អាជីវករ​លក់​សាច់មាន និង​អ្នក​បរិភោគ​លើកឡើង​ក្តី​បារម្ភ​ពី​ការ​ផ្ទុះ​ជំងឺ​ផ្តាសាយបក្សី

170

ភ្នំពេញ ៖ ​បន្ទាប់ពី​ផ្ទុះ​ករណី​ជំងឺផ្តាសាយបក្សី លើ​សត្វ​មាន់ នៅ​ស្រុក​ឯក​ភ្នំ ខេត្តបាត់ដំបង កាលពីដើម​សប្តាហ៍​នេះ ប្រជាពលរដ្ឋ និង​អាជីវករ​លក់​សាច់មាន់ ​បាន​សម្តែង​ការ​ព្រួយបារម្ភ​។ អាជីវករ​លក់​សាច់មាន់ ​បាន​អះអាងថា ​ការទិញ​សាច់​មាន់ គឺមាន​ប្រភព​ច្បាស់លាស់ មានការ​បញ្ជាក់​ត្រឹមត្រូវ​ពី​អាជ្ញាធរ​សុខភាព​សត្វ​។

អាជីវករ​លក់​សាច់​មាន់ ​នៅ​ផ្សារ​ច្បារអំពៅ នៅ​ព្រឹក​ថ្ងៃទី​១៣ មករា ឆ្នាំ​២០២១​នេះ ​បាន​លើកឡើងថា មានការ​ព្រួយបារម្ភ​ជុំវិញ ការផ្ទុះ​ឆ្លង​ជំងឺ​ផ្ដាសាយ​បក្សី លើ​សត្វ​មាន់​ក្នុងស្រុក ​ដោយ​លើកឡើងថា ការទិញ​សាច់​មាន់​យក​មក​លក់​លើ​ទីផ្សារ​ គឺមាន​ប្រភព​ច្បាស់លាស់ ​និង​មានការ​បញ្ជាក់​សុខភាព​សត្វ ពី​អាជ្ញាធរ​។

ចំណែក អ្នកទិញ​សាច់មាន់​បរិភោគ​វិញ ក៏​លើកឡើង​ស្រដៀង​គ្នា ដោយ​បញ្ជាក់ថា ​បាន​ពិនិត្យ​ច្បាស់លាស់ ​សួរនាំ​ត្រឹមត្រូវ ទៅ​អ្នកលក់​សាច់​មាន់​តាម​ផ្សារ ពី​ប្រភព​សាច់មាន់​ មុននឹង​ទិញ ដើម្បី​ជៀសវាង ​ទិស​សាច់មាន់ ​មាន​ជំងឺ ដែល​មិនមាន​ប្រភព​ច្បាស់លាស់​។

គួរ​បញ្ជាក់ថា​ ក្រសួងកសិកម្ម រុក្ខាប្រមាញ់​ និង​នេសាទ ​បានប្រកាស​បន្ទាន់​អំពី​ការកំណត់​តំបន់​ផ្ទុះ​នៃ​ជំងឺផ្តា​សាយបក្សី ហៅ​កាត់ H5N1​នេះ ដែល​មាន​ មាន់ ​ទា ជិត​២​ពាន់​ក្បាល​បាន​ងាប់ ​ស្ថិត​ក្នុង​ភូមិ​ព្រែ​កតា​ច្រែង ឃុំ​ព្រែក​នរិន្ទ ស្រុក​ឯក​ភ្នំ ​ខេត្តបាត់ដំបង​។

ឯកឧត្តម តាន់ ផាន់​ណា​រ៉ា អគ្គនាយក​ នៃ​អគ្គនាយកដ្ឋាន​សុខភាព​សត្វ និង​ផលិតកម្ម​សត្វ ​បាន​អំពាវនាវ ​ដល់​បងប្អូន​ប្រជាពលរដ្ឋ បន្ត​បរិភោគ​សាច់មាន់ ​ខណៈ​ស្ថាន​ការទប់ស្កាត់​រីក​រាលដាល​ជំងឺ​ផ្តាសាយបក្សី​ស្ថិតក្នុង​ស្ថានភាព​គ្រប់គ្រង​បាន​។

ក្រសួង ​បាន​អំពាវនាវ​ដល់​កសិករ​ចិញ្ចឹមសត្វ ​ និង​ម្ចាស់​កសិដ្ឋាន​ទាំងអស់​ត្រូវ​អនុវត្ត​វិធានការ​អនាម័យ​ជាប្រចាំ រួមមាន​ការ​បាញ់​សម្លាញ់​មេរោគ​នៅក្នុង​ទីតាំង​ចិញ្ចឹម ​ឬ ​កសិដ្ឋាន​នោះ​ចំនួន​២​ដង​រៀងរាល់​មួយ​សប្តាហ៍ ​ ដើម្បី​បង្ការ​មេរោគ​ផ្សេងៗ ក្នុងនោះ ​ម្ចាស់​កសិដ្ឋាន ត្រូវ​ចូលរួម​ការទប់ស្កាត់ ឬ​មិន​ត្រូវ​អនុញ្ញាត​បុគ្គល​ដែល​ធ្លាប់​ទៅ​ទីតាំង​ដែល​មាន​សត្វ​ឈឺ​នោះ​ចូល​កសិដ្ឋាន​របស់​ខ្លួន​ឡើយ ដើម្បី​បង្ការ​ការ​ចម្លង​ជំងឺ​ផ្តាសាយ​បក្សី​ទៅ​តំបន់​ផ្សេងទៀត​ផងដែរ​៕

អត្ថបទ ​៖ ឈិ​ត បូរ៉ា​វី