ដល់ព័ត៌មានសំដៅរួមចំណែក ជាមួយអគ្គនាយកដ្ឋានអន្តោប្រវេសន៍ក្នុងន័យស្ថាបនា ដើម្បីកែលម្អចំណុចខ្វះខាត និងលើកកម្ពស់កិត្យានុភាពជាតិ តាមរយៈការចូលរួមផ្សព្វផ្សាយនូវព័ត៌មានដែលមានលក្ខណៈវិជ្ជមានពីកម្ពុជា ចៀសវាងផ្សព្វផ្សាយព័ត៌មានអវិជ្ជមាន និងមិនពិតដែលបន្តឱ្យមានការភ័ន្តច្រឡំដល់សាធារណជន និងភ្ញៀវបរទេសនានា៕ អត្ថបទ៖ សេក ឧត្តម

កំណាត់ផ្លូវជាតិលេខ៧៦ ដែលបាក់ស្រុតត្រង់ចំណុចអូរងើយ បានស្ថាបនាក្រាលកៅស៊ូ និងបើកឱ្យធ្វើចរាចរណ៍វិញហើយ

កំណាត់ផ្លូវជាតិលេខ៧៦ ដែលបានបាក់ស្រុត ប្រមាណ១៦៦ម៉ែត្រ ត្រង់ចំណុចអូរងើយ ភូមិអណ្ដូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី ចន្លោះ PK94+080 – PK94+150 កាលពីថ្ងៃទី០១ ខែសីហា ឆ្នាំ២០២៣ បច្ចុប្បន្ននេះការស្ថាបនាផ្លូវថ្មីតភ្ជាប់ឡើងវិញ បានសម្រេចការងារក្រាលកៅស៊ូ DBST ប្រវែង ៤២៥ម បានលទ្ធផល១០០% និងបានបើកឱ្យធ្វើចរាចរណ៍ សម្រាប់រថយន្តគ្រប់ប្រភេទវិញបានហើយ។គួររំលឹកដែរថា ផ្លូវជាតិលេខ៧៦ (ស្នួល - សែនមនោរម្យ) មានប្រវែង ១២៧គ.ម ជាប្រភេទផ្លូវ DBST បានចាប់ផ្ដើមការស្ថាបនា នៅក្នុងខែកុម្ភៈ ឆ្នាំ២០០៧ និងបញ្ចប់ការស្ថាបនា នៅក្នុងខែមីនា ឆ្នាំ២០១១។ ផ្លូវនេះបានសម្ពោធបើកឱ្យប្រើប្រាស់ជាផ្លូវការ នៅថ្ងៃទី៣១ ខែមករា ឆ្នាំ២០១២៕

