នៅ​ទីសាធារណៈ​ហាក់​ស្ងប់ស្ងាត់​ ជាង​មុន ក្រោយ​រក​ឃើញ​ករណី​វិជ្ជមាន​កូ​វីដ​-១៩ ​ជា​បន្តបន្ទាប់​

227

ភ្នំពេញ ៖ ​ក្នុង​រយៈពេល​ប៉ុន្មាន​ថ្ងៃក្រោយ​ព្រឹត្តិការណ៍ ២០​កុម្ភៈ ករណី​វិជ្ជមាន​ដែល​ជា​ការឆ្លង​ក្នុង​សហគមន៍ ​ត្រូវបាន​រកឃើញ​ជាច្រើន ​ជា​បន្តបន្ទាប់​។ ​ការរកឃើញ​ករណី​វិជ្ជមាន​គួរឱ្យ​ព្រួយបារម្ភ​ជា​រៀងរាល់​ថ្ងៃនេះ ​ធ្វើឱ្យ​ទីសាធារណៈ តាម​សួនច្បារ ដងផ្លូវ ​ក៏ដូចជា​ទីផ្សារ ​​ចាប់ផ្ដើម​មាន​ភាព​ស្ងប់ស្ងាត់​ និង​សង្កេតឃើញថា ​មាន​កំណើន​ពាក់​ម៉ាស​ការពារ​ច្រើនជាង​មុន​។

បច្ចុប្បន្ន​កម្ពុជា កំពុង​ជួបប្រទះ​ការឆ្លង​ជំងឺ​កូ​វីដ-​១៩ ជា​លើក​ទី​៣​។ ការ​ឆ្លង​ចូល​សហគមន៍​ ជា​លើក​ទី​៣​នេះ រាជរដ្ឋាភិបាល​បាន​កំណត់​វា ព្រឹត្តិការណ៍​សហគមន៍ ២០ កុម្ភៈ​ និង​បញ្ជាក់​ថា ​វា​ជាការ​ឆ្លង​គួរឱ្យ​ព្រួយបារម្ភ​ស្រប​ពេល​ដែល​រាជរដ្ឋាភិបាល​កំពុង​យកចិត្តទុកដាក់​ក្នុង​ការ​ទប់ស្កាត់​ការចម្លង​ពី​ខាងក្រៅ និង​ប្រទេសជិតខាង​ផងដែរ​។

ការផ្ទុះ​ឡើង​នូវ​ការឆ្លង​ក្នុង​រាជធានី​ភ្នំពេញ​នេះ បានធ្វើឱ្យ​ទីសាធារណៈ​ដូចជា​ ទី​សួនច្បារ​សម្រាប់​ហាត់ប្រាណ តាម​ដងផ្លូវ ​និង​ទីផ្សារ មាន​ភាព​ស្ងប់ស្ងាត់​ ជាង​ពេលវេលា​ធម្មតា​។ ​ទន្ទឹមនឹង​ភាព​ស្ងប់ស្ងាត់​នេះ ​ការពាក់​ម៉ាស​ការពារ​នៅ​ទីតាំង​ទាំងនោះ ​ក៏មាន​ការ​កើនឡើង​ផងដែរ​។ ​ជាក់ស្ដែង​សម្រាប់​ទីផ្សារ​ជា​កន្លែង​ប្រមូលផ្ដុំ ទោះ​មាន​ភាព​ពិបាក​ក្នុង​ការ​រក្សា​គម្លាត​យ៉ាងណាក្ដី ​ក៏​ការ​ពាក់​ម៉ាស​ការពារ​មាន​ភាព​ប្រសើរ​ជាង​មុន​ផងដែរ​។ ​សម្រាប់​ផ្សា​របឹង​កេងកង តាម​ការបញ្ជាក់​របស់​លោក ឯក និមល ​ជា​ប្រធាន​ផ្សារ​លើកឡើងថា ​ចាប់​រាប់​ពី​ព្រឹត្តិការណ៍​សហគមន៍ ​២០​កុម្ភៈ​មកនេះ ​ការ​ពាក់ម៉ាស​ការពារ​ក្នុង​ទីតាំង​ផ្សារ​គឺ​អនុវត្ត​បាន​យ៉ាង​ល្អប្រសើរ ​ហើយ​គណៈកម្មការ​ផ្សារ​ក៏​នៅតែ​ណែនាំ និង​ដាក់​ចេញ​វិធានការ​វាស់​កម្ដៅ ​បាញ់​អាល់កុល​នៅ​តាម​ច្រកចូល​។

ជុំវិញ​ព្រឹត្តិការណ៍​សហគមន៍ ២០​កុម្ភៈ​នេះ ក៏បាន​បង្ក​ឱ្យ គ្រឹះស្ថានសិក្សា​សាធារណៈ ​និង​ឯកជន​ក្នុង​រាជធានី​ភ្នំពេញ និង​ខេត្តកណ្ដាល ​ផ្អាក​ការសិក្សា​ជា​បណ្ដោះអាសន្ន​រយៈពេល​២​សប្ដាហ៍​ និង​ធ្វើឱ្យ​មាន​ការផ្អាក​សារមន្ទីរ រោងភាពយន្ត រោង​សម្តែង​សិល្បៈ​ គ្រឹះស្ថាន​អប់រំ​បណ្តុះ​បណ្តាល​វិជ្ជាជីវៈ ផងដែរ ​ដើម្បី​ចូលរួម​ទប់ស្កាត់​ការ​ចម្លង​ជំងឺ​កូ​វីដ​-19​

គិត​ត្រឹម​ថ្ងៃទី ២២ ខែកុម្ភៈ​ឆ្នាំ ២០២១ កម្ពុ​ជា​មាន​ករណី​ឆ្លង​ជំងឺ​កូ​វីដ​១៩ ​សរុប​ចំនួន ៥៩៣​នាក់ និង​មានការ​ព្យាបាល​ជាសះស្បើយ​ចំនួន ៤៧៥ នាក់​។ ​សម្រាប់​ថ្ងៃទី ២២ កុម្ភៈ​ដដែល កម្ពុជា​រក​ឃើញ​ករណី​វិជ្ជមាន​ចំនួន​ ២៥​ករណី ដោយ​ក្នុង​នោះ​ មាន​ការឆ្លង​ពាក់ព័ន្ធ​ព្រឹត្តិការណ៍​សហគមន៍ ២០ កុម្ភៈ មាន​ចំនួន​រហូតដល់ ២៣​ករណី​៕

អត្ថបទ​៖​គឹម​ហុក