ខ្សែប្រយុទ្ធ​កាណាដា Marcus Haber ផ្ទេរ​មកលេងឲ្យ​ក្លិប​វិសាខា​ត្រៀម​រដូវ​កាល​ថ្មី​

64

បាល់ទាត់៖ ព្រឹក​នេះ​ក្លិប​​វិសាខាបានបង្ហាញ​កីឡាករ​បរទេស​ថ្មី ដែលជា​ខ្សែប្រយុទ្ធ​ជម្រើស​ជាតិ​កាណាដា វ័យ​ ៣២​ឆ្នាំ Marcus Haber មក​ពង្រឹង​ក្រុម​ត្រៀម​សម្រាប់​ការប្រកួត ​កីឡា​បាល់ទាត់​ជម្រើស​ជើងឯក​ជាតិ​កម្ពុជា (​មិត្ត​ហ្វូ​ន​ខាំ​បូ​ឌា​លី​គ ២០២១)​

មុន​ផ្ទេរ​មកកាន់​ទឹកដី​កម្ពុជា ខ្សែប្រយុទ្ធ​រូបនេះលេង​ឱ្យ​ក្លិប Calvary FC ដែល​លេង​នៅ​លី​គ​កំពូល​ប្រទេស​កាណាដា​។ Haber បានចាប់ផ្តើម​បាល់ទាត់​ដំបូងជាមួយ​ក្លិប Vancouver Selects ដោយ​លេង ​៤​ឆ្នាំ​ក្នុង​ក្រុមយុវជន​។ នៅ​ឆ្នាំ​២០០៦ កីឡាករ​រូបនេះទៅលេង​ឱ្យ​ក្លិប FC Groningen ក្នុង​លី​គ​កំពូល​ហូ​ឡង់ជា​កីឡាករ​យុវជន ហើយ​បាន​ចំណាយពេល​ ២​ឆ្នាំ​ក្នុង​ក្រុមយុវជន​អាយុ​ក្រោម ​១៩​ឆ្នាំ​។​ បន្ទាប់មក Haber បាន​ផ្ទេរ​ទៅកាន់​ទឹកដី​កាណាដាលេង​ឱ្យ​ក្លិប Vancouver Whitecaps នៅ​ខែកុម្ភៈ ឆ្នាំ​២០០៩​។ ឆ្នាំ​២០១០ កីឡាករ​កម្ពស់ ១​ម៉ែត្រ​៩២​នេះផ្ទេរ​ទៅកាន់​ទឹកដី​អង់គ្លេសជាមួយ​ក្លិប West Bromwich Albion ដែល​កាលនោះ​លេង​ក្នុង​លី​គ​លំដាប់​ទី​២ ​អង់គ្លេស (The Championshiop)​

ក្រោយមកទៀតផ្ទេរ​ទៅកាន់​ក្លិប Exeter City លី​គ​លំដាប់​ទី​៣ ​អង់គ្លេស (League One) មុន​ខ្ចី​ជើង​ទៅលេង​ឱ្យ Vancouver Whitecaps វិញ​។​ យ៉ាងណាក៏ដោយ​មុន​មកដល់​ក្លិប Calvary FC ជាទី​ដែល​គេ​រកបាន ២​គ្រាប់​ក្នុងការ​បង្ហាញខ្លួន ​៩​ដង និង​វិសាខា​នៅ​កម្ពុជា គេ​ចំណាយពេល​ជាមួយ​ក្លិប ​៨​ផ្សេង​ទៀតនៅ​អឺរ៉ុប និង​អាមេរិក​។​ លើសពីនេះ Marcus Haber ធ្លាប់​លេង​ឱ្យ​ជម្រើសជាតិ​កាណាដាគ្រប់​កម្រិត​អាយុ​ ដូចជា​យុវជនអាយុ​ក្រោម ​១៦​ឆ្នាំ, អាយុ​ក្រោម ​១៧​ឆ្នាំ, អាយុ​ក្រោម ​២០​ឆ្នាំ, អាយុ​ក្រោម ២៣​ឆ្នាំ និង​ជ​ម្រើ​សជាតិ​៕

អត្ថបទ៖ គង់ ហួន