ឆ្នាំ២០២៣ កម្ពុជាទទួលជើងហោះហើរអន្តរជាតិងើបឡើងវិញជិត ៥០ភាគរយ

រដ្ឋលេខាធិការដ្ឋានអាកាសចរណ៍ស៊ីវិល បានឱ្យដឹងថា នៅក្នុងឆ្នាំ២០២៣ កម្ពុជា មានកំណើនជើងហោះហើរអន្តរជាតិងើបឡើងវិញបានប្រមាណ ៥០% បើប្រៀបធៀបចំនួនជើងហោះហើរដឹកអ្នកដំណើរអន្តរជាតិសរុប នៅឆ្នាំ២០១៩ មុនពេលមិនទាន់មានវិបត្តិកូវីដ១៩។ឯកឧត្តម ស៊ីន ចាន់សិរីវុត្ថា អនុរដ្ឋលេខាធិការ និងអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានថ្លែងប្រាប់ BTV នៅថ្ងៃទី៣ ខែមករា ឆ្នាំ២០២៤នេះថា កំណើនជើងហោះហើរ ចាប់ពីក្រោយវិបត្តិកូវីដ១៩នេះពីមួយខែទៅមួយខែ គឺមានកំណើនការហោះហើរក្នុងរង្វង់ ៥% និងចំនួនអ្នកដំណើរគឺមានកំណើនប្រមាណជាង ១០% ហើយកំណើនជើងហោះហើរ ឆ្នាំ២០២៣ កើន៤៥% ប្រៀបធៀបឆ្នាំ២០២២។ ឯកឧត្តម បានបញ្ជាក់ថា នៅក្នុងឆ្នាំ២០២៣នេះ គឺមានក្រុមហ៊ុនអាកាសចរណអន្តរជាតិ បើកជើងហោះហើរពីបណ្តាប្រទេសនានា មកកាន់រាជធានីភ្នំពេញគឺមានកំណើនប្រមាណ៨៧% ក្នុងនោះមានក្រុមហ៊ុនបើកជើងហោះហើរចំនួន២៨ក្រុមហ៊ុន មានកំណើនជើងហោះហើរក្នុងមួយថ្ងៃមួយៗមានរង្វង់១២០ជើង និងមានអ្នកដំណើរអន្តរប្រមាណ ១៤០០នាក់ ខណៈឆ្នាំ២០១៩ គឺមានចំនួនហោះហើរប្រមាណ២៧០ជើង និងមានអ្នកដំណើរប្រមាណ១៦០០នាក់ក្នុងមួយថ្ងៃ។ដោយឡែកសម្រាប់អាកាសយន្តដ្ឋានអន្តរជាតិខេត្តសៀមរាប ដែលទើបនឹងចាប់ផ្តើមបើកដំណើរការនៅពេលថ្មីនេះ នៅក្នុងឆ្នាំ២០២៣ គឺចំនួនជើងហោះហើរបានងើបឡើងវិញបានប្រមាណជាង៤០% ក្នុងនោះមានក្រុមហ៊ុន បើកជើងហោះហើរចំនួន១០ក្រុមហ៊ុន មានជើងហោះហើរសរុបជិត៥០ជើងក្នុងមួយថ្ងៃៗ និងមានអ្នកដំណើរប្រមាណ៤៥០០នាក់ក្នុងមួយថ្ងៃៗ ខណៈកាលពីឆ្នាំ២០១៩ គឺមានក្រុមហ៊ុនបើកជើងហោះហើរចំនួន៤០ក្រុមហ៊ុន មានជើងហោះហើរចំនួន១០០ជើង និងមានអ្នកដំណើរប្រមាណជាង១០០០០នាក់ក្នុងមួយថ្ងៃ។ ឯកឧត្តម ស៊ីន ចាន់សិរីវុត្ថា បន្តថា ដោយឡែកសម្រាប់តែអាកាសយានដ្ឋានអន្តរជាតិកងកេង នៅខេត្តព្រះសីហនុ គឺបានងើបឡើងវិញបានប្រមាណតែរង្វង់២ជើងក្នុងមួយថ្ងៃៗ៕ អត្ថបទ៖ ស៊ុម សុខជា

ថ្ងៃរាប់ថយក្រោយឆ្លងឆ្នាំ ខេត្តកំពត ទទួលបានភ្ញៀវទេសចរជាតិនិងអន្តរជាតិជិត៤០ម៉ឺនាក់

មន្ត្រីជំនាញបានលើកឡើងថា ព្រឹត្តិការណ៍ឆ្លងឆ្នាំ២០២៣ ចូល២០២៤ ភ្ញៀវទេសចរ បាននាំគ្នាចេញ ដើរកម្សាន្តតាមបណ្តាខេត្តច្រើនជាងឆ្នាំមុនៗ ក្នុងខេត្តកំពត សម្រាប់តែថ្ងៃ Count Down ឆ្លងឆ្នាំ ភ្ញៀវទេសចរជាតិ និងអន្តរជាតិ បានមកកម្សាន្តជិត៤០ម៉ឺននាក់។ ហើយភ្ញៀវទេសចរ និងអាជីវករ បានបង្ហាញ អារម្មណ៍សប្បាយរីករាយ និងនិយាយថារដ្ឋបាលខេត្តរៀបចំបានស្អាតប្លែក ធ្វើឲ្យទេចរសប្បាយរីករាយ កក់ក្ដៅក្នុងចិត្តយ៉ាងខ្លាំង។ ប្រធានមន្ទីរទេសណ៍ខេត្តកំពត លោក សយ ស៊ីណុល បានប្រាប់ឲ្យដឹងថា ដោយមានការយកចិត្តទុកដាក់ចង្អុលបង្ហាញ និងដឹកនាំដោយផ្ទាល់ពី សំណាក់ឯកឧត្តម ម៉ៅ ធនិន អភិបាលខេត្តកំពត ក្នុងការរៀបចំតុបតែងកែលម្អសោភ័ណភាពក្រុង ពិសេសការអភិវឌ្ឍន៍តំបន់ឆ្នេរ និងកម្មវិធីកម្សាន្តសប្បាយច្រើនផងនោះ បានធ្វើឲ្យព្រឹត្តិការណ៍ឆ្លងឆ្នាំនៅខេត្តកំពត មានភាពអធឹកអធម គគ្រឹកគគ្រេង ពោពេញដោយភាពសប្បាយរីករាយក្រៃលែង។ លោកប្រធានមន្ទីរបានប្រាប់ឲ្យដឹងថា សម្រាប់ថ្ងៃទី៣១ ខែធ្នូ (ថ្ងៃCount Downឆ្លងឆ្នាំ)ខេត្តកំពត មានទេសចរសរុបចំនួន៣៨៦ ៤៨៨ នាក់ ក្នុងនោះ ៖ ភ្ញៀវទេសចរកំសាន្តតាមរមណីយដ្ឋាន សហគមន៍ទេសចរណ៍នានាសរុបចំនួន ៥៦ ៤៨៨ នាក់ (ភ្ញៀវអន្តរជាតិចំនួន២៤៨៨នាក់) ខណៈដែលភ្ញៀវទេសចរជាតិ អន្តរជាតិ បងប្អូនប្រជាពលរដ្ឋ ចូលរួមកំសាន្តសប្បាយកម្មវិធីរាប់ថយក្រោយ(Count Down) ក្នុងក្រុង មានចំនួនសរុប ៣៣០ ០០០នាក់ (ភ្ញៀវទេសចរអន្តរជាតិចំនួន១៥០០នាក់ )។ភ្ញៀវទេសចរមកពីរាជធានីភ្នំពេញ បានបង្ហាញចំណាប់អារម្មណ៍សប្បាយរីករាយរបស់ខ្លួនថា ពួកគាត់សម្រេចចិត្តមកលេងខេត្តកំពត ពិតជាមិនខុសបំណងទេ កំពតមានកន្លែងដើរលេងច្រើន ហើយការរៀបចំព្រឹត្តិការណ៍ឆ្លងឆ្នាំបានស្អាត មានសណ្តាប់ធ្នាប់ សន្តិសុខ សុវត្ថិភាព អនាម័យបរិស្ថានល្អ សេវាកម្មផ្សេងៗមានតម្លៃសមរម្យ អ្នកដែលខកខានមិនបានមកឆ្លងឆ្នាំនៅខេត្តកំពតពិតជាស្តាយក្រោយ។ តំណាងអាជីវករលក់ដូរ និងម្ចាស់ទូកទេសចរណ៍ដឹកភ្ញៀវកម្សាន្តតាមដងព្រែកកំពង់បាយ បានប្រាប់ឲ្យដឹងដែរថា រយៈពេលពីរថ្ងៃ(៣០ និង៣១ ខែធ្នូ)នេះ ភ្ញៀវទេសចរជាតិ និងអន្តរជាតិមកលេងកំពតច្រើនខ្លាំង ទូកទេសចរណ៍ក៏មានអ្នកមកជិះច្រើនដែរ។ អាជីវកររូបនេះបានថ្លែងអំណរគុណដល់រាជរដ្ឋាភិបាល ពិសេសឯកឧត្តមអភិបាលខេត្ត ដែលលោកតែងតែគិតគូរដល់សុខទុក្ខ និងជីវភាពរស់នៅរបស់ប្រជាពលរដ្ឋ។ តាមការបញ្ជាក់របស់ប្រធានមន្ទីរទេសចរណ៍ខេត្ត ថាព្រឹត្តិការណ៍ឆ្លងឆ្នាំ(២០២៣ ចូល២០២៤) បានព្រឹត្តិទៅល្អប្រសើរ មិនមានបញ្ហាអ្វីកើតឡើងគួរឲ្យកក់សំគាល់នោះឡើយ ហើយបើទោះជាមានទេសចរមកលេងពេញក្រុងកំពត និងគ្រប់គោលដៅទេសចរណ៍ និងរមណីយដ្ឋានយ៉ាងណាក៏ដោយ រដ្ឋបាលខេត្តនៅតែរក្សាបាននូវ សន្តិសុខ សុវត្ថិភាព សណ្តាប់ធ្នាប់ល្អ គ្មានការកកស្ទះចរាចរណ៍ ធ្វើឲ្យភ្ញៀវទេចរមានទទួលបានភាពសប្បាយរីករាយ និងកក់ក្តៅក្នុងចិត្តយ៉ាងខ្លាំង៕ អត្ថបទៈ អន សារឹម

ថ្ងៃឆ្លងឆ្នាំសកលមានយានយន្តជិត ៣ម៉ឺនគ្រឿង ធ្វើដំណើរលើផ្លូវល្បឿនលឿនភ្នំពេញ-ព្រះសីហនុ

ពេញមួយថ្ងៃនៃថ្ងៃទី៣១ ខែធ្នូ ដែលជាថ្ងៃឆ្លងឆ្នាំសកល មានយានយន្តជិត៣ម៉ឺនគ្រឿងបានធ្វើដំណើរលើផ្លូវល្បឿនលឿនភ្នំពេញ-ព្រះសីហនុ។ពេញមួយថ្ងៃនៃថ្ងៃទី៣១ ខែធ្នូ ឆ្នាំ២០២៣ ដែលជាថ្ងៃមានការធ្វើដំណើរសម្រាប់ការកម្សាន្តនានាក្នុងពេលឆ្លងឆ្នាំសកល ២០២៣ ឈានចូលឆ្នាំ២០២៤ ការធ្វើចរាចរណ៍លើផ្លូវល្បឿនលឿនភ្នំពេញ-ព្រះសីហនុ មានភាពមមាញឹកច្រើន ដែលមានយានយន្តចំនួន ២៨,៨៦១ គ្រឿងបានធ្វើដំណើរលើផ្លូវល្បឿនលឿននេះ ដែលចំនួននេះគឺមានការកើនឡើងប្រមាណ ១ម៉ឺនគ្រឿង ខណៈដែលថ្ងៃអាទិត្យធម្មតាជាទូទៅមានចំនួនយានយន្តប្រមាណ ១ម៉ឺន៩ពាន់គ្រឿងធ្វើដំណើរ។ នេះបើតាមឯកឧត្តម ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូនបានប្រាប់ឱ្យដឹងនៅព្រឹកថ្ងៃទី០១ ខែមករា ឆ្នាំ២០២៤នេះ។ឯកឧត្តម ហ៊ាង សុទ្ធាយុត្តិ បានបន្ថែមថា ខែធ្នូ ឆ្នាំ២០២៣កន្លងទៅនេះ គឺជាខែដែលមានចរាចរណ៍ខ្ពស់ជាងគេ ក្នុងឆ្នាំ ២០២៣ ដែលមានចំនួនរហូតដល់ទៅ ៤៥,៨ម៉ឺនគ្រឿង។ ឯកឧត្តមបញ្ជាក់ថា បើគិតមួយឆ្នាំពេញនៃឆ្នាំ២០២៣ គឺមានយានយន្តជាង ៤,៩លានគ្រឿងបានធ្វើចរាចរណ៍លើផ្លូវល្បឿនលឿនភ្នំពេញ-ព្រះសីហនុ។ការធ្វើចរាចរណ៍លើផ្លូវល្បឿនលឿនភ្នំពេញ-ព្រះសីហនុ គឺជាការធ្វើចរាចរណ៍ទៅមកសម្រាប់ភ្នំពេញ-កំពង់ស្ពឺ ភ្នំពេញ-ស្រែអំបិលនៃខេត្តកោះកុង និងភ្នំពេញ-ព្រះសីហនុផ្ទាល់។ ជាមួយគ្នានេះក្នុងនាមក្រសួងសាធារណការ និងដឹកជញ្ជូន ឯកឧត្តម ហ៊ាង សុទ្ធាយុត្តិ បានអំពាវនាវដល់អ្នកដែលធ្វើដំណើរលើផ្លូវល្បឿនលឿនទាំងអស់ សូមគោរពច្បាប់ចរាចរណ៍ កុំបើកបញ្ច្រាស ដែលនាំឱ្យមានគ្រោះថ្នាក់ដល់អាយុជីវិតខ្លួនឯង និងអ្នកដទៃ សូមបើកតាមល្បឿនកំណត់ និងមិនលើសល្បឿន ១២០គីឡូម៉ែត្រក្នុងមួយម៉ោង៕ អត្ថបទ៖ ប្រាក់ វ៉ាន់ដា

បណ្ដាញសង្គម

ព័ត៌មានថ្មីៗ

ក្រុមបាតុករប៉ះទង្គិចជាមួយនគរបាលអ៊ីស្រាអែល ក្នុងការតវ៉ាទាមទារឱ្យមានការដោះលែងចំណាប់ថ្នូរ

អ្នកនយោបាយកេនយ៉ា ដាក់ញត្តិប្រឆាំងនឹងបេសកកម្មដាក់ពង្រាយនគរបាលទៅប្រទេសហៃទី

រលកកម្ដៅដ៏ខ្លាំងក្លា និងភ្លៀងធ្លាក់ត្រូវបានព្យាករណ៍នៅតំបន់ខ្លះនៃប្រទេសឥណ្ឌា

ចំនួនអ្នកស្លាប់ជនជាតិប៉ាឡេស្ទីន នៅតំបន់សង្រ្គាមហ្កាហ្សា ឡើងដល់ជិត ៣៥.៤០០ នាក់

ជម្លោះយោធាដ៏អូសបន្លាយនៅក្នុងប្រទេសស៊ូដង់ ធ្វើឱ្យខូចខាតដល់ប្រព័ន្ធវេជ្ជសាស្ត្រ

មនុស្ស ៥០ នាក់ស្លាប់ ដោយសារភ្លៀងធ្លាក់ខ្លាំង និងទឹកជំនន់នៅភាគកណ្តាលអាហ្វហ្គានីស្ថាន

FASMEC ផ្តល់ចំណេះដឹងដល់ម្ចាស់សហគ្រាសធុនតូច និងមធ្យមជាច្រើននៅខេត្តកំពង់ធំ

ប្រធាន UNRWA៖ មនុស្សជាង ៨០ ម៉ឺននាក់ ត្រូវបង្ខំឱ្យភៀសខ្លួនចេញពីក្រុង Rafah នៅតំបន់ហ្កាហ្សា

ភ្លៀងធ្លាក់ខ្លាំងបង្កការជន់លិចដល់ផ្លូវក្នុងទីក្រុងភាគនៅខាងត្បូងប្រទេសចិន

មនុស្ស ២ នាក់ រងរបួសក្នុងការបាញ់ប្រហារនៅតំបន់ Kashmir របស់ឥណ្ឌា ស្របពេលការបោះឆ្នោត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

វប្បធម៌ និងទេសចរណ៍

ស្ពានផ្លូវកង់ប្រាសាទតាកែវបង្កើតបរិយាកាសថ្មី សម្រាប់អ្នកជិះកង់

សារមន្ទីរព្រះនរោត្តមសីហនុ-អង្គរ នឹងតាំងពិព័រណ៍បង្ហាញវត្ថុសិល្បៈក្វាតជិត ៧០០០គ្រាប់

នាវាទេសចរណ៍បរទេស ផ្ទុកអ្នកដំណើរជិត ១០០០នាក់ ចូលចតធ្វើទស្សនកិច្ចក្នុងខេត្ដព្រះសីហនុ

