គំនរ​ឈើ​ដែល​ផ្ដួល​រំលំ​ហើយ លើ​ផ្ទៃដី​ទំហំ​ជាង​៦០​ហិកតា​ត្រូវ​គេ​ព្យាយាម​កាយ​ដី​លុបបំបាត់​ភស្តុតាង ​សមត្ថកិច្ច​ពាក់ព័ន្ធ​​ឆ្លើយ​រុញ​ដាក់គ្នា​

888

មណ្ឌលគិរី ៖ សកម្មភាព​បទល្មើស​ព្រៃឈើ​ទ្រង់ទ្រាយ​ធំ​ឈានដល់​យក​គ្រឿងចក្រ​កាយ​ដី​កប់​ដើមឈើ​ដែល​គេ​បាន​កាប់​ដួល​ហើយ​រាប់សិប​ហិកតា ​ដើម្បី​បំបាត់ភស្តុតាង​តែ​ត្រូវ​ក្រុម​អ្នកតាមដាន​បទល្មើស​ព្រៃឈើ តាម​ទាន់​រាយ​ការណ៍​ដល់​ជំនាញ​ចុះទៅ​ចាប់​បង្ក្រាប​ភ្លាមៗ​ ជាក់ស្តែង​នៅ​ទីតាំង​ដែល​ស្ថិតនៅ​ភូមិ​ពូ​ឡេះ ឃុំ​ដាក់​ដាំ ស្រុក​អូររាំង កាលពី​ថ្ងៃទី​១៥ តុលា ២០២០​ម្សិលមិញ​នេះ​។

សេចក្តី​រាយ​ការណ៍ ​បាន​ឲ្យ​ដឹងថា បន្ទាប់ពី​ទទួល​ព័ត៌មាន​ភ្លាម​កម្លាំង​នគរបាល​ស្រុក​អូររាំង បាន​ចុះទៅ​ដល់ទី​​តាំង​ក្រុម​គ្រឿងចក្រ​ធ្វើ​សកម្មភាព​កាយ​ដី​កប់​ដើមឈើ​រាប់ម៉ឺន​ដើម​ហាមឃាត់​មិន​ឲ្យ​បន្ត ខណៈនោះ​អ្នកបើកបរ​គ្រឿងចក្រ​បាន​រត់​អស់​គ្មាន​សល់ ​។ បើតាម​របាយ​ការ​ណ៍​ របស់​សមត្ថកិច្ច ករណី​គាស់​កាយ​ដីព្រៃ​ឈើ ​និង​កប់​គល់ឈើ​ធំៗ​ដើម្បី​លុបបំបាត់​ភស្តុតាង ​លើ​ផ្ទៃដី​ទំហំ​ជាង​៦០​ហិកតា​នៅ​ជិត​ភ្នំ​អណ្ដូង​ស្នេហ៍​ ជាប់​នឹង​របៀង​អភិរក្ស​ជីវៈចម្រុះ​ និង​ដីព្រៃ​អចិន្ត្រៃយ៍​របស់​រដ្ឋបាល​ព្រៃឈើ សមត្ថកិច្ច​ចាប់​រឹបអូស​បាន​គ្រឿងចក្រ​ចំនួន​២​គ្រឿង អេស្កាវ៉ាទ័រ​១​គ្រឿង​ និង​ត្រាក់ទ័រ​១​គ្រឿង និង​ម៉ូតូ ២ គ្រឿង​ ដែល​ជនសង្ស័យ​រត់ចោល ។ បច្ចុប្បន្ន​វត្ថុ​តាង​បទល្មើស​ទាំងនេះ​ត្រូវបាន​ប្រគល់​ឱ្យ​ខាង​មន្ត្រី​បរិស្ថាន​ដើម្បី​កសាង​សំណុំរឿង​តាម​នីតិវិធី​។

