បាល់ទាត់៖ ក្រុមតោកំណាចអង់គ្លេសចាញ់ដាណឺម៉ាក ០ទល់នឹង១ ក្នុងទឹកដីខ្លួនឯង Wembley ការប្រកួត UEFA Nation League, League A ក្រុមទី២ យប់មិញ ហើយកីឡាករខ្សែការពារ Manchester United, Harry Maguire ត្រូវពិន័យកាតក្រហមបណ្ដេញចេញពីទីលាន។
មួយគ្រាប់ជ័យជំនះរបស់ដាណឺម៉ាក កើតឡើងដោយបាល់ពិន័យ ១១ម៉ែត្រនៅនាទីទី៣៥ ហើយកីឡាករខ្សែបម្រើ Christian Eriksen របស់ Inter Milan ក៏ធ្វើបានសម្រេច។ ក្រុមនេះដែរ ប៊ែលហ្ស៊ិកឈ្នះអ៊ីស្លង់ ២ទល់នឹង១ ក្រៅដីដោយគ្រាប់បាល់កីឡាករ Lukaku។ ក្រោយលេងបាន ៤ប្រកួតម្នាក់ ប៊ែលហ្ស៊ិកលេខ១ មាន ៩ពិន្ទុ, ដាណឺម៉ាកលេខ២ មាន ៧ពិន្ទុ, អង់គ្លេសលេខ៣ មាន ៧ពិន្ទុ ចំនែកអ៊ីស្លង់លេខ៤ មាន ០ពិន្ទុ។
ទៅមើលការប្រកួតក្នុងក្រុមទី៣ វិញ ក្រូអាស៊ីចាញ់បារាំង ១ទល់នឹង២។ ជំនួបនេះលេងបានតែ ៨នាទីភ្ញៀវបារាំងនាំមុខមុន ពេលកីឡាករខ្សែប្រយុទ្ធ Barcelona, Antoine Griezmann ស៊ុតបញ្ចូលទីបានសម្រេច។ ប៉ុន្តែក្នុងតង់ទី២ នាទីទី៦៤ កីឡាករ Nikola Vlasic ខ្សែបម្រើក្លិបរុស្ស៊ី CSKA Moscow រកបានគ្រាប់ស្មើឱ្យក្រូអាស៊ី មុនពេលខ្សែប្រយុទ្ធវ័យក្មេងក្លិបអ្នកមាន Paris Saint Germaine, Kylian Mbappe ធ្វើបានសម្រេចគ្រាប់ជ័យជំនះឱ្យជើងឯកពិភពលោកបារាំង។
ក្នុងពូលជាមួយគ្នានេះ ព័រទុយហ្កាល់ឈ្នះស៊ុយអែត ៣ទល់នឹង០ ទោះបីគ្មាន Cristiano Ronaldo ក៏ដោយ។ បីគ្រាប់របស់ព័រទុយហ្កាល់កើតឡើងដោយកីឡាករ Bernardo Silva របស់ Manchester City និងពីរគ្រាប់ទៀតធ្វើបានសម្រេចដោយខ្សែបម្រើវ័យ ២៣ឆ្នាំ Liverpool, Diogo Jota។ បន្ទាប់ពីលេងបាន ៤ប្រកួត ព័រទុយហ្កាល់ និងបារាំងមាន ១០ពិន្ទុដូចគ្នាឈរនៅចំណាត់ថ្នាក់លេខ១ និងលេខ២ រៀងគ្នា, ក្រូអាស៊ីលេខ៣ មាន ៣ពិន្ទុ ខណៈដែលស៊ុយអែតមិនទាន់ឈ្នះមួយប្រកួតឡើយ។
ដោយឡែកការប្រកួតក្នុងក្រុមទី១ នៃលីគ A នេះដែរ អ៊ីតាលី និងបិសាចទឹកក្រូចហូឡង់បានត្រឹមតែស្មើគ្នា ១ទល់នឹង១ តែប៉ុណ្ណោះ។ លេងបាន ១៦នាទី អ៊ីតាលីបើកការនាំមុខដោយគ្រាប់បាល់កីឡាករ Lorenzo Pellegrini លេងឱ្យក្លិប Roma ប៉ុន្តែនាទីទី២៥ ហូឡង់តាមស្មើដោយគ្រាប់បាល់កីឡាករ Donny van de Beek ដែលប្រកបអាជីពនៅ Manchester United។ តង់ទី២ ក្រុមទាំងពីរគ្មានគ្រាប់បាល់កើតឡើងទេ។ ក្រុមទី១ នេះដែរ ប៉ូឡូញឈ្នះជម្រើសជាតិបូស្នី និងហឺហ្សេហ្គូវីណា ៣ទល់នឹង០ ដោយគ្រាប់បាល់កីឡាករខ្សែប្រយុទ្ធ Bayern Munich, Robert Lewandowski ពីរគ្រាប់តែឯង និងមួយគ្រាប់ទៀតដោយកីឡាករវ័យ ២៥ឆ្នាំ Karol Linetty ខ្សែបម្រើក្លិប Torino។ ឆ្លងកាត់ ៤ប្រកួតម្នាក់ ប៉ូឡូញមាន ៧ពិន្ទុ, អ៊ីតាលីមាន ៦ពិន្ទុ, ហូឡង់មាន ៥ពិន្ទុ និងបូស្នីមាន ២ពិន្ទុ៕
អត្ថបទ៖ គង់ ហួន