បណ្តាមគ្គុទេសក៍ទេសចរណ៍នាំគ្នាពង្រឹងគោរពក្រមសីលធម៌ខ្លួនក្រោយមានការណែនាំពីក្រសួង

អគ្គនាយកដ្ឋានអន្តោប្រវេសន៍ បដិសេធចំពោះការផ្សព្វផ្សាយរឿងពុករលួយនៅអាកាសយានដ្ឋានអន្តរជាតិសៀមរាប

កំណាត់ផ្លូវជាតិលេខ៧៦ ដែលបាក់ស្រុតត្រង់ចំណុចអូរងើយ បានស្ថាបនាក្រាលកៅស៊ូ និងបើកឱ្យធ្វើចរាចរណ៍វិញហើយ

ឆ្នាំ២០២៣ កម្ពុជាទទួលជើងហោះហើរអន្តរជាតិងើបឡើងវិញជិត ៥០ភាគរយ

ថ្ងៃរាប់ថយក្រោយឆ្លងឆ្នាំ ខេត្តកំពត ទទួលបានភ្ញៀវទេសចរជាតិនិងអន្តរជាតិជិត៤០ម៉ឺនាក់

ថ្ងៃឆ្លងឆ្នាំសកលមានយានយន្តជិត ៣ម៉ឺនគ្រឿង ធ្វើដំណើរលើផ្លូវល្បឿនលឿនភ្នំពេញ-ព្រះសីហនុ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

វប្បធម៌ និងទេសចរណ៍

ស្ពានផ្លូវកង់ប្រាសាទតាកែវបង្កើតបរិយាកាសថ្មី សម្រាប់អ្នកជិះកង់

សារមន្ទីរព្រះនរោត្តមសីហនុ-អង្គរ នឹងតាំងពិព័រណ៍បង្ហាញវត្ថុសិល្បៈក្វាតជិត ៧០០០គ្រាប់

នាវាទេសចរណ៍បរទេស ផ្ទុកអ្នកដំណើរជិត ១០០០នាក់ ចូលចតធ្វើទស្សនកិច្ច​ក្នុងខេត្ដព្រះសីហនុ

បណ្តាមគ្គុទេសក៍ទេសចរណ៍នាំគ្នាពង្រឹងគោរពក្រមសីលធម៌ខ្លួនក្រោយមានការណែនាំពីក្រសួង

អគ្គនាយកដ្ឋានអន្តោប្រវេសន៍ បដិសេធចំពោះការផ្សព្វផ្សាយរឿងពុករលួយ​នៅអាកាសយានដ្ឋានអន្តរជាតិសៀមរាប

កំណាត់ផ្លូវជាតិលេខ៧៦ ដែលបាក់ស្រុតត្រង់ចំណុចអូរងើយ បានស្ថាបនាក្រាលកៅស៊ូ និងបើកឱ្យធ្វើចរាចរណ៍វិញហើយ​

ឆ្នាំ២០២៣ កម្ពុជាទទួលជើងហោះហើរអន្តរជាតិងើបឡើងវិញជិត ៥០ភាគរយ

ថ្ងៃរាប់ថយក្រោយឆ្លងឆ្នាំ ខេត្តកំពត ទទួលបានភ្ញៀវទេសចរជាតិនិងអន្តរជាតិជិត៤០ម៉ឺនាក់

ថ្ងៃឆ្លងឆ្នាំសកលមានយានយន្តជិត ៣ម៉ឺនគ្រឿង ធ្វើដំណើរលើផ្លូវល្បឿនលឿនភ្នំពេញ-ព្រះសីហនុ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នាវាទេសចរណ៍បរទេស ផ្ទុកអ្នកដំណើរជិត ១០០០នាក់ ចូលចតធ្វើទស្សនកិច្ចក្នុងខេត្ដព្រះសីហនុ

អគ្គនាយកដ្ឋានអន្តោប្រវេសន៍ បដិសេធចំពោះការផ្សព្វផ្សាយរឿងពុករលួយនៅអាកាសយានដ្ឋានអន្តរជាតិសៀមរាប

កំណាត់ផ្លូវជាតិលេខ៧៦ ដែលបាក់ស្រុតត្រង់ចំណុចអូរងើយ បានស្ថាបនាក្រាលកៅស៊ូ និងបើកឱ្យធ្វើចរាចរណ៍វិញហើយ