គេ​សង្កេតឃើញថា ដីព្រៃ​នេះ ​នៅ​មិន​ឆ្ងាយ​ពី​ រមណីយដ្ឋាន​អណ្តូង​ស្នេហ៍​ តែ​អាជ្ញាធរ​ខេត្ត​ហាក់​មើល​មិនឃើញ​ បណ្ដែតបណ្ដោយ​ឲ្យ​ព្រៃឈើ​រាប់​សិប​ហិកតា​ត្រូវគេ​គាស់​កាយ​រំលំ​រាប​ដល់​ដី ​ហើយ​ទីតាំង​នេះដែរ ​ក៏​ស្ថិតនៅ​ក្បែរ​គ្នា​ជាមួយ​ចំណុច​ភ្នំ រ​ហាំង ភ្នំ​ក្បាល​ខ្មោច ​ដែល​កម្លាំង​ថ្នាក់​ទើប​ចុះ​បង្ក្រាប ចាប់ខ្លួន​មនុស្ស​៥​នាក់​ ដាក់​ពន្ធនាគារ​ផងដែរ ។

ជុំវិញ​រឿងរ៉ាវ​ខាងលើ​លោក សៀក មុន្នី អភិបាលស្រុក​អូររាំង​ បាន​ឲ្យ​ដឹង​នៅ​ថ្ងៃទី​១៦ តុលា ២០២០ យ៉ាងខ្លី​ថា ​ដី​នេះ​ស្ថិត​នៅក្រោម​ការគ្រប់គ្រង​របស់​បរិស្ថាន​…​ចំពោះ​ចំណាត់​ការ​វិញ ​គឺ​បាន​ទប់ស្កាត់​និង​បាន​បញ្ជូន​ទៅ​តុលាការ​ ដើម្បី​បន្ត​នីតិ​វិធី​។

ចំណែក​លោក កែវ សុភ​គ៌ ប្រធាន​មន្ទីរ​បរិស្ថាន​ខេត្តមណ្ឌលគិរី បាន​ឲ្យ​ដឹង​នៅ​ថ្ងៃទី​១៦​ តុលា ២០២០​ថា លោក​កំពុង​ឲ្យ​ក្រុមការងារ​បញ្ជូន​សំណុំរឿង​នេះ​ទៅ​ខាង​រដ្ឋបាល​ព្រៃឈើ​វិញ​កុំ​ឲ្យ​ខុស​នីតិ​វិធី ព្រោះ​ករណីនេះ​ ស្ថិតនៅក្នុង​ដែល​សមត្ថកិច្ច​របស់​រ​ដ្ឋ​បាល​ព្រៃឈើ​។​ ចំណែក​ខណ្ឌ​រដ្ឋបាល​ព្រៃឈើ​មណ្ឌលគិរី បាន​ឲ្យ​ដឹងថា ​កំពុង​ឲ្យ​មន្ត្រី​ចុះ​ផ្ទៀងផ្ទាត់​ថា​ តើ​ដី​ចំណុច​នោះ​ស្ថិតក្រោម​ការ​គ្រប់គ្រង​របស់​ជំនាញ​ខាង​ណា​។

នៅ​ព្រឹក​ថ្ងៃទី​១៦ តុលា ២០២០ មាន​ប្រភព​ច្បាស់លាស់​បង្ហើប​ថា ​គ្រឿងចក្រ​ធុន​ធំ​ខាងលើ​ជំនាញ​ទើប​ចាប់​មិន​ទាន់បាន​មួយ​ដង្ហើម​ចង្រិត​ផង​ឥឡូវ​ឮ​ថា ​មាន​អ្នកធំៗ​គ្រាក់ៗ​ ប្រើ​វប្បធម៌​អន្តរាគមន៍​យក​អំណាច​កៀបសង្កត់​មន្ត្រី​តាម​មូលដ្ឋាន ​ដើម្បី​ជួយរំដោះយក​គ្រឿងចក្រ​ទាំងនោះ​ទៀតផង